សង្គម និងសេដ្ឋកិច្ច - La Reine Media

អត្តពលិកនៅអាស៊ីអាគ្នេយ៍ ទទួលបាន 1 លានដុល្លារអាមេរិក ក្រោយដណ្ដើមបានមេដាយមាសជាប្រវត្តិសាស្ត្រ

Hidilyn Diaz ត្រូវបានកត់ត្រាក្នុងប្រវត្តិសាស្ត្រនៃវិស័យកីឡារបស់ប្រទេស ហ្វីលីពីន ក្រោយពីបានជួយឱ្យប្រទេសនៅអាស៊ីអាគ្នេយ៍មួយនេះ ដណ្ដើមបានមេដាយមាសជាលើកដំបូង នៅក្នុងការប្រកួតកីឡាអូឡាំពិក។

Hidilyn Diaz បានក្លាយជានារីអត្តពលិកផ្នែកលើកទម្ងន់ក្នុងប្រវត្តិសាស្ត្ររបស់ ហ្វីលីពីន នៅពេលនាងដណ្ដើមបានមេដាយមាសក្នុងការប្រកួតលើកទម្ងន់ ប្រភេទ 55 គីឡូក្រាម។ នេះគឺជាមេដាយមាសដំបូងរបស់ក្រុមអត្តពលិក ហ្វីលីពីន នៅក្នុងការប្រកួតកីឡាអូឡាំពិកលើកនេះ។

បន្ទាប់ពីដណ្ដើមបានជ័យជំនះជូនប្រទេសជាតិ Hidilyn Diaz ទទួលបានការផ្ដល់រង្វាន់ដ៏ធំ នាំឱ្យនាងក្លាយជាសេដ្ឋិនីមួយរំពេច។ ជាក់ស្ដែង ក្រៅពីប្រាក់រង្វាន់គោលចំនួន 10 លានប៉េសូ (ស្មើនឹង 200,900 ដុល្លារអាមេរិក) សម្រាប់មេដាយមាសមួយគ្រឿង Hidilyn Diaz ក៏ទទួលបានប្រាក់រង្វាន់ចំនួនជាង 40 លានប៉េសូ (ស្មើនឹង 803,700 ដុល្លារអាមេរិក) ពីបណ្ដាក្រុមហ៊ុន និងក្រុមមន្ត្រី ហ្វីលីពីន ផងដែរ។ ទឹកប្រាក់សរុប ដែលនារីអត្តពលិករូបនេះទទួលបាន ស្មើនឹង 1,004,000 ដុល្លារអាមេរិក។

ក្រៅពីទឹកប្រាក់សុទ្ធ Diaz ក៏ទទួលបានផ្ទះល្វែងមួយខ្នងស្ថិតនៅក្នុងតំបន់លំដាប់ប្រណិតមួយកន្លែង ផ្ទះសម្រាប់លំហែកាយមួយខ្នងនៅភាគខាងត្បូងរដ្ឋធានី ម៉ានីល រថយន្តថ្មីមួយគ្រឿង រួមនឹងការចាក់សាំងដោយមិនគិតថ្លៃ ការធ្វើដំណើរតាមយន្តហោះពាណិជ្ជកម្មដោយមិនគិតថ្លៃពេញមួយជីវិតទៀតផង។

ទោះបីផ្ដល់រង្វាន់យ៉ាងច្រើនសន្ធឹកដល់អត្តពលិកដែលដណ្ដើមបានមេដាយមាស ប៉ុន្តែ ហ្វីលីពីន មិនមែនជាប្រទេសដែលផ្ដល់រង្វាន់ច្រើនជាងគេនោះទេ។ យោងតាម Forbes សិង្ហបុរី ទើបជាប្រទេសដែលផ្ដល់រង្វាន់គោលច្រើនជាងគេ ក្នុងនោះ រង្វាន់ 738,000 ដុល្លារអាមេរិក សម្រាប់អត្តពលិកដណ្ដើមបានមេដាយមាស, 370,500 ដុល្លារ សម្រាប់មេដាយប្រាក់ និង 185,300 ដុល្លារ សម្រាប់មេដាយសំរឹទ្ធ។

ឈរបន្ទាប់ពី សិង្ហបុរី គឺ តៃវ៉ាន់ ដោយផ្ដល់រង្វាន់សម្រាប់មេដាយមាស ចំនួន 716,000 ដុល្លារអាមេរិក រីឯលំដាប់ទីបីគឺ ប្រទេស ឥណ្ឌូនេស៊ីដោយផ្ដល់ 346,000 ដុល្លារអាមេរិក សម្រាប់មេដាយមាស៕

August 4, 2021

យានលក្ខណៈបុគ្គល ហោះហើរសំដែងដឹកមនុស្សលើកដំបូង នៅក្នុងពិព័រណ៍អាកាសចរណ៍ AirVenture

មធ្យោបាយហោះហើរដែលមានឈ្មោះថា BlackFly ធ្វើការហោះហើររយៈពេលខ្លី ទៅកាន់កម្ពស់ 21 ម៉ែត្រ និងក្នុងល្បឿន 56 គីឡូម៉ែត្រ/ម៉ោង នៅក្នុងព្រឹត្តិការណ៍ពិព័រណ៍អាកាសចរណ៍ នៅទីក្រុង Oshkosh សហរដ្ឋអាមេរិក។

Opener ដែលជាក្រុមហ៊ុនអភិវឌ្ឍមធ្យោបាយហោះហើរដំណើរការដោយថាមពលអគ្គិសនី មានទីស្នាក់ការកណ្ដាលនៅ សហរដ្ឋអាមេរិក សម្រេចបានគោលដៅថ្មី នៅក្នុងការហោះហើរសាកល្បងចុងក្រោយ។

Opener បានធ្វើការហោះហើរសំដែងដោយមានមនុស្សបើកជាសាធារណៈលើកដំបូង ជាមួយនឹងយានដែលអាចហោះឡើង និងចុះចតត្រង់ និងដំណើរការដោយថាមពលអគ្គិសនី ដែលមានឈ្មោះថា BlackFly។

ការហោះហើរខាងលើនេះ ត្រូវបានធ្វើឡើងនៅក្នុងព្រឹត្តិការណ៍ពិព័រណ៍ផ្នែកអាកាសចរណ៍ AirVenture របស់សមាគមយន្តហោះសាកល្បង ដែលមានឈ្មោះថា Experimental Aircraft Association (EAA) នៅទីក្រុង Oshkosh ក្នុងរដ្ឋ Wisconsin សហរដ្ឋអាមេរិក កាលពីថ្ងៃទី 26 ខែកក្កដា ដល់ថ្ងៃទី 01 ខែសីហា ឆ្នាំ 2021។

ក្នុងការសំដែងនេះ BlackFly ហោះហើរបានច្រើននារី ក្នុងល្បឿន 56 គីឡូម៉ែត្រ/ម៉ោង និងហោះឡើងដល់កម្ពស់ប្រមាណ 21 ម៉ែត្រ។

BlackFly គឺជាយានជំនិះលក្ខណៈបុគ្គលដែលមានទម្ងន់មហាស្រាល មានកៅអីតែមួយ មានស្លាបកង្ហារ 8 និងមិនតម្រូវឱ្យមានប័ណ្ណបើកបរនោះឡើយ។ វាអាចហោះហើរក្នុងរយៈចម្ងាយ 56 គីឡូម៉ែត្រ ជាមួយនឹងល្បឿនជាង 120 គីឡូម៉ែត្រ/ម៉ោង។

បណ្ដាកំណែរបស់ BlackFly ធ្លាប់បានហោះហើរក្នុងចម្ងាយផ្លូវសរុប ជាង 37,000 គីឡូម៉ែត្រ ដោយហោះហើរជាង 2,300 លើក៕

August 4, 2021

Bernard Arnault អ្នកមានជាងគេបំផុតក្នុងលោក៖ ក្ដោបក្ដាប់យីហោល្បីៗរាប់សិប ខណៈទ្រព្យច្រើនជាងជិតទ្វេដង ធៀបនឹង Warren Buffett

ក្រុមហ៊ុន LVMH របស់កំពូលមហាសេដ្ឋី Bernard Arnault កំពុងគ្រប់គ្រងយីហោចំនួន 75 ក្នុងនោះមាន Louis Vuitton, Christian Dior, TAG Heuer, Hublot, Bvlgari និង Tiffany ។ល។

រំលឹកដល់ Bernard Arnault ដែលជាប្រធាន និងជា CEO របស់ក្រុមហ៊ុន LVMH មនុស្សជាច្រើននឹងគិតដល់ភ្លាម អំពីរូបភាពអ្នកជំនួញដែលមានមហិច្ឆតាខ្ពស់ និងខ្លាំងក្លារបស់ប្រទេសបារាំង។ Bernard Arnault តែងតែស្វែងរកស្ទើរគ្រប់មធ្យោបាយដើម្បីសម្រេចបានគោលដៅ និងមិនខ្លាចក្នុងការបញ្ឈប់បុគ្គលិកជាន់ខ្ពស់របស់ខ្លួន។ លោក Bernard Arnault ក៏ល្បីឈ្មោះថាជា កំពូលអ្នកដើរទិញក្រុមហ៊ុនម៉ូដែលល្បីៗផងដែរ។

Bernard Arnault កើតឆ្នាំ 1949 នៅទីក្រុង Roubaix ប្រទេសបារាំង។ ឪពុករបស់លោកគឺជាអ្នកជំនួញ ហើយតាំងពីតូច Bernard Arnault ចូលចិត្តកិច្ចការធ្វើជំនួញខ្លាំងណាស់។

ក្រោយពីបានបញ្ចប់ការសិក្សានៅសាលា Ecole Polytechnique នៃប្រទេសបារាំង កាលពីឆ្នាំ 1971 លោក Bernard បានទៅតាមឪពុកដើម្បីគ្រប់គ្រងក្រុមហ៊ុនសំណង់ស៊ីវិលរបស់គ្រួសារ នៅក្នុងវ័យ 25 ឆ្នាំ។ ក្នុងរយៈពេលខ្លី Bernard បានជួយធ្វើឱ្យក្រុមហ៊ុនរីកចម្រើនយ៉ាងខ្លាំង។ ប៉ុន្តែក្រោយមក លោកក៏បានបញ្ចុះបញ្ចូលឪពុក ក្នុងការលក់ក្រុមហ៊ុននេះ ហើយផ្ដោតទៅលើតែអចលនទ្រព្យ។

ឆ្នាំ 1984 នៅពេលរដ្ឋាភិបាលបារាំង ស្វែងរកអ្នកទិញក្រុមហ៊ុន Boussac (ក្រុមហ៊ុនផលិតខោទឹកនោមក្រដាស និងតម្បាញដែលក្ស័យធន) លោក Bernard ក៏សម្រេចចិត្តទិញភ្លាម ដោយមើលឃើញថា វាជាឱកាសមាស។ Boussac មិនមានតម្លៃប៉ុន្មាននោះទេ ប៉ុន្តែ ប្រការដែលលោក Bernard ចង់បាន នោះគឺក្រុមហ៊ុនច្នៃម៉ូដសម្លៀកបំពាក់ និងគ្រឿងអលង្ការ Christian Dior ដែល Boussac មានភាគហ៊ុននៅក្នុងនោះ។

Bernard ចំណាយប្រាក់ 15 លានដុល្លារអាមេរិក ដើម្បីទិញយកក្រុមហ៊ុនខាងលើ ហើយក៏បញ្ចុះបញ្ចូលក្រុមហ៊ុនហិរញ្ញវត្ថុរបស់ បារាំង Lazard Freres ដើម្បីបានខ្ចីប្រាក់បន្ថែម 80 លានដុល្លារទៀត សម្រាប់ទិញ Boussac និងបង្វែរក្រុមហ៊ុននេះទៅរកមុខជំនួញលំដាប់ប្រណិត។

ក្រោយមក លោកក៏បានប្រើប្រាស់លុយ 400 លានដុល្លារ ដែលបានមកពីការលក់ទ្រព្យរបស់ Boussac រួមនឹងទុនដែលបានមកពី Lazard ដើម្បីអនុវត្តជំហានបន្ទាប់ នោះគឺ ការច្បាមយកមូលបត្ររបស់ LVMH។ Bernard ទិញក្រុមហ៊ុននេះបានដោយជោគជ័យកាលពីឆ្នាំ 1990 ក្នុងគ្រាដែលផ្ទៃក្នុងរបស់ក្រុមហ៊ុននេះ កំពុងបែកបាក់។

ម្ចាស់ក្រុមហ៊ុន LVMH លោក Bernard Arnault និងភរិយា Helene (ស្ដាំ) កាលពីដើមឆ្នាំ 2021

ក្រោយទិញបាន លោក Bernard ក៏បានប្រែក្លាយ LVMH ទៅជាយីហោប្រណិត ដោយផលិតផលរបស់ក្រុមហ៊ុន ប្រកប់ដោយភាពច្នៃប្រឌិតខ្ពស់ជាងមុន និងខុសពីរូបភាព «ចាស់ជរា» កាលពី 20 ឆ្នាំមុន។

ក្នុងអំឡុងទសវត្សរ៍ឆ្នាំ 1990 លោក Bernard បានចំណាយប្រាក់រាប់ពាន់លានដុល្លារ ដើម្បីប្រមូលទិញយីហោសម្លៀកបំពាក់លំដាប់ប្រណិតៗ ដូចជា Fendi, Kenzo និង Thomas Pink, បណ្ដាក្រុមហ៊ុនផលិតនាឡិកា និងគ្រឿងអលង្ការ Chaumet, Zenith និង TAG Heuer រួមនឹងបណ្ដាញលក់រាយ ដូចជា DFS និង Sephora ។ល។

មកដល់បច្ចុប្បន្ន LVMH របស់កំពូលមហាសេដ្ឋី Bernard Arnault បានក្លាយជាក្រុមហ៊ុនលេខ 1 ក្នុងពិភពលោក ដែលផ្គត់ផ្គង់ទំនិញប្រណិត តម្លៃថ្លៃ ដោយមានយីហោចំនួន 75 ដែលប្រតិបត្តិការនៅក្នុងវិស័យភេសជ្ជៈមានអាល់កុល គ្រឿងសម្អាង គ្រឿងក្រអូប សម្លៀកបំពាក់ នាឡិកា គ្រឿងអលង្ការ រួមនឹងវិស័យលក់រាយមួយចំនួន។ល។

ទ្រព្យសម្បត្តិរបស់លោក Bernard Arnault កើនឡើងយ៉ាងឆាប់រហ័ស បើទោះ COVID-19 រាតត្បាតពេញពិភពលោក

យោងតាមស្ថិតិរបស់ Forbes ម្ចាស់ក្រុមហ៊ុន LVMH កំពុងក្ដោបក្ដាប់ទ្រព្យសម្បត្តិចំនួន 199.1 ពាន់លានដុល្លារ និងជាអ្នកមានជាងគេបង្អស់ក្នុងពិភពលោក។ ចំណែកមហាសេដ្ឋី Jeff Bezos ដែលជាស្ថាបនិករបស់ក្រុមហ៊ុន Amazon បានធ្លាក់មកនៅលេខ 2 ជាមួយនឹងទ្រព្យ 194.6 ពាន់លានដុល្លារ។

ក្នុងបញ្ជីចំណាត់ថ្នាក់មហាសេដ្ឋីពិភពលោក ដែលត្រូវបាន Forbes ចេញផ្សាយកាលពីខែមេសា ឆ្នាំ 2020 ទ្រព្យរបស់លោក Bernard មានត្រឹមតែ 76 ពាន់លានដុល្លារអាមេរិកប៉ុណ្ណោះ។ ដូច្នេះ ក្រោយរយៈពេលជាងមួយឆ្នាំ ទ្រព្យរបស់មហាសេដ្ឋីជនជាតិបារាំងរូបនេះ បានកើនបន្ថែម 123 ពាន់លានដុល្លារ។ ទ្រព្យសម្បត្តិរបស់លោក Bernard ច្រើនជាងជិតទ្វេដង បើធៀបនឹងទ្រព្យរបស់មហាសេដ្ឋីអាមេរិក Warren Buffett ដែលមាន 101.8 ពាន់លានដុល្លារ។ ទ្រព្យរបស់លោក Bernard និងគ្រួសារ គឺបានមកពីភាគហ៊ុននៅក្នុងក្រុមហ៊ុន LVMH។

ក្នុងពាក់កណ្ដាលដើមឆ្នាំ 2021 LVMH រកបានចំណូល 33.9 ពាន់លានដុល្លារ កើន 56% ធៀបនឹងដំណាក់កាលដូចគ្នាកាលពីឆ្នាំ 2020។ កំណើននៃប្រាក់ចំណូលនេះ ភាគច្រើនបានមកពីផលិតផលសម្លៀកបំពាក់ និងផលិតផលធ្វើអំពីស្បែកសត្វ។

ថ្មីៗនេះ LVMH ក៏បានប្រកាសអំពីការទិញភាគហ៊ុនចំនួន 60% របស់ Off-White ដែលត្រូវបានបង្កើតឡើងដោយ Virgil Abloh។ Virgil Abloh គឺជាអ្នកទទួលខុសត្រូវក្នុងការរចនាម៉ូដសម្លៀកបំពាក់បុរសប្រចាំក្រុមហ៊ុន Louis Vuitton៕

August 4, 2021

តំណែងអ្នកមានជាងគេបង្អស់ក្នុងពិភពលោក របស់ Jeff Bezos បានធ្លាក់ទៅលើដៃជនជាតិបារាំង

ក្រោយការត្រលប់មកពីអវកាស មហាសេដ្ឋី របស់ សហរដ្ឋអាមេរិក លោក Jeff Bezoa ទទួលបានដំណឹងមិនល្អ៖ បាត់បង់តំណែងជាអ្នកមានទ្រព្យច្រើនជាងគេបង្អស់ក្នុងពិភពលោក។

សារព័ត៌មាន MarketWatch បានរាយកាណ៍ថា លោក Jeff Bezos ទើបតែបានបាត់បង់តំណែងជាអ្នកមានជាងគេក្នុងពិភពលោក ដោយសារទ្រព្យរបស់លោក បានថយុះ 13.9 ពាន់លានដុល្លារក្នុងរយៈពេលតែ 1 ថ្ងៃ។

មូលហេតុនៃបញ្ហានេះ គឺដោយសារមូលបត្រ Amazon បានដាំក្បាលចុះកាលពីចុងសប្ដាហ៍មុន ដោយបាត់បង់អស់ 7% បន្ទាប់ពីក្រុមហ៊ុននេះ បានចេញរបាយការណ៍ស្ដីពីកំណើនពាណិជ្ជកម្មនៅក្នុងត្រីមាសទី 2 ដែលមិនបានដូចការព្យាករ។

មហាសេដ្ឋីជនជាតិបារាំង លោក Bernard Arnault

ការបាត់បង់ទ្រព្យដ៏ច្រើននេះ ធ្វើឱ្យលោក Jeff Bezos ត្រូវបានអ្នកជំនួញបារាំង លោក Bernard Arnault ដណ្ដើម និងកាន់កាប់តំណែងជាអ្នកមានជាងគេក្នុងពិភពលោក។ លោក Arnault មាន LVMH ក្នុងដៃ។ LVMH ជាក្រុមហ៊ុនដែលក្ដោបក្ដាប់យីហោផលិតផលប្រណិតៗ រួមមានទាំង Louis Vuitton, Sephora, Moët & Chandon និង Tiffany & Co ផងដែរ។

គិតមកដល់ថ្ងៃនេះ (03 សីហា ឆ្នាំ 2021) ទ្រព្យរបស់លោក Arnault បានកើនឡើងដល់ 195.8 ពាន់លានដុល្លារអាមេរិក ខណៈដែលទ្រព្យរបស់លោក Bezos ធ្លាក់មកនៅត្រឹម 192.6 ពាន់លានដុល្លារ៕

August 3, 2021

យានអវកាសរបស់ Boeing ត្រៀមខ្លួនជាស្រេច ដើម្បីហោះទៅទីអវកាសនៅថ្ងៃស្អែក

យានអវកាស Starliner របស់ក្រុមហ៊ុន Boeing និងរ៉ុក្កែត Atlas V របស់ Boeing សហការជាមួយ Lockheed Martin ត្រូវបាននាំទៅកាន់ប្រព័ន្ធជើងទម្រលេខ 41 នៅស្ថានីយអវកាសចរណ៍ Cape Canaveral កាលពីថ្ងៃទី 02 ខែសីហា។

រ៉ុក្កែត Atlas V និងយាន Starliner នឹងបំពេញភារកិច្ចដែលគេហៅថា OFT-2 គ្រោងនឹងធ្វើឡើងនៅវេលាម៉ោង 0:20 នាទី ថ្ងៃទី 04 សីហា (ម៉ោងនៅកម្ពុជា)។ ក្នុងបេសកកម្មនេះ យាន Starliner ដែលមិនមានមនុស្សបើក នឹងត្រូវហោះទៅកាន់ស្ថានីយអវកាសអន្តរជាតិ (ISS)។

នេះមិនមែនជាលើកទីមួយទេ ដែលរ៉ុក្កែត Atlas V និងយាន Starliner បានទៅដល់កន្លែងបាញ់បង្ហោះលេខ 41។ ពួកវាធ្លាប់ត្រូវបានដឹកទៅដាក់លើជើងទម្រនេះកាលពីថ្ងៃទី 29 កក្កដា ដើម្បីត្រៀមបាញ់បង្ហោះនៅថ្ងៃទី 30 កក្កដា។ ប៉ុន្តែ ព្រឹត្តិការណ៍នេះត្រូវបានពន្យារពេល ដោយសារតែម៉ូឌុល Nauka របស់ រុស្ស៊ី បានធ្វើឱ្យមានបញ្ហាមួយចំនួនដល់ ISS។

ក្រុមហ៊ុន Boeing អភិវឌ្ឍ Starliner ក្រោមការវិនិយោគពីកម្មវិធីពាណិជ្ជកម្មដឹកមនុស្ស របស់ NASA។ កម្មវិធីនេះក៏គាំទ្រដល់យាន Crew Dragon របស់ SpaceX ផងដែរ ក្នុងគោលដៅប្រើប្រាស់យានអវកាសឱ្យបានឆាប់បំផុតតាមដែលអាចធ្វើទៅបាន បន្ទាប់ពីយាន Space Shuttle របស់ NASA បានចូលនិវត្តន៍កាលពីឆ្នាំ 2011។

Crew Dragon ធ្លាប់បានដឹកអ្នកអវកាសឡើងទៅកាន់ ISS ដោយជោគជ័យ ចំណែក Starliner មិនទាន់ធ្វើបាននៅឡើយ។ ជាដំបូង យាន Starliner ត្រូវបង្ហាញអំពីសមត្ថភាពនៃការហោះហើរដោយស្ថិរភាពនៅពេលពុំមានមនុស្សជិះ។ នេះគឺជាគោលដៅរបស់ OFT-2។ OFT-2 គឺជាការហោះហើរសាកល្បងលើកទីពីររបស់ Starliner ដោយត្រូវហោះទៅកាន់ ISS។ ការសាកល្បងដំបូង ត្រូវបានធ្វើឡើងកាលពីខែធ្នូ ឆ្នាំ 2019 ប៉ុន្តែ មិនបានជោគជ័យ៕

August 3, 2021

ចិន បង្កើត «សណ្ឋាគារជ្រូក» ដើម្បីការពារប្រភពផ្គត់ផ្គង់

«សណ្ឋាគារជ្រូក» កម្ពស់ច្រើនជាន់គឺជាដំណោះស្រាយថ្មីមួយសម្រាប់ប្រទេសដែលមានប្រជាជនច្រើនជាងគេដូច ចិន ដើម្បីការពារជ្រូករបស់ប្រទេសនេះ ពីការយាយីរបស់ជំងឺឆ្លងមួយចំនួន ដូចជាជំងឺប៉េស្ដជ្រូកអាហ្វ្រិក ជាដើម។

ចិន កំពុងតែនាំយកបញ្ហាសុវត្ថិភាពជីវសាស្ត្រសម្រាប់សត្វជ្រូក ឡើងខ្ពស់ថែមមួយកម្រិតទៀត។ អគារកម្ពស់ 13 ជាន់ ស្ថិតនៅភាគខាងត្បូងប្រទេសនេះ ត្រូវបានសាងសង់ឡើងដើម្បីចិញ្ចឹមជ្រូកប្រមាណ 10,000 ក្បាល។ ជ្រូកនៅទីនេះ រស់នៅក្នុងបរិស្ថានសន្តិសុខយ៉ាងតឹងរ៉ឹង ក្នុងនោះមានទាំងកាមេរ៉ាតាមដាន ផ្លូវចេញចូលមានកំណត់ សេវាកម្មពេទ្យសត្វនៅនឹងកន្លែង ហើយអាហារក៏ត្រូវបានរៀបចំយ៉ាងប្រុងប្រយ័ត្ន។

ដំណើរការខាងលើនេះ ត្រូវបានធ្វើឡើងក្នុងបំណងការពារសុវត្ថិភាពផ្នែកជីវសាស្ត្រដល់ប្រភពផ្គត់ផ្គង់សាច់ជ្រូច នៅចំពោះមុខវីរុសជាច្រើនប្រភេទ រួមទាំងជំងឺប៉េស្តជ្រូក (African swine fever) ដែលធ្លាប់បានលុបបំបាត់ជ្រូកប្រមាណពាក់កណ្ដាលនៃចំនួនជ្រូកសរុបទូទាំងប្រទេសរបស់ចិន ក្នុងឆ្នាំ 2018 និង 2019។

រូបមន្តដែលមានរហ័សនាមថា «សណ្ឋាគារជ្រូក» នេះ ត្រូវសាងសង់ឡើងដោយបណ្ដាក្រុមហ៊ុនដូចជា Muyuan Foods និង New Hope Group។ រូបមន្តនេះ ត្រូវបានប្រើប្រាស់នៅក្នុងប្រទេសផ្សេងៗតាំងពីយូរមកហើយ ដើម្បីគ្រប់គ្រង និងការពារសត្វជ្រូកពីជំងឺកាចសាហាវផ្សេង។

Rupert Claxton ប្រធានផ្នែកសាច់របស់ក្រុមហ៊ុនប្រឹក្សាយោបល់ Gira នៃប្រទេស អង់គ្លេស បានវាយតម្លៃថា ប្រទេសចិន កំពុងរៀនសូត្រអំពីវិធីសាស្ត្រល្អបំផុតពី អឺរ៉ុប និង សហរដ្ឋអាមេរិក ដើម្បីកាត់បន្ថយគម្លាតផ្នែកសុវត្ថិភាពជីវិសាស្ត្រ។ «ក្នុងរយៈពេល 20 ឆ្នាំ ពួកគេអាចធ្វើបាននូវប្រការដែលជនជាតិអាមេរិក ប្រហែលជាត្រូវចំណាយពេល 100 ឆ្នាំ ទើបអាចធ្វើបាន»។

ជំងឺបេស្ដជ្រូកអាហ្វ្រិក បានផ្ទុះឆ្លងរាលដាលយ៉ាងខ្លាំងក្លានៅប្រទេសចិន កាលពីឆ្នាំ 2018។ ក្នុងរយៈពេល 1 ឆ្នាំ ជ្រូកជាង 400 លានក្បាលរបស់ប្រទេសនេះ ត្រូវបានសម្លាប់ចោល ដែលចំនួននេះ ច្រើនជាងចំនួនជ្រូកប្រចាំឆ្នាំរបស់ សហរដ្ឋអាមេរិក និង ប្រេស៊ីល បូកចូលគ្នាទៅទៀត។ បញ្ហានេះក៏បាននាំឱ្យតម្លៃសាច់ជ្រូកកើនឡើងខ្ពស់ បណ្ដាលឱ្យតម្រូវការនៃការនាំចូលពីបរទេស កើនឡើងច្រើនមិនធ្លាប់មានពីមុនមក។

នៅពេលបញ្ហាអតិភរណាកើនឡើងដល់កម្រិតខ្ពស់បំផុតក្នុងអំឡុងពេល 8 ឆ្នាំ រដ្ឋាភិបាលចិន ត្រូវងាកទៅរកប្រភពសាច់ជ្រូកក្លាសេជាបន្ទាន់ ដើម្បីបញ្ចុះតម្លៃ ទន្ទឹមនឹងគោលនយោបាយថ្មី សម្រាប់ការប្ដូរទៅរកសកម្មភាពចិញ្ចឹមជ្រូកតាមបែបឧស្សាហកម្មទំនើប។

មកដល់បច្ចុប្បន្ន បរិមាណជ្រូកក្នុងស្រុក បានងើបឡើងវិញលឿនជាងការព្យាករ ដោយសារកសិដ្ឋានធំៗ នាំគ្នាបង្កើនទំហំនៃការចិញ្ចឹម។ តម្លៃរបស់សាច់ជ្រូកក៏បានធ្លាក់ចុះរហូតដល់រដ្ឋាភិបាលត្រូវផ្ដល់សញ្ញាអាសន្ន ហើយឃ្លាំងជាតិ ក៏ត្រូវបើកយុទ្ធនាការប្រមូលទិញសាច់ជ្រូកយកមករក្សាទុក ដើម្បីរក្សាស្ថិរភាពតម្លៃក្នុងទីផ្សារ។

ប៉ុន្តែ ការគំរាមពីវីរុសនានា នៅតែកើតមាន។ ជំងឺឆ្លងចំនួន 11 លើក បានកើតឡើងលើសត្វជ្រូក ក្នុងឆ្នាំ 2021 នាំឱ្យជ្រូកជាង 2,000 ក្បាលត្រូវបានសម្លាប់ចោល ក្នុងគ្រាដែលបណ្ដាប្រទេស ដូចជា សហរដ្ឋអាមេរិក ដាណឺម៉ាក និងហូឡង់ ជាដើម ពុំធ្លាប់មានរបាយការណ៍ស្ដីពីជំងឺដូចនៅប្រទេសចិន។

ដូច្នេះហើយ ចិន ក៏ព្យាយាមកែលម្អវិធីសាស្ត្រចិញ្ចឹមជ្រូក និងបង្កើនបរិមាណសត្វជ្រូកក្នុងប្រទេស។ គិតមកដល់ឆ្នាំ 2020 57% នៃបរិមាណសាច់ជ្រូករបស់ប្រទេសនេះ គឺបានមកពីកសិដ្ឋានធំៗ ដែលអាចចិញ្ចឹមបានជាង 500 ក្បាល ក្នុងមួយឆ្នាំ។

ការកែលម្អវិធីសាស្ត្រចិញ្ចឹមជ្រូកនៅប្រទេសចិន រួមមានដូចជា ការសាងសង់កសិដ្ឋានបែបឧស្សាហកម្មទំនើប ក្នុងនោះក៏មានការសាងសង់អគារខ្ពស់ៗសម្រាប់ចិញ្ចឹមជ្រូក ការសាងសង់កន្លែងស្នាក់នៅសមរម្យសម្រាប់បុគ្គលិក កម្មករនៅកសិដ្ឋាន ដើម្បីកាត់បន្ថយការប៉ះពាល់របស់ពួកគេជាមួយនឹងបរិស្ថាននៅខាងក្រៅ។ល។

August 3, 2021

អ្នកវិទ្យាសាស្ត្រ អាចធ្វើឱ្យទឹកស្អាតក្លាយជាលោហធាតុ

ក្រុមអ្នកវិទ្យាសាស្ត្របានធ្វើការពិសោធ និងបានប្រែក្លាយទឹកស្អាតឱ្យទៅជាលោហធាតុ ដោយប្រើពេលតែប៉ុន្មានវិនាទីប៉ុណ្ណោះ ហើយនេះក៏បង្កើតបានជាធាតុរាវដែលមានសមត្ថភាពបញ្ជូនអគ្គិសនី។

ទឹកដែលមិនទាន់បានច្រោះស្អាតអាចនាំអគ្គិសនី មានន័យថា អេឡិចត្រុងបន្ទុកអវិជ្ជមាន អាចត្រូវបានចម្លងរវាងម៉ូលេគុល ព្រោះនៅក្នុងទឹកមានជាតិអំបិល។ ប៉ុន្តែ ទឹកស្អាតគឺមានតែម៉ូលេគុលទឹកប៉ុណ្ណោះ ក្នុងនោះអេឡិចត្រុងនានានៅសម្បកខាងក្រៅបង្អស់ (សម្បកអេឡិចត្រុងវ៉ាឡង់/ Valence electron) នៅតែតោងជាប់នឹងអាតូម និងមិនអាចផ្លាស់ទីដោយសេរីក្នុងទឹក។

អំពីទ្រឹស្ដី បើសិនជាបង្កើតសម្ពាធឱ្យបានគ្រប់គ្រាន់ទៅលើទឹកស្អាត ម៉ូលេគុលទឹកនឹងត្រូវកៀបឱ្យជាប់គ្នា ហើយសម្បកអេឡិចត្រុងខាងក្រៅបង្អស់ដែលព័ទ្ធជុំវិញអាតូម នឹងត្រូវគរលើគ្នា។ ប្រការនេះនឹងបង្កលក្ខណៈងាយស្រួលឱ្យអេឡិចត្រុងផ្លាស់ទីដោយសេរី រវាងអាតូមនីមួយៗ ហើយប្រែក្លាយទឹកទៅជាលោហធាតុ។

បញ្ហានៅត្រង់ថា ដើម្បីកៀបទឹករហូតដល់ក្លាយជាលោហធាតុ គឺទាមទារឱ្យមានសម្ពាធប្រហែល 220 លាន psi (pound per square inch) នេះបើតាមអ្នកវិទ្យាសាស្ត្រ Pavel Jungwirth មកពីបណ្ឌិតសភាវិទ្យាសាស្ត្រ ឆែក នៅរដ្ឋធានី Prague។ ដោយមូលហេតុនេះហើយ ធ្វើឱ្យអ្នកវិទ្យាសាស្ត្រសង្ស័យថា ទឹកត្រូវប្រែទៅជាលោហធាតុ ដែលអាចមានវត្តមាននៅក្នុងស្នូលរបស់បណ្ដាភពខ្នាតយក្ស ដូចជាភពព្រហស្បតិ៍ ភពណិបទូន និងភពអ៊ុយរ៉ានុស។

Jungwirth និងក្រុមការងារ បានរកវិធីផ្សេង ដើម្បីអាចធ្វើឱ្យទឹកក្លាយជាលោហធាតុ។ ពួកគេប្រើប្រាស់លោហអាល់កាឡាំង រួមមានធាតុផ្សំដូចជា ប៉ូតាស្យូម និងសូដ្យូម ហើយមានផ្ទុកអេឡិចត្រុងតែមួយនៅសម្បកអេឡិចត្រុងវ៉ាឡង់។

លោហអាល់កាឡាំង អាចផ្ទុះ នៅពេលប៉ះនឹងទឹក ប៉ុន្តែ ពួកគេគិតថា ដោយវិធីណាមួយនោះ ដែលអាចចៀសវាងការផ្ទុះបាន ពួកគេអាចខ្ចីអេឡិចត្រុងពីលោហអាល់កាឡាំង និងប្រើប្រាស់អេឡិចត្រុងនោះដើម្បីធ្វើឱ្យទឹកក្លាយជាលោហធាតុ។

ការពិសោធថ្មីដែលត្រូវបានចុះផ្សាយកាលពីថ្ងៃទី 28 កក្កដា នៅលើទស្សនាវដ្ដី Nature ក្រុមអ្នកវិទ្យាសាស្ត្របានរកឃើញវិធីសមស្រប។ ពួកគេដាក់ស៊ីឡាំងដែលពេញដោយសូដ្យូម និងប៉ូតាស្យូមនៅក្នុងប្រអប់ទំនេរ រួចបញ្ចេញតំណក់តូចៗនៃលោហធាតុរាវក្នុងសីតុណ្ហភាពស្មើនឹងកំដៅក្នុងបន្ទប់ ក្រោយមកទុកឱ្យតំណក់លោហធាតុនេះប៉ះនឹងចំហាយទឹកដ៏ល្អិត។ ទឹកក៏បានកកើតនៅលើបន្ទះមួយដែលមានកម្រាស់ 0.1 micromet នៅខាងលើផ្ទៃនៃតំណក់លោហធាតុ ហើយភ្លាមនោះ អេឡិចត្រុងពីលោហធាតុក៏រត់ទៅរកទឹក។

នៅក្នុងរយៈពេលដ៏ខ្លី ទឹកប្រែទៅជាពណ៌លឿងបែបលោហធាតុរលើបរលោង។ ដោយការប្រើប្រាស់ឧបករណ៍វាស់ស្ទង់ spectrometer ក្រុមស្រាវជ្រាវអាចបញ្ជាក់បានថា ទឹកដែលមានពណ៌លឿងនោះ ពិតជាលោហធាតុ៕

August 2, 2021

Amazon កំពុងក្លាយជាគោលដៅក្នុងការរឹតត្បឹតពីសំណាក់រដ្ឋាភិបាលអាមេរិក

ការរីកចម្រើន ហើយពេលខ្លះក៏ត្រូវបានគេមើលឃើញថាជា ការរកស៊ីផ្ដាច់មុខកាន់តែខ្លាំងឡើងរបស់ Amazon បានធ្វើឱ្យពួកគេក្លាយជាគោលដៅដែលត្រូវចាត់វិធានការពីសំណាក់រដ្ឋ និងក្រុមអ្នកតាក់តែងច្បាប់ នៅសហរដ្ឋ អាមេរិក។

ក៏ប៉ុន្តែ ដោយសារតែទំហំដ៏មហិមា និងឥទ្ធិពលដ៏ខ្លាំងក្លារបស់ខ្លួន ក្រុមហ៊ុន Amazon ក៏ធ្វើឱ្យក្រុមអ្នកបង្កើតច្បាប់ ត្រូវថ្លឹងថ្លែងយ៉ាងយកចិត្តទុកដាក់បំផុតក្នុងការរឹតត្បឹតលើក្រុមហ៊ុននេះ ដើម្បីមិនឱ្យមានការប៉ះពាល់ដល់អតិថិជន និងបណ្ដាក្រុមហ៊ុនដែល «អាស្រ័យផល» ដោយសារ។

កាលពីចុងខែមុន តំណាងរាស្ត្រមួយក្រុម រួមមានទាំងក្រុមអ្នកតាក់តែងច្បាប់នៅសភាជាន់ទាបអាមេរិក បានបង្ហាញសេចក្ដីព្រាងច្បាប់មួយដើម្បីដោះស្រាយលើបញ្ហា «ក្ដោបក្ដាប់អំណាច» នៃបណ្ដាក្រុមហ៊ុនបច្ចេកវិទ្យាធំៗ មានដូចជា Facebook, Amazon, Apple និង Google។ សេចក្ដីព្រាងច្បាប់នេះ នឹងអាចបើកផ្លូវឱ្យមានការកាត់ផ្ដាច់ក្រុមហ៊ុនមួយ ឬច្រើនចេញពីគ្នា ទន្ទឹមនឹងការដែលត្រូវរកដំណោះស្រាយឱ្យបានសមស្រប។

ក្រុមហ៊ុន Amazon កាលពីពេលថ្មីៗនេះ បានបង្ហើបឱ្យដឹងថា ពួកគេប្រហែលជាត្រូវបានបង្ខំឱ្យឈប់ដំណើរការទីផ្សាររបស់អ្នកលក់ជាភាគីទីបី និងត្រលប់មកស្ថានភាពដើម ដែល Amazon គ្រាន់តែលក់ទំនិញផ្ទាល់ខ្លួនតែប៉ុណ្ណោះ។ សកម្មភាពនេះ នឹងធ្វើឱ្យមានផលប៉ះពាល់ធ្ងន់ធ្ងរដល់អ្នកលក់រាប់លាននាក់ ដែលកំពុងពឹងផ្អែកលើទីផ្សារជាឈ្មួញកណ្ដាលរបស់ Amazon ដើម្បីធ្វើជំនួញ និងធ្វើឱ្យបទពិសោធន៍នៃការទិញដូររបស់អតិថិជន ត្រូវក្រឡាប់ចាក់។

Joel Mitnick ដែលជាសមាជិកម្នាក់នៃក្រុមមេធាវីប្រឆាំងការរកស៊ីផ្ដាច់មុខ ប្រចាំក្រុមហ៊ុនច្បាប់ Cadwalader ឱ្យដឹងថា៖ «ការបំបែកក្រុមហ៊ុននានា ពិតជាមានការលំបាក ហើយការបំបែកក្រុមហ៊ុនដែលមានអតិថិជនស្រលាញ់ចូលចិត្តច្រើន នោះវាកាន់តែពិបាកខ្លាំងទៅទៀត»។

Amazon ធ្លាប់តែជាក្រុមហ៊ុនមួយដែលលក់តែសៀវភៅ។ ពេលនេះ យើងអាចហៅសកម្មភាពអាជីវកម្មរបស់ពួកគេដោយខ្លីថា «ពាណិជ្ជកម្មអនឡាញ»។ Amazon មានក្រុមហ៊ុនបុត្រសម្ព័ន្ធជាច្រើន ដូចជា Amazon Web Services, Whole Food, ផ្សព្វផ្សាយ, ហ្គេម, កំសាន្ត និងសេវាកម្មផ្សាយផ្ទាល់, ដឹកជញ្ជូន, ឧបករណ៍ឆ្លាតវៃ, សេវាទូទាត់ប្រាក់ និងផ្សារអនឡាញ។

ក្រុមហ៊ុនបុត្រសម្ព័ន្ធមួយចំនួនរបស់ Amazon បានក្លាយជាគោលដៅនៃការរិះគន់នាប៉ុន្មានឆ្នាំចុងក្រោយនេះ។ តំណាងរាស្ត្រ Elizabeth Warren ធ្លាប់បានដាក់សំណើបង្កើតអង្គភាពនានា ដើម្បី «ប្រែត្រលប់មកវិញ ចំពោះករណីច្របាច់បញ្ចូលគ្នារវាងបណ្ដាក្រុមហ៊ុន ដែលមានកត្តាប្រឆាំងនឹងការប្រកួតប្រជែង»។ ក្នុងនោះមានទាំងករណី Amazon ប្រើប្រាស់លុយ 13.7 ពាន់លានដុលលារ ដើម្បីទិញក្រុមហ៊ុន Whole Foods កាលពីឆ្នាំ 2017។

ថ្មីៗនេះ ការដែល Amazon លើកសំណើរទិញយកក្រុមហ៊ុនភាពយន្ត MGM ក្នុងតម្លៃ 8.45 ពាន់លានដុល្លារ ក៏ជួបនឹងប្រតិកម្មរបស់ Warren និងអ្នកតាក់តែងច្បាប់ដទៃទៀត។ គណៈកម្មការពាណិជ្ជកម្មសហរដ្ឋអាមេរិក ក្រោមការដឹកនាំរបស់ប្រធានដែលទើបតែត្រូវបានតែងតាំង Lina Khan នឹងសើរើកិច្ចព្រមព្រៀងខាងលើឡើងវិញ។

បើទោះជាមិនទាន់ទទួលបានចំណាប់អារម្មណ៍ខ្លាំង ប៉ុន្តែ Amazon Web Services នៅតែអាចទទួលរងឥទ្ធិពល ដោយសារតែច្បាប់។

អ្នកវិភាគមួយចំនួន ក្នុងនោះមានទាំងអតីតអនុប្រធានរបស់ Amazon បានផ្ដល់យោបល់ថា ក្រុមហ៊ុន Amazon គួរតែបំបែក Amazon Web Services ឱ្យដាច់ដោយឡែក ដើម្បីទប់ទល់នឹងកម្លាំងមកពីបណ្ដាអង្គភាពប្រឆាំងនឹងការរកស៊ីផ្ដាច់មុខ និងដើម្បីជំរុញកំណើនរបស់សេវាកម្មនេះ។

អំពី Amazon នៅពេលគេស្វែងរកផលិតផលមួយនៅលើគេហទំព័ររបស់ Amazon គេឃើញមានទំនិញជាច្រើនដែលមិនមែនជាផលិតផលផ្ទាល់ខ្លួនរបស់ក្រុមហ៊ុននេះ ប៉ុន្តែ ជាផលិតផលរបស់ភាគីទីបី ដែលប្រើប្រាស់ថ្នាលបច្ចេកវិទ្យារបស់ Amazon ដើម្បីលក់ផលិតផលដល់អតិថិជននៅទូទាំងពិភពលោក។ ទំនាក់ទំនងបែបនេះ រវាង Amazon និងភាគីអ្នកលក់ បានក្លាយជាចំណុចដែលត្រូវរិះគន់។

មនុស្សជាច្រើនមានការបារម្ភអំពីការដែល Amazon ចម្លងផលិតផលរបស់អ្នកលក់ ហើយលក់វាក្នុងតម្លៃទាបជាង នៅពេលពួកគេមានទំហំគ្រប់គ្រាន់ និងធនធានមនុស្សច្រើនជាងបច្ចុប្បន្ន។

សង្គ្រាមទប់ទល់នឹងការរកស៊ីផ្ដាច់មុខរបស់ក្រុមហ៊ុន Amazon ទំនងជាត្រូវចំណាយពេលច្រើនឆ្នាំទៀត ហើយក៏នឹងនៅមានការប្ដូរផ្លាស់ទៅតាមពេលវេលា។ ប៉ុន្តែ ប្រតិកម្មដំបូងរបស់ Amazon បានបង្ហាញថា ក្រុមហ៊ុនបុត្រសម្ព័ន្ធណាខ្លះដែលទទួលបានការគាំពារជាអាទិភាព នៅក្នុងពិភពប្រឆាំងនឹងការរកស៊ីផ្ដាច់មុខ៕

August 2, 2021

អគ្គនាយកដ្ឋានពន្ធដារ ណែនាំរបៀបប្រើប្រាស់ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ»

ថ្មីៗនេះ ទន្ទឹមនឹងការណែនាំក្នុងការប្រើប្រាស់កម្មវិធីបង់ពន្ធតាមទូរស័ព្ទដៃ GDT Taxpayer ថ្មីៗនេះ អគ្គនាយកដ្ឋានពន្ធដារ ក៏បានចេញវីដេអូ ណែនាំអំពីរបៀបប្រើប្រាស់ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ» ផងដែរ។

ដើម្បីជួយសម្រួលដល់អ្នកជាប់ពន្ធទាំងអស់ ដែលមានបំណងស្នើសុំវិញ្ញាបនបត្រពន្ធដារ អគ្គនាយកដ្ឋានពន្ធដារ នៃក្រសួងសេដ្ឋកិច្ច និង ហិរញ្ញវត្ថុ បានធ្វើការណែនាំកម្មវិធីមួយដែលមានឈ្មោះថា «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ»។ ម្ចាស់អាជីវកម្ម និងអ្នកជាប់ពន្ធទាំងអស់ អាចប្រើប្រាស់កម្មវិធីនេះដើម្បីបង្កើតសំណើ និងបោះពុម្ភវិញ្ញាបនបត្ររបស់ខ្លួន សម្រាប់ប្រើប្រាស់ផ្លូវការបាន។

ប្រភេទវិញ្ញបនបត្រដែលអ្នកជាប់ពន្ធអាចស្នើសុំតាមរយៈ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ» នេះ មានដូចជា «វិញ្ញាបនបត្រអនុលោមភាពសារពើពន្ធ», «វិញ្ញាបនបត្របញ្ជិកាគណនេយ្យត្រឹមត្រូវ», «វិញ្ញាបនបត្រអត្រាសូន្យនូវអាករលើតម្លៃបន្ថែម» និង «វិញ្ញបនបត្រលើកលែងពន្ធលើប្រាក់ចំណូល» ជាដើម។

ដើម្បីប្រើប្រាស់ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ» នេះ សូមចូលទៅកាន់គេហទំព័ររបស់អគ្គនាយកដ្ឋានពន្ធដារ www.tax.gov.kh និងធ្វើតាមការណែនាំនៅក្នុងវីដេអូខាងក្រោម៖

ប្រភព៖ អគ្គនាយកដ្ឋានពន្ធដារ
ដកស្រង់៖ បុត្រា

July 31, 2021

អគ្គនាយកដ្ឋានពន្ធដារ ណែនាំឱ្យប្រើកម្មវិធីទូរស័ព្ទ ដើម្បី «បង់ពន្ធយានយន្តគ្រប់ប្រភេទ»

«អគ្គនាយកដ្ឋាពន្ធដារ បង្កើតកម្មវិធីទូរស័ព្ទដៃអ្នកជាប់ពន្ធនេះឡើង ក្នុងគោលបំណងបង្កើនប្រសិទ្ធិភាពក្នុងការផ្តល់សេវា និងជួយសម្រួលដល់លោក-លោកស្រីដែលជាម្ចាស់-តំណាងសហគ្រាសប្រកបអាជីវកម្ម ភ្នាក់ងារសេវាកម្មពន្ធដារ ប្រជាពលរដ្ឋ និងសាធារណៈជនមានចលនទ្រព្យ និងអចលនទ្រព្យនៅក្នុងព្រះរាជាណាចក្រកម្ពុជា អាចបង់ប្រាក់ពន្ធតាមទូរស័ព្ទដៃបាន» នេះបើតាមអគ្គនាយកដ្ឋាពន្ធដារ នៃក្រសួងសេដ្ឋកិច្ច និង ហិរញ្ញវត្ថុ កម្ពុជា។

នៅក្នុងកម្មវិធីទូរស័ព្ទដៃដែលមានឈ្មោះថា GDT Taxpayer នេះ ក៏អនុញ្ញាតឱ្យអ្នកប្រើប្រាស់ដែលជាម្ចាស់សហគ្រាស ប្រជាពលរដ្ឋ និងសាធារណៈជនមានចលនទ្រព្យ និងអចលនទ្រព្យតាមដាន និងមើលប្រវត្តិបង់ប្រាក់ពន្ធបានផងដែរ។

ដើម្បីប្រើប្រាស់កម្មវិធីនេះបាន សូមចូលទៅកាន់ Google Play (Google Play Store / សម្រាប់ទូរស័ព្ទ Android) ទាញយក និងដំឡើងលើទូរស័ព្ទដៃ។ សូមធ្វើតាមការណែនាំនៅក្នុងវីដេអូខាងក្រោម៖

https://www.youtube.com/watch?v=INEV2Fp2E3U

ប្រភព៖ អគ្គនាយកដ្ឋានពន្ធដា
ដកស្រង់៖ បុត្រា

July 31, 2021

Category: សង្គម និងសេដ្ឋកិច្ច