សង្គម និងសេដ្ឋកិច្ច - La Reine Media

រដ្ឋាភិបាលតម្រូវឱ្យក្រុមហ៊ុនទាំងឡាយនៅ ម៉ាឡេស៊ី ជ្រើសតាំងប្រធានជាស្ត្រីភេទ

រដ្ឋាភិបាលនៃប្រទេស ម៉ាឡេស៊ី បានស្នើឱ្យបណ្ដាក្រុមហ៊ុនដែលបោះផ្សាយមូលបត្រនៅប្រទេសនេះ តែងតាំងស្ត្រីជាប្រធានឱ្យបានយ៉ាងតិចមួយរូប នៅក្នុងគណៈគ្រប់គ្រងរបស់ក្រុមហ៊ុន ចាប់ពីឆ្នាំ 2022 តទៅ។

រដ្ឋមន្ត្រីក្រសួងហិរញ្ញវត្ថុ Tengku Zafrul Abdul Aziz កាលពីថ្ងៃទី 29 តុលា ឱ្យដឹងថា គោលនយោបាយថ្មីដែលត្រូវបានអនុម័តនេះ ក៏ព្រោះតែក្រុមហ៊ុនប្រមាណ 250 ដែលស្មើនឹង ¼ ក្នុងចំណោមបណ្ដាក្រុមហ៊ុនដែលមានឈ្មោះក្នុងផ្សារហ៊ុននៅប្រទេសនេះ មិនទាន់មានវត្តមានស្ត្រីនៅក្នុងក្រុមប្រឹក្សាភិបាលនៅឡើយ។

សេចក្ដីសម្រេចនេះក៏ដើម្បីជា «ការទទួលស្គាល់តួនាទីរបស់ស្ត្រីនៅក្នុងការសម្រេចចិត្ត និងបង្កើនតួនាទីជាថ្នាក់ដឹកនាំ រួមនឹងប្រសិទ្ធភាពរបស់ក្រុមប្រឹក្សាភិបាលផងដែរ»។

គោលនយោបាយនេះមានសុពលភាពចំពោះបណ្ដាក្រុមហ៊ុនធំៗចាប់ពីខែកញ្ញា ហើយតាមគម្រោង វានឹងត្រូវអនុវត្តចំពោះក្រុមហ៊ុនទាំងអស់នៅខែមិថុនា ឆ្នាំ 2023។

ក្រុមប្រឹក្សាភិបាលនៃបណ្ដាក្រុមហ៊ុននៅ អឺរ៉ុប តែងយកចិត្តទុកដាក់លើបញ្ហាសមភាពយ៉េនឌ័រ។ នៅប្រទេស ន័រវែស អេស្ប៉ាញ និង អ៊ីតាលី ជាដើម បានអនុម័តច្បាប់ដើម្បីបង្កើនវត្តមានរបស់ស្ត្រីនៅក្នុងក្រុមប្រឹក្សាភិបាលនៃក្រុមហ៊ុននានា។

នៅទ្វីប អាស៊ី ប្រការខាងលើនេះ ត្រូវបានអនុវត្តនៅក្នុងប្រទេស ឥណ្ឌា ប៉ុន្តែ វាជារឿងកម្រសម្រាប់ប្រទេសជាច្រើនផ្សេងទៀតនៅក្នុងទ្វីបនេះ៕

October 30, 2021

មិនមែន Elon Musk នោះទេ ប៉ុន្តែ បុរសពីរនាក់នេះទើបជាសហស្ថាបនិកពិតប្រាកដរបស់ក្រុមហ៊ុន Tesla (ប្រវត្តិរបស់ក្រុមហ៊ុននេះ)

បច្ចុប្បន្ននេះ Tesla គឺជាក្រុមហ៊ុនផលិតរថយន្តដែលមានតម្លៃមូលធនទីផ្សាររហូតដល់ជាង មួយលានលាន (ទ្រីលាន/1,000,000,000,000) ដុល្លារអាម៉េរិក ពោលគឺធំជាងគេបំផុតក្នុងពិភពលោក។ ជោគជ័យរបស់ក្រុមហ៊ុននេះ ផ្សារភ្ជាប់ជាមួយនឹងមហាសេដ្ឋីដ៏ល្បីឈ្មោះ Elon Musk។ ក៏ប៉ុន្តែ ខុសពីការគិតរបស់មនុស្សស្ទើរគ្រប់គ្នា លោក Musk មិនមែនជាស្ថាបនិកដែលបានបង្កើត Tesla ដំបូងគេនោះឡើយ។ លោក Musk ជានាយកប្រតិបត្តិចាប់ពីខែតុលា ឆ្នាំ 2008 និងជាមនុស្សទីបួនដែលកាន់តំណែងនេះនៅក្នុងក្រុមហ៊ុន Tesla។

សហស្ថាបនិកពិតប្រាកដចំនួនពីរនាក់របស់ Tesla គឺ Martin Eberhard និង Marc Tarpenning។ ពួកគាត់ចាប់ផ្ដើមគិតអំពី Tesla បន្ទាប់ពី General Motors បញ្ចប់កម្មវិធីរថយន្តអគ្គិសនី EV1 របស់ខ្លួន។

ស្ថាបនិកដំបូងពីររូបរបស់ក្រុមហ៊ុន Tesla

Tesla Motors ត្រូវបានដាក់ឈ្មោះទៅតាមអ្នកវិទ្យាសាស្ត្រ Nikola Tesla។ ក្រុមហ៊ុននេះត្រូវបានបង្កើតឡើងកាលពីខែកក្កដា ឆ្នាំ 2003 ដោយ Martin Eberhard និង Marc Tarpenning។ អ្នកទាំងពីរ ដំបូងឡើយមានតួនាទីជា CEO (នាយកប្រតិបត្តិ) និង CFO (នាយកផ្នែកហិរញ្ញវត្ថុ) របស់ក្រុមហ៊ុន Tesla។ Eberhard ធំឡើងនៅឯតំបន់ Kensington រដ្ឋ California និងបានរៀននៅសាកលវិទ្យាល័យ Illinois នៅទីក្រុង Urbana-Champain ជាសាលាដែលលោកទទួលបានសញ្ញាបត្របរិញ្ញាផ្នែកវិស្វកម្មកុំព្យូទ័រ (computer engineering) កាលពីឆ្នាំ 1982 និងអនុបណ្ឌិតផ្នែកបច្ចេកទេសអគ្គិសនី ឆ្នាំ 1984។

ចំណែក Tarpenning វិញ ធំឡើងនៅឯតំបន់ Sacramento រដ្ឋ California និងទទួលបានសញ្ញាបត្រផ្នែកវិទ្យាសាស្ត្រកុំព្យូទ័រ (computer science) នៅសាកលវិទ្យាល័យ California ក្នុងតំបន់ Berkeley ឆ្នាំ 1985។ លោកបានចាប់ផ្ដើមការងារដំបូងក្នុងក្រុមហ៊ុន Textron នៅប្រទេស អារ៉ាប់ប៊ីសាអូឌីត។ ក្រោយមក លោកក៏បានអភិវឌ្ឍផ្នែកទន់ (software) និងកម្មវិធីបង្កប់ (firmware) មួយចំនួនឱ្យក្រុមហ៊ុននានា។ លោកក៏ធ្លាប់ជាអនុប្រធានផ្នែកបច្ចេកទេសរបស់ក្រុមហ៊ុន Packet Design ផងដែរ។

Eberhard និង Tarpenning បង្កើត Tesla Motors ឡើងដោយមានមហិច្ឆតាធ្វើឱ្យមានការប្រែប្រួលក្នុងវិស័យឧស្សាហកម្មរថយន្ត។ ពួកគេមានបំណងបង្កើតរថយន្តអគ្គិសនីដែលអ្នកណាៗក៏ចង់បាន៖ តម្លៃទាប មិនប៉ះពាល់ដល់បរិស្ថាន និងការចល័តបានលឿន។

បន្ទាប់ពី Eberhard និង Tarpenning បុគ្គលិកទីបីរបស់ Tesla គឺ Ian Wright ដែលបានចូលបម្រើការប៉ុន្មានខែប៉ុណ្ណោះបន្ទាប់ពីក្រុមហ៊ុនត្រូវបានបង្កើតឡើង។ ខែកុម្ភៈ ឆ្នាំ 2004 ពួកគេប្រមូលទុនបានដោយជោគជ័យពីអ្នកវិនិយោគជាច្រើន ក្នុង Elon Musk បោះទុនច្រើនជាងគេ។

ការជួបមុខដំបូងជាមួយ Elon Musk

Eberhard និង Tarpenning បានជួប Elon Musk ដំបូងនៅក្នុងកិច្ចប្រជុំមួយសម្រាប់សមាជិករបស់ Mars Society ដែលជាអង្គការមិនស្វែងរកកម្រៃសម្រាប់ការស្រាវជ្រាវ និងរស់នៅលើពិភពព្រះអង្គារ។ ដំណាក់កាលនោះ លោក Musk មិនទាន់បានបង្កើត SpaceX នៅឡើយ។ ពួកគេបានយល់ចិត្តគ្នា ដោយសារតែមានចក្ខុវិស័យស្រដៀងគ្នា។

បន្ទាប់ពីការប្រមូលទុនជុំ Series A លោក Elon Musk បានក្លាយជាប្រធានក្រុមហ៊ុន Tesla។ មួយឆ្នាំក្រោយមក Tesla បានសហការជាមួយក្រុមហ៊ុនផលិតរថយន្ត Lotus Cars របស់ អង់គ្លេស ហើយក្រោយមក រថយន្តដំបូងរបស់ Tesla ឈ្មោះ Roadster ក៏បានបង្ហាញខ្លួន។

ឆ្នាំដដែល សហស្ថាបនិករបស់ Google គឺលោក Sergey Brin និង Larry Page ក៏បានចូលរួមក្នុងការប្រមូលទុន Series B របស់ Tesla។ Musk នៅតែជាអ្នកនាំមុខក្នុងជុំប្រមូលទុនលើកនេះ។ លោក Musk ក្រោយមកក៏បានប្រកាសអំពីគម្រោង «អាថ៌កំបាំង» របស់ខ្លួនសម្រាប់ Tesla នោះគឺ ប្រើប្រាស់ទុនដែលប្រមូលបានដើម្បីអភិវឌ្ឍរថយន្តមួយប្រភេទដែលមានតម្លៃទាបសមរម្យ ហើយក៏បង្កើតបានរថយន្តអគ្គិសនីប្រហាក់ប្រហែលសព្វថ្ងៃ។

ក្នុងឆ្នាំ 2006 ថ្នាក់ដឹកនាំរបស់ Tesla មានការប្រែប្រួល។ លោក Eberhard លាលែងពីតំណែង CEO ដោយមកធ្វើជាទីប្រឹក្សា។ ចំណែក Michael Marks ដែលជាអ្នកវិនិយោគមួយរូបរបស់ Tesla ក៏បានឡើងធ្វើជា CEO បណ្ដោះអាសន្ន រហូតដល់អ្នកប្រណាំងឡាន Ze’ev Drori បានចូលមកជំនួសនៅខែវិច្ឆិកា។

ឆ្នាំ 2008 Tesla មានបញ្ហាខ្វែងគំនិតគ្នារវាងសហស្ថាបនិក។ ជាលទ្ធផល សហស្ថាបនិកដំបូងគេពីរនាក់ គឺលោក Martin Eberhard និង Mark Tarpenning បានចាកចេញពីក្រុមហ៊ុន។ នេះក៏ជាដំណាក់កាលរថយន្ត Tesla គ្មានដំបូលដំបូង ត្រូវបានប្រគល់ឱ្យ Elon Musk ហើយខ្សែរោងចក្រផលិតរថយន្តនេះក៏បានចាប់ផ្ដើម។

ខែតុលា ឆ្នាំ 2008 Elon Musk បានក្លាយជា CEO របស់ Tesla និងបានបញ្ឈប់បុគ្គលិកចំនួន 25%។ ដំណាក់កាលនេះ Tesla មានសាច់ប្រាក់ក្នុងដៃតែ 9 លានដុល្លារប៉ុណ្ណោះ និងកំពុងប្រឈមនឹងបញ្ហាមិនអាចប្រគល់ទំនិញទាន់ពេល។ Tesla ត្រូវបោះផ្សាយមូលបត្របំណុលដើម្បីប្រមូលទុន 40 លានដុល្លារ ក្នុងបំណងបញ្ចៀសការក្ស័យធន។

ដើមឆ្នាំ 2009 Tesla បញ្ចេញរថយន្តគំរូ Model S ដែលមានតម្លៃចាប់ពី 76,000 ដុល្លារ។ មិនយូរប៉ុន្មាន Daimler AG បានទិញភាគហ៊ុន 10% របស់ Tesla ក្នុងតម្លៃ 50 លានដុល្លារ។ ខ្ទង់វិនិយោគនេះបានជួយឱ្យ Tesla រួចពីហានិភ័យនៃការក្ស័យធននៅឆ្នាំបន្ទាប់។

ឆ្នាំ 2009 ដដែល អតីត CEO របស់ Tesla លោក Martin Eberhard បានចោទប្រកាន់លោក Elon Musk ថា បានកែប្រែប្រវត្តិសាស្ត្រ និងបានប្ដឹងពីបទបរិហារកេរ្ដិ៍។

ខែកញ្ញា ឆ្នាំ 2009 Tesla និង Martin Eberhard បានប្រកាសកិច្ចព្រមព្រៀងមួយស្ដីពីអ្នកដែលអាចហៅខ្លួនឯងថាជាសហស្ថាបនិករបស់ក្រុមហ៊ុននេះ។ កិច្ចព្រមព្រៀងចែងថា មនុស្ស 5 នាក់ដែលត្រូវបានគេចាត់ទុកថាជាសហស្ថាបនិករបស់ Tesla រួមមាន Elon Musk, JB Straubel (កាលណោះជាប្រធានផ្នែកបច្ចេកវិទ្យារបស់ Tesla), Martin Eberhard, Marc Tarpenning និង Ian Wright។

នៅក្នុងកិច្ចសម្ភាសជាមួយទូរទស្សន៍ CNBC កាលពីពេលថ្មីៗនេះ លោក Eberhard ឱ្យដឹងថា លោកនៅតែគាំទ្រ និងនៅតែជាម្ចាស់ភាគហ៊ុនមួយរូបរបស់ Tesla ព្រមទាំងបានអះអាងថា រថយន្តអគ្គិសនីគឺជាគន្លឹះដែលអាចជួយសង្គ្រោះភពផែនដី។ ចំណែកលោក Tarpenning វិញ បាននិយាយថា ពេលខ្លះ លោកក៏នៅតែនិយាយរក Musk។ រំលឹកពីអតីតកាល លោកបញ្ជាក់ថា មិនបានស្ដាយក្រោយនោះទេ ព្រោះថា «តាំងពីដើមដល់ចប់ គ្រប់យ៉ាងល្អប្រសើរ បូករួមទាំងបញ្ហាអាក្រក់បំផុត និងល្អបំផុត»៕

October 28, 2021

កម្ពុជា នឹងបើកទទួលទេសចរដែលបានចាក់វ៉ាក់សាំងពេញលេញនៅទូទាំងប្រទេស ក្រោយពីការសាកល្បងនៅក្រុង ព្រះសីហនុ ខេត្តកោះកុង និងខេត្តសៀមរាប

រដ្ឋមន្ត្រីក្រសួងទេសចរណ៍ ឯកឧត្តម ថោង ខុន បានឱ្យដឹងថា ការបើកដំណើរការកម្មវិធីទេសចរណ៍វ៉ាក់សាំងពេញលេញនៅទូទាំងប្រទេស នឹងអនុវត្តក្រោយគម្រោងសាកល្បងនៅក្នុងខេត្ត ព្រះសីហនុ និងតំបន់តារាសាគរនៃខេត្ត កោះកុង នៅចុងខែវិច្ឆិកា ឆ្នាំ 2021 ខណៈដែលខេត្ត សៀមរាប ត្រៀមអនុវត្តនៅក្នុងខែមករា ឆ្នាំ 2022។

ការចាប់ផ្តើមទទួលភ្ញៀវទេសចរណ៍អន្តរជាតិឡើងវិញ នៅក្នុងខេត្តទាំង 3 ខាងលើ គឺជាជំហានទីមួយ មុននឹងឈានដល់ជំហានទីពីរ ដែលអនុញ្ញាតឱ្យទទួលទេសចរអន្តរជាតិ មកទស្សនាកំសាន្តនៅតំបន់ទេសចរណ៍សុវត្ថិភាពដទៃទៀត និងការបើកទទួលទេសចរណ៍វ៉ាក់សាំងពេញលេញនៅទូទាំងប្រទេស ក្នុងជំហានទីបី។ នេះបើតាមប្រសាសន៍របស់ ឯកឧត្តម ថោង ខុន ដែលជាប្រធានក្រុមការងាររាជរដ្ឋាភិបាលនិងឯកជន ដើម្បីស្តារ និងលើកស្ទួយវិស័យទេសចរណ៍ ក្នុង និងក្រោយវិបត្តិ COVID-19 ដែលបានបញ្ជាក់នៅក្នុងពិធីប្រកាសផ្សព្វផ្សាយ និងដាក់ឱ្យអនុវត្ត «ផែនការយុទ្ធសាស្ត្រ ស្តីពី ការបើកទទួលទេសចរណ៍វ៉ាក់សាំង» នាថ្ងៃទី 28 ខែតុលានេះ។

ការបើកទទួលភ្ញៀវទេសចរអន្តរជាតិនេះ គឺស្ថិតក្នុងកម្មវិធីទេសចរណ៍វ៉ាក់សាំង ដែលទេសចរអន្តរជាតិនឹងត្រូវបានអនុញ្ញាតឱ្យស្នាក់នៅ និងទស្សនាកំសាន្តក្នុងតំបន់ទេសចរណ៍សុវត្ថិភាព រយៈពេល 5 ថ្ងៃ ដោយមិនតម្រូវឱ្យធ្វើចត្តាឡីស័កនោះទេ ប៉ុន្តែ តម្រូវឱ្យមានប័ណ្ណបញ្ជាក់ពីការចាក់វ៉ាក់សាំងរួចរាល់ និងធ្វើតេស្តរហ័ស នៅពេលមកដល់អាកាសយានដ្ឋានរបស់ កម្ពុជា។

យោងតាម ឯកឧត្តម ឧបនាយករដ្ឋមន្ត្រី អូន ព័ន្ធមុនីរត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការជាតិអភិវឌ្ឍន៍ទេសចរណ៍ ក្រសួងក៏មានផែនការទ្រទ្រង់ និងគ្រប់គ្រងគោលដៅទេសចរណ៍ក្នុងស្រុកសុវត្ថិភាពផងដែរ៕

October 28, 2021

ព្រឹត្តិការណ៍ប្រកួតបាល់ទាត់ដណ្ដើមពានរង្វាន់សម្តេចតេជោ ហ៊ុន សែន ថ្នាក់ជាតិ ឆ្នាំ 2021 ត្រូវបានកែប្រែ

គណៈកម្មការប្រកួតបាល់ទាត់ជាតិកម្ពុជា (CNCC) កំណត់យកប្រព័ន្ធប្រកួត និងពេលវេលាប្រកួតត្រូវថ្មី សម្រាប់ពានរង្វាន់សម្តេចតេជោ ហ៊ុន សែន ថ្នាក់ជាតិ ឆ្នាំ 2021 ដោយក្រុមនានានឹងត្រូវប្រកួតតែមួយជើងគត់នៅក្នុងវគ្គជម្រុះ។

ការប្រកួតកីឡាបាល់ទាត់ ពានរង្វាន់សម្ដេចតេជោ ហ៊ុន សែន ថ្នាក់ជាតិ លើកទី 15 រដូវកាល 2021 ដែលគ្រោងនឹងចាប់ផ្ដើមពីថ្ងៃទី 9 ខែវិច្ឆិកា ឆ្នាំ 2021 ខាងមុខនេះ នឹងត្រូវប្រើប្រាស់ប្រព័ន្ធប្រកួតថ្មី ដែលមានរយៈពេលខ្លីជាងមុន។ ក្នុងនោះ ការប្រកួតវគ្គជម្រុះ 16 ក្រុមថ្នាក់ជាតិ និងវគ្គ 8 ក្រុមចុងក្រោយ ត្រូវជួបគ្នាតែមួយជើងគត់ ហើយក្រុមទាំងឡាយដែលបានបាញ់នឹងធ្លាក់ចេញពីវគ្គជម្រុះតែម្តង។

ដើមឡើង ការប្រកួតថ្នាក់ជាតិត្រូវជូបគ្នាចំនួនពីរជើង ទាំងវគ្គ 16 ក្រុម និងវគ្គ 8 ក្រុមចុងក្រោយ ក្នុងនោះ វគ្គពាក់កណ្ដាលផ្ដាច់ព្រ័ត្រ ពីរក្រុមដែលឈ្នះនឹងត្រូវឡើងទៅប្រកួតដណ្ដើមជើងឯក និងចំណាត់ថ្នាក់លេខ 2 ខណៈពីរក្រុមដែលចាញ់នឹងត្រូវប្រកួតដណ្ដើមចំណាត់ថ្នាក់លេខ 3។

នាថ្ងៃទី 09 ខែវិច្ឆិកា ឆ្នាំ 2021 នឹងមាន 4 ប្រកួត៖ ក្រុមព្រះខ័នរាជស្វាយរៀង នឹងត្រូវប្រកួតជាមួយក្រុមកោះកុងអេហ្វ.ស៊ី, ក្រុមភ្នំពេញក្រោន នឹងប៉ះក្រុមខេត្តត្បូងឃ្មុំ, ក្រុមវិសាខា នឹងប៉ះជាមួយក្រុមខេត្តបន្ទាយមានជ័យ និងក្រុមណាហ្គាវើលដ៍ ត្រូវប្រកួតនឹងក្រុមនគរបាលជាតិ។

ព្រឹត្តិការណ៍ប្រកួតបាល់ទាត់ដណ្ដើមពានរង្វាន់សម្តេចតេជោ ហ៊ុន សែន ថ្នាក់ជាតិ ឆ្នាំ 2021 ដែលគ្រោងនឹងចាប់ផ្តើមនៅថ្ងៃទី 9 ខែវិច្ឆិកា ខាងមុខនេះ នឹងត្រូវបញ្ចប់នៅថ្ងៃទី 25 ខែវិច្ឆិកា ឆ្នាំ 2021៕

October 28, 2021

កម្ពុជាចូលរួមវេទិកាប្រចាំឆ្នាំ របស់ធនាគារពិភពលោក ស្តីពី ភាពជាដៃគូនៃការគ្រប់គ្រង និងប្រឹក្សាលើទុនបម្រុងអន្តរជាតិ

ឯកឧត្ដម ស៊ុំ សន្និសិទ្ធ ទេសាភិបាលរងរបស់ធនាគារជាតិនៃកម្ពុជា កាលពីល្ងាចថ្ងៃទី 26 ខែតុលា ឆ្នាំ 2021 បានអញ្ជើញចូលរួមវេទិកាប្រចាំឆ្នាំរបស់ធនាគារពិភពលោក ស្តីពី ភាពជាដៃគូនៃការគ្រប់គ្រង និងប្រឹក្សាលើទុនបម្រុងអន្តរជាតិ (RAMP)។

វេទិកាដែលមានវត្តមានរបស់ថ្នាក់ដឹកនាំធនាគារកណ្ដាល នាយកប្រតិបត្តិផ្នែកហិរញ្ញវត្ថុ និងមន្ត្រីជំនាញគ្រប់គ្រងទុនបម្រុងអន្តរជាតិនេះ មានគោលបំណងផ្ដល់ឱកាសសម្រាប់ការពិភាក្សាលើស្ថានភាពសេដ្ឋកិច្ចពិភពលោក បទពិសោធន៍នៃការគ្រប់គ្រងទុនបម្រុងអន្តរជាតិ និងទស្សនវិស័យនាពេលខាងមុខ ហើយប្រធានបទបច្ចុប្បន្នភាពសំខាន់ៗដែលវេទិកានេះបានលើកឡើងដែរនោះរួមមាន៖ ការកើនឡើងនៃអត្រាអតិផរណា ការធ្វើប្រក្រតីកម្មនយោបាយរូបិយវត្ថុ ការកើនឡើងកម្រិតបំណុល ការប្រែប្រួលអាកាសធាតុ និងបច្ចេកវិទ្យាហិរញ្ញវត្ថុ។

ទាក់ទងនឹងបច្ចេកវិទ្យាហិរញ្ញវត្ថុ វេទិកានេះក៏បានលើកឡើងអំពីកំណើននៃការប្រើប្រាស់ពីសំណាក់អតិថិជន ដែលជំរុញឱ្យមានការបង្កើតរូបិយប័ណ្ណអេឡិចត្រូនិក ផ្អែកលើបច្ចេកវិទ្យា Blockchain ដូចជា Crytocurrencies និងរូបិយវត្ថុអេឡិចត្រូនិករបស់ធនាគារកណ្ដាល (Central Bank Digital Currency/CBDC) ដែលកំពុងក្លាយជាជំហានថ្មីនៃការប្រែប្រួលរបស់រូបិយប័ណ្ណ។

ចំពោះការប្រើប្រាស់បច្ចេកវិទ្យាហិរញ្ញវត្ថុនៅ កម្ពុជា ធនាគារជាតិ បានគាំទ្រដល់ការអភិវឌ្ឍប្រព័ន្ធទូទាត់ទំនើប និងបានដាក់ឱ្យដំណើរការប្រព័ន្ធទូទាត់បាគង ដែលប្រើប្រាស់បច្ចេកវិទ្យា Blockchain សម្រាប់ជាប្រព័ន្ធទូទាត់កន្លោង ដើម្បីលើកកម្ពស់បរិយាបន្នហិរញ្ញវត្ថុ (Financial Inclusion) ដែលជាការផ្ដល់វេសាហិរញ្ញវត្ថុដល់អតិថិជនគ្រប់ស្រទាប់ តម្លាភាព គណនេយ្យភាព និងអាចទូទាត់ឆ្លងគ្រឹះស្ថានបាន (interoperability) ជួយសម្រួលការទូទាត់ទាំងក្នុងស្រុក និងសមាហរណកម្មទៅក្នុងតំបន់៕

October 28, 2021

ធុញនឹងការបង្កើតរថយន្តប្រណិត ជាងឈើងាកមកធ្វើរថក្រោះវិញម្ដង

ខុសពី «កំពូលរថយន្ត» មុនៗដែលជាស្នាដៃរបស់ខ្លួន រថពាសដែក EBR 105 ថ្មីដែលធ្វើពីឈើនេះត្រូវបានច្នៃឡើងដោយយោងទៅតាមលំនាំនៃរថយន្ត Mitsubishi។

ក្រោយពីមានឈ្មោះល្បីទាក់ទងនឹងផលិតផលធ្វើពីឈើ ថ្មីៗនេះ បុរសជនជាតិវៀតណាម ម្នាក់ ឈ្មោះ Truong Van Dao បន្តបញ្ចេញស្នាដៃថ្មី ប្លែកជាងមុន។ ផលិតផលថ្មីជារថពាសដែក EBR 105 ធ្វើអំពីឈើនេះ យកគំរូតាមរថយន្ត Mitsubishi ជំនាន់ចាស់។

យានយោធា EBR 105 គឺជារថពាសដែករបស់កងទ័ពនៃ ប្រទេសបារាំង ធ្វើការចល័តដោយកង់ចំនួន 8 គ្រាប់ និងបំពាក់កាំភ្លើងធំ។

មុនពេលបង្ហាញរថពាសដែក EBR 105 ធ្វើអំពីឈើនេះ បុរសជនជាតិវៀតណាម Truong Van Dao ក៏ធ្លាប់បានច្នៃឈើទៅជារថយន្តប្រណិតជាច្រើនប្រភេទមកហើយ មានដូចជា Bugatti Chiron, Lamborghini Sian Roadster, Ferrari GTO 250 និង BMW 328 ជាដើម៕

October 27, 2021

មនុស្សអាចរុញច្រានផែនដីគេចចេញឆ្ងាយពីព្រះអាទិត្យដើម្បីរក្សាជីវិត ដោយប្រើរ៉ុក្កែតយក្សនៅប៉ូលខាងត្បូង

នៅពេលព្រះអាទិត្យបញ្ចេញថាមពលច្រើនហួស ការរុញផែនដីឱ្យចេញឆ្ងាយដោយប្រើប្រាស់ម៉ាស៊ីនរុញច្រានដ៏មហិមា អាចជាជម្រើសមួយដែលក្រុមអ្នកវិទ្យាសាស្ត្រគិតដល់។

ក្នុងរយៈពេលមួយពាន់លានឆ្នាំទៀត ព្រះអាទិត្យនឹងបញ្ចេញកម្ដៅខ្លាំងជាងបច្ចុប្បន្ន នាំឱ្យបរិមាណនៃអុកស៊ីសែននៅលើផែនដីត្រូវថយចុះរហូតដល់ថ្នាក់មិនអាចទ្រទ្រង់ជីវិតស្មុគស្មាញបន្តទៀតបាន នេះបើតាមអត្ថបទស្រាវជ្រាវដែលត្រូវបានចុះផ្សាយនៅលើទំព័រទស្សនាវដ្ដី Nature Geoscience។

អ្នកវិទ្យាសាស្ត្រ Ethan Siegel បានលើកឡើងនូវដំណោះស្រាយដ៏មហាអស្ចារ្យមួយ នោះគឺការដំឡើងម៉ាស៊ីនរ៉ុក្កែតខ្នាតយក្សនៅតំបន់ប៉ូលខាងត្បូង ដើម្បីផ្លាស់ទីគន្លងគោចររបស់ផែនដី។

ជាការពិត បរិមាណនៃ អេល្យូម ក្នុងស្នូលរបស់ព្រះអាទិត្យ ចេះតែកើនឡើងទៅតាមពេលវេលា ដែលនាំឱ្យវារួញចូលមកវិញដោយសារតែកម្លាំងទំនាញ បណ្ដាលឱ្យស្នូលខាងក្នុងព្រះអាទិត្យឡើងកម្ដៅកាន់តែខ្លាំង ធ្វើឱ្យដំណើរនៃប្រតិកម្មនុយក្លេអែរកាន់តែលឿនជាងមុន។ ប្រការនេះនឹងនាំឱ្យបរិមាណថាមពលដែលព្រះអាទិត្យបញ្ចេញមកក្រៅ ត្រូវកើនឡើងប្រហែល 10% ក្នុងរយៈពេលមួយពាន់លានឆ្នាំ ខណៈដែលផែនដីមានតែខែលធម្មជាតិប៉ុណ្ណោះសម្រាប់ការពារខ្លួន។ ដូច្នេះហើយបានជា អ្នកវិទ្យាសាស្ត្រ Ethan Siegel លើកឡើងនូវវិធីសាស្ត្រនេះ។

លោក Ethan Siegel គណនាឃើញថា ផែនដីត្រូវការផ្លាស់ទីចេញឆ្ងាយពីព្រះអាទិត្យប្រមាណ 4.9% បន្ថែមទៀត ពីគម្លាត់មធ្យម 149.6 លានគីឡូម៉ែត្រ ឡើងទៅ 164 លានគីឡូម៉ែត្រ ដើម្បីរក្សាបរិមាណនៃថាមពលដែលទទួលបានពីព្រះអាទិត្យឱ្យនៅដូចបច្ចុប្បន្ន។

https://www.youtube.com/watch?v=gieE-9NZeY4

ម៉ាស៊ីនដែលប្រើប្រាស់សម្រាប់ការផ្លាស់ទីផែនដីនេះ នឹងត្រូវការថាមពលច្រើនជាង 500,000 ដង ធៀបនឹងថាមពលសរុបដែលមនុស្សជាតិបង្កើតឡើងជាបន្តបន្ទាប់ក្នុងរយៈពេលពីរពាន់លានឆ្នាំ។ សាស្ត្រាចារ្យ Ethan Siegel ថ្លែងថា ប្រភពថាមពលនេះ អាចត្រូវបានផ្ដល់ដោយប្រព័ន្ធផ្ទាំងសូឡាដ៏មហិមា។

ម៉ាស៊ីនរុញច្រាននឹងត្រូវបានបង្កើតឡើងនៅតំបន់ប៉ូលខាងត្បូងរបស់ផែនដី។ វានឹងមិនរាំងស្ទះដល់ទិសដៅបច្ចុប្បន្នរបស់ផែនដី ហើយឆ្លងកាត់រាប់លានឆ្នាំ វាអាចនាំផែនដីទៅកាន់គន្លងគោចរធំជាង និងសុវត្ថិភាពជាង ធៀបនឹងព្រះអាទិត្យ។

យន្តការនៃការផ្លាស់ទីអាចរួមមានទាំងការបាញ់ចេញនូវរលកនៃគ្រាប់ដែលផ្ទុកអគ្គិសនី ដែលអាចរុញច្រានផែនដីទៅមុខដោយប្រើគោលការណ៍រូបវិទ្យាដូចទៅនឹងការបាញ់បង្ហោះរ៉ុក្កែតចូលទៅក្នុងទីអវកាស ប៉ុន្តែទាមទារឱ្យមានថាមពលប្រហាក់ប្រហែលនឹងការបាញ់រ៉ុក្កែតឡើងទីអវកាសចំនួន 300,000,000,000,000,000,000 ដងឯណោះ។

យោងតាមសាស្ត្រាចារ្យ Siegel គន្លងគោចរថ្មីនឹងនាំផែនដីចេញពីផ្លូវគោចររបស់វត្ថុអវកាសមួយចំនួន និងចូលទៅដល់ផ្លូវហោះហើររបស់វត្ថុអវកាសដទៃ។ ប៉ុន្តែ យើងអាចសម្រេចគោលដៅនៃការកាត់បន្ថយបរិមាណវិទ្យុសកម្មដែលជះចេញពីព្រះអាទិត្យមកលើផែនដី៕

October 27, 2021

SEA Games 31 ត្រូវបានប្ដូរកាលបរិច្ឆេទថ្មី ខណៈ ASEAN Para Games ឆ្នាំនេះក៏ត្រូវលុបចោល

វៀតណាម បានសម្រេចលើកព្រឹត្តិការណ៍ SEA Games 31 ទៅធ្វើនៅត្រីមាសទីពីរ ឆ្នាំ 2022 ព្រមទាំងសម្រេចមិនប្រារព្ធព្រឹត្តិការណ៍ ASEAN Para Games 11 ផងដែរ។

យោងតាមប្រភពព័ត៌មានពី ប្រទេសវៀតណាម SEA Games 31 នៅប្រទេសនេះ ត្រូវបានលើកទៅធ្វើនៅត្រីមាសទីពីរ ឆ្នាំ 2022 ជំនួសឱ្យការចាប់ផ្ដើមនៅថ្ងៃទី 21 ខែវិច្ឆិកា ឆ្នាំ 2021 ដោយសារតែបញ្ហា COVID-19។ យោងតាមកាលបរិច្ឆេទថ្មី ពិធីសម្ពោធបើកព្រឹត្តិការណ៍ SEA Games 31 នឹងត្រូវបានធ្វើឡើងនៅខែឧសភា ឆ្នាំ 2022។ ក្រៅពីនេះ វៀតណាម ក៏បានសម្រេចមិនប្រារព្ធព្រឹត្តិការណ៍ Paragames 11 ផងដែរ ដោយសារបញ្ហាហិរញ្ញវត្ថុ។

SEA Games 31 តាមគម្រោង នឹងមានមនុស្សចូលរួមប្រមាណ 20,000 នាក់ មកពីក្រុមកីឡាករចំនួន 11 ក្រុម នៅក្នុងតំបន់អាស៊ីអាគ្នេយ៍។ ក្រុមកីឡាករនឹងប្រកួតប្រជែងនៅក្នុងវិញ្ញាសារចំនួន 40 នៅ ប្រទេសវៀតណាម។

នេះគឺជាលើកទីពីរដែល ប្រទេសវៀតណាម ទទួលប្រារព្ធព្រឹត្តិការណ៍ SEA Games បន្ទាប់ពីបានធ្វើជាម្ចាស់ផ្ទះលើកទីមួយកាលពីឆ្នាំ 2003៕

October 27, 2021

វគ្គជម្រុះពូល K នៃព្រឹត្តិការណ៍ AFC U23 Asian Cup 2022៖ ជប៉ុន ឈ្នះ កម្ពុជា 4-0

នៅក្នុងការប្រកួតជម្រុះពូល K នៅកីឡដ្ឋាន J-Village នៃព្រឹត្តិការណ៍ AFC U23 ASIAN CUP 2022 ក្រុមម្ចាស់ផ្ទះ ជប៉ុន ក្រោមអាយុ23 ឆ្នាំ បានយកឈ្នះក្រុម កម្ពុជា ក្រោមអាយុ 23 ឆ្នាំ ដោយលទ្ធផល 4-0 កាលពីថ្ងៃអង្គារ ទី 26 ខែតុលា ឆ្នាំ 2021។

នៅក្នុងវគ្គទីមួយ ក្រុម កម្ពុជា បានចាញ់ ក្រុមជប៉ុន ក្នុងលទ្ធផល 0-2 ខណៈវគ្គទី 2 ក្រុម ជប៉ុន ក៏បានបន្តឈ្នះ 2 គ្រាប់ទៀត។ ពេលនេះ ពូល K ក្រុម U23 ជប៉ុន ឈរលេខ 1 ដោយរកបាន 3 ពិន្ទុ។ ចំណែកក្រុម កម្ពុជា រកបាន 3 ពិន្ទុ ឈរលេខ 2 បន្ទាប់ពីបានឈ្នះក្រុម ហុងកុង 4-2 កាលពីថ្ងៃទី 23 ខែតុលា។

ស្អែកនេះ ក្រុម ជប៉ុន នឹងត្រូវប្រកួតជាមួយក្រុម ហុងកុង ដើម្បីអាចឡើងទៅវគ្គ 16 ក្រុម ដោយស្វ័យប្រវត្តិ សម្រាប់វគ្គជម្រុះនៃជុំផ្តាច់ព្រ័ត្រ។

វគ្គជម្រុះ AFC U23 ASIAN CUP Uzbekistan 2022 មានក្រុមចូលរួមសរុបចំនួន 41 ក្រុម មកពីទូទាំងទ្វីបអាស៊ី ដោយបែងចែកជា 11 ពូល ហើយក្រុមចំណាត់ថ្នាក់លេខ 1 នៃពូល នីមួយៗ រួមនឹងក្រុមចំណាត់ថ្នាក់លេខ 2 ល្អបំផុតចំនួន 4 ក្រុម (សរុប 16 ក្រុម) នឹងត្រូវឡើងទៅប្រកួតវគ្គជម្រុះនៃជុំផ្តាច់ព្រ័ត្រ នៅ ប្រទេសអ៊ូសបេគីស្ថាន ឆ្នាំ 2022៕

October 27, 2021

Tesla មានឈ្មោះក្នុងក្លឹបនៃបណ្ដាក្រុមហ៊ុនតម្លៃលានលានដុល្លារ ខណៈ Elon Musk រកបានរាប់សិបពាន់លានដុល្លារកាលពីម្សិលមិញ

មូលបត្រ Tesla បានកើនឡើង 13% កាលពីម្សិលមិញ (25/តុលា) ដែលជាការឡើងថ្លៃខ្ពស់បំផុតរាប់ចាប់តាំងពីដើមខែមីនា ឆ្នាំ 2021 ជួយឱ្យមូលធនទីផ្សាររបស់ក្រុមហ៊ុនផលិតរថយន្តអគ្គិសនីអាម៉េរិក នេះ បានកើនឡើងលើសពី 1 លានលាន (ទ្រីលាន/1000,000,000,000) ដុល្លារអាម៉េរិក។

យោងតាមសារព័ត៌មាន Bloomberg ក្រុមហ៊ុន Tesla គឺជាក្រុមហ៊ុនដែលសម្រេចបានគោលដៅនៃមូលធនទីផ្សារ 1 លានលានដុល្លារ លឿនជាងគេលំដាប់ទីពីរក្នុងពិភពលោកបន្ទាប់ពី Facebook ដោយចំណាយពេលតែជាង 11 ឆ្នាំ រាប់ចាប់ពីថ្ងៃធ្វើ IPO ក្នុងខែមិថុនា ឆ្នាំ 2010។ ដូច្នេះ ក្លឹបនៃក្រុមហ៊ុនដែលមានមូលធនទីផ្សារ 1 លានលានដុល្លារបច្ចុប្បន្ន រួមមាន ក្រុមហ៊ុន Facebook, Amazon, Microsoft, Alphabet និង Tesla ដែលសុទ្ធតែជាក្រុមហ៊ុនរបស់ អាម៉េរិក។

មូលបត្រ Tesla បានឡើងថ្លៃខ្លាំងបន្ទាប់ពីក្រុមហ៊ុន Hertz Global Holdings បានបញ្ជាទិញរថយន្តចំនួន 100,000 គ្រឿង។ នេះគឺជាជំហានដំបូងនៅក្នុងគម្រោងប្រកបដោយមហិច្ឆតាដើម្បីក្ដោបក្ដាប់ទីផ្សាររថយន្តអគ្គិសនីសម្រាប់ជួលរបស់ Hertz Global Holdings។

នេះអាចជាការជួញដូរធំបំផុតមិនធ្លាប់មានពីមុនមក ហើយវានាំមកនូវចំណូល 4.2 ពាន់លានដុល្លារដល់ Tesla។ នេះបើតាមប្រភពព័ត៌មានរបស់ Bloomberg។

គ្រាន់តែក្នុងថ្ងៃម្សិលមិញ មហាសេដ្ឋី Elon Musk ដែលជា CEO របស់ក្រុមហ៊ុន Tesla ក៏រកបានប្រាក់ចំនួន 36.2 ពាន់លានដុល្លារ។ Bloomberg ឱ្យដឹងថា បច្ចុប្បន្ន មហាសេដ្ឋីអាម៉េរិក ដើមកំណើតអាហ្វ្រិកខាងត្បូងរូបនេះ មានទ្រព្យចំនួន 288.6 ពាន់លានដុល្លារអាម៉េរិក៕

October 26, 2021

Category: សង្គម និងសេដ្ឋកិច្ច