សង្គម និងសេដ្ឋកិច្ច - La Reine Media

អាថ៌កំបាំងខ្លះៗ ជួយឱ្យ «ប្រាក់បង្កើតប្រាក់» របស់ត្រកូលមួយដែលរកបាន 2.6 លានដុល្លារ/ម៉ោង

ខ្ទង់វិនិយោគនានារបស់ត្រកូល Walton កំពុងតែត្រូវបានបង្ហើបបន្តិចម្ដងៗ ឱ្យដឹងថា នៅចុងខែមីថុនា ពួកគេកំពុងកាន់កាប់ភាគហ៊ុនដែលមានតម្លៃប្រាក់ជិត 5 ពាន់លានដុល្លារផ្សេងទៀត តាមរយៈក្រុមហ៊ុនគ្រប់គ្រងទ្រព្យសម្បត្តិមួយដែលមិនមានឈ្មោះល្បី។

យោងតាមឯកសាររបស់ WIT LLC (Walton Investment Team) ជាក្រុមហ៊ុនវិនិយោគនៃត្រកូល Walton ដែលត្រូវបានដាក់ទៅកាន់គណៈកម្មការមូលបត្ររបស់ សហរដ្ឋអាម៉េរិក (SEC) កាលពីចុងខែធ្នូ ខ្ទង់វិនិយោគរបស់ត្រកូលនេះ មានតម្លៃ 3.8 ពាន់លានដុល្លារ។ ក្នុងឆ្នាំ 2021 តួលេខនេះបានកើនឡើង ហើយភាគច្រើនត្រូវបានវិនិយោគទៅលើមូលនិធិ ETF នានា ដែលមានចំណាយទាប ដូចជា Vanguard FTSE Emerging Markets និងមូលនិធិ ETF ដែលតាមដានមូលបត្របំណុលរយៈពេលខ្លី។ ក្រៅពីនេះ ត្រកូល Walton ក៏បានបង្ហើបឱ្យដឹងអំពីខ្ទង់ភាគហ៊ុនដែលមាននៅក្នុងក្រុមហ៊ុន Apollo Global Management Inc., Snowflake Inc. និង China’s Pinduoduo Inc. ផងដែរ។

ត្រកូល Walton បច្ចុប្បន្នគឺជាគ្រួសារធំដែលមានទ្រព្យច្រើនជាងគេបង្អស់ក្នុងពិភពលោក ដោយកាន់កាប់ទ្រព្យតម្លៃ 238 ពាន់លានដុល្លារ នេះបើតាម Bloomberg Billionaires Index។ ទ្រព្យសម្បត្តិប្រមាណជិតពាក់កណ្ដាលរបស់ពួកគេ បានមកពីបណ្ដាញលក់រាយធំបំផុតរបស់ពិភពលោក នោះគឺ Walmart ដែលត្រូវបាន Sam Walton បង្កើតឡើងកាលពីឆ្នាំ 1950។ បច្ចុប្បន្ន ត្រកូលនេះកាន់កាប់ភាគហ៊ុន 48% នៅក្នុងក្រុមហ៊ុន Walmart។

Walmart គឺជាបណ្ដាញផ្សារលក់រាយរបស់ត្រកូល Walton

ច្រើនឆ្នាំមកនេះ ត្រកូល Walton តែងតែនៅស្ងៀម ទាក់ទងនឹងខ្ទង់វិនិយោគរបស់ពួកគេ។ ប៉ុន្តែ ការស្ងាត់ស្ងៀមនេះមិនអាចអូសបន្លាយយូរទៀត ដោយសារតែពួកគេរកបានរាប់ពាន់លានដុល្លារពីការលក់ភាគហ៊ុននៅក្នុង Walmart។ ត្រកូលនេះបានលក់ភាគហ៊ុនដែលមានតម្លៃប្រហែល 6.5 ពាន់លានដុល្លារ ចាប់ពីឆ្នាំ 2020។ អ្នកជំនាន់ក្រោយរបស់ Sam Walton នៅតែកាន់កាប់ដោយផ្ទាល់នូវមូលបត្រចំនួន 1,334,480,250 ហ៊ុន នៅក្នុងបណ្ដាញ Walmart ដោយតម្លៃរបស់វា បានកើន 23 ពាន់លានដុល្លារក្នុងឆ្នាំ 2020 ព្រោះតែតម្លៃមូលបត្រកើនឡើងខ្ពស់។

មកដល់ពេលនេះ ព័ត៌មានស្ដីពីការវិនិយោគរបស់ WIT ទើបតែទទួលបានការយកចិត្តទុកដាក់ជាងមុន។ Walton Enterprises ដែលជាការិយាល័យតំណាងក្រុមហ៊ុនរបស់ត្រកូល Walton មិនបានបង្ហើបឱ្យដឹងអំពីតម្លៃសរុបនៃទ្រព្យដែលពួកគេកំពុងកាន់កាប់នោះទេ បើទោះឯកសារពន្ធរបស់បណ្ដាក្រុមហ៊ុនផ្សេងៗដែលទទួលបានទុនពី Walton Enterprises បង្ហាញថា ត្រកូល Walton កំពុងកាន់កាប់ភាគហ៊ុននៅក្នុងមូលនិធិបម្រុងនានាដែលគ្រប់គ្រងដោយ Tiger Global Management និង Viking Global Investors៕

September 29, 2021

ក្រុមហ៊ុនធុរកិច្ចថ្មីរបស់ អាម៉េរិក ក្ដាប់បានរូបមន្តផលិត «សាច់» ពី «ខ្យល់»

(សហរដ្ឋអាម៉េរិក)-Air Protein ដែលជាក្រុមហ៊ុនធុរកិច្ចថ្មី ប្រើប្រាស់ ប្រូតេអ៊ីន ដែលបង្កើតឡើងពីខ្យល់បរិយាកាសតាមរយៈការបំប្លែង CO2 ទៅជាវត្ថុធាតុដែលមានសារជាតិបំប៉នដូចទៅនឹង ប្រូតេអ៊ីន របស់សាច់សត្វ។

បច្ចេកវិទ្យារបស់ Air Protein ត្រូវបានអភិវឌ្ឍឡើងទៅតាមគំនិតដែល NASA ធ្លាប់បានស្រាវជ្រាវកាលពីទសវត្សរ៍ឆ្នាំ 1960។ កាលណោះ ក្រុមអ្នកវិទ្យាសាស្ត្រស្វែងរកវិធីផ្គត់ផ្គង់អាហារដល់ក្រុមអវកាសចរដែលធ្វើការនៅទីអវកាស ហើយបានរកឃើញថា អាចប្រើប្រាស់បណ្ដុំមីក្រូជីវសាស្ត្រដើម្បីបំប្លែង កាបូនឌីអុកស៊ីត (CO2) ពីខ្យល់ដង្ហើមរបស់អ្នកអវកាស ឱ្យទៅជាអាហារ។ ដោយប្រើប្រាស់យន្តការដូចគ្នានេះ នៅលើផែនដី បច្ចេកវិទ្យាដែលអភិវឌ្ឍដោយ Air Protein អាចជួយកាត់បន្ថយផលប៉ះពាល់ដែលកើតឡើងពីវិស័យឧស្សាហកម្មម្ហូបអាហារ ដល់បរិស្ថាន។

បច្ចេកវិទ្យារបស់ក្រុមហ៊ុននេះ ប្រហាក់ប្រហែលនឹងដំណើរការនៃការផលិតទឹកដោះគោជូ។ នៅខាងក្នុងអាងដំបែ បាក់តេរីធម្មជាតិស្រូបយក CO2 និងបញ្ចេញសារជាតិបំប៉ន អាចយកមកបង្កើតជាវត្ថុធាតុដែលផ្ទុក ប្រូតេអ៊ីន 80%។ មិនដូច ប្រូតេអ៊ីន របស់សណ្ដែកសៀង ឬ ប្រូតេអ៊ីន របស់រុក្ខជាតិដទៃ នេះគឺជា ប្រូតេអ៊ីន ពេញលេញ ដោយមាន អាស៊ីតអាមីណូ (amino acids) ដូចទៅនឹង ប្រូតេអ៊ីន ក្នុងសាច់គោ ឬសាច់មាន់ ប៉ុន្តែ វាមិនមាន អង់ទីប៊ីយូទិក និង អ័រម៉ូន។ CO2 ដែលប្រើប្រាស់នៅក្នុងដំណើរការនៃការផលិត អាចត្រូវបានយកមកពីបច្ចេកវិទ្យាប្រមូល CO2 ផ្ទាល់ពីខ្យល់បរិយាកាស។

បច្ចុប្បន្ន ផ្ទៃដី ¼ របស់ពិភពលោក កំពុងត្រូវបានប្រើប្រាស់ដើម្បីចិញ្ចឹមសត្វ, 1/3 ជាដីដាំដុះសម្រាប់ចិញ្ចឹមសត្វ។ ដោយសារតម្រូវការសាច់កាន់តែច្រើន មនុស្សត្រូវកាប់ព្រៃឈើយកដីមកដាំដុះ។ ឆ្នាំ 2050 មនុស្សនឹងបរិភោគសាច់សត្វច្រើនជាង 68% ធៀបនឹងឆ្នាំ 2010។ ប៉ុន្តែ បើសិនជាគេអាចផលិតសាច់ពីរោងចក្រដែលប្រើប្រាស់វិធីដូចក្រុមហ៊ុន Air Protein នេះ នោះមនុស្សអាចសំច័យប្រភពធនធាតធម្មជាតិបានយ៉ាងច្រើន។

Air Protein គឺជាក្រុមហ៊ុនបុត្រសម្ព័ន្ធរបស់ Kiverdi ជាក្រុមហ៊ុនមួយដែលប្រើប្រាស់វិធីសាស្ត្រដូចគ្នានេះ ដើម្បីបំប្លែង CO2 ទៅជាផលិតផលជំនួសឱ្យជ័រកៅស៊ូ និងវត្ថុធាតុដូចជាប្រេងដូង។ ក្រុមអ្នកស្រាវជ្រាវរបស់ Air Protein បានចំណាយពេលអស់ជាច្រើនឆ្នាំដើម្បីអភិវឌ្ឍ ប្រូតេអ៊ីន និងរូបមន្តសម្រាប់គំរូអាហាររបស់ពួកគេ។ ម្សៅ ប្រូតេអ៊ីន របស់ Air Protein មានរសជាតិស្រាលល្មម អាចប្រើប្រាស់ជាមួយនឹងអាហារច្រើនមុខក្រៅពីសាច់ ដូចជាការបន្ថែមវាទៅក្នុងគ្រាប់ ឬម្សៅធញ្ញជាតិ ឬមួយបន្ទះ ប្រូតេអ៊ីន ជាដើម។

បច្ចុប្បន្ន ក្រុមហ៊ុន Air Protein កំពុងស្វែងរកប្រភេទអាហារសមស្របដើម្បីអាចដាក់លក់ក្នុងទីផ្សារ។ នេះបើតាមនាយិកាប្រតិបត្តិ Lisa Dyson នៃក្រុមហ៊ុនមេរបស់ Air Protein៕

September 29, 2021

ក្រុមហ៊ុន Samsung ថតចម្លងខួរក្បាលមនុស្ស ដាក់ទៅក្នុងអង្គចងចាំ Neuromorphic Chips

(កូរ៉េខាងត្បូង)-ក្រុមហ៊ុន Samsung កំពុងអភិវឌ្ឍវិធីសាស្ត្រ «ថតចម្លង» ប្រព័ន្ធខួរក្បាលរបស់មនុស្សទៅក្នុងឈីបរបស់កុំព្យូទ័រ ដោយមានជំនួយពីក្រុមអ្នកវិទ្យាសាស្ត្រនៅសាកលវិទ្យាល័យ Harvard។

Samsung Electronics បង្ហាញវិធីសាស្ត្រថ្មីដើម្បីរក្សាទិន្នន័យរបស់ខួរក្បាលមនុស្សនៅក្នុងអង្គចងចាំខាងក្រៅ ដែលព័ត៌មាននេះត្រូវបានចុះផ្សាយនៅលើទស្សនាវដ្ដី Nature Electronics។ អត្ថបទសារព័ត៌មានដែលមានចំណងជើងថា «សរសៃប្រសាទអេឡិចត្រូនិកដែលយោងទៅតាមការថតចម្លងពីខួរក្បាល» (Neuromorphic electronics based on copying and pasting the brain) គឺជាលទ្ធផលនៃការសិក្សាស្រាវជ្រាវរបស់សាស្ត្រាចារ្យ Ham Don-hee នៅសាកលវិទ្យាល័យ Harvard, វិទ្យាស្ថានបច្ចេកវិទ្យាទំនើបរបស់ Samsung, សាស្ត្រាចារ្យ Park Hong-kun នៅសាកលវិទ្យាល័យ Harvard, Hwang Sung-woo នាយកប្រតិបត្តិរបស់ Samsung SDS និង Kim Ki-nam អនុប្រធានរបស់ក្រុមហ៊ុន Samsung Electronics។

អត្ថបទបានរៀបរាប់អំពីវិធីសាស្ត្រក្នុងការថតចម្លងផែនទីតភ្ជាប់ neuron ក្នុងខួរក្បាល ដោយប្រើបន្ទះឈីបអេឡិចត្រូនិកមហាសែនតូច ដែលអភិវឌ្ឍដោយសាស្ត្រាចារ្យ Ham និង សាស្ត្រាចារ្យ Park ហើយចម្លងផែនទីនេះទៅក្នុងប្រព័ន្ធអង្គចងចាំបីវិមាឌដែលមានដង់ស៊ីតេខ្ពស់។ តាមរយៈវិធីសាស្ត្រ «ថត និងចម្លង» នេះ ក្រុមស្រាវជ្រាវមានបំណងបង្កើតឈីបចងចាំមួយដែលត្រាបតាមចំណុចពិសេសៗរបស់ខួរក្បាលមនុស្ស ដូចជា ការប្រើប្រាស់ថាមពលតិច, រៀនសូត្របានងាយស្រួល, ស៊ាំនឹងបរិស្ថាន, សមត្ថភាពគ្រប់គ្រងខ្លួនឯង និងការយល់ដឹងជាដើម ដែលបច្ចុប្បន្ន ទាំងនេះនៅតែជារឿងដែលបច្ចេកវិទ្យាមិនទាន់ធ្វើបាន។ ប្រព័ន្ធខួរក្បាល រួមមាន neuron ក្នុងបរិមាណច្រើន និងប្រព័ន្ធសរសៃប្រសាទ ទទួលបន្ទុកក្នុងការប្រើប្រាស់មុខងារនានា។ យល់ច្បាស់អំពីប្រព័ន្ធនេះគឺជាកត្តាគន្លឹះដែលជួយក្នុងការរចនាខួរក្បាលនិម្មិត។

គោលដៅដំបូងនៃការស្រាវជ្រាវថ្មីរបស់ Samsung និងសាកលវិទ្យាល័យ Harvard គឺការធ្វើត្រាបតាមប្រព័ន្ធខួរក្បាល។ បណ្ដាញអេឡិចត្រូតអារ៉េ កម្រិត ណាណូ អាចត្រូវបានបញ្ជ្រាបចូលទៅក្នុង neuron ដើម្បីថតយករលកសញ្ញាអេឡិចត្រូនិករបស់ពួកគេ ប្រកបដោយសុក្រឹតភាពខ្ពស់។ ប្រព័ន្ធថតចម្លងនេះ ផ្ដល់ទិន្នន័យអំពីប្រព័ន្ធសរសៃប្រសាទ ទីតាំងរបស់ neuron ដែលតភ្ជាប់នឹងគ្នា រួមនឹងភាពខ្លាំងនៃការតភ្ជាប់។ ដោយការថតចម្លង ក្រុមស្រាវជ្រាវអាចបង្កើតផែនទីស្ដីពីការតភ្ជាប់របស់សរសៃប្រសាទ។

ផែនទីខាងលើ ក្រោយមក អាចត្រូវបាន «ចម្លង» ទៅកាន់ប្រព័ន្ធឈីបចងចាំ ដូចជា flash ពាណិជ្ជកម្ម (SSD) ឬអង្គចងចាំ RRAM។

ការស្រាវជ្រាវនេះនឹងអាចរកឃើញវិធីចម្លងផែនទី neuron របស់សរសៃប្រសាទ ទៅក្នុងប្រព័ន្ធអង្គចងចាំ។ នៅពេលត្រូវបានបញ្ជាផ្ទាល់ដោយរលកសញ្ញាដែលត្រូវបានកត់ត្រាពីកោសិកាខាងក្នុង ប្រព័ន្ធអង្គចងចាំអេឡិចត្រូនិក អាចសិក្សា និងបង្ហាញផែនទីតភ្ជាប់របស់ neuron។

ដោយសារតែខួរក្បាលមនុស្ស មានសរសៃប្រសាទ neuron ប្រហែល 100 ពាន់លាន និងចំនួនចំនុចតភ្ជាប់របស់សរសៃប្រសាទច្រើនជាងប្រហែល 1,000 ដង ដូច្នេះ ឈីបសរសៃប្រសាទនឹងត្រូវការ neuron និម្មិត និងតំណភ្ជាប់នៃសរសៃប្រសាទនិម្មិតរហូតដល់ 100 ទ្រីលាន (1 លានលាន) ឯណោះ។ ការបំពាក់អង្គចងចាំដ៏ធំនៅលើឈីបមួយគឺអាចទៅរួច ដោយសារថា នេះគឺជាបច្ចេកវិទ្យាមួយដែល Samsung កំពុងតែនាំមុខគេ៕

September 29, 2021

ក្រសួងសេដ្ឋកិច្ចនិងហិរញ្ញវត្ថុ ជ្រើសរើសមន្ត្រីរាជការរាប់សិបនាក់ បម្រើការនៅអគ្គនាយកដ្ឋានគយនិងរដ្ឋាករកម្ពុជា

បេក្ខជនជាមន្ត្រីរាជការដែលប្រឡងជាប់នៅក្នុងការជ្រើសរើសរបស់ក្រសួងសេដ្ឋកិច្ចនិងហិរញ្ញវត្ថុ នាពេលខាងមុខ នឹងបានចូលបម្រើការនៅអគ្គនាយកដ្ឋានគយនិងរដ្ឋាករកម្ពុជា នៃ ក្រសួងសេដ្ឋកិច្ចនិងហិរញ្ញវត្ថុ។

សេចក្ដីជូនដំណឹងរបស់ ក្រសួងសេដ្ឋកិច្ចនិងហិរញ្ញវត្ថុ នាថ្ងៃនេះ បានឱ្យដឹងថា ក្រសួងជ្រើសរើសបុគ្គលិកចំនួន 50 នាក់ ក្នុងនោះមានជំនាញជាច្រើនមុខ រួមមាន (1)-បច្ចេកវិទ្យាព័ត៌មាន (2)-ច្បាប់ (3)-ធនធានមនុស្ស (4)-ពាណិជ្ជកម្មអន្តរជាតិ (5)-វិភាគសេដ្ឋកិច្ច (6)-សុវត្ថិភាពម្ហូបអាហារ, គុណភាពទំនិញ, ភូតគាមអនាម័យ (7)-ជំនាញមន្ទីរពិសោធន៍ និង (8)-គណនេយ្យករជំនាញ។

ព័ត៌មានលម្អិត សូមអានសេចក្ដីជូនដំណឹង ដូចមាននៅខាងក្រោម៖

September 28, 2021

ប្រាក់ឈ្នួលរបស់កម្មករវិស័យកាត់ដេរសម្លៀកបំពាក់ និងផលិតផលស្បែកជើង នៅ កម្ពុជា សម្រាប់ឆ្នាំ 2022

បន្ទាប់ពីបានពិភាក្សាគ្នា 4 លើក របស់ក្រុមតំណាងត្រីភាគី ពុំមានលទ្ធផល ពោលគឺនៅរក្សាត្រឹម 192 ដុល្លារ/ខែដដែល សម្តេចនាយករដ្ឋមន្ត្រី ហ៊ុន សែន បានសម្រេចចុងក្រោយបង្អស់ ដោយបន្ថែម 2 ដុល្លារទៀត ទៅលើប្រាក់ឈ្នួលបច្ចុប្បន្ន។

ក្រសួងការងារ និងបណ្ដុះបណ្ដាលវិជ្ជាជីវៈ នាព្រឹកថ្ងៃទី 28 ខែកញ្ញា ឆ្នាំ 2021 នេះ បានឱ្យដឹងថា ក្រុមប្រឹក្សាជាតិប្រាក់ឈ្នួលអប្បបរមា ដែលមានតំណាងរបស់កម្មករនិយោជិត តំណាងនិយោជក និងតំណាងរាជរដ្ឋាភិបាល បានបើកកិច្ចប្រជុំជាច្រើនលើក ដើម្បីកំណត់ប្រាក់ឈ្នួលសម្រាប់ឆ្នាំក្រោយ ប៉ុន្តែ មិនបានឯកភាពគ្នានោះទេ ដោយនៅរក្សាតួលេខចុងក្រោយរៀងៗខ្លួន។

ក្រសួងការងារ បានបន្ថែមថា ប្រមុខរដ្ឋាភិបាល សម្តេច ហ៊ុន សែន បានសម្រេចចុងក្រោយបង្អស់ ដោយបានបន្ថែម 2 ដុល្លារទៀត ទៅលើប្រាក់ឈ្នួលបច្ចុប្បន្ន ដូច្នេះ កម្មករនិយោជិតក្នុងវិស័យកាត់ដេរសម្លៀកបំពាក់ និងវិស័យផលិតផលស្បែកជើង នឹងទទួលបាន 194 ដុល្លារ/ខែសម្រាប់កម្មករពេញសិទ្ធិ និង 192 ដុល្លារ/ខែសម្រាប់កម្មករសាកល្បង រាប់ចាប់ពីខែមករា ឆ្នាំ 2022។

ចំណែកប្រាក់អត្ថប្រយោជន៍ផ្សេងៗទៀត ត្រូវបានរក្សាទុកនៅដដែល។ ក្រសួងបញ្ជាក់ថា ជាមធ្យម កម្មករនិយោជិតម្នាក់ៗ នឹងទទួលបានប្រាក់ខែយ៉ាងតិចពី 211 ដុល្លារ ដល់ 222 ដុល្លារ/ខែ នៅឆ្នាំក្រោយ៕

September 28, 2021

ក្រុមហ៊ុនវីង (Wing) ត្រូវផ្អាកដំណើរការបណ្ដោះអាសន្ន ព្រោះតែសត្វក្អែក (វីដេអូ)

(អូស្ត្រាលី)-ក្រុមហ៊ុនដឹកជញ្ជូនទំនិញដោយយន្តហោះដ្រូនមួយ ត្រូវផ្អាកដំណើរការរបស់ខ្លួននៅតំបន់ជាយក្រុងកង់បេរ៉ា (Canberra) ដោយសារតែការគំរាមកំហែងនៅលើអាកាស ពីសត្វក្អែកដែលចង់ការពារដែនដីរបស់ពួកវា។

បញ្ហាសត្វស្លាបហោះច្រាសពីអាកាស សំដៅអ្នកដំណើរនៅលើដីគឺជារឿងដែលកើតឡើងញឹកញាប់នៅប្រទេសអូស្ត្រាលី។ នៅក្នុងរដូវបន្តពូជ សត្វស្លាបជាច្រើនប្រភេទដូចជា សារិកាអាស៊ី-អឺរ៉ុប (Eurasian magpie) ជាដើម អាចវាយប្រហារអ្នកទាំងឡាយណាដែលចូលទៅក្បែរសម្បុករបស់ពួកវា។ សត្វក្អែកក៏មានទម្លាប់ការពារសម្បុក និងដែនដីរបស់ពួកវាដែរ។ ពេលខ្លះ សត្វក្អែក ថែមទាំងវាយប្រហារទៅលើយន្តហោះដ្រូនដឹកជញ្ជូនទំនិញទៀតផង។

នៅក្នុងវីដេអូ ដែលថតបានដោយ បែន រ៉ូបឺត (Ben Robert) ជាពលរដ្ឋរស់នៅក្នុងតំបន់ ហារីសុន (Harrison) ជាយក្រុងកង់បេរ៉ា បង្ហាញឱ្យឃើញថា សត្វក្អែកហោះទៅរកយន្តហោះដ្រូនដែលកំពុងត្រៀមចុះចតដើម្បីប្រគល់កាហ្វេឱ្យអតិថិជន។ ដ្រូនបន្ទាបខ្លួនបន្តិចម្ដងៗ និងត្រៀមទម្លាក់ថង់កាហ្វេ ប៉ុន្តែ ភ្លាមនោះ ក្អែកបានហោះមកចាប់ដ្រូន និងច្រាសប្រហារនៅកណ្ដាលអាកាស។

ការច្រាសប្រហារនេះកើតឡើងជាច្រើនវិនាទី។ ស្លាបកង្ហាររបស់ដ្រូនបន្លឺសំឡេងខ្លាំងជាងមុន នៅពេលវាព្យាយាមរក្សាលំនឹង។ បន្ទាប់មក សត្វក្អែកនេះក៏បានហោះចេញទៅ ហើយដ្រូនក៏អាចបន្ទាបថង់ទំនិញដោយខ្សែពួរ ដើម្បីប្រគល់ជូនអតិថិជន។

នេះមិនមែនជាករណីទីមួយនោះទេ ដែលថង់កាហ្វេរបស់ រ៉ូបឺត បានក្លាយជាគោលដៅវាយប្រហារពីសត្វស្លាប។ កន្លងមក ហ្វូងសត្វស្លាបក៏ធ្លាប់ព្យាយាមចូលទៅចាប់យន្តហោះដ្រូនដែលដឹកជញ្ជូនទំនិញឱ្យបុរសនេះ ហើយពួកវាទំនងជាចេះគេចពីស្លាបកង្ហារទៀតផង។

រដ្ឋធានីកង់បេរ៉ា កំពុងស្ថិតក្នុងអំឡុងពេលនៃការអនុវត្តបម្រាមគោចរដោយសារ COVID-19 នាំឱ្យតួលេខអ្នកបញ្ជាទិញទំនិញដែលដឹកជញ្ជូនដោយយន្តហោះដ្រូន មានការកើនឡើងខ្ពស់។ វីង (Wing) ដែលជាក្រុមហ៊ុនគ្រប់គ្រងយន្តហោះដ្រូន សម្រេចចិត្តផ្អាកដំណើរការនៅតំបន់ ហារីសុន នៅពេលរង់ចាំក្រុមអ្នកគ្រប់គ្រងសត្វស្លាប ពិនិត្យសកម្មភាពរបស់ហ្វូងសត្វដែលដូចទៅនឹងករណីរបស់ រ៉ូបឺត។ ក្រុមហ៊ុន វីង បានបង្ហាញអត្តសញ្ញាណរបស់សត្វក្អែកមួយចំនួនដែលធ្វើសកម្មភាពការពារដែនដីរបស់ពួកវា ហើយក្រុមហ៊ុននេះមានបំណងធ្វើឱ្យប៉ះពាល់តិចតួចបំផុតទៅលើការរស់នៅរបស់ពួកវា។

នីល ហឺមេស (Neil Hermes) ជាប្រធានអង្គការគ្រប់គ្រងសត្វស្លាប Canberra Ornithologists Group បានឱ្យដឹងថា សត្វក្អែកតែងតែវាយប្រហារវត្ថុ ឬមនុស្សដែលទៅជិតសម្បុករបស់វា។ ដូច្នេះ លោកយល់ថា ការសម្រេចចិត្តរបស់ក្រុមហ៊ុន វីង គឺជារឿងត្រឹមត្រូវ ខណៈរង់ចាំសមត្ថកិច្ចពិចារណា និងដោះស្រាយ៕

September 23, 2021

វីធីសាស្ត្រដែលនាំឱ្យ ជេស្ស៊ីកា អាលបា (Jessica Alba) ជោគជ័យក្នុងការកសាងក្រុមហ៊ុនរហូតដល់មានតម្លៃជិត 1,000 លានដុល្លារ

នៅក្នុងដំណើរកសាងក្រុមហ៊ុនផ្ទាល់ខ្លួន ជេស្ស៊ីកា អាលបា (Jessica Alba) បានជួបប្រទះឧបសគ្គជាច្រើន និងត្រូវប្រឈមនឹងការមន្ទិលសង្ស័យ និងការរិះគន់ផងដែរ។

មកដល់បច្ចុប្បន្ន តម្លៃមូលធនទីផ្សាររបស់ក្រុមហ៊ុន Honest ដែល ជេស្ស៊ីកា ជាអ្នកបង្កើតឡើង បានកើនដល់ជិត 1,000 លានដុល្លារទៅហើយ។ ប៉ុន្តែ នៅក្នុងអំឡុងពេលចាប់ផ្ដើមរកស៊ីទាក់ទងនឹងមុខទំនិញប្រើប្រាស់ប្រចាំថ្ងៃកាលពីឆ្នាំ 2012 តារាសម្ដែងនៃខ្សែភាពយន្តរឿង «Dark Angel» ត្រូវប្រឈមនឹងការសង្ស័យជាច្រើន សូម្បីតែខ្លួននាងផ្ទាល់ ទាក់ទិននឹងលទ្ធភាពជោគជ័យរបស់គម្រោង។

នៅប៉ុន្មានឆ្នាំដំបូងនៃការកសាងក្រុមហ៊ុន ជេស្ស៊ីកា ត្រូវធ្វើការដើម្បីទប់ទល់នឹងមតិប្រឆាំង ដោយបង្កើតយុទ្ធសាស្ត្រ «ដោះស្រាយ» ដើម្បីឆ្លើយតបនឹងការរិះគន់ និងប្រើប្រាស់ភាពឆ្លាតវៃរបស់នាងនៅក្នុងកិច្ចការជំនួញ។ បច្ចុប្បន្ន ជេស្ស៊ីកា គឺជាសហស្ថាបនិករបស់ក្រុមហ៊ុន Honest ហើយក៏ជាប្រធានផ្នែកច្នៃប្រឌិត និងជាសមាជិកនៃក្រុមប្រឹក្សាភិបាលរបស់ក្រុមហ៊ុននេះផងដែរ។

ថ្មីៗនេះ ជេស្ស៊ីកា បានចែករំលែកឱ្យដឹងថា៖ «ខ្ញុំស្រលាញ់តួលេខ និងទិន្នន័យ។ ដូច្នេះ នៅពេលមានអ្នកណាម្នាក់បង្ហាញឱ្យឃើញថា មានការសង្ស័យ និងលើកឡើងនូវមូលហេតុទាំងឡាយដែលថាគ្រប់យ៉ាងមិនគួរកើតមាន ខ្ញុំបកស្រាយបញ្ច្រាសមកវិញថា “អូ មែនក៏អី? ហេតុអ្វីប្រការទាំងនេះមិនអាចកើតមាន?” ហើយក្រោយមក ខ្ញុំនឹងទៅប្រមូលរាល់ទិន្នន័យចាំបាច់ និងឱ្យពួកគេមើល»។

ជេស្ស៊ីកា បន្ថែមថា ការត្រៀមខ្លួនដោយមានយុទ្ធសាស្ត្រនឹងដំណើរការយ៉ាងមានប្រសិទ្ធភាព នៅពេលអ្នកអាចគ្រប់គ្រងឥរិយាបថរបស់ខ្លួនបាន ខណៈលើកឡើងនូវសំនួរនោះ (ពោលគឺមិនខឹងនឹងមតិខាងក្រៅ)។

អនុសាសន៍របស់ ជេស្ស៊ីកា ស្ដីពីការត្រៀមខ្លួនទាក់ទងនឹងតួលេខ ឬទិន្នន័យគឺពិតជាសាមញ្ញ ប៉ុន្តែ ប្រាកដណាស់ វាមិនងាយស្រួលឡើយ ហើយនេះគឺជាការពិតដែលស្ត្រីកូន 3 វ័យ 40 ឆ្នាំនេះបានទទួលស្គាល់ នៅពេលនាងរំលឹកអំពីយប់ទាំងឡាយដែលគេងមិនលក់ និងអារម្មណ៍នៅក្នុងថ្ងៃចុងសប្ដាហ៍នៅក្នុងដំណាក់កាលដំបូងនៃការបើកអាជីវកម្មរបស់ខ្លួន។ ពិតជាពិបាកឱ្យយើងញញឹម នៅពេលអស់កម្លាំងខ្លាំង ប៉ុន្តែ ជេស្ស៊ីកា ឱ្យដឹងថា ប្រការចាំបាច់ដែលធ្វើឱ្យក្រុមហ៊ុនរីកចម្រើន នោះគឺត្រូវដោះស្រាយកិច្ចការឱ្យបានល្អបំផុត៖ «រាល់សេចក្ដីលម្អិត សុទ្ធតែសំខាន់»។

ជាច្រើនឆ្នាំក្រោយពីបានបង្ហាញខ្លួន វិថីត្រូវដើរនៅតែមានឧបសគ្គ៖ ក្រុមហ៊ុនរបស់នាង ត្រូវប្រឈមនឹងពាក្យបណ្ដឹងជាក្រុមស្ដីពីការឃោសនាផលិតផលខុសពីការពិត បញ្ហាច្របូកច្របល់ក្នុងការដឹកនាំ និងការចេញលក់ដំបូងទទួលបរាជ័យ។ ចំពោះ ជេស្ស៊ីកា គន្លឹះសម្រាប់ដោះស្រាយ នោះគឺត្រូវបិទត្រចៀកខ្លះចំពោះគំនិតពីខាងក្រៅ។

ឆ្នាំ 2016 ក្នុងកិច្ចសម្ភាសជាមួយ Vanity Fair ជេស្ស៊ីកា និយាយថា៖ «ខ្ញុំគិតថា អាថ៌កំបាំងដើម្បីជោគជ័យគឺស្ថិតនៅលើប្រការជុំវិញខ្លួនអ្នក រួមនឹងមនុស្សដែលឆ្លាតវៃខ្លាំង ហើយតែងតែផ្ដោតទៅលើបេសកកម្ម និងធានាឱ្យបានប្រាកដថា អ្នកពិតជាមានការចូលរួមយ៉ាងសកម្ម»។

ចុងក្រោយ ក្រុមហ៊ុន Honest របស់ ជេស្ស៊ីកា បានធ្វើ IPO (ការបោះផ្សាយមូលបត្រជាសាធារណៈលើកដំបូង) ដោយជោគជ័យ កាលពីខែឧសភា ឆ្នាំ 2021 ជាមួយនឹងតម្លៃ 16 ដុល្លារ/ហ៊ុន ហើយប្រមូលទុនបានប្រហែល 122 លានដុល្លារ នេះបើតាម Bloomberg។ ក្រុមហ៊ុននេះកំពុងជួញដូរក្នុងតម្លៃ 10.71 ដុល្លារ/ហ៊ុន គិតត្រឹមថ្ងៃទី 14 កញ្ញា។

ស្វាមីរបស់ ជេស្ស៊ីកា ដែលជាផលិតករភាពយន្តហូលីវូដ លោក ខាស វ័ររ៉ែន (Cash Warren) បានបញ្ជាក់ថា ជោគជ័យរបស់ ជេស្ស៊ីកា គឺបានមកពី «ឧបសគ្គគ្រប់យ៉ាង» ដែលនាងបានឆ្លងកាត់។ សាររបស់លោក ខាស វ័ររ៉ែន គឺថា «នាងស័ក្ដិសមជាងអ្នកណាទាំងអស់សម្រាប់ការស្ថិតនៅក្នុងតំណែងនោះ»៕

September 22, 2021

ព្រះអង្គម្ចាស់ នរោត្តម រ៉ាវីចក្រ ថា «ធ្វើឱ្យក្លឹបបាល់ទាត់ Saint-Etienne ត្រលប់ទៅកាន់សម័យអស្ចារ្យរបស់វា» គឺជាមហិច្ឆតារបស់ទ្រង់

សារព័ត៌មាន បារាំង បានរាយការណ៍ថា «រាជទាយាទរបស់ កម្ពុជា» មានបំណងទិញក្លឹបបាល់ទាត់ Saint Etienne ក្នុងតម្លៃ 117 លានដុល្លារអាម៉េរិក ប៉ុន្តែ ក្រសួងព្រះបរមរាជរាំង អះអាងថា កម្ពុជា មិនមានរាជទាយាទនោះទេ។

កាសែតជាច្រើនរបស់ បារាំង កាលពីថ្ងៃទី 18 កញ្ញា ដកស្រង់ប្រភពព័ត៌មានពីទីភ្នាក់ងារសារព័ត៌មាន Le Parisien ដែលបានចុះផ្សាយដំណឹងដែលទាក់ទងនឹង «រាជទាយាទ កម្ពុជា» ព្រះអង្គម្ចាស់ នរោត្តម រ៉ាវីចក្រ មានបំណងទិញក្លឹបបាល់ទាត់ Saint Etienne ក្នុងតម្លៃ 100 លានអឺរ៉ូ (ជាង 117 លានដុល្លារអាម៉េរិក)។ ប៉ុន្តែ គណៈគ្រប់គ្រងរបស់ក្លឹប មិនទាន់ឆ្លើយតបនឹងសំណើនេះនៅឡើយ។

ការចរចាអាចត្រូវបានចាប់ផ្ដើមឆាប់ៗខាងមុខ ដោយសារក្លឹបបាល់ទាត់ Saint Etienne កំពុងប្រឈមនឹងបញ្ហាហិរញ្ញវត្ថុ។ នេះបើតាមសារព័ត៌មាន បារាំង។

គ្រូបង្វឹក Claude Puel របស់ក្លឹប Saint-Etienne

«រាជទាយាទ (ព្រះអង្គម្ចាស់ នរោត្តម រ៉ាវីចក្រ) គឺជាមនុស្សដែលចូលចិត្តបាល់ទាត់ និងត្រូវបានគេជឿថា កំពុងមានបំណងបន្តទំនាក់ទំនងយូរអង្វែងរវាង បារាំង និង កម្ពុជា ដោយការគ្រប់គ្រងក្លឹបមួយក្នុងចំណោមក្លឹបបាល់ទាត់ប្រវត្តិសាស្ត្រនៃវិស័យបាល់ទាត់ នៅប្រទេសបារាំង» សារព័ត៌មាន French Football News ចុះផ្សាយដូច្នេះ។

ក្រសួងព្រះបរមរាជរាំងនៃប្រទេសកម្ពុជា កាលពីថ្ងៃទី 20 កញ្ញា បានឱ្យដឹងថា កម្ពុជា ពុំមានតំណែង «រាជទាយាទ» នោះទេ ដូច្នេះ មិនមានរឿងដែលថា «រាជទាយាទ កម្ពុជា» ចង់ទិញក្លឹបបាល់ទាត់បារាំង នោះដែរ។

សូមបញ្ជាក់ថា ព្រះអង្គម្ចាស់ នរោត្តម រ៉ាវីចក្រ ប្រសូត្រនៅឆ្នាំ 1974 មានព្រះបិតាព្រះនាមសម្តេចព្រះមហិស្សរា នរោត្តម ចក្រពង្ស សមាជិកក្រុមប្រឹក្សាធម្មនុញ្ញ និងមានព្រះមាតានាម ហ៊ុន សឿន ដែលជាអតីតអ្នករបាំព្រះរាជ្យទ្រព្យ។ ព្រះអង្គម្ចាស់ នរោត្តម រ៉ាវីចក្រ ត្រូវជាព្រះភាគិនេយ្យ(ក្មួយប្រុស) របស់ ព្រះករុណាព្រះបាទ នរោត្តម សីហមុនី និងត្រូវជាព្រះនត្តា(ចៅប្រុស) របស់ ព្រះករុណាព្រះបរមរតនកោដ្ឋ អតីតព្រះមហាក្សត្ររបស់ កម្ពុជា៕

September 22, 2021

អ្នកវិទ្យាសាស្ត្រផលិតកាហ្វេ ដោយមិនបាច់ដាំដើមកាហ្វេ

(ហ្វាំងឡង់)-អ្នកវិទ្យាសាស្ត្រមួយក្រុម យកកោសិការបស់ដើមកាហ្វេរស់ និងអភិវឌ្ឍវានៅក្នុងបន្ទប់ពិសោធន៍ ហើយក៏បង្កើតបានកាហ្វេដែលមានក្លិនឈ្ងុយដូចកាហ្វេពិតៗដែលមាននៅលើទីផ្សារ។

បណ្ឌិត Heiko Rscher ប្រធានផ្នែកបច្ចេកវិទ្យាជីវសាស្ត្ររុក្ខជាតិ ប្រចាំវិទ្យាស្ថានស្រាវជ្រាវ VTT នៃប្រទេសហ្វាំងឡង់ កំពុងទទួលខុសត្រូវលើគម្រោងស្រាវជ្រាវទាក់ទងនឹងការផលិតកាហ្វេនៅក្នុងបន្ទប់ពិសោធន៍។ កាលពីសប្ដាហ៍មុន ការប្រឹងប្រែងរបស់ពួកគេ ទទួលបានផ្លែផ្កាគួរឱ្យពេញចិត្ត នៅពេលបង្កើតបានកាហ្វេមួយពែងដំបូងដែលមានរសជាតិ និងក្លិនដូចទៅនឹងកាហ្វេដែលផលិតពីគ្រាប់របស់ដើមកាហ្វេពិត។ នេះបើតាម New Atlas ចុះផ្សាយកាលពីថ្ងៃទី 20 កញ្ញា។

ពិភពលោកផលិតកាហ្វេជិត 10 ពាន់លានគីឡូក្រាម ជារៀងរាល់ឆ្នាំ ហើយតម្រូវការនេះនឹងកើនឡើងនាពេលខាងមុខ។ ដើម្បីឆ្លើយតបនឹងតម្រូវការនេះ មនុស្សនឹងត្រូវកាប់ព្រៃបន្ថែមទៀតដើម្បីដាំដើមកាហ្វេ។

បច្ចេកវិទ្យាថ្មីរបស់ បណ្ឌិត Heiko Rscher បានបង្ហាញអំពីរូបមន្តនៃ «កសិកម្មកោសិកា» ក្នុងនោះ បណ្ដាផលិតផលត្រូវបានផលិតឡើងដោយការចិញ្ចឹមកោសិកាដែលមិនមែនជាសត្វ ឬរុក្ខជាតិពិត។ ដូច្នេះ ដំណើរការនេះត្រូវការថាមពល ទឹក និងបញ្ចេញឧស្ម័នក្នុងកម្រិតទាប។

«គំនិតនៅទីនេះគឺ ការប្រើប្រាស់បច្ចេកវិទ្យាជីវសាស្ត្រជំនួសឱ្យការដាំដុះបែបបុរាណដើម្បីផលិតអាហារ។ ដំណោះស្រាយនេះ ទាមទារទឹក និងសកម្មភាពដឹកជញ្ជូនតិចជាងធម្មតា។ ពួកវាក៏មិនពឹងផ្អែកលើរដូវកាល និងមិនត្រូវការថ្នាំសម្លាប់សត្វល្អិត» លោក Riscer បកស្រាយដូច្នេះ។

លោកបន្ថែមថា៖ «ដំណើរការនៃការផលិតគឺ ត្រូវប្រើប្រាស់កោសិកាពិតរបស់ដើមកាហ្វេរស់។ កោសិកាដំបូងត្រូវបានចិញ្ចឹមដោយផ្សាំពីផ្នែកមួយរបស់ដើមកាហ្វេ ដូចជាស្លឹកជាដើម។ បន្ទាប់មក កោសិកានឹងដុះឡើងច្រើននៅក្នុងបរិស្ថានដែលមានសារធាតុចិញ្ចឹមសមស្រប។ ចុងក្រោយ ពួកវាត្រូវបានដឹកទៅកាន់រោងចក្រប្រតិកម្មជីវសាស្ត្រដើម្បីប្រមូលផល។ បន្ទាប់មក កោសិការបស់កាហ្វេត្រូវបានគេសម្ងួត និងលីង រួចហើយ អាចយកមកឆុងជាកាហ្វេបាន»។

Rischer បញ្ជាក់ថា៖ «យោងតាមសេណារីយោដែលប្រកបដោយសុទិដ្ឋិនិយមបំផុត ផលិតផលមួយសម្រាប់សកម្មភាពពាណិជ្ជកម្ម អាចនឹងត្រៀមរួចរាល់ដើម្បីបង្ហាញខ្លួននៅក្នុងរយៈពេល 4 ឆ្នាំខាងមុខ»៕

September 21, 2021

ក្រុមហ៊ុនផលិតរថយន្តរបស់ អង់គ្លេស ប្រើប្រាស់ថាមពលនុយក្លែអែរ សម្រាប់ការទាញយករ៉ែពីឋានព្រះចន្ទ

ក្រុមហ៊ុន Rolls-Royce កំពុងអភិវឌ្ឍម៉ាស៊ីនប្រតិកម្មនុយក្លេអែរ ឬហៅថា រ៉េអាក់ទ័រនុយក្លេអ៊ែរ (nuclear reactor) ដើម្បីផ្គត់ផ្គង់អគ្គិសនីសម្រាប់សកម្មភាពទាញយករ៉ែនៅលើឋានព្រះចន្ទ និងភពព្រះអង្គារ។

ក្រុមហ៊ុន Rolls-Royce កាលពីដើមឆ្នាំនេះ បានសហការជាមួយទីភ្នាក់ងារអវកាសរបស់ អង់គ្លេស ដើម្បីស្រាវជ្រាវរកវិធីសាស្ត្រប្រើប្រាស់ថាមពលនុយក្លេអែរសម្រាប់រ៉ុក្កែត។ ក្រុមហ៊ុននេះកំពុងពិនិត្យលើវិធីប្រើប្រាស់ម៉ាស៊ីនប្រតិកម្មនុយក្លេអែរខ្នាតតូច ដើម្បីរុញច្រានរ៉ុក្កែតក្នុងទីអវកាស បំណងបង្កើនល្បឿនឱ្យលឿនជាងបច្ចុប្បន្ន និងប្រើប្រាស់បច្ចេកវិទ្យានេះឡើងវិញដើម្បីផ្គត់ផ្គង់ថាមពលដល់សកម្មភាពទាញយក និងរក្សារ៉ែ បន្ទាប់ពីដំណើរការរុករកនៅលើឋានព្រះចន្ទ ឬពិភពព្រះអង្គារ។

Dave Gordon មេដឹកនាំផ្នែកការពារជាតិរបស់ Rolls-Royce បានឱ្យដឹងថា ក្រុមហ៊ុននឹងប្រើប្រាស់បទពិសោធន៍ 60 ឆ្នាំ នៅក្នុងការអភិវឌ្ឍនាវាមុជទឹកនុយក្លេអែរសម្រាប់កងទ័ពជើងទឹក អង់គ្លេស របស់ខ្លួន សម្រាប់វិស័យអវកាស។

Gordon និយាយថា ប្រភពរ៉ែកម្រនៅលើផែនដី ពិតជាមិនសូវមាន ប៉ុន្តែ គេអាចរកឃើញពួកវានៅលើឋានព្រះចន្ទ និងបណ្ដាភពដទៃ។ លោកអះអាងថា ការរុករក និងទាញយករ៉ែនៅលើព្រះចន្ទ និងភពព្រះអង្គារ អាចក្លាយជាការពិតក្នុងអនាគតកាល។ សកម្មភាពថ្មីទាំងនេះ ត្រូវការថាមពលនុយក្លេអែរ ព្រោះថា ថាមពលព្រះអាទិត្យមិនសមស្របជាមួយនឹងគម្លាតនៃរយៈចម្ងាយដ៏ធំធេងនេះទេ។

Rolls-Royce មិនមែនជាក្រុមហ៊ុនតែមួយដែលមានគម្រោងអភិវឌ្ឍប្រព័ន្ធបច្ចេកវិទ្យាដើម្បីរុករក និងទាញយករ៉ែពីភពផ្សេងនោះទេ។ ក្រុមហ៊ុនចំនួនបី រួមមាន Lunar Outpost, Honeybee Robotics និងក្រុមហ៊ុន Masten Space Systems ក៏កំពុងតែអភិវឌ្ឍប្រព័ន្ធថ្មីដើម្បីទាញយកទឹកកកពីឋានព្រះចន្ទ ដោយរ៉ុក្កែត នៅឆ្នាំ 2023។ អ្នកស្រាវជ្រាវមួយក្រុមមកពីសាកលវិទ្យាល័យ Arizona ក៏ទទួលបានខ្ទង់ថវិកា 500,000 ដុល្លារ ពី NASA ដើម្បីអភិវឌ្ឍក្រុមរ៉ូបូតស្វ័យប្រវត្តដែលអាចស្វែងរក និងជីកយករ៉ែដីកម្រនៅលើឋានព្រះចន្ទផងដែរ៕

September 21, 2021

Category: សង្គម និងសេដ្ឋកិច្ច