សង្គម និងសេដ្ឋកិច្ច - La Reine Media

(វីដេអូ)-ក្រុមហ៊ុនបារាំង បង្ហាញយន្តហោះដែលមានប្រព័ន្ធកង្ហារស្ថិតក្នុងស្លាប ស្អាតជាងយន្តហោះក្នុងរឿង អាវ៉ាតារ (Avatar) ទៅទៀត

(បារាំង)-យន្តហោះដែលអាចហោះឡើង និងចុះចតត្រង់ ATEA អាចដឹកមនុស្សបាន ៥ នាក់ សមស្របសម្រាប់ប្រើជាតាក់ស៊ីហោះនៅក្នុងទីក្រុង និងជាយក្រុង។

Ascendance Flight Technologies (AFT) ជាក្រុមហ៊ុនមួយនៅតំបន់ Toulouse ប្រទេសបារាំង បានបង្ហើបឱ្យដឹងអំពីរចនារូបរាងដ៏ទាក់ទាញរបស់គំរូនៃយន្តហោះដែលមានឈ្មោះថា ATEA នេះបើតាមការចុះផ្សាយរបស់ទំព័រ Interesting Engineering កាលពីថ្ងៃទី ៣ ធ្នូ។ វាគឺជាយន្តហោះកូនកាត់សាំង-អគ្គិសនី ដែលមានកៅអីចំនួន ៥ ហើយកង្ហាររបស់វាត្រូវបានបំពាក់នៅខាងក្នុងស្លាប។

ATEA គឺជាលទ្ធផលនៃការស្រាវជ្រាវ និងអភិវឌ្ឍរយៈពេល ៣ ឆ្នាំ របស់ក្រុមហ៊ុនខាងលើ។ វាត្រូវបានគេហៅថា យន្តហោះនៃអនាគត ដោយសារតែវាបង្ហាញអំពីគោលដៅនៃការកាត់បន្ថយឧស្ម័នពុលក្នុងវិស័យអាកាសចរណ៍របស់ Ascendance Flight Technologies។

ជាមួយនឹងរង្វង់ប្រតិបត្តិការ ៤០០ គីឡូម៉ែត្រ និងដឹកបាន ៥ នាក់ ATEA សមស្របដើម្បីប្រើប្រាស់នៅក្នុងតំបន់ជាយក្រុង និងទីក្រុង ឬយកធ្វើជាតាក់ស៊ីហោះ ដោយសារវាងាយស្រួលហោះឡើង ចុះចត ក៏ដូចជារហ័សជាងតាក់ស៊ីនៅលើដី។

ទ្រង់ទ្រាយនៃយន្តហោះក្នុងភាពយន្តរឿង Avatar

ក្រៅពីជួយសន្សំសំចៃប្រេងសាំង និងការកាត់បន្ថយការបំភាយឧស្ម័ន យន្តហោះ ATEA ក៏បញ្ចេញសំឡេងទាបជាង ១/៤ ធៀបនឹងយន្តហោះធម្មតាផងដែរ។ យន្តហោះនេះមានកង្ហារលើកដែលបំពាក់នៅក្នុងស្លាបឆ្វេង-ស្ដាំ និងកង្ហាររុញច្រាននៅខាងមុខ និងខាងក្រោយ។

«ATEA នឹងមានគំរូយន្តហោះពិតពេញលេញ និងអាចចាប់ផ្ដើមហោះហើរសាកល្បងនៅក្នុងឆ្នាំ ២០២។ ដោយមានការគាំទ្រពីដៃគូហិរញ្ញវត្ថុ យើងកំពុងអភិវឌ្ឍវាយ៉ាងខ្លាំងក្លា…និងឆ្ពោះទៅរកការទទួលស្គាល់ដោយស្របច្បាប់នៅឆ្នាំ ២០២៥» Jean-Christophe Lambert សហស្ថាបនិក និងជា CEO របស់ក្រុមហ៊ុន AFT បានបញ្ជាក់ដូច្នេះ៕

December 6, 2021

កម្ពុជា នឹងមានរោងចក្រផលិតវ៉ាក់សាំងបង្ការកូវីដ-១៩ ផ្ទាល់ខ្លួន នាពេលឆាប់ៗនេះ

កម្ពុជានឹងមានវត្តមានរោងចក្រផលិតវ៉ាក់សាំងនៅពេលឆាប់ៗនេះ ដើម្បីធានាប្រភពផ្គត់ផ្គង់វ៉ាក់សាំងគ្រប់គ្រាន់សម្រាប់ ប្រជាពលរដ្ឋ។ នេះបើតាមប្រសាសន៍របស់ ប្រមុខរាជរដ្ឋាភិបាលកម្ពុជា។

សម្តេចតេជោ ហ៊ុន សែន បានមានប្រសាសន៍ដូចខាងលើ នៅពេលថ្លែងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ១១ និងផ្លូវក្នុងក្រុងព្រៃវែង នាព្រឹកថ្ងៃទី ៦ ខែធ្នូ ឆ្នាំ ២០២១។ ប្រមុខរដ្ឋាភិបាល បានបញ្ជាក់ថា ក្រុមហ៊ុននៃប្រទេសទាំងពីរគឺ កម្ពុជា និងចិន បានចុះហត្ថលេខារួចហើយ ទាក់ទងនឹងការផលិតវ៉ាក់សាំងកូវីដ នៅ កម្ពុជា។

ការចុះហត្ថលេខារវាងក្រុមហ៊ុនកម្ពុជា និងក្រុមហ៊ុនចិន នេះ ត្រូវបានសម្ដេច អះអាងថា កើតឡើងបន្ទាប់ពី កម្ពុជា បានស្នើដល់រដ្ឋាភិបាលចិន តាមរយៈ ឯកឧត្តម វ៉ាង វិនធាន ឱ្យមកបង្កើត និងផលិតវ៉ាក់សាំងនៅក្នុងស្រុកខ្មែរ។

សម្ដេចបន្ថែមថា កម្ពុជា នៅតែត្រូវចំណាយប្រាក់ដើម្បីទិញវ៉ាក់សាំងពីក្រុមហ៊ុនដែលមានមូលដ្ឋាននៅក្នុងស្រុក ប៉ុន្តែ នឹងមានតម្លៃទាប ហើយមិនពិបាកក្នុងការដឹកជញ្ជូនផងដែរ។

អគ្គរដ្ឋទូតចិនប្រចាំនៅកម្ពុជា ឯកឧត្តម វ៉ាង វិនធាន បានបញ្ជាក់ថា បច្ចុប្បន្នក្រុមហ៊ុនផលិតវ៉ាក់សាំងស៊ីណូហ្វាមរបស់ រដ្ឋាភិបាលចិន កំពុងធ្វើការជាមួយក្រសួងសុខាភិបាលកម្ពុជា ដើម្បីពិភក្សាអំពីដំណើរការនៃការផលិតវ៉ាក់សាំងនៅកម្ពុជា។ លោកបញ្ជាក់ថា នៅក្នុងឆ្នាំក្រោយ កម្ពុជា នឹងអាចប្រើប្រាស់វ៉ាក់សាំងបង្ការជំងឺកូវីដ១៩ ដែលផលិតនៅក្នុងស្រុកបានហើយ៕

December 6, 2021

បុរសម្នាក់ត្រូវឆ្នោតស្ទួនពីរសន្លឹក តម្លៃជិត ៨០០,០០០ ដុល្លារអាម៉េរិក ដោយសារតែច្រឡំទិញពីរដង

(សហរដ្ឋអាម៉េរិក)-បុរសម្នាក់នៅរដ្ឋ Carolina ខាងជើង មិនច្បាស់ថា ខ្លួនបានទិញឆ្នោតរបស់រដ្ឋនេះហើយ ឬនៅ ទើបទិញថែមមួយសន្លឹកទៀត ហើយក៏ត្រូវទាំងពីរសន្លឹក។

អ្នកបើកបររថយន្តដឹកទំនិញម្នាក់ឈ្មោះ Scotty Thomas អាយុ ៤៩ ឆ្នាំ រស់នៅក្នុងទីក្រុង Fayetteville នៃរដ្ឋ Carolina ខាងជើង បានទិញឆ្នោត Lucky for Life ចំនួនពីរសន្លឹកដែលមានលេខដូចគ្នាដោយអចេតនា ហើយក៏បានត្រូវទាំងពីរសន្លឹកកាលពីថ្ងៃទី ២៧ វិច្ឆិកា។

«ខ្ញុំដេកលើគ្រែមើលបាល់បោះក្នុងទូរទស្សន៍ និងមិនចាំថាបានសរសេរព័ត៌មានក្នុងការទិញឆ្នោតហើយ ឬនៅ» Thomas រៀបរាប់។ «ខ្ញុំបានសរសេរជាថ្មី ហើយព្រឹកឡើង កូនប្រុសសួរថា ហេតុអ្វីបានជាមានដល់ទៅពីរសន្លឹកដូចគ្នា។ ពេលនោះទើបខ្ញុំដឹងច្បាស់ថា បានទិញពីរដង»។

Thomas ទទួលបានសារចំនួនពីរដែលប្រាប់ថា គាត់បានត្រូវឆ្នោត ដោយក្នុងរង្វាន់មួយសន្លឹកមានតម្លៃ ២៥,០០០ ដុល្លារ/ឆ្នាំ រហូតដល់ពេញមួយជីវិត។ នេះគឺជារង្វាន់ធំទីពីររបស់ Lucky for Life បន្ទាប់ពីរង្វាន់ពិសេសគឺទទួលបាន ១,០០០/ថ្ងៃ រហូតដល់អស់ជីវិត។

ប៉ុន្តែ Thomas បានជ្រើសយកជម្រើសទទួល ៧៨០,០០០ ដុល្លារ មួយលើក សម្រាប់រង្វាន់ទាំងពីរ ជំនួសឱ្យការទទួល ៥០,០០០ ដុល្លារ រៀងរាល់ឆ្នាំ។ ប្រាក់ដែលលោក Thomas ទទួលបានក្រោយការបង់ពន្ធគឺ ៥៥១,៨៥១ ដុល្លារ។ លោកមានគម្រោងប្រើប្រាស់ប្រាក់ដែលត្រូវឆ្នោតនេះដើម្បីពង្រីកអាជីវកម្ម ការចំណាយប្រចាំថ្ងៃរបស់គ្រួសារ និងអាចទិញផ្ទះ។

«ពេលដឹងថាត្រូវឆ្នោត ខ្ញុំត្រូវដេកទៅលើឥដ្ឋ ព្រោះតែមិនគួរឱ្យជឿង។ ខ្ញុំពិតជាមានសំណាងខ្លាំងណាស់» លោក Thomas រៀបរាប់ដូច្នេះ៕

December 6, 2021

មហាសេដ្ឋីអាម៉េរិក Elon Musk បានក្លាយជាកំពូលអ្នកមានដែល «គ្មានផ្ទះសម្បែងផ្ទាល់ខ្លួន» ជាផ្លូវការហើយ!

នាយកប្រតិបត្តិរបស់ Tesla និង SpaceX ទើបតែបានលក់អចលនទ្រព្យចុងក្រោយរបស់ខ្លួន ក្នុងតម្លៃ ៣០ លានដុល្លារ នាសប្ដាហ៍នេះ។

មហាសេដ្ឋីដែលមានទ្រព្យច្រើនជាងគេក្នុងពិភពលោក Elon Musk បានលក់ភូមិគ្រឹះរបស់ខ្លួនដែលមានទំហំ ១៦,០០០ ហ្វ៊ូតក្រឡា នៅឯតំបន់ Gillsborough ក្នុងរដ្ឋ California សហរដ្ឋអាម៉េរិក។ អចលនទ្រព្យនេះត្រូវបានលក់ក្នុងតម្លៃ ៣០ លានដុល្លារ។ ដំបូងឡើយ លោក Musk ចង់លក់ក្នុងតម្លៃ ៣៧.៥ លានដុល្លារ តែក្រោយមកក៏បញ្ចុះមកនៅត្រឹម ៣១.៩៩ លានដុល្លារកាលពីខែតុលា។

ចំណែកអត្តសញ្ញាណរបស់អ្នកដែលបានទិញអចលនទ្រព្យនេះ មិនត្រូវបានគេបង្ហើបឱ្យដឹងនោះឡើយ។ នេះបើតាមទំព័រ Marketwatch។

លោក Elon Musk វ័យ ៥០ ឆ្នាំ មុននោះបានប្រកាសថា អចលនទ្រព្យខាងលើគឺជា «ផ្ទះចុងក្រោយ» របស់គាត់ នៅរដ្ឋ California បន្ទាប់ពីបានលក់អចលនទ្រព្យផ្សេងរបស់លោកនៅក្នុងរដ្ឋនេះ។

មូលហេតុនៃការលក់អចលនទ្រព្យទាំងឡាយ ត្រូវបានលោក Musk អះអាងថា គឺដើម្បីអាចគ្រប់គ្រងអវកាសបានឆាប់រហ័ស

អចលនទ្រព្យនេះមានប្រវត្តិជាង ១០០ ឆ្នាំមកហើយ មុនពេលបានមកដៃ Elon Musk។ ភូមិគ្រឹះនេះត្រូវបានសាងសង់កាលពីឆ្នាំ ១៩១២ ដោយជនជាតិបារាំងម្នាក់។ វាស្ថិតនៅលើដីដែលមានទំហំធំបំផុតមួយនៅក្នុងតំបន់ និងមានផ្លូវលំជាច្រើនខ្សែសម្រាប់ដើរដោយថ្មើរជើង រួមនឹងបឹងមួយផងដែរ។

ឆ្នាំ ២០១៣ វាត្រូវបានដាក់លក់ក្នុងតម្លៃ ១០០ លានដុល្លារ ប៉ុន្តែ ឆ្នាំ ២០១៦ ចុះមកនៅត្រឹម ២៩.៨៥ លានដុល្លារ។ លោក Elon Musk បានទិញអចលនទ្រព្យនេះកាលពីឆ្នាំ ២០១៧ ក្នុងតម្លៃ ២៣.៤ លានដុល្លារ។ នេះបើតាមព័ត៌មានដែលសរសេរនៅក្នុងឯកសារសាធារណៈ។

មុនពេលបានលក់ផ្ទះចុងក្រោយរបស់ខ្លួន លោក Elon Musk បានរើទៅរស់នៅក្នុងផ្ទះមួយខ្នងដែលជាប្រភេទផ្ទះដំឡើងស្រាប់ និងមានផ្ទៃក្រឡាប្រហែល ៣៧ ម៉ែត្រ និងតម្លៃ ៥០,០០០ ដុល្លារ នៅក្នុងរដ្ឋ Texas។

មូលហេតុនៃការលក់អចលនទ្រព្យទាំងឡាយរបស់លោក Musk ត្រូវបានលោក អះអាងថា គឺដើម្បីអាចគ្រប់គ្រងអវកាសបានឆាប់រហ័ស៕

December 4, 2021

ព្រលានយន្តហោះដែលដំណើរការដោយមិនមានប្រព័ន្ធរ៉ាដារគ្រប់គ្រងការហោះហើរ

ស៊ីមបាវ៉េ ចុះកិច្ចព្រមព្រៀងកែលម្អព្រលានយន្តហោះជាមួយនឹងក្រុមហ៊ុនរបស់ ចិន ប៉ុន្តែ ជួបបញ្ហាហិរញ្ញវត្ថុ ធ្វើឱ្យព្រលានយន្តហោះសំខាន់ជាងគេរបស់ប្រទេសនេះ ដំណើរការដោយពុំមានប្រព័ន្ធរ៉ាដារសម្រាប់គ្រប់គ្រងការហោះហើរ។

«យើងមិនអាចបន្តដឹកនាំការហោះហើរដោយមិនមានប្រព័ន្ធរ៉ាដារសមស្រប។ នឹងមានគ្រោះថ្នាក់ជាទីបំផុតចំពោះសុវត្ថិភាព» Oscar Gorerino ប្រធានគណៈកម្មការគ្រប់គ្រងថវិកាជាតិរបស់ សភាស៊ីមបារ៉េ ថ្លែងដូច្នេះ នៅក្នុងកិច្ចប្រជុំកាលពីថ្ងៃទី ២ ធ្នូ។ លោក Gorerino ឱ្យដឹងថា យន្តហោះទាំងឡាយដែលកំពុងចុះចតនៅឯព្រលានយន្តហោះអន្តរជាតិ Robert Gabriel Mugabe ក្នុងរដ្ឋធានីហារ៉ារ៉េ (Harare) ត្រូវបានធ្វើឡើងដោយមិនមានការណែនាំពីក្រុមមន្ត្រីគ្រប់គ្រងការហោះហើរ ព្រោះតែមិនមានរ៉ាដារ។

អាជ្ញាធរគ្រប់គ្រងអាកាសចរណ៍ស៊ីវិលរបស់ ស៊ីមបាវ៉េ (CAAZ) បានចុះកិច្ចព្រមព្រៀងជាមួយក្រុមរបស់ ចិន CHEC ដើម្បីធ្វើបច្ចុប្បន្នភាពប្រព័ន្ធរ៉ាដានៅឯព្រលានយន្តហោះអន្តរជាតិ Robert Gabriel Mugabe។ ធនាគារឯកទេសផ្នែកអាហរ័ណ-នីហរ័ណចិន បានយល់ព្រមផ្ដល់ប្រាក់កម្ចី ១៥៣ លានដុល្លារ ដល់ ប្រទេសស៊ីមបារ៉េ ដើម្បីកែលម្អព្រលានយន្តហោះ ក្នុងនោះមានទាំងប្រព័ន្ធរ៉ាដាផងដែរ។

ប៉ុន្តែ CAAZ ឱ្យដឹងថា ថវិការបស់ពួកគេមានតែប្រហែល ១.៥ លានដុល្លារប៉ុណ្ណោះ ខណៈដែលប្រព័ន្ធរ៉ាដារថ្មី មានតម្លៃ ៣.៤ លានដុល្លារ។ គណៈកម្មការគ្រប់គ្រងថវិកាជាតិនៃសភាស៊ីមបាវ៉េ មិនបានបញ្ជាក់ច្បាស់នូវបញ្ហាដែលបានកើតឡើងជាមួយនឹងខ្ទង់ប្រាក់កម្ចីដែលនៅសល់ ឬប្រព័ន្ធរ៉ាដារចាស់របស់ព្រលានយន្តហោះបានខូចពេលណានោះដែរ។

Gorerino បានស្នើឱ្យរដ្ឋមន្ត្រីក្រសួងចរាចរណ៍និងដឹកជញ្ជូន Theodius Chiyanga បើកកិច្ចប្រជុំរវាងក្រុមតំណាងរាស្ត្រស៊ីមបាវ៉េ ជាមួយនឹងក្រុមហ៊ុនចិន CHEC ដែលជាភាគីឈ្នះការដេញថ្លៃក្នុងការធ្វើបច្ចុប្បន្នភាពប្រព័ន្ធរ៉ាដារគ្រប់គ្រងការហោះហើរ ដើម្បីបានដឹងច្បាស់អំពីបញ្ហាដែលនាំឱ្យមានការយឺតយ៉ាវ។

រដ្ឋមន្ត្រី Chiyanga បកស្រាយថា ក្រសួងហិរញ្ញវត្ថុ មិនទាន់ផ្ដល់ថវិកាបដិភាគ ៣.៤ លានដុល្លារដែល CAAZ ត្រូវការដើម្បីទិញ និងដំឡើងប្រព័ន្ធរ៉ាដារថ្មី។

ភាគីក្រុមហ៊ុន CHEC និងភាគីពាក់ព័ន្ធរបស់ ចិន មិនទាន់មានការអធិប្បាយអ្វីទាក់ទិននឹងព័ត៌មានខាងលើនៅឡើយ។

គម្រោងស្ដារ និងពង្រីកព្រលានយន្តហោះអន្តរជាតិ Robert Gabriel Mugabe ត្រូវបានចាប់ផ្ដើមកាលពីខែកក្កដា ២០១៨ ដោយត្រូវចំណាយថវិកា ១៥៣ លានដុល្លារ។ តាមផែនការ គម្រោងកែលម្អនេះនឹងស៊ីពេលសរុប ៣ ឆ្នាំ ហើយវានឹងក្លាយជាព្រលានយន្តហោះធំមួយក្នុងតំបន់ ដែលអាចបម្រើដល់អ្នកដំណើរ ៦ លាននាក់/ឆ្នាំ ច្រើនជាង ២.៤ ដង ធៀបនឹងតួលេខអ្នកដំណើរមុននោះ៕

December 4, 2021

(វីដេអូ)-បុរសគ្មានជើង រត់ដោយដៃលឿនជាងគេក្នុងពិភពលោក កំពុងត្រៀមខ្លួនសម្រាប់ការប្រកួតក្នុងព្រឹត្តិការណ៍ អូឡាំពិក និងប៉ារ៉ាឡាំពិក នៅ ប្រទេសបារាំង

(សហរដ្ឋអាម៉េរិក)-Zion Clark ជាមនុស្សកើតមកពុំមានជើង បានបង្កើតកំណត់ត្រាពិភពលោក Guinness ស្ដីពីការរត់ដោយដៃលឿនជាងគេក្នុងពិភលោក សម្រាប់ចម្ងាយ ២០ ម៉ែត្រ។

លោក Clark ដែលមានអាយុ ២៤ ឆ្នាំ ចំណាយពេលតែ ៤.៧៨ វិនាទីប៉ុណ្ណោះ ក្នុងការរត់ដោយដៃ សម្រាប់រយៈចម្ងាយ ២០ ម៉ែត្រ បានបង្កើតកំណត់ត្រាពិភពលោកកាលពីខែកុម្ភៈ ២០២។ បុរសជាអ្នកស្រុក San Diego នៃរដ្ឋ California រូបនេះ ឱ្យដឹងថា គន្លឹះនៃជោគជ័យគឺការហ្វឹកហាត់ជាបន្តបន្ទាប់។

«ដើម្បីអាចរត់លឿនដូច្នេះ យើងមិនមែនក្រោកពីព្រលឹម ហើយគិតថា ខ្លួននឹងជាមនុស្សរត់លឿនបំផុតក្នុងលោកនោះទេ។ លទ្ធផលនេះទាមទារពេលវេលាយូរ និងការប្រឹងប្រែងហ្វឹកហាត់» លោក Clark ប្រាប់ដូច្នេះ។

លោកបន្តថា «ពេលខ្លះ ខ្ញុំត្រូវហាត់រហូតដល់យប់។ ខ្ញុំចង់ក្លាយជាមនុស្សដំបូងដែលមានវត្តមាននៅលើទីលានហ្វឹកហាត់ និងជាមនុស្សចុងក្រោយដែលចាកចេញ»។

Clark មានជំងឺឆ្អឹងខ្នង និងមិនមានជើងតាំងពីកំណើត។ ដោយសារតែមិនមានលទ្ធភាពចិញ្ចឹម ម្ដាយរបស់ Clark ក៏បានទុកឱ្យកូនរស់នៅក្នុងមណ្ឌលកុមារកំព្រា។ គាត់ធ្លាប់ត្រូវបានវះកាត់ឆ្អឹងខ្នងពីរលើក ដើម្បីអាចអង្គុយត្រង់ខ្នងដូចគេ។ ចុងក្រោយ ក្នុងវ័យ ១៦ ឆ្នាំ Clark ក៏ត្រូវបាន Kimberli Hawkins ដែលជាអ្នកប្រាថ្នាចង់បានកូនប្រុស ទទួលយកទៅចិញ្ចឹម។

កាលពីរៀននៅវិទ្យាល័យ Clark ចាប់ផ្ដើមរកឃើញការសប្បាយរីករាយនៅក្នុងវិស័យកីឡា។ ឆ្នាំ ២០១៨ ជីវិតកំព្រាដែលត្រូវបានគេសម្លុត ធ្វើបាប និងការពុះពារ ជំនះឧបសគ្គរបស់ Clark បានក្លាយជាប្រធានបទនៃខ្សែភាពយន្តឯកសារមួយរបស់ Netflix។

https://www.youtube.com/watch?v=sE9TvLTmxR8

បច្ចុប្បន្ន លោក Clark កំពុងទទួលការបណ្ដុះបណ្ដាល និងហ្វឹកហាត់ដើម្បីក្លាយជាអត្តពលិកជនជាតិអាម៉េរិក ដំបូងគេ ដែលចូលរួមប្រកួតទាំងនៅ អូឡាំពិក (កីឡាចំបាប់) ទាំងនៅ ប៉ារ៉ាឡាំពិក (ប្រណាំងរទេះរុញ) ដែលនឹងប្រារព្ធឡើងនៅក្នុងឆ្នាំ ២០២៤ នៅ ទីក្រុងប៉ារីស ប្រទេសបារាំង៕

December 3, 2021

មេខ្លោងនៃបណ្ដាញផលិតប្រេងសាំងក្លែងក្លាយនៅ វៀតណាម ត្រៀមខ្លួនឡើងតុលាការ

អាជ្ញាធរខេត្ត ដាក់ ណុង (Dak Nong) នៃ ប្រទេសវៀតណាម ត្រៀមនាំខ្លួនឈ្មោះ ទ្រិញ សឿង (Trinh Suong) ស្នាក់នៅក្នុងខេត្តឃ្លាំង (Soc Trang) ដែលជាប់ទាក់ទិននឹងរឿងក្ដីផលិតប្រេងសាំងក្លែងក្លាយ ឡើងសវនាការ កាត់ក្ដីជាថ្មី។

យោងតាមតុលាការខេត្ត ដាក់ ណុង រឿងក្ដីដែលនឹងត្រូវបានបើកសវនាការនៅថ្ងៃទី ២០ ធ្នូ ២០២១ ខាងមុខនេះ ក្រៅពីជនជាប់ចោទចំនួន ៣៩ នាក់ ក៏មានតំណាងធនាគារនានាផងដែរ ដែលត្រូវបានកោះហៅក្នុងនាមជាអ្នកមានផលប្រយោជន៍ និងមានភារកិច្ចទាក់ទងនឹងរឿងក្ដី។

មុននោះ កាលពីខែមេសា តុលាការខាងលើបានបើកសវនាការកាត់ក្ដីរឿងផលិត និងចែកចាយប្រេងសាំងក្លែងក្លាយទាក់ទិននឹងឈ្មោះ ទ្រិញ សឿង និងជនជាប់ចោទ ៣៨ នាក់ផ្សេងទៀត។ ក៏ប៉ុន្តែ ក្រោយមក តុលារតម្រូវឱ្យមានការស៊ើបអង្កេតបន្ថែមទៀត ដោយសារតែមានភាពមិនច្បាស់លាស់ទាក់ទងនឹងបរិមាណប្រេងសាំងក្លែងក្លាយ និងខ្ទង់ប្រាក់ដែលក្រុមជនជាប់ចោទរកបានដោយខុសច្បាប់។

លទ្ធផលនៃការស៊ើបអង្កេតថ្មីបំផុតបង្ហាញថា ឈ្មោះ ទ្រិញ សឿង រកបានប្រាក់ចំណេញខុសច្បាប់ជាង ១៥៥.៨ ពាន់លានដុង (៦,៨២0,០០០ ដុល្លារអាម៉េរិក)។

មុនពេលត្រូវបានចាប់ខ្លួន ក្រុមជនជាប់ចោទខាងលើ ធ្លាប់បានរកស៊ីលក់ប្រេងសាំងអស់មួយរយៈពេល ហើយក្ដាប់បានវិធីលាយសាំងក្លែងក្លាយ។ ពួកគេប្រើប្រាស់គីមីជាច្រើនមុខ ដូចជា Naphtha, Solmix, orgasol, BMSol White, BMSol Petro, Toluel, MTBE, Xylene, Ethanol និង Azo លាយជាមួយសាំងសុទ្ធ A95, A92 និង E5 ron 92 បង្កើតបានជាប្រេងសាំង A95, A92 និង E5 ron 92។

ការផលិត និងជួញដូរប្រេងសាំងក្លែងក្លាយនេះ បានជួយឱ្យក្រុមជនជាប់ចោទរកបានប្រាក់ចំណេញច្រើនជាងការលក់ប្រេងសាំងសុទ្ធ៕

December 3, 2021

ប្រាក់ឌីជីថល! ហេតុអ្វីបានជា «ម្ដាយបង្កើត» របស់ Bitcoin មិនបង្ហាញខ្លួនឱ្យគេដឹងជាសាធារណៈ?

អ្នកបង្កើតរូបិយវត្ថុឌីជីថល Bitcoin ត្រូវបានគេជឿថា នឹងមិនបង្ហាញខ្លួនឡើយ ព្រោះថា អាចនឹងត្រូវប្រឈមនឹងបញ្ហាផ្លូវច្បាប់ និងប៉ះពាល់ដល់តម្លៃរបស់ប្រាក់និម្មិតមួយនេះ។

Bitcoin ត្រូវបានបង្ហាញវត្តមានលើកដំបូងកាលពីឆ្នាំ ២០០៨ ដោយបុគ្គលមួយរូបដែលមានរហ័សនាមថា Satoshi Nakamotor។ រហូតដល់ឆ្នាំ ២០១១ បុគ្គលរូបនេះក៏បានបាត់ខ្លួនទាំងស្រុង ក្រោយពីបានផ្ទេរ កូដប្រភពរបស់ Bitcoin ឱ្យទៅ Gavin Andresen ដែលជាអ្នកឯកទេសខាងអភិវឌ្ឍកូដ។ ១០ ឆ្នាំកន្លងទៅ ពិភពលោកនៅតែមិនទាន់ដឹងច្បាស់ថា Nakamoto គឺជាបុគ្គល ឬជាស្ថាប័ន។

មនុស្សមួយចំនួនត្រូវបានគេជឿថា គឺជាអ្នកបង្កើត Bitcoin ប៉ុន្តែ ក្រុមអ្នកជំនាញអះអាងថា «ម្ដាយបង្កើត» ពិតប្រាកដរបស់រូបិយវត្ថុឌីជីថលនេះ អាចនឹងគ្មានថ្ងៃបង្ហាញខ្លួន ដោយសារតែមូលហេតុមួយចំនួនដូចតទៅ៖

អ្នកបង្កើត Bitcoin អាចត្រូវសមត្ថកិច្ចស៊ើបអង្កេត

ឆ្នាំ ១៩៩៨ Bernard von NotHaus ដែលជាអ្នកស្រុក Hawaii បានផលិតប្រាក់ផ្ទាល់ខ្លួន និងដាក់ឈ្មោះថា Liberty Dollar។ បុរសនេះផលិតប្រាក់ដោយប្រើប្រាស់លោហធាតុកម្រ ក្រោយមកដាក់ឱ្យចរាចរនៅ សហរដ្ឋអាម៉េរិក អស់រយៈពេលច្រើនឆ្នាំ។ មកដល់ឆ្នាំ ២០០៧ គាត់ត្រូវបាន FBI ចាប់ខ្លួន ដោយសារតែសកម្មភាពផលិតរូបិយវត្ថុខុសច្បាប់។ អាជ្ញាធរបានចោទប្រកាន់គាត់ពីបទ «ផលិតរូបិយវត្ថុឯកជនដើម្បីប្រកួតប្រជែងជាមួយរូបិយវត្ថុរដ្ឋ» នៅឆ្នាំ ២០០៩ និងត្រូវបានពិន័យឱ្យស្ថិតក្រោមការតាមដានពីប៉ូលិស។

នៅឆ្នាំ ២០០៧ ដដែល ម្ចាស់កម្មសិទ្ធិ E-Gold ដែលជាប្រាក់ឌីជីថលដំបូងគេមួយក្នុងពិភពលោក ត្រូវបានចោទប្រកាន់ពីបទជំរុញព័ត៌មានមិនស្របច្បាប់ ហើយក៏ត្រូវជាប់ឃុំក្នុងផ្ទះ ចំណែកសកម្មភាពដែលទាក់ទងក៏ត្រូវបិទទ្វារ។

កាលពីខែមករា រដ្ឋមន្ត្រីក្រសួងហិរញ្ញវត្ថុរបស់ សហរដ្ឋអាម៉េរិក Janet Yellen បានព្រមានដល់ក្រុមអ្នកវិនិយោគអំពីការជួញដូរ Bitcoin។ លោកស្រីព្រួយបារម្ភថា ប្រាក់ឌីជីថលនេះអាចត្រូវបានប្រើប្រាស់សម្រាប់ការជួញដូរខុសច្បាប់ និងត្រូវការឱ្យមានការរឹតត្បិត។

យោងតាម Business Insider ការដែលត្រូវអាជ្ញាធរ «សម្លាក់សម្លឹង» ច្រើនពេក ធ្វើឱ្យអ្នកដែលនៅពីក្រោយ Bitcoin មិនហ៊ានបង្ហាញខ្លួន។ ប្រការនេះក៏ជួយឱ្យស្ថាបនិករបស់ Bitcoin និងរូបិយវត្ថុនេះ មិនត្រូវបានត្រួតត្រាដោយស្ថាប័ន ឬបុគ្គលណាមួយ ក៏ដូចជាចៀសបាននូវលទ្ធផលអាក្រក់ដែលកើតឡើងដោយសារច្បាប់ ដូចជា ត្រូវរដ្ឋាភិបាលស៊ើបអង្កេត និងហាមជួញដូរជាដើម។

តម្លៃនឹងធ្លាក់ដាំក្បាលចុះភ្លាមៗ បើសិនជាអ្នកបង្កើត Bitcoin បង្ហាញខ្លួន

Nakamoto កំពុងកាន់កាប់ Bitcoin ចំនួន ១ លាន ក្នុងចំណោម Bitcoin សរុបចំនួន ២១ លាន ដែលស្មើនឹង ៦០ ពាន់លានដុល្លារអាម៉េរិក។

ដើមឆ្នាំនេះ Brian Armstrong ដែលជា CEO របស់ផ្សាររូបិយវត្ថុ Coinbase បានអះអាងថា ការដែល «ម្ដាយបង្កើត» របស់ Bitcoin បង្ហាញខ្លួន អាចប៉ះពាល់យ៉ាងធ្ងន់ធ្ងរ និងបង្កអស្ថិរភាពដល់ទីផ្សារប្រាក់ឌីជីថលទាំងមូល។ «បើសិនជា Bitcoin ជាង ១ លាន ត្រូវបានគេបញ្ចេញ នោះតម្លៃរបស់ Bitcoin ប្រាកដជាត្រូវធ្លាក់ចុះ» លោក Arstrong ថ្លែងដូច្នេះ៕

December 3, 2021

សហស្ថាបនិករបស់ Grab ក្លាយជាមហាសេដ្ឋីបានតែប៉ុន្មានម៉ោងគត់ កោយមកក៏ធ្លាក់មកជាសេដ្ឋីវិញ

Anthony Tan មានពេលមួយនោះ កាន់កាប់ទ្រព្យជាង ១,០០០ លានដុល្លារអាម៉េរិក ក៏ប៉ុន្តែ ក្រោយការជួញដូរភាគហ៊ុនចុងក្រោយនៃថ្ងៃដដែល ទ្រព្យរបស់គាត់នៅសល់តែ ៧២៥ លានដុល្លារប៉ុណ្ណោះ ដោយសារតែភាគហ៊ុន Grab ធ្លាក់ថ្លៃ។

«ភាគហ៊ុននឹងតែងតែឡើងថ្លៃ និងធ្លាក់ថ្លៃ» Anthony Tan សហស្ថាបនិករបស់ក្រុមហ៊ុន Grab Holdings ថ្លែងដូច្នេះនៅ សិង្ហបុរី កាលពីថ្ងៃទី ២ ធ្នូ ២០២។ ភាគហ៊ុន Grab កាលពីម្សិលមិញ ត្រូវបានដាក់ឱ្យជួញដូរដំបូងនៅលើផ្សារមូលបត្រ Nasdaq (សហរដ្ឋអាម៉េរិក) បន្ទាប់ពីបានច្របាច់បញ្ចូលគ្នាជាមួយ SPAC (ក្រុមហ៊ុនដែលត្រូវបានបង្កើតឡើងក្នុងគោលដៅពិសេស) មួយ ដែលគាំទ្រដោយ Altimeter Capital កាលពីខែសីហា។

ភាគហ៊ុន Grab កើនឡើងខ្ពស់នៅមុនការជួញដូរ ប៉ុន្តែនៅពេលផ្សារហ៊ុនបើកទ្វារ វាបែរជាធ្លាក់ចុះ ហើយពេលបញ្ចប់ការជួញដូរ វាបាត់បង់ជាង ២១%។ បញ្ហានេះធ្វើឱ្យមូលធនទីផ្សាររបស់ក្រុមហ៊ុន ត្រូវបាត់បង់ ១៧,០០០ លានដុល្លារ។ ចំណែកទ្រព្យរបស់លោក Anthony Tan វិញ មានពេលខ្លះកើនឡើងដល់ជាង ១,០០០ លានដុល្លារ ប៉ុន្តែពេលចប់ការជួញដូរក្នុងថ្ងៃដដែល នៅសល់តែ ៧២៥ លានដុល្លារប៉ុណ្ណោះ នេះបើតាមសារព័ត៌មាន Bloomberg Billionaires Index។

លោក Anthony Tan បច្ចុប្បន្នកាន់កាប់ភាគហ៊ុនត្រឹមតែ ២.២% ប៉ុន្តែ មានសិទ្ធិបោះឆ្នោតប្រហាក់ប្រហែលនឹង ៦០.៤%។

បើទោះជាតម្លៃភាគហ៊ុនធ្លាក់ចុះ ក្រុមមេដឹកនាំសំខាន់ៗផ្សេងទៀតរបស់ Grab នៅតែកាន់កាប់ទ្រព្យច្រើនគួរឱ្យកត់សម្គាល់។ សហស្ថាបនិក Hooi Ling Tan និងប្រធាន Ming Maa បច្ចុប្បន្នមានទ្រព្យ ២២៤ លានដុល្លារ និង ១២៦ លានដុល្លារ។ ក្រុមហ៊ុនជប៉ុន SoftBank បានវិនិយោគ ៣,០០០ លានដុល្លារទៅលើ Grab កាលពីឆ្នាំ ២០១។ ភាគហ៊ុនរបស់ SoftBank នៅក្នុង Grab បច្ចុប្បន្នមានតម្លៃ ៦.១ ពាន់លានដុល្លារអាម៉េរិក។

Grab មិនទាន់មានប្រាក់ចំណេញ ប៉ុន្តែ អ្នកវិនិយោគនៅតែទទួលយកកិច្ចព្រមព្រៀងច្របាច់បញ្ចូលគ្នាជាមួយក្រុមហ៊ុនដទៃ។ យោងតាមកិច្ចព្រមព្រៀង Grab ទទួលបាន ៤.៥ ពាន់លានដុល្លារពីការទិញដូរក្រុមហ៊ុននេះ។

ឆ្នាំនេះ Grab មានការប្រែប្រួលច្រើន។ ការច្របាច់បញ្ចូលគ្នាជាមួយនឹងក្រុមហ៊ុន Altimeter ក៏ត្រូវបានពន្យារពេលយូរ។

December 3, 2021

គម្រោង «ច្រកទ្វារសកល» តម្លៃ ៣៤០ ពាន់លានដុល្លារ របស់ EU ដែលប្រជែងនឹងគម្រោង «ខ្សែក្រវាត់និងផ្លូវ» របស់ ចិន នឹងផ្ដោតទៅលើវិស័យណាខ្លះ?

«ច្រកទ្វារសកល (Global Gateway)» ដែលជាគម្រោងខ្នាតយក្សរបស់ សហភាពអឺរ៉ុប (EU) ត្រូវបានបង្កើតឡើងដើម្បីប្រកួតប្រជែងនឹងគម្រោង «ខ្សែក្រវាត់និងផ្លូវ (BRI)» របស់ ចិន មានគោលដៅអភិវឌ្ឍវិស័យជាច្រើននៅទូទាំងសកលលោក ក្នុងនោះក៏មានបច្ចេកវិទ្យាឌីជីថល ផងដែរ។

គម្រោងហេដ្ឋារចនាសម្ព័ន្ធ «ច្រកទ្វារសកល» របស់ សហភាពអឺរ៉ុប ដែលមានគោលដៅប្រមូលទុន ៣០០ ពាន់លានអឺរ៉ូ (៣៤០ ពាន់លានដុល្លារអាម៉េរិក) ពីថវិកាសាធារណៈ និងឯកជន ក្នុងដំណាក់កាលពីឆ្នាំ ២០២១ ដល់ ២០២៧ គឺផែនការសាងសង់ហេដ្ឋារចនាសម្ព័ន្ធទំនើបនៅខាងក្រៅទឹកដីរបស់ EU ក្នុងទិសដៅអភិវឌ្ឍវិស័យជាច្រើនដូចជា បច្ចេកវិទ្យាឌីជីថល ចរាចរណ៍ ថាមពលស្អាត ប្រព័ន្ធសុខាភិបាល អប់រំ និងស្រាវជ្រាវ។

អំពីបច្ចេកវិទ្យាឌីជីថល សហភាពអឺរ៉ុប នឹងវិនិយោគទៅលើប្រព័ន្ធខ្សែកាបអុបទិករវាងបណ្ដាប្រទេស ប្រព័ន្ធផ្កាយរណប ហេដ្ឋារចនាសម្ព័ន្ធពពក (Cloud infrastructure) ដើម្បីបង្កលក្ខណៈងាយស្រួលដល់កិច្ចសហប្រតិបត្តិការជាសកល ការចែករំលែកទិន្នន័យ និងការអភិវឌ្ឍបញ្ញាសិប្បនិម្មិត។ គម្រោងនេះនឹងផ្ដោតសំខាន់ទៅលើ តំបន់អាម៉េរិកឡាទីន។

ចំណែកវិស័យថាមពលស្អាត EU នឹងបំពាក់ប្រព័ន្ធថាមពលនានា ដែលប្ដូរទៅរកថាមពលកកើតឡើងវិញ និងសហការជាមួយបណ្ដាប្រទេសដើម្បីជំរុញការផលិតអ៊ីដ្រូសែនកកើតឡើងវិញ។ គម្រោងនេះផ្ដោតសំខាន់ជាងគេទៅលើ តំបន់អាហ្វ្រិក។

ចំពោះវិស័យចរាចរណ៍ ដែលត្រូវបានគេយល់ឃើញថា ប្រឈមមុខផ្ទាល់ជាមួយនឹង BRI សហភាពអឺរ៉ុបក៏នឹងវិនិយោគទៅលើផ្លូវដែក ផ្លូវគោក កំពង់ផែ ព្រលានយន្តហោះ និងច្រកព្រំដែន។ វិស័យផ្លូវគមនាគមន៍នេះនឹងផ្ដល់អាទិភាពដល់តំបន់មជ្ឈិមបូព៌ា និង តំបន់អាហ្វ្រិកខាងជើង។

ប្រធានគណៈកម្មការអឺរ៉ុប លោកស្រី លោកស្រី អួរស៊ូឡា វ៉ុនឌែរ ឡេយែន (Ursula von der Leyen)

សម្រាប់វិស័យសុខាភិបាលវិញ EU នឹងជួយដល់បណ្ដាប្រទេសក្នុងការផលិតវ៉ាក់សាំងដោយខ្លួនឯង ពិសេសគឺបណ្ដាប្រទេសនៅក្នុង តំបន់អាហ្វ្រិក។

រីឯវិស័យអប់រំ សហភាពអឺរ៉ុប នឹងវិនិយោគបន្ថែមទៀតទៅក្នុងតំបន់នានារបស់ពិភពលោក ក្នុងនោះក៏នឹងមានការពង្រីកសកម្មភាពអប់រំតាមប្រព័ន្ធអ៊ីនធើណិត រួមនឹងការដោះដូរនិស្សិតឱ្យមកសិក្សាក្នុង តំបន់អឺរ៉ុប។ល។

បើទោះជាឯកសារស្ដីពី «ច្រកទ្វារសកល» មិនបាននិយាយដល់ ប្រទេសចិន ប៉ុន្តែ ក្រុមអ្នកវិភាគវាយតម្លៃថា គម្រោងនេះបានបង្ហាញថា សហភាពអឺរ៉ុប កំពុងតែ «ភ្ញាក់ខ្លួន» នៅចំពោះមុខសំណើប្រកួតប្រជែងជាមួយ ទីក្រុងប៉េកាំង។

ប្រទេសចិន កាលពីឆ្នាំ ២០១៣ បានចាប់ផ្ដើមយុទ្ធសាស្ត្រវិនិយោគទូទាំងសកលលោកដែលប្រទេសនេះបានដាក់ឈ្មោះថា «ខ្សែក្រវាត់និងផ្លូវ (BRI)» ជាគម្រោងលំដាប់កំពូលរបស់ ប្រធានាធិបតីចិន លោក ស៊ី ជីនពីង។ ទីក្រុងប៉េកាំង ឱ្យដឹងថា ខ្លួនបានវិនិយោគទឹកប្រាក់ចំនួន ១៣៩.៨ ពាន់លានដុល្លារអាម៉េរិក គិតត្រឹមឆ្នាំ ២០២០ ក្នុងនោះមាន ២២.៥ ពាន់លានដុល្លារត្រូវបានវិនិយោគសម្រាប់ឆ្នាំ ២០២០ ក្នុងក្របខណ្ឌនៃគម្រោង BRI របស់ខ្លួន៕

December 3, 2021

Category: សង្គម និងសេដ្ឋកិច្ច