សង្គម និងសេដ្ឋកិច្ច - La Reine Media

បុរស និងស្ត្រីជាង 800 នាក់ អាក្រាតកាយទាំងស្រុង ដើម្បីអបអររដូវស្លឹកឈើជ្រុះ

(អង់គ្លេស)-បុរស និងស្ត្រីជាង 800 នាក់ នាំគ្នាអាក្រាតកាយ នៅឈូងសមុទ្រ Druridge ដើម្បីទទួលអំណរថ្ងៃនៃរដូវស្លឹកឈើជ្រុះ «Autumnal Equinox» ខាងមុខ។

មនុស្សរាប់រយនាក់ ប្រមូលផ្ដុំគ្នាទស្សនាការរាំរែកនៅជុំវិញភ្លក់ភ្លើងមុនពេលដោះសម្លៀកបំពាក់ទាំងអស់ និងត្រាំខ្លួនក្នុងទឹកនៅឈូងសមុទ្រ Druridge ក្នុងតំបន់ Northumberland ភាគឦសាននៃប្រទេសអង់គ្លេស កាលពីថ្ងៃទី 19 កញ្ញ។ សកម្មភាពនេះត្រូវបានធ្វើឡើងក្នុងបំណងអបអរថ្ងៃ Autumnal Equinox ជាថ្ងៃដំបូងនៃរដូវស្លឹកឈើជ្រុះដែលនឹងកើតឡើងនៅថ្ងៃទី 22 កញ្ញា។ យោងតាមវិទ្យាសាស្ត្រអឺរ៉ុប Autumnal equinox ឬ September Equinox ឬក៏ Fall Equinox គឺជាថ្ងៃដំបូងនៃរដូវស្លឹកឈើជ្រុះនៅអឌ្ឍគោលខាងជើង។

ក្រុមសង្គ្រោះបន្ទាន់ត្រូវបានដាក់ពង្រាយនៅលើឆ្នេរសមុទ្រ ដើម្បីត្រៀមបង្ការ និងសង្គ្រោះនៅពេលមានហេតុការណ៍គ្រោះថ្នាក់កើតឡើង ប៉ុន្តែ ពុំមានបញ្ហាណាមួយនោះទេនៅក្នុងព្រឹត្តិការណ៍នេះ។

ពិធីបុណ្យអាក្រាតកាយដ៏ធំដែលត្រូវបានធ្វើឡើងដើម្បីអបអររដូវស្លឹកឈើជ្រុះនៅឈូងសមុទ្រ Druridge បានក្លាយជាព្រឹត្តិការណ៍ប្រចាំឆ្នាំ បន្ទាប់ពីត្រូវបានធ្វើឡើងជាលើកដំបូងកាលពីឆ្នាំ 2012 ដើម្បីរៃអង្គាសប្រាក់ជូនដល់អង្គការមនុស្សធម៌ដែលធ្វើការខាងសុខភាពផ្លូវចិត្ត MIND។

កាលពីឆ្នាំ 2020 ព្រឹត្តិការណ៍នេះត្រូវបានគេលុបចោលបណ្ដោះអាសន្ន ដោយសារតែបម្រាមគោចរ។ ឆ្នាំ 2019 ព្រឹត្តិការណ៍នេះទាក់ទាញបានអ្នកចូលរួមជាង 700 នាក់។

«គ្រប់យ៉ាងពិតជាអស្ចារ្យ និងប្រព្រឹត្តទៅយ៉ាងរលូន។ យើងមានគ្នាចូលរួមយ៉ាងតិច 820 នាក់ បើទោះតួលេខចុងក្រោយមិនទាន់ប្រកាស» Jax Higginson អ្នកគ្រប់គ្រងព្រឹត្តិការណ៍ និយាយដូច្នេះ និងបន្ថែមថា ឆ្នាំនេះអាចរៃអង្គាសបានប្រាក់ប្រហែល 20,000 ផោន ស្មើនឹងជាង 27,000 ដុល្លារអាម៉េរិក សម្រាប់ជួយដល់មូលនិធិ MIND៕

September 20, 2021

ត្រកូលអ្នកមានទ្រព្យច្រើនជាងគេបង្អស់ទាំង 5 របស់ពិភពលោក នាឆ្នាំ 2021

យោងតាមការស្រាវជ្រាវរបស់ Bloomberg បច្ចុប្បន្ន ត្រកូលអ្នកមានបំផុតចំនួន 25 របស់ពិភពលោក កាន់កាប់ទ្រព្យសរុបចំនួន 1,700,000,000,000 ដុល្លារអាម៉េរិក កើត 312,000,000,000 ដុល្លារ ស្មើនឹង 22% ធៀបនឹង 1 ឆ្នាំមុន។

ក្រុមត្រកូលអ្នកមាននៅលើពិភពលោក រកបានប្រាក់យ៉ាងច្រើនក្នុងអំឡុង 1 ឆ្នាំកន្លងទៅនេះ។ ភាពសម្បូរទ្រព្យដែលងាយស្រួលលក់ដូរ និងទីផ្សារមូលបត្រឡើងដល់កំពូលជាបន្តបន្ទាប់ បូករួមនឹងគោលនយោបាយពន្ធដារប្រកបដោយអត្ថប្រយោជន៍គឺជាកត្តាដែលជួយឱ្យទ្រព្យដែលពួកគេរកបាន កាន់តែរីកមាឌ។ យោងតាមការស្រាវជ្រាវរបស់ Bloomberg បច្ចុប្បន្ន ត្រកូលអ្នកមានបំផុតចំនួន 25 របស់ពិភពលោក កាន់កាប់ទ្រព្យសរុបចំនួន 1,700,000,000,000 (1.7 សែនកោដិ ឬ 1.7 ទ្រីលាន) ដុល្លារអាម៉េរិក កើត 312,000,000,000 (3.12 សែនកោដិ ឬ 312 ពាន់លានដុល្លារ) ដុល្លារ ស្មើនឹង 22% ធៀបនឹង 1 ឆ្នាំមុន។

ឈរលំដាប់ទីមួយដែលជាត្រកូលអ្នកមានទ្រព្យច្រើនជាងគេក្នុងសកលលោករយៈពេល 4 ឆ្នាំបន្តបន្ទាប់គឺ Waltons មកពី Arkansas សហរដ្ឋអាម៉េរិក។ ត្រកូលនេះកំពុងកាន់កាប់ទ្រព្យចំនួនពាក់កណ្ដាលនៅក្នុងបណ្ដាញផ្សារលក់រាយ Walmart។ ធៀបនឹងឆ្នាំ 2020 ទ្រព្យរបស់ត្រកូលនេះបានកើនថែម 23 ពាន់លានដុល្លារ មានន័យថា ត្រកូល Waltons រកបាន 63 លានដុល្លារ/ ថ្ងៃ ឬ 2.6 លានដុល្លារ/ម៉ោង ឬក៏ 44,000 ដុល្លារ/វិនាទី។

ថ្ងៃណាក៏គេឃើញធនាគារ Goldman Sachs តំណាងឱ្យត្រកូល Waltons លក់ភាគហ៊ុន។ ក្នុងសប្ដាហ៍កន្លងទៅ ត្រកូលនេះបានលក់ភាគហ៊ុនតម្លៃ 294 លានដុល្លារ។ ជាសរុប ក្នុងរយៈពេល 7 ខែចុងក្រោយនេះ ត្រកូល Waltons លក់ភាគហ៊ុន Walmart បានរហូតដល់ជាង 6 ពាន់លានដុល្លារ។

ប៉ុន្តែ បណ្ដាកូនចៅជំនាន់ក្រោយរបស់ Sam Walton បច្ចុប្បន្ននៅតែកាន់កាប់មូលបត្រចំនួន 1,334,480,250 ហ៊ុន នៅក្នុងក្រុមហ៊ុន Walmart។ ដោយសារតម្លៃភាគហ៊ុន Walmart កើនឡើងខ្ពស់ក្នុង 1 ឆ្នាំកន្លង ទ្រព្យរបស់គ្រួសារ Walton ក៏កើនឡើងគួរឱ្យកត់សម្គាល់។

ជោគជ័យរបស់ Walmart ជួយឱ្យត្រកូល Waltons ដែលមកពី Arkansas (បច្ចុប្បន្នបានឈានចូលដល់ជំនាន់ទីបី រាប់ចាប់តាំងពី Walmart បានបង្ហាញខ្លួន) មានទ្រព្យច្រើនជាងមហាសេដ្ឋី Jeff Bezos និង Elon Musk ទៅទៀត។ ត្រកូល Waltons ក៏មានប្រាក់ច្រើនជាងជិត 100 ពាន់លានដុល្លារ ធៀបនឹងត្រកូលអ្នកមានលំដាប់ទីពីរគឺ Mars។

Mars និង Waltons គឺជាត្រកូលដែលរកប្រាក់បានច្រើនជាងគេបំផុតនៅក្នុងឆ្នាំកន្លង ដោយសារតែផលិតផលរបស់ពួកគេទទួលបានការគាំទ្រច្រើននៅក្នុងអំឡុង COVID-19 កំពុងរាតត្បាត ក្នុងនោះក៏មានផលិតផលដែលទាក់ទងនឹងផ្សារអនឡាញផងដែរ។

នៅមានត្រកូលជាច្រើនផ្សេងទៀតដែលទទួលបានផលប្រយោជន៍ពីនិន្នាការប្ដូរផ្លាស់ថ្មីនៅក្នុងវិស័យផ្សេង។ ត្រកូល Johnsons ដែលនៅពីក្រោយមូលនិធិវិនិយោគ Fidelity Investments រកបានប្រាក់ច្រើនពីការពេញនិយមនៃការជួញដូរមូលបត្រអនឡាញ។ ចំណែកត្រកូលអ្នកមានបំផុតនៅទ្វីបអាស៊ី គឺ Ambanis ក៏ទទួលបានផលប្រយោជន៍ពីទិន្នការថាមពលបៃតង និងនិន្នាការនៃបរិវត្តកម្មឌីជីថល (Digital Transformation)។

នៅពេល COVID-19 រាតត្បាតខ្លាំងបំផុត បណ្ដាយីហោប្រណិតទទួលរងផលប៉ះពាល់ធ្ងន់ធ្ងរ និងត្រូវគេព្យាករថានឹងជួបវិបត្តិធំ។ ប៉ុន្តែ ត្រកូលនានាដែលនៅពីក្រោយយីហោលំដាប់ខ្ពស់ទាំងនោះ បែរជារកបានប្រាក់ច្រើនទៅវិញ។ ត្រកូល Lauders ដែលនៅពីក្រោយយីហោផលិតផលគ្រឿងសម្អាង Estee Lauder ជាលើកដំបូងមានឈ្មោះនៅក្នុងតារាងចំណាត់ថ្នាក់ ខណៈដែលទ្រព្យរបស់ត្រកូល Hermes កើន 75% ពោលគឺឡើងដល់ 112 ពាន់លានដុល្លារ។

ត្រកូលមួយចំនួនរងផលប៉ះពាល់ដោយសារជាប់ពន្ធស្នងមរតក ក្នុងនោះ ត្រកូល Lee ដែលគ្រប់គ្រង Samsung គឺជាឧទាហរណ៍មួយ។ ត្រកូលនៅ កូរ៉េខាងត្បូងមួយនេះបានបាត់ឈ្មោះពីបញ្ជីចំណាត់ថ្នាក់ ដោយសារតែត្រូវបង់ពន្ធចំនួន 11 ពាន់លានដុល្លារ លើការស្នងមរតកក្រោយពីលោក Lee Kun-hee បានស្លាប់។

ខាងក្រោមនេះគឺជាត្រកូលអ្នកមានជាងគេទាំង 5 របស់ពិភពលោក ដែលយោងតាមតារាងចំណាត់ថ្នាក់របស់ Bloomberg ៖

1-ត្រកូល Walton

ក្រុមហ៊ុន៖ Walmart

ទ្រព្យសរុប៖ 238.2 ពាន់លានដុល្លារ

អាសយដ្ឋាន៖ Bentonville, Arkansas, សហរដ្ឋអាម៉េរិក

2-ត្រកូល Mars

ក្រុមហ៊ុន៖ Mars

ទ្រព្យសរុប៖ 141.9 ពាន់លានដុល្លារ

អាសយដ្ឋាន៖ McLean, Virginia, សហរដ្ឋអាម៉េរិក

3-ត្រកូល Kochs

ក្រុមហ៊ុន៖ Koch Industries

ទ្រព្យសរុប៖ 124.4 ពាន់លានដុល្លារ

អាសយដ្ឋាន៖ Wichita, Kansas, សហរដ្ឋអាម៉េរិក

4- ត្រកូល Hermes

ក្រុមហ៊ុន៖ Hermes

ទ្រព្យសរុប៖ 111.6 ពាន់លានដុល្លារ

អាសយដ្ឋាន៖ Paris, ប្រទេសបារាំង

5-រាជវង្ស Al Saud

ទ្រព្យសរុប៖ 100 ពាន់លានដុល្លារ

អាសយដ្ឋាន៖ Riyadh, រាជាណាចក្រអារ៉ាប៊ីសាអូឌីត

September 20, 2021

បណ្ដាញសង្គម TikTok ចិន រឹតត្បិតលើការប្រើប្រាស់របស់ក្មេងអាយុក្រោម 14 ឆ្នាំ

Douyin ដែលជាកំណែសម្រាប់អ្នកប្រើប្រាស់នៅប្រទេសចិន របស់ TikTok បានប្រកាសថានឹងកាត់បន្ថយពេលវេលានៃការប្រើប្រាស់របស់ក្មេងដែលមានអាយុក្រោម 14 ឆ្នាំ ដោយអនុញ្ញាតឱ្យពួកគេលេងត្រឹមតែ 40 នាទីប៉ុណ្ណោះ ក្នុង 1 ថ្ងៃ។

ByteDance ជាក្រុមហ៊ុនមេរបស់បណ្ដាញសង្គម Douyin កាលពីថ្ងៃទី 18 កញ្ញា បានប្រកាសអនុវត្តគោលការណ៍សម្រាប់ក្មេងជំទង់ ក្នុងនោះ អ្នកប្រើប្រាស់បណ្ដាញសង្គម TikTok កំណែសម្រាប់ប្រទេសចិន ដែលមានអាយុក្រោម 14 ឆ្នាំ អាចលេង Douyin បានតែ 40 នាទីប៉ុណ្ណោះក្នុង 1 ថ្ងៃ ក្នុងអំឡុងពេលពីម៉ោង 6 ព្រឹក ដល់ម៉ោង 22 យប់។

Douyin បានដាក់មុខងារមួយចំនួនដូចគ្នានេះដែរ តាំងពីឆ្នាំ 2018 ប៉ុន្តែ ជាមុខងារដែលអាចជ្រើសរើសបាន។ ការកំណត់ខាងលើដែលនឹងអនុវត្តចំពោះអ្នកប្រើប្រាស់ចុះឈ្មោះពិត និងមានអាយុក្រោម 14 ឆ្នាំនេះ ត្រូវបានធ្វើឡើងដើម្បីការពារក្មេងៗពីខ្លឹមសារអាក្រក់។

ក្នុងរយៈពេល 40 នាទីរៀងរាល់ថ្ងៃ Douyin នឹងណែនាំដល់អ្នកប្រើប្រាស់នូវខ្លឹមសារដែលសម្បូរចំណេះដឹង ដូចជា ការពិសោធផ្នែកវិទ្យាសាស្ត្រ ឬពិព័រណ៍សារមន្ទីរ និងមេរៀនប្រវត្តិសាស្ត្រជាដើម។ Douyin អំពាវនាវឱ្យអាណាព្យាបាលគ្រប់រូប ចុះឈ្មោះ និងអាយុពិតរបស់កូន ដើម្បីជួយគាំទ្រដល់គោលការណ៍ថ្មីរបស់បណ្ដាញសង្គមមួយនេះ។

ការកំណត់ខាងលើរបស់ Douyin ត្រូវបានធ្វើឡើងនៅពេលរដ្ឋាភិបាលចិន ស្វែងរកវិធីគ្រប់គ្រងបណ្ដាក្រុមហ៊ុនបណ្ដាញសង្គមដែលផ្ដល់ខ្លឹមសារលើអ៊ីនធើណិតនៅប្រទេសចិន ដោយចោទពួកគេថា រំលោភច្បាប់ប្រឆាំងការរកស៊ីផ្ដាច់មុខ បញ្ហាការពារទិន្នន័យ និងកម្លាំងពលកម្ម។

ប្រទេសចិន កាលពីខែមិថុនា បានធ្វើវិសោធនកម្មច្បាប់ការពារអនីតិជន ដោយស្នើដល់ក្រុមអ្នកផ្គត់ផ្គង់ខ្លឹមសារឌីជីថល បំពាក់ឧបករណ៍គ្រប់គ្រងពេលវេលានៃការប្រើប្រាស់របស់អតិថិជន កាត់បន្ថយមុខងារមួយចំនួន និងកាត់បន្ថយការលក់ផលិតផលចំពោះអ្នកប្រើប្រាស់ដែលមានអាយុក្រោម 18 ឆ្នាំ។

កម្មវិធី (App) ចែករំលែកវីដេអូ Kuaishou របស់ក្រុមហ៊ុន Kuaishou Technology ដែលជាគូប្រជែងធំនៅប្រទេសចិន របស់ Douyin បានកំណត់របបសម្រាប់ក្មេងមិនទាន់គ្រប់អាយុ ដូចទៅនឹង Douyin តាំងពីឆ្នាំ 2019 ក្រោមរូបភាពអាចជ្រើសរើសបាន។ ចំណែក WeChat ដែលជាកម្មវិធីទាក់ទងគ្នាដ៏ល្បីល្បាញនៅប្រទេសចិន របស់ក្រុមហ៊ុន Tencent, TokTik ដែលជាកំណែអន្តរជាតិរបស់ Douyin ជាដើម ក៏បាន និងកំពុងអនុវត្តគោលការណ៍នានាដើម្បីជួយការពារអនីតិជនផងដែរ៕

September 20, 2021

លក់កាហ្វេដោយរទេះរុញតាមដងផ្លូវ ពេលនេះកសិករជនជាតិអាម៉េរិក ម្នាក់ ក្លាយជាមហាសេដ្ឋី

ក្នុងអំឡុងទសវត្សរ៍ឆ្នាំ 1990 បងប្អូនពីរនាក់របស់គ្រួសារត្រកូល Boersma សន្សំបានប្រាក់មួយចំនួនដើម្បីទិញរទេះរុញមួយគ្រឿង និងម៉ាស៊ីនឆុងកាហ្វេ espresso មួយគ្រឿង ដើម្បីលក់កាហ្វេតាមដងផ្លូវ។ ពួកគេចាប់ផ្ដើមលក់កាហ្វេនៅក្នុងទីក្រុង Grants Pass (Oregon)។ មិនយូរប៉ុន្មាន ពួកគេទិញបានរទេះរុញរហូតដល់ 5 គ្រឿងដើម្បីលក់កាហ្វេ។

Dane និង Travis Boersma គឺជាកសិករចិញ្ចឹមគោយកទឹកដោះ ជំនាន់ទីបីរបស់គ្រួសារ។ នៅពេលស្វែងរកការងារសមស្របមួយធ្វើនឹងគេ ក្រៅពីកិច្ចការចិញ្ចឹមគោរបស់គ្រួសារ ពួកគេសម្រេចចិត្តសាកល្បងកម្លាំងជាមួយនឹងកាហ្វេ។ ពួកគេក្រោយមកក៏រកបានប្រាក់ដែលអាចសន្សំ និងចាយវាយសម្រាប់ពិធីកំសាន្តធំៗបាន។

បន្ទាប់ពីបងប្រុស Dane បានស្លាប់ដោយសារជំងឺស្វឹតដៃជើង Travis ក៏បន្តមុខរបរប្រចាំថ្ងៃ។ បច្ចុប្បន្ន យីហោ Dutch Bros Inc. របស់ Travis គ្រប់គ្រងហាងចំនួន 471 កន្លែង នៅពាសពេញតំបន់ភាគខាងលិចនៃទឹកដី សហរដ្ឋអាម៉េរិក ដោយរកចំណូលបានជាង 400 លានដុល្លារក្នុងមួយឆ្នាំ។

មូលបត្ររបស់ក្រុមហ៊ុននេះ ផ្ដើមដាក់ឱ្យជួញដូរចាប់ពីថ្ងៃទី 15 កញ្ញា នៅលើផ្សារហ៊ុន NYSE ដោយមានឈ្មោះកូដ BROS។ តម្លៃមូលបត្រនេះបានកើនឡើងដល់ 34.01 ដុល្លារ/ហ៊ុន កើន 48% ធៀបនឹងពេលមានវត្តមានក្នុងផ្សារហ៊ុនដំបូង ដែលនេះបាននាំឱ្យតម្លៃមូលធនទីផ្សាររបស់ Dutch Bros ឡើងដល់ 5.6 ពាន់លានដុល្លារអាម៉េរិក។ Travis អាយុ 50 ឆ្នាំ បច្ចុប្បន្នគឺជាម្ចាស់ហ៊ុនធំជាងគេ ដោយមានភាគហ៊ុនតម្លៃ 2.3 ពាន់លានដុល្លារ ប៉ុន្តែគេនៅមិនទាន់ដឹងច្បាស់អំពីចំនួនភាគហ៊ុនដែលលោកកំពុងកាន់កាប់នៅឡើយ។

ដោយមានគូប្រជែងធំៗ ដូចជា Starbucks, Dunkin’ និង Peet’s Coffee & Tea ជាដើម ទីផ្សារកាហ្វេនៅ សហរដ្ឋអាម៉េរិក ហាក់ពិបាកឱ្យគេលោតចូលរកស៊ី។ ប៉ុន្តែ Dutch Bros បែរជាបង្កើតបានទីផ្សារពិសេសដោយឡែក (niche market) ជាមួយនឹងអរិយធម៌ដែលគេហៅថា «Dutch Luv»។ ហាងកាហ្វេរបស់ Dutch Bros សុទ្ធតែដំណើរការដោយប្រើរូបមន្ត «អតិថិជនបើកឡានមកទិញយកទៅផ្ទះ» ដោយ Dutch Bros លក់តែភេសជ្ជៈត្រជាក់។

ប្រាក់ចំណេញរបស់ក្រុមហ៊ុននេះគឺ 6.3 លានដុល្លារ នៅក្នុងចំណូលសរុប 404.5 លានដុល្លារសម្រាប់រយៈពេល 12 ខែ គិតត្រឹមថ្ងៃទី 30 ខែមិថុនា ឆ្នាំ 2021 ខណៈដែលប្រាក់ចំណូលក្នុងឆ្នាំ 2018 មានត្រឹមតែ 186 លានដុល្លារ។

ក្រុមហ៊ុននេះ យកចិត្តទុកដាក់ខ្ពស់ទៅលើការពេញចិត្ត និងឱកាសរីកចម្រើនរបស់បុគ្គលិក។ អត្រាសុំឈប់ពីការងាររបស់ Dutch Bros ស្មើនឹង 40% ទាបជាងឆ្ងាយ បើធៀបនឹងអត្រាជាង 100% នៅក្នុងវិស័យទាំងមូល។ នេះបើតាមអ្នកវិភាគ Michael Galen មកពី Bloomberg Intelligence។

កាលពីខែកុម្ភៈ Travis បានលាលែងពីតំណែង CEO ប៉ុន្តែ នៅតែគ្រប់គ្រងតំណែងជាប្រធានក្រុមហ៊ុន។ ដំបូងឡើយក្រុមហ៊ុនឯកជន TSG Consumer Partners បានបោះទុនទៅក្នុងក្រុមហ៊ុន Dutch Bros កាលពីឆ្នាំ 2018 ហើយបច្ចុប្បន្ន TSG Consumer Partners កាន់កាប់មូលបត្រចំនួន 65 លានហ៊ុន ក្រោយពីបានធ្វើ IPO ដំបូង និងក្លាយជាម្ចាស់ភាគហ៊ុនធំជាងគេលំដាប់ទីពីរបន្ទាប់ពី Travis៕

September 17, 2021

សម្ព័ន្ធក្រុមហ៊ុន ព្រីនស៍ គ្រុប ចូលរួមជាមួយក្លឹប សហគ្រាសដែលមានទំនួលខុសត្រូវនៅតំបន់អាស៊ី (Asia Responsible Enterprise Club)

NGO Enterprise Asia បានជ្រើសយកសម្ព័ន្ធក្រុមហ៊ុន ព្រីនស៍ គ្រុប នៅកម្ពុជាសម្រាប់ពានរង្វាន់នៃការពង្រឹងសិទ្ធិអំណាចនៅក្នុងសង្គម ដោយក្នុងកម្មវិធីនោះទទួលបានការចុះឈ្មោះជាង ៥០០នាក់។

[ភ្នំពេញថ្ងៃទី១៧ ខែកញ្ញា ឆ្នាំ២០២១] – ព្រីនស៍ ហូលឌីង គ្រុប (“ ព្រីនស៍គ្រុប”) ដែលជាក្រុមហ៊ុនធំជាងគេ និងរីកចម្រើនលឿនបំផុតមួយនៅកម្ពុជា ត្រូវបានគេទទួលស្គាល់ចំពោះភាពជាសហគ្រិនដែលប្រកបដោយទំនួលខុសត្រូវនៅក្នុងកម្មវិធីពានរង្វាន់សហគ្រាសដែលមានទំនួលខុសត្រូវនៅតំបន់អាស៊ីប្រចាំឆ្នាំ២០២១ ហៅកាត់ថា “ AREA”។ សម្ព័ន្ធក្រុមហ៊ុន ព្រីនស៍ ទទួលបានការកោតសរសើរចំពោះកិច្ចការងារដែលមានឥទ្ធិពលដ៏ខ្លាំងក្លានៅអំឡុងពេលនៃការរីករាលដាលនៃជម្ងឺកូវីដ-១៩ ក្នុងប្រទេសកម្ពុជា។ នេះជាពានរង្វាន់ទី ៥ ហើយ ដែលសម្ព័ន្ធក្រុមហ៊ុន ព្រីនស៍ គ្រុប ទទួលបាននៅក្នុងឆ្នាំនេះ ក្រុមប្រឹក្សាវិនិច្ឆ័យថ្នាក់ជាតិ និងអន្តរជាតិបានគូសបញ្ជាក់ថាក្រុមហ៊ុនេះ ជាក្រុមហ៊ុនឈានមុខគេនៅតំបន់អាស៊ីទទួលបានជោគជ័យខ្លាំងដែលមានការអភិវឌ្ឍប្រកបដោយចីរភាពទាំងនៅក្នុងប្រទេសកម្ពុជា ក៏ដូចជានៅទូទាំងតំបន់អាស៊ានទាំងមូល។

កម្មវិធីពានរង្វាន់សហគ្រាសដែលមានទំនួលខុសត្រូវនៅតំបន់អាស៊ី ហៅកាត់ថា “AREA” បង្កើតឡើងនៅក្នុងឆ្នាំ២០១១ បាននឹងកំពុងស្វែងរកគន្លឹះដើម្បីកំណត់ឧទាហរណ៍នៃភាពជាអ្នកដឹកនាំគិតគូរដល់បរិស្ថាន ការវិនិយោគលើប្រជាជន ការលើកកម្ពស់សុខុមាលភាព ការពង្រឹងសិទ្ធិអំណាចសង្គម អភិបាលកិច្ចសាជីវកម្ម សារាចរនៃភាពជាអ្នកដឹកនាំផ្នែកសេដ្ឋកិច្ច និងភាពជាអ្នកដឹកនាំធុរកិច្ចដែលប្រកបដោយទំនួលខុសត្រូវ។ កម្មវិធីនេះបានដំណើរការដើម្បីបង្កើតសហគមន៍មួយដែលមានគោលបំណងតែមួយដូចគ្នា ដើម្បីឱ្យអ្នកជំនួញខ្លាំងពូកែនានាក្នុងតំបន់អាស៊ីបានរៀនពីគ្នាទៅវិញទៅមក ដោយពេលនេះសម្ព័ន្ធក្រុមហ៊ុន ព្រីនស៍ គ្រុប បានចូលរួមក្នុងបញ្ជីឈ្មោះនៃកម្មវិធីនោះហើយ។ កម្មវិធីនេះមានគោលបំណងលើកកម្ពស់សកម្មភាពសាជីវកម្មឱ្យស្របទៅតាមគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ។

អ្នកដែលទទួលបានពានរង្វាន់ផ្សេងទៀតពីកម្មវិធីនេះ រួមមាន មូលនិធិ Foxconn Education Foundation មូលនិធិ WPP India Foundation និងក្រុមហ៊ុន King Power International Co., Ltd.។ សម្ព័ន្ធក្រុមហ៊ុន ព្រីនស៍ គ្រុប ត្រូវបានគេទទួលស្គាល់នៅក្នុងប្រភេទនៃការពង្រឹងសិទ្ធអំណាចនៅក្នុងសង្គមសម្រាប់ការឆ្លើយតបទៅលើពហុវិស័យ ដែលត្រូវបានមើលឃើញពីការអនុវត្តដ៏រហ័ស និងសកម្មភាពសម្របសម្រួលដែលពាក់ព័ន្ធនឹងភាពជាដៃគូនៃអង្គភាពធុរកិច្ចនានា នាយកដ្ឋានរាជរដ្ឋាភិបាល និងអង្គការក្រៅរដ្ឋាភិបាល។ កន្លងមក សម្ព័ន្ធក្រុមហ៊ុន ព្រីនស៍ គ្រុប ក៏ត្រូវបានគេទទួលស្គាល់ចំពោះការឆ្លើយតបរបស់សាជីវកម្មចំពោះវិបត្តិកូវីដ-១៩ របស់ខ្លួននៅក្នុងកម្មវិធីពានរង្វាន់ Stevie Awards Asia Pacific ខណៈពេលដែល អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ គ្រុប បានឈ្នះពានរង្វាន់សហគ្រិនដ៏ឆ្នើមប្រចាំឆ្នាំនៅក្នុងកម្មវិធីពានរង្វាន់ធុរកិច្ចអន្តរជាតិឆ្នាំ២០២។

ក្នុងរយៈពេលជាងមួយឆ្នាំកន្លងមកនេះ សម្ព័ន្ធ រួមជាមួយក្រសួងអប់រំ យុវជន និងកីឡា បានបើកដំណើរការកម្មវិធីអាហារូបករណ៍ ចេន ហ្ស៊ី សម្រាប់និស្សិតកម្រិតសាកលវិទ្យាល័យនៅក្នុងប្រទេសកម្ពុជាចំនួន ៤០០នាក់ ការចូលរួមជាជំនួយថវិការចំនួន ១លានដុល្លារសហរដ្ឋអាមេរិក ដល់អង្គការសង្គមស៊ីវិលដើម្បីបង្កើតនូវឥទ្ធិពលក្នុងការជួយដល់អ្នកដែលរស់នៅតាមតំបន់ជនបទនានា ការបរិច្ចាគថវិកាចំនួន ៦លានដុល្លារសហរដ្ឋអាមេរិក ដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការប្រយុទ្ធប្រឆាំងនឹងជម្ងឺរាតត្បាត ដោយរួមបញ្ចូលទាំងការទិញវ៉ាក់សាំងការពារជម្ងឺកូវីដ-១៩ ចំនួន ១លានដូស និងបានរៀបចំនូវការចាក់វ៉ាក់សាំងការពារជម្ងឺកូវីដ-១៩ ជាច្រើនលើកជូនដល់បុគ្គលិករបស់ខ្លួនបានជាង ៣,៥០០នាក់។ ដោយផ្តោតទៅលើការស្តារស្ថានភាពឡើងវិញក្រោយពីជម្ងឺរាតត្បាតត្រូវបានបញ្ចប់នៅក្នុងប្រទេសកម្ពុជា សម្ព័ន្ធក្រុមហ៊ុននេះបានចាប់ផ្តើមធ្វើការលើគម្រោងទីក្រុងរាមដែលជាគម្រោងអភិវឌ្ឍន៍លើឆ្នេរសមុទ្រដែលមានទំហំ ដី ៨៣៤ហិកតា ដោយផែនការមេបានមកពីក្រុមហ៊ុនសិង្ហបុរី Surbana Jurong ក្នុងគោលបំណងផ្លាស់ប្តូរខេត្តព្រះសីហនុប្រកបដោយនិរន្តរភាព តាមរយៈប្រព័ន្ធអេកូទេសចរណ៍ សកម្មភាពពាណិជ្ជកម្ម និងលំនៅដ្ឋានដែលមានសក្តានុពលក្នុងការផ្តល់ជូននូវផ្ទះស្នាក់នៅដល់ប្រជាជនរហូតដល់ ១៣ម៉ឺននាក់។

អ្នកឧកញ៉ា ចេន ហ្ស៊ី (Chen Zhi) ដែលជាប្រធានសម្ព័ន្ធក្រុមហ៊ុន ព្រីនស៍ គ្រុប បានមានប្រសាសន៍ថា “ សម្ព័ន្ធក្រុមហ៊ុន ព្រីនស៍ គ្រុប បានធ្វើការទៅលើមូលនិធិព្រីនស៍ (Prince Foundation) ដោយបានបំពេញកិច្ចការយ៉ាងខ្ជាប់ខ្ជួនដើម្បីធានាបានថាប្រតិបត្តិការពាណិជ្ជកម្ម និងសកម្មភាពសប្បុរសធម៌របស់យើងដើរទន្ទឹមគ្នា ដើម្បីបង្កើតនូវភាពខុសប្លែកគ្នាទៅកាន់បុគ្គលិក ប្រជាពលរដ្ឋនៅកម្ពុជា និងបរិស្ថានទាំងមូល។ ពួកយើងនឹងបន្តខិតខំប្រែងឱ្យអស់ពីសមត្ថភាព ដើម្បីលើកកម្ពស់កិត្តិនាមរបស់ប្រទេសកម្ពុជានៅលើឆាកអន្តរជាតិ និងរៀនសូត្រពីដៃគូរបស់យើងនៅទូទាំងតំបន់ ព្រោះពួកយើងកំពុងសម្លឹងមើលពីឱកាសក្នុងការស្តារស្ថានភាពឡើងវិញដើម្បីផ្តល់ជូននូវអនាគតដ៏រុងរឿងនិងប្រកបដោយនិរន្តរភាព” ។

អស់រយៈពេលជាច្រើនឆ្នាំកន្លងមកនេះ សម្ព័ន្ធក្រុមហ៊ុន ព្រីនស៍ គ្រុប បានវិនិយោគជាថវិកាអស់ជាង ២ពាន់លានដុល្លារសហរដ្ឋអាមេរិកជាមួយគម្រោងនៅក្នុងស្រុក ហើយពហុក្រុមហ៊ុននេះនឹងបន្តបង្ហាញនូវការប្តេជ្ញាចិត្តនារយៈពេលវែងរបស់ខ្លួនតាមរយៈវិធីសាស្ត្រផ្សេងៗជាបន្តបន្ទាប់សម្រាប់ប្រទេសកម្ពុជា។

– ចប់ –

អំពីក្រុមហ៊ុន ព្រីនស៍ ហូល ឌីង គ្រុប (Prince Holding Group

ព្រីនស៍ ហូលឌីង គ្រុប (Prince Holding Group) គឺជាសម្ព័ន្ធក្រុមហ៊ុនពហុផលិតផលដដ៏ធំមួយនៅកម្ពុជាដែលមានអង្គភាពជាច្រើនធ្វើការផ្តោតលើ វិស័យស្នូលចំនួន ៣ គឺការអភិវឌ្ឍវិស័យអចលនទ្រព្យ សេវាហិរញ្ញវត្ថុ និងសេវាអតិថិជន។

អង្គភាពអាជីវកម្មសំខាន់ៗរបស់ក្រុមហ៊ុន Prince Holding Group នៅកម្ពុជារួមមានក្រុមហ៊ុន Prince Real Estate Group ក្រុមហ៊ុន Prince Huan Yu Real Estate Group ធនាគារ Prince Bank ក្រុមហ៊ុនអាកាសចរណ៍ Cambodia Airways ក្រុមហ៊ុន Belt Road Capital Management ព្រមទាំងក្រុមហ៊ុន Awesome Global Investment Group ។ តាមរយៈក្រុមហ៊ុនបុត្រសម្ព័ន្ធរបស់ខ្លួន ក្រុមហ៊ុន Prince Holding Group មានអាជីវកម្មជាង ៨០ នៅក្នុងប្រទេសកម្ពុជាដែលកំពុងប្រតិបត្តិការលើការអភិវឌ្ឍវិស័យអចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ភស្តុភារ បច្ចេកវិទ្យា ម្ហូបអាហារ និងភេសជ្ជៈ និងវិស័យជីវិតរស់នៅ ។ល។

ការកើនឡើងនូវការវិនិយោគផ្ទាល់ពីបរទេស កិច្ចព្រមព្រៀងពាណិជ្ជកម្មសេរីជាមួយបណ្តាប្រទេសឈានមុខ និងការចូលរួមនាពេលអនាគតនៅក្នុងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ត្រូវបានរំពឹងថានឹង ដើរតួនាទីជាកត្តាលីករដ៏សំខាន់មួយក្នុងការជំរុញសេដ្ឋកិច្ចកម្ពុជា ក្រោមការគាំទ្រពីគំនិតផ្តួចផ្តើមគោលនយោបាយទ្រទ្រង់វិស័យឧស្សាហកម្មរបស់រាជរដ្ឋាភិបាល។

ដោយប្រើបណ្តាញអ្នកជំនាញផ្នែកឧស្សាហកម្ម ធុរកិច្ច និងហិរញ្ញវត្ថុនៅទូទាំងទ្វីបអាស៊ី ក្រុមហ៊ុន Prince Holding Group បានកសាងមូលដ្ឋានគ្រឹះជាស្ពានចម្លងដ៏សំខាន់សម្រាប់មូលធនក្នុងស្រុក និងអន្តរជាតិ។ សម្ព័ន្ធនេះប្តេជ្ញាយ៉ាងមុតមាំចំពោះការអភិវឌ្ឍរយៈពេលវែងរបស់ប្រទេសកម្ពុជា។ ជាតួយ៉ាង ក្រុមហ៊ុន Prince Holding Group កំពុងអភិវឌ្ឍន៍ទីក្រុងរាម ដែលជាគម្រោងទេសចរណ៍ និងលំនៅដ្ឋានបុរីនាពេលខាងមុខដែលនឹងក្លាយជាគម្រោងអចលនទ្រព្យប្រកបដោយនិរន្តរភាពដំបូងគេបង្អស់នៅកម្ពុជា ក្នុងគោលបំណងធានាបាននូវការវិនិយោគសរុបចំនួន ១៦ ពាន់លានដុល្លារសហរដ្ឋអាមេរិកនៅក្នុងតំបន់។ គម្រោងនេះស្ថិតនៅទីតាំងយ៉ាងងាយស្រួលដោយគ្រាន់តែធ្វើដំណើររយៈពេល ១០ នាទីពីអាកាសយានដ្ឋានអន្តរជាតិខេត្តព្រះសីហនុប៉ុណ្ណោះ ដែលមានគោលបំណងរួមចំណែកដល់ការស្តារសេដ្ឋកិច្ចរបស់ខេត្តព្រះសីហនុ។

អំពី កម្មវិធីពានរង្វាន់ សហគ្រាសដែលមានទំនួលខុសត្រូវនៅតំបន់អាស៊ី (AREA)

កម្មវិធីពានរង្វាន់ សហគ្រាសដែលមានទំនួលខុសត្រូវនៅតំបន់អាស៊ី (AREA) ចាត់ថ្នាក់នឹងផ្តល់ពានរង្វាន់ជាកិត្តិយសដល់ធុរកិច្ចនានានៅតំបន់អាស៊ីដែលទទួលបានជោគជ័យខ្លាំងនិងសហគ្រិនភាពដែលមានទំនួលខុសត្រូវខ្ពស់តាមរយៈផ្នែកផ្សេងៗដូចជាភាពជាអ្នកដឹកនាំគិតគូរដល់បរិស្ថាន ការវិនិយោគលើប្រជាជន ការលើកកម្ពស់សុខុមាលភាព ការពង្រឹងសិទ្ធិអំណាចសង្គម អភិបាលកិច្ចសាជីវកម្ម សារាចរនៃភាពជាអ្នកដឹកនាំផ្នែកសេដ្ឋកិច្ច និងភាពជាអ្នកដឹកនាំធុរកិច្ចដែលប្រកបដោយទំនួលខុសត្រូវខ្ពស់។ សម្រាប់ព័ត៌មានបន្ថែមសូមចូលទៅកាន់គេហទំព័រ https://enterpriseasia.org/area/

សម្រាប់ព័ត៌មានបន្ថែមពីមូលនិធិសប្បុរសធម៌ព្រីនស៍ សូមទាក់ទង៖

លោកស្រី Ada Leung                                            លោក Andrew Scott
Hill+Knowlton Strategies Asia                 Hill+Knowlton Strategies Asia
ទូរសព្ទលេខ៖ +៨៥២-២៨៩៤-៦២២៥                      ទូរសព្ទលេខ៖ +៨៥២-៥៩១៨-៩៨៩៦
អ៊ីម៉ែល៖ [email protected]     [email protected]

September 17, 2021

«ផ្ទះបាយខ្មោច» (Ghost Kitchens) កំពុងពេញនិយមនៅតំបន់អាស៊ី

ក្នុង «ផ្ទះបាយខ្មោច» មួយកន្លែង នៅតំបន់ឧស្សាហកម្មជាយក្រុងតៃប៉ិ នៃកោះតៃវ៉ាន់ ក្រុមចុងភៅកំពុងញាប់ដៃ ញាប់ជើង ចម្អិនអាហារដែលមិនត្រូវបានបម្រើអតិថិជននៅក្នុងភោជនីយដ្ឋាននោះទេ៖ ស្វាគមន៍មកកាន់ពិភពលោក «ផ្ទះបាយខ្មោច»។

មុន COVID-19 មកដល់ វិស័យប្រគល់អាហារដល់ផ្ទះអតិថិជន បានរីកចម្រើនណាស់ទៅហើយ ប៉ុន្តែ នៅពេលបម្រាមគោចរត្រូវបានអនុវត្ត បន្ទាប់ពី COVID-19 បង្ហាញខ្លួន វិស័យនេះបន្តរីកចម្រើនថែមមួយកម្រិតទៀតនៅទ្វីបអាស៊ី។

នៅពេលកម្មវិធីទូរស័ព្ទ (App) បញ្ជាទិញ និងប្រគល់អាហារបានផ្ទុះឡើង ក៏មានន័យថា អតិថិជនបានស៊ាំនឹងការហៅមុខអាហារ ឬភេសជ្ជៈពីចម្ងាយ និងទទួលបានយ៉ាងឆាប់រហ័ស។ ឆ្លើយតបនឹងតម្រូវការនេះ ភោជនីយដ្ឋានកាន់តែច្រើនឡើងៗ នាំគ្នាបង្កើតសេវាកម្មលក់អាហារដោយមិនបម្រើនៅនឹងកន្លែង ឬហៅថា «ផ្ទះបាយពពក» (cloud kitchens) ឬ «ផ្ទះបាយខ្មោច» (ghost kitchens)។ ក្រោយមក មហារោគរាតត្បាត បានមកដល់ ធ្វើឱ្យមនុស្សរាប់ពាន់លាននាក់មិនអាចទៅកាន់ភោជនីយដ្ឋានដើម្បីបរិភោគ។

«COVID-19 ពិតជាបានជំរុញឱ្យវិស័យនេះរីកចម្រើនខ្លាំងក្លា ពិតជាផ្ដល់ផលប្រយោជន៍ច្រើនដល់យើងខ្ញុំ» Jason Chen នាយកប្រតិបត្តិរបស់ក្រុមហ៊ុន JustKitchen និយាយដូច្នេះ។

JustKitchen ចាប់ផ្ដើមដំណើរការ «ផ្ទះបាយខ្មោច» ដំបូងនៅ តៃវ៉ាន់ ចាប់ពីដើមឆ្នាំ 2020។ បច្ចុប្បន្ន ក្រុមហ៊ុននេះមានសាខាចំនួន 17 នៅ កោះតៃវ៉ាន់, 1 កន្លែងនៅ ហុងកុង និងកំពុងមានគម្រោងពង្រីកទៅកាន់ប្រទេសហ្វីលីពីន និង សិង្ហបុរី នៅចុងឆ្នាំនេះ។

បណ្ដាក្រុមហ៊ុនធំៗក្នុងវិស័យដឹកជញ្ជូនអាហារក្នុងតំបន់ ក៏បានក្ដោបក្ដាប់និន្នាការនេះបាន និងបានពង្រីកផ្ទះបាយពពកនៅពាសពេញតំបន់ អាស៊ីអាគ្នេយ៍ ចាប់តាំងពី COVID-19 រាតត្បាតខ្លាំង។

បុគ្គលិករបស់ក្រុមហ៊ុន JustKitchen កំពុងញាប់ដៃញាប់ជើង

យោងតាម Researchchandmarkets.com វិស័យ «ផ្ទះបាយខ្មោច» នៅទូទាំងសកលលោក ត្រូវគេរំពឹងថានឹងមានកំណើន 12% ជារៀងរាល់ឆ្នាំ ហើយមានតម្លៃសរុបប្រមាណ 139.37 ពាន់លានដុល្លារ គិតត្រឹមឆ្នាំ 2028។ អាស៊ីប៉ាស៊ីហ្វិក ជាតំបន់ដែលមានប្រជាជន 4.3 ពាន់លាននាក់ កាន់កាប់ចំណែកទីផ្សារពិភពលោកក្នុងវិស័យនេះ ប្រហែល 60%។

ក្រុមហ៊ុនស្រាវជ្រាវ Euromonitor បានគណនាឃើញថា ផ្ទះបាយពពក ចំនួន 7,500 កន្លែង កំពុងដំណើរការនៅប្រទេសចិន, 3,500 កន្លែង នៅ ឥណ្ឌា, 1,500 នៅ សហរដ្ឋអាមេរិក និង 750 នៅប្រទេសអង់គ្លេស។

Natalie Phanphensophon ត្រូវប្ដូរទិសដៅអាជីវកម្មនៃក្រុមហ៊ុនគ្រប់គ្រងភោជនីយដ្ឋានអាយុកាល 45 ឆ្នាំរបស់ខ្លួន ទៅជាសេវាអាហារវេចទៅផ្ទះ ដោយសារតែ COVID-19។ គ្រួសាររបស់នាង គ្រប់គ្រងបណ្ដាញភោជនីយដ្ឋាន Mango Tree & Coca នៅប្រទេសថៃ។

ដើមឆ្នាំនេះ ពួកគេបានបើកភោជនីយដ្ឋានពពកដំបូង នៅជាយក្រុងបាងកក និងកំពុងត្រៀមបើកបន្ថែម 2 កន្លែងផ្សេងទៀត។ «គោលដៅរបស់យើងគឺធានាឱ្យបុគ្គលិកគ្រប់រូបក្នុងបណ្ដាញ អាចឆ្លងផុតការលំបាករួមគ្នា» ស្ត្រីវ័យ 35 ឆ្នាំខាងលើ និយាយដូច្នេះ។

ប្រាក់ចំណេញដែលផ្ទះបាយ ឬភោជនីយដ្ឋានពពកនាំមកគឺតិចជាង បើធៀបនឹងភោជនីយដ្ឋានបែបបុរាណ ព្រោះតែមានអតិថិជនតិចតួចដែលបញ្ជាទិញអាហារច្រើនមុខក្នុងពេលតែមួយ។ ប៉ុន្តែ ជំនួសមកវិញ ប្រាក់ចំណាយសម្រាប់ដំណើរការហាងគឺទាបជាងច្រើន។

iBerry Group ក្រុមហ៊ុនគ្រប់គ្រងបណ្ដាញភោជនីយដ្ឋាន និងហាងការ៉ែម ដែលនៅក្នុងបណ្ដាមជ្ឈមណ្ឌលពាណិជ្ជកម្មនៅប្រទេសថៃ ក៏បានបើកក្រុមហ៊ុនដឹកជញ្ជូនអាហារដល់ផ្ទះមួយកន្លែងផងដែរ។

អាស៊ីប៉ាស៊ីហ្វិក ជាតំបន់ដែលមានប្រជាជន 4.3 ពាន់លាននាក់ កាន់កាប់ចំណែកទីផ្សារពិភពលោកក្នុងវិស័យនេះ ប្រហែល 60%។

«ផ្ទះបាយពពក ជាមូលដ្ឋាន គ្រាន់តែជាម៉ាសអុកស៊ីសែន សម្រាប់ពួកយើងនៅក្នុងសម័យ COVID-19» Thitanun Taveebhol នាយកផ្នែកម៉ាក យីហោ (Brand Manager) របស់ iBerry Group បញ្ជាក់ដូច្នេះ។

នៅពេលបណ្ដាក្រុមហ៊ុន និងបណ្ដាញភោជនីយដ្ឋាន ងាកទៅរកអាជីវកម្មប្រគល់ទំនិញដល់ផ្ទះ បណ្ដាផ្ទះបាយពពកលក្ខណៈគ្រួសារ ក៏ចាប់ផ្ដើមពេញនិយម។

បន្ទាប់ពីបានចូលនិវត្តន៍ពីក្រុមហ៊ុនអាកាសចរណ៍ Air India លោក Nirjash Roy Chowdhury ក៏បានយកប្រាក់សន្សំបានទៅបើកភោជនីយដ្ឋានពពកមួយ នៅទីក្រុង ម៉ុមបៃ។ អ្នកជំនួញរូបនេះបានជួលបុគ្គលិក 6 នាក់ ដែលធ្លាប់បានធ្វើការនៅសណ្ឋាគារ។

Chowdhury ឱ្យដឹងថា លោកចំណាយពេល 6 ខែ ទើបរកបានប្រាក់ដើមមកវិញ ប៉ុន្តែ លោកជឿជាក់ថា វិស័យនេះនៅតែបន្តមានសក្ដានុពលយូរអង្វែង។

ក្រុមអ្នកជំនាញយល់ថា នេះគឺជាទិសដៅដែលប្រកបដោយសុវត្ថិភាព។ Nailul Huda អ្នកវិភាគប្រចាំវិទ្យាស្ថានស្រាវជ្រាវសេដ្ឋកិច្ច និងហិរញ្ញវត្ថុ ដែលមានការិយាល័យកណ្ដាលនៅទីក្រុងហ្សាការតា ប្រទេសឥណ្ឌូនេស៊ី ឱ្យដឹងថា កត្តាថ្លៃដំណើរការទាបជាង និងទម្លាប់ហៅអាហារដែលដឹកជញ្ជូនដល់ផ្ទះរបស់ក្រុមយុវវ័យសម័យថ្មី នឹងធានាស្ថិរភាពនៃកំណើនសេដ្ឋកិច្ចសម្រាប់វិស័យផ្ទះបាយពពក៕

September 16, 2021

ព្រោះតែសម្លាប់ត្រីចិញ្ចឹមរបស់អតីតភរិយាដើម្បីសងសឹក សេដ្ឋីម្នាក់ត្រូវជាប់ពន្ធនាគារជាងមួយឆ្នាំ

អង់គ្លេស៖ សេដ្ឋីឈ្មោះ Haines ត្រូវបានកាត់ទោសដាក់ពន្ធនាគាររយៈពេល 16 ខែ ព្រោះតែបានលួចចូលផ្ទះរបស់អតីតភរិយា នៅឯស្រុក Caerphilly និងបានសម្លាប់ត្រីចិញ្ចឹមដែលមានតម្លៃជិត 14,000 ដុល្លារ របស់អ្នកស្រី ដើម្បីជាការសងសឹក។

តុលាការ Newpor Crown កាលពីថ្ងៃទី 14 កញ្ញា បានកាត់ទោសម្ចាស់ក្រុមហ៊ុនកែច្នៃ Anthony Haines វ័យ 51 ឆ្នាំ ពីបទលួចចូលផ្ទះអតីតភរិយាឈ្មោះ Jane អាយុ 52 ឆ្នាំ មានទីលំនៅក្នុងតំបន់ Caerphilly នៃដែនដី Wales របស់ អង់គ្លេស កាលពីខែមិថុនា។ Haines បានផ្ដាច់អគ្គិសនីក្នុងផ្ទះរបស់ Jane ធ្វើឱ្យត្រីដែលមានតម្លៃជិត 14,000 ដុល្លារអាមេរិក ត្រូវងាប់។

Haines ថែមទាំងបានបំផ្លាញរូបថតរបស់ Jane ដែលថតជាមួយមិត្តប្រុសរបស់អ្នកស្រី ព្រមទាំងបានឆែកឆេរបន្ទប់គេង និងយកកាំបិតកាប់ចិញ្ច្រាំក្ដារជ្រញ់ និងទូក្នុងផ្ទះបាយទៀតផង។ បន្ទាប់ពីបានសារភាពទោស សេដ្ឋីរូបនេះត្រូវបានតុលាការផ្ដន្ទាទោសដាក់ពន្ធនាគាររយៈពេល 16 ខែ។

«Jane បានសង្ស័យលើអតីតស្វាមីតាំងពីដំបូង។ អ្នកស្រីនិយាយថា គាត់ប្រចណ្ឌ ព្រោះតែអ្នកស្រីបានចាប់ផ្ដើមជីវិតថ្មី» ចៅក្រម Jones និយាយដូច្នេះ និងបន្ថែមថា ចាប់តាំងពីគូស្វាមី និងភរិយានេះបានរស់នៅបែកពីគ្នា និងជិតឈានដល់ការលែងលះស្ថាពរ Haines បានធ្វើឱ្យជីវភាពរបស់អតីតភរិយា «ដូចទៅនឹងនរកអវីចី»។

កាលពីឆ្នាំ 2019 លោក Haines ក៏ធ្លាប់បានជាប់ពន្ធគារម្ដងរួចហើយ ព្រោះតែបានគំរាមកំហែងដល់ Jane និងមិត្តប្រុសរបស់អ្នកស្រី ដោយកាំបិតកាប់សាច់ជ្រូក។

ក្នុងហេតុការណ៍កាលពីខែមិថុនា ដោយសារតែស្រវឹងស្រា ទើប Haines មានសកម្មភាពដូច្នេះ នេះបើតាមមេធាវី Marian Lewis។ ចំណែកកូនស្រីរបស់ Haines ក៏បានឱ្យដឹងថា គាត់គឺជាឪពុក ជាលោកតាដ៏ល្អរបស់កូនចៅ។ សេដ្ឋី Haines បានកសាងអាជីវកម្មផ្ទាល់ខ្លួន និងបានជួយឱ្យគ្រួសារមានជីវភាពល្អប្រសើរផ្នែកហិរញ្ញវត្ថុ៕

September 16, 2021

iPhone 13 ទើបតែបង្ហាញខ្លួនសោះ Samsung ចំអកចំអនឱ្យ Apple ភ្លាមៗតែម្ដង

ក្នុងអំឡុងពេលនេះ Samsung ទំនងជា «មានក្ដីសុខ» នៅពេលបាន «ចំអក» ឱ្យ Apple ក្រោយ iPhone 13 ត្រូវបានបង្ហាញខ្លួន។

ថ្មីៗនេះ Appe បានបញ្ចេញទូរស័ព្ទឆ្លាតវៃមួយគូគឺ iPhone 13 Pro និង iPhone 13 Pro Max ដែលមានមុខងារជាច្រើនត្រូវបានបន្ទាន់សម័យ ក្នុងនោះ អេក្រង់ ProMotion 120Hz ត្រូវបានបំពាក់ជាលើកដំបូងនៅលើ iPhone។ មុខងារនេះប្រហែលជាថ្មីថ្មោងសម្រាប់អ្នកប្រើប្រាស់ iPhone ប៉ុន្តែតាមពិត អេក្រង់លំដាប់នេះត្រូវបានបំពាក់នៅលើទូរស័ព្ទ Android លំដាប់ខ្ពស់តាំងពីយូរមកហើយ ចំណែកបច្ចុប្បន្ន វាក៏មាននៅលើទូរស័ព្ទតម្លៃមធ្យមផងដែរ។

ដូចសព្វមួយដង បន្ទាប់ពី Apple បញ្ចេញ iPhone ថ្មី ដោយមានចំនុចបង្កចំណាប់អារម្មណ៍គឺអេក្រង់ ProMotion 120Hz ក្រុមហ៊ុន Samsung ក៏បាន «លែបខាយ» ដាក់ Apple ដោយការបង្ហោះសារនៅលើ Twitter។

សារខាងលើត្រូវបានបង្ហោះដោយគណនីផ្លូវការមួយដែលមានសញ្ញា «គូសធីក (tick) ពណ៌ខៀវ» របស់ Samsung នៅ សហរដ្ឋអាមេរិក។ នេះមិនមែនជាលើកដំបូងដែល Samsung ចំអកឱ្យគូប្រជែងនោះទេ។ ឱ្យតែមានការបញ្ចេញផលិតផលថ្មី Samsung តែងតែមានការបង្ហោះសាររិះគន់ លែបខាយដល់ផលិតផលរបស់គូប្រជែងនេះ ទន្ទឹមនឹងនេះ Samsung ក៏មិនភ្លេចឃោសនាផលិតផលរបស់ខ្លួនផងដែរ។

ជាមូលដ្ឋាន iPhone 13 ឆ្នាំនេះ ប្រើប្រាស់បច្ចេកវិទ្យាអេក្រង់ LTPO ដែលមានសមត្ថភាពដំណើរការស្វ័យប្រវត្តក្នុងការកែតម្រូវល្បឿនប្រតិបត្តិការរបស់អេក្រង់ ដោយយោងទៅលើកិច្ចការ និងខ្លឹមសារដែលបង្ហាញនៅលើអេក្រង់ ដើម្បីសន្សំសំច័យថ្ម។ បច្ចេកវិទ្យានេះ ធ្លាប់ត្រូវបាន Samsung បំពាក់លើ Galaxy S21 Ultra ដែលបានបង្ហាញខ្លួនក្នុងទីផ្សាយកាលពីដើមឆ្នាំនេះ។ ចំណែកទូរស័ព្ទដំបូងរបស់ Samsung ដែលបានបំពាក់អេក្រង់ល្បឿន 120Hz គឺ Galaxy S20 ដែលបានបង្ហាញខ្លួនកាលពីដើមឆ្នាំ 2020។

iPhone 13 Pro និង 13 Pro Max បច្ចុប្បន្ន មានតម្លៃចាប់ពី 999 ដុល្លារ និង 1,099 ដុល្លារអាមេរិក សម្រាប់កំណែដែលមានអង្គចងចាំ 128GB៕

September 16, 2021

មហាសមុទ្រទាំងអស់របស់ផែនដី ត្រូវកក តើបញ្ហាអ្វីខ្លះនឹងកើតឡើង? (វីដេអូ)

ទឹកសមុទ្រកក នឹងបណ្ដាលឱ្យមានគ្រោះមហន្តរាយដល់ជីវិតទាំងអស់ដែលមាននៅលើពិភពផែនដី ដោយសារតែបាត់បង់ប្រភពផ្គត់ផ្គង់អុកស៊ីសែន និងដំណើរនៃវដ្ដរបស់ទឹក។

ផែនដី បានឆ្លងកាត់យុគសម័យទឹកកកធំៗយ៉ាងតិច 5 លើករួចមកហើយ។ លើកចុងក្រោយបានកើតឡើងកាលពីប្រមាណ 20,000 ឆ្នាំមុន និងធ្វើឱ្យផែនដីត្រជាក់ជាងបច្ចុប្បន្ន ប្រហែល 5 អង្សាសេ។ ប៉ុន្តែ កាលណោះ អ្នកក៏មិនអាចមើលឃើញផ្ទៃទឹកមហាសមុទ្រត្រូវកកទាំងស្រុងនោះដែរ។

មានកត្តាសំខាន់ៗមួយចំនួនដែលរក្សាទឹកក្នុងមហាសមុទ្ររបស់យើង ឱ្យស្ថិតនៅក្នុងសភាពរាវ ក្រៅពីតំបន់ដែលត្រជាក់បំផុតនៃប៉ូលខាងជើង និងខាងត្បូង។ បើសិនជាបាត់បង់កត្តាទាំងនេះភ្លាមៗ ទឹកនឹងត្រូវកក។

កត្តាដំបូងគឺកំហាប់ខ្ពស់នៃជាតិអំបិល ដោយវាជួយកំណត់កម្រិតនៃភាពត្រជាក់ដែលនាំឱ្យទឹកប្រែជាកក ពី 0 អង្សាសេ មកនៅត្រឹម -2 អង្សាសេ។

មូលហេតុមួយផ្សេងទៀត នោះគឺផែនដីមានទឹកយ៉ាងច្រើន។ ប្រមាណ 71% នៃផ្ទៃផែនដី ត្រូវបានគ្របដណ្ដប់ដោយទឹក ក្នុងនោះមានប្រហែល 96.5% គឺជាទឹកប្រៃ។ ចំពោះបរិមាណទឹកនេះ គេត្រូវការបំបាត់កំដៅយ៉ាងច្រើន ដើម្បីអាចឈានដល់សភាពកក។ សូមកុំភ្លេចថា ទឹកក្នុងមហាសមុទ្រទាំងអស់សុទ្ធតែមានចលនា។ លំហូរទឹកសមុទ្របែងចែកទឹកក្កៅទៅកាន់តំបន់ទឹកត្រជាក់។

កត្តាចុងក្រោយ នោះគឺសម្បកផែនដីដែលស្ដើងបំផុត ស្ថិតនៅខាងក្រោមមហាសមុទ្រ ដូច្នេះហើយទើបកម្ដៅអាចភាយចេញពីខាងក្រោមសម្បកផែនដីចូលមកក្នុងទឹកសមុទ្រ។

បើសិនជាកត្តាទាំងឡាយខាងលើត្រូវបាត់បង់ អ្នកនឹងត្រូវការវ៉ែនតាពណ៌ខ្មៅ ព្រោះថាពេលនោះ ផែនដីរបស់យើងនឹងក្លាយជាពិភពដ៏មហាសែនត្រជាក់ ដែលពន្លឺព្រះអាទិត្យត្រូវចាំងប្លាតយ៉ាងខ្លាំងក្លា ដោយសារតែទឹកកក និងព្រឹលមានពណ៌ស រលោង អាចបង្កើតកម្រិតខ្ពស់។ បាតុភូតនេះបកស្រាយអំពីមូលហេតុដែលនាំឱ្យកំពូលផ្ទាំងទឹកកកនៅតំបន់ប៉ូល បានជួយរក្សាអាកាសធាតុផែនដីឱ្យមានស្ថិរភាពក្នុងរយៈពេលរាប់ពាន់ឆ្នាំ។

https://www.youtube.com/watch?v=dasw-xE9WCU

បើសិនមហាសមុទ្រទាំងអស់ត្រូវកក វានឹងចាំងប្លាតពន្លឺព្រះអាទិត្យយ៉ាងច្រើនចេញទៅក្រៅបរិយាកាស ហើយប្រការនេះនឹងធ្វើឱ្យវដ្ដរបស់ទឹកនៅលើផែនដី ត្រូវរអាក់រអួល។

កម្ដៅពីព្រះអាទិត្យនឹងមិនគ្រប់គ្រាន់ដើម្បីធ្វើឱ្យទឹកត្រូវហួតទៅលើមេឃ។ ប្រការនេះមានន័យថា មិនមានភ្លៀងធ្លាក់ទៀតនោះទេ។ បើពុំមានពពក ភ្លៀងក៏ត្រូវបាត់ខ្លួន។ ទឹក និងព្រឹលមានសារសំខាន់សម្រាប់ជីវិតនៅលើផែនដី ប៉ុន្តែបើសិនពួកវាបាត់ខ្លួន ផែនដីនឹងក្លាយទៅជាស្ងួតហួតហែងដូចទៅនឹងប៉ូលខាងត្បូង ឬផ្នែកខ្លះនៃសមុទ្រខ្សាច់ សាហារ៉ា (Sahara)។

មហាសមុទ្រទាំងអស់ដែលកកជាទឹកកក អាចធ្វើឱ្យជីវិតរបស់សត្វច្រើនប្រភេទត្រូវផុតពូជ ព្រោះថា មហាសមុទ្រនានាមានផ្ទុកជីវិតរបស់ផែនដី ប្រមាណ 80% ហើយត្រីទាំងឡាយដែលបានងាប់ក្រោមផ្ទៃទឹកកកនេះ នឹងប៉ះពាល់ធ្ងន់ធ្ងរដល់សេដ្ឋកិច្ចរបស់មនុស្ស។

ទឹកកកនឹងកាត់ផ្ដាច់ផ្លូវទឹកនៅលើសមុទ្រ ដែលនេះមានន័យថា នឹងធ្វើឱ្យសកម្មភាពដោះដូរពាណិជ្ជកម្មសកលត្រូវបាត់បង់ 80%។ មនុស្សជិត 56 លាននាក់កំពុងធ្វើការងារក្នុងវិស័យនេសាទត្រី និងដាំ ឬចិញ្ចឹមសត្វក្នុងទឹកនឹងត្រូវអស់ការងារធ្វើ។ អាហារសមុទ្រនឹងលែងជាអាហារសំខាន់នៅក្នុងរបបអាហារប្រចាំថ្ងៃទៀតហើយ ក្នុងនោះក៏នឹងលែងមានមុខម្ហូប ស៊ូស៊ី ឬបង្កងអាំងនៅលើចង្ក្រានទៀតដែរ។

ប៉ុន្តែ បញ្ហាខាងលើនេះនៅតែមិនធ្ងន់ធ្ងរប៉ុន្មាន បើធៀបនឹងការដែលអ្នកត្រូវពិបាកដកដង្ហើមជាងមុន។ មហាសមុត្ររួមចំណែកផ្ដល់អុកស៊ីសែនពី 50-85% នៃបរិយាកាសរបស់ផែនដី ដែលនេះគឺសារតែសត្វប្រភេទប្លង់តុង (Zooplankton) សារាយ និងបាក់តេរី បង្កើតឡើងក្នុងពេលធ្វើរស្មីសំយោគ។ បើសិនជាមហាមុទ្រត្រូវកក ពួកវាអាចងាប់ទាំងអស់ លើកលែងតែអ្នកដាំដើមឈើរាប់ពាន់លានដើមក្នុងរយៈពេលតែមួយយប់។

សត្វច្រើនប្រភេទនៅលើគោក រួមទាំងមនុស្ស ក៏នឹងស្លាប់ដោយសារគ្មានអុកស៊ីសែន។ បើសិនអ្នកជាមនុស្សម្នាក់ដែលមានសំណាងនៅរស់ នោះចំណេរចុងក្រោយ កំហាប់អុកស៊ីសែនអាចត្រលប់មកជាធម្មតាវិញ។ ប៉ុន្តែ តើជីវិតនឹងត្រូវបន្តរស់តាមរបៀបណានៅលើផែនដីដែលកកមួយនេះ?

ការចែវទូក kayak ទៅមើលសត្វផ្សោតនៅមហាសមុទ្រ នាំមកនូវការសប្បាយរីករាយដល់យើងទាំងអស់គ្នា។ ប៉ុន្តែ នៅពេលមហាសមុទ្រត្រូវកក អ្នកនឹងលែងបានទទួលបទពិសោធន៍ទាំងនោះទៀតហើយ៕

September 15, 2021

ឈុតហោះហើរដែល «មិនប្រើកម្លាំងដៃ» ដំបូងបង្អស់ក្នុងពិភពលោក

អង់គ្លេស៖ ឈុតហោះហើរ Maverick Jetpack មានប្រព័ន្ធបើកបរស្វ័យប្រវត្ត ជួយឱ្យអ្នកប្រើប្រាស់មិនត្រូវឆ្លងកាត់វគ្គបណ្ដុះបណ្ដាលដ៏ស្មុគស្មាញ និងតម្លៃថ្លៃ។

Maverick Aviation ដែលជាក្រុមហ៊ុនបច្ចេកវិទ្យាថ្មី មានទីស្នាក់ការកណ្ដាលនៅ Southampton ប្រទេសអង់គ្លេស បានអភិវឌ្ឍឈុតហោះហើរថ្មីដែលមានឈ្មោះថា Maverick Jetpack ដែលអាចដំណើរការចាប់ពីឆ្នាំ 2022។ ក្រុមហ៊ុននេះអះអាងថា នេះគឺជាឈុតហោះហើរដំបូងគេក្នុងពិភពលោក ដែលមិនបាច់ប្រើដៃ។ នេះបើតាមសារព័ត៌មាន Mail ចេញផ្សាយកាលពីថ្ងៃទី 14 កញ្ញា។

ខុសពីឈុតហោះហើររបស់បណ្ដាក្រុមហ៊ុនដែលតម្រូវឱ្យអ្នកប្រើប្រាស់ឆ្លងកាត់ការបណ្ដុះបណ្ដាលត្រឹមត្រូវ ឈុត Maverick Jetpack មានប្រព័ន្ធបញ្ជាការហោះហើរដោយស្វ័យប្រវត្តិ។ ក្រុមអ្នកអភិវឌ្ឍជឿថា ក្នុងអនាគតដ៏ខ្លីខាងមុខ ឧបករណ៍នេះអាចត្រូវបានប្រើប្រាស់នៅក្នុងទីដែលពិបាកទៅដល់ ដូចជា ស្លាបចក្រនៅទីខ្ពស់ ឬការដ្ឋានសំណង់។ល។

Maverick Jetpack គឺជាផលិតផលប្រកបដោយបញ្ញារបស់ Matt Denton អ្នកជំនាញផ្នែកវិស្វកម្មមេកានិក នៅ ហូលីវូដ និង Antony Quinn មកពីកងទ័ពជើងទឹកអង់គ្លេស។

Quinn និយាយអំពីមូលហេតុដែលនាំឱ្យមាន Maverick Jetpack ៖ «ក្រុមវិស្វករ ត្រូវដើរឡើងតាមជណ្ដើរខាងក្នុងសំណង់នានារាប់ម៉ោងក្នុងមួយៗ ហើយក្នុងស្ថានភាពបន្ទាន់ ការដើរចុះលឿន ហាក់មិនអាចធ្វើទៅបាន។ ដ្រូន អាចមានប្រយោជន៍ដល់ការត្រួតពិនិត្យ ប៉ុន្តែ ក្នុងករណីជាច្រើន គេនៅតែត្រូវការវិស្វករម្នាក់នៅទីនោះ»។

ក្រោយដំណើរទស្សនកិច្ច អាហ្វហ្គានីស្ថាន និង អ៊ីរ៉ាក់ Quinn បានឃើញសក្ដានុពលនៃការប្រើប្រាស់ឈុតហោះហើរនេះ។ «មុននេះ គ្រប់គ្នានឹងប្រើប្រាស់ឧទ្ធម្ភាគចក្រតម្លៃ 30 លានផោន (ជាង 41,400,000 ដុល្លារ) ដើម្បីបំពេញការងារសាមញ្ញមួយចំនួន ដូច្នេះ យើងអាចបង្ហាញដំណោះស្រាយសមស្រប ដោយចំណាយប្រាក់តិចតួចប៉ុណ្ណោះ» Quinn បន្ថែមដូច្នេះ។

ក្នុងវីដេអូខាងលើគឺជាឈុតហោះហើររបស់ក្រុមហ៊ុន Gravity Industries

Maverick Jetpack ត្រូវបានផលិតឡើងពីវត្ថុធាតុស្រាលៗ រួមមាន អាលុយមីញ៉ូម, ទីតានីញ៉ូម និងសរសៃកាបូន ហើយអាចហោះហើរក្នុងល្បឿន 48 គីឡូម៉ែត្រ/ម៉ោង អាស្រ័យលើប្រភេទការងារ។ ឈុតនេះក៏បំពាក់ប្រព័ន្ធហោះឡើង និងចុះចតត្រង់ ដំណើរការដោយម៉ាស៊ីនយន្តហោះដែលមានទំហំប៉ុនគ្រាប់បាល់ក្នុងកីឡាបាល់ឱប។

Quinn ក៏បានឱ្យដឹងថា ការហោះហើរដោយប្រើឈុត Maverick Jetpack គឺពិតជាសាមញ្ញណាស់ ដូច្នេះ ថ្លៃបណ្ដុះបណ្ដាលក៏នឹងទាប ក្រុមអ្នកជំនាញអាចធ្វើការនៅក្នុងបរិស្ថានពិបាកទៅដល់ ប្រកបដោយសុវត្ថិភាព និងរហ័សទាន់ចិត្ត។ ការហោះហើរសាកល្បងដែលមានមនុស្សបើកបរដំបូងនឹងត្រូវបានធ្វើឡើងនៅក្នុងរដូវក្ដៅឆ្នាំក្រោយ៕

September 15, 2021

Category: សង្គម និងសេដ្ឋកិច្ច