សង្គម និងសេដ្ឋកិច្ច - La Reine Media

Zhao Wei ចូលរួមព្រឹត្តិការណ៍ជាមួយតួឯកស្រី ក្នុងរឿង The Dance of the Storm

(ប្រទេសចិន)៖ Zhao Wei តួឯកស្រីក្នុងរឿង ព្រះនាងយេយេ (My Fair Princess) បានចូលរួមព្រឹត្តិការណ៍បង្ហាញម៉ូដសម្លៀកបំពាក់ ជាមួយនឹងក្រុមតារាសំដែងជំនាន់ក្រោយ មានដូចជា នាង Gulinazha ដែលជាតួឯកក្នុងខ្សែភាពយន្តទូរទស្សន៍រឿង The Dance of the Storm រួមជាមួយនឹង Zhang Ruoyun និង Xu Kai ជាដើម ។ល។

តារាសំដែងវ័យ 45 ឆ្នាំ Zhao Wei បានចូលរួមព្រឹត្តិការណ៍បង្ហាញម៉ូដ របស់ក្រុមហ៊ុនម៉ូដសម្លៀកបំពាក់ Fendi នៅឯ សៀងហៃ កាលពីយប់ថ្ងៃទី 23 កក្កដា ឆ្នាំ 2021។

Zhao Wei ស្លៀកឈុតរ៉ូបសូត្រ និងប្រើប្រាស់កាបូបយួរដៃដែលមានពណ៌ប្រហាក់ប្រហែលនឹងរ៉ូប។

ទំព័រ Sina បានអធិប្បាយថា Zhao Wei បង្ហាញស្ទីលថតរូបប្រកបដោយភាពទាក់ទាញ ទាន់សម័យ និងគួរឱ្យស្រលាញ់។

ចំណែកស្រីស្អាតជនជាតិ អ៊ុយហ្គួ មកពីតំបន់ Xinjiang នាង Gulinazha វិញ ជ្រើសរើសអាវបង្ហាញក្បាលពោះ (crop-top) និងខោខ្លី។

នាង Gulinazha ទទួលបានការសរសើរច្រើនពីសំណាក់ទស្សនិកជន ទាក់ទងនឹងការលេងស្ទីល និងសម្រស់ក្នុងវ័យ 29 ឆ្នាំ។

តារាសិល្បៈពហុជំនាញ (សំដែង, ច្រៀង និងអ្នករាំ) នាង Kong Xueer បង្ហាញខ្លួនយ៉ាងទាក់ទាញ ជាមួយនឹងអាវបង្ហាញទាំងស្មា បង្ហាញទាំងក្បាលពោះ។

រីឯ តារាសំដែងប្រុសក្នុងរឿង ជម្លោះដំណាក់យ៉ានស៊ី (Story of Yanxi Palace) ក៏មិនអន់ដែរ ដោយប្រើប្រាស់កាបូបពណ៌លឿង ដើម្បីទាក់ទាញចំណាប់អារម្មណ៍។

តារាសំដែង Zhang Ruoyun ស្លៀកពាក់ឈុតពណ៌ខ្មៅ រំលេចដោយកាបូបយួរដៃបែបយុវវ័យទាន់សម័យ។

ប្រភព៖ Sina
ប្រែសម្រួល៖ បុត្រា

July 24, 2021

កំពូលតារាសំដែង Angelina Jolie ដើរទេសចរណ៍ជាមួយកូនៗ ក្រោយជាប់ក្នុងផ្ទះដោយសារ COVID-19

កំពូលតារាសំដែងជនជាតិអាមេរិកាំង នាង Angelina Jolie នាំកូនៗទៅកាន់ទីក្រុងប៉ារីស ប្រទេសបារាំង ដើម្បីលម្ហែកាយ បន្ទាប់ពីត្រូវនៅផ្ទះជាងមួយឆ្នាំ ដោយសារខ្លាច COVID-19 និងដោះស្រាយបញ្ហានៅតុលាការ ទាក់ទិននឹងសិទ្ធិចិញ្ចឹមកូនៗ ជាមួយនឹង Brad Pitt។

យោងតាម Daily Mail កាលពីថ្ងៃទី 22 កក្កដា Jolie បាននាំកូនៗ រួមមាន Pax Thien, Zahara, Shiloh និង Knox ដើរកំសាន្ត និងទិញទំនិញ។ កូនប្រុសច្បង Maddox និងកូនស្រីពៅ Vivienne មិនបានបង្ហាញខ្លួនជាមួយម្ដាយនោះទេ។ ពួកគេទាំង 5 នាក់ ស្លៀកពាក់យ៉ាងសាមញ្ញ និងពាក់ម៉ាស់ផងដែរ។ ពួកគេក៏បានចូលភោជនីយដ្ឋានមួយនៅក្បែរតួ Eiffel ដើម្បីទទួលទានអាហារ។

ក្នុងខែមិថុនា កំពូលតារាសំដែងរូបនេះ បាននាំកូនៗទៅកាន់ទីក្រុងនីវយ៉ក លេងប្រហែលមួយសប្ដាហ៍ ក្នុងឱកាសខួបអាយុ 46 ឆ្នាំ។ នៅទីនេះ នាងក៏បានទៅសួរសុខទុក្ខអតីតស្វាមី Jonny Lee Miller ផងដែរ។ មុននោះ Angelina Jolie កម្រនឹងចេញទៅបរទេសណាស់ ក្នុងអំឡុងពេញមួយឆ្នាំ។ ភាគច្រើន នាងនៅ California ដើម្បីមើលថែកូនៗ ថតកុន និងចូលរួមសវនាការដណ្ដើមសិទ្ធិចិញ្ចឹមកូនជាមួយនឹង Brad Pitt។

កាលពីចុងខែឧសភា តុលាការបានអនុញ្ញាតឱ្យ Brad Pitt មានសិទ្ធិចិញ្ចឹមកូន ស្មើនឹង Angelina Jolie។ នាងមិនសុខចិត្ត ដោយយល់ថា ចៅក្រមបានរំលោភលើច្បាប់របស់រដ្ឋ California ព្រោះថា Brad Pitt ធ្លាប់ប្រើអំពើហិង្សាក្នុងគ្រួសារ ផ្ទុយពីផលប្រយោជន៍របស់ក្មេង។ នាងនឹងបន្តធ្វើការតវ៉ា ដើម្បីទាមទារសិទ្ធិចិញ្ចឹមកូនទាំងស្រុងឡើងវិញ។

Brad Pitt និង Angelina Jolie បានស្គាល់គ្នា នៅពេលថតកុន រឿង Mr. & Mrs. Smith (2005)។ ក្រោយមក Pitt បានលែងលះជាមួយភរិយាឈ្មោះ Jennifer Aniston ដើម្បីមករក Jolie។ អ្នកទាំងពីរក៏បានរៀបការកាលពីឆ្នាំ 2014 និងមានកូនជាមួយគ្នាចំនួន 6 នាក់។ ឆ្នាំ 2016 Jolie បានប្ដឹងលែងលះ ដោយមូលហេតុថា មានការយល់ឃើញខុសគ្នាជាច្រើនចំនុច ដែលមិនអាចផ្សះផ្សានឹងគ្នាបាន៕

ប្រភព៖ Daily Mail
ប្រែសម្រួល៖ បុត្រា

July 23, 2021

ពាណិជ្ជកម្ម អាមេរិក-ចិន ល្អដូចមិនធ្លាប់មានភាពតានតឹង និង COVID-19

យោងតាមសារព័ត៌មាន Bloomberg សហរដ្ឋអាមេរិក និងចិន កំពុងដោះដូរទំនិញក្នុងល្បឿនលឿនបំផុត ធៀបនឹងប៉ុន្មានឆ្នាំកន្លងមកនេះ ហើយប្រៀបដូចជាពុំធ្លាប់មានសង្គ្រាមពាណិជ្ជកម្ម ឬវីរុស COVID-19 ដូច្នោះដែរ។

រយៈពេល 18 ខែ បន្ទាប់ពីអាជ្ញាធររបស់លោក Trump បានចុះកិច្ចព្រមព្រៀងផ្អាកសង្គ្រាមពាណិជ្ជកម្ម កង្វះផ្នែកពាណិជ្ជកម្មរបស់ សហរដ្ឋអាមេរិក នៅតែមិនទាន់បានកាត់បន្ថយ ក្នុងនោះ ការយកពន្ធនានា នៅតែត្រូវបានអនុវត្ត ហើយក៏មិនទាន់មានកិច្ចចរចាណាមួយស្ដីពីបញ្ហាសេដ្ឋកិច្ចផ្សេងៗនៅឡើយ។ ប៉ុន្តែ ពាណិជ្ជកម្មទ្វេភាគី គឺជាវិស័យដែលមានស្ថិរភាព នៅក្នុងស្ថានការណ៍ដែលទំនាក់ទំនងរបស់ប្រទេសទាំង 2 បន្តអាក្រក់ឡើងៗ ទាក់ទិននឹងបញ្ហាប្រភពរបស់វីរុស COVID-19 បញ្ហាហុងកុង និង តៃវ៉ាន់ ។ល។

កាលពីខែកុម្ភ ឆ្នាំ 2020 ចំណូលបានមកពីវិស័យពាណិជ្ជកម្ម រវាង អាមេរិក-ចិន បានថយចុះ 19 ពាន់លានដុល្លារ ដោយសារតែចិនបានបិទរោងចក្រជាច្រើន ព្រោះតែរោគរាតត្បាត។ ប៉ុន្តែ យោងតាមទិន្នន័យផ្លូវការរបស់ចិន តួលេខនេះបានងើបឡើងដល់កំណត់ត្រាថ្មីក្នុងឆ្នាំ 2020។ ការងើបឡើងនេះ ទំនងជានឹងនៅតែបន្ត គ្រាដែលចិន ទិញកសិផលរាប់លានតោនពី សហរដ្ឋអាមេរិក នៅក្នុងឆ្នាំនេះ និងឆ្នាំក្រោយ ទន្ទឹមនឹងការដែលពលរដ្ឋអាមេរិកដែលនៅជាប់ក្នុងផ្ទះ នៅតែបន្តទិញទំនិញយ៉ាងច្រើនមិនធ្លាប់មានពីមុនមក។

សកម្មភាពពាណិជ្ជកម្មមមាញឹកឡើងវិញ បើទោះជាមានការព្យាករទាក់ទងនឹងបញ្ហាពន្ធដា ក្នុងនោះ តម្លៃខ្ទង់សែនលានដុល្លារនៃទំនិញរបស់ចិន នឹងត្រូវចែករំលែកដល់បណ្ដាខ្សែច្រវាក់ផ្គត់ផ្គង់។ ប៉ុន្តែ ភាគីទាំងពីរ បានរៀនរស់ជាមួយនឹងប្រភេទពន្ធផ្សេង។ បណ្ដាក្រុមហ៊ុនចិន បញ្ជាទិញទំនិញច្រើនជាងមុន ដើម្បីឆ្លើយតបនឹងលក្ខខណ្ឌនៃកិច្ចព្រមព្រៀងស្ដីពីពាណិជ្ជកម្ម ឆ្នាំ 2020។ ចំណែក សហរដ្ឋអាមេរិក វិញ ទិញទំនិញទាំងឡាយណាដែលខ្លួនមិនអាចទិញពីកន្លែងផ្សេង ដើម្បីផ្គត់ផ្គង់តម្រូវការរបស់គ្រួសារនានា ដោយប្រើប្រាស់កញ្ចប់ជំនួយសេដ្ឋកិច្ចរាប់លានលានដុល្លាររបស់រដ្ឋាភិបាល។

ទំនិញចិន ដែលបាននាំចូល សហរដ្ឋអាមេរិក កើនឡើងខ្ពស់ជាងទំនិញដែលបាននាំពី សហរដ្ឋអាមេរិក មកប្រទេស ចិន

«យើងឃើញថា តម្រូវការប្រើប្រាស់យ៉ាងខ្លាំងក្លា កំពុងតែកើតមានឡើងនៅក្នុងរដូវ COVID-19 ហើយផលិតផលនាំចូល ក៏កំពុងកើនឡើងខ្ពស់។ នោះជាសញ្ញាបង្ហាញថា សេដ្ឋកិច្ចនៅតែបន្តងើបឡើង» លោក Jonathan Gold អនុប្រធានផ្នែកផ្គត់ផ្គង់ និងគោលនយោបាយពន្ធដា នៃក្រុមហ៊ុន National Retail Federation ឱ្យដឹងដូច្នេះ។

ក្នុងដំណាក់កាលដូចគ្នា ទំនិញដែលនាំចូលពីកូរ៉េខាងត្បូង និងតៃវ៉ាន់ ទៅកាន់ សហរដ្ឋអាមេរិក ក៏បានកើនឡើងខ្ពស់ផងដែរ។ ប៉ុន្តែ ជិតពាក់កណ្ដាលក្នុងចំណោមទំនិញតម្លៃ 259 ពាន់លានដុល្លារ ដែលចេញចូលតាមកំពង់ផែ Los Angeles (កំពង់ផែធំបំផុតរបស់អាមេរិក) មានជាប់ទាក់ទងនឹងប្រទេសចិន និង ហុងកុង។

Jonathan Gold និយាយថា «ពន្ធដា និងថ្លៃដឹកជញ្ជូនកើនឡើង សុទ្ធតែប៉ះពាល់ដល់ផលប្រយោជន៍របស់ក្រុមហ៊ុននានា។ រដ្ឋាភិបាលរបស់លោក Biden បច្ចុប្បន្នមិនទាន់ឱ្យដឹងថា តើនឹងអនុវត្តកិច្ចព្រមព្រៀងបន្តទៀត ឬយ៉ាងណានៅឡើយ ប៉ុន្តែ កំពុងតែពិចារណាអំពីគោលនយោបាយរបស់ សហរដ្ឋអាមេរិក ចំពោះ ចិន ទាក់ទងនឹងបញ្ហាពាណិជ្ជកម្មនេះ៕

ប្រភព៖ Bloomberg
ប្រែសម្រួល៖ បុត្រា

July 23, 2021

ក្រុមហ៊ុនចិន បង្ហាញឡានហោះកំណែថ្មី អាចដឹកមនុស្សបាន 2 នាក់

ក្រុមហ៊ុន XPeng របស់ប្រទេសចិន កាលពីថ្ងៃទី 18 កក្កដា បានបង្ហាញកំណែរថយន្តហោះថ្មីបំផុត អាចដឹកមនុស្សបាន 2 នាក់ និងសម្រាប់ធ្វើចរាចរណ៍ក្នុងទីក្រុង។

ក្រុមហ៊ុនផលិតរថយន្តអគ្គិសនី XPeng របស់ចិន បានតាំងបង្ហាញ X2 ដែលជាឡានហោះកំណែថ្មីបំផុតរបស់ខ្លួន នៅក្នុងពិព័រណ៍ សៀងហៃ។

XPeng X2 ធ្វើអំពីសរសៃកាបោន និងប្រើប្រាស់ស្លាបកង្ហារចំនួន 8 ដែលបំពាក់លើដងចំនួន 4 ព្រមទាំងមានអាគុយចំនួន 8 ក្រុមដាច់ដោយឡែកពីគ្នា។ នេះគឺជាយានជំនិះដែលផ្ទុកមនុស្សបាន 2 នាក់ ហើយហោះឡើង និងចុះចតដោយបញ្ឈរត្រង់ដំបូងគេ ដែលមានលក្ខណៈជាបន្ទប់បិទជិត និងអាចផ្ទុកទម្ងន់ 200 គីឡូក្រាម។

X2 ដំណើរការដោយថាមពលអគ្គិសនីទាំងស្រុង ហើយអាចហោះហើរក្នុងរយៈពេល 35 នាទីជាប់ៗគ្នា បន្ទាប់ពីបញ្ចូលថាមពលពេញ។ វាត្រូវបានរចនាឡើងដើម្បីអាចហោះឡើងដល់កម្ពស់ចាប់ពី 300 ដល់ 500 ម៉ែត្រ ធៀបនឹងផ្ទៃដី ជាមួយនឹងល្បឿនអតិបរមា 130 គីឡូម៉ែត្រ/ម៉ោង។

https://www.youtube.com/watch?v=VjsDtOLJvms

មុខងារបើកបរស្វ័យប្រវត្ត រួមផ្សំនឹងការបើកបរដោយមនុស្ស របស់យាននេះ គឺអាចឆ្លើយតបទៅតាមតម្រូវការធ្វើដំណើររយៈចម្ងាយជិតនៅក្នុងទីក្រុង។ ទន្ទឹមនឹងនេះ វាក៏អាចប្រើប្រាស់សម្រាប់ការល្បាតពីលើអាកាស ការជួយសង្គ្រោះ ឬដឹកជញ្ជូនផ្នែកសុខាភិបាល។ល។

ប្រភព៖ Planetcar
ប្រែសម្រួល៖ បុត្រា

July 23, 2021

Olympic Tokyo 2020 បើកជាផ្លូវការនៅថ្ងៃនេះ (23/7)

ម៉ោង 18 ព្រលប់ នៃ ថ្ងៃទី 23 កក្កដា ឆ្នាំ 2021 (ម៉ោងនៅកម្ពុជា) ពិធីបើកការប្រកួតកីឡា Olympic Tokyo 2020 នឹងត្រូវធ្វើឡើងជាផ្លូវការនៅកីឡដ្ឋានជាតិតូខ្យូ ដែលស្ថិតក្នុងរាជធានីតូខ្យូ នៃប្រទេស ជប៉ុន។

ក្រោយរយៈពេលជាច្រើនថ្ងៃដែលបានរង់ចាំ ចុងក្រោយ Olympic Tokyo 2020 ក៏នឹងត្រូវបើកជាផ្លូវការនៅម៉ោង 18 នៃថ្ងៃទី 23 ខែកក្កដា ម៉ោងនៅភ្នំពេញ។ មុនពេលពិធីបើកការប្រកួតជាផ្លូវការនេះ កីឡាចំនួន 4 ប្រភេទ ត្រូវបានបើកការប្រកួត ក្នុងនោះមាន កីឡាបាល់ទាត់ បាល់ទន់ (Softball) បាញ់ធ្នូ និង ចែវទូក (rowing)។

ដំបូងឡើយ Olympic Tokyo 2020 គ្រោងបើកនៅក្នុងឆ្នាំ 2020 ប៉ុន្តែ ត្រូវពន្យារពេល 1 ឆ្នាំ ដោយសារ COVID-19។ បច្ចុប្បន្ន រោគរាតត្បាតនេះ ក៏កំពុងតែបង្កភាពស្មុគស្មាញនៅប្រទេស ជប៉ុន ប៉ុន្តែ គណៈកម្មការ Olympic Tokyo 2020 នៅតែសម្រេចឱ្យប្រារព្ធព្រឹត្តិការណ៍អូឡាំពិកលើកទី 32 នេះ ក្នុងលក្ខខណ្ឌទប់ស្កាត់ និងប្រយុទ្ធប្រឆាំងយ៉ាងតឹងរ៉ឹង។

ព្រោះតែ COVID-19 កម្មវិធីមួយចំនួននៃគម្រោងបើកព្រឹត្តិការណ៍កីឡា Olympic Tokyo 2020 ក៏ត្រូវបានកាត់ចោល ធៀបនឹងគម្រោងដំបូង។ ប៉ុន្តែ ការហែក្បួនរបស់ក្រុមកីឡាករនានា និងការអុជភ្លើងគប់ នៅតែត្រូវធ្វើឡើងដូចធម្មតា។

តាមផែនការ មហាក្សត្រជប៉ុន Naruhito នឹងជាអ្នកប្រកាសបើកព្រឹត្តិការណ៍កីឡាអូឡាំពិក (Olympic Tokyo 2020) លើកនេះ។ ពិធីបើកការប្រកួតកីឡាអូឡាំពិក ឆ្នាំនេះ នឹងមានវត្តមានរបស់មេដឹកនាំប្រទេស និងដែនដីចំនួន 15 ក្នុងនោះក៏មានប្រធានាធិបតីបារាំង Emmanuel Macron និងភរិយារបស់ប្រធានាធិបតីសហរដ្ឋអាមេរិក Joe Biden លោកស្រី Jill Biden ។ល។

ប្រភព៖ CNN
ប្រែសម្រួល៖ បុត្រា

July 23, 2021

អតីតមន្ត្រីយោធាជើងទឹក SEAL បង្ហាញពីភាពអស្ចារ្យ ពេលក្រោកពីដេក ម៉ោង 4 និង 30 នាទី៖ «ឆាប់ក្រោក ជីវិតនឹងប្ដូរផ្លាស់!»

Willink ជាមនុស្សម្នាក់ដែលមានទម្លាប់ក្រោកពីដំណេកនៅវេលាម៉ោង 4 និង 30 នាទីព្រឹក ហើយគាត់បញ្ជាក់ថា គ្រប់គ្នាអាចធ្វើបាន។ ការមានវិន័យក្នុងការក្រោកពីព្រលឹម «មិនមែនកើតមក យកមកតាមនោះឡើយ» គ្រូបង្វឹក និងជាម្ចាស់សៀវភៅជាច្រើនក្បាលរូបនេះ បានប្រាប់ទំព័រ Make It របស់ CNBC ដូច្នេះ។

លោក Jocko Willink អតីតមន្ត្រីមួយរូបនៃអង្គភាពពិសេសរបស់កងទ័ពជើងទឹក សហរដ្ឋអាមេរិក និយាយថា «ពុំមានអ្វីលំបាកសម្រាប់ការឆាប់ក្រោកពីគេងនៅពេលព្រលឹម។ ប្រការដែលអ្នកត្រូវធ្វើ នោះគឺ នៅពេលនាឡិការោទ៍ អ្នកត្រូវតែក្រោក។ ការដាក់វិន័យសម្រាប់ជីវិតគឺ សាមញ្ញដូច្នេះ»។ Willink បញ្ជាក់ថា គ្រប់គ្នាអាចធ្វើបាន ដោយគ្រាន់តែកំណត់ឱ្យបានច្បាស់ថា នោះគឺជាអ្វីដែលអ្នកនឹងធ្វើ។

«ពិតណាស់ អ្នកក៏អាចជ្រើសរើសជីវភាពតាមរបៀបផ្សេងពីនេះ។ អ្នកអាចសម្រេចថា នឹងនៅលើគ្រែ និងមិនគ្រប់គ្រងពេលវេលានៅក្នុងថ្ងៃនេះ ហើយទុកឱ្យវាធ្វើជាម្ចាស់ជីវិតរបស់អ្នក ប៉ុន្តែ ខ្ញុំចង់ប្រាប់អ្នកថា ជីវភាពប្រចាំថ្ងៃដែលអ្នកធ្វើជាម្ចាស់ នោះនឹងល្អប្រសើរជាងឆ្ងាយ បើធៀបនឹងការបណ្ដោយឱ្យជីវភាពគ្រប់គ្រងលើអ្នក។ ចូរកុំទុកឱ្យបញ្ហានេះកើតឡើង។ ចូរតតាំងប្រឆាំងនឹងវា!» លោក Jocko Willink បន្ថែម។

យោងតាមការស្រាវជ្រាវដែលអូសបន្លាយពេល 5 ឆ្នាំ អំពីសេដ្ឋីដែលរកស៊ីតាំងពីបាតដៃទទេ អ្នកនិពន្ធ Thomas C. Corley បានរកឃើញថា ជិត 50% ក្នុងចំណោមសេដ្ឋីទាំងនោះ តែងតែក្រោកយ៉ាងតិច 3 ម៉ោង មុនពេលថ្ងៃធ្វើការថ្មីមកដល់។

«ការក្រោកពីព្រលឹមដើម្បីបង្ហើយការងារ នឹងជួយឱ្យអ្នកគ្រប់គ្រងបានច្រើនលើជីវិតរបស់ខ្លួន» Corley បានសរសេរដូច្នេះ នៅក្នុងសៀវភៅ “Change Your Habits, Change Your Life”។ «វានាំមកនូវអារម្មណ៍ជឿជាក់ថា អ្នកពិតជាកំពុងកំណត់ទិសដៅនៃជីវិត។ វានាំមកនូវថាមពលសម្រាប់ជីវិត»។

ពេលព្រឹក អាចជាវេលាដែលមានប្រសិទ្ធភាពបំផុតនៅក្នុងមួយថ្ងៃៗ ព្រោះវាអនុញ្ញាតឱ្យអ្នកបំពេញការងារដោយជោគជ័យ មុនពេលមានការរំខានអារម្មណ៍ពីបរិយាកាសនៅជុំវិញ នេះបើតាមសារព័ត៌មាន The Wall Street Journal ដែលបានចេញផ្សាយកាលពីឆ្នាំ 2016។ អ្នកឯកទេសផ្លូវចិត្ត Josh Davis និងអ្នកនិពន្ធរបស់សៀវភៅ “Two Awesome Hours” បានប្រាប់ទស្សនាវដ្ដីថា «នៅពេលអ្នកស្ថិតក្នុងបរិយាកាសស្ងប់ស្ងាត់ ហើយអ្នកក៏មិនបានបែកអារម្មណ៍ដោយសារការរំខានពីអ្នកដទៃ នោះប្រសិទ្ធភាពនៃការបំពេញការងាររបស់អ្នក នឹងកើនឡើងខ្ពស់ជាងធម្មតា។ អ្នកអាចបំពេញកិច្ចការសំខាន់ៗបានយ៉ាងលឿន ដោយជោគជ័យ និងដោយពេញចិត្ត»។

ជាមូលដ្ឋាន ការឆាប់ក្រោកពីព្រឹកគឺ មានន័យថា អ្នកកំពុងបំបាត់កត្តារំខានជាច្រើន មានដូចជា ការរំខានពីសារ ឬអ៊ីមេល និងការជូនដំណឹងនៅលើបណ្ដាញសង្គម។ល។ Davis និយាយថា «ពុំមានអ្នកណាម្នាក់ចង់ឱ្យអ្នកផ្ញើអ៊ីមេល ឬលើកទូរស័ព្ទនៅវេលាម៉ោង 4 ព្រឹកនោះឡើយ ហើយក៏ពុំមានអ្នកណាគេបង្ហោះអ្វីមួយនៅលើ Facebook នោះដែរ។ ដូច្នេះ អ្នកបានលុបបំបាត់កត្តាអូសទាញពីខាងក្នុង និងពីខាងក្រៅ»។

លើកក្រោយ នៅពេលអ្នកឃើញថា ខ្លួនត្រូវបានអូសទាញ និងចង់ដេកបន្តទៀត សូមនឹកដល់ឃ្លាដែល Willink ធ្លាប់បាននិយាយថា «បើសិនជាខ្ញុំកំពុងដេកលើគ្រែ ហើយថ្ងៃនោះបានអូសទាញខ្ញុំ ដោយវាប្រាប់ឱ្យខ្ញុំបន្តទាញផួយដណ្ដប់ដល់ក និងដេកអង្កួញជើងជាថ្មី នោះគឺជាប្រការដែលរំលោភលើខ្ញុំ ហើយខ្ញុំនឹងមិនទទួលយកវាឡើយ។ អ្វីដែលខ្ញុំនឹងធ្វើ នោះគឺត្រូវហែក បំបែកការអូសទាញនោះ ខ្ញុំនឹងក្រោកចេញពីគ្រែ ហើយខ្ញុំនឹងដោះស្រាយនូវអ្វីដែលខ្ញុំត្រូវធ្វើ។ ខ្ញុំនឹងធ្វើឱ្យបានសម្រេច»។ ចូរកុំបណ្ដោយឱ្យថ្ងៃនោះ ធ្វើឱ្យអ្នកបរាជ័យ។ ចូរយកឈ្នះលើថ្ងៃដូច្នោះ!»។

ពេលបានអានមកដល់នេះ អ្នកឃើញហើយថា ពុំមានអាថ៌កំបាំងកម្រិតកំពូលណាមួយសម្រាប់ការបង្កើតទម្លាប់ឆាប់ក្រោកពីព្រលឹមសោះឡើយ។ វាគ្រាន់តែជារឿងសាមញ្ញៗប៉ុណ្ណោះ នោះគឺការប្ដេជ្ញាចិត្ត ការហាត់ពត់ លត់ដំខ្លួនឱ្យមានវិន័យ ការភ្ញាក់រលឹក ដើម្បីបង្កើតទម្លាប់ឆាប់ក្រោកពីព្រលឹម! តែប៉ុណ្ណឹងគឺគ្រប់គ្រាន់ហើយ៕

ប្រភព៖ CNBC Make It
ប្រែសម្រួល៖ បុត្រា

July 23, 2021

ភាពយន្តស្ដីពីការប្រយុទ្ធនឹង COVID-19 នៅ Wuhan រកបានចំណូលបាន 154 លានដុល្លារអាមេរិក

(ប្រទេសចិន)៖ «Chinese Doctors» ដែលជាខ្សែភាពយន្តចិន និយាយអំពីការប្រយុទ្ធប្រឆាំងនឹងរោគរាតត្បាត COVID-19 នៅទីក្រុង Wuhan រកបានប្រាក់ចំណូល 1 ពាន់លានយុន (ជាង 154 លានដុល្លារអាមេរិក)។

យោងតាមសារព័ត៌មាន Sina ខ្សែភាពយន្តដែលបានធ្វើឱ្យកក្រើកបន្ទប់លក់សំបុត្រក្នុងរដូវក្ដៅឆ្នាំនេះ កំពុងតែនាំមុខគេលើប្រាក់ចំណូល បើធៀបនឹងខ្សែភាពយន្តដែលចេញដំណាលគ្នា មានដូចជា រឿង 1921 ឬ Realm of Terracotta ជាដើម។ ក្រុមអ្នកជំនាញ បានព្យាករថា Chinese Doctors នឹងរកបានចំណូលប្រហែល 1.6 ពាន់លានយុន ដែលស្មើនឹង 247 លានដុល្លារអាមេរិក។

Chinese Doctors ដែលបានថតកាលពីចុងឆ្នាំ 2020 គឺជាភាពយន្តមួយ យោងទៅតាមទិដ្ឋភាពនៅឯមន្ទីរពេទ្យនានាក្នុងទីក្រុង Wuhan ចាប់តាំងពី COVID-19 បានបង្ហាញខ្លួន រហូតដល់ត្រូវបានគ្រប់គ្រង។ ស្នាដៃនិពន្ធនេះ បង្ហាញឡើងវិញនូវទិដ្ឋភាពនៃប្រការប្រយុទ្ធប្រឆាំងនឹង COVID-19 រួមនឹងការតស៊ូដើម្បីរស់របស់ក្រុមវេជ្ជបណ្ឌិត និងបុគ្គលិកសុខាភិបាល។ Chinese Doctors មានការចូលរួមសំដែងពីតារាល្បីៗមួយចំនួន ដូចជា Zhang Hanyu (ដើរតួជា Zhang Jingyu), Yuan Quan (Wen Ting), Zhu Yawen (Tao Jun), Li Chen (Wu Chenguang), Jackson Yee (Yang Xiaoyang), Oho Ou (Jin Zai) និង Zhou Ye (Xiao Wen)។ល។

ទោះជាជោគជ័យក៏ដោយ ប៉ុន្តែ Chinese Doctors ក៏ទទួលបានការរិះគន់មួយចំនួន ដូចជាថា ភាពយន្តនេះ មានកន្លែងខ្លះខ្វះភាពត្រឹមត្រូវ មិនដូចជាក់ស្ដែង។ អ្នកខ្លះថា «រោគរាតត្បាតមិនទាន់បានបញ្ចប់ផង ប៉ុន្តែ សាច់រឿងនេះ មើលទៅដូចបានកើតឡើងតាំងពីសតវត្សរ៍មុន»។

Chinese Doctors គឺជាខ្សែភាពយន្តដ៏កម្រ ដែលរកបានចំណូលច្រើនគួរសមនៅក្នុងរដូវក្ដៅឆ្នាំនេះ។ យោងតាម Mtime គិតមកដល់ថ្ងៃទី 21 កក្កដា ចំណូលសរុបនៅក្នុងរដូវក្ដៅឆ្នាំនេះ មានចំនូនជាង 4.2 ពាន់លានយុន ស្មើនឹង 648.6 លានដុល្លារអាមេរិក ថយចុះពាក់កណ្ដាល បើធៀបនឹងអំឡុងពេលដូចគ្នា ក្នុងឆ្នាំ 2018 និង 2019៕

ប្រភព៖ Xinhuanet
ប្រែសម្រួល៖ បុត្រា

July 22, 2021

អ្នករាំរបាំ វ័យ 26 ឆ្នាំ គ្រងមកុដបវរកញ្ញាឯកភពផែនដី Miss Earth Japan របស់ ជប៉ុន ឆ្នាំ 2021

បេក្ខនារី Konatsu Yoshida តំណាងឱ្យខេត្ត Hokkaido បានគ្រងមកុដបវរកញ្ញាឯកផែនដីជប៉ុន ឆ្នាំ 2021 បន្ទាប់ពីបានយកឈ្នះលើបេក្ខនារីចំនួន 26 នាក់ មកពីតំបន់នានា ក្នុងប្រទេសនេះ។

នៅក្នុងរាត្រីផ្ដាច់ព្រ័ត្រ កាលពីថ្ងៃទី 20 ខែកក្កដា នៅរាជធានី តូខ្យូ នាង Konatsu Yoshida ត្រូវបានប្រគល់មកុដពី Anna Tode ដែលជាបវរកញ្ញាឯកផែនដីជប៉ុន ឆ្នាំ 2020 (Miss Earth Japan 2020)។ បវរកញ្ញាឯកថ្មីនេះ មានកម្ពស់ 1.7 ម៉ែត្រ គឺជាអ្នករាំរបាំបាឡេ និងជាអ្នកលេងព្យ៉ាណូផងដែរ។ នាងធ្លាប់បានរៀននៅវិទ្យាស្ថានរបាំអន្តរជាតិក្នុងទីក្រុង ប៊ែកឡាំង និងបានរស់នៅក្នុងប្រទេស អាល្លឺម៉ង់ អស់មួយរយៈពេលផងដែរ។ នេះបើតាមសារព័ត៌មាន Missosology។

បវរកញ្ញាឯកភពផែនដីរបស់ជប៉ុន ឆ្នាំ 2021 (Miss Earth Japan 2021)

បវរកញ្ញាភពផែនដី Konatsu Yoshida នឹងធ្វើជាតំណាងរបស់ ជប៉ុន ទៅចូលរួមប្រលងបវរកញ្ញាភពផែនដីឆ្នាំ 2021 ដែលគ្រោងនឹងប្រារព្ធឡើងនៅប្រទេស ហ្វីលីពីន នៅចុងឆ្នាំនេះ។

គណៈកម្មការក៏បានផ្ដល់រង្វាន់ បវរកញ្ញាឯករង ក្នុងនាមជា Miss Air ដល់ Haruka Miura (តំណាងឱ្យ Aomori), Miss Water ដល់ Mari Fujita (Osaka) និង Miss Fire ដល់ Rina Takehara (តំណាងឱ្យរាជធានី)។

Miss Earth Japan គឺជាព្រឹត្តិការណ៍ប្រលងបវរកញ្ញាប្រចាំឆ្នាំរបស់ប្រទេស ជប៉ុន ដើម្បីជ្រើសរើសបេក្ខភាពទៅចូលរួមប្រកួតប្រជែងនៅ Miss Earth អន្តរជាតិ៕

ប្រភព៖ Missosology
ប្រែសម្រួល៖ បុត្រា

July 22, 2021

តារាចម្រៀង Britney Spears មានសុភមង្គលយ៉ាងខ្លាំង ពេលបានបើកបររថយន្ត

តារាចម្រៀងអាមេរិកាំង នាង Britney Spears បានបើកបររថយន្តជាលើកដំបូង បន្ទាប់ពីត្រូវតុលាកហាមឃាត់អស់រយៈពេល 13 ឆ្នាំ ដោយឱ្យរស់នៅក្រោមការគ្រប់គ្រងទាំងស្រុងដូចកូនតូច ពីសំណាក់ឪពុក។

យោងតាមសារព័ត៌មាន People កាលពីថ្ងៃទី 21 កក្កដា ប្រភពព័ត៌មានដែលស្និទ្ធនឹង Britney Spears បានឱ្យដឹងថា «តារាចម្រៀងរូបនេះ រីករាយខ្លាំងណាស់ នៅពេលមានសិទ្ធិបើកបររថយន្តឡើងវិញ។ នាងសប្បាយចិត្តខ្លាំង និងដឹងគុណចំពោះអ្នកដែលបានជួយដល់នាងនាពេលថ្មីៗនេះ។ Britney Spears ក៏ពេញចិត្តនឹងសវនាការរបស់តុលាការនាពេលកន្លងផងដែរ។ នាងសង្ឃឹមថា មេធាវីថ្មី អាចជួយនាងឱ្យរួចផុតពីការគ្រប់គ្រង (ដែលជាបញ្ជារបស់តុលាការ)»។

Britney Spears ធ្លាប់ត្រូវបានរិះគន់ នៅពេលបណ្ដោយឱ្យកូនតូចអង្គុយលើភ្លៅ ដោយមិនពាក់ខ្សែក្រវាត់សុវត្ថិភាពឱ្យកូន ក្នុងពេលបើកបររថយន្ត កាលពីឆ្នាំ 2006។ ក្រោយពីត្រូវបានតុលាការចេញសាលក្រមឆ្នាំ 2008 តារាចម្រៀងរូបនេះ ក៏ត្រូវស្ថិតក្រោមការគ្រប់គ្រងរបស់ឪពុក ហើយមិនមានសិទ្ធិបើកបរនោះទេ បើសិនមិនមានការអនុញ្ញាតពីឪពុក។ បងប្រុសរបស់នាង ធ្លាប់បាននិយាយថា Britney Spears គឺជាអ្នកបើកបរមិនល្អ ហើយថា ការហាមមិនឱ្យនាងបើកបររថយន្ត គឺជា រឿងត្រឹមត្រូវ។

នៅក្នុងសវនាការកាលពីថ្ងៃទី 14 កក្កដា ចៅក្រមបានយល់ព្រមតាមការស្នើរបស់ Britney Spears ដោយតែងតាំងមេធាវីថ្មី ឈ្មោះ Mathew Rosengart បន្ទាប់ពីលោក Samuel Ingham II បានសុំឈប់ពីការងារ។ នេះជាលើកដំបូងហើយដែលនាងមានសិទ្ធិជ្រើសរើសមេធាវីផ្ទាល់ខ្លួន ក្រោយរយៈពេល 13 ឆ្នាំដែលត្រូវតុលាការហាមឃាត់។

នៅក្នុងសវនាការខាងលើនេះដែរ Britney Spears ក៏បានចោទឪពុករបស់ខ្លួនអំពីបទរំលោភលើសិទ្ធិជាអាណាព្យាបាល។ នាងឱ្យដឹងថា ខ្លួនត្រូវបានគ្រប់គ្រងយ៉ាងឃោរឃៅ។ តារាចម្រៀងរូបនេះ ចង់ឱ្យតុលាការបើកការស៊ើបអង្កេតលើឪពុកទៀតផង។

លោក Jamie Spears ដែលជាឪពុករបស់ Britney Spears ត្រូវបានតុលាការសម្រេចឱ្យធ្វើជាអ្នកគ្រប់គ្រងលើ Britney Spears ចាប់ពីឆ្នាំ 2018 ក្រោយពីនាងបានឃុំខ្លួនឯង និងកូនៗនៅក្នុងបន្ទប់ បន្ទាប់ពីចាញ់ក្ដីនៅតុលាការ ទាក់ទិននឹងសិទ្ធិចិញ្ចឹមកូនក្រោយការលែងលះស្វាមី។ លោក Jamie Spears ទទួលបានប្រាក់បៀវត្សប្រចាំឆ្នាំប្រហែល 130,000 ដុល្លារ សម្រាប់តួនាទីនេះ។ ប៉ុន្មានឆ្នាំកន្លងទៅថ្មីៗនេះ Britney Spears បានស្នើតុលាការ ដកបទបញ្ជាទាក់ទងនឹងសិទ្ធិជាអាណាព្យាបាលលើរូបនាងពីសំណាក់ឪពុក ប៉ុន្តែមិនបានសម្រេច។ នៅក្នុងវ័យ 40 ឆ្នាំ Britney Spears ពុំមានសិទ្ធិបោះឆ្នោត និងជួបកូនៗដោយសេរីនោះឡើយ ហើយនាងថែមទាំងត្រូវគ្រប់គ្រងលើបញ្ហាហិរញ្ញវត្ថុ ការឆ្លើយនឹងកិច្ចសម្ភាស។ល។

ប្រភព៖ People
ប្រែសម្រួល៖ បុត្រា

July 22, 2021

ក្រុមហ៊ុនស៊ុយអែត អភិវឌ្ឍយន្តហោះ ប្រើម៉ាស៊ីនអគ្គិសនីតម្លៃទាបជាង 20 ដង ធៀបនឹងម៉ាស៊ីនទួរប៊ីនកង្ហារធម្មតា

(ស៊ុយអែត)-យន្តហោះអគ្គិសនី ES-19 ដែលនឹងផ្ដល់សេវាកម្មដឹកអ្នកដំណើរផ្លូវជិត អាចដឹកភ្ញៀវបាន 19 នាក់ និងអាចធ្វើដំណើរបានរយៈចម្ងាយ 400 គីឡូម៉ែត្រ។

ក្រុមហ៊ុនបច្ចេកវិទ្យាថ្មី Heart Aerospace របស់ប្រទេស ស៊ុយអែត កំពុងអភិវឌ្ឍយន្តហោះ ES-19 ដំណើរការទាំងស្រុងដោយអគ្គិសនី និងសម្រាប់ដឹកអ្នកដំណើរក្នុងរយៈចម្ងាយផ្លូវជិត ដែលបច្ចុប្បន្នមិនមានសក្ដានុពលផ្នែកសេដ្ឋកិច្ចសម្រាប់ប្រភេទយន្តហោះធម្មតា។ នេះបើតាមសារព័ត៌មាន New Atlas ចេញផ្សាយកាលពីថ្ងៃទី 19 កក្កដា។ Heart Aerospace ទើបតែរកបានអ្នកវិនិយោគថ្មីជាច្រើន ក្នុងនោះមាន United Airlines ផងដែរ។ ក្រុមហ៊ុន United Airlines គ្រោងនឹងបញ្ជាទិញ ES-19 ចំនួន 100 គ្រឿង ដើម្បីប្រើប្រាស់ក្នុងពេលអនាគត។

យន្តហោះអគ្គិសនី ត្រូវការពេលវេលាយូរទៀត ទើបអាចផ្ដល់សេវាកម្មដឹកជញ្ជូនផ្លូវឆ្ងាយ ឬដំណើរហោះហើរជាអន្តរជាតិ ដូចទៅនឹងយន្តហោះពាណិជ្ជកម្មនាបច្ចុប្បន្ន ដោយសារតែបច្ចេកវិទ្យាថាមពលអាគុយមានកំណត់។ ប៉ុន្តែ ពួកវាមានសក្ដានុពលខ្លាំងក្លា នៅពេលដឹកជញ្ជូនផ្លូវជិត។ ES-19 ត្រូវបានអភិវឌ្ឍឡើង ដើម្បីឆ្លើយតបនឹងគោលដៅនេះ។

ក្រុមហ៊ុន Heart Aerospace បានឱ្យដឹងថា ម៉ាស៊ីនប្រើអគ្គិសនីរបស់ ES-19 មានតម្លៃទាបជាង 20 ដង បើធៀបនឹងម៉ាស៊ីនទួរប៊ីនកង្ហារធម្មតា ហើយការចំណាយលើការថែទាំក៏ទាបជាង 100 ដងផងដែរ។

ES-19 អាចដឹកភ្ញៀវបាន 19 នាក់ ដោយហោះហើរក្នុងរយៈចម្ងាយផ្លូវ 400 គីឡូម៉ែត្រ។ រយៈចម្ងាយនេះនឹងត្រូវកើនឡើង នៅពេលបច្ចេកវិទ្យាអាគុយនាពេលអនាគត រីកចម្រើនជាងនេះ។ ES-19 អាចហោះឡើងពីផ្លូវរត់ប្រវែងត្រឹម 750 ម៉ែត្រ។ វាក៏អាចដឹកអ្នកដំណើរឆ្លងកាត់ភ្នំ ឬពីកោះមួយទៅកោះមួយ ជាតំបន់ដែលពិបាកធ្វើដំណើរដោយផ្លូវគោក។ នេះបើតាម Heart Aerospace។

តាមផែនការ Heart Aerospace នឹងបង្ហើយកិច្ចការរចនារូបរាងសម្រាប់ ES-19 នៅក្នុងឆ្នាំ 2023 និងធ្វើការហោះហើរដំបូងនៅក្នុងត្រីមាសទីមួយ ឆ្នាំ 2024។ ក្រុមហ៊ុននេះ ក៏សង្ឃឹមថា ម៉ូដែលយន្តហោះថ្មីរបស់ខ្លួន នឹងទទួលបានលិខិតអនុញ្ញាតពីអាជ្ញាធរ នៅក្នុងឆ្នាំ 2026 ហើយដំណើរការជាផ្លូវការចាប់ពីត្រីមាសទី 4 ក្នុងឆ្នាំដដែល៕

ប្រភព៖ New Atlas
ប្រែសម្រួល៖ បុត្រា

July 22, 2021

Category: សង្គម និងសេដ្ឋកិច្ច