សង្គម និងសេដ្ឋកិច្ច - La Reine Media

ប្រហែល «ស្អប់» Facebook ខ្លាំងពេក ទើបមហាសេដ្ឋី Elon Musk ក្លាយជាម្ចាស់ភាគហ៊ុនធំជាងគេរបស់ Twitter

យោងតាមឯកសាររបស់គណៈកម្មការមូលបត្រអាម៉េរិក (SEC) លោក Elon Musk បច្ចុប្បន្នគឺជាអ្នកកាន់កាប់ភាគហ៊ុន Twitter ចំនួន ៩.២% ធ្វើឱ្យលោកក្លាយជាម្ចាស់ភាគហ៊ុនធំជាងគេបង្អស់នៅក្នុងបណ្ដាញសង្គមនេះ។

ចំនួនភាគហ៊ុនរបស់មហាសេដ្ឋី Musk គឺច្រើនជាងសហស្ថាបនិករបស់ Twitter លោក Jack Dorsey ដែលមានតែ ២.២៥%។

ភាគហ៊ុនរបស់ Twitter បានកើនឡើង ២៥% បន្ទាប់ពីព័ត៌មានខាងលើត្រូវបានបង្ហើប។ ភាគហ៊ុនរបស់លោក Musk មានតម្លៃប្រហែល ២.៨៩ ពាន់លានដុល្លារ នេះបើយោងតាមតម្លៃទីផ្សារដែលបានបិទទ្វារកាលពីថ្ងៃសុក្រសប្ដាហ៍មុន។

ការដែលនាំឱ្យលោក Musk ក្លាយជាម្ចាស់ភាគហ៊ុនធំជាងគេនៅ Twitter ទំនងជាមកពីលោកមិនចូលចិត្ត Facebook។ កាលពីពេលកន្លងទៅ លោក Musk ធ្លាប់បានធ្វើការស្ទង់មតិនៅលើ Twitter ស្ដីពីការគោរពសេរីភាពក្នុងការបញ្ចេញមតិរបស់បណ្ដាញសង្គមនេះ។ លទ្ធផលបង្ហាញថា មានអ្នកលេង Twitter ជាង ៧០% ឆ្លើយថា Twitter មិនគោរពសេរីភាពបញ្ចេញមតិ ចំណែកជាង ២៩% ឆ្លើយថា គោរព។

មហាសេដ្ឋី Elon Musk និង មហាសេដ្ឋី Zuckerberg

ដូច្នេះ ក្រុមអ្នកវិភាគយល់ថា ការដែលលោក Musk ទិញភាគហ៊ុនយ៉ាងច្រើនរបស់ Twitter អាចថា មកពីលោកចង់បង្វែរទិសដៅរបស់ Twitter ទៅរកភាពវិជ្ជមាន គឺការគោរពសិទ្ធិបញ្ចេញមតិឱ្យបានច្រើនជាងមុន។

ជាងនេះ លោក Elon Musk គឺជា «សត្រូវធំ» របស់ Mark Zuckerberg ដែលជាម្ចាស់ Facebook និងជាគូប្រជែងរបស់ Twitter។

កន្លងមក លោក Musk ក៏ធ្លាប់បានឱ្យក្រុមការងាររបស់លោក លុបចោលទំព័រ Facebook របស់ ក្រុមហ៊ុន SpaceX និង Tesla ផងដែរ។ មហាសេដ្ឋីរូបនេះ ធ្លាប់បង្ហោះសារស្នើឱ្យគ្រប់គ្នាលុបបណ្ដាញសង្គមនេះចេញពីទូរស័ព្ទ និងងាកទៅប្រើកម្មវិធីផ្ញើសារដែលបំប្លែងជាកូដ Sinnal ទៀតផង។

April 5, 2022

Hyundai អភិវឌ្ឍយន្តហោះដើរដោយថាមពលអ៊ីដ្រូសែន ហោះឡើង និងចុះចតដោយត្រង់

ក្រុមហ៊ុនផលិតរថយន្ត Hyundai របស់ កូរ៉េខាងត្បូង កំពុងផ្ដោតលើទីផ្សារអាកាសចរណ៍ ដោយមានគម្រោងបញ្ចេញយន្តហោះអ៊ីដ្រូសែនដំបូងនៅឆ្នាំ ២០២៨។

Hyundai កំពុង «លេងល្បែង» មួយប្រកបដោយភាពម៉ឺងម៉ាត់ក្នុងវិស័យអាកាសចរណ៍ជំនាន់ថ្មី ដោយការបង្កើតក្រុមហ៊ុនបុត្រសម្ព័ន្ធ Supernal កាលពីចុងឆ្នាំ ២០២១ ដើម្បីផលិតមធ្យោបាយហោះហើរឡើង និងចុះចតដោយត្រង់ ដំណើរការដោយថាមពលអគ្គិសនី (eVTOL) ក្នុងបរិមាណច្រើន។

នៅក្នុងបទបង្ហាញមួយនៅវេទិកា H2 Aero របស់ Vertical Flight Society ក្នុងរដ្ឋ California សហរដ្ឋអាម៉េរិក កាលពីសប្ដាហ៍កន្លង Supernal បានឱ្យដឹងថា នឹងបញ្ចេញយន្តហោះ eVTOL ដំបូងរបស់ខ្លួន នៅឆ្នាំ ២០២៨ និងធ្វើពាណិជ្ជកម្មនៅឆ្នាំ ២០៣០។

យោងតាម New Atlas នោះគឺជាយន្តហោះសម្រាប់ទីក្រុងដែលដំណើរការដោយថ្មអ៊ីដ្រូសែន មិនបញ្ចេញឧស្ម័នពុល ដែលអាចហោះបានរយៈចម្ងាយ ១២០ គីឡូម៉ែត្រ ពោលគឺអាចហោះហើរនៅក្នុងរង្វង់នៃទីក្រុងមួយបាន។

ទន្ទឹមនឹងគម្រោងយន្តហោះ eVTOL សម្រាប់ទីក្រុង ក្រុមហ៊ុន Hyundai ក៏មានគម្រោងអភិវឌ្ឍយន្តហោះអ៊ីដ្រូសែន ដែលហោះឡើង និងចុះចតត្រង់ ប្រតិបត្តិការរយៈចម្ងាយឆ្ងាយជាងប្រភេទយន្តហោះខាងលើ ដោយអាចហោះបានចាប់ពី ១៩០ គីឡូម៉ែត្រ ដល់ ១,០០០ គីឡូម៉ែត្រ ដែលអនុញ្ញាតឱ្យបើកបរឆ្លងពីទីក្រុងមួយ ទៅកាន់ទីក្រុងមួយ៕

April 5, 2022

មានទ្រព្យ ៧៤ ពាន់លានដុល្លារអាម៉េរិក ស្ថាបនិករបស់ Binance យល់ថា ភាពមានបានរបស់ខ្លួនគ្រាន់តែនៅលើក្រដាសប៉ុណ្ណោះ

ក្រោយការបង្កើត Binance បាន ៥ ឆ្នាំ លោក Zhao ត្រូវបាន Bloomberg គណនាឃើញថា មានទ្រព្យសុទ្ធរហូតដល់ ៧៤ ពាន់លានដុល្លារអាម៉េរិក។

លោក Changpeng Zhao ដែលជាស្ថាបនិករបស់ក្រុមហ៊ុន Binance បច្ចុប្បន្នគឺជាមហាសេដ្ឋីមួយរូបក្នុងចំណោមអ្នកមានទ្រព្យច្រើនជាងគេងនៅលើពិភពលោក។

បុរសវ័យ ៤៤ ឆ្នាំ Changpeng Zhao គឺជាអ្នកគ្រប់គ្រងផ្សាររូបិយវត្ថុឌីជីថល ធំជាងគេបង្អស់ក្នុងសកលលោក ដោយមានតម្លៃប្រហែល ៣០០ ពាន់លានដុល្លារ ពោលគឺធំជាងជិត ៦ ដង ធៀបនឹងគូប្រជែង Coinbase នៅ សហរដ្ឋអាម៉េរិក។

យោងតាម Bloomberg ក្រោយបង្កើត Binance បាន ៥ ឆ្នាំ លោក Zhao មានទ្រព្យសុទ្ធរហូតដល់ ៧៤ ពាន់លានដុល្លារអាម៉េរិក ជិតស្មើនឹងទ្រព្យរបស់ Mark Zuckerberg ដែលជានាយកប្រតិបត្តិរបស់ Meta ជាក្រុមហ៊ុនមេរបស់បណ្ដាញសង្គម Facebook។ ដោយជាប់ចំណាត់ថ្នាក់ជាអ្នកមានជាងគេទី ១៥ នៅលើទំព័ររបស់សារព័ត៌មាន Bloomberg លោក Zhao មានទ្រព្យច្រើនជាងស្ថាបនិករបស់ Dell គឺ Michael Dell និងអ្នកស្នងមរតក ៣ នាក់ របស់ Walmart ទៅទៀត។

ចែករំលែងជាមួយ Fortune លោក Changpeng Zhao និយាយថា លោកកើតនៅក្នុងគ្រួសារក្រីក្រ និងធំឡើងក្នុងភូមិមួយក្នុងខេត្ត Jiangsu ប្រទេសចិន។ លោកធ្លាប់ឆ្លងកាត់ជំនាន់ចែករបបអាហារ។

ក្រោយមក គ្រួសាររបស់លោក បានទៅកាន់ ប្រទេសកាណាដា។ Zhao ចាប់ផ្ដើមរកប្រាក់ដោយធ្វើការឱ្យ McDonald’s និងធ្វើជាអ្នកបើកបរនៅក្នុងការប្រកួតបាល់ទះនានា។ បន្ទាប់មក លោកបន្តរៀនអភិវឌ្ឍកម្មវិធីកុំព្យូទ័រ និងធ្លាប់បានធ្វើការច្រើនឆ្នាំនៅ ប្រទេសជប៉ុន និង សហរដ្ឋអាម៉េរិក មុនពេលបង្កើតក្រុមហ៊ុន Binance។

Binance ដើមឡើយមានការិយាល័យកណ្ដាលនៅ ប្រទេសចិន ប៉ុន្តែ បានរើចេញពីប្រទេសនេះ ដោយសារតែមានសម្ពាធពីរដ្ឋាភិបាល។

ពេលនេះ លោក Zhao បានក្លាយជាមហាសេដ្ឋី ដោយមានទ្រព្យរាប់សិបពាន់លានដុល្លារ និងក្ដោបក្ដាប់ផ្សាររូបិយវត្ថុឌីជីថលលំដាប់លើគេក្នុងពិភពលោក ដែលមានតម្លៃនៃការជួញដូរឡើងដល់ជាង ៣៤,០០០ ពាន់លានដុល្លារអាម៉េរិក កាលពីឆ្នាំ ២០២១។

ចំពោះភាពមានបានរបស់ខ្លួន លោក Zhao យល់ថា វាគ្រាន់តែមាននៅលើក្រដាសប៉ុណ្ណោះ។ ហើយយោងតាមល្បឿននៃការពង្រីកខ្លួនរបស់ Binance ភាពមានបានហាក់មិនមែនជារបស់ដែលមានសារសំខាន់បំផុតសម្រាប់លោកឡើយ៕

April 5, 2022

(វីដេអូ)-ក្រុមសត្វផ្សោតសមុទ្រ (Dolphin) «ធ្វើសង្គ្រាមពាក្យសម្ដី» ដើម្បីដណ្ដើមស្រីស្នេហ៍

ក្រុមផលិតភាពយន្តឯកសាររបស់ BBC ថតបានសកម្មភាពផ្សោតសមុទ្រ ២ ក្រុម ដែលប្ដេជ្ញា «ធ្វើសង្គ្រាមពាក្យសម្ដី» នឹងគ្នា ដោយបញ្ចេញសំឡេងបែបទំនាក់ទំនងជាន់ខ្ពស់ប្រកបដោយភាពស្មុគស្មាញ ដើម្បីដណ្ដើមសិទ្ធិជាម្ចាស់បេះដូងនៃផ្សោតញី។

នៅក្នុងសង្គមនៃសត្វផ្សោតសមុទ្រ (Dolphin) ទំនាក់ទំនងក៏មានផ្នែកអវិជ្ជមាន។ ទាំងនេះគឺជាក្រុមសត្វផ្សោតវ័យក្មេង។ ពួកវាតែងតែបញ្ចេញខ្យល់តាមមាត់នៅពេលខឹង ឬត្រៀមស្មារតីសម្រាប់ដេញតាម និងប្រយុទ្ធគ្នា។ នេះបើតាមបណ្ឌិត Denise Herzing អ្នកជំនាញខាងសភាសត្វផ្សោត។

សត្វផ្សោតឈ្មោលតែងហែលជាក្រុមតូចៗ ហើយធ្វើសកម្មភាព និងបញ្ចេញសំឡេងស្របគ្នា។ ពេលនៅជុំគ្នា ពួកវាទំនងជាបង្កើតជាសំឡេងពិសេសសម្រាប់ក្រុមរបស់ខ្លួន។

ក្រុមផ្សោតឈ្មោលទាំងនេះកំពុងដេញតាម Amanda ជាផ្សោតញីដែលអ្នកស្រី Denise ស្គាល់ច្បាប់។ ពួកវាកំពុងទាក់ទាញ Amanda ដោយសកម្មភាពស្របគ្នា។ Amanda ហាក់មិនមានសុភមង្គលប៉ុន្មាននៅចំពោះមុខការយកចិត្តទុកដាក់បែបនេះ ហើយវាក៏បានព្យាយាមដេញក្រុមផ្សោតឈ្មោលដោយប្រើសំឡេងដូចទៅនឹងគេសង្កៀតធ្មេញ និងបក់កន្ទុយដាក់។

យ៉ាងនេះក៏ដោយ ក្រុមផ្សោតឈ្មោលនេះនៅតែបន្ត «ខ្សឹបខ្សៀវ» គ្នា ដើម្បីបានដឹងអំពីស្ថានភាពរបស់ Amanda។ ប៉ុន្តែ ពេលនេះពួកវាមានសត្រូវស្នេហាមកប្រកួតប្រជែង។ នោះគឺជាក្រុមផ្សោតឈ្មោលដែលមានវ័យចំណាស់ជាង។

សង្គ្រាមដណ្ដើមមិត្តស្រីក៏បានចាប់ផ្ដើម។ នៅបាតសមុទ្រ ផ្សោត ២ ក្រុម កំពុងប្រឈមមុខដាក់គ្នា។

ដោយសារមិនត្រូវបានក្រុមសត្វផ្សោតចាប់អារម្មណ៍ អ្នកថតវីដេអូ Didier ក៏មានឱកាសដ៏កម្រ ដើម្បីថតយកសកម្មភាពនៃ «សង្គ្រាមពាក្យសម្ដី» ដ៏ខ្លាំងក្លារបស់ពួកវា។

ភាគីទាំងសងខាងសុទ្ធតែប្រឹងប្រែង «ដំឡើងខ្លួន» និងប្រើប្រាស់ធ្មេញសង្កៀតគ្នាដើម្បីឱ្យឃើញថា ពួកវាធំជាង និងរឹងមាំជាង។ នោះគឺជាការគំរាមដែលមិនប្រើប្រាស់អំពើហិង្សា ប៉ុន្តែគឺជាការយោងទៅលើកម្រិតនៃទំនាក់ទំនងជាន់ខ្ពស់។

មិនយូរប៉ុន្មាន ក្រុមផ្សោតវ័យចំណាស់ ក៏បានដេញក្រុមផ្សោតវ័យក្មេងបានសម្រេច។ សង្គ្រាមរវាងផ្សោតឈ្មោល ២ ក្រុម ក៏ត្រូវបានបញ្ចប់៕

April 4, 2022

(វីដេអូ)-គម្រោងផលិតអគ្គិសនីដើរដោយថាមពលព្រះអាទិត្យ និងជំនោរ-លំនាចទឹកសមុទ្រ ដំបូងគេបង្អស់នៅ ប្រទេសចិន

ប្រទេសចិន កំពុងដំឡើងផ្ទាំងសូឡានៅលើកសិដ្ឋានផលិតអគ្គិសនីដែលដើរដោយកម្លាំងជំនោរ-លំនាចទឹកសមុទ្រ ធំបំផុតរបស់ប្រទេសនេះ ដើម្បីបង្កើនសមត្ថភាពនៃការផលិតអគ្គិសនី។

នេះគឺជាគម្រោងផលិតអគ្គិសនីប្រើថាមពលព្រះអាទិត្យ និងជំនោរ-លំនាចទឹកសមុទ្រដំបូងគេបង្អស់នៅ ប្រទេសចិន។ តាមផែនការ កសិដ្ឋានផលិតអគ្គិសនីនេះ នឹងបើកដំណើរការចាប់ពីខែឧសភា ឆ្នាំ ២០២២។ គម្រោងនេះមានទីតាំងនៅក្នុងទីក្រុង Wenling នៃខេត្ត Zhejiang ភាគខាងកើតប្រទេសចិន។

គម្រោងនេះ ដំបូងឡើយត្រូវបានស្ថាបនាជារោងចក្រផលិតអគ្គិសនីដែលដើរដោយកម្លាំងជំនោរទឹក-លំនាចនៃទឹកសមុទ្រធំបំផុតរបស់ ប្រទេសចិន ប៉ុន្តែ ក្រោយមក ផ្ទាំងសូឡានានាដែលមានទំហំសរុបជាង ១៣៣ ហិកតា ក៏ត្រូវបានដំឡើងបន្ថែមពីលើ ដើម្បីបង្កើនសមត្ថភាពនៃការផលិតអគ្គិសនី។

ប្រព័ន្ធដែលដើរដោយកម្លាំងជំនោរ-លំនាចទឹកសមុទ្រ និងប្រព័ន្ធស្រូបកម្ដៅព្រះអាទិត្យនឹងផលិតអគ្គិសនីស្អាតបានជាង ១០០ លានគីឡូវ៉ាត់ម៉ោង ជារៀងរាល់ឆ្នាំ ប្រហាក់ប្រហែលនឹងការប្រើប្រាស់ធ្យូងថ្មជាង ៣១,០០០ តោន នៅក្នុងវិស័យផលិតអគ្គិសនីដើរដោយកម្ដៅធ្យូងថ្ម ដូច្នេះ វានឹងជួយកាត់បន្ថយការបំភាយឧស្ម័នកាបូន ប្រហែលជាង ៨៤,០០០ តោន ជារៀងរាល់ឆ្នាំ។

April 4, 2022

ទម្រសម្រាប់បាញ់បង្ហោះរ៉ុក្កែតខ្នាតយក្សឡើងទៅកាន់ឋានព្រះចន្ទ របស់ ណាសា ត្រូវរន្ទះបាញ់ចំច្រើនគ្រាប់

(សហរដ្ឋអាម៉េរិក)-ទម្រ ៣៩B នៅមជ្ឈមណ្ឌលអវកាស Kennedy ក្នុងរដ្ឋ Florida ត្រូវរន្ទះបាញ់ចំជាច្រើនលើកក្នុងថ្ងៃទី ២ មេសា ប៉ុន្តែ មហារុក្កែត SLS កម្ពស់ជាង ១០០ ម៉ែត្រ នៅតែស្ថិតក្នុងស្ថានភាពល្អប្រសើរ។

រន្ទះបាញ់ចំនួន ៤ «គ្រាប់» បានបាញ់ត្រង់តំបន់ជុំវិញទម្រ Pad ៣៩B ជាកន្លែងដែលប្រព័ន្ធរ៉ុក្កែត SLS របស់ ណាសា នឹងត្រូវឆ្លងកាត់ការធ្វើតេស្តបញ្ចូលឥន្ធនៈសម្រាប់បេសកកម្ម Artemis ហោះទៅកាន់ឋានព្រះចន្ទនៅចុងឆ្នាំនេះ។ រ៉ុក្កែតត្រូវបានការពារផលប៉ះពាល់ពីរន្ទះ ដោយអង់តែនចំនួន ៣ និងប្រព័ន្ធខ្សែនាំរន្ទះចុះដីដែលនៅជុំវិញ។

យោងតាម ណាសា រន្ទះ ៣ គ្រាប់ដំបូងមានថាមពលខ្សោយ ប៉ុន្តែ គ្រាប់ទី ៤ ដែលបាញ់ចំអង់តែនទីមួយក្នុងប្រព័ន្ធការពារ មានថាមពលខ្លាំងជាងគេ នេះបើតាម Jeremy Parsons អនុប្រធានផ្នែកគ្រប់គ្រងប្រព័ន្ធលើដីរបស់ ណាសា។ លោក Parsons និយាយថា ប្រព័ន្ធការពាររន្ទះដំណើរការល្អ ជួយការពាររ៉ុក្កែត SLS និងយាន Orion ប្រកបដោយសុវត្ថិភាព។

ណាសា បានបន្ថែមគុណភាពនៃប្រព័ន្ធទប់ទល់រន្ទះសម្រាប់ទម្រ ៣៩B ដើម្បីការពារប្រព័ន្ធផ្នែករឹងរបស់រ៉ុក្កែត។ នៅលើកំពូលរបស់អង់តែននីមួយៗ មានបង្គោលស្រូបយករន្ទះ ធ្វើអំពីសរសៃកញ្ចក់ និងខ្សែនាំរន្ទះចុះដី។ ប្រព័ន្ធថ្មីនេះក៏បំពាក់អង្គញាណជាច្រើន ដែលជួយឱ្យគេដឹងអំពីស្ថានភាពរបស់រ៉ុក្កែត បន្ទាប់ពីត្រូវរន្ទះបាញ់ចំក្បែរនោះ។

Artemis ១ គឺជាបេសកកម្មដំបូងរបស់ SLS ក្នុងកម្មវិធី Artemis ដើម្បីនាំអ្នកអវកាសរបស់ ណាសា ឡើងទៅកាន់ឋានព្រះចន្ទក្នុងឆ្នាំ ២០៥។ Artemis ១ គឺជាជើងហោះហើរគ្មានមនុស្សបើក ដែលនឹងហោះជុំវិញព្រះចន្ទដើម្បីសាកល្បងដំណើរការរ៉ុក្កែត SLS និងយានអវកាស Orion។ ប្រព័ន្ធយាន និងរ៉ុក្កែតនេះ នឹងដឹកឧបករណ៍វិទ្យាសាស្ត្រជាច្រើន រួមទាំងមនុស្សសិប្បនិម្មិតមួយដែលមានបំពាក់អង្គញាណផងដែរ៕

April 4, 2022

តម្លៃមាសត្រូវបានព្យាករថា អាចឡើងដល់ ២,០០០ ដុល្លារ ក្នុងត្រីមាសទីពីរ

ការព្រួយបារម្ភអំពីសេដ្ឋកិច្ចអាម៉េរិក មានសញ្ញានៃវិបត្តិ និងការដែលសង្គ្រាមរវាង រុស្ស៊ី និង អ៊ុយក្រែន នៅបន្តឡើងកម្ដៅ អាចធ្វើឱ្យតម្លៃមាសឡើងដល់ ២,០០០ ដុល្លារអាម៉េរិក ក្នុង ១ អោន នៅក្នុងត្រីមាសទីពីរ នេះបើតាមអ្នកជំនាញការ។

ក្នុងត្រីមាសដំបូង តម្លៃមាសកើនជាង ៦% និងខ្ពស់បំផុតរាប់ចាប់ពីត្រីមាសទីបី ឆ្នាំ ២០២។ Frank Cholly អ្នកជំនាញជាន់ខ្ពស់ផ្នែកទីផ្សាររបស់ RJO Futures ឱ្យដឹងថា សេណារីយោវិជ្ជមានប្រហាក់ប្រហែលនេះ នឹងកើតឡើងក្នុងត្រីមាសទីពីរ ជាមួយនឹងគោលដៅ ២,០០០ ដុល្លារអាម៉េរិក ក្នុង ១ អោន (១ អោន-ounce ជិតស្មើនឹង ៨.៣ ជី)។

លោក Frank Cholly ព្យាករថា បើសិនតម្លៃមាសលោតឡើងផុតរង្វង់ ១,៩៥០-១,៩៧៥ ដុល្លារ/អោន នោះគោលដៅ ២,០០០ ដុល្លារ/អោន នឹងទៅដល់ក្នុងពេលឆាប់។

បន្ទាប់ពីដំណាក់កាលកើនឡើងយ៉ាងល្អនៅដើមឆ្នាំ តម្លៃមាសចាប់ផ្ដើមត្រីមាសថ្មីដោយការធ្លាក់ចុះ ៣០ ដុល្លារ ក្នុងថ្ងៃដំបូងនៃខែមេសា មកនៅត្រឹម ១,៩២៥.៥ ដុល្លារ/អោន។ ប៉ុន្តែ ក្រុមអ្នកវិភាគដែលកំពុងតាមដានលើការប្រាក់នៃមូលបត្របំណុលរបស់រតនាគារជាតិអាម៉េរិក យល់ថា តម្លៃមាសនៅសល់ចំណុចច្រើនទៀតដែលអាចលោតឡើង។

សង្គ្រាមរវាង រុស្ស៊ី និង អ៊ុយក្រែន ត្រូវបានគេព្យាករថា នឹងបន្តបង្កផលប៉ះពាល់ដល់តម្លៃមាស។ អ្នកជំនាញប្រចាំ TD Securities ឱ្យដឹងថា «ជម្រកដែលមានសុវត្ថិភាពបំផុតសម្រាប់អ្នកវិនិយោគគឺមាស។ ឱ្យតែកិច្ចចរចាឈប់បាញ់ និងការបន្ថយភាពតានតឹងនៅតែពិបាកចាប់យក ក្រុមអ្នកវិនិយោគក៏នឹងនៅតែស្វែងរកមាស ដើម្បីជាជម្រកសុវត្ថិភាព»។

ទោះជាយ៉ាងណាក៏ដោយ Michael Boutros ដែលជាអ្នកយុទ្ធសាស្ត្ររបស់ DailyFX សង្កត់ធ្ងន់ថា កត្តាបច្ចេកទេសបង្ហាញថា មាសនៅតែមិនទាន់ដល់ពេលផ្ទុះខ្លាំង។ អនាគត មាសអាចត្រូវបានលក់ចេញក្នុងទ្រង់ទ្រាយធំ ពិសេសគឺនៅពេលដែលតម្លៃរង្វង់ពី ១,៨២៨-១,៨៤៩ ដុល្លារ/អោន មិនត្រូវបានរក្សា «ខ្ជាប់ខ្ជួន»។ លោក Boutros យល់ថា តម្លៃរបស់មាសនឹងត្រូវបានធ្វើឱ្យមានតុល្យភាពដោយល្បឿននៃកំណើនការប្រាក់របស់ FED ហើយតម្លៃពិបាកនឹងចុះទាបក្រោមរង្វង់ដែលបាននិយាយខាងដើម៕

April 4, 2022

ប្រវត្តិឡូហ្គោ ៤៦ ឆ្នាំ របស់ Apple ៖ ហេតុអ្វីបានជា «ផ្លែប៉ោម» មានស្នាមខាំ?

និមិត្តសញ្ញាដំបូងរបស់ក្រុមហ៊ុន Apple មើលទៅគួរឱ្យព្រឺក្បាល ព្រោះស្រដៀងនឹងរូបភាពក្នុងរឿងនិទានស្ដីពីព្រលឹងវិញ្ញាណ។

Apple ត្រូវបានបង្កើតឡើងដោយ Steve Jobs, Steve Wozniak និង Ronald Wayne កាលពីខែមេសា ឆ្នាំ ១៩៧៦។ ពុំមានអ្នកណាម្នាក់នឹកស្មានដល់ថា ក្រុមហ៊ុនមួយដែលត្រូវបានបង្កើតឡើងនៅក្នុងយានដ្ឋាន អាចក្លាយជាក្រុមហ៊ុនខ្នាតយក្សក្នុងវិស័យបច្ចេកវិទ្យាដែលមានតម្លៃមូលធនទីផ្សារ ៣,០០០ ពាន់លានដុល្លារអាម៉េរិក ដូចបច្ចុប្បន្ន។

ហេតុអ្វីបានជាឡូហ្គោរបស់ Apple មានស្នាមខាំបែបនេះ?

មូលហេតុដែលនាំឱ្យ «ផ្លែប៉ោម» មានស្នាមខាំ គឺដើម្បីបញ្ចៀសការភាន់ច្រឡំទៅនឹងប្រភេទផ្លែឈើមួយចំនួនផ្សេងទៀតដូចជា ផ្លែប៉េងប៉ោះ ឬផ្លែឈែរី។

និមិត្តសញ្ញាដំបូងរបស់ Apple

ឡូហ្គោដំបូងរបស់ Apple ត្រូវបានរចនាឡើងដោយ Ronal Wayne ដែលជាសហស្ថាបនិករបស់ Apple កាលពីឆ្នាំ ១៩៧៦។ ក្នុងឡូហ្គោនេះ មានរូបលោក Issac Newton កំពុងអង្គុយក្រោមដើមឈើដែលមានផ្លែប៉ោមចាំងរស្មីនៅលើក្បាល។ ប៉ុន្តែ មិនយូរប៉ុន្មាន ឡូហ្គោនេះក៏ត្រូវបានប្ដូរ ព្រោះលោក Steve Jobs មិនចូលចិត្តអត្ថន័យនោះ។

ឡូហ្គោផ្លែប៉ោមមានពណ៌ឥន្ទធនូ

នេះគឺជានិមិត្តសញ្ញាដំបូងដែលបានធ្វើឡើងបន្ទាប់ពីលោក Jobs បានប្រគល់ឱ្យ Rob Janoff ធ្វើការសម្រេចចិត្តជ្រើសរើសដើម្បីរចនា។ លោក Jobs យល់ថា ការប្រើប្រាស់ឡូហ្គោដែលមានពណ៌ចម្រុះបែបនេះ នឹងដូចទៅនឹងមធ្យោបាយដើម្បី «ពង្រីក» ក្រុមហ៊ុន។ ចំណែក ស្លឹកឈើនៅពីលើផ្លែប៉ោម ត្រូវបាន Janoff អះអាងថា ព្រោះតែធម្មជាតិឱ្យវានៅទីនោះ។

ឡូហ្គោពណ៌ខៀវខ្ចី

ឆ្នាំ ១៩៩៨ ស្រឡាយ Mac ត្រូវបានបញ្ចេញលក់ក្នុងទីផ្សារ ដោយមានពណ៌ខៀវ Bondi។ ម៉ាស៊ីន Mac ថ្មីនោះ មានឡូហ្គោជា ផ្លែប៉ោមខៀវខ្ចីតែមួយគត់ នាំឱ្យពណ៌ស្នូតបែបឥន្ទធនូត្រូវបាត់ខ្លួន ដើម្បីឆ្ពោះទៅកាន់ភាពសាមញ្ញ។

និមិត្តសញ្ញារបស់ Apple ចាប់ពីឆ្នាំ ២០០១ ដល់បច្ចុប្បន្ន

មកដល់ឆ្នាំ ២០០១ ឡូហ្គោរបស់ Apple ស្ថិតក្នុងស្ថិរភាព។ ជាមួយនឹងកំណែពណ៌ក្រហមដែលត្រូវបានប្រើសម្រាប់គោលដៅធានារ៉ាប់រង និងជំនួយផ្នែកបច្ចេកទេស Apple Care កំណែពណ៌ខ្មៅក៏ត្រូវបានប្រើជាថ្មីនៅឆ្នាំ ២០១៤ ជំនួសឱ្យកំណែពណ៌សចំនួន ២ មុននោះ៕

April 2, 2022

រកបានប្រាក់ច្រើនតាំងពីដើមឆ្នាំ មហាសេដ្ឋីឥណ្ឌា រូបនេះ មានវត្តមានក្នុងក្លឹបអ្នកមានទ្រព្យចាប់ពី ១០០ ពាន់លានដុល្លារអាម៉េរិក

មហាសេដ្ឋី Gautam Adani គឺជាសមាជិកទី ១០ របស់ ក្លឹបអ្នកមានទ្រព្យចាប់ពី ១០០ ពាន់លានដុល្លារ (The 100 Billion Dollar Club) នាបច្ចុប្បន្ន។

ក្លឹបមហាសេដ្ឋីដែលមានទ្រព្យមានលេខចំនួន ១២ ខ្ទង់ ទើបតែបានទទួលសមាជិកថ្មី នោះគឺមហាសេដ្ឋីឥណ្ឌា Gautam Adani។ យោងតាម Bloomberg Billionaire Index ម្ចាស់ Adani Group ដែលជាក្រុមហ៊ុនរកស៊ីក្នុងវិស័យកំពង់ផែសមុទ្រ រុករករ៉ែ និងថាមពលបៃតង បច្ចុប្បន្នមានទ្រព្យដែលមានតម្លៃ ១០០ ពាន់លានដុល្លារអាម៉េរិក។

លោក Adani ក៏ជាមហាសេដ្ឋីដែលរកបានប្រាក់ច្រើនជាងគេបង្អស់ចាប់ពីដើមឆ្នាំមកនេះ ដោយរកបាន ២៤ ពាន់លានដុល្លារអាម៉េរិក ខណៈពេល ១ ឆ្នាំ ២០២១ លោករកបានសរុបជិត ៤៣ ពាន់លានដុល្លារ។ លោក Adani បានយកឈ្នះមហាសេដ្ឋីឥណ្ឌា Mukesh Ambani និងក្លាយជាអ្នកមានទ្រព្យច្រើនជាងគេបង្អស់ក្នុង ទ្វីបអាស៊ី ព្រមទាំងឈរលំដាប់ទី ១០ ក្នុងពិភពលោក។ លោក Ambani ឈរពីក្រោយលោក Adani ដោយមានទ្រព្យ ៩៩ ពាន់លានដុល្លារអាម៉េរិក។

មហាសេដ្ឋី Adani ចាប់ដៃជាមួយលោក Modi ដែលបច្ចុប្បន្នជានាយករដ្ឋមន្ត្រីរបស់ ប្រទេសឥណ្ឌា

លទ្ធផលខាង បានកើតឡើងបន្ទាប់ពី ក្រុមហ៊ុន Adani Group បង្វែរទិសដៅទៅរកវិស័យថាមពលបៃតង និងហេដ្ឋារចនាសម្ព័ន្ធ ហើយទាក់ទាញបានប្រភពទុនវិនិយោគច្រើនពីបរទេស រួមមានពី Total SE របស់ បារាំង និង Warburg Pincus របស់ សហរដ្ឋអាម៉េរិក។

មហាសេដ្ឋីកើតឆ្នាំ ១៩៦២ រូបនេះ ក៏បានពង្រីកខ្លួនទៅក្នុងវិស័យនានាដែល នាយករដ្ឋមន្ត្រីឥណ្ឌា Narendra Modi បានវាយតម្លៃថា មានសារសំខាន់សម្រាប់ការកសាងប្រទេសជាតិ។

ក្នុងគ្រាដែលក្រុមមហាសេដ្ឋីមកពីបណ្ដាក្រុមហ៊ុនខ្នាតយក្សក្នុងវិស័យបច្ចេកវិទ្យារបស់ សហរដ្ឋអាម៉េរិក បានស្គាល់ការធ្លាក់ចុះនៃទ្រព្យសម្បត្តិរបស់ខ្លួន គេឃើញថា មហាសេដ្ឋី ២ រូប របស់ ឥណ្ឌា គឺលោក Adani និង Ambani បែរជាមានទ្រព្យកាន់តែច្រើន។ ដូចទៅនឹងមហាសេដ្ឋី Adani ម្ចាស់ក្រុមហ៊ុន Reliance Industries លោក Ambani ក៏កំពុងតែពង្រីកវត្តមានទៅក្នុងវិស័យថ្មី មានដូចជា ពាណិជ្ជកម្មបែបឌីជីថល និងបច្ចេកវិទ្យាជាដើម ដែលទាក់ទាញបានអ្នកវិនិយោគធំៗមួយចំនួន ក្នុងនោះមានទាំង Facebook និង Google ផងដែរ៕

April 2, 2022

(វីដេអូ)-នាវាទេសចរណ៍ដើរដោយថាមពលអគ្គិសនីធំបំផុតក្នុងពិភពលោក ដំណើរការលើកដំបូង

ប្រទេសចិន កាលពីថ្ងៃទី ២៩ មិនា បានសម្ពោធដាក់ឱ្យប្រើប្រាស់នាវាទេសចរណ៍មួយគ្រឿងដែលមានប្រវែង ១០០ ម៉ែត្រ និងមានបំពាក់ថ្មដែលអាចផ្ទុកថាមពលប្រហាក់ប្រហែលនឹងថ្មរបស់រថយន្តអគ្គិសនី ១០០ គ្រឿង។

នាវាទេសចរណ៍ដំណើរការដោយថាមពលអគ្គិសនីធំជាងគេក្នុងពិភពលោក ដែលមានឈ្មោះថា «Yangtze River Three Gorges ១» កាលពីថ្ងៃអង្គារ ត្រូវបានដាក់ឱ្យដំណើរការជាលើកដំបូងនៅទីក្រុង Yichang, ខេត្ត Hubei ប្រទេសចិន។ នាវានេះបំពាក់ថ្មដែលមានកម្លាំង ៧,៥០០ គីឡូវ៉ាត់ម៉ោង ស្មើនឹងថាមពលថ្មរបស់រថយន្តអគ្គិសនីចំនួន ១០០ គ្រឿង បូកចូលគ្នា។

នាវា Yangtze River Three Gorges ១ អាចធ្វើដំណើរបានរយៈចម្ងាយ ១០០ គីឡូម៉ែត្រ បន្ទាប់ពីបញ្ចូលថាមពលពេញ ជួយសំច័យឥន្ធនៈបាន ៥៣០ តោន និងកាត់បន្ថយឧស្ម័នពុលបាន ១,៦៦០ តោន ដែលអាចរួមចំណែកក្នុងគោលដៅបន្សុទ្ធឧស្ម័នកាបូនក្នុងបរិយាកាសរបស់ អាជ្ញាធរចិន នៅឆ្នាំ ២០៦០។

នាវាទេសចរណ៍នេះមានបណ្ដោយប្រវែង ១០០ ម៉ែត្រ និងទទឹង ១៦.២ ម៉ែត្រ អាចដឹកភ្ញៀវបាន ១,៣០០ នាក់ ទៅទេសចរណ៍តាមបណ្ដោយទន្លេ Yangtze (Yangzi ឬ Chang Jiang) ត្រង់តំបន់ដែលឆ្លងកាត់ទីក្រុង Yichang នៅភាគខាងលិចនៃខេត្ត Hubei។

April 1, 2022

Category: សង្គម និងសេដ្ឋកិច្ច