សង្គម និងសេដ្ឋកិច្ច - La Reine Media

អាជីវកម្មម៉ាស្សានៅ កម្ពុជា ត្រូវបានក្រសួងដាក់ឱ្យអនុវត្តនីតិវិធីប្រតិបត្តិស្ដង់ដាអប្បបរមា តាមគន្លងប្រក្រតីភាពថ្មី សម្រាប់ដំណើរការរកស៊ី

នៅក្នុងសេចក្ដីសម្រេច ចុះថ្ងៃទី 11 វិច្ឆិកា ឆ្នាំ 2021 ក្រសួងទេសចរណ៍ កំណត់ឱ្យបណ្ដាទីតាំងអាជីវកម្មម៉ាស្សា អនុវត្តនីតិវិធីប្រតិបត្តិស្ដង់ដាអប្បបរមា ដើម្បីទប់ស្កាត់ការឆ្លងរាលដាលនៃជំងឺ COVID-19 នៅក្នុងពេលបើកទ្វារទទួលអតិថិជន។

សេចក្ដីសម្រេចដែលស្ដីពីការគោរពតាមវិធានការការពារការឆ្លងវីរុសនេះ ក៏បាននិយាយដល់ការលើកទឹកចិត្តឱ្យភ្ញៀវប្រើប្រាស់សេវាទូទាត់ប្រាក់តាមអនឡាញដើម្បីកាត់បន្ថយការប៉ះពាល់ ការកក់សេវាកម្មជាមុន ការប្រើសញ្ញា/កាយវិការនៅពេលមានតម្រូវការអ្វីមួយជំនួសឱ្យការបញ្ចេញសំឡេងខ្លាំងៗ ឬការធ្វើតេស្តរហ័ស។ល។

ព័ត៌មានលម្អិត សូមបន្តអានសេចក្ដីសម្រេចរបស់ក្រសួងទេសចរណ៍ ដូចខាងក្រោម៖

November 13, 2021

វីថីជោគជ័យក្នុងការរកប្រាក់របស់មហាសេដ្ឋី Peter Thiel ដែលជាអ្នកវិនិយោគដំបូងៗមួយរូបរបស់ក្រុមហ៊ុន Facebook

ឆ្នាំ 2012 Facebook បានបោះផ្សាយមូលបត្របំណុលជាសាធារណៈលើកដំបូង (IPO) របស់ខ្លួន ហើយ Thiel ដែលកាលណោះគឺជាសមាជិកក្រុមប្រឹក្សាភិបាល ក៏រកប្រាក់បានប្រមាណ 1,000 លានដុល្លារពីការលក់ភាគហ៊ុន។

Peter Thiel ដែលកើតឆ្នាំ 1967 នៅប្រទេស អាល្លឺម៉ង់ បានរួមដំណឹងជាមួយគ្រួសារទៅកាន់ សហរដ្ឋអាម៉េរិក ជាលើកដំបូងនៅពេលមានអាយុមួយឆ្នាំ។ ប៉ុន្តែ ក្រោយមក ពួកគេបានធ្វើដំណើរពាសពេញពិភពលោក មុនពេលសម្រេចរស់នៅក្នុងទីក្រុង Foster នៅភាគខាងត្បូង San Francisco សហរដ្ឋអាម៉េរិក ដែលកាលណោះ Thiel កំពុងរៀនថ្នាក់ទី 5។

Peter Thiel មានសញ្ញាបត្រផ្នែកទស្សនវិជ្ជា និងច្បាប់របស់សាកលវិទ្យាល័យ Stanford។ កាលពីនៅសិក្សានៅទីនេះ លោកបានបង្កើត និងក្លាយជានិពន្ធនាយករបស់សារព័ត៌មាន The Stanford Review។

Thiel ក៏ធ្លាប់ជាម្នាក់ក្នុងចំណោមកំពូលអ្នកលេងអុកវ័យក្មេងដែលត្រូវបានចាត់ចូលក្នុងចំណាត់ថ្នាក់ពិភពលោក និងធ្លាប់បានក្លាយជាកំពូលអ្នកលេងអុកលំដាប់ខ្ពស់បំផុតប្រចាំ សហរដ្ឋអាម៉េរិក ផងដែរ។

មុនពេលចូលប្រលូកក្នុងវិស័យបច្ចេកវិទ្យា Thiel គឺជាជំនួយការម្នាក់របស់ចៅក្រម។ លោកក៏ធ្លាប់ទៅសម្ភាសដើម្បីក្លាយជាជំនួយការរបស់ចៅក្រមនៅតុលាការកំពូល ប៉ុន្តែបានបរាជ័យ។

បន្ទាប់មក លោក Thiel ធ្វើជាមេធាវីផ្នែកមូលបត្រក្នុងរយៈពេល 7 ខែ ហើយក្រោយមកក៏បានធ្វើកិច្ចការដោះដូរពាណិជ្ជកម្មនៅក្រុមហ៊ុន Credit Suisse។ ការងារនេះបានជួយឱ្យ Thiel មានប្រាក់គ្រប់គ្រាន់ដើម្បីសហការជាមួយ Max Levchin បង្កើតក្រុមហ៊ុនបច្ចេកវិទ្យាហិរញ្ញវត្ថុ PayPal ដែលក្រោយមក ក្រុមហ៊ុននេះត្រូវបានច្របាច់បញ្ចូលគ្នានឹងក្រុមហ៊ុន X.com របស់ Elon Musk មុនពេលត្រូវបានលក់ទៅឱ្យ eBay ក្នុងតម្លៃ 1.5 ពាន់លានដុល្លារ កាលពីឆ្នាំ 2002។ នេះបើយោងតាមព័ត៌មានពី CNet។

មហាសេដ្ឋី Peter Thiel (ឆ្វេង) និងមហាសេដ្ឋី Elon Musk

នៅពេល PayPal ត្រូវបានលក់កាលពីឆ្នាំ 2002 ភាគហ៊ុនរបស់ Thiel មានតម្លៃប្រហែល 55 លានដុល្លារ។ ខ្ទង់ប្រាក់នេះត្រូវបានលោកយកទៅបង្កើតមូលនិធិបង្ការហានិភ័យ Clarium Capital។ Clarium ដំបូងឡើយទទួលបានជោគជ័យខ្លាំង ប៉ុន្តែក្រោយមកក៏បានបាត់បង់ទុន 90% ក្នុងឆ្នាំ 2011។

ឆ្នាំ 2004 Thiel និង Alexander Karp បានសហការបង្កើតក្រុមហ៊ុន Palantir ដោយយោងទៅតាមគំនិតរបស់ Thiel ដែលថា ពួកគេនឹងប្រើកម្មវិធីកុំព្យូទ័ររុករកករណីបន្លំនៅក្នុងវិស័យហិរញ្ញវត្ថុក្នុងបំណងស្វែងរកសកម្មភាពភេរវកម្ម។

ឆ្នាំ 2004 ដដែល Thiel បានក្លាយជាអ្នកវិនិយោគមកពីខាងក្រៅរបស់ Facebook។ លោកបានវិនិយោគ 500,000 ដុល្លារសម្រាប់ទិញភាគហ៊ុន 10% របស់ក្រុមហ៊ុននេះ ហើយក៏បានចូលរួមក្នុងក្រុមប្រឹក្សាភិបាល។

ប្រធានក្រុមហ៊ុន Facebook កាលណោះគឺ Sean Parker បានជួប CEO Reid Hoffman របស់ LinkedIn មុន ហើយ Hoffman បានណែនាំ Parker ឱ្យស្គាល់ Thiel។ នៅពេលចូលរួមក្នុងក្រុមប្រឹក្សាភិបាល លោក Beter Thiel បានជួយ Mark Zuckerberg ដោយផ្ទាល់តាមរយៈការសម្រេចចិត្តជាច្រើនទាក់ទងនឹងការប្រមូលទុន។ ឆ្នាំ 2012 Facebook បានបោះផ្សាយមូលបត្របំណុលជាសាធារណៈលើកដំបូង (IPO) ហើយ Thiel ក៏រកប្រាក់បានប្រមាណ 1,000 លានដុល្លារពីការលក់ភាគហ៊ុនរបស់ខ្លួន។

ទន្ទឹមនឹងការចូលរួមក្នុងក្រុមប្រឹក្សាភិបាលរបស់ Facebook លោក Thiel ក៏បង្កើតក្រុមហ៊ុន Founders Fund។ ក្រុមហ៊ុននេះបានវិនិយោគទៅក្នុងក្រុមហ៊ុនធុរកិច្ចថ្មីជាច្រើន មានដូចជា SpaceX និង Airbnb ។ល។ ក្រៅពីនេះ Thiel ក៏នៅតែជាអ្នកវិនិយោគធំនៃក្រុមហ៊ុនថ្មីជាច្រើនផ្សេងទៀត ក្នុងនោះក៏មាន LinkedIn, Yammer និង Yelp ផងដែរ។

បន្ទាប់មក Thiel ក៏បង្កើតក្រុមហ៊ុនវិនិយោគចំនួនពីរទៀតគឺ Valar Ventures ដែលផ្ដោតទៅលើខ្ទង់វិនិយោគនៅប្រទេស នូវែលសេឡង់ និង Mithril Capital ដែលបណ្ដាក់ទុនទៅក្នុងបណ្ដាក្រុមហ៊ុនធុរកិច្ចថ្មីទាំងឡាយដែលបានឆ្លងផុតដំណាក់កាលដំបូង។

ឆ្នាំ 2011 លោក Thiel បង្កើត The Thiel Fellowship ក្នុងបំណងផ្ដល់ជំនួយ 100,000 ដុល្លារ និងគាំទ្រពីរឆ្នាំដល់បេក្ខភាព 20 រូប អាយុក្រោម 20 ឆ្នាំ ដើម្បីអាចឱ្យពួកគេប្រែក្លាយក្ដីស្រមៃទៅជាការពិតក្នុងការបង្កើតក្រុមហ៊ុនផ្ទាល់ខ្លួន។

មូលនិធិនេះ ត្រូវបានបង្កើតឡើងទៅតាមគំនិតរបស់ Thiel ដែលយល់ថា ថ្លៃសាលានៅមហាវិទ្យាល័យខ្ពស់ខ្លាំង បើធៀបនឹងអ្វីដែលទទួលបាន ហើយអ្នកឆ្លាតវៃគួរចាប់ផ្ដើមធ្វើការឱ្យបានកាន់តែឆាប់ កាន់តែល្អ។

មិនត្រឹមតែជាអ្នកវិនិយោគដែលមានមនោសញ្ចេតនាខ្ពស់នោះទេ ប៉ុន្តែ Peter Thiel ក៏ជាម្ចាស់ស្នាដៃនិពន្ធនៃសៀវភៅមួយក្បាលដែលមានឈ្មោះថា Zero to One (ពីសូន្យដល់មួយ) ផងដែរ ដែលវាត្រូវបានក្រុមអ្នករកស៊ីថ្មី ចាត់ទុកថាជាសៀវភៅប្រចាំក្បាលដំណេករបស់ពួកគេ។ យោងតាមស្ថិតិរបស់ទស្សនាវដ្ដី Forbes មហាសេដ្ឋី Thiel បច្ចុប្បន្នមានទ្រព្យ 3.7 ពាន់លានដុល្លារអាម៉េរិក៕

November 13, 2021

រាជរដ្ឋាភិបាល អនុញ្ញាតឱ្យពលរដ្ឋដែលត្រៀមរៀបអាពាហ៍ពិពាហ៍ អញ្ជើញភ្ញៀវតិច ឬច្រើន ទៅតាមលទ្ធភាព

នៅក្នុងសារជាសំឡេងមួយដែលត្រូវបានផ្សព្វផ្សាយនាល្ងាចថ្ងៃទី 12 ខែវិច្ឆិកា ឆ្នាំ 2021 នេះ ប្រមុខរដ្ឋាភិបាលកម្ពុជា សម្ដេច ហ៊ុន សែន បានមានប្រសាសន៍ថា រាជរដ្ឋាភិបាល អនុញ្ញាតឱ្យប្រជាពលរដ្ឋដែលត្រៀមធ្វើពិធីរៀបមង្គលការ អញ្ជើញភ្ញៀវទៅតាមលទ្ធភាព ពោលគឺអាចអញ្ជើញដល់រាប់ពាន់នាក់។

រាជរដ្ឋាភិបាលលុបចោលការកំណត់ទៅលើចំនួនមនុស្សដែលបានដាក់ចេញកន្លងមក ហើយប្រជាពលរដ្ឋអាចរៀបចំអាពាហ៍ពិពាហ៍ដោយអញ្ជើញភ្ញៀវចូលរួមតិច ឬច្រើនទៅតាមលទ្ធភាព។ ប៉ុន្តែ សម្ដេច បញ្ជាក់ថា ចំនួនភ្ញៀវត្រូវកំណត់ទៅតាមទំហំនៃទីតាំងប្រារព្ធពិធីនីមួយ។

សម្ដេច បន្ថែមថា កម្មវិធីទទួលភ្ញៀវមកចូលរួមជប់លៀងអាពាហ៍ពិពាហ៍ មួយតុត្រូវកំណត់យកត្រឹម 7 នាក់ និងត្រូវអនុវត្តវិធានការសុខាភិបាលឱ្យបានតឹងរ៉ឹង មានដូចជា ការរក្សាគម្លាត ការពាក់ម៉ាស ការបាញ់អាល់កុល ការវាស់កម្ដៅ។ល។

ទន្ទឹមនឹងនេះ ប្រមុខរដ្ឋាភិបាល ក៏បានលើកទឹកចិត្តឱ្យក្រុមគ្រួសារដែលជាម្ចាស់ពិធីអាពាហ៍ពិពាហ៍ អញ្ជើញតែភ្ញៀងទាំងឡាយណាដែលបានទទួលការចាក់វ៉ាក់សាំងរួចរាល់ ព្រោះថា បើសិនជាក្នុងពិធីរៀបការនោះ មានវត្តមានរបស់អ្នកមិនបានចាក់វ៉ាក់សាំងដោយសារការគេចវេះ នោះអាចជាហានិភ័យនៃការឆ្លងរាលដាលវីរុស COVID-19។

ការសម្រេចខាងលើនេះ មិនមែនអនុវត្តត្រឹមតែពិធីរៀបមង្គលការនោះទេ ប៉ុន្តែក៏អនុវត្តចំពោះរាល់ព្រឹត្តិការណ៍ និងពិធីនានា រួមទាំងពិធីសាសនាផងដែរ៕

November 12, 2021

ទីក្រុង «10 នាទី» ប្រកបដោយបច្ចេកវិទ្យាខ្ពស់ នៅក្នុងរដ្ឋធានី សេអ៊ូល

(កូរ៉េខាងត្បូង)-ក្រុមស្ថាបត្យករនឹងសាងសង់ទីក្រុងមួយដែលប្រើប្រាស់បច្ចេកវិទ្យាទំនើប និងថាមពលស្អាត អនុញ្ញាតឱ្យប្រជាជនផ្លាស់ទីទៅគ្រប់កន្លងក្នុងរង្វង់ 10 នាទី។

មុននេះ គំនិតស្ដីពី «ទីក្រុង 15 នាទី» ក្នុងនោះ ប្រជាជនអាចធ្វើដំណើរទៅកន្លែងធ្វើការ និងកន្លែងលេងកម្សាន្តដោយចំណាយពេលដើរ ឬធ្វើដំណើរតាមយានយន្តតែ 15 នាទី ពីផ្ទះរបស់ពួកគេ កំពុងទាក់ទាញចំណាប់អារម្មណ៍ខ្លាំងពីសំណាក់អ្នកវិនិយោគនៅក្នុងសម័យ COVID-19។ ពេលនេះ ក្រុមស្ថាបត្យករកំពុងតែរៀបចំគម្រោងសាងសង់ទីក្រុងមួយដែលប្រកបដោយមហិច្ឆតាធំជាងនេះនៅទីក្រុង សេអ៊ូល របស់ កូរ៉េខាងត្បូង នោះគឺ «ទីក្រុង 10 នាទី»។

គម្រោងដែលមានឈ្មោះថា «គម្រោង H1» នេះ នឹងអភិវឌ្ឍតំបន់ឧស្សាហកម្មចាស់ ឱ្យទៅជាទីក្រុងឆ្លាតវៃដែលតភ្ជាប់គ្នា។ គម្រោងនេះនឹងមានអគារស្នាក់នៅខ្ពស់ចំនួន 8 និងមានការិយាល័យ សាលារៀន សួនកម្សាន្ត មជ្ឈមណ្ឌលកីឡា អាងហែលទឹក និងកសិដ្ឋានដាំបន្លែលើទឹក (hydroponic farm) ជាដើម នៅលើផ្ទៃដីទំហំ 50.5 ហិកតា។

ត្រូវបានរចនាឡើងដោយក្រុមហ៊ុនស្ថាបត្យកម្ម UNStudio របស់ប្រទេស ហូឡង់ និងមានការវិនិយោគពីក្រុមហ៊ុនអភិវឌ្ឍ Hyundai គម្រោងនេះនឹងក្លាយជាទីក្រុងបង្រួមតូចដែលមិនមានវត្តមានរបស់រថយន្ត។ គ្រប់ទីតាំងផ្ដល់សេវាកម្ម និងទំនិញ សុទ្ធតែមានចម្ងាយពីលំនៅឋានរបស់ប្រជាជនប្រមាណតែ 10 នាទីប៉ុណ្ណោះ។

Ben van Berkel សហស្ថាបនិករបស់ UNStudio បានឱ្យដឹងថា ទីក្រុងនេះផ្ដោតសំខាន់ទៅលើផាសុកភាពនៃការរស់នៅ និងពេលវេលាធ្វើដំណើររបស់ប្រជាជន។

អ្នកនាំពាក្យមួយរូបរបស់ UNStudio បានបញ្ជាក់ថា គម្រោងនេះទទួលបានការអនុញ្ញាតរួចហើយសម្រាប់ការសាងសង់។ ក្រុមវិស្វករឱ្យដឹងថា ថាមពលស្អាតនឹងត្រូវបានផលិតនៅនឹងកន្លែង។ ទន្ទឹមនឹងនេះ ប្រព័ន្ធប្រមូល និងរក្សាទុកទឹកភ្លៀងក៏ត្រូវបានរចនាជាពិសេសដើម្បីជួយបន្ថែមប្រភពផ្គត់ផ្គង់ទឹកសម្រាប់ការប្រើប្រាស់ប្រចាំថ្ងៃ៕

November 12, 2021

តាក់ស៊ីហោះរបស់ Hyundai អាចដឹកភ្ញៀវចាប់ពីឆ្នាំ 2028

ក្រុមហ៊ុន Hyundai កាលពីថ្ងៃទី 9 វិច្ឆិកា បានប្រកាសអំពីគម្រោងអភិវឌ្ឍតាក់ស៊ីហោះអគ្គិសនីបើកបរស្វ័យប្រវត្ត 5 កៅអី របស់ខ្លួន ដែលអាចចាប់ផ្ដើមការហោះហើរពីឆ្នាំ 2028។

ក្រុមហ៊ុនផលិតរថយន្តនៅទីក្រុង Seoul បានប្ដូរឈ្មោះផ្នែកដឹកជញ្ជូនផ្លូវអាកាសទៅជាក្រុមហ៊ុនថ្មីដែលមានឈ្មោះថា Supernal។ ក្រុមហ៊ុន Hyundai បានបង្ហាញតាក់ស៊ីហោះដំបូងរបស់ខ្លួនដែលមានឈ្មោះថា S-A1 នៅឯព្រឹត្តិការណ៍ពិព័រណ៍ CES នៅ Las Vegas កាលពីឆ្នាំមុន។ កាលណោះ ពួកគេក៏បានបង្ហើបឱ្យដឹងអំពីគម្រោងសហការជាមួយ Uber ផងដែរ។

ម៉ូដែលតាក់ស៊ីហោះរបស់ Hyundai នឹងបំពាក់ប្រព័ន្ធអាគុយអ៊ីដ្រូសែន។ ពួកគេក៏កំពុងអភិវឌ្ឍប្រព័ន្ធអាគុយ lithium ដែលអាចផ្ទុកថាមពលបានខ្ពស់ផងដែរ។ S-A1 នឹងដំណើរការដោយស្វ័យប្រវត្តទាំងស្រុងនាពេលអនាគត។

តាក់ស៊ីហោះនេះមានស្លាបកង្ហារចំនួន 12 និងអាចដឹកមនុស្សបាន 5 នាក់ ហោះហើរក្នុងល្បឿន 290 គីឡូម៉ែត្រ/ម៉ោង អាចហោះបាន 96.5 គីឡូម៉ែត្រ/លើក និងកម្ពស់ 600 ម៉ែត្រ។

យោងតាម Hyundai និង Supernal អតិថិជននឹងប្រើប្រាស់កម្មវិធីដូចទៅនឹង Uber, Lyft និង Bolt ដើម្បីបង្កើតគម្រោងដំណើរពីផ្ទះរបស់អ្នកដំណើរ ទៅកាន់គោលដៅរបស់ពួកគេ។

Hyundai និង Supernal បានសហការជាមួយក្រុមហ៊ុន Urban-Air Port ដើម្បីអភិវឌ្ឍហេដ្ឋារចនាសម្ព័ន្ធសម្រាប់តាក់ស៊ីហោះចុះចត និងហោះឡើងត្រង់ នៅជុំវិញពិភពលោក៕

November 11, 2021

កម្ពុជា កំពុងជំរុញឱ្យមានជើងហោះហើរត្រង់ជាមួយ ប្រទេសជប៉ុន បន្ថែមទៀត ដើម្បីទាក់ទាញទេសចរវ៉ាក់សាំង

កម្ពុជា កំពុងរៀបចំយុទ្ធសាស្ត្រទាក់ទាញទេសចរចាក់វ៉ាក់សាំងពីអន្តរជាតិ ក្នុងនោះទីផ្សារជប៉ុន ត្រូវបានរដ្ឋាភិបាលយកចិត្តទុកដាក់ខ្លាំង។

យោងតាមខ្លឹមសារនៃជំនួបទ្វេភាគីរវាង ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និង លោក មីកាមិ ម៉ាសាហ៉ីរ៉ូ (Mikami Masahiro) ឯកអគ្គរាជទូតជប៉ុន ប្រចាំ កម្ពុជា ស្ដីពីកិច្ចសហការលើវិស័យទេសចរណ៍រវាងប្រទេសទាំងពីរ ជាពិសេសភ្ញៀវទេសចរណ៍ដែលបានចាក់វ៉ាក់សាំងរួចរាល់។ ជំនួបនេះត្រូវបានធ្វើឡើងកាលពីរសៀលថ្ងៃទី 10 វិច្ឆិកា 2021 នៅស្ថានទូតជប៉ុន នារាជធានីភ្នំពេញ។

ក្នុងជំនួបនោះ ឯកឧត្តម ថោង ខុន បានជម្រាបលោក មីកាមិ ថា កម្ពុជា នឹងមានការរៀបចំជាពិសេសសម្រាប់ការធ្វើដំណើររបស់ទេសចរជប៉ុន មកកាន់តំបន់គោលដៅទាំង 3 របស់ កម្ពុជា ដែលទើបតែត្រូវបានបើកដំណើរការទទួលទេសចរវ៉ាក់សាំងពីបរទេស។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និង លោក មីកាមិ ម៉ាសាហ៉ីរ៉ូ (Mikami Masahiro) ឯកអគ្គរាជទូតជប៉ុន ប្រចាំ កម្ពុជា

ថ្មីៗនេះ កម្ពុជា បានប្រកាសបើកទ្វារសេដ្ឋកិច្ច និងសង្គមឡើងវិញលើគ្រប់វិស័យ ក្នុងនោះតំបន់ទេសចរណ៍សំខាន់ៗចំនួន 3 រួមមាន ខេត្តព្រះសីហនុ ក្រុងកោះរ៉ុង និងតំបន់តារាសាគរ នៃខេត្តកោះកុង ចាប់ពីថ្ងៃទី 31 ខែវិច្ឆិកា ខណៈតំបន់សៀមរាបអង្គរ ក៏នឹងទទួលភ្ញៀវទេសចរណ៍ចាប់ពីអំឡុងខែមករា ឆ្នាំ 2022៕

November 11, 2021

ស្ដាយជំនួស Bill Gates! បើសិនបន្តដំណើរជាមួយ Microsoft មកដល់បច្ចុប្បន្ន លោកអាចមានទ្រព្យច្រើនជាង Elon Musk ទ្វេដង

មហាសេដ្ឋីអាម៉េរិក លោក Bill Gates ក្នុងសម័យនេះ មិនមែនជាបុគ្គលដែលជួយឱ្យ Microsoft រីកចម្រើនបំផុត ហើយក៏មិនមែនជាម្ចាស់ភាគហ៊ុនធំបំផុតនោះដែរ។

លោក Bill Gates គួរណាស់តែមានទ្រព្យច្រើនជាងលោក Elon Musk និងលោក Jeff Bezos បូកចូលគ្នា

សារព័ត៌មាន Bloomberg បានអះអាងថា មហាសេដ្ឋី Bill Gates ប្រហែលជាមានការសោកស្ដាយនៅពេលបានឃើញតម្លៃមូលបត្ររបស់ Microsoft នាបច្ចុប្បន្ន។ គួរណាស់តែលោកបានក្លាយជាអ្នកមានជាងគេក្នុងពិភពលោកនាពេលនេះ ពោលគឺមានទ្រព្យច្រើនជាងមហាសេដ្ឋី Elon Musk និងមហាសេដ្ឋី Jeff Bezos បូកចូលគ្នា បើសិនជាលោក Bill Gates នៅតែបន្តរក្សាភាគហ៊ុនរបស់ខ្លួននៅ Microsoft រហូតដល់បច្ចុប្បន្ន។

យោងតាមស្ថិតិរបស់ Bloomberg មហាសេដ្ឋី Bill Gates បច្ចុប្បន្នគឺជាអ្នកមានជាងគេលំដាប់ទី 4 ក្នុងពិភពលោក ដោយមានទ្រព្យប្រមាណ 138.5 ពាន់លានដុល្លារ។ កាលពីខែកញ្ញា ឆ្នាំ 1998 លោក Gates កាន់កាប់ភាគហ៊ុនជាង 2 ពាន់លានហ៊ុនរបស់ Microsoft ហើយនោះគឺជាអំឡុងពេលដែលក្រុមហ៊ុននេះក្លាយជាស្ថាប័នដែលមានតម្លៃបំផុតក្នុងពិភពលោក។

លោក Bill Gates និងអតីតភរិយា Melinda French Gates

បច្ចុប្បន្ន Microsoft នៅតែជាក្រុមហ៊ុនដែលមានតម្លៃខ្ពស់ជាងគេក្នុងលោក ដោយមានមូលធនទីផ្សារ 2.5 លានលាន (2.5 ទ្រីលាន) ដុល្លារ។ ប្រការនេះមានន័យថា ភាគហ៊ុនរាប់ពាន់លានហ៊ុនដែលលោក Bill Gates ធ្លាប់បានកាន់កាប់ បើសិនរក្សាទុកដល់ថ្ងៃទី 5 ខែវិច្ឆិកា ឆ្នាំ 2021 នឹងមានតម្លៃសរុបប្រហែល 693 ពាន់លានដុល្លារ ច្រើនជាងទ្វេដងធៀបនឹងទ្រព្យ 340.4 ពាន់លានដុល្លាររបស់លោក Elon Musk និងច្រើនជាង 3 ដង ធៀបនឹងទ្រព្យ 200.3 ពាន់លានដុល្លាររបស់លោក Jeff Bezos។

ក៏ប៉ុន្តែ គួរឱ្យស្ដាយខ្លាំងណាស់ ប្រការទាំងនោះមិនបានកើតឡើងនោះទេ។ លោក Bill Gates បានលក់ភាគហ៊ុនស្ទើរតែទាំងអស់របស់ខ្លួន នៅពេលលោកចាកចេញពីក្រុមប្រឹក្សាភិបាលរបស់ Microsoft កាលពីឆ្នាំទៅ។ កាលណោះ (ប្រហែលខែមីនា ឆ្នាំ 2020) លោក Gates បានប្រកាសថា នឹងចាកចេញពីក្រុមហ៊ុនលំដាប់យក្ស Microsoft ដើម្បីផ្ដោតទៅលើកិច្ចការមនុស្សធម៌។ បច្ចុប្បន្ន មហាសេដ្ឋីរូបនេះ នៅសល់ភាគហ៊ុនត្រឹមតែ 1.3% ប៉ុណ្ណោះ នៅក្នុងក្រុមហ៊ុន Microsoft។

ការចាកចេញពីក្រុមប្រឹក្សាភិបាលរបស់ Microsoft កាលពីឆ្នាំ 2020 របស់លោក Gates កើតឡើងដោយសារកត្តាមួយចំនួន ពិសេសគឺបញ្ហាទំនាក់ទំនងស្នេហាជាមួយស្រីផ្សេង។ល។ ក្រោយមក បញ្ហាអវិជ្ជមានជាច្រើនរបស់លោកក៏ត្រូវបានគេបើកកកាយយកមកនិយាយជាហូរហែ៕

November 10, 2021

(វីដេអូ)-ស្ពានបោះពុម្ភដោយម៉ាស៊ីន 3D ដំឡើងពីផ្ទាំងបេតុង 500 ស្រទាប់

(អ៊ីតាលី)-ស្ពានថ្នើរជើងប្រវែង 16 ម៉ែត្រ ក្នុងឧទ្យានមួយនៅទីក្រុង Venice ត្រូវបានសាងសង់ពីផ្ទាំងបេតុងចំនួន 53 ដុំ ដែលទាំងអស់សុទ្ធតែត្រូវបានបោះពុម្ភដោយម៉ាស៊ីន 3D និងប្រើពេលតែ 84 ម៉ោងប៉ុណ្ណោះ។

ស្ពានបេតុងដែលត្រូវបានបោះពុម្ភដោយម៉ាស៊ីន 3D នេះ ឈរជាប់យ៉ាងមាំដោយមិនចាំបាច់ប្រើប្រាស់ទម្រ ឬគ្រោងដែក។

ក្រុមហ៊ុន Zaha Hadid Architects និងវិទ្យាស្ថានបច្ចេកវិទ្យាជាតិស្វីស (ETH Zurich) គឺជាអ្នករចនា Striatus ដែលជាស្ពានថ្នើរជើង 3D ត្រូវបានដំឡើងដោយមិនបាច់មានទម្រង ឬគ្រោងឆ្អឹង។

ស្ពានដែលស្ថិតនៅក្នុងឧទ្យានមួយនៃទីក្រុង Venice ប្រទេស អ៊ីតាលី នេះ មានប្រវែង 16 ម៉ែត្រ ទទឹង 12 ម៉ែត្រ និងត្រូវបានដំឡើងពីដុំបេតុងចំនួន 53 ដុំ ហើយក្នុង 1 ដុំៗ មានបេតុងចំនួន 500 ស្រទាប់ និងប្រើពេលចាប់ពី 1 ម៉ោង ដល់ 2 ម៉ោងក្នុងការបោះពុម្ភ 1 ដុំ។

ពេលវេលាសរុបដែលត្រូវបានចំណាយសម្រាប់ការបោះពុម្ភដុំបេតុងទាំងនោះគឺ 84 ម៉ោង។ ដំណាក់កាលនៃការបង្ហើយការងារសាងសង់ដែលរួមមាន ដំណាក់កាលចាក់គ្រឹះ ដំឡើងតួ ដំឡើងកាំជណ្ដើរ និងផ្ទៃខាងមុខរបស់ស្ពាន បានស៊ីពេលអស់ 35 ថ្ងៃ។

សំណង់នេះជួយលើកកម្ពស់តម្លៃសិល្បៈក្នុងការសាងសង់ដោយថ្មបុរាណ។ ដុំបេតុងត្រូវបានតម្រៀបយ៉ាងសមស្របដើម្បីឱ្យទម្ងន់របស់សំណង់ត្រូវបានបែងចែកស្មើគ្នាដល់គ្រឹះទាំងឡាយរបស់វា និងមិនចាំបាច់មានគ្រោងឆ្អឹងខាងក្នុង៕

November 10, 2021

ឧកញ៉ាម្នាក់ចូលខ្លួនទៅកាន់ស្នងការដ្ឋាននគរបាល ក្រោយមានដីកាចាប់ខ្លួន

ឧកញ៉ា លី សាយឃាង បានចូលខ្លួនទៅកាន់ស្នងការដ្ឋាននគរបាលខេត្តសៀមរាប តាមដីកាចាប់ខ្លួនរបស់សាលាដំបូងរាជធានីភ្នំពេញ ដែលនេះបើតាមនគរបាលជាន់ខ្ពស់ នៃអគ្គស្នងការដ្ឋាននគរបាលជាតិ។

សាលាដំបូងរាជធានីភ្នំពេញ កាលពីថ្ងៃទី 8 ខែវិច្ឆិកា ឆ្នាំ 2021 បានចេញដីកាចាប់ខ្លួនឧកញ៉ា លី សាយឃាង ពាក់ព័ន្ធបទល្មើសរំលោភលើទំនុកចិត្ត និងបរិហារកេរ្តិ៍ជាសាធារណៈ។

ជនត្រូវចោទឈ្មោះ លី សាយឃាង ភេទប្រុស អាយុ 58 ឆ្នាំ ជាជនជាតិខ្មែរ និងមានមុខរបរអ្នកជំនួញនេះ មានស្រុកកំណើតនៅឃុំថ្មស ស្រុកគិរីសាគរ ខេត្តកោះកុង និងមានទីលំនៅផ្ទះលេខ 53 ផ្លូវលេខ 184 សង្កាត់ផ្សារថ្មី 3 ខណ្ឌដូនពេញ រាជធានីភ្នំពេញ។

យោងតាមដីកាចាប់ខ្លួន លោកឧកញ៉ា លី សាយឃាង ត្រូវបានចោទប្រកាន់ពាក់ព័ន្ធនឹងករណី រំលោភលើទំនុកចិត្ត និងបរិហារកេរ្តិ៍ជាសាធារណៈ ប្រព្រឹត្តនៅឃុំអូរបីជាន់ ស្រុកអូរជ្រៅ , សង្កាត់និមិត្ត និងសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ កាលពីអំឡុងឆ្នាំ 2018 និងអំឡុងឆ្នាំ 2017៕

November 10, 2021

ជាប់ពន្ធនាគារ 10 ឆ្នាំ ដោយសារបទល្មើសវាយធ្វើបាបសត្វចិញ្ចឹម

(សហរដ្ឋអាម៉េរិក)-បុរសម្នាក់នៅរដ្ឋ Florida ត្រូវបានកាត់ទោសឱ្យជាប់ពន្ធនាគាររយៈពេល 10 ឆ្នាំ ព្រោះតែបានវាយធ្វើបាបសត្វសុនកប្រភេទ pit bull ដោយចាក់ 50 កាំបិត និងញាត់ចូលក្នុងវ៉ាលិស បណ្ដាលឱ្យស្លាប់ពីរថ្ងៃក្រោយមក។

Brendan Evans អាយុ 35 ឆ្នាំ នៅទីក្រុង Hollywood រដ្ឋ Florida ត្រូវទទួលទោសនៅក្នុងរឿងក្ដីវាយធ្វើបាបសត្វសុនកឈ្មោះ Ollie កាលពី 4 ឆ្នាំមុន។ នេះបើតាម Michael Gottlieb ដែលជាមេធាវីរបស់ជនល្មើស ឱ្យដឹងកាលពីថ្ងៃទី 9 វិច្ឆិកា។

យោងតាមឯកសាររឿងក្ដី កាលពីឆ្នាំ 2017 Evans បានវាយធ្វើបាប Ollie ដោយចាក់ 50 កំបិទ និងញាប់វាចូលក្នុងវ៉ាលិស នៅពេលសត្វចិញ្ចឹមនេះកំពុងត្រដរខ្យល់។ ប្ដី ប្រពន្ធមួយគូ ដែលកំពុងដើរលេងពីយប់ បានឮសំឡេងស្រែកថ្ងូររបស់សុនករងគ្រោះចេញពីវ៉ាលិសពណ៌ខៀសដែលមានចម្ងាយមិនឆ្ងាយប៉ុន្មានពីផ្ទះរបស់ Evans ហើយក៏បានទូរស័ព្ទប្រាប់ប៉ូលិស។

Ollie ត្រូវបាននាំទៅកាន់បន្ទប់ព្យាបាលសត្វដែលនៅក្បែរនោះ។ ក្រុមគ្រូពេទ្យយល់ថា សុនកនេះនឹងជាសះស្បើយ ប៉ុន្តែ ពីរថ្ងៃក្រោយមក Ollie ក៏បានស្លាប់។

ដំបូងឡើយ មនុស្សរាប់រយនាក់បានស្នើសុំទទួលយក Ollie មកចិញ្ចឹម។ ក្រោយពីវាបានស្លាប់ដោយសាររបួស មនុស្សទាំងនេះក៏ប្រមូលប្រាក់បរិច្ចាគបានជិត 60,000 ដុល្លារ ដើម្បីវែកមុខជនដៃដល់។

ប៉ូលិសកំណត់បានអត្តសញ្ញាណរបស់ Evans ដោយសារតែ DNA របស់ជននេះដែលជាប់នៅលើ វ៉ាលិស។ Evans ដំបូងឡើយបានបដិសេធ ប៉ុន្តែ ក្រុមមន្ត្រីស៊ើបអង្កេតបានរកឃើញជើងរបស់សត្វឆ្មា និងកណ្ដុរដែលត្រូវគេកាត់ក្បាល នៅក្នុងទូក្លាសេរបស់ជននេះ រួមនឹងកូនកាំបិទបាក់ដងមួយនៅក្នុងចានចំណីរបស់សុនក។ ស្នាមឈាមក៏ត្រូវបានរកឃើញនៅក្នុងបន្ទប់ទឹក ចំណែកឈាមកកស្ងួត និងរោមសត្វក៏ត្រូវបានរកឃើញនៅក្នុងចង្ក្រានអាំងសាច់។

អំពើឃោរឃៅចំពោះ Ollie បានបណ្ដាលឱ្យមានប្រតិកម្មនៅទូទាំងសកលលោក ពិសេសពីអ្នកដែលស្រលាញ់សុនក។ Evans ត្រូវបានឃុំខ្លួនចាប់តាំងពីពេលត្រូវបានចាប់ខ្លួនកាលពី 4 ឆ្នាំមុន។

មេធាវី Gottlieb ឱ្យដឹងថា ដំបូង ជននេះត្រូវបានចោទប្រកាន់លើបទល្មើសធ្វើបាបសត្វចំនួន 17 ករណី ប៉ុន្តែ តុលាការបានសម្រេចលុបចោល 15 ករណី។ បើសិនត្រូវបានកាត់ទោសទាំង 17 ករណី Evans អាចត្រូវដេកគុក 85 ឆ្នាំឯណោះ៕

November 10, 2021

Category: សង្គម និងសេដ្ឋកិច្ច