សង្គម និងសេដ្ឋកិច្ច - La Reine Media

តារាសំដែង Song Hye Kyo ឡង់សេ ម៉ូដសក់ក្រង ទម្លាក់ចំហៀង នៅក្នុងព្រឹត្តិការណ៍ Fendi Photos

តារាសំដែងស្រី កូរ៉េខាងត្បូង វ័យ 40 ឆ្នាំ នាង Song Hye Hyo បង្អួតម៉ូដសក់ក្រងទម្លាក់ចំហៀង និងបង្ហាញរាងក្នុងឈុតសម្លៀកបំពាក់ ពណ៌ pastel យ៉ាងស្រទន់។

ក្នុងព្រឹត្តិការណ៍នៅទីក្រុង សេអ៊ូល កាលពីថ្ងៃទី 26 កក្កដា តារាសំដែង Song Hye Hyo ប្រើប្រាស់សម្លៀកបំពាក់របស់ក្រុមហ៊ុន Fendi។

Hye Hyo ឡង់សេ កម្រងតង្កៀបសក់ O’Lock របស់ Fendi។

នៅលើទំព័រ វេទីកា (forum) ជាច្រើន នៅ អាស៊ី អ្នកគាំទ្ររបស់តារារូបនេះ ចាប់អារម្មណ៍ខ្លាំងទៅលើរបៀបក្រងសក់ទម្លាក់ចំហៀង ដែលបង្កើតជាបែបបទថ្មីសន្លាង សម្រាប់ Hye Hyo។

កន្លងមក គេកម្រឃើញតារាសំដែងដែលកើតឆ្នាំ 1981 រូបនេះ ធ្វើម៉ូដសក់ប្លែកៗណាស់ នាងតែងតែទម្លាក់ប៉ប្រះស្មា អ៊ុតរួញ ឬចងបួងឡើងលើ។

Hye Hyo ឡង់សេ ម៉ូដសម្លៀកបំពាក់សម្រាប់រដូវស្លឹកឈើជ្រុះ របស់ក្រុមហ៊ុន Michaa។

ស្រីស្អាតនេះ រកបានប្រាក់ចំណូលច្រើន ពីការផ្សាយពាណិជ្ជកម្មរបស់ក្រុមហ៊ុនឆ្នៃម៉ូដសម្លៀកបំពាក់ និងក្រុមហ៊ុនថែទាំសម្រស់។

បច្ចុប្បន្ន Song Hye Kyo កំពុងថតភាពយន្តទូរទស្សន៍ រឿង «Now, We Are Breaking Up»។ «Now, We Are Breaking Up» គឺជាស្នាដៃនិពន្ធរបស់ Je In និងដឹកនាំសំដែងដោយ Lee Gil-bok ហើយផលិតដោយក្រុមហ៊ុន Samhwa Networks រួមសហការដោយ United Artists Agency សម្រាប់ទូរទស្សន៍ SBS នៃប្រទេសកូរ៉េខាងត្បូង។ ក្រៅពីខ្សែភាពយន្តទូរទស្សន៍នេះ នៅមានគម្រោងចំនួន 2 ទៀត កំពុងរង់ចាំនាង៕

ប្រភព៖ Fendi
ប្រែសម្រួល៖ បុត្រា

July 27, 2021

iPhone 14 Pro ប្រើប្រាស់វត្ថុធាតុ «ប្រណិត និងថ្នៃថ្នូរ» ជាងឆ្ងាយ ធៀបនឹងបច្ចុប្បន្ន

iPhone 14 កំណែលំដាប់ខ្ពស់ឆ្នាំ 2022 តាមគម្រោងនឹងត្រូវងាកទៅប្រើប្រាស់លោហធាតុ ទីតានីញ៉ូម។ នេះគឺជារបាយការណ៍របស់ធនាគារ JPMorgan Chase។

យោងតាមរបាយការណ៍ លោហធាតុ ទីតានីញ៉ូម នេះ គឺជាការផ្លាស់ប្ដូរដ៏ធំមួយ ចំពោះ ទូរស័ព្ទ Apple iPhone 2022។ ក្រុមហ៊ុន Foxconn នឹងផលិតផ្ដាច់មុខ ស៊ុមដែលធ្វើអំពីទីតានីញ៉ូម សម្រាប់ iPhone 14 Pro។ បើសិនជាព័ត៌មាននេះ ពិតជាត្រឹមត្រូវមែន នោះនឹងជាលើកដំបូងដែល Apple ប្រើប្រាស់ ទីតានីញ៉ូម សម្រាប់ផលិតផលជាទូរស័ព្ទរបស់ខ្លួន។

ធៀបនឹងដែកមិនច្រែះ (អ៊ីណុក) លោហធាតុ ទីតានីញ៉ូម រឹងជាងឆ្ងាយ និងអាចទប់ទល់នឹងបញ្ហាឆ្កូតបានយ៉ាងល្អ។ វាក៏មានលទ្ធភាពប្រឆាំងនឹងការសឹករិចរឹល ជាងលោហធាតុដទៃ។ ប៉ុន្តែ ទីតានីញ៉ូម ក៏មានចំណុចខ្សោយមួយចំនួន មានដូចជា ស្នាមក្រយៅដៃច្បាស់ជាង ចំណែកភាពរឹងមាំរបស់វា ក៏បង្កការលំបាកដល់សកម្មភាពឆ្លាក់ផងដែរ។

Apple កំពុងសិក្សាស្រាវជ្រាវដើម្បីដោះស្រាយបញ្ហាខាងលើ។ ប័ណ្ណប៉ាតង់ថ្មីៗនេះ បង្ហាញថា Apple អាចនឹងប្រើប្រាស់ស្រទាប់ស្ដើងនៃ ធាតុ oxide ដើម្បីស្រោបពីលើលោហធាតុទីតានីញ៉ូម បំណងកាត់បន្ថយស្នាមក្រយៅដៃនៅលើស្មាតហ្វូន។ ក្រុមហ៊ុនក៏បង្កើតគំនូរព្រាងថ្មី ដើម្បីនាំមកនូវភាពរលោងដល់ទីតានីញ៉ូម។

របាយការណ៍របស់ JPMorgan Chase ធ្វើឱ្យព័ត៌មានចចាមអារ៉ាម ដែលថា «iPhone 2022 នឹងមានការប្ដូរផ្លាស់ច្រើនធៀបនឹង iPhone 13» កាន់តែមានភាពច្បាស់លាស់ ស្របពេលដែល Apple ចាត់ទុកឆ្នាំ 2022 ជាឆ្នាំ «មហាវដ្ដ» របស់ iPhone។ នៅក្នុងវដ្ដបែបនេះ អ្នកប្រើប្រាស់នឹងទិញច្រើនជាងធម្មតា។ iPhone 2022 នឹងមិនមានកំណែ mini នោះឡើយ។ មុននេះ អ្នកវិភាគ Ming Chi Kuo បានព្យាករថា Apple នឹងដាក់លក់ iPhone 2022 កំណែ 6.1 អ៊ិញ ចំនួន 2 ម៉ូដែល និងកំណែ 6.7 អ៊ិញ ចំនួន 2 ម៉ូដែល។

របាយការណ៍ខាងលើ ក៏បានរំលឹកឡើងវិញអំពីដំណឹងចចាមអារ៉ាម ដែលថា Touch ID នឹងត្រលប់មកកាន់ iPhone 2022 ក្រោមរូបភាពផ្សេង ដោយវាត្រូវបានបំពាក់នៅលើគ្រាប់ចុចចំហៀង ឬលាក់ក្រោមអេក្រង់។ ព័ត៌មានចចាមអារ៉ាម មួយចំនួនទៀត បាននិយាយថា iPhone ឆ្នាំក្រោយ នឹងលែងមានកន្លែងឆកទៀតហើយ ពោលគឺ វានឹងដូចទៅនឹងស្មាតហ្វូន Android មួយចំនួននាបច្ចុប្បន្ន៕

ប្រភព៖ Mashable
ប្រែសម្រួល៖ បុត្រា

July 27, 2021

តំណាងរាស្ត្រ អាមេរិក វាយប្រហារ Jeff Bezos ៖ មានប្រាក់ហោះទៅកាន់អវកាស ម៉េចក៏មិនបង់ពន្ធបន្ថែម!

ស្ថាបនិករបស់ Amazon បន្តក្លាយជាគោលដៅនៃការវាយប្រហាររបស់ក្រុមអ្នកនយោបាយ អាមេរិក បន្ទាប់ពីជើងហោះហើរឡើងទៅកាន់ទីអវកាសដោយជោគជ័យ។

យោងតាមទំព័រ Business Insider តំណាងរាស្ត្រ Elizabeth Warren ថ្មីៗនេះ បានបង្ហោះសារមួយនៅលើបណ្ដាញសង្គម Twitter អំពីជើងហោះហើររបស់កំពូលមហាសេដ្ឋី Jeff Bezos ដោយយល់ថា ស្ថាបនិក Amazon រូបនេះ បើសិននៅសល់លុយហោះទៅកាន់ទីអវកាស នោះក៏មានលុយគ្រប់គ្រាន់ដើម្បីពន្ធបន្ថែម។

«បុរសជាអ្នកមានជាងគេបំផុតក្នុងពិភពលោក អាចបាញ់បង្ហោះយានដើម្បីនាំខ្លួនឯងឡើងទៅកាន់អវកាស ខណៈដែលជាងពាក់កណ្ដាលនៃប្រជាជនអាមេរិក ត្រូវរស់នៅក្នុងស្ថានភាពលំបាកពីមួយថ្ងៃ ទៅមួយថ្ងៃ។ បច្ចុប្បន្ន មនុស្សជាង 43 លាននាក់ កំពុងជួបការលំបាក ដោយសារបំណុលលើការសិស្ស និងថ្លៃសម្រាប់សុខាភិបាលជាដើម ហើយថែមទាំងមិនមានការងារធ្វើទៀតផង។ ជាក់ស្ដែង គាត់អាចបង់ពន្ធបន្ថែម ដើម្បីឱ្យគ្រប់គ្នាមានឱកាសរស់ក្នុងជីវភាពល្អជាងនេះ» តំណាងរាស្ត្រ Warren សរសេរដូច្នេះ។

របាយការណ៍របស់ ProPublica បានបង្ហាញថា ស្ថាបនិករបស់ Amazon មិនត្រូវបង់ពន្ធលើប្រាក់ចំណូលអ្វីទាំងអស់ ក្នុងអំឡុងពេលយ៉ាងតិច 2 ឆ្នាំ (2006 និង 2018)។ ពួកគេសង្ស័យថា Bezos ថែមទាំងបានគេចវេះមិនបង់ពន្ធជាច្រើនឆ្នាំផ្សេងទៀត ប៉ុន្តែ មិនទាន់ប្រមូលបានទិន្នន័យគ្រប់គ្រាន់។

Jeff Bezos (ទីពីរ រាប់ពីស្ដាំ) និងអ្នកដែលបានឡើងទៅទីអវកាស តាមរយៈយានរបស់ Blue Origin កាលពីសប្ដាហ៍មុន

ទាក់ទងនឹងបញ្ហានេះ របាយការណ៍របស់ Lynnley Browning មកពីក្រុមហ៊ុន Insider ក៏បានបង្ហាញថា Amazon មានសកម្មភាពគេចពន្ធក្នុងឆ្នាំ 2017 និង 2018។

បច្ចុប្បន្ន មហាសេដ្ឋី អាមេរិក លោក Jeff Bezos កំពុងស្ថិតនៅលើកំពូលនៃតារាងចំណាត់ថ្នាក់ស្ដីពីកក្រុមអ្នកមានជាងគេនៅលើពិភពលោក របស់ទស្សនាវដ្ដី Forbes ដោយមានទ្រព្យរហូតដល់ 209.2 ពាន់លានដុល្លារអាមេរិក។ Blue Origin ដែលជាក្រុមហ៊ុនអវកាសរបស់លោក បានទទួលជោគជ័យក្នុងការនាំយកស្ថាបនិករូបនេះ ឡើងទៅកាន់ជាយអវកាស។

បន្ទាប់ពីករណីបាញ់បង្ហោះដោយជោគជ័យកាលពីសប្ដាហ៍មុន របស់ក្រុមហ៊ុន Blue Origin តំណាងរាស្ត្រ Warren បានចំអកនៅលើ Twitter ថា មហាសេដ្ឋី Bezos ភ្លេចអរគុណកម្មករ អាមេរិក ដែលកំពុងបង់ពន្ធជូនរដ្ឋ ខណៈដែលខ្លួនលោក និងក្រុមហ៊ុន Amazon បែរជាគេចពន្ធទៅវិញ៕

ប្រភព៖ BI
ប្រែសម្រួល៖ បុត្រា

July 27, 2021

ហិង្ហបុរី គ្រោងអនុញ្ញាតឱ្យដើរទេសចរណ៍ ដោយមិនបាច់ធ្វើចត្តាឡីស័ក

ប្រទេសសិង្ហបុរី កំពុងឆ្ពោះទៅរកគោលដៅបន្ធូរបន្ថយវិធានការទប់ស្កាត់វីរុស ក្នុងនោះរួមមានទាំងការអនុញ្ញាតឱ្យពលរដ្ឋដើរទេសចរណ៍ដោយមិនបាច់ធ្វើចត្តាឡីស័កផងដែរ ចាប់ពីខែកញ្ញាតទៅ។

ថ្លែងនៅក្នុងសភា នាថ្ងៃទី 27 កក្កដា រដ្ឋមន្ត្រីក្រសួងហិរញ្ញវត្ថុ Lawrence Wong បានឱ្យដឹងថា នៅខែកញ្ញា តាមផែនការ សិង្ហបុរី នឹងចាក់វ៉ាក់សាំងរួចរាល់បាន 80% ធៀបនឹងចំនួនប្រជាជនសរុប ដែលនេះនឹងជួយឱ្យសិង្ហបុរី មានមូលដ្ឋានជាក់លាក់ដើម្បីបើកដំណើរការសេដ្ឋកិច្ចឡើងវិញ។

ការសម្រេចគោលដៅនៃការចាក់វ៉ាក់សាំង នឹងអនុញ្ញាតឱ្យសិង្ហបុរី បើកទ្វារព្រំដែនឡើងវិញ សម្រាប់ការធ្វើដំណើរទៅ-មក ជាមួយនឹងបណ្ដាប្រទេស ឬតំបន់ដែលគ្រប់គ្រងវីរុសបានល្អ។

យោងតាមរដ្ឋមន្ត្រី Lawrence Wong នៅពេល សិង្ហបុរី សម្រេចបានគោលដៅក្នុងការចាក់វ៉ាក់សាំង ពលរដ្ឋដែលបានទទួលការចាក់វ៉ាក់សាំងរួចរាល់ អាចដើរទេសចរណ៍បាន ដោយមិនបាច់ធ្វើចត្តាឡីស័ក 14 ថ្ងៃ ពេលត្រលប់ចូលប្រទេស។

យោងទៅតាមកម្រិតនៃហានិភ័យរបស់បណ្ដាប្រទេសដែលពលរដ្ឋបានទៅទេសចរណ៍ វិធានការចត្តាឡីស័កអាចត្រូវបានជំនួសដោយយន្តការធ្វើតេស្តម៉ត់ចត់ ឬពេលវេលាដែលត្រូវធ្វើចត្តាឡីស័ក ត្រូវបានកាត់បន្ថយមកនៅត្រឹម 7 ថ្ងៃ និងត្រូវធ្វើនៅក្នុងផ្ទះ ជំនួសឱ្យសណ្ឋាគារដែលត្រូវបានកំណត់។ ពលរដ្ឋដែលមិនទាន់បានទទួលការចាក់វ៉ាក់សាំង ក៏មានសិទ្ធិទៅទេសចរណ៍ ប៉ុន្តែ ត្រូវធ្វើចត្តាឡីស័កឱ្យបានពេញលេញ។

សិង្ហបុរី មានផែនការចាក់វ៉ាក់សាំងឱ្យបាន 2/3 នៃចំនួនប្រជាជនសរុប នៅក្នុងថ្ងៃបុណ្យឯករាជ្យ (9 សីហា) ហើយក្រោយមក នឹងកាត់បន្ថយវិធានការទប់ស្កាត់បន្តិចម្ដង៕

ប្រភព៖ Bloomberg News
ប្រែសម្រួល៖ បុត្រា

July 27, 2021

Selena Gomez មានទ្រព្យរាប់សិបលានដុល្លារ និងចូលចិត្តស្លៀករ៉ូបបង្ហាញសម្រស់រាងកាយ

រ៉ូបប្រភេទ Versace និង Armani ជាដើម ជួយឱ្យកំពូលតារាចម្រៀងជនជាតិអាមេរិកាំង នាង Selena Gomez បង្ហាញសម្រស់នៃរាងកាយបានយ៉ាងល្អ។

Selena Gomez ទទួលអំណរអាយុថ្មីរបស់នាងកាលពីថ្ងៃទី 22 ខែកក្កដា នៅភូមិគ្រឹះនាទីក្រុង Los Angeles សហរដ្ឋអាមេរិក។ ក្នុងឱកាសខួបកំណើត តារាចម្រៀង និងជាអ្នកជំនួញរូបនេះ បានអំពាវនាវឱ្យបង្កើតមូលនិធីមួយ ដើម្បីរៃអង្គាសប្រាក់សម្រាប់ជួយដល់អ្នកជំងឺផ្លូវចិត្ត។

យោងតាម Forbes ក្នុងវ័យ 29 ឆ្នាំ Selena មានទ្រព្យសម្បត្តិតម្លៃ 75 លានដុល្លារអាមេរិក។ ក្រៅពីអាជីពជាអ្នកចម្រៀង និងសំដែង ស្រីស្អាតកើតឆ្នាំ 1992 នេះ ក៏រកចំណូលបានពីការធ្វើជំនួញក្នុងវិស័យអចលនទ្រព្យ តាំងពីអាយុ 19 និងជោគជ័យ ពេលគ្រប់គ្រងក្រុមហ៊ុនលក់គ្រឿងសំអាង Rare Beauty ចាប់ពីឆ្នាំ 2020 ផងដែរ។

ទំព័រ Tribedynamics បានរកឃើញថា ប្រាក់ចំណូលរបស់ Rare ខ្ពស់ជាងប្រភេទផលិតផលថែសម្រស់របស់ Victoria Beckham ទៅទៀត។

Vogue បានអធិប្បាយថា Selena Gomez ចូលចិត្តឈុតសម្លៀកបំពាក់ទាក់ទាញចំណាប់អារម្មណ៍។ ស្រីស្អាតនេះ ចូលចិត្តរ៉ូបឆែក រឹបចង្កេះ រឹបដើមទ្រូង ឬទាក់ទាញភ្នែក ត្រង់ត្រគាក៕

ប្រភព៖ Forbes, REX
ប្រែសម្រួល៖ បុត្រា

July 26, 2021

(វីដេអូ)-រថភ្លើងហោះ ល្បឿន 600 ម៉ែត្រ ក្នុង 1 ម៉ោង ៖ លឿនជាងយន្តហោះទៅទៀត

ជាមួយនឹងល្បឿនអតិបរមា 600 គីឡូម៉ែត្រ ក្នុង 1 ម៉ោង រថភ្លើងដែលប្រើប្រាស់បច្ចេកវិទ្យាអេឡិចត្រូម៉ាញេទិក ដែលត្រូវបាន ចិន ឧទ្ទេសនាមកាលពីថ្ងៃទី 21 កក្កដា គឺជាមធ្យោបាយដឹកជញ្ជូនផ្លូវគោក ដែលមានល្បឿនលឿនជាងគេបង្អស់ក្នុងពិភពលោក។

ប្រទេស ចិន កាលពីថ្ងៃទី 21 ខែកក្កដា ឆ្នាំ 2021 បានបង្ហាញរថភ្លើងអណ្ដែតថ្មីសន្លាងមួយគ្រឿង ដែលប្រើកម្លាំងមេដែក (maglev (magnetic levitation train) និងអាចរត់ក្នុងល្បឿន 600 គីឡូម៉ែត្រ/ម៉ោង។ ល្បឿននេះអាចជួយឱ្យគំរូរថភ្លើងដែលអភិវឌ្ឍ និងផលិតដោយប្រទេស ចិន នៅទីក្រុងឆ្នេរសមុទ្រ Qingdao នៃខេត្ត Shandong ក្លាយជាយានដែលមានល្បឿនលឿនជាងគេបំផុតក្នុងពិភពលោក បើធៀបនឹងប្រភេទយានទាំងឡាយដែលធ្វើដំនើរលើដីគោក។

ដោយកម្លាំងដ៏មហិមារបស់ថាមពលនៃ អេឡិចត្រូម៉ាញេទិក (electromagnetic force) រថភ្លើងនេះ អណ្ដែតក្នុងបរិយាកាស ដោយមិនប៉ះពាល់ដល់ផ្លូវដែកដែលនៅខាងក្រោម។ ប្រការនេះមានន័យថា រថភ្លើងអណ្ដែតដោយសារកម្លាំងរបស់ដែនម៉ាញេទិក បង្កើតឡើងដោយអគ្គិសនី «ខ្នាតយក្ស»។

បច្ចេកវិទ្យានេះ ត្រូវបានប្រទេស ចិន ប្រើប្រាស់ជិតពីរទសវត្សរ៍មកហើយ ប៉ុន្តែ ប្រើក្នុងទ្រង់ទ្រាយមានកំណត់។ នៅទីក្រុង សៀងហៃ មានផ្លូវរថភ្លើងប្រភេទ maglev មួយខ្សែ ដែលធ្វើដំណើរពីព្រលានយន្តហោះមួយ ចូលមកកាន់ទីក្រុង។

បច្ចុប្បន្ន បើទោះជាមិនទាន់មានផ្លូវដែកសម្រាប់រថភ្លើងហោះឆ្លងខេត្តនៅប្រទេស ចិន ដែលអាចធ្វើដំណើរក្នុងល្បឿនលឿនដូច្នេះក៏ពិតមែន ប៉ុន្តែ បណ្ដាទីក្រុងដូចជា សៀងហៃ និង ចេងឌូ (Chengdu) បានចាប់ផ្ដើមធ្វើការសិក្សាស្រាវជ្រាវទៅហើយ។

ដោយមានល្បឿន 600 គីឡូម៉ែត្រក្នុង 1 ម៉ោង គេគ្រាន់តែចំណាយពេលត្រឹមតែ 2.5 ម៉ោងប៉ុណ្ណោះ ដើម្បីធ្វើដំណើរឆ្លងកាត់ចម្ងាយផ្លូវជាង 1,000 គីឡូម៉ែត្រ ពីទីក្រុងប៉េកាំង ទៅកាន់ទីក្រុងសៀងហៃ។ ចម្ងាយផ្លូវឆ្ងាយបែបនេះ បច្ចុប្បន្ន បើជិតរថភ្លើងល្បឿនលឿន គេត្រូវចំណាយពេលអស់ 5.5 ម៉ោង ហើយបើជិតយន្តហោះវិញ ក៏ស៊ីពេលអស់ 3 ម៉ោងឯណោះ៕

ប្រភព៖ Next Media
ប្រែសម្រួល៖ បុត្រា

July 26, 2021

គូស្នេហ៍ក្លាយជាសេដ្ឋីមុនវ័យ 20 ឆ្នាំ ៖ Startup តាំងពីរៀននៅវិទ្យាល័យ និងតែងគោរពតាមគោលការណ៍ «ចាយកម្រិតណា វិនិយោគកម្រិតនោះ» ដើម្បីក្លាយជាអ្នកមាន

Dalton Ng និង Joella Lum បច្ចុប្បន្ន រស់នៅជាមួយគ្នាក្នុងខុនដូមួយដ៏សុខសាន្ត ដោយសារពួកគេសុទ្ធតែជាសេដ្ឋីដែលរកស៊ីមានបានពីបាត់ដៃទទេ ហើយបច្ចុប្បន្ន ពួកគេម្នាក់ៗ មានទ្រព្យចាប់ពី 2 ដល់ 3 លានដុល្លារអាមេរិក។

សេដ្ឋី Dalton Ng (វ័យ 20 ឆ្នាំ) និងសេដ្ឋិនី Joella Lum (វ័យ 19 ឆ្នាំ) ពុំមែនជាគូស្នេហ៍ដែលស្រលាញ់គ្នាធម្មតានោះទេ។ Joella បានឱ្យដឹងថា អ្នកទាំងពីរសុទ្ធតែជាមនុស្សដែលចូលចិត្តភាពឯករាជ្យ និងមាន «ឈាម» ជាអ្នកជំនួញតាំងតែពីក្មេង។ «អ្នកដឹងថា មានក្មេងៗដែលរៀននៅបឋមសិក្សា ទិញប្រដាប់លុប 1 កញ្ចប់ ហើយលក់រាយទៅវិញដើម្បីរកប្រាក់ចំណេញដែរទេ? ពួកយើងគឺជាមនុស្សប្រភេទនោះ»។

គ្រាដែលមនុស្សជាច្រើនក្នុងវ័យប្រហាក់ប្រហែលនឹង Dalton Ng និង Joella Lum សុទ្ធតែកំពុងធ្វើការរកប្រាក់ទៅតាមម៉ោង Dalton Ng និង Joella Lum បែរជារកបានប្រាក់ពី 70,000 ដល់ 150,000 ក្នុងមួយខែៗ ពីសកម្មភាពជំនួញមួយចំនួន និងការវិនិយោគផ្សេង។

ចំពោះ Joella Lum វិញ នាងកំពុងគ្រប់គ្រងហាងមួយចំនួននៅលើផ្សារអនឡាញ Shopify។ នាងក៏ទទួលបន្ទុកក្នុងការវិនិយោគលើមូលបត្រ និងរូបិយវត្ថុឌីជីថល របស់អ្នកទាំងពីរផងដែរ។

ដោយសារតែការប្រឹងប្រែង និងព្យាយាម ពេលដែល Joella ទើបតែមានវ័យ 18 ឆ្នាំ ហើយ Dalton វ័យ 19 ឆ្នាំ ពួកគេក៏មានលទ្ធភាពចេញរស់នៅខាងក្រៅ និងមានប្រាក់សល់សម្រាប់ទិញផ្ទះ ក៏ដូចជាមធ្យោបាយធ្វើដំណើរមួយចំនួន បម្រើដល់កិច្ចការជំនួញ។

ខាងក្រោមនេះគឺជាការណែនាំមួយចំនួនរបស់ Dalton Ng និង Joella Lum ជូនចំពោះយុវជន យុវនារី ដែលទើបតែពេញវ័យ និងចង់ក្លាយជាអ្នកមាន៖

1-ឆាប់ចាប់ផ្ដើម

Dalton Ng និង Joella Lum មិនមែនក្លាយជាអ្នកមានក្រោយរយៈពេលតែមួយយប់នៅទេ ប៉ុន្តែ ពួកគេបានចាប់ផ្ដើមមុខជំនួញតាំងតែពីនៅរៀនវិទ្យាល័យ រួមផ្សំនឹងទម្លាប់សន្សំសំច័យ និងការវិនិយោគបន្ថែមដើម្បីទទួលបានប្រាក់ចំណូលខ្ពស់។

Joella ចាប់ផ្ដើមធ្វើជំនួញដោយការលក់សម្លៀកបំពាក់ដែលបានទិញពីហាង H&M និង Cotton On នៅលើគេហទំព័រ Carousell និងរកបានប្រាក់រាប់ពាន់ដុល្លារតាំងតែពីនៅរៀនវិទ្យាល័យ។ ចំណែក Dalton វិញ បានធ្វើជាអ្នកសរសេរកូដ ក៏ដូចជាអភិវឌ្ឍកម្មវិធី (App) តាំងពីនៅរៀនអនុវិទ្យាល័យ ហើយរកបានប្រហែល 10,000 ដុល្លារពីគម្រោងនីមួយ។

2-ចាយវាយដោយការទទួលខុសត្រូវ

ការចាយវាយសម្រាប់ជីវិតលំដាប់ខ្ពស់ គឺជា ការទាក់ទាញចំពោះមនុស្សគ្រប់រូបដែលរកបានប្រាក់ច្រើនដូចជា Dalton និង Joella។ ប៉ុន្តែ គូស្នេហ៍នេះ ឆាប់ចាប់ផ្ដើមចេះចាយវាយដោយមានការទទួលខុសត្រូវ និងតែងគោរពទៅតាមគោលការណ៍ «ចាយកម្រិតណា វិនិយោគកម្រិតនោះ។

3-ស្រាវជ្រាវទីផ្សារឱ្យបានច្បាស់លាស់ និងមិនវិនិយោគច្រើនជាងប្រាក់ដែលអ្នកអាចបាត់បង់

បច្ចុប្បន្ន មានយុវវ័យជាច្រើន បានលោតទៅវិនិយោគភ្លាមៗ បន្ទាប់ពីបានមើលវីដេអូមួយចំនួននៅលើ Youtube ពិសេសគឺទាក់ទងនឹងផ្សារមូលបត្រ។ ប៉ុន្តែ Dalton និង Joella សង្កត់ធ្ងន់ថា ប្រការនេះនាំឱ្យយើងប្រឈមនឹងហានិភ័យខ្ពស់។ ផ្ទុយទៅវិញ អ្នកត្រូវតែស្វែងយល់ឱ្យបានច្បាស់លាស់ មុននឹងធ្វើការវិនិយោគ។

Dalton និយាយថា៖ «អ្នកមិនគួរវិនិយោគទៅលើអ្វីដែលខ្លួនមិនយល់ច្បាស់ សូម្បីតែរូបិយវត្ថុឌីជីថល។ មុនពេលទិញរូបិយវត្ថុឌីជីថល ខ្ញុំបានស្វែងយល់អំពីវា តាំងពីនៅរៀនអនុវិទ្យាល័យ»៕

ប្រភព៖ Asia One
ប្រែសម្រួល៖ បុត្រា

July 26, 2021

កំណើនសេដ្ឋកិច្ចពិភពលោក អាចឡើងដល់កំពូល នៅក្នុងត្រីមាសទីបី

សេដ្ឋកិច្ចនៅទូទាំងសកលលោកសម្រាប់ត្រីមាសទីបី នឹងមានកំណើនខ្ពស់បំផុតនៅក្នុងឆ្នាំ 2021 ប៉ុន្តែ វីរុសបំប្លែងខ្លួន Delta របស់ COVID-19 ត្រូវបានគេចាត់ទុកជាហានិភ័យគួរឱ្យបារម្ភ។

តំបន់សេដ្ឋកិច្ចនានានៃពិភពលោក ត្រូវបានព្យាករថា នឹងមានកំណើនខ្ពស់ក្នុងប៉ុន្មានខែខាងមុខ ដែលនេះជួយឱ្យបណ្ដាប្រទេស តាមជិតទាន់ សហរដ្ឋអាមេរិក និងចិន។ នេះបើតាម ការសិក្សាស្រាវជ្រាវមួយចំនួន ទៅលើ សន្ទស្សន៍អ្នកគ្រប់គ្រងការទិញ (Purchasing Managers Index / PMI)។

ទិន្នន័យដែលត្រូវបាន IHS Markit ប្រកាសកាលពីថ្ងៃទី 23 កក្កដា បានបង្ហាញថា សហរដ្ឋអាមេរិក ដែលមានកំណើនសេដ្ឋកិច្ចខ្ពស់ក្នុងត្រីមាសទីពីរ នឹងថយចុះបន្តិចក្នុងត្រីមាសទីបី ដោយសារតែប្រភពផ្គត់ផ្គង់បន្តមានកំណត់ កង្វះពលករ និងការរីករាលដាលនៃវ៉ារ្យ៉ង Delta របស់ COVID-19។

PMI សរុបរបស់ សហរដ្ឋអាមេរិក បានថយចុះមកនៅត្រឹម 59.7 ពិន្ទុ ក្នុងខែកក្កដា ទាបជាងបន្តិចធៀបនឹង 63.7 ពិន្ទុ ក្នុងខែមិថុនា។ អត្រាលើ 50 ពិន្ទុ បញ្ជាក់ថា សកម្មភាពផលិត នៅតែបន្តកើនឡើង។

ផ្ទុយមកវិញ PMI នៃតំបន់ដែលប្រើប្រាស់រូបិយវត្ថុ Euro បានកើនឡើងដល់ 60.6 ពិន្ទុ ក្នុងខែនេះ ខ្ពស់ជាង បើធៀបនឹងពិន្ទុ 59.5 ក្នុងខែមិថុនា។ សញ្ញានេះបង្ហាញថា សេដ្ឋកិច្ចអឺរ៉ុប កំពុងតែងើបឡើងយ៉ាងឆាប់រហ័ស។

ខណៈដែលក្រុមសេដ្ឋវិទូ ព្យាករថា កំណើនសេដ្ឋកិច្ចរបស់ សហរដ្ឋអាមេរិក បានឡើងដល់ចំណុចកំពូលកាលពីត្រីមាសកន្លង កំណើនរបស់ពិភពលោក ក៏ត្រូវគេព្យាករថា នឹងឡើងដល់ចំណុចខ្ពស់បំផុតក្នុងត្រីមាសបច្ចុប្បន្ន។ JPMorgan ព្យាករថា GDP របស់ អាមេរិក និង ចិន នឹងបន្ថយល្បឿនក្នុងត្រីមាសទីបី ប៉ុន្តែ ជំនួសមកវិញ កំណើនសេដ្ឋកិច្ចរបស់ អឺរ៉ុប អាចមានល្បឿនលឿនជាងកំណើនសេដ្ឋកិច្ចរបស់ អាមេរិក កាលពីត្រីមាសទីពីរទៅទៀត។ បូករួមជាមួយនឹងការងើបឡើងវិញយ៉ាងឆាប់របស់ ប្រទេស ឥណ្ឌា កំណើនសេដ្ឋកិច្ចរបស់ពិភពលោកទាំងមូល អាចឡើងដល់កំពូលបំផុតក្នុងឆ្នាំ 2021 នៅត្រីមាសទីបី។

យ៉ាងនេះក្ដី វីរុសបំប្លែងខ្លួនប្រភេទ Delta របស់ COVID-19 នៅតេជាឧបសគ្គធំសម្រាប់កំណើនសេដ្ឋកិច្ចពិភពលោក។ «Delta អាចរារាំងការងើបឡើងវិញរបស់វិស័យមួយចំនួន ពិសេសគឺ ទេសចរណ៍ និងសណ្ឋាគារ» នេះបើតាម Christine Lagarde ប្រធានធនាគារកណ្ដាលអឺរ៉ុប។

Chris Williamson ប្រធានក្រុមអ្នកសេដ្ឋកិច្ចប្រចាំ IHS Markit ក៏បានទទួលស្គាល់ថា Delta បង្កហានិភ័យធំធេងដល់ដំណើរងើបឡើងវិញនៃសេដ្ឋកិច្ច សហរដ្ឋអាមេរិក៕

ប្រភព៖ WSJ
ប្រែសម្រួល៖ បុត្រា

July 26, 2021

«កំពូលបុរស» មកពី Tonga បង្ហាញសាច់ដុំ ក្នុងពិធីបើកព្រឹត្តិការណ៍កីឡាអូឡាំពិក នៅ ជប៉ុន

អត្តពលិក Pita Taukatofua ដែលកាន់ទង់ឱ្យក្រុមកីឡាករ Tongo នៅក្នុងពិធីបើកព្រឹត្តិការណ៍កីឡាអូឡាំពិកតូខ្យូ 2020 (Olympic Tokyo 2020) បានធ្វើឱ្យមានចំណាប់អារម្មណ៍យ៉ាងខ្លាំង ដោយសារការដោះអាវ បង្ហាញសាច់ដុំដ៏រឹងមាំ។

Pita Taufatofua ធ្លាប់បានលេចធ្លោនៅក្នុងរាត្រីមួយកាលពី 5 ឆ្នាំមុន ពេលគាត់ដោះអាវជាលើកដំបូង នៅក្នុងពិធីហែក្បួនក្នុងឈុតសម្លៀកបំពាក់ប្រពៃណីរបស់ជនជាតិ តុងហ្គា (Tongan) ក្នុងពិធីបើកព្រឹត្តិការណ៍កីឡាអូឡាំពិក ឆ្នាំ 2016 នៅ ប្រេស៊ីល និង ឆ្នាំ 2018 នៅ កូរ៉េខាងត្បូង។ ជាថ្មីម្ដងទៀត Taufatofua ក៏បានបង្កការចាប់អារម្មណ៍នៅក្នុងរាត្រីថ្ងៃទី 23 កក្កដា ឆ្នាំ 2021 ពេលបង្ហាញខ្លួននៅក្នុងពិធីបើកព្រឹត្តិការណ៍កីឡាអូឡាំពិកតូខ្យូ ឆ្នាំ 2020 នៅជប៉ុន។

នៅក្នុងព្រឹត្តិការណ៍កីឡាអូឡាំពិកលើកនេះ អត្តពលិក Taufatofua នឹងចូលរួមប្រកួតក្បាច់គុន តៃខ្វាន់ដូ (Taekwondo)។

Taufatofua បានប្រាប់ New York Time ថា គាត់មានការភ្ញាក់ផ្អើលនៅពេលអ្នកលេងបណ្ដាញសង្គម បានចាប់អារម្មណ៍ខ្លាំងលើគាត់ នាពេលថ្មីៗនេះ។ តួលេខអ្នកចុចតាមដានរូបគាត់នៅលើបណ្ដាញសង្គម បានកើនឡើងយ៉ាងឆាប់រហ័ស។

បច្ចុប្បន្ន Taufatofua មិនត្រឹមតែមានអាជីពជាអត្តពលិកនោះទេ តែគាត់ក៏ជាវាគ្មិនដ៏មានប្រជាប្រិយភាព និងមានតួនាទីជាទូតសុច្ឆន្ទៈ តំណាងឱ្យ UNICEF ផងដែរ។

ប្រភព៖ Olympics
ប្រែសម្រួល៖ បុត្រា

July 24, 2021

មន្ត្រីហិរញ្ញវត្ថុ ព្រមានអំពីហានិភ័យដែល អាមេរិក ត្រូវក្ស័យធន នៅថ្ងៃទី 1 សីហា

រដ្ឋាភិបាល សហរដ្ឋអាមេរិក នឹងធ្លាក់ទៅក្នុងស្ថានភាពក្ស័យធន នៅថ្ងៃទី 1 ខែសីហា ឆ្នាំ 2021 ហើយបង្ខំឱ្យក្រសួងហិរញ្ញវត្ថុប្រទេសនេះ ដាក់ចេញនូវ «វិធានការពិសេសនានា» រហូតដល់សភាដំឡើងពិដាននៃសូចនាករបំណុលសាធារណៈ។

ខាងលើនេះគឺជាការព្រមានរបស់រដ្ឋមន្ត្រីក្រសួងហិរញ្ញវត្ថុ សហរដ្ឋអាមេរិក លោកស្រី Janet Yellen ដែលបានលើកឡើងកាលពីថ្ងៃទី 23 កក្កដា នៅក្នុងលិខិតផ្ញើទៅកាន់ក្រុមតំណាងរាស្ត្រ សហរដ្ឋអាមេរិក។

ក្នុងលិខិតនោះ រដ្ឋមន្ត្រីហិរញ្ញវត្ថុ បានលើកឡើងច្បាស់ថា៖ «បើសិនជាសភា មិនផ្អាក ឬដំឡើងពិដាននៃសូចនាករបំណុលសាធារណៈ ឱ្យបានមុនថ្ងៃទី 2 ខែសីហា នោះក្រសួងហិរញ្ញវត្ថុនឹងត្រូវអនុវត្តវិធានការបន្ថែមពិសេស ដើម្បីទប់ស្កាត់មិនឱ្យ សហរដ្ឋអាមេរិក ធ្លាក់ទៅក្នុងស្ថានភាពក្ស័យធន»។

លោកស្រី Yellen បញ្ជាក់ថា ការដំឡើងពិដាននៃសូចនាករបំណុលសាធារណៈ មិនធ្វើឱ្យការចំណាយរបស់រដ្ឋាភិបាលឡើងខ្ពស់នោះទេ ប៉ុន្តែ នឹងអនុញ្ញាតឱ្យក្រសួងហិរញ្ញវត្ថុ ផ្ដល់ការគាំទ្រដល់សកម្មភាពនានាដែលត្រូវបានសភាអនុម័ត។

យោងតាមរដ្ឋមន្ត្រីខាងលើ បើសិនជា សហរដ្ឋអាមេរិក មិនធានាបាននូវកាតព្វកិច្ចក្នុងការទូទាត់បំណុល នោះ អាមេរិក នឹងធ្លាក់ទៅក្នុងវិបត្តិហិរញ្ញវត្ថុ ដែលគំរាមកំហែងដល់សេដ្ឋកិច្ចរបស់ពលរដ្ឋ។ ក្រសួងនឹងផ្អាកលក់មូលបត្របំណុលរដ្ឋាភិបាល នៅថ្ងៃទី 30 កក្កដា ហើយក៏នឹងមិនភ្ជាប់សកម្មភាពនេះឡើងវិញនោះដែរ រហូតដល់សភាដំឡើងពិដាននៃសូចនាករបំណុលសាធារណៈ។

បំណុលសាធារណៈរបស់ សហរដ្ឋអាមេរិក កើនឡើងនៅក្នុងសម័យ COVID-19 បន្ទាប់ពីសេតវិមាន បានអនុម័តលើគម្រោងចំណាយធំៗចំនួន 3 ដើម្បីកាត់បន្ថយការខូចខាតនានា ដែលកើតឡើងដោយសារវិបត្តិសុខភាព។

យោងតាមការិយាល័យថវិកាសភា របស់ សហរដ្ឋអាមេរិក (Congressional Budget Office) គិតត្រឹមចុងខែមិថុនា បំណុលសាធារណៈរបស់ប្រទេសនេះ បានឡើងដល់ 28,500,000,000,000 ដុល្លារ (28.5 លានលាន ឬ 28.5 ទ្រីលាន ដុល្លារ) និង ឱនភាពថវិកាជាតិ ឆ្នាំនេះ ត្រូវបានព្យាករថា នឹងឡើងដល់ 3,000,000,000,000 ដុល្លារ (3 លានលាន ឬ 3 ទ្រីលាន ដុល្លារ) ខ្ពស់ជាងគេលំដាប់ទីពីរ បន្ទាប់ពី ឱនភាពថវិកា ឆ្នាំ 2020។

ការដំឡើងពិតាននៃសូចនាករបំណុលសាធារណៈ ធ្លាប់ជាបញ្ហាដែលបង្កឱ្យមានភាពចម្រូងចម្រាសនៅសភា អាមេរិក ក្នុងរយៈពេលប៉ុន្មានឆ្នាំចុងក្រោយនេះ ហើយភាពទាល់ច្រកនៃបញ្ហានេះក្នុងឆ្នាំ 2011 ក៏បានធ្វើឱ្យរដ្ឋាភិបាល ត្រូវគេទម្លាក់ចំណាត់ថ្នាក់ទំនុកចិត្តផងដែរ៕

ប្រភព៖ CNBC
ប្រែសម្រួល៖ បុត្រា

July 24, 2021

Category: សង្គម និងសេដ្ឋកិច្ច