Alomari ចំណាយពេល ៧ ឆ្នាំក្នុងការកសាងក្រុមហ៊ុនចំនួន ៤ របស់គាត់ ដើម្បីរកបានទ្រព្យខ្ទង់លានដុល្លារអាម៉េរិក បន្ទាប់ពីមានបញ្ហាហិរញ្ញវត្ថុ និងវិះត្រូវក្ស័យធន។
ថ្ងៃមួយក្នុងខែមករា ២០១២ Ahmed Alomari (នៅ Michigan សហរដ្ឋអាម៉េរិក) កំពុងបើកបរក្រោមព្រឹលយ៉ាងត្រជាក់ដើម្បីដឹកជញ្ជូននំភីហ្សាចំនួន ៣ ជើងចុងក្រោយ បញ្ចប់ថ្ងៃធ្វើការ ១៥ ម៉ោងរបស់គាត់។ ពេលនោះ ស្រាប់តែភរិយារបស់គាត់គឺនាង Nancy បានទូរស័ព្ទមកប្រាប់ថា ចង្ក្រានកំដៅលែងដំណើរការ។ បណ្ណឥណទានក៏ត្រូវធនាគារផ្អាកដំណើរការ ព្រោះគាត់មិនទាន់បង់ប្រាក់លើវិក្កយបត្រមុន។
«យប់នេះត្រូវធ្វើយ៉ាងណាទៅបង» Nancy សួរ។ ពេលនោះនាងកំពុងមានផ្ទៃពោះលើកដំបូង។ «បងទើបតែទទួលបាន ២ ដុល្លារសម្រាប់ជើងចុងក្រោយ និងរកបាន ៨០ ដុល្លារក្នុងថ្ងៃនេះ» Ahmed Alomari ឆ្លើយតបដូច្នេះ។
រាត្រីមួយដ៏សែនត្រជាក់នៅក្នុងឆ្នាំ ២០១២ គឺជាកាលៈទេសៈដែល Ahmed Alomari មិនអាចបំភ្លេចបាន។ ស្ថានភាពទាល់ច្រកនោះហើយដែលគាត់គិតថា ត្រូវចាកចេញឱ្យផុតពីអារម្មណ៍ដែលថា «ខ្ញុំគឺជាជនរងគ្រោះ»។ គាត់ប្រាកដជាមិនអាចក្លាយជាអ្នកមានបានឡើយ បើសិនចេះតែរកលេស និងរក្សាទម្លាប់អាក្រក់។ Ahmed Alomari យល់ឃើញថា «មិនមានសម្ពាធគឺមិនមានត្បូងពេជ្រ»។
ក្រោយមក ក្នុងអំឡុង ៧ ឆ្នាំកន្លង Ahmed Alomari (អាយុ ៣៨ ឆ្នាំ) បានបង្កើត និងកសាងក្រុមហ៊ុនអនឡាញចំនួន ។ គាត់ថែមទាំងបានវិនិយោគរាប់លានដុល្លារទៅក្នុងទីផ្សារមូលបត្រ និងបណ្ដុះបណ្ដាលផ្នែកហិរញ្ញវត្ថុដល់និស្សិតរាប់រយនាក់ផងដែរ។ Enttrepreneur បានគណនាឃើញថា ទ្រព្យរបស់ Alomari បច្ចុប្បន្ន បានឡើងដល់ជាង ៧.៥ លានដុល្លារអាម៉េរិក។
Alomari ជឿថា បណ្ដាញទំនាក់ទំនងដែលគាត់បានស្គាល់ក៏មានតម្លៃប្រហាក់ប្រហែលនឹងតម្លៃទ្រព្យសុទ្ធ។ «ទំនាក់ទំនងបើកឱ្យមានផ្លូវដែលប្រាក់កាសមិនអាចធ្វើបាន» Alomari និយាយដូច្នេះ។
«ខ្ញុំបានវិនិយោគច្រើនទៅលើការរៀនសូត្រ និងស្វែងរកមនុស្សដើម្បីសុំយោបល់»។ Alomari យល់ថា បើចង់ក្លាយជាអ្នកមាន នោះគេត្រូវបោះចោលនូវប្រការអវិជ្ជមាន និងភាពទាល់ច្រក ចេញពីជីវិត។ អ្នកត្រូវការមនុស្សឆ្លាតវៃ និងមនុស្សដែលមានភាពជោគជាង នៅជុំវិញខ្លួន។
ពិតប្រាកដណាស់ មុនពេលរកឃើញជោគជ័យដូចសព្វថ្ងៃ Alomari ក៏ធ្លាប់ឆ្លងកាត់បញ្ហាជាច្រើនទាក់ទងនឹងហិរញ្ញវត្ថុ ហើយពេលខ្លះវិះនឹងត្រូវក្ស័យធនទៀតផង។
បន្ទាប់ពីកំណត់បាននូវកត្តាផ្លូវចិត្ត និងការប្រឹងប្រែងរៀនសូត្រ Alomari ចាប់ផ្ដើមកសាងបណ្ដាញមួយដែលរួមមានទាំងក្រុមមនុស្សដែលមានឥទ្ធិពលក្នុងបណ្ដាញសង្គម ក្រោយមក ក៏បានលក់វាទៅឱ្យអតីតនាយកប្រតិបត្តិរបស់ MySpace កាលពីឆ្នាំ ២០១៦។ ក្នុងចំណោមទ្រព្យដែល Alomari បានលក់ ក៏មានគេហទំព័រព័ត៌មានស្ដីអំពីបុគ្គលល្បីឈ្មោះទាំង ៥,០០០ នាក់ ដែលឈរលំដាប់កំពូលតារាងរបស់ Alexa ផងដែរ។ គេហទំព័រនេះមានអ្នកចូលអានជិត ១ លាននាក់ជារៀងរាល់ថ្ងៃ។ អ្នកអានទាំងអស់ សុទ្ធតែបានមកពីបណ្ដាញសង្គម។
ក៏ប៉ុន្តែ ២ សប្ដាហ៍បន្ទាប់ពីបានលក់ក្រុមហ៊ុន ម្ដាយរបស់ Alomari ក៏ត្រូវបានវេជ្ជបណ្ឌិតពិនិត្យឃើញថា មានជំងឺមហារីកដំណាក់កាលទី ។ ឆ្នាំ ២០១៧ ក្នុងគ្រាលំបាក Alomari ក៏បានបាត់បង់ទ្រព្យភាគច្រើនរបស់គាត់ ដោយសារតែករណីឆបោកដ៏អស្ចារ្យមួយ។ ទ្រព្យរបស់ Alomari បានវិលមកចំណុចសូន្យ នៅពេលគាត់ត្រូវចិញ្ចឹមកូន ៤ នាក់ និងភរិយាកំពុងមានផ្ទៃពោះ។
កូនៗរបស់គាត់ ក្រោយមកក៏ត្រូវដេញចេញពីសាលាឯកជន។ បំណុលលើរថយន្ត សំបុត្រព្រមាន រួមនឹងការមកសួរនាំរបស់មន្ត្រីពន្ធដារ គឺជាផ្នែកមួយដែលកើតឡើងជាប្រចាំក្នុងជីវភាពរបស់គាត់។ ក្នុងគ្រាលំបាកបំផុត គ្រួសារគាត់ក៏ត្រូវយកប្រាក់រាយដែលបានសន្សំជាច្រើនឆ្នាំ មកទិញអាហារ។
ជាថ្មីម្ដងទៀត Alomari ប្រកាសថា មិនត្រូវចុះចាញ់ និងមិនត្រូវយកជាលេស។ គាត់ចាប់ផ្ដើមប្រើប្រាស់ទំនាក់ទំនងដែលមានស្រាប់ ដើម្បីបង្កើតក្រុមហ៊ុនរកស៊ីតាមអនឡាញចំនួន ។ មិនយូរប៉ុន្មាន ក្រុមហ៊ុនទាំងនេះ រកចំណូលបានខ្ទង់លានដុល្លារ ចំណែកគាត់ក៏ជួញដូរមូលបត្រ។
ក្រុមហ៊ុនទី ២ របស់ Alomari ដែលគ្រប់គ្រងគេហទំព័រស្ដីអំពីបុគ្គលល្បីឈ្មោះលើបណ្ដាញសង្គម រកចំណូលបានជិត ២ លានដុល្លារ ចាប់តាំងពីត្រូវបានបង្កើតឡើងកាលពីឆ្នាំ ២០១៨។ ក្រុមហ៊ុនទី ៣ គឺជាហាងអនឡាញ ដែលរកចំណូលបានជិត ២ លានដុល្លារ ក្នុងរយៈពេល ៤ ខែដើមឆ្នាំ ២០២០។ ទន្ទឹមនឹងនេះ Alomari ក៏មានក្រុមហ៊ុនប្រឹក្សាយោបល់ដែលមានតម្លៃរាប់លានដុល្លារ ដែលកំពុងដំណើរការល្អដល់បច្ចុប្បន្ន។
«ខ្ញុំតែងតែគិតដល់លទ្ធផល និងផលប្រយោជន៍ដែលអតិថិជនចង់បាន ជាជាងផលិតផល និងសេវាកម្មដែលខ្ញុំចង់លក់។ នៅពេលអ្នកពិតជាបានផ្ដោតទៅលើតម្រូវការរបស់អតិថិជន និងក្លាយជាអ្នកដោះស្រាយបញ្ហាឱ្យពួកគេ នោះក្រុមហ៊ុនរបស់អ្នកនឹងរីកចម្រើនទៅតាមលេខគុណ» Alomari អះអាងដូច្នេះ។
សេដ្ឋីរូបនេះបន្ថែមថា៖ «នៅពេលយល់ច្បាស់អំពីបញ្ហារបស់អតិថិជន អ្នកអាចមានទំនុកចិត្តក្នុងការផ្ដល់នូវអ្វីមួយដែលពួកគេត្រូវការ។ បន្ទាប់មក ប្រាក់នឹងរត់មករកអ្នក»។
បច្ចុប្បន្ន Alomari រស់នៅក្នុង ប្រទេសនូវែលសេឡង់ ជាមួយនឹងភរិយា និងកូនចំនួន ៦ នាក់។ គាត់នៅតែបន្តផ្ដល់ប្រឹក្សាយោបល់ដល់ក្រុមមនុស្សល្បីឈ្មោះ បណ្ដុះបណ្ដាលអំពីការរកស៊ីតាមអនឡាញ និងវិនិយោគលើទីផ្សារមូលបត្រ៕
