សង្គម និងសេដ្ឋកិច្ច - La Reine Media

ទស្សនាដៃរ៉ូបូត ឆុងភេសជ្ជៈបម្រើអតិតជននៅអូឡាំពិកប៉េកាំង៖ មានភាពស្ទាត់ជំនាញ និងល្បឿនឆុងលឿនមិនគួរឱ្យជឿ

ដៃយន្តនៅឯមជ្ឈមណ្ឌលសារព័ត៌មាន នៃ ព្រឹត្តិការណ៍អូឡាំពិកប៉េកាំង ២០២២ ចំណាយពេលតែពី ៧០ ទៅ ៩០ វិនាទីប៉ុណ្ណោះ គឺអាចឆុងភេសជ្ជៈ ១ កែវបានស្អាត និងយ៉ាងឈ្ងុយឆ្ងាញ់។

បុគ្គលិកឆុងភេសជ្ជៈសំខាន់ជាងគេនៅឯមជ្ឈមណ្ឌលសារព័ត៌មាននៃព្រឹត្តិការណ៍អូឡាំពិកប៉េកាំង គឺជាដៃរ៉ូបូត ១ គ្រឿង។ គ្រប់គ្នាអាចស្នើឱ្យដៃយន្តនេះឆុងភេសជ្ជៈ ដើម្បីអង្គុយញ៉ាំនៅក្នុងសាលរបស់ភោជនីយដ្ឋាន។

ដៃរ៉ូបូតនេះអាចផ្គត់ផ្គង់ភេសជ្ជៈមានអាល់កុល និងមិនមានអាល់កុលក្រឡុក ជាង ១០ ប្រភេទឯណោះ។ វាចំណាយពេលតែពី ៧០ ទៅ ៩០ វិនាទីប៉ុណ្ណោះ គឺអាចឆុងភេសជ្ជ ១ កែវបានយ៉ាងឆ្ងាញ់ ដូចទៅនឹងរសជាតិដែលមនុស្សអាចធ្វើបាន។ ល្បឿននៃការធ្វើការរបស់បុគ្គលិកជាដៃយន្តនេះ ត្រូវបានគេប្រៀបប្រដូចទៅនឹងអត្តពលិករបស់អូឡាំពិកយ៉ាងដូច្នេះដែរ។

នៅក្នុងសាលរបស់ភោជនីយដ្ឋានដែលស្ថិតក្នុងមជ្ឈមណ្ឌលព័ត៌មានរបស់ព្រឹត្តិការណ៍អូឡាំពិក ក៏មានបុគ្គលិកជាមនុស្សផងដែរ ដើម្បីជួយគាំទ្រនៅពេលចាំបាច់។

នៅឯអាហារដ្ឋានរបស់ភូមិអូឡាំពិក ក៏មានការប្រើប្រាស់រ៉ូបូតច្រើនប្រភេទ ដើម្បីជំនួសឱ្យក្រុមបុគ្គលិក៕

January 25, 2022

ក្រសួងសាធារណការ៖ ស្ថានីយបញ្ចូលថាមពលថ្ម Evs សម្រាប់រថយន្តអគ្គិសនី កំពុងត្រូវបានរៀបចំដំឡើង

ក្រសួងសាធារណការ និងដឹកជញ្ជូន ប្តេជ្ញាចិត្តប្រកបដោយការទទួលខុសត្រូវខ្ពស់ ក្នុងការជំរុញការប្រើប្រាស់រថយន្តដើរដោយថាមពលអគ្គិសនី ដើម្បីរួមចំណែកកាត់បន្ថយការបំភាយឧស្ម័នកាបូនទៅក្នុងបរិយាកាស។

ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងដូចខាងលើ នៅក្នុងជំនួបជាមួយគណៈប្រតិភូសហព័ន្ធឧស្សាហកម្មយានយន្តកម្ពុជា (CAIF) ដឹកនាំដោយលោកបណ្ឌិត តាន់ មុនីវណ្ណ ប្រធានសហព័ន្ធ និងជាអនុប្រធានសភាពាណិជ្ជកម្មកម្ពុជា។

ក្នុងជំនួបខាងលើដែលត្រូវបានធ្វើឡើងកាលពីព្រឹកមិញ នៅទីស្ដីការក្រសួងសាធារណការ ក៏មានវត្តមានរបស់តំណាងរបស់ក្រុមហ៊ុន HGB Group, តំណាងរបស់ក្រុមហ៊ុន Mercedes, តំណាងក្រុមហ៊ុន HGB Group និង នាយកប្រតិបត្តិសហព័ន្ធឧស្សាហកម្មយានយន្តកម្ពុជា ផងដែរ។

រាជរដ្ឋាភិបាលគាំទ្រដល់ការវិនិយោគលើសម្ព័ន្ធសម្រាប់ដំណើរការរថយន្តដើរដោយថាមពលអគ្គិសនី នេះបើតាម ឯកឧត្ដមទេសរដ្ឋមន្ដ្រី ស៊ុន ចាន់ថុល។ លោកបន្ថែមថា សេចក្តីព្រាងគោលនយោបាយដឹកជញ្ជូនផ្លូវគោក ដើម្បីជំរុញការប្រើប្រាស់រថយន្តអគ្គិសនី កំពុងត្រូវបានរៀបចំ។

ក្រសួងសាធារណការ និងដឹកជញ្ជូន ក៏កំពុងសហការជាមួយអង្គការអភិវឌ្ឍន៍សហប្រជាជាតិ (UNDP)ដើម្បីដំឡើងស្ថានីយបញ្ចូលថាមពលថ្ម Evs ចំនួន ៥ ទីតាំង ទៀតផង។ ទីតាំងដែលគ្រោងនឹងត្រូវដំឡើងស្ថានីយបញ្ចូលថាមពលថ្ម រួមមាន ទីស្តីក្រសួងសាធារណការ និងបណ្តារាជធានី-ខេត្តមួយចំនួន គម្រោងដំឡើងស្ថានីយថ្ម EV នៅតាមផ្លូវល្បឿនលឿនភ្នំពេញ-ក្រុងព្រះសីហនុ ដែលគ្រោងដាក់ឱ្យប្រើប្រាស់ក្នុងខែកញ្ញា ឆ្នាំ២០២២ និងគម្រោងដំឡើងស្ថានីយសាកថ្ម EV នៅក្នុងរាជធានីចំនួន ១០ ទីតាំង ដោយសហការជាមួយវិស័យឯកជន។

គណៈប្រតិភូ CAIF បានសំណូមពរឱ្យក្រសួងជួយសម្រួលលើការងារបច្ចេកទេសពាក់ព័ន្ធនឹងការដំឡើងឧបករណ៍ស្តង់ដាររួម ដែលអនុញ្ញាតឱ្យរថយន្តអគ្គិសនីគ្រប់ប្រភេទ អាចប្រើប្រាស់រួមគ្នាបាន៕

January 24, 2022

«ស្រីស្អាតឌីជីថល» រកបានចំណូលរាប់លានដុល្លារអាម៉េរិក ពីរូបថត NFT ផ្ទាល់ខ្លួន

Irene Zhao អាយុ ២៨ ឆ្នាំ បានដាក់រូបថត NFT (Non-Fungible Token ឬ ទ្រព្យដែលមិនអាចផ្លាស់ប្ដូរបាន) របស់ខ្លួននៅលើផ្សារជួញដូរទ្រព្យឌីជីថល ក្នុងបំណងសាកល្បងប៉ុណ្ណោះ ប៉ុន្តែ នឹកស្មានមិនដល់ថា មានការជួញដូររហូតដល់ ៦ លានដុល្លារអាម៉េរិក។

កម្រងរូបថតរបស់ Irene ត្រូវបានដាក់ឡើងលើផ្សារ NFT OpenSea កាលពីថ្ងៃទី ១៤ មករា ហើយមកដល់បច្ចុប្បន្ន មានមនុស្ស ៤៩៩ នាក់ បានទិញ ជាមួយនឹងតម្លៃសរុបឡើងដល់ ២,៣០០ ETH (ប្រាក់ឌីជីថល Ethereum) ស្មើនឹង ៦ លានដុល្លារអាម៉េរិក។ តម្លៃទាបបំផុតនៅក្នុងកម្រងរូបថតរបស់នាងគឺ ០.៩៥ ETH។ បុគ្គលល្បីឈ្មោះជាច្រើនរូបដូចជា អ្នកវិនិយោគ Mike Novogratz ឬ YouTuber Logan Paul ជាដើម ត្រូវបានគេជឿថា បានទិញរូបថត NFT រាប់សិបសន្លឹករបស់ Irene។

Irene បានប្រាប់ CoinDesk ថា ដំបូងឡើយនាងមានបំណងសាកល្បងប៉ុណ្ណោះ។ វាជារឿងដ៏គួរឱ្យភ្ញាក់ផ្អើលនៅពេលរូបថត NFT ទាំងនេះត្រូវបានគេទិញអស់យ៉ាងឆាប់រហ័ស និងមានតម្លៃខ្ពស់។ «ខ្ញុំបានចេញទៅក្រៅប្រហែល ៤០ នាទី ហើយពេលត្រលប់មកវិញ កម្រងរូបថត NFT ៥០០ សន្លឹក ត្រូវបានគេទិញអស់រលីង» នាងបន្ថែមដូច្នេះ។

Irene Zhao គឺជាតារាបង្ហាញម៉ូដនៅលើ Instagram និងមានអ្នកតាមដានជិត ៤ សែននាក់នៅលើបណ្ដាញសង្គមនេះ។ កាលពីឆ្នាំ ២០២១ នាងក៏ធ្លាប់បានល្បីឈ្មោះនៅក្នុងពិភព blockchain បន្ទាប់ពីក្លាយជានាយិកាផ្នែកទីផ្សាររបស់ Konomi Network ជាគម្រោងគ្រប់គ្រងទ្រព្យឌីជីថលលើ blockchain។

រូបថតរបស់ Irene ត្រូវបានបង្កើតឡើងក្នុងបំណងធ្វើជា sticker សម្រាប់អ្នកប្រើប្រាស់ Telegram។ កម្រង sticker នេះ មានអ្នកទាញយកមកប្រើប្រាស់ជាង ២,០០០ លើក បន្ទាប់ពីបង្ហាញខ្លួនបាន ៤ ថ្ងៃ។ អ្នកគាំទ្រម្នាក់ដែលមានរហ័សនាមថា libevm បានណែនាំឱ្យ Irene សាកល្បងប្រែក្លាយវាទៅជា NFT។

រូបថត NFT របស់ Irene ត្រូវបានបង្កើតឡើងដោយយោងទៅតាមការទាក់ទាញអារម្មណ៍ពីកម្រងរូបថត Ghozali Everday របស់និស្សិតជនជាតិឥណ្ឌូណេស៊ី។ កម្រងរូបថតដែលថតក្នុងរយៈពេល ៤ ឆ្នាំ បានជួយឱ្យ Ghozali Ghozalo ក្លាយជាបុគ្គលល្បីឈ្មោះ ហើយការជួញដូររូបថតទាំងនេះមានតម្លៃឡើងដល់ ១ លានដុល្លារអាម៉េរិក៕

January 24, 2022

សហរដ្ឋអាម៉េរិក ពិនិត្យលទ្ធភាពក្នុងការ «បង្កើតរូបិយវត្ថុដុល្លារឌីជីថល»

យោងតាមធនាគារជាតិអាម៉េរិក (FED/Federal Reserve System) ប្រាក់ដុល្លារអាម៉េរិកឌីជីថល ដែលគាំទ្រដោយរដ្ឋាភិបាល នឹងជួយឱ្យការជួញដូរ និងទូទាត់ប្រាក់ប្រព្រឹត្តទៅយ៉ាងឆាប់រហ័ស និងងាយស្រួលសម្រាប់មនុស្សភាគច្រើន បើធៀបនឹងប្រព័ន្ធធនាគារបច្ចុប្បន្ន។

ថ្មីៗនេះ FED បានប្រកាសជាសាធារណៈអំពីចំណុចវិជ្ជមាន និងអវិជ្ជមានរបស់ប្រាក់ដុល្លារឌីជីថល បំណងប្រមូលមតិយោបល់ពីសាធារណជន ដើម្បីកំណត់ និងសម្រេចថា តើគួរបញ្ចេញប្រាក់ឌីជីថល ឬទេ។

ការអភិវឌ្ឍប្រាក់ដុល្លារអាម៉េរិកឌីជីថលនេះនឹងជាការផ្លាស់ប្ដូរយ៉ាងធំទាក់ទងនឹងតួនាទីរបស់រដ្ឋនៅក្នុងប្រព័ន្ធហិរញ្ញវត្ថុ ហើយវាមានចំណុចវិជ្ជមានជាច្រើន។ ក៏ប៉ុន្តែ និយាយអំពីចំណុចអវិជ្ជមានវិញ អ្វីដែលគេអាចមើលឃើញច្បាស់ជាងគេ នោះគឺថា ភាពទាក់ទាញរបស់បណ្ដាធនាគារពាណិជ្ជកម្មនឹងត្រូវអនថយ។

ឥរិយាបថរបស់ FED ត្រូវបានធ្វើឡើងនៅក្នុងគ្រាដែលប្រទេសជាង ៩០ ក្នុងពិភពលោក កំពុងអភិវឌ្ឍរូបិយវត្ថុឌីជីថលដោយឡែករៀងៗខ្លួន។ ធនាគារកណ្ដាលរបស់អឺរ៉ុប បញ្ចេញ ប្រាក់អឺរ៉ូឌីជីថល (EUR) ចំណែក ប្រទេសចិន វិញ ដាក់ឱ្យប្រើប្រាស់សាកល្បង ប្រាក់យុនឌីជីថល (e-CNY) ដែលបានអភិវឌ្ឍតាំងតែពីឆ្នាំ ២០១៤។

ប្រកាសរបស់ FED ក៏បានឱ្យដឹងថា រដ្ឋាភិបាលសហរដ្ឋអាម៉េរិក កំពុងស្វែងរកវិធីដើម្បីរក្សាអំណាចរបស់ប្រាក់ដុល្លារអាម៉េរិក នៅក្នុងទីផ្សារពិភពលោក៕

January 24, 2022

(វីដេអូ)-រ៉ូបូត សម្ដែងសមត្ថភាពជិះស្គីលើភ្នំ មិនចាញ់កីឡាករអាជីពឡើយ

(ប្រទេសចិន)-ការប្រណាំងស្គីលើផ្ទៃព្រឹលមិនមែនសម្រាប់តែកីឡាករដែលមានសមត្ថភាពនោះទេ ប៉ុន្តែ រ៉ូបូតក៏អាចសម្ដែងបានយ៉ាងល្អនូវកីឡារដូវរងានេះផងដែរ។

ត្រូវបានអភិវឌ្ឍដោយសាកលវិទ្យាល័យចរាចរណ៍សៀងហៃ រ៉ូបូតដែលមានជើង ៦ នេះ បានឆ្លងផុតវិញ្ញាសាធ្វើតេស្តស្ដីពីការជិះស្គីលើព្រឹលនៅលើកំណាត់ផ្លូវមួយនៃចង្កេះភ្នំនៅតំបន់ Shenyang ក្នុងខេត្ត Liaoning ប្រទេសចិន ក្នុងខែនេះ។

រ៉ូបូតនេះមានរូបរាងដូចសុនក ដោយមានជើង ៤ សម្រាប់រក្សាលំនឹង និងជើង ២ ទៀតសម្រាប់រក្សាបន្ទះស្គី។ នៅក្នុងការធ្វើតេស្តកាលពីពេលកន្លង រ៉ូបូតនេះបានជិះស្គីក្នុងល្បឿនជាង ១០ ម៉ែត្រ/វិនាទី លើផ្លូវមានជម្រាល ១៨ អង្សា និងប្រវែង ៤០០ ម៉ែត្រ។ វាបានបញ្ចេញកាយវិការលំបាកៗជាច្រើន ដូចជាការបង្កើនល្បឿន បត់បែន បង្កើតគម្រោងផ្លូវត្រូវរត់ គេចពីឧបសគ្គ និងទាក់ទងជាមួយមនុស្ស។ រ៉ូបូតនេះមានសមត្ថភាពក្នុងការធ្វើត្រាប់តាមអ្នកជិះស្គីផងដែរ។

ក្នុងអនាគត អ្នកវិទ្យាសាស្ត្រជឿថា រ៉ូបូត ដែលត្រូវបានបញ្ជាពីចម្ងាយអាចប្រកួតប្រជែងនឹងមនុស្សនៅក្នុងវិស័យដូច្នេះ។ ក្រៅពីការសម្ដែង រ៉ូបូតនេះនឹងត្រូវបានប្រើប្រាស់សម្រាប់ការល្បាត ជួយសង្គ្រោះលើភ្នំ និងជួយការពារសន្តិសុខរបស់អ្នកជិះស្គីលើព្រឹល៕

January 24, 2022

ប្រព័ន្ធផ្កាយរណបផ្គត់ផ្គង់អ៊ីនធើណិត ៥G របស់ក្រុមហ៊ុនបច្ចេកវិទ្យាមួយ ចាប់ផ្ដើមប្រជែងនឹង Starlink របស់ Elon Musk

(ប្រទេសចិន)-ក្រុមហ៊ុនធុរកិច្ចថ្មីមួយចាប់ផ្ដើមកសាងប្រព័ន្ធផ្កាយរណប ១,០០០ គ្រឿង ដើម្បីផ្គត់ផ្គង់អ៊ីនធើណិតជំនាក់ទី ៥ (៥G) ដើម្បីចូលរួមប្រជែងដណ្ដើមទីផ្សារពី Starlink របស់ SpaceX។

ក្រុមផ្កាយរណបទូរគមនាគមន៍ដែលមានកម្លាំងខ្លាំង តម្លៃទាប ត្រូវបានផលិត សាកល្បង និងនាំទៅកាន់ទីលានបាញ់បង្ហោះសម្ងាត់រួចហើយ នេះបើតាមសារព័ត៌មាន Xinhua ចុះផ្សាយកាលពីថ្ងៃទី ១៨ មករា។

ក្រុមហ៊ុន GalaxySpace នៅ ប៉េកាំង ដែលជាស្ថាប័នគ្រប់គ្រងគម្រោងនេះ បានឱ្យដឹងថា ពួកគេមានផែនការផ្គត់ផ្គង់បណ្ដាញ ៥G របស់ ចិន នៅពាសពេញពិភពលោក និងប្រកួតប្រជែងជាមួយប្រព័ន្ធ Starlink នៃក្រុមហ៊ុន SpaceX របស់មហាសេដ្ឋីអាម៉េរិក លោក Elon Musk នៅក្នុងទីផ្សារផ្គត់ផ្គង់សេវាអ៊ីនធើណិតល្បឿនលឿន សម្រាប់តំបន់ដាច់ស្រយាលរបស់ពិភពលោក។

ផ្កាយរណបរបស់ ចិន តូចជាង ធៀបនឹង Starlink។ ទោះជាតូចជាងបើនិយាយអំពីទំហំក៏ពិតមែន ប៉ុន្តែ ប្រព័ន្ធផ្កាយរណប ១,០០០ គ្រឿងរបស់ GalaxySpace នឹងក្លាយជាប្រព័ន្ធដំបូងគេដែលប្រើប្រាស់បច្ចេកវិទ្យា ៥G ដែលអាចឱ្យអ៊ីនធើណិតរបស់ពួកគេមានល្បឿនលឿនជាង ៥០០ megabit/វិនាទី ជាមួយនឹងកម្រិតនៃភាពយឺតទាប។

Starlink បច្ចុប្បន្ន មានផ្កាយរណបចំនួន ២,០០០ គ្រឿង កំពុងគោចរក្នុងគន្លងតារាវិថី ហើយវានឹងកើនឡើងរហូតដល់ ៤២,០០០ គ្រឿង នៅពេលគម្រោងនេះត្រូវបានបញ្ចប់ជាស្ថាពរ។ បើទោះជាប្រើប្រាស់ប្រព័ន្ធខុសពី ៥G ប៉ុន្តែ Starlink មានសក្ដានុពលក្នុងការផ្គត់ផ្គង់សេវា ៦G នាពេលអនាគត។

January 22, 2022

(វីដេអូ)-រោងចក្រនៅ ស្រុកចិន បានបញ្ចេញកប៉ាល់ដឹកអ្នកដំណើរប្រភេទ «Ro-Ro» ប្រណិត ល្បឿនលឿនបំផុតដែលផលិតនៅប្រទេសនេះ

ក្រុមហ៊ុនផលិតកប៉ាល់អន្តរជាតិក្វាងចូវ បានដំឡើងកប៉ាល់ដឹកអ្នកដំណើរប្រភេទប្រណិត Xianglongdao រួចរាល់ជាស្ថាពរ និងប្រគល់ឱ្យដៃគូសហការកាលពីថ្ងៃទី ១៨ មករា ២០២២។

កប៉ាល់ដឹកអ្នកដំណើរប្រណិតថ្មីមួយគ្រឿង ដែលមានឈ្មោះថា Xianglongdao ត្រូវបានបញ្ចេញពីរោងចក្រកាលពីថ្ងៃទី ១៨ មករា និងត្រូវបានប្រគល់ជូនអតិថិជននៅក្នុងខណ្ឌ Nansha នៃក្រុងក្វាងចូវ ខេត្តក្វាងទុង។

កប៉ាល់នេះមានបណ្ដោយ ២០៨ ម៉ែត្រ និងទទឹង ២៨.៦ ម៉ែត្រ។ ដោយអាចធ្វើដំណើរបាន ៤២.៦ គីឡូម៉ែត្រ/ម៉ោង Xianglongdao បានក្លាយជាកប៉ាល់ដឹកអ្នកដំណើរប្រភេទ «Ro-Ro» មានល្បឿនលឿនជាងគេបង្អស់ដែលត្រូវបានផលិតនៅ ប្រទេសចិន។

Ro-Ro គឺជាពាក្យសរសេរកាត់របស់ roll-on/roll-off ដែលមានន័យថា វាអាចដឹកទំនិញដែលមានកង់ ដូចជា រថយន្ត និងទូរថភ្លើងជាដើម ដោយមិនបាច់ប្រើប្រាស់ដងស្ទូច។

Xianglongdao អាចដាក់អ្នកដំណើរបាន ១,៣៧៥ នាក់ និងយានយន្តដែលមានខ្នាតប្រហាក់ប្រហែលនឹងរថយន្តដឹកទំនិញជាង ៥០០ គ្រឿង។ ក្នុងកប៉ាល់ប្រណិតនេះ មានបំពាក់ប្រព័ន្ធចង្ក្រានអាំងសាច់ដែលអាចផ្គត់ផ្គង់សម្រាប់មនុស្សប្រហែល ៣៤០ នាក់, បន្ទប់ការ៉ាអូខេធំមួយដែលអាចដាក់មនុស្សបាន ១០ នាក់, បន្ទប់លេងអុកមួយ, រោងភាពយន្តមួយ, ផ្សារទំនើបមួយដែលមានទំហំ ១២០ ម៉ែត្រក្រឡា និងបន្ទប់ហាត់ប្រាណមួយ។ល។

January 22, 2022

សហរដ្ឋអាម៉េរិក ផ្អាកការហោះហើរទៅកាន់ ប្រទេសចិន ចំនួន ៤៤ ជើង

រដ្ឋាភិបាលអាម៉េរិក ប្រកាសផ្អាកការហោះហើរចំនួន ៤៤ ជើង ពីប្រទេសនេះទៅកាន់ ប្រទេសចិន ដើម្បីឆ្លើយតបនឹងកាយវិការដូចគ្នានេះពីសំណាក់ទីក្រុងប៉េកាំង។

ក្រសួងចរាចរណ៍សហរដ្ឋអាម៉េរិក កាលពីថ្ងៃទី ២១ មករា បានឱ្យដឹងថា ការសម្រេចរបស់ សហរដ្ឋអាម៉េរិក នឹងមានសុពលភាពចាប់ពីថ្ងៃទី ៣០ មករា រហូតដល់ថ្ងៃទី ២៩ មីនា។ ក្រុមហ៊ុនដែលត្រូវបានផ្អាករួមមាន Xiamen Airlines, Air China, China Southern Airlines និង China Eastern Airlines។

មុននោះ រដ្ឋាភិបាលចិន ក៏បានផ្អាកការហោះហើរចំនួន ៤៤ ជើង របស់ក្រុមហ៊ុនអាម៉េរិក រួមមាន United Airlines, American Airlines និង Delta Airlines ចាប់ពីថ្ងៃទី ៣១ ធ្នូ ២០២១ បន្ទាប់ពីបានរកឃើញអ្នកវិជ្ជមាននឹងកូវីដ-១។ សហរដ្ឋអាម៉េរិក ក៏បានឱ្យដឹងថា លើកចុងក្រោយបង្អស់ ពោលគឺនៅថ្ងៃទី ១៨ មករា រដ្ឋាភិបាលចិន ក៏បានប្រកាសផ្អាកការហោះហើររបស់ពួកគេផងដែរ។

ក្រុមហ៊ុនអាកាសចរណ៍អាម៉េរិក បានគាំទ្រចំពោះចំណាត់ការរបស់រដ្ឋាភិបាលអាម៉េរិក ដោយលើកឡើងថា គឺដើម្បីធានានូវយុត្តិធម៌លើទីផ្សារ។ ប៉ុន្តែ ទីក្រុងវ៉ាស៊ីងតោន ប្រកាសថា ស្ថានភាពនេះនឹងអាចត្រូវបានស្ដារឡើងវិញ នៅពេល ចិន កែប្រែសេចក្ដីសម្រេចរបស់ខ្លួន។

ចំណែកអ្នកនាំពាក្យរបស់ស្ថានទូតចិន ប្រចាំ សហរដ្ឋអាម៉េរិក លោក Liu Pengyu បានឱ្យដឹងថា គោលនយោបាយសម្រាប់ការហោះហើរដឹកអ្នកដំណើរអន្តរជាតិមកកាន់ ប្រទេសចិន ត្រូវបានអនុវត្តដោយស្មើភាពគ្នា មិនថាក្រុមហ៊ុនអាកាសចរណ៍ចិន ឬបរទេស៕

January 22, 2022

ទិដ្ឋភាព «មួយគ្មានពីរ» លើផែនដី! នារីបម្រើលើយន្តហោះ ឈរលើកំពូលអគារខ្ពស់ជាងគេក្នុងពិភពលោក ដោយមានយន្តហោះឆ្វែលពីក្រោយ

ទិដ្ឋភាពដូចបាននិយាយក្នុងចំណងជើងរបស់អត្ថបទនេះ កំពុងទាក់ទាក់ចំណាប់អារម្មណ៍ខ្លាំងពីទស្សនិកជន។ ថ្មីៗនេះ នៅលើទំព័របណ្ដាញសង្គម Youtube របស់ក្រុមហ៊ុនអាកាសចរណ៍ Emirates (នៃរាជាណាចក្រឌូបៃ) បានបង្ហោះវីដេអូមួយប្រកបដោយភាពទាក់ទាញ។

វីដេអូបង្ហាញថា នារីដែលស្លៀកឈុតអ្នកបម្រើលើយន្តហោះម្នាក់ ឈរនៅលើកំពូលអគារ Burj Khalifa (កម្ពស់ជិត ៨៣០ ម៉ែត្រ) ដែលខ្ពស់ជាងគេបង្អស់ក្នុងពិភពលោក និងស្ថិតនៅក្នុង ទីក្រុងឌូបៃ។ នារីរូបនេះនិយាយថា៖ «ខ្ញុំនៅតែស្ថិតនៅទីនេះ»។ ភ្លាមនោះ យន្តហោះ ១ គ្រឿង ប្រភេទធំបំផុតក្នុងពិភពលោក គឺ Airbus A៣៨០ ក៏បង្ហាញខ្លួននៅខាងក្រោយខ្នងរបស់នារីនេះ។

សារដែលនារីរូបនេះ រួមនឹងក្រុមអ្នកបើកបរយន្តហោះ Emirates A៣៨០ ផ្ញើជូនពិភពលោក នោះគឺ៖ «សូមហោះហើរជាមួយយន្តហោះ Emirates A៣៨០ ដើម្បីទៅចូលរួមព្រឹត្តិការណ៍ Dubai Expo ២០២០ ដែលជាពិធីតាំងពិព័រណ៍អន្តរជាតិធំបំផុតក្នុងពិភពលោក»។

Dubai Expo ២០២០ ត្រូវបានប្រារព្ធឡើងចាប់ពីថ្ងៃទី ១ តុលា ២០២១ ដល់ ៣១ មីនា ២០២២។ ក្នុងព្រឹត្តិការណ៍នេះ មានប្រទេសចំនួន ១៩២ កំពុងតាំងបង្ហាញផលិតផល និងសេវារបស់ពួកគេ ក្នុងនោះមាន កម្ពុជា ផងដែរ។

នារីជាអ្នកបម្រើលើយន្តហោះនៅក្នុងវីដេអូនេះ តាមពិតគឺជា Nicole Smith-Ludvik ដែលជាអត្តពលិកផ្នែកលោតឆត្រយោង និងជាបុគ្គលល្បីឈ្មោះនៅលើបណ្ដាញសង្គម។

វីដេអូនេះ បានទាក់ទាញអ្នកចូលមើលរាប់លានលើក។ អ្នកចូលមើលជាច្រើនឆ្ងល់ថា ហេតុអ្វីយន្តហោះអាចហោះក្បែរនារីរូបនេះបានយ៉ាងដូច្នេះ។ ក្រុមហ៊ុន Emirates បានចូលមកបកស្រាយថា ថាពិត យន្តហោះនេះ ហោះឆ្ងាយពីនាងរហូតដល់ ៨០០ ម៉ែត្រ ប៉ុន្តែ ដោយសារអ្នកថតស្ថិតនៅជិត នាង Nicole Smith-Ludvik ពេក ទើបឃើញយន្តហោះនៅជិតបង្កើយដូច្នេះ៕

January 21, 2022

មុនពេលរកបានប្រាក់ ១ លានដុល្លារអាម៉េរិក មហាសេដ្ឋី Warren Buffett ត្រូវឆ្លងកាត់ការងារដំបូងដែលទំនងជាមិនអាចក្លាយជាមហាសេដ្ឋី

ការដែលបានក្លាយជាមហាសេដ្ឋី ពុំមែនជារឿងងាយស្រួលឡើយ ព្រោះថា អ្នកមានទាំងឡាយសុទ្ធតែត្រូវឆ្លងកាត់ដំណាក់កាលធ្វើការឱ្យគេយ៉ាងលំបាក។

កាលពីនៅជាកុមារ មហាសេដ្ឋីជនជាតិអាម៉េរិក លោក Warren Buffett ធ្លាប់ធ្វើការងារជាអ្នកដឹកកាសែតយកទៅជូនអតិថិជនជារៀងរាល់ព្រឹក ដែលនេះគឺជាការងារស៊ីឈ្នួលដំបូងបង្អស់របស់គាត់។

ឪទុករបស់លោក Buffett គឺជាឈ្មួញគក់ជេរភាគហ៊ុន។ កាលនៅតូច លោក Buffett តែងតែទៅជួយធ្វើការងារឪពុករបស់គាត់។ អាយុ ១១ ឆ្នាំ លោក Buffett បានទិញភាគហ៊ុនរបស់ Cities Service Preferred ក្នុងតម្លៃ ៣៨ ដុល្លារ/ហ៊ុន។ ក្រោយមក នៅវ័យ ១៣ ឆ្នាំ លោកក៏បានធ្វើការងារដំបូងរបស់ខ្លួន នោះគឺយកកាសែត The Washington Post ទៅប្រគល់ឱ្យអតិថិជនដល់ផ្ទះ។ ការងារនេះជួយឱ្យលោករកបាន ១៧៥ ដុល្លារ/ខែ។

យោងតាមសារព័ត៌មាន Forbes មហាសេដ្ឋី Warren Buffett បច្ចុប្បន្នមានទ្រព្យប្រមាណ ១១២.៦ ពាន់លានដុល្លារអាម៉េរិក គិតត្រឹមថ្ងៃទី ២១ មករា ២០២២។

January 21, 2022

Category: សង្គម និងសេដ្ឋកិច្ច