សង្គម និងសេដ្ឋកិច្ច - La Reine Media

Raphaël Varane ត្រូវក្លិបមកពីអង់គ្លេសមួយនេះ ចាប់អារម្មណ៍ខ្លាំង

ក្លិបបាល់ទាត់ Manchester United កំពុងតែមានវិបត្តិខ្សែប្រយុទ្ធ ដោយក្រុមមួយនេះ កំពុងតែសម្លឹងមើលខ្សែការពារលំដាប់ពិភពលោកមួយចំនួន មកបំពេញទម្រង់របស់ខ្លួនដែលខ្វះខាតកាលពីរដូវកាលមុន ។

Raphaël Varane ត្រូវបានក្លិបមួយនេះ ដាក់គោលដៅ ដើម្បីនាំមកក្នុងពេលឆាប់ៗខាងមុននេះ ។ ដោយក្នុងនោះក្លិបបាល់ទាត់បិសាចក្រហមមួយនេះ បានស្នើរលុយចំនួន ៥០ លានដុល្លារ ដើម្បីត្រៀមទុកក្នុងការចរចារទិញកីឡាកររូបនេះ ។

Raphaël Varane គឺជាកីឡាករខ្សែការពារកណ្តាលដ៏រឹងមាំមួយរូប របស់ Real Madrid ដែលមានវ័យទើបតែ ២៨ ឆ្នាំតែប៉ុណ្ណោះ តែគេមានបទពិសោធន៍ច្រើនមែនទែន ដោយធ្លាប់ជួយឱ្យក្រុមស្តេចស Real Madrid និង ក្រុមជម្រើសជាតិបារាំងលើកពានយ៉ាងច្រើនសន្ធឹកសន្ធាប់ ៕

July 14, 2021

ក្រុមហ៊ុនចិន ដើរទិញដីបរទេស បានច្រើនជាងគេក្នុងពិភពលោក

ដីធ្លីជិត 6.5 លានហិកតា នៅជុំវិញពិភពលោក ត្រូវបានក្រុមហ៊ុន ចិន ទិញ នៅក្នុងរយៈពេល 10 ឆ្នាំកន្លងទៅនេះ។

បណ្ដាក្រុមហ៊ុន ចិន កំពុងដើរទិញដីនៅពាសពេញពិភពលោក ក្នុងនោះ ភាគច្រើននៅតំបន់អាស៊ី និងអាហ្វ្រិក។ ទំហំផ្ទៃដីដែលបណ្ដាក្រុមហ៊ុន ចិន បានទិញ ឬជួល ក្នុងអំឡុង 1 ទសវត្សរ៍កន្លង ស្មើនឹងផ្ទៃដីសរុបរបស់ប្រទេស ស្រីលង្កា ឬប្រទេស លីទុយអានី (Lithuania) និងធំជាងឆ្ងាយ បើធៀបនឹងផ្ទៃដីដែលក្រុមហ៊ុនប្រទេសដទៃបានទិញ ឬជួល។

Land Matrix ដែលជាអង្គការតាមដានបញ្ហាដីធ្លីនៅអឺរ៉ុប បានឱ្យដឹងថា បណ្ដាក្រុមហ៊ុន ចិន ដណ្ដើមបានសិទ្ធិគ្រប់គ្រងដីទំហំ 6.48 លានហិកតា សម្រាប់វិស័យកសិកម្ម រុក្ខកម្ម និងរុករករ៉ែ នៅពាសពេញពិភពលោក ចាប់ពីឆ្នាំ 2011 ដល់ឆ្នាំ 2020។ តួលេខនេះ ខ្ពស់ជាងឆ្ងាយ បើធៀបនឹងផ្ទៃដីសរុបដែលបណ្ដាក្រុមហ៊ុន អង់គ្លេស (1.56 លានហិកតា), អាមេរិក (860,000 ហិកតា) និង ជប៉ុន (420,000 ហិកតា) កំពុងកាន់កាប់។

ការដែលក្រុមហ៊ុន ចិន ដើរទិញដីនៅបរទេសយ៉ាងរហ័សបែបនេះ គឺដើម្បីឆ្លើយតបនឹងតម្រូវការក្នុងស្រុកដែលចេះតែកាន់តែខ្ពស់ ដោយសារសេដ្ឋកិច្ចរីកចម្រើនខ្លាំងរបស់ប្រទេសចិន។ វិធីសាស្ត្រនេះ ជួយឱ្យពួកគេមានស្ថិរភាពជាងមុន ទាក់ទិននឹងប្រភពធនធានធម្មជាតិ នៅពេលប្រភពផ្គត់ផ្គង់របស់ពិភពលោក ត្រូវបានរឹតបន្តឹង។

មកដល់បច្ចុប្បន្ន គេឃើញមានវិធានការទប់ទល់នឹងការរកស៊ីរបស់បណ្ដាក្រុមហ៊ុន ចិន ខាងលើ។ កាលពីខែមិថុនា ឆ្នាំ 2021 សភាជប៉ុន បានអនុម័តច្បាប់ថ្មីមួយ ដើម្បីរឹតបន្តឹងលើការកំណត់នានា ចំពោះការប្រមូល និងប្រើប្រាស់ដីនៅតំបន់ដែលត្រូវបានចាត់ទុកថា សំខាន់ដល់សន្តិសុខជាតិ។

ច្បាប់ដែលសំដៅលើប្រទេស ចិន នេះ ត្រូវបានរៀបរៀងឡើងដើម្បីទប់ស្កាត់ការជួញដូរដីធ្លីដែលគួរឱ្យសង្ស័យនានារបស់បណ្ដាក្រុមហ៊ុនបរទេស។ ជាក់ស្ដែង មានករណីកម្លាំងបរទេសមួយចំនួន បានកាន់កាប់ដីនៅក្បែរមូលដ្ឋានការពារដែនអាកាសរបស់ ជប៉ុន នៅតំបន់ Chitose នៃខេត្ត Hokkaido៕

ប្រភព៖ Nikkei
ប្រែសម្រួល៖ បុត្រា

July 13, 2021

ម៉ាស៊ីនខួងផ្លូវរថភ្លើងក្រោមដីខ្នាតយក្ស ទម្ងន់ 3,000 តោន ត្រៀមខ្លួនរួចរាល់ហើយ

ប្រទេសចិន៖ ម៉ាស៊ីនខួងដីខ្នាតយក្ស ធំបំផុត ដែលត្រូវបានផលិតឡើងដោយប្រទេស ចិន ត្រូវបាននាំចេញពីរោងចក្រ នៅក្នុងខេត្ត Hunan កាលពីថ្ងៃទី 10 ខែកក្កដា ឆ្នាំ 2021។

ឧបករណ៍ដែលមានឈ្មោះថា Jinxiu នេះ គឺជាម៉ាស៊ីនសម្រាប់ខួងជាផ្លូវរូងក្រោមដី។ Jinxiu មានបណ្ដោយប្រវែង 135 ម៉ែត្រ, ទទឹង 12.79 ម៉ែត្រ និងទម្ងន់រហូតដល់ 3,000 តោន។

វិស្វកររបស់ក្រុមហ៊ុន ឧស្សាហកម្មធុនធ្ងន់ សាងសង់ផ្លូវដែក ចិន (CRCHI) ឱ្យដឹងថា៖ ក្បាលរបស់ម៉ាស៊ីនខួងនេះមានធ្មេញប្រភេទធំ សរុប 8 ជួរ ហើយធ្មេញនីមួយៗ មានអង្កត់ផ្ចិត 19 អ៊ីញ (48 សម)។

(ក្នុងវីដេអូខាងលើនេះ គឺជា សកម្មភាពសាងសង់ផ្លូវក្រោមដី ដោយប្រើប្រាស់ម៉ាស៊ីនខួងខ្នាតយក្ស)

Jinxiu ប្រៀបបានទៅនឹងមហាយក្សដែលមានធ្មេញយ៉ាងរឹងមាំ អាចខួងដី និងថ្មបានដោយងាយ។ ម៉ាស៊ីននេះ នឹងត្រូវបានប្រើប្រាស់ក្នុងពេលឆាប់ៗខាងមុខ នៅក្នុងការសាងសង់ផ្លូវដែក នៅក្នុងខេត្ត Sichuan ភាគនិរតីនៃប្រទេសចិន៕

ប្រភព៖ CCTV Plus
ប្រែសម្រួល៖ បុត្រា

July 13, 2021

លោកយាយ វ័យ 94ឆ្នាំ គ្រងឈុតកូនក្រមុំជាលើកដំបូង ក្រោយគេងស្រមៃមក 70ឆ្នាំ

លោកយាយ បានស្លៀកឈុតកូនក្រមុំជាលើកដំបូង ក្រោយគេងស្រមៃអស់ 70ឆ្នាំ ព្រោះតែការរើសអើងជាតិសាសន៍ពណ៌សម្បុរ កាលពីអតីតកាល ធ្វើឱ្យមិនបានស្លៀកឈុតអាពាហ៍ពិពាហ៍ ដូចដែលខ្លួននឹកសង្ឃឹម។

ការបានគ្រងឈុតកូនក្រមុំ ក្នុងថ្ងៃរៀបការ គឺជាក្ដីស្រមៃដ៏ធំធេងរបស់នារីគ្រប់រូប រួមទាំងក្ដីស្រមៃរបស់ “ម៉ាថា មែ អូហ្វ៊ីលៀ មូន ថាក់ឃើរ” លោកយាយស្បែកខ្មៅ អាយុ 94ឆ្នាំ មកពីរដ្ឋអាឡាបាម៉ា សហរដ្ឋអាមេរិកផងដែរ តែគួរឱ្យសោកសៅបំផុត ដែលនៅថ្ងៃត្រូវរៀបការ លោកយាយបែរជាត្រូវបានអាជ្ញាធររារាំង រើសអើងមិនឱ្យគ្រងឈុតកូនក្រមុំ ដូចដែលខ្លួនឯងនឹកសង្ឃឹមបាន។

លោកយាយ ថាក់ឃើរ រៀបការជាមួយស្វាមី ក្នុងឆ្នាំ1952 ដែលក្នុងអំឡុងពេលនោះ មានការបែងចែកពណ៌សម្បុរ និងរើសអើងជាតិសាសន៍យ៉ាងខ្លាំងក្លា ទើបធ្វើឱ្យស្ត្រីស្បែកខ្មៅ មិនបានទទួលការអនុញ្ញាត ឱ្យចូលហាង ដើម្បីជួលសម្លៀកបំពាក់ឈុតអាពាហ៍ពិពាហ៍បានឡើយ ដោយហេតុនេះហើយ ទើបលោកយាយត្រូវស្លៀកឈុតផ្សេង ដែលមានពណ៌ខៀវចាស់ ដើម្បីចូលពិធីមង្គលការរបស់ខ្លួនជំនួសវិញ។

ទោះជាពេលវេលា កន្លងផុតទៅជិត 70ឆ្នាំហើយក្ដី តែលោកយាយ ថាក់ឃើរ នៅតែនឹកស្រមៃ ចង់គ្រងឈុតកូនក្រមុំជានិច្ច ហើយថ្ងៃមួយ នៅពេលដែលលោកយាយអង្គុយទស្សនាឈុតឆាករៀបការនៅក្នុងខ្សែភាពយន្តរឿង “Coming to America” ជាមួយ “អ៊ែងជើឡា ស្ត្រូសៀរ” ដែលជាចៅស្រី លោកយាយក៏ខ្សិបប្រាប់នាងថា ចង់សាកល្បងស្លៀកឈុតកូនក្រមុំ ដូចនៅក្នុងកុនឱ្យបានម្ដង។

ក្រោយពីបានឮសេចក្ដីប្រាថ្នារបស់លោកយាយហើយ ស្ត្រូសៀរ ក៏សម្រេចចិត្តធ្វើឱ្យលោកយាយថាក់ឃើរ ភ្ញាក់ផ្អើល ដោយការណាត់លោកយាយទៅហាងជួលឈុតអាពាហ៍ពិពាហ៍ ហើយមិនត្រឹមតែប៉ុនហ្នឹងទេ នាងថែមទាំងជួលជាងតុបតែងមុខ មកជួយបន្ថែមភាពស្រស់ស្អាតជូនលោកយាយទៀតផង។

នៅទីបំផុត ថ្ងៃដែលទន្ទឹងរង់ចាំ ក៏មកដល់ នៅពេលដែលលោកយាយ បានសាកល្បងស្លៀកឈុតកូនក្រមុំពណ៌សដូចក្ដីបំណង…ភ្លាមៗនោះ នៅពេលដែលលោកយាយ បានឃើញខ្លួនឯងនៅក្នុងកញ្ចក់ ក៏ញញឹមឡើងយ៉ាងស្រស់ និងឈរថតរូបយ៉ាងមានសេចក្ដីសុខ ធ្វើឱ្យមនុស្សម្នា ដែលនៅជុំវិញទីនោះ រំភើបចិត្ត រលីងរលោងទឹកភ្នែកគ្រប់ៗគ្នា។

“អ្នកទាំងអស់គ្នា ដឹងទេ? ខ្ញុំមិនអាចបង្ហាញចេញមកទាំងអស់បានថា តើវាពិសេសប៉ុនណាឡើយ តែវាវិសេសខ្លាំងណាស់! ខ្ញុំមានអារម្មណ៍ថា ដូចខ្លួនឯងកំពុងជិតបានរៀបការអ៊ីចឹង ខ្ញុំមិនចង់ដោះឈុតហ្នឹងចេញវិញសោះ”៕

ប្រភព៖ timesnownews, Facebook
រៀបរៀងដោយអ្នកគ្រូ ស.សមចិន្ដា

July 13, 2021

អាមេរិក ត្រូវការបុគ្គលិកផ្នែកសំណង់ 1 លាននាក់ ៖ ប្រាក់ខែខ្ពស់ តែពិបាករកកម្មករ

ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដងៗ ក្រោយការវាយប្រហាររបស់វីរុស COVID-19។

Matthew Messer ជញ្ជូនផ្ទាំងសូឡានៅលើដំបូលផ្ទះមួយកន្លែងរបស់អតិថិជន នៅឯ Long Island នៃទីក្រុង New York ក្រោមកំដៅថ្ងៃ 38 អង្សា ក្នុងខែមិថុនា។ Messer គឺជាថៅកែនៃក្រុមហ៊ុន New York Solar Maintenance (ជំនាញជួសជុលផ្ទាំងសូឡា) ប៉ុន្តែ បច្ចុប្បន្ន គាត់ត្រូវចេញទៅធ្វើការជាមួយក្រុមបច្ចេកទេសរបស់ខ្លួនជារៀងរាល់ថ្ងៃ នៅពេលអាជីវកម្មចាប់ផ្ដើមកក្រើនជាថ្មី។

ក្រោយរលក COVID-19 តម្រូវការកម្លាំងពលកម្ម កើនឡើងឆាប់រហ័ស

«នេះមិនមែនជាវិធីល្អបំផុតក្នុងការប្រើប្រាស់ពេលវេលារបស់ខ្ញុំ។ ប៉ុន្តែ នោះគឺជាអ្វីដែលចាំបាច់ត្រូវធ្វើ» លោក Messer និយាយអំពីថ្ងៃដែលគាត់ត្រូវធ្វើការនៅលើដំបូលផ្ទះ។ នេះក៏ព្រោះតែម្ចាស់អាជីវកម្មរូបនេះ រកបុគ្គលិកមិនបាន។ ក្រុមហ៊ុនរបស់លោក ជួលបុគ្គលិកចំនួន 3 កម្រិត ក្នុងនោះក៏មានផ្នែកបច្ចេកទេសផងដែរ ប៉ុន្តែ ក្រុមហ៊ុនកំពុងប្រឈមនឹងបញ្ហារួមនៅក្នុងវិស័យសំណង់ នោះគឺបញ្ហាខ្វះបុគ្គលិក ដោយសារតែតម្រូវការរើសបុគ្គលិកក្នុងវិស័យនេះ កំពុងកក្រើកឡើងវិញ បន្ទាប់ពីការវាយប្រហាររបស់ COVID-19។

ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការទៅវិញ។ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដង។

តម្រូវការផ្នែកសាងសង់ និងជួសជុលផ្ទះ កំពុងកើនឡើង នៅពេលទីផ្សារលំនៅឋាន ងើបឡើងវិញ ចំណែកមនុស្សជាច្រើន ត្រូវធ្វើការនៅផ្ទះ។ យោងតាមសមាគមកម្មករនិងអ្នកម៉ៅការសំណង់ របស់ សហរដ្ឋអាមេរិក «ក្នុងវិស័យមួយដែលធ្លាប់តែខ្វះកម្លាំងពលកម្មតាំងពីមុន COVID-19 បណ្ដាក្រុមហ៊ុនសំណង់ នឹងត្រូវការបុគ្គលិកចំនួន 430,000 នាក់ ក្នុងឆ្នាំនេះ និង 1 លាននាក់ទៀតនៅក្នុងរយៈពេល 2 ឆ្នាំខាងមុខ ដើម្បីឆ្លើយតបនឹងតម្រូវការទីផ្សារការងារ»។

ដំណោះស្រាយ៖ ផ្ដល់ប្រាក់ខែច្រើនជាងមុន ដើម្បីទាក់ទាញបុគ្គលិក

នៅពេល Matthew Messer ចាប់ផ្ដើមដឹងថា មានបញ្ហាខ្វះបុគ្គលិក គាត់ក៏យល់ថា ខ្លួនត្រូវតែប្រញាប់ដំឡើងឈ្នួល ដើម្បីរក្សាកម្លាំងប្រកួតប្រជែង។ បុគ្គលិកដែលនៅសេះសល់របស់លោក កំពុងត្រូវក្រុមហ៊ុនផ្សេងៗ តាម «ចែចង់»។ ក្នុងអំឡុង 4 ខែកន្លង លោក Messer បានដំឡើងប្រាក់ឈ្នួលរហូតដល់ 40% ធៀបនឹងប្រាក់ឈ្នួលមុននេះ។

Messer និយាយថា៖ «ខ្ញុំឱ្យប្រាក់ឈ្នួលចាប់ពី 18 ដល់ 22 ដុល្លារ ក្នុង 1 ម៉ោង ប៉ុន្តែ ពុំមានអ្នកណាមកដាក់ពាក្យធ្វើការទាល់តែសោះ។ ខ្ញុំក៏ដំឡើងថ្លៃឈ្នួលដល់ 23 ដុល្លារ តែ នៅតែមិនអាចរកបានបុគ្គលិក។ ខ្ញុំបន្តដំឡើងរហូតដល់ 25 ដុល្លារ ទើបឃើញមានអ្នកមកដាក់ពាក្យខ្លះ។ នេះគឺជាការដំឡើងថ្លៃឈ្នួលខ្ពស់គួរសម ប៉ុន្តែ ដើម្បីអាជីវកម្មរីកចម្រើន ខ្ញុំចាំបាច់ត្រូវការជ្រើសរើសបុគ្គលិកឱ្យបាន»។

យោងតាមនាយកដ្ឋានស្ថិតិកម្លាំងពលកម្មរបស់ សហរដ្ឋអាមេរិក បុគ្គលិកនៅភោជនីយដ្ឋានម្នាក់ អាចរកប្រាក់បាន 18.23 ដុល្លារ/ម៉ោង ខណៈដែលបុគ្គលិកសំណង់ម្នាក់ អាចរកបាន 32.86 ដុល្លារ/ម៉ោង៕

ប្រភព៖ CNN
ប្រែសម្រួល៖ បុត្រា

July 13, 2021

ម្ចាស់ផ្ទះអូឡាំពិក មិនអនុញ្ញាត ឱ្យមានទស្សនិកជន ចូលរួមទស្សនាផ្ទាល់ ជាដាច់ខាត

ដោយសារប្រឈមនឹងការស្ទុះឡើងនៃករណីឆ្លងជំងឺកូវីដ-19 រដ្ឋាភិបាលជប៉ុន ដែលជាម្ចាស់ផ្ទះនៃព្រឹត្តិការណ៍កីឡាអូឡាំពិករដូវក្ដៅ បានសម្រេចចិត្តកាលពីចុងសប្តាហ៍កន្លងទៅ ដោយបានប្រកាសដាក់ទីក្រុងតូក្យូ ក្នុងភាពអាសន្នសាជាថ្មី ក្នុងអំឡុងពេលនៃការប្រកួតកីឡាអូឡាំពិកតែម្តង។

ព្រឹត្តិការណ៍មហាកីឡាអូឡាំពិក ឆ្នាំ2020 ដែលត្រូវបានលើកមកធ្វើនៅឆ្នាំ2021 ចាប់ពីថ្ងៃទី23 ខែកក្កដា រហូតដល់ថ្ងៃទី8 សីហា ឆ្នាំ2021នេះ នឹងត្រូវស្វាគមន៍អត្តពលិកច្រើនជាង 1ម៉ឺននាក់ ដោយមានវិញ្ញាសាប្រកួតដល់ទៅ 339វិញ្ញាសា ក្នុងប្រភេទកីឡាករទាំង33 ដែលត្រូវដាក់ឱ្យប្រកួត។

ការដាក់ទីក្រុង ក្នុងភាពអាសន្នជាថ្មីម្ដងទៀតរបស់ជប៉ុនលើកនេះ ថ្វីបើមិនតឹងតែងខ្លាំងដូចបណ្តាប្រទេសដទៃ នៅលើពិភពលោក ដោយមានត្រឹមតែការណែនាំ ឱ្យហាងលក់នានា ត្រូវឆាប់បិទការបម្រើសេវាកម្មក្ដី ប៉ុន្តែគណៈកម្មការរៀបចំកម្មវិធីប្រកកួតកីឡាអូឡាំពិក ត្រូវប្រឈមមុខនឹងការលំបាកមួយទៀត ដោយការប្រកួតត្រូវប្រព្រឹត្តដោយការបិទទ្វារ គ្មានទស្សនិកជនឱ្យចូលរួមឡើយ មិនមែនឱ្យចូលពាក់កណ្តាល ដូចសេចក្តីសម្រេចកាលពីខែមិថុនា ឆ្នាំ2021នោះទេ៕

July 13, 2021

(វីដេអូ) – អ្នកក្លាហាន ប្រថុយស្លាប់ អង្គុយផឹកកាហ្វេលើផ្លូវដែក ដើម្បីបញ្ឈប់ដំណើររថភ្លើង

តុកាហ្វេ និងកៅអី ត្រូវបានរៀបចំដាក់នៅកណ្ដាលផ្លូវរថភ្លើង ហើយបុរសជា «អ្នកក្លាយហាន» ម្នាក់ អង្គុយជក់បារី ធ្វើព្រងើយ បើទោះជាអ្នកបើកបររថភ្លើង ខំប្រឹងចាប់ហ្វ្រាំង និងបរជិតមកដល់ហើយក្ដី។ ហេតុការណ៍នេះ បានកើតឡើងកាលពីថ្ងៃទី 22 ខែឧសភា ឆ្នាំ 2021 នៅឯ Casablanca នៃប្រទេស ម៉ារ៉ុក។

នៅក្នុងវីដេអូ គេឃើញតុ និងកៅអី ត្រូវបានគេដាក់កណ្ដាលផ្លូវដែក។ បន្ទាប់មក បុរសម្នាក់ក៏បានបង្ហាញខ្លួន និងដើរទៅអង្គុយលើកៅអីយ៉ាងក្លាហាន ស្របពេលដែលកញ្ចែរបស់រថភ្លើង បន្លឺឡើងកងរំពង និងតម្រង់មកដល់។ យ៉ាងនេះក៏ដោយ អ្នកក្លាហានរូបនេះ ហាក់មិនបានអើពើអ្វីទាំងអស់ រួមទាំងការស្លាប់ដែលស្ថិតនៅចំពោះមុខ។ ជំនួសមកវិញ បុរសនេះ បែរជាអុជបារី និងអង្គុយជក់ធ្វើដូចគ្មានរឿងអ្វីកើតឡើង ខណៈអ្នកបម្រើ នាំយកភេសជ្ជៈមកឱ្យ។ រថភ្លើងក៏បានចាប់ហ្វ្រាំងទាន់ពេល នៅពីក្រោយខ្នងអ្នកដំណើរចម្លែកនេះ។

សមត្ថកិច្ចក្នុងតំបន់ ក្រោយមកក៏កំណត់បានអត្តសញ្ញាណរបស់បុរសដែលបានរារាំងដំណើររបស់រថភ្លើងនេះ។ M.T ដែលជាពលរដ្ឋម្នាក់នៅក្នុងទីក្រុង Casablanca ត្រូវបានចាប់ខ្លួន រួមជាមួយនឹងមនុស្ស 2 នាក់ទៀត ក្នុងនោះមានម្នាក់ជាអ្នកថតវីដេអូ។ ពួកគេម្នាក់ៗ ត្រូវបានពិន័យដាក់ពន្ធនាគាររយៈពេល 2 ឆ្នាំ។ ដោយឡែក M.T ត្រូវបានពិន័យជាប្រាក់ 4,500 ដុល្លារអាមេរិក បន្ថែមពីលើការចាប់គុក 2 ឆ្នាំ ព្រោះតែបានបង្កការខូចខាតដល់ក្រុមហ៊ុនផ្លូវដែក៕

ប្រភព៖ News in 24
ប្រែសម្រួល៖ បុត្រា

July 12, 2021

(វីដេអូ)-មហាសេដ្ឋី Richard Branson ហោះហើរទៅកាន់ទីអវកាសលើកដំបូង ដោយជោគជ័យ

មហាសេដ្ឋី Richard Branson សហស្ថាបនិកនៃក្រុមហ៊ុនអវកាស Virgin Galactic ទើបតែទទួលបានជោគជ័យក្នុងការហោះហើរទៅកាន់ទីអវកាសជាលើកដំបូង ដែលនេះត្រូវបានគេចាត់ទុកថាជា ការបើកផ្លូវសម្រាប់ការរីកចម្រើនរបស់វិស័យទេសចរណ៍អវកាស។

ក្រោយការធ្វើដំណើរប្រហែល 1 ម៉ោង ជើងហោះហើរដែលដឹកមហាសេដ្ឋី Richard Branson បានចុះចតដោយសុវត្ថិភាព នៅលើព្រលានយន្តហោះនៅ New Mexico សហរដ្ឋអាមេរិក។ ជើងហោះហើរនេះក៏មានមនុស្សយ៉ាងច្រើនតាមដាន ទាំងនៅលើអ៊ីនធឺណិត ទាំងនៅលើដីផ្ទាល់។

ក្រុមអ្នកអវកាស នៅក្នុងយានអវកាសរបស់ Virgin Galactic

នៅលើកម្ពស់ប្រហែល 14 គម យានអវកាសបានផ្ដាច់ខ្លួន ហើយរ៉ុក្កែតក៏ត្រូវបានបញ្ឆេះ ដើម្បីនាំក្រុមអវកាសចរ ឡើងទៅកាន់កម្ពស់ 85.9 គម និងបានស្ថិតនៅក្នុងស្ថានភាពគ្មានទម្ងន់ជាច្រើននាទី មុននឹងវិលត្រលប់មកកាន់ផែនដី។ ក្រោយការចុះចតភ្លាម មហាសេដ្ឋី Richard Branson បានប្រាប់ថា នេះគឺជា «បទពិសោធន៍គ្មានពីរ»។

ការហោះហើរខាងលើនេះ គឺជា ជើងហោះហើរសាកល្បងចុងក្រោយមួយ របស់ Virgin Galactic មុនពេលបើកដំណើរការសេវាកម្មទេសចរណ៍អវកាស ក្នុងឆ្នាំ 2022។ ក្រៅពីមហាសេដ្ឋី Richard Branson ដំណើរទេសចរណ៍អវកាសនេះ ក៏មានបុគ្គលិករបស់ Virgin Galactic ចំនួន 3 រូប នៅក្នុងបន្ទប់អវកាសចរ ដើម្បីវាយតម្លៃលើបទពិសោធន៍ និងអ្នកបើកបរចំនួន 2 នាក់ នៅក្នុងបន្ទប់បើកបរ។

នេះគឺជាបេសកកម្មសំខាន់ នៅក្នុងមហិច្ឆតាធ្វើពាណិជ្ជកម្មលើវិស័យទេសចរណ៍អវកាស របស់ក្រុមហ៊ុន Virgin Galactic ដែលត្រូវបានបង្កើតឡើងតាំងពីឆ្នាំ 2004។ មកដល់បច្ចុប្បន្ន ក្រុមហ៊ុននេះ លក់សំបុត្របានប្រហែល 600 សំបុត្រ ដល់អតិថិជនដែលបានបញ្ជាទិញជាមុន ក្នុងតម្លៃប្រមាណ 250,000 ដុល្លារ ក្នុង 1 សំបុត្រ៕

ប្រភព៖ Reuters
ប្រែសម្រួល៖ បុត្រា

July 12, 2021

Microsoft ផ្ដល់ប្រាក់ឧបត្ថម្ភ 1,500 ដុល្លារ ដល់បុគ្គលិកគ្រប់រូប

ខ្ទង់ប្រាក់ឧបត្ថម្ភនេះ អនុវត្តសម្រាប់គ្រប់បុគ្គលិករបស់ក្រុមហ៊ុន Microsoft ទាំងនៅ សហរដ្ឋអាមេរិក ទាំងនៅទូទាំងសកលលោក។

នៅក្នុងសេចក្ដីកំណត់ចំណាំអំពីកិច្ចការផ្ទៃក្នុងមួយរបស់ Microsoft ដែល The Verge ទទួលបាន បង្ហាញថា ប្រាក់ឧបត្ថម្ភមួយលើកនេះគឺជា «ការកត់សម្គាល់សម្រាប់របាយការណ៍ហិរញ្ញវត្ថុប្រចាំឆ្នាំមួយ ប្រកបដោយភាពចម្លែក និងពោរពេញដោយឧបសគ្គ ដែល Microsoft ទើបតែសម្រេចបាន»។

នាយិការងផ្នែកធនធានមនុស្សរបស់ Microsoft អ្នកស្រី Kathleen Hogan ឱ្យដឹងថា បុគ្គលិករបស់ Microsoft នៅទូទាំងពិភពលោក រាប់ចាប់ពីថ្នាក់ក្រោមនៃតំណែងអនុប្រធានក្រុមហ៊ុន ដែលធ្វើការមកដល់ថ្ងៃទី 31 ខែមីនា ឆ្នាំ 2021 ក្នុងនោះ រួមទាំងបុគ្គលិកក្រៅម៉ោងធ្វើការ និងបុគ្គលិកធ្វើការស៊ីម៉ោង ក៏នឹងទទួលបានប្រាក់ឧបត្ថម្ភនេះ។

បច្ចុប្បន្ន Microsoft មានបុគ្គលិកសរុបចំនួន 175,508 នាក់ នៅទូទាំងសកលលោក ប៉ុន្តែ បុគ្គលិករបស់ LinkedIn, GitHub និង ZeniMax មិនទទួលបានប្រាក់ឧបត្ថម្ភនេះទេ បើទោះ Microsoft ជាអ្នកគ្រប់គ្រងក៏ដោយ។ ដូច្នេះ ជាសរុប Microsoft នឹងចំណាយប្រហែល 200 លានដុល្លារ សម្រាប់ការឧបត្ថម្ភនេះ។ 200 លានដុល្លារអាមេរិកនេះ មិនទាន់ស្មើនឹងប្រាក់ចំណេញដែល Microsoft រកបានក្នុងរយៈពេល 2 ថ្ងៃនៅឡើយ។

កន្លែងសម្រាប់បុគ្គលិក មួយកន្លែងរបស់ Microsoft នៅទីក្រុងវ៉ាស៊ីងតោន

បច្ចុប្បន្ន នៅលើផ្សារហ៊ុននៅ សហរដ្ឋអាមេរិក មានក្រុមហ៊ុនតែ 2 ប៉ុណ្ណោះ ដែលមានតម្លៃមូលធន (capitalization value) លើសពី 2 ម៉ឺនកោដិ ឬ 2 លានលាន (2,000,000,000,000) ដុល្លារអាមេរិក។

កន្លងទៅថ្មីៗនេះ ក្រៅពី Microsoft ក៏មានក្រុមហ៊ុនជាច្រើន បានផ្ដល់ប្រាក់ឧបត្ថម្ភបែបនេះដល់បុគ្គលិក ក្នុងនោះមានដូចជា Facebook (1.000 ដុល្លារ/បុគ្គលិកម្នាក់), Amazon (បន្ថែមប្រាក់សម្រាប់ការឈប់ថ្ងៃបុណ្យ 300 ដុល្លារ/ម្នាក់) និងក្រុមហ៊ុន BT (1.000 ផោន/ម្នាក់)។ល។

គិតចាប់ពី Covid-19 បានបង្ហាញវត្តមាន រហូតមកដល់បច្ចុប្បន្ន ក្រុមហ៊ុន Microsoft រកបានប្រាក់ចំណូលប្រមាណ 160 ពាន់លានដុល្លារ ដោយសារផលិតផល និងសេវាកម្ម មានទីផ្សារជាងមុន៕

ប្រភព៖ The Verge
ប្រែសម្រួល៖ បុត្រា

July 9, 2021

ឆ្មា3Dយក្ស ផុសឡើង កណ្ដាលផ្លូវបំបែកឈីនជូគុ ដូចឆ្មាមែនទែនបំផុត រាយមន្តស្នេហ៍ដាក់អ្នកស្រឡាញ់សត្វ

កាលពីថ្ងៃទី7 កក្កដា CNN និង sora news24 បានរាយការណ៍ថា អ្នកទីក្រុងតូក្យូ បាននាំគ្នាភ្ញាក់ផ្អើលនឹងរូបភាពសត្វឆ្មា3D ដ៏ធំមួយ ដែលបង្ហាញខ្លួនឡើងនៅក្នុងផ្ទាំងផ្សាយពាណិជ្ជកម្ម នៃអេក្រង់ LED កណ្ដាលផ្លូវបំបែកជា4 ឈិនជូគុ មជ្ឈមណ្ឌលសបភីង កណ្ដាលទីក្រុងតូក្យូ នៃប្រទេសជប៉ុន ទាក់ទាញចំណាប់អារម្មណ៍ ពីមនុស្សម្នាដែលធ្វើដំណើរទៅមក និងក្នុងពិភពអនឡាញ តាំងពីមិនទាន់ដល់ថ្ងៃបើកបង្ហាញខ្លួនជាផ្លូវការទៅទៀត។

Cross Shinjuku Vision អ្នកផលិតរូបភាពសត្វឆ្មាយក្ស ធ្វើជាតារាណែនាំផលិតផលនេះ គឺដើម្បីប្រូម៉ូតពីទីតាំងដាក់ឱ្យជួលផ្ទាំងផ្សាយពាណិជ្ជកម្ម ដែលជាអេក្រង់ LED ដែលមានភាពកោង ទំហំ 154ម៉ែត្រការ៉េ ប្រដាប់បំពងសំឡេងគុណភាពខ្ពស់ រូបភាពច្បាស់កម្រិត 4K ដែលផ្ដល់រូបភាពច្បាស់ដូចរបស់ពិត បង្ហាញពីរូបភាពសត្វឆ្មា ដើរលេងទៅមក នៅពីលើទីក្រុងតូក្យូ និងស្រែកយំម៉េវ។

រូបភាពសត្វឆ្មា សម្លឹងមើលចុះមកខាងក្រោម ហាក់ដូចជាវា ប្រុងលោតចុះមកគ្រប់ពេលវេលា ជារូបភាពវីដេអូ3D ដែលទាំងគួរឱ្យស្រឡាញ់ និងគួរឱ្យខ្លាចប៉ុនៗគ្នា ជាពិសេស នៅពេលដែលសត្វឆ្មាដ៏ប៉ឹនឆ្ងល់នោះ សម្លឹងចំមុខយើង។

វីដេអូ នឹងចាប់បញ្ចាំងចន្លោះពីម៉ោង 7.00នាទី ដល់ម៉ោង 1.00នាទី ដោយបង្ហាញរូបភាពសត្វឆ្មា បញ្ចេញកាយវិការក្នុងឥរិយាបថផ្សេងៗពេញ 1ថ្ងៃ ចាប់ផ្ដើមតាំងពីពេលភ្ញាក់ពីដេក ដោយនៅពេលព្រឹក និងពេលរសៀល សត្វឆ្មាក្រោកឈរឡើង និងបញ្ចេញសំឡេងម៉េវៗទៅកាន់មនុស្សម្នាដែលដើរទៅដើរមក លុះដល់ពេលព្រលប់ សត្វឆ្មានឹងទម្លាក់ខ្លួនដេកវិញ ក្នុងឥរិយាបថយកក្បាលកើយបាតជើង។

ទោះជាការឃោសនាផ្សាយពាណិជ្ជកម្មសត្វឆ្មាយក្សនេះ មិនទាន់បង្ហាញខ្លួនជាផ្លូវការ រហូតទាល់តែដល់ថ្ងៃទី12 កក្កដាខាងមុខក្ដី តែមានការសាកល្បងផ្សព្វផ្សាយតាមរលកធាតុអាកាសតាំងពីខែកន្លងមករួចទៅហើយ ធ្វើឱ្យសត្វឆ្មាឈិនជូគុ រាយមន្តស្នេហ៍ រហូតល្បីល្បាញនៅក្នុងបណ្ដាញសង្គមអនឡាញ រហូតដល់អ្នកលេងបណ្ដាញសង្គមជាច្រើន នាំគ្នាបញ្ចេញយោបល់ថា គួរឱ្យស្រឡាញ់ និងកំពុងភ្ញាក់ផ្អើលរំភើបញាប់ញ័រចំពោះតិចណូឡូជីថ្មីមួយនេះ៕

July 9, 2021

Category: សង្គម និងសេដ្ឋកិច្ច