សង្គម និងសេដ្ឋកិច្ច - La Reine Media

រោងចក្រផលិតតាក់ស៊ីហោះរបស់ក្រុមហ៊ុន EHang

ប្រទេសចិន៖ រោងចក្រនៅទីក្រុង Yunfu របស់ក្រុមហ៊ុន Ehang កំពុងផលិតតាក់ស៊ីហោះចំនួនពីរម៉ូដែល គឺ 216 និង VT30។

ក្រុមហ៊ុន EHang នៅដែលមានទីស្នាក់ការកណ្ដាលនៅ Guangzhou កាលពីថ្ងៃទី 18 សីហា បានចែករំលែកវីដេអូស្ដីអំពីរោងចក្រផលិតតាក់ស៊ីហោះរបស់ខ្លួន ដែលកំពុងដំណើរការគ្រប់ជ្រុងជ្រោយ នៅក្នុងទីរួមស្រុក Yunfu។ EHang ធ្លាប់បានដឹកមនុស្សជាច្រើននាក់ដោយប្រើប្រាស់យន្តហោះអគ្គិសនី ដែលហោះឡើង និងចុះចតត្រង់ (eVTOL) ក្នុងនោះក៏មាន នាយកប្រតិបត្តិរបស់ក្រុមហ៊ុននេះផងដែរ។

ការធ្វើតេស្តជាច្រើនដែលជួយឱ្យ EHang ទទួលបានជោគជ័យ បាននាំឱ្យក្រុមហ៊ុននេះ លេចធ្លោជាង បើបៀបធៀបនឹងក្រុមហ៊ុនផលិតតាក់ស៊ីហោះដទៃទៀត ដូចជា Joby Aero Inc ដែលកំពុងធ្វើតេស្តហោះហើរដោយគ្មានមនុស្សជិត និងក្រុមហ៊ុន Volocopter ដែលទើបតែធ្វើតេស្តហោះហើរដឹកមនុស្សដំបូងកាលពីខែមុន។ តាមគម្រោង EHang នឹងផ្ដល់សេវាកម្មនៅ ប៉ារីស និងសិង្ហបុរី ចាប់ពីឆ្នាំ 2024។

នៅក្នុងវីដេអូថ្មី រោងចក្ររបស់ EHang ត្រូវបានគេពិពណ៌នាថាជា ទីតាំងផលិតតាក់ស៊ីហោះ eVTOL ដែលដំណើរការពេញលេញដំបូងគេក្នុងពិភពលោក។ ខ្សែច្រវាក់ផលិតកម្មរបស់រោងចក្រទំហំ 2,230 ម៉ែត្រក្រឡា នៅ Yunfu នេះ កំពុងផលិតគ្រឿងបម្លាស់ចាំបាច់សម្រាប់ដំឡើងជាតាក់ស៊ីហោះស្វ័យប្រវត្ត ម៉ូដែល 216 និងយន្តហោះក្នុងទីក្រុង VT30 ហើយម៉ូដែលទាំងពីរនេះ សុទ្ធតែជាមធ្យោបាយហោះហើរ ដែលមានកៅអីចំនួន 2 ដូចគ្នា។ វីដេអូនេះ ក៏បង្ហាញឱ្យដឹងអំពីដំណើរការនៃការបាញ់ថ្នាំ ការដំឡើងស្លាប និងការធ្វើតេស្តប្រព័ន្ធរុញច្រាន។ល។

កាលពីឆ្នាំមុន EHang ប្រកាសថា សហការជាមួយអាជ្ញាធរក្នុងស្រុក នៅ អេស្ប៉ាញ និង ន័រវែស ដើម្បីដំណើរការសាកល្បងនូវបច្ចេកវិទ្យាតាក់ស៊ីហោះ ដែលដំណើរការទាំងស្រុងដោយថាមពលអគ្គិសនី ក៏ដូចជាបង្ហាញម៉ូដែលយន្តហោះគ្មានមនុស្សបើក (Drone) ប្រភេទ 200 គីឡូក្រាម។

EHang កំពុងឆ្ពោះទៅរកគោលដៅសំខាន់ៗជាច្រើន នៅក្នុងទីផ្សារពិភពលោក។ ក្រុមហ៊ុននេះ ទទួលបានការគាំទ្រយ៉ាងច្រើនពីសំណាក់រដ្ឋាភិបាលប្រទេសចិន ក្នុងការធ្វើតេស្តប្រព័ន្ធនានារបស់យន្តហោះ។ ប្រទេសចិន សង្ឃឹមថា អាចស្ដារឡើងវិញនូវតំណែងលំដាប់កំពូលរបស់ខ្លួននៅលើឆាកអន្តរជាតិ ទាក់ទងនឹងបច្ចេកវិទ្យាយន្តហោះគ្មានមនុស្សបើកបរ ក្នុងគ្រាដែលក្រុមហ៊ុនផលិតតាក់ស៊ីហោះជាច្រើន កំពុងបង្ហាញខ្លួន៕

August 23, 2021

អតីតភរិយារបស់ Bill Gates ស្ថិតក្នុង Top 30 នៃស្ត្រីមានទ្រព្យច្រើនបំផុតនៅ សហរដ្ឋអាមេរិក ក្រោយលែងលះ

Melinda French Gates កាន់កាប់ទ្រព្យសម្បត្តិដែលមានតម្លៃរាប់ពាន់លានដុល្លារអាមេរិក និងជាស្ត្រីដែលមានទ្រព្យច្រើនជាងគេលំដាប់ទី 28 នៅ សហរដ្ឋអាមេរិក។

យោងតាមបញ្ជីចំណាត់ថ្នាក់អ្នកមាន Real Time របស់ Forbes អ្នកស្រី Melinda French Gates ដែលជាអតីតភរិយារបស់មហាសេដ្ឋី អាមេរិក Bill Gates បច្ចុប្បន្ន មានទ្រព្យសរុប 5.7 ពាន់លានដុល្លារ និងជាស្ត្រីដែលមានទ្រព្យច្រើនជាងគេលំដាប់ទី 28 នៅ សហរដ្ឋអាមេរិក។ ចំណែក MacKenzie Scott ដែលជាអតីតភរិយារបស់ម្ចាស់ Amazon លោក Jeff Bezos កំពុងជាមហាសេដ្ឋិនីលំដាប់ទីពីរនៅ សហរដ្ឋអាមេរិក ជាមួយនឹងទ្រព្យសម្បត្តិសរុប 53.8 ពាន់លានដុល្លារ។ នៅលើកំពូលតារាងចំណាត់ថ្នាក់នេះ គឺ Alice Walton ដែលជាអ្នកស្នងមរតកនៃក្រុមហ៊ុន Walmart ដោយមានទ្រព្យ 67.8 ពាន់លានដុល្លារ។

យោងតាមឯកសាររបស់គណៈកម្មការមូលបត្រអាមេរិក កាលពីថ្ងៃទី 5 សីហា មូលនិធិវិនិយោគ Cascade Investment របស់លោក Gates បានផ្ទេរមូលបត្រចំនួន 3.3 លានហ៊ុនរបស់ AutoNation តម្លៃប្រហែល 387 លានដុល្លារ ទៅឱ្យ Melinda។ អតីតភរិយារបស់លោក Gates ក៏ទទួលបានមូលបត្រ 2.8 លានហ៊ុនរបស់ Deere & Co. តម្លៃប្រហែល 1 ពាន់លានដុល្លារ និងមូលបត្រ 9.5 លានហ៊ុនរបស់ Canadian National Railway Co. តម្លៃជាង 1 ពាន់លានដុល្លារ។

មុននោះ បន្ទាប់ពីបានប្រកាសលែងលះកាលពីដើមខែឧសភា អ្នកស្រី Melinda ក៏ទទួលបានមូលបត្រពីបណ្ដាក្រុមហ៊ុនខាងលើ ក្នុងតម្លៃជាង 3 ពាន់លានដុល្លារផងដែរ។

ចំណែកលោក Bill Gates វិញ Forbes បានគណនាឃើញថា សហស្ថាបនិកនៃក្រុមហ៊ុន Microsoft កំពុងកាន់កាប់ទ្រព្យដែលមានតម្លៃ 129.9 ពាន់លានដុល្លារ។ បច្ចុប្បន្ន មហាសេដ្ឋីរូបនេះ គឺជាអ្នកមានជាងគេលំដាប់ទី 4 ក្នុងពិភពលោក បន្ទាប់ពី Jeff Bezos, Elon Musk និង Bernard Arnault។

គួររំលឹកថា Bill និង Melinda បានជួបគ្នានៅឯក្រុមហ៊ុន Microsoft ដែលពេលនោះ លោក Gates គឺជា CEO។ Melinda ចាប់ផ្ដើមធ្វើការជាអ្នកគ្រប់គ្រងផ្នែកផ្សព្វផ្សាយកម្មវិធីឯកសាររបស់ Microsoft នៅឆ្នាំ 1987។ កាលណោះ អ្នកស្រីគឺជាស្ត្រីតែម្នាក់គត់ក្នុងចំណោមអ្នកដែលមានសញ្ញាបត្រអនុបណ្ឌិតផ្នែកគ្រប់គ្រងពាណិជ្ជកម្មនៅ Microsoft។ កាលពីខែឧសភា ឆ្នាំនេះ លោក Gates និងអ្នកស្រី Melinda បានប្រកាសលែងលះគ្នា បន្ទាប់ពីរស់នៅជាប្ដីប្រពន្ធបាន 27 ឆ្នាំ៕

August 20, 2021

មនុស្សយន្តរបស់ អាមេរិក អាចហក់ លោតដូចអត្តពលិក parkour (វីដេអូ)

រ៉ូបូតជើងពីរ កម្ពស់ 150 ស.ម និងទម្ងន់ 86 គីឡូក្រាម ឈ្មោះ Atlas មានសមត្ថភាពអាចធ្វើសកម្មភាពពិបាកៗដែលមនុស្សជាច្រើនមិនអាចធ្វើបាន ដូចជាការលោត រត់ ដើរលើកំណាត់ឈើ និងលោតដាំក្បាលត្រលប់ក្រោយជាដើម។

ក្រុមហ៊ុនអភិវឌ្ឍរ៉ូបូត Boston Dynamics (អាមេរិក) កាលពីថ្ងៃទី 17 សីហា បានបញ្ចេញវីដេអូមួយបង្ហាញអំពី រ៉ូបូត Atlas សម្ដែងកីឡា parkour ប្រកបដោយភាពស្ទាត់ជំនាញ។ ពួកវាផ្លាស់ទីឆ្លងកាត់ឧបសគ្គបានយ៉ាងល្អ ក្នុងនោះក៏មានកាយវិការស្របគ្នា ដូចជាការបង្វិលខ្លួន និងលោតដាំក្បាលត្រលប់ក្រោយផងដែរ។

លទ្ធផលនៃការអភិវឌ្ឍខាងលើនេះ ជួយឱ្យរ៉ូបូត អាចដើរ ឬរត់នៅលើសណ្ឋានដីគ្រប់ប្រភេទ និងធ្វើការគ្រប់យ៉ាងនាពេលអនាគត។ នេះបើតាម Scott Kuindersma ប្រធានក្រុមអភិវឌ្ឍ Atlas ប្រចាំក្រុមហ៊ុន Boston Dynamics។

លោក Scott Kuindersma និយាយថា៖ «ការងារដែលយើងកំពុងធ្វើ តាមពិតគ្រាន់តែជាការកសាងមូលដ្ឋានគ្រឹះប៉ុណ្ណោះ»។

Atlas គឺជារ៉ូបូតដែលមានរូបរាងស្រដៀងមនុស្ស មានកម្ពស់ប្រហែល 150 សង់ទីមែត្រ និងទម្ងន់ 86 គីឡូក្រាម។ វាត្រូវបានបំពាក់អាគុយស្ងួត, កាមេរ៉ា RGB, អង្គញាណវាស់ជម្រៅ រួមនឹងកុំព្យូទ័រចំនួនបីគ្រឿង។

ក្រុមហ៊ុនខាងលើក៏បានបញ្ចេញវីដេអូក្រៅឆាកបង្ហាញថា រ៉ូបូត មិនមែនចេះតែអាចសម្ដែងដោយជោគជ័យក្នុងគ្រាដំបូងនោះទេ។ «ពួករ៉ូបូត ធ្លាប់បានដួលជាច្រើនលើក ហើយពេលខ្លះធ្វើឱ្យយើងធុញ និងអស់សង្ឃឹមផងដែរ» លោក Benjamin Stephens ប្រធានផ្នែកប្រព័ន្ធបញ្ជារបស់ Atlas រៀបរាប់។

លោក Benjamin Stephens ឱ្យដឹងថា ប្រការនេះគឺដូចទៅនឹងវីដេអូស្ដីពីកីឡាជិះស្គី ឬ parkour ក្នុងនោះ អត្តពលិកបានហាត់រាប់សិប ឬរាប់រយលើក ទើបអាចធ្វើបានល្អ ហើយ «យើងក៏កំពុងធ្វើដូច្នេះជាមួយនឹង Atlas»។

ក្រុមអ្នកវិទ្យាសាស្ត្រ ប្រចាំ Boston Dynamics បានចាប់ផ្ដើមឱ្យរ៉ូបូតពីរគ្រឿង ធ្វើសកម្មភាពដូចអត្តពលិក parkour ក្នុងពេលតែមួយ តាំងពីពីរសប្ដាហ៍មុន ហើយនេះគឺជាលើកដំបូងដែលថតសកម្មភាពពួកវាហាត់រួមគ្នា នេះបើតាម Benjamin Stephens៕

August 19, 2021

ធ្លាប់ត្រូវរិះគន់ថាអាក្រក់ ពេលនេះ Tesla Cybertruck ដំឡើងមិនទាន់ពេលឱ្យអតិថិជន

កាលពីត្រីមាសទីពីរ ឆ្នាំ 2021 ក្រុមហ៊ុន Tesla នៅមានភាពជឿជាក់ថា រថយន្ត Cybertruck នឹងឈានដល់ដំណាក់កាលដំឡើងនៅក្នុងរោងចក្រ Austin រដ្ឋ Texas ក្រោយពីខ្សែច្រវាក់ផលិតកម្មសម្រាប់ស៊េរី Tesla Model Y បានចាប់ផ្ដើមដំណើរការ។ ប៉ុន្តែ ពេលនេះ Tesla បានខកសន្យាម្ដងទៀតហើយ។

ថ្មីៗនេះ Tesla Cybertruck បានជូនដំណឹងដល់អតិថិជនរបស់ពួកគេថា រថយន្តនេះនឹងត្រូវបានផលិតចាប់ពីឆ្នាំ 2022។ មនុស្សជាច្រើនមិនជឿថា Tesla អាចធ្វើបានតាមការសន្យានេះឡើយ។

Tesla Cybertruck ដែលជារថយន្តប្រភេទភីកអាប់ ត្រូវបានឧទ្ទេសនាមកាលពីខែវិច្ឆិកា ឆ្នាំ 2019 ហើយត្រូវបានគេចាប់អារម្មណ៍ជាខ្លាំង ដោយសារតែរូបរាងដ៏ចម្លែករបស់វា ព្រោះមិនមានចំនុចណាដែលដូចទៅនឹងផលិតផលរបស់ក្រុមហ៊ុនដទៃ។ ក៏ប៉ុន្តែ 2 ឆ្នាំកន្លងទៅហើយ Tesla នៅតែមិនទាន់ធ្វើបានសម្រេចតាមផែនការ ខណៈ Ford F-150 ដែល «ចេញដំណើរក្រោយ» ប៉ុន្តែ «បានដល់គោលដៅមុន»។

ក្នុងរយៈពេលកន្លង មានព័ត៌មានជាច្រើនអះអាងថា Tesla Cybertruck ទទួលបានការបញ្ជាទិញរហូតដល់ជិត 1.25 លាននាក់ ប៉ុន្តែ ជោគជ័យរបស់ Tesla ត្រកូលភីកអាប់មួយនេះ នៅតែត្រូវគេសង្ស័យ ក្រោយពី CEO លោក Elon Musk ទទួលស្គាល់នៅលើ Twitter ថា រថយន្តនេះប្រហែលអាចក្លាយជាផលិតដែលមិនសូវជោគជ័យ ដោយសារវាមានកត្តាជាច្រើនដែលបង្កឱ្យមានភាពចម្រូងចម្រាស ពិសេសគឺជុំវិញរឿងរូបរាងមហាសែនចម្លែករបស់វា៕

August 18, 2021

ទស្សនាទិដ្ឋភាពនៃយានអវកាស ដឹកនំភីហ្សា ទៅកាន់ស្ថានីយ ISS

យានអវកាសដែលផ្ទុកទំនិញច្រើនមុខ ក្នុងនោះក៏មានអាហារស្រស់ និងនំភីហ្សា សម្រាប់ក្រុមអវកាសចរ បានហោះទៅដល់ស្ថានីយអវកាសអន្តរជាតិ ISS ដោយសុវត្ថិភាព។

សារព័ត៌មានអាមេរិក AP បានរាយការណ៍ថា យានដឹកទំនិញ Cygnus របស់ក្រុមហ៊ុន Northrop Grumman ដែលត្រូវបានបាញ់បង្ហោះពី Virginia (សហរដ្ឋអាមេរិក) ទៅកាន់ទីអវកាស កាលពីថ្ងៃទី 10 សីហា ហើយបានទៅដល់ ISS ដោយសុវត្ថិភាព នៅថ្ងៃទី 12 សីហា។

Cygnus បានដឹកទំនិញទម្ងន់ 3,700 គីឡូក្រាម រួមមាន ផ្លែប៉ោមស្រស់ ប៉េងប៉ោះ គីវី រួមទាំងនំភីហ្សាជាដើម សម្រាប់អ្នកអវកាសចំនួន 7 នាក់។ ទន្ទឹមនឹងនេះ ក៏មានធ្នើរសម្រាប់ដៃថាមពលព្រះអាទិត្យថ្មី ដែលនឹងត្រូវប្រើក្នុងឆ្នាំ 2022 នៅលើ ISS និងវត្ថុធាតុមួយសម្រាប់ធ្វើជាធូលីព្រះចន្ទសិប្បនិម្មិត និងធូលីសម្រាប់ផលិតវត្ថុធាតុដោយម៉ាស៊ីនបោះពុម្ភ 3D របស់ ISS, ពុម្ភសម្រាប់ការពិសោធផ្នែកអប់រំរបស់បារាំង ដែលមានឈ្មោះថា Blob និងឧបករណ៍ស្វែងរកកាំរស្មីអ៊ីនហ្វ្រារ៉េដ។

នេះគឺជាលើកទី 16 ហើយ ដែល Northrop Grumman បានជួយបញ្ជូនទំនិញរបស់ NASA ឡើងទៅកាន់ ISS ហើយនេះក៏ជាជើងហោះហើរទៅកាន់ទីអវកាសដែលផ្ទុកទំនិញច្រើនបំផុត។

https://www.youtube.com/watch?v=PPR-aUjsb5c

ISS បច្ចុប្បន្ន មានអ្នកអវកាសចំនួន 7 នាក់ កំពុងរស់នៅ និងធ្វើការ រួមមាន ជនជាតិអាមេរិកាំង 3 នាក់, ជនជាតិរុស្ស៊ី 2 នាក់, ជនជាតិបារាំង 1 នាក់ និងជនជាតិជប៉ុន 1 នាក់៕

August 13, 2021

ក្រុមមហាសេដ្ឋីដែលរកស៊ីពីបាតដៃទទេ កំពុងមានប្រៀបជាងអ្នកមានក្នុងក្រុម Chaebol នៅ កូរ៉េខាងត្បូង

ស្រទាប់អ្នកជំនួញដែលទើបតែរកស៊ីមានបានក្នុងជំនាន់ថ្មី កំពុងតែគ្រប់គ្រងតារាងចំណាត់ថ្នាក់អ្នកមាននៅប្រទេសកូរ៉េខាងត្បូង ដោយមានប្រៀបជាងសមាជិកនៃក្រុមត្រកូលអ្នកមានៗដែលឈរនៅពីក្រោយបណ្ដាក្រុមហ៊ុនចាស់វស្សា។

Brian Kim ស្ថាបនិកនៃក្រុមហ៊ុនគ្រប់គ្រងកម្មវិធីផ្ញើសារ Kakao គឺជាឧទាហរណ៍លេចធ្លោបំផុត នៅពេល «យកឈ្នះ» លើ «អ្នកស្នងមរតក» របស់ Samsung លោក Jay Y. Lee (Lee Jae-yong) ហើយក្លាយជាអ្នកមានជាងគេបង្អស់នៅប្រទេសកូរ៉េខាងត្បូង ដោយមានទ្រព្យចំនួន 12.9 ពាន់លានដុល្លារអាមេរិក។

ក្រៅពី Brian កូរ៉េខាងត្បូង ក៏នៅមានមហាសេដ្ឋីដែលបានរកស៊ីពីបាតដៃទទេ ជាច្រើនទៀត ដែលកំពុងបង្ហាញឥទ្ធិពលរបស់ខ្លួន ក្នុងនោះមាន Seo Jung-jin ស្ថាបនិកនៃក្រុមហ៊ុនបច្ចេកវិទ្យាជីវសាស្ត្រ Celltrion មានទ្រព្យប្រមាណ 10 ពាន់លានដុល្លារ, Bom Kim (ពលរដ្ឋអាមេរិក ដើមកំណើត កូរ៉េខាងត្បូង) ស្ថាបនិកនៃផ្សារពាណិជ្ជកម្មអនឡាញ Coupang ឬ Chang Byung-gyu ដែលជាម្ចាស់ក្រុមហ៊ុនហ្គេម Krafton។ល។

ការប្រែប្រួលនេះគឺជាសញ្ញាមួយបង្ហាញថា ខឿនសេដ្ឋកិច្ចដែលមានតម្លៃ 1.6 លានលាន (1.6 ទ្រីលាន) ដុល្លារ របស់ កូរ៉េខាងត្បូង កំពុងឈានចូលដល់យុគសម័យរីកចម្រើនថ្មី និងកាត់បន្ថយការពឹងផ្អែកទៅលើតែក្រុម chaebol (ក្រុមត្រកូលអ្នកមានដែលគ្រប់គ្រងបណ្ដាក្រុមហ៊ុនធំៗនៅ កូរ៉េខាងត្បូង) ដែលធ្លាប់បានក្ដោបក្ដាប់អំណាចធំនៅក្នុងសង្គម ដោយនៅពីក្រោយបណ្ដាក្រុមហ៊ុនខ្នាតយក្ស ដូចជា Huyndai, Samsung, LG និង Hanjin។ល។

Brian Kim ស្ថាបនិកនៃក្រុមហ៊ុនគ្រប់គ្រងកម្មវិធីផ្ញើសារ Kakao និងជាអ្នកមានជាងគេនៅ កូរ៉េខាងត្បូង

សាស្ត្រាចារ្យ Kyong-hwan មកពីសាកលវិទ្យាល័យ Sungkyunkwan បានអធិប្បាយថា៖ «នេះគឺជាការប្រែប្រួលវិជ្ជមាន ចំពោះ កូរ៉េខាងត្បូង»។ ក្រុម chaebol កំពុងតែទុកឱកាសឱ្យបណ្ដាក្រុមហ៊ុនថ្មីៗ ដែលចាប់ផ្ដើមលេចធ្លោបន្តិចម្ដង។ នេះបើតាមសារព័ត៌មាន Bloomberg។

សម័យ COVID-19 បានធ្វើឱ្យតម្រូវការនៅក្នុងវិស័យពាណិជ្ជកម្មអនឡាញ កំសាន្ត និងបច្ចេកវិទ្យាជីវសាស្ត្រ កើនឡើងយ៉ាងឆាប់រហ័ស នាំឱ្យក្រុមអ្នកវិនិយោគទម្លាក់លុយរាប់ពាន់លានដុល្លារទៅក្នុងបណ្ដាក្រុមហ៊ុនបច្ចេកវិទ្យាថ្មី។ ខ្ទង់វិនិយោគហានិភ័យ (Risky Investment) ដែលត្រូវបានទម្លាក់មកកាន់ប្រទេសនេះ បានកើនឡើងដល់ 2.7 ពាន់លានដុល្លារអាមេរិក នៅក្នុងពាក់កណ្ដាលដើមឆ្នាំ 2021 ខ្ពស់បំផុតមិនធ្លាប់មានក្នុងអំឡុង ខែ។ នេះបើតាមទិន្នន័យរបស់រដ្ឋាភិបាលកូរ៉េខាងត្បូង។

សាស្ត្រាចារ្យ Kyong-hwan ថ្លែងថា៖ «នេះគឺជាឱកាសល្អសម្រាប់ការរីកចម្រើន និងការប្រមូលទុនរបស់បណ្ដាក្រុមហ៊ុនបច្ចេកវិទ្យាថ្មី»។ លោកបានព្យាករថា កូរ៉េខាងត្បូងនឹងមានមហាសេដ្ឋីថ្មីជាច្រើនទៀតដែលមានប្រៀបជាងបណ្ដាមហាសេដ្ឋី «បុរាណ»។ លោក Kyong-hwan សង្កត់ធ្ងន់ថា៖ «ក្រុមមហាសេដ្ឋីថ្មីគឺជាគំរូដែលជួយឱ្យក្រុមយុវវ័យយល់ថា ពួកគេអាចក្លាយជាអ្នកមានប្រកបដោយភាពឯករាជ្យ ជំនួសឱ្យការទទួលមរតក»៕

August 13, 2021

ក្រុមហ៊ុនបច្ចេកវិទ្យាចិន បង្ហាញឆ្កែយន្ត CyberDog ស្រដៀងនឹង Boston Dynamics Spot តែតម្លៃទាបជាងឆ្ងាយ

CyberDog ប្រើប្រាស់ឧបករណ៍ដូចទៅនឹង Boston Dynamics Spot និងមានសមត្ថភាពអាចរត់ក្នុងល្បឿន 3.2 ម៉ែត្រ/វិនាទី អាចឆ្លើយតបនឹងសំឡេងបញ្ជា និងដើរតាមម្ចាស់។

ឆ្កែយន្តថ្មីដែលត្រូវបានក្រុមហ៊ុនចិន Xiaomi ហៅថា ម៉ាស៊ីន open source សម្រាប់ពិសោធន៍នេះ មិនត្រូវបានគេដឹងច្បាស់អំពីគោលបំណងនៃការអភិវឌ្ឍនៅឡើយ ប៉ុន្តែ Xiaomi បានបង្ហើបឱ្យដឹងថា CyberDog នេះគឺសម្រាប់អ្នកគាំទ្ររបស់ Xiaomi, វិស្វករ និងក្រុមមនុស្សដែលចូលចិត្តរ៉ូបូត។

https://www.youtube.com/watch?v=i5o0TevLfxY

ផលិតផល CyberDog នេះ មានតម្លៃ 9,999 យុន (1,543 ដុល្លារអាមេរិក / 6,279,000 រៀល) ថោកជាងឆ្ងាយបើធៀបនឹងតម្លៃដំបូង 74.000 ដុល្លាររបស់ឆ្កែយន្ត Boston Dynamics Spot។ ប៉ុន្តែ CyberDog នឹងត្រូវបានផលិតត្រឹមតែ 1,000 គ្រឿងប៉ុណ្ណោះ។

CyberDog ត្រូវបានក្រុមហ៊ុន Xiaomi អះអាងថា មានលក្ខណៈដូចទៅនឹងសត្វចិញ្ចឹម ដោយសារវាអាចប្រតិកម្មតបនឹងសំឡេងបញ្ជា ឬដើរតាមម្ចាស់។ CyberDog មានរូបរាងដូចជាឧបករណ៍ដែលមកពីអនាគតកាល ស្រដៀងនឹងតួអង្គក្នុងខ្សែភាពយន្តវិទ្យាសាស្ត្រ។

ក្រុមហ៊ុន Xiaomi និយាយថា CyberDog អាចលោតត្រលប់ខ្លួនទៅក្រោយដូចអ្នកចេះក្បាច់គុន អាចរត់ក្នុងល្បឿន 3.2 ម៉ែត្រ/វិនាទី និងមានទម្ងន់ 3 គីឡូក្រាម។ ឆ្កែយន្តនេះ ប្រើប្រាស់បច្ចេកវិទ្យា Jetson Xavier AI របស់ Nvidia និងមានឧបករណ៍បច្ចេកវិទ្យាជាច្រើន ដូចជា កាមេរ៉ា អង្គញាណ និងឧបករណ៍កំណត់ទិស GPS ។ល។

CyberDog អាចវិភាគបរិយាកាសជុំវិញ បង្កើតផែនដី កំណត់គោលដៅ និងគេចពីឧបសគ្គ។ ឆ្កែយន្តនេះ នឹងតាមដានម្ចាស់របស់វាដោយការសង្កេតមើលកាយវិការ និងស្កេនផ្ទៃមុខ។ ផលិតផលនេះក៏អាចត្រូវបានបញ្ជាដោយទូរស័ព្ទឆ្លាតវៃ ស្គាល់ឃ្លាឃ្លោងដែលជាបញ្ជារបស់ម្ចាស់។ល។

https://www.youtube.com/watch?v=bclX-78Nqxw&t=33s

CyberDog មានរន្ធ USB-C ចំនួន 3, រន្ធ HDMI ចំនួន 1 ដែលត្រូវបានប្រើដើម្បីបញ្ជាទៅលើគ្រឿងម៉ាស៊ីនខាងក្នុង។ CyberDog ក៏អាចបំពាក់បន្ថែមនូវអង្គញាណ lidar, កាមេរ៉ាមើលឃើញគ្រប់ទិស (panoramic camera) ឬ ពិលសម្រាប់ស្វែងរក។ល។

August 12, 2021

អាជ្ញាធរចិន ចាប់ខ្លួនប្រធានទំនាក់ទំនងសាធារណៈរបស់បណ្ដាញសង្គម Weibo

ប្រធានទំនាក់ទំនងសាធារណៈរបស់ Weibo ដែលជាបណ្ដាញសង្គមធំជាងគេនៅប្រទេសចិន ត្រូវបានចាប់ខ្លួន ព្រោះតែជាប់សង្ស័យថា បានប្រព្រឹត្តអំពើពុករលួយ។

Weibo ដែលជាបណ្ដាញសង្គមមានអ្នកប្រើប្រាស់ច្រើនជាងគេបង្អស់នៅប្រទេសចិន គឺជាកម្មសិទ្ធិរបស់ក្រុមហ៊ុន Sina Corporation។ កាលពីថ្ងៃទី 10 សីហា បណ្ដាញសង្គមនេះបានប្រកាសថា លោក Mao Taotao ដែលជាប្រធានផ្នែកទំនាក់ទំនងសាធារណៈរបស់ Weibo ត្រូវបានអាជ្ញាធរចាប់ខ្លួន ព្រោះតែជាប់សង្ស័យថា បានប្រព្រឹត្តអំពើសូកប៉ាន់ បង្ក «ផលប៉ះពាល់ធ្ងន់ធ្ងរដល់កេរ្តិ៍ឈ្មោះរបស់ក្រុមហ៊ុន»។

ប្រកាសរបស់ Weibo មានឃ្លាសរសេរថា៖ «យោងតាមគោលការណ៍របស់ក្រុមហ៊ុន និងច្បាប់រដ្ឋ យើងសម្រេចដកតំណែង Mao ហើយនឹងមិនរើសយកគាត់មកធ្វើការទៀតទេ»។

លោក Mao បានចូលធ្វើការនៅក្នុងក្រុមហ៊ុន Weibo កាលពីឆ្នាំ 2010 ហើយក៏ទទួលបានជោគជ័យយ៉ាងឆាប់រហ័សនៅក្នុងគណៈកម្មការទីផ្សារ និងផ្សព្វផ្សាយ។ Weibo មិនបានឆ្លើយតបនឹងសំណួររបស់ក្រុមអ្នកយកព័ត៌មាន ខណៈ Mao ក៏ទាក់ទងមិនទាន់បាន។

ចំនួនក្រុមហ៊ុនបច្ចេកវិទ្យាចិន ដែលបានជាប់ក្នុងការស៊ើបអង្កេតទាក់ទិននឹងបញ្ហាពុករលួយ បានកើនឡើងទ្វេដងក្នុងរយៈពេលច្រើនឆ្នាំចុងក្រោយនេះ ក្នុងគ្រាយុទ្ធនាការប្រឆាំងអំពើពុករលួយដែលត្រូវបានផ្ដួចផ្ដើមដោយប្រធានាធិបតី ស៊ី ជីនពីង ត្រូវបានជំរុញយ៉ាងខ្លាំងក្លា។

កាលពីដើមឆ្នាំ 2020 អតីតអនុប្រធានក្រុមហ៊ុន Kuaishou ក៏ត្រូវបានចាប់ខ្លួនពីបទពុករលួយ ខណៈដែល Tencent Holdings បានឱ្យដឹងដែរថា ម្នាក់ក្នុងចំណោមនាយកប្រតិបត្តិរបស់ខ្លួន ក៏កំពុងត្រូវបានអាជ្ញាធរស៊ើបអង្កេត ដោយត្រូវសង្ស័យថា ជាប់ទាក់ទងនឹង «អំពើពុករលួយលក្ខណៈឯកជន»៕

August 11, 2021

ជូនសែកដល់ពិធីការិនីម្នាក់ តែត្រូវនាងបដិសេធ៖ មហាសេដ្ឋី Bill Gates ក៏ផ្ដល់មេរៀនយ៉ាងធំមួយដល់នាង

មហាសេដ្ឋីជនជាតិអាមេរិក លោក Bill Gates បានជូនមេរៀនមួយដែលមិនអាចបំភ្លេចបាន ដល់ពិធីការិនីស្រស់ស្អាតមួយរូប ដែលបានបដិសេធមូលប្បទានប័ត្ររបស់លោក។

នៅពេលអ្នកជោគជ័យ អ្នកតែងស្ថិតនៅក្នុងចំណោមមហាសេដ្ឋីដែលត្រូវបានគេរំលឹក និងសួរនាំអំពីវិធីសាស្ត្រដើម្បីឆ្ពោះទៅរកភាពជោគជ័យ ហើយ មហាសេដ្ឋី Bill Gates ក៏ដូច្នេះដែរ។ មួយក្នុងចំណោមរឿងរ៉ាវរបស់លោក Bill Gates ដែលត្រូវបានគេយកមកនិយាយច្រើនជាងគេបំផុតក្នុងរយៈពេលច្រើនឆ្នាំមកនេះ នោះគឺរឿងទាក់ទងនឹងពិធីការិនីទូរទស្សន៍ដ៏ស្រស់ស្អាតមួយរូប និងមូលប្បទានប័ត្រមួយសន្លឹក។

រឿងរ៉ាវនេះបានកើតឡើងនៅក្នុងកិច្ចសម្ភាសមួយ របស់ពិធីការិនី (MC) មួយរូប ជាមួយនឹងមហាសេដ្ឋី Bill Gates។ ស្រីស្អាតជា MC នេះ បានសួរទៅលោក Gates ថា៖ «អ្វីទៅជាគន្លឹះសំខាន់ដែលនាំឱ្យលោកជោគជ័យ?»។

ជំនួសឱ្យការឆ្លើយត្រង់ទៅនឹងសំនួរ ម្ចាស់ក្រុមហ៊ុន Microsoft ក៏បានហូតមូលប្បទានប័ត្រមួយសន្លឹកចេញ រួចចុះហត្ថលេខា ហើយហុចឱ្យស្រីស្អាតរូបនេះ ដោយប្រាប់ឱ្យនាងបន្ថែមចំនួនទឹកប្រាក់ទៅតាមចិត្តរបស់នាង។ នៅចំពោះមុខសកម្មភាពបែបនេះរបស់មហាសេដ្ឋី Bill Gates នាង MC ក៏បានបដិសេធ រួចក៏សួរសំនួរនេះជាថ្មី។

មហាសេដ្ឋី Bill Gates នៅក្នុងកិច្ចសម្ភាសមួយជាមួយពិធីការិនីដ៏ស្រស់ស្អាត

មហាសេដ្ឋីកើតឆ្នាំ 1955 រូបនេះ នៅតែធ្វើដូចអំបាញ់មិញ ដោយហុចសន្លឹកសែកនោះឱ្យទៅនាងម្ដងទៀត តែនាងនៅតែបដិសេធដដែល។ ចុងក្រោយ លោក Gates ក៏បានហែកសែកមួយសន្លឹកនោះចោល ហើយឆ្លើយថា៖ «គន្លឹះជោគជ័យរបស់ខ្ញុំគឺ មិនបោះបង់ចោលឱកាសដែលខ្ញុំមាន មិនដូចអ្វីដែលនាងទើបតែបានធ្វើសោះឡើយ។ នាងគួរណាស់តែបានក្លាយជាពិធីការិនីដែលមានប្រាក់ច្រើនជាងគេក្នុងពិភពលោក»។

តាមរយៈរឿងនេះ យើងដឹងច្បាស់ថា ឱកាសមិនចេះតែកើតឡើងគ្រប់ពេលនោះទេ ដូច្នេះ ត្រូវតែចាប់យកវាឱ្យបានលឿនបំផុត នៅពេលវាបានមកក្បែរយើង៕

August 11, 2021

គណៈកម្មការ គ.អ.ក ពិន័យជាប្រាក់បានជាង 46 លានរៀល ចំពោះបុគ្គលល្មើសនឹងវិធានប្រឆាំង COVID-19 ក្នុងថ្ងៃទី 10 សីហា

ក្នុងអំឡុង 24 ម៉ោង កាលពីម្សិលមិញ គណៈកម្មការ គ.អ.ក បានឃាត់ខ្លួនមនុស្ស ចំនួន 1,682 នាក់ ក្នុងនោះមាន ករណីត្រូវអប់រំ និងករណីពិន័យជាប្រាក់ផងដែរ។

គណៈកម្មការអន្តរក្រសួង ដើម្បីប្រយុទ្ធនឹងជំងឺ COVID-19 (គ.អ.ក) នាព្រឹកថ្ងៃទី 11 ខែសីហា ឆ្នាំ 2021 នេះ បានឱ្យដឹងថា គ.អ.ក បានពិន័យចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល ជាទឹកប្រាក់ ចំនួន 46,100,000 រៀល (ប្រហែល 11,299 ដុល្លារអាមេរិក) នៅក្នុងអំឡុងពេល 24 ម៉ោង នៃថ្ងៃទី 10 ខែសីហា ឆ្នាំ 2021។

លទ្ធផលនៃការអនុវត្តវិធានការច្បាប់ចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល នៅថ្ងៃទី 10 ខែសីហា ឆ្នាំ 2021 មានដូចតទៅ៖

– វិធានការអប់រំផ្សព្វផ្សាយច្បាប់ ៖ 1,320 ទីតាំង

– អនុវត្តវិធានការច្បាប់ ៖ 941 ករណី

– ឃាត់ខ្លួនមនុស្ស (អប់រំ និង ពិន័យ) ៖ 1,682 ករណី

– ឃាត់យានយន្ត ៖ 811 ករណី

– ពិន័យជាប្រាក់ ៖ 46,100,000 រៀល

August 11, 2021

Category: សង្គម និងសេដ្ឋកិច្ច