សង្គម និងសេដ្ឋកិច្ច - La Reine Media

ស្រុកស្ទឹងហាវ និងស្រុកព្រៃនប់ នៃ ខេត្តព្រះសីហនុ នឹងទាក់ទាញអ្នកវិនិយោគគ្រប់វិស័យនាពេលខាងមុខ

តំបន់កសិឧស្សាហកម្មដំណាំដូងប្រេង និងដំណាំកៅស៊ូ នៅក្នុងភូមិសាស្ត្រស្រុកស្ទឹងហាវ និងស្រុកព្រៃនប់ ខេត្តព្រះសីហនុ នឹងមានអ្នកវិនិយោគចូលមកបណ្ដាក់ទុនរកស៊ីលើគ្រប់វិស័យ នេះបើតាមការអះអាងរបស់ ឯកឧត្តម គួច ចំរើន អភិបាលខេត្តព្រះសីហនុ។

នៅក្នុងពេលចុះពិនិត្យការអភិវឌ្ឍ ក្នុងតំបន់កសិឧស្សាហកម្មដំណាំដូងប្រេង និងដំណាំកៅស៊ូ នៅក្នុងភូមិសាស្ត្រស្រុកស្ទឹងហាវ និងស្រុកព្រៃនប់ ខេត្តព្រះសីហនុ នាព្រឹកថ្ងៃទី ១៦ ខែមីនា ឆ្នាំ ២០២២ អភិបាល នៃគណៈអភិបាលខេត្តព្រះសីហនុ បានថ្លែងកោតសរសើរ ចំពោះអ្នកឧកញ៉ា ម៉ុង ឫទ្ធី ដែលបានធ្វើការអភិវឌ្ឍលើវិស័យកសិឧស្សាមហកម្ម ហើយបាន និងកំពុងជួយដល់ប្រជាពលរដ្ឋនៅក្នុងតំបន់នេះ។

ឯកឧត្តមអភិបាលខេត្ត ព្រះសីហនុ សង្ឃឹម និងជឿជាក់ថា អនាគត ភូមិសាស្ត្រស្រុកស្ទឹងហាវ និងស្រុកព្រៃនប់ នៃ ខេត្តព្រះសីហនុ នឹងក្លាយជាតំបន់ដែលមានសក្តានុពលសម្រាប់ការវិនិយោគលើគ្រប់វិស័យ៕

March 16, 2022

គំរូនាវាទេសចរណ៍ប្រណិតខ្នាតយក្ស បំពាក់ផ្ទាំងសូឡាពេញខ្លួន

ក្រុមអ្នករចនាបានបង្ហើបឱ្យដឹងអំពីគំនិតស្ដីពី នាវាទេចរណ៍មួយគ្រឿងមានឈ្មោះថា Solar Express ដែលត្រូវបានបំពាក់ផ្ទាំងសូឡាពេញខ្លួន។

យោងតាមការប្រកាសរបស់អ្នករចនា Anthony Glasson នៅឯ studio M៥១ ក្នុង ទីក្រុងហុងកុង គំនិតស្ដីពី Solar Express ត្រូវបានលើកបង្ហាញទៅតាមអារម្មណ៍ដែលកើតចេញពីបណ្ដានាវាដំណើរការដោយចំហាយទឹក បង្ហាញខ្លួននៅក្នុងខ្សែភាពយន្ត The Polar Express ឆ្នាំ ២០០៤។ បន្ថែមពីលើនោះ ផ្នែកខាងមុខនាវាត្រូវបានបន្ថែមច្រមុះយ៉ាងស្រួចដែលដូចទៅនឹងប្រភេទសត្វស្នែងមួយ។

នាវាអនាគតនេះនឹងមានប្រវែង ១៣០ ម៉ែត្រ មានអាងហែលទឹកបណ្ដោយ ១០ ម៉ែត្រ, ទីតាំងហូបចុកលើដំបូល និងបន្ទប់នានាដែលមើលឃើញមហាសមុទ្រ។

ប្រការដែលធ្វើឱ្យ Solar Express មានលក្ខណៈពិសេសជាងគេ នោះគឺដងខ្លួនរបស់វាត្រូវបានគ្របដណ្ដប់ដោយផ្ទាំងសូឡាជាច្រើនដែលមានផ្ទៃក្រឡាជាង ១៦,០០០ ម៉ែត្រ។

Solar Express គឺជាការខិតខំប្រឹងប្រែងឆ្ពោះទៅកាន់អនាគតបៃតងជាងបច្ចុប្បន្ន សម្រាប់នាវាទេសចរណ៍ខ្នាតយក្ស នេះបើតាម Glasson។ Solar Express មិនមែនដំណើរការទាំងស្រុងដោយអគ្គិសនីដែលបានមកពីផ្ទាំងសូឡានោះទេ ប៉ុន្តែ វាក៏នឹងត្រូវបានបំពាក់ម៉ាស៊ីន hybrid, ម៉ាស៊ីនភ្លើង។ល។

នាវាទេសចរណ៍នេះនឹងមានទម្ងន់យ៉ាងស្រាល ដោយសារធ្វើអំពីអាលុយមីញូមប្រភេទស្រាល អនុញ្ញាតឱ្យវាសំច័យថាមពលបានច្រើន បើទោះ M៥១ មិនទាន់ប្រកាសឱ្យដឹងអំពីតួលេខដែលទាក់ទងនឹងល្បឿន ឬរង្វង់ប្រតិបត្តិការ៕

March 16, 2022

ឥណ្ឌា ចង់ទិញបន្ថែមប្រេងពី រុស្ស៊ី

រដ្ឋមន្ត្រីក្រសួងរ៉ែ និងថាមពល របស់ ឥណ្ឌា លោក Hardeep Singh Puri បានឱ្យដឹងថា កំពុងចរចាជាមួយ ភាគីរុស្ស៊ី អំពីការបង្កើនការនាំចូលប្រេង ដើម្បីរួមចំណែកទប់ស្កាត់ការឡើងថ្លៃសាំងក្នុងប្រទេស។

«ខ្ញុំបាននិយាយគ្នាជាមួយក្រុមមន្ត្រីរបស់ សហព័ន្ធរុស្ស៊ី» អំពីការនាំចូលប្រេង លោក Hardeep Singh Puri បានប្រាប់ សភាឥណ្ឌា កាលពីថ្ងៃទី ១៤ មីនា។ លោក Puri និយាយថា បញ្ហាកំពុងជជែកគ្នារួមមាន ការធានារ៉ាប់រង វិធីដឹកជញ្ជូន និងការទូទាត់។

ឥណ្ឌា ត្រូវនាំចូលប្រេង ៨០% ក្នុងចំណោមប្រេងដែលត្រូវប្រើប្រាស់ក្នុងស្រុកសរុប ហើយក្នុងចំណោមនោះ មាន ៣% ទិញពី រុស្ស៊ី។ កាលពីចុងសប្ដាហ៍មុន ឧបនាយករដ្ឋមន្ត្រីរុស្ស៊ី Alexandrer Novak បានឱ្យដឹងថា ការនាំចូលប្រេងពី រុស្ស៊ី របស់ ឥណ្ឌា មានតម្លៃប្រហែល ១ ពាន់លានដុល្លារអាម៉េរិក ខណៈលំហូរពាណិជ្ជកម្មរវាងប្រទេសទាំងពីរ មានត្រឹមតែ ៩ ពាន់លានដុល្លារ មិនដល់ ១/១០ នៃពាណិជ្ជកម្មរវាង រុស្ស៊ី និង ចិន។

ឥណ្ឌា ជាប្រទេសមួយដែលជិតស្និទ្ធនឹង រុស្ស៊ី។ ឥណ្ឌា រក្សាទំនាក់ទំនងជាមួយ អ៊ុយក្រែន និងលោកខាងលិច ប៉ុន្តែ ក៏បង្ហាញការមិនយល់ស្របចំពោះការដាក់ទណ្ឌកម្មលើ រុស្ស៊ី នៅក្នុងវេទិកាអន្តរជាតិ។

សហរដ្ឋអាម៉េរិក បានហាមការនាំចូលប្រេងពី រុស្ស៊ី។ ប៉ុន្តែ អឺរ៉ុប នៅតែមានការស្ទាក់ស្ទើរចំពោះបញ្ហានេះ ព្រោះកំពុងពឹងផ្អែកលើប្រេង និងធនធានថាមពលរបស់ រុស្ស៊ី ច្រើនជាងឆ្ងាយ ធៀបនឹង សហរដ្ឋអាម៉េរិក៕

March 16, 2022

ប្រេងធ្លាក់ថ្លៃ ៣០% ក្នុងរយៈពេល ១ សប្ដាហ៍ចុងក្រោយ

កាលពីដើមសប្ដាហ៍កន្លង តម្លៃប្រេង Brent ក្នុង ១ ធុង ឡើងជិតដល់ ១៤០ ដុល្លារអាម៉េរិក ប៉ុន្តែ បច្ចុប្បន្ននៅសល់ ៩៩ ដុល្លារ។

បន្ទាប់ពី រុស្ស៊ី បានប្រកាសបើកយុទ្ធនាការយោធានៅ អ៊ុយក្រែន តម្លៃប្រេងឆៅនៅទូទាំងសកលលោក បានកើនឡើងយ៉ាងឆាប់រហ័ស។ គ្រាន់តែ ១ សប្ដាហ៍សោះ តម្លៃប្រេង Brent ឡើងដល់ ១៣៩ ដុល្លារ/ធុង ខ្ពស់បំផុតរាប់ចាប់ពីឆ្នាំ ២០០។ ក្រុមអ្នកជំនាញបានព្រមានថា តម្លៃអាចឡើងដល់ ១៨៥ ដុល្លារ រួចហើយ ២០០ ដុល្លារ នៅពេលពិភពលោកបែរខ្នងដាក់ប្រេងរបស់ រុស្ស៊ី។

ក៏ប៉ុន្តែ ក្រោយមក ស្ថានការណ៍បានប្រែប្រួលយ៉ាងលឿន។ តម្លៃប្រេង Brent បច្ចុប្បន្ន ថយចុះជិត ៣០% ធៀបនឹងតម្លៃខ្ពស់បំផុត។ ក្នុងថ្ងៃទី ១៥ មីនា តម្លៃប្រេងធ្លាក់ចុះក្រោម ១០០ ដុល្លារ/ធុង ជាលើកដំបូងក្នុងខែនេះ។ ១ ថ្ងៃមុននោះ តម្លៃប្រេង Brent បានធ្លាក់ថ្លៃ ៦.៥%។

ការធ្លាក់ថ្លៃនេះ ត្រូវបានបកស្រាយថា ដោយសារក្ដីសង្ឃឹមទៅលើ ប្រទេសអារ៉ាប៊ីសាអូឌីត និង អេមីរ៉ាតអារ៉ាមរួម ដែលសន្យាថា នឹងបង្កើនការផលិតប្រេង។ ទន្ទឹមនឹងនោះ តម្រូវការប្រេងថយចុះនៅ ប្រទេសចិន ដោយសារបម្រាមគោចរ ព្រោះតែ កូវីដ-១៩ ក៏ជារឿងដែលជួយឱ្យតម្លៃប្រេងធ្លាក់ថ្លៃ។

ទោះយ៉ាងនេះក្ដី ក្រុមអ្នកវិភាគព្រមានថា ពិភពលោកនៅតែមិនទាន់រួចផុតពីហានិភ័យ។ ប្រេងនៅតែត្រូវបានជួញដូរក្នុងតម្លៃខ្ពស់ជាងឆ្ងាយ ធៀបនឹងការចំណាយលើការផលិត។

March 16, 2022

Apple សំច័យប្រាក់បានរាប់ពាន់លានដុល្លារ ដោយសារបោះបង់ឆ្នាំងសាកថ្ម និងកាសរបស់ iPhone

ក្រុមហ៊ុន Apple ត្រូវបានគេជឿថា សំច័យប្រាក់បានជាង ៦ ពាន់លានដុល្លារអាម៉េរិក ពីការបោះបង់ឆ្នាំងសាកថ្ម និងកាស របស់ទូរស័ព្ទ iPhone ចាប់ពីឆ្នាំ ២០២០។

យោងតាម Daily Mail ក្រុមហ៊ុន Apple កាត់បន្ថយការចំណាយបានប្រហែល ៣៥ ដុល្លារ សម្រាប់ទូរស័ព្ទឆ្លាតវៃ iPhone ១ គ្រឿង ដែលក្រុមហ៊ុនបានលក់ចេញ ដោយសារបំបាត់ចោលឧបករណ៍អមរបស់ផលិតផលនេះ។ រាប់ចាប់តាំងពីចុងឆ្នាំ ២០២០ ដល់ដើមឆ្នាំ ២០២២ Apple បានលក់ iPhone ប្រហែល ១៩០ លានគ្រឿង ដូច្នេះ ទឹកប្រាក់ដែលក្រុមហ៊ុននេះសំច័យបាន គឺប្រហែល ៦.៥ ពាន់លានដុល្លារ។

កន្លងមក ក្រុមអ្នកជំនាញបានគណនាឃើញថា ការកាត់បន្ថយទំហំរបស់ប្រអប់ដាក់ទូរស័ព្ទ អនុញ្ញាតឱ្យ Apple បន្ថយការចំណាយទៅលើវត្ថុធាតុដើមសម្រាប់ផលិតជាប្រអប់ទូរស័ព្ទ ក៏ដូចជាបង្កើនចំនួន iPhone បាន ៧០% នៅក្នុងប្រអប់ប៉ាឡែត (pallet) នីមួយៗ ដូច្នេះ ក៏អាចបន្ថយការចំណាយទៅលើសេវាដឹកជញ្ជូនបាន ៤០% ធៀបនឹងដំណាក់កាលមុននោះ។

Ben Wood ដែលជាអ្នកវិភាគរបស់ CCS Insight បានវាយតម្លៃថា ទិន្នន័យខាងលើគឺមានមូលដ្ឋាន។ ប៉ុន្តែ Apple បានបដិសេធការអធិប្បាយទាក់ទងនឹងតួលេខខាងលើ។ ក្រុមហ៊ុននេះសង្កត់ធ្ងន់ថា ការកាត់ចោលឆ្នាំងសាកថ្ម និងកាស ជួយកាត់បន្ថយឧស្ម័នកាបូនពុលបានជាង ២ លានតោន ស្មើនឹងរថយន្ត ៥ សែនគ្រឿង ដែលមិនធ្វើចរាចរណ៍ ជារៀងរាល់ឆ្នាំ៕

March 15, 2022

តម្លៃមាស និងតម្លៃប្រេងអន្តរជាតិ «សហការគ្នា» ដាំក្បាលចុះកាលពីម្សិលមិញ

មាសធ្លាក់ថ្លៃជិត ៤០ ដុល្លារអាម៉េរិក ក្នុង ១ អោន ខណៈដែលតម្លៃប្រេងឆៅក៏បាត់បង់ជាង ៥% ក្នុងការជួញដូរកាលពីថ្ងៃទី ១៤ មីនា ២០២២។

តម្លៃមាសពិភពលោកប្រភេទប្រគល់ភ្លាម ធ្លាក់ថ្លៃ ៣៨ ដុល្លារអាម៉េរិក ពេលបញ្ចប់ការជួញដូរកាលពីថ្ងៃទី ១៤ មីនា ចុះមកនៅត្រឹម ១,៩៥៣ ដុល្លារ ក្នុង ១ អោន (១ អោន (ounce) ប្រហែល ៨.៣ ជី)។ និន្នាការធ្លាក់ថ្លៃនេះ ក៏បានអូសបន្លាយមកដល់ព្រឹកថ្ងៃទី ១៥ មីនា ហើយបច្ចុប្បន្ន ត្រូវបានជួញដូរក្នុងរង្វង់ ១,៩៥១ ដុល្លារ ក្នុង ១ អោន។

មូលហេតុដែលនាំឱ្យមានការធ្លាក់ថ្លៃនេះ ត្រូវបាន Jim Wyckoff ដែលជាអ្នកវិភាគប្រចាំក្រុមហ៊ុន Kitco Metals បកស្រាយថា៖ «ព័ត៌មានល្អស្ដីពីសង្គ្រាម រុស្ស៊ី-អ៊ុយក្រែន បានជួយឱ្យទីផ្សារមូលបត្រមានសន្ទស្សន៍កើនឡើង បង្កជាសម្ពាធលើទីផ្សារលោហធាតុមានតម្លៃ»។

អត្រាការប្រាក់នៃមូលបត្របំណុលរបស់ រដ្ឋាភិបាលសហរដ្ឋអាម៉េរិក ប្រភេទ ១០ ឆ្នាំ ក៏ជាចំណែកធំមួយដែលធ្វើឱ្យមាសធ្លាក់ថ្លៃ។ ធនាគារកណ្ដាលអាម៉េរិក (FED) សប្ដាហ៍នេះត្រូវបានគេរំពឹងថា នឹងប្រកាសដំឡើងការប្រាក់សម្រាប់មូលបត្របំណុលរបស់រដ្ឋាភិបាល។

ចំណែកទីផ្សារប្រេងវិញ តម្លៃនាថ្ងៃនេះក៏ទទួលរងសម្ពាធដោយមានដំណឹងថា សហរដ្ឋអាម៉េរិក កំពុងធ្វើការជាមួយ វ៉េណេស៊ុយអេឡា ក្នុងបំណងបង្កើនប្រភពផ្គត់ផ្គង់ប្រេង ជំនួសឱ្យ រុស្ស៊ី។ ទន្ទឹមនឹងនេះ ការដែល ចិន ដាក់បម្រាមគោចរលើទីក្រុងមួយចំនួនជាថ្មី ដោយសារ កូវីដ-១៩ ក៏ប៉ះពាល់ដល់តម្រូវការប្រេងប្រចាំថ្ងៃ។ ជាងនេះ សង្គ្រាមរវាង រុស្ស៊ី និង អ៊ុយក្រែន ដែលត្រូវបានគេរំពឹងថា នឹងល្អប្រសើរឡើងវិញ ក៏ជួយទាញតម្លៃប្រេងសាំង ឱ្យធ្លាក់ចុះមួយកម្រិតផងដែរ។

បញ្ចប់ការជួញដូរកាលពីថ្ងៃទី ១៤ មីនា តម្លៃប្រេងឆៅអាម៉េរិក WTI ធ្លាក់ថ្លៃ ៦% ដោយត្រូវបានជួញដូរក្នុងរង្វង់ ១០៣ ដុល្លារ/ធុងបារ៉ែល។ កាលពីម្សិលមិញ មានពេលខ្លះ តម្លៃប្រេងធ្លាក់មកនៅក្រោម ១០០ ដុល្លារ/ធុង៕

March 15, 2022

ស្ពានអាកាស និងផ្លូវក្រោមដីចោមចៅ សម្រេចបាន ៩៨-៩៩% និងកំពុងត្រៀមដាក់ឱ្យប្រើប្រាស់ជាបណ្ដោះអាសន្ន

អភិបាលរាជធានីភ្នំពេញ កាលពីថ្ងៃទី ១៤ មីនា បានដឹកនាំមន្ត្រីជំនាញ និងមន្ត្រីរបស់ក្រុមហ៊ុនទទួលម៉ៅការសាងសង់ បានចុះពិនិត្យការដ្ឋានសាងសង់ស្ពានអាកាស និងផ្លូវក្រោមដីចោមចៅ។

គម្រោងរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ នេះ បច្ចុប្បន្នសម្រេចបានប្រមាណពី ៩៨ ទៅ ៩៩%។ ហើយ ៥ ថ្ងៃទៀតប៉ុណ្ណោះនឹងរួចរាល់ជាស្ថាពរ ដែលអាចដាក់ឱ្យធ្វើដំណើរឆ្លងកាត់ជាបណ្តោះអាសន្នបាន នេះបើតាម ឯកឧត្តម ឃួង ស្រេង អភិបាលរាជធានីភ្នំពេញ។

ការចុះត្រួតពិនិត្យរបស់ អភិបាលរាជធានីភ្នំពេញ កាលពីម្សិលមិញនេះ គឺក្នុងបំណងជំរុញការងារដែលនៅសេសសល់ឱ្យបានរួចរាល់ក្នុងរយៈពេល ៥ ថ្ងៃទៀត ដើម្បីត្រៀមសម្រាប់ការសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាពរបស់សម្ដេចនាយករដ្ឋមន្ត្រី ហ៊ុន សែន នាពេលខាងមុខ។

ស្ពានអាកាស និងផ្លូវក្រោមដីចោមចៅ គឺជាគម្រោងរបស់ រាជរដ្ឋាភិបាលកម្ពុជា តាមរយៈ រដ្ឋបាលរាជធានីភ្នំពេញ។ សំណង់ដែលត្រូវបានបើកការដ្ឋានសាងសង់កាលថ្ងៃទី ២៩ មិថុនា ២០១៨ ទទួលម៉ៅការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយប្រើប្រាស់រយៈពេល ៣០ ខែ ក្នុងការសាងសង់ និងចំណាយថវិកាសាងសង់សរុបប្រមាណ ២២ លានដុល្លារអាម៉េរិក៕

March 15, 2022

គ្រាន់តែសារមួយឃ្លាសោះ ម្ចាស់ក្រុមហ៊ុន SpaceX ធ្វើឱ្យទីក្រុងក្រីក្រប្រែទៅជា «ច្រកទ្វារទៅកាន់ពិភពអង្គារ»! ដីឡើងថ្លៃខ្ពស់ ឯអ្នកវិនិយោគក៏អូសគ្នាចូលមករកស៊ី

តម្លៃដីនៅទីក្រុងក្រីក្រដែល បានឡើងថ្លៃខ្ពស់មិនគួរឱ្យជឿ ដោយចំណាយពេលត្រឹមតែមួយយប់ ក្រោយមហាសេដ្ឋីអាម៉េរិក Elon Musk បង្ហោះសារមួយឃ្លានៅលើ Twitter។

Evan Wood បានប្រាប់ Bloomberg ថា ថ្មីៗនេះ គាត់ទទួលបានសារជាញឹកញាប់ពីមនុស្សចម្លែក ដែលសួរគាត់ថា ចង់លក់ផ្ទះនៅលើកោះ South Padre Island ក្នុងរដ្ឋ Texas ឬអត់។ ពីផ្ទះនេះ គេអាចមើលឃើញមូលដ្ឋានបាញ់បង្ហោះយានអវកាស Texas របស់ Elon Musk បានយ៉ាងច្បាស់ ដោយវាមានចម្ងាយពីគ្នាប្រហែល ១០ គីឡូម៉ែត្រ។ ប៉ុន្តែ វិស្វករបច្ចេកវិទ្យារូបនេះ បានបញ្ជាក់ថា គាត់នឹងមិនលក់ផ្ទះនេះជាដាច់ខាត។

នៅឯ Brownsville ជាទីក្រុងមួយរបស់ Cameron ក៏កំពុងជួបស្ថានភាពដូចគ្នានេះដែរ។ Bruno Zavaleta ដែលជាក្រុមហ៊ុនអចលនទ្រព្យក្នុងតំបន់មួយ ឱ្យដឹងថា មានភ្ញៀវដែលស្ម័គ្រចិត្តជិះរថយន្ត ១៦ ម៉ោង មកកាន់ទីនេះ ដើម្បីទិញផ្ទះ ២ ខ្នង ដែលកំពុងសាងសង់ក្នុងតំបន់ Alto Groves។ តំបន់នេះត្រូវបានក្រុមអ្នករកស៊ីក្នុងវិស័យអចលនទ្រព្យឃោសនាថា ដូចទៅនឹង «ផ្ទះរបស់មជ្ឈមណ្ឌលគ្រប់គ្រង SpaceX»។

ប្រការខាងលើនេះ កន្លងមកមិនដែលកើតមានឡើយ នៅក្នុងខណ្ឌ Cameron ជាទីដែលក្នុងចំណោមមនុស្ស ៤ នាក់ គឺមានម្នាក់រស់នៅក្នុងស្ថានភាពអត់ឃ្លាន។ ចំណែកក្រុមយុវវ័យដែលទៅរកស៊ីឆ្ងាយ នឹងមិនដែលវិលត្រលប់មកវិញឡើយ។ ប៉ុន្តែ ដោយសារតែសារនៅលើ Twitter របស់អ្នកមានទ្រព្យច្រើនជាងគេក្នុងពិភពលោក អចលនទ្រព្យនៅ Cameron ក៏ត្រូវបានគេរកទិញជាបន្តបន្ទាប់ក្នុងតម្លៃខ្ពស់ មិនគួរឱ្យជឿ។

តាមពិត ក្រុមហ៊ុន SpaceX របស់មហាសេដ្ឋី Elon Musk បានតាំងនៅទីនេះអស់ជាច្រើនឆ្នាំមកហើយ។ អចលនទ្រព្យនៅទីនេះឡើងថ្លៃខ្ពស់ បន្ទាប់ពីលោក Musk អំពាវនាវឱ្យគ្រប់គ្នាមកទិញផ្ទះនៅ South Padre Island កាលពីខែមីនា ២០២។ នៅលើ Twitter លោក Elon Musk សរសេរថា៖ «ចូរពិចារណាអំពីការរើមករស់នៅក្នុងតំបន់ Starbase ឬតំបន់ Brownsville នៅ South Padre Island ក្នុងរដ្ឋ Texas»។ ជាងនេះ ក្រោយមក លោក Musk ក៏បានសន្យាចំណាយប្រាក់ ១០ លានដុល្លារ ដើម្បីអភិវឌ្ឍទីក្រុង Brownsville ព្រមទាំងចំណាយ ២០ លានដុល្លារ ដើម្បីជួសជុលសាលារៀននានាក្នុងខណ្ឌ Cameron ផងដែរ។

មួយឆ្នាំក្រោយមក សេដ្ឋកិច្ចរបស់ខណ្ឌនេះ បានប្ដូរផ្លាស់គួរឱ្យចាប់អារម្មណ៍ ដោយសារតែក្រុមអ្នកគាំទ្ររបស់លោក Elon Musk។ ទីក្រុង Brownsville ក៏ត្រូវបានគេភ្ជាប់ទៅនឹងឈ្មោះថ្មី៖ «ច្រកទៅកាន់ពិភពអង្គារ»។ «ទីផ្សារបានប្រែជាមានភាពទាក់ទាញខ្លាំង ក្រោយរយៈពេល ១ យប់ ទៅតាមន័យត្រង់។ សារមួយឃ្លាបានប្ដូរផ្លាស់គ្រប់យ៉ាង» Laurie Howell ដែលជាបុគ្គលិកអចលនទ្រព្យមួយរូប អះអាងដូច្នេះ។

នៅពាសពេញតំបន់ Cameron ឥទ្ធិពលរបស់មហាសេដ្ឋី Elon Musk បានស្ដែងចេញយ៉ាងច្បាស់។ ក្រុមហ៊ុន អាជីវកម្មជាច្រើនដែលទើបត្រូវបានបង្កើតឡើងថ្មី នាំគ្នាដាក់ឈ្មោះទៅតាមទិសដៅនៃអវកាស ក្នុងនោះមានដូចជា ឈ្មោះ «ប្រព័ន្ធបាញ់បង្ហោះរុក្កែត» ឬ «ថ្មព្រះចន្ទ»។ល។ បណ្ដាក្រុមហ៊ុនដែលទាក់ទងនឹងអាកាសចរណ៍អវកាស ដូចជា ក្រុមហ៊ុនឡានហោះ Paragon VTOL, Space Channel និង Spaced Ventures ជាដើម ក៏ចាប់ផ្ដើមរើមកកាន់តំបន់នេះ៕

March 14, 2022

ទីក្រុងមូស្គូ គំរាមរឹបអូសទ្រព្យសម្បត្តិរបស់បណ្ដាក្រុមហ៊ុនដែលចាកចេញពី រុស្ស៊ី

យោងតាម WSJ រដ្ឋអាជ្ញាតុលាការរុស្ស៊ី បានព្រមានថា អាចចាប់ខ្លួនមេដឹកនាំ ឬរឹបអូសយកទ្រព្យសម្បត្តិរបស់បណ្ដាក្រុមហ៊ុនលោកខាងលិចដែលដកខ្លួនចេញពីទឹកដី រុស្ស៊ី។

ប្រភពព័ត៌មានរបស់ Wall Street Journal ឱ្យដឹងថា ក្នុងសប្ដាហ៍កន្លង រដ្ឋអាជ្ញានៃតុលាការរបស់ រុស្ស៊ី បានផ្ញើការព្រមានដល់បណ្ដាក្រុមហ៊ុន ដូចជា Coco-Cola, McDonald’s, Procter & Gamble Co., International Business Machines និងម្ចាស់ KFC – Yum Brands។ ក្រុមហ៊ុនទាំងនេះត្រូវបានគំរាមប្ដឹង ឬរឹបអូសទ្រព្យសម្បត្តិ ក្នុងនោះមានទាំងយីហោផងដែរ។

ការព្រមានរបស់ រុស្ស៊ី នេះ បានធ្វើឱ្យក្រុមហ៊ុនយ៉ាងហោចមួយ ក្នុងចំណោមក្រុមហ៊ុនជាគោលដៅ ត្រូវកាត់បន្ថយទំនាក់ទំនងជាមួយបណ្ដាសាខានៅ រុស្ស៊ី និងបណ្ដាសាខាដែលនៅសល់ ព្រោះបារម្ភថា សារ និងអ៊ីមេល ត្រូវអាជ្ញាធររុស្ស៊ី រាំងខ្ទប់។ បណ្ដាក្រុមហ៊ុនផ្សេងៗ បានបញ្ជូនថ្នាក់ដឹកនាំជាន់ខ្ពស់ ចេញពី រុស្ស៊ី រួចរាល់ហើយ។

បច្ចុប្បន្ន អ្នកនាំពាក្យរបស់ Coca-Cola, IBM, P&G និង McDonald’s, Yum (KFC និង Pizza Hut) នៅ រុស្ស៊ី បានបដិសេធការអធិប្បាយអំពីបញ្ហានេះ។

បន្ទាប់ពីបានបើកការឈ្លានពានលើ អ៊ុយក្រែន ក្រុមហ៊ុនរបស់បណ្ដាប្រទេសលោកខាងលិច បាននាំគ្នាបិទទ្វារ ឬកាត់បន្ថយសកម្មភាពជំនួញរបស់ពួកគេនៅ រុស្ស៊ី ព្រោះតែរងផលប៉ះពាល់ពីការដាក់ទណ្ឌកម្មរបស់បស្ចិមលោក មកលើ រុស្ស៊ី។

យោងតាមសាលាគ្រប់គ្រង Yale បច្ចុប្បន្ន មានក្រុមហ៊ុនបរទេសជាង ៣៥០ ស្ថាប័ន បានប្រកាសថានឹងចាកចេញ ឬផ្អាកសកម្មភាពអាជីវកម្មនៅ រុស្ស៊ី។

Jen Psaki លេខាផ្នែកសារព័ត៌មានរបស់ សេតវិមាន បានឱ្យដឹងថា៖ «រាល់ការប្រឹងប្រែងដោយខុសច្បាប់របស់ រុស្ស៊ី ក្នុងបំណងរឹបអូសទ្រព្យរបស់បណ្ដាក្រុមហ៊ុន នឹងនាំទៅរកផលវិបាកផ្នែកសេដ្ឋកិច្ចកាន់តែធ្ងន់ធ្ងរ»។

March 14, 2022

តម្លៃប្រេងពិភពលោកព្រឹកថ្ងៃទី ១៤ មីនា បន្តធ្លាក់ចុះ

បន្តនិន្នាការធ្លាក់ថ្លៃក្នុងសប្ដាហ៍កន្លង តម្លៃប្រេងពិភពលោកព្រឹកថ្ងៃទី ១៤ មីនានេះ ថយចុះប្រហែល ៤ ដុល្លារ បន្ទាប់ពីមន្ត្រីអាម៉េរិក មួយរូបនិយាយថា មានសញ្ញាជាច្រើនបង្ហាញថា រុស្ស៊ី ត្រៀមខ្លួនរួចរាល់សម្រាប់បន្តការចរចាជាមួយ អ៊ុយក្រែន។

តម្លៃប្រេង Brent ថយចុះ ៤.១២ ដុល្លារអាម៉េរិក ឬ ៣.៦% ចុះមកនៅត្រឹម ១០៨.៥៥ ដុល្លារ/ធុងបារ៉ែល នៅវេលាម៉ោង ៨និង១៥នាទី (ម៉ោងនៅ កម្ពុជា)។ តម្លៃប្រេងឆៅ West Texas Intermediate (WTI) របស់ សហរដ្ឋអាម៉េរិក ធ្លាក់ថ្លៃ ៣.៩៣ ដុល្លារ ឬ ៣.៧% ចុះមកនៅត្រឹម ១០៥.៤ ដុល្លារ/ធុងបារ៉ែល។

ប្រេងទាំង ២ ប្រភេទខាងលើ សុទ្ធតែបានឡើងថ្លៃខ្ពស់ ចាប់តាំងពី រុស្ស៊ី បើកយុទ្ធនាការយោធានៅ អ៊ុយក្រែន កាលពីថ្ងៃទី ២៤ កុម្ភៈ និងកើន ៤០% រាប់ចាប់ពីដើមឆ្នាំ ២០២២។

កាលពីថ្ងៃទី ១៣ មីនា អនុរដ្ឋមន្ត្រីការបរទេសអាម៉េរិក Wendy Sherman យល់ថា មានសញ្ញាជាច្រើនបង្ហាញថា រុស្ស៊ី បានត្រៀមជាស្រេចក្នុងការបន្តចរចាជាមួយ អ៊ុយក្រែន។ យុទ្ធនាការយោធារបស់ រុស្ស៊ី នៅ អ៊ុយក្រែន បានធ្វើឱ្យទីផ្សារថាមពលសកល មានការប្រែប្រួលខ្លាំង។

តម្លៃប្រេង Brent បានថយចុះ ៤.៨% ក្នុងសប្ដាហ៍កន្លង ខណៈប្រេង WTI ធ្លាក់ថ្លៃ ៥.៧%។ ប្រេង ២ ប្រភេទនេះ សុទ្ធតែធ្លាប់មានតម្លៃខ្ពស់បំផុតកាលពីដើមសប្ដាហ៍ រាប់ចាប់ពីឆ្នាំ ២០០៨ ដោយសារតែមានការបារម្ភអំពីប្រភពផ្គត់ផ្គង់ ក្រោយពី សហរដ្ឋអាម៉េរិក និងសម្ព័ន្ធមិត្តនៅ អឺរ៉ុប បានចាប់ផ្ដើមពិចារណាអំពីការហាមឃាត់ប្រេងដែលនាំពី រុស្ស៊ី។

អាម៉េរិក ក្រោយមកក៏បានហាមឃាត់ប្រេងរបស់ រុស្ស៊ី ក្នុងគ្រាដែល អង់គ្លេស ផ្អាកការនាំចូលជាជំហានៗ ចាប់ពីពេលនេះដល់ចុងឆ្នាំ ២០២២។ សម្ពាធលើតម្លៃប្រេងបានថយចុះ បន្ទាប់ពី ឯកអគ្គរាជទូតរបស់ អេមីរ៉ាតអារ៉ាប់រួម ប្រចាំ សហរដ្ឋអាម៉េរិក ថ្លែងថា ប្រទេសនេះគាំទ្រការបង្កើនផលិតភាព ហើយថានឹងអំពាវនាវឱ្យ អង្គការនៃបណ្ដាប្រទេសនាំចេញប្រេង ពិចារណាអំពីប្រការដូចគ្នានេះ។

យោងតាមអ្នកនាំពាក្យរបស់ វិមានក្រឹមឡាំង Dmitry Peskov កិច្ចចរចារវាង រុស្ស៊ី និង អ៊ុយក្រែន នឹងបន្តធ្វើឡើងនៅក្នុងថ្ងៃទី ១៤ មីនានេះ ក្រោយពីការចរចាកាលពីថ្ងៃទី ១៣ មីនា បានចប់៕

March 14, 2022

Category: សង្គម និងសេដ្ឋកិច្ច