សង្គម និងសេដ្ឋកិច្ច - La Reine Media

ត្រូវឆ្នោតតម្លៃ ១លានដុល្លារអាម៉េរិក ដោយសារអំណោយក្នុងថ្ងៃបុណ្យណូអែល

(សហរដ្ឋអាម៉េរិក)-និស្សិតម្នាក់នៅសាកលវិទ្យាល័យ Virginia បានត្រូវឆ្នោតតម្លៃ ១ លានដុល្លារអាម៉េរិក ពីអំណោយដែលម្ដាយបានឱ្យក្នុងថ្ងៃបុណ្យណែអែល ឆ្នាំ ២០២១។

Brian Donohue ដែលជានិស្សិតម្នាក់នៅសាកលវិទ្យាល័យ Virginia ក្រោកពីគេងក្នុងថ្ងៃបុណ្យណែអែល ក៏ស្រាប់តែបានប្រទះឃើញសន្លឹកឆ្នោត Bank a Million ១ សន្លឹក នៅក្នុងចំណោមកាដូដែលខ្លួនបានទទួលពីម្ដាយ។ ម្ដាយរបស់ Brian បានទិញសន្លឹកឆ្នោតនេះកាលពីថ្ងៃទី ២២ ធ្នូ ២០២១ ពីហាងទំនិញមួយនៅ Okaton។

Brian បានផ្ទៀងលេខឆ្នោត ហើយក៏ឃើញថា លេខ ៤-៨-២១-២៥-៣២-៣៥ គឺជាលេខត្រូវរង្វាន់តម្លៃ ១ លានដុល្លារក្រោយការបង់ពន្ធ។ កំលោះនេះបានទៅទទួលប្រាក់រង្វាន់កាលពីថ្ងៃទី ២៧ ធ្នូ ២០២១ ប៉ុន្តែ រហូតដល់យប់ថ្ងៃទី ៦ មករា ២០២២ ទើបព័ត៌មាននេះត្រូវបានផ្សព្វផ្សាយ។ Brian ឱ្យដឹងថា នឹងប្រើប្រាស់លុយនេះដើម្បីបង់ថ្លៃសាលារៀន។

ឆ្នោត Bank a Billion ត្រូវបានបោះផ្សាយផ្ដាច់មុខនៅ Virginia និងចាប់រង្វាន់នៅថ្ងៃពុធ និងថ្ងៃសៅរ៍រៀងរាល់សប្ដាហ៍ នៅវេលាម៉ោង ២។ រង្វាន់ធំជាងគេរួមមាន ១ លានដុល្លារ, កន្លះលានដុល្លារ និង ២៥០,០០០ ដុល្លារ ក្រោយការបង់ពន្ធរួច។ អត្រានៃការត្រូវរង្វាន់ធំជាងគេគឺ ១/៣.៨ លាន មានន័យថា ក្នុងចំណោមសន្លឹកឆ្នោតចំនួន ៣,៨០០,០០០ សន្លឹក គឺមាន ១ សន្លឹកជារង្វាន់ធំជាងគេ៕

January 8, 2022

(វីដេអូ)-SpaceX បើកទំព័រឆ្នាំ ២០២២ របស់ខ្លួន ដោយការបាញ់បង្ហោះផ្កាយរណប ៤៩ គ្រឿង

ក្រុមហ៊ុន SpaceX កាលពីព្រឹកម្សិលមិញ បានបំពេញបេសកកម្មអវកាសដំបូងក្នុងឆ្នាំ ២០២២ ដែលនាំយកផ្កាយរណបអ៊ីនធើណិតថ្មីទៅកាន់ទីអវកាស។

ផ្កាយរណប Starlink សរុប ៤៩ គ្រឿង ត្រូវបានដាក់នៅលើក្បាលរ៉ុក្កែត Falcon 9 ហើយហោះឡើងពីប្រព័ន្ធទម្រ ៣៩A នៅឯមជ្ឈមណ្ឌលអវកាស Kennedy ក្នុងរដ្ឋ Florida សហរដ្ឋអាម៉េរិក នៅវេលាម៉ោង ១៦:៤៩ នាទី ថ្ងៃទី ៦ មករា ម៉ោងក្នុងស្រុក ត្រូវនឹងម៉ោង ៤:៤៦ នាទី ថ្ងៃទី ៧ មករា នៅ ភ្នំពេញ។

ប្រហែល ៩ នាទី ក្រោយការបាញ់បង្ហោះ កំណាត់រុញច្រានដំបូងរបស់ រ៉ុក្កែត (B១០៦២) បានផ្ដាច់ខ្លួន និងចុះចតលើស្រឡាងគ្មានមនុស្សបើកថ្មីដែលមានឈ្មោះថា «A Shortfall of Gravitas» នៅលើមហាសមុទ្រ អាត្លង់ទិក ជាបេសកកម្មជោគជ័យដំបូងរបស់ SpaceX ក្នុងឆ្នាំថ្មី។

ក្រុមហ៊ុនរបស់មហាសេដ្ឋី Elon Musk បានបញ្ជាក់ថា ផ្កាយរណប ៤៩ គ្រឿង ត្រូវបានដាក់ពង្រាយដោយជោគជ័យ បន្ទាប់ពីបាញ់បង្ហោះបានប្រហែល ១ ម៉ោង និង ២០ នាទី ដូច្នេះចំនួនផ្កាយរណប Starlink សរុបដែលកំពុងស្ថិតនៅក្នុងគន្លងគោចរ ឡើងដល់ជិត ២,០០០ គ្រឿង។

គោលដៅរបស់ SpaceX គឺការផ្គត់ផ្គង់សេវាអ៊ីនធើណិតនៅទូទាំងសកលលោក ពិសេសគឺនៅតំបន់ដាច់ស្រយាល ជាទីដែលពិបាកប្រើប្រាស់អ៊ីនធើណិតបំផុត។ បច្ចុប្បន្ន សេវាកម្មនេះរបស់ SpaceX កំពុងត្រូវបានប្រើប្រាស់ពេញលេញ និងមានស្រាប់នៅក្នុងប្រទេសចំនួន ២០ ដោយមានអ្នកប្រើប្រាស់ជាង ១០០,០០០ នាក់បានចុះឈ្មោះ៕

January 8, 2022

(វីដេអូ)-ក្រុមហ៊ុនអាម៉េរិក បង្ហាញយានថ្មី ចូលរួមប្រកួតប្រជែងក្នុងវិស័យទេសចរណ៍អវកាស

នៅក្នុងព្រឹត្តិការណ៍តាំងពិព័រណ៍ CES ២០២២ ក្រុមហ៊ុន Sierra Space បានតាំងបង្ហាញគំរូយានអវកាសឈ្មោះ Dream Chaser ដែលអាចដឹកមនុស្សបាន ៦ នាក់ ឡើងទៅកាន់ទីអវកាស។

ក្រុមហ៊ុន Sierra Space មានមូលដ្ឋាននៅ Colorado សហរដ្ឋអាម៉េរិក បានចុះកិច្ចព្រមព្រៀងជាមួយទីភ្នាក់ងារអវកាសអាម៉េរិក (NASA) ស្ដីពីការហោះហើរទៅកាន់ស្ថានីយអវកាសអន្តរជាតិ (ISS) សម្រាប់ឆ្នាំនេះ។ ដើមឡើង Dream Chaser ត្រូវបានអភិវឌ្ឍឡើងដើម្បីដឹកទំនិញទៅកាន់ ISS ប៉ុន្តែ នៅក្នុងប្រកាសថ្មីមួយនៅ CES ២០២២ ក្រុមហ៊ុន Sierra Space បានបង្ហើបឱ្យដឹងថា កំពុងបន្ទាន់សម័យយានអវកាសនេះ ដើម្បីអាចដឹកមនុស្សទៅកាន់ទីអវកាស ដែលនេះគឺជាការចូលរួមប្រកួតប្រជែងក្នុងវិស័យទេសចរណ៍អវកាស។

ដោយមានបណ្ដោយប្រមាណ ៩ ម៉ែត្រ យាន Dream Chaser អាចដឹកក្រុមហោះហើរមួយក្រុមដែលមានគ្នា ៦ នាក់ ពីផែនដី ទៅកាន់មូលដ្ឋានពាណិជ្ជកម្មនានានៅលើគន្លងគោចរកម្រិតទាបនៃផែនដី ដែល Sierra Space គ្រោងនឹងសាងសង់នៅក្នុងទសវត្សរ៍ខាងមុខ។

Sierra Space បានចុះកិច្ចព្រមព្រៀងជាមួយ Blue Origin ដើម្បីអភិវឌ្ឍស្ថានីយអវកាសឯកជនមួយដែលមានឈ្មោះថា Orbital Reef។ ក្រុមហ៊ុន Blue Origin មានបំណងប្រែក្លាយ Orbital Reef ទៅជាមជ្ឈមណ្ឌលពាណិជ្ជកម្មមួយនៅទីអវកាស ដោយមានសេវាកម្មផលិត អាជីវកម្ម កម្សាន្ត កីឡា និងទេសចរណ៍ផ្សងព្រេង។

កាលពីខែមុន NASA បានប្រគល់ថវិកាជាង ៤១៥ លានដុល្លារ ទៅឱ្យក្រុមហ៊ុនម៉ៅការចំនួន ៣ គឺ Blue Origin, Northrop Grumman និង Nanoracks ដើម្បីអភិវឌ្ឍស្ថានីយអវកាសពាណិជ្ជកម្មមួយចំនួនដែលវិស័យឯកជនធ្វើជាម្ចាស់កម្មសិទ្ធិ និងជាអ្នកគ្រប់គ្រង ក្នុងបំណងជំរុញកំណើនសេដ្ឋកិច្ចដែលដឹកនាំដោយ សហរដ្ឋអាម៉េរិក នៅលើគន្លងគោចរកម្រិតទាបរបស់ផែនដី នៅពេល ISS «ចូលនិវត្តន៍» នៅចុងទសវត្សរ៍នេះ។

ក្រុមវិស្វករសង្ឃឹមថា Dream Chaser នឹងបើកទំព័រសករាជថ្មីក្នុងវិស័យទេសចរណ៍អវកាស និងការស្រាវជ្រាវអវកាស។ ជើងហោះហើរដំបូងទៅកាន់ទីអវកាសរបស់ Dream Chaser អាចកើតឡើងនៅចុងឆ្នាំ ២០២២៕

January 8, 2022

«កុំសន្សំប្រាក់សម្រាប់កូនៗ មុនពេលសន្សំទ្រព្យសម្រាប់ខ្លួនឯង» នេះជាអនុសាសន៍របស់អតីតមេដឹកនាំមួយរូប នៃក្រុមហ៊ុនអាម៉េរិក JPMorgan

Anne Lester អតីតប្រធានផ្នែកដំណោះស្រាយសម្រាប់ការចូលនិវត្តន៍របស់ក្រុមហ៊ុន JPMorgan Asset Management បានលើកឡើងនូវអនុសាសន៍ចំនួន ៦ ប្រការដែលទាក់ទងនឹងការត្រៀមសម្រាប់អនាគត។

ក្នុងចំណោមអនុសាសន៍ទាំងនេះ យើងឃើញថា អនុសាសន៍ទី ៦ ដែលនិយាយអំពី «ការសន្សំប្រាក់សម្រាប់កូនៗ មុនការសន្សំទ្រព្យសម្រាប់ខ្លួនឯង» គឺជាប្រការគួរឱ្យចាប់អារម្មណ៍។

អ្នកស្រី Anne Lester លើកឡើងថា នៅពេលអ្នកបានក្លាយជាឪពុក ឬម្ដាយគេ អ្នកប្រាកដជាមានបំណងលើកយកតម្រូវការរបស់កូនៗ ដាក់ទៅក្នុងបញ្ជីអាទិភាព ជាជាងតម្រូវការរបស់ខ្លួន។ ប៉ុន្តែ ការសន្សំប្រាក់សម្រាប់បង់ថ្លៃសាលាមហាវិទ្យាល័យឱ្យកូនៗ នៅមុនការសន្សំប្រាក់សម្រាប់ដំណាក់កាលចូលនិវត្តន៍របស់ខ្លួន គឺជាកំហុសឆ្គងមួយដ៏ធំ។

អ្នកស្រី Anne Lester កាលនៅធ្វើការឱ្យ J.P.Morgan

«មានវិធីសាស្ត្រជាច្រើនសម្រាប់ការបង់ថ្លៃសាលានាពេលអនាគតរបស់កូនៗ ដូចជា ការចូលរួមប្រកួតប្រជែងយកអាហារូបករណ៍ និងការជ្រើសរើសសាលាដែលមានថ្លៃសិក្សាទាប ឬកម្ចីឥណទានជាដើម» អ្នកស្រី Anne Lester និយាយដូច្នេះ និងបន្តថា៖ «កូនម្នាក់របស់ខ្ញុំបានចូលសាកលវិទ្យាល័យសាធារណៈ ហើយមួយចំនួនទៀតបានទទួលអាហារូបករណ៍រៀននៅសាលាមួយចំនួន»។

ការសិក្សានាពេលអនាគតរបស់កូនៗ គឺមានវិធីជាច្រើនដើម្បីរកប្រាក់មកបង់ថ្លៃសាលា ប៉ុន្តែ ការចំណាយនៅក្នុងដំណាក់កាលចូលនិវត្តន៍របស់អ្នក ទំនងជាមិនមានវិធីសាស្ត្រច្រើននោះទេ ក្រៅតែពីការសន្សំទ្រព្យពេលខ្លួននៅមានសមត្ថភាពរកប្រាក់។

ក្រៅពីការណែនាំខាងលើ អតីតមេដឹកនាំមួយរូបរបស់ JPMorgan ក៏បានផ្ដល់អនុសាសន៍មួយចំនួនទៀត រួមមាន៖

១-គួរមានខ្ទង់សន្សំសម្រាប់បញ្ហាបន្ទាន់
២-គួរមានសេវាធានារ៉ាប់រងសុខភាព
៣-គួរទូទាត់បំណុលដែលមានការប្រាក់ខ្ពស់ឱ្យបានឆាប់
៤-គួរកុំទិញផ្ទះលើសពីតម្រូវការ
៥-គួរសកម្មក្នុងការសន្សំទ្រព្យសម្រាប់ដំណាក់កាលចូលនិវត្តន៍

January 6, 2022

(វីដេអូ)-ព្រែកជីកដែលមានជម្រៅជ្រៅបំផុតក្នុងពិភពលោក

(ប្រទេសក្រិក)-ព្រែកជីក Corinth មានជញ្ជាំងទាំងសងខាងខ្ពស់រហូតដល់ ៧៩ ម៉ែត្រ ចំណែកទទឹងវិញ មានកន្លែងខ្លះត្រឹមតែ ២0 ម៉ែត្រប៉ុណ្ណោះ។

Corinth គឺជាព្រែកដ៏ធំមួយដែលមនុស្សបានបង្កើតឡើង។ ជញ្ជាំងរបស់ព្រែកនេះមានកម្ពស់ ៧៩ ម៉ែត្រ ធ្វើឱ្យវាក្លាយជា ព្រែកដែលជ្រៅបំផុតក្នុងពិភពលោក។ ប៉ុន្តែ វាមានទទឹងត្រឹមតែ ២៥ ម៉ែត្រប៉ុណ្ណោះ ធ្វើឱ្យកប៉ាល់ធំៗ ពិបាកឆ្លងកាត់។

ព្រែកជីកនេះគឺជាផ្លូវទឹកដែលមានសារសំខាន់ខ្លាំងណាស់ សម្រាប់កប៉ាល់ជាង ១១,០០០ គ្រឿង ឆ្លងកាត់ក្នុង ១ ឆ្នាំ។

វិស្វករ Haris Saraglou នៅតែបន្តដើរត្រួតពិនិត្យ ដើម្បីធានាឱ្យបានប្រាកដថា ជញ្ជាំងរបស់ព្រែកជីកនេះនៅតែរឹងមាំ និងសុវត្ថិភាព។ លោក Haris Saraglou ថ្លែងថា Corinth គឺជាកន្លែងដែលសំខាន់ខ្លាំង ព្រោះវាជាច្រកទ្វារដែលនាំទៅកាន់ Peloponnese ហើយវាក៏ប្រសព្វមុខគ្នាជាមួយនឹងសមុទ្រ និងដីគោក។

នៅពេលការស្ថាបនាព្រែកជីក Corinth បានរួចរាល់កាលពីឆ្នាំ ១៨៩៣ ពេលនោះកប៉ាល់នានាមានទំហំតូចជាងកប៉ាល់នៅសម័យនេះឆ្ងាយណាស់។ បច្ចុប្បន្ន មានកប៉ាល់ធំៗជាច្រើនគ្រឿងធ្លាប់បានឆ្លងកាត់ព្រែកជីកនេះ ដោយកប៉ាល់ខ្លះស្ទើរតែមិនអាចជៀតចូលបាន។ ការធ្វើដំណើររបស់កប៉ាល់ធំៗទាំងនោះ គឺជាទិដ្ឋភាពដ៏អស្ចារ្យបំផុតមួយរបស់ប្រទេសក្រិក នៅពេលគេមើលពីលើទីខ្ពស់។

កាលពីខែតុលា ឆ្នាំ ២០១៩ កប៉ាល់ទេសចរណ៍ខ្នាតយក្សមួយ ប្រវែង ១៩៥ ម៉ែត្រ ដែលមានឈ្មោះថា Braemar បានធ្វើដំណើរឆ្លងកាត់ព្រែកជីក Corinth។ កប៉ាល់ដែលមានទម្ងន់ ២៤,៣៤៤ តោននេះ គឺជាកបាល់ធំបំផុតដែលធ្លាប់បានឆ្លងកាត់ផ្លូវទឹកដ៏ចង្អៀតនេះ។

ការមើលពីលើទីខ្ពស់ ជួយឱ្យយើងបានគយគន់ទិដ្ឋភាពដ៏អស្ចារ្យនេះ។ ចំណែកអ្នកបើកបរកប៉ាល់ខ្នាតយក្សដែលឆ្លងកាត់ព្រែកនេះក៏ត្រូវតែមានស្មារតីរឹងមាំទើបអាចទៅរួច។ ត្រង់កន្លែងចង្អៀតបំផុត ចន្លោះពីកប៉ាល់ទៅជញ្ជាំងទាំងសងខាង នៅសល់មិនដល់ ១ ម៉ែត្រនោះទេ។

ពេលកប៉ាល់ នាវាឆ្លងកាត់ព្រែកជីក Corinth មានន័យថា ពួកវាកំពុងតែសម្រេចបាននូវមហិច្ឆតាបុរាណមួយ ដែលត្រូវការពេលវេលាជាង ២,០០០ ឆ្នាំ ទើបអាចធ្វើបាន។ ជនជាតិក្រិកបុរាណ ចង់ជីកព្រែកនៅទីនេះ ព្រោះពួកគេដឹងច្បាស់ថា នេះគឺជាទីតាំងយុទ្ធសាស្ត្រដ៏សំខាន់។ ពួកគេអាចជំរុញសកម្មភាពជំនួញ និងរកបានផលប្រយោជន៍យ៉ាងច្រើនផ្សេងទៀតបើគិតអំពីវិធីសាស្ត្រអភិវឌ្ឍអារ្យធម៌។ ព្រែកជីក Corinth ត្រូវបានចាប់ផ្ដើមស្ថាបនាដោយអធិរាជរ៉ូម៉ាំង Nero កាលពីសតវត្សរ៍ទី១ ប៉ុន្តែ ស្ថាបត្យកម្មនេះត្រូវបានធ្វើឡើងដល់ត្រឹមដំណាក់កាលជីកកកាយដីផ្នែកខាងលើប៉ុណ្ណោះ ទ្រង់ក៏បានសោយទិវង្គត។

បន្ទាប់ពីធ្វើដំណើរបានចម្ងាយ ៦ គីឡូម៉ែត្រ ដែលហាក់ដូចមានការលំបាកខ្លាំង ចុងក្រោយ កប៉ាល់ Braemar ក៏បានរុលចូលទៅដល់ផ្នែកម្ខាងទៀតនៃព្រែកជីក Corinth៕

January 6, 2022

បាត់ «បណ្ណកម្មសិទ្ធិអចលនវត្ថុ ជិត ៤០០ សន្លឹក» ក្រសួងរៀបចំដែនដី ជូនដំណឹងបន្ទាន់ដើម្បីឱ្យមានការប្រុងប្រយ័ត្ន

ក្រសួងរៀបចំដែនដី នគរូបនីយកម្ម និងសំណង់ នាថ្ងៃទី ៦ មករានេះ បានចេញសេចក្ដីជូនដំណឹងមួយស្ដីពីការបាត់ វិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិ) ចំនួន ៣៩៩ សន្លឹក នៃភូមិព្រៃទទឹង ឃុំសំបួរ ស្រុកស្វាយទាប ខេត្តស្វាយរៀង។

ក្នុងសេចក្ដីជូនដំណឹងនេះ ក្រសួងរៀបចំដែនដី ក៏បានបញ្ជាក់ថា ក្រសួងសូមបដិសេធវិញ្ញាបនបត្រទាំងឡាយដែលបានបាត់ខាងលើ ដោយចាត់ជាអសារឥតការ។

ក្រសួងនេះក៏ស្នើឱ្យសាធារណជនមានការប្រុងប្រយ័ត្នខ្ពស់ផងដែរ ក្នុងការធ្វើកិច្ចសន្យាផ្សេងៗដែលទាក់ទងនឹងអចលនវត្ថុ ដូចជា ការទិញ-លក់ ការបង្កើតសិទ្ធិលើការបញ្ចាំ ជាដើម ដើម្បីចៀសវាងការធ្លាក់ក្នុងឧបាយកលរបស់ជនទុច្ចរិតដែលប្រើប្រាស់បណ្ណកម្មសិទ្ធិក្លែងក្លាយ បំណងទទួលបានប្រាក់កក់ ឬប្រាក់កម្ចី។ល។

ព័ត៌មានលម្អិត សូមអានសេចក្ដីប្រកាសរបស់ក្រសួងរៀបចំដែនដី នគរូបនីយកម្ម និងសំណង់ ដូចខាងក្រោម៖

January 6, 2022

ឪឡឹករាប់ពាន់តោន ត្រូវបានឈ្មួញបោះចោលក្បែរព្រំដែនចិន

ឪឡឹករាប់ពាន់តោន ត្រូវឈ្មួញបោះចោលតាមបណ្ដោយផ្លូវក្នុងទឹកដីនៃប្រទេសមីយ៉ានម៉ា ក្បែរព្រំដែនចិន ដោយសារតែវិធានការទប់ស្កាត់កូវីដ-១៩ ធ្វើឱ្យឡានដឹកទំនិញពី មីយ៉ានម៉ា មិនអាចចូលទៅក្នុងទឹកដីចិន។

ដងផ្លូវភ្ជាប់ពីទីក្រុង Ruili នៃខេត្ត Yunnan ដែលជាច្រកផ្លូវសំខាន់របស់ ចិន និង មីយ៉ានម៉ា បានកកស្ទះយ៉ាងណែន ដោយមានឡានដឹកទំនិញរាប់រយគ្រឿងកំពុងរង់ចាំនៅក្បែរស្ថានីយត្រួតពិនិត្យ នេះបើតាមសារព័ត៌មាន SCMP ចុះផ្សាយនាថ្ងៃទី ៦ មករា។

Lee Htay វ័យ ៦៥ ឆ្នាំ ដែលជាម្ចាស់ក្រុមហ៊ុនដឹកជញ្ជូនមួយ បានឱ្យដឹងថា៖ «មុនវិបត្តិអាសន្នរោគ ក្នុងមួយថ្ងៃ យើងនាំផ្លែឈើជាង ៥០០ តោន ចូលប្រទេសចិន ភាគច្រើនគឺ ឪឡឹក ត្រសក់ផ្អែម (honeydew lemon) ស្វាយ។ល។ ពេលនេះ ក្នុងមួយថ្ងៃ មានឡានមិនដល់ ១០ គ្រឿង ដែលអាចឆ្លងកាត់ច្រកព្រំដែន»។

«យើងត្រូវស្វែងរកវិធីដើម្បីនាំចេញទៅកាន់ប្រទេសដទៃ ឬលក់ក្នុងស្រុក ប៉ុន្តែ ត្រូវការពេលវេលា។ ក្នុងករណីភាគច្រើន យើងមានតែបោះចោលផ្លែឪឡឹក» លោក Lee Htay បន្ថែមដូច្នេះ និងបន្តថា យ៉ាងហោចណាស់មានឡានដឹកទំនិញចំនួន ២០០ គ្រឿងដែលដឹកផ្លែឈើ កំពុងកកស្ទះលើដងផ្លូវពី Mandalay ដែលជាទីក្រុងធំជាងគេទី២ របស់ មីយ៉ានម៉ា ភ្ជាប់ទៅកាន់ទីរួមស្រុក Musem។ នេះគឺជាផ្លូវសំខាន់ដែលភ្ជាប់ទៅទីរួមស្រុកមួយចំនួននៅ ប្រទេសចិន ដូចជា Wanding និង Ruili ជាដើម។

យោងតាមស្ថានទូតចិន ប្រចាំ មីយ៉ានម៉ា ទំហំនៃការនាំចេញ នាំចូលតាមច្រកព្រំដែន Wanding មានតម្លៃប្រហែល ២០០ លានយុន (៣១ លានដុល្លារអាម៉េរិក) នៅក្នុងខែធ្នូ ២០២១ ក្រោយការបើកច្រកព្រំដែនឡើងវិញបានមួយខែ ថយចុះជាង ៤០% ធៀបនឹងឆ្នាំមុន។ ស្ថានទូតចិន បានឱ្យដឹងដែរថា ការអនុវត្តវិធានការទប់ស្កាត់កូវីដ-១៩ គឺមានន័យថា ឡានដឹកទំនិញប្រមាណ ៤០ គ្រឿងប៉ុណ្ណោះ ដែលអាចត្រូវបានត្រួតពិនិត្យ និងអនុញ្ញាតឱ្យឆ្លងកាត់ច្រកព្រំដែននេះ នៅក្នុង ១ ថ្ងៃ៕

January 6, 2022

ក្រសួងអប់រំ ជូនដំណឹងស្ដីពីការបើកបវេសនកាលឆ្នាំសិក្សា ២០២១-២០២២

នៅថ្ងៃទី ៥ ខែមករា ឆ្នាំ ២០២២ នេះ ក្រសួងអប់រំ យុវជន និងកីឡា បានជូនដំណឹងស្ដីពីការបើកបវេសនកាលឆ្នាំសិក្សា ២០២១-២០២២ សម្រាប់គ្រឹះស្ថានសិក្សាចំណេះទូទៅ និងការបើកដំណើរការបង្រៀន និងរៀននៅកម្រិតមត្តេយ្យសិក្សា គ្រប់រូបភាព។

ព័ត៌មានលម្អិត សូមអានសេចក្ដីជូនដំណឹងខាងក្រោម៖

January 5, 2022

ប្រទេសអែលសាល់វ៉ាឌ័រ កំពុងរៀបចំផែនការបោះផ្សាយមូលបត្របំណុល Bitcoin

កាលពីថ្ងៃទី ៤ មករា រដ្ឋមន្ត្រីក្រសួងហិរញ្ញវត្ថុរបស់ អែលសាល់វ៉ាឌ័រ (El Salvador) លោក Alejandro Zelaya បានប្រកាសថា រដ្ឋាភិបាលប្រទេសអាម៉េរិកភាគកណ្ដាលនេះ នឹងបោះផ្សាយមូលបត្របំណុល Bitcoin នៅអំឡុងខែកុម្ភៈ និងខែមីនាខាងមុខ ដើម្បីប្រមូលទុនសម្រាប់គម្រោងសាងសង់ «ទីក្រុង Bitcoin» ដំបូងគេបង្អស់ក្នុងពិភពលោក។

ប្រភពព័ត៌មានពី អាម៉េរិកឡាទីន បានឱ្យដឹងថា រដ្ឋមន្ត្រី Zelaya ថ្លែងថា បើទោះជាការស្ទង់មតិលើក្រុមអ្នកវិនិយោគស្ដីអំពីលទ្ធភាពនៃតម្រូវការលើមូលបត្រនេះស្ថិតនៅក្នុងកម្រិតជាង ២០០ លានដុល្លារអាម៉េរិក ក៏ដោយ ក៏រដ្ឋាភិបាលអែលសាល់វ៉ាឌ័រ នៅតែរៀបផែនការបោះផ្សាយមូលបត្រ Bitcoin តម្លៃ ១ ពាន់លានដុល្លារ។ រដ្ឋមន្ត្រី Zelaya វាយតម្លៃថា ការបោះផ្សាយមូលបត្រ Bitcoin បានជោគជ័យ នឹងបើកផ្លូវឱ្យមានឱកាសសម្រាប់វិស័យហិរញ្ញវត្ថុថ្មី ទន្ទឹមនឹងការបន្តបោះផ្សាយមូលបត្រនៅលើទីផ្សារបច្ចុប្បន្ន។

កាលពីខែកញ្ញា ឆ្នាំ ២០២១ អែលសាល់វ៉ាឌ័រ បានក្លាយជាប្រទេសដំបូងគេក្នុងពិភពលោកដែលបានទទួលស្គាល់ប្រាក់ឌីជីថល Bitcoin ជាផ្លូវការសម្រាប់ការជួញដូរ បន្ទាប់ពីសភាប្រទេសនេះបានអនុម័តច្បាប់ Bitcoin កាលពីថ្ងៃទី ៩ មិថុនា ២០២១។

រដ្ឋមន្ត្រីក្រសួងហិរញ្ញវត្ថុរបស់ អែលសាល់វ៉ាឌ័រ លោក Alejandro Zelaya

យោងតាមច្បាស់នេះ Bitcoin ត្រូវបានប្រើប្រាស់ស្របច្បាប់ មិនមានកំណត់នៅក្នុងការជួញដូរណាមួយ និងចំពោះរាល់មុខតំណែងដែលរូបវន្តបុគ្គល និងនីតិបុគ្គលរបស់រដ្ឋ ឬឯកជនស្នើអនុវត្ត។ ទន្ទឹមនឹងនេះ ច្បាប់របស់ អែលសាល់វ៉ាឌ័រ ក៏បានកំណត់ថា ការជួញដូររវាង Bitcoin និងរូបិយវត្ថុដុល្លារអាម៉េរិក នឹងត្រូវបានធ្វើឡើងដោយ «សេរី ទៅតាមទីផ្សារ» ហើយនឹងមិនត្រូវជាប់ពន្ធលើទុនបន្ថែមដូចទៅនឹងប្រភេទរូបិយវត្ថុស្របច្បាប់ដទៃ៕

January 5, 2022

(វីដេអូ)-សង្ឃច្រើនអង្គ «រាំរែកតាមចង្វាក់ភ្លេងញាក់កន្ត្រាក់អារម្មណ៍» ដើម្បីលើកទឹកចិត្តសិស្ស និស្សិត

(ជប៉ុន)-លោកសង្ឃមួយអង្គ នាម Ryushin Takiyama បានចូលរួមបញ្ចេញក្បាច់រាំជាមួយនឹងបទភ្លេងកន្ត្រាក់អារម្មណ៍នៅឯវិហារ Ekoin ដើម្បីជាការលើកទឹកចិត្តដល់សិស្ស និស្សិតដែលត្រូវចូលប្រលងនៅមហាវិទ្យាល័យ។

អង្គគ្រូ Ryushin Takiyama រួមនឹងសិស្សជាច្រើននាក់របស់សាលាមធ្យមសិក្សា Koyasan ក្នុងខេត្ត Wakayama នៃប្រទេសជប៉ុន គ្រង និងស្លៀកពាក់ឈុតចីវរ និងរាំរែកទៅតាមចង្វាក់ Sutra Remix ដែលនិពន្ធដោយ Kenta Higashioji។

វីដេអូនេះបានចាប់ផ្ដើមដោយទេសភាពស្ងប់ស្ងាត់នៅឯវិហារ Ekoin ស្ថិតនៅលើភ្នំពិសិដ្ឋ Koya ក្នុងខេត្ត Wakayama។ ក្នុងទិដ្ឋភាព និងកាយវិការប្រកបដោយការសង្រួម ស្រាប់តែអង្គគ្រូ Takiyama បញ្ចេញក្បាចរាំទន្ទឹមនឹងចង្វាក់ភ្លេងយ៉ាងកន្ត្រាក់អារម្មណ៍ ជាមួយនឹងការរាំអមកំដររបស់ក្រុមនិស្សិត។

វីដេអូ ដែលត្រូវបានបង្ហោះលើ Youtube តាំបពីចុងខែធ្នូ ២០២១ បានធ្វើឱ្យមានការភ្ញាក់ផ្អើល និងទាក់ទាញអ្នកចូលមើលបានរាប់ម៉ឺនលើក។

ការសម្ដែងរបស់អង្គគ្រូ Takiyama ត្រូវបានពន្យល់ថា ជាអំណោយជំនួយស្មារតី លើកទឹកចិត្តដល់សិស្ស និស្សិតជប៉ុន ដែលត្រៀមខ្លួនសម្រាប់ការប្រលងចូលមហាវិទ្យាល័យនៅដើមឆ្នាំនេះ ហើយក៏ជាគម្រោងដែលសហការជាមួយក្រុមហ៊ុនផលិតស្ករគ្រាប់ក្នុងស្រុកមួយផងដែរ។

ព្រះគ្រូ Takiyama គឺជាស្ថាបនិករបស់គម្រោង «Koyasan x Dance» ដែលបង្កើតឡើងក្នុងបំណងចែករំលែកវប្បធម៌ ប្រវត្តិសាស្ត្រ និងជំនឿ Koyasan ទៅកាន់ពិភពលោក តាមរយៈសិល្បៈនៃការសម្ដែង។

ក្រៅពីវីដេអូខាងលើ ក្រុមហ៊ុនផលិតស្ករគ្រាប់ខាងលើនោះ ថែមទាំងបាននាំយកផលិតផលរបស់ពួកគេមកកាន់វិហារ Ekoin ដើម្បីពឹងសង្ឃអង្គនេះប្រសិទ្ធី និងចែកជូនសិស្ស និស្សិតដែលកំពុងត្រៀមប្រលងផងដែរ។ សិស្ស និស្សិតដំបូងគេចំនួន ២៤០ នាក់ ដែលមកកាន់វិហារនេះ សុទ្ធតែទទួលបានស្ករគ្រាប់ ១ ថង់ ដែលត្រូវគេចាត់ទុកថាជាវត្ថុស័ក្ដិសិទ្ធសម្រាប់ការប្រលងនាពេលខាងមុខ៕

January 5, 2022

Category: សង្គម និងសេដ្ឋកិច្ច