សង្គម និងសេដ្ឋកិច្ច - La Reine Media

Karina (Aespa) បន្តយកឈ្នះលើ Jennie (Black Pink) ដោយដណ្ដើមបាន No.1 នៃតារាងចំណាត់ថ្នាក់លើភាពល្បីឈ្មោះ សម្រាប់ខែកក្កដា

Karina ទទួលបានចំណាត់ថ្នាក់ No.1 ពីរលើកបន្តបន្ទាប់ នៅលើតារាងចំណាត់ថ្នាក់លើភាពល្បីល្បាញផ្ទាល់ខ្លួននៃសមាជិកទាំងឡាយរបស់បណ្ដាក្រុមចម្រៀងស្រីកូរ៉េខាងត្បូង។ Karina (카리나) គឺជាតារាចម្រៀងនៅ កូរ៉េខាងត្បូង របស់ផលិតកម្ម SM Entertainment។ នាងគឺជាប្រធានក្រុម និងជាអ្នករាំសំខាន់របស់ក្រុមចម្រៀងស្រី Aespa។

កាលពីថ្ងៃទី 18 ខែកក្កដា វិទ្យាស្ថានស្រាវជ្រាវពាណិជ្ជកម្ម កូរ៉េខាងត្បូង បានបញ្ចេញតារាងចំណាត់ថ្នាក់ភាពល្បីល្បាញនៃខែនេះ សម្រាប់សមាជិកក្រុមចម្រៀងស្រីនានា ដែលកំពុងធ្វើសកម្មភាព។ ទិន្នន័យរបស់តារាងចំណាត់ថ្នាក់ ត្រូវបានកំណត់ដោយយោងទៅតាមស្ដង់ដាមួយចំនួន ដូចជា កម្រិតនៃការចូលរួមរបស់អ្នកប្រើប្រាស់ កម្រិតនៃការគ្របដណ្ដប់លើបណ្ដាញផ្សព្វផ្សាយ សន្ទស្សន៍នៃបណ្ដាញផ្សព្វផ្សាយ និងការយល់ឃើញរបស់សាធារណជន។ ទិន្នន័យខាងលើ ត្រូវបានប្រមូលចាប់តាំងពីថ្ងៃទី 18 មីថុនា ដល់ថ្ងៃទី 1 កក្កដា។

តារាចម្រៀង Karina របស់ក្រុម Aespa រក្សាបានចំណាត់ថ្នាក់លេខមួយ នៅក្នុងតារាងចំណាត់ថ្នាក់ ដោយសន្ទស្សន៍នៃភាពល្បីល្បាញស្មើនឹង 3,648,118 ពិន្ទុ (ថយចុះ 0.56% ធៀបនឹងខែមុន)។ ឃ្លាដែលមានចំណាត់ថ្នាក់ខ្ពស់ នៅក្នុងការវិភាគពាក្យគន្លឹះ រួមមាន «Next Level», «concert», «ទាក់ទាញ» និង «ដូចឆ្មា» ។ល។ ការវិភាគលើអត្រាវិជ្ជមាន-អវិជ្ជមាន ទៅលើ Karina បង្ហាញថា អត្រាប្រតិកម្មវិជ្ជមាន ស្មើនឹង 64.02%។

ចំណែក Jennie (Black Pink) តាមពីក្រោយ ដោយជាប់ចំណាត់ថ្នាក់លេខពីរ ជាមួយនឹងពិន្ទុ 3,613,982 (ថយចុះ 0.19% ធៀបនឹងខែមិថុនា)។ Jennie គឺជា idol ស្រីតែម្នាក់គត់ ដែលមិនទាន់ធ្លាក់ចេញពី top 10 នៃតារាងចំណាត់ថ្នាក់នេះ នៅក្នុងរយៈពេល 18 ខែបន្តបន្ទាប់។

រីឯ Yu Jeong (Brave Girls) បានឡើងដល់ចំណាត់ថ្នាក់លេខបី ជាមួយនឹងសន្ទស្សន៍នៃភាពល្បីឈ្មោះស្មើនឹង 3,354,420 ពិន្ទុ កើន 44.13% ធៀបនឹងខែមិថុនា។

ចំណាត់ថ្នាក់ចំនួនពីរចុងក្រោយនៅក្នុង top 5 គឺបានទៅលើ Joy នៃក្រុម Red Velvet (3.279.802 ពិន្ទុ) និង Yuna នៃក្រុម Brave Girls (3,161,880 ពិន្ទុ)៕

July 19, 2021

ឧបករណ៍ខ្នាតតូច បំពាក់លើជញ្ជាំង អាចរកឃើញ COVID-19 ដល់ 8 ប្រភេទ ក្នុងពេលតែមួយ

ឧបករណ៍នេះ មានផ្ទុកអង្គញាណជីវសាស្ត្រ (Biological Sensors) អាចរកឃើញ COVID-19 តាមរយៈខ្យល់ដង្ហើមរបស់អ្នកវិជ្ជមាននឹងវីរូស នៅក្នុងកន្លែងធ្វើការ និងអាចរកឃើញវ៉ារ្យ៉ង់ (វីរូសបំប្លែងខ្លួនថ្មី) របស់ COVID-19 ចំនួន 8 ប្រភេទ។

ក្រុមអ្នកវិទ្យាសាស្ត្រនៃវិទ្យាស្ថានបច្ចេកវិទ្យារ៉ូយ៉ាល់មែលប៊ន (RMIT) និងវិទ្យាស្ថានបឺរណែត របស់ អូស្ដ្រាលី គឺជាអ្នកបានអភិវឌ្ឍឧបករណ៍បច្ចេកវិទ្យានេះ។

ឧបករណ៍ទំនើប ដែលរួមមាន អង្គញាណជីវសាស្ត្រនេះ មានរូបរាងតូច ប្រើប្រាស់បច្ចេកទេសមីក្រូអេឡិចត្រូនិកប្រកបដោយភាពបត់បែន និងបច្ចេកវិទ្យា nano សិប្បនិម្មិត ដែលមានសមត្ថភាពវិភាគដឹងច្បាស់អំពីប្រភេទវីរុស តាមរយៈដង្ហើមរបស់មនុស្សនៅតាមទីតាំងជាក់លាក់។ អ្នកប្រើប្រាស់ នឹងទទួលបានឈីបមួយបន្ថែមទៀត សម្រាប់ផ្ទុកទិន្នន័យឯកជន។

TS Alasdair Wood សមាជិកម្នាក់របស់ក្រុមស្រាវជ្រាវ ឱ្យដឹងថា អង្គញាណស្វែងរកវីរុសក្នុងបរិស្ថាន ដែលពិភពលោកកំពុងអភិវឌ្ឍ នាបច្ចុប្បន្ន មានទំហំធំ ស៊ីថាមពលច្រើន និងអាចរកឃើញតែវីរុសមួយប្រភេទ។ អង្គញាណរបស់ក្រុមខាងលើ មានរូបរាងតូច អាចពាក់នៅលើដៃ ឬដាក់ភ្ជាក់នឹងជញ្ជាំងនៃបន្ទប់ធ្វើការ ឬមន្ទីរពេទ្យ និងអាចរកឃើញវីរុសបំប្លែងខ្លួនថ្មីរហូតដល់ 8 ប្រភេទឯណោះ។

ក្រុមអ្នកវិទ្យាសាស្ត្រខាងលើ បន្ថែមថា ឧបករណ៍របស់ពួកគេ មានសមត្ថភាពរកឃើញវីរុស COVID-19 សូម្បីតែនៅលើអ្នកវិជ្ជមានដែលមិនទាន់មានរោគសញ្ញាទៀតផង។

តាមគម្រោង ឧបករណ៍នេះនឹងត្រូវបានផលិតទ្រង់ទ្រាយធំជាបន្តបន្ទាប់ និងដាក់លក់ក្នុងទីផ្សារ ចាប់ពីដើមឆ្នាំ 2022៕

ប្រភព៖ 9news
ប្រែសម្រួល៖ បុត្រា

July 19, 2021

ផ្លូវរថភ្លើងល្បឿនលឿនក្រោមដី ឆ្លងកាត់សមុទ្រ ប្រវែង 277 គីឡូម៉ែត្រ បានខួងរួចរាល់ហើយ (វីដេអូ)

ប្រទេសចិន បានខួងរួចរាល់ផ្លូវរូងក្រោមដីទាំងអស់ដែលស្ថិតនៅក្នុងប្រព័ន្ធផ្លូវដែកល្បឿនលឿនឆ្លងកាត់សមុទ្រដំបូងរបស់ប្រទេសនេះ ដែលស្ថិតក្នុងខេត្ត Fujian នៅភាគអាគ្នេយ៍។

ផ្លូវរូងក្រោមដីទាំងអស់ ដែលស្ថិតនៅតាមបណ្ដោយផ្លូវដែកល្បឿនលឿនប្រវែង 277 គីឡូម៉ែត្រ ពី Fuzhou ទៅ Xiamen ត្រូវបានខួងភ្ជាប់ចូលគ្នារួចរាល់ហើយ កាលពីថ្ងៃទី 12 កក្កដា។ នេះគឺជាគម្រោងផ្លូវដែកល្បឿនលឿនឆ្លងកាត់សមុទ្រដំបូងរបស់ប្រទេស ចិន ដែលអនុញ្ញាតឱ្យរថភ្លើងធ្វើដំណើរបានក្នុងល្បឿន 350 គម/ម៉ោង។

តាមផែនការ គម្រោងដែលនឹងត្រូវបានដាក់ឱ្យដំណើរការ ចាប់ពីឆ្នាំ 2023 នេះ នឹងជួយកាត់បន្ថយពេលវេលាក្នុងការដំណើរ ពីទីក្រុង Fuzhou ទៅកាន់ Xieman មកនៅត្រឹមតែ 1 ម៉ោងប៉ុណ្ណោះ៕

ប្រភព៖ CGTN
ប្រែសម្រួល៖ បុត្រា

July 17, 2021

ឈុតហោះហើរលក្ខណៈបុគ្គលដូច Iron Man ដើរដោយថាមពលអគ្គិសនី

ក្រុមហ៊ុន អង់គ្លេស បង្ហាញកំណែដើរដោយថាមពលអគ្គិសនី នៃឈុតហោះហើរលក្ខណៈបុគ្គល ដូចទៅនឹង Iron Man (មនុស្សដែក) និងមិនបង្កផលប៉ះពាល់ដល់បរិស្ថាន។

Richard Browning គឺជាស្ថាបនិករបស់ក្រុមហ៊ុន Gravity Industries និងជាអ្នកអភិវឌ្ឍឈុតហោះហើរលក្ខណៈ ដែលប្រៀបបានទៅនឹង «មនុស្សដែក» នេះ។

ឈុតហោះហើរថ្មី ដំណើរការដោយថាមពលអគ្គិសនីនេះ មានឈ្មោះថា E-suit។ លោក Richard Browning បានឱ្យដឹងថា កំណែដើរដោយថាមពលអគ្គិសនីនេះ បានបង្ហាញអំពីមហិច្ឆតារបស់ពួកយើង ដោយដែនកំណត់របស់វា ត្រូវបានលុបបំបាត់ជាបន្តបន្ទាប់។

លោក Richard Browning បន្តថា «តាមពិត កាលពី 24 ម៉ោងមុន វាមិនទាន់បង្ហាញបានអំពីអ្វីដែលយើងត្រូវការ។ ប៉ុន្តែ យើងចង់បង្ហាញសកម្មភាពជាក់ស្ដែង ជាជាងការនិយាយ ហើយយើងក៏សំដែងនៅចំពោះមុខសាធារណជន។

កំណែនៃឈុតហោះហើរ ដែលដើរដោយថាមពលឧស្ម័ន ត្រូវបានគេបង្ហាញ និងទទួលស្គាល់រួចហើយ នៅក្នុងបេសកកម្មស្វែងរក ជួយសង្គ្រោះ និងនៅក្នុងវិស័យយោធា។ កំណែដើរដោយថាមពលឧស្ម័ននេះ អាចមានល្បឿនដល់ 130 គម/ម៉ោង ហើយបើតាមទ្រឹស្ដី វាអាចហោះឡើងដល់កម្ពស់ជាង 3.650 ម៉ែត្រ។

ដូច្នេះ កំណែអគ្គិសនី ត្រូវការកែលម្អឱ្យបានច្រើនជាងបច្ចុប្បន្ន។ Richard Browning ថ្លែងថា ប្រការនេះ អាស្រ័យលើអាគុយ។ ពិតជាគួរឱ្យភ្ញាក់ផ្អើល នៅពេលដឹងថា ត្រូវការថាមពលប៉ុន្មានដែលអាចផ្ទុកក្នុងឧបករណ៍តូចបែបនេះ ដើម្បីអាចនាំមនុស្ស ហោះផុតពីដី។ វានៅត្រង់ដែនកំណត់ ដោយសារតែកម្រិតនៃថាមពលដែលអាចផ្ទុកបាននៅក្នុងអាគុយ។

«ក៏ប៉ុន្តែ ថ្ងៃនេះ យើងបានជោគជ័យ ដោយអាចធ្វើឱ្យឈុតហោះហើរនេះ ដំណើរការបាន» ស្ថាបនិករបស់ក្រុមហ៊ុន Gravity Industries បញ្ជាក់បន្ថែមដូច្នេះ៕

ប្រភព៖ Amaze Lab
ប្រែសម្រួល៖ បុត្រា

July 17, 2021

«ព្រះអាទិត្យសិប្បនិម្មិត» បញ្ចេញកំដៅ 100 លានអង្សាសេ របស់ អង់គ្លេស អាចផ្គត់ផ្គង់អគ្គិសនីដល់ទីក្រុងប៉ុន Oxford

ឧបករណ៍ប្រមូលផ្ដុំថាមពលនុយក្លេអែរ ឬ ថាមពលដែលកើតពីប្រតិកម្មនុយក្លេអែរ (Nuclear fusion) ដែលអភិវឌ្ឍដោយក្រុមហ៊ុន Tokamak Energy មានសក្ដានុពលធំធេងផ្នែកពាណិជ្ជកម្ម។

ខុសពីរោងចក្រនុយក្លេអែរធម្មតា (nuclear fission reactor) ដែលក្នុងនោះ ថាមពលត្រូវបានបញ្ចេញតាមរយៈដំណើរការបំបែកអាតូមអ៊ុយរ៉ាញ៉ូម រោងចក្រថាមពលនុយក្លេអែរ របស់ក្រុមហ៊ុន Tokamak Energy បង្កើតថាមពលដោយការប្រមូលផ្ដុំអាតូម (fusion power reactor) និងមិនអាចក្ដៅរហូតដល់រលាយខ្លួនឯងនោះទេ។

រោងចក្រ fusion power reactor របស់ អង់គ្លេស នេះ គឺយោងទៅលើប្រតិកម្មនៃការប្រមូលផ្ដុំរវាងអាតូមអ៊ីដ្រូសែនចំនួន 2 ផ្សេងគ្នា បង្កើតបានជា អាតូមអេល្យូម ហើយក៏បញ្ចេញជាថាមពលដ៏មហិមា។ វត្ថុធាតុដើមរបស់រោងចក្រប្រតិកម្មនុយក្លេអែរនេះ មិនបំភាយឧស្ម័ន ព្រមទាំងមានតម្លៃទាប ព្រោះវត្ថុធាតុដើមដែលជា អ៊ីដ្រូសែន អាចរកបានពីទឹកសមុទ្រ។

កំណែប្រភេទតូចចល័តរបស់រោងចក្រនេះ អាចផ្ដល់ថាមពលដល់យន្តហោះ និងកប៉ាល់ធំៗ ជួយកាត់បន្ថយការបំភាយឧស្ម័នកាបូនិកបានយ៉ាងច្រើន។ ថាមពលដែលកើតឡើងពីរ៉េអាក់ទ័រខាងលើ អាចទាញយកបានតាមរយៈឧបករណ៍ដែលផលិតដោយក្រុមអ្នកស្រាវជ្រាវរបស់អង្គភាពថាមពលនុយក្លេអែរ អង់គ្លេស នៅ Oxfordshire។ ថាមពលនេះ នឹងត្រូវបានប្រើដើម្បីកំដៅចំហាយទឹក សម្រាប់ជួយឱ្យកង្ហារទួរប៊ីនវិល និងបញ្ចេញជាអគ្គិសនី។

យោងតាមបណ្ឌិត David Kingham សហស្ថាបនិក និងជាអនុប្រធាន នៃក្រុមហ៊ុន Tokamak Energy ក្នុងរយៈពេលប៉ុន្មានសប្ដាហ៍ទៀតប៉ុណ្ណោះ រ៉េអាក់ទ័រ ST 40 នឹងឆ្លងផុតចំណុចសំខាន់ នៅពេល កំដៅផ្លាស្មា ឡើងដល់ 100 លានអង្សាសេ ក្ដៅជាង 6 ដង ធៀបនឹងស្នូលរបស់ព្រះអាទិត្យ (15 លានអង្សាសេ)។

ក្រុមហ៊ុន កំពុងឆ្ពោះទៅរកគោលដៅផ្គត់ផ្គង់រ៉េអាក់ទ័រ បែបពាណិជ្ជកម្ម ដំបូង នៅចុងទសវត្សរ៍ 2030។ រោងចក្រជាច្រើននឹងត្រូវបានបើកនៅពាសពេញពិភពលោក ដោយប្រើប្រាស់ឧបករណ៍របស់ អង់គ្លេស ដែលរ៉េអាក់ទ័រនីមួយៗ បញ្ចេញថាមពល 150 MW គ្រប់គ្រាន់សម្រាប់ផ្គត់ផ្គង់អគ្គិសនីដល់ទីក្រុងមួយដែលមានប្រជាជនជាង 150,000 នាក់ ដូចជា Oxford ជាដើម។

រោងចក្ររ៉េអាក់ទ័រ របស់ Tokamak Energy ដែលទាក់ទាញទុនបាន 207.6 លានដុល្លារ ពីអ្នកវិនិយោគ រួមនឹងថវិកា 13.8 លានដុល្លារពីរដ្ឋាភិបាលនេះ បច្ចុប្បន្ន មានគូប្រជែងមួយចំនួន ដែលកំពុងញាប់ដៃ ញាប់ជើង ក្នុងការអភិវឌ្ឍ ក្នុងនោះមានទាំងក្រុមហ៊ុន Lockheed Martin នៅ អាមេរិក និង មហាសេដ្ឋី Jeff Bezos ផងដែរ។

ក្រៅពីនេះ ITER ដែលជារោងចក្រថាមពលនុយក្លេអែរ ដែលបង្កើតឡើងដោយប្រទេសចំនួន 35 និងស្ថិតនៅលើទឹកដី បារាំង ក៏គ្រោងនឹងដំណើរការនៅចុងទសវត្សរ៍ឆ្នាំ 2020។ ITER មានទំហំប្រហាក់ប្រហែលនឹងទីលានបាល់ទាត់ចំនួន 60 ខណៈដែលរោងចក្ររបស់ Tokamak Energy មានទំហំប៉ុនផ្ទះធម្មតាមួយខ្នងប៉ុណ្ណោះ៕

ប្រភព៖ Mail
ប្រែសម្រួល៖ បុត្រា

July 16, 2021

មហាសេដ្ឋី កូរ៉េខាងត្បូង ដែលនៅពីក្រោយក្រុមចម្រៀង BTS

ទ្រព្យសម្បត្តិរបស់ Bang Si-hyuk ដែលជាស្ថាបនិករបស់ក្រុមហ៊ុននៅពីក្រោយក្រុមចម្រៀង K-pop BTS កើនឡើងជាងទ្វេដង ដោយប្រើពេលត្រឹមតែប៉ុន្មានខែប៉ុណ្ណោះ។

យោងតាមទំព័រ Bloomberg Billionaires Index លោក Bang Si-hyuk មានទ្រព្យសុទ្ធប្រមាណ 3.2 ពាន់លានដុល្លារអាមេរិក បន្ទាប់ពីមូលបត្រក្រុមហ៊ុន Hybe របស់លោក កើនបន្ថែម 131% រាប់ចាប់ពីពេលត្រូវបានបោះផ្សាយមូលបត្រ (IPO) នៅប្រទេស កូរ៉េខាងត្បូង កាលពីខែតុលា។ ក្នុងអំឡុងធ្វើ IPO ទ្រព្យសម្បត្តិរបស់លោក Bang មានតម្លៃស្មើនឹង 1.5 ពាន់លានដុល្លារអាមេរិក។

នោះគឺជាភ័ស្ដុតាងបង្ហាញអំពីភាពល្បីល្បាញរបស់ក្រុមចម្រៀង BTS ដែលមានកម្រងចម្រៀងមួយចំនួន ទទួលបានការគាំទ្របំផុតក្នុងពិភពលោក។ ទន្ទឹមនឹងនេះ ក្រុមអ្នកវិនិយោគក៏មានការជឿជាក់លើមហិច្ឆតាក្ដោបក្ដាប់ពិភពតន្ត្រីរបស់ក្រុមហ៊ុន Hybe ក្រោយពីទិញបានក្រុមហ៊ុនដែលនៅពីក្រោយតារាចម្រៀងអន្តរជាតិពីររូប គឺ Justin Bieber និង Ariana Grande។

លោក Bang កាន់កាប់ភាគហ៊ុនចំនួន 34% របស់ក្រុមហ៊ុន Hybe និងត្រូវបានគេហៅថា «Hitman» នៅ កូរ៉េខាងត្បូង ទៀតផង។

កាលពីខែមេសា ក្រុមហ៊ុន Hybe ប្រកាសថា បានចំណាយប្រាក់ 1.05 ពាន់លានដុល្លារ សម្រាប់ Ithaca Holding ជាក្រុមហ៊ុនប្រព័ន្ធផ្សព្វផ្សាយដែលនៅពីក្រោយតារាចម្រៀង Bieber និង Grande។ Scooter Braun ដែលជាអ្នកដឹកនាំក្រុមហ៊ុន Ithaca ក្លាយជាសហនាយកប្រតិបត្តិរបស់ក្រុមហ៊ុន Hybe America ក្រោយការទិញដូរនេះ។

លោក Braun កាន់កាប់ភាគហ៊ុនចំនួន 1% របស់ Hybe ដែលមានតម្លៃស្មើនឹង 124.8 លានដុល្លារអាមេរិក។ សមាជិករបស់ក្រុមហ៊ុន BTS ដែលសុទ្ធតែមានវ័យ 20 ឆ្នាំ កាន់កាប់ភាគហ៊ុនដែលមានតម្លៃ 18.5 លានដុល្លារស្មើៗគ្នា ខណៈដែល Bieber និង Grande ម្នាក់ៗកាន់កាប់ភាគហ៊ុនដែលមានតម្លៃ 14.5 លានដុល្លារ។

Bang Si-hyuk បានបង្កើត Big Hit Entertainment ដែលជាឈ្មោះដើមរបស់ Hybe កាលពីឆ្នាំ 2005។ ដំបូងឡើយ ក្រុមហ៊ុននេះ មិនសូវមានសកម្មភាពនោះទេ ហើយវាស្ទើរតែដួលរលំ នៅក្នុងដំណាក់កាលដំបូង មុនពេល BTS ចេញអាល់ប៊ុម ដំបូងកាលពីឆ្នាំ 2013។

បទចម្រៀងថ្មី ល្បីបំផុតរបស់ BTS គឺ Butter ធ្លាប់ស្ថិតនៅលើកំពូលតារាងចំណាត់ថ្នាក់ Billboard Hot 100 អស់ជាច្រើនសប្ដាហ៍។ ក្រុមហ៊ុន Hybe ឱ្យដឹងកាលពីឆ្នាំ 2020 ថា ប្រាក់ចំណូលជិត 88% នៅក្នុងពាក់កណ្ដាលដើមឆ្នាំ 2020 គឺបានមកពី BTS។

ក្រុមអ្នកវិភាគយល់ថា Hybe ត្រូវការស្វែងរក «BTS បន្ទាប់» ហើយមហាសេដ្ឋី Bang Si-hyuk ក៏យល់ឃើញបែបនេះដែរ។ «ពួកគេកំពុងកាន់បន្ថយការពឹងផ្អែកទៅលើក្រុមចម្រៀង BTS។ ក្រុមចម្រៀងប្រុសផ្សេងទៀតរបស់ Hybe បានប្រែជាល្បីឈ្មោះជាងមុន ហើយក្រុមហ៊ុនក៏មានតារាចម្រៀងអន្តរជាតិបន្ថែមទៀត» Gina An អ្នកវិភាគរបស់ក្រុមហ៊ុន eBest Investment & Securities វាយតម្លៃដូច្នេះ៕

ប្រភព៖ Bloomberg
ប្រែសម្រួល៖ បុត្រា

July 16, 2021

វ័យផ្សេងគ្នា គិតផ្សេងគ្នា…តើមនុស្សក្នុងវ័យជំនាន់នីមួយៗ សម្លឹងមើល “ស្នេហា” បែបណា?

ទស្សនៈអំពីស្នេហារបស់មនុស្សក្នុងវ័យជំនាន់នីមួយៗ មានភាពខុសប្លែកពីគ្នា ទៅតាមបទពិសោធ និងសភាពបរិស្ថានរបស់សង្គម និងដែលគួរឱ្យចាប់អារម្មណ៍នោះគឺ មនុស្សក្នុងវ័យជំនាន់នីមួយៗ មានដំណោះស្រាយសម្រាប់សេចក្ដីស្នេហារបស់ខ្លួនឯង ខុសប្លែកពីគ្នា…ចុះអ្នកវិញ ស្ថិតក្នុងវ័យជំនាន់ណាដែរ? មានទស្សនៈចំពោះស្នេហា ដូចដែលអត្ថបទវិភាគខាងក្រោមនេះ ដែរឬទេ? ដូច្នេះយើងនាំគ្នាមកពិនិត្យមើលទាំងអស់គ្នា…។

Baby Boomer ៖ មានចម្ងល់ចំពោះស្នេហា តែនៅរក្សាទំនៀមទម្លាប់

ស្នេហារបស់មនុស្សក្នុងវ័យជំនាន់ Baby Boomer គឺមនុស្សដែលបច្ចុប្បន្ន មានអាយុក្នុងចន្លោះ 55-70ឆ្នាំ។ Baby Boomer ភាគច្រើន នឹងរៀបការមុនអាយុ30 និងជាការរៀបការតាមទំនៀមទម្លាប់ ប្រពៃណី ទោះជាមានសំណួរនៅក្នុងចិត្តអំពីការរៀបការ និងការកសាងគ្រួសារក៏ដោយ តែពួកគេ ក៏នៅតែប្រតិបត្តិតាមទំនៀមទម្លាប់បែបផែនប្រពៃណីដដែល។

ដោយមិនបានដឹងឡើយថា នៅពេលក្រោយមក ការរៀបការទាំងនៅមានសំណួរនៅក្នុងចិត្ត ធ្វើឱ្យមនុស្សក្នុងវ័យជំនាន់ Baby Boomer គឺជាក្រុមដែលមានស្ថិតិការលែងលះខ្ពស់បំផុត ព្រោះជាច្រើនគូ រៀបការដោយមិនបានដឹងថា ពួកគេស្រឡាញ់គ្នាពិតប្រាកដប៉ុនណាឡើយ និងជាច្រើនគូទៀត ក៏ប្រើវិធីរស់នៅដោយឡែកពីគ្នា ដោយមិនធ្វើលិខិតលែងលះ និងម្នាក់ៗ ក៏ទៅរកមនុស្សដែលខ្លួនឯងពេញចិត្ត ដោយមិនមានការរៀបការជាថ្មីម្ដងទៀតឡើយ ខណៈដែលជាច្រើនគូទៀត មិនមាននៅសល់សេចក្ដីស្រឡាញ់ចំពោះគ្នាទៀតឡើយ តែម្នាក់ៗរស់នៅ ដើម្បីឱ្យកូនៗសប្បាយចិត្តតែប៉ុណ្ណោះ។

វ័យជំនាន់ X ៖ ស្នេហាពិត ត្រូវតែសាងឡើងដោយដៃយើងខ្លួនឯង

មនុស្សវ័យជំនាន់ X គឺក្រុមមនុស្សដែលបច្ចុប្បន្នមានអាយុក្នុងអំឡុង 39-50ឆ្នាំ។ មនុស្សក្នុងវ័យជំនាន់នេះ នឹងក្ររៀបការ ដោយមានលទ្ធផលពិនិត្យជំរឿនឃើញថា មានតែ 1ភាគ3 ប៉ុណ្ណោះ ដែលរៀបការពេលអាយុ 30ឆ្នាំ ដោយសារតែពួកគេត្រូវការភាពពិតប្រាកដច្បាស់លាស់ក្នុងជីវិតអាពាហ៍ពិពាហ៍ ហើយមនុស្សក្នុងវ័យជំនាន់ X នេះ ស៊ាំធ្លាប់នឹងការលែងលះយ៉ាងច្បាស់ ពួកគេមិនបានសម្លឹងឃើញថា វាជាបញ្ហានោះទេ តែពួកគេយល់ឃើញថា វាគឺជាការរស់នៅ ដែលត្រូវតែស្វែងរកចំណុចដែលត្រឹមត្រូវឱ្យបាន ហើយរឿងហ្នឹងឯង ដែលធ្វើឱ្យមនុស្សក្នុងវ័យជំនាន់នេះ មានស្ថិតិការលែងលះតិចបំផុត។

ព្រោះជាច្រើនគូ បានសិក្សាមើលចិត្តមើលថ្លើមគ្នាមុនរៀបការ និងនៅពេលពួកគេគិតចង់រៀបការ នោះមានន័យថា ជាការរៀបការដែលកើតឡើងពីសេចក្ដីស្នេហា មិនមែនជាការបំពេញតួនាទីទេ ហើយពួកគេនឹងធ្វើគ្រប់យ៉ាង ក្នុងការទប់ប្រគង ឱ្យគ្រួសាររបស់ខ្លួនឯង មានជីវិតដែលល្អប្រសើរ ដើម្បីមិនឱ្យកើតមានការលែងលះ។

Millennials ៖ សេចក្ដីស្នេហា សាងប្រពៃណីថ្មីមួយឡើង

មនុស្សក្នុងវ័យជំនាន់ Y ឬមីលលេននៀល នេះ ជាក្រុមដែលមានអាយុ 25-38ឆ្នាំ។ អាចរាប់បានថា ជាវ័យជំនាន់ ដែលសាងប្រពៃណីការរៀបការឡើងជារបស់ខ្លួនឯង។ ជាច្រើនគូចូលទៅរស់នៅជាមួយគ្នាមុនរៀបការ និងមានការប្រកាសឱ្យមិត្តភក្តិបានដឹងពីការចូលទៅរស់នៅជាមួយគ្នានេះទៀតផង។ ប្រៀបដូចជាការប្រកាសថា 1គូនេះ នឹងត្រូវរ៉ូវគ្នាយ៉ាងពិតប្រាកដ។ គូខ្លះថែមទាំងមានការរៀបផែនការក្នុងការទិញកន្លែងរស់នៅ(ផ្ទះ) ឬគូខ្លះថែមទាំងមានកូនជាមួយគ្នាមុនរៀបការទៀតផង។

ការពិតទៅ ក្រុមមនុស្សវ័យជំនាន់ Y នេះ មិនជឿលើប្រពៃណីការរៀបការប៉ុន្មានឡើយ ពួកគេអាចរស់នៅជាមួយគ្នា ដោយមិនបាច់រៀបការបាន ដែលនេះក៏អាចរាប់បានដែរថា ជាការសាងប្រពៃណីក្នុងការមានគ្រួសារបែបថ្មីឡើងហ្នឹងឯង។

តែអ្វីដែលគួរឱ្យចាប់អារម្មណ៍នោះគឺ មនុស្សវ័យជំនាន់ Y នឹងមានសញ្ញាថា រស់នៅរួមជាមួយមនុស្សក្នុងគ្រួសារ ដែលមានភាពខុសប្លែកខាងវ័យជំនាន់បានខ្លាំងជាងមនុស្សក្នុងវ័យជំនាន់ X។ ដែលវាទៅជាដូច្នេះ ព្រោះមនុស្សក្នុងវ័យជំនាន់ Y ជឿថា ការរស់នៅរួមគ្នាជាគ្រួសារធំមួយ នឹងធ្វើឱ្យអាចជួយមើលថែទាំរវាងគ្នា និងគ្នាបាន។

វ័យជំនាន់ Z ៖ ស្នេហ៍ឆ្លងវេហាស៍

វ័យជំនាន់ Z គឺក្រុមមនុស្សដែលស្ថិតក្នុងអំឡុងវ័យ 23ឆ្នាំចុះក្រោម ជាក្រុមមនុស្សដែលមិនធ្លាប់ស្គាល់សង្គមដែលមិនដែលមានស្មាតហ្វូន កុំព្យូទ័រ ឬវីដេអូហ្គេមឡើយ និងជាវ័យជំនាន់ ដែលមានភាពសម្បូរបែបខាងសង្គមច្រើនឡើង។

ស្នេហារបស់មនុស្សក្នុងវ័យជំនាន់នេះ នឹងមិនបានប្រកាន់ខ្ជាប់ជាមួយមនុស្សសញ្ជាតិដូចគ្នានឹងខ្លួនឯងទៀតឡើយ តែជាស្នេហាដែលអាចកើតឡើងបានជាមួយមនុស្សគ្រប់រូបលើពិភពលោកនេះ និងគួរឱ្យចាប់អារម្មណ៍ថា ក្រុមវ័យជំនាន់ Z នេះ មានស្ថិតិការកើតឡើង ច្រើនជាងមនុស្សក្នុងយុគសម័យ Baby Boomer ដែលនេះមានន័យថា មនុស្សក្នុងវ័យជំនាន់នេះ នឹងក្លាយជាមនុស្សក្រុមធំបំផុតរបស់ពិភពលោកនាពេលអនាគត និងប្រហែលជាត្រូវនាំគ្នាមកមើលថា តើពួកគេនឹងបន្តវេនស្នេហាបែបណា រវាងវ័យជំនាន់ X ដែលថែរក្សាសេចក្ដីស្នេហាឱ្យស្ថិតស្ថេរ និងវ័យជំនាន់ Y ដែលយល់ថា ការរៀបការ មិនមែនជាសារៈសំខាន់ក្នុងជីវិតតទៀតឡើយ តែជាការមានស្នេហាដ៏ពិតប្រាកដទៅវិញទេ ទើបធ្វើឱ្យជីវិតគូរស់រានទៅមុខបាន៕

រៀបរៀងដោយអ្នកគ្រូ ឆវី

July 16, 2021

ក្រុមហ៊ុន Blue Origin របស់ Jeff Bezos ត្រៀមបញ្ជូនអតិថិជនវ័យក្មេងបំផុត ឡើងទៅទីអវកាស

កាលពីថ្ងៃទី 15 កក្កដា នៅក្នុងប្រកាសមួយរបស់ក្រុមហ៊ុនអវកាសចរណ៍ Blue Origin ដែលបង្កើតឡើងកាលពីឆ្នាំ 2000 ដោយកំពូលមហាសេដ្ឋីពិភពលោក ជនជាតិ អាមេរិក Jeff Bezos បានឱ្យដឹងថា អតិថិជនម្នាក់ដែលមានវ័យទើបតែ 18 ឆ្នាំ នឹងចូលរួមដំណើរនៅលើយានអវកាស New Shepard ហោះហើរទៅកាន់ទីអវកាស នៅថ្ងៃទី 20 កក្កដា ខាងមុខ។

ប្រកាសខាងលើបានឱ្យដឹងថា អតិថិជនឈ្មោះ Oliver Daemon បានបញ្ចប់ការសិក្សានៅវិទ្យាល័យ កាលពីឆ្នាំ 2020 នឹងក្លាយជាអ្នកអវកាសវ័យក្មេងបំផុតក្នុងពិភពលោក។ ការដែលបានហោះទៅកាន់ទីអវកាស គឺជា ក្ដីស្រមៃពេញមួយជីវិតរបស់ Daemon ចាប់តាំងពីគាត់មានអាយុ 4 ឆ្នាំ។ បច្ចុប្បន្ន គាត់មានវិញ្ញបនបត្របើកបរយន្តហោះ ដែលផ្ដល់ឱ្យដោយក្រុមហ៊ុនឯកជន។

ប្រធានប្រតិបត្តិរបស់ Blue Origin លោក Bob Smith និយាយថា «ព្រឹត្តិការណ៍នេះ គឺជា ការចាប់ផ្ដើមនៃដំណើរហោះហើរបែបពាណិជ្ជកម្មរបស់ New Shepard ហើយ Oliver Daemon គឺជាអ្នកតំណាងឱ្យមនុស្សជំនាន់ថ្មី ជាក្រុមមនុស្សដែលនឹងជួយបើកផ្លូវទៅកាន់ទីអវកាស»។

រួមដំណើរជាមួយ Daemon នៅក្នុងការហោះហើរទៅកាន់ទីអវកាសនៅថ្ងៃទី 20 កក្កដា ខាងមុខ ក៏នឹងមានវត្តមានរបស់មហាសេដ្ឋី Jeff Bezos និងប្អូនប្រុស Mark Bezos រួមនឹងអ្នកត្រួសត្រាយផ្លូវអាកាស Wally Funk វ័យ 82 ឆ្នាំផងដែរ។ ដូច្នេះ ជើងហោះហើរទៅកាន់ទីអវកាសនេះ មានទាំងមនុស្សមានវ័យនៅក្មេងបំផុត និងចាស់បំផុត ដែលមិនធ្លាប់មានពីមុនមក។

តាមផែនការ ដំណើរទេសចរណ៍ទីអវកាសនេះ នឹងប្រើពេល 10 នាទី ក្នុងនោះ អតិថិជន មាន 4 នាទី ដើម្បី «គយគន់ទេសភាពអវកាស» នៅតាម «ដងផ្លូវ» Karman ជាលំហអាកាសដែលខណ្ឌចែករវាងបរិយាកាសផែនដី និងទីអវកាស៕

ប្រភព៖ Space
ប្រែសម្រួល៖ បុត្រា

July 16, 2021

អាល្លឺម៉ង់ ឈ្នះការដេញថ្លៃធ្វើជាម្ចាស់ផ្ទះ Euro 2024

ការប្រកួតដណ្ដើមពានរង្វាន់ប្រចាំទ្វីបអឺរ៉ុប Euro 2020 បានបិទបញ្ចប់ហើយ ដោយម្ចាស់ពាននេះ គឺក្រុមបាល់ទាត់ជម្រើសជាតិអ៊ីតាលី ខណៈដែលក្រុមបាល់ទាត់ជម្រើសជាតិអង់គ្លេស គឺជាក្រុមជើងឯករង ក្រោយទាត់បាល់ប៉េណាល់ទី 11ម៉ែត្រកាត់សេចក្តី។

ក្នុងនោះដែរ ចំពោះម្ចាស់ផ្ទះ ដែលនឹងត្រូវទទួលរៀបចំការប្រកួតដណ្ដើមពាននេះលើកក្រោយ នៅឆ្នាំ2024 នោះគឺប្រទេសអាល្លឺម៉ង់ បន្ទាប់ពីឈ្នះលើប្រទេសតួរគី ក្នុងការដេញថ្លៃលើកចុងក្រោយ ដោយប្រទេសអាល្លឺម៉ង់ បានត្រៀមកីឡដ្ឋានចំនួន ១០កន្លែង សម្រាប់រៀបចំការប្រកួតដ៏ធំប្រចាំទ្វីបអឺរ៉ុបមួយនេះ។

គួរឱ្យដឹងដែរថា អាល្លឺម៉ង់ ធ្លាប់ធ្វើជាម្ចាស់ផ្ទះពាន Euro នេះចំនួន 1ដងរួចមកហើយ កាលពីឆ្នាំ198 ខណៈដែលក្រុមបាល់ទាត់របស់ប្រទេសមួយនេះ ធ្លាប់គ្រងជើងឯកពាននេះ ដល់ទៅ 3លើក គឺនៅឆ្នាំ1972, 1980 និងចុងក្រោយនៅឆ្នាំ1996៕

July 16, 2021

Ronaldo បើកសណ្ឋាគារថ្មីមួយទៀតហើយ នៅអាមេរិក

កីឡាករខ្សែប្រយុទ្ធ Cristiano Ronaldo មិនអាចជួយក្រុមជម្រើសជាតិព័រទុយហ្គាល់ ឡើងផុតវគ្គ ១៦ ក្រុមចុងក្រោយឡើយ បន្ទាប់ពីចាញ់ក្រុមបាល់ទាត់ជម្រើសជាតិប៊ែលហ្សិក ក្នុងលទ្ធផល ១ ទល់នឹង ០ ។

ក្រោយជ្រុះចេញពីពាននេះ នៅប៉ុន្មានថ្ងៃមុននេះ គេបានប្រទះឃើញវត្តមានកីឡាកររបស់ក្លិប Juventus រូបនេះចូលរួមក្នុងការបើកសម្ភោធសណ្ឋាគារមួយកន្លែង មានឈ្មោះថា PESTANA CR7 Hotel ដែលមានទីតាំងនៅចំកណ្តាលក្រុងញ៉ូវយក សហរដ្ឋអាមេរិក ។

ក្រៅពីអាជីពបាល់ទាត់ Cristiano Ronaldo ត្រូវបានគេដឹងថាមានជំនួញជាច្រើនដែលកំពុងតែកាន់កាប់នៅក្នងដៃ ដែលមានដូចជាគ្រឿងសម្អាងយីហោ CR7 និង សណ្ឋាគារ PESTANA ជាដើម ៕

July 16, 2021

Category: សង្គម និងសេដ្ឋកិច្ច