សង្គម និងសេដ្ឋកិច្ច - La Reine Media

ប្រទេសជាប់របងជាមួយ កម្ពុជា អនុញ្ញាតឱ្យប្រើប្រាស់រូបិយវត្ថុឌីជីថល ក្នុងការទូទាត់មួយចំនួន

ប្រទេសនេះ ទើបតែបានអនុញ្ញាតឱ្យក្រុមហ៊ុនចំនួន ២ ដែលផ្ដល់សេវាទិញដូរ និងគក់ជេរ ទូទាត់ប្រាក់ដោយប្រើប្រាស់រូបិយវត្ថុ និងទ្រព្យសម្បត្តិឌីជីថលផ្សេងទៀត សម្រាប់ប្រជាជនក្នុងប្រទេស និងក្នុងតំបន់។

ជាស្ដែង ធនាគារកណ្ដាលរបស់ ប្រទេសឡាវ (BOL) បានអនុញ្ញាតឱ្យក្រុមហ៊ុន Lao Digital Assets Exchange (LDX) ដែលជាក្រុមហ៊ុនបណ្ដាក់ទុនរួមរវាង AIF, Phongsupthavy និង Bitqik ដែលជាក្រុមហ៊ុនបុត្រសម្ព័ន្ធរបស់ Simuong ផ្ដល់សេវាទូទាត់ប្រាក់ឌីជីថល។

LDX និង Bitqik គឺជាក្រុមហ៊ុនតែ ២ គត់ ដែលស្ថិតក្រោមការគ្រប់គ្រងរបស់ រដ្ឋាភិបាលឡាវ ត្រូវបានអនុញ្ញាតឱ្យផ្ដល់សេវាទូទាត់ក្នុងការទិញដូរ និងគក់ជេរដោយប្រើប្រាស់ប្រាក់ឌីជីថល រួមនឹងបណ្ដាទ្រព្យឌីជីថលដទៃទៀតសម្រាប់ប្រជាជនក្នុងប្រទេសឡាង និងក្នុងតំបន់។

ប្រកាសមួយរបស់ក្រុមហ៊ុន AIF បង្ហាញថា ក្រុមហ៊ុន LDX និង Bitqik គ្រោងនឹងផ្ដល់សេវាកម្មពេញលេញចាប់ពីខែមេសា ២០២២។

ជាមួយនឹងការអនុញ្ញាតខាងលើនេះ ក្រុមអ្នកវិនិយោគក្នុងវិស័យទ្រព្យ ប្រាក់ឌីជីថល ដូចជា Bitcoin និង Ethereum ជាដើម នឹងមានលក្ខណសម្បត្តិគ្រប់គ្រាន់ក្នុងការប្រើប្រាស់គណនីធនាគារក្នុងស្រុក ជំនួសឱ្យការពឹងលើតែធនាគារបរទេស ឬប័ណ្ណឥណទាននៅពេលទូទាត់ប្រាក់ទៅកាន់ប្រទេសក្រៅ។

យោងតាមសារព័ត៌មាន Xinhua លោក Sonexay Sitphaxay អគ្គនាយកធនាគារកណ្ដាលរបស់ ឡាវ បានឱ្យដឹងថា BOL បានចំណាយពេលយ៉ាងយូរ និងធនធានមនុស្សជាច្រើនសម្រាប់ការដេញថ្លៃទៅតាមច្បាប់កំណត់៕

January 21, 2022

ហត្ថលេខារបស់មហាសេដ្ឋីអាម៉េរិក Bill Gates បង្កប់អត្ថន័យស្ដីពី «ពិភពរាសីរុងរឿង»

របៀបចុះហត្ថលេខារបស់មហាសេដ្ឋីអាម៉េរិក លោក Bill Gates ត្រូវបានអ្នកជំនាញវាយតម្លៃថា ប្រកបដោយហុងស៊ុយល្អ នាំមកនូវសំណាងខ្ពស់។

មិនថាអក្សរសរសេរ ឬស៊ីញេនោះទេ គឺដូចទៅនឹងក្រយៅដៃ៖ ពុំមានមនុស្ស ២ នាក់ ដែលសរសរ ឬចុះហត្ថលេខាដូចគ្នាទាំងស្រុងឡើយ។ ក្រុមអ្នកវិភាគហត្ថលេខា អះអាងថា យើងអាចយល់បានអំពីចរឹត របៀបរបបធ្វើការ ឬក៏ស្ថានភាពអារម្មណ៍របស់មនុស្ស ដោយការពិនិត្យមើលទម្រង់អក្សរ ឬហត្ថលេខារបស់ពួកគេ។

Kathi McKnight និង Elaine Charal គឺជាមនុស្សល្បីឈ្មោះនៅក្នុងចំណោមអ្នកវិភាគលើទម្រង់អក្សរសរសេរដោយដៃ។ កាលពីប៉ុន្មានឆ្នាំមុន ពួកគេក៏បានវិភាគហត្ថលេខារបស់មហាសេដ្ឋី Bill Gates។

ខាងក្រោមនេះគឺជាការយល់ឃើញរបស់ពួកគេចំពោះស៊ីញេ របស់មហាសេដ្ឋីលំដាប់ទី ៤ ក្នុងពិភពលោក៖

McKnight៖ «សញ្ញាគូសទទឹងអក្សរ «T» នៅក្នុងហត្ថលេខារបស់គាត់ (Bill Gates) ត្រូវបានសរសេរយ៉ាងមានសណ្ដាប់ធ្នាប់ និងដាច់ខាត។ ប្រការនេះបង្ហាញថា គាត់គឺជាមនុស្សដែលមានការប្ដេជ្ញាចិត្តខ្ពស់។ ប៉ុន្តែ ផ្នែកដែលមិនជាប់គ្នានៅលើអក្សរ «T» ក៏បង្ហាញថា មាន «ភាពរសើបខ្លាំង» ជាមួយនឹងការរិះគន់។ ដូច្នេះ នៅក្នុងការចរចា ឬពិភាក្សាជាមួយគាត់ ដៃគូទាំងឡាយគួរតែប្រើពាក្យពេចន៍ឱ្យបានសមស្របដើម្បីចៀសវាងការសង្ស័យថា មានគំនិតមិនល្អ។

ទម្រង់នៃអក្សរ «l» ទាំង ២ ស្ដែងឱ្យឃើញថា គាត់មិនមែនជាមនុស្សមមើមមៃ។ គ្រប់យ៉ាងត្រូវបានគាត់ពិនិត្យយ៉ាងជាក់ស្ដែង»។

អ្នកទំនងជាមិនបានដឹងថា លោក Bill Gates មានហត្ថលេខាដល់ទៅ ។ ខាងក្រោមនេះគឺជាការយល់ឃើញរបស់អ្នកវិភាគ ចំពោះស៊ីញេទី ២ របស់គាត់៖

McKnight៖ ហត្ថលេខាណាក៏ដោយ ដែលត្រូវបានសរសេរឈ្មោះពេញ ដូចក្នុងស៊ីញេនេះ គឺសុទ្ធតែបង្ហាញថា ម្ចាស់ហត្ថលេខាគោរពយ៉ាងខ្ជាប់ខ្ជួនទៅតាមស្ដង់ដារួម។ ទម្រង់អក្សរ «S» បញ្ជាក់ថា គាត់ពិតជាមានមោទកភាពលើខ្លួនឯង និងមានថាមពលប្រមូលផ្ដុំខ្លាំងក្លាបំផុត»។

ចំណែកអ្នកវិភាគ Charal យល់ថា៖ «ហត្ថលេខាទាំង ២ របស់ Bill Gates សុទ្ធតែងាយស្រួលអាន និងដឹងបាន។ ប្រការនេះបញ្ជាក់ថា គាត់ជាមនុស្សស្មោះត្រង់។ ទន្ទឹមនឹងនេះ វាក៏បង្ហាញថា គាត់តែងតែកំណត់គោលដៅ និងការរំពឹងទុកខ្ពស់។ ទាំង ២ នេះ មើលទៅសុទ្ធតែប្រាកដប្រជា ដែលបញ្ជាក់ថា គាត់ជាមនុស្សប្រកាន់ខ្ជាប់។ ក្រៅពីនេះ ហត្ថលេខាដែលពេញលេញ ស្ដែងឱ្យឃើញថា គាត់ជាមនុស្សប្រឹងប្រែង ព្យាយាម ក៏ដូចជាការដែលតែងតែស្វែងរកវិធីដើម្បីឈានដល់គោលដៅដែលបានកំណត់៕

January 21, 2022

បច្ចេកវិទ្យា mRNA ដែលប្រើសម្រាប់ការអភិវឌ្ឍវ៉ាក់សាំងទំនើបចុងក្រោយ ប្រឆាំង កូវីដ-១៩ ឈ្នះពានរង្វាន់កំពូល VinFuture តម្លៃ ៣ លានដុល្លារ របស់ក្រុមហ៊ុនវៀតណាម

ការសិក្សាស្រាវជ្រាវរបស់អ្នកវិទ្យាសាស្ត្រ ត្រូវបានលើកតម្កើងព្រោះតែបង្កើតបានបច្ចេកវិទ្យា mRNA ដែលជាវិធីអភិវឌ្ឍវ៉ាក់សាំងប្រភេទទំនើបសម្រាប់ទប់ស្កាត់ជំងឺកូវីដ-១៩ ក៏ដូចជាជំងឺដទៃ នាំមកនូវប្រយោជន៍ដល់មនុស្សលោក។

VinFuture Grand Prize ដែលជាពានរង្វាន់ធំបំផុត ត្រូវបានប្រគល់ជូនដល់ក្រុមអ្នកវិទ្យាសាស្ត្រដែលនៅពីក្រោយជោគជ័យរបស់វ៉ាក់សាំងប្រភេទ mRNA ដែលប្រើសម្រាប់ទប់ស្កាត់កូវីដ-១។ ក្រុមអ្នកវិទ្យាសាស្ត្រដែលនៅពីក្រោយបច្ចេកវិទ្យា mRNA នេះ រួមមាន «ម្ដាយបង្កើត» របស់ mRNA លោកស្រីវេជ្ជបណ្ឌិត Katalin Kariko ដែលជាអ្នកវិទ្យាសាស្ត្រជនជាតិហុងគ្រី ប្រចាំក្រុមហ៊ុន BioNTech, សាស្ត្រាចារ្យ Drew Weissman អ្នកវិទ្យាសាស្ត្រស្រាវជ្រាវវ៉ាក់សាំងប្រចាំសាកលវិទ្យាល័យ Pennsylvania និងសាស្ត្រាចារ Pieter Rutter Cullis ប្រធានវិទ្យាស្ថានជីវវិទ្យានៃសាកលវិទ្យាល័យ British Columbia។

សាស្ត្រាចារ្យ Pieter Rutter Cullis គឺជាអ្នកមានស្នាដៃចំពោះការស្រាវជ្រាវក្នុងការអភិវឌ្ឍគ្រាប់ណាណូលីភីដ (LNP) សម្រាប់ «ខ្ចប់» RNA និងការពារវាពីការចុះខ្សោយ អនុញ្ញាតឱ្យ mRNA ត្រូវបានបញ្ជូនដល់កោសិកា។ នៅទីនេះ mRNA «ណែនាំ» ឱ្យកោសិកាបង្កើតប្រូតេអ៊ីនដែលទាក់ទងនឹងវីរុសបង្កជំងឺ ជួយឱ្យវ៉ាក់សាំងដំណើរការ។ ប្រការនេះបានបើកផ្លូវឱ្យមានវិស័យវិទ្យាសាស្ត្រថ្មីមួយ និងវិធីសាស្ត្រថ្មីក្នុងការផលិតវ៉ាក់សាំង mRNA សម្រាប់ទប់ស្កាត់កូវីដ-១។ល។

«ម្ដាយបង្កើត» របស់ បច្ចេកវិទ្យា mRNA លោកស្រីវេជ្ជបណ្ឌិត Katalin Kariko (កណ្ដាល), សាស្ត្រាចារ្យ Drew Weissman (ស្ដាំ) និង សាស្ត្រាចារ Pieter Rutter Cullis

ចំណែកសាស្ត្រាចារ្យ Katalin Karriko វិញ ផ្ដោតទៅលើការស្រាវជ្រាវ ARN ព័ត៌មាន (mRNA) ជាសម្ភារៈហ្សែនដែលផ្ទុកការណែនាំ DNA សម្រាប់ឱ្យប្រព័ន្ធបង្កើតប្រូតេអ៊ីនក្នុងកោសិកានីមួយ។ លោកស្រីជឿថា mRNA អាចប្រើប្រាស់ដើម្បីណែនាំកោសិកាឱ្យផលិតថ្នាំ រួមទាំងវ៉ាក់សាំង តាមចិត្តចង់។

អ្នកវិទ្យាសាស្ត្រទី ៣ នៃគម្រោងស្រាវជ្រាវដែលទទួលបានពានរង្វាន់ខាងលើ គឺសាស្ត្រាចារ្យ Drew Weissman ដែលជាអ្នកឯកទេសផ្នែកជំងឺឆ្លងប្រចាំសាកលវិទ្យាល័យ Pennsylvania (សហរដ្ឋអាម៉េរិក)។ លោកបានចំណាយពេលជាង ១៥ ឆ្នាំ ក្នុងការស្រាវជ្រាវអំពី RNA ក្នុងបំណងបង្កើតវ៉ាក់សាំងទាំងឡាយដែលអាចទប់ស្កាត់ និងព្យាបាលជំងឺគ្រប់ប្រភេទ។

ជារដូវកាលដំបូង ពានរង្វាន់ VinFuture បានទាក់ទាញចំណាប់អារម្មណ៍របស់សហគមន៍អ្នកវិទ្យាសាស្ត្រទូទាំងសកលលោក។ គម្រោងស្រាវជ្រាវចំនួន ៦០០ មកពីប្រទេសចំនួន ៧០ បានចូលរួមប្រកួតប្រជែងយកពានរង្វាន់នេះ។ ពានរង្វាន់ធំជាងគេ VinFuture Grand Prize មានតម្លៃ ៣ លានដុល្លារអាម៉េរិក ចំណែកពានរង្វាន់ពិសេសចំនួន ៣ ទៀត មានតម្លៃ ៥០០,០០០ ដុល្លារ/រង្វាន់។

មហាសេដ្ឋីវៀតណាម លោក ហ្វាម ញឹត វឿង (Pham Nhat Vuong)

VinFuture គឺជាពានរង្វាន់វិទ្យាសាស្ត្រ និងបច្ចេកវិទ្យាសកល ដែលត្រូវបានបង្កើតឡើងកាលពីឆ្នាំ ២០២០ ដោយមូលនិធិ VinFuture របស់មហាសេដ្ឋីវៀតណាម លោក Pham Nhat Vuong ដែលជាស្ថាបនិក និងជាប្រធានក្រុមហ៊ុនខ្នាតយក្ស Vingroup។

January 21, 2022

អាថ៌កំបាំងដែលនាំឱ្យក្រុមហ៊ុនផលិតរថយន្តអគ្គិសនីមួយនៅប្រទេសចិន «ជោគជ័យខ្លាំង» និងធ្វើឱ្យ Tesla ព្រួយបារម្ភ

ល្បឿននៃការផលិតរថយន្តអគ្គិសនី Xpeng មាន លឿនជាង Tesla ទ្វេដង និងធ្លាប់ធ្វើឱ្យក្រុមហ៊ុនផលិតរថយន្តរបស់មហាសេដ្ឋី Elon Musk ជំរុញល្បឿនសាងសង់រោងចក្រនៅ ប្រទេសចិន ដើម្បីបង្កើនការប្រកួតប្រជែង។

ក្រុមហ៊ុនផលិតរថយន្តអគ្គិសនី Xpeng ត្រូវបានបង្កើតឡើងកាលពីឆ្នាំ ២០១៤ ដោយលោក He Xiaopeng ដែលជាអ្នកជំនួញល្បីម្នាក់ ក្នុងវិស័យព័ត៌មានវិទ្យានៅ ប្រទេសចិន។ មុនពេលបង្កើត Xpeng លោក Xiaopengគឺជាសហស្ថាបនិករបស់ UC Browser ដែលជាកម្មវិធីរុករកលើបណ្ដាញអ៊ីនធើណិត។ ក្រោយពីក្រុមហ៊ុនធុរកិច្ចថ្មីនេះត្រូវបាន Alibaba ទិញ លោក Xiaopeng ក៏បានកាន់កាប់តំណែងប្រធានផ្នែកអាជីវកម្មទូរស័ព្ទចល័តរបស់ក្រុមហ៊ុននេះ។

ក្រុមហ៊ុន Xpeng មានមូលដ្ឋាននៅខេត្តក្វាងចូវ ប្រទេសចិន និងការិយាល័យតំណាងនៅ Mountain View (សហរដ្ឋអាម៉េរិក)។ ក្រុមមេដឹកនាំជាន់ខ្ពស់រួមមាន ក្រុមអតីតបុគ្គលិករបស់ Guangzhou Auto នៅប្រទេសចិន, Ford, BMW និងបុគ្គលិកមកពី Tesla។

ក្រៅពីនេះ Xpeng ក៏ថែមទាំងទាក់ទាញបានបុគ្គលិកមកពីបណ្ដាក្រុមហ៊ុនបច្ចេកវិទ្យាធំៗ ដូចជា Xiaomi, Tencent, Samsung និង Huawei ផងដែរ ដើម្បីបង្កើនការប្រកួតប្រជែងនៅក្នុងបច្ចេកវិទ្យារថយន្តឆ្លាតវៃ។

He Xiaopeng ធ្លាប់បានប្រកាសថា ខ្លួនគឺជា «អ្នកគាំទ្រដ៏ខ្លាំងក្លា» របស់ Tesla ហើយ Xpeng ក៏ត្រូវបានបង្កើតឡើងដោយយោងទៅតាមអារម្មណ៍ទាក់ទាញរបស់ Tesla។

ឆ្នាំ ២០១៤ Elon Musk បានប្រកាសជាសាធារណៈនូវប័ណ្ណប៉ាតង់ជាង ២០០ របស់ Tesla ដើម្បីឱ្យគ្រប់គ្នាបានមើល។ «មូលហេតុមួយដែលនាំឱ្យ Xpeng ត្រូវបានបង្កើតឡើងគឺដោយសារ CEO របស់ Tesla ប្រកាសបង្ហាញប័ណ្ណប៉ាតង់។ Tesla បានជះឥទ្ធិពលដ៏ខ្លាំងក្លាដល់ខ្ញុំ» He Xiaopeng និយាយដូច្នេះ។

មិនត្រឹមតែការស្រាវជ្រាវលើប័ណ្ណប៉ាតង់របស់ Tesla នោះទេ Xiaopeng ថែមទាំងឱ្យបុគ្គលិករបស់ខ្លួន «ពុះបំបែក» រថយន្ត Tesla ជាច្រើនគ្រឿងទៀតផងដើម្បីជួយដល់ការអភិវឌ្ឍរថយន្តអគ្គិសនីដោយឡែករបស់ខ្លួន។

ឆ្នាំ ២០១៨ Xpeng ប្រមូលទុនបាន ៦០០ លានដុល្លារ ពី Alibaba និងអ្នកវិនិយោគផ្សេងៗ ហើយក្រុមហ៊ុននេះក៏ត្រូវបានកំណត់តម្លៃឡើងដល់ជិត ៤ ពាន់លានដុល្លារអាម៉េរិក បើទោះជាក្រុមហ៊ុននេះមិនទាន់បានលក់ចេញសូម្បីតែ ១ គ្រឿង ហើយជាងនេះទៀត Xpeng កាលណោះក៏មិនទាន់មានរោងចក្រ និងមិនទាន់ទទួលបានការអនុញ្ញាតឱ្យផលិតនៅឡើយ។

ក្នុងឆ្នាំដដែល បើទោះមិនទាន់បានដាក់លក់ជាផ្លូវការ ប៉ុន្តែ Xpeng បានយកឈ្នះលើ Tesla នៅក្នុងទីផ្សារក្នុងស្រុក។ ពួកគេទទួលបានការបញ្ជាទិញរហូតដល់ ៦,០០០ គ្រឿង។ ជោគជ័យមួយផ្នែករបស់ Xpeng គឺដោយសារមានទុនគាំទ្រពីបណ្ដាក្រុមហ៊ុនខ្នាតយក្ស ដូចជា Alibaba, Foxconn និង Xiaomi ជាដើម។

ចុងឆ្នាំ ២០២១ Xpeng បានឱ្យដឹងថា ពួកគេផលិតរថយន្តអគ្គិសនីបាន ១០០,០០០ គ្រឿង ក្រោយបង្កើតក្រុមហ៊ុននេះបាន ៦ ឆ្នាំ។ ចំណែក Tesla វិញ ត្រូវចំណាយពេលរហូតដល់ ១២ ឆ្នាំ ទើបផលិតបានស្មើនឹងបរិមាណនេះ។

Tesla ចំណាយពេលជិត ៦ ឆ្នាំ (២០០៣-២០០៨) ដើម្បីបញ្ចេញរថយន្តដំបូង (Roadster) ខណៈដែល Xpeng ចំណាយតែ ៣ ឆ្នាំ ដើម្បីបញ្ចេញរថយន្តដំបូងរបស់ខ្លួនគឺ ម៉ូដែល G3 ដែលត្រូវគេយល់ថា មានចំណុចជាច្រើនដែលដូចទៅនឹង Model 3 របស់ Tesla។

សរុបមក គេអាចនិយាយបានថា ដោយសារតែយកតម្រាប់តាមអ្នកដើរមុន (Tesla) ទើប Xpeng អាចផលិត រថយន្តអគ្គិសនី បានលឿនដូច្នេះ៕

January 20, 2022

ស្រឡាងឆ្លាតវៃខ្នាតយក្សដំណើរការស្វ័យប្រវត្តនៅលើផ្ទៃសមុទ្រចម្ងាយ ២៤០ គីឡូម៉ែត្រ

ស្រឡាង Soleil បណ្ដោយ ២២២ ម៉ែត្រ អាចធ្វើដំណើរក្នុងល្បឿន ៤៨ គីឡូម៉ែត្រ/ម៉ោង និងមានសមត្ថភាពចូលចតដោយមិនបាច់មានមនុស្សជួយ ត្រូវបានដាក់ឱ្យដំណើរការសាកល្បងដោយជោគជ័យ នៅលើផ្ទៃសមុទ្រ Iyonada។

ស្រឡាងដែលមានឈ្មោះថា Soleil ជាស្រឡាងដឹកយានយន្តស្វ័យប្រវត្តិដំបូងគេបង្អស់របស់ពិភពលោក និងត្រូវបានដាក់ឱ្យដំណើរការសាកល្បងកាលពីថ្ងៃទី ១៧ មករា គឺជាជលយានដែលស្ថិតក្នុងគម្រោងស្រឡាងសមុទ្រឆ្លាតវៃត្រូវបានអភិវឌ្ឍដោយក្រុមហ៊ុន Mitsubishi និង Shin Nihonkai។

គម្រោងស្រឡាងនេះគឺជាផ្នែកមួយនៃមហាគម្រោង «ប្រព័ន្ធកំណត់ទិសស្វ័យប្រវត្ត Meguri ២០៤០» របស់អង្គការ Nippon Founation។

Soleil ដំណើរការជាលើកដំបូងកាលពីថ្ងៃទី ១ កក្កដា ២០២១ និងត្រូវបានបញ្ជាដោយក្រុមនាវិក។ ក្នុងដំណើរទៅ-មកច្រើនលើករវាងតំបន់ Shinmoji និង Iyonada ដែលមានរយៈចម្ងាយ ២៤០ គីឡូម៉ែត្រ ប្រព័ន្ធកំណត់ទិសស្វ័យប្រវត្ត Super Bridge-X របស់ស្រឡាង បានប្រមូលទិន្នន័យទាំងអស់ទាក់ទិននឹងផ្លូវត្រូវធ្វើចរាចរណ៍។ ការបើកដំណើរការសាកល្បងកាលពីថ្ងៃទី ១៧ មករាកន្លងទៅ គឺជាលើកទី ១ ហើយដែលប្រព័ន្ធស្វ័យប្រវត្ត (Soleil) នេះដំណើរការតែឯង ដោយមិនមានក្រុមនាវិកបញ្ជា។ ក្នុងការសាកល្បងនេះ Soleil ធ្វើដំណើរក្នុងល្បឿន ៤៨ គីឡូម៉ែត្រ/ម៉ោង។

ស្រឡាង Soleil ត្រូវបានបំពាក់បច្ចេកវិទ្យាកំណត់ទិស, ប្រព័ន្ធកាមេរ៉ាអ៊ីនហ្វ្រារ៉េដ៏ទំនើប, ប្រព័ន្ធគ្រប់គ្រងម៉ាស៊ីន, ប្រព័ន្ធចូលចត-ចាកចេញពីកំពង់ផែស្វ័យប្រវត្ត។ល។

January 20, 2022

ទីក្រុងដំបូងគេបង្អស់នៅ សហរដ្ឋអាម៉េរិក ដែលហាមឃាត់ការសាងសង់ស្ថានីយប្រេងសាំងថ្មី

នៅចំពោះមុខឥទ្ធិពលនៃការប្រែប្រួលអាកាសធាតុ Petaluma បានលើកឡើងនូវការសម្រេចចិត្តជាប្រវត្តិសាស្ត្រមួយ នោះគឺការហាមឃាត់ការសាងសង់ស្ថានីយប្រេងសាំងថ្មី នៅទូទាំងទីក្រុង។

ដូចទៅនឹងតំបន់ដទៃទៀតនៅ សហរដ្ឋអាម៉េរិក វិបត្តិអាកាសធាតុកំពុងតែប្រែប្រួលយ៉ាងលឿននៅ Petaluma។ ទីក្រុង Petaluma របស់រដ្ឋ California ដែលមានចម្ងាយពី San Francisco ប្រហែល ៦៤ គីឡូម៉ែត្រ ទៅទិសខាងជើង កំពុងជួបបញ្ហាធ្ងន់ធ្ងន់ស្ដីពីប្រភពទឹក ដោយសារតែគ្រោះរាំងស្ងួត។ ក្នុងរយៈពេល ៧ ឆ្នាំកន្លង ទីនេះមានករណីភ្លើងឆេះព្រៃធំៗចំនួន ៥ លើក ក្នុងចំណោម ១៣ លើកដែលមានទំហំធំជាងគេបង្អស់ក្នុងប្រវត្តិសាស្ត្ររបស់រដ្ឋ California។

ដើម្បីទប់ទល់នឹងវិបត្តិនេះ រដ្ឋបាលក្រុង Petaluma បានដាក់ចេញនូវការសម្រេចចិត្តជាប្រវត្តិសាស្ត្រ នោះគឺបទបញ្ជាហាមឃាត់ការសាងសង់ស្ថីយប្រេងសាំងថ្មី ចាប់ពីខែមីនា ២០២១ ធ្វើឱ្យទីក្រុងនេះក្លាយជាទីក្រុងដំបូងគេនៅ សហរដ្ឋអាម៉េរិក ដែលបានធ្វើដូច្នេះ។

ក្រុមមន្ត្រីជឿថា សណ្ឋានដីរាបស្មើ នឹងជួយឱ្យទីក្រុង Petaluma អាចអនុវត្តយុទ្ធសាស្ត្រសម្រាប់អ្នកថ្មើរជើង និងអ្នកជិះកង់នាពេលអនាគត

បច្ចុប្បន្ន ទីក្រុង Petaluma មានស្ថានីយប្រេងសាំងចំនួន ១៦ កន្លែង ដែលកំពុងធ្វើសកម្មភាព។ ក្រៅពីកត្តាអាកាសធាតុ នៅមានកត្តាមួយផ្សេងទៀតដែលរួមចំណែកជួយជំរុញឱ្យ Petaluma ងាយស្រួលចេញបទបញ្ជានេះ គឺដោយសារដីភាគច្រើននៅក្នុងទីក្រុងមានសណ្ឋានរាបស្មើ ងាយស្រួលដល់ការធ្វើដំណើរដោយថ្មើរជើង និងជិះកង់៕

January 20, 2022

តាំងពីទើបកើត ត្រូវឪពុកម្ដាយលក់ឱ្យអ្នកដទៃ ប៉ុន្តែ ដល់ពេលបានរកឃើញឪពុកម្ដាយបង្កើតវិញ ក៏ត្រូវបានបោះបង់ចោលជាថ្មី

(ប្រទេសចិន)-ឪពុកម្ដាយរបស់ Liu Xuezhou ដែលជាក្មេងប្រុសជំទង់វ័យ ១៧ ឆ្នាំ នៅខេត្ត Hebei បានលក់កូនឱ្យអ្នកដទៃតាំងតែពីកូនទើបចាប់កំណើត ហើយបន្ត «ទាត់កូនចោល» នៅពេលកូនបានរកឃើញពួកគេ។

ក្នុងសារដែលបានបង្ហោះលើបណ្ដាញសង្គមកាលពីថ្ងៃទី ១៧ មករា Liu Xuezhou បានឱ្យដឹងថា ខ្លួនបានកើតក្នុងឆ្នាំ ២០០៥ មុនពេលឱពុកម្ដាយបានរៀបការ ហើយក៏ត្រូវបានលក់ឱ្យទៅអ្នកដទៃដើម្បីយកប្រាក់មករៀបការនឹងគ្នា។ តាមរយៈមនុស្សម្នាក់ Liu ក៏មានគ្រួសារថ្មី និងត្រូវបានឪពុកម្ដាយធម៌ ចិញ្ចឹម បីបាច់រក្សា។ ប៉ុន្តែ ជាអកុសល ឪពុកម្ដាយធម៌របស់ Liu ក៏បានស្លាប់នៅក្នុងហេតុការណ៍ផ្ទុះមួយ នៅពេលដែល Liu មានអាយុទើបតែ ៤ ឆ្នាំ។

ក្រោយមក Liu ត្រូវបានលោកតា និងលោកយាយ រួមនឹងញាតិខាងឪពុកម្ដាយធម៌ ជួយគ្នាចិញ្ចឹម។ នៅក្នុងវ័យ ១៧ ឆ្នាំ Liu បច្ចុប្បន្នគឺជានិស្សិតឆ្នាំទី ២ នៃសាកលវិទ្យាល័យមួយ នៅទីក្រុង Shijiazhuang ខេត្ត Hebei របស់ ប្រទេសចិន និងបានធ្វើការងារមួយចំនួនក្នុងរយៈពេលប៉ុន្មានឆ្នាំមកនេះ។ Liy រស់នៅដោយមានការផ្គត់ផ្គង់ជំនួយពីរដ្ឋាភិបាលសម្រាប់កុមារកំព្រា។

កាលពីដើមខែមុន Liu បានសម្រេចចិត្តស្វែងរកឪពុកម្ដាយបង្កើត តាមរយៈការបង្ហោះសារនៅលើបណ្ដាញសង្គម។ មួយសប្ដាហ៍ក្រោយមក ប៉ូលីសខេត្ត Shanxi ក៏បានរកឃើញថា បុរសដែលមានឈ្មោះថា Ding Shuangquan គឺជាឪពុកបង្កើតរបស់ Liu។

អាជ្ញាធរក្នុងតំបន់ កាលពីចុងខែកន្លង បានប្រារព្ធពិធីជួបជុំរវាង Liu និង Ding។ កាលពី ១ សប្ដាហ៍កន្លងទៅ Liu ក៏បានជួបម្ដាយបង្កើតរបស់ខ្លួននៅតំបន់ ម៉ុងហ្គោលីខាងក្នុង (Inner Mongolia)។ ប៉ុន្តែ បន្ទាប់ពីពិធីជួបជុំឪពុកម្ដាយ Liu ក៏ត្រូវបានឪពុកម្ដាយបង្កើតបោះបង់ម្ដងទៀត។

Liu បានរៀបរាប់ថា ឪពុកម្ដាយបង្កើតសុទ្ធតែមិនទទួលយករូបខ្លួន ព្រោះពួកគេបានលែងលះ និងសុទ្ធតែមានគ្រួសារថ្មីរៀងៗខ្លួន។ ទាំងម្ដាយ ទាំងឪពុក សុទ្ធតែបានស្នើឱ្យ Liu នៅឱ្យឆ្ងាយពីពួកគេ ដោយសារតែយល់ថា វត្តមានរបស់ Liu ធ្វើឱ្យជីវភាពរបស់ពួកគេត្រូវច្របូកច្របល់។ ពុំមានអ្នកណាម្នាក់ព្រមជួយផ្គត់ផ្គង់ប្រាក់កាសដល់ Liu ព្រោះតែក្មេងជំទង់នេះជិតពេញវ័យ។

Liu Xuezhou ឱ្យដឹងថា ឪពុកម្ដាយបង្កើតគ្រាន់តែយល់ព្រមជួបមុខកូន ក៏ដោយសារតែសម្ពាធពីសាធារណមតិ ហើយក្រោយមកក៏បានផ្ដាច់ទំនាក់ទំនង។ ម្ដាយបង្កើតបានប្លុក Liu នៅលើកម្មវិធី WeChat ចំណែកឪពុកបង្កើតហាក់ដូចមានការព្រួយបារម្ភ ខ្លាចប្រពន្ធថ្មីរបស់គាត់ប្ដឹងលែងលះ បើសិនគាត់ទទួលយក Liu ឱ្យចូលរស់នៅក្នុងគ្រួសារ។

«ខ្ញុំមិនយល់សោះថា ហេតុអ្វីបែរជានិយាយថា ខ្ញុំជាអ្នកអុកឡុកជីវភាពរបស់គាត់ទៅវិញ។ គឺគាត់ហ្នឹងហើយដែលជាអ្នក បានធ្វើឱ្យជីវិតរបស់ខ្ញុំច្របូកច្របល់» Liu សរសេរផ្ញើជូនឪពុកបង្កើតរបស់ខ្លួនដូច្នេះ នៅលើបណ្ដាញសង្គម៕

January 19, 2022

ប្រទេសចិន ជិតបានក្លាយជាមហាអំណាចសេដ្ឋកិច្ចលេខ១ ជំនួស សហរដ្ឋអាម៉េរិក

ការនាំចេញរបស់ ប្រទេសចិន ខ្ពស់ជាងពេលណាៗទាំងអស់ ចំណែក GDP ក៏ខ្ពស់បំផុតក្នុងអំឡុងពេលជិត ១ ទសវត្សរ៍ បើទោះជាមានវិបត្តិកូវីដ-១៩ ដូច្នេះ ថ្ងៃដែល ប្រទេសចិន ចូលមកកាន់កាប់តំណែង «មហាអំណាចសេដ្ឋកិច្ចលេខ ១ របស់ពិភពលោក» នឹងមិននៅយូរទៀតទេ។

យោងតាមសារព័ត៌មាន Bloomberg ទិន្នន័យរបស់អគ្គនាយកដ្ឋានស្ថិតិជាតិចិន (NBS) ដែលបានប្រកាសកាលពីថ្ងៃទី ១៧ មករា ២០២២ បង្ហាញថា ផលិតផលក្នុងស្រុកសរុប (GDP) របស់ ប្រទេសចិន បានឡើងដល់ ១១៤.៣៧ ទ្រីលាន (១១៤,៣៧០,០០០,០០០,០០០) យុន ប្រហែល ១៨ ទ្រីលានដុល្លារអាម៉េរិក ខ្ពស់បំផុតក្នុងរយៈពេលជិត ១០ ឆ្នាំកន្លង។

អ្វីដែលពិសេសជាងនេះទៀត នោះគឺ ការនាំចេញសរុបរបស់ ប្រទេសចិន នៅក្នុងឆ្នាំ ២០២១ បានកើនដល់ ៣.៣៦ ទ្រីលាន (៣,៣៦០,០០០,០០០,០០០) ដុល្លារអាម៉េរិក ខ្ពស់ជាងពេលណាៗទាំងអស់។ ឆ្នាំ ២០២១ តួលេខនៃការនាំចេញ-នាំចូលរបស់ ប្រទេសចិន ក៏បានឡើងដល់ ៦៧៦ ពាន់លានដុល្លារអាម៉េរិក។ សេដ្ឋកិច្ចប្រទេសនេះ មានអតិរេកពាណិជ្ជកម្មនៃការនាំចេញ-នាំចូល ឡើងដល់ ៦៧៦ ពាន់លានដុល្លារអាម៉េរិក ក្នុងឆ្នាំ ២០២១។

របាយការណ៍របស់ធនាគារពិភពលោក បង្ហាញថា GDP របស់ សហរដ្ឋអាម៉េរិក នឹងកើនតែ ៥.៦% នៅក្នុងឆ្នាំ ២០២១ ហើយល្បឿននៃកំណើនជាមធ្យម ត្រូវបានគណនាឃើញថា កើនតែ ១.០៥% ក្នុងដំណាក់កាល ២០២០-២០២។ មូលនិធិអន្តរជាតិ (IMF) ព្យាករថា កំណើនសេដ្ឋកិច្ចរបស់ សហរដ្ឋអាម៉េរិក ក្នុងឆ្នាំ ២០២១ កើនតែ ៦% ប៉ុណ្ណោះ។

បច្ចុប្បន្ន អ្នកជំនាញជាច្រើនព្រមានថា ចិន អាចដណ្ដើមបានតំណែងមហាអំណាចសេដ្ឋកិច្ចទី ១ របស់ពិភពលោក ពីដៃ សហរដ្ឋអាម៉េរិក នៅក្នុងអនាគតដ៏ខ្លីខាងមុខ ដែលអាចនៅឆ្នាំ ២០៣០ ឬឆ្នាំ ២០២៨៕

January 18, 2022

ក្លាយជាមហាសេដ្ឋី ក្រោយពីបោះបង់ការសិក្សា និងបើកក្រុមហ៊ុនផ្ដល់សេវាទូទាត់វិក្កយបត្រ

ប្រធាននាយកប្រតិបត្តិរបស់ Checkout.com លោក Guillaume Pousaz បានបោះបង់ការសិក្សានៅពេលដែលឱពុករបស់គាត់មានជំងឺមហារីក ហើយក្រោយមក លោកក៏បានរៀនជិះស្គីលើរលកទឹក មុនពេលបានចូលរួមប្រលូកក្នុងវិស័យធនាគារ។

លោក Guillaume Pousaz សិក្សាមុខវិជ្ជាសេដ្ឋកិច្ចនៅសាកលវិទ្យាល័យមួយនៅឯស្រុកកំណើតក្នុង ប្រទេសស្វ៊ីស ដោយសង្ឃឹមថា បានធ្វើការក្នុងវិស័យធនាគារវិនិយោគ។ ក្រោយមក ឪពុករបស់គាត់មានជំងឺមហារីក ដូច្នេះ គាត់ក៏បានបោះបង់ការសិក្សានៅមហាវិទ្យាល័យ ក្នុងឆ្នាំសិក្សាចុងក្រោយ (២០០៥)។

ពេលឪពុកគាត់លាចាកលោក Guillaume Pousaz ក៏ទៅរស់នៅក្នុងរដ្ឋ California សហរដ្ឋអាម៉េរិក ហើយរៀនជិះស្គីលើរលកសមុទ្រ ប៉ុន្តែ ចុងក្រោយគាត់ក៏ត្រូវចូលធ្វើការឱ្យក្រុមហ៊ុនផ្ដល់សេវាទូទាត់ប្រាក់មួយនៅ សហរដ្ឋអាម៉េរិក ដោយសារតែអស់លុយចាយ។

ឆ្នាំ ២០១២ លោក Guillaume Pousaz បានបង្កើតក្រុមហ៊ុនទូទាត់តាមអនឡាញ Checkout.com។ «ខ្ញុំយល់ថា ប្រឹងប្រែងធ្វើអ្វីមួយដោយខ្លួនឯង វានឹងល្អជាងការធ្វើការឱ្យអ្នកដទៃ» លោក Guillaume Pousaz ប្រាប់ Telegraph ដូច្នេះ។

កាលពីសប្ដាហ៍កន្លង ក្រុមហ៊ុននេះប្រមូលទុនបាន ១ ពាន់លានដុល្លារពីក្រុមអ្នកវិនិយោគ ក្នុងនោះក៏មាន Tiger Global Management របស់ Chase Coleman និង Qatar Investment Authority ដែលជាមូលនិធិវិនិយោគជាតិរបស់ ប្រទេសកាតា។ Checkout.com ត្រូវបានកំណត់តម្លៃ ៤០ ពាន់លានដុល្លារអាម៉េរិក ជួយឱ្យទ្រព្យរបស់លោក Pousaz កើនដល់ប្រហែល ១៩.៤ ពាន់លានដុល្លារ។ នេះបើតាម Bloomberg Billionaires Index។

Checkout.com ប្រមូលទុនបាន ១ ពាន់លានដុល្លារពីក្រុមអ្នកវិនិយោគ កាលពីសប្ដាហ៍កន្លង

តាំងពីឆ្នាំ ២០០៩ បុរសនេះបានចំណាយប្រាក់ ៣៥០,០០០ ដុល្លារ ទិញក្រុមហ៊ុនតូចមួយនៅ Mauritius ដែលមានលិខិតអនុញ្ញាតក្នុងការប្រតិបត្តិលើការទូទាត់តាមរយៈបណ្ដាញរបស់ Mastercard និង Visa។ កាលណោះ ប្រព័ន្ធអនឡាញនានា មាន Gmail ជាដើម កំពុងស្ថិតនៅក្នុងដំណាក់កាលដំបូងៗនៅឡើយ។

ជំហានដ៏ធំមួយបានកើតឡើងចំពោះក្រុមហ៊ុននេះ កាលពី ៥ ឆ្នាំមុន។ Checkout ត្រូវបានក្រុមហ៊ុន Netflix ជ្រើសរើសជាដៃគូផ្គត់ផ្គង់សេវាទូទាត់វិក្កយបត្ររបស់ខ្លួន។ ប្រការនេះបានជួយឱ្យ Pousaz ប្រមូលទុនបានជាលើកដំបូង។ កាលណោះ តម្លៃមូលធនទីផ្សាររបស់ Checkout ត្រូវបានកំណត់ត្រឹមតែ ២ ពាន់លានដុល្លារប៉ុណ្ណោះ។

Checkout រីកចម្រើនបានយ៉ាងលឿនចាប់តាំងពីត្រូវបានបង្កើតឡើង។ ក្នុងឆ្នាំ ២០២១ ក្រុមហ៊ុននេះបានបើកការិយាល័យថ្មីនៅក្នុងប្រទេសចំនួន ៦ ហើយបច្ចុប្បន្ន ក្រុមហ៊ុននេះធ្វើសកម្មភាពនៅក្នុងប្រទេសជាង ២។ អតិថិជនរបស់ Checkout មានដូចជា ក្រុមហ៊ុន Pizza និង Coinbase ជាដើម។

ក្រុមហ៊ុនដែលមានការិយាល័យកណ្ដាលនៅ ទីក្រុងឡុងដ៍ ចក្រភពអង់គ្លេស នេះ បានឱ្យដឹងថា ទុនដែលប្រមូលបាននឹងត្រូវបានប្រើប្រាស់ដើម្បីពង្រីកអាជីវកម្មនៅ សហរដ្ឋអាម៉េរិក និងវិនិយោគទៅលើវិស័យបច្ចេកវិទ្យា។

ទ្រព្យដែលបានកើនឡើងខ្ពស់ បានជួយឱ្យ Pousaz បើកបានក្រុមហ៊ុនវិនិយោគផ្ទាល់ខ្លួន Zinal Growth។ ក្រុមហ៊ុននេះវិនិយោគទៅលើបណ្ដាក្រុមហ៊ុនធុរកិច្ចថ្មី (startup) មានដូចជា Ziina និង Wayflyer ក៏ដូចជាក្រុមហ៊ុន blockchain Snickerdoodle Labs ជាដើម។

បើទោះជាមានទ្រព្យច្រើន ប៉ុន្តែ Pousaz នៅតែរក្សាទម្លាប់រស់នៅតាមបែបសាមញ្ញ។ បច្ចុប្បន្ន គាត់ និងគ្រួសារ រស់នៅក្នុង ទីក្រុងឌូបៃ របស់ ប្រទេសអារ៉ាប់រួម (United Arab Emirates) ដើម្បីគ្រប់គ្រងមុខជំនួញនៅ មជ្ឈិមបូព៌ា៕

January 18, 2022

ក្រសួងអប់រំ ជ្រើសរើសបេក្ខជនជាប់បាក់ឌុបជិត ១០,០០០ នាក់ ឱ្យចូលរៀនថ្នាក់បរិញ្ញាបត្រដោយមិនបង់ថ្លៃ

ក្រសួងអប់រំ យុវជន និងកីឡា នឹងជ្រើសរើសបេក្ខជនជាប់បាក់ឌុប ចំនួន ៩,៨១៨ នាក់ ឱ្យទទួលអាហារូបករណ៍ ចូលរៀនថ្នាក់បរិញ្ញាបត្រដោយមិនបង់ថ្លៃ នេះបើតាម ឯកឧត្តមបណ្ឌិត រស់ សុវាចា អ្នកនាំពាក្យរបស់ក្រសួងអប់រំ យុវជន និងកីឡា។

បេក្ខជនជាប់បាក់ឌុប ចំនួន ៩,៨១៨ នាក់ ដែលត្រូវបានជ្រើសរើស នឹងត្រូវទទួលបានអាហារូបករណ៍ ១០០% សម្រាប់ឆ្នាំសិក្សា ២០២១-២០២២។

ឯកឧត្តមបណ្ឌិត រស់ សុវាចា អគ្គលេខាធិការ ក្រសួងអប់រំ យុវជន និងកីឡា ក៏បានបញ្ជាក់ថា បេក្ខជនដែលចុះឈ្មោះសុំអាហារូបករណ៍ នឹងត្រូវទទួលយកលក្ខខណ្ឌចំនួន ២ គឺ៖ ទី ១ ជ្រើសរើសតាមប្រព័ន្ធកុំព្យូទ័រ ដោយផ្អែកលើនិទ្ទេសរួមនៃលទ្ធផលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២០-២០២១។ ចំណែក លក្ខខណ្ឌទី ២ គឺតាមរយៈការប្រឡងរបស់បេក្ខជននៅតាមគ្រឹះស្ថានសិក្សានានា និងមិនទាន់បានជាប់អាហារូបករណ៍នៅឡើយ។

គួររំលឹកផងដែរថា យោងតាមលទ្ធផលដែលបង្ហាញដោយក្រសួងអប់រំ យុវជន និងកីឡា នៅក្នុងសម័យប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅកាលពីថ្ងៃទី ២៧ ធ្នូ ២០២១ មានបេក្ខជនប្រឡងជាប់សរុបចំនួនជាង ៧០,០០០ នាក់ ស្មើនឹង ៦៥,៦៥% ក្នុងនោះ បេក្ខជនជាប់និទ្ទេស A មានរហូតដល់ ១,៧៥៣ នាក់ ដែលតួលេខនេះខ្ពស់ជាងឆ្ងាយ បើធៀបនឹងបេក្ខជនជាប់និទ្ទេស A ៤៤៣ នាក់ កាលពីឆ្នាំ ២០១៩៕

January 18, 2022

Category: សង្គម និងសេដ្ឋកិច្ច