សង្គម និងសេដ្ឋកិច្ច - La Reine Media

រដ្ឋមន្ត្រីរុស្ស៊ី៖ ការហាមឃាត់ Bitcoin គឺប្រៀបដូចទៅនឹងការហាមឃាត់ អ៊ីនធើណិត

ក្នុងគ្រាដែលធនាគារជាតិរុស្ស៊ី បន្តអំពាវនាវឱ្យរដ្ឋ ធ្វើការហាមឃាត់រូបិយវត្ថុឌីជីថល ដូចជា Bitcoin ជាដើម រដ្ឋមន្ត្រីក្រសួងហិរញ្ញវត្ថុ Anton Siluanov បែរជាប្រកាសបដិសេធទៅវិញ។

យោងតាម Forbes រុស្ស៊ី នៅក្នុងកិច្ចប្រជុំរវាងក្រសួងហិរញ្ញវត្ថុ និងធនាគារជាតិរុស្ស៊ី លោក Siluanov ឱ្យដឹងថា ការចេញបទបញ្ជាហាមឃាត់ប្រាក់ឌីជីថល នៅ រុស្ស៊ី «ក៏ស្មើនឹងការហាមឃាត់ប្រព័ន្ធអ៊ីនធើណិត ដែលជាប្រការមួយមិនអាចទៅរួច»។

ជំនួសមកវិញ លោករដ្ឋមន្ត្រីយល់ថា គួរស្វែងរកវិធីគ្រប់គ្រងវិស័យនេះឱ្យបានកាន់តែឆាប់ កាន់តែល្អ ជាជាងការហាមឃាត់ទាំងស្រុង។ លោកអះអាងថា ប្រាក់ឌីជីថល អាចអនុញ្ញាតឱ្យរដ្ឋាភិបាលតាមដានទីផ្សារ និងបង្កើនប្រាក់ចំណូលរបស់ជាតិ តាមរយៈការយកពន្ធ។

ចំណែកធនាគារជាតិរុស្ស៊ី វិញ មិនបានគាំទ្រដល់គំនិតដែលថា អនុញ្ញាតឱ្យអ្នកវិនិយោគដែលមិនមានជំនាញ ធ្វើការជួញដូរប្រាក់ឌីជីថល ដូចជា Bitcoin នោះទេ ដោយហេតុថា អាចមានអំពើលាងលុយ និងអំពើបោកបន្លំ។

ក្រោយពីជជែកគ្នាអស់ជាច្រើនឆ្នាំ ធនាគារជាតិរុស្ស៊ី និងរដ្ឋាភិបាល គ្រោងនឹងស្វែងរកចំណុចស្របគ្នាស្ដីពីការកំណត់លើរូបិយវត្ថុឌីជីថលវិមជ្ឈការ ដែលនឹងត្រូវបានដាក់ចេញនៅថ្ងៃសុក្រសប្ដាហ៍នេះ៕

February 17, 2022

មហាសេដ្ឋី Elon Musk បរិច្ចាគភាគហ៊ុន Tesla តម្លៃជិត ៦ ពាន់លានដុល្លារអាម៉េរិក

អ្នកមានជាងគេបង្អស់ក្នុងពិភពលោក បានឱ្យដឹងថា លោកបានបរិច្ចាគភាគហ៊ុន Tesla ជាង ៥ លានហ៊ុន នៅក្នុងខែវិច្ឆិកា ឆ្នាំ ២០២១។

យោងតាមឯកសារដែលបានបញ្ជូនទៅកាន់គណៈកម្មការមូលបត្រអាម៉េរិក (SEC) CEO របស់ក្រុមហ៊ុនផលិតរថយន្តអគ្គិសនី Tesla លោក Elon Musk បានបរិច្ចាគភាគហ៊ុន Tesla ជាង ៥ លានហ៊ុន នៅក្នុងអំឡុងពេលចន្លោះពីថ្ងៃទី ១៩ វិច្ឆិកា ដល់ ២៩ វិច្ឆិកា ២០២១។ ភាគហ៊ុនទាំងនេះមានតម្លៃ ៥.៧ ពាន់លានដុល្លារអាម៉េរិក បើគិតទៅតាមតម្លៃមធ្យមនៅក្នុងដំណាក់កាលនោះ។

នេះគឺជាខ្ទង់បរិច្ចាគដ៏សម្បើមមួយនៅក្នុងប្រវត្តិសាស្ត្រ។ ឈ្មោះនៃអង្គការដែលបានទទួលការបរិច្ចាគនេះ មិនត្រូវបានបង្ហើបឱ្យដឹងនោះទេ។

ខ្ទង់បរិច្ចាគខាងលើត្រូវបានធ្វើឡើងចំពេលមានសង្គ្រាមពាក្យសម្ដីរវាងលោក Elon Musk និងអ្នកនយោបាយអាម៉េរិក ទាក់ទិននឹងវិសមភាពនៃប្រាក់ចំណូល និងអត្រាពន្ធលើទ្រព្យសម្បត្តិ។

Bloomberg បានគណនាឃើញថា ប្រាក់ពន្ធដែលលោក Musk ត្រូវបង់ជូនរដ្ឋ គឺប្រមាណ ១០ ពាន់លានដុល្លារ ដោយយោងទៅលើសិទ្ធិជ្រើសទិញភាគហ៊ុនក្នុងតម្លៃទាបជាងទីផ្សារដែលលោកបានធ្វើឡើងកាលពីឆ្នាំកន្លង។

ប៉ុន្មានឆ្នាំមកនេះ លោក Musk បានធ្វើសកម្មភាពមនុស្សធម៌ញឹកញាប់ជាងមុន។ លោកធ្លាប់បានផ្ដល់ជំនួយ ១០០ លានដុល្លារដល់ការប្រកួតប្រជែងកាត់បន្ថយកាបូន និងជូន ៥ លានដុល្លារដល់អ្នកវិទ្យាសាស្ត្រដែលមានការស្រាវជ្រាវទាក់ទងនឹងកូវីដ-១។ល។

លោក Musk បច្ចុប្បន្នគឺជាអ្នកមានជាងគេបង្អស់ក្នុងពិភពលោក ដោយមានទ្រព្យ ២២៧ ពាន់លានដុល្លារអាម៉េរិក នេះបើតាម Bloomberg Billionaires Index៕

February 15, 2022

ទិដ្ឋភាព «ដៃក្នុងដៃ ភ្នែកក្នុងភ្នែក» របស់មហាសេដ្ឋី Jeff Bezos និងមិត្តស្រី នៅទីសាធារណៈ

មហាសេដ្ឋីអាម៉េរិក លោក Jeff Bezos និងមិត្តស្រី ថ្មីៗនេះ បានបញ្ចេញឥរិយាបថប្រលោមស្នេហ៍ដ៏គួរឱ្យទើសភ្នែកនៅទីសាធារណៈ ធ្វើឱ្យមានការរិះមួយចំនួន។

នៅលើទំព័រ Instagram អ្នកស្រី Lauren Sanchez ដែលជាគូស្នេហ៍បច្ចុប្បន្នរបស់មហាសេដ្ឋី Bezos បានបង្ហោះរូបថតមួយចំនួនស្ដីពីការអបអរសាទរជ័យជំនះរបស់ក្រុមបាល់ឱប Los Angeles Rams។ អ្នកស្រីនៅតែស្លៀកពាក់បែបទាក់ទាញ ហើយកាន់ដៃមហាសេដ្ឋី Bezos សើចញញឹមយ៉ាងពព្រាយ បើទោះជាមានការរិះគន់កន្លងមកថា ជា «មនុស្សទី ៣» ឬជា «អ្នកជ្រែកស្នេហ៍»។ល។

ក្នុងថ្ងៃដដែល រូបថតដែលថតជាមួយ Bezos រួមនឹងប្ដីប្រពន្ធ Tony Gonzales និងកូនប្រុស Nikko ក៏ត្រូវបានអ្នកស្រី Lauren Sanchez បង្ហោះលើបណ្ដាញសង្គម Instagram ផងដែរ ដើម្បីជូនពរថ្ងៃខួបកំណើតលើកទី ២១ របស់កូន។ ក្នុងរូបថតនេះ អ្នកស្រីយកដៃឱបចង្កេះរបស់លោក Bezos និងទេរទៅរកមហាសេដ្ឋីរូបនេះ។

ក្រៅពីនេះ នៅមានរូបថតមួយចំនួនទៀត ដែលមើលទៅពិតជាគួរឱ្យទើសភ្នែក សម្រាប់អ្នកគាំទ្ររបស់លោកស្រី MacKenzie Scott ដែលជាអតីតភរិយារបស់លោក Bezos។

កន្លងមក បើទោះជាមានមតិរិះគន់យ៉ាងខ្លាំងក្លាពីសំណាក់សាធារណជនក៏ដោយ មហាសេដ្ឋី Bezos និងអ្នកស្រី Lauren នៅតែអាចរក្សាទំនាក់ទំនងស្នេហានេះបានរយៈពេល ៣ ឆ្នាំ គិតមកដល់បច្ចុប្បន្ន។

ពួកគេត្រូវបានប្រទះឃើញ «ដៃក្នុងដៃ ភ្នែកក្នុងភ្នែក» ជាញឹកញាប់នៅតាមដងផ្លូវក្នុងក្រុង New York៕

February 15, 2022

វៀតណាម បានបើកឡើងវិញទាំងស្រុងនូវជើងហោះហើរអន្តរជាតិ

ចាប់ពីថ្ងៃទី ១៥ កុម្ភៈ នេះ នាយកដ្ឋានអាកាសចរណ៍វៀតណាម ចាប់ផ្ដើមបើកដំណើរការជើងហោះហើរអន្តរជាតិជាប្រក្រតីឡើងវិញ បន្ទាប់ពីបានផ្អាកអស់រយៈពេលជិត ២ ឆ្នាំ។

ដើម្បីត្រៀមសម្រាប់ទទួលភ្ញៀវទេសចរណ៍បរទេសឱ្យបានមុនថ្ងៃទី ៣១ មីនា វៀតណាម បានសម្រេចដកចេញរាល់ការកំណត់លើចំនួនជើងហោះហើរអន្តរជាតិ។ រាល់ការហោះហើរត្រលប់មករកធម្មតាដូចកាលពីមុនកូវីដ-១៩ មកដល់។

វៀតណាម នឹងផ្ដល់ការអនុញ្ញាតឱ្យក្រុមហ៊ុនអាកាសចរណ៍ទាំងឡាយ ធ្វើការហោះហើរចេញចូលប្រទេសនេះ បន្ទាប់ពីទទួលបានការឯកភាពពីបណ្ដាប្រទេស។

មុននោះ ចាប់ពីថ្ងៃទី ១ មករា ២០២២ វៀតណាម បានបើកជើងហោះហើរអន្តរជាតិទៅកាន់ទីក្រុងមួយចំនួនក្នុងដំណាក់កាលទី ១ រួមមាន តូក្យូ សេអ៊ូល តៃប៉ិ បាងកក សិង្ហបុរី វៀងចន្ទន៍ ភ្នំពេញ សានហ្វ្រានស៊ីស្កូ/ឡូសអាន់ជ័រលេស ប្រទេសចិន (ចិន មិនទាន់អនុញ្ញាត) និងបន្តបើកជើងហោះហើរទៅកាន់ អូស្ត្រាលី រុស្ស៊ី អង់គ្លេស បារាំង អាល្លឺម៉ង់ នៅក្នុងខែកុម្ភៈ ២០២២។

អ្នកដំណើរលើយន្តហោះអន្តរជាតិដែលចេញចូល វៀតណាម នឹងត្រូវអនុវត្តវិធានការទប់ស្កាត់ការឆ្លងកូវីដ-១៩ ក្នុងនោះ ពេលឡើងយន្តហោះ អ្នកដំណើរត្រូវមានលិខិតបញ្ជាក់អំពីលទ្ធផលតេស្ត PCR អវិជ្ជមាននឹង កូវីដ-១៩ ក្នុងរយៈ ៧២ ម៉ោង, លិខិតបញ្ជាក់ការចាក់វ៉ាក់សាំង ឬលិខិតបញ្ជាក់អំពីការជាសះស្បើយពីជំងឺកូវីដ-១។

បន្ទាប់ពីចុះពីយន្តហោះ អ្នកដំណើរដែលបានចាក់វ៉ាក់សាំងពេញលេញ ឬអ្នកដែលបានជាសះស្បើយ នឹងត្រូវធ្វើចត្តាឡីស័កក្នុងផ្ទះ ៣ ថ្ងៃ ប៉ុន្តែ បើចាក់វ៉ាក់សាំងមិនទាន់គ្រប់ដូស ត្រូវធ្វើចត្តាឡីស័យ ៧ ថ្ងៃ។ អ្នកដំណើរដែលចាក់វ៉ាក់សាំងមិនទាន់ពេញលេញ ឬមិនទាន់ត្រូវបានទទួលស្គាល់ថា បានជាពីជំងឺ នឹងត្រូវមានលិខិតបញ្ជាក់ថា មានលក្ខណៈគ្រប់គ្រាប់ដែលអាចធ្វើចត្តាឡីស័កនៅផ្ទះ ឬលិខិតបញ្ជាក់ថា បានកក់បន្ទប់សណ្ឋាគារ (តិចបំផុត ៧ ថ្ងៃ) រួចហើយ។ នៅពេលអ្នកដំណើរបំពេញបែបបទឡើងយន្តហោះ ក្រុមហ៊ុនអាកាសចរណ៍នឹងពិនិត្យលិខិតទាំងនេះ៕

February 15, 2022

បេក្ខភាពប្រធានាធិបតីនិម្មិតដំបូងគេក្នុងពិភពលោក កំពុងបង្កការចាប់អារម្មណ៍ខ្លាំងនៅ កូរ៉េខាងត្បូង

នៅក្នុងការិយាល័យឃោសនារកសំឡេងឆ្នោតនៅ ទីក្រុងសេអ៊ូល ក្រុមបុគ្គលិកវ័យក្មេង ប្រើប្រាស់បច្ចេកវិទ្យា deepfake ដើម្បីបង្កើតបេក្ខភាពប្រធានាធិបតីនិម្មិត។

ក្រុមបច្ចេកទេស បង្កើតរូបភាពឌីជីថលមួយ និងដាក់ឈ្មោះឱ្យថា AI Yoon តំណាងឱ្យលោក Yoon Suk-yeol ដែលជាបេក្ខភាពប្រធានាធិបតីរបស់បក្សប្រឆាំង (បក្សកម្លាំងប្រជាជន)។ AI Yoon ត្រូវបានបង្កើតឡើង មួយផ្នែកដោយការប្រើប្រាស់វីដេអូរាប់សិបម៉ោង ដែលថតសកម្មភាពរបស់លោក Yoon Suk-yeol និងដើម្បីជួយឃោសនារកសំឡេងឆ្នោតនៅមុនការបោះឆ្នោតថ្ងៃទី ៩ មីនា។

បញ្ញាសិប្បនិម្មិត (AI) ធ្លាប់បានបង្ហាញខ្លួនក្នុងការបោះឆ្នោតមួយចំនួនរួចមកហើយ។ នៅលើអ៊ីនធើណិត ធ្លាប់មានវីដេអូ deepfake ខ្លះ បង្ហាញថា Barack Obama រិះគន់លោក Donald Trump ឬបេក្ខភាពអភិបាលក្រុង New York លោក Andrew Yang កំពុងឃោសនារកសំឡេងឆ្នោត នៅក្នុងពិភពនិម្មិត។ ក៏ប៉ុន្តែ ក្រុមអ្នកអភិវឌ្ឍយល់ថា AI Yoon គឺជាបេក្ខភាពដែលឃោសនារកសំឡេងឆ្នោតផ្លូវការដំបូងគេបង្អស់ក្នុងពិភពលោក ដែលប្រើប្រាស់បច្ចេកវិទ្យា deepfake ជារូបភាពបង្កើតឡើងដោយ AI និងកំពុងត្រូវបានចាប់អារម្មណ៍ខ្លាំងនៅ កូរ៉េខាងត្បូង។

ដោយមានសក់ពណ៌ខ្មៅរលើប និងស្លៀកពាក់ឈុត vest ដ៏សង្ហា AI Yoon ដូចទៅនឹងមនុស្សពិតខ្លាំងណាស់ ប៉ុន្តែបែរជាប្រើប្រាស់ពាក្យពេចន៍កំប្លុកកំប្លែង និងរិះគន់ ដើម្បីទាក់ទាញម្ចាស់ឆ្នោតវ័យក្មេងដែលតែងតែតាមដានព័ត៌មាននៅលើអ៊ីនធើណិត។

ចាប់តាំងពីបានបង្ហាញខ្លួនកាលពីថ្ងៃទី ១ មករា AI Yoon បានទាក់ទាញអ្នកចូលមើលរាប់លានលើក។ មនុស្សរាប់ម៉ឺននាក់ បានដាក់ជាសំណួរឱ្យ AI Yoon ឆ្លើយ ប៉ុន្តែ ភាគច្រើនគឺជាសំណួរដែលមិនទាក់ទងនឹងគោលនយោបាយ។

«ប្រធានាធិបតី Moon Jae-in និងបេក្ខភាពរបស់គូប្រឆាំង Lee Jae-myung ជិតលង់ទឹកស្លាប់។ លោកជ្រើសរើសអ្នកណា? អ្នកលេងអ៊ីនធើណិតម្នាក់ សួរដូច្នេះ។

បេក្ខភាពប្រធានាធិបតី AI Yoon ឆ្លើយថា៖ «ខ្ញុំជូនពរឱ្យអ្នកទាំងពីរជួបតែសំណាងល្អ»។

បេក្ខភាព AI Yoon បានថតសំឡេងជាឃ្លានិយាយជាង ៣,០០០ ឃ្លា ដើម្បីធ្វើជាមូលដ្ឋានទិន្នន័យសម្រាប់ AI។ នេះបើតាម Baik Kyeong-hoon ប្រធានក្រុមការងារច្នៃប្រឌិត។ ប៉ុន្តែ តាមពិត ខ្លឹមសារដែល AI Yoon និយាយគឺសុទ្ធតែត្រូវបានសរសេរដោយក្រុមគ្រប់គ្រងយុទ្ធនាការឃោសនា។

វិធីច្នៃប្រឌិតនេះ ទទួលបានជោគជ័យ។ ការថ្លែងរបស់ បេក្ខភាព AI Yoon បានក្លាយជាប្រធានបទនៃការជជែកនានានៅលើសារព័ត៌មានកូរ៉េខាងត្បូង។ មនុស្ស ៧ លាននាក់បានចូលទៅគេហទំព័រ Wiki Yoon ដើម្បីដាក់ជាសំណួរដល់បេក្ខភាពប្រធានាធិបតិនិម្មិតនេះ។

Ko Sam-seog ជាអ្នកធ្វើការឱ្យ Lee Jae-myung ដែលជាគូប្រជែងសំខាន់របស់លោក Yoon Suk-yeol បានចោទបេក្ខភាពនិម្មិតនេះថា ប្រើប្រាស់ពាក្យពេចន៍មិនសមស្របជាមួយនឹងស្ដង់ដានយោបាយ។

ទោះជាយ៉ាងណាក៏ដោយ បេក្ខភាព AI Yoon កំពុងបង្ហាញប្រសិទ្ធភាពខ្ពស់ នៅពេលបានជួយឱ្យលោក Yoon Suk-yeol នាំមុខគេនៅក្នុងការស្ទង់មតិលើក្រុមយុវវ័យដែលមានអាយុខ្ទង់ ២០ ឆ្នាំ។

គណៈកម្មការរៀបចំការបោះឆ្នោតរបស់ កូរ៉េខាងត្បូង បានអនុញ្ញាតឱ្យបេក្ខភាពទាំងឡាយ ប្រើប្រាស់ AI នៅក្នុងយុទ្ធនាការរកសំឡេងឆ្នោត ជាមួយនឹងលក្ខខណ្ឌ «ត្រូវនិយាយឱ្យបានច្បាស់ថា ជាបច្ចេកវិទ្យា deepfake និងមិនត្រូវលើកឡើងអំពីព័ត៌មានមិនពិត»៕

February 15, 2022

ទិវានៃក្ដីស្រលាញ់ (Valentine’s Day) ឆ្នាំ ២០២២៖ ៧៦% នៃអ្នកដែលមានគម្រោងធ្វើខួបអនុស្សាវរីយ៍ យល់ថា ជារឿងសំខាន់ដែលត្រូវធ្វើខួប នៅក្នុងកាលៈទេសៈនេះ

(សហរដ្ឋអាម៉េរិក)-យោងតាមការស្ទង់មតិប្រចាំឆ្នាំដែលត្រូវបានប្រកាសនាថ្ងៃនេះដោយសម្ព័ន្ធជាតិលក់រាយ និង Prosper Insights & Analytics ជាមធ្យម មនុស្សម្នាក់គ្រោងនឹងចំណាយ ១៧៥.៤១ ដុល្លារអាម៉េរិក សម្រាប់អំណោយនៅក្នុងទិវានៃក្ដីស្រលាញ់។

ការស្រាវជ្រាវរបស់សម្ព័ន្ធជាតិលក់រាយ និង Prosper Insights & Analytics បានឱ្យដឹងថា ការចំណាយសម្រាប់ទិវានៃក្ដីស្រលាញ់ នឹងឡើងដល់ ២៣.៩ ពាន់លានដុល្លារក្នុងឆ្នាំ ២០២២ ខណៈឆ្នាំ ២០២១ តួលេខនេះត្រឹមតែ ២១.៨ ពាន់លានដុល្លារ។

«ទិវានៃក្ដីស្រលាញ់ គឺជាឱកាសពិសេសសម្រាប់ពលរដ្ឋអាម៉េរិកភាគច្រើន។ ជាងនេះទៀត នៅពេលយើងបានចាកផុតពីវិបត្តិកូវីដ-១៩ ក្រុមលក់រាយបានត្រៀមរួចរាល់ដើម្បីជួយពួកគេឱ្យទទួលបានបទពិសោធន៍មិនអាចបំភ្លេចបាន និងមានន័យជ្រៅ នៅក្នុងទិវានេះ» លោក Matthew Shay ដែលជាប្រធាន និងជានាយកប្រតិបត្តិរបស់ NRF (National Research Foundation) បានថ្លែងដូច្នេះ។

ពលរដ្ឋអាម៉េរិក នឹងចំណាយប្រាក់ ២៣.៩ ពាន់លានដុល្លារក្នុងទិវានៃក្ដីស្រលាញ់ ឆ្នាំ ២០២២

ជាក់ស្ដែង ជាងពាក់កណ្ដាល (៥៣%) នៃអ្នកប្រើប្រាស់នៅ សហរដ្ឋអាម៉េរិក មានគម្រោងប្រារព្ធពិធីអនុស្សាវរីយ៍នៅឆ្នាំ ២០២២ ដែលតួលេខនេះខ្ពស់ជាងបន្តិច ធៀបនឹង ៥២% ក្នុងឆ្នាំ ២០២១។ ទន្ទឹមនឹងនេះ ប្រហែល ៧៦% ក្នុងចំណោមអ្នកដែលមានគម្រោងប្រារព្ធខួបអនុស្សាវរីយ៍ យល់ថា នេះគឺជារឿងសំខាន់ដែលត្រូវធ្វើ ពិសេសគឺនៅក្នុងស្ថានការណ៍នៃជំងឺរាតត្បាតនេះ។

យោងតាមការស្ទង់មតិ មនុស្សម្នាក់មានគម្រោងចំណាយជាមធ្យម ១៧៥.៤១ ដុល្លារអាម៉េរិក សម្រាប់កាដូនៅក្នុងទិវានៃក្ដីស្រលាញ់។ ចំនួននៃការចំណាយនេះ កើនឡើងបន្តិច ធៀបនឹង ១៦៤.៧៦ ដុល្លារ កាលពីឆ្នាំ ២០២១។

ចំណែកកាដូដែលនឹងត្រូវបាននិយមបំផុតនៅក្នុងឆ្នាំនេះ រួមមានដូចជា ស្ករគ្រាប់ (៥៦%), លិខិតជូនពរ (៤០%) និង ផ្កា (៣៧%)។ ប្រមាណជា ៣១% នៃអ្នកដែលត្រូវបានស្ទង់មតិ ឆ្លើយថា នឹងទទួលទានអាហារក្នុងរាត្រីទិវានៃក្ដីស្រលាញ់ប្រកបដោយរ៉ូមេនទិច ខណៈតួលេខនេះកាលពីឆ្នាំ ២០២១ មាន ២៤%។

ទន្ទឹមនឹងនេះ ជិត ២២% នៃអ្នកត្រូវបានសួរ ប្រាប់ថា នឹងជ្រើសរើសគ្រឿងអលង្ការជូនមនុស្សពិសេស។ ការចំណាយសម្រាប់កាដូជាគ្រឿងអលង្ការឆ្នាំនេះ ត្រូវបានគណនាឃើញថា ប្រហែល ៦.២ ពាន់លានដុល្លារ ខ្ពស់ជាងច្រើន ធៀបនឹង ៤.១ ពាន់លានដុល្លារកាលពីឆ្នាំ ២០២១ និងជាកម្រិតខ្ពស់បំផុតក្នុងប្រវត្តិសាស្ត្រ។

«បើទោះជាកាដូជាប្រពៃណីនៅក្នុងទិវានៃក្ដីស្រលាញ់ ដូចជា ស្ករគ្រាប់ និងផ្កាជាដើម ហាក់នៅតែជាអំណោយទាន់សម័យ ប៉ុន្តែ អ្នកជូន និងអ្នកទទួលសុទ្ធតែមានអារម្មណ៍ថា មានផាសុកភាពជាង នៅពេលបានទៅបរិភោគអាហារពិសេស ឬចូលរួមទទួលយកបទពិសោធន៍ថ្មី ធៀបនឹងឆ្នាំមុន» លោក Philips Rist នាយកប្រតិបត្តិរងនៃក្រុមហ៊ុន Prosper Insights បញ្ជាក់ដូច្នេះ៕

February 14, 2022

រុស្ស៊ី បានអភិវឌ្ឍបច្ចេកវិទ្យាដែលអាចរកឃើញវីរុស SARS-CoV-2 (កូវីដ-១៩) នៅដំណាក់កាលដំបូងបំផុតបន្ទាប់ពីបានឆ្លង

យោងតាមសារព័ត៌មាន Sputniknews អាជ្ញាធរការពារផលប្រយោជន៍អ្នកប្រើប្រាស់ និងសុខភាពមនុស្ស របស់ សហព័ន្ធរុស្ស៊ី (Rospotrebnadzor) បង្ហើបឱ្យដឹងថា ក្រុមអ្នកវិទ្យាសាស្ត្រនៃវិទ្យាស្ថានជាតិស្រាវជ្រាវជំងឺឆ្លងរបស់ខ្លួន បានអភិវឌ្ឍបច្ចេកវិទ្យាដែលអនុញ្ញាតឱ្យរកឃើញវីរុស SARS-CoV-2 ក្នុងដំណាក់កាលដំបូងបំផុត បន្ទាប់ពីបានឆ្លងមកមនុស្សម្នាក់ នៅពេលកំហាប់វីរុសស្ថិតក្នុងកម្រិតទាបបំផុត។

ក្នុងស្ថានការណ៍កូវីដ-១៩ កំពុងរាតត្បាត កម្រិតប្រសិទ្ធភាពនៃឧបករណ៍ធ្វើតេស្តសំណាក និងការដែលឆាប់ប្រមូលបានលទ្ធផលគឺជាកត្តាសំខាន់បំផុតរបស់ប្រព័ន្ធវិនិច្ឆយរោគ។ បច្ចេកវិទ្យាថ្មីរបស់ Rospotrebnadzor មានសមត្ថភាពឆ្លើយតបនឹងតម្រូវការទាំងអស់ខាងលើនេះ។

សមាជិកម្នាក់នៃក្រុមស្រាវជ្រាវខាងលើ បានប្រាប់ថា របកគំហើញនេះអាចក្លាយជាមូលដ្ឋានសម្រាប់ប្រព័ន្ធវិនិច្ឆយរោគរហ័សនៅនឹងកន្លែងអ្នកជំងឺ ឬគោលដៅធ្វើតេស្ត។ ប្រព័ន្ធដែលប្រើប្រាស់បច្ចេកវិទ្យានេះនឹងមិនត្រូវការឧបករណ៍ដែលមានបច្ចេកវិទ្យាខ្ពស់ ដូច្នេះ ការចំណាយក្នុងការផលិតឧបករណ៍ធ្វើតេស្តនឹងទាប តែផ្ដល់លទ្ធផលបានយ៉ាងលឿន ជួយឱ្យមានការព្យាបាលទាន់ពេល។

បច្ចុប្បន្ន បច្ចេកវិទ្យារបស់ Rospotrebnadzor ត្រូវបានចុះបញ្ជិកានៅការិយាល័យផ្ដល់ប័ណ្ណកម្មសិទ្ធិបញ្ញារបស់ រុស្ស៊ី (Rospatent) រួចហើយ។

របកគំហើញរបស់ក្នុងអ្នកវិទ្យាសាស្ត្ររុស្ស៊ីនេះគឺទាក់ទងទៅនឹងបច្ចេកទេសតំណពូជ និងបច្ចេកវិទ្យាជីវសាស្ត្រ ដោយយោងទៅលើ ម៉ូលេគុល RNA នាំផ្លូវ (Guide RNA/gRNA) នឹងអាចត្រូវបានប្រើក្នុងប្រព័ន្ធ CRISPR-Cas14 ដើម្បីស្វែងរក RNA របស់ វីរុសកូវីដ-១៩ ប្រកបដោយភាពទាន់ចិត្ត៕

February 14, 2022

មហាសេដ្ឋី ប៊ីល ហ្គេត (Bill Gates) សោកស្ដាយចំពោះ «យុវវ័យ» របស់ខ្លួន កាលពីនៅរៀន ព្រោះតែ «មិនចេះសប្បាយ»!

មហាសេដ្ឋីជនជាតិអាម៉េរិក លោក Bill Gates បានឱ្យដឹងថា ប្រការដែលលោកសោកស្ដាយបំផុតគឺ កាលពីនៅរៀន លោកមិនបានចូលរួមក្នុងពិធីជប់លៀង និងដើរលេងសប្បាយឱ្យបានច្រើននឹងគេ។

ឆ្នាំ ១៩៧៥ លោក Bill Gates បានសម្រេចចិត្តបោះបង់ការសិក្សានៅមហាវិទ្យាល័យ Harvard ដ៏ល្បីល្បាញ ប៉ុន្តែនោះមិនមែនជាប្រការដែលធ្វើឱ្យលោកសោកស្ដាយបំផុតនោះទេ។ នៅក្នុងពិធីជួបពិភាក្សាជាមួយក្រុមនិស្សិតរបស់សាលាមួយកាលពីប៉ុន្មានឆ្នាំមុន លោក Bill Gates ថ្លែងថា ប្រការដែលលោកសោកស្ដាយជាងគេបំផុតគឺ កាលពីជំនាន់នៅរៀន គាត់មិនបានចូលរួមក្នុងពិធីជប់លៀង និងដើរលេងសប្បាយឱ្យបានច្រើន។

«ខ្ញុំបានរំលងចោលប្រការជាច្រើន។ ខ្ញុំមិនធ្លាប់បានចូលរួមក្នុងការប្រកួតបាល់ឱប បាល់បោះ ឬកីឡាប្រភេទណាមួយ ពេលនៅ Harvard។ គ្រប់យ៉ាងដែលខ្ញុំបានធ្វើគឺ រៀន និងស្រាវជ្រាវ» លោក Bill Gates ប្រាប់ដូច្នេះ។

លោកបន្តថា «ខ្ញុំមិនបានចូលរួមធ្វើសកម្មភាពសង្គម ឬក្លឹប ឬក្រុមណាមួយឱ្យបានញឹកញាប់។ ខ្ញុំថែមទាំងមិនបានដឹងអំពីវត្តមានរបស់ពួកវា។

Bill Gates និង លោក Paul Allen បង្កើតក្រុមហ៊ុន Microsoft កាលពីឆ្នាំ ១៩៧៥

មហាសេដ្ឋីរូបនេះយល់ថា ការចូលរួមធ្វើសកម្មភាពច្រើន និងជួបមនុស្សច្រើននឹងនាំមកនូវប្រយោជន៍មិនតិចនោះទេសម្រាប់ជោគជ័យនាពេលអនាគត ជាជាងការគិតតែពីការរៀនសូត្រ និងស្រាវជ្រាវ។

ទោះជាយ៉ាងណាក៏ដោយ លោកនៅតែជាឧទាហរណ៍លេចធ្លោស្ដីពីមនុស្សម្នាក់អាចរកឃើញផ្លូវសម្រាប់ខ្លួនឯង និងជោគជ័យត្រចះត្រចង់ ដោយមិនបាច់មានសញ្ញាបត្រមហាវិទ្យាល័យ នៅក្នុងចំណោមបុគ្គលជាច្រើនដែលបានបោះបង់ការសិក្សានៅមហាវិទ្យាល័យ ដើម្បីកសាងមុខជំនួញផ្ទាល់ខ្លួន ក្នុងនោះមានដូចជា សហស្ថាបនិករបស់ Facebook លោក Mark Zuckerberg, Steve Jobs ស្ថាបនិករបស់ Apple ឬ Michael Dell ដែលជា CEO របស់ Dell Technologies ជាដើម។

ក៏ប៉ុន្តែ នេះមិនមែនមានន័យថា គ្រប់គ្នាគួរបោះបង់ការសិក្សា ដើម្បីចេញរកស៊ីនោះទេ។ ជំនួសមកវិញ គ្រប់គ្នាត្រូវមានការវាយតម្លៃឱ្យបានគ្រប់ជ្រុងជ្រោយ មុននឹងសម្រេចយកបុគ្គលណាមួយជាគំរូ៕

February 12, 2022

ប្រទេសចិន អាចនឹងមិនបានក្លាយជា «មហាយក្សសេដ្ឋកិច្ចទីមួយរបស់ពិភពលោក»! នេះជាមូលហេតុ…

វិបត្តិបំណុល ការដាក់ខ្លួនឱ្យដាច់ដោយឡែកពីខាងក្រៅ និងចំនួនប្រជាជនចេះតែថយចុះ គឺជាកត្តាដែលអាចក្លាយជាឧបសគ្គដែលរារាំង ចិន នៅលើវិថីក្លាយជាមហាយក្សសេដ្ឋកិច្ចទីមួយរបស់ពិភពលោក។

បើតាមនិន្នាការបច្ចុប្បន្ន ប្រទេសចិន នឹងយកឈ្នះ សហរដ្ឋអាម៉េរិក ហើយដណ្ដើមបានតំណែងលេខ ១ នៅក្នុងចំណោមប្រទេសមហាយក្សសេដ្ឋកិច្ចពិភពលោក ក្រោយរយៈពេលប្រហែល ១ ទសវត្សរ៍ទៀត។ ក៏ប៉ុន្តែ ពុំមានអ្វីដែលអាចធានាបាននូវការរំពឹងទុកនេះ។

យោងតាម Bloomberg កត្តាដែលបាននិយាយខាងដើម អាចធ្វើឱ្យ ប្រទេសចិន នៅតែឈរលំដាប់លេខ ២ បន្ទាប់ពី សហរដ្ឋអាម៉េរិក។ Bloomberg Economics បានបង្កើតរូបមន្តស្ដីពី សេណារីយ៉ោ ចំនួន ៣ ដែលអាចកើតមានឡើងនៅ ប្រទេសចិន។

សេណារីយ៉ោ ទីមួយ គឺជា សេណារីយ៉ោ ដែលអាចទៅរួចសម្រាប់ ប្រទេសចិន៖ ប្រទេសនេះនឹងយកឈ្នះលើ សហរដ្ឋអាម៉េរិក នៅឆ្នាំ ២០៣០។

កំណែទម្រង់ថ្មី និងការច្នៃប្រឌិត គឺជាកត្តាសំខាន់ដើម្បីជំរុញឱ្យមានការរីកចម្រើន និងដោយមានប្រភពវិនិយោគធំសម្រាប់វិស័យស្រាវជ្រាវ អភិវឌ្ឍជាដើម ប្រទេសចិន កំពុងតែលេចធ្លោជាងគេបង្អស់។ ដូច្នេះ ចិន មានលទ្ធភាពអាចផ្ដួល អាម៉េរិក ដើម្បីក្លាយជាប្រទេសដែលមានសេដ្ឋកិច្ចធំជាងគេទីមួយក្នុងពិភពលោក។

សេណារីយ៉ោ ទីពីរ គឺវិបត្តិហិរញ្ញវត្ថុ។ នៅពេលដែល ប្រទេសជប៉ុន ស្វែងរកវិធីដើម្បីក្លាយជាមហាយក្សសេដ្ឋកិច្ចនាំមុខគេ ប្រទេសនេះបានធ្លាក់ទៅក្នុងវិបត្តិបំណុល។ ប្រការដូចគ្នានេះក៏អាចកើតឡើងចំពោះ ប្រទេសចិន។ ស្ថានភាពបំណុលកើនឡើងខ្ពស់ចាប់តាំងពីឆ្នាំ ២០០៨ នៅ ប្រទេសចិន គឺជាសញ្ញាប្រកាសអាសន្នកម្រិតពណ៌ក្រហម។

បណ្ដាខឿនសេដ្ឋកិច្ចជឿនលឿនដូចជា សហរដ្ឋអាម៉េរិក ជាដើម មានបំណុលខ្ពស់ ប៉ុន្តែ ពួកគេបានឈានដល់ដំណាក់កាលរកចំណូលបានក្នុងកម្រិតខ្ពស់។ ឥណ្ឌា និងបណ្ដាប្រទេសដែលមានចំណូលទាប បង្កលក្ខណៈងាយស្រួលដើម្បីអភិវឌ្ឍ និងរីកចម្រើន។ ចំណែកចំណូលទាប និងបំណុលខ្ពស់របស់ ចិន ធ្វើឱ្យប្រទេសនេះ ធ្លាក់ទៅក្នុងស្ថានការណ៍លំបាក។

ករណីវិបត្តិបំណុលរបស់ក្រុមហ៊ុន Evergrande Group និងបញ្ហាជាច្រើនដែលកើតឡើងលើបណ្ដាក្រុមហ៊ុនអភិវឌ្ឍអចលនទ្រព្យនៅ ប្រទេសចិន បានបង្ហាញថា ប្រទេសនេះមានគ្រឹះមិនរឹងមាំ។ លទ្ធផលគឺថា ចិន អាចធ្លាក់ទៅក្នុងវិបត្តិហិរញ្ញវត្ថុ ធ្វើឱ្យល្បឿននៃកំណើនសេដ្ឋកិច្ចត្រូវថយចុះ នាំឱ្យជាប់នៅក្នុងលំដាប់ទីពីរដដែល។

សេណារីយ៉ោ ទីបី គឺ ល្បឿននៃកំណើនសេដ្ឋកិច្ចធ្លាក់ចុះ។ មិនចាំបាច់មានវិបត្តិហិរញ្ញវត្ថុ ក៏ការលោតឡើងរបស់ ចិន នៅតែអាចត្រូវបានបន្ថយល្បឿន។ ការរួមផ្សំរវាងកត្តាមួយចំនួនដូចជា ការដាក់ខ្លួនដោយឡែកពីពិភពខាងក្រៅ ឧបសគ្គទាក់ទងនឹងប្រជាសាស្ត្រ និងចំណុចអវិជ្ជមានក្នុងការគ្រប់គ្រង អាចបង្កឱ្យមានផលប៉ះពាល់ដូចគ្នា។

សង្គ្រាមពាណិជ្ជកម្មរវាង ចិន-អាម៉េរិក លែងនៅជារឿងក្ដៅគគុកដូចមុន ប៉ុន្តែ អត្រាពន្ធដែល អាម៉េរិក អនុវត្តចំពោះ ប្រទេសចិន នៅតែខ្ពស់។ ស្ថានការណ៍នៃការដាក់ខ្លួនឯងឱ្យនៅដាច់ដោយឡែកពីអន្តរជាតិ ពិសេសគឺបញ្ហាដែលកើតឡើងដោយសារ កូវីដ-១៩ បូករួមនឹងរនាំងនៃទីផ្សារសកល និងបច្ចេកវិទ្យា អាចកាត់បន្ថយល្បឿននៃកំណើនសេដ្ឋកិច្ចរបស់ ប្រទេសចិន បានដែរ។

ចិន មានកម្មវិធីវិបុលភាពរួម ក្នុងបំណងដោះស្រាយបញ្ហាវិសមភាពនានានៅក្នុងទីផ្សារ ប៉ុន្តែ វាក៏ជាការសំពងមួយយ៉ាងធ្ងន់ធ្ងន់ទៅលើវិនិយោគិន។

ការបញ្ចប់គោលនយោបាយកូនមួយគឺជាក្ដីសង្ឃឹមរបស់ ប្រទេសចិន ប៉ុន្តែ ចំនួនប្រជាជនក្នុងវ័យពលកម្មដែលចេះតែថយចុះពីមួយថ្ងៃទៅមួយថ្ងៃ នឹងជាកម្លាំងរារាំងដល់កំណើនសេដ្ឋកិច្ច។

ជាលទ្ធផល ប្រទេសចិន អាចធ្លាក់ចូលទៅក្នុងផ្លូវដែលមានកំណើនសេដ្ឋកិច្ចយឺតជាងបច្ចុប្បន្ន ហើយត្រូវដេញតាមឱ្យទាន់ សហរដ្ឋអាម៉េរិក ប៉ុន្តែ មិនអាចតាមពីក្រោយក្នុងគម្លាតឆ្ងាយ៕

February 12, 2022

(វីដេអូ)-«បើសិនផែនដីឈប់វិល ៥ វិនាទី» តើនឹងមានរឿងអ្វីកើតឡើងខ្លះ?

ការដែលផែនដីឈប់វិលភ្លាមៗ អាចបង្កឱ្យមានរលកយក្ស និងខ្យល់ខ្លាំងរហូតដល់ ១,៦៧០ គីឡូម៉ែត្រ/ម៉ោង ដែលអាចហែកកម្ទេចគ្រប់យ៉ាងនៅលើពិភពបៃតងនេះ។

ផែនដីបញ្ចប់រង្វិលជុំមួយជុំខ្លួនវាក្នុងរយៈពេលមួយថ្ងៃ ប្រការនេះបានបង្កើតឱ្យមានថ្ងៃ និងយប់។ ផែនដីវិលគឺកើតឡើងដោយសារការប៉ះទង្គិចនៅក្នុងដំណាក់កាលកកើតកាលពី ៤.៦ ពាន់លានឆ្នាំមុន។ នៅពេលថាសធូលី និងឧស្ម័នដ៏មហិមាមួយវិលជុំវិញព្រះអាទិត្យ ធូលី និងគ្រាប់ថ្ម បានប្រមូលផ្ដុំគ្នា បង្កើតបានជាកម្លាំងដែលរក្សាភពផែនដីវិលទៅតាមទិសតែមួយ ហើយទំនងជាមិនមានកម្លាំងអ្វីមួយក្នុងលំហអវកាស អាចធ្វើឱ្យវាវិលយឺតមកវិញ។ ផែនដីបន្តវិលទៅទៀត និងបន្តក្នុងរយៈពេលរាប់ពាន់លានឆ្នាំ។

ក៏ប៉ុន្តែ បើសិនជាផែនដីឈប់វិលមួយស្របក់ តើគ្រប់យ៉ាងអាចខ្ទាតចេញពីផ្ទៃផែនដី ឬទេ?

នៅពេលផែនដីឈប់វិលភ្លាមៗ បរិយាកាសនឹងនៅតែមានចលនា។ ប្រការនេះមានន័យថា បើទោះជាគ្រប់យ៉ាងបានឈប់ ប៉ុន្តែ ខ្យល់ខ្លាំងនឹងនៅតែបន្តបោកបក់ ហើយនោះមិនមែនជាខ្យល់ខ្លាំងធម្មតា។ វានឹងខ្លាំងជាងច្រើនដង ធៀបនឹងខ្យល់ព្យុះដែលធ្លាប់មានកន្លងមកនៅលើផែនដី។ ប៉ុន្តែ កម្លាំងរបស់ខ្យល់នឹងមានភាពខុសគ្នា ពីតំបន់មួយទៅតំបន់មួយ។

នៅតំបន់អេក្វាទ័រ ឬក្បែរតំបន់អេក្វាទ័រ ផែនដីវិលលឿនបំផុត ហើយនៅទីនេះខ្យល់នឹងមានល្បឿន ១,៦៧០ គីឡូម៉ែត្រ/ម៉ោង អាចបក់អ្នកទៅលើអាកាស។ មិនត្រឹមតែប៉ុណ្ណោះទេ វាក៏មានកម្លាំងគ្រប់គ្រាន់ដើម្បីហែកបំបែកសម្បកផែនដី។ ដូច្នេះ បើទោះកំពុងនៅកណ្ដាលវាល ឬខាងក្នុងអគារដ៏មហារឹងមាំ ខ្យល់នេះក៏នៅតែអាចយកជីវិតអ្នកបាន។

ដើម្បីប្រៀបធៀប៖ ខ្យល់កំបុតត្បូង F៥ ខ្លាំងបំផុត មានល្បឿន ៥១១ គីឡូម៉ែត្រ/ម៉ោង អាចហែក និងដកកម្ទេចផ្ទះចេញពីគ្រឹះ និងកួចរថយន្តទៅលើអាកាស ហើយអាចកម្ទេចហេដ្ឋារចនាសម្ព័ន្ធផ្លូវបេតុងផងដែរ។ ប៉ុន្តែ ខ្យល់ដែលកើតឡើងនៅពេលផែនដី «ចាប់ហ្វ្រាំងបន្ទាន់» គឺខ្លាំងជាងនេះ ៣ ដងឯណោះ។ ដូច្នេះ បើសិនជាបេតុងនៅក្រោមជើងរបស់អ្នកមិនត្រូវខ្ទេច អ្នក និងវត្ថុជាច្រើនផ្សេងទៀតអាចត្រូវបានខ្យល់កួចហោះទៅយ៉ាងឆ្ងាយ ប៉ុន្តែ មិនអាចចេញផុតពីផែនដី។ ល្បឿនដែលអ្នកត្រូវការដើម្បីអាចចេញផុតពីទំនាញផែនដី និងអណ្ដែតត្រសែតក្នុងទីអវកាស គឺប្រហែល ៤០,០០០ គីឡូម៉ែត្រ/ម៉ោង។

នៅតំបន់ផ្សេងលើផែនដី ដូចជា នូវែលសេឡង់ ឬបារាំង អ្នកនឹងបានជួបខ្យល់ដែលមានកម្លាំងខ្សោយជាងបន្តិច ប៉ុន្តែ ល្បឿននៅតែឡើងដល់ ១,១៨០ គីឡូម៉ែត្រ/ម៉ោង ខ្លាំងជាងខ្យល់ព្យុះដែលមានបច្ចុប្បន្ន។ វាក៏នឹងអាចកម្ទេចសំណង់ជាច្រើនប្រភេទ។

យ៉ាងនេះក៏ដោយ ខ្យល់មិនមែនជាការគំរាមតែមួយគត់ ដែលអ្នកនឹងត្រូវប្រឈមក្នុងរយៈពេល ៥ វិនាទីនេះនោះទេ។ ផែនដីរបស់យើង ពុំមែនជាពិភពដែលមានរាងមូលពេញលេញឡើយ។ វានឹងប៉ោងឡើងនៅតំបន់ក្បែរខ្សែអាក្វាទ័រ ដោយសារតែកម្លាំងមួយដែលហៅថា «centrifugal force» កើតឡើងព្រោះតែការវិលរបស់ផែនដី។

បើសិនការវិលរបស់ផែនដី បានឈប់មកវិញ ផែនដីនឹងប្រែរូបរាងទៅជាមូលពេញលេញ។ ទឹកទាំងអស់ដែលប្រមូលផ្ដុំក្បែរខ្សែអេក្វាទ័រ នឹងហូរទៅកាន់ប៉ូលទាំងពីរ បង្កើតបានជារលកយក្សដ៏មហិមា។ ៥ វិនាទីក្រោយ នៅពេលផែនដីចាប់ផ្ដើមវិលក្នុងល្បឿនធម្មតាឡើងវិញ ទឹកនឹងហូរត្រលប់ទៅកាន់កន្លែងដើម។ រលកយក្សនឹងបោកខ្ទប់ពីរលើកទៅលើគ្រប់យ៉ាង។

តំបន់តែមួយគត់ដែលអាចមានសុវត្ថិភាពនៅក្នុងករណីនេះ គឺតំបន់ក្បែរប៉ូលខាងជើង ឬប៉ូលខាងត្បូង។ នៅទីនេះ ខ្យល់នឹងមានកម្លាំងស្រាលបំផុត។ អ្នកប្រហែលជាបានធូរស្រាលក្នុងអារម្មណ៍នៅពេលដឹងថា ផែនដីបានត្រលប់មកសភាពធម្មតា។ ប៉ុន្តែ ពេលនោះគ្រប់យ៉ាងលែងមាននៅលើផែនដីទៀតហើយ។

អគារ ដីកសិកម្ម និងបច្ចេកវិទ្យាគ្រប់ប្រភេទនឹងត្រូវបានកម្ទេច។ មនុស្សរាប់ពាន់លាននាក់នឹងស្លាប់ដោយសារតែកម្លាំងដ៏មហាសាលរបស់ខ្យល់។ ដូច្នេះ បើសិនជាអ្នកចង់នៅមានជីវិតក្នុងស្ថានភាពនេះ ល្អបំផុត អ្នកគួរតែចាប់ផ្ដើមសាងសង់ជម្រកក្រោមដីដែលប្រកបដោយភាពមហារឹងមាំ។

ក៏ប៉ុន្តែ សំណាងល្អ អ្នកវិទ្យាសាស្ត្រព្យាករថា ផែនដីនឹងមិនឈប់វិលសោះឡើយនៅក្នុងរយៈពេលរាប់ពាន់លានឆ្នាំទៀត៕

February 11, 2022

Category: សង្គម និងសេដ្ឋកិច្ច