សង្គម និងសេដ្ឋកិច្ច - La Reine Media

រាជធានីភ្នំពេញ ហាមមិនឱ្យបើកក្លឹបកម្សាន្ត និងខារ៉ាអូខេ ខណៈដែលរាជរដ្ឋាភិបាលបានបើកប្រទេសឱ្យដំណើរការឡើងវិញលើគ្រប់វិស័យ

អភិបាលរាជធានីភ្នំពេញ ឯកឧត្តម ឃួង ស្រេង បានដាក់បទបញ្ជាយ៉ាងម៉ឺងម៉ាត់បំផុត ដោយជំរុញឱ្យអាជ្ញាធរ និងកងកម្លាំងប្រដាប់អាវុធទាំងអស់របស់រាជធានី អនុវត្តវិធានការនៃការហាមមិនឱ្យបើកអាជីវកម្ម ខារ៉ាអូខេ និងក្លឹបកម្សាន្តដែលស្ថិតនៅក្នុងភូមិសាស្ត្ររាជធានីភ្នំពេញ។

បទបញ្ជានេះ ត្រូវបានធ្វើឡើងនៅក្នុងកិច្ចប្រជុំស្ដីពី ការជំរុញការងារចាក់វ៉ាក់សាំងបង្ការជំងឺ COVID-19 នៅ ភ្នំពេញ នារសៀលថ្ងៃទី 2 ខែវិច្ឆិកា ឆ្នាំ 2021 នៅសាលារាជធានីភ្នំពេញ។

ឯកឧត្តម ឃួង ស្រេង បានថ្លែងថា រាជរដ្ឋាភិបាលបានបើកប្រទេសឱ្យដំណើរការឡើងវិញលើគ្រប់វិស័យហើយ ប៉ុន្តែចំពោះក្លឹបកម្សាន្ត និងខារ៉ាអូខេ គឺមិនអនុញ្ញាតឱ្យបើកដំណើរការនោះទេ ខណៈភោជនីយដ្ឋាន និងបៀរហ្គាឌិន ត្រូវបានអនុញ្ញាត។ ការដាក់បម្រាមនេះ ត្រូវបានអភិបាលរាជធានី ពន្យល់ថា ក្លឹបកម្សាន្ត និងខារ៉ាអូខេ គឺជាទីតាំងដែលមានហានិភ័យខ្ពស់បំផុតនៃការឆ្លងរីករាលដាលជំងឺ COVID-19។

ឯកឧត្តម អភិបាល ក៏បានជំរុញឱ្យអាជ្ញាធរ រៀបចំ អនុវត្តការចាក់វ៉ាក់សាំងជូនប្រជាពលរដ្ឋទាំងឡាយដែលមិនទាន់ទទួលបានការចាក់វ៉ាក់សាំងដូសមូលដ្ឋាន ឱ្យបានល្អ នៅពេលពួកគាត់ទៅទទួលការចាក់វ៉ាក់សាំង៕

November 3, 2021

វ៉ាក់សាំងបង្ការ COVID-19 នាពេលអនាគត អាចគ្រាន់តែជា «បង់បិទលើស្បែក»

វ៉ាក់សាំងមួយប្រភេទដែលដូចទៅនឹងឧបករណ៍បិទលើស្បែក អាចឱ្យជួយមនុស្សក្នុងពិភពលោក ទទួលបានវ៉ាក់សាំងបង្ការ COVID-19 ដោយងាយស្រួល។

ក្រុមអ្នកវិទ្យាសាស្ត្រអូស្ត្រាលី កំពុងស្រាវជ្រាវវ៉ាក់សាំងបង្ការជំងឺ COVID-19 មួយប្រភេទ ដែលអាចរក្សាទុកក្នុងសីតុណ្ហភាពបន្ទប់ និងអាចប្រើប្រាស់ដោយមិនចាំបាច់ប្រើម្ជុលចាក់ដូចសព្វថ្ងៃ។ ព័ត៌មាននៃការស្រាវជ្រាវនេះត្រូវបានចុះផ្សាយនៅលើទស្សនាវដ្ដី Scientific Advances។

ប្រភពព័ត៌មានឱ្យដឹងថា អ្នកវិទ្យាសាស្ត្រមួយក្រុមរបស់សាកលវិទ្យាល័យ Queensland (អូស្ត្រាលី) បានអភិវឌ្ឍវ៉ាក់សាំងបង្ការ COVID-19 ប្រភេទសម្រាប់បិទលើស្បែក។ វាជាឧបករណ៍តូចមួយ មានរាងជារង្វង់មូលសំប៉ែត បិទភ្ជាប់លើកំភួនដៃផ្នែកខាងលើ។ បន្ទះបិទនេះមានទំហំ 7×7 ម.ម។ នៅលើវាមានក្បាលម្ជុលចំនួន 5,000 ដែលមានតួនាទីបញ្ជ្រាបវ៉ាក់សាំងចូលទៅក្នុងស្រទាប់ស្បែក។

មិនដូចទៅនឹងម្ជុលចាក់ថ្នាំបច្ចុប្បន្ន ក្បាលម្ជុលចំនួន 5,000 នេះ មានរូបរាងល្អិតខ្លាំង ដូច្នេះ វាមិនបឺតឈាម ឬប៉ះពាល់ដល់ក្បាលសរសៃវិញ្ញាណដែលនាំឱ្យមានអារម្មណ៍ឈឺនោះឡើយ។

បច្ចេកវិទ្យានេះ ត្រូវបានគេហៅថា បង់ម្ជុលល្អិត (microneedle) ដែលធ្លាប់ត្រូវបានប្រើប្រាស់សម្រាប់បញ្ចូលថ្នាំ អាំងសូលីន ឱ្យអ្នកជំងឺទឹកនោមផ្អែក និងថ្នាំដទៃទៀត។ វ៉ាក់សាំងបង់ម្ជុលល្អិតនេះ ត្រូវបានក្រុមអ្នកវិទ្យាសាស្ត្រនៃសាកលវិទ្យាល័យ Queensland រចនាឡើងដើម្បីការពារមនុស្សពីជំងឺ COVID-19 ប៉ុន្តែ មកដល់បច្ចុប្បន្ន វាទើបតែត្រូវបានពិសោធនៅលើកណ្ដុរប៉ុណ្ណោះ។

ក្រុមអ្នកវិទ្យាសាស្ត្របានអភិវឌ្ឍវ៉ាក់សាំងខាងលើនេះ ដោយវិធីសម្ងួតពិសេស ដើម្បីកែប្រែប្រូតេអ៊ីនបន្លានៅលើ COVID-19 ឱ្យទៅជាទម្រង់ម្សៅ។ ក្រោយមក ពួកគេយកម្សៅនេះទៅលាបលើក្បាលម្ជុលល្អិត។

ក្នុងការពិសោធ ក្រុមស្រាវជ្រាវរកឃើញថា បង់បិទវ៉ាក់សាំងនេះនៅតែមានគុណភាពល្អដដែលក្នុងរយៈពេលមួយខែ នៅក្នុងសីតុណ្ហភាពក្នុងបន្ទប់ និងឡើងដល់មួយសប្ដាហ៍ពេលដាក់ក្នុងសីតុណ្ហភាព 40 អង្សាសេ។ ការពិសោធលើកណ្ដុរបង្ហាញថា បង់បិទវ៉ាក់សាំងនេះបង្កើតបានអង្គបដិប្រាណប្រឆាំង COVID-19 ខ្ពស់ជាង ធៀបនឹងវ៉ាក់សាំងដែលចាក់ដោយម្ជុលធម្មតា។

David Muller ដែលជាអ្នកស្រាវជ្រាវមួយរូបនៅក្នុងក្រុមខាងលើ និងជាអ្នកឯកទេសជាន់ខ្ពស់មួយរូបនៅសាកលវិទ្យាល័យ Queensland ឱ្យដឹងថា៖ «យើងបានទទួលនូវការឆ្លើយតបដ៏អស្ចារ្យ»៕

November 3, 2021

សិស្សានុសិស្ស អាចប្រើប្រាស់ប័ណ្ណចាក់វ៉ាក់សាំងថតចម្លង ចៀសវាងការបាត់បង់ច្បាប់ដើម

សារសំឡេងពិសេសរបស់ សម្ដេចតេជោ ហ៊ុន សែន ទាក់ទងនឹងការប្រើប័ណ្ណចាក់វ៉ាក់សាំងថតចម្លងសម្រាប់សិស្សានុសិស្សនេះ ត្រូវបានធ្វើឡើងនៅថ្ងៃទី 2 ខែវិច្ឆិកា ឆ្នាំ 2021 បន្ទាប់ពីមានការអនុញ្ញាតឱ្យបើកដំណើរការសាលារៀនឡើងវិញក្រោយពីយុទ្ធនាការចាក់វ៉ាក់សាំង COVID-19 ជុំទីមួយទទួលបានជោគជ័យ។

នៅក្នុងសារជាសំឡេងនេះ ប្រមុខរដ្ឋាភិបាល បានស្នើឱ្យរដ្ឋមន្ត្រីក្រសួងអប់រំ រៀបចំអនុញ្ញាតឱ្យប្រើប័ណ្ណចាក់វ៉ាក់សាំងថតចម្លងសម្រាប់សិស្សានុសិស្សយកទៅសាលារៀនដើម្បីការពារការបាត់បង់ ឬខូចខាតច្បាប់ដើមនៃប័ណ្ណចាក់វ៉ាក់សាំង។

https://www.youtube.com/watch?v=n-bb3TsfjiU

ការចាក់វ៉ាក់សាំងនៅកម្ពុជា គិតត្រឹមថ្ងៃទី 1 ខែវិចិ្ឆកា ឆ្នាំ 2021 រួមមាន៖

– អាយុ 6 ឆ្នាំ – 11 ឆ្នាំ = 101.46%
– អាយុ 12 – 17 ឆ្នាំ = 97.93%
– អាយុ 18 ឆ្នាំ ឡើងទៅ = 100.05%

November 2, 2021

អារ៉ាប៊ីសាអូឌីត បើកការសាងសង់ «ទីក្រុងបណ្ដោយត្រង់» ប្រវែងរាប់រយគីឡូម៉ែត្រ

ទីក្រុងអនាគតនៅលើសមុទ្រខ្សាច់ ដែលត្រូវចំណាយទឹកប្រាក់រហូតដល់ មួយសែនលានដុល្លារ (100,000,000,000) មិនប្រើប្រាស់រថយន្ត ហើយដំណើរការទាំងស្រុងដោយថាមពលស្អាត។

ព្រះអង្គម្ចាស់ Mohammed bin Salman របស់ ប្រទេសអារ៉ាប៊ីសាអូឌីត កាលពីខែមករា ឆ្នាំ 2021 បានប្រកាសជាលើកដំបូងនូវគម្រោងសាងសង់ «ទីក្រុងបណ្ដោយត្រង់» (The Line) ដែលមានប្រវែង 170 គីឡូម៉ែត្រ។ បច្ចុប្បន្ន គ្រឿងចក្រនានាកំពុងតែដឹកជញ្ជូនដី និងជីកផ្លូវក្រោមដី ទម្លុះភ្នំ ដើម្បីសាងសង់ទីក្រុងបណ្ដោយត្រង់បីជាន់ រួមមាន តំបន់លើដីសម្រាប់មនុស្សដើរ និងពីរជាន់នៅក្រោមដីសម្រាប់មធ្យោបាយធ្វើដំណើរ និងហេដ្ឋាចរនាសម្ព័ន្ធ។ Nadhmi Al-Nasr ដែលជាអ្នកគ្រប់គ្រងគម្រោង បានឱ្យដឹងថា នេះគឺជាសំណង់ដ៏មហិមា។

ជំនួសឱ្យការសាងសង់ពីចំនុចចាប់ផ្ដើម និងពង្រីកទៅទីជុំវិញ ក្រុមអ្នកអភិវឌ្ឍគម្រោង កំពុងពិចារណាលើការសាងសង់ពីចំនុចចាប់ផ្ដើមចំនួនពីរ ហើយសាងសង់ឆ្ពោះទៅកាន់តំបន់កណ្ដាល។

ដោយលាតសន្ធឹងពីជួរភ្នំនៅភាគពាយព្យនៃ ប្រទេសអារ៉ាប៊ីសាអូឌីត ដល់សមុទ្រក្រហម ទីក្រុងបណ្ដោយត្រង់ នេះ អាចឱ្យមនុស្សមួយលាននាក់រស់នៅបាន ជាមួយនឹងការតភ្ជាប់ដោយផ្លូវល្បឿនលឿន និងមធ្យោបាយធ្វើដំណើរស្វ័យប្រវត្តជាច្រើនប្រភេទ។ សាលារៀន ភោជនីយដ្ឋាន ហាង និងទីតាំងផ្សេងៗ សុទ្ធតែស្ថិតនៅលើរង្វង់ដែលមនុស្សអាចដើរដល់ក្នុងរយៈពេល 5 នាទី និងពុំមានទីតាំងណាមួយដែលត្រូវធ្វើដំណើរលើសពី 20 នាទីនោះឡើយ។

ដោយសារតែមានរូបរាងបណ្ដោយត្រង់ ហើយហេដ្ឋារចនាសម្ព័ន្ធសុទ្ធតែនៅក្រោមដី ដូច្នេះ ទីក្រុងនេះក៏ជួយការពារធម្មជាតិនៅលើដីបាន 95% ផងដែរ។ ប្រជាជនអាចចូលមករស់នៅក្នុងទីក្រុងថ្មីនេះចាប់ពីឆ្នាំ 2024។

ប្រទេសអារ៉ាប៊ីសាអូឌីត វិនិយោគប្រមាណពី មួយសែនលាន ទៅពីរសែនលានដុល្លារ សម្រាប់ការសាងសង់ទីក្រុងបណ្ដោយត្រង់នេះ។ តាមផែនការ គម្រោងនេះនឹងបង្កើតការងារថ្មីដល់មនុស្សចំនួន 380,000 នាក់ និងជួយឱ្យ GDP របស់ប្រទេសនេះកើនបន្ថែមប្រមាណ 48 ពាន់លានដុល្លារ នៅឆ្នាំ 2030។

ទីក្រុងបណ្ដោយត្រង់នេះគឺជាគម្រោងដំបូងមួយដែលស្ថិតក្នុងគម្រោងមេ Neom ដែលជាមហាទីក្រុងស្វយ័តមួយមានតម្លៃ 5 សែនលានដុល្លារ គ្របដណ្ដប់លើផ្ទៃដី 25,900 គីឡូម៉ែត្រក្រឡា នៅក្នុងខេត្ត Tabuk របស់ អារ៉ាប៊ីសាអូឌីត ជិតព្រំដែននៃ ប្រទេសហ្ស៊កដានី និង ប្រទេសអេហ្ស៊ីប។ Neom គឺជាមហាគម្រោងប្រកបដោយមហិច្ឆតាដែលអាចជួយ អារ៉ាប៊ីសាអូឌីត បញ្ចប់ការពឹងផ្អែកលើរ៉ែប្រេង និងប្រែក្លាយប្រទេសនេះទៅជាមជ្ឈមណ្ឌលបច្ចេកវិទ្យាដូចទៅនឹងជ្រលងភ្នំ Silicon នៅ សហរដ្ឋអាម៉េរិក។

ទីក្រុងនេះនឹងប្រើប្រាស់តាក់ស៊ីហោះ រ៉ូបូតដាយណូស័រ និងភោជនីយដ្ឋានកម្រិតផ្កាយ Michelin ខ្ពស់បំផុតក្នុងពិភពលោក។ តំបន់នេះនឹងត្រូវបានប្ដូរផ្លាស់ដោយការប្រើប្រាស់ម៉ាស៊ីនបង្កើតភ្លៀង។ Neom ក៏នឹងមានឧទ្យានផ្កាថ្មធំបំផុតក្នុងលោក ខ្សាច់បញ្ចេញពន្លឺ និងព្រះចន្ទសិប្បនិម្មិតដ៏ធំដែលភ្លឺនៅពេលយប់។ មហាទីក្រុងនេះនឹងប្រើថាមពលដែលបានពីខ្យល់ ពីព្រះអាទិត្យ និងបច្ចេកវិទ្យាទំនើបប្រែក្លាយទឹកឱ្យទៅជាអុកស៊ីសែន និងអ៊ីដ្រូសែន ដើម្បីប្រើប្រាស់ជំនួសប្រេងឥន្ធនៈ៕

November 2, 2021

ពលរដ្ឋអាម៉េរិក តុបតែងខ្លួនជាវីរុស COVID-19 និងវ៉ាក់សាំងជាដើម ក្នុងរាត្រីនៃពិធីបុណ្យហាឡូវីន

ប្រជាជនជាច្រើនក្រុម នៅ សហរដ្ឋអាម៉េរិក នាំគ្នាតុបតែងខ្លួនទៅតាមប្រធានបទដែលទាក់ទងនឹង COVID-19 ក្នុងការហែក្បួន នារាត្រីបុណ្យហាឡូវីន លើកដំបូង ក្នុងអំឡុងពីរឆ្នាំកន្លង។

កាលពីយប់ថ្ងៃទី 31 តុលា ទីក្រុងនីវយ៉ក របស់ សហរដ្ឋអាម៉េរិក មានព្រឹត្តិការណ៍ហែក្បួននៅក្នុងពិធីបុណ្យហាឡូវីនដំបូង ក្នុងរយៈពេលជិតពីរឆ្នាំមកនេះ ក្រោយពីព្រឹត្តិការណ៍កាលពីឆ្នាំមុនត្រូវបានលុបចោលដោយសារបម្រាមគោចរប្រឆាំង COVID-19។

ក្នុងព្រឹត្តិការណ៍នេះ មានអ្នកខ្លះពាក់ឈុតដែលបង្ហាញអំពីប័ណ្ណចាក់វ៉ាក់សាំង អ្នកខ្លះជ្រើសរើសឈុតម្ជុលចាក់វ៉ាក់សាំង Pfizer និងអ្នកខ្លះក៏ពាក់ឈុតជារូបរាងរបស់វីរុស COVID-19 ខណៈអ្នកផ្សេងទៀតក៏កាន់រូបគ្រោងឆ្អឹងមនុស្ស។ ទាំងនេះគឺដើម្បីរំលឹកគ្រប់គ្នាឱ្យចងចាំរោគរាតត្បាតនេះ ក៏ដូចជាអំពាវនាវដល់អ្នកដទៃ ឱ្យទៅទទួលការចាក់វ៉ាក់សាំងភ្លាម បើសិនជាអាច។

ហាឡូវីន (Halloween) គឺជាពិធីបុណ្យប្រពៃណីរបស់បណ្ដាប្រទេសលោកខាងលិច ដែលត្រូវបានធ្វើឡើងនៅថ្ងៃទី 31 តុលា រៀងរាល់ឆ្នាំ។

ពិធីបុណ្យហាឡូវីន នេះ ជាចំនុចសម្គាល់នៃការបញ្ចប់រដូវប្រមូលផល និងចាប់ផ្ដើមរដូវរងា។ ទន្ទឹមនឹងនេះ វាក៏ជាពិធីបុណ្យដែលរំលឹកដល់វិញ្ញាណក្ខន្ធរបស់បុព្វបុរសដែលបានលាចាកលោកផងដែរ៕

November 2, 2021

កោះរ៉ុង ជាសួគា៌ និងជាគោលដៅដែលមិនគួរមើលរំលង នៅពេលសម្រេចចិត្តដើរទេសចរណ៍

កោះរង់ដែលមានសម្រស់ដ៏ស្រស់ត្រកាលស្ថិតនៅលំហសមុទ្រនៃខេត្ត ព្រះសីហនុ គឺជាទីតាំងមួយក្នុងចំណោមទីតាំងទាំងបីរបស់ កម្ពុជា ដែលត្រូវបើកទ្វារទទួលភ្ញៀវទេសចរណ៍ ចាប់ពីថ្ងៃទី 30 ខែវិច្ឆិកា ឆ្នាំ 2021។

ការងើបឡើងវិញយ៉ាងលឿននៃវិស័យទេសចរណ៍នឹងស្ដែងឱ្យឃើញកាន់តែច្បាស់ នៅពេល កម្ពុជា សម្រេចបើកដំណើរការសង្គម និងសេដ្ឋកិច្ចឡើងវិញ ពិសេសគឺការបើកទ្វារទទួលទេសចរមកកាន់ទីក្រុង ព្រះសីហនុ និង កោះរ៉ុង នៃខេត្ត ព្រះសីហនុ រួមនឹង តារាសាគរ នៃខេត្ត កោះកុង ចាប់ពីថ្ងៃទី 30 វិច្ឆិកា ហើយបន្ទាប់មកទៀតគឺខេត្ត សៀមរាប ចាប់ពីឆ្នាំ 2022។

ក្រោយជោគជ័យរបស់កម្មវិធី «ប្រអប់ខ្សាច់» Phuket នៅ ប្រទេសថៃ មានប្រទេសជាច្រើនក្នុងតំបន់ ក៏កំពុងជំរុញការអនុវត្តគម្រោងប្រហាក់ប្រហែលនេះ ដើម្បីស្ដារវិស័យទេសចរណ៍ឡើងវិញ។

នៅ កម្ពុជា យុទ្ធនាការចាក់វ៉ាក់សាំងបង្ការ COVID-19 ទទួលបានជោគជ័យយ៉ាងធំធេង ដោយបាននាំមុខគេ ធៀបនឹងប្រទេសភាគច្រើនក្នុងតំបន់។ ជោគជ័យនៃការចាក់វ៉ាក់សាំង រួមនឹងអត្រាអ្នកឆ្លង COVID-19 ថ្មី ត្រឹមក្រោម 100 នាក់/ថ្ងៃ គឺជាកម្លាំងដែលរុញច្រាន កម្ពុជា ដល់ដំណាក់កាលបើកទ្វារសេដ្ឋកិច្ច សង្គម ឡើងវិញ ក្នុងនោះ ទេសចរណ៍គឺជាវិស័យដ៏សំខាន់។

យោងតាមកម្មវិធីទេសចរណ៍នៃខេត្ត ព្រះសីហនុ អ្នកទេសចរណ៍គ្រាន់តែបង្ហាញលិខិតបញ្ជាក់ការចាក់វ៉ាក់សាំង COVID-19, ធានារ៉ាប់រងសុខភាព និងលទ្ធផលតេស្តអវិជ្ជមាន 72 ម៉ោង មុនពេលចេញដំណើរ។ ពួកគេនឹងត្រូវបានអនុញ្ញាតឱ្យដើរកំសាន្តគ្រប់កន្លែងក្នុងរយៈពេល 5 ថ្ងៃ ដោយមិនបាច់ធ្វើចត្តាឡីស័ក។

អ្នកទេសចរណ៍ក៏អាចមុជទឹក គយគន់ផ្កាថ្មផងដែរ

ឋានសួគ៌ធម្មជាតិ ដែលអ្នកទេសចរណ៍មិនគួរមើលរំលង

ជាយូរមកហើយ កម្ពុជា មានឈ្មោះល្បីល្បាញក្នុងពិភពលោក ទាក់ទងនឹងវប្បធម៌ ប្រាសាទបុរាណដ៏ច្រើន និងសម្បូរបែប។ ក៏ប៉ុន្តែ នេះមិនមែនជាទីតាំងទេសចរណ៍តែមួយដែលភ្ញៀវអាចទទួលបានបទពិសោធន៍នោះទេ។ កម្ពុជា នៅមានកោះតូចធំ និងឆ្នេរខ្សាច់ដ៏ស្រស់ស្អាត មិនចាញ់តំបន់ដទៃឡើយ។ ក្នុងនោះ គេក៏មិនត្រូវមើលរំលង កោះរ៉ុង និង កោះរ៉ុងសន្លឹម។

កោះរ៉ុង គឺជាកោះដែលមានផ្ទៃដីធំលំដាប់កំពូលមួយនៅ កម្ពុជា ដោយមានផ្ទៃដី 78 គីឡូម៉ែត្រក្រឡា និងមានឆ្នេរខ្សាច់ប្រកបដោយភាពទាក់ទាញរហូតដល់ 23 កន្លែង។ ទីនេះ ល្បីឈ្មោះថាមានសម្រស់ធម្មជាតិដ៏អស្ចារ្យ ដែលត្រូវបានទេសចរប្រសិទ្ធនាមថា «ឋានសួគ៌» ពេលវេលាល្អបំផុតសម្រាប់ដំណើរកំសាន្តមកកាន់ កោះរ៉ុង គឺក្នុងខែឧសភា និងខែវិច្ឆិកា។ សីតុណ្ហភាពក្នុងអំឡុងពេលនេះ ប្រហែលពី 25 ទៅ 40 អង្សាសេ។

ចាប់ពីខែធ្នូ រហូតដល់ខែមេសា ទឹកសមុទ្រនឹងប្រែជាពណ៌ខៀវស្រងាត់ ឆ្នេរខ្សាច់សក្បុស ស្រស់ស្អាត ជំនោរសមុទ្រដ៏បរិសុទ្ធជាមួយនិងសម្រស់ធម្មជាតិដែលមិនអាចកាត់ថ្លៃបាន ហើយទេសភាពដែលស្រស់ស្អាតបំផុត គឺនៅក្នុងខែកុម្ភៈ។ ឆ្នេរខ្សាច់ល្បីជាងគេរបស់ កោះរ៉ុង មានដូចជា ឆ្នេរឡុងសិត (Long Set), ឆ្នេរខាងនិរតីនៃកោះរុង (Southwestern beach, Kohrong), ឆ្នេរសុខសាន្ត រីសត ឬក៏គេច្រើនហៅថា ឆ្នេរសុខសាន្ត កោះរ៉ុង, ឆ្នេរខ្សាច់ វ៉ៃត៍ (White)។ល។

ភ្ញៀវទេសចរណ៍ដែលបានទៅកំសាន្តនៅតាមឆ្នេរខ្សាច់របស់ កោះរ៉ុង ក៏អាចគយគន់ទេសភាពដ៏ស្រស់អស្ចារ្យនៅពេលព្រះអាទិត្យជិតអស្ដង្គតផងដែរ។

ភ្ញៀវទេសចរមិនបាច់បារម្ភពីការអត់កន្លែងស្នាក់នៅ ហូបចុកនោះទេ ពីព្រោះថានៅទីនេះមានទាំងភោជនីយដ្ឋាន អាហារដ្ឋាន បារ ផ្ទះស្នាក់ ផ្ទះសំណាក់ សណ្ដាគារ បឹងហ្កាឡូ និងរីសតជាដើមបើកបម្រើដល់ភ្ញៀវទេសចរជារៀងរាល់ថ្ងៃ ប៉ុន្តែសូមកក់ទុកមុន ដើម្បីមានភាពងាយស្រួលជាង៕

November 2, 2021

កម្ពុជា ប្រកាសបើកប្រទេសលើគ្រប់វិស័យឡើងវិញជាបណ្តើរៗ

សម្តេចតេជោ ហ៊ុនសែន ប្រកាសបើកសកម្មភាពសង្គមសេដ្ឋកិច្ចឡើងវិញលើគ្រប់វិស័យជាបណ្តើរៗ ចាប់ពីថ្ងៃទី 1 ខែវិច្ឆិកា ឆ្នាំ 2021 នេះតទៅ ដោយការរស់នៅតាមប្រក្រតីភាពថ្មី ដើម្បីជំរុញកំណើនសេដ្ឋកិច្ចជាតិ។

នាវិមានសន្តិភាព ក្នុងពិធីបិទយុទ្ធនាការចាក់វ៉ាក់សាំងបង្ការជំងឺ COVID-19 សម្រាប់ពលរដ្ឋដែលមានអាយុ 6 ឆ្នាំឡើង និងបើកយុទ្ធនាការចាក់សម្រាប់ក្មេងអាយុ 5 ឆ្នាំ នាព្រឹកថ្ងៃទី 1 ខែវិច្ឆិកា ឆ្នាំ 2021 នេះ ប្រមុខរដ្ឋាភិបាលកម្ពុជា បានមានប្រសាសន៍ថា៖ «ថ្ងៃនេះជាមួយនឹងការប្រកាសបិទបញ្ចប់ជាផ្លូវការនូវយុទ្ធនាការជាតិចាក់វ៉ាក់សាំងជុំទីមួយក្នុងក្របខ័ណ្ឌទូទាំងប្រទេស យើងក៏ប្រកាសបើកទំព័រថ្មីមួយទៀត គឺការរស់នៅជាមួយ COVID-19 ក្នុងក្របខ័ណ្ឌនៃប្រក្រតីភាពថ្មី តាមរយៈការបើកឡើងវិញជាបណ្តើរៗនូវសកម្មភាពសង្គម-សេដ្ឋកិច្ច និងជីវភាពប្រចាំថ្ងៃរបស់ប្រជាជនគ្រប់ផ្នែក និងគ្រប់វិស័យ ប្រសិនបើមិនមានប្រភេទវីរុស COVID-19 បំប្លែងខ្លួនថ្មីដែលអាចបង្កជាហានិភ័យដ៏ធ្ងន់ធ្ងរឡើងវិញដល់សុខភាពសាធារណៈនោះទេ យើងអាចវាយតម្លៃបានថា ប្រទេសជាតិយើងទាំងមូលកំពុងចាប់ផ្ដើមចាកចេញពីវិបត្តិនៃ COVID-19 នេះ ក្នុងភាពរឹងមាំ ត្រឡប់ទៅរកមាគ៌ា នៃកំណើន និងការអភិវឌ្ឍ»។

គិតត្រឹមថ្ងៃទី 31 ខែតុលា ឆ្នាំ 2021 ការចាក់វ៉ាក់សាំងនៅ កម្ពុជា រួមមាន ទីមួយ៖ អាយុ 18 ឆ្នាំ ឡើងទៅ ចាក់បាន 100%, ទីពីរ៖ អាយុ 12 ឆ្នាំ ដល់ 17 ឆ្នាំ ចាក់បាន 97.89% និងទីបី៖ អាយុចាប់ពី 6 ឆ្នាំ ដល់ 11 ឆ្នាំ ចាក់បាន 101.22%។

November 1, 2021

សម្ដេចតេជោ បញ្ជាក់ថា អនុញ្ញាតឱ្យពលរដ្ឋរៀបអាពាហ៍ពិពាហ៍ធម្មតា តែទ្រង់ទ្រាយតូច

ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន បញ្ជាក់ថា រាជរដ្ឋាភិបាលមិនបានហាមឃាត់ប្រជាពលរដ្ឋរៀបអាពាហ៍ពិពាហ៍នោះទេ ប៉ុន្តែ មិនឱ្យមានកម្មវិធីជួបជុំទ្រង់ទ្រាយធំ ដើម្បីគោរពតាមវិធានសុខាភិបាល បំណងបង្ការជំងឺ COVID-19។

នៅឯវិមានសន្ដិភាព ក្នុងពិធីបិទយុទ្ធនាការចាក់វ៉ាក់សាំងបង្ការជំងឺ COVID-19 ជុំទីមួយ សម្រាប់ក្រុមពលរដ្ឋអាយុចាប់ពី 6 ឆ្នាំឡើង និងបើកយុទ្ធនាការចាក់វ៉ាក់សាំងបង្ការដល់កុមារ អាយុ 5 ឆ្នាំ នាព្រឹកថ្ងៃទី 1 ខែវិច្ឆិកា ឆ្នាំ 2021 នេះ ប្រមុខរដ្ឋាភិបាលកម្ពុជា បានថ្លែងថា រដ្ឋាភិបាលអនុញ្ញាតឱ្យរៀបការធម្មតា ប៉ុន្តែ ការរៀបចំពិធីរៀបការត្រូវមានមនុស្សក្រោម 50 នាក់ និងមានការរក្សាគម្លាតសុវត្ថិភាព និងវិធានការសុខាភិបាលនានា។

ការបញ្ជាក់នេះត្រូវបានធ្វើឡើងបន្ទាប់ពីក្រសួងសុខាភិបាលបានប្រកាសផ្អាកជាបណ្តោះអាសន្ននូវពិធីរៀបអាពាហ៍ពិពាហ៍ដើម្បីទប់ស្កាត់ការរីករាលដាលជំងឺ COVID-19។

ទន្ទឹមនឹងនេះ ប្រមុខរដ្ឋាភិបាលកម្ពុជា ក៏បានលើកទឹកចិត្តពលរដ្ឋដើរកម្សាន្តឱ្យបានច្រើន ដោយត្រូវចេះការពារខ្លួនពីជំងឺ COVID-19 ជាមួយនឹងការពាក់ម៉ាស ការរក្សាគម្លាត និងគោរពតាមវិធានការសុខាភិបាលផ្សេងៗទៀត៕

November 1, 2021

ស្ងាត់ៗ ប្រេងសាំងឡើងថ្លៃ ជាង 200 រៀលក្នុងមួយលីត្រ

នាព្រឹកថ្ងៃទី 1 ខែវិច្ឆិកា ឆ្នាំ 2021 នេះ ក្រសួងពាណិជ្ជកម្ម បានចេញសេចក្ដីជូនដំណឹងស្ថីពី ថ្លៃលក់រាយប្រេងឥន្ទនៈនៅតាមស្ថានីយលក់ប្រេងក្នុងស្រុក។

ប្រេងឥន្ទនៈដែលលក់រាយនៅ កម្ពុជា នឹងត្រូវលក់ក្នុងតម្លៃ 4,550 រៀល/លីត្រ សម្រាប់សាំងធម្មតា និង 4,100 រៀល/លីត្រ សម្រាប់ប្រេងម៉ាស៊ូត។ តម្លៃនេះនឹងត្រូវអនុវត្តសម្រាប់រយៈពេលពីថ្ងៃទី 1 ខែវិច្ឆិកា ឆ្នាំ 2021 ដល់ថ្ងៃទី 15 ខែវិច្ឆិកា ឆ្នាំ 2021។

តម្លៃប្រេងខាងលើត្រូវបានកំណត់ដោយយោងទៅលើប្រកាសអន្តរក្រសួង តម្លៃប្រេងក្នុងទីផ្សារអន្តរជាតិ ការព្រមព្រៀងរបស់បណ្ដាក្រុមហ៊ុនលក់ប្រេងនៅ កម្ពុជា និងការបញ្ចុះតម្លៃពីរដ្ឋាភិបាល។

ដូច្នេះ ប្រេងសាំងសម្រាប់ថ្ងៃទី 1 វិច្ឆិកា ដល់ 15 វិច្ឆិកា ឆ្នាំ 2021 ត្រូវឡើងថ្លៃ 250 រៀល សម្រាប់សាំង និង 100 រៀល សម្រាប់ប្រេងម៉ាស៊ូត៕

November 1, 2021

ជាងភ្លើងកាត់ប្រដាប់ភេទរបស់មនុស្សជិត 10 នាក់ នៅ អាល្លឺម៉ង់

(អាល្លឺម៉ង់)- ជាងភ្លើងម្នាក់ត្រូវបានចោទប្រកាន់ពីបទមនុស្សឃាត ដោយសារអះអាងថាខ្លួនជាអ្នកឯកទេសផ្នែកសុខាភិបាល និងបានកាត់ចោលប្រដាប់ភេទរបស់បុរសជាច្រើននាក់។

នៅក្នុងសវនាការមួយនាទីក្រុង Munich កាលពីថ្ងៃទី 28 តុលា ជាងភ្លើងម្នាក់អាយុ 66 ឆ្នាំ បានសារភាពថា បានកាត់ចោលប្រដាប់ភេទរបស់បុរសចំនួន 8 នាក់ ចាប់តាំងពីខែកក្កដា ឆ្នាំ 2018 ដល់ខែមីនា ឆ្នាំ 2020។ ជនជាប់ចោទនេះបាននិយាយថា ខ្លួនបានធ្វើការវះកាត់ទៅតាមសំណើរបស់មនុស្សទាំងនោះ។

ជននេះក៏បានបដិសេធលើការចោទប្រកាន់ដែលថា ខ្លួនបានធ្វើឱ្យមនុស្សម្នាក់បាត់បង់ជីវិតក្រោយពីទទួលការវះកាត់។ 3 សប្ដាហ៍បន្ទាប់មក ប៉ូលិសបានរកឃើញសាកសពនៅក្នុងធុងមួយ។

ដំបូងឡើយ ជនជាប់ចោទ បានប្រកាសលក់ខ្លួននៅលើគេហទំព័ររបស់ក្រុមសង្គមងងឹតនានាដើម្បីរកប្រាក់មកសងបំណុល។ ក្រោយមក ជននេះបានអះអាងថា ខ្លួនជាគ្រូពេទ្យឯកទេស ហើយបានធ្វើការវះកាត់ប្រដាប់ភេទនៅក្នុងផ្ទះបាយរបស់ខ្លួន នៅឯទីរួមស្រុក Markt Schwaben។

ចៅក្រមបានចោទជនសង្ស័យនេះពីបទមនុស្សឃាត ព្រោះតែមិនបានហៅឡានពេទ្យសង្គ្រោះបន្ទាន់ រួមនឹងបទចោទបង្ករបួសធ្ងន់ធ្ងរ និងគ្រោះថ្នាក់ដល់រាងកាយរបស់អ្នកដទៃ៕

October 30, 2021

Category: សង្គម និងសេដ្ឋកិច្ច