សង្គម និងសេដ្ឋកិច្ច - La Reine Media

AFC លុបចោល វគ្គជម្រុះ វិសាខា នៅ AFC CUP ដោយឱ្យឡើងទៅវគ្គចែកពូលតែម្តង

ការប្រកួតវគ្គជម្រុះបឋម នៃពានរង្វាន់អាស៊ី AFC Cup 2021 រវាងក្លិបវិសាខា ជាមួយក្លិប Lalenok United របស់ប្រទេសទីម័រខាងកើត ដែលគ្រោងប្រកួតនាពេលខាងមុខនេះ ត្រូវបានលុបចោលហើយ។ នេះបើតាមការកែសម្រួលកម្មវិធីប្រកួត របស់សហព័ន្ធកីឡាបាល់ទាត់ទ្វីបអាស៊ី (AFC) កាលពីថ្មីៗ។

ក្រោយលុបចោលការប្រកួតនេះ ក្រុមទាំង2 គឺ វិសាខា និង Lalenok FC ត្រូវបានដំឡើងឱ្យទៅចូលរួមជាមួយនឹងពូល I តែម្តង ដើម្បីបង្គ្រប់ក្រុមដែលនៅសល់ 2ក្រុមក្នុងពូលនេះ។

ការដំឡើងនេះ ត្រូវបានគេដឹងថា ដោយសារតែក្រុមមកពីហ្វីលីពីនមួយក្នុងពូលនេះ បានឈ្នះវគ្គជម្រុះទៅលេងវគ្គចែកពូល AFC Champions League ម្យ៉ាងទៀត គឺដោយសារតែបញ្ហាកូវីដ-19 ដែលធ្វើឱ្យពាននេះពិបាកក្នុងការរៀបចំប្រកួតវគ្គជម្រុះ៕

ប្រភព ៖ afc

July 9, 2021

ចម្លែក! រលកបោកខ្ទប់ច្រាំង បង្ហាញរូបភាព ដូច មុខមាត់របស់អាទិទេពសមុទ្រ

រលកសមុទ្រដែលមានរូបរាងដូចទៅនឹងមុខមាត់របស់អាទិទេពសមុទ្រ Neptune នៅក្នុងទេវកថា រ៉ូម៉ាំង បានបង្ហាញខ្លួន នៅពេលព្យុះមួយ កំពុងបោកបក់ទៅលើឆ្នេរសមុទ្រស្រុក Sussex ខាងកើត នៃចក្រភពអង់គ្លេស។

អ្នកថតរូប Jeff Overs របស់ទីភ្នាក់ងារសារព័ត៌មាន BBC ថតបានរូបភាពនេះ នៅឯកំពង់ផែ Newhaven កាលពីថ្ងៃទី 6 ខែកក្កដា នៅពេលដែលរលកធំៗ បង្កឡើងដោយព្យុះ កំពុងបោកខ្ទប់ទៅលើទំនប់ឃាំងរលកសមុទ្រ។ រូបភាពនេះ ត្រូវបានថតនៅពេលទឹកសមុទ្រជោរឡើងខ្ពស់ និងខ្យល់មានល្បឿនជាង 80គម/ម៉ោង។

«ទីនេះ បានក្លាយជាកន្លែងដ៏ពេញនិយមសម្រាប់ជាងថតរូប ព្រោះតែសមុទ្រមានខ្យល់ខ្លាំង និងរលកធំៗ បោកខ្ទប់ទំនប់ស្កាត់រលក» Overs រៀបរាប់។ «រលក លាយឡំនឹងខ្យល់ខ្លាំង បោកខ្ទប់ចូលច្រាំង បង្កើតបានជារូបភាពស្រដៀងនឹងមុខមាត់ផ្សេងៗ យ៉ាងចម្លែក»។

ការមើលឃើញមុខមាត់របស់អាទិទេពសមុទ្រ Neptune (អាទិទេព Poseidon នៅក្នុងទេវកថា របស់ ក្រិក) គឺជាឧទាហរណ៍ជាក់ស្ដែងអំពី pareidolia ដែលជារោគសញ្ញានៃការខ្លាចមួយប្រភេទរបស់ផ្លូវចិត្ត ទាក់ទិននឹងមុខមាត់នានា បណ្ដាលឱ្យមនុស្សមើលឃើញរូបភាពចៃដន្យមួយចំនួនថាជា រូបភាពផ្សេងៗ តាមការស្រមើស្រមៃ។

អ្នកថតរូបខាងលើនេះ បានអះអាងថា៖ «នោះគឺជារូបភាពដែលថតត្រង់ពីមុខ ហើយខ្ញុំក៏មិនបានកែរូបថតនេះសោះឡើយ»៕

ប្រភព៖ BBC
ប្រែសម្រួល៖ បុត្រា

July 9, 2021

កសិករចិន ឡាយលក់កសិផល រកបានប្រាក់ខ្ទង់លានដុល្លារអាមេរិក

ឆ្នាំ 2018 Jin Guowei នៅជំពាក់បំណុលគេវ័ណ្ឌកនៅឡើយ និងលក់ផ្លែឈើជូនភ្ញៀវទេសចរណ៍ដែលមកលេងទីក្រុង Lijiang នៃខេត្ត Yunnan ប្រទេសចិន ប៉ុន្តែ បច្ចុប្បន្នគាត់បានក្លាយជាសេដ្ឋីប្រាក់ដុល្លារទៅហើយ។

ជាមួយនឹងរហ័សនាមថា Brother Pomegranate លោក Jin Guowei បច្ចុប្បន្ន គឺជាបុគ្គលល្បីឈ្មោះនៅលើអ៊ីនធឺណិត ដោយមានអ្នកតាមដានជាង 7.3 លាននាក់ និងរកបាន 300 លានយុន (46 លានដុល្លារអាមេរិក) កាលពីឆ្នាំ 2020។ Jin Guowei ធ្លាប់រកបានប្រាក់ 6 លានយុន ក្នុងរយៈពេល 20 នាទី ដោយការលក់ផ្លែទទឹម តាមរយៈការឡាយ (livestream) លើបណ្ដាញសង្គម។

ខាងលើនេះគឺជាការពេញនិយមថ្មីដែលកំពុងផ្ទុះឡើងនៅទីជនបទរបស់ប្រទេសចិន។ កសិករ និងអ្នកជំនួញផ្នែកផលិតផលកសិកម្ម នៅតាមបណ្ដាខេត្តឆ្ងាយៗ នៃប្រទេសចិន កំពុងនាំគ្នាឡាយលក់ផលិតផលដោយផ្ទាល់ ឱ្យអតិថិជននៅទីក្រុង។ ប្រាក់ចំណូលដែលបានមកពីវីដេអូស្ដីអំពីជនបទ នៅលើ Douyin (កំណែក្នុងស្រុករបស់ TikTok) របស់ ByteDance បានកើន 15 ដង បើធៀបនឹងដំណាក់កាលដូចគ្នា កាលពីឆ្នាំ 2020។

កសិករមួយរូបផ្សេងទៀត ដែលមានឈ្មោះថា Guo Chengcheng «ទំនាក់ទំនង» ជាមួយនឹងអ្នកគាំទ្រ Douyin ជាង 2.5 លាននាក់ ពីចំការរបស់ខ្លួន។ នៅពេលផ្ទះរបស់នាងកំពុងប្រមូលផល អ្នកទស្សនាអាចចុចទៅលើតំណភ្ជាប់លើអេក្រង់ ដើម្បីទិញផលិតផល។

Guo លក់កសិផលគ្រប់មុខ តាំងពីល្ពៅប្រភេទតូច រហូតដល់ដើមផ្កាអង្គាសីល ដែលផ្គត់ផ្គង់ដោយប្រជាជនក្នុងភូមិ។ កន្លងមក នាងធ្លាប់លក់ទំនិញនៅលើ WeChat របស់ Tencent ហើយទទួលបានការបញ្ជាទិញប្រហែល 100 លើក ជារៀងរាល់ថ្ងៃ។ បច្ចុប្បន្ន Guo អាចរកបានអតិថិជនរហូតដល់ 50,000 នាក់ រាល់ពេលនាងឡាយលក់ ដែលនេះ ជួយឱ្យនាងរកបានប្រាក់យ៉ាងតិច 9 លានយុន ជារៀងរាល់ខែ។

Guo Chengcheng និង Brother Pomegranate គឺជាផ្នែកមួយនៅក្នុងចំណោមពលរដ្ឋទាំងឡាយដែលត្រលប់ទៅស្រុកកំណើត ក្រោយពីបានរស់នៅ និងធ្វើការនៅទីក្រុងអស់ជាច្រើនទសវត្សរ៍។ បណ្ដាញសង្គម Douyin បានឱ្យដឹងថា 54% នៃ influencer (អ្នកដែលមានឥទ្ធិពលលើបណ្ដាញសង្គម) នៅតាមជនបទ គឺជា ក្រុមយុវវ័យដែលត្រលប់មកពីទីក្រុង។

ការនិយមថ្មីនេះ កាន់តែបង្ហាញយ៉ាងច្បាស់ ចាប់ពីប្រទេសចិន មានវិបត្តិ Covid-19។ ពលរដ្ឋចំណាកស្រុកជាង 23 លាននាក់ បានត្រលប់មកស្រុកកំណើត។ ពេលប្រព័ន្ធគមនាគមន៍របស់ជាតិ ផ្អាកដំណើរការបណ្ដោះអាសន្នកាលពីឆ្នាំទៅ កសិផលនានាត្រូវខូចក្នុងឃ្លាំង ចំណែកអ្នកទិញក៏ត្រូវជាប់ក្នុងផ្ទះ នាំឱ្យតម្រូវការនៃការចម្អិនអាហារនៅផ្ទះ កើនឡើងខ្ពស់ជាងពេលណាៗទាំងអស់។ តម្រូវការទំនិញស្រស់ៗដែលលក់តាមអនឡាញ ក៏កើនឡើងខ្ពស់ ខណៈបណ្ដាញសង្គម និងផ្សារអនឡាញ បង្កភាពងាយស្រួលដល់ការរកស៊ីរបស់កសិករ។

នៅលើផ្សារអនឡាញ Taobao Live របស់ Alibaba មានកសិករជាង 100,000 នាក់ បានឡាយលក់កសិផលប្រមាណ 2.52 លានលើក នៅក្នុងឆ្នាំសារពើពន្ធដែលបានបញ្ចប់កាលពីខែមីនាកន្លងទៅ។ ចំនួនអ្នកឡាយទាក់ទិននឹងកសិកម្មដែលមានមនុស្សតាមដានជាង 10,000 នាក់ នៅលើបណ្ដាញសង្គម Douyin បានកើន 5 ដង រាប់ចាប់ពីឆ្នាំ 2019-2020។

ដើម្បីដឹកជញ្ជូនទំនិញឱ្យអតិថិជន កសិករចិន ប្រើប្រាស់សេវាកម្មដឹកជញ្ជូនរបស់បណ្ដាក្រុមហ៊ុនផ្សារអនឡាញធំៗ ដូចជា JD Logistics ឬ Cainiao របស់ Alibaba ឬក៏ប្រើសេវាកម្មរបស់ SF Express។

ក្រុមអ្នកជំនាញផ្នែកពាណិជ្ជកម្មអនឡាញ និងក្រុមអ្នកមានបទពិសោធន៍ច្រើនខាងការឡាយ បានឱ្យដឹងថា អាថ៌កំបាំងដើម្បីជោគជ័យនៃការឡាយលក់កសិផលរបស់កសិករចិន នោះគឺ ការរួមផ្សំរវាងការនឹករលឹកធម្មជាតិរបស់អ្នកក្រុង ការបាត់បង់ជំនឿទៅលើផ្សារបុរាណ ព្រោះតែបញ្ហាសុវត្ថិភាពនៃទំនិញជាកសិផល រួមនឹងការចូលចិត្តទស្សនាទិដ្ឋភាពស្រស់បំព្រងនៃជនបទ របស់អ្នកទស្សនា៕

ប្រភព៖ Bloomberg
ប្រែសម្រួល៖ បុត្រា

July 9, 2021

តើក្រុមណា មានប្រៀបជាង នៅវគ្គផ្តាច់ព្រ័ត្រ Euro2020 ?

ការប្រកួតពានរង្វាន់ Euro 2020 បានឈានមកដល់វគ្គផ្តាច់ព្រ័ត្រហើយ ក្រោយរកឃើញជើងខ្លាំង 2ក្រុម មកពីវគ្គពាក់កណ្តាលផ្តាច់ព្រ័ត្រ។ ដោយកាលពីយប់ថ្ងៃទី8 ខែកក្កដា ឆ្នាំ2021 កន្លងទៅនេះ ក្រុមតោកំណាចអង់គ្លេស បានយកឈ្នះក្រុមដាណឺម៉ាក ក្នុងលទ្ធផល 2ទល់នឹង1 ក្នុងវគ្គថែមម៉ោង 15នាទី 2ដង ក្រោយស្មើគ្នា 1ទល់នឹង1 នៅវគ្គធម្មតា។

ក្រោយយកឈ្នះ ដាណីម៉ាក ក្រុមអង់គ្លេសនឹងត្រូវឡើងទៅជួបក្រុមខ្លាំង អ៊ីតាលី ដែលមិនដែលចាញ់ទាល់តែសោះ តាំងពីចាប់ផ្តើមប្រកួតមក។ ដោយការប្រកួត នឹងធ្វើឡើងនៅថ្ងៃចន្ទ ទី12 ខែកក្កដា ឆ្នាំ2021 វេលាម៉ោង2 រំលងអធ្រាត្រ។

គួរឱ្យដឹងដែរថា អង់គ្លេសបានខកខានឡើងដល់វគ្គផ្តាច់ព្រ័ត្រ គ្រប់ពានរង្វាន់ទាំងអស់ តាំងពីឆ្នាំ1886មក។ ខណៈដែលអ៊ីតាលី ហាក់មានប្រៀបជាងបន្តិច ក្នុងកំណត់ត្រានេះ ដោយគេធ្លាប់ឈ្នះ World Cup ឆ្នាំ2006 ហើយក្រុមមួយនេះ មិនដែលចាញ់ទាល់តែសោះ តាំងពីខែតុលា ឆ្នាំ2018មក៕

July 9, 2021

មហាសេដ្ឋីទី 9 របស់ពិភពលោក ក្លាយជា «សមាជិកថ្មី» នៃក្រុមមនុស្សដែលមានទ្រព្យច្រើនជាង 100 ពាន់លានដុល្លារ

លោក Steve Ballmer បច្ចុប្បន្ន មានទ្រព្យសម្បត្តិសរុបចំនួន 100.5 ពាន់លានដុល្លារអាមេរិក និងជាអ្នកមានជាងគេលំដាប់ទី 9 នៅក្នុងពិភពលោក។

Steve Ballmer ដែលជាអតីត CEO របស់ក្រុមហ៊ុន Microsoft ទើបតែបានក្លាយជាមហាសេដ្ឋីទី 9 ដែលមានឈ្មោះនៅក្នុងក្លឹបមហាសេដ្ឋីដែលមានទ្រព្យ ខ្ទង់ 100,000,000,000 ដុល្លារអាមេរិក។ យោងតាម Bloomberg Billionaires Index លោក Ballmer បច្ចុប្បន្ន មានទ្រព្យសរុបចំនួន 100.5 ពាន់លានដុល្លារអាមេរិក តិចជាង 1 ពាន់លានដុល្លារ បើធៀបនឹងអ្នកមានជាងគេលំដាប់ទី 8 លោក Warren Buffett។

លោក Steve Ballmer បានចូលធ្វើការឱ្យក្រុមហ៊ុន Microsoft ចាប់ពីឆ្នាំ 1980 និងជាបុគ្គលិកទី 30 របស់ក្រុមហ៊ុននេះ បន្ទាប់ពីត្រូវលោក Bill Gates បញ្ចុះបញ្ចូលឱ្យបោះបង់ការសិក្សានៅសាកលវិទ្យាល័យ Stanford។ លោក Steve Ballmer ក្រោយមក ក៏ត្រូវបានតែងតាំងជាប្រធាន ហើយបន្ទាប់មកទៀតគឺជា CEO ជំនួសលោក Gates កាលពីឆ្នាំ 2000។ ឆ្នាំ 2014 លោក Steve Ballmer បានចាកចេញពី Microsoft បន្ទាប់ពីបាននៅជាមួយក្រុមហ៊ុននេះអស់រយៈពេលជាង 3 ទសវត្សរ៍។

មហាសេដ្ឋី Bill Gates និងមហាសេដ្ឋី Steve Ballmer

មហាសេដ្ឋី Steve Ballmer បច្ចុប្បន្នមានអាយុ 65 ឆ្នាំ និងមានក្លឹបបាល់បោះមួយដែលមានឈ្មោះថា Los Angeles Clippers។ តាំងពីដើមឆ្នាំ 2021 មកដល់បច្ចុប្បន្ន ទ្រព្យសម្បត្តិរបស់លោក Ballmer បានកើនថែម 20.1ពាន់លានដុល្លារ។

នៅក្នុងចំណោមមហាសេដ្ឋីចំនួន 9 រូប ដែលមានទ្រព្យច្រើនជាង 100,000,000,000 ដុល្លារ គឺមានរហូតដល់ 7 រូប ដែលរកស៊ីមានបានដោយសារវិស័យបច្ចេកវិទ្យា។ ក្នុងនោះ ស្ថាបនិក Amazon លោក Jeff Bezos នៅតែជាអ្នកមានជាងគេបង្អស់ក្នុងពិភពលោក ដោយមានទ្រព្យចំនួន 212 ពាន់លានដុល្លារ។

ទន្ទឹមនឹងអតីត CEO របស់ Microsoft មហាសេដ្ឋីបច្ចេកវិទ្យាមួយរូបទៀត ក៏នឹងមានឈ្មោះនៅក្នុងក្លឹបអ្នកមានទ្រព្យច្រើនជាង 100 ពាន់លានដុល្លារ ឆាប់ៗនេះ នោះគឺលោក Larry Ellison។ សហស្ថាបនិករបស់ Oracle រូបនេះ បច្ចុប្បន្នមានទ្រព្យចំនួន 98.6 ពាន់លានដុល្លារ និងជាអ្នកមានជាងគេលំដាប់ទី 10 ក្នុងពិភពលោក៕

ប្រភព៖ Bloomberg
ប្រែសម្រួល៖ បុត្រា

July 8, 2021

ស្ងាត់! មានដឹងទេថា រដូវកាលថ្មីនេះ Ronaldo ទៅលេងនៅក្លិបណា?

Christiano Ronaldo កីឡាករខ្សែប្រយុទ្ធ របស់ក្លិបបាល់ទាត់ Juventus បានប្រកាសលាមិត្តរួមក្រុមរបស់ខ្លួន ក្រោយបញ្ចប់រដូវកាល2021 កាលពីពេលថ្មីៗនេះ ដោយមិនបានឈ្នះពាន Seria A ឡើយ ហើយថែមទាំងធ្លាក់ ត្រឹមវគ្គ 16ក្រុមចុងក្រោយនៃយុទ្ធនាការ Champions League ទៀតផង ដោយបានឈ្នះត្រឹមពានលំដាប់ទី3 មួយតែប៉ុណ្ណោះ។

ក្រោយពេលប្រកាសលា កីឡាកររូបនេះ ត្រូវបានគេគិតថា អាចនឹងទៅចូលរួមជាមួយនឹងក្លិប Manchester United ឬក៏ក្លិប Sporting នៅឯស្រុកកំណើតវិញ តែមកទល់ពេលនេះ រូបគេប្រហែលជាមិនអាចទៅណាបានឡើយ ដោយសារតែក្លិបទាំង2 គ្មានលទ្ធភាពនាំយករូបគេទៅ ក្នុងរដូវកាលដែលញាំញីដោយជំងឺកូវីដ-19 នេះ ឡើយ។

នៅពេលនេះ ភ្នាក់ងាររបស់ Ronaldo ត្រូវបានគេដឹងថា កំពុងតែចរចាជាមួយ Juventus ដដែល ដើម្បីបន្តកុងត្រានៅក្លិបមួយនេះមួយយរយៈទៀតសិន មុននឹងគិតបន្តនៅរដូវកាលក្រោយ៕

July 7, 2021

Barcelona លែងចង់ទុក Philippe Coutinho ទៀតហើយ

Philippe Coutinho ត្រូវបានក្លិបបាល់ទាត់ FC Barcelona ប្រកាសលក់ចេញភ្លាមៗ ស្របពេលដែលក្លិបត្រូវការលុយច្រើនភ្លាមៗ ដើម្បីស្វែងរកកីឡាករចំណូលថ្មីមកជួយក្រុមក្នុងរដូវកាលថ្មី។

ចំពោះតម្លៃនៃការលក់ចេញកីឡាកររូបនេះ ត្រូវបានក្លិប Barcelona ដាក់តម្លៃធូរថ្លៃខ្លាំងបំផុត ពោលគឺត្រឹមតែ 21លានដុល្លារប៉ុណ្ណោះ ខណៈដែលក្លិប Barcelona ទិញយកមកក្នុងតម្លៃដល់ទៅជាង 150លានដុល្លារឯណោះ។

មូលហេតុដែលធ្វើឱ្យរូបគេធ្លាក់ថ្លៃខ្លាំងបែបនេះ គឺដោយសារតែគេ មិនស្ថិតនៅក្នុងជម្រើសដំបូងរបស់គ្រូបង្វឹកឡើយកាលពីរដូវកាលមុន ដោយសារតែបញ្ហារបូសជង្គង់រ៉ាំរ៉ៃញាំញី បូករួមទាំងពេលបង្ហាញខ្លួន ក៏ធ្វើមិនសូវបានល្អទៀត៕

July 7, 2021

Barcelona ប្រកាសថា Messi នឹងនៅបន្តជាមួយខ្លួន

ក្លិបបាល់ទាត់ Barcelona បានផុតកុងត្រាជាមួយនឹងកីឡាករខ្សែប្រយុទ្ធជួរមុខរបស់ខ្លួន Lionel Messi ហើយ កាលពីថ្ងៃទី ០១ ខែកក្កដា ឆ្នាំ ២០២១ កន្លងទៅនេះ ។ ថ្វីបើកុងត្រាចាស់ផុតក៏ពិតមែន ក៏ប៉ុន្តែកីឡាកររូបនេះ មិនទាន់ចុះហត្ថលេខាលើកុងត្រាថ្មីរបស់គេនៅឡើយទេ ។

ទាក់ទងនឹងបញ្ហានេះ ប្រធានក្លិប FC Barcelona បានចេញមុខបកស្រាយ ថាក្លិប និង Messi កំពុងដំណើរការរឿងនេះហើយ គ្រាន់តែមិនទាន់សម្រេចជាផ្លូវការ ។ លោកបានបន្តថា Messi នឹងមិនទៅណាឡើយ តែគ្រាន់តែវាមិនទាន់អាចប្រកាសជាផ្លូវការបាន ។ លោកក៏បានអំពាវនាវទៅដល់អ្នកគាំទ្រក្លិប និង កីឡាកររូបនេះថា សូមកុំភ័យថាក្លិបនឹងបាត់បង់ Messi ។

Lionel Messi គឺជាកីឡាករលេងបានយូរបំផុតរបស់ក្លិប Barcelona ដែលកំពុងតែលេងឱ្យក្លិបមួយនេះ ដោយគេបានចូលមកលេងនៅទីនេះតាំងពីឆ្នាំ ២០០០ ដែលគិតមកដល់ពេលនេះ គឺមានរយៈពេល ២១ ឆ្នាំពេញហើយ ៕

ប្រភព ៖ dailymail

July 7, 2021

“អាណាចក្រពាណិជ្ជកម្ម” របស់មហាសេដ្ឋី Jeff Bezos

នៅពេល Jeff Bezos ចាកចេញពីតំណែង CEO កាលពីថ្ងៃទី 5 ខែកក្កដា ឆ្នាំ 2021 ក្រុមហ៊ុនយក្ស Amazon ដែលលោកបានកសាងឡើង កំពុងតែរីកមាឌលឿនជាងពេលណាៗទាំងអស់។

ក្នុងអំឡុង 27 ឆ្នាំ លោក Jeff Bezos បានប្រែក្លាយ Amazon ទៅជាក្រុមហ៊ុនដ៏ធំមួយក្នុងពិភពលោក ដែលមានអំណាច និងឥទ្ធិពលយ៉ាងសម្បើម នៅក្នុងវិស័យជាច្រើន។ ទ្រព្យសម្បត្តិរបស់ Jeff Bezos និងក្រុមហ៊ុន Amazon ក៏បានកើនឡើងយ៉ាងឆាប់រហ័សក្នុងរយៈពេលប៉ុន្មានឆ្នាំកន្លងទៅថ្មីៗនេះ។

ក្រៅពីការដណ្ដើមបានជោគជ័យក្នុងវិស័យពាណិជ្ជកម្មអនឡាយ ក្រុមហ៊ុន Amazon ក៏ទទួលបានជោគជ័យយ៉ាងត្រចះត្រចង់ក្នុងវិស័យជាច្រើនទៀត ក្នុងនោះមានដូចជាសេវាកម្ម កុំព្យូទ័រពពក (cloud computing) កម្សាន្ត និងសេវាផ្សាយពាណិជ្ជកម្ម។

ចាប់ពីថ្ងៃទី 5 ខែកក្កដា ឆ្នាំ 2021 ក្រោយពីបានប្រគល់តំណាង CEO ឱ្យ Andy Jassy ដើម្បីក្លាយជាប្រធានក្រុមហ៊ុន មហាសេដ្ឋី Jeff Bezos នឹងឈានចូលដល់ជីវភាពថ្មី ហើយលោកនឹងចំណាយពេលវេលាច្រើនជាងមុន ទៅលើកិច្ចការស្រាវជ្រាវអវកាស កិច្ចការមនុស្សធម៌ ទិញអចលនទ្រព្យ និងនាវាទេសចរណ៍។

ធ្វើជំនួញក្នុងវិស័យជាច្រើន

ក្រុមហ៊ុនស្រាវជ្រាវ eMarketer បានឱ្យដឹងថា Amazon គ្រប់គ្រងផ្នែកលក់រាយអនឡាញ ប្រមាណ 41% ក្នុងចំណោមផលិតផលលក់រាយតាមអនឡាញសរុបរបស់ សហរដ្ឋអាមេរិក។ ប៉ុន្តែ Amazon ក៏បាននាំមុខគេក្នុងវិស័យសេវាកម្មកុំព្យូទ័រពពក និងជា «មហាអំណាច» មួយក្នុងវិស័យផ្សាយពាណិជ្ជកម្ម ដែលប្រកួតប្រជែងនឹង Google និង Facebook ផងដែរ។ Amazon ក៏វាយលុកទៅក្នុងវិស័យផ្ដល់សេវាកម្មអនឡាញ និងផលិតផលឆ្លាតវៃ។

ការជ្រើសរើសបុគ្គលិក

Amazon បានជ្រើសរើសបុគ្គលិកបន្ថែម ជាង 500,000 នាក់ នៅជុំវិញពិភពលោក នាឆ្នាំ 2020 ហើយក្នុងឆ្នាំបន្តបន្ទាប់ទៀត ក្រុមហ៊ុននេះ អាចយកឈ្នះ Walmart ដើម្បីក្លាយជាអ្នកជ្រើសរើសបុគ្គលិកច្រើនជាងគេបង្អស់នៅ សហរដ្ឋអាមេរិក។

ដើមឆ្នាំ 2021 នេះ Amazon បានជ្រើសរើសបុគ្គលិកបន្ថែមជិត 4,000 នាក់ទៀត។ បច្ចុប្បន្ន ក្រុមហ៊ុននេះ មានបុគ្គលិកការិយាល័យចំនួនជាង 130,000នាក់ ក្នុងចំណោម 950,000 នាក់ របស់ខ្លួន ដែលកំពុងធ្វើការនៅ សហរដ្ឋអាមេរិក។

ជោគជ័យនៅ Hollywood

Amazon បានចាប់ផ្ដើមចូលប្រលូកក្នុងវិស័យឧស្សាហកម្មភាពយន្តកាលពីឆ្នាំ 2010 តាមរយៈ Amazon Studios។ បច្ចុប្បន្ន ពួកគេគឺជាផលិតកម្ម និងជាអ្នកផ្គត់ផ្គង់ភាពយន្តដែលមានឈ្មោះល្បីល្បាញ។ ខ្សែភាពយន្តរបស់ Amazon ដែលទទួលបានជោគជ័យច្រើនជាងគេ មានដូចជា រឿង “The Marvelous Mrs. Maisel”, “Manchester by the Sea” និង “Sound of Metal” ជាដើម។

គម្រោងវិនិយោគដទៃ

មហាសេដ្ឋី Bezos មានគម្រោងហោះទៅកាន់ទីអវកាស នៅថ្ងៃទី 20 ខែកក្កដា ខាងមុខ។ លោក ក៏នឹងផ្ដោតទៅលើកិច្ចការមនុស្សធម៌ អាកាសធាតុច្រើនជាងមុនផងដែរ។ លោក Bezos គឺជាមហាសេដ្ឋីលំដាប់ទីមួយក្នុងពិភពលោក ដោយមានទ្រព្យប្រមាណ 200 ពាន់លានដុល្លារអាមេរិក នេះបើតាម Bloomberg Billionaires Index៕

ប្រភព ៖ WSJ
ប្រែសម្រួល ៖ បុត្រា

July 7, 2021

Kylian Mbappe ប្រកាសដើរចេញពី PSG ហើយ

មកទល់ពេលនេះ ខ្សែប្រយុទ្ធ Kylian Mbappe បានប្រកាសថា គេលែងចង់លេងឱ្យក្លិបនៅក្នុងប្រទេសបារាំងទៀតហើយ។ កីឡាករដ៏ល្អ ដែលបានជួយឱ្យបារាំងឈ្នះពាន World Cup កាលពីឆ្នាំ2018 នេះ ថែមទាំងបាននិយាយផងដែរថា រូបគេមិនចង់បន្តកុងត្រាថ្មី ជាមួយ PSG ទៀតឡើយ។

ប៉ុន្តែ មកដល់ពេលនេះ PSG មិនទាន់សម្រេចចិត្តលក់ Mbappe នៅឡើយ ដោយសារតែក្លិបនេះ នឹងប្រថុយ ចំណាយពេល 6ខែ ទៅមុខទៀត ដើម្បីបន្តបញ្ចុះបញ្ចូល ឱ្យកីឡាកររូបនេះ ចុះកុងត្រាថ្មីបន្តទៀត។

កីឡាករ Kylian Mbappe បានរងសម្ពាធជាច្រើន ក្រោយពីមិនអាចជួយ ឱ្យក្រុមជម្រើសជាតិបារាំងឡើងទៅកាន់វគ្គ 8ក្រុមចុងក្រោយនៃពានរង្វាន់ Euro 2020 ក្រោយចាញ់បាល់ប៉េណាល់ទី ក្រុមស្វ៊ីស ខណៈដែល Mbappe គឺជាអ្នកដែលស៊ុតបាល់ចុងក្រោយ មិនចូល៕

July 7, 2021

Category: សង្គម និងសេដ្ឋកិច្ច