សង្គម និងសេដ្ឋកិច្ច - La Reine Media

អ្នកចំណេញប្រាក់បានប៉ុន្មាន បើសិនបានវិនិយោគ 1,000 ដុល្លារ ទៅក្នុងក្រុមហ៊ុន Tesla កាលពី 1.5 ឆ្នាំ និង 10 ឆ្នាំមុន?

យោងតាមការគណនារបស់សារព័ត៌មាន CNBC បើសិនជាអ្នកបានវិនិយោគទៅលើក្រុមហ៊ុន Tesla កាលពីខែវិច្ឆិកា ឆ្នាំ 2020 ក្នុងគ្រាដែលមូលបត្រនេះមានតម្លៃជាង 400 ដុល្លារអាម៉េរិក មកដល់បច្ចុប្បន្ន ខ្ទង់វិនិយោគរបស់អ្នកនឹងកើនឡើងច្រើនជាងមុន 3 ដង។

មូលបត្រ Tesla កំពុងតែកើនឡើងយ៉ាងខ្ពស់គួរឱ្យចាប់អារម្មណ៍ បើទោះជាមានព័ត៌មានមិនល្អខ្លះក្នុងរយៈពេលកន្លងទៅថ្មីៗនេះ ដូចជា ប្រព័ន្ធជំនួយការបើកបរស្វ័យប្រវត្តជួបបញ្ហា ឬ Hertz មិនទាន់ចុះកិច្ចព្រមព្រៀងទិញរថយន្ត Tesla 10,000 គ្រឿងជាដើម។

តម្លៃមូលបត្រ Tesla បានកើនឡើងជាង 50% រាប់ចាប់ពីដើមខែតុលា ហើយតម្លៃមូលធនទីផ្សារក៏កើនឡើងដល់ជាង 1.2 លានលាន (ទ្រីលាន) ដុល្លារអាម៉េរិក។ Tesla បានយកឈ្នះលើ Toyota ហើយបច្ចុប្បន្នគឺជាក្រុមហ៊ុនផលិតរថយន្តដែលមានមូលធនទីផ្សារធំជាងគេលំដាប់ទីមួយក្នុងពិភពលោក។ តម្លៃមូលធនទីផ្សាររបស់ Toyota កំពុងស្ថិតនៅត្រឹមជិត 900 ពាន់លានដុល្លារ។

ប៉ុន្តែ Tesla ក៏ជាមូលបត្រមួយក្នុងចំណោមមូលបត្រដែលត្រូវគេលក់ចោលច្រើនបំផុតនៅ Wall Street។ ដូច្នេះ អ្នកជំនាញមួយចំនួនអះអាងថា ការឡើងថ្លៃរបស់មូលបត្រ Tesla ទំនងជានឹងមិននាំមកនូវលទ្ធផលល្អប៉ុន្មាននោះទេ។

យោងតាមការគណនារបស់សារព័ត៌មាន CNBC បើសិនជាអ្នកបានវិនិយោគទៅលើក្រុមហ៊ុន Tesla កាលពីខែវិច្ឆិកា ឆ្នាំ 2020 ក្នុងគ្រាដែលមូលបត្រនេះមានតម្លៃជាង 400 ដុល្លារអាម៉េរិក មកដល់បច្ចុប្បន្ន ខ្ទង់វិនិយោគរបស់អ្នកនឹងកើនឡើងច្រើនជាងមុន 3 ដង។ ខ្ទង់វិនិយោគ 1,000 ដុល្លារកាលពីថ្ងៃទី 2 វិច្ឆិកា ឆ្នាំ 2020 នឹងមានតម្លៃប្រហែល 2,940 ដុល្លារ ស្មើនឹងអត្រាចំណេញ 193%។

បើសិនជាវិនិយោគបានឆាប់ជាង ផលចំណេញដែលអ្នកទទួលបានក៏កាន់តែច្រើន។ កាលពី 5 ឆ្នាំមុន ពោលគឺនៅថ្ងៃទី 2 វិច្ចិកា ឆ្នាំ 2016 Tesla ត្រូវបានជួញដូរក្នុងរង្វង់ប្រហែល 38 ដុល្លារ/ហ៊ុន។ ខ្ទង់វិនិយោគ 1,000 ដុល្លារ នឹងកើនឡើង 3,025% ស្មើនឹង 31,286 ដុល្លារ គិតមកដល់ដំណាច់ថ្ងៃទី 3 វិច្ឆិកា ឆ្នាំ 2021។

បើសិនអ្នកវិនិយោគទៅលើ Tesla ក្នុងឆ្នាំ 2011 នោះប្រាក់ចំណេញនឹងមានលេខចំនួន 5 ខ្ទង់។ ខ្ទង់វិនិយោគ 1,000 ដុល្លារទៅលើ Tesla ចាប់ពីខែវិច្ឆិកា ឆ្នាំ 2011 ដល់បច្ចុប្បន្ន នឹងមានតម្លៃជាង 204,000 ដុល្លារ ដោយអត្រាផលចំណេញឡើងដល់ជាង 20,000% នៅពេលតម្លៃមូលបត្រកើនពី 5.74 ដុល្លារ ឡើងដល់ 1,229 ដុល្លារ/ហ៊ុន ក្នុងរយៈពេល 10 ឆ្នាំកន្លង៕

November 5, 2021

កម្ពុជា ត្រៀមគោលនយោបាយគាំទ្រដល់រថយន្តដែលដើរដោយថាមពលអគ្គិសនី

ទេសរដ្ឋមន្ត្រី រដ្ឋមន្ត្រីក្រសួង សាធារណការ និង ដឹកជញ្ជូន បានថ្លែងថា រថយន្តដើរដោយថាមពលអគ្គិសនី ដើរតួនាទីយ៉ាងសំខាន់ រួមចំណែកក្នុងការការពារបរិស្ថាន។

ប្រសាសន៍ខាងលើនេះត្រូវបាន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង សាធារណការ និង ដឹកជញ្ជូន លើកឡើងនៅក្នុងឱកាសអញ្ជើញធ្វើដំណើរតាមរថយន្ដអគ្គិសនី ជាមួយលោកស្រី Tina Redshaw ឯកអគ្គរាជទូតអង់គ្លេស ប្រចាំ កម្ពុជា ដើម្បីធ្វើតេស្តប្រសិទ្ធភាពរបស់រថយន្តអគ្គិសនី ក្នុងដំណើរឆ្ពោះទៅចូលរួមកិច្ចពិភាក្សា នៅសណ្ឋាគារ Raffles le Royal Hotel ក្រោមប្រធានបទ៖ “អគ្គិសនីភាវូបនីយកម្មនៃយានយន្ត ដើម្បីអនាគតបៃតងសម្រាប់កម្ពុជា” កាលពី ថ្ងៃ 4 ខែវិច្ឆិកា កន្លងទៅ។

ឯកឧត្តមទេសរដ្ឋមន្ត្រី បានបញ្ជាក់ថា ការធ្វើដំណើរតាមរថយន្តដែលដំណើរការដោយថាមពលអគ្គិសនី ក៏មានលក្ខណៈដូចទៅនឹងការធ្វើដំណើរតាមរថយន្តម៉ាស៊ីនសាំងធម្មតាដែរ ហើយថែមទាំងស្ងាត់ទៀតផង។

ជាងនេះ រដ្ឋមន្ត្រីក្រសួង សាធារណការ ក៏មានប្រសាសន៍បញ្ជាក់ថា ក្រសួងកំពុងរៀបចំគោលនយោបាយដើម្បីជាការគាំទ្រសម្រាប់រថយន្តដើរដោយថាមពលអគ្គិសនីដែលមាននៅ កម្ពុជា ផងដែរ។ ហេដ្ឋារចនាសម្ព័ន្ធ និងសេវាកម្មទាំងមូលសម្រាប់រថយន្តប្រភេទនេះនៅ កម្ពុជា នឹងរួមមាន ស្ថានីយបញ្ចូលថាមពលអាគុយ, ទីតាំងផ្តល់សេវា, គ្រឿងបន្លាស់, បុគ្គលិកទទួលការបណ្តុះបណ្តាល, កន្លែងបោះចោលអាគុយ។ គម្រោងរបស់ក្រសួងក៏នឹងត្រូវធានាឱ្យបានប្រាកដថា រថយន្តអគ្គសនីទាំងឡាយដែលនាំចូលមក កម្ពុជា សុទ្ធតែមានគុណភាពល្អ៕

November 5, 2021

មហាសេដ្ឋីលំដាប់ទីមួយ Elon Musk ចំអកឱ្យ មហាសេដ្ឋីលំដាប់ទីពីរ Jeff Bezos ជុំវិញរឿងក្ដីជាមួយ NASA

មហាសេដ្ឋី Elon Musk បានបង្ហោះរូបត្លុកដើម្បីចំអកឱ្យ Jeff Bezos បន្ទាប់ពីក្រុមហ៊ុនអវកាស Blue Origin របស់ម្ចាស់ Amazon បានចាញ់ក្ដីជាមួយ NASA។

តុលាការសហរដ្ឋអាម៉េរិក កាលពីម្សិលមិញ (4 វិច្ឆិកា) បានចេញសាលក្រមជំទាស់នឹងបណ្ដឹងរបស់ក្រុមហ៊ុនអវកាសឯកជន Blue Origin របស់មហាសេដ្ឋី Jeff Bezos ដែលបានប្ដឹងទីភ្នាក់ងារអវកាសអាម៉េរិក NASA ថា បានផ្ដល់កិច្ចសន្យាទាក់ទិននឹងយានចុះចតលើឋានព្រះចន្ទដែលមានតម្លៃ 2.9 ពាន់លានដុល្លារ ឱ្យទៅក្រុមហ៊ុន SpaceX របស់មហាសេដ្ឋី Elon Musk ដោយវិធី «មិនសមហេតុផល»។

ក្រោយការសម្រេចរបស់ចៅក្រមតុលាការសហព័ន្ធសហរដ្ឋអាម៉េរិក Richard Hertling ទីភ្នាក់ងារអវកាស NASA ប្រកាសថា កិច្ចសហការជាមួយ SpaceX នឹងត្រូវបានភ្ជាប់ឡើងវិញ «កាន់តែឆាប់ កាន់តែល្អ»។

ភ្លាមនោះ លោក Elon Musk បានបង្ហោះសារនៅលើ Twitter ចំអកឱ្យលោក Jeff Bezos ដោយប្រើប្រាស់រូបត្លុកដែលមានប្រភពពីខ្សែភាពយន្ត Judge Dredd ឆ្នាំ 1995 អមជាមួយនឹងឃ្លា៖ «អ្នកត្រូវទទួលសាលក្រម»។

«ទំនាស់អវកាស» របស់បណ្ដាមហាសេដ្ឋីអាម៉េរិក បានចាប់ផ្ដើមឡើងកាលពីរដូវផ្ការីក នៅពេល NASA បានចុះកិច្ចសន្យាលើគម្រោងយានចុះចតលើឋានព្រះចន្ទជាមួយ SpaceX ក្នុងគ្រាដែល Blue Origin និង Dynetics ក៏បានចូលរួមដេញថ្លៃដើម្បីបានក្លាយជាដៃគូសហការជាមួយ NASA ប៉ុន្តែ មិនបានសម្រេច ដោយសារតែតម្លៃខុសគ្នាឆ្ងាយ។

កាលពីខែតុលា នៅពេល Musk យកឈ្នះ Bezos ដោយបានក្លាយជាមហាសេដ្ឋីលំដាប់ទីមួយក្នុងពិភពលោក CEO របស់ក្រុមហ៊ុន Tesla លោក Elon Musk ក៏បានផ្ញើរូបភាពតំណាងមេដាយប្រាក់ឱ្យទៅលោក Bezos ផងដែរ ដែលនេះមានន័យថា ចំណាត់ថ្នាក់លេខពីរគឺសម្រាប់ម្ចាស់ Amazon៕

November 5, 2021

បច្ចេកវិទ្យាជួយឱ្យមេគ្រួសារដាំដំណាំក្នុងផ្ទះបានយ៉ាងងាយស្រួល និងមានប្រណិតភាពខ្ពស់ (វីដេអូ)

កូរ៉េខាងត្បូង ថ្មីៗនេះ បានបង្ហាញឧបករណ៍ឆ្លាតវៃមួយចំនួនដែលជួយឱ្យមនុស្សគ្រប់គ្នាអាចដាំដំណាំក្នុងផ្ទះបានដោយងាយស្រួល ដូចជាបន្លែ ផ្កា និងកូនឈើជាដើម។

(ខេត្ត Gyeonggi កូរ៉េខាងត្បូង)-នៅពេលជំងឺរាតត្បាតកំពុងតែធ្វើឱ្យមនុស្សម្នាពិបាកចេញពីខាងក្រៅ បណ្ដាក្រុមហ៊ុនអេឡិចត្រូនិករបស់ ប្រទេសកូរ៉េខាងត្បូង បានឧទ្ទេសនាមប្រព័ន្ធដាំដុះឆ្លាតវៃជាច្រើនដែលអាចប្រើប្រាស់នៅក្នុងផ្ទះ។

ម៉ាស៊ីនដាំដំណាំរបស់យីហោ Wells នៃក្រុមហ៊ុនមេ Kyowon មានទំហំប្រហាក់ប្រហែលនឹងកូនអាងចិញ្ចឹមត្រីលម្អ។ ចំពោះមេផ្ទះដូចជា Kim Sun-mi ឧបករណ៍នេះងាយស្រួលប្រើប្រាស់បំផុត។ អ្នកស្រីគ្រាន់តែស្រោចទឹកបន្លែតែម្ដងគត់ក្នុងមួយសប្ដាហ៍ នៅពេលម៉ាស៊ីនឆ្លាតវៃនេះផ្ញើសារជូនដំណឹង។

អ្នកស្រី Kim Sun-mi ដែលជាអតិថិជនម្នាក់រស់នៅក្នុងខេត្ត Gyeonggi បានប្រាប់ថា៖ «មានអារម្មណ៍ថាអស្ចារ្យគ្រប់ពេលដែលក្រោកពីគេង និងមើលវានៅពេលព្រលឹម។ ខ្ញុំចូលចិត្តមើលវាលូតលាស់ពីមួយថ្ងៃ ទៅមួយថ្ងៃ។ ខ្ញុំឃើញថា វាធំឡើងទៅតាមពេលវេលា»។

ឧបករណ៍នេះ មើលទៅដូចមិនអាចដាំបន្លែបានច្រើនប៉ុន្មាន ប៉ុន្តែទិន្នផលជាក់ស្ដែងរបស់វា មានច្រើនជាងការរំពឹងទុក។

មុននេះ ក្រុមហ៊ុន LG Electronics ក៏បានឃោសនាអំពីម៉ាស៊ីនដាំដំណាំឆ្លាតវៃរបស់ខ្លួន។ ឧបករណ៍របស់ពួកគេ ដូចទៅនឹងទូទឹកកកតូចមួយគ្រឿង ប៉ុន្តែ អាចដាំបានទាំងបន្លែ ទាំងផ្កា។

ក្រុមហ៊ុន LG Electronics ឱ្យដឹងថា បន្លែស៊ីពេល 4 សប្ដាហ៍ទើបអាចប្រមូលផលបាន រីឯផ្កាវិញស៊ីពេលអស់ប្រហែល 6 សប្ដាហ៍ទើបចេញផ្កា។ អ្នកប្រើប្រាស់អាចតាមដានការលូតលាស់របស់ដំណាំ តាមរយៈទូរស័ព្ទឆ្លាតវៃរបស់ពួកគេ។

យោងតាមទិន្នន័យពីសមាគមលើកកម្ពស់ការច្នៃប្រឌិតកូរ៉េ KIPA (Korean Invention Promotion Association) តម្លៃទីផ្សារសម្រាប់អ្នកដាំដំណាំនឹងកើនដល់ 500 ពាន់លានវ៉ុន (ប្រហែល 425 លានដុល្លារអាម៉េរិក) នៅឆ្នាំ 2023៕

November 5, 2021

មហាសេដ្ឋី Jeff Bezos ទើបតែលក់ភាគហ៊ុន Amazon តម្លៃ 2 ពាន់លានដុល្លារ ដើម្បីយកទៅ «សង្គ្រោះពិភពលោក»

យោងតាមសារព័ត៌មាន Bloomberg មហាសេដ្ឋីលំដាប់ទីពីរក្នុងពិភពលោក Jeff Bezos ទើបតែបានលក់ភាគហ៊ុនតម្លៃប្រហែល 2 ពាន់លានដុល្លារនៅក្នុងក្រុមហ៊ុន Amazon ក្រោយពីបានសន្យាថានឹងចំណាយប្រាក់ទាំងនេះដើម្បីស្ដារធម្មជាតិ និងផ្លាស់ប្ដូរប្រព័ន្ធស្បៀងអាហាររបស់ពិភពលោក។

ខ្ទង់ប្រាក់ចំនួន 2 ពាន់លានដុល្លារខាងលើនឹងត្រូវបានផ្ទេរទៅឱ្យមូលនិធិ Bezos Earth របស់លោក ដើម្បីអនុវត្តផែនការដែលលោកបានសន្យា។

ឯកសាររបស់គណៈកម្មការមូលបត្រអាម៉េរិក បានបង្ហាញថា លោក Bezos បានលក់ភាគហ៊ុន Amazon ចំនួន 608,450 ហ៊ុន។ ដូច្នេះ នៅក្នុងឆ្នាំនេះ ស្ថាបនិករបស់ Amazon បានលក់ភាគហ៊ុនដែលមានតម្លៃសរុប 8.6 ពាន់លានដុល្លារ។

លោក Bezos និងព្រះអង្គម្ចាស់ Charles នៅក្នុងជំនួបមួយ នៅឯព្រឹត្តិការណ៍ COP26 ក្នុងក្រុង Glasgow, Scotland កាលពីប៉ុន្មានថ្ងៃមុន

លោក Jeff Bezos បានប្រើប្រាស់ប្រាក់ដែលបានពីការលក់ភាគហ៊ុន Amazon សម្រាប់ទ្រទ្រង់ក្រុមហ៊ុនអវកាស Blue Origin។ ក្រៅពីនេះ លោកក៏បានសន្យាថា ផ្ដល់ប្រាក់ 10 ពាន់លានដុល្លារទៅឱ្យមូលនិធិ Bezos Earth Fund ដើម្បីជួយប្រយុទ្ធប្រឆាំងនឹងផលប៉ះពាល់ដែលកើតឡើងដោយសារការប្រែប្រួលអាកាសធាតុរបស់ផែនដី។

ក្នុងប្រកាសថ្មីបំផុត លោក Bezos មានបំណងចំណាយ 1 ពាន់លានដុល្លារ ដើម្បីជួយដល់សកម្មភាពស្ដារធម្មជាតិឡើងវិញ និង 1 ពាន់លានដុល្លារទៀតសម្រាប់កែប្រែប្រព័ន្ធស្បៀងអាហារ និងវិស័យកសិកម្មរបស់ពិភពលោក៕

November 4, 2021

មួយថ្ងៃចាយអស់ 10,000 ដុល្លារ! តើអ្នកនឹងត្រូវចំណាយពេលប៉ុន្មានឆ្នាំទើបចាយអស់ប្រាក់របស់មហាសេដ្ឋី Elon Musk?

បើនិយាយឱ្យលើសបន្តិច ប្រាក់ទាំងអស់របស់មហាសេដ្ឋីអាម៉េរិក ដើមកំណើតអាហ្វ្រិក លោក Elon Musk បើទោះយកទៅដុតក៏មិនងាយនឹងអស់ដែរ។

ក្នុងពេលបច្ចុប្បន្ន លោក Elon Musk គឺជាអ្នកមានជាងគេបង្អស់ក្នុងពិភពលោក។ ជាមួយនឹងទ្រព្យជាង 300 ពាន់លានដុល្លារអាម៉េរិក (ជាក់ស្ដែងគឺ 315.6 ពាន់លានដុល្លារ) លោក Musk មានជាងមហាសេដ្ឋី Jeff Bezos រហូតដល់ 100 លានដុល្លារអាម៉េរិក។

ប៉ុន្តែ តើប្រាក់ចំនួន 315 ពាន់លានដុល្លារ ច្រើនដល់កម្រិតណា? បើសិនជាប្រាក់ចំនួន 315 ពាន់លានដុល្លារខាងលើជារបស់អ្នក ហើយក្នុងមួយថ្ងៃ អ្នកចាយអស់ 10,000 ដុល្លារ តើអ្នកនឹងត្រូវប្រើពេលប៉ុន្មានឆ្នាំ ដើម្បីចាយឱ្យអស់ប្រាក់នេះ?

តាមការគណនា អ្នកនឹងត្រូវប្រើពេលប្រមាណរហូតដល់ជាង 315,00,000 ថ្ងៃ ដែលស្មើនឹង 86,300 ឆ្នាំ ទើបអាចចាយអស់ប្រាក់ចំនួន 315 ពាន់លានដុល្លារនេះ។ សូមបញ្ជាក់ថា តួលេខនេះ គ្រាន់តែជាការគណនាក្រៅផ្លូវការប៉ុណ្ណោះ ហើយវាអាស្រ័យទៅលើតម្លៃពិតនៃទ្រព្យរបស់មហាសេដ្ឋី Elon Musk។

មហាសេដ្ឋី Elon Musk (Elon Reeve Musk FRS) មានសញ្ជាតិចំនួន 3 គឺ អាម៉េរិក កាណាដា និងអាហ្វ្រិកខាងត្បូង។ បច្ចុប្បន្ន លោកមានអាយុ 50 ឆ្នាំ។ លោក Musk តែងតែជាទីចាប់អារម្មណ៍របស់សាធារណជន មិនថានៅលើបណ្ដាញសង្គម មិនថានៅលើទំព័រសារព័ត៌មាន។ លោកគឺជានាយកប្រតិបត្តិរបស់ក្រុមហ៊ុនអវកាស SpaceX និងក្រុមហ៊ុនផលិតរថយន្តអគ្គិសនី Tesla៕

November 4, 2021

អាកាសយានដ្ឋានអន្ដរជាតិភ្នំពេញថ្មី សង់បាន 26% ហើយ ខណៈវិស័យឯកជន បោះទុន 15 លានដុល្លារថែមទៀត

វិស័យឯកជនបានបោះទុនវិនិយោគ 15 លានដុល្លារអាម៉េរិក លើមូលបត្របំណុលរបស់ក្រុមហ៊ុន CAIC ដោយធនាគារព្រីនស៍ សម្រាប់គម្រោងសាងសង់សំណង់អាកាសយានដ្ឋានអន្ដរជាតិភ្នំពេញថ្មី នៅខេត្ដកណ្ដាល បន្ទាប់ពី កម្ពុជា សម្រេចបើកប្រទេសឡើងវិញ។

ពិធីចុះហត្ថលេខាមួយ រវាងលោក Honn Sorachna នាយកធនាគារ ធនាគារ Prince Bank និងលោក Charles Vann នាយកក្រុមហ៊ុន OCIC ត្រូវបានធ្វើឡើងកាលពីរសៀលថ្ងៃទី 3 ខែវិច្ឆិកា ដោយមានវត្តមានរបស់អ្នកឧកញ៉ា ពុង ឃែវសែ នាយកប្រតិបត្ដិធនាគារកាណាឌីយ៉ា ផងដែរ។

ការចុះហត្ថលេខាខាងលើនេះគឺជាការបញ្ជាក់អំពីការវិនិយោគដោយទឹកប្រាក់ 15 លានដុល្លារ ទៅលើមូលបត្របំណុលរបស់គម្រោងសាងសង់អាកាសយានដ្ឋានអន្តរជាតិ ភ្នំពេញថ្មី (New Phnom Penh International Airport/NPPIA)។ ទឹកប្រាក់ដែលប្រមូលបានពីកិច្ចព្រមព្រៀងនេះ នឹងត្រូវប្រើប្រាស់សម្រាប់ការសាងសង់ និងការអភិវឌ្ឍន៍ NPPIA។

គម្រោង NPPIA ដែលបច្ចុប្បន្នសម្រេចបាន 26% លើទឹកប្រាក់ប្រមាណ 346 លានដុល្លារអាម៉េរិក (មិនរាប់បញ្ចូលថ្លៃដី ដែលវិនិយោគរួចដោយ CAIC) នេះ ត្រូវបានរំពឹងថា នឹងត្រូវដាក់ឱ្យដំណើរការនៅឆ្នាំ 2023។ នេះបើតាម លោក Honn Sorachna នាយកធនាគារ Prince។

សូមបញ្ជាក់ថា NPPIA គឺជាគម្រោងធំមួយដែលកំពុងត្រូវបានអភិវឌ្ឍដោយក្រុមហ៊ុន OCIC (Overseas Cambodian Investment Corporation) ខណៈក្រុមហ៊ុន CAIC ត្រូវបានរាជរដ្ឋាភិបាលកម្ពុជា ផ្តល់សិទ្ធិឱ្យកាន់កាប់រចនានៃការសាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោងនេះ។

November 4, 2021

ទិដ្ឋភាពក្រុងខាងលិចនៃ រាជធានីបាងកក ក្រោយការបើកទ្វារទទួលទេសចរ

ផ្លូវ Khaosan ដែលធ្លាប់ជាតំបន់អ៊ូអរដោយសារវត្តមានរបស់ភ្ញៀវទេសចរណ៍បរទេស នៅ រាជធានីបាងកក នៅតែមានសភាពស្ងាត់ជ្រងំ បើទោះជា ប្រទេសថៃ បានប្រកាសបើកទ្វារទទួលទេសចរឡើងវិញក៏ដោយ។

យោងតាមសារព័ត៌មាន Reuters របស់ អង់គ្លេស ផ្លូវ Khaosan ក្នុងរាជធានីបាងកក លែងមានសភាពអ៊ូអរដូចមុនទៀតហើយ ចាប់តាំងពី COVID-19 ផ្ទុះឆ្លងរាលដាលកាលពីឆ្នាំទៅ។ ប៉ុន្តែ ម្ចាស់អាជីវកម្មនានា កំពុងតែសង្ឃឹមថា ការដែល ប្រទេសថៃ បើកទ្វារទទួលអ្នកទេសចរណ៍ក្នុងសប្ដាហ៍នេះ នឹងជួយស្ដារស្ថានការណ៍របស់ក្រុងនេះឡើងវិញ។

ប្រទេសថៃ ដែលជាទីតាំងទេសចរណ៍ល្បីឈ្មោះមួយនៅ ទ្វីបអាស៊ី បានអនុវត្តវិធានការទប់ស្កាត់ COVID-19 យ៉ាងតឹងរ៉ឹង ដោយផ្អាកការទទួលភ្ញៀវទេសចរណ៍បរទេសក្នុងរយៈពេល 18 ខែកន្លងទៅ។ ប៉ុន្តែ ចាប់ពីថ្ងៃទី 1 ខែវិច្ឆិកា ប្រទេសនេះបានបើកទ្វារទទួលភ្ញៀវបរទេសទាំងឡាយណាដែលបានចាក់វ៉ាក់សាំងរួចរាល់ និងជាពលរដ្ឋមកពីប្រទេស និងដែនដីជាង 60 ដែលមានហានិភ័យទាប ដោយមិនតម្រូវឱ្យធ្វើចត្តាឡីស័ក។

Thapanee Pansodsaicharoenkit ម្ចាស់ភោជនីយដ្ឋាន Rocco នៅលើបណ្ដោយផ្លូវ Khaosan ឱ្យដឹងថា៖ «ផ្លូវ Khaosan គឺជាទីតាំងល្បីឈ្មោះសម្រាប់ភ្ញៀវទេសចរណ៍បរទេសនៅពេលពួកគេមកលេង បាងកក។ ចំពោះយើង និងអ្នកទាំងឡាយដែលជាម្ចាស់អាជីវកម្ម ពួកគេគឺជាក្ដីសង្ឃឹមតែមួយគត់នៅពេលនេះ»។

នៅពេលអ្នកយកព័ត៌មានរបស់ Reuters មកកាន់ទីនេះកាលពីព្រលប់ថ្ងៃទី 2 វិច្ឆិកា បើទោះជាភោជនីយដ្ឋានចាប់ផ្ដើមមានភ្ញៀវ ប៉ុន្តែ ផ្លូវក្នុងក្រុងនៅតែស្ងប់ស្ងាត់ ក្នុងនោះមានហាងលក់ទំនិញប្រមាណ 90% បានបិទទ្វារដោយមិនមានកាលកំណត់។

Prasit Singhdamrong ប្រធានសមាគមពាណិជ្ជកម្ម Khaosan ថ្លែងថា អាជីវកម្មនៅតាមបណ្ដោយដងផ្លូវ Khaosan ត្រូវបានផ្អាករយៈពេល 18 ខែកន្លងទៅ ហើយមានអាជីវកម្ម 10% ប៉ុណ្ណោះ ដែលអាចបន្តរកស៊ី។ ទោះជាបានបើកទ្វារនាសប្ដាហ៍នេះ ប៉ុន្តែ វិធានការរឹងបន្តឹងមួយចំនួន នៅតែមាន។ ភោជនីយដ្ឋានទាំងឡាយដែលត្រូវបានស្ថាប័នគ្រប់គ្រងទេសចរណ៍ទទួលស្គាល់ អាចបម្រើស្រាដល់អតិថិជនត្រឹមម៉ោង 21 ប៉ុណ្ណោះ ខណៈហាងស្រា នៅតែត្រូវបិទទ្វារ៕

November 4, 2021

អាចឆ្លើយនឹងសំនួររបស់ Jeff Bezos ដែលសួរថា «មានបង្អួចប៉ុន្មាននៅក្នុងទីក្រុង» បេក្ខនារីមួយរូប បានចូលធ្វើការនៅ Amazon ភ្លាម មិនចាំស្អែក

សំនួរក្នុងកិច្ចសម្ភាសប្រកបដោយភាពរីករាយរបស់មហាសេដ្ឋី អាម៉េរិក Jeff Bezos គឺ៖ «មានបង្អួចសរុបចំនួនប៉ុន្មាន នៅក្នុងទីក្រុង?»។

អត្ថបទនេះគឺជាការចែករំលែករបស់នាង Ann Hiatt ដែលជាអតីតអ្នកយុទ្ធសាស្ត្រមួយរូបនៅជ្រលងភ្នំ Silicon (silicon valley) នៃរដ្ឋ California សហរដ្ឋអាម៉េរិក។ នាង Ann Hiatt មានបទពិសោធន៍ 15 ឆ្នាំ ទាក់ទងនឹងការងារជាសហការិនី ឬជំនួយការរបស់មេដឹកនាំក្រុមហ៊ុនបច្ចេកវិទ្យាធំៗជាច្រើនរូប មានដូចជា មហាសេដ្ឋី Jeff Bezos, Marissa Mayer និង Eric Schmidt ជាដើម។ ថ្មីៗនេះ Hiatt បានបង្កើត និងទទួលភារកិច្ចជានាយិកាប្រតិបត្តិរបស់ក្រុមហ៊ុនប្រឹក្សាយោបល់ដែលមានអតិថិជនជា CEO របស់បណ្ដាក្រុមហ៊ុននៅទូទាំងពិភពលោក។

«ខ្ញុំបានដាក់ពាក្យសុំការងារជាជំនួយការនៅឯក្រុមហ៊ុន Amazon កាលពីឆ្នាំ 2002។ កាលណោះ ខ្ញុំមិនបានស្គាល់អ្នកណាទាំងអស់នៅក្នុងក្រុមហ៊ុន និងមិនមានសញ្ញាបត្រវិទ្យាសាស្ត្រកុំព្យូទ័រ ថែមទាំងមិនមានបទពិសោធន៍ក្នុងកិច្ចការជាលេខារបស់ CEO ណាមួយនោះដែរ។

ហើយនេះគឺជាបទពិសោធន៍នៃកិច្ចសម្ភាសសុំការងាររបស់ខ្ញុំ នៅ Amazon ៖

កិច្ចសម្ភាសដំបូងរបស់ខ្ញុំនៅឯក្រុមហ៊ុន Amazon ច្រើនដល់ថ្នាក់វិលមុខ។ ខ្ញុំបានសម្ភាសផ្ទាល់ជាមួយជំនួយការជាន់ខ្ពស់ទាំងអស់របស់ក្រុមហ៊ុននេះ ក្នុងចំណោមនោះ មានខ្លះស៊ីពេលពេញមួយថ្ងៃ។

ជាងនេះ ក៏មានកិច្ចសម្ភាសមួយដែលធ្វើឡើងនៅក្នុងបន្ទប់ងងឹត មានតែពន្លឺអេក្រង់កុំព្យូទ័រដែលពេញដោយកូដ និងអំពូលភ្លើងរាត្រីច្រើនពណ៌នៅឯជ្រុងបន្ទប់។ ប៉ុន្តែ វាមិនចម្លែកប៉ុន្មានទេ ព្រោះធ្លាប់ជួបរឿងនេះ (ឪពុក ម្ដាយរបស់ខ្ញុំគឺជាអ្នកធ្វើការក្នុងវិស័យនេះ)។

នាង Ann Hiatt បច្ចុប្បន្នគឺជា CEO របស់ក្រុមហ៊ុនប្រឹក្សាយល់ ដែលអតិថិជនគោលដៅសុទ្ធតែជា CEO នៃបណ្ដាក្រុមហ៊ុនអន្តរជាតិ

ប៉ុន្មានខែក្រោយមក ខ្ញុំគិតថា ប្រហែលជាធ្លាក់បាត់ហើយ ព្រោះមិនមានការឆ្លើយតបសោះ។ ប៉ុន្តែ បុគ្គលិកធនធានមនុស្សម្នាក់របស់ Amazon បានហៅទូរស័ព្ទ និងអញ្ជើញខ្ញុំទៅសម្ភាសលើកចុងក្រោយ។ ប៉ុន្តែ ម្នាក់នេះមិនបានប្រាប់ថា ខ្ញុំនឹងត្រូវសម្ភាសជាមួយមហាសេដ្ឋី Jeff Bezos នោះឡើយ។

សំនួរដំបូងនៅក្នុងកិច្ចសម្ភាសជាមួយម្ចាស់ Amazon

ខ្ញុំមានអារម្មណ៍ធូរស្រាលក្នុងចិត្តនៅពេលត្រូវសម្ភាស។ Bezos ឈានជើងចូលដល់ អង្គុយទល់មុខនឹងខ្ញុំ រួចក៏ណែនាំខ្លួន។ គាត់ប្រាប់ថា នឹងសួរតែពីរសំនួរគត់ ហើយសំនួរដំបូងនឹងជាសំនួរ «សប្បាយរីករាយ»។

«ខ្ញុំចង់ឱ្យអ្នកគណនា។ មានបង្អួចចំនួនប៉ុន្មាននៅក្នុងទីក្រុង?» លោក Bezos និយាយបណ្ដើរ គូររូបបង្អួចនៅលើក្ដារខៀនបណ្ដើរ។

ភ្លាមនោះ ខ្ញុំពិតជាភ្ញាក់ផ្អើលខ្លាំងណាស់។ ក្រោយមក ខ្ញុំក៏ដកដង្ហើមមួយយ៉ាងវែងដើម្បីសម្រួលអារម្មណ៍ និងរំលឹកខ្លួនឯងអំពី «គោលបំណង» របស់ Bezos នៅពេលសួរសំនួរនោះ។ ខ្ញុំគិតថា ប្រការនេះគឺដើម្បីសង្កេតមើលថា តើខ្ញុំរហ័សរហួនដល់កម្រិតណា ហើយគាត់ចង់ឃើញវិធីដែលខ្ញុំបំបែកបញ្ហាស្មុគស្មាញជាចំណែកតូចៗ ដើម្បីគ្រប់គ្រង។

ខ្ញុំចាប់ផ្ដើមដោយលើកឡើងអំពីចំនួនប្រជាជននៅទីក្រុង Seattle (ប្រហែល 1 លាននាក់)។ បន្ទាប់មក ខ្ញុំលើកឧទាហរណ៍ថា ក្នុងមនុស្សម្នាក់មានផ្ទះមួយខ្នង រថយន្តមួយគ្រឿង និងការិយាល័យមួយ ឬសាលារៀនមួយកន្លែង ដែលទាំងអស់នេះសុទ្ធតែមានបង្អួច។ ហើយយើងក៏ចាប់ផ្ដើមគណនាជាមួយគ្នា ដោយពិនិត្យមើលរាល់ករណីដែលអាចកើតឡើង ប្រក្រតីភាព រួមនឹងករណីលើកលែង។ ខ្ញុំនិយាយ ចំណែក Bezos បង់លេខទៅលើក្ដារខៀន។ កិច្ចការនេះស៊ីពេលអស់ជាង 10 នាទី មុននឹងគាត់សរសេរអំពីការប៉ាន់ស្មានចុងក្រោយ រួចបញ្ចេញយោបល់៖ «ស្ដាប់ទៅ ទំនងត្រូវ»។

ដូច្នេះ សំនួរ «សប្បាយរីករាយ» ក៏បានបញ្ចប់។

នាង Ann Hiatt មានបទពិសោធន៍ 15 ឆ្នាំ ទាក់ទងនឹងការងារជាសហការិនី ឬជំនួយការរបស់មេដឹកនាំក្រុមហ៊ុនបច្ចេកវិទ្យាធំៗជាច្រើន

សំនួរទីពីររបស់លោក Jeff Bezos ៖ «តើគោលដៅនៃមុខរបររបស់អ្នកគឺជាអ្វី?»

ខ្ញុំនិយាយថា Amazon ត្រូវបានគេបញ្ជាក់ថា ជាក្រុមហ៊ុនមួយដែលពោរពេញដោយមនុស្សដែលមានមហិច្ឆតា និងការជាប់ចិត្ត។ ខ្ញុំចង់ដូចពួកគាត់ និងរៀនសូត្រពីពួកគាត់។ ចំនុចខ្លាំងរបស់ពួកគាត់គឺជាអ្វីដែលខ្ញុំចង់រីកចម្រើន។ ទោះបីកន្លងមក ខ្ញុំមានបំណងក្លាយជាសាស្ត្រាចារ្យ ប៉ុន្តែ ខ្ញុំបានផ្លាស់ប្ដូរការគិត ហើយចង់ទទួលបានបទពិសោធន៍ពីក្រុមហ៊ុន Amazon។

ខ្ញុំក៏បានបន្ថែមថា ខ្ញុំមិនមានបទពិសោធន៍ធ្វើការជាជំនួយការ ប៉ុន្តែ តែងតែយល់ច្បាស់អំពីសារសំខាន់ដែលគួរនៅក្រៅរង្វង់សុវត្ថិភាពដើម្បីអភិវឌ្ឍខ្លួន និងដើម្បីជោគជ័យ។

បន្ទាប់មក Bezos មិនបានទុកឱ្យខ្ញុំត្រូវរង់ចាំទៀតនោះទេ គាត់ប្រកាសនៅនឹងកន្លែងថា ខ្ញុំត្រូវបានជ្រើសរើស។ គាត់ក៏បង្ហាញតុធ្វើការរបស់ខ្ញុំដែលមានចម្ងាយប្រហែល 3 ជំហាន ពីកន្លែងអង្គុយរបស់គាត់។ នោះគឺជាតុដែលនៅជិតកន្លែងធ្វើការរបស់ Bezos ជាងគេ នៅក្នុងក្រុមហ៊ុននេះ។

ពេលវេលាបានកន្លងទៅអស់ជាច្រើនឆ្នាំ ទើបខ្ញុំយល់អំពីមូលហេតុដែល Bezos បែរជាផ្ដល់ឱកាសការងារដល់បេក្ខភាពដែលមិនមានបទពិសោធន៍ដូចខ្ញុំ។ គាត់មានបំណងបង្កើតក្រុមបុគ្គលិកដែលពេញដោយមហិច្ឆតា ច្នៃប្រឌិតក្នុងការងារ ដោយមិនគិតដល់ការដែលពួកគេខ្វះជំនាញមួយចំនួន៕

November 3, 2021

រមណីយដ្ឋានអង្គរ ជាប់ចំណាត់ថ្នាក់លេខមួយ ជាទីកន្លែងដែលល្អបំផុត សម្រាប់ដំណើរទេសចរណ៍ នៅក្នុងតំបន់អាស៊ីអាគ្នេយ៍

ដំណឹងខាងលើនេះគឺយោងតាមការស្ទង់មតិរបស់ក្រុមហ៊ុនមគ្គុទេសទេសចរណ៍ Touropia ដែលចេញផ្សាយកាលពីពេលថ្មីៗនេះ។

«នៅពេលនិយាយដល់ទីតាំងបុរាណ អ្នកទេសចរណ៍នឹងមិនចង់រំលងចោលរមណីយដ្ឋានអង្គរ នៅខេត្តសៀមរាប ដែលស្ថិតនៅភាគខាងជើង នៃ ប្រទេសកម្ពុជា សោះឡើយ។ រមណីយដ្ឋានអង្គរ បង្កប់ទៅដោយវប្បធម៌ដ៏សំខាន់ៗបំផុតរបស់ពិភពលោក រួមនឹងប្រាសាទអង្គរវត្តដ៏ធំសម្បើម ប្រាសាទបាយ័ន ដែលមានរូបព្រហ្មមុខ 4 ធំៗ និងប្រាសាទតាព្រហ្ម ជាប្រាសាទបែបព្រះពុទ្ធសាសនា ដែលគ្របដណ្តប់ដោយរុក្ខជាតិធំៗ និងខ្ពស់» Touropia រៀបរាប់ដូច្នេះ។

ក្រៅពីរមណីយដ្ឋានអង្គរ កម្ពុជា ក៏នៅមានខេត្ត ព្រះសីហនុ ផងដែរ ដែលបានជាប់ចំណាត់ថ្នាក់លេខ 28 ខណៈ រាជធានីភ្នំពេញ ជាប់ចំណាត់ថ្នាក់លេខ 20។

ចំណាត់ថ្នាក់លេខពីរ ក្នុងចំណោមទីកន្លែងល្អបំផុត សម្រាប់ដំណើរទេសចរណ៍ នៅក្នុងតំបន់អាស៊ីអាគ្នេយ៍ បានទៅលើ កោះបាលី នៃប្រទេសឥណ្ឌូនេស៊ី។ ចំណែកឆ្នេរសមុទ្រហាឡុង នៃប្រទេសវៀតណាម បានជាប់លេខបី៕

November 3, 2021

Category: សង្គម និងសេដ្ឋកិច្ច