សង្គម និងសេដ្ឋកិច្ច - La Reine Media

(វីដេអូ)-ស្ងាត់ៗ ប្រទេសចិន សាកល្បងបច្ចេកវិទ្យា «ចាប់យក» ផ្កាយរណបនៅទីអវកាស

ក្រុមហ៊ុន ExoAnalytic Solutions បានរកឃើញថា ប្រទេសចិន សម្ងំសាកល្បងប្រើប្រាស់ឧបករណ៍ចាប់ផ្កាយរណបនៅពេលថ្ងៃ ជាអំឡុងពេលដែលគេពិបាកពិនិត្យដោយកែវយឹតពីផែនដី។

កាលពីសប្ដាហ៍កន្លង សារព័ត៌មាន DW បានរាយការណ៍ថា ក្រុមហ៊ុន ExoAnalytic Solutions បានរកឃើញថា ប្រទេសចិន កំពុងសម្ងំសាកល្បងប្រើប្រាស់ឧបករណ៍ចាប់ផ្កាយរណបនៅលើគន្លងគោចរផែនដី។ ExoAnalytic Solutions គឺជាក្រុមហ៊ុនឯកជនរបស់ សហរដ្ឋអាម៉េរិក ដែលមានឯកទេសខាងតាមដានផ្កាយរណប ដោយប្រើប្រាស់បណ្ដាញនៃកែវយឹតអុបទិកធំៗនៅជុំវិញពិភពលោក។

ថ្មីៗនេះ ក្រុមហ៊ុនខាងលើបានផ្ដល់ភ័ស្ដុតាងបង្ហាញថា ផ្កាយរណប SJ-២១ របស់ ចិន បានបាត់ខ្លួនចេញពីទីតាំងដើមកាលពីថ្ងៃទី ២២ មករា ២០២២។ ប្រការនេះបានកើតឡើងនៅពេលថ្ងៃ ជាអំឡុងពេលដែលគេពិបាកពិនិត្យមើលដោយប្រើកែវយឹតអុបទិក។ ក្រោយមក SJ-២១ ក៏ត្រូវបានរកឃើញថា ស្ថិតនៅក្បែរផ្កាយរណបមួយគ្រឿងផ្សេងទៀតរបស់ ប្រទេសចិន នោះគឺជាផ្កាយរណបដែលបានឈប់ដំណើរការ និងស្ថិតក្នុងប្រព័ន្ធកំណត់ទិស Beidou។

SJ-២១ បានចាប់យកផ្កាយរណបដែលបានងាប់ម៉ាស៊ីនហើយនោះ និងបានអូសវាទៅទិសខាងលិចក្នុងរយៈពេលច្រើនថ្ងៃបន្ទាប់។ មកដល់ថ្ងៃទី ២៦ មករា SJ-២១ ក៏បានដោះលែងផ្កាយរណបរបស់ BeiDou និងរុញវាចូលទៅក្នុង «គន្លងគោចរមរណៈ» ជាទីដែលត្រូវបានគេចាត់ទុកថាជា វាលព្រលែងខ្មោចក្នុងអវកាស ដែលស្ថិតនៅឆ្ងាយពីគន្លងគោចរសកម្មធម្មតារបស់ផ្កាយរណប។

បើទោះជាបណ្ដាផ្កាយរណបដូច SJ-២១ អាចត្រូវបានប្រើប្រាស់ក្នុងគោលដៅល្អ ដូចជាបេសកកម្មសម្អាតសំរាមក្នុងអវកាស ប៉ុន្តែ វាក៏មិនមែនជាដំណឹងល្អដែលគួរត្រេកអរសម្រាប់ក្រុមមន្ត្រីរៀបចំផែនការនយោបាយរបស់ មន្ទីរបញ្ចកោណ នោះដែរ ព្រោះថា ប្រការនេះមានន័យថា ប្រទេសចិន ក៏អាចប្រើប្រាស់ឧបករណ៍ដូចគ្នានេះដើម្បីចាប់យកផ្កាយរណបរបស់ សហរដ្ឋអាម៉េរិក រួចហើយកម្ទេចចោល ដោយរុញវាចូលក្នុងបរិយាកាសផែនដី៕

February 22, 2022

ក្រុមហ៊ុនប្រេងតេលា ចេញប្រកាសបដិសេធ «កម្មវិធីឆ្លើយសំនួរយករង្វាន់ប្រាក់លាន នៅលើបណ្ដាញសង្គម»

ថ្មីៗនេះ អ្នកលេងបណ្ដាញសង្គមមួយចំនួន បានទទួល និងចែករំលែកតៗគ្នានូវកម្មវិធីឆ្លើយសំនួរ និងចាប់រង្វាន់តម្លៃ ១ លានរៀល ដែលមានរូបភាពបង្ហាញថា ជាកម្មវិធីរបស់ ក្រុមហ៊ុនកម្ពុជាតេលា (Kampuchia Tela)។

ក៏ប៉ុន្តែ នៅថ្ងៃទី ២១ កុម្ភៈនេះ ភាគីក្រុមហ៊ុនកម្ពុជាតេលា បានចេញប្រកាសមួយដែលធ្វើការបដិសេធថា «កម្មវិធីបំពេញកម្រងសំនួរដើម្បីមានឱកាសឈ្នះប្រាក់រង្វាន់ ១,០០០,០០០ រៀល ក្នុងឱកាសគម្រប់ខួប ២៥ ឆ្នាំ របស់ក្រុមហ៊ុនកម្ពុជាតេលា» មិនមែនជាកម្មវិធីរបស់ក្រុមហ៊ុននេះឡើយ។

ក្រុមហ៊ុនកម្ពុជាតេលា ក៏ប្រកាសមិនទទួលខុសត្រូវលើបញ្ហា និងផលប៉ះពាល់នានាដែលកើតឡើងពីការចូលរួមក្នុងកម្មវិធីក្លែងបន្លំនេះនោះដែរ។ បច្ចុប្បន្ន ក្រុមហ៊ុននេះ កំពុងសហការជាមួយសមត្ថកិច្ច ដើម្បីស្វែងរកក្រុមជនក្លែងបន្លំខាងលើ ដើម្បីធ្វើការផ្ដន្ទាទោសតាមច្បាប់។

February 21, 2022

តម្លៃរថយន្តអគ្គិសនីនៅប្រទេសណា ដែលទាបជាងគេក្នុងពិភពលោក?

ថ្មីៗនេះ ទំព័រ Confused.com ទើបតែបានប្រកាសលទ្ធផលនៃការស្រាវជ្រាវស្ដីពីខ្ទង់ប្រាក់ដែលអ្នកប្រើប្រាស់ត្រូវចំណាយ ដើម្បីទិញរថយន្តនៅក្នុងប្រទេស និងដែនដីមួយចំនួន។

Confused.com បានប្រកាសលទ្ធផលនៃការស្រាវជ្រាវរបស់ខ្លួនស្ដីពីខ្ទង់ប្រាក់ដែលពលរដ្ឋម្នាក់ត្រូវចំណាយច្រើនបំផុត និងតិចបំផុតដើម្បីទិញរថយន្ត។ ក្នុងការស្រាវជ្រាវ ក្រុមអ្នកជំនាញរបស់ Confused.com បានពិនិត្យរាល់ប្រភេទមធ្យោបាយធ្វើដំណើរដែលត្រូវបានប្រើប្រាស់ច្រើននៅទូទាំងពិភពលោក ហើយក្រោយមក ពួកគេបានធ្វើការប្រៀបធៀបតម្លៃនៅលើទីផ្សារនីមួយ។ បើទោះនៅមិនទាន់មានសុក្រឹតភាពបំផុតក៏ដោយ ប៉ុន្តែ វាបានផ្ដល់ឱ្យគ្រប់គ្នាបានដឹងនូវប្រការដែលគួរឱ្យយកចិត្តទុកដាក់ខ្លះ។

ចំពោះរថយន្តអគ្គិសនី Confused.com បានជ្រើសរើស Tesla Model 3 ហើយបានរកឃើញថា ទីក្រុងម៉ាកាវ (ប្រទេសចិន) គឺជាកន្លែងដែលលក់ក្នុងតម្លៃទាបបំផុត ពោលគឺប្រហាក់ប្រហែល ៤០,៣៨២ ដុល្លារអាម៉េរិក បន្ទាប់មកគឺ ចិនដីគោក រ៉ូម៉ានី ជប៉ុន និង បារាំង។ ចំណែក សហរដ្ឋអាម៉េរិក វិញ ឈរលំដាប់ទី ៨ (ស្មើនឹងដែនដី ព័រតូរីកូ/Puerto Rico (សហរដ្ឋអាម៉េរិក)) ដោយ Tesal Model 3 ត្រូវបានលក់ក្នុងតម្លៃ ៤៤,៩៩០ ដុល្លារ/គ្រឿង។

តម្លៃនេះហាក់មានបញ្ហាសម្រាប់អតិថិជននៅ ប្រទេសអង់គ្លេស ព្រោះថា Tesal Model 3 នៅទីនេះ មានតម្លៃប្រហែល ៥៨,៣៧៩ ដុល្លារ។ ប្រការនេះបានបង្ហាញនូវភាពខុសឆ្គងខ្លះនៅក្នុងការស្រាវជ្រាវ ព្រោះថា នៅមានរថយន្តអគ្គិសនីខ្លះ មានតម្លៃទាបជាងនេះ នៅ ប្រទេសអង់គ្លេស ដូចជា Volkswagen ID.3 ជាដើម ដែលមានតម្លៃ ៤៣,៥៣០ ដុល្លារ។ ប៉ុន្តែ និយាយរួម រថយន្តស្ទើរគ្រប់ប្រភេទនៅ អង់គ្លេស មានតម្លៃថ្លៃជាងនៅ សហរដ្ឋអាម៉េរិក។

ក៏ប៉ុន្តែ ប្រទេសដែលរថយន្ត Tesal Model 3 ត្រូវបានលក់ក្នុងតម្លៃថ្លៃជាងគេបង្អស់គឺ សិង្ហបុរី ដោយមានតម្លៃប្រហែល ៨៣,៤៨៩ ដុល្លារ/គ្រឿង។ ចំណែកប្រទេសដែលលក់រថយន្ត Tesal Model 3 ថ្លៃជាងគេលំដាប់ទី ២ គឺ អ៊ីស្រាអែល ដោយមានតម្លៃប្រហែល ៦៤,៦២៩ ដុល្លារ ទាបជាងជិត ២,០០០ ដុល្លារ ធៀបនឹង សិង្ហបុរី។ បន្ទាប់មកគឺបណ្ដាប្រទេស ដូចជា ស៊ុយអែត ឆែក និង ដាណឺម៉ាក៕

February 21, 2022

មហាសេដ្ឋី Elon Musk ទាក់ទងមិត្តស្រីថ្មី ជានារីដែលមានវ័យក្មេងជាង ២៣ ឆ្នាំ

«ពួកគេបានទាក់ទងគ្នាអស់ជាច្រើនខែមកហើយ និងកំពុងពិចារណាអំពីទំនាក់ទំនងប្រាកដប្រជា» នេះបើតាមប្រភពព័ត៌មានច្បាស់ការណ៍មួយ។

លោក Elon Musk បច្ចុប្បន្នគឺជាមហាសេដ្ឋីលំដាប់ទីមួយក្នុងពិភពលោក ដោយមានទ្រព្យ ២២០ ពាន់លានដុល្លារអាម៉េរិក។ ជាការពិតណាស់ គ្រប់យ៉ាងដែលទាក់ទងនឹងលោក គឺសុទ្ធតែត្រូវបានសាធារណជនចាប់អារម្មណ៍។

ថ្មីៗនេះ សារព័ត៌មាននៅ សហរដ្ឋអាម៉េរិក មួយចំនួនបានរាយការណ៍អំពីមិត្តស្រីថ្មីរបស់ Elon Musk។ ជាក់ស្ដែង កាលពីថ្ងៃទី ១៧ កុម្ភៈ ម្ចាស់ក្រុមហ៊ុន Tesla ត្រូវបានគេមើលឃើញថា បានរួមដំណើរជាមួយនារីស្រស់ស្អាតម្នាក់ នៅពេលលោកឈានជើងចុះពីយន្តហោះ នៅ Los Angeles។ ក្រោយមក ពួកគេក៏បានចាកចេញទៅដោយជិះរថយន្ត Tesla។

មិនយូរប៉ុន្មាន អត្តសញ្ញាណរបស់ស្រីស្អាតរូបនេះក៏ត្រូវបានគេរកឃើញ។ ប្រភពព័ត៌មានមួយបានបញ្ជាក់ប្រាប់សារព័ត៌មាន Hollywood Life ថា មិត្តស្រីថ្មីរបស់លោក Elon Musk គឺជាតារាសម្ដែង Natasha Bassett អាយុ ២៧ ឆ្នាំ។

ប្រភពព័ត៌មានបានប្រាប់ថា «ពួកគេបានទាក់ទងគ្នាច្រើនខែមកហើយ។ អ្នកទាំងពីរកំពុងតែនៅទំនេរ មិនទាន់មានទំនាក់ទំនងមនោសញ្ចេតនាជាមួយអ្នកដទៃ និងកំពុងពិចារណាអំពីទំនាក់ទំនងប្រាកដប្រជានឹងគ្នា»។

បន្ទាប់ពីព័ត៌មានខាងលើ ឈ្មោះ Natasha Bassett ក៏បានក្លាយជាទីចាប់អារម្មណ៍របស់សាធារណជន ព្រោះថា នាងគឺជា «រាជិនី» ដែលកំពុងក្លាយជាម្ចាស់បេះដូងរបស់មហាសេដ្ឋីលំដាប់លេខ ១ ក្នុងពិភពលោក។

ស្រីស្អាត Natasha Bassett កើត និងធំឡើងនៅ ទីក្រុងស៊ីដនី ប្រទេសអូស្ត្រាលី។ ឆ្នាំ ២០១៩ នាងបានទៅរស់នៅ សហរដ្ឋអាម៉េរិក ដើម្បីស្វែងរកឱកាសពង្រីកអាជីពនៅ Hollywood។

នៅឯប្រទេសកំណើត នាងមានបទពិសោធន៍ក្នុងការសម្ដែងតាំងពីអាយុ ១៤ ឆ្នាំ និងបានល្បីឈ្មោះបន្ទាប់ពីសម្ដែងជាតួអង្គក្នុងល្ខោននិយាយ រឿង «Romeo និង Jiluet»។ ចាប់ពីពេលនោះ នាងក៏មានវត្តមាននៅក្នុងខ្សែភាពយន្តជាច្រើន ដូចជា រឿង Hail, Caesar! ។ល។

ការទាក់ទងគ្នានេះ បានកើតឡើងបន្ទាប់ពីលោក Elon Musk បានចែកផ្លូវគ្នាពីតារាសិល្បៈ Grimes កាលពីខែកញ្ញា ២០២១ ក្រោយពីបានរួមរស់ជាមួយគ្នាអស់រយៈពេល ៣ ឆ្នាំ និងមានកូនប្រុសម្នាក់ជាមួយគ្នាគឺ X Æ A-Xii។

លោក Elon Musk បង្ហើបឱ្យដឹងអំពីមូលហេតុនៃការចែកផ្លូវគ្នានេះថា៖ «ដោយសារតែការងារនៅ SpaceX និង Tesla ខ្ញុំចំណាយពេលវេលាច្រើននៅ Texas និងបរទេស។ ចំណែកនាងវិញ ធ្វើការនៅ Los Angeles។ ថ្វីបើបានចែកផ្លូវគ្នា ប៉ុន្តែយើងនៅតែធ្វើជាមិត្តនឹងគ្នា ព្រមទាំងចែករំលែកការទទួលខុសត្រូវលើការចិញ្ចឹមកូន»។

មុនពេលបានជួប Grimes លោក Musk ធ្លាប់ឆ្លងកាត់ទំនាក់ទំនងអាពាហ៍ពិពាហ៍ជាច្រើនលើកជាមួយនឹងស្រីស្អាតច្រើននាក់។ ចាប់ពីឆ្នាំ ២០០០-២០០៨ លោក Musk បានរៀបការ និងរួមរស់ជាមួយអ្នកពិពន្ធ Justine Musk ព្រមទាំងមានកូន ៦ នាក់ ដែលសុទ្ធតែជាកូនប្រុស។

ក្រោយពីបានលែងលះ លោក Musk ក៏បានរៀបការជាមួយតារាសម្ដែង Talulah Riley។ ពួកគេធ្លាប់បានចែកផ្លូវគ្នា និងជួបគ្នាវិញ ប៉ុន្តែ ចុងក្រោយក៏បានលែងលះកាលពីឆ្នាំ ២០១៦។ ចាប់ពីឆ្នាំ ២០១៧-២០១៨ Musk បានទាក់ទងជាមួយតារាសម្ដែង Amber Heard។ ប៉ុន្តែ ពួកគេក៏មិនអាចនៅជាមួយគ្នាបានយូរ ព្រោះសុទ្ធតែរវល់ការងាររៀងៗខ្លួន។

ចាប់ពីឆ្នាំ ២០១៨ មហាសេដ្ឋី Elon Musk បានរួមរស់ជាមួយ Grimes។ កាលពីឆ្នាំ ២០២១ ពួកគេបានផ្ដល់កំណើតដល់កូនប្រុសម្នាក់។ មុនពេលបែកគ្នា ពួកគេបានបង្ហាញខ្លួនជាមួយគ្នាជាលើកចុងក្រោយ នៅក្នុងព្រឹត្តិការណ៍មួយកាលពីខែកញ្ញា ២០២១៕

February 21, 2022

ក្រុមហ៊ុនអ៊ីនធើណិត Opennet ត្រូវបិទជាបណ្ដោះអាសន្ននៅសប្ដាហ៍ក្រោយ ព្រោះមិនទាន់ទូទាត់បំណុលរាប់លានដុល្លារ

ដោយសារមិនទាន់ចូលទៅទូទាត់បំណុលប្រមាណជា ៦.៦ លានដុល្លារអាមេរិក ជូនរដ្ឋ ដូច្នេះ ក្រុមហ៊ុនផ្ដល់សេវាអ៊ីនធឺណិត ឈ្មោះ King Technologies (Opennet) នឹងត្រូវបាន ក្រសួងប្រៃសណីយ៍ និងទូរគមនាគមន៍ ចុះទៅបិទជាបណ្ដោះអាសន្ននៅសប្ដាហ៍ក្រោយ។

Opennet នៅជំពាក់បំណុលរដ្ឋ ជាង ៦ លានដុល្លារអាមេរិក ដែលបានជំពាក់ចាប់តាំងពីឆ្នាំ ២០១៧ ដល់ឆ្នាំ ២០១៩ និងវិភាគទានបន្ថែមចូលមូលនិធិ USO និង CBRD សរុបជាង ១.៨ លានដុល្លារ ដែលមិនបានប្រកាសពីឆ្នាំ ២០១៨ ដល់ឆ្នាំ ២០២០។ នេះបើតាម លោក សូ វិសុទ្ធី ដែលជារដ្ឋលេខាធិការ និងជាអ្នកនាំពាក្យក្រសួងប្រៃសណីយ៍ និងទូរគមនាគមន៍ ដែលបានប្រាប់សារព័ត៌មានក្នុងស្រុកមួយកាលពីម្សិលមិញ។

អ្នកនាំពាក្យរូបនេះថ្លែងថា Opennet មិនបានធ្វើការទូទាត់ប្រាក់បំណុលឱ្យបានសព្វគ្រប់ ដោយបានបង់បំណុលតែ ១.៣ លានដុល្លារ និងនៅជំពាក់ ៦.៦ លានដុល្លារ។ «នៅអាទិត្យក្រោយនេះ ក្រុមការងារក្រសួងនឹងចុះទៅបិទក្រុមហ៊ុនជាបណ្ដោះអាសន្ន» លោក សូ វិសុទ្ធី ប្រាប់ដូច្នេះ។

កាលពីថ្ងៃទី ១០ កុម្ភៈ ២០២២ ក្រសួងប្រៃសណីយ៍ និងទូរគមនាគមន៍ រួមនឹង ក្រសួងសេដ្ឋកិច្ច និងហិរញ្ញវត្ថុ បានចេញលិខិតរួមគ្នាមួយ បង្គាប់ឱ្យក្រុមហ៊ុន King Technologies (Opennet) ចូលមកទូទាត់ប្រាក់បំណុលក្នុងរយៈពេល ៧ ថ្ងៃ ហើយថា នឹងចាត់វិធានការតាមច្បាប់ ក្នុងករណីក្រុមហ៊ុននេះនៅតែគេចវេះមិនព្រមទូទាត់បំណុលជូនរដ្ឋ។

ក្រុមហ៊ុន Opennet គឺជាក្រុមហ៊ុនបុត្រសម្ព័ន្ធមួយរបស់ ក្រុមហ៊ុន វៀតណាម FPT Group ដែលដើមឡើយមានឈ្មោះថា The Corporation for Financing and Promoting Technology (FPT)។ FPT Group មានទីស្នាក់ការកណ្ដាលនៅ រដ្ឋធានីហាណូយ ប្រទេសវៀតណាម។

ក្រុមហ៊ុន Opennet និងក្រុមហ៊ុន Viettel (Metfone) គឺជាដៃគូរកស៊ីក្នុងវិស័យអ៊ីនធើណិត នៅ កម្ពុជា។ Metfone គឺជាក្រុមហ៊ុនបុត្រសម្ព័ន្ធរបស់ Viettel Group ដែលជាក្រុមហ៊ុនរបស់ រដ្ឋវៀតណាម និងគ្រប់គ្រងដោយកងទ័ពវៀតណាម មានទីស្នាក់ការកណ្ដាលនៅ ហាណូយ៕

February 19, 2022

Startup ធំៗចំនួន ៤ ដែលស្ថិតក្នុងចំណោមក្រុមហ៊ុនដែលមានតម្លៃជាងគេនៅ សហរដ្ឋអាម៉េរិក មាន CEO ជាជនអន្តោប្រវេសន៍

នាយកប្រតិបត្តិរបស់ក្រុមហ៊ុន SpaceX, Stripe, Instacart និង Databricks គឺសុទ្ធតែជាជនអន្តប្រវេសន៍ ក្នុងនោះមានទាំង ជនជាតិអ៊ីរ៉ង់ ផងដែរ។

ក្នុងរយៈពេលប៉ុន្មានឆ្នាំចុងក្រោយនេះ បណ្ដាជនអន្តោប្រវេសន៍កាន់តែមានតួនាទីសំខាន់នៅក្នុងបណ្ដាក្រុមហ៊ុនបច្ចេកវិទ្យាកំពូលៗនៅ សហរដ្ឋអាម៉េរិក។ យោងតាម Crunchbase ក្រុមហ៊ុនបច្ចេកវិទ្យាធំៗ និងមានតម្លៃជាងគេចំនួន ៤ នៅប្រទេសនេះ សុទ្ធតែមានស្ថាបនិក និងនាយកប្រតិបត្តិជាជនអន្តោប្រវេសន៍។

១-ក្រុមហ៊ុន SpaceX

ក្រុមហ៊ុនអវកាសនេះត្រូវបានកំណត់តម្លៃដល់ជាង ១០០ ពាន់លានដុល្លារអាម៉េរិក កាលពីខែតុលា ២០២១។ SpaceX ត្រូវបានបង្កើតឡើងដោយលោក Elon Musk ដែលជាពលរដ្ឋអាម៉េរិក ដើមកំណើតអាហ្វ្រិកខាងត្បូង។ លោក Musk ធ្លាប់បានរៀននៅសាកលវិទ្យាមួយនៃ ប្រទេសកាណាដា មុននឹងបានមកតាំងលំនៅលើទឹកដី សហរដ្ឋអាម៉េរិក។

បច្ចុប្បន្ន លោក Elon Musk គឺជាអ្នកមានទ្រព្យច្រើនជាងគេលំដាប់ទី ១ ក្នុងពិភពលោក ដោយមានទ្រព្យ ២៣៦ ពាន់លានដុល្លារ នេះបើតាម Bloomberg Billionaires Index។ ទ្រព្យភាគច្រើនរបស់លោក មិនមែនបានមកពី SpaceX នោះទេ ប៉ុន្តែ បានមកពីក្រុមហ៊ុនផលិតរថយន្តអគ្គិសនី Tesla។

២-ក្រុមហ៊ុន Stripe

ក្រុមហ៊ុនសេវាកម្មទូទាត់ប្រាក់តាមអនឡាញ Stripe ត្រូវបានបង្កើតឡើងដោយបងប្អូន ២ នាក់ គឺ Patrick និង John Collison កាលពីឆ្នាំ ២០១០។ Patrick បច្ចុប្បន្នគឺជា នាយកប្រតិបត្តិ ខណៈដែល John កាន់តំណែងជាប្រធានក្រុមហ៊ុន។

ពួកគេបានចាប់កំណើត និងធំឡើងនៅតំបន់ជនបទក្នុងស្រុក Tipperary នៃ ប្រទេសអៀឡង់។ លោក Patrick ធ្លាប់សិក្សាផ្នែកគណិតនៅវិទ្យាស្ថានបច្ចេកវិទ្យា Massachusetts សហរដ្ឋអាម៉េរិក។ ២ ឆ្នាំក្រោយ John ក៏បានប្រឡងជាប់ចូលសាកលវិទ្យាល័យ Havard។

ក្នុងពេលនៅសិក្សា ពួកគេបានក្លាយជាសេដ្ឋីទៅហើយ ដោយសារគម្រោងអាជីវកម្មដំបូងដែលមានឈ្មោះថា Auctomatic។ ក្រុមហ៊ុននេះ ក្រោយមកក៏ត្រូវបានលក់ក្នុងតម្លៃ ៥ លានដុល្លារ កាលពីឆ្នាំ ២០០។ បន្ទាប់មក ពួកគេក៏បានបង្កើតក្រុមហ៊ុន Stripe។ ដើម្បីជាការវិនិយោគឱ្យអស់ពីកម្លាំងកាយចិត្តទៅលើ Stripe ពួកគេក៏បានសម្រេចចិត្តបោះបង់ការសិក្សានៅសាកលវិទ្យាល័យ។

បច្ចុប្បន្ននេះ ក្រុមហ៊ុន Stripe ត្រូវបានកំណត់តម្លៃឡើងដល់ប្រមាណ ៩៥ ពាន់លានដុល្លារអាម៉េរិក។

៣-ក្រុមហ៊ុន Instacart

នាង Fidji Simo (ស្ដាំបង្អស់) កាលពីនៅ Facebook

Fidji Simo ដែលជាអតីតប្រធានផ្នែកមួយរូបរបស់ Facebook បានចាកចេញពីក្រុមហ៊ុននេះកាលពីខែកក្កដា ២០២១ និងបានក្លាយជា CEO របស់ក្រុមហ៊ុនដឹកជញ្ជូនទំនិញជាគ្រឿងទេស Instacart ចាប់ពីខែសីហា ឆ្នាំដដែល។ Simon គឺជាស្ត្រីអ្នកជំនួញជនជាតិបារាំង។

ចំណែកស្ថាបនិក និងជាអតីត CEO របស់ Instacart ឈ្មោះ Apoorva Mehta កើតនៅ ឥណ្ឌា ក្រោយមកក៏ទៅរស់នៅក្នុង ប្រទេសលីប៊ី និង កាណាដា។ Mehta បានសិក្សាថ្នាក់វិស្វករនៅសាកលវិទ្យាល័យ Waterloo និងធ្លាប់ជាវិស្វករផ្នែករចនាប្រចាំក្រុមហ៊ុន Blackberry និង Qualcomm។ គាត់ក៏ធ្លាប់ធ្វើការឱ្យ Amazon ក្នុងតំណែងជាវិស្វករប្រព័ន្ធផ្គត់ផ្គង់ ដែលបានជួយអភិវឌ្ឍប្រព័ន្ធទទួល និងចាត់ការលើការបញ្ជាទិញ។

ថ្មីៗនេះ ក្រុមហ៊ុនដឹកជញ្ជូនទំនិញគ្រឿងទេស Instacart ត្រូវបានកំណត់តម្លៃឡើងដល់ ៣៩ ពាន់លានដុល្លារអាម៉េរិក។

៤-ក្រុមហ៊ុន Databricks

លោក Ali Ghodsi មានដើមកំណើតជា ជនជាតិអ៊ីរ៉ង់

ស្ថាបនិក និងជា CEO របស់ Databricks ឈ្មោះ Ali Ghodsi មានដើមកំណើតជា ជនជាតិអ៊ីរ៉ង់។ គាត់បានទៅរស់នៅក្នុងទឹកដីនៃ ប្រទេសស្វ៊ីស តាំងពីនៅតូច។ បន្ទាប់ពីបានបញ្ចប់ការសិក្សាថ្នាក់បណ្ឌិតនៅ ប្រទេសស្វ៊ីស លោក Ali ក៏បានមកកាន់ សហរដ្ឋអាម៉េរិក ទៅតាមការអញ្ជើញឱ្យមកបង្រៀននៅ សាកលវិទ្យាល័យ Berkeley។

ក្រុមហ៊ុន Databricks ត្រូវបានបង្កើតឡើងកាលពីឆ្នាំ ២០១៣ និងមានកម្មវិធីកុំព្យូទ័រដែលជួយឱ្យក្រុមហ៊ុននានា អាចចាត់ការបណ្ដុំទិន្នន័យធំៗ និងត្រៀមសម្រាប់ការវិភាគ។ ក្រុមហ៊ុននេះត្រូវបានកំណត់តម្លៃប្រហែល ៣៨ ពាន់លានដុល្លារអាម៉េរិក។ បណ្ដាក្រុមហ៊ុនដែលវិនិយោគទៅលើ Startup នេះ រួមមានទាំង Microsoft, Amazon, Alphabet និង Salesforce ផងដែរ។

យោងតាមលទ្ធផលនៃការស្រាវជ្រាវរបស់ Forbes បច្ចុប្បន្នលោក Ali Ghodsi មានទ្រព្យប្រមាណ ១.៨ ពាន់លានដុល្លារអាម៉េរិក៕

February 18, 2022

Facebook ធ្លាក់ពីតារាងចំណាត់ថ្នាក់ស្ដីពី «កំពូលក្រុមហ៊ុនទាំង ១០ ដែលមានតម្លៃជាងគេក្នុងពិភពលោក»

តម្លៃភាគហ៊ុនដាំក្បាលចុះនៅក្នុងប៉ុន្មានសប្ដាហ៍កន្លងទៅនេះ បានធ្វើឱ្យមូលធនទីផ្សាររបស់ Meta Platforms ដែលជាក្រុមហ៊ុនមេរបស់ Facebook បច្ចុប្បន្ននៅសល់តែ ៥៦៥ ពាន់លានដុល្លារអាម៉េរិក។

តួលេខរបស់ Bloomberg បានបង្ហាញថា ជាមួយនឹងមូលធនទីផ្សារដែលមានតម្លៃ ៥៦៥ ពាន់លានដុល្លារ Meta បច្ចុប្បន្នគឺជាក្រុមហ៊ុនធំជាងគេលំដាប់ទី ១១ នៅក្នុងពិភពលោក បន្ទាប់ពី Tencent Holdings (ចិន)។ កាលពីឆ្នាំ ២០២១ Meta Plafroms ធ្លាប់ឈរលំដាប់ថ្នាក់ទី ៦ ដោយមានតម្លៃជាង ១,០០០ ពាន់លាន (១ ទ្រីលាន) ដុល្លារអាម៉េរិក។

ភាគហ៊ុននេះធ្លាក់ចុះខ្លាំងក្នុងរយៈពេល ២ សប្ដាហ៍កន្លង ដោយសារតែរបាយការណ៍ហិរញ្ញវត្ថុត្រីមាសទី ៤ ឆ្នាំ ២០២១ បង្ហាញថា កំណើននៃចំនួនអ្នកប្រើប្រាស់នៅទ្រឹង ចំណែកប្រាក់ចំណេញក៏ថយចុះ។

យោងតាម Bloomberg ក្រុមហ៊ុនដែលបានចូលមកកាន់ចំណាត់ថ្នាក់ទី ៦ ក្នុងចំណោមក្រុមហ៊ុនដែលមានមូលធនទីផ្សារធំជាងទាំង ១០ របស់ពិភពលោក ជំនួស Meta គឺ ក្រុមហ៊ុនផលិតរថយន្តអគ្គិសនី Tesla ដោយមានតម្លៃ ៩០៦ ពាន់លានដុល្លារ។ ចំណែកក្រុមហ៊ុនដែលមានតម្លៃជាងគេក្នុងពិភពលោក នៅតែជា Apple ដោយមាន ២,៨០០ ពាន់លានដុល្លារ។ តាមពីក្រោយ Apple គឺ Microsoft និងក្រុមហ៊ុនរដ្ឋ Aramco របស់ ប្រទេសអារ៉ាប៊ីសាអូឌីត៕

February 18, 2022

អ្នកជួញដូរប្រាក់ឌីជីថល គួរប្រយ័ត្ន! វេជ្ជបណ្ឌិតម្នាក់ បាត់បង់ Bitcoin តម្លៃជាង ១ សែនដុល្លារអាម៉េរិក ព្រោះតែត្រូវ bot ឆបោក

កាលពីខែមុន វេជ្ជបណ្ឌិត Anders Apgar និងគ្រួសារ បានទៅទទួលទានអាហារពេលយប់នៅក្នុងភោជនីយដ្ឋានមួយ ស្រាប់តែទូរស័ព្ទរបស់គាត់រោទ៍ឡើងជាបន្តបន្ទាប់ ហើយក្រោយពីបានធ្វើតាមការណែនាំរបស់ខ្សែទូរស័ព្ទម្ខាងទៀត វេជ្ជបណ្ឌិតរូបនេះ ក៏បាត់បង់ប្រាក់ Bitcoin ដែលមានតម្លៃជាង ១ សែនដុល្លារ។

ដំបូងឡើយ Apgar យល់ថា ការហៅទូរស័ព្ទនេះ គឺដូចទៅនឹងការហៅស្វ័យប្រវត្ត ទើបមិនបានចាប់អារម្មណ៍។ ការហៅទូរស័ព្ទលើកបន្ទាប់ក៏ត្រូវភរិយារបស់លោកលើកទទួល។

«ពេលប្រពន្ធខ្ញុំលើកទូរស័ព្ទ ក៏មានសារប្រកាសថា គណនីរបស់អ្នកកំពុងជួបគ្រោះថ្នាក់» លោក Apgar រៀបរាប់។ គាត់យកទូរស័ព្ទពីប្រពន្ធមកស្ដាប់ដោយផ្ទាល់ ប៉ុន្តែ នោះក៏ជាពេលដែលគ្រួសារនេះចាប់ផ្ដើមត្រូវរន្ធត់ជាទីបំផុត។

ប្ដីប្រពន្ធ Apgar សុទ្ធតែជាវេជ្ជបណ្ឌិតនៅក្នុងមន្ទីរពេទ្យមួយក្នុងរដ្ឋ Maryland (សហរដ្ឋអាម៉េរិក)។ អ្នកទាំងពីរបានចាប់ផ្ដើមវិនិយោគទៅលើទីផ្សាររូបិយវត្ថុឌីជីថល តាំងពីប៉ុន្មានខែមុន។ ខែធ្នូ ២០២១ គណនីរបស់បុរសជាប្ដី កើនដល់ ១០៦,០០០ ដុល្លារ ដែលភាគច្រើនគឺដោយសារ Bitcoin។ ដូចទៅនឹងពលរដ្ឋអាម៉េរិក រាប់លាននាក់ផ្សេងទៀត ពួកគេក៏ជួញដូរ និងរក្សាទុកកាក់ Bitcoin របស់ខ្លួននៅក្នុងផ្សារ Coinbase។

នៅពេលលោក Apgar ស្ដាប់ទូរស័ព្ទ សំឡេងស្ត្រីម្នាក់បាននិយាយថា៖ «ស្វាគមន៍អ្នកមកកាន់ខ្សែទូរស័ព្ទការពារសុវត្ថិភាពបន្ទាន់របស់ Coinbase។ យើងរកឃើញថា មានសកម្មភាពខុសច្បាប់កើតឡើងដោយសារតែការព្យាយាមចូលក្នុងគណនីរបស់អ្នកដោយមិនបានសម្រេច ពីអាសយដ្ឋាន IP នៅ កាណាដា។ បើសិនមិនមែនជាអ្នក សូមចុចលេខ ១ ដើម្បីបញ្ចប់ដំណើរការនៃការការពារ និងស្ដារគណនី»។ ភ្លាមនោះ Apgar ក៏ចុចលេខ ១ ដោយមិនបានសង្ស័យអ្វីទាំងអស់។

២ នាទីក្រោយមក គណនីរបស់វេជ្ជបណ្ឌិត Apgar ក៏ត្រូវបានបិទ ហើយរហូតដល់បច្ចុប្បន្ន នៅតែមិនអាចយកមកវិញបាន។ លោក Apgar បញ្ជាក់ថា លោកបានបាត់បង់ប្រាក់ Bitcoin ទាំងអស់ដែលមាននៅក្នុងគណនី។

យោងតាមអ្នកជំនាញផ្នែកសន្តិសុខអ៊ីនធើណិត លោក Apgar ត្រូវបានគេឆបោកដោយប្រើប្រាស់កម្មវិធីបញ្ជាក់លេខកូដត្រួត ២ ជាន់ ឈ្មោះ ២FA។ ២FA គឺជាវិធីការពារសន្តិសុខនៅលើអ៊ីនធើណិត ដែលត្រូវគេប្រើប្រាស់ច្រើននៅក្នុងការជួញដូរនៅធនាគារ ផ្សាររូបិយវត្ថុឌីជីថល បណ្ដាញសង្គម និង អ៊ីមេល។ល។ វាត្រូវបានវាយតម្លៃថា អាចការពារគណនីបានក្នុងកម្រិតខ្ពស់ ដោយការបញ្ជាក់អំពីលេខសម្ងាត់ប្រើម្ដងចោល (OTP) ដែលផ្ញើមកទូរស័ព្ទ ទន្ទឹមនឹងលេខសម្ងាត់គោល។

ក៏ប៉ុន្តែ OTP ក៏កំពុងក្លាយជាគោលដៅដែលក្រុមចោរអ៊ីនធើណិតប្រើប្រាស់ដើម្បីឆបោកយកប្រាក់ពីអ្នកប្រើប្រាស់ផងដែរ។ មិនត្រឹមតែធ្វើការហៅតាមទូរស័ព្ទ ឬផ្ញើសារធម្មតានោះទេ ប៉ុន្តែ ពួកហែកឃើ ថែមទាំងឆបោកយកប្រាក់ឌីជីថល ដោយប្រើកម្មវិធីណែនាំស្វ័យប្រវត្ត bot ទៀតផង៕

February 17, 2022

(វីដេអូ)-យានផ្សងព្រេងសម្រាប់ការស្រាវជ្រាវព្រះចន្ទរបស់ពិភពសៅរ៍ ហោះហើរសាកល្បង

(សហរដ្ឋអាម៉េរិក)-ស្ថានីយចុះចត និងជាយន្តហោះ Dragonfly របស់ ណាសា (NASA) ដំណើរការសាកល្បងនៅលើសមុទ្រខ្សាច់ California ជាទីដែលមានដំបូកខ្សាច់ខ្ពស់ៗ ដូចទៅនឹងសណ្ឋានដីលើឋានព្រះចន្ទរបស់ភពសៅរ៍។

Dragonfly គឺជាស្ថានីយចុះចត និងជាយន្តហោះរបស់ទីភ្នាក់ងារអាវកាសអាម៉េរិក ណាសា ដែលនឹងបំពេញបេសកកម្មស្រាវជ្រាវឋានព្រះចន្ទរបស់ពិភពសៅរ៍ (Saturn)។ កាលពីខែកញ្ញា ២០២១ ក្រុមអ្នកជំនាញបានធ្វើតេស្តយានផ្សងព្រេងនេះនៅលើវាលខ្សាច់ដែលដូចទៅនឹងដំបូកខ្សាច់លើព្រះចន្ទទីតាន (ឬហៅថា ថាយធិន ឬ ទីតង់ (Titan)) ក្នុងរយៈពេល ៣ ថ្ងៃ។

ការប្រមូលរូបភាព និងទិន្នន័យទាំងថ្ងៃ ទាំងយប់ មានសារសំខាន់សម្រាប់ប្រព័ន្ធគ្រប់គ្រងទិសរបស់ Dragonfly ដែលនឹងជួយឱ្យយន្តហោះនេះដឹងអំពីទីតាំង និងការចល័តរបស់ខ្លួននៅលើ ព្រះចន្ទទីតាន របស់ ភពសៅរ៍។

ការសាកល្បងដូច្នេះនៅលើផែនដី ក៏ជួយដល់ក្រុមអ្នកស្រាវជ្រាវ អាចអភិវឌ្ឍ Dragonfly ឱ្យហោះបាននៅលើពិភពដទៃ។ តាមគម្រោង យាន Dragonfly របស់ ណាសា នឹងត្រូវបានបាញ់បង្ហោះទៅកាន់ទីអវកាសនៅក្នុងឆ្នាំ ២០២៧៕

February 17, 2022

(វីដេអូ)-លក់ដេញថ្លៃត្បូងពេជ្រពណ៌ផ្ទៃមេឃធំបំផុត និងថ្លៃបំផុតក្នុងពិភពលោក

ត្បូងពេជ្រពណ៌ផ្ទៃមេឃធំជាងគេ និងថ្លៃជាងគេបំផុតក្នុងពិភពលោក De Beers Cullinan Blue គ្រោងនឹងរកបានប្រាក់ជាង ៤៨ លានដុល្លារ នៅក្នុងការលក់ដេញថ្លៃនៅខែមេសាខាងមុខ។

De Beers Cullinan Blue ត្រូវបានរកឃើញកាលពីឆ្នាំ ២០២១ នៅក្នុងអណ្ដូងរ៉ែ Cullinan របស់ អាហ្វ្រិកខាងត្បូង ជាប្រភពកម្រមួយក្នុងពិភពលោកដែលផ្គត់ផ្គង់ត្បូងប្រភេទនេះ។

ត្បូងពេជ្រនេះមានទម្ងន់ជាង ១៥ ការ៉ាត មានពណ៌ផ្ទៃមេឃយ៉ាងស្រស់ស្អាត។ វិទ្យាស្ថានត្បូងពេជ្រអាម៉េរិក បានដាក់បញ្ចូលប្រភេទត្បូងនេះទៅក្នុងក្រុមដែល «មានពណ៌ផ្ទៃមេឃដ៏ទាក់ទាញ» ជាប្រភេទដែលមានតែ ១% ប៉ុណ្ណោះ នៅក្នុងចំណោមប្រភេទត្បូងពេជ្រពណ៌ផ្ទៃមេឃ។

ដំណើរការនៃការកកើតថ្ម និងវត្តមានរបស់រ៉ែកាបូន នៅពេលកកើតគ្រីស្តាល់ គឺជាវិទ្យាសាស្ត្រប្រកបដោយភាពបរិសុទ្ធ ហើយវាកើតឡើងនៅទីកន្លែងមួយចំនួនតូចតែប៉ុណ្ណោះ។ នោះគឺជាមូលហេតុដែលនាំឱ្យពួកវាក្លាយជារបស់កម្រ។

តាមការគណនា De Beers Cullinan Blue នឹងរកបានជាង ៤៨ លានដុល្លារអាម៉េរិក នៅក្នុងព្រឹត្តិការណ៍លក់ដេញថ្លៃនៅក្នុងខែមេសា នាទីក្រុងហុងកុង។ នេះជាតម្លៃខ្ពស់បំផុត សម្រាប់ប្រភេទត្បូងពេជ្រពណ៌ផ្ទៃមេឃ ព្រោះតែទំហំរបស់វា។ កន្លងមក មិនធ្លាប់មានត្បូងពេជ្រពណ៌ផ្ទៃមេឃណាមួយមានទំហំធំដូច្នេះទេ។

February 17, 2022

Category: សង្គម និងសេដ្ឋកិច្ច