ផ្អែកតាមតម្លៃមធ្យមនៃប្រេងឥន្ធនៈលើទីផ្សារអន្តរជាតិ ក្រសួងពាណិជ្ជកម្មបានកំណត់ថ្លៃលក់ប្រេងសាំងក្នុងស្រុក សម្រាប់ដំណាក់កាលចាប់ពីថ្ងៃទី ២១ ដល់ ៣០ មេសា ២០២។
ក្នុងនោះ ប្រេងសាំងធម្មតា EA៩២ ត្រូវលក់ក្នុងតម្លៃ ៥,៣១០ រៀល/លីត្រ និងប្រេងម៉ាស៊ូត លក់ក្នុងតម្លៃ ៥,៦៦០ រៀល/លីត្រ។
ព័ត៌មានលម្អិត សូមអានសេចក្ដីជូនដំណឹងរបស់ ក្រសួងពាណិជ្ជកម្ម ដែលមាននៅខាងក្រោម៖
(ជប៉ុន)-ចង្កឹះអេឡិចត្រូនិកប្រើប្រាស់ចរន្តអគ្គិសនីខ្សោយដើម្បីកែប្រែ សូដ្យូមអ៊ីយ៉ុង (Sodium ion/Na+) និងផ្លាស់ប្ដូរជីវ្ហាវិញ្ញាណ ជួយឱ្យអ្នកតមជាតិប្រៃនៅតែអាចទទួលអារម្មណ៍ថា អាហារមានរសជាតិប្រៃឆ្ងាញ់ ល្មមទទួលទាន។
សាស្ត្រាចារ្យ Homei Miyashita នៃសាកលវិទ្យាល័យ Meiji (ជប៉ុន) សហការជាមួយក្រុមហ៊ុនផ្គត់ផ្គង់អាហារ Kirin ដើម្បីអភិវឌ្ឍចង្កឹះអេឡិចត្រូនិកដែលមានសមត្ថភាពបង្កើនរសជាតិប្រៃ ដោយការរំញោចពីអគ្គិសនី និងកូនកុំព្យូទ័រមួយគ្រឿងដែលភ្ជាប់នៅលើដៃ នេះបើតាមសារព័ត៌មាន Guardian ចុះផ្សាយកាលពីថ្ងៃទី ១៩ មេសា។
ឧបករណ៍នេះប្រើប្រាស់ចរន្តអគ្គិសនីខ្សោយដើម្បីបញ្ជូន សូដ្យូមអ៊ីយ៉ុង ពីអាហារ ឆ្លងកាត់តាមចង្កឹះ ទៅពាល់នឹងមាត់ ធ្វើឱ្យអ្នកបរិភោគមានអារម្មណ៍ថាប្រៃ។ ក្រុមអ្នកស្រាវជ្រាវឱ្យដឹងថា ពួកគេនឹងបង្កើតបានចង្កឹះកំណែពេញលេញនាពេលឆាប់ៗនេះ ហើយសង្ឃឹមថា អាចផ្គត់ផ្គង់ចង្កឹះថ្មីនេះដល់អ្នកប្រើប្រាស់នៅឆ្នាំក្រោយ។
ចង្កឹះបច្ចេកវិទ្យានេះប្រាកដជាទទួលបានការគាំទ្រច្រើន ពិសេសគឺនៅ ជប៉ុន និងនៅតាមបណ្ដាប្រទេសដែលអាហារប្រពៃណីមួយចំនួនមានរសជាតិប្រៃខ្លាំង ដោយសារប្រើប្រាស់គ្រឿងផ្អាប់ ដូចជាប្រហក់ ផ្អក សៀង ឬត្រីប្រៃ។ល។
នាល្ងាចថ្ងៃទី ២០ មេសា ២០២២ នេះ ក្រសួងពាណិជ្ជកម្ម បានជូនដំណឹងស្ដីពី ការរៀបចំពិព័រណ៍គ្រឿងអលង្ការអន្តរជាតិសិង្ហបុរី ២០២២ (Singapore International Jewelry Expo 2022) ដែលនឹងធ្វើឡើងនៅ មជ្ឈមណ្ឌលតាំងពិព័រណ៍ Marina Bay Sands Expo & Convention Centre, Hall A & B, Level 1 នៃ ប្រទេសសិង្ហបុរី ចាប់ពីថ្ងៃទី ១៤ ដល់ ១៧ ខែកក្កដា ២០២២។
ពិព័រណ៍គ្រឿងអលង្ការអន្តរជាតិសិង្ហបុរី ខាងលើនេះ គឺជាព្រឹត្តិការណ៍ពាណិជ្ជកម្មលើវិស័យគ្រឿងអលង្ការខ្នាតអន្តរជាតិដ៏ធំ ដែលទទួលបានជោគជ័យក្នុងរយៈពេល ១៦ ឆ្នាំចុងក្រោយនេះ។ ពិព័រណ៍គ្រឿងអលង្ការអន្តរជាតិសិង្ហបុរី មានក្រុមហ៊ុនចូលរួមជាង ២២០ មកពីប្រទេសចំនួន ២២ ក្នុងពិភពលោក។
ក្នុងនាមអ្នកសម្របសម្រួលការងារពិព័រណ៍ ជូនគណៈកម្មការរៀបចំពិព័រណ៍របស់ ប្រទេសសិង្ហបុរី ក្រសួងពាណិជ្ជកម្មកម្ពុជា សូមអញ្ជើញ ម្ចាស់សហគ្រាសគ្រឿងអលង្ការ និងត្បូងថ្មមានតម្លៃនៅ កម្ពុជា ចូលរួមក្នុងព្រឹត្តិការណ៍ពាណិជ្ជកម្មនេះ ដោយទាក់ទងទៅលោកស្រី Judy Lee អគ្គនាយិកាក្រុមហ៊ុនរៀបចំព្រឹត្តិការណ៍ និង អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម តាមរយៈអាសយដ្ឋានខាងក្រោម។
តម្លៃប្រេងពិភពលោក បានធ្លាក់ចុះប្រហែល ៥% ក្នុងការជួញដូរកាលពីថ្ងៃទី ១៩ មេសា ដោយសារបារម្ភចំពោះតម្រូវការប្រើប្រាស់ ក្រោយពី មូលនិធិរូបិយវត្ថុអន្តរជាតិ (IMF) បានទម្លាក់អត្រានៃការរំពឹងលើកំណើនសេដ្ឋកិច្ច និងព្រមានអំពីបញ្ហាអតិផរណាខ្ពស់។
បញ្ចប់ការជួញដូរកាលពីម្សិលមិញ ប្រេង Brent ផលិតពីរ៉ែប្រេងនៅ សមុទ្រខាងជើង (North Sea) ធ្លាក់ថ្លៃ ៥.៩១ ដុល្លារ (៥.២២%) មកនៅត្រឹម ១០៧.២៥ ដុល្លារ/ធុងបារ៉ែល ខណៈដែលតម្លៃប្រេង WTI របស់ អាម៉េរិក ថយចុះ ៥.៦៥ ដុល្លារ (៥.២២%) មកនៅត្រឹម ១០២.៥៦ ដុល្លារ/ធុង។
តម្លៃប្រេងដាំក្បាលចុះ បើទោះជាអង្គការនៃបណ្ដាប្រទេសនាំចេញប្រេង (OPEC) និងបណ្ដាប្រទេសសម្ព័ន្ធមិត្ត ឬហៅថា OPEC+ បានកាត់បន្ថយផលិតភាព នៅក្នុងស្ថានការណ៍ដែលបរិមាណប្រេងដែលផលិតនៅ រុស្ស៊ី ចាប់ផ្ដើមថយចុះ ដោយសារទណ្ឌកម្មពីលោកខាងលិច។ OPEC+ ផលិតប្រេងក្នុងបរិមាណក្រោមកម្រិតនៃគោលដៅ ១.៤៥ លានធុន/ថ្ងៃ នៅក្នុងខែមីនា ២០២២ ក្នុងពេលដែល រុស្ស៊ី ផលិតតិចជាង ៣០០,០០០ ធុង/ថ្ងៃ ធៀបនឹងគោលដៅ ១០,០១៦ លានធុង/ថ្ងៃ។
IMF បានទម្លាក់អត្រាកំណើនសេដ្ឋកិច្ចនៅទូទាំងពិភពលោក ប្រហែល ១% ដោយសារតែភាពតានតឹងរវាង រុស្ស៊ី និង អ៊ុយក្រែន នៅតែកើតមាន ហើយថា អតិផរណាគឺជា «ការគំរាមកំហែងដែលមានពិតប្រាកដ និងច្បាស់លាស់ ចំពោះប្រទេសជាច្រើនក្នុងសកលលោក៕
ចំណែកទីផ្សារ iPhone របស់ Apple បានថយមកនៅក្រោម ២០% ក្នុងត្រីមាសទី ១ ឆ្នាំ ២០២២ ធ្វើឱ្យក្រុមហ៊ុននេះវិលត្រលប់មកជាប់ចំណាត់ថ្នាក់ទី ២ ស្ដីពីទូរស័ព្ទឆ្លាតវៃដែលលក់ដាច់ជាងគេក្នុងពិភពលោក បន្ទាប់ពី Samsung។
យោងតាម Canals ក្រុមហ៊ុន Apple ក្ដោបក្ដាប់ទីផ្សារ ១៨%, Samsung និង Xiaomi ក្ដាប់បាន ២៤% និង ១៣% នៅក្នុងរយៈពេល ៣ ខែដំបូង នៃឆ្នាំ ២០២។ បច្ចុប្បន្ន ថ្វីបើស្ថិតិនេះគ្រាន់តែជាលទ្ធផលនៃការគណនាបឋម ប៉ុន្តែចំណាត់ថ្នាក់ផ្លូវការក៏ទំនងនឹងមិនមានការប្រែប្រួល។ ក្នុងត្រីមាសទី ៤ ឆ្នាំ ២០២១ Apple បានកាន់កាប់ទីផ្សារ ២៣% ខ្ពស់ជាងគេបង្អស់ក្នុងចំណោមក្រុមហ៊ុនផលិតស្មាតហ្វូននានា។
របាយការណ៍របស់ Canalys ឱ្យដឹងថា បរិមាណទូរស័ព្ទដែលបានលក់ចេញនៅលើទីផ្សារទូទាំងសកលលោកក្នុងត្រីមាសដំបូងនៃឆ្នាំនេះ បានថយចុះ ១១% ធៀបនឹងត្រីមាសមុននោះ។
មូលហេតុនៃការធ្លាក់ចុះខាងលើនេះគឺ បណ្ដាលមកពីផលប៉ះពាល់ដោយសារជំងឺកូវីដ-១៩ ប្រភេទអូមីក្រុង, សង្គ្រាមនៅ អ៊ុយក្រែន, ការដាក់បម្រាមគោចរព្រោះតែ កូវីដ-១៩ នៅ ប្រទេសចិន រួមនឹងកត្តាទំនិញឡើងថ្លៃ។ នេះបើតាមលោកស្រី Nicole Peng អនុប្រធានទទួលបន្ទុកផ្នែកផលិតផលចល័តរបស់ Canalys។
នៅទូទាំងប្រទេស នាថ្ងៃទី ១៩ មេសា ២០២២ នេះ មានករណីគ្រោះថ្នាក់ចរាចរណ៍ចំនួន ៥ លើក ដែលបានបណ្ដាលឱ្យមានអ្នកស្លាប់ ២ នាក់។
យោងតាមអគ្គស្នងការដ្ឋាននគរបាលជាតិ ក្នុងករណីគ្រោះថ្នាក់ចរាចរណ៍ផ្លូវគោកទាំង ៥ លើកនេះ បានបណ្តាលឱ្យមនុស្សស្លាប់ ២ នាក់ ក្នុងនោះមានស្រីម្នាក់ និងរបួសធ្ងន់ចំនួន ៤ នាក់, របួសស្រាល ៥ នាក់។
ទិន្នន័យគ្រោះថ្នាក់ចរាចរណ៍ផ្លូវគោករបស់ នាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ បង្ហាញថា គ្រោះថ្នាក់ចរាចរណ៍ទាំងនេះ កើតឡើងដោយសារការប៉ះទង្គិចគ្នាព្រោះតែជិតក្នុងល្បឿនលឿន និងមិនប្រកាន់ស្ដាំ។
(ស្វ៊ីស)-អគារ Rocket&Tigeli កម្ពស់ ១០០ ម៉ែត្រ នឹងត្រូវបានបង្ហើយការសាងសង់ជាស្ថាពរក្នុងរយៈពេល ៤ ឆ្នាំទៀត។
ក្រុមហ៊ុន Schmidt Hammer Lassen បានបង្ហាញរចនារូបរាងនៃអគារ Rocket&Tigeli ដែលជាអគារស្នាក់នៅ និងមានកម្ពស់ខ្ពស់ជាងគេបង្អស់ក្នុងចំណោមអគារសាងសង់ពីឈើខ្ពស់ៗក្នុងពិភពលោក។
ក្នុងរយៈពេល ៤ ឆ្នាំទៀត អគារឈើកម្ពស់ ១០០ ម៉ែត្រនេះនឹងត្រូវបានសម្ពោធដាក់ឱ្យដំណើរការនៅទីក្រុង Winterthur ភាគឦសានតំបន់ Zurich របស់ ប្រទេសស្វ៊ីស ក្បែរព្រំដែនអាល្លឺម៉ង់។
គម្រោងនេះនឹងបំបែកកំណត់ត្រារបស់អគារធ្វើពីឈើខ្ពស់បំផុតក្នុងពិភពលោកនាបច្ចុប្បន្ន ដែលស្ថិតនៅក្នុង ប្រទេសន័រវែស គឺអគារ Mjostarnet កម្ពស់ ៨៥.៤ ម៉ែត្រ។
(ជប៉ុន)-ស្លឹកតែកែច្នៃដោយដៃ មកពីខេត្ត Shizuoka ក្នុង ១ គីឡូក្រាម ត្រូវបានលក់ក្នុងតម្លៃ ១.១៦ លានយេន នៅក្នុងព្រឹត្តិការណ៍លក់ដេញថ្លៃនាដើមរដូវតែឆ្នាំនេះ។
ពិធីពិព័រណ៍លក់ដេញថ្លៃខាងលើដែលត្រូវបានធ្វើឡើងនៅក្នុងផ្សារតែជប៉ុន ក្នុងខេត្ត Shizuoka កាលពីព្រឹកថ្ងៃទី ១៨ មេសា ២០២២ គឺដើម្បីទាក់ទាញចំណាប់អារម្មណ៍សម្រាប់រដូវកាលផលិតតែថ្មី។ គណៈកម្មការរៀបចំព្រឹត្តិការណ៍លក់ដេញថ្លៃបានឱ្យដឹងថា ដើមតែឆ្នាំនេះលូតលាស់យឺតជាងធម្មតា ប៉ុន្តែ នៅតែធានាបានគុណភាព។
ស្លឹកតែ Saemidori កែច្នៃដោយដៃ មានប្រភពពីទីក្រុង Fujinomiya ១ គីឡូក្រាមត្រូវបានលក់ក្នុងតម្លៃ ១.១៩ លានយេន ស្មើនឹង ១៥,៥០០ ដុល្លារអាម៉េរិក ថ្លៃជាងឆ្ងាយធៀបនឹង ១.០៨ លានយេន (៨,៥០០ ដុល្លារ) ដែលជាកំណត់ត្រាកាលពីឆ្នាំ ២០២១។
នៅ Shizuoka ស្លឹកតែនីមួយៗត្រូវបានជ្រើសរើសយ៉ាងម៉ត់ចត់ និងបេះដោយដៃមនុស្ស។ ក្រោយជំហាននៃការចំហុយស្លឹកតែ ក្រុមអ្នកជំនាញនឹងអនុវត្ត ៣ ដំណាក់កាលទៀត ដែលទាក់ទងនឹងការញីដោយដៃដើម្បីស្រូបយកសំណើម និងបង្កើតជារូបរាងពិសេស។
ដំណាក់កាលមមាញឹកនៃការផលិតតែដែលកែច្នៃដោយដៃនៅ ប្រទេសជប៉ុន ឆ្នាំនេះត្រូវបានគេព្យាករថា នឹងធ្លាក់ទៅចុងខែមេសា។
ក្រោយការលក់ដេញថ្លៃជាង ១ ម៉ោង បរិមាណតែដែលត្រូវបានលក់ កើនឡើងដល់ ១,៧៣២ គីឡូក្រាម ក្នុងនោះតម្លៃមធ្យមគឺ ៥,០២៧ យេន (៤០ ដុល្លារអាម៉េរិក) ក្នុង ១ គីឡូក្រាម។
Yasuhide Uchino អ្នកគ្រប់គ្រងព្រឹត្តិការណ៍ពិព័រណ៍លក់ដេញថ្លៃ បាននិយាយថា ការចំណាយទៅលើវត្ថុធាតុដើម និងឥន្ធនៈ បានធ្វើឱ្យតម្លៃរបស់តែនេះថ្លៃជាងមុន ប៉ុន្តែ ពួកគេបានប្រឹងប្រែងដើម្បីធានាថា អាចផ្គត់ផ្គង់ «តែឈ្ងុយឆ្ងាញ់ ជាមួយនឹងតម្លៃសមស្រប»៕
(ឧត្តរមានជ័យ)-នៅថ្ងៃទី ១៨ មេសា ២០២២ កម្លាំងជំនាញ នៃ អធិការដ្ឋាននគរបាលក្រុងសំរោង សហការជាមួយកម្លាំងផែនការងារនគរបាលព្រហ្មទណ្ឌ នៃ ស្នងការដ្ឋានខេត្តឧត្តរមានជ័យ បានចុះស្រាវជ្រាវ និងបានបំបែកសំណុំរឿងឃាតកម្ម «រំលោភសម្លាប់» នៅសង្កាត់អូរស្មាច់ ក្រុងសំរោង ខេត្តឧត្តរមានជ័យ។
ការបំបែកសំណុំរឿងឃាតកម្មបានជោគជ័យ ក៏ដោយមានការណែនាំពីឯកឧត្ដម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងមានការសម្របសម្រួលពី ឯកឧត្តម តូច សុភក្ដី ព្រះរាជអាជ្ញាអមសាលាដំបូងខេត្ត លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ។
លទ្ធផលនៃកិច្ចប្រតិបត្តិការខាងលើ កម្លាំងជំនាញឃាត់ខ្លួនជនសង្ស័យ បានចំនួន ២ នាក់ ក្នុងនោះមានម្នាក់ឈ្មោះ ភាក់ សីហា ភេទប្រុស អាយុ ១៨ ឆ្នាំ នៅភូមិអូពក សង្កាត់កូនគ្រៀល ក្រុងសំរោង ខេត្តឧត្តរមានជ័យ និងម្នាក់ទៀតឈ្មោះ ភាជ សុជាតិ ភេទប្រុស អាយុ ១៧ ឆ្នាំ នៅភូមិអភិវឌ្ឍន៍ សង្កាត់អូរស្មាច់ ក្រុងសំរោង ខេត្តឧត្តរមានជ័យ។ នេះបើតាមការឱ្យដឹងរបស់ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ។
ជនសង្ស័យទាំង ២ នាក់ខាងលើ បានសារភាពថា នៅមានម្នាក់ទៀតដែលបានចូលរួមធ្វើសកម្មភាព។ មកដល់វេលាទៀបភ្លឺ ឈានចូលថ្ងៃទី ១៩ មេសា ២០២២ ជនសង្ស័យម្នាក់ទៀតដែលមានឈ្មោះថា ត្រយ ចិត្រា ភេទប្រុស អាយុ ១៥ ឆ្នាំ នៅភូមិអភិវឌ្ឍន៍ សង្កាត់អូរស្មាច់ ក្រុងសំរោង ខេត្តឧត្តរមានជ័យ ក៏ត្រូវបានកម្លាំងជំនាញឃាត់ខ្លួនបាន។
ជនសង្ស័យទាំង ៣ នាក់នេះ បានសារភាពថា ពិតជាបានធ្វើសកម្មភាពលបស្ទាក់ចាប់ជនរងគ្រោះនៅតាមផ្លូវ ដើម្បីយកទៅរំលោភ និងសម្លាប់ ហើយបោះចូលទៅក្នុងទឹកអូរពិតប្រាកដមែន។
សូមបញ្ជាក់ថា កាលពីថ្ងៃទី ១៥ មេសា ២០២២ វេលាម៉ោងប្រហែល ២៣ និង ០០ នាទី នៅចំណុចមាត់អូរខាងត្បូងភូមិ ស្ថិតក្នុងភូមិចំការចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ មានករណីរំលោភសម្លាប់ដែលបង្កឡើងដោយដៃដល់មិនស្គាល់អត្តសញ្ញាណ។ ជនរងគ្រោះឈ្មោះ ឡុង គឹមឡាយ ភេទស្រី អាយុ ១៧ ឆ្នាំ មានទីលំនៅភូមិកើតហេតុ ត្រូវបានជនដៃដល់ ចាប់យកទៅរំលោភ និងសម្លាប់ ហើយក៏ត្រូវបោះចូលទៅក្នុងទឹកអូរខាងត្បូង នៃ ភូមិចំការចេក។
ប្រភពព័ត៌មានពីអគ្គស្នងការដ្ឋាននគរបាលជាតិ បានឱ្យដឹងថា បច្ចុប្បន្នជនសង្ស័យទាំង ៣ នាក់ខាងលើ ត្រូវបានឃាត់ខ្លួន នាំទៅកាន់ស្នងការដ្ឋាននគរបាលខេត្តឧត្តរមានជ័យ ដើម្បីកសាងសំណុំរឿង បញ្ជូនទៅកាត់ទោសនៅសាលាដំបូងខេត្ត៕
មហាសេដ្ឋី Elon Musk បានឱ្យដឹងថា បច្ចុប្បន្ន គាត់មិនមានផ្ទះជាកម្មសិទ្ធិផ្ទាល់ខ្លួនឡើយ ហើយជាញឹកញាប់ គាត់ទៅស្នាក់នៅបណ្ដោះអាសន្នក្នុងផ្ទះរបស់មិត្តភក្ដិ។
«សូម្បីតែផ្ទះក៏ខ្ញុំមិនមានជាកម្មសិទ្ធិផ្ទាល់ខ្លួន។ ខ្ញុំពិតជាកំពុងស្នាក់នៅឯផ្ទះរបស់មិត្តសម្លាញ់របស់ខ្ញុំ។ បើខ្ញុំទៅកាន់តំបន់ឈូងសមុទ្រ San Francisco ជាទីដែលដាក់មូលដ្ឋានបច្ចេកទេសស្ទើរតែទាំងអស់របស់ Tesla ខ្ញុំនឹងទៅស្នាក់នៅដោយសារផ្ទះរបស់មិត្តភក្ដិ» លោក Elon Musk ចែករំលែកនៅក្នុងការជជែកជាមួយកម្មវិធី TED ដែលត្រូវបានផ្សាយកាលពីចុងសប្ដាហ៍កន្លង។
នៅពេលត្រូវបានសួរអំពីភាពខុសគ្នារវាងអ្នកក្រ និងអ្នកមាននៅ អាម៉េរិក នាយកប្រតិបត្តិរបស់ Tesla និយាយថា «ប្រាកដជាមានបញ្ហាធំ បើសិនជាខ្ញុំចំណាយរាប់ពាន់លានដុល្លារក្នុង ១ ឆ្នាំៗ ទៅលើការចាយវាយផ្ទាល់ខ្លួន ប៉ុន្តែ មិនដូច្នោះទេ»។
លោក Musk ឱ្យដឹងថា លោកមិនបានចាត់ទុកការចំណាយផ្ទាល់ខ្លួនរបស់លោកថាខ្ពស់ឡើយ លើកលែងតែលោកប្រើប្រាស់យន្តហោះផ្ទាល់ខ្លួន។ «ប៉ុន្តែ បើខ្ញុំមិនប្រើប្រាស់យន្តហោះផ្ទាល់ខ្លួន ពេលវេលាធ្វើការរបស់ខ្ញុំនឹងថយចុះ» លោក Musk បញ្ជាក់។
កាលពីឆ្នាំ ២០០០ មហាសេដ្ឋីអាម៉េរិក ដើមកំណើតអាហ្វ្រិកខាងត្បូង រូបនេះ បានប្រកាសថា នឹងលក់សម្បត្តិជាអចលនទ្រព្យស្ទើរតែទាំងអស់របស់លោក ដើម្បីបន្ធូរបន្ថយការរិះគន់អំពីភាពស្ដុកស្ដម្ភរបស់លោក។ ចុងឆ្នាំ ២០២១ លោក Musk បានក្លាយជាមនុស្សគ្មានផ្ទះសំបែង ក្រោយពីបានលក់ភូមិគ្រឹះចុងក្រោយនៅ California ក្នុងតម្លៃ ៣០ លានដុល្លារ។ បន្ទាប់មក លោកក៏បានជួលផ្ទះមួយខ្នងដែលមានតម្លៃ ៥០,០០០ ដុល្លារ នៅ Boca Chica នៃរដ្ឋ Texas។
យោងតាមតារាងចំណាត់ថ្នាក់មហាសេដ្ឋីតាមពេលវេលាជាក់ស្ដែងរបស់ ទស្សនាវដ្ដី Forbes លោក Elon Musk បច្ចុប្បន្នមានទ្រព្យសុទ្ធប្រមាណ ២៦៩.៥ ពាន់លានដុល្លារ ជាអ្នកមានជាងគេបង្អស់ក្នុងពិភពលោក៕