សង្គម និងសេដ្ឋកិច្ច - La Reine Media

ប្រធានាធិបតីតួកគី ត្រូវក្មេងដណ្ដើមកាត់ខ្សែបូបានមុន នៅក្នុងពិធីសម្ពោធផ្លូវក្រោមដី (វីដេអូ)

ប្រធានាធិបតី Erdogan បានចូលរួមជាអធិបតីភាពក្នុងពិធីសម្ពោធដាក់ឱ្យប្រើប្រាស់ផ្លូវរូងក្រោមដីនៅក្នុងខេត្ត Rize ប៉ុន្តែ ក្មេងម្នាក់បានកាត់ខ្សែបូមុនពេលលោកបានប៉ះដល់កន្ត្រៃ។

លោក Tayyip Erdogan បានចូលរួមជាអធិបតីភាពក្នុងពិធីខាងលើកាលពីថ្ងៃទី 4 កញ្ញា។ ក្រៅពីក្រុមមន្ត្រី និងប្រធានាធិបតី Erdogan ពិធីសម្ពោធនេះក៏មានវត្តមានរបស់កុមារជាច្រើននាក់ក្នុងតួនាទីជាអ្នកកាន់ខ្សែបូជូនក្រុមមន្ត្រីសំខាន់ៗដែលជាអ្នកកាត់។

ក៏ប៉ុន្តែ កុមារាម្នាក់ដែលជាអ្នកកាន់ខ្សែបូឱ្យប្រធានាធិបតី បានប្រញាប់កាត់ខ្សែបូនេះ ហាក់ដណ្ដើមកាត់ឱ្យបានមុនលោក Erdogan។ ខ្សែបូត្រូវបានកុមាររូបនេះកាត់មុនគេបានសម្រេច នៅចំពោះមុខមនុស្សគ្រប់រូប។ ប្រធានាធិបតី Erdogan បានបង្ហាញការភ្ញាក់ផ្អើល និងបានខោកក្បាលកុមារនេះតិចៗ ទំនងជា «ស្ដីបន្ទោស» ប៉ុន្តែ ក្រោយមក លោក និងកុមារនៅជុំវិញ សុទ្ធតែផ្ទុះសំណើច។

វីដេអូដែលបង្ហាញអំពីទិដ្ឋភាពកាត់ខ្សែបូដ៏គួរឱ្យភ្ញាក់ផ្អើលនេះ ត្រូវបានអ្នកលេងបណ្ដាញសង្គម ចែករំលែកតៗគ្នា។ អ្នកខ្លះបានបញ្ចេញមតិថា នេះគឺជាទិដ្ឋភាពដ៏គួរឱ្យស្រលាញ់របស់កុមាររូបនេះ និងប្រធានាធិបតី Erdogan។

September 6, 2021

NASA កំពុងធ្វើតេស្តតាក់ស៊ីហោះដំណើរការដោយអគ្គិសនី ល្បឿន 322 គីឡូម៉ែត្រ/ម៉ោង

កាលពីថ្ងៃទី 30 សីហា ទីភ្នាក់ងារអវកាសអាមេរិក (NASA) បានចាប់ផ្ដើមធ្វើតេស្តយានដែលហោះហើរ និងចុះចតត្រង់ដែលប្រើប្រាស់ថាមពលអគ្គិសនីទាំងស្រុង (eVTOL) របស់ក្រុមហ៊ុន Joby Aviation។

ការសាកល្បងហោះហើរនេះនឹងត្រូវបានធ្វើឡើងរហូតដល់ថ្ងៃទី 10 កញ្ញា នៅមូលដ្ឋានហោះហើររបស់ Joby ក្បែរតំបន់ Big Sur ក្នុងរដ្ឋ California សហរដ្ឋអាមេរិក។ នេះគឺជាលើកដំបូងហើយដែល NASA ធ្វើតេស្តយន្តហោះប្រភេទ eVTOL។ ក្នុងអនាគត ម៉ូដែលយន្តហោះនេះអាចដំណើរការដូចជាតាក់ស៊ីហោះ នៅតាមទីក្រុង និងតំបន់ជុំវិញទីក្រុង ក្នុងផ្ទៃប្រទេស ដោយវាអាចដឹកទាំងមនុស្ស ទាំងទំនិញ។

គោលដៅរបស់ NASA នៅក្នុងការធ្វើតេស្តនេះគឺដើម្បីប្រមូលព័ត៌មានអំពីលទ្ធភាពរបស់យន្តហោះ និងទិន្នន័យជាសំឡេងរបស់វា ដែលនឹងត្រូវបានប្រើសម្រាប់បង្កើតរូបមន្ត និងរចនានៃអាកាសចរណ៍នាពេលអនាគត។ ការធ្វើតេស្តនេះជួយស្វែងរកចំនុចខ្វះខាតនៅក្នុងការកំណត់ និងគោលនយោបាយបច្ចុប្បន្នរបស់នាយកដ្ឋានអាកាសចរណ៍ជាតិ សហរដ្ឋអាមេរិក (FAA)។

ដើម្បីរចនាដោយជោគជ័យសម្រាប់សកម្មភាពពាណិជ្ជកម្ម ក្រុមអ្នកអភិវឌ្ឍយន្តហោះប្រភេទ eVTOL ត្រូវដោះស្រាយបញ្ហាសំឡេងរបស់យន្តហោះទាំងនេះនៅក្នុងទីក្រុង។ ក្នុងពេលយន្តហោះរបស់ Joby ហោះហើរទៅតាមផែនការ ក្រុមបច្ចេកទេសរបស់ NASA នឹងប្រមូលទិន្នន័យអំពីវីធីដែលយន្តហោះនេះផ្លាស់ទី ការបញ្ចេញសំឡេង និងការទាក់ទងទៅកាន់បុគ្គលិកគ្រប់គ្រងដែនអាកាស។

ក្រុមហ៊ុន Joby ដែលមានមូលដ្ឋាននៅ Santa Cruz រដ្ឋ California បានអភិវឌ្ឍ eVTOL ក្នុងរយៈពេលជាច្រើនឆ្នាំ។ យន្តហោះអគ្គិសនីរបស់ពួកគេ អាចដឹកអ្នកបើកបរម្នាក់ និងអ្នកដំណើរ 4 នាក់ ក្នុងល្បឿន 322 គីឡូម៉ែត្រ/ម៉ោង និងអាចហោះហើរក្នុងរយៈចម្ងាយ 241 គីឡូម៉ែត្រ បន្ទាប់ពីបានបញ្ចូលថាមពលមួយលើក។ ក្រុមហ៊ុន Joby នឹងផ្ដល់សេវាកម្មដឹកភ្ញៀវចាប់ពីឆ្នាំ 2024 តទៅ។

NASA កំពុងសហការជាមួយបណ្ដាក្រុមហ៊ុនអភិវឌ្ឍយន្តហោះអគ្គិសនី eVTOL និងក្រុមហ៊ុនផ្គត់ផ្គង់បច្ចេកវិទ្យាដែលទាក់ទង តាមរយៈយុទ្ធនាការជាតិ ដើម្បីវាយតម្លៃអំពីសុវត្ថិភាព និងឧបសគ្គរបស់តាក់ស៊ីហោះ។ ក្រៅពី Joby ទីភ្នាក់ងារ NASA ក៏កំពុងតែសហការជាមួយបណ្ដាក្រុមហ៊ុន រួមមានទាំង Wish Aero និង Reliable Robotics ផងដែរ។ យុទ្ធនាការខាងលើនេះស្ថិតក្នុងគម្រោង Advanced Air Mobility (AAM) របស់ NASA៕

September 4, 2021

គម្រោងផលិតទឹកស្អាតតម្លៃ 500 ពាន់លានដុល្លារ នៅ អារ៉ាប៊ីសាអូឌីត៖ បច្ចេកវិទ្យា Solar Dome ប្រែក្លាយទឹកសមុទ្រទៅជាទឹកសាប (វីដេអូ)

រោងចក្របំប្លែងទឹកប្រៃទៅជាទឹកសាប ដែលបំពាក់បច្ចេកវិទ្យា Solar Dome (ផ្ទះកញ្ចក់ព្រះអាទិត្យ) ប្រើប្រាស់វិទ្យុសកម្មរបស់ពន្លឺព្រះអាទិត្យដើម្បីបញ្ជូនកម្ដៅទៅជះលើទឹកសមុទ្រ ធ្វើឱ្យទឹកសាបហួតទៅលើ និងប្រមូលផ្ដុំជាទឹកដែលអាចផឹកបាន។

ក្រុមហ៊ុន Solar Water PLC នៅក្រុងឡុងដ៍ ប្រទេសអង់គ្លេស បានចុះកិច្ចព្រមព្រៀងជាមួយរដ្ឋាភិបាលអារ៉ាប៊ីសាអូឌីត អនុវត្តគម្រោងបច្ចេកវិទ្យាទឹកស្អាត NEOM ដែលមានតម្លៃ 500 ពាន់លានដុល្លារអាមេរិក។ Solar Water នឹងសាងសង់រោងចក្របន្សាបទឹកប្រៃដំបូងដែលបំពាក់បច្ចេកវិទ្យាផ្ទះកញ្ចក់ព្រះអាទិត្យ (Solar Dome) នៅភាគពាយព្យប្រទេសនេះ ដែលតាមផែនការនឹងរួចរាល់នៅក្នុងឆ្នាំ 2021 នេះ។

យោងតាមនាយកប្រតិបត្តិ David Reavley របស់ក្រុមហ៊ុន Solar Water ជាមូលដ្ឋាន រោងចក្រនេះនឹងដូចទៅនឹង «ឆ្នាំងដែកមានរាងមូលដែលកប់ក្រោមដី និងមានដំបូលមូលគ្របពីលើ»។ ដំបូលរបស់រោងចក្រនេះ មានបំពាក់បច្ចេកវិទ្យាប្រមូលផ្ដុំថាមពលព្រះអាទិត្យ (CSP)។ ចំហាយក្ដៅ ត្រូវបានបញ្ជូនទៅកាន់ទឹកសមុទ្រដែលនៅខាងក្នុងរោងចក្រ ធ្វើឱ្យទឹកក្ដៅហួតឡើងទៅលើ និងប្រមូលផ្ដុំជាទឹកសាប។ រោងចក្រនេះមិនប្រើប្រាស់សរសៃលោហធាតុដែលនាំឱ្យប៉ះពាល់ដល់បរិស្ថានដែលគេប្រើប្រាស់ក្នុងបច្ចេកវិទ្យាបន្សាបជាតិប្រៃបែបបុរាណនោះទេ។ Reavley ឱ្យដឹងថា រោងចក្ររបស់លោក ប្រើប្រាស់ប្រាក់ចំណាយទាប និងអាចសាងសង់បានលឿន ទន្ទឹមនឹងនេះវាក៏មិនបញ្ចេញឧស្ម័នពុលនោះដែរ។

បើសិនជា Solar Water សម្រេចបានគោលដៅ ពួកគេអាចបញ្ជាក់បានអំពីប្រសិទ្ធភាពរបស់បច្ចេកវិទ្យាបន្សាបជាតិប្រៃបែបថ្មី ដោយមិនបាច់ប្រើអគ្គិសនីច្រើន និងមិនបាច់ប្រើធាតុគីមីដែលអាចនាំឱ្យមានបញ្ហាបរិស្ថាន។

https://www.youtube.com/watch?v=vIREk4Ky1V0

Solar Water ពុំមែនជាក្រុមហ៊ុនតែមួយគត់ដែលផ្ដល់សេវាបន្សាបទឹកសមុទ្រក្នុងទ្រង់ទ្រាយធំនោះទេ។ ក្រុមហ៊ុន Climate Fund Manager និង Solar Water Solutions ក៏កំពុងដំឡើងឧបករណ៍បន្សាបទឹកប្រៃចំនួន 200 ប្រព័ន្ធ នៅក្នុងខណ្ឌ Kitui County នៃប្រទេសកេនយ៉ា ដោយមានទិសដៅផ្គត់ផ្គង់ទឹកស្អាតដល់មនុស្សចំនួន 400,000 នាក់ នៅឆ្នាំ 2023។

ដំណោះស្រាយដូចជា Solar Dome របស់ក្រុមហ៊ុន Solar Water នេះ ពិតជាមានសារសំខាន់ខ្លាំងណាស់នៅតំបន់មជ្ឈិមបូព៌ា ជាទីដែលមិនសូវមានទឹកភ្លៀង និងខ្វះទឹកសាបយ៉ាងធ្ងន់ធ្ងរ៕

September 3, 2021

វិថីក្លាយជាមហាសេដ្ឋីដែលមានទ្រព្យច្រើនជាងគេនៅ សិង្ហបុរី របស់ម្ចាស់ផ្សារអនឡាញ Shopee

ធ្លាប់ស្រលាញ់ចូលចិត្តហ្គេមយ៉ាងខ្លាំងក្លា Forrest Li ទទួលបានអារម្មណ៍ពុះកញ្ជ្រោលពីសម្ដីរបស់លោក Steve Jobs ដែលនាំឱ្យលោក សម្រេចចិត្តបង្កើតក្រុមហ៊ុនផ្ទាល់ខ្លួន ហើយបច្ចុប្បន្នក៏ក្លាយជាមហាសេដ្ឋីបច្ចេកវិទ្យាដែលមានទ្រព្យច្រើនជាងគេនៅប្រទេសសិង្ហបុរី។

Forrest Li (Li Xiaodong) កើតឆ្នាំ 1977 នៅប្រទេសចិន (ដីគោក)។ ដូចទៅនឹងយុវវ័យជំនាន់ 1970 ដទៃទៀត លោក Li Xiaodong ឆាប់ដឹងច្បាស់អំពីការប្ដូរផ្លាស់របស់ប្រទេសចិន និងបានស្វែងរករៀនភាសាអង់គ្លេស ក្នុងបំណងបានយល់ដឹងអំពីវប្បធម៌លោកខាងលិច ដើម្បីបម្រើដល់មហិច្ឆតារកស៊ីរបស់ខ្លួន។

កំពូលអ្នកញៀនហ្គេម និងឥទ្ធិពលពី Steve Jobs

ក្នុងកិច្ចសម្ភាសជាមួយ Bloomberg លោក Li Xiaodong ឱ្យដឹងថា លោកធ្លាប់ជាអ្នកញៀននឹងហ្គេមកំសាន្ត។ ពេលបញ្ចប់ការសិក្សា លោកបានបម្រើការជាអ្នកជ្រើសរើសបុគ្គលិកក្នុងក្រុមហ៊ុន Motorola Solutions។ ដោយដឹងថា ខ្លួនមិនអាចបង្រួញខ្លួននៅតែក្នុងបន្ទប់ការិយាល័យប៉ុននេះ Li ក៏បានចាប់ផ្ដើមចុះឈ្មោះចូលរៀនវគ្គបណ្ដុះបណ្ដាលនានាដែលទាក់ទងនឹងការបើកក្រុមហ៊ុន។

ចុងក្រោយ លោក Li Xiaodong សម្រេចចិត្តធ្វើដំណើរទៅ សហរដ្ឋអាមេរិក ដើម្បីរៀនអនុបណ្ឌិតផ្នែកគ្រប់គ្រងអាជីវកម្ម នៅ Stanford។ ខែមិថុនា ឆ្នាំ 2005 Li Xiaodong បានទៅចូលរួមពិធីប្រគល់សញ្ញាបត្រនៃសាលារបស់មិត្តស្រី ដែលក្រោយមកនាងគឺជាភរិយារបស់លោក។ នៅទីនោះ Li Xiaodong បានស្ដាប់សេចក្ដីថ្លែងការណ៍របស់ Steve Jobs ក្នុងនោះក៏មានឃ្លាមួយដែលល្បីល្បាញ នោះគឺ «Stay hungry, stay foolish» (ចូរបន្តស្រេកឃ្លាន និងបន្តធ្វើជាមនុស្សល្ងង់)។

លោក Li ប្រាប់ថា លោកស្ដាប់សេចក្ដីថ្លែងការណ៍នេះ 3 ដង ក្នុង 1 ថ្ងៃ ក្នុងរយៈពេល 1 ខែពេញ ហើយក៏សម្រេចចិត្តបើកក្រុមហ៊ុន។ «សេចក្ដីថ្លែងការណ៍នោះបានក្លាយជាកត្តាជំរុញទឹកចិត្ត ដែលជួយឱ្យខ្ញុំមានភាពក្លាហានគ្រប់គ្រាន់ដើម្បីធ្វើការងារដូចបច្ចុប្បន្ន» Li Xiaodong បានប្រាប់ Bloomberg ដូច្នេះ។

ក្រោយពីបញ្ចប់ការសិក្សានៅ សហរដ្ឋអាមេរិក លោក Li រួមនឹងមិត្តស្រី បានត្រលប់មកកាន់ សិង្ហបុរី។ លោក Li បានចូលធ្វើការឱ្យក្រុមហ៊ុន MTV Network ហើយបន្ទាប់មកក៏បង្កើតក្រុមហ៊ុនផ្ទាល់ខ្លួនដំបូង នោះគឺ GG Game។ ប៉ុន្តែ Li ឆាប់ដឹងខ្លួនថា បានដើរខុសទិសដៅ ព្រោះថា ពេលនោះ ហ្គេមអនឡាញកំពុងតែពេញនិយម តែលោកបែរជាបង្កើតក្រុមហ៊ុន ហ្គេមអហ្វឡាញទៅវិញ។

ដំណាក់កាលវិបត្តិសេដ្ឋកិច្ចឆ្នាំ 2008 ធ្វើឱ្យគ្រប់យ៉ាងត្រូវក្រឡាប់ចាក់។ ក្រុមហ៊ុនរបស់ Li ត្រូវក្ស័យធន ហើយលោកក៏បានទទួលស្គាល់បរាជ័យនៅចំពោះមុខក្រុមអ្នកវិនិយោគ។ «ពួកគេគោរពចំពោះភាពស្មោះត្រង់របស់ខ្ញុំ។ សម្រាប់អ្នកវិនិយោគផ្សងព្រេង ពួកគេសង្ឃឹមលើមនុស្ស ហើយជឿថា អ្នកនោះនឹងរកបានជោគជ័យក្នុងថ្ងៃណាមួយ» Li Xiaodong ប្រាប់ Forbes ដូច្នេះ។

ក្រោយបរាជ័យដំបូង Li បានស្វែងរកឱកាសថ្មី។ «ខ្ញុំបានជជែកជាមួយក្រុមអ្នកវិនិយោគ អាមេរិក។ ពួកគេចាប់អារម្មណ៍នឹងគម្រោងរបស់ខ្ញុំ ប៉ុន្តែ ពួកគេចូលចិត្តក្រុមហ៊ុនដែលនៅឆ្ងាយពីពួកគេ 30 នាទីនៃការបើកបរ ច្រើនជាង» លោក Li រៀបរាប់។ ឆ្នាំ 2009 លោក Li ទទួលបានខ្ទង់ប្រាក់វិនិយោគជិត 1 លានដុល្លារអាមេរិក។

ក្រុមហ៊ុនរបស់ Li Xiaodong បានចុះបញ្ជីនៅផ្សារហ៊ុននីវយ៉ក កាលពីឆ្នាំ 2017

ពេលនោះ Forrest Li បានដឹងច្បាស់អំពីសក្ដានុពលនៃអាជីវកម្មអេឡិចត្រូនិច (E-commerce) នៅអាស៊ីអាគ្នេយ៍។ លោក Li បានបង្កើតប្រព័ន្ធមួយដែលសមស្របនឹងវប្បធម៌ក្នុងតំបន់ ដោយល្បែងកំសាន្តសកល Global Arena ដែលក្រោយមកត្រូវបានបង្រួមមកជាឈ្មោះក្រុមហ៊ុន Garena។ ជោគជ័យដំបូងរបស់ Garena គឺហ្គេមអនឡាញ។ ក្រុមហ៊ុននេះ បន្ទាប់មកក៏ទទួលបានការវិនិយោគបន្ថែមពី Tencent នៅក្នុងការពង្រីកមុខជំនួញទៅកាន់វិស័យទូទាត់អនឡាញ និងលក់រាយ។

Garena ប្រឈមមុខនឹង Alibaba នៅ អាស៊ីអាគ្នេយ៍

ក្នុងគ្រាដែលទីផ្សារនៅ អាស៊ីអាគ្នេយ៍ ត្រូវ Alibaba របស់ Jack Ma លោតចូលរកស៊ី ក្រុមហ៊ុន Shopee របស់ Garena ក៏ចាប់ផ្ដើមលេចធ្លោជាអាណាចក្រដ៏គួរឱ្យញញើតមួយផងដែរ។

យោងតាមរបាយការណ៍របស់ iPrice និង SimilarWeb ឆ្នាំ 2020 Shopee ក្លាយជាផ្សារអនឡាញដែលមានអ្នកចូលប្រើច្រើនបំផុតក្នុងតំបន់ ខណៈស្ថិតិរបស់ App Annie ក៏បញ្ជាក់ថា Shopee គឺជាកម្មវិធីទិញដូរទំនិញ ដែលត្រូវបានទាញយកមកប្រើច្រើនជាងគេលំដាប់ទីពីរក្នុងពិភពលោក។

Li Xiaodong ក្លាយជាមហាសេដ្ឋីបច្ចេកវិទ្យាដែលមានទ្រព្យច្រើនជាងគេនៅ សិង្ហបុរី

ទន្ទឹមនឹងការរីកចម្រើនរបស់ Shopee ក្រុមហ៊ុន Garena ក៏ទទួលបានជោគជ័យក្នុងវិស័យហ្គេម និងទូទាត់ប្រាក់តាមអនឡាញផងដែរ។ ឆ្នាំ 2014 Forrest Li បង្កើត studio ហ្គេម មួយ នៅ សៀងហៃ ដោយប្ដូរទិសដៅពី ហ្គេមសម្រាប់កុំព្យូទ័រ មកជាហ្គេមសម្រាប់ទូរស័ព្ទ។ ឆ្នាំ 2016 Garena បង្ហាញហ្គេមដ៏អស្ចារ្យមួយដែលមានឈ្មោះថា Free Fire។

សារព័ត៌មាន SCMP ឱ្យដឹងថា Free Fire គឺជាកម្មវិធីហ្គេមទូរស័ព្ទដែលមានអ្នកទាញយកច្រើនជាងគេបំផុតក្នុងឆ្នាំ 2020 នៅលើ Google Play និង App Store។ ជោគជ័យក្នុងវិស័យហ្គេម បានជួយឱ្យ Garena ប្រមូលទុនបាន 170 លានដុល្លារ ក្នុងឆ្នាំ 2016 ហើយក្រុមហ៊ុននេះក៏ត្រូវបានកំណត់តម្លៃស្មើ 3.75 ពាន់លានដុល្លារអាមេរិក និងក្លាយជាកំពូលក្រុមហ៊ុន startup ដំបូងរបស់ សិង្ហបុរី។

ឆ្នាំ 2017 ក្រុមហ៊ុន Garena បានប្ដូរឈ្មោះជា Sea ដោយរកស៊ីក្នុងវិស័យចំនួន 3 គឺ ហ្គេម អាជីវកម្មអេឡិចត្រូនិក (ផ្សេរអនឡាញ) និងទូទាត់ប្រាក់តាមអនឡាញ។

ចុងខែសីហា ឆ្នាំ 2021 យោងតាម Bloomberg Billionaires Index មហាសេដ្ឋី Li Xiaodong មានទ្រព្យសរុបប្រមាណ 19.8 ពាន់លានដុល្លារអាមេរិក និងក្លាយជាអ្នកមានជាងគេបង្អស់នៅ សិង្ហបុរី។ ចំណែកអ្នកមានលំដាប់ទីពីរគឺលោក Goh Cheng Liang ម្ចាស់ក្រុមហ៊ុនផលិតថ្នាំលាប Wuthelam Holdings ដោយមានទ្រព្យប្រមាណ 17.7 ពាន់លានដុល្លារអាមេរិក៕

September 2, 2021

ក្រុមហ៊ុនជប៉ុន អភិវឌ្ឍបច្ចេកវិទ្យារូបនិម្មិត សម្រាប់ទេសចរណ៍អវកាស និងធ្វើការពីចម្ងាយ

ក្រុមហ៊ុន avatarin Inc និងទីភ្នាក់អវកាសជប៉ុន JAXA កំពុងសហការគ្នា នៅក្នុងគម្រោងអភិវឌ្ឍ «បច្ចេកវិទ្យារូបនិម្មិត» ដែលធ្លាប់ត្រូវបានសាកល្បងនៅលើស្ថានីអវកាសអន្តរជាតិ (ISS) រួចហើយ។

កាលពីខែវិច្ឆិកា ឆ្នាំ 2020 ក្រុមហ៊ុន avatarin និង JAXA បានទទួលជោគជ័យក្នុងការធ្វើតេស្តបច្ចេកវិទ្យាដែលអនុញ្ញាតឱ្យសហគមន៍អ្នកវិទ្យាសាស្ត្រប្រើប្រាស់រូបតំណាងដើម្បីទាក់ទងជាមួយនឹងអ្នកអវកាសក្នុងបន្ទប់ពិសោធន៍ KIBO របស់ ជប៉ុន នៅលើ ISS។ ផ្អែកលើជោគជ័យនោះ គម្រោង Space Avatar ពេលនេះកំពុងឆ្ពោះទៅរកការអភិវឌ្ឍ និងពង្រីកបច្ចេកវិទ្យាតាមរយៈកិច្ចសហការជាមួយសាលាបច្ចេកទេសរបស់សាកលវិទ្យាល័យ Tokyo។ ក្រុមហ៊ុន avatarin ឱ្យដឹងថា បច្ចេកវិទ្យានេះនឹងអនុញ្ញាតឱ្យធ្វើទេសចរណ៍អវកាស និងជួយដល់ការធ្វើការពីចម្ងាយ។

ទេសចរណ៍អវកាសពីចម្ងាយនឹងប្រើប្រាស់បច្ចេកទេសរូបតំណាងដែលបំពាក់អេក្រង់ទំនាក់ទំនង។ ឧបករណ៍នេះនឹងត្រូវបានបញ្ជាពីផែនដី និងអាចចល័តដោយសេរីនៅក្នុងស្ថានីយ ISS។ យោងតាម JAXA និង avatarin បច្ចេកវិទ្យានេះនឹងជួយធ្វើប្រជាធិបតេយ្យលើវិស័យទេសចរណ៍អវកាស បើទោះក្នុងរូបភាពនិម្មិត។

Avatarin នឹងអភិវឌ្ឍបច្ចេកវិទ្យារូបតំណាង សម្រាប់គោលដៅទាក់ទងពីចម្ងាយ និងគោលដៅដែលទាមទារកម្រិតសុក្រឹតភាពខ្ពស់។ JAXA និង avatarin សង្ឃឹមថា នឹងអាចធ្វើតេស្តបច្ចេកវិទ្យាទេសចរណ៍ពីចម្ងាយនៅឯសារមន្ទីរអវកាសក្នុងមជ្ឈមណ្ឌល Tanegashima ដែលជាប្រព័ន្ធបាញ់បង្ហោះរ៉ុក្កែតធំបំផុតរបស់ ជប៉ុន៕

September 2, 2021

តាលីបង់ អនុញ្ញាតឱ្យប្រកួតកីឡាបាល់ដំបង (Cricket) លក្ខណៈអន្តរជាតិ

តាលីបង់ អនុញ្ញាតឱ្យក្រុមបាល់ដំបងគ្រីឃីត របស់ អាហ្វហ្គានីស្ថាន ប្រកួតលើកដំបូង ចាប់តាំងពីខ្លួនបានចូលគ្រប់គ្រងប្រទេស ធ្វើឱ្យសាធារណមតិសង្ឃឹមថា ការប្រកួតលក្ខណៈអន្តរជាតិនឹងត្រូវបានធ្វើឡើងជាធម្មតា។

«យើងទទួលបានការអនុញ្ញាតដើម្បីនាំក្រុមជម្រើសជាតិទៅកាន់ អូស្ត្រាលី» ប្រធានប្រតិបត្តិនៃក្រុមប្រឹក្សាបាល់ដំបង (Cricket) អាហ្វហ្គានីស្ថាន Hamid Shinwari និយាយដូច្នេះកាលពីថ្ងៃទី 1 កញ្ញា។

ក្នុងអំឡុងកាន់អំណាចចាប់ពីឆ្នាំ 1996 ដល់ 2001 តាលីបង់ បានហាមមិនឱ្យមានរូបភាពកំសាន្តស្ទើរតែទាំងអស់ ក្នុងនោះរួមមានទាំងកីឡាជាច្រើនប្រភេទផងដែរ ចំណែកពហុកីឡដ្ឋានវិញ ក៏ត្រូវបានប្រើប្រាស់ជាកន្លែងសម្រាប់ប្រហារជីវិតជាសាធារណៈ។ ប៉ុន្តែ តាលីបង់ កាលណោះក៏មិនបានហាមកីឡាបាល់ដំបងនេះ នោះទេ ព្រោះថា វាត្រូវបានទាហាន តាលីបង់ ចូលចិត្ត។

ក្រោយពីបានកាន់កាប់ប្រទេសចាប់ពីថ្ងៃទី 15 សីហា ឆ្នាំ 2021 តាលីបង់ បានសន្យាថា នឹងដឹកនាំប្រទេសដោយប្រើច្បាប់អ៊ីស្លាម ដែលមិនតឹងរ៉ឹងដូចមុន។ ការប្រកួតបាល់ដំបង នឹងត្រូវបានធ្វើឡើងនៅ Hobart ជាទីក្រុងមួយនៃរដ្ឋ Tasmania របស់ អូស្ត្រាលី ចាប់ពីថ្ងៃទី 27 វិច្ឆិកា ដល់ 1 ធ្នូ។ នេះនឹងជាការប្រកួតលើកដំបូងរបស់ក្រុមកីឡាបាល់ដំបង របស់ អាហ្វហ្គានីស្ថាន នៅប្រទេស អូស្ត្រាលី។

Rashid Khan (ស្ដាំ) តារាបាល់គ្រីឃីត របស់ អាហ្វហ្គានីស្ថាន

មុនពេលទៅប្រកួតនៅ អូស្ត្រាលី ក្រុមកីឡាករគ្រីឃីត អាហ្វហ្គានីស្ថាន នឹងត្រូវទៅចូលរួមប្រកួតនៅ T20 World Cup នៅ អារ៉ាប់រួម ចាប់ពីថ្ងៃទី 17 តុលា ដល់ 15 វិច្ឆិកា។ Shinwari បញ្ជាក់ថា ក្រុមកីឡាករគ្រីឃីត វ័យក្រោម 19 ឆ្នាំ របស់ អាហ្វហ្គានីស្ថាន នឹងប្រកួតនៅ បង់ក្លាដែស នៅចុងខែនេះផងដែរ។

ចាប់តាំងពី សហរដ្ឋអាមេរិក និង NATO ដកទ័ពចេញពី អាហ្វហ្គានីស្ថាន កាលពីចុងខែមុន សាធារណជនមានការព្រួយបារម្ភថា កីឡាបាល់ដំបង និងកីឡាច្រើនប្រភេទទៀត នឹងត្រូវរងផលប៉ះពាល់។ ប៉ុន្តែ ក្រុមមន្ត្រីនៃក្រុមប្រឹក្សាគ្រីឃីត អាហ្វហ្គានីស្ថាន អះអាងថា កីឡានេះនឹងត្រូវបាន តាលីបង់ គាំទ្រ។

គ្រីឃីត (Cricket) ហាក់មិនត្រូវបានគេស្គាល់នៅ អាហ្វហ្គានីស្ថាន នោះទេ រហូតដល់ដើមឆ្នាំ 2000 វាត្រូវបានគេនិយមចូលចិត្ត ព្រោះតែសង្គ្រាម។ កីឡានេះត្រូវបានជនភៀសខ្លួន អាហ្វហ្គានីស្ថាន នៅ ប៉ាគីស្ថាន ទទួលយក ហើយក្រោយមកក៏ត្រូវបាននាំចូលមកស្រុកកំណើតរបស់ពួកគេ។

ក្រុមជម្រើសជាតិ អាហ្វហ្គានីស្ថាន ដណ្ដើមបានពានជើងឯកពិភពលោក ឆ្នាំ 2017 ហើយបច្ចុប្បន្ន ក្រុមរបស់ អាហ្វហ្គានីស្ថាន ស្ថិតក្នុងចំណោមក្រុមបាល់ដំបងទាំង 10 ដែលខ្លាំងជាងគេក្នុងពិភពលោក៕

September 2, 2021

ទិដ្ឋភាពមនុស្សរស់នៅលើសមុទ្រនាពេលអនាគត មុននឹងអាចឡើងទៅធ្វើអាណានិគមភពអង្គារ

ក្នុងអនាគត មនុស្សអាចរស់នៅក្នុងអគារខ្ពស់ៗដែលត្រូវបានសាងសង់លើផ្ទៃទឹកសមុទ្រ និងប្រើប្រាស់អគ្គិសនីដែលផលិតឡើងដោយដំណើរការនៃការប្រែប្រួលកំដៅក្នុងមហាសមុទ្រ។

មុនពេលអាចទៅធ្វើអាណានិគមពិភពព្រះអង្គារ មនុស្សនឹងត្រូវរស់នៅក្នុងបណ្ដាប្រទេសលើមហាសមុទ្រ។ ទស្សនវិស័យនេះ ត្រូវបានព្យាករដោយ Joe Quirk ដែលជាប្រធានវិទ្យាស្ថាន Seasteading (សហរដ្ឋអាមេរិក)។

កាលស្យូម កាបូន ត្រូវបានទាញយកផ្ទាល់ពីទឹកសមុទ្រ ដើម្បីកសាងទីក្រុងលើមហាសមុទ្រ ដោយប្រើប្រាស់ថ្មជីវសាស្ត្រដែលត្រូវបានបោះពុម្ភដោយម៉ាស៊ីន 3D។ មនុស្សជំនាន់ក្រោយនឹងរស់នៅក្នុងអគារខ្ពស់ដាំក្បាលចុះក្រោម (អគារក្នុងទឹកសមុទ្រ)។

វត្ថុសម្រាប់ធ្វើជាយុថ្កាដ៏ធំមហិមា នឹងត្រូវបានដាក់ជ្រៅក្រោមទឹកសមុទ្រ បង្កើតជាគ្រឹះរឹងមាំសម្រាប់សាងសង់អគារនៅលើសសរដែលខ្ពស់ជាងរលកសមុទ្រ។

ឱ្យតែពាល់ដល់ជម្រៅ 1,000 ម៉ែត្រ អគារលើសមុទ្រទាំងឡាយនឹងផលិតអគ្គិសនីបានយ៉ាងច្រើន ដោយសារតែភាពអស្ចារ្យនៃការប្រែប្រួលថាមពលក្នុងមហាសមុទ្រ។ បច្ចេកវិទ្យាបៃតងនេះ ប្រើប្រាស់មហាសមុទ្រជាផ្ទាំងសូឡា ហើយវាត្រូវបានអ្នកវិទ្យាសាស្ត្របញ្ជាក់រួចហើយ។

ក្នុងជម្រៅ 500 ម៉ែត្រក្រោមសមុទ្រ សារជាតិបំប៉ន មានយ៉ាងច្រើនសម្បូរបែប និងអណ្ដែតក្នុងទឹក ជាកន្លែងដែលពន្លឺមិនអាចចូលទៅដល់។ អគារខ្ពស់នានានឹងស្រូបយកជាតិបំប៉នទាំងនេះឡើងទៅលើផ្ទៃទឹក ដើម្បីផ្គត់ផ្គង់ឱ្យរុក្ខជាតិ។ ឧទ្យានទាំងឡាយនៅលើផ្ទៃទឹកសមុទ្រនឹងរីកលូតលាស់យ៉ាងស្រស់បំព្រង។

ចំការបន្លែ និងកសិដ្ឋានដាំសារាយសមុទ្រនានានឹងអាចស្រូបយកកាបូន អាស៊ីត រាប់លានតោន ដែលនេះនឹងជួយបន្សាបជាតិអាស៊ីតក្នុងទឹកសមុទ្រ ក៏ដូចជាផ្គត់ផ្គង់អាហារដល់មនុស្សផង និងជួយស្ដារបរិស្ថានផងដែរ៕

September 1, 2021

Wing ប្រើប្រាស់យន្តហោះដ្រូន ដឹក និងប្រគល់ទំនិញជាមាន់អាំង និងអាហារដទៃរាប់ម៉ឺនឈុត ដល់អតិថិជន

Alphabet ដែលជាក្រុមហ៊ុនមេរបស់ Google ឱ្យដឹងថា យន្តហោះគ្មានមនុស្សបើក (Drone) របស់ខ្លួន បានដឹក និងប្រគល់ទំនិញជាកាហ្វេចំនួន 10,000 កែវ, អាហារសម្រន់ 1,700 ឈុត និងមាន់អាំងចំនួន 1,200 ឈុត នៅទីក្រុង Logan ប្រទេសអូស្ត្រាលី កាលពីឆ្នាំ 2020។

ក្នុងឆ្នាំ 2021 Wing បានប្រគល់ទំនិញជាង 50,000 លើក នៅក្នុងទីក្រុង Logan ប្រទេស អូស្ត្រាលី ក្នុងឆ្នាំ 2021 ដោយប្រើប្រាស់យន្តហោះដ្រូន។

សេវាកម្មប្រគល់ទំនិញដោយយន្តហោះគ្មានមនុស្សបើកនេះ ត្រូវបាន Wing ដែលជាក្រុមហ៊ុនបុត្រសម្ព័ន្ធរបស់ Alphabet ចាប់ផ្ដើមដំណើរការនៅ អូស្ត្រាលី កាលពីឆ្នាំ 2019 បន្ទាប់ពីការធ្វើតេស្តជាច្រើនលើក រាប់ចាប់ពីឆ្នាំ 2014។ អតិថិជនអាចបញ្ជាទិញទំនិញដូចជាអាហារជាដើម តាមរយៈកម្មវិធីទូរស័ព្ទដៃ និងទទួលបានទំនិញក្នុងរយៈពេលតែប៉ុន្មាននាទីប៉ុណ្ណោះ។ ចាប់តាំងពីបានបង្ហាញខ្លួន សេវាកម្មនេះ បានប្រគល់ទំនិញ ជាង 100,000 លើករួចមកហើយ។

Wing ដំបូងឡើយគឺជាផ្នែកមួយដែលជំនាញខាងអភិវឌ្ឍយន្តហោះគ្មានមនុស្សបើករបស់ Alphabet មុនពេលវាត្រូវបានបំបែកចេញដោយឡែក។ ក្រុមហ៊ុននេះមានជំនាញខាងអភិវឌ្ឍដ្រូនប្រគល់ទំនិញ និងប្រព័ន្ធកំណត់ទិសរបស់ទំនិញ ទន្ទឹមនឹងការស្រាវជ្រាវលើប្រព័ន្ធគ្រប់គ្រងចរាចរណ៍គ្មានមនុស្សបើក (UTM) ដែលជួយឱ្យដ្រូនកំណត់ទិសបានដោយសុវត្ថិភាពនៅលើដែនអាកាស។

Wing សង្ឃឹមថា នឹងផ្ដល់សេវាកម្មប្រគល់ទំនិញគ្រប់ទីកន្លែងក្នុងពិភពលោក ហើយអាចជំនួសការប្រគល់ទំនិញបែបបុរាណដែលត្រូវការទាំងយានជំនិះ ទាំងអ្នកបើកបរ។ ក្រុមហ៊ុន Wing បច្ចុប្បន្ន មានវត្តមាននៅ សហរដ្ឋអាមេរិក, ហ្វាំងឡង់ និង អូស្ត្រាលី ក្នុងនោះ Wing កំពុងសហការជាមួយក្រុមហ៊ុនជាង 30 នៅក្នុងប្រទេសទាំងនេះ។

កាលពីឆ្នាំ 2019 Wing បានក្លាយជាក្រុមហ៊ុនប្រគល់ទំនិញដោយយន្តហោះគ្មានមនុស្សបើកដំបូងគេដែលទទួលបានការអនុញ្ញាតពីនាយកដ្ឋានអាកាសចរណ៍ជាតិរបស់ សហរដ្ឋអាមេរិក (FAA)។ ឆ្នាំដដែលនោះ Wing ក៏បានចាប់ផ្ដើមការសាកល្បងប្រគល់ទំនិញជាអាហារ និងភេសជ្ជៈ រួមនឹងថ្នាំពេទ្យ ទន្ទឹមនឹងការចាប់ដៃជាមួយ FedEx ដើម្បីប្រគល់ទំនិញស្រាលៗផងដែរ។

ការប្រគល់ទំនិញដោយប្រើប្រាស់យន្តហោះគ្មានមនុស្សបើក ត្រូវបានក្រុមហ៊ុនធំៗដូចជា UPS, Uber និង Amazon ជាដើម មានការចាប់អារម្មណ៍នាពេលកន្លង។ Amazon បានអនុវត្តគម្រោងមួយដែលមានឈ្មោះថា Prime Air កាលពីឆ្នាំ 2016 និងទទួលបានការយល់ព្រមពី FAA កាលពីឆ្នាំ 2020 ដែលអនុញ្ញាតឱ្យដឹកទំនិញច្រើនប្រភេទដោយប្រើប្រាស់យន្តហោះដ្រូន៕

August 27, 2021

កប៉ាល់ដឹកទំនិញស្វ័យប្រវត្តមិនបញ្ចេញឧស្ម័នពុលដំបូងបង្អស់ក្នុងពិភពលោក

ន័រវែស៖ កប៉ាល់ Yara Birkeland ដំណើរការទាំងស្រុងដោយថាមពលអគ្គិសនី អាចដឹកបាន 103 កុងតឺន័រ ជាមួយល្បឿន 24 គីឡូម៉ែត្រ/ម៉ោង និងមិនចាំបាច់មានក្រុមនាវិកទៅជាមួយ។

ក្រុមហ៊ុនផលិតគីមី Yara International (ន័រវែស) ប្រកាសថា ពួកគេផលិតបានកប៉ាល់ដឹកទំនិញស្វ័យប្រវត្ត ដែលមិនបញ្ចេញឧស្ម័នពុលដំបូងគេក្នុងលោក នេះបើតាមការចេញផ្សាយរបស់ CNN កាលពីថ្ងៃទី 25 សីហា។ តាមផែនការ កប៉ាល់ដែលមានឈ្មោះថា Yara Birkeland នេះ នឹងធ្វើដំណើរជាលើកដំបូងពីទីរួមស្រុក Heroya ទៅទីរួមស្រុក Brevik នៅចុងឆ្នាំនេះ ដោយមិនចាំបាច់មាននាវិក។ ជំនួសមកវិញ វានឹងត្រូវបានតាមដានដោយមជ្ឈមណ្ឌលគ្រប់គ្រងទិន្នន័យចំនួនបីដែលនៅលើដីគោក។

Yara Birkeland មិនមែនជាកប៉ាល់ដំបូងគេដែលដំណើរការដោយស្វ័យប្រវត្តនោះទេ ប៉ុន្តែ តំណែងនេះបានទៅលើស្រឡាងស្វ័យប្រវត្តមួយគ្រឿងដែលបង្ហាញខ្លួនកាលពីឆ្នាំ 2018 នៅ ហ្វាំងឡង់។ ក៏ប៉ុន្តែ Yara Birkeland គឺជាកប៉ាល់ដឹកកុងតឺន័រដំបូងគេដែលដំណើរការទាំងស្រុងដោយថាមពលអគ្គិសនី។ នេះបើតាម Yara International។

«Yara Birkeland ត្រូវបានគេនឹកគិតដល់តាំងពីឆ្នាំ 2017 ហើយក្រោយមក វាក៏ត្រូវបានសហការសាងសង់ដោយក្រុមហ៊ុនបច្ចេកវិទ្យា Kongsberg Maritime និងក្រុមហ៊ុនផលិតកប៉ាល់ Vard។ កប៉ាល់នេះអាចដឹកបាន 103 កុងតឺន័រ និងធ្វើដំណើរក្នុងល្បឿន 24 គីឡូម៉ែត្រ/ម៉ោង ដោយប្រើអាគុយ 7 MWh» នេះបើតាម Jon Sletten ប្រធានរោងចក្ររបស់ Yara International នៅ Porsgrunn។ កប៉ាល់នេះនឹងបញ្ចូលថាមពលនៅឯចំណត់ មុននឹងធ្វើដំណើរទៅកាន់កំពុងផែកុងតឺន័រនៅតាមបណ្ដោយឆ្នេរសមុទ្រ និងត្រលប់មកវិញ។ Yara Birkeland អាចធ្វើការជំនួសរថយន្តដឹកទំនិញ 40,000 គ្រឿងជារៀងរាល់ឆ្នាំ។

បច្ចុប្បន្ន ការងារលើកដាក់ទំនិញនឹងត្រូវការមនុស្ស ប៉ុន្តែ Sletten ឱ្យដឹងថា មិនយូរទៀតទេ គ្រប់សកម្មភាពរបស់កប៉ាល់នេះនឹងត្រូវបានដំណើរការដោយបច្ចេកវិទ្យាស្វ័យប្រវត្ត។

សាស្ត្រាចារ្យ Rudy Negenborn មកពីសាកលវិទ្យាល័យបច្ចេកវិទ្យា Delft (ហូឡង់) ឱ្យដឹងថា អនាគត កប៉ាល់ស្វ័យប្រវត្តដូចជា Yara Birkeland នឹងត្រូវធ្វើអន្តរកម្មជាមួយនឹងកប៉ាល់ដទៃដើម្បីគូសវាសផ្លូវសម្រាប់ធ្វើចរាចរណ៍ ក្នុងបំណងចៀសវាងបញ្ហាស្ទះផ្លូវ។

បើសិនជាពុំមានក្រុមនាវិកត្រួតពិនិត្យ និងថែទាំ កប៉ាល់ដូច Yara Birkeland នឹងត្រូវបំពាក់ប្រព័ន្ធត្រួតពិនិត្យស្វ័យប្រវត្ត ដែលអាចរកឃើញ និងដោះស្រាយបញ្ហា ឬរាយការណ៍ប្រាប់មនុស្សដើម្បីចេញទៅជួយ។ ក្រៅពីបញ្ហាបច្ចេកទេស បណ្ដាបញ្ហាផ្លូវច្បាប់ក៏នឹងកើតមានឡើងនៅពេលកប៉ាល់ស្វ័យប្រវត្តធ្វើដំណើរពីប្រទេសមួយ ទៅប្រទេសមួយ៕

August 26, 2021

ផ្ទះតូចបំផុតនៅអង់គ្លេស៖ ទទឹងមិនដល់ 2 ម៉ែត្រក្រឡា តែមានអ្នកមកទស្សនា 55,000 នាក់ រៀងរាល់ឆ្នាំ

ផ្ទះដ៏សែនតូចនេះ ត្រូវបានផ្ទេរមកឱ្យកូនចៅច្រើនជំនាន់ និងមានអាយុកាលរាប់រយឆ្នាំ ហើយធ្វើឱ្យគ្រប់គ្នាចង់ដឹង ចង់លឺអំពីបរិវេណខាងក្នុងរបស់ផ្ទះនេះ។

ផ្ទះដែលស្ថិតនៅក្នុងក្រុង Conwy នៃតំបន់ North Wales ប្រទេសអង់គ្លេស មានទទឹង 1.82 ម៉ែត្រ, កម្ពស់ 3.01 ម៉ែត្រ និងមានបន្ទប់ចំនួនពីរ។ វាស្ថិតនៅចន្លោះផ្ទះនានា និងហាក់ត្រូវកៀបជាប់នឹងផ្ទះទាំងនោះ ធ្វើឱ្យអ្នកដំណើរមានការចង់ដឹង ចង់លឺ។

សម្ភារប្រើប្រាស់ក្នុងផ្ទះនេះ សុទ្ធតែត្រូវបានច្នៃយ៉ាងពិសេសដើម្បីអាចយកចូលតាមទ្វារដ៏តូច។ ក្នុងផ្ទះ អាចដាក់បានគ្រែមួយសម្រាប់មនុស្សម្នាក់ ចង្ក្រានកម្ដៅ និងកន្លែងដាក់ធ្យូង។ ប៉ុន្តែ ពេលនេះ ម្ចាស់ផ្ទះក៏បានបន្ថែមសាឡុងមួយ ដែលត្រូវបានរចនាជាពិសេសដោយក្រុមហ៊ុន Snug។

Jan Tyley ដែលជាម្ចាស់បច្ចុប្បន្នរបស់ផ្ទះនេះ បានឱ្យដឹងថា អ្នកស្រីភ្ញាក់ផ្អើលណាស់នៅពេលពួកគេអាចយកសាឡុងការិយាល័យចូលទៅក្នុងបន្ទប់ក្រោមដីបាន។ បន្ទប់ក្រោមដីគឺជាកន្លែងទទួលភ្ញៀវ ផ្ទះបាយ និងបន្ទប់ទឹក។

ផ្ទះតូចបំផុតនៅអង់គ្លេសនេះ ត្រូវបានម្ចាស់ផ្ទះរក្សាទុក តកូន តចៅ ក្នុងអំឡុង 130 ឆ្នាំមកហើយ។ ដើម្បីចៀសពីការតម្រូវឱ្យរុះរើពីសំណាក់អាជ្ញាធរ អតីតម្ចាស់ផ្ទះនេះ ដែលមានឈ្មោះថា Robert Jones បានដើរគ្រប់កន្លែងក្នុងប្រទេសអង់គ្លេស ដើម្បីស្រាវជ្រាវឱ្យដឹងច្បាស់ថា តើផ្ទះរបស់ខ្លួន ពិតជាផ្ទះតូចជាងគេបង្អស់ប្រចាំប្រទេសដែរ ឬយ៉ាងណា។

ចុងក្រោយ ផ្ទះរបស់គាត់បានជាប់ឯតទគ្គកម្ម Guinness កាលពីឆ្នាំ 1920 និងត្រូវបានទទួលស្គាល់ថាជា ផ្ទះតូចជាងគេបង្អស់នៅប្រទេសអង់គ្លេស។ ចាប់តាំងពីពេលនេះមក ផ្ទះនេះ ទាក់ទាញបានភ្ញៀវមកទស្សនាប្រមាណ 55,000 នាក់ ជារៀងរាល់ឆ្នាំ។ នេះក៏ជាមូលហេតុដែលនាំឱ្យរដ្ឋាភិបាល បោះបង់បំណងរុះរើផ្ទះនេះ៕

August 23, 2021

Category: សង្គម និងសេដ្ឋកិច្ច