សេចក្ដីសម្រេចរបស់ក្រសួងសេដ្ឋកិច្ច និងហិរញ្ញវត្ថុ មានខ្លឹមសារថា «កម្មវិធីឧបត្ថម្ភសាច់ប្រាក់នេះនឹងត្រូវបន្តអនុវត្ត សម្រាប់ជុំទី 7 ដែលមានរយៈពេល 03 ខែគឺ ខែតុលា ខែវិច្ឆិកា និងខែធ្នូ ឆ្នាំ 2021។ ការបើកផ្ដល់ប្រាក់ឧបត្ថម្ភ ត្រូវធ្វើឡើងក្នុងសប្ដាហ៍ទី 4 នៃខែនីមួយ។
ព័ត៌មានបន្ថែម សូមអានសេចក្ដីសម្រេចរបស់ក្រសួងសេដ្ឋកិច្ច និងហិរញ្ញវត្ថុ ដែលមានដូចខាងក្រោម៖
(ឥណ្ឌា)-លោកយាយម្នាក់ឈ្មោះ Jivunben Rabari បានក្លាយជាស្ត្រីកូនខ្ចីដែលមានវ័យចំណាស់ជាងគេបំផុតមួយរូបនៅលើពិភពលោក បន្ទាប់ពីបានឆ្លងទន្លេក្នុងវ័យ 70 ឆ្នាំ ដោយវិធីបង្កកំណើតនៅក្នុងឧបករណ៍វិទ្យាសាស្ត្រ ដែលហៅថា In Vitro Fertilization។
លោកយាយ Rabari និងស្វាមី Maldhari អាយុ 75 ឆ្នាំ រស់នៅក្នុងភូមិ Mora រដ្ឋ Gujurat រៀបការជាមួយគ្នាបាន 45 ឆ្នាំហើយ និងតែងតែចង់បានកូននឹងគេ។ រហូតមកដល់ខែនេះ ទើបពួកគាត់បានទទួលស្វាគមន៍កូនដំបូង តាមរយៈវិធីសាស្ត្រ IVF។
លោកយាយ Rabari ឱ្យដឹងថា គាត់មិនមានលិខិតស្នាមបញ្ជាក់ពីអាយុផ្ទាល់ខ្លួន ប៉ុន្តែអះអាងថា មានអាយុ 70 ឆ្នាំ។ ប្រការនេះបាននាំឱ្យលោកយាយក្លាយជាស្ត្រីម្នាក់ក្នុងចំណោមស្ត្រីកូនខ្ចីដែលមានវ័យចំណាស់ជាងគេក្នុងពិភពលោក។
«លើកដំបូង ពួកគាត់បានមករកខ្ញុំ ខ្ញុំប្រាប់ថា ពួកគាត់មិនអាចមានកូននៅក្នុងវ័យចំណាស់នេះទេ ប៉ុន្តែពួកគាត់នៅតែចង់បង្កើតកូន។ ពួកគាត់និយាយថា សមាជិកច្រើននាក់របស់គ្រួសារគាត់ក៏ធ្លាប់បានប្រើប្រាស់វិធីសាស្ត្របង្កកំណើតក្នុងឧបករណ៍វិទ្យាសាស្ត្រ» វេជ្ជបណ្ឌិត Naresh Bhanushali រៀបរាប់អំពីប្ដីប្រពន្ធលោកយាយ Rabari និងបន្ថែមថា៖ «ករណីដូចប្ដីប្រពន្ធមួយគូនេះគឺកម្រជួបប្រទះខ្លាំងណាស់»។
កាលពីឆ្នាំ 2019 លោកយាយជនជាតិឥណ្ឌាម្នាក់ ឈ្មោះ Mangayamma Yarmati ក៏ធ្លាប់បានធ្វើឱ្យមានការចាប់អារម្មណ៍ផងដែរ ព្រោះតែបង្កើតបានកូនស្រីពីរនាក់នៅក្នុងវ័យ 73 ឆ្នាំ ដោយប្រើវិធីដូចខាងលើ។ ឆ្នាំ 2016 លោកយាយ Daljinder Kaur ដែលជាស្ត្រីជនជាតិឥណ្ឌាម្នាក់ផ្សេងទៀត ក៏បង្កើតបានកូនប្រុសក្នុងវ័យ 70 ឆ្នាំ ដោយសារវិធីសាស្ត្រ In vitro fertilization នេះដែរ។
ជាធម្មតា ស្ត្រីស្ទើរតែទាំងអស់ សុទ្ធតែឆ្លងកាត់ដំណាក់កាលអស់រដូវ ដែលកើតឡើងចាប់ពីវ័យប្រហែល 50 ឆ្នាំឡើងទៅ ដូច្នេះ ការមានផ្ទៃពោះតាមបែបធម្មជាតិក្នុងវ័យ 70 ឆ្នាំគឺស្ទើរតែមិនអាចទៅរួច។ ប៉ុន្តែ ក្រុមអ្នកវិទ្យាសាស្ត្រជឿថា ការប្រើប្រាស់វិធីសាស្ត្របង្កកំណើតក្នុងឧបករណ៍វិទ្យាសាស្ត្រ ស្ត្រីនៅតែអាចមានផ្ទៃពោះក្នុងពេលមានវ័យចំណាស់ ឱ្យតែស្បូននៅមានសុខភាពល្អ៕
គម្រោងរកស៊ីដែលទាក់ទងនឹងបាល់ទាត់ និងមានការចូលរួមពី Ronaldo (CR7) របស់មហាសេដ្ឋីសិង្ហបុរី នឹងផ្ដល់សេវាកម្មកំសាន្តតាមអនឡាញ ជួយឱ្យអ្នកប្រើប្រាស់ទទួលបានបទពិសោធន៍ថ្មីនៅពេលចូលរួមលេងហ្គេមបាល់ទាត់។
កាលពីពេលថ្មីៗនេះ នៅលើទំព័របណ្ដាញសង្គម Instagram ផ្ទាល់ខ្លួន កំពូលតារាបាល់ទាត់ ជនជាតិព័រទុយហ្កាល់ លោក Cristiano Ronaldo បានបង្ហោះរូបថតមួយសន្លឹកបង្ហាញពីការចាប់ដៃរវាងលោក និងមហាសេដ្ឋី Peter Lim ដែលជាម្ចាស់ក្លឹបបាល់ទាត់ Valencia ដែលបច្ចុប្បន្ន កំពុងចូលរួមប្រកួតនៅ La Liga ជាពានរង្វាន់លំដាប់កំពូលបំផុតសម្រាប់បណ្ដាក្រុមបាល់ទាត់នៅ ប្រទេសអេស្ប៉ាញ។
អ្វីដែលគួរឱ្យកត់សម្គាល់ នោះគឺ កំពូលតារាបាល់ទាត់របស់ក្លឹប Manchester United រូបនេះ បានបង្ហោះរូបថតដែលអមនឹងសារ «ដំណឹងល្អជិតមកដល់» ជាមួយនឹង hashtag #WritingTheFutureOfFootball ហើយមានទាំងតំណភ្ជាប់ទៅកាន់គេហទំព័ររបស់ ZujuGP។
ទស្សនាវដ្ដី Forbes ឱ្យដឹងថា ZujuGP គឺជាក្រុមហ៊ុនធុរកិច្ចថ្មីផ្នែកបច្ចេកវិទ្យាឌីជីថល សម្រាប់តែពិភពបាល់ទាត់ និងត្រូវបានបង្កើតឡើងដោយមហាសេដ្ឋី Peter Lim រួមនឹងកូនប្រុសឈ្មោះ Kait Lim ក្រោមការយល់ព្រម និងសហការពី Cristiano Ronaldo។
ទាក់ទងនឹងកិច្ចសហការនេះ Ronaldo ឱ្យដឹងថា៖ «ខ្ញុំរីករាយណាស់ដែលបានសហការជាមួយ ZujuGP ពិសេសគឺមិត្តយូរឆ្នាំរបស់ខ្ញុំ Peter Lim។ ខ្ញុំបានស្គាល់គាត់ច្រើនឆ្នាំ ហើយការចូលរួមក្នុងគម្រោងនេះ ធ្វើឱ្យខ្ញុំពេញចិត្តជាខ្លាំង។ ពិសេស កិច្ចសហការនេះបង្ហាញថា ជនជាតិនៅលោកខាងលិច និងខាងកើត ពិតជាអាចបង្កភាពសុខដុមនឹងគ្នា។ ប្រការនេះធ្វើឱ្យខ្ញុំមានមោទកភាពថែមទៀត»។
ក្រុមហ៊ុន ZujuGP បានឱ្យដឹងថា ពួកគេកំណត់គោលដៅធ្វើឌីជីថលូបនីយកម្មលើបទពិសោធន៍លេងហ្កេមអនឡាញសម្រាប់អ្នកគាំទ្រ ដោយការផ្ដល់ជម្រើសផ្នែកកំសាន្ត បណ្ដាញផ្ទាល់ខ្លួន និងពាណិជ្ជកម្មអេឡិចត្រូនិក។ ទន្ទឹមនឹងនេះ ក្រុមហ៊ុនធុរកិច្ចថ្មីនេះក៏នឹងកសាងបណ្ដាញសេវាកម្មអនឡាញមួយសម្រាប់ភ្នាក់ងារប្រមាញ់កីឡាកររបស់ក្លឹបនានាក្នុងពិភពលោក បណ្ដុះបណ្ដាល និងប្រឹក្សាយោបល់ដល់អ្នកលេង តាមរយៈប្រព័ន្ធដែលគ្រប់គ្រងដោយបញ្ញាសិប្បនិម្មិត (AI)។
ក្រុមហ៊ុនធុរកិច្ចថ្មីនៅ ប្រទេសសិង្ហបុរី នេះ ចាត់ទុក ទ្វីបអាស៊ី ថាជាអនាគតរបស់ពិភពបាល់ទាត់ បន្ទាប់ពី ទ្វីបអឺរ៉ុប និង ទ្វីបអាម៉េរិក។ ពួកគេឱ្យដឹងថា តំបន់ដែលមានប្រជាជន 60% នៃប្រជាជនសរុបរបស់ពិភពលោក មានការគាំទ្រយ៉ាងខ្លាំងក្លាដល់កីឡាបាល់ទាត់។ ដូច្នេះ ចំនួនអ្នកគាំទ្រនឹងកើនឡើងពីមួយថ្ងៃ ទៅមួយថ្ងៃ ដែលនេះនឹងនាំមកនូវឱកាសយ៉ាងធំធេងដល់ក្រុមហ៊ុនអភិវឌ្ឍហ្គេមអនឡាញ និងសេវាកម្មនានាដែលជាប់ទាក់ទងនឹងការប្រកួតពានដណ្ដើមរង្វាន់បាល់ទាត់លំដាប់កំពូលៗនៅលើពិភពលោក។
បច្ចុប្បន្ន Cristiano Ronaldo កំពុងកាន់កាប់តំណែងលេខមួយនៅលើបណ្ដាញសង្គម Instagram ដោយមានអ្នកចុះឈ្មោះតាមដានជាង 357 លាននាក់។ អត្ថបទដែល CR7 បង្ហោះនៅលើបណ្ដាញសង្គមនេះ ក៏ទទួលបានការចុចចូលចិត្តជាង 5.3 លានលើក រួមនឹងការបញ្ចេញមតិជិត 28,000 លើក។ ជាមួយនឹងភាពល្បីល្បាញ និងឥទ្ធិពលខ្លាំងនៅក្នុងវិស័យបាល់ទាត់របស់ Ronaldo តាមគម្រោង ក្រុមហ៊ុន ZujuGP អាចសម្រេចបានគោលដៅថ្មីនាពេលអនាគត។
ចំណែកមហាសេដ្ឋី Peter Lim ដែលជាកំពូលអ្នកជំនួញជនជាតិសិង្ហបុរី ក៏ធ្លាប់ជាកំពូលអ្នកគក់ជេរភាគហ៊ុននៃប្រទេសនេះ ហើយបច្ចុប្បន្ន លោកកំពុងវិនិយោគក្នុងវិស័យជាច្រើន។ កាលពីឆ្នាំ 2019 ទស្សនាវដ្ដី Forbes ធ្លាប់ចាត់ឈ្មោះលោកទៅក្នុងលំដាប់ថ្នាក់ទី 10 នៃតារាងចំណាត់ថ្នាក់អ្នកមានជាងគេនៅ សិង្ហបុរី ដោយមានទ្រព្យចំនួន 2.5 លានដុល្លារអាម៉េរិក។ លោក Peter Lim ក៏ជាអ្នកក្ដោបក្ដាប់ Mint Media Sport ដែលជាក្រុមហ៊ុនកាន់កាប់សិទ្ធិគ្រប់គ្រងរូបភាពរបស់ Cristiano Ronaldo ផងដែរ៕
ក្នុងរយៈពេល 9 ខែដើមឆ្នាំ ទំនិញរបស់ កម្ពុជា ដែលបាននាំចូល ប្រទេសវៀតណាម ស្មើនឹង 3.7 ពាន់លានដុល្លារអាម៉េរិក កើនជិត 4 ដង ធៀបនឹងអំឡុងពេលដូចគ្នាកាលពីឆ្នាំ 2020 នេះបើតាមអគ្គនាយកដ្ឋានគយ។
ការដោះដូរពាណិជ្ជកម្មរវាងប្រទេសទាំងពីរ សម្រេចបាន 7.2 ពាន់លានដុល្លារ កើន 90.9% ធៀបនឹងអំឡុងពេលដូចគ្នាកាលពីឆ្នាំ 2020។ ក្នុងនោះ ទំនិញរបស់ កម្ពុជា ដែលនាំចូល វៀតណាម មានចំនួនជាង 51% សល់ពីនេះគឺជាទំនិញរបស់ វៀតណាម នាំចូល កម្ពុជា ដែលស្មើនឹង 3.5 ពាន់លានដុល្លារ កើន 16.1% ធៀបនឹងអំឡុងពេលដូចគ្នាក្នុងឆ្នាំ 2020។
កសិផលសំខាន់ពីរមុខដែល វៀតណាម នាំចូលពី កម្ពុជា សម្រាប់យកទៅកែច្នៃដើម្បីនាំចេញ នោះគឺគ្រាប់ស្វាយចន្ទី 1.84 ពាន់លានដុល្លារ និងជ័រកៅស៊ូ 961 លានដុល្លារ។
បច្ចុប្បន្ន 10/11 នៃក្រុមទំនិញដែល កម្ពុជា នាំចេញទៅកាន់ វៀតណាម មានកំណើនខ្ពស់ ធៀបនឹង 9 ខែដើមឆ្នាំ 2020។ ក្នុងនោះ បន្លែ ផ្លែឈើកើន 61%, គ្រាប់ស្វាយចន្ទីកើន 595%, សណ្ដែកសៀងកើន 548.99%, កៅស៊ូកើន 391%។ ទន្ទឹមនឹងនេះ ទំនិញជាឈើ និងផលិតផលធ្វើអំពីឈើ ក្រណាត់ សំណល់អេតចាយ និងទំនិញជាច្រើនមុខផ្សេងទៀតក៏មានកំណើនចាប់ពី 5 ទៅ 300% ធៀបនឹងអំឡុងពេលដូចគ្នាក្នុងឆ្នាំ 2020។
ក្នុងចំណោមប្រភេទផ្លែឈើដែល កម្ពុជា នាំចេញទៅ វៀតណាម គេឃើញថា ចេក ក្រូចថ្លុង និងផ្លែស្វាយ កំពុងតែទទួលបានការគាំទ្រច្រើនពីអតិថិជននៅ វៀតណាម។ ចំពោះទំនិញជាស្បៀងអាហារ ដូចជា ស្រូវ និងដំឡូងមី ក៏កំពុងត្រូវបាននាំចេញទៅកាន់ វៀតណាម ច្រើនផងដែរ ក្នុងនោះ ស្រូវ 2.52 លានតោន និងដំឡូងមី 815,872 តោន។
យោងតាមក្រសួងកសិកម្ម រុក្ខាប្រមាញ់ និងនេសាទ ក្នុងអំឡុង 9 ខែដើមឆ្នាំនេះ កម្ពុជា បាននាំចេញកសិផលទៅកាន់ប្រទេស និងដែនដីចំនួន 90 នៅលើពិភពលោក ស្មើនឹង 5.93 លានតោន។ ក្នុងនោះ កសិផលដែលនាំចេញទៅ ប្រទេសវៀតណាម មានបរិមាណច្រើនជាងគេ គឺស្មើនឹង 64.11%, ប្រទេសថៃ 21.49%, ប្រទេសចិន 9.69% និងប្រទេសដទៃទៀតសរុបស្មើនឹង 4.71%៕
ឧបករណ៍ តូកាម៉ាក (Tokamak) ដែលកំពុងត្រូវបានពិសោធនៅ ប្រទេសចិន បង្ហាញអំពីយន្តការប្រមូលផ្ដុំ អ៊ីដ្រូសែន របស់ព្រះអាទិត្យ និងបង្កើតបានកម្ដៅរហូតដល់ 120 លានអង្សាសេ។
ក្រុមអ្នកវិទ្យាសាស្ត្រចិន កំពុងអភិវឌ្ឍ «ព្រះអាទិត្យសិប្បនិម្មិតមួយដួង» ដែលមានកម្ដៅខ្លាំងជាងស្នូលរបស់ព្រះអាទិត្យរហូតដល់ 8 ដងឯណោះ ដោយការធ្វើត្រាបតាមយន្តការប្រតិកម្មនៃបណ្ដុំ អ៊ីដ្រូសែន របស់ព្រះអាទិត្យ ដើម្បីបង្កើតបានជាថាមពល នៅលើផែនដីតែម្ដង។
យោងតាមអង្គការថាមពលអាតូមិកអន្តរជាតិ កម្ដៅរបស់ព្រះអាទិត្យ ជួយធានាឱ្យ អ៊ីដ្រូសែន ផ្លាស់ទីក្នុងល្បឿនលឿន ក៏ដូចជាទំហំ និងទម្ងន់របស់វាត្រូវបានកំណត់ក្នុងបរិវេណជាក់លាក់ នាំឱ្យមានការប៉ះទង្គិចគ្នា បង្កើតបានជាថាមពលដ៏មហិមា។
ម៉ាស៊ីនប្រតិកម្ម តូកាម៉ាក ដ៏ទំនើប ដែលត្រូវបានធ្វើការពិសោធនៅឯទីក្រុង Hefei នៃប្រទេសចិន ដំណើរការដោយវិធីសាស្ត្របង្កបង្កើតជាថ្មីនូវលក្ខណទាំងឡាយខាងលើ។ តូកាម៉ាក ប្រើប្រាស់កងមេដែកដើម្បីរក្សាលំហូរនៃរស្មី ផ្លាស្មា (plasma) របស់ អ៊ីដ្រូសែន ដ៏មហាសែនក្ដៅ ឱ្យផ្លាស់ទីនៅក្នុងវត្ថុមួយដែលមានរូបរាងដូចពោះវៀនកង់ឡាន (torus)។
នៅពេល អ៊ីដ្រូសែន អណ្ដែតនៅខាងក្នុងបន្ទប់មេដែក ហើយ តូកាម៉ាក បញ្ចេញអេឡិចត្រូម៉ាញេទិក ដើម្បីបំបែកអាតូមនានារបស់ អ៊ីដ្រូសែន ចេញពី អ៊ីឡិចត្រុង របស់ពួកវា បង្កើតបានជាស្ថានភាព ផ្លាស្មា ហើយក្រោយមកធ្វើឱ្យវាឡើងកម្ដៅ។
ដោយសារតែផ្កាយសិប្បនិម្មិតរបស់ ប្រទេសចិន មិនអាចបង្ហាប់ ផ្លាស្មា រហូតដល់កម្រិតមួយដូចព្រះអាទិត្យ ដូច្នេះគ្រាប់អាតូមនានាត្រូវការដុតកម្ដៅច្រើនជាងដើម្បីបង្កើនលទ្ធភាពនៃការប៉ះទង្គិចគ្នា។
កាលពីខែឧសភា ម៉ាស៊ីនប្រតិកម្ម តូកាម៉ាក បានបង្កើតកម្ដៅ ផ្លាស្មា រហូតដល់ 120 លានអង្សាសេ ឯណោះ ក្នុងរយៈពេល 101 វិនាទី៕
(ហូឡង់)-ក្រុមអ្នកវិទ្យាសាស្ត្រកំពុងអភិវឌ្ឍបច្ចេកវិទ្យាឡាស៊ែរ ដើម្បីបញ្ជូនវ៉ាក់សាំងឆ្លងកាត់ស្បែក ចូលទៅកាន់ខ្លួនមនុស្សដោយមិនបាច់ប្រើម្ជុល អាចនេះនឹងជួយកាត់បន្ថយភាពភ័យខ្លាចចំពោះមនុស្សមួយចំនួន។
ឧបករណ៍ «Bubble Gun» ប្រើប្រាស់ឡាស៊ែរ ដើម្បីរុញច្រានគ្រាប់ល្អិតនៃទឹកថ្នាំ ឬវ៉ាក់សាំងចូលទៅក្នុងសាច់ ដោយឆ្លងកាត់ស្រទាប់ស្បែកខាងក្រៅ នេះបើតាម DAvid Fernandez Rivas សាស្ត្រាចារ្យនៃសាកលវិទ្យាល័យ Twente និងវិទ្យាស្ថានបច្ចេកវិទ្យា Massachusetts។ ដំណើរនេះកើតឡើងលឿនជាងមូសខាំ និងមិនមានការឈឺចាប់ ដោយសារមិនប៉ះពាល់ដល់ក្បាលសរសៃវិញ្ញាណនៅលើស្បែក។
«ក្នុងរង្វង់ 1 មិល្លីវិនាទី បំពង់កញ្ចក់ដែលផ្ទុកពេញដោយធាតុរាវត្រូវឡើងក្ដៅនៅពេលបញ្ចាំងពន្លឺឡាស៊ែរ។ ពពុះកើតឡើងនៅត្រង់ធាតុរាវ ហើយរុញច្រានធាតុរាវនោះឱ្យធ្វើដំណើរក្នុងល្បឿន 100 គីឡូម៉ែត្រ/ម៉ោង។ យន្តការនេះអនុញ្ញាតឱ្យនាំវ៉ាក់សាំងឆ្លងកាត់ស្បែកដោយមិនបង្ករបួសស្នាម។ យើងមិនបានឃើញរបួស ឬស្នាមចាក់អ្វីទាំងអស់» Rivas បកស្រាយដូច្នេះ។
Rivas សង្ឃឹមថា របកគំហើញនេះមិនត្រឹមតែជួយឱ្យតួលេខនៃការចាក់វ៉ាក់សាំងកើនឡើងនោះទេ តែវាក៏ទប់ស្កាត់ការឆ្លងមេរោគនៅពេលចាក់វ៉ាក់សាំងដោយម្ជុល និងកាត់បន្ថយកាកសំណល់ផ្នែកសុខាភិបាលផងដែរ។ ការពិសោធដោយជោគជ័យខាងលើ ត្រូវចំណាយថវិកាអស់ 1.73 លានដុល្លារអាម៉េរិក ដែលបានមកពី សហភាពអឺរ៉ុប។ ក្រុមអ្នកស្រាវជ្រាវកំពុងចាប់ផ្ដើមពិសោធនៅលើមនុស្ស ហើយអ្នកស្ម័គ្រចិត្តទាំងឡាយនឹងអាចចុះឈ្មោះបាននៅក្នុងខែតុលានេះ។
Rivas និងសហការី ត្រូវការពេលពី 1-3 ឆ្នាំក្នុងការបំពេញការងារនានាដើម្បីអាចបញ្ចេញលក់ឧបករណ៍នេះនៅក្នុងទីផ្សារ អាស្រ័យលើភាពជាក់ស្ដែងនៃការស្រាវជ្រាវ និងបញ្ហាផ្ដល់លិខិតអនុញ្ញាត៕
ថ្មីៗនេះ រាជរដ្ឋាភិបាលកម្ពុជា បានចេញអនុក្រឹត្យលេខ២០០អនក្រ.បក អនុញ្ញាតដាក់ឱ្យចរាចរ និងប្រើប្រាស់ទូទាំងប្រទេសនូវ ក្រដាសប្រាក់ប្រភេទ 30,000 រៀលគំរូថ្មី ដើម្បីអបអរខួប 30 ឆ្នាំនៃ កិច្ចព្រមព្រៀងសន្តិភាពទីក្រុងប៉ារីស និងខួប 30 ឆ្នាំនៃការយាងនិវត្តន៍របស់ ព្រះករុណាព្រះបាទ សម្តេចព្រះនរោត្តម សីហនុ “ព្រះបរមរតនកោដ្ឋ”។
សេចក្ដីលម្អិត សូមអានខ្លឹមសារនៃអនុក្រឹត្យ និងព័ត៌មានទាក់ទងនឹងក្រដាសប្រាក់នេះ ដែលមានដូចខាងក្រោម៖
(នូវែលសេឡង់)-គ្រូមន្តអាគមម្នាក់បានចុះកិច្ចព្រមព្រៀង និងទទួលបានប្រាក់បៀវត្សចំនួន 11,300 ដុល្លារអាម៉េរិក/ឆ្នាំ ជាថ្នូរនឹងការ «ប្រោះព្រំវេទមន្ត» ដល់ទីក្រុង Christchurch ក្នុងរយៈពេល 2 ទសវត្សរ៍កន្លង។
ក្រុមប្រឹក្សាទី Christchurch នៃ ប្រទេសនូវែលសេឡង់ កាលពីថ្ងៃទី 09 តុលា បានប្រកាសថា នឹងបញ្ចប់កិច្ចសន្យាជាមួយ Wizard (គ្រូវេទមន្ត) របស់ទីក្រុងនេះ នៅចុងឆ្នាំ 2021។ ខ្ទង់ប្រាក់ខែចុងក្រោយនឹងត្រូវបានទូទាត់នៅក្នុងខែធ្នូខាងមុខ។
ឈ្មោះផ្លូវការរបស់រាជគ្រូ Wizard គឺ Brackenbury Channell អាយុ 88 ឆ្នាំ កើតនៅ ប្រទេសអង់គ្លេស បានចាប់ផ្ដើមសកម្មភាពប្រើប្រាស់វេទមន្ត និងសិល្បៈកំសាន្តនៅទីសាធារណៈ នៅពេលទៅដល់ ប្រទេសនូវែលសេឡង់ កាលពីឆ្នាំ 1976។
ឆ្នាំ 1982 សមាគមនាយកវិចិត្រសាលសិល្បៈនូវែលសេឡង់ (New Zealand Art Gallery Directors Association) បានប្រកាសតែងតាំងលោក Brackenbury Channell ជាស្នាដៃសិល្បៈរស់ ហើយក្រោយមក នៅឆ្នាំ 1990 នាយករដ្ឋមន្ត្រីរបស់ នូវែលសេឡង់ កាលណោះគឺ Mike Moore បានស្នើឱ្យលោកធ្វើជារាជគ្រូនៃប្រទេសនេះ។
«ខ្ញុំបារម្ភថា មន្តអាគមរបស់លោក មិនត្រូវបានអនុញ្ញាតឱ្យប្រើប្រាស់នៅទូទាំងប្រទេស។ ដូច្នេះ ខ្ញុំស្នើឱ្យលោកប្រញាប់ពិចារណាអំពីសំណើតែងតាំងជារាជគ្រូរបស់ នូវែលសេឡង់, អង់តាកតិកនៃនូវែលសេឡង់ (Antarctica New Zealand) និងតំបន់សមុទ្រដែលជាប់ទាក់ទង។ ប្រាកដណាស់ថា មន្តអាគមនានា មានឥទ្ធិពលលើអំពើអាបធ្មប់ បណ្ដាសា និងបញ្ហាជំនឿអរូបីផ្សេងទៀតដែលស្ថិតនៅក្រៅសមត្ថកិច្ចរបស់នាយករដ្ឋមន្ត្រី» Mike Moore កាលណោះថ្លែងដូច្នេះ។
តាំងពីពេលនោះមក Channell ក៏ចាប់ផ្ដើមធ្វើសកម្មភាពសម្ដែងឫទ្ធិនៅទីក្រុង Christchurch ដើម្បីបួងសួងសុំទឹកភ្លៀងនៅ នូវែលសេឡង់ និង អូស្ត្រាលី។ លោកក៏ធ្លាប់ទទួលបានមេដាយបម្រើមហាក្សត្រី អង់គ្លេស កាលពីឆ្នាំ 2009 ផងដែរ។
រាជគ្រូ Brackenbury Channell បានចុះកិច្ចព្រមព្រៀងជាមួយទីក្រុង Christchurch ចាប់តាំងពីឆ្នាំ 1998 ដើម្បី «ផ្ដល់សេវាកម្មវេទមន្ត និងសេវាកម្មដទៃទៀតដែលប្រហាក់ប្រហែលនឹងវេទមន្ត ដែលដូចទៅនឹងផ្នែកមួយនៃកិច្ចការផ្សព្វផ្សាយសម្រាប់ទីក្រុង Christchurch» ដោយទទួលបានប្រាក់បៀរវត្ស 16,000 ដុល្លារនូវែលសេឡង់ (11,300 ដុល្លារអាម៉េរិក)/ឆ្នាំ រយៈពេល 23 ឆ្នាំកន្លង។ ទឹកប្រាក់សរុបដែល Channell បានទទួលក្នុងអំឡុងពេលនោះ ស្មោះនឹង 368,000 ដុល្លារអាម៉េរិក។
ថ្មីៗនេះ ក្រុមប្រឹក្សាទីក្រុង បានប្រកាសថា បានផ្ញើលិខិតទៅអរគុណលោក Channell ចំពោះការលះបង់របស់លោកនៅក្នុងកិច្ចការបម្រើទីក្រុងអស់រយៈពេលជាង 20 ឆ្នាំកន្លង ទន្ទឹមនឹងនេះក៏បានប្រកាសថា ជិតបញ្ចប់កិច្ចសន្យាជាមួយរាជគ្រូនេះផងដែរ នេះបើតាមអ្នកនាំពាក្យ Lynn McClelland។ លោកស្រីនិយាយបន្ថែមថា ក្រុមប្រឹក្សាក្រុង មានការច្របូកច្របល់ចិត្តនៅពេលសម្រេចបញ្ចប់កិច្ចសន្យានេះ ប៉ុន្តែ បានសង្កត់ធ្ងន់ថា លោក Channell «នៅតែជាផ្នែកមួយនៃប្រវត្តិសាស្ត្ររបស់ Christchurch»។
ទីក្រុងនេះកំពុងតែជំរុញវិស័យទេសចរណ៍ទៅតាមទិសដៅថ្មី បង្ហាញថាជា «ទីក្រុងមមាញឹក សម្បូរបែប ទាន់សម័យ ដើម្បីទាក់ទាញភ្ញៀវទេសចរណ៍ក្នុងនិងក្រៅប្រទេសមកទស្សនា ព្រមទាំងទាក់ទាញក្រុមហ៊ុនថ្មីៗ និងកម្លាំងពលកម្មដែលមានជំនាញខ្ពស់ ចូលមកបណ្ដាក់ទុន និងធ្វើការ»។
លោក Channell ឱ្យដឹងថា ការដែលក្រុមប្រឹក្សាក្រុងបញ្ចប់កិច្ចព្រមព្រៀងនេះ ក៏ព្រោះតែយល់ថា លោកលែងសមស្របនឹងរូបភាពថ្មីរបស់ទីក្រុង។ លោកនិយាយថា លោកត្រូវបានគេចាត់ទុកថាជាមនុស្សចូលចិត្តបង្កហេតុ។
លោក Channell ជាបុគ្គលដែលមានគេស្គាល់ច្រើននៅទីក្រុង Christchurch ប៉ុន្តែប៉ុន្មានឆ្នាំចុងក្រោយនេះ លោកមិនសូវបានបង្ហាញខ្លួននៅទីសាធារណៈ។ លោកឱ្យដឹងថា មូលហេតុគឺដោយសារក្រុមប្រឹក្សាធ្វើឱ្យលោកអវត្តមានច្រើនជាងមុន និងមិនបានឆ្លើយតបនឹងសំណើកែលម្អវិស័យទេសចរណ៍ដែលលោកលើកឡើង។
ក្រោមការឧបត្ថម្ភពីក្រុមប្រឹក្សាក្រុង មជ្ឈមណ្ឌលសិល្បៈ Christchurch នឹងប្រារព្ធពិធីតាំងពិព័រណ៍មួយស្ដីពីដំណើរជីវិតរបស់រាជគ្រូរូបនេះនៅក្នុងខែតុលា។
នៅពេលត្រូវបានសួរថា «តើលោកបានដាក់បណ្ដាសាដល់ក្រុមប្រឹក្សាក្រុង ព្រោះតែបានបញ្ចប់កិច្ចសន្យាជាមួយលោក ឬទេ?» លោក Channell ឆ្លើយថា លោក «ចូលចិត្តជូនពរជាង»៕
ជីវភាពរបស់ Roshida Dowe ក្រោយពេលត្រូវគេបណ្ដេញពីការងារ បានក្លាយជាឱកាសដើម្បីឱ្យនាងមានសេរីភាព សុភមង្គល និងធ្វើអ្វីដែលនាងប្រាថ្នា។
Roshida Dowe គឺជាមនុស្សឧស្សាហ៍ព្យាយាមក្នុងការបំពេញការងារ ចាប់តាំងពីថ្ងៃធ្វើការដំបូងក្នុងតួនាទីជាអ្នកទទួលភ្ញៀវ រហូតដល់ពេលសម្រេចចិត្តទៅរៀនច្បាប់ និងចំណាយពេលច្រើនឆ្នាំក្នុងតួនាទីជាមេធាវីផ្នែកហិរញ្ញវត្ថុរថយន្តនៅជ្រលងភ្នំ Silicon។
ក៏ប៉ុន្តែ នៅឆ្នាំ 2018 ក្នុងវ័យ 39 ឆ្នាំ គ្រប់យ៉ាងបានប្ដូរផ្លាស់នៅពេលនាងត្រូវគេបណ្ដេញពីការងារ ហើយនាងក៏សម្រេចចិត្តចំណាយវេលាមួយឆ្នាំនៅពេលអត់ការងារធ្វើ ដើម្បីដើរទេសចរណ៍ជុំវិញពិភពលោក។ ក្នុងដំណើរទេសចរណ៍ នាងបានដឹងច្បាស់ថា ខ្លួនចូលចិត្តសេរីភាពក្នុងការធ្វើអ្វីដែលខ្លួនចូលចិត្ត ដូច្នេះនាងក៏ប្ដេជ្ញាប្រែក្លាយដំណើរទេសចរណ៍នេះ ឱ្យទៅជាជីវភាពប្រចាំថ្ងៃ។
Dowe បានបោះបង់ការរស់នៅឯ សហរដ្ឋអាម៉េរិក។ បច្ចុប្បន្ន នាងរស់នៅក្នុងទីក្រុង Mexico City នៃប្រទេសម៉ិកស៊ិក ជាទីដែលនាងទទួលយកបទពិសោធន៍មួយដែលនាងហៅថា «ចូលនិវត្តន៍ចៃដន្យ» ដោយធ្វើជាគ្រូបង្វឹកផ្នែកជីវិត និងគ្រប់គ្រងឆានែល Youtube ផ្ទាល់ខ្លួន។
បច្ចុប្បន្ន នៅក្នុងវ័យ 42 ឆ្នាំ Dowe កំពុងអនុវត្តគម្រោងវិនិយោគជាច្រើនដែលមានតម្លៃជាង 1 លានដុល្លារ និងមានបំណងឆាប់ចូលនិវត្តន៍។
លើកកម្ពស់ខ្ទង់ចំណូល កាត់បន្ថយខ្ទង់ចំណាយ និងសន្សំសំច័យដើម្បីដោះបំណុល
បើទោះជាធំឡើងនៅក្នុងគ្រួសារដែលមានជីវភាពមធ្យម ប៉ុន្តែ ឪពុក ម្ដាយរបស់ Dowe កម្រចែករំលែកចំណេះដឹងផ្នែកហិរញ្ញវត្ថុគ្រួសារដល់នាង។
ក្រោយពីបញ្ចប់ការសិក្សានៅមហាវិទ្យាល័យ និងធ្វើជាអ្នកទទួលភ្ញៀវ Dowe ក៏មិនបានស្ទាត់ជំនាញអ្វីដែរ អំពីបញ្ហាហិរញ្ញវត្ថុ។ ការសម្រេចចិត្តត្រលប់ទៅសិក្សាផ្នែកច្បាប់នៅសាកលវិទ្យាល័យ Virginia ក៏ព្រោះតែនាងយល់ឃើញថា ប្រាក់ខែរបស់អ្នកទទួលភ្ញៀវ មិនគ្រប់គ្រងសម្រាប់ទូទាត់លើខ្ទង់ចំណាយប្រចាំថ្ងៃរបស់នាង។
ការសិក្សាផ្នែកច្បាប់នឹងជួយឱ្យ Dowe ទទួលបានប្រាក់ខែខ្ពស់ជាងឆ្ងាយ បើទោះនាងត្រូវទៅខ្ចីប្រាក់ពីគេ 200,000 ដុល្លារសម្រាប់បង់ថ្លៃសាលា។ ដើម្បីអាចសងបំណុលអស់ នាងត្រូវកាត់បន្ថយការចំណាយជាអតិបរមា និងប្រមូលប្រាក់យកទៅសងបំណុល មុននឹងទូទាត់ខ្ទង់ចំណាយដទៃ។ ទោះជាបានសងបំណុលរួចរាល់ហើយក្ដី ក៏នាងនៅតែរក្សាទម្លាប់សំច័យប្រាក់ ហើយសន្សំទុកខ្លះសម្រាប់ការវិនិយោគ។
បាត់បង់ការងារ ប៉ុន្តែ រកឃើញអ្វីៗដែលខ្លួនចូលចិត្ត
ឆ្នាំ 2018 ក្រុមហ៊ុនរបស់នាង បានបិទទ្វារ ហើយ Dowe ក៏ត្រូវបាត់បង់ការងារ និងបាត់បង់ប្រាក់បៀវត្ស 200,000 ដុល្លារ។ ជំនួសឱ្យការស្វែងរកការងារថ្មីភ្លាមៗ Dowe សម្រេចចិត្តដើរទេសចរណ៍ពេញមួយឆ្នាំ។
Dowe បានទៅដល់ទីក្រុង ចំនួន 44 របស់ប្រទេសចំនួន 23 ក្នុងពិភពលោក ប៉ុន្តែ Mexico City គឺជាទីក្រុងតែមួយគត់ដែលនាងត្រលប់ទៅលេងច្រើនលើកជាងគេ។
«ខ្ញុំពិតជាចូលចិត្តអារម្មណ៍នៅពេលនៅទីនេះ។ ខ្ញុំចូលចិត្តថាមពលនៅទីនេះ» Dowe រៀបរាប់។
នេះគឺជាមូលហេតុដែលនាំឱ្យ Dowe បោះបង់គម្រោងដំបូងដែលថានឹងត្រលប់ទៅ សហរដ្ឋអាម៉េរិក ដើម្បីស្វែងរកការងារថ្មី។ នាងសម្រេចចិត្តរស់នៅក្នុង ប្រទេសម៉ិចស៊ិក។
ជាមួយនឹងប្រាក់ជាង 500,000 ដុល្លារ នៅក្នុងខ្ទង់វិនិយោគនានា និងប្រហែល 150,000 ដុល្លារ ជាភាគហ៊ុននៅក្នុងក្រុមហ៊ុនចាស់ Dowe គិតថា នាងមានប្រាក់គ្រប់គ្រាន់ដើម្បីរស់នៅក្នុង ប្រទេសម៉ិកស៊ិក យ៉ាងហោចក៏បានមួយរយៈពេល។
«ខ្ញុំបានសងបំណុលរួចស្រេច និងសន្សំប្រាក់បានមួយចំនួន។ នៅពេលដឹងថា ខ្លួនមិនចង់ធ្វើការទៀត ខ្ញុំក៏ចាប់ផ្ដើមរៀបផែនការ» Dowe និយាយដូច្នេះ។
ទោះជាថ្លៃជួលផ្ទះនៅក្នុងទីក្រុង Mexico City មិនទាបជាងបណ្ដាទីក្រុងធំៗផ្សេងទៀត ប៉ុន្តែ នាងនៅតែត្រូវចំណាយតិចជាង បើធៀបនឹងការវិលត្រលប់ទៅរស់នៅ សហរដ្ឋអាម៉េរិក។ ជារួម ខ្ទង់ចំណាយប្រចាំខែរបស់ Dowe ប្រហាក់ប្រហែលនឹង 2,300 ដុល្លារ។
ស្ថានភាពដូចក្នុងសុបិន
ក្នុងដំណើរទេសចរណ៍របស់ខ្លួន Dowe បានបង្ហោះអត្ថបទនិយាយអំពីការដើរត្រាច់ចររបស់ខ្លួនដើម្បីជាដំណឹងជូនដល់ក្រុមគ្រួសារ និងមិត្តភ័ក្ដិ។ យូរៗទៅ នាងទទួលបានការចូលចិត្តច្រើនឡើងៗ ហើយមានអ្នកខ្លះថែមទាំងសុំយោបល់ពីនាងទៀតផង។
«អ្នកដែលខ្ញុំមិនស្គាល់ ភាគច្រើនជាស្ត្រី បានទាក់ទងមកខ្ញុំ និងសួរថា «អ្នកបានឈប់ពីការងារ? ខ្ញុំក៏ចង់ធ្វើដូច្នេះ។ អ្នកអាចចែករំលែកបន្ថែមអំពីប្រការទាំងនោះទេ?» Dowe រៀបរាប់ដូច្នេះ និងបន្ថែមថា៖ «ខ្ញុំបានជួយដល់ពួកគេរហូតចប់ចុង ចប់ដើម ហើយចុងក្រោយខ្ញុំគិតថា នេះអាចជាកិច្ចការជំនួញមួយ»។
ពេលនេះ Dowe ធ្វើកិច្ចការងារដូចទៅនឹងគ្រូបង្វឹកផ្នែកជីវិតមួយរូប ដោយជួយដល់ស្ត្រីទាំងឡាយដែលចង់ឈប់ធ្វើការ និងចង់បោះបង់ការងារបច្ចុប្បន្នដែលមិនស័ក្ដិសមនឹងពួកគេ។ អតិថិជនរបស់ Dowe ភាគច្រើនគឺជាស្ត្រីដែលចង់ទៅរស់នៅឯបរទេស ប៉ុន្តែមិនដឹងថា ខ្លួនធ្វើបានឬអត់។
Dowe ក៏មានឆានែល Youtube ផ្ទាល់ខ្លួនមួយ ដើម្បីចែករំលែកអំពីដំណើរទេសចរណ៍នានារបស់ខ្លួន។
ការងារដែល Dowe កំពុងធ្វើ បាន និងកំពុងនាំយកប្រាក់ចំណូលដល់នាងប្រហែលពី 3,000 ដុល្លារ ដល់ 5,000 ដុល្លារ/ខែ។ «ប្រាក់ចំណូលនេះ ជួយឱ្យខ្ញុំរក្សាបាននូវខ្ទង់វិនិយោគទាំងឡាយដែលខ្ញុំកំពុងមាន» Dowe បន្ថែម។
បើទោះបីជាបច្ចុប្បន្ន Dowe មានមុខជំនួញជោគជ័យមួយ ប៉ុន្តែនាងនៅតែចាត់ទុកថា បានចូលនិវត្តន៍ពេញលេញ។ នាងមិនដែលធ្វើការលើសពី 4 ថ្ងៃនោះទេ នៅក្នុងមួយសប្ដាហ៍ ហើយពេលខ្លះ នាងឈប់ធ្វើការរាប់អាទិត្យ ឬរាប់ខែដើម្បីធ្វើអ្វីដែលនាងចង់ធ្វើ។
«មនុស្សជាច្រើនគិតថា ការចូលនិវត្តន៍មានន័យថា អ្នកមិនធ្វើការអ្វីទាំងអស់ ហើយបើសិនជាអ្នកកំពុងធ្វើការ នោះមិនមែនជាការចូលនិវត្តន៍ពិតប្រាកដ។ ចំណែកខ្ញុំវិញ ខ្ញុំធ្វើកិច្ចការណាដែលខ្ញុំចូលចិត្ត ហើយខ្ញុំធ្វើនៅពេលណាដែលខ្ញុំចង់ធ្វើតែប៉ុណ្ណោះ» Dowe បញ្ជាក់។
ចុងក្រោយ ជីវភាពរបស់ Dowe ពេលនេះ ហាក់ត្រូវបាន «រចនាឡើង» ដើម្បីឱ្យនាងទទួលបានការសប្បាយរីករាយជានិច្ច និងអាចគ្រប់គ្រងខ្លួនឯងបាន ហើយអាចធ្វើអ្វីដែលខ្លួនស្រលាញ់ចូលចិត្ត ដែលនេះទើបជាប្រការសំខាន់បំផុតចំពោះ Dowe៕
នាង Rumeysa Gelgi នៅ ប្រទេសតួកគី ត្រូវបានអង្គការកំណត់ត្រាពិភពលោកហ្គីណេស (Guinness World Records) ទទួលស្គាល់ថាជាស្ត្រីដែលខ្ពស់ជាងគេបង្អស់ ដោយមានកម្ពស់ជាង 2.15 ម៉ែត្រ។
Rumeysa Gelgi អាយុ 24 ឆ្នាំ រស់នៅក្នុងខេត្ត Karabuk កើតជំងឺ Weaver បណ្ដាលឱ្យរាងកាយលូតលាស់លឿនខុសប្រក្រតី នេះបើតាមអង្គការកំណត់ត្រា Guinness World Records។ ឆ្នាំ 2014 នាង Gelgi ធ្លាប់ត្រូវបានគេទទួលស្គាល់ថាជា នារីដែលខ្ពស់ជាងគេក្នុងពិភពលោក នៅក្នុងវ័យ 18 ឆ្នាំ។
Gelgi មិនអាចធ្វើដំណើរដោយគ្មានរទេះសម្រាប់ជនពិការបានឡើយ។ ប៉ុន្តែ នាងអាចផ្លាស់ទីបានក្នុងរយៈពេលខ្លី ដោយប្រើឧបករណ៍សម្រាប់អ្នករៀនដើរ។
«គ្រប់យ៉ាងដែលជាឧបសគ្គ អាចប្រែទៅជាប្រយោជន៍របស់ខ្លួន ដូច្នេះចូរទទួលយកនូវអ្វីដែលជារបស់ខ្លួន ស្វែងយល់អំពីសក្ដានុពលរបស់ខ្លួន និងប្រឹងប្រែងឱ្យអស់ពីលទ្ធភាព» Gelgi និយាយដូច្នេះ។
លោក Craig Glenday និពន្ធនាយកនៃសៀវភៅកំណត់ត្រាពិភពហ្គីណេស ថ្លែងថា៖ «ពិតជាមានកិត្តិយស នៅពេលបានទទួលស្វាគមន៍ Rumeysa ដែលបានត្រលប់មកកាន់កំណត់ត្រាពិភពលោក។ ស្មារតីរឹងមាំ និងមោទកភាពលើខ្លួនឯងនៅពេលបង្ហាញខ្លួននៅចំពោះមុខសាធារណជនរបស់នាងគឺជាប្រភពថាមពលសម្រាប់លើកទឹកចិត្តដល់គ្រប់គ្នា»។
បុរសដែលខ្ពស់ជាងគេបំផុតក្នុងពិភពលោកគឺ Sultan Kosen ក៏ជាពលរដ្ឋមកពី ប្រទេសតួកគឺ ដោយមានកម្ពស់ 2.51 ម៉ែត្រ។ អង្គការហ្គីណេស ឱ្យដឹងថា តំណែងជាបុរស និងស្ត្រីខ្ពស់ជាងគេក្នុងពិភពលោក ដែលសុទ្ធតែជាពលរដ្ឋរបស់ប្រទេសតែមួយគឺជា «រឿងកម្រជួបប្រទះ»។
ករណីដូចគ្នានេះ បានកើតឡើងកាលពីឆ្នាំ 2009។ កាលណោះ Bao Xishun មានកម្ពស់ 2.36 ម៉ែត្រ និង Yao Defen មានកម្ពស់ 2.33 ម៉ែត្រ មកពី ប្រទេសចិន សុទ្ធតែគ្រប់គ្រងតំណែងបុរស និងស្ត្រីដែលមានកម្ពស់ខ្ពស់ជាងគេក្នុងពិភលោក។
ស្ត្រីខ្ពស់ជាងគេបំផុតក្នុងលោកដែលធ្លាប់ត្រូវបាន ហ្គីណេស ទទួលស្គាល់គឺ Zeng Jinlian មកពី ប្រទេសចិន ដោយមានកម្ពស់ជាង 2.46 ម៉ែត្រ ប៉ុន្តែ ស្ត្រីរូបនេះបានទទួលមរណភាពកាលពីឆ្នាំ 1982 ទៅហើយ៕