សង្គម និងសេដ្ឋកិច្ច - La Reine Media

អ្នកជីកត្បូងពេជ្រក្រីក្រ ជាង 3ពាន់នាក់ នៅអាហ្វ្រិកខាងត្បូង ហាក់អស់សង្ឃឹមថា “នឹងបានផ្លាស់ប្ដូរជីវភាព”

ប្រជាជនអាហ្វ្រិកខាងត្បូង ជាង 3ពាន់នាក់ ដែលបាន និងកំពុងនាំគ្នាជីក គាស់ដី ក្នុងបំណងស្វែងរកត្បូងមានតម្លៃ ដោយសង្ឃឹមថា នឹងបានផ្លាស់ប្ដូរជីវភាពដោយសារត្បូងពេជ្រ ក៏ប៉ុន្តែ ត្បូងដែលពួកគេរកបាន មានតម្លៃទាបណាស់។ នេះបើតាម Ravi Pillay ដែលជាសមាជិកម្នាក់ នៃក្រុមប្រឹក្សាសេដ្ឋកិច្ច និងទេសចរណ៍ របស់ខេត្ត KwaZulu-Natal។

ក្រុមមន្ត្រីអាហ្វ្រិកខាងត្បូង កាលពីថ្ងៃទី20 ខែមិថុនា បានឱ្យដឹងថា មនុស្សពីគ្រប់ទិសទីក្នុងប្រទេសនេះ បាននាំគ្នាសម្រុកចូលមកកាន់ភូមិ KwaHlathi ដែលស្ថិតនៅក្នុងខេត្ត KwaZulu-Natal ចាប់ពីថ្ងៃទី12 ខែមិថុនា ក្រោយពីគង្វាលសត្វម្នាក់ គាស់បានថ្មចម្លែក ស្រដៀងនឹងត្បូង quartz ដ៏មានតម្លៃ។

«ការពិនិត្យ វាយតម្លៃនានា បានបញ្ជាក់ថា ត្បូងទាំងឡាយដែលត្រូវបានរកឃើញនៅក្នុងភូមិនេះ មិនមែនជាពេជ្រ ដូចដែលមនុស្សជាច្រើនរំពឹងទុក។ តម្លៃរបស់វា មិនទាន់ត្រូវបានកំណត់នៅឡើយ ប៉ុន្តែ បើមាន (តម្លៃ) វាក៏ប្រាកដជាទាបឆ្ងាយ បើធៀបនឹងត្បូងពេជ្រ» Ravi Pillay រៀបរាប់។

នៅតំបន់ជាច្រើន នៃប្រទេសអាហ្វ្រិកខាងត្បូង អត្រាបាត់បង់ការងារ និងភាពក្រីក្រ ដែលមានកម្រិតខ្ពស់ ធ្វើឱ្យពលរដ្ឋជួបការលំបាក និងសង្ឃឹមលើការរុករកត្បូងនៅក្នុងភូមិ KwaHlathi។

Ravi Pillay និយាយថា ថ្វីបើពលរដ្ឋដែលមករកត្បូង បានថយចុះមកនៅត្រឹមប្រហែល 500នាក់ ប៉ុន្តែ រណ្ដៅជម្រៅរហូតដល់ 1ម៉ែត្រ ដែលពួកគេបានបន្សល់ទុក អាចបង្កគ្រោះថ្នាក់ដល់សត្វចិញ្ចឹម។

Ravi Pillay ក៏មានការព្រួយបារម្ភថា ការដែលមនុស្សប្រមូលផ្ដុំច្រើន អាចនាំឱ្យឆ្លងរាលដាលនៃវីរុសCovid-19 ដូច្នេះ អាជ្ញាធរ បានស្នើឱ្យគ្រប់គ្នា ប្រញាប់ចាកចេញ ពុំនោះទេ នឹងអាចត្រូវប៉ូលិសធ្វើអន្តរាគមន៍ បើសិនជាចាំបាច់៕

ប្រភព៖ Guardian
ប្រែសម្រួល៖ បុត្រា

June 21, 2021

Daniel Lee Rose ចាកចេញពី Spur ជាផ្លូវការហើយ

ក្លិបបាល់ទាត់ Watford ដែលទើបតែឡើងមកលេងនៅក្របខ័ណ្ឌលីគកំពូលអង់គ្លេស English Premier League រដូវកាល2021-2022 នេះ បានប្រកាសព័ត៌មាន អំពីការនាំយកកីឡាករខ្សែបម្រើសញ្ជាតិអង់គ្លេសម្នាក់ មករួមក្រុម ដើម្បីត្រៀមខ្លួនប្រកួតប្រជែងក្នុងរដូវកាលថ្មីខាងមុខនេះ។

ខ្សែការពារ Daniel Lee Rose ត្រូវបានក្លិបខាងលើ ផ្តល់កុងត្រារយៈពេល 2ឆ្នាំ ក្រោយពីគេផុតកុងត្រាជាមួយនឹងក្លិប Tottenham Hotspurs ភ្លាមៗ (ចុងខែឧសភាកន្លងទៅ) ដោយការផ្ទេរយកអតីតកីឡាករជម្រើសជាតិអង់គ្លេសរូបនេះ គឺមិនមានតម្លៃខ្លួនឡើយ។

គួរបញ្ជាក់ផងដែរថា Rose ជាកីឡាកររបស់ Spur តាំងពីឆ្នាំ2007 មក និងធ្លាប់ទៅលេងនៅក្លិបផ្សេងក្នុងលក្ខខណ្ឌខ្ចីជើងទៀតផង ជាក់ស្ដែងកីឡាកររូបនេះក៏ធ្លាប់ទៅលេងឱ្យ Watford ម្ដងរួចមកហើយដែរ កាលរដូវកាលឆ្នាំ2007/2009៕

June 21, 2021

Eriksen ប្រកាស នៅតែបន្តអាជីព ទោះមានការព្រមានពីគ្រូពេទ្យក៏ដោយ

Christian Eriksen ខ្សែបម្រើប្រយុទ្ធរបស់ក្លិបបាល់ទាត់ Inter Milan បានរួចផុតពីសេចក្តីស្លាប់ ក្រោយពីហេតុការណ៍ដួលសន្លប់នៅលើទីលានប្រកួត ក្នុងជំនួបបើកឆាក Euro ពេលដាណីម៉ាក ប៉ះហ្វាំងឡង់ ដែលធ្វើឱ្យការប្រកួតត្រូវបានពន្យារពេលអស់ជាច្រើនម៉ោង។

បើតាមការបញ្ជាក់ពីគ្រូពេទ្យរបស់ក្រុមបាល់ទាត់ជម្រើសជាតិ បានឱ្យដឹងថា កីឡាកររូបនេះ មានបញ្ហាបេះដូង ហើយដើម្បីបញ្ចៀសពីហានិភ័យដល់អាយុជីវិត គេគួរតែបញ្ឈប់អាជីពនេះ។

ទោះបីជាបែបនេះក្តី ក្រោយពីភ្ញាក់ពីការសង្គ្រោះបន្ទាន់ Christian Eriksen បាននិយាយទៅកាន់អ្នកគាំទ្រថា រូបគេនឹងនៅតែ នៅជាមួយអ្នកគាំទ្រជានិច្ច ហើយគេនឹងមិនបោះបង់អាជីពនេះចោលត្រឹមនេះឡើយ៕

June 17, 2021

Leicester ឱ្យ Barcelona 20លានផោន យក Philippe Coutinho ទៅអង់គ្លេសវិញ

ខ្សែបម្រើ Philippe Coutinho របស់ក្លិប Barcelona កំពុងតែរង់ចាំទទួលភ្លើងខៀវពីក្លិប Leicester City ដែលកំពុងតែឡើងជើងនៅក្របខ័ណ្ឌកំពូលអង់គ្លេស English Premier League ដើម្បីបានវិលត្រឡប់ទៅអង់គ្លេសវិញ។

ក្លិប Leicester City គ្រោងនឹងយកកីឡាករសញ្ជាតិប្រេស៊ីលរូបនេះ មកលេងនៅ English Premier League វិញ ក្រោយពីកីឡាកររូបនេះ ចំណាយពេលនៅក្លិប Barcelona នៃលីគកំពូលអេស្ប៉ាញ La Liga អស់ជាង 4រដូវកាលទៅហើយ តែហាក់ដូចជាមិនទទួលបានជោគជ័យ អ្វីជាដុំកំភួនសោះឡើយ។

គួររំឭកដែរថា កីឡាករសញ្ជាតិប្រេស៊ីលរូបនេះ មិនបានចូលរួមលេងឱ្យ Barcelona ក្នុងឆ្នាំ2021 នេះទេ បន្ទាប់ពីរងរបួសជង្គង់ធ្ងន់ធ្ងរ កាលពីខែធ្នូ ចុងឆ្នាំកន្លងទៅ ហើយ Barcelona ថែមទាំងចង់លក់កីឡាកររូបនេះចេញ ស្របពេលដែល Leicester ចាប់អារម្មណ៍ និងហ៊ានឱ្យតម្លៃខ្លួនកីឡាកររូបនេះ ដល់ទៅ 20លានផោនទៀតផង៕

June 17, 2021

ជប៉ុន ពាក់ម៉ាស់ ថ្វាយរូបសំណាកព្រះពោធិសត្វ កម្ពស់ជិត 60ម៉ែត្រ

ក្រុមកម្មករនៅប្រទេស ជប៉ុន ត្រូវបានគេបង្គាប់ឱ្យពាក់ម៉ាស ថ្វាយដល់រូបសំណាកព្រះពោធិសត្វ (bodhisattva) ដ៏ធំមួយអង្គ នៅក្នុងខេត្ត Fukushima ក្នុងបំណងបួងសួងសូមឱ្យមហាជំងឺរាតត្បាត Covid-19 ឆាប់ត្រូវបានបញ្ចប់។

កាលពីថ្ងៃទី15 ខែមិថុនា កម្មករចំនួន 4នាក់ បានចំណាយពេល 3ម៉ោង ដើម្បីយកខ្សែពួរ ទាញម៉ាស់ដ៏ធំមួយ ឡើងទៅកាន់ផ្នែកខាងលើនៃរូបសំណាកព្រះពោធិសត្វ កម្ពស់ 57ម៉ែត្រ ដែលស្ថិតនៅបរិវេណវិហារ Houkokuji Aizu Betsuin នៃខេត្ត Fukushima ប្រទេស ជប៉ុន។

ម៉ាស់ដ៏ធំ ដែលត្រូវបានធ្វើឡើងអំពីក្រណាត់សំណាញ់ពណ៌ផ្កាឈូកនេះ មានបណ្ដោយ 5.3ម៉ែត្រ, ទទឹង 4.1ម៉ែត្រ និងទម្ងន់ 35គីឡូក្រាម។ ក្រុមកម្មករ បានអូសម៉ាស់នេះឡើង និងបានពាក់ជិតច្រមុះ និងមាត់របស់រូបសំណាក។

Takaomi Horigane ដែលជាអ្នកគ្រប់គ្រងវិហារ Houkokuji Aizu Betsuin ឱ្យដឹងថា រូបសំណាកព្រះពោធិសត្វនេះ នឹងពាក់ម៉ាស់ រហូតដល់ស្ថានភាព Covid-19 នៅប្រទេស ជប៉ុន ត្រូវបានគ្រប់គ្រងទាំងស្រុង។

រូបសំណាកនេះ ត្រូវបានកសាងកាលពី 33ឆ្នាំមុន ជាមួយនឹងផ្នែកដងព្រះកាយត្រូវបានធ្វើឡើងអំពីឈើ និងមានជណ្ដើររាងគូទខ្យង ដែលអនុញ្ញាតឱ្យគ្រប់គ្នា អាចឡើងទៅដល់ផ្នែកស្មារបស់រូបសំណាក។ ពលរដ្ឋដែលបានមកកាន់វិហារខាងលើនេះ ភាគច្រើនបួងសួងសុំសំណាងល្អ និងសេចក្ដីសុខដល់ទារកក្នុងផ្ទៃ ក៏ដូចជាការឆ្លងទន្លេប្រកបដោយសុវត្ថិភាព៕

ប្រភព៖ Reuters
ប្រែសម្រួល៖ បុត្រា

June 17, 2021

តើបុរសៗយើងដឹងទេ ហេតុអីបានប្រុសៗចាំបាច់ត្រូវប្រើតែផលិតផលថែបំប៉នស្បែកសម្រាប់បុរស?

កាលពីសម័យមុន ការមើលថែទាំស្បែកសម្រាប់កំលោះៗ មិនមែនជារឿងសំខាន់ឡើយ នៅក្នុងបន្ទប់ទឹករបស់បុរសខ្លះ មានតែសាប៊ូ 1ដុំសម្រាប់ដុសខ្លួន និងមុខតែប៉ុណ្ណោះ តែមានអ្នកខ្លះ អាចខ្ចីគ្រីមថូននើរ៍ ឬហ្វូមលាងមុខ របស់ប្រពន្ធមកប្រើ ក៏មានដែរ។ តែបច្ចុប្បន្ននេះ មានផលិតផលថែបំប៉នស្បែកសម្រាប់បុរសចេញមកជាច្រើន ហើយបុរសជាច្រើន ក៏ងាកមកប្រើប្រាស់ផលិតផលទាំងអស់នោះដែរ តែ ក៏នៅតែមានអ្នកខ្លះ នៅសង្ស័យដែរថា តើហេតុអី បានមនុស្សប្រុស ប្រើហ្វូមលាងមុខ ឬគ្រីមថែបំប៉នស្បែករបស់មនុស្សស្រីមិនបាន? ថ្ងៃនេះ ឡារ៉ែន មានចម្លើយសម្រាប់សំណួរនេះ ព្រមទាំងមានហេតុផលមួយចំនួនថា តើហេតុអីបានបុរស គួរតែប្រើផលិតផលថែបំប៉នស្បែកសម្រាប់បុរស មកជម្រាបជូន ដើម្បីឱ្យបាត់ឆ្ងល់ដូចខាងក្រោម៖

1. ដោយសារតែអ័រម៉ូនរបស់មនុស្សភេទប្រុសហ្នឹងឯង

អ្នកណាៗក៏ដឹងដែរថា យើងមានស្បែកខ្លាញ់ ខ្លាំងជាងមនុស្សស្រី ជាពិសេសនៅលើផ្ទៃមុខ នោះគឺ ដោយសារតែអ័រម៉ូនថេសថូស្ទើរ៉ូន ឬអ័រម៉ូនភេទប្រុសហ្នឹងឯង ដែលអ័រម៉ូនមួយនេះ នឹងបង្កើនភាពខ្លាញ់នៅលើផ្ទៃមុខ និងបង្កើតបញ្ហាផ្សេងទៀតតាមមកជាច្រើន ដូច្នេះហើយទើបផលឹតផលថែបំប៉នស្បែកសម្រាប់បុរស ច្រើនតែមានចំណែកផ្សំ ដែលខុសផ្លែកពីរបស់នារីៗ ជាពិសេសហ្វូមលាងមុខ ដែលក្រៅតែពីអាចសម្អាត បានយ៉ាងជ្រៅជ្រះហើយ ម៉យស៍ជើរ៉ៃហ្ស៊ើ ក៏មានតិចជាងដែរ ដែលវានឹងជួយកាត់បន្ថយមូលហេតុរបស់ភាពឡើងខ្លាញ់លើផ្ទៃមុខ បានយ៉ាងល្អ។

2. បុរស មានស្រទាប់ស្បែកក្រាស់ជាង ទើបការមើលថែទាំ មិនដូចគ្នា

ជាទូទៅ ស្បែករបស់មនុស្សប្រុស ច្រើនតែក្រាស់ជាងរបស់មនុស្សស្រី ប្រមាណជា 20 – 30ភាគរយ ដែលអាចនិយាយបានថា នេះជាចំណុចមានប្រៀប ព្រោះស្បែករបស់បុរស អាចធន់នឹងការបំផ្លាញពីពន្លឺថ្ងៃបានខ្លាំងជាង រួមទាំងអាចរក្សាសំណើមបានល្អជាងទៀតផង តែទាំងអស់នេះ ក៏មិនមែនបានន័យថា អ្នកមិនចាំបាច់ត្រូវមើលថែទាំស្បែកដែរ ផ្ទុយទៅវិញ អ្នកចាំបាច់ត្រូវជ្រើសរើសផលឹតផលបំប៉នស្បែក ដែលផលឹតឡើងសម្រាប់បុរសជាពិសេស ដែលនឹងជួយឱ្យស្បែកមានសំណើម និងការពារស្បែករបស់អ្នកពីពន្លឺថ្ងៃ បានយ៉ាងស័ក្តិសមទៀតផង។

3. ជីវិតកណ្តាលថ្ងៃ ដ៏សែនធ្ងន់ធ្ងរ

បុរសជាច្រើន អាចប្រើប្រាស់ពេលវេលា នៅកណ្តាលថ្ងៃបែបពេញទំហឹង មិនថាដោយសារតែអាជីពការងារ ដែលត្រូវទទួលខុសត្រូវ ការលេងកីឡាកណ្តាលថ្ងៃ ឬការងារខ្លះ ដូចជារៀបចំសួនច្បារ ជម្រះស្មៅជាដើម ក៏ជាមូលហេតុមួយ ដែលធ្វើឱ្យស្បែក ត្រូវបំផ្លាញដោយពន្លឺថ្ងៃ និងបរិយាកាសជុំវិញ ដែលអាចបំផ្លាញស្បែកយើងដោយមិនដឹងខ្លួន។ ដូច្នេះហើយ ទើបគ្រីមការពារពន្លឺថ្ងៃ និងផលឹតផលថែបំប៉នស្បែកសម្រាប់បុរស ក្លាយជាវត្ថុចាំបាច់មួយ ព្រោះវាផ្តល់នូវការការពារស្បែករបស់អ្នក បានយ៉ាងពេញទំហឹង។

4. កោរពុកមាត់ ក៏ជាការបំផ្លាញស្បែក មិនស្ទើរដែរ

អ្វីដែលជាគូគ្នា ជាមួយផ្ទៃមុខរបស់បណ្តាបុរសៗយើងនោះ គឺពុកមាត់ហ្នឹងឯង តែបើសិនអ្នកចាំបាច់ត្រូវតែកោរពុកមាត់រាល់ថ្ងៃនោះ ធានាថា ច្បាស់ជាមានបញ្ហាផ្សេងៗកើតឡើងច្រើនមិនខាន ទាំងអាការក្រហាយផ្សា ស្បែកឡើងកន្ទួល ស្បែកស្ងួតនៅត្រង់កន្លែងកោរ និងដែលធ្ងន់ធ្ងរបំផុតនោះគឺ មុននឹងកើតឡើងយ៉ាងពិតប្រាកដ។ អ្នកគួរមើលថែទាំស្បែក ដោយគ្រីមផ្សេងៗ ដែលសម្រាប់ប្រើក្រោយពេលកោរពុកមាត់ហើយផង ដោយសារផលិតផលទាំងនោះ នឹងជួយថែរក្សាស្ថានភាពស្បែក ក្រោយពេលកោរពុកមាត់រួច កាត់បន្ថយការក្រហាយ និងផ្តល់សំណើមដល់ស្បែកបានយ៉ាងល្អ។

5. ការវេចខ្ចប់ ដែលច្នៃម៉ូដឡើងសម្រាប់បុរស

ផលិតផលថែបំប៉នស្បែកប្រភេទខ្លះសម្រាប់បុរស មានគុណសម្បត្តិ និងសារធាតុផ្សំ ដូចគ្នានឹងរបស់ស្ត្រីគ្រប់ប្រការ តែបើសិនជាវាត្រូវផ្ទុកនៅក្នុងដបរូបបេះដូង ពណ៌ផ្កាឈូកដ៏ស្រស់ស្អាត គួរឱ្យស្រឡាញ់នោះ ធានាថា បុរសៗប្រហែលជាមិនទិញយកទៅប្រើជាដាច់ខាត ដូច្នេះហើយទើបអ្នកផលិត បានច្នៃម៉ូដរូបរាងរបស់ផលិតផល ឱ្យមើលទៅរាងស្អាតសង្ហា ឡូយបន្តិច ព្រមទាំងបញ្ជាក់ថា ជាផលិតផលសម្រាប់តែបុរស ដើម្បីឱ្យលោកអ្នកអាចទិញប្រើបានយ៉ាងងាយស្រួល និងហ៊ានប្រើប្រាស់វា រៀងរាល់ថ្ងៃ ដោយមិនអៀនស្រីៗហ្នឹងឯង។

សង្ឃឹមថា ចំណុចណែនាំទាំងអស់ ដែលឡារ៉ែន បានជម្រាបជូនខាងលើនេះ ប្រហែលជាល្មម អាចឱ្យបុរសៗយើង ចាប់ផ្តើមយល់ហើយថា តើហេតុអីបានយើង មិនអាចប្រើផលិតផលខ្លះ រួមជាមួយនារីៗបាន តែយើងអាចជ្រើសរើសប្រើផលិតផល ដែលធ្វើឡើងសម្រាប់តែបុរស និងត្រូវប្រើជាប់ជាប្រចាំទៀតផង ដើម្បីធានាថា ភាពស្រស់សង្ហាឡូយ ច្បាស់ជានៅជាមួយបុរសៗយើង យូរតទៅទៀតមិនខាន៕

June 16, 2021

សំណួរ-ចម្លើយ ដែលបងៗស្ត្រីមេផ្ទះ ត្រូវតែអាន…(ហើយកុំភ្លេចប្រាប់ តៗគ្នាផង)

តើស៊ុតសឆៅ អាចព្យាបាលរបួស ដោយសារការរលាកទឹកក្តៅ បានមែនឬ?
មែន! យកស៊ុតសឆៅ មកលាបលើកន្លែង ដែលរលាកទឹកក្តៅឱ្យសព្វ រួចទុកចោល រហូតដល់វាស្ងួតដោយខ្លួនឯង ហើយទុកចោលមួយសន្ទុះធំទៀត សឹមលាងចេញ។ កន្លែងរលាកនោះ នឹងគ្មានស្នាមក្រហម ឬពងបែកឡើយ តែចំណុចសំខាន់គឺ មុនលាបស៊ុតស ចូរកុំឱ្យកន្លែងរលាកនោះ ប៉ះទឹកត្រជាក់ ឬរបស់អ្វីផ្សេងឱ្យសោះ និងកុំកេះ ឬអេះ ពេលដែលវាជិតស្ងួត ព្រោះនឹងធ្វើឱ្យរបកស្បែក។
តើប្រេងកូឡា អាចកំចាត់ស្នាមស្ករកៅស៊ូ ដែលប្រឡាក់ជាប់ក្រណាត់ បានមែនឬ?
មែន! អាចសម្អាតបាន ដោយការយកប្រេងកូឡា មកដុសចុះឡើងត្រង់កន្លែង ដែលប្រឡាក់ស្នាមស្អិតៗរបស់ស្ករកៅស៊ូ មិនយូរប៉ុន្មានជ័រស្ករកៅស៊ូ នឹងរបូតជ្រុះចេញអស់ ហើយអាចយកទៅបោកគក់សម្អាតដូចធម្មតាបាន។
ដាក់បំពង់បឺតចូលក្នុងដបទឹកប៉េងប៉ោះ នឹងធ្វើឱ្យទឹកប៉េងប៉ោះនោះ ហូរចេញស្រួលមែនឬ?
មែន! ការដាក់បំពង់បឺត ចូលទៅឱ្យដល់បាតដប នឹងធ្វើឱ្យមានខ្យល់ចូលទៅដល់ក្នុងដបបាន ហើយពេលចាក់ ទឹកប៉េងប៉ោះនឹងហូរចេញមកយ៉ាងងាយស្រួល។
យកស្រោមជើងបារ៍ ដាក់ត្រាំក្នុងទឹកអំបិល នឹងធ្វើឱ្យស្រោមជើងបារ៍ មិនងាយរហែកមែនឬ?
មែន! យកទឹកអំបិល 2ពែង លាយជាមួយទឹក 1ធុង ដាក់ត្រាំស្រោមជើងបារ៍ ដែលទើបទិញមកថ្មី រយ:ពេល 3ម៉ោងហើយលាងចេញដោយទឹកស្អាត រួចយកទៅដាក់ហាល ឱ្យស្រក់ទឹកអស់ រហូតស្ងួត នឹងធ្វើឱ្យស្រោមជើងបារ៍នោះ ស្ថិតក្នុងសភាពល្អដដែល ហើយស្វិតជាប់បានយូរ មិនងាយរហែកទៀតផង។
មើមដំឡូងបារាំង អាចបំបាត់ក្លិនខ្ទឹមក្រហម ធុំជាប់ដៃ បានមែនឬ?
មិនពិតទេ! មើមឡូងបារាំងទៅវិញទេ ដែលអាចបំបាត់ក្លិនខ្ទឹមក្រហម ធុំជាប់ដៃបាននោះ។ យកមើមដំឡូងបារាំងឆៅ មកបកសម្បកចេញ ហើយយកមកដុសលើដៃ ដែលមានធុំក្លិនខ្ទឹមក្រហម មួយស្របក់ក្លិនមិនគួរឱ្យបេតីនោះ នឹងរលាយបាត់អស់មិនខាន។
ម្ទេសក្រៀម អាចដេញរុយ បានមែនឬ?
មែន! ពេលហាលត្រីប្រឡាក់ ឬរបស់អ្វីផ្សេងៗ ច្រើនតែមានសត្វរុយមករោម ចូរយកផ្លែម្ទេសក្រៀម 5 – 6គ្រាប់ មកសៀត ឬដាក់ជុំវិញកញ្ច្រែង ដែលដាក់របស់ហាលនោះ ចំហាយក្តៅរបស់ម្ទេស នឹងធ្វើឱ្យសត្វរុយ មិនហ៊ានចូលមកក្បែរ។
ទឹកប៊ីយែ ជួយបន្ធូរខ្ចៅ ដែលរឹតជាប់ណែន ដោយសារច្រែះ បានមែនឬ?
ត្រឹមត្រូវ! ចូរចាក់ស្រោចទឹកប៊ីយែ ទៅលើខ្ចៅ ដែលរឹតជាប់ណែនដោយសារច្រែះនោះបន្តិច រង់ចាំ 2 – 3នាទីក្រោយ ភាពជាអាស៊ីតរបស់ទឹកប៊ីយែ នឹងជួយកម្ចាត់វត្ថុកខ្វក់ៗ និងកម្ទេចច្រែះចេញ ធ្វើឱ្យខ្ចៅនោះ កាន់តែងាយស្រួលមួលឡើង៕

June 16, 2021

Giroud អន់ចិត្តនឹង Mbappe ដែលមិនបោះបាល់ឱ្យគេសោះ

កាលពីពេលថ្មីៗកន្លងទៅនេះ ក្រុមបាល់ទាត់ជម្រើសជាតិបារាំងបានយកឈ្នះ ក្រុមបាល់ទាត់ជម្រើសជាតិប៊ុលការី ដោយលទ្ធផល 3ទល់នឹង0 ក្នុងការប្រកួតមិត្តភាព ដែលធ្វើឡើងនៅលើទឺកដីរបស់បារាំង ។

ទោះជាក្រុមដែលបានទទួលជ័យជម្នះ រកបានដល់ទៅ 3គ្រាប់ក៏ពិតមែន ក៏ប៉ុន្តែកីឡាករខ្សែប្រយុទ្ធជម្រើសជាតិបារាំង Olivier Giroud ហាក់មិនពេញចិត្តប៉ុន្មានឡើយ ចំពោះការលេងលើកនេះ ដោយគេបាននិយាយ ក្រោយពេលបញ្ចប់ការប្រកួតថា គេលេងថ្ងៃនេះ គ្មានអ្នកបោះបាល់ឱ្យសោះ ទោះបីជានៅតំបន់ល្អខ្លាំង យ៉ាងណាក៏ដោយ ។

ការនិយាយបែបនេះ ត្រូវបានគេដឹងថា Olivier Giroud ចង់សំដៅដល់ Mbappe ដោយសារតែការប្រកួតនេះ Mbappe ហាក់រាងកំណាញ់បាល់បន្តិច។ ចំពោះ Mbappe វិញ ទើបតែចេញមុខថ្លែងក្នុងសន្និសីទមួយ ដោយបានឆ្លើយតបទៅអ្នកសារព័ត៌មានថា គេមិនអន់ចិត្តអ្វីឡើយ ដោយសារតែពួកគេលេង ដើម្បីទង់ជាតិបារាំង ដូចនេះវាគ្មានអ្វី ដែលរូបគេត្រូវអន់ចិត្តនឹងមិត្តរួមក្រុមឡើយ៕

June 16, 2021

អតីតកីឡាករជម្រើសជាតិអាមេរិក បណ្តុះកូនខ្មែរម្នាក់ រហូតដល់ជាប់ជម្រើសជាតិអាមេរិក

Jordan Pisey ជាកូនខ្មែរសុទ្ធសាធ រស់នៅសហរដ្ឋអាមេរិក មានអាយុ 22ឆ្នាំ ទើបតែបានជាប់ក្នុងបញ្ជឺកីឡាករលោតទឹក នៃក្រុមជម្រើសជាតិអាមេរិក ដើម្បីត្រៀមចូលរួមក្នុងព្រឹត្តិការណ៍អូឡាពិកឆ្នាំ2021 ដែលនឹងធ្វើឡើងនៅប្រទេសជប៉ុន ក្រោយពីគេបានបំបាក់កីឡាករឆ្នើមអាមេរិកជាច្រើនរូប នឹងឈ្នះមេដាយជាច្រើនពីការប្រកួតក្នុងស្រុក។

ជាមួយទេពកោសល្យល្អខាងកីឡាលោតទឹកនេះ Jordan Pisey ត្រូវបានអតីតកីឡាករជម្រើសជាតិអាមេរិកម្នាក់ យកទៅរស់នៅ នឹងបង្ហាត់ជំនាញកីឡាលោតទឹកនេះ តាំងពី Pisey អាយុ 7ឆ្នាំ ហើយនៅពេលអាយុបាន 12ឆ្នាំ Pisey បានប្រកួតឈ្នះពានរង្វាន់ថ្នាក់ជាតិ លើវិញ្ញាសាលោតទឹកកម្ពស់ 10ម៉ែត្រ ព្រមទាំងបានឈ្នះមេដាយមាស ក្នុងការប្រកួតថ្នាក់ជាតិនៅរដ្ឋ Arizona ទៀតផង រួចហើយក៏បានឈ្នះមេដាយប្រាក់ និងសំរឹទ្ធ នាការប្រកួតថ្នាក់ជាតិ 2ផ្សេងទៀត និងជាពិសេសក្នុងឆ្នាំ2016 នេះ Jordan Pisey ថែមទាំងបានឈ្នះមេដាយសំរឹទ្ធ ក្នុងការប្រកួតហែលទឹកកម្រិតពិភពលោកមួយ នៅប្រទេសព័រតូរីកូទៀតផង។

គួរឱ្យដឹងដែរថា Pisey ធ្លាប់បានមកលេងប្រទេសកម្ពុជា ម្ដងរួចមកហើយ កាលពីឆ្នាំ2016 ដោយធ្លាប់បានជួបជាមួយនឹងប្រធានសហព័ន្ធហែលទឹកកម្ពុជា ដែលនៅពេលនោះរូបគេបាននិយាយថា គេចង់វិលមកជួយក្រុមជម្រើសជាតិកម្ពុជា ដើម្បីដណ្តើមមេដាយ ក្នុងការប្រកួតនៅលើឆាកអន្តរជាតិនាពេលអនាគតទៀតផង៕

June 16, 2021

វិធីធ្វើឱ្យក្រូចពោធិ៍សាត់ ដែលជូរហួញ ក្លាយទៅជាក្រូចផ្អែមវិញ

បើនិយាយពីផ្លែឈើវិញ មនុស្សជាច្រើន ប្រហែលជាមិនភ្លេចនឹក ដល់ផ្លែក្រូចទេមើលទៅ ដោយសារតែរសជាតិ ផ្អែម ក្រអូប ឆ្ងាញ់ល្មម និងសម្បូរទៅដោយវិតាមីន C…តែពេលខ្លះ ក្រូចដែលយើងទិញមកនោះ បែរជាមានរសជាតិជូរហួញ យ៉ាងគ្មានខ្លាចចិត្តអ្នកញ៉ាំបន្តិចសោះតែម្តង ដូច្នេះថ្ងៃនេះ ឡារ៉ែនមានវិធី ធ្វើឱ្យក្រូចជូរ ក្លាយទៅជាក្រូចផ្អែមវិញ មកជម្រាបជូនបងៗស្ត្រីមេផ្ទះ ដូចតទៅ៖

-គ្មានអ្វីពិបាកទេ គ្រាន់តែយកផ្លែក្រូចដែលជូរនោះ ទៅដាក់ត្រាំនៅក្នុងទឹកក្តៅ 40អង្សា ប្រមាណជា 10នាទីប៉ុណ្ណោះ រសជាតិផ្លែក្រូចនោះ នឹងប្រែទៅជាផ្អែមវិញមិនខាន ។

ការពិតទៅ ក្រូចជូរនោះ មិនមែនប្តូររសជាតិទេ គ្រាន់តែរសជាតិជូររបស់វា ត្រូវបានបំផ្លាញចោលអស់ ដោយសារកម្ដៅតែប៉ុណ្ណោះ៕

June 16, 2021

Category: សង្គម និងសេដ្ឋកិច្ច