Category: សង្គម និងសេដ្ឋកិច្ច

និន្នាការនៃរូបមន្តបំពេញការងាររបស់បុគ្គលិក និយោជិត សម្រាប់ឆ្នាំ ២០២២
ឆ្នាំ ២០២១ ជិតកន្លងផុតទៅ ក្រុមហ៊ុនប្រឹក្សាយោបល់ជាច្រើនបានបញ្ចេញទិន្នន័យនៃការព្យាកររបស់ពួកគេ ក្នុងនោះក៏មានទស្សនាវដ្ដីអាម៉េរិក Forbes ផងដែរ។
Forbes បានឱ្យដឹងថា រូបមន្តធ្វើការបែប Hybrid នឹងក្លាយជានិន្នាការនៃការធ្វើការសម្រាប់ឆ្នាំ ២០២២៖
នៅក្នុងឆ្នាំ ២០២១ ដែលពោរពេញដោយឧបសគ្គព្រោះតែជំងឺរាតត្បាតសកល និងជាឆ្នាំដែលជិតកន្លងផុតទៅនេះ បើសិនអ្នកជាបុគ្គលិកធ្វើការដោយប្រើបញ្ញា អ្នកប្រាកដជាបានដឹងច្បាស់ថា ខ្លួនមានសេរីភាពជាងមុន នៅក្នុងការជ្រើសរើសពេលវេលា និងទីតាំងធ្វើការ ដែលនេះអាចជួយធ្វើឱ្យមានតុល្យភាពរវាងជីវភាពនៅឯផ្ទះ និងនៅកន្លែងធ្វើការ។
ផ្ទុយមកវិញ បើសិនអ្នកជាបុគ្គលិក «ជួរមុខ» អ្នកនឹងមានការងារច្រើនដែលត្រូវសាកល្បង។ សម្រាប់បុគ្គលិកជួរមុខក្នុងវិស័យសុខាភិបាល លក់រាយ អប់រំ ដឹកជញ្ជូន និងសន្តិសុខជាដើម នោះពាក្យថា «ធ្វើការដោយការរួមផ្សំ» (Hybrid Working) ទំនងជាមិនសូវប៉ះពាល់ដល់ជីវភាពប្រចាំថ្ងៃរបស់អ្នក។ ជំនួសមកវិញ អ្នកទទួលបានជំនួយច្រើនពីបច្ចេកវិទ្យា ដើម្បី «ធ្វើឱ្យមានស្ថិរភាព» ក្នុងការរស់នៅ។
ធ្វើការតាមបែបរួមផ្សំ ឬហៅថា បែប Hybrid (Hybrid Working) គឺជារូបមន្តរួមផ្សំរវាង «ការធ្វើការពីចម្ងាយ ឬពីផ្ទះ» ជាមួយនឹង «ការធ្វើការក្នុងការិយាល័យ»។ នៅពេលនិយាយអំពីរូបមន្តធ្វើការបែប Hybrid ទស្សនាវដ្ដី Forbes ឱ្យដឹងថា ឆ្នាំ ២០២២ នឹងបន្តមាន ៣ ទម្រង់សំខាន់ៗ គឺ កន្លែងធ្វើការប្រមូលផ្ដុំ, ការគ្រប់គ្រងពីចម្ងាយបែបវិមជ្ឈការ និងវិធីសាស្ត្ររួមផ្សំរវាងរូបមន្តទាំង ២ ខាងលើ។
ដោយសារតែផលប៉ះពាល់ពីជំងឺរាតត្បាត បរិស្ថានធ្វើការក្នុងឆ្នាំ ២០២២ នឹងប្រែជាមានច្រើនបែបច្រើនយ៉ាងជាងបច្ចុប្បន្ន សម្រាប់បុគ្គលិកជ្រើសរើស ជំនួសឱ្យការធ្វើតាមការកំណត់របស់ស្ថាប័ន ក្រុមហ៊ុន។ ប្រការនេះបង្ហាញថា ក្រុមហ៊ុននានាក៏សម្របខ្លួនទៅតាមស្ថានការណ៍ នៅក្នុងទំនាក់ទំនងរបស់ពួកគេជាមួយនឹងបុគ្គលិក និយោជិត ហើយពេលនោះ គំនិតស្ដីអំពីកន្លែងធ្វើការប្រមូលផ្ដុំក៏ចាប់ផ្ដើមថយចុះកាន់តែទាប។
យោងតាមការស្រាវជ្រាវរបស់ក្រុមហ៊ុនសវនកម្ម KPMG របស់ ហូឡង់ នៅក្នុងអំឡុងជំងឺរាតត្បាតឆ្នាំ ២០២០ ក្រុមហ៊ុនធំៗចំនួន ៦៩% គ្រោងនឹងកាត់បន្ថយទំហំរបស់ការិយាល័យ។ ដើម្បីឆ្លើយតបនឹងស្ថានការណ៍ជាក់ស្ដែង បុគ្គលិក និយោជិតនឹងត្រូវធ្វើការពីចម្ងាយជាញឹកញាប់ រហូតដល់លែងធ្វើការនៅក្នុងការិយាល័យ ហើយបន្ទប់ប្រជុំនឹងត្រូវបានយកមកធ្វើជាកន្លែងសម្រាប់ជួយដល់កម្លាំងដែលធ្វើការពីចម្ងាយ។
របាយការណ៍ថ្មីមួយរបស់ Loom បង្ហាញថា ៩០% នៃបុគ្គលិកដែលត្រូវបានស្ទង់មតិ បានប្រាប់ថា មានការសប្បាយរីករាយជាងមុន ដោយសារកាន់តែទទួលបានសេរីភាពនៅពេលពួកគេធ្វើការពីផ្ទះ។ ប្រការនេះបង្ហាញថា នេះអាចជាទិន្នាការថ្មីដែលមានលក្ខណៈជា «ការពិត ជាក់ស្ដែង» សម្រាប់ការធ្វើការនៅក្នុងឆ្នាំ ២០២២៕
December 30, 2021
កោះត្រល់ នឹងមានមជ្ឈមណ្ឌលអវកាសនាពេលឆាប់ៗ ខណៈក្រុមហ៊ុន Thaiholdings បង្កើត Thaispace នៅ វៀតណាម
ក្រុមហ៊ុន Thaiholdings នឹងបណ្ដាក់ទុន ៥% នៃទុនសរុបរបស់ក្រុមហ៊ុនបុត្រសម្ព័ន្ធ Thaispace ដែលតួលេខនេះប្រហាក់ប្រហែលនឹង ៥៨,៥២៦,០០០ ដុល្លារអាម៉េរិក។ ឆ្នាំ ២០២២ Thaispace នឹងធ្វើ IPO នៅឯផ្សារហ៊ុន សហរដ្ឋអាម៉េរិក។
កាលពីថ្ងៃទី ២៩ ធ្នូ ក្រុមហ៊ុន Thaiholdings នៅប្រទេស វៀតណាម បានប្រកាសបង្កើតក្រុមហ៊ុនមូលបត្រ Thaispace។ Thaispace នឹងមានទុនប្រមាណ ១,១៧០,០០០,០០០ ដុល្លារអាម៉េរិក ក្នុងនោះ Thaiholdings នឹងបោះទុន ៥% នៃដើមទុនសរុបរបស់ Thaispace ហើយក្រុមហ៊ុនបុត្រសម្ព័ន្ធនេះនឹងមានទីស្នាក់ការកណ្ដាលនៅកោះ ហ្វ៊ូក្វុក (កោះត្រល់) ខេត្ត កៀនហ្សាង ប្រទេសវៀតណាម។
Thaiholdings ឱ្យដឹងថា Thaispace នឹងមានជើងហោះហើរទៅកាន់ទីអវកាសដំបូង ចេញពីកោះត្រល់ ក្នុងអំឡុងពីឆ្នាំ ២០២៦ ដល់ ២០៣០ បើសិនជាទទួលបានការអនុញ្ញាតពីរដ្ឋាភិបាលវៀតណាម។
December 30, 2021
(វីដេអូ)-២០២១ ជាឆ្នាំជោគជ័យបំផុតរបស់មហាសេដ្ឋី Elon Musk ទាំងនៅដី ទាំងនៅទីអវកាស
មហាសេដ្ឋី Elon Musk នៅក្នុងឆ្នាំ ២០២១ ទទួលបានជោគជ័យជាច្រើន ខណៈដែលលោកបានក្លាយជាអ្នកមានជាងគេបង្អស់ក្នុងពិភពលោក ចំណែកគម្រោងអវកាសនានាប្រកបដោយមហិច្ឆតា ក៏សម្រេចបានផ្លែផ្កាធំធេង។ លោក Elon Musk ដណ្ដើមបានតំណែងលេខ ១ ពីកំពូលមហាសេដ្ឋីអាម៉េរិក Jeff Bezos ដោយក្លាយជាអ្នកមានទ្រព្យច្រើនជាងគេបំផុតរបស់ពិភពលោក នេះបើតាម Bloomberg។
ចំណែក Analyst Estimates បានចេញផ្សាយថា បរិមាណរថយន្ត Tesla ដែលត្រូវបានប្រគល់ដល់ដៃអតិថិជន បានកើនឡើង ៨០% ក្នុងឆ្នាំនេះ ធៀបនឹងឆ្នាំ ២០២។ SpaceX បានបាញ់បង្ហោះយានអវកាសច្រើនជាងគូប្រជែងនានានៅ សហរដ្ឋអាម៉េរិក។
និយាយអំពីវិស័យនៅលើដី ក្រុមហ៊ុន Tesla បានចាប់ផ្ដើមឆ្នាំ ២០២១ ប្រកបដោយភាពរលូន ដោយចំណូលសរុបក្នុងត្រីមាសទី ១ កើន ៧៤% ធៀបនឹងដំណាក់កាលដូចគ្នាក្នុងឆ្នាំ ២០២០ ដែលនេះ មួយផ្នែកគឺបានមកពីទីផ្សារនៅប្រទេស ចិន។ ត្រីមាសទី ៣ ឆ្នាំ ២០២១ ក្រុមហ៊ុន Tesla នៅតែរកបានប្រាក់ចំណេញច្រើន ស្មើនឹង ៣០%។
មិនត្រឹមតែការបង្កើនការអភិវឌ្ឍរថយន្តអគ្គិសនីបើកបរស្វ័យប្រវត្តនោះទេ លោក Musk កាលពីខែសីហា ថែមទាំងបានបង្ហាញផលិតផលថ្មីដែលមានឈ្មោះថា Tesla Bot ផងដែរ។ នេះគឺជារ៉ូបូតរូបរាងមនុស្សដែលត្រូវបានលោក Musk សង្ឃឹមថា នឹងអាចបំពេញភារកិច្ចរួមរបស់មនុស្សយន្ត។
ក្នុងវិស័យអវកាស ឆ្នាំនេះ លោក Musk បន្តការងារពង្រីកសម្មភាពរបស់ Starship។ លោករំពឹងថា នេះនឹងជាយានអវកាសអាចប្រើប្រាស់ច្រើនដងដំបូងគេ ដែលនឹងអាចនាំមនុស្សឡើងទៅកាន់ឋានព្រះចន្ទ និងពិភពព្រះអង្គារ។
កាលពីខែមីនា មហាសេដ្ឋីអាម៉េរិក ដើមកំណើតអាហ្វ្រិកខាងត្បូង រូបនេះ បានប្រកាសគម្រោងសាងសង់ទីក្រុងថ្មីដែលមានឈ្មោះថា Starbase នៅក្នុងរដ្ឋ Texas។ លោកក៏គ្រោងនឹងប្រើប្រាស់ទីក្រុងនេះជាកន្លែងបាញ់បង្ហោះយាន Starship ផងដែរ។
ប្រព័ន្ធសាកល្បងរបស់ Starship របស់ SpaceX កាលពីខែឧសភា បានចុះចតដោយជោគជ័យនៅក្នុងការសាកល្បងលើកទី ។ ក្រៅពី Starship ក្រុមហ៊ុន SpaceX ក៏បន្តបង្កើតមូលដ្ឋានគ្រឹះថ្មីៗមួយចំនួនទៀតដែរ។
ក្រុមហ៊ុននេះបានបាញ់បង្ហោះយានអវកាសដឹកមនុស្សដំបូង ទៅកាន់គន្លងគោចរ។ យានបាននាំអ្នកអវកាសរបស់ NASA ទៅកាន់ស្ថានីយអវកាសអន្តរជាតិ (ISS) លើកទី ២ ក្នុងឆ្នាំ ២០២។ ក្រុមអ្នកអវកាសលើយាន Dragon បានអរគុណដល់គ្រប់គ្នា និងថ្លែងថា ជើងហោះហើរពិតជាអស្ចារ្យ ប្រសើរជាងអ្វីដែលពួកគេបានស្រមៃទៅទៀត។
ក្រុមហ៊ុន SpaceX ក៏បានទទួលជ័យជំនះក្នុងការដេញថ្លៃសម្រាប់សកម្មភាពអភិវឌ្ឍយានចុះចតលើឋានព្រះចន្ទសម្រាប់ NASA ផងដែរ។
Starlink ដែលជាគម្រោងផ្គត់ផ្គង់អ៊ីនធើណិតរបស់លោក Elon Musk ក៏បានស្គាល់ការរីកចម្រើនយ៉ាងលឿនក្នុងឆ្នាំ ២០២១ និងឈានចូលដល់ដំណាក់កាលសាកល្បងនៅក្នុងតំបន់ដាច់ស្រយាលបំផុតមួយចំនួនរបស់ សហរដ្ឋអាម៉េរិក។ កាលពីខែកក្កដា Starlink បានឱ្យដឹងថា បានបាញ់បង្ហោះផ្កាយរណបប្រមាណ ១,៨០០ គ្រឿង និងផ្គត់ផ្គង់អ៊ីនធើណិតដល់មនុស្សចំនួនប្រហែល ១៤០,០០០ នាក់ នៅក្នុងប្រទេសជាង ២០។
កាលពីថ្ងៃទី ២ ធ្នូ ក្រុមហ៊ុន SpaceX បានបាញ់បង្ហោះយានអវកាសលើកទី ២៧ នៅក្នុងឆ្នាំ ២០២១ នាំយកផ្កាយរណប Starlink ជិត ៥០ គ្រឿង ទៅដាក់នៅក្នុងគន្លងគោចរ។
មហិច្ឆតារបស់ Musk មិនត្រឹមតែប៉ុណ្ណឹងទេ លោកថែមទាំងមានគម្រោងសាងសង់រោងចក្រផលិតឡានអគ្គិសនីធំៗចំនួន ២ ទៀត នៅ សហរដ្ឋអាម៉េរិក និង អាល្លឺម៉ង់។ គោលដៅសម្រាប់ឆ្នាំក្រោយរបស់មហាសេដ្ឋីរូបនេះ គឺការបាញ់បង្ហោះយានអវកាសគំរូ Starship ដំបូងទៅកាន់គន្លងតារាវិថី។
SpaceX កំពុងតែស្វែងរកវិធីដើម្បីទទួលបានវិញ្ញាបនបត្របញ្ជាក់ការអនុញ្ញាត និងកំពុងរង់ចាំការវាយតម្លៃផ្នែកបរិស្ថានពីស្ថាប័នគ្រប់គ្រងអាកាសចរណ៍របស់ សហរដ្ឋអាម៉េរិក ដែលនឹងធ្វើឡើងនៅចុងឆ្នាំ ២០២១។ Starlink ក៏កំពុងមានគម្រោងសុំច្បាស់អាជ្ញាធរដើម្បីបាញ់បង្ហោះផ្កាយរណបជាច្រើនគ្រឿងថែមទៀតនៅឆ្នាំក្រោយ។
បច្ចុប្បន្ន លោក Musk មានបំណងបង្ហាញកំណែគំរូនៃរថយន្តអគ្គិសនីប្រភេទទ្រុង ដែល Tesla គ្រោងនឹងផលិតទ្រង់ទ្រាយធំនៅឆ្នាំ ២០២១។
មហាសេដ្ឋី Elon Musk ទំនងជានឹងដាក់ចេញនូវមហិច្ឆតាថ្មីៗជាច្រើនថែមទៀត ចាប់ពីរថយន្តអគ្គិសនីនៅលើដី រហូតដល់រ៉ុក្កែតក្នុងវិស័យអវកាស ដែលជួយឱ្យលោកទទួលបានជោគជ័យ និងប្រាក់កាសច្រើនក្នុងអនាគត៕
December 30, 2021
សាស្ត្រាចារ្យចិន ក្លាយជាមហាសេដ្ឋី ដោយសារបង្កើតក្រុមហ៊ុនបច្ចេកវិទ្យា
តាង ស៊ីវអ៊ូ (Tang Xiao’ou) សហស្ថាបនិករបស់ក្រុមហ៊ុន SenseTime បច្ចុប្បន្នកាន់កាប់ភាគហ៊ុនចំនួន ២១% ដែលប្រហាក់ប្រហែលនឹង ៣.៤ ពាន់លានដុល្លារអាម៉េរិក។
SenseTime Group ដែលជាក្រុមហ៊ុនបច្ចេកវិទ្យាបញ្ហាសិប្បនិម្មិត (AI/Artificial intelligence) ធំជាងគេនៅ ប្រទេសចិន កាលពីសប្ដាហ៍កន្លងបានកំណត់មូលបត្រនៅពេលធ្វើ IPO ក្នុងតម្លៃ ៣.៨៥ ដុល្លារហុងកុង/ហ៊ុន ហើយប្រមូលទុនបាន ៥.៥៥ ពាន់លានដុល្លារហុងកុង។ មូលបត្ររបស់ក្រុមហ៊ុននេះនឹងត្រូវដាក់ឱ្យជួញដូរនៅលើផ្សារហ៊ុនហុងកុង ចាប់ពីថ្ងៃទី ៣០ ធ្នូ ២០២១។ បច្ចុប្បន្ន ក្រុមហ៊ុននេះមានមូលធនទីផ្សារតម្លៃជាង ១៦ ពាន់លានដុល្លារអាម៉េរិក។
យោងតាម Bloomberg Billionaires Index បច្ចុប្បន្ន សហស្ថាបនិករបស់ SenseTime គឺលោក តាង ស៊ីវអ៊ូ កំពុងកាន់កាប់ភាគហ៊ុនចំនួន ២១% នៅក្នុងក្រុមហ៊ុន ដែលនៃប្រហាក់ប្រហែលនឹង ៣.៤ ពាន់លានដុល្លារអាម៉េរិក។ លោក តាង ស៊ីវអ៊ូ ឆ្នាំនេះមានអាយុ ៥៣ ឆ្នាំ ហើយក៏ជាសាស្ត្រាចារ្យផ្នែកវិស្វកម្មបច្ចេកវិទ្យាព័ត៌មាន (Information Technology Engineering/ITE) នៃសាកលវិទ្យាល័យចិនហុងកុង( Chinese University of Hong Kong)។
លោក តាង ស៊ីវអ៊ូ
លោក តាង ស៊ីវអ៊ូ បានចូលប្រលូកក្នុងវិស័យបច្ចេកវិទ្យាបញ្ញាសិប្បនិម្មិតផ្នែកស្កេនផ្ទៃមុខ តាំងតែពីយូរមកហើយ។ លោកបានបញ្ចប់ការសិក្សានៅមហាវិទ្យាល័យវិទ្យាសាស្ត្រនិងបច្ចេកវិទ្យាចិន បន្ទាប់មកក៏ទទួលបានវិញ្ញាបនបត្រពីសាកលវិទ្យាល័យ Rochester នៅទីក្រុងនីវយ៉ក សហរដ្ឋអាម៉េរិក ហើយក្រោយមកទៀតក៏ទទួលបានសញ្ញាបត្របណ្ឌិតពីវិទ្យាស្ថានបច្ចេកវិទ្យា Massachusetts កាលពីឆ្នាំ ១៩៩៦។
លោក តាង ស៊ីវអ៊ូ ធ្លាប់ធ្វើការឱ្យ Microsoft Research Asia អស់រយៈពេលច្រើនឆ្នាំ មុននឹងក្លាយជាសហស្ថាបនិករបស់ SenseTime កាលពីឆ្នាំ ២០១៤ នៅ សៀងហៃ ដោយសហការជាមួយ Xu Li (កាលណោះ Xu Li ធ្វើការឱ្យ Lenovo Group។ មិនយូរប៉ុន្មាន ក្រុមហ៊ុន SenseTime ក៏ទទួលបានទុនវិនិយោគពី IDG Capital, SoftBank, Alibaba Group រួមទាំង Silver Lake ផងដែរ។
សារព័ត៌មាន Bloomberg បានឱ្យដឹងថា បច្ចុប្បន្ន SenseTime គឺជាក្រុមហ៊ុនបច្ចេកវិទ្យាបញ្ញាសិប្បនិម្មិត ធំជាងគេប្រចាំ ទ្វីបអាស៊ី ដោយមានចំណែកទីផ្សារ ១១%។ ប្រាក់ចំណូលរបស់ក្រុមហ៊ុននេះ កាលពីឆ្នាំទៅ កើន ១៤% ដែលឡើងដល់ ៣.៤ ពាន់លានយុន (៥៣៤ លានដុល្លារអាម៉េរិក) ប៉ុន្តែ ពួកគេក៏ខាតបង់ ១.៨ ពាន់លានយុនផងដែរ ទៅលើការចំណាយនានារបស់ក្រុមហ៊ុន៕
December 29, 2021
អ៊ីឡុន ម៉ាស (Elon Musk) បានលក់ភាគហ៊ុន Tesla តម្លៃជាង ១៦ ពាន់លានដុល្លារ ក្នុងរយៈពេល ២ ខែមកនេះ
មហាសេដ្ឋីលំដាប់លេខ ១ ក្នុងពិភពលោក ជិតបានសម្រេចកិច្ចការលក់ភាគហ៊ុនចំនួន ១០% ក្នុងចំណោមភាគហ៊ុនរបស់លោក នៅក្នុងក្រុមហ៊ុន Tesla ទៅតាមការសន្យានៅក្នុងការស្ទង់មតិលើ Twitter កាលពីខែមុន។
យោងតាមឯកសារដែលបានដាក់ទៅកាន់គណៈកម្មការមូលបត្រអាម៉េរិក (SEC) នាយកប្រតិបត្តិរបស់ Tesla លោក អ៊ីឡុន ម៉ាស ទើបតែបានលក់ភាគហ៊ុន Tesla ចំនួន ៩៣៤,០០០ ហ៊ុនថែមទៀត ធ្វើឱ្យភាគហ៊ុនសរុបដែលលោកបានលក់ចាប់តាំងពីខែវិច្ឆិកា មកដល់បច្ចុប្បន្ន ឡើងដល់ ១៥.៦ លានហ៊ុន។ តួលេខភាគហ៊ុននេះប្រហាក់ប្រហែលនឹងទឹកប្រាក់ ១៦.៤ ពាន់លានដុល្លារ។ មហាសេដ្ឋីរូបនេះត្រូវការលក់ភាគហ៊ុន Tesla ប្រហែល ១៧ លានហ៊ុន ទើបត្រូវទៅតាមការសន្យាលក់ភាគហ៊ុន ១០% ដែលលោកបានធ្វើឡើងកាលពីខែវិច្ឆិកា។
នៅក្នុងការស្ទង់មតិមួយនៅលើបណ្ដាញសង្គម Twitter កាលពីខែវិច្ឆិកា ២០២១ ពាក់ព័ន្ធនឹង កម្មវិធីស្បៀងអាហារពិភពលោក (World Food Programme) មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស បានសួរអ្នកលេងបណ្ដាញសង្គមថា គួរតែលក់ភាគហ៊ុន Tesla ១០% ឬទេ។ ភាគហ៊ុន Tesla បានកើនឡើងជាង ២,៣០០% ក្នុងរយៈពេល ៥ ឆ្នាំមកនេះ។ កាលពីសប្ដាហ៍កន្លងទៅ លោក Musk បានប្រកាសថា លោកជិតសម្រេចបានគោលដៅនៃការលក់ភាគហ៊ុននេះហើយ។
កាលពីសប្ដាហ៍កន្លង CEO របស់ Tesla បានអះអាងថា លោកនឹងបង់ពន្ធជាង ១១ ពាន់លានដុល្លារសម្រាប់ឆ្នាំនេះ។
បច្ចុប្បន្ន មហាសេដ្ឋី អ៊ីឡុន ម៉ាស គឺជាអ្នកមានជាងគេបំផុតក្នុងពិភពលោក ដោយមានទ្រព្យសរុប ២៧៩ ពាន់លានដុល្លារ នេះបើតាម Bloomberg Billionaires Index។ ទ្រព្យសម្បត្តិរបស់លោក បានកើនជិត ៨០% នៅក្នុងឆ្នាំ ២០២១៕
December 29, 2021
ចំការផលិតអគ្គិសនីដើរដោយកម្លាំងខ្យល់លើសមុទ្រធំបំផុតនៅ ប្រទេសចិន ចាប់ផ្ដើមដំណើរការ
ប្រទេសចិន កាលពីថ្ងៃទី ២៤ ធ្នូ ២០២១ បានដាក់ឱ្យដំណើរការចំការផលិតអគ្គិសនីដើរដោយកម្លាំងខ្យល់លើផ្ទៃសមុទ្រ ដែលផ្ដល់ថាមពលអគ្គិសនីជាង ១ លានគីឡូវ៉ាត់ ដំបូងគេបង្អស់របស់ប្រទេសនេះ។
ចំការផលិតអគ្គិសនីដើរដោយថាមពលខ្យល់លើសមុទ្រធំបំផុតនៅ ប្រទេសចិន បានចាប់ផ្ដើមផលិតអគ្គិសនី និងតភ្ជាប់បណ្ដាញកាលពីថ្ងៃទី ២៤ ធ្នូ ដែលនេះគឺជាជំហានថ្មីមួយនៅក្នុងការប្ដេជ្ញាអភិវឌ្ឍថាមពលស្អាតរបស់ ប្រទេសចិន។
ស្ថិតនៅលើផ្ទៃសមុទ្ររបស់ទីក្រុង Yangjiang នៃខេត្ត ក្វាងទុង ភាគខាងត្បូង ប្រទេសចិន ចំការអគ្គិសនី Yangjiang Shapa ត្រូវបានសាងសង់ដោយក្រុមហ៊ុនចិន China Three Gorges Corporation ដោយប្រើប្រាស់ទុនសរុប ៥.៥ ពាន់លានដុល្លារអាម៉េរិក។ គម្រោងនេះរួមមាន ទួរប៊ីនខ្យល់ចំនួន ២៦៩ គ្រឿង ដែលអាចផ្ដល់អគ្គិសនី ១.៧ លានគីឡូវ៉ាត់។
ប្រធានក្រុមហ៊ុន China Three Gorges Corporation លោក Lei Mingshan បានឱ្យដឹងថា ការសាងសង់គម្រោងនេះនឹងនាំមកនូវបទពិសោធន៍ដ៏មានតម្លៃ ទាក់ទងនឹងការអភិវឌ្ឍចំការផលិតអគ្គិសនីដើរដោយថាមពលខ្យល់នៅលើផ្ទៃសមុទ្រក្នុងទ្រង់ទ្រាយធំ និងប្រមូលផ្ដុំនៅ ប្រទេសចិន ក៏ដូចជានៅក្នុងតំបន់ទឹកជ្រៅ។
ក្រោយពីបានឈានដល់ដំណាក់កាលដំណើរការទាំងស្រុង ចំការផលិតអគ្គិសនី Yangjiang Shapa នឹងផ្គត់ផ្គង់អគ្គិសនីបៃតងចំនួន ៤.៧ ពាន់លានគីឡូវ៉ាត់/ម៉ោង ជារៀងរាល់ឆ្នាំ ប្រហាក់ប្រហែលនឹងការដុតធ្យូងថ្មចំនួនប្រហែល ១.៥ លានតោន នៅក្នុងវិស័យផលិតអគ្គិសនីដោយប្រើប្រាស់ធ្យូងថ្ម។ ប្រការនេះនឹងជួយកាត់បន្ថយឧស្ម័នកាបូនឌីអុកស៊ីត ប្រមាណ ៤ លានតោន/ឆ្នាំ។
គម្រោងនេះនឹងផ្គត់ផ្គង់តម្រូវការប្រើប្រាស់អគ្គិសនីរបស់គ្រួសារដែលជាអតិថិជនចំនួន ២ លានគ្រួ ហើយរួមចំណែកក្នុងការផ្លាស់ប្ដូរហេដ្ឋារចនាសម្ព័ន្ធថាមពលនៅតំបន់ឈូងសមុទ្រ ក្វាងទុង-ហុងកុង-ម៉ាកាវ៕
December 29, 2021
ដំណើរកម្សាន្តបោះជំរំបែបផ្សងព្រេងរបស់អតិថិជន FORD “FORD Adventure ២០២១” ឆ្ពោះទៅកាន់ទឹកធ្លាក់ថ្មដា ភ្នំ១៥០០ ស្រុកវាលវែង ខេត្តពោធិ៍សាត់

ដំណើរកម្សាន្ត FORD Adventure ២០២១ ត្រូវបានរៀបចំឡើងកាលពីថ្ងៃទី២៤ដល់ថ្ងៃទី២៦ ខែធ្នូ ឆ្នាំ២០២១ ដែលមានរយៈពេល៣ថ្ងៃ ២យប់ ក្រោមការចូលរួមពីសំណាក់អតិថិជន FORD ចំនួន៧០រថយន្ត ដោយធ្វើដំណើរពីរាជធានីភ្នំពេញ ឆ្ពោះទៅកាន់ទឹកធ្លាក់ថ្មដា ភ្នំ១៥០០ ស្ថិតនៅស្រុកវាលវែង ខេត្តពោធិ៍សាត់។ ដំណើរកម្សាន្តដ៏រីករាយនេះត្រូវបានរៀបចំឡើងដោយក្រុមហ៊ុន អ អិម អេ ខេមបូឌា (RMA Cambodia) ដែលជាក្រុមហ៊ុននាំចូលផ្តាច់មុខរថយន្តម៉ាក FORD មកកាន់ទីផ្សារប្រទេសកម្ពុជា និងសហការជាមួយធនាគារ KB Daehan (KB Daehan Specialized Bank Plc) ជាធនាគារដែលផ្តល់នូវសេវាហិរញ្ញវត្ថុដ៏ល្អនៅក្នុងប្រទេសកម្ពុជា ជាពិសេសឥណទានទិញរថយន្តថ្មី។
ដំណើរកម្សាន្ត FORD Adventure ឆ្នាំ២០២១នេះ មានភាពអធិកអធមណាស់ ទោះជាដំណើរកម្សាន្តលើកនេះមានលក្ខណៈតូចជាងឆ្នាំមុនៗក៏ដោយ តែគឺពេញដោយភាពសប្បាយរីករាយ និងភាពស្និតស្នាលគ្នារវាងអ្នកចូលរួមទាំងអស់ ក្រោមការរៀបចំកម្មវិធីកម្សាន្តជាច្រើនពីសំណាក់ក្រុមហ៊ុន ដែលមានដូចជា ការបោះតង់គេងជុំគ្នា ការជិះរថយន្ត FORD ជាក្បួនប្រមាណ៧០គ្រឿងធ្វើដំណើរឆ្លងកាត់ពីរាជធានីភ្នំពេញទៅកាន់ខេត្តកំពង់ឆ្នាំង ហើយឆ្ពោះទៅទឹកដីស្រុកវាលវែង ខេត្តពោធិ៍សាត់ ដែលជាតំបន់ទេសចរបែបធម្មជាតិថ្មីមួយនៅលើទឹកដីប្រទេសកម្ពុជា ដែលមានទេសភាពដ៏ស្រស់ត្រកាល និងមានអាកាសធាតុត្រជាក់ចិត្ត ត្រជាក់កាយ អមដោយព្រៃភ្នំពណ៌បៃតងស្រស់ មានផ្លូវបត់បែនដូចអន្ទង់ ហើយតាមរយៈការធ្វើដំណើរលើកនេះ អតិថិជន FORD ទាំងអស់ក៏បានទទួលនូវបទពិសោធន៍ថ្មីក្នុងការបើកបរលើប្រភេទផ្លូវដែលមានភាពបត់បែនច្រើន និងបានទៅទស្សនាតំបន់ទេសចរណ៍នៅលើទឹកដីកម្ពុជាយើងមិនតិចនោះទេ។ ក្រៅពីការរីករាយជាមួយការធ្វើដំណើរ និងទេសភាពនៅតាមដងផ្លូវ អ្នកចូលរួមទាំងអស់ក៏បានរីករាយកម្សាន្តជាមួយនឹងការងូតទឹកអូរលេងជុំគ្នា ការថតរូបលេងជាមួយទេសភាពដ៏ស្រស់ស្អាតនៅរមណីដ្ឋានកែច្នៃដែលមានឈ្មោះថា កាហ្វេភ្នំ ដែលស្ថិតនៅលើភ្នំ១៥០០ និងការទស្សនាព្រំដែនថ្មដា ដែលជាព្រំដែនរវាងប្រទេសកម្ពុជា និងប្រទេសថៃផងដែរ។ ចំណែកឯនៅពេលរាត្រីចូលមកដល់ អ្នកចូលរួមនៅក្នុងដំណើរកម្សាន្តលក្ខណៈគ្រួសារ FORD Adventure ឆ្នាំ២០២១ទាំងអស់ ក៏ទទួលបាននូវភាពរីករាយប្លែកអារម្មណ៍មួយបែបទៀត ជាមួយនឹងការច្រៀងរាំកម្សាន្តជួបជុំគ្នាវិញម្តង ដែលកម្មវិធីទាំងនេះបានញ៉ាំងឱ្យដំណើរកម្សាន្តលើកនេះកាន់តែមានភាពសប្បាយរីករាយ ប្រកបដោយអត្ថន័យ និងពេញដោយការចងចាំល្អៗ។
គួរបញ្ជាក់ផងដែរថា គ្រប់កម្មវិធីដំណើរកម្សាន្ត FORD Adventure ក្រុមហ៊ុន អ អិម អេ ខេមបូឌា (RMA Cambodia) មិនដែលឱ្យរំលងនោះទេ គឺក្រុមហ៊ុនតែងតែផ្សារភ្ជាប់ជាមួយនឹងកម្មវិធីសប្បុរសធម៌ជានិច្ច ដើម្បីជាការចូលរួមជួយប្រទេសជាតិ និងជួយដល់ជនទុរគត ដែលកំពុងជួបនឹងការលំបាកនៅក្នុងការរស់នៅ។ ការផ្សារភ្ជាប់ភាពរីករាយនៃដំណើរកម្សាន្ត ជាមួយនឹងការងារសប្បុរធម៌បែបនេះ គឺជាការបណ្តុះគំនិតដល់យុវជនខ្មែរជំនាន់ក្រោយឱ្យចេះជួយគ្នាទៅវិញទៅមក ឱ្យមានសេចក្តីសន្តោសប្រណីដល់ជនទីទាល់ក្រ និងឱ្យពួកគេចេះស្រឡាញ់រាប់អានគ្នាដោយមិនរើសអើងពីឋានៈផងដែរ។

ព្រឹត្តិការណ៍ដំណើរកម្សាន្ត FORD Adventure ប្រចាំឆ្នាំ២០២១នេះ គឺពិតជាពិសេស និងពេញដោយភាពសប្បាយរីករាយខ្លាំងណាស់ អតិថិជនរថយន្ត FORD ទាំងអស់បានទទួលនូវការសម្រាកជួបជុំគ្រួសារ និងស្គាល់មិត្តភក្តិថ្មីៗជាច្រើនពីគ្រប់ខេត្តក្រុងក្នុងប្រទេសកម្ពុជា ព្រមទាំងបានស្គាល់ពីទឹកដីថ្មីនៃស្រុកវាលវែង ក្នុងខេត្តពោធិ៍សាត់ផងដែរ។ លើសពីនេះទៅទៀត ទាំងអតិថិជនរថយន្ត FORD ទាំងអ្នកសារព័ត៌មានទាំងអស់ដែលបានចូលរួមនៅក្នុងដំណើរកម្សាន្តលើកនេះ មានការពេញចិត្តចំពោះការរៀនចំ និងការស្វាគមន៍ដ៏កក់ក្តៅរបស់ក្រុមការងារនៃក្រុមហ៊ុន អ អិម អេ ខេមបូឌា (RMA Cambodia) ក្រៃលែង គឺទាំងកន្លែងដែលបានទៅដើរលេងកម្សាន្ត ទាំងកន្លែងស្នាក់នៅ ទាំងអាហារហូបចុក ទាំងកម្មវិធីកម្សាន្តផ្សេងៗពេញរយៈពេល៣ថ្ងៃ ២យប់នេះ គឺល្អខ្លាំងណាស់ សប្បាយប្លែកអារម្មណ៍តែម្តង នេះជាកាដូដ៏មានអត្ថន័យរបស់ក្រុមហ៊ុន អ អិម អេ ខេមបូឌា (RMA Cambodia) ជូនដល់អតិថិជនដែលតែងតែគាំទ្រដល់រថយន្ត FORD ក្នុងឆ្នាំ២០២១នេះ៕
December 29, 2021
ក្រុមហ៊ុនជប៉ុនមួយចំនួន កំពុងស្នើសុំបង្កើតរោងចក្រផលិតអគ្គិសនី ដើរដោយឧស្ម័នធម្មជាតិ និងពន្លឺព្រះអាទិត្យនៅ កម្ពុជា
រាជរដ្ឋាភិបាលជប៉ុន បញ្ជាក់ថា នឹងជួយជំរុញកំពង់ផែក្រុងព្រះសីហនុ ឱ្យក្លាយទៅជាកំពង់ផែ ស្នូល របស់ កម្ពុជា នេះបើតាម ឯកឧត្ដម អ៊ាង សុផ្លែត ជំនួយការផ្ទាល់របស់ប្រមុខរដ្ឋាភិបាលកម្ពុជា។
ព័ត៌មាននេះត្រូវបានលើកឡើងបន្ទាប់ពី សម្ដេចតេជោ ហ៊ុន សែន បានអនុញ្ញាតឱ្យ ឯកឧត្តម MIKAMI Masahiro ឯកអគ្គរាជទូតជប៉ុនប្រចាំកម្ពុជា ចូលជួបពិភាក្សាការងារ កាលពីព្រឹកថ្ងៃទី ២៨ ខែធ្នូ ឆ្នាំ ២០២១ នៅឯគេហដ្ឋានរបស់ សម្ដេច នាទីក្រុងតាខ្មៅ ខេត្តកណ្ដាល។
ឯកអគ្គរាជទូតជប៉ុនប្រចាំកម្ពុជា បានជម្រាបជូនសម្ដេចតេជោថា ក្រុមហ៊ុនរបស់ជប៉ុនមួយចំនួន កំពុងតែស្នើសុំបង្កើតរោងចក្រផលិតថាមពលអគ្គិសនី ដោយឧស្ម័នធម្មជាតិ និងពន្លឺព្រះអាទិត្យនៅ កម្ពុជា។
ជាងនេះ ឯកឧត្ដម MIKAMI Masahiro ក៏បានបញ្ជាក់ថា ប្រទេសជប៉ុន គាំទ្រ និងជួយជំរុញកំពង់ផែក្រុងព្រះសីហនុ របស់ កម្ពុជា ឱ្យក្លាយទៅជាកំពង់ផែសំខាន់បំផុតរបស់ប្រទេសជាតិ។
ប្រមុខរដ្ឋាភិបាលកម្ពុជា បានថ្លែងអំណរគុណចំពោះ ប្រទេសជប៉ុន ដែលបានផ្ដល់ជំនួយ និងការគាំទ្រដល់ កម្ពុជា នាពេលកន្លង ក៏ដូចជានាពេលខាងមុខ៕
December 28, 2021
ចិន សម្ពោធដាក់ឱ្យប្រើប្រាស់ផ្លូវល្បឿនលឿនឆ្លងកាត់សមុទ្រខ្សាច់ដំបូងគេនៅតំបន់ស៊ីនជាំង (វីដេអូ)
ផ្លូវល្បឿនលឿន S21 អាល់តៃ-អ៊ុយរ៉ុមឈី (Altay-Urumqi) ប្រវែង ៣៤៣ គីឡូម៉ែត្រ ដែលឆ្លងកាត់សមុទ្រខ្សាច់ធំលំដាប់ទី ២ របស់ ប្រទេសចិន ត្រូវបានដាក់ឱ្យប្រើប្រាស់ជាផ្លូវការរួចហើយ។
ផ្លូវល្បឿនលឿនដែលត្រូវបានដាក់ឱ្យប្រើប្រាស់ចាប់ពីថ្ងៃទី ២៤ ធ្នូ ២០២១ នេះ នឹងជួយកាត់បន្ថយពេលវេលាបានពាក់កណ្ដាលនៃការធ្វើដំណើរពីទីក្រុងរដ្ឋបាល អ៊ុយរ៉ុមឈី ទៅកាន់តំបន់ អាល់តៃ នៅភាគខាងជើង។
S21 អាល់តៃ-អ៊ុយរ៉ុមឈី មានប្រវែងសរុប ៣៤៣ គីឡូម៉ែត្រ ក្នុងនោះមានជាង ១៥០ គីឡូម៉ែត្រស្ថិតនៅលើសមុទ្រខ្សាច់ ហ្គរបានទុងហ្គូត (Gurbantunggut) ជាសមុទ្រខ្សាច់ធំលំដាប់ទី ២ នៅ ប្រទេសចិន។
តាបឺស (Tabus) ដែលជាអ្នកផ្ដល់សេវាកម្មរថយន្តសម្រាប់អ្នកដំណើរផ្លូវឆ្ងាយ បានឱ្យដឹងថា៖ «យើងធ្លាប់ចំណាយពេលពី ៧ ទៅ ៨ ម៉ោង ដើម្បីទៅកាន់ អ៊ុយរ៉ុមឈី»។ ពេលនេះ យើងចំណាយពេលតែប្រហែល ៣ ទៅ ៤ ម៉ោងប៉ុណ្ណោះ ដែលប្រការនេះជួយសន្សំសំច័យពេលវេលាបានយ៉ាងច្រើន។
ចាង ឈាន (Zhang Qian) ដែលជាម្ចាស់ហាងគ្រឿងសមុទ្រមួយនៅស្រុក ហ្វ៊ូហៃ (Fuhai) ថ្លែងថា ដោយសារមានផ្លូវថ្មី គាត់អាចផ្ញើទំនិញទៅកាន់ អ៊ុយរ៉ុមឈី និងតំបន់ដទៃបានលឿនជាងមុនឆ្ងាយណាស់។ «ទំនិញត្រូវផ្ញើនៅពេលព្រឹក ហើយទៅដល់នៅពេលថ្ងៃត្រង់»។
ដើម្បីកាត់បន្ថយផលប៉ះពាល់ដល់បរិស្ថាន ផ្លូវល្បឿនលឿននេះក៏មានផ្លូវដើរសម្រាប់សត្វព្រៃ មានផ្លាកសញ្ញាព្រមានអំពីល្បឿន និងហាមស៊ីផ្លេ ចំណែកសងខាងផ្លូវក៏មានប្រព័ន្ធសំណាញ់ចំបើងដើម្បីការពារបញ្ហាខ្សាច់ហូរចូលផ្លូវផងដែរ៕
December 28, 2021
យន្តហោះល្បឿនលឿនជាងសំឡេង ៥ ដង នឹងហោះហើរសាកល្បងនៅឆ្នាំ ២០២៥
យន្តហោះ SR-72 របស់ក្រុមហ៊ុន Lockheed Martin ដែលនឹងក្លាយជាយន្តហោះមានល្បឿនលឿនជាងគេបង្អស់ក្នុងពិភពលោក នឹងហោះហើរសាកល្បងនៅឆ្នាំ ២០២៥។
SR-72 នឹងក្លាយជាយន្តហោះដែលចូលមកគ្រប់គ្រងចំណាត់ថ្នាក់កំពូលជំនួស SR-71 Blackbird ដែលជាយន្តហោះមានមនុស្សបើកបរល្បឿនលឿនជាងគេក្នុងពិភពលោក ដោយធ្លាប់បានបំបែកឯតទគ្គកម្មល្បឿនកាលពីឆ្នាំ ១៩៧៤ និងបានចូលនិវត្តន៍កាលពីឆ្នាំ ១៩៩៨។
SR-72 គឺជាយន្តហោះដែលត្រូវបានអភិវឌ្ឍដោយក្រុមហ៊ុនអាម៉េរិក Lockheed Martin ដើម្បីក្លាយជាយន្តហោះល្បឿនលឿងជាងសំឡេងគ្មានមនុស្សបើកដែលអាចប្រើប្រាស់ឡើងវិញ និងប្រើប្រាស់សម្រាប់ឈ្លបយកការណ៍ តាមដាន និងវាយប្រហារ។
យន្តហោះដែលមានល្បឿនលឿនជាងសំឡេង ៥ ដង (Mach 5) ត្រូវបានគេហៅថា យន្តហោះប្រភេទ Hypersonic ដោយមានល្បឿនជាង ៦,២០០ គីឡូម៉ែត្រ/ម៉ោង។ យន្តហោះដែលមានល្បឿនលឿនជាងសំឡេង ប៉ុន្តែមិនដល់ ៥ ដង ត្រូវបានគេចាត់ទុកថាជាយន្តហោះប្រភេទ Supersonic។
គម្រោង SR-72 ដែលត្រូវបានប្រកាសកាលពីឆ្នាំ ២០១៣ នេះ មានល្បឿនអតិបរមា ៧,៤០០ គីឡូម៉ែត្រ/ម៉ោង លឿនជាងទ្វេដង ធៀបនឹងកំណែមុន។ យន្តហោះនេះអាចគេចខ្លួនពីបណ្ដាយន្តហោះចម្បាំងល្បឿនលឿននាបច្ចុប្បន្ន៕
December 28, 2021