សង្គម និងសេដ្ឋកិច្ច - La Reine Media

ប្រទេសអែលសាល់វ៉ាឌ័រ នឹងសាងសង់ «ទីក្រុង Bitcoin» ដំបូងគេក្នុងពិភពលោក

ប្រទេសអែលសាល់វ៉ាឌ័រ មានគម្រោងសាងសង់ «ទីក្រុង Bitcoin» ដំបូងគេក្នុងពិភពលោក ដោយប្រភពទុនវិនិយោគដំបូងនឹងត្រូវបានប្រមូលពីការបោះផ្សាយមូលបត្របំណុលរបស់ប្រាក់ឌីជីថលមួយនេះ។

ប្រធានាធិបតី Nayib Bukele នៃប្រទេសអែលសាល់វ៉ាឌ័រ (El Salvador) កាលពីថ្ងៃទី 20 វិច្ឆិកា បានប្រកាសអំពីព័ត៌មានខាងលើនៅក្នុងគ្រាដែលប្រទេសអាម៉េរិកខាងត្បូងនេះ រួមជាមួយនឹងប្រទេសផ្សេងៗក្នុងតំបន់ កំពុងជំរុញការវិនិយោគទៅលើវិស័យប្រាក់ឌីជីថល។

លោក Nayib Bukele បានថ្លែងថា ប្រទេសរបស់លោកនឹងចាប់ផ្ដើមប្រមូលទុនវិនិយោគពីប្រភពមូលបត្របំណុល Bitcoin នៅពេលវាត្រូវបានបោះផ្សាយក្នុងឆ្នាំ 2022។

ទីក្រុងនេះនឹងមានរូបរាងមូល តំណាងឱ្យរូបរាងរបស់កាក់ ហើយនឹងត្រូវបានសាងសង់នៅភាគអាគ្នេយ៍នៃតំបន់ La Unión របស់ប្រទេសនេះ។ នេះបើតាម លោក Nayib Bukele។

ប្រធានាធិបតី Nayib Bukele នៃប្រទេសអែលសាល់វ៉ាឌ័រ (El Salvador)

ទន្ទឹមនឹងការប្រកាសរបស់មេដឹកនាំនៃ ប្រទេសអែលសាល់វ៉ាឌ័រ ប្រធានយុទ្ធសាស្ត្ររបស់ក្រុមហ៊ុនបច្ចេកវិទ្យា Blockstream លោក Samson Mow ឱ្យដឹងថា ចំពោះមុខ អែលសាល់វ៉ាឌ័រ នឹងបោះផ្សាយមូលបត្រ Bitcoin តម្លៃ 1,000 លានដុល្លារអាម៉េរិក ដើម្បីប្រមូលទុនវិនិយោគសម្រាប់គម្រោងសាងសង់ខាងលើ។

សូមរំលឹកថា កាលពីខែកញ្ញា ឆ្នាំ 2021 ប្រទេសអែលសាល់វ៉ាឌ័រ បានក្លាយជាប្រទេសដំបូងគេដែលបានទទួលស្គាល់ប្រាក់ឌីជីថល Bitcoin ជាប្រាក់ស្របច្បាប់នៅក្នុងការជួញដូរ ទូទាត់ បន្ទាប់ពីសភាប្រទេសនេះបានអនុម័តច្បាប់ Bitcoin កាលពីថ្ងៃទី 9 មិថុនា 2021៕

November 22, 2021

(វីដេអូ)-លុយ «ធ្លាក់មកលើផ្លូវដូចទឹកភ្លៀង» ប្រជាជនអាម៉េរិក នាំគ្នាចុះរើស ធ្វើឱ្យប៉ូលិសមានការងារត្រូវធ្វើបន្ត

«នេះគឺជារឿងដ៏អស្ចារ្យដែលខ្ញុំធ្លាប់បានឃើញ» Bagby និយាយនៅក្នុងវីដេអូមួយដែលបង្ហោះនៅលើបណ្ដាញសង្គម Instagram «មានគេធ្វើឱ្យប្រាក់ជ្រុះពេញផ្លូវល្បឿលឿន»។

ព្រឹកថ្ងៃទី 19 វិច្ឆិកា រថយន្តពាសដែកមួយគ្រឿងដែលដឹកប្រាក់ បានបើកទ្វារ ធ្វើឱ្យថង់ដាក់ប្រាក់ធ្លាក់ពីលើរថយន្ត នាំឱ្យប្រាក់ជ្រុះមកលើដីដូចទឹកភ្លៀង នៅលើផ្លូវ San Diego។ ម្ចាស់រថយន្តនានានាំគ្នាឈប់រថយន្ត ហើយរត់ទៅរើសប្រាក់ ធ្វើឱ្យផ្លូវត្រូវស្ទះយ៉ាងយូរ។ នេះបើតាមក្រុមល្បាតផ្លូវល្បឿនលឿន California (CHP)។

មនុស្សយ៉ាងតិចចំនួនពីរនាក់ត្រូវបានដាក់ខ្នោះដៃនៅកន្លែងកើតហេតុ បន្ទាប់ពីពួកគេបិទសោរថយន្ត ធ្វើឱ្យស្ទះផ្លូវ។

«យើងកំពុងធ្វើការជាមួយ FBI។ នេះគឺជាការស្រាវជ្រាវរួម ហើយបើសិនអ្នករើសបានប្រាក់ ខ្ញុំស្នើឱ្យអ្នកយកមកប្រគល់ជូនការិយាល័យ CHP ជាបន្ទាន់ ព្រោះថា យើងមានភ័ស្ដុតាងច្រើនណាស់» អ្នកនាំពាក្យរបស់ CHP បានប្រាប់អ្នកយកព័ត៌មានដូច្នេះ។

ហេតុការណ៍ខាងលើកើតឡើងនៅលើដងផ្លូវ Interstate 5 នៅ Carlsbad រដ្ឋ California កាលពីវេលាម៉ោងប្រហែល 9 និង 30 នាទី ថ្ងៃទី 19 វិច្ឆិកា 2021។

Demi Bagby ដែលជាអ្នកល្បីឈ្មោះម្នាក់នៅលើបណ្ដាញសង្គម ដោយមានអ្នកតាមដានប្រមាណ 2 លាននាក់ បានបង្ហោះវីដេអូមួយដែលបង្ហាញអំពីទិដ្ឋភាពដែលខ្លួនមានវត្តមាននៅកន្លែងកើតហេតុ។

Demi Bagby និយាយនៅក្នុងវីដេអូដែលបង្ហោះនៅលើបណ្ដាញសង្គម Instagram ថា៖ «នេះគឺជារឿងដ៏អស្ចារ្យដែលខ្ញុំធ្លាប់បានឃើញ។ មានគេធ្វើឱ្យប្រាក់ជ្រុះពេញផ្លូវល្បឿលឿន»៕

November 22, 2021

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នឹងត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃស្អែក

ស្ពានដែលចំណាយថវិកាអស់ជិត 57 លានដុល្លារអាមេរិក និងចំណាយពេលក្នុងការសាងសង់អស់ 42 ខែ នេះ តាមគម្រោងនឹងត្រូវបានសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី 23 ខែវិច្ឆិកា ឆ្នាំ 2021។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ចាប់ផ្តើមនៅត្រង់គីឡូម៉ែត្រលេខ 58+200 ត្រើយខាងលិច ស្ថិតលើផ្លូវខេត្តលេខ 2714 ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ភ្ជាប់ទៅត្រើយខាងកើតទន្លេមេគង្គ នៅត្រង់ចំណុចភូមិក្តុលកណ្តាល ឃុំទ្រា ស្រុកក្រូចឆ្មារ ខេត្តត្បូងឃ្មុំ។ តាមគម្រោង ស្ពាននេះនឹងត្រូវបានសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី 23 ខែវិច្ឆិកា ឆ្នាំ 2021 ដោយវត្តមានរបស់ សម្តេចអគ្គមហាសេនាបតីតេជោ ហ៊ុន សែន។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ក្នុងពេលកំពុងសាងសង់កាលពីចុងឆ្នាំ 2020

ស្ពានមិត្តភាពកម្ពុជា-ចិន មួយនេះ មានតួស្ពានសុទ្ធសាធមានប្រវែង 1,131 ម៉ែត្រ ទទឹង 13.5 ម៉ែត្រ ក្រាលបេតុងកៅស៊ូកម្រាស់ 5 សង់ទីម៉ែត្រ មានផ្លូវរថយន្តចំនួន 2 គន្លង ផ្លូវម៉ូតូចំនួន 2 គន្លង ផ្លូវថ្មើរជើងចំនួន 2 គន្លង សម្រាប់ធ្វើដំណើរទៅមក។ ផ្លូវមេសងខាងស្ពាន តភ្ជាប់ទៅផ្លូវជាតិលេខ 71C មានប្រវែង 8,323 ម៉ែត្រ។ ជាសរុប ទាំងស្ពាន និងផ្លូវតភ្ជាប់មានប្រវែង 9,454 ម៉ែត្រ។

ស្ពានស្ទឹងត្រង់-ក្រូចឆ្មារ នេះ ត្រូវបានបើកការដ្ឋានសាងសង់កាលពីថ្ងៃទី 9 ខែកុម្ភៈ ឆ្នាំ 2018 និងសាងសង់ដោយក្រុមហ៊ុនសំណង់សៀងហៃ(SCG) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន។

ស្ថានភាពស្ពានកាលពីថ្ងៃទី 17 វិច្ឆិកា 2021

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ចំណាយថវិកាក្នុងការសាងសង់អស់ 56.998 លានដុល្លារអាមេរិក និងចំណាយពេលសាងសង់អស់ 42 ខែ៕

November 22, 2021

ដល់ពេល «ថ្ងៃឈប់រះ» ទីក្រុងខាងជើងបង្អស់របស់ សហរដ្ឋអាម៉េរិក ជិតលិចលង់ក្នុងភាពងងឹតរយៈពេល 66 ថ្ងៃ

(សហរដ្ឋអាម៉េរិក)-ចាប់ពីសប្ដាហ៍នេះ ប្រជាជនដែលរស់នៅក្នុងទីក្រុង Utquagvik នឹងត្រូវឆ្លងកាត់ «រាត្រីតំបន់ប៉ូល» ដែលអូសបន្លាយពេលរហូតដល់ 66 ថ្ងៃ ដោយពុំមានពន្លឺព្រះអាទិត្យ។

Utqiagvik គឺជាទីក្រុងនៅប៉ូលខាងជើងរបស់ សហរដ្ឋអាម៉េរិក ដែលជាតំបន់រស់នៅរបស់មនុស្សជាង 4,000 នាក់។ ទីក្រុងនៃរដ្ឋ Alaska នេះ មានរហ័សនាមជាច្រើន រួមមាន «ដំបូលផ្ទះរបស់ពិភពលោក» និង «ចំនុចចាប់ផ្ដើមនៃបម្រែបម្រួលអាកាសធាតុ»។

ចាប់ពីសប្ដាហ៍នេះ Utqiagvik នឹងត្រូវឆ្លងកាត់ «រាត្រីតំបន់ប៉ូល» រយៈពេល 66 ថ្ងៃ។ ដោយពុំមានពន្លឺថ្ងៃ សីតុណ្ហភាពនៅទីនេះនឹងចុះត្រជាក់ខ្លាំង។ Utqiagvik មានសីតុណ្ហភាពទាបជាង 0 អង្សាសេ រយៈពេល 160 ថ្ងៃ។ ដូច្នេះ ថ្ងៃបន្ទាប់ ព្រះអាទិត្យ នឹងរះឡើងនៅឯនាយជើងមេឃ នៅថ្ងៃទី 22 មករា 2022។

ពលរដ្ឋនៅ Utqiagvik នៅតែបន្តរស់នៅតាមធម្មតាក្នុងគ្រាមិនមានពន្លឺព្រះអាទិត្យ។ «មេឃងងឹតនៅពេលអ្នកត្រលប់មកផ្ទះនៅថ្ងៃត្រង់។ អ្នកត្រូវបើកភ្លើងហ្វានៅវេលាថ្ងៃត្រង់ដើម្បីបរឡានមកផ្ទះ។ ប្រការនេះខុសបន្តិចធៀបនឹងពលរដ្ឋដែលរស់នៅក្នុងរដ្ឋចំនួន 48 ផ្សេងទៀតរបស់ សហរដ្ឋអាម៉េរិក» Myron McCumber ម្ចាស់ផ្ទះសំណាក់មួយកន្លែងនៅក្នុងទីក្រុង Utqiagvik ប្រាប់ពីបទពិសោធន៍ក្នុងការរស់នៅ។

ភាគច្រើននៃប្រជាជនរស់នៅក្នុងខណ្ឌ North Slope របស់ Alaska គឺជាជនជាតិដើម Inupiat (Iñupiaq) ដែលពួកគេបានរស់នៅទីនេះអស់រយៈពេលរាប់ពាន់ឆ្នាំមកហើយ។ ក្នុងប្រវត្តិសាស្ត្រ ពួកគេអាចរក្សាជីវិតរស់នៅក្នុងសីតុណ្ហភាពមហាត្រជាក់បានក៏ដោយសារការនេសាទត្រីបាឡែន សត្វរមាំង ត្រីនាគ តោសមុទ្រ និងបក្សាបក្សី។

យោងតាមសារព័ត៌មាន Business Insider ប្រជាជននៅតំបន់ Utqiagvik ភាគច្រើនរស់នៅដាច់ដោយឡែកពីដំណើរការពាណិជ្ជកម្មនៅក្នុងរដ្ឋចំនួន 48 ផ្សេងទៀតរបស់ អាម៉េរិក។ ទីក្រុង Utquagvik ទាំងមូលដែលមានប្រជាជនសរុបប្រមាណ 4,500 នាក់ ប៉ុន្តែ មានផ្ទះត្រឹមតែ 5 ខ្នងប៉ុណ្ណោះ៕

November 22, 2021

ផ្លូវការ! ព្រឹត្តិការប្រកួតកីឡាយុវជនអាស៊ី ឆ្នាំ 2029 នឹងត្រូវធ្វើឡើងនៅ កម្ពុជា

ជាផ្លូវការ កម្ពុជា ទទួលបានសិទ្ធិធ្វើជាម្ចាស់ផ្ទះ ការប្រកួតកីឡាយុវជនអាស៊ី សម្រាប់នាឆ្នាំ 2029 ដែលនេះគឺជារាយការណ៍របស់ឯកឧត្តម វ៉ាត់ ចំរើន រដ្ឋលេខាធិការនៃក្រសួងទេសចរណ៍ និងជាអគ្គលេខាធិការនៃ គណៈកម្មាធិការជាតិអូឡាំពិកកម្ពុជា។

ដំណឹងជាផ្លូវការនេះត្រូវបានលើកឡើងបន្ទាប់ពីឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) និងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានចុះហត្ថលេខាទទួលយកសិទ្ធិជាផ្លូវការ នៅទីក្រុងឌូបៃ ប្រទេសអារ៉ាប់រួម កាលពីល្ងាចថ្ងៃអាទិត្យ ទី 21 ខែវិច្ឆិកា ឆ្នាំ 2021។

ឯកឧត្តម ថោង ខុន ក្នុងនាមប្រធានគណៈកម្មាធិការជាតិកម្ពុជា (NOCC) និងក្នុងនាមជាអ្នករៀបចំការប្រកួតកីឡាយុវជនអាស៊ី និងឯកឧត្តម ឃួង ស្រេង ក្នុងនាមម្ចាស់ផ្ទះ រាជធានីភ្នំពេញ បានចុះហត្ថលេខាជាមួយប្រធានស្តីទីនៃក្រុមប្រឹក្សាកីឡាអូឡាំពិកអាស៊ី ដោយទទួលបានការអបអរសាទរពីបណ្តាប្រទេសទាំង 45 នៃ ទ្វីបអាស៊ី ដោយទទួលបានសិទ្ធិធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ 2029។

គណៈប្រតិភូកីឡារបស់ កម្ពុជា ដែលអញ្ជើញទៅបំពេញបេសកកម្មអន្តរជាតិ នៅ ប្រទេសអារ៉ាប់រួម នេះ រួមមាន ប្រធានគណៈប្រតិភូ ឯកឧត្តមបណ្ឌិត ថោង ខុន អមដំណើរដោយឯកឧត្តម ឃួង ស្រេង ឯកឧត្តម អ៊ុក សិទ្ធជាតិ អគ្គនាយកកីឡាដែលជាតំណាងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម វ៉ាត់ ចំរើន។ល។

November 22, 2021

Apple ដាក់ពាក្យស្នើសុំប័ណ្ណប៉ាតង់សម្រាប់ម៉ូដែល iPhone ធ្វើអំពីកញ្ចក់ថ្លា មានអេក្រង់ច្រើន

ក្រុមហ៊ុន Apple របស់ អាម៉េរិក ទើបតែបានដាក់ពាក្យសុំចុះឈ្មោះប័ណ្ណប៉ាតង់សម្រាប់រចនាបថលម្អិតនៃរូបរាងរបស់ iPhone ជំនាន់ថ្មីដែលធ្វើអំពីកញ្ចក់ទាំងស្រុង ដោយមានអេក្រង់ព័ទ្ធជុំវិញ អនុញ្ញាតឱ្យបង្ហាញរូបភាពទាំងអេក្រង់មុខ ទាំងអេក្រង់ក្រោយ។

យោងតាមសារព័ត៌មាន Daily Mail កញ្ចក់អាចជាទិន្នាការថ្មីបំផុតរបស់ Apple ហើយក្រុមហ៊ុននេះក៏កំពុងតែត្រៀមខ្លួនក្នុងការបញ្ចេញផលិតផលដែលប្រើប្រាស់កញ្ចក់ភាគច្រើន មានដូចជានាឡិកាឆ្លាតវៃ និងកុំព្យូទ័រជាដើម។

ពាក្យស្នើសុំប័ណ្ណប៉ាតង់ ទើបត្រូវបាន Apple បញ្ជូនទៅកាលពីសប្ដាហ៍មុន។ ប៉ុន្តែ ប្រការនេះមិនមែនមានន័យថា រចនាបថណាមួយដែលមាននៅក្នុងពាក្យស្នើសុំនោះ សុទ្ធតែនឹងត្រូវបានផលិតនោះឡើយ។

iPhone ដែលធ្វើអំពីកញ្ចក់ពិសេសនេះត្រូវបានអធិប្បាយថា ដូចទៅនឹងឧបករណ៍អេឡិចត្រូនិកដែលមានសម្បកជាកញ្ចក់។

ពាក្យស្នើសុំប័ណ្ណប៉ាតង់ រួមមានទាំងគំនូរដែលបង្ហាញថា ប៊ូតុងមួយចំនួននឹងមាននៅលើអេក្រង់កោងដែលលាតសន្ធឹងតាមបណ្ដោយគែមរបស់ទូរស័ព្ទ ក្នុងនោះមានដូចជា ប៊ូតុង Airplane mode, Wi-Fi និង ប៊ូតុងគ្រប់គ្រងសំឡេង។

ចំនុចពិសេសបំផុតនៅក្នុងរចនាបថនៃទូរស័ព្ទនេះគឺអេក្រង់ខាងក្រោយ ពោលគឺវាមានទាំងអេក្រង់មុខ និងអេក្រង់ក្រោយ។
ឯកសារថែមទាំងបានបរិយាយថា iPhone ថ្មីរបស់ Apple នឹងមានអេក្រង់ព័ទ្ធជុំវិញគែមទាំងឡាយរបស់វា ដើម្បីអនុញ្ញាតឱ្យផ្ទៃទាំង 6 របស់វាអាចបង្ហាញរូបភាព ឬយ៉ាងហោចណាស់ក៏ត្រូវបានបិទជិត និងមានរន្ធសម្រាប់មុខងារផ្សេង។

ទន្ទឹមនឹងនេះ Apple ក៏បានបង្ហាញអំពីរចនារូបរាងនៃនាឡិកាថ្លាមើលឃើញគ្រឿងក្នុង និងប្រអប់ sever case របស់កុំព្យូព័រ Mac Pro ផងដែរ។

បើទោះជាគំនិតស្ដីអំពី iPhone ធ្វើអំពីកញ្ចក់ថ្លា អាចនឹងមិនមានលទ្ធភាពត្រូវបានបង្កើតឡើងក៏ដោយ ប៉ុន្តែ រចនារូបរាងបែបនេះអាចបង្ហាញឱ្យគ្រប់គ្នាយល់អំពីទិសដៅថ្មីនាពេលអនាគតរបស់ Apple៕

November 22, 2021

ក្រសួងទេសចរណ៍ជំរុញឱ្យក្រុមហ៊ុនទេសចរណ៍ រៀបចំលក់កញ្ចប់ទស្សនា ក្នុងតម្លៃសរម្យ ដើម្បីទាក់ទាញទេសចរបរទេស

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានជំរុញឱ្យបណ្ដាក្រុមហ៊ុនទេសចរណ៍ រៀបចំលក់កញ្ចប់ទស្សនាក្នុងតម្លៃមួយសរម្យ ដើម្បីអាចទាក់ទាញភ្ញៀវបរទេសដែលចាក់វ៉ាក់សាំងរួចរាល់ ចូលមកទស្សនា។

ប្រសាសន៍របស់លោក ត្រូវបានលើកឡើងនាថ្ងៃទី 17 ខែវិច្ឆិកា នេះ នៅក្នុងកិច្ចប្រជុំផ្សព្វផ្សាយស្តីពីការទទួលទេសចរអន្តរជាតិ និងអ្នកដំណើរ ដែលបានចាក់វ៉ាក់សាំងបង្ការជំងឺ COVID-19 ពេញលេញ ចូលមក កម្ពុជា នៅខេត្តសៀមរាប។

លោករដ្ឋមន្ត្រី បានមានប្រសាសន៍ថា អ្វីដែលយើងត្រូវត្រៀម គឺការអនុវត្តតាមស្តង់ដារអប្បបរមា (SOP) តាមគន្លងប្រក្រតីភាពថ្មី ក្រោយពីរាជរដ្ឋាភិបាលកម្ពុជាបានអនុញ្ញាតឱ្យទេសចរបរទេស និងអ្នកដំណើរពីក្រៅប្រទេសដែលបានចាក់វ៉ាក់សាំងរួចរាល់ ចូលមក កម្ពុជា។

គោលដៅតំបន់ទេសចរណ៍សំខាន់ៗចំនួន 6 នៅខេត្តសៀមរាប មានដូចជា តំបន់ឧទ្យានជាតិព្រះជ័យវរ្ម័ន្ម-នរោត្តមភ្នំគូលែន តំបន់ទេសចរណ៍ជុំវិញតំបន់ការពារប្រាសាទបន្ទាយស្រី តំបន់ទេសចរណ៍អង្គរ តំបន់ទេសចរណ៍ក្រុងសៀមរាប តំបន់ទេសចរណ៍បឹងទន្លេសាប និងតំបន់ទេសចរណ៍សៀមរាបថ្មី ត្រូវបានដាក់ឱ្យអនុវត្តន៍ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ 2021-2023 ផងដែរ។ នេះបើតាមប្រសាសន៍របស់ ឯកឧត្តម ថោង ខុន៕

November 17, 2021

ព្រះចន្ទនឹងប្រែទៅជាពណ៌ក្រហមទុំ នៅក្នុងព្រឹត្តិការណ៍ចន្ទ្រគ្រាសដែលមានរយៈពេលវែងបំផុតប្រចាំសតវត្ស ដែលកើតឡើងក្នុងសប្ដាហ៍នេះ

នៅពេលព្រឹត្តិការណ៍ចន្ទ្រគ្រាសកើតឡើង ពន្លឺមួយផ្នែករបស់ព្រះអាទិត្យនៅតែអាចឆ្លងកាត់បរិយាកាសផែនដី ហើយទៅដល់ព្រះចន្ទ បណ្ដាលឱ្យភពរណបមួយនេះប្រែជាពណ៌ក្រហម។

ចន្ទ្រគ្រាសមួយផ្នែកដែលមានរយៈពេលវែងជាងគេប្រចាំសតវត្សរ៍ និងវែងជាងគេក្នុងអំឡុង 580 ឆ្នាំ នឹងកើតមានឡើងក្នុងសប្ដាហ៍នេះ។ ព្រឹត្តិការណ៍ចន្ទ្រគ្រាសស្ទើរតែទាំងស្រុងនេះ កើតឡើងនៅពេលចន្ទពេញបូណ៌មី ហើយផែនដីគោចរដល់ចំនុចកណ្ដាល នៅចន្លោះព្រះចន្ទ និងព្រះអាទិត្យ។

ស្រមោលរបស់ផែនដី គ្របដណ្ដប់លើព្រះចន្ទ នាំឱ្យភពរណបធម្មជាតិនេះស្ថិតក្នុងភាពងងឹតក្នុងរយៈពេលជិត 3 ម៉ោង និង 30 នាទី។ ស្រមោលផែនដីនឹងបាំងពន្លឺស្ទើរតែទាំងអស់ដែលជះពីព្រះអាទិត្យ ធ្វើឱ្យព្រះចន្ទប្រែទៅជាពណ៌ក្រហមទុំ។

មូលហេតុដែលនាំឱ្យព្រះចន្ទត្រូវប្រែពណ៌ទៅជាក្រហមទុំនេះគឺដោយសារពន្លឺពីព្រះអាទិត្យ បើទោះជាត្រូវបាំងដោយផែនដី ប៉ុន្តែ វានៅតែកាច់កោងព័ទ្ធជុំវិញ និងឆ្លងកាត់បរិយាកាសរបស់ផែនដីដើម្បីទៅដល់ឋានព្រះចន្ទ។ បរិយាកាសផែនដី ច្រោះយករលកពន្លឺខ្លីពណ៌ខៀវ នៅសល់តែរលកពន្លឺវែងពណ៌ក្រហមដែលអាចធ្វើដំណើរទៅមុខ។ នៅពេលរលកពន្លឺពណ៌ក្រហមនេះឆ្លងកាត់ផុតបរិយាកាសផែនដី និងទៅដល់ព្រះចន្ទ វានឹងបណ្ដាលឱ្យព្រះចន្ទត្រូវប្រែពណ៌ទៅតាមពណ៌នៃពន្លឺនោះ។

ប្រជាជនដែលរស់នៅក្នុងតំបន់ជាច្រើននៃទ្វីបអាម៉េរិក អឺរ៉ុប អូស្ដ្រាលី និងទ្វីបអាស៊ី អាចមើលឃើញព្រឹត្តិការណ៍នេះនៅថ្ងៃទី 18 និង 19 ខែវិច្ឆិកា ឆ្នាំ 2021 ប៉ុន្តែ ពេលវេលាជាក់ស្ដែងនឹងអាស្រ័យទៅតាមតំបន់នីមួយ៕

November 17, 2021

ខាងក្នុងឋានសួគ៌លម្ហែកាយនៃទីក្រុងទំនើបរបស់ ប្រទេសកូរ៉េខាងជើង

សាមជីយ៉ុន (Samjiyon) ជាទីក្រុងដែលមានភ្នំ ប៉ាកទូ (Paektu) ត្រូវបាន កូរ៉េខាងជើង ចាត់ទុកជា «គំរូរបស់វប្បធម៌ជឿនលឿន» ដោយមានតំបន់សម្រាកលម្ហែកាយ និងសណ្ឋាគារជាច្រើន។

(រូបខាងលើគឺជាទិដ្ឋភាពទាំងមូលរបស់ទីក្រុង សាមជីយ៉ុន ដែលស្ថិតនៅជើងភ្នំ ប៉ាកទូ ក្នុងខេត្ត រីយ៉ាងហ្កាង (Ryanggang) មើលពីទីខ្ពស់ នៅក្នុងពិធីសម្ពោធបើកដំណើរការហេដ្ឋារចនាសម្ព័ន្ធទីនេះកាលពីខែធ្នូ 2019)

សាមជីយ៉ុន ត្រូវបានទីភ្នាក់ងារសារព័ត៌មានរដ្ឋកូរ៉េខាងជើង ហៅថា «គំរូនៃវប្បធម៌ជឿនលឿន» ដោយមានផ្ទះស្នាក់នៅ និងសណ្ឋាគាររចនាបថបែបថ្មី រួមនឹងតំបន់សម្រាកលម្ហែកាយកម្សាន្ត និងសេវាកម្មពាណិជ្ជកម្ម វប្បធម៌ និងសុខាភិបាល។ ទីក្រុងនេះអាចឱ្យមនុស្សរស់នៅបាន 4,000 គ្រួសារ ជាមួយនឹងសំណង់សាធារណៈ និងឧស្សាហកម្ម ដែលលាតសន្ធឹងនៅលើផ្ទៃដីរាបរយហិកតា។

(មេដឹកនាំរបស់ កូរ៉េខាងជើង លោក គីម ជុងអ៊ុន (Kim Jong-un) ធ្វើទស្សនកិច្ចសំណង់នានានៅ សាមជីយ៉ុន នៅក្នុងរូបថតដែលត្រូវបានសារព័ត៌មានរដ្ឋចេញផ្សាយកាលពីថ្ងៃទី 16 វិច្ឆិកា ដែលជាការបង្ហាញខ្លួនលើកដំបូងរបស់លោក បន្ទាប់ពីអវត្តមាន 35 ថ្ងៃ។)

យោងតាម KCNA លោក គីម ជុងអ៊ុន មកកាន់ទីតាំងនេះដើម្បីត្រួតពិនិត្យដំណាក់កាលទីបីនៃការសាងសង់ទីក្រុង។

(ផ្ទះស្នាក់នៅដែលមានរចនាបថដូចៗគ្នា ត្រូវបានសាងសង់នៅក្នុងទីក្រុង សាមជីយ៉ុន នៅក្នុងរូបថតដែលត្រូវបានចុះផ្សាយកាលពីខែមុន)

(ប្រជាពលរដ្ឋកូរ៉េខាងជើង ត្រូវបានអនុញ្ញាតឱ្យរើមករស់នៅក្នុងលំនៅឋានថ្មីក្នុងទីក្រុង សាមជីយ៉ុន ចាប់តាំងពីថ្ងៃទី 20 តុលា ដល់ថ្ងៃទី 28 តុលា 2021។)

(ប្រជាជននាំគ្នាប្រារពពិធីសម្ពោធគេហដ្ឋានថ្មី ដោយមានពិធីរាំរបាំ និងច្រៀងចម្រៀងប្រពៃណី)

ទីក្រុងគឺជាទ្រព្យមួយក្នុងចំណោមគំនិតផ្ដួចផ្ដើមផ្នែកសេដ្ឋកិច្ចធំបំផុតរបស់ គីម ជុងអ៊ុន ដើម្បីបង្ហាញឱ្យឃើញអំពីកិច្ចប្រឹងប្រែងសម្រាប់សេដ្ឋកិច្ចម្ចាស់ការ។ ដំណើរការនៃការសាងសង់ទីក្រុង សាមជីយ៉ុន បានជួបឧបសគ្គជាច្រើន និងត្រូវពន្យារពេលដោយសារបញ្ហាខ្វះគ្រឿងសំណង់ និងកម្លាំងពលកម្ម ព្រោះតែផលប៉ះពាល់ពីទណ្ឌកម្មរបស់អន្តរជាតិដើម្បីបង្អាក់កម្មវិធីអភិវឌ្ឍអាវុធនុយក្លេអែររបស់ ទីក្រុងព្យុងយ៉ាង។

(រូបខាងលើគឺជា ពិធីបុណ្យឆ្លាក់ទឹកកកដែលត្រូវបានរៀបចំឡើងនៅក្នុងទីក្រុង សាមជីយ៉ុន កាលពីខែកុម្ភៈ 2020 ដើម្បីជាការរំលឹកវិញ្ញាណក្ខន្ធ និងថ្ងៃកំណើតរបស់លោក គីម ជុងអ៊ីល។)

ទីក្រុង សាមជីយ៉ុន នេះ បានចាប់ផ្ដើមដំណាក់កាលរីកច្រើនចាប់ពីឆ្នាំ 2018 និងត្រូវបាន កូរ៉េខាងជើង ចាត់ទុកថាជា «ទីក្រុងតំបន់ភ្នំគំរូទាក់សម័យ ទៅតាមលទ្ធិសង្គមនិយម និងស្ដង់ដាអភិវឌ្ឍជនបទ»៕

November 17, 2021

កម្ពុជា ចាត់វិធានការបិទខ្ទប់គេហទំព័រចំនួន 79 ដោយសារផ្ដល់សេវាមិនស្របច្បាប់

គេហទំព័រចំនួន 79 ត្រូវបានអាជ្ញាធរ កម្ពុជា សម្រេចបិទខ្ទប់ ក្រោយពីបានរកឃើញថា ពួកគេបានប្រតិបត្តិការ និងផ្ដល់សេវាលេងល្បែងស៊ីសងខុសច្បាប់ ដោយប្រើប្រាស់ប្រព័ន្ធអនឡាញនៅ កម្ពុជា។

ចំណាត់ការនេះត្រូវបានធ្វើឡើងដោយមានកិច្ចសហការរវាង និយ័តករទូរគមនាគមន៍កម្ពុជា (ន.ទ.ក) និងអគ្គស្នងការដ្ឋាននគរបាលជាតិនៃក្រសួងមហាផ្ទៃ នេះបើតាមសេចក្ដីប្រកាសព័ត៌មានរបស់ និយ័តករទូរគមនាគមន៍កម្ពុជា។

ន.ទ.ក ក៏បានអំពាវនាវឱ្យមានការរាយការណ៍ដល់អាជ្ញាធរផងដែរ នូវគេហទំព័រទាំងឡាយណាដែលរកស៊ីខាងល្បែងស៊ីសង តាមប្រព័ន្ធអ៊ីនធើណិតនៅ កម្ពុជា តាមរយៈទូរស័ព្ទ 6789 ឬបណ្ដាញសង្គម Facebook ៖ «និយ័តករទូរគមនាគមន៍កម្ពុជា-Telecommunication Regulator of Cambodia»។

November 17, 2021

Category: សង្គម និងសេដ្ឋកិច្ច