សង្គម និងសេដ្ឋកិច្ច - La Reine Media

«អ្នកស្នងមរតក» របស់ Samsung ត្រូវបានលើកលែងទោស

កាលពីថ្ងៃទី 09 ខែសីហា ក្រសួងយុត្តិធម៌ កូរ៉េខាងត្បូង បានប្រកាសថា នឹងលើកលែងទោសដល់អនុប្រធាន និងជា «អ្នកស្នងមរតក» នៃក្រុមហ៊ុន Samsung លោក Lee Jae-yong នៅចុងសប្ដាហ៍នេះ។

នៅក្នុងប្រកាសមួយ រដ្ឋមន្ត្រីក្រសួងយុត្តិធម៌ Park Beom-kye បានលើកឡើងថា លោក Lee Jae-yong នឹងត្រូវបានដោះលែងពីពន្ធនាគារនៅថ្ងៃទី 13 សីហា ក្នុងឱកាសទិវារំដោះជាតិ 15 សីហា។ រដ្ឋាភិបាល កូរ៉េខាងត្បូង តែងតែដោះលែងអ្នកទោសដោយមានលក្ខខណ្ឌ ឬលើកលែងទោសនៅក្នុងទិវានេះ ដើម្បីលើកកម្ពស់ស្មារតីសាមគ្គីជាតិ។ ការសម្រេចនេះ ត្រូវបានធ្វើលើកឡើងបន្ទាប់ពីមានកិច្ចប្រជុំមួយរបស់គណៈកម្មការលើកលែងទោសនៃក្រសួងយុត្តិធម៌ កូរ៉េខាងត្បូង។ លោក Lee Jae-yong បានបំពេញកាតព្វកិច្ចតាមការណែនាំនានាដើម្បីអាចទទួលបានការលើកលែងទោស ក្រោយពីការអនុវត្តទោសរួចរាល់បាន 60%។

លោក Park Beom-kye បានឱ្យដឹងថា ស្ថានភាពសេដ្ឋកិច្ចរបស់ប្រទេសជាតិ បញ្ហាសេដ្ឋកិច្ចទូទាំងសកលលោក រួមនឹងវិបត្តិ COVID-19 ត្រូវបានចាត់ទុកថាជាកត្តារួមចំណែកនាំឱ្យមានការចេញសេចក្ដីសម្រេចនេះ។

ប៉ុន្តែ យោងតាមច្បាប់សេដ្ឋកិច្ចរបស់ប្រទេសនេះ លោក Lee Jae-yong នឹងមិនអាចត្រលប់ចូលធ្វើការនៅក្រុមហ៊ុន Samsung ក្នុងរយៈពេល 5 ឆ្នាំ។ ច្បាប់នេះ ហាមមិនឱ្យបុគ្គលដែលត្រូវបានកាត់ទោសពីបទពុករលួយ ឬខ្វះការទទួលខុសត្រូវលើទឹកប្រាក់ដែលលើសពី 500 លានវ៉ុន (436,300 ដុល្លារអាមេរិក) ធ្វើការក្នុងក្រុមហ៊ុនដែលជាប់ទាក់ទងនឹងអំពើខុសច្បាប់របស់ពួកគេ ក្នុងរយៈពេល 5 ឆ្នាំ រាប់ចាប់ពីថ្ងៃត្រូវបានដោះលែងពីពន្ធនាគារ។

កាលពីថ្ងៃទី 18 មករា ឆ្នាំ 2021 តុលាការកំពូលរបស់ទីក្រុងសេអ៊ូល នៃប្រទេសកូរ៉េខាងត្បូង បានប្រកាសថា លោក Lee Jae-yong (អាយុ 52 ឆ្នាំ) ដែលជាអនុប្រធាននៃក្រុមហ៊ុន Samsung បានប្រព្រឹត្តអំពើសូកប៉ាន់អតីតប្រធានាធិបតី Park Geun-hye ដើម្បីទទួលបានការគាំទ្រពីរដ្ឋាភិបាលនៅក្នុងការស្នងមរតក និងដើម្បីទទួលបានការធានាលើសិទ្ធិគ្រប់គ្រង Samsung។ តុលាការក៏បានកាត់ទោសបុគ្គលដែលមានអំណាចខ្លាំងរបស់ Samsung រូបនេះ ឱ្យជាប់ពន្ធនាគាររយៈ 2 ឆ្នាំកន្លះ។

មុននេះ ក្រុមហ៊ុន Samsung រួមនឹងសភាពាណិជ្ជកម្មនិងឧស្សាហកម្ម របស់ កូរ៉េខាងត្បូង (Korea Chamber of Commerce and Industry) បានស្នើឱ្យមានការដោះលែងបណ្ដោះអាសន្ន ឬការលើកលែងទោសដោយប្រធានាធិបតី ដើម្បីជួយឱ្យលោក Lee Jae-yong អាចផ្ដោតលើការគ្រប់គ្រងក្រុមហ៊ុនធំបំផុតរបស់ប្រទេសនេះ ក្នុងគ្រាដែលសេដ្ឋកិច្ចក្នុងស្រុក និងពិភពលោក កំពុងជួបបញ្ហាដោយសារ COVID-19៕

August 10, 2021

ទស្សនាបណ្ដាផលិតផលរបស់ Apple ដែលបានបរាជ័យកន្លងមក

ទន្ទឹមនឹងកំពូលផលិតផលដែលទទួលបានជោគជ័យខ្លាំង ដូចជា iPhone, iPad ក្រុមហ៊ុន Apple កន្លងមកក៏មានផលិតផលជាច្រើនដែលបានបរាជ័យ ក្នុងនោះក៏មាន HomePod កុំព្យូទ័រ និងម៉ាស៊ីនលេងហ្គេមផងដែរ។

20^th Anniversary Mac

ម៉ូដែលនេះ ត្រូវបានផលិត និងបង្ហាញខ្លួនក្នុងឆ្នាំ 1997 ដើម្បីរំលឹកអនុស្សាវរីយ៍ 20 ឆ្នាំ ដែល Apple បានលោតចូលទីផ្សារ PC។ ប៉ុន្តែ វាត្រូវបានផ្អាកការផលិតទាំងស្រុង ក្រោយការបង្ហាញខ្លួនបាន 1 ឆ្នាំ។ ផលិតផលនេះ មានតម្លៃ 7,499 ដុល្លារអាមេរិក ប៉ុន្តែ ត្រូវបានបញ្ចុះរហូតដល់នៅសល់ 1,995 ដុល្លារ មុននឹងត្រូវផ្អាកការផលិត ដោយសារតែលក់មិនដាច់។

Macintosh TV

ទូរទស្សន៍នេះ ដែលមានតម្លៃ 2,099 ដុល្លារអាមេរិក នេះ ថ្វីបើមាន CPU ខ្លាំង ប៉ុន្តែ RAM របស់វា មានតែ 8 MB ប៉ុណ្ណោះ។ Apple សម្រេចបញ្ឈប់ការផលិត បើទោះផលិតផលនេះទើបតែបង្ហាញខ្លួនបាន 5 ខែ។

Pinpin

ម៉ាស៊ីនលេងហ្គេមនេះ បានចាប់កំណើតកាលពីឆ្នាំ 1994។ វាជាផលិតផលដែលបង្កើតឡើងដើម្បីប្រកួតប្រជែងជាមួយ Sony PlayStation។ នេះ គឺជាផលិតផលសហការរវាង Apple និង Bandai។

Pinpin ចំនួន 42,000 គ្រឿង ត្រូវបានលក់ចេញទូទាំងពិភពលោក។ Apple ឈប់ផលិតចាប់ពីឆ្នាំ 1997។

Ping

Ping គឺជាបណ្ដាញសង្គមផ្នែកតន្ត្រីរបស់ Apple ដែលត្រូវបានបង្កើតឡើងកាលពីឆ្នាំ 2010។ Apple ចង់សហការជាមួយ Facebook ប៉ុន្តែ បរាជ័យ។ វាបានក្លាយជាអតីតកាល ចាប់ពីឆ្នាំ 2012 ក្រោយបង្ហាញវត្តមានបាន 2 ឆ្នាំ។

Newton

មុនពេលទទួលបានជោគជ័យដោយសារ iPhone និង iPad ក្រុមហ៊ុន Apple ក៏ធ្លាប់បានបរាជ័យជាមួយនឹងជំនួយការផ្ទាល់ខ្លួន (personal digital assistant / PDA) ដែលមានឈ្មោះថា Newton។

ឧបករណ៍នេះ បានបង្ហាញខ្លួនកាលពីឆ្នាំ 1993 ដោយលក់ក្នុងតម្លៃ 699 ដុល្លារ។ Apple លក់ឧបករណ៍នេះបាន 300,000 គ្រឿង ក្នុងអំឡុង 5 ឆ្នាំដែលវាមានវត្តមានក្នុងទីផ្សារ។

Performa x200 Series

វាបានបង្ហាញខ្លួនកាលពីឆ្នាំ 1995 នៅពេល Apple កាត់បន្ថយចំណាយដើម្បីផលិតម៉ាស៊ីន Mac ដែលមានតម្លៃទាប ប៉ុន្តែ ដោយសារវាដំណើរការយឺតពេក វាក៏ទទួលបរាជ័យក្នុងទីផ្សារ។

Power Mac G4 Cube

PC នេះ បង្ហាញខ្លួនកាលពីឆ្នាំ 2000 និងឈប់ផលិតទៅវិញ ក្រោយការបង្ហាញវត្តមានក្នុងទីផ្សារបាន 1 ឆ្នាំ។

Apple III

ម៉ូដែលនេះ ផលិតឡើងកាលពីឆ្នាំ 1980 និងត្រូវបានចាត់ទុកថាជាផលិតដែលបរាជ័យដំបូងគេបង្អស់របស់ Apple ហើយក៏ជាផលិតផលដែលស្ទើរតែបានបំផ្លាញក្រុមហ៊ុននេះទាំងស្រុង។ Apple III មានតម្លៃចាប់ពី 4.340 ដុល្លារ ដល់ 7.800 ដុល្លារ។

PowerBook 5300

កុំព្យូទ័រយួរដៃ PowerBook 5300 នេះ ផលិតឡើងកាលពីឆ្នាំ 1995។ ផលិតផលនេះមានបញ្ហាច្រើន ធ្វើឱ្យវាមិនអាចរកឃើញជោគជ័យ។

កុំព្យូទ័រ PC Lisa

វាត្រូវបាន Apple ដាក់លក់ចាប់ពីឆ្នាំ 1983។ Lisa ជាផលិតផលទំនើបបំផុត កាលពីជំនាន់នោះ។ បរាជ័យរបស់វា គឺដោយសារតម្លៃខ្ពស់កប់ពពក។ PC Lisa 1 គ្រឿងមានតម្លៃ 9,995 ដុល្លារ ប្រហាក់ប្រហែលនឹង 25,000 ដុល្លារ បើគិតក្នុងសម័យនេះ។ Apple លក់ផលិតផលនេះបានជិត 100,000 គ្រឿង។

HomePod

ឧបករណ៍បំពងសំឡេងនេះ ត្រូវបានដាក់លក់កាលពីឆ្នាំ 2018។ តម្លៃ 349 ដុល្លាររបស់វា ក៏ជាកត្តាសំខាន់មួយ រួមចំណែកនាំឱ្យវាបរាជ័យ។ ឆ្នាំ 2021 HomePod ក៏ត្រូវបានបញ្ឈប់ការផលិត។

iPod Hi-Fi

ឆ្នាំ 2006 iPod បានគ្រប់គ្រងទីផ្សារតន្ត្រីចល័ត ប៉ុន្តែ ម៉ូដែល iPod Hi-Fi របស់ Apple បានទទួលបរាជ័យ ដោយសារតម្លៃ (349 ដុល្លារ) ថ្លៃជាង iPod ដំបូង។ វាត្រូវគេឈប់ផលិតចាប់ពីឆ្នាំ 2007 ក្រោយបង្ហាញវត្តមានបាន 1 ឆ្នាំ៕

August 9, 2021

រថយន្តគ្មានមនុស្សបើកបរ របស់ក្រុមហ៊ុន វៀតណាម៖ ល្បឿន 30គម/ម៉ោង កំណត់ទិសបានយ៉ាងសុក្រឹត

ក្រុមហ៊ុន Vingroup របស់ប្រទេសវៀតណាម មានគម្រោងដាក់ឱ្យដំណើរការរថយន្តស្វ័យប្រវត្តនេះ នៅក្នុងតំបន់ទេសចរណ៍ តំបន់លំហែកាយ និងនៅទីក្រុងនានា ទូទាំងប្រទេស។

រថយន្តឆ្លាតវៃ គ្មានមនុស្សបើកបររបស់វិទ្យាស្ថានស្រាវជ្រាវទិន្នន័យធំ VinBigData នៃក្រុមហ៊ុន Vingroup របស់មហាសេដ្ឋី វៀតណាម Pham Nhat Vuong ត្រូវបានអភិវឌ្ឍតាំងពីខែមករា ឆ្នាំ 2021 និងបានដំណើរការសាកល្បងនៅ VinPearl តាំងពីពាក់កណ្ដាលឆ្នាំ 2021 ហើយបច្ចុប្បន្ន វាកំពុងត្រូវបានរៀបចំសម្រាប់ដំណើរការជាផ្លូវការចាប់ពីឆ្នាំ 2022។

យោងតាមក្រុមហ៊ុន Vingroup រថយន្តស្វ័យប្រវត្តិរបស់ VinBigData នាំមកនូវបទពិសោធន៍នៃការផ្លាស់ទីប្រកបដោយភាពរលូតសម្រាប់អ្នកដំណើរ។

រថយន្តដែលអាចដឹកមនុស្សបាន 23 នាក់នេះ ក៏មានភាពងាយស្រួលសម្រាប់ការកក់សំបុត្រតាមរយៈកម្មវិធីលើទូរស័ព្ទដៃ។ រថយន្តនឹងធ្វើដំណើរទៅទទួលអ្នកដំណើរដែលបានកក់សំបុត្ររួច ដោយប្រើប្រាស់ល្បឿនជាមធ្យម 20 ទៅ 25 គីឡូម៉ែត្រ/ម៉ោង ខណៈដែលល្បឿនជាអតិបរមា ស្មើនឹង 30 គីឡូម៉ែត្រ/ម៉ោង។

https://www.youtube.com/watch?v=k7GjY1glI5c

មុខងារនានាដែលលេចធ្លោបជាងគេ របស់រថយន្តស្វ័យប្រវត្តិនេះ រួមមាន៖

– ផែនទីដែលមានគុណភាពបង្ហាញខ្ពស់ ដែលមានទំហំផ្ទៃក្រឡា ឡើងដល់ 10 គីឡូម៉ែត្រ

– សមត្ថភាពនៃការកំណត់ទិសកម្រិតខ្ពស់ ដោយខុសតួលេខប្រមាណ 5 ស.ម ប៉ុណ្ណោះ

– ប្រើប្រាស់បច្ចេកវិទ្យាបញ្ហាសិប្បនិម្មិត (AI) ភ្ជាប់ទិន្នន័យរវាងប្រព័ន្ធ lidar (Light Detection and Ranging) ចំនួន 2 និងកាមេរ៉ា មុំ 102 ដឺក្រេ ចំនួន 6 ដែលអាចចាប់រូបភាពឧបសគ្គនៅលើដងផ្លូវ ដូចជា មនុស្ស មធ្យោបាយធ្វើដំណើរផ្សេងៗ និងស្លាកសញ្ញាចរាចរណ៍បានយ៉ាងល្អ និងដោះស្រាយបានយ៉ាងសុក្រឹត

– សមត្ថភាពបន្ថយល្បឿនស្វ័យប្រវត្ត ពីចម្ងាយ 30 ម៉ែត្រ, ប្ដូរគន្លងផ្លូវពីចម្ងាយប្រហែល 10 ម៉ែត្រ នៅពេលមានឧបសគ្គនៅខាងមុខដែលត្រូវបានកំណត់ថា នៅស្ងៀមនឹងកន្លែង

– មុខងារចូលចតដោយស្វ័យប្រវត្ត

– បច្ចេកវិទ្យាស្វែងរកកំហុស ទាក់ទងនឹងបញ្ហាលើសចរន្តអគ្គិសនី លើសសម្ពាធរបស់តួប៊ីនអគ្គិសនី ដែលជួយការពារ និងបង្កើនភាពមាំមួនរបស់រថយន្ត

– មានសមត្ថភាពដំណើរការបានល្អ នៅលើសណ្ឋានដីភ្នំ នៅពេលចុះទួល និងឡើងទួល៕

August 9, 2021

ជើងឯកអូឡាំពិករបស់ ឥណ្ឌា ទទួលប្រាក់រង្វាន់រាប់លានដុល្លារ

Neeraj Chopra ដែលដណ្ដើមបានមេដាយមាស នៅក្នុងការប្រកួតវិញ្ញាសារចោលលំពែងនៅក្នុងព្រឹត្តិការណ៍កីឡាអូឡាំពិតតូខ្យូ ទទួលបានការសន្យាផ្ដល់រង្វាន់ជាង 2 លានដុល្លារអាមេរិក ពីសំណាក់បណ្ដាក្រុមហ៊ុន និងអាជ្ញាធរឥណ្ឌា។

អត្តពលិកវ័យ 23 ឆ្នាំ ឈ្មោះ Neeraj Chopra បានយកឈ្នះលើអត្តពលិកនានា នៅក្នុងការប្រកួតវិញ្ញាសារចោលលំពែង ដោយចោលបានចម្ងាយ 87.58 ម៉ែត្រ នៅលើទីលានប្រកួតកីឡាអូឡាំពិកតូខ្យូ កាលពីថ្ងៃទី 07 សីហា។ ជ័យជំនះនេះ បាននាំមកនូវមេដាយមាសជាប្រវត្តិសាស្ត្រជូនដល់ប្រទេសឥណ្ឌា។ នេះគឺជាមេដាយមាសអូឡាំពិកដំបូងរបស់ Chopra ហើយក៏ជាមេដាយមាសអត្តពលកម្មដំបូងរបស់ ឥណ្ឌា នៅព្រឹត្តិការណ៍អូឡាំពិកទាំងឡាយដែលប្រទេសនេះបានចូលរួម។

Chopra កំពុងនាំមុខអត្តពលិកអូឡាំពិកដែលជោគជ័យបំផុតរបស់ ឥណ្ឌា តាំងពីមុនរហូតដល់បច្ចុប្បន្ន ដោយដណ្ដើមបានមេដាយមាសចំនួន 1, មេដាយប្រាក់ចំនួន 2 និងមេដាយសំរឹទ្ធចំនួន 4។

អាជ្ញាធររដ្ឋ Haryana ដែលជាស្រុកកំណើតរបស់ Chopra បានឱ្យដឹងថា ពួកគេនឹងផ្ដល់រង្វាន់ជាទឹកប្រាក់ចំនួន 60 លានរ៉ូពីឥណ្ឌា (800,000 ដុល្លារអាមេរិក)។ បណ្ដារដ្ឋផ្សេងៗ ក៏បានស្នើផ្ដល់រង្វាន់បន្ថែម 400,000 ដុល្លារ ខណៈក្រុមហ៊ុនវិស័យអប់រំដ៏ធំមួយនៅ ឥណ្ឌា ក៏បានសន្យាផ្ដល់ប្រាក់រង្វាន់ចំនួន 270,000 ដុល្លារផងដែរ។

ក្រុមប្រឹក្សា cricket ឥណ្ឌា (BCCI) និងក្រុម Chennai Super Kings ក៏បានសន្យាផ្ដល់រង្វាន់ 135,000 ដុល្លារ សម្រាប់អត្តពលិកដែលដណ្ដើមបានមេដាយ ហើយ Chopra ក៏នឹងទទួលបាន 100,000 ដុល្លារពីសមាគមអូឡាំពិក ឥណ្ឌា (IOA) ផងដែរ។

ចំណែកបណ្ដាក្រុមហ៊ុងដទៃទៀត ក៏ផ្ដល់រង្វាន់ឱ្យ Chopra តាមរយៈការមិនយកថ្លៃសំបុត្រយន្តហោះ ការផ្ដល់រង្វាន់ជារថយន្តទំនើប និងប្រាក់សុទ្ធ។ល។ ប្រាក់រង្វាន់ជាសរុបរបស់ Chopra បច្ចុប្បន្នបានកើនដល់ជាង 2 លានដុល្លារអាមេរិក ហើយតួលេខនេះនឹងនៅតែកើនឡើង មុនពេល Chopra ត្រលប់មកប្រទេសវិញ។

រាក់អត្តពលិកដែលដណ្ដើមបានមេដាយ សុទ្ធតែអាចទទួលបានប្រាក់រង្វាន់យ៉ាងច្រើន នៅពេលត្រលប់មកប្រទេស។ IOA ផ្ដល់រង្វាន់ 53,000 ដុល្លារសម្រាប់មេដាយប្រាក់ និង 33,500 ដុល្លារ សម្រាប់មេដាយសំរឹទ្ធ។

ឥណ្ឌា ត្រូវបានគេចាត់ទុកជាប្រទេសដែលផ្ដល់រង្វាន់ច្រើនជាងគេដល់បណ្ដាអត្តពលិកដែលដណ្ដើមបានមេដាយពីព្រឹត្តិការណ៍អូឡាំពិក 2021 នៅ ជប៉ុន បើទោះ សិង្ហបុរី កន្លងមកក៏ធ្លាប់នាំមុខគេលើរឿងនេះ ដោយផ្ដល់រង្វាន់ជាង 700,000 ដុល្លារសម្រាប់មេដាយមាស៕

August 9, 2021

ម្ចាស់គ្លីនិកមួយនៅ កម្ពុជា ក្លាយជាមហាសេដ្ឋី ក្នុងអំឡុង COVID-19

តម្លៃនៃទ្រព្យសម្បត្តិរបស់វេជ្ជបណ្ឌិត Loo Choon Yong បានកើនឡើងដល់ 1.1 ពាន់លានដុល្លារអាមេរិក បន្ទាប់ពីក្រុមហ៊ុនរបស់លោក បានជួយដល់ដំណើរការនៃយុទ្ធនាការចាក់វ៉ាក់សាំង COVID-19 នៅ សិង្ហបុរី។

នៅក្នុងបញ្ជីចំណាត់ថ្នាក់មហាសេដ្ឋីរបស់ទស្សនាវដ្ដី Bloomberg ដែលបានធ្វើបច្ចុប្បន្នភាពកាលពីម្សិលមិញ (06 សីហា) ទ្រព្យរបស់វេជ្ជបណ្ឌិត Loo Choon Yong នាយកប្រតិបត្តិនៃក្រុមហ៊ុន Raffles Medical បានកើនឡើងលើសពី 1 ពាន់លានដុល្លារ ក្រោយពីប្រាក់ចំណូលសុទ្ធរបស់ក្រុមហ៊ុនផ្គត់ផ្គង់សេវាកម្មសុខាភិបាលនេះ កើនឡើងជាងទ្វេដង នៅក្នុងពាក់កណ្ដាលដើមឆ្នាំ 2021 ខណៈមូលបត្រក៏បានកើន 104% ធៀបនឹងខែមីនា ឆ្នាំ 2020។

ក្រុមហ៊ុន Raffles Medical កំពុងគ្រប់គ្រងមជ្ឈមណ្ឌលចាក់វ៉ាក់សាំងចំនួន 15 នៅប្រទេសសិង្ហបុរី និងជួយដល់សកម្មភាពចម្រាញ់រកអ្នកផ្ទុកវីរុសនៅឯព្រលានយន្តហោះ ក៏ដូចជាផ្ដល់សេវាកម្មយកសំណាកទៅធ្វើតេស្តផងដែរ។ ក្រុមហ៊ុននេះ ក៏កំពុងដំណើរការគ្លីនិកជាង 80 និងមន្ទីរពេទ្យចំនួន 1 នៅ សិង្ហបុរី។

វេជ្ជបណ្ឌិត Loo Choon Yong មានភាគហ៊ុនប្រមាណ 52% នៅក្នុងក្រុមហ៊ុន Raffles Medical។ វេជ្ជបណ្ឌិតវ័យ 72 ឆ្នាំ រូបនេះ បានសហការបង្កើតក្រុមហ៊ុននេះ ជាមួយមិត្តម្នាក់ឈ្មោះ Alfred Loh កាលពីឆ្នាំ 1976។ ដំបូង ពួកគេបានទិញបន្ទប់ពិគ្រោះជំងឺចំនួន 2 ផ្សេងគ្នា ហើយចាប់ផ្ដើមកសាងក្រុមហ៊ុននេះទៅតាមដំណាក់កាល។ ក្រៅពី សិង្ហបុរី ក្រុមហ៊ុន Raffles Medical ក៏មានមន្ទីរពេទ្យចំនួន 3 នៅប្រទេសចិន និងពង្រីកអាជីវកម្មទៅកាន់ប្រទេសជប៉ុន និង កម្ពុជា ផងដែរ។ នៅភ្នំពេញ Raffles Medical មានទីតាំងស្ថិតនៅក្នុងសង្កាត់បឹងរាំង ខណ្ឌពេញ។

វេជ្ជបណ្ឌិត Loo ឱ្យដឹងថា៖ «នៅក្នុងអំឡុង COVID-19 អ្នកជំងឺមានការព្រួយបារម្ភ និងចង់តែនៅផ្ទះ មិនចង់ទៅពិនិត្យសុខភាព នៅចំពោះមុខហានិភ័យនៃការឆ្លងវីរុស»។

ដូច្នេះហើយ ក្រុមហ៊ុនក៏ទទួលបានការអនុញ្ញាតក្នុងការបញ្ជូនក្រុមវេជ្ជបណ្ឌិត និងបុគ្គលិកសុខាភិបាលរបស់ខ្លួន ទៅកាន់តំបន់នានា ដើម្បីធ្វើតេស្តរក COVID-19 និងចម្រាញ់រកអ្នកឆ្លងវីរុស នៅព្រលានយន្តហោះ។ ជាលទ្ធផល ប្រាក់ចំណេញក្រោយការបង់ពន្ធដែលក្រុមហ៊ុននេះរកបានក្នុងពាក់កណ្ដាលដើមឆ្នាំ 2021 នេះ ឡើងដល់ 28.7 លានដុល្លារអាមេរិក កើន 138% ធៀបនឹងដំណាក់កាលដូចគ្នា ក្នុងឆ្នាំ 2020។ ប្រាក់ចំណូលរបស់ក្រុមហ៊ុន ក៏បានកើន 42% ឡើងដល់ 254.4 លានដុល្លារអាមេរិក៕

August 7, 2021

តារាងចំណាត់ថ្នាក់មេដាយ Olympic Games Tokyo 2021 សម្រាប់ថ្ងៃទី 06 សីហា

ក្រុមកីឡាកររបស់ប្រទេសចិន កំពុងបង្ហាញស្នាដៃខ្លាំងក្លារបស់ខ្លួន នៅ Olympic Games Tokyo 2020 ដែលកំពុងប្រព្រឹត្តិក្នុងឆ្នាំ 2021 នៅប្រទេសជប៉ុន។

ក្នុងតារាងចំណាត់ថ្នាក់នៃចំនួនមេដាយ ដែលក្រុមកីឡាករនៃបណ្ដាប្រទេសដណ្ដើមបាននេះ ក្រុមរបស់ចិន កំពុងនាំមុខគេនៅព្រឹត្តិការណ៍កីឡាអូឡាំពិកលើកនេះ ដោយដណ្ដើមបានមេដាយមាសចំនួន 34, មេដាយប្រាក់ចំនួន 24 និងមេដាយសំរឹទ្ធចំនួន 17។ ជាសរុប គិតមកដល់ពេលនេះ ចិន ដណ្ដើមបានមេដាយចំនួន 75 រួចហើយ។

ឈរលំដាប់ទី 2 គឺ សហរដ្ឋអាមេរិក ដោយដណ្ដើមបានមេដាយមាសចំនួន 30, មេដាយប្រាក់ចំនួន 35, មេដាយសំរឹទ្ធចំនួន 27។ សរុបមក ប្រទេសនេះ រកបានមេដាយចំនួន 92។

ចំណែកលំដាប់ទី 3 គឺ ជប៉ុន ដែលជាម្ចាស់ផ្ទះ ដោយដណ្ដើមបានមេដាយសរុបចំនួន 47 ក្នុងនោះមានមេដាយមាសចំនួន 22, ប្រាក់ចំនួន 10 និងសំរឹទ្ធចំនួន 15។

រីឯចំណាត់ថ្នាក់ទី 4 បានទៅលើ អង់គ្លេស, ទី 5 អូស្ត្រាលី, ទី 6 រុស្ស៊ី, 7 អាល្លឺម៉ង់, 8 អ៊ីតាលី, 9 ហូឡង់, ទី 10 បានទៅលើប្រទេស បារាំង។

August 6, 2021

យន្តហោះលក្ខណៈបុគ្គល បំពាក់ស្លាបកង្ហារ 33 គ្រឿង អាចហោះឡើងត្រង់ដូចឧទ្ធម្ភាគចក្រ នឹងដាក់លក់ចាប់ពីឆ្នាំ 2022

យន្តហោះដែលអាចហោះហើរឡើងត្រង់នេះ មានកន្លែងអង្គុយចំនួន 1 និងមានល្បឿន 160 គម/ម៉ោង ហើយអាចហោះបានរយៈចម្ងាយ 160 គីឡូម៉ែត្រ ក្រោយការបញ្ចូលថាមពលពេញ។

ក្រុមហ៊ុន ជប៉ុន Tetra Aviation បានតាំងបង្ហាញផលិតផលពាណិជ្ជកម្មដំបូងរបស់ខ្លួន នៅឯព្រឹត្តិការណ៍តាំងពិព័រណ៍ AirVenture របស់សមាគមយន្តហោះសាកល្បង (EAA) ដែលធ្វើឡើងនៅ Oshkosh រដ្ឋ Wisconsin សហរដ្ឋអាមេរិក ចាប់ពីថ្ងៃទី 26 កក្កដា ដល់ថ្ងៃទី 01 សីហា។ នោះគឺម៉ូដែលយន្តហោះដែលហោះឡើង និងចុះចតត្រង់ ដំណើរការដោយអគ្គិសនី មានឈ្មោះថា Mk5។ ក្រុមហ៊ុននេះសង្ឃឹមថា នឹងអាចប្រគល់ទំនិញដល់អតិថិជន ចាប់ពីឆ្នាំ 2022 តទៅ។

Mk5 គឺជាយន្តហោះមានកៅអីចំនួន 1 គ្រឿង, កង្ហារយោងចំនួន 32 គ្រឿង និងកង្ហាររុញ 1 គ្រឿង។ គ្រោងឆ្អឹងរបស់យន្តហោះនេះ ភាគច្រើនធ្វើអំពីអាលុយមីញ៉ូម រីឯសម្បកខាងក្រៅធ្វើអំពី ប៉ូលីមែរ (polymer) ដែលពង្រឹងដោយសរសៃកាបូនស្រាល និងសរសៃអារ៉ាម (aramid)។

យន្តហោះគំរូ Mk5 បានហោះហើរសាកល្បងនៅ Oshkosh រួចហើយ។ កំណែគំរូនេះ ប្រើប្រាស់អាគុយ 13.5 kWh ហើយដងខ្លួនរបស់វា មានទទឹង 8.62 ម៉ែត្រ បណ្ដោយ 615 ម៉ែត្រ និងកម្ពស់ 2.51 ម៉ែត្រ។ ទម្ងន់ទទេរបស់វាគឺ 488 គីឡូក្រាម ខណៈទម្ងន់ហោះហើរជាអតិបរមាគឺ 567 គីឡូក្រាម ពោលគឺវាអាចដឹកមនុស្សដែលមានទម្ងន់ 79 គីឡូក្រាម ឬស្រាលជាងនេះ។

សម្រាប់កំណែពាណិជ្ជកម្មរបស់ Mk5 ត្រូវបានក្រុមហ៊ុនអះអាងថា នឹងមានសមត្ថភាពខ្ពស់ជាងនេះ ដោយវាអាចដឹកមនុស្សដែលមានទម្ងន់យ៉ាងតិច 91 គីឡូក្រាម ហោះក្នុងល្បឿន 160 គីឡូម៉ែត្រ/ម៉ោង និងហោះបានក្នុងរយៈចម្ងាយ 160 គីឡីម៉ែត្រ បន្ទាប់ពីបានបញ្ចូលអាគុយពេញ។ អំពីសុវត្ថិភាពវិញ Tetra នឹងប្រើប្រាស់ប្រព័ន្ធបញ្ជាការហោះហើរបម្រុងយ៉ាងតិចចំនួន 3 ដែលមានមានលទ្ធភាពបែងចែកអគ្គិសនីទៅឱ្យស្លាបកង្ហារយោងចំនួន 32 គ្រឿង សម្រាប់បង្ការលើបញ្ហាគាំងម៉ាស៊ីន ឬប្រព័ន្ធបញ្ជាការហោះហើរណាមួយលែងដំណើរការ។ ក្នុងករណីចាំបាច់បន្ទាន់ អ្នកបើកបរអាចរំដោះខ្លួនដោយសុវត្ថិភាព តាមរយៈឆត្រយោង។

តាមផែនការ Tetra នឹងដាក់លក់ Mk5 ក្រោមរូបភាពយន្តហោះដែលអាចដំឡើងដោយអតិថិជន។ ម្ចាស់យន្តហោះ អាចបើកបរបាន បើសិនមានប័ណ្ណបើកបរយន្តហោះលក្ខណៈបុគ្គលនៅ សហរដ្ឋអាមេរិក។ យ៉ាងនេះក្ដី តម្លៃរបស់ Mk5 មិនទាន់ត្រូវបានបង្ហើបឱ្យដឹងនៅឡើយ៕

August 6, 2021

NASA តែងតាំងពលរដ្ឋដើមកំណើត វៀតណាម ជាប្រធានផ្នែកហិរញ្ញវត្ថុ

អ្នកស្រី Margaret Vo Schaus ដែលជាពលរដ្ឋអាមេរិកាំងដើមកំណើត វៀតណាម ត្រូវបានតែងតាំងឱ្យធ្វើជាប្រធានផ្នែកហិរញ្ញវត្ថុនៃទីភ្នាក់ងារអវកាសអាមេរិក (NASA) នេះបើតាមសារព័ត៌មាន Yahoo News។

អ្នកស្រី Margaret Vo Schaus បានឱ្យដឹងថា «មានមោទកភាពខ្លាំងណាស់ នៅពេលបានស្បថចូលកាន់តំណែង» ក្រោមអធិបតីភាពរបស់អគ្គនាយក NASA លោក Bill Nelson កាលពីថ្ងៃទី 04 សីហា។ លោកស្រីក៏បានសំដែងការដឹងគុណដល់ប្រធានាធិបតី Biden ដែលបានផ្ដល់ឱកាសឱ្យអ្នកស្រី ធ្វើជាអ្នក «គ្រប់គ្រងថវិការបស់ NASA»។

លោក Nelson ឱ្យដឹងថា លោកបានស្គាល់ Vo Schaus ជាច្រើនឆ្នាំមកហើយ និងយល់ថា បទពិសោធន៍របស់អ្នកស្រី នឹង «ជួយអនុវត្តគោលដៅ និងបេសកកម្មរបស់ NASA ពីនិយមន័យ ឱ្យទៅជាការជាក់ស្ដែង»។

មុនពេលត្រូវបានតែងតាំងជានាយិកាផ្នែកហិរញ្ញវត្ថុរបស់ NASA អ្នកស្រី Vo Shaus បានកាន់តំណែងជាប្រធានពាណិជ្ជកម្មនៃការិយាល័យស្រាវជ្រាវនិងបច្ចេកទេស របស់ក្រសួងការពារជាតិ សហរដ្ឋអាមេរិក ដែលទទួលខុសត្រូវក្នុងការតាមដាន «ថវិកាខ្ទង់ពាន់លានដុល្លារ»។ អ្នកស្រីក៏ស្ថិតក្នុងគណៈគ្រប់គ្រងជាន់ខ្ពស់របស់នាយកដ្ឋានថាមពល និងការពារជាតិ អស់ជាច្រើនទសវត្សរ៍។

អ្នកស្រី Vo Schaus បានបញ្ចប់ការសិក្សាថ្នាក់បរិញ្ញាបត្រវិទ្យាសាស្ត្រ បច្ចេកវិទ្យា សង្គម និងភាសាអង់គ្លេស។ អ្នកស្រីក៏ទទួលបានសញ្ញាបត្រថ្នាក់អនុបណ្ឌិតផ្នែកគ្រប់គ្រងវិទ្យាសាស្ត្រ និងបច្ចេកទេសពី សាកលវិទ្យាល័យ Stanford ផងដែរ៕

August 6, 2021

ចំនួនសេដ្ឋីក្នុងពិភពលោក នៅតែកើនឡើងច្រើនជាងពេលណាៗទាំងអស់ បើទោះ COVID-19 កំពុងរាតត្បាតខ្លាំង

មនុស្សជាង 5 លាននាក់ បានក្លាយជាសេដ្ឋីដុល្លារ ចាប់ពីឆ្នាំ 2019 ដល់ឆ្នាំ 2020 ដែលនេះធ្វើឱ្យពិភពលោក មានប្រជាជនពេញវ័យជាង 1% ក្លាយជាសេដ្ឋីដុល្លារ។

ក្នុងរយៈពេល 17 ខែ រាប់ចាប់តាំងពី COVID-19 បានបង្ហាញខ្លួន មនុស្សរាប់សិបលាននាក់ បានធ្លាក់ទៅក្នុងស្ថានភាពលំបាកខ្លាំង ប៉ុន្តែ ក៏មានមនុស្សរាប់លាននាក់ បានក្លាយជាសេដ្ឋីផងដែរ។ យោងតាមទិន្នន័យពីធនាគារស្វីស Credit Suisse ដែលត្រូវបានចេញផ្សាយកាលពីខែមិថុនាកន្លងទៅ មនុស្សជាង 5 លាននាក់ បានក្លាយជាសេដ្ឋី រាប់ចាប់ពីឆ្នាំ 2019 ដល់ឆ្នាំ 2020 បើទោះជា COVID-19 កំពុងធ្វើឱ្យសេដ្ឋកិច្ចពិភពលោកទាំងមូល ត្រូវដាំក្បាល។

ចក្រភពអង់គ្លេស មានសេដ្ឋីថ្មី ចំនួន 258,000 នាក់បន្ថែមទៀត នាំឱ្យចំនួនសេដ្ឋីនៅប្រទេសនេះ កើនឡើងដល់ 2.5 លាននាក់។ យោងតាម Vice នេះគឺជាលើកដំបូងហើយ ដែលពិភពលោកទាំងមូល មានប្រជាជនជាង 1% ក្លាយជាសេដ្ឋីប្រាក់ដុល្លារ។

មិនត្រឹមតែសេដ្ឋីនោះទេ ដែលកើនឡើងច្រើន ប៉ុន្តែ ចំនួនមហាសេដ្ឋីរបស់ពិភពលោក ក៏បាន និងកំពុងកើនឡើងច្រើនគួរឱ្យកត់សម្គាល់។ តារាងចំណាត់ថ្នាក់អ្នកមានជាងគេប្រចាំឆ្នាំ លើកទី 35 របស់ទស្សនាវដ្ដី Forbes ដែលបានចេញផ្សាយកាលពីឆ្នាំ 2020 បង្ហាញថា រៀងរាល់ 17 ម៉ោង ពិភពលោកក៏មានមហាសេដ្ឋីម្នាក់បង្ហាញខ្លួន។ ធៀបនឹងឆ្នាំ 2019 Forbes បានបន្ថែមមហាសេដ្ឋីថ្មីចំនួន 660 នាក់ទៅក្នុងតារាងចំណាត់ថ្នាក់ សម្រាប់ឆ្នាំ 2020។

នៅក្នុងរបាយការណ៍ Credit Suisse បានឱ្យដឹងថា ការកើនឡើងនៃចំនួនសេដ្ឋី ភាគច្រើនទាក់ទងនឹងអចលនទ្រព្យដែលពួកគេកំពុងកាន់កាប់។

Nannette Hechler-Fayd’herbe ប្រធានផ្នែកសេដ្ឋកិច្ច និងស្រាវជ្រាវសកល ប្រចាំធនាគារ Credit Suisse ឱ្យដឹងថា ចំនួនសេដ្ឋីដែលនៅតែកើនឡើងនេះ មួយផ្នែកក៏ទាក់ទងនឹងការដែលរដ្ឋាភិបាលបណ្ដាប្រទេស ចាត់វិធានការដើម្បីទប់ស្កាត់វិបត្តិសេដ្ឋកិច្ច និងហានិភ័យនៃអតិភរណា ក្នុងនោះ ក៏មានការជួយជាថវិកាជំរុញសេដ្ឋកិច្ច ដែលបណ្ដាក្រុមហ៊ុនជាអ្នកទទួលផលផងដែរ។

ចែករំលែកជាមួយ Vice អតីត CEO របស់ Black Rock លោក Morris Pearl បាននិយាយថា៖ «ពុំមានអ្វីអាក្រក់នោះទេ នៅពេលគ្រប់គ្នាមានទ្រព្យច្រើនជាងមុន។ ប៉ុន្តែ ប្រការសំខាន់ដែលត្រូវយកចិត្តទុកដាក់ នោះគឺ បញ្ហាវិសមភាព។ យើងមិនចង់ឃើញទិដ្ឋភាពសេដ្ឋីកាន់តែមានចំនួនច្រើនឡើងៗ ចំណែកឯអ្នកគ្មានផ្ទះសំបែងក៏ចេះតែកើនឡើងច្រើន ពីមួយថ្ងៃ ទៅមួយថ្ងៃ»។

លោក Morris Pearl គឺជាមនុស្សម្នាក់ នៅក្នុងចំណោមសេដ្ឋីជនជាតិអាមេរិក ជាច្រើនរូប ដែលកំពុងអំពាវនាវឱ្យរដ្ឋាភិបាល សហរដ្ឋអាមេរិក ចាត់វិធានការដែលមានប្រសិទ្ធភាពជាងបច្ចុប្បន្ន ដើម្បីកាត់បន្ថយគម្លាតរវាងអ្នកមាន និងអ្នកក្រ។

សាស្ត្រាចារ្យមួយរូប ថ្លែងថា៖ «ការពិតមួយដ៏គួរឱ្យស្រពោនចិត្ត នោះគឺថា ក្រុមអ្នកមានលំដាប់កំពូល មិនបានយកចិត្តទុកដាក់លើបញ្ហាគ្រប់យ៉ាងដែលគ្រប់គ្នាគិតនោះឡើយ។ មហាសេដ្ឋី និងសេដ្ឋីមិនតិចនោះទេ ដែលបានឈប់គិត ឬមិនអើពើដល់ផលប្រយោជន៍សាធារណៈ ព្រោះពួកគេធ្វើសកម្មភាពជំនួញបានល្អណាស់នៅក្នុងគ្រានេះ បើទោះជាមនុស្សជាច្រើនកំពុងជួបការលំបាកខ្លាំងក៏ដោយ»៕

August 6, 2021

Rihanna ក្លាយជាមហាសេដ្ឋិនីជាអ្នកចម្រៀងដំបូងគេបង្អស់ក្នុងពិភពលោក

នាង Rihanna ក្លាយជាតារាចម្រៀងស្រីដែលមានទ្រព្យច្រើនជាងគេក្នុងពិភពលោក និងជាស្ត្រីដែលមានលុយច្រើនជាងគេលំដាប់ទីពីរ នៅក្នុងវិស័យសិល្បៈ បន្ទាប់ពី Oprah Winfrey។

យោងតាមស្ថិតិរបស់ទស្សនាវដ្ដី Forbes តារាចម្រៀង Robyn Rihanna Fenty ទើបតែបានក្លាយជាមហាសេដ្ឋិនីប្រាក់ដុល្លារនាបច្ចុប្បន្ន។ Forbes បានធ្វើការតាមដានទិន្នន័យរបស់បុគ្គលអ្នកមានៗនៅទូទាំងពិភពលោក អស់រយៈពេលច្រើនឆ្នាំមកហើយ។ ហើយកាលពីម្សិលមិញ (04 សីហា) តារាចម្រៀងប៉ុប វ័យ 33 ឆ្នាំ នាង Rihanna ត្រូវបាន Forbes គណនាឃើញថា មានទ្រព្យក្នុងដៃចំនួន 1.7 ពាន់លានដុល្លារឯណោះ។ ប្រការនេះ ធ្វើឱ្យនាងក្លាយជាតារាចម្រៀងស្រីដែលមានទ្រព្យច្រើនជាងគេក្នុងសកលលោក និងជាស្ត្រីដែលមានលុយច្រើនជាងគេលំដាប់ទីពីរ នៅក្នុងវិស័យសិល្បៈ បន្ទាប់ពី Oprah Winfrey។

រយៈពេល 5 ឆ្នាំមកហើយ រាប់ចាប់តាំងពីអាប៊ុម Anti របស់ Rihanna បានបង្ហាញខ្លួន និងបានឈរនៅលើកំពូលតារាងចំណាត់ថ្នាក់ Billboard រយៈពេល 63 សប្ដាហ៍ នាង Rihanna មិនបានបញ្ចេញអាល់ប៊ុមថ្មីណាមួយទៀតឡើយ ប៉ុន្តែ នាងបានផ្ដោតទៅលើមុខជំនួញ តាមរយៈស៊េរីផលិតផលគ្រឿងសម្អាង Fenty Beauty និងឈុតខោអាវទ្រនាប់ Savage x Fenty។

Forbes បានគណនាឃើញថា ស៊េរីគ្រឿងសម្អាង Fenty Beauty មានតម្លៃរហូតដល់ 2.8 ពាន់លានដុល្លារអាមេរិក។ ក្នុងឆ្នាំ 2018 ផលិតផលយីហោនេះ ត្រូវបានដាក់លក់ក្នុងបណ្ដាញហាង Sephora និងរកចំណូលបានជាង 550 លានដុល្លារជារៀងរាល់ឆ្នាំ ខ្ពស់ជាងយីហោ KKW Beauty របស់ Kim Kardeshian, Kylie Cosmetics របស់ Kylie Jenner និង Honest របស់ Jessica Alba ទៅទៀត។

កត្តាមួយក្នុងចំណោមកត្តាសំខាន់ដែលជួយឱ្យ Rihanna ទទួលបានជោគជ័យនៅក្នុងវិស័យគ្រឿងសម្អាង និងសម្លៀកបំពាក់ នោះគឺ ដោយសារការផ្សព្វផ្សាយផលិតផលដែលសមស្របនឹងស្រី ដោយវាតម្រូវតាមទម្រង់រូបរាង គ្រប់ទំហំ និងគ្រប់ពណ៌ស្បែក។

ខណៈដែល Victoria’s Secret បាចលុយរាប់លានដុល្លារ ទៅក្នុងព្រឹត្តិការណ៍បង្ហាញម៉ូដប្រណិតៗ Fenty Beauty របស់ Rihanna ឯណេះវិញ បែរជាភ្ជាប់ទំនាក់ទំនងជាមួយបណ្ដាញអនឡាញ ដើម្បីស្វែងរកអតិថិជន។ យីហោខោអាវទ្រនាប់របស់ Victoria’s Secret មានភាពល្បីល្បាញជាមួយនឹងកំពូលតារាៗបង្ហាញម៉ូដ ប៉ុន្តែ Savage x Fenty របស់ Rihanna ក៏បែរជាលុបបំបាត់រាល់ឧបសគ្គទាក់ទងនឹងសម្រស់របស់ស្ត្រី។

នៅក្នុងព្រឹត្តិការណ៍បង្ហាញម៉ូដដំបូងរបស់ Savage x Fenty គេឃើញថា អ្នកបង្ហាញម៉ូដជាច្រើនពិតជាមានសម្រស់ផ្ទុយពីតារាបង្ហាញម៉ូដទូទៅ។ និយមន័យស្ដីពីសម្រស់នៃរូបរាងកាយ ទំនងជាត្រូវបានបំបាត់ចោលនៅក្នុងព្រឹត្តិការណ៍នេះ។ Rihanna បានសង្កត់ធ្ងន់ថា៖ «ចូរស្អាតទៅតាមបែបបទរបស់អ្នក»។

ការបោះជំហានដ៏ឆ្លាតវៃ និងសារដែលងាយទទួលយក គឺជា មូលហេតុដែលនាំឱ្យឱ្យយីហោខោអាវទ្រនាប់របស់ Rihanna ឆាប់ទទួលបានការគាំទ្រពីបងប្អូនស្ត្រី។

Forbes បាននិយាយថា Rihanna កាន់កាប់ភាគហ៊ុន 30% នៅក្នុងក្រុមហ៊ុន Savage x Fenty។ ក្រុមហ៊ុននេះ ប្រមូលទុនបាន 115 លានដុល្លារ កាលពីខែកុម្ភៈ ឆ្នាំ 2021 បន្ទាប់ពីត្រូវបានកំណត់តម្លៃ 1 ពាន់លានដុល្លារអាមេរិក។ CEO របស់ក្រុមហ៊ុន LVMH គឺមហាសេដ្ឋី Bernard Arnault និងតារាចម្រៀងរ៉ែប Jay Z ក៏ជាអ្នកវិនិយោគសំខាន់របស់យីហោ Savage x Fenty នេះផងដែរ៕

August 5, 2021

Category: សង្គម និងសេដ្ឋកិច្ច