សង្គម និងសេដ្ឋកិច្ច - La Reine Media

ក្រុមហ៊ុនមួយនេះ មានគម្រោងផលិតរថយន្តអគ្គិសនីឱ្យបាន ៣០ ម៉ូដែល ក្នុងរយៈពេលជិត ១០ ឆ្នាំទៀត

ក្រុមហ៊ុន Honda របស់ ជប៉ុន បានប្រកាសថា ពួកគេបានកំណត់គោលដៅបញ្ចេញរថយន្តអគ្គិសនី (EV) ចំនួន ៣០ ម៉ូដែល នៅឆ្នាំ ២០៣០ ប៉ុន្តែ ក្រុមអ្នកវិភាគយល់ឃើញថា Honda គួរតែដើរឱ្យបានឆ្ងាយជាងនេះ។

ទីភ្នាក់ងារសារព័ត៌មាន Nikkei បានចេញផ្សាយថា ក្រុមហ៊ុន Honda នៅក្នុងខែនេះ បានប្រកាសថា ពួកគេកំណត់គោលដៅបញ្ចេញរថយន្តអគ្គិសនី (EV) ចំនួន ៣០ ម៉ូដែល នៅឆ្នាំ ២០៣០។ កាលពី ១ ឆ្នាំមុន Honda បានប្រកាសថា នឹងឈប់លក់រថយន្តដើរដោយប្រេងសាំងនៅឆ្នាំ ២០៤០។ យុទ្ធសាស្ត្រថ្មីនេះគឺដើម្បីឆ្លើយតបទៅនឹងការរិះគន់ដែលថា ការសន្យារបស់ Honda កន្លងមក គឺខ្វះភាពជាក់លាក់។

ប្រធានក្រុមហ៊ុន Honda លោក Toshihiro Mibe ថ្លែងថា «តាំងពីខែមេសា ឆ្នាំ ២០២១ យើងបានចាប់ផ្ដើមពិចារណារកវិធីដើម្បីសម្រេចបានគោលដៅនេះ។ ដោយមានការរំពឹងទុកនៅស្រពេចស្រពិល យើងបានរៀបផែនការចុះឡើងជាច្រើនលើក»។

គម្រោងថ្មីបំផុតរបស់ Honda តម្រូវឱ្យបង្កើនការផលិតរថយន្តឱ្យបានជាង ២ លានគ្រឿងក្នុង ១ ឆ្នាំៗ ដែលប្រហាក់ប្រហែលនឹង ៤០% បើធៀបនឹងបរិមាណរថយន្តរបស់ក្រុមហ៊ុននេះនៅឆ្នាំ ២០៣១។

ក៏ប៉ុន្តែ ភាគហ៊ុនរបស់ Honda បានថយចុះ ៥ យេន នៅក្នុងថ្ងៃដែលប្រកាសខាងលើនេះត្រូវបានផ្សព្វផ្សាយ ពោលគឺមកនៅត្រឹម ៣,២២៩ យេន/ហ៊ុន។

Shinya Naruse អ្នកវិភាគមួយរូបប្រចាំ Okasan Securities ឱ្យដឹងថា «យើងមិនបានឃើញអ្វីដែលយើងរំពឹងទុកសោះ នៅពេលមើលទៅលើយុទ្ធសាស្ត្ររបស់ Honda ឧទាហរណ៍ដូចជា ការរួមកម្លាំងជាមួយសកម្មភាពជំនួញក្នុងផ្នែកម៉ូតូរបស់ក្រុមហ៊ុននេះជាដើម»។

តម្លៃមូលធនទីផ្សាររបស់ Honda កាលពីថ្ងៃនោះគឺ ៥.៨៥ ទ្រីលានយេន (៤៥.៧ ពាន់លានដុល្លារអាម៉េរិក) ថយចុះបន្តិចធៀបនឹងមុនពេលប្រកាសងាកទៅផលិតរថយន្តអគ្គិសនីទាំងស្រុង កាលពីខែមេសា ២០២១។ ក្នុងដំណាក់កាលនោះ គូប្រជែងរបស់ Honda ក៏កំពុងតែរត់ប្រណាំងនៅពីមុខ។ មូលធនទីផ្សាររបស់ Tesla កើន ៤៧% ខណៈដែល BYD របស់ ចិន និង Toyota Motor កើនបន្តបន្ទាប់គឺ ៣៧% និង ២៤%។

លទ្ធភាពនៃការរកបានប្រាក់ចំណេញពីការផលិតរថយន្តគឺជាឧបសគ្គធំបំផុតចំពោះតម្លៃភាគហ៊ុនរបស់ Honda ដែលវាធំជាងការខកចិត្តទៅលើយុទ្ធសាស្ត្រក្នុងការផលិតរថយន្តអគ្គិសនីរបស់ពួកគេទៅទៀត។ Honda នៅតែបន្តពឹងផ្អែកលើអាជីវកម្មម៉ូតូ ដោយវិស័យនេះមានអត្រាចំណេញ ១៥% ជួយបង្កើនអត្រាចំណេញរួមរបស់ក្រុមហ៊ុននេះឡើងដល់ ៦%។

យោងតាមយុទ្ធសាស្ត្រថ្មី ដែលស្នើឱ្យវិនិយោគ ៥ ទ្រីលានយេន (៥,០០០,០០០,០០០,០០០) ទៅក្នុងវិស័យរថយន្តអគ្គិសនី និងវិស័យដទៃទៀតនៅចុងខែមីនា ២០៣១ ក្រុមហ៊ុន Honda នឹងបង្កើនកិច្ចសហប្រតិបត្តិការណ៍ជាមួយ GM នៅក្នុងការការចែករំលែកបច្ចេកវិទ្យារថយន្តអគ្គិសនី និងអភិវឌ្ឍរថយន្តរួមគ្នា។ Honda ក៏កំពុងចាប់ដៃជាមួយ Sony ដែលជាក្រុមហ៊ុនក្រៅវិស័យ ដើម្បីបង្កើនប្រសិទ្ធភាពផ្នែក R&D (ស្រាវជ្រាវ និងអភិវឌ្ឍ)។

ទោះជាយ៉ាងណាក៏ដោយ ក្រុមអ្នកវិភាគយល់ឃើញថា ក្រុមហ៊ុន Honda គួរតែដើរឱ្យបានឆ្ងាយជាងផែនការដែលពួកគេបានគ្រោងទុក៕

May 4, 2022

ផ្លូវរូងក្រោមដីថ្មី ឆ្លងកាត់ក្រោមបាតទន្លេ Yangtze កំពុងត្រូវបានស្ថាបនានៅតំបន់ Wuhu

ប្រទេសចិន កំពុងសាងសង់ផ្លូវរូងក្រោមដីមួយខ្សែសម្រាប់ជាផ្លូវល្បឿនលឿនទ្វេទិស ប្រវែង ៦ គីឡូម៉ែត្រ ឆ្លងកាត់បាតទន្លេ Yangtze ក្នុងខេត្ត Anhui។

ផ្លូវរូងក្រោមដីមួយខ្សែនេះ កំពុងត្រូវបានស្ថាបនានៅក្នុងទីរួមស្រុក Wuhu នៃខេត្ត Anhui នៅភាគខាងកើតនៃ ប្រទេសចិន។ ដោយមានបណ្ដោយប្រវែងប្រហែល ៦ គីឡូម៉ែត្រ នេះគឺជាផ្លូវរូងក្រោមដំបូងដែលឆ្លងកាត់ក្រោមបាតទន្លេ Yangtze នៃខេត្ត Anhui។

សំណង់នេះស្ថិតនៅជម្រៅ ៧០ ម៉ែត្រ ខាងក្រោមបាតទន្លេ និងមានផ្លូវល្បឿនលឿនទ្វេទិស ៦ គន្លង ដែលអាចបើកបរក្នុងល្បឿន ៨០ គីឡូម៉ែត្រ/ម៉ោង។

គម្រោងដែលមានឈ្មោះថា Wuhu City South Crossing River Tunnel នេះ នឹងត្រូវបានដាក់ឱ្យប្រើប្រាស់នៅចុងឆ្នាំ ២០២៤ នេះ នឹងជួយកាត់បន្ថយពេលវេលានៃការធ្វើដំណើររវាងតំបន់ថ្មី និងតំបន់ទីក្រុងរបស់ Wuhu ចុះមកនៅត្រឹម ៥ នាទី នៅពេលជិះរថយន្ត។

May 3, 2022

ភាគហ៊ុន Alibaba ធ្លាក់ដាំក្បាលចុះ បន្ទាប់ពី CCTV ផ្សាយថា Hangzhou បានដាក់កំហិតលើបុគ្គលម្នាក់ដែលមានត្រកូល Ma

ក្រុមអ្នកវិនិយោគនៅ Alibaba ហាក់បីដូចកំពុងអង្គុយក្បែរអណ្ដាតភ្លើងដ៏ក្ដៅ នៅពេលបញ្ហានេះកើតឡើង។

យោងតាមទំព័រ Bloomberg ភាគហ៊ុនរបស់ Alibaba Group Holding ទើបតែបានឃើញនូវការធ្លាក់ចុះជាង ៩% បន្ទាប់ពីទូរទស្សន៍រដ្ឋចិន CCTV ផ្សាយកាលពីថ្ងៃអង្គារថា អាជ្ញាធរនៅទីក្រុង Hangzhou បានដាក់បទបញ្ជារឹតត្បិតលើបុគ្គល ១ រូបដែលមានត្រកូល Ma។

ភាគហ៊ុនរបស់ Alibaba ក្រោយមកក៏បានងើបឡើងជិតដល់តម្លៃដើម បន្ទាប់ពីប៉ូលិសក្រុង Hangzhou បានចេញប្រកាសមួយដែលដូចទៅនឹងការផ្សាយរបស់ CCTV ប៉ុន្តែ មានការប្ដូរផ្លាស់តិចតួចដែលបង្ហាញថា ឈ្មោះរបស់ជនជាប់ចោទមាន ៣ ពាក្យ។ ចំណែក ឈ្មោះរបស់មហាសេដ្ឋី Jack Ma សហស្ថាបនិករបស់ Alibaba នៅក្នុងភាសាចិន មានតែ ២ ពាក្យ គឺ Ma Yun (马云)។

របាយការណ៍ដំបូងឱ្យដឹងថា បុគ្គលដែលត្រូវបានគេលាក់ឈ្មោះនេះ ត្រូវបានអនុវត្តនូវអ្វីដែលគេហៅថា «វិធានការបង្ខំ» កាលពីថ្ងៃទី ២៥ មេសា ក្រោយពីត្រូវបានចោទពីបទអុជអាលដើម្បីផ្ដួលរំលំរដ្ឋអំណាច និងបង្កគ្រោះថ្នាក់ដល់សន្តិសុខជាតិ។ នេះគឺជាព័ត៌មានដែល CCTV បានចុះផ្សាយ ដោយដកស្រង់ពីអង្គភាពសន្តិសុខសាធារណៈ ដែលមិនមានការបកស្រាយអ្វីបន្ថែម។

ថ្វីបើមានខ្លឹមសារខ្លី ប៉ុន្តែ វាបានធ្វើឱ្យក្រុមអ្នកវិនិយោគមានការព្រួយបារម្ភចំពោះការរឹតត្បិតក្នុងរយៈពេលយូររបស់ ទីក្រុងប៉េកាំង ទៅលើគ្រប់កន្លុកកន្លៀតនៃវិស័យអ៊ីនធើរណិក ដោយការចាប់ផ្ដើមសំពងលើមហាសេដ្ឋី Jack Ma ដំបូងគេ។ មុននោះ អាជ្ញាធរចិន បានផ្អាកគម្រោង IPO របស់ Ant Group Co. មុនពេលចាប់ផ្ដើមយុទ្ធនាការដើម្បីកាត់បន្ថយការកើនឡើងនៃអំណាច និងការរីកចម្រើនយ៉ាងលឿនរបស់បណ្ដាក្រុមហ៊ុនក្នុងវិស័យអ៊ីនធើណិត។

ក្រុមមន្ត្រីចិន នៅទីក្រុង Hangzhou ជាទីដែលទាំង Alibaba ទាំង Ant សុទ្ធតែមានការិយាល័យកណ្ដាល មិនបានអធិប្បាយអ្វីចំពោះបញ្ហានេះ។ ចំណែកតំណាងរបស់ Alibaba និង Ant ក៏មិនបានឆ្លើយតបភ្លាមៗទៅនឹងសំណួរពី Bloomberg ទាក់ទិននឹងបញ្ហាខាងលើ៕

May 3, 2022

(វីដេអូ)-ទំនប់វារីអគ្គិសនីធំជាងគេលំដាប់ទីពីរក្នុងពិភពលោក សាងសង់ជិតរួចរាល់ជាស្ថាពរ

ស្ថានីយវារីអគ្គិសនី Baihetan ស្ថិតនៅលើទន្លេ Yangtze មានកម្លាំង ១៦ លានគីឡូវ៉ាត់ គ្រោងនឹងសាងសង់រួចរាល់ជាស្ថាពរនៅក្នុងខែកក្កដា ២០២២។

ស្ថានីយវារីអគ្គិសនី Baihetan កំពុងត្រូវបានបង្ហើយការងារនៃការដំឡើងម៉ាស៊ីនវារីអគ្គិសនី ២ គ្រឿងចុងក្រោយបង្អស់។ នៅពេលស្ថាបនារួចរាល់នៅក្នុងខែកក្កដា វានឹងក្លាយជាស្ថានីយវារីអគ្គិសនីធំជាងគេលំដាប់ទីពីរក្នុងពិភពលោក បន្ទាប់ពីគម្រោងទំនប់វារីអគ្គិសនី Three Gorge។

ស្ថិតនៅត្រង់កំណាត់លើនៃទន្លេ Yangtze ទំនប់ដែលមានរាងដូចដំបូងនេះ មានកម្ពស់ ២៨៩ ម៉ែត្រ និងប្រវែង ៧០៩ ម៉ែត្រ។ Baihetan នឹងមានកម្លាំងសរុប ១៦ លានគីឡូវ៉ាត់ ដោយបំពាក់ម៉ាស៊ីនវារីអគ្គិសនីចំនួន ១៦ គ្រឿង ក្នុងនោះ ១ គ្រឿងៗមានកម្លាំង ១ លានគីឡូវ៉ាត់ ដែលនេះគឺខ្លាំងបំផុតក្នុងពិភពលោក បើនិយាយពីកម្លាំងម៉ាស៊ីនទោល។

មហាគម្រោងនេះត្រូវបានចាប់ផ្ដើមស្ថាបនាកាលពីឆ្នាំ ២០១៧ និងត្រូវចំណាយទុនវិនិយោគ ៣៤ ពាន់លានដុល្លារអាម៉េរិក។ ម៉ាស៊ីនវារីអគ្គិសនីចំនួន ២ គ្រឿងដំបូងបានដាក់ឱ្យដំណើរការកាលពីខែមិថុនា ២០២១។

ជាគម្រោងធំមួយក្នុងកម្មវិធីផលិត និងចែកចាយអគ្គិសនីបស្ចិម-បូព៌ា របស់ ប្រទេសចិន គម្រោងវារីអគ្គិសនី Baihetan បញ្ជូនអគ្គិសនីពីតំបន់ភាគខាងលិចដែលសម្បូរធនធានធម្មជាតិ មកកាន់បណ្ដាតំបន់ខាងកើតដែលមានតម្រូវការអគ្គិសនីខ្ពស់។

គម្រោងនេះត្រូវបានគេរំពឹងថា នឹងជួយកាន់បន្ថយការប្រើប្រាស់ធ្យូងថ្មប្រហែល ១៩.៦៨ លានតោន និងកាត់បន្ថយឧស្ម័នកាបូនឌីអុកស៊ីត (CO2) បានប្រហែល ៥១.៦ លានតោន ជារៀងរាល់ឆ្នាំ៕

May 2, 2022

ក្រសួងសាធារណការ ប្រកាសឱ្យក្រុមហ៊ុនភ្នាក់ងារនាវា មកដាក់ពាក្យសុំលិខិតអនុញ្ញាត ដើម្បីអាចប្រើព័ន្ធផ្លាស់ប្ដូរទិន្នន័យអេឡិចត្រូនិកកំពង់ផែ

នៅថ្ងៃទី ០២ ឧសភានេះ ក្រសួងសាធារណការ និងដឹកជញ្ជូន បានចេញសេចក្ដីជូនដំណឹងមួយស្ដីពី ការកំណត់ពេលវេលានៃការស្នើសុំលិខិតអនុញ្ញាតក្រុមហ៊ុនភ្នាក់ងារនាវា។

នៅក្នុងប្រកាសនេះ ក្រសួងសាធារណការ បានឱ្យដឹងថា បច្ចុប្បន្ន នៅមានក្រុមហ៊ុនភ្នាក់ងារនាវាមួយចំនួនទៀត មិនទាន់បានមកដាក់ពាក្យស្នើសុំលិខិតអនុញ្ញាត ដើម្បីឱ្យក្លាយជាក្រុមហ៊ុនស្របច្បាប់នៅឡើយ។ ដូច្នេះ ក្រសួងស្នើឱ្យក្រុមហ៊ុនទាំងនេះ ចូលមកដាក់ពាក្យស្នើសុំលិខិតអនុញ្ញាត ឱ្យបានត្រឹមថ្ងៃទី ២៩ ឧសភា ២០២២ មុនពេលប្រព័ន្ធផ្លាស់ប្ដូរទិន្នន័យអេឡិចត្រូនិកកំពង់ផែ (Port EDI) ត្រូវបានដាក់ឱ្យដំណើរការផ្លូវការ។

ក្រុមហ៊ុននឹងមិនមានសិទ្ធិទទួលបានគណនីប្រើប្រាស់ក្នុងប្រព័ន្ធផ្លាស់ប្ដូរទិន្នន័យអេឡិចត្រូនិកកំពង់ផែឡើយ បើសិនមិនបានដាក់ពាក្យស្នើសុំលិខិតអនុញ្ញាត។

ព័ត៌មានបន្ថែម សូមអានសេចក្ដីជូនដំណឹងខាងក្រោម៖

May 2, 2022

សម្ពោធដាក់ដំណើរការ «ព្រលានឡានហោះ» ដំបូងក្នុងពិភពលោក

(អង់គ្លេស)-ព្រលានឡានហោះ Air One ដំណើរការដោយស្វ័យប្រវត្ត និងរួមផ្សំជាមួយមធ្យោបាយដឹកជញ្ជូនដើរដោយថាមពលអគ្គិសនី ដើម្បីនាំមកនូវបណ្ដាញចរាចរណ៍សាធារណៈក្នុងក្រុងដែលមិនបញ្ចេញឧស្ម័នពុល។

Air One ជាព្រលានយន្តហោះដំបូងគេក្នុងពិភពលោកសម្រាប់ឡានហោះ និងយន្តហោះដ្រូនដែលដើរដោយថាមពលអគ្គិសនី។ Air One បើកដំណើរការនៅទីក្រុង Coventry របស់ ប្រទេសអង់គ្លេស នេះបើតាមការចុះផ្សាយកាលពីថ្ងៃទី ២៩ មេសា របស់ Interesting Engineering។ បើសិនជាជោគជ័យ Air One នឹងក្លាយជាគំរូសម្រាប់ការសាងសង់ព្រលានឡានហោះរាប់រយផ្សេងទៀតនៅទូទាំងសកលលោក។

ក្រុមអ្នកស្រាវជ្រាវឱ្យដឹងថា ទីផ្សារសម្រាប់យានយន្តក្នុងវិស័យអាកាសចរណ៍ទំនើប អាចឡើងដល់ ១២.៤ ពាន់លានដុល្លារនៅទូទាំងសកលលោក នៅឆ្នាំ ២០២៧។ ក្នុងគ្រាដែលក្រុមវិស្វករ និងក្រុមអ្នករចនា ស្រាវជ្រាវអំពីយន្តហោះដែលអាចហោះឡើង និងចុះចតត្រង់ ដើម្បីអាចបម្រើដល់វិស័យចរាចរណ៍ក្នុងក្រុង Urban-Air Port ដែលជាក្រុមហ៊ុនធុរកិច្ចថ្មីមានមូលដ្ឋាននៅ អង់គ្លេស ក៏បានប្រឹងប្រែងដើម្បីបង្ហាញថា ហេដ្ឋារចនាសម្ព័ន្ធចាំបាច់សម្រាប់ពួកវា មិនស្មុគស្មាញដូចអ្វីដែលមនុស្សជាច្រើនបានគិត។

Air One ដែលជាព្រលានឡានហោះបណ្ដោះអាសន្នដំបូងរបស់ Urban-Air Port ត្រូវបានសាងសង់រួចរាល់ជាស្ថាពរដោយប្រើពេល ១៥ ខែ ក្នុងនោះក៏រួមទាំងពេលវេលានៃការគូប្លង់ និងការសាង់សង់។ នេះគឺជាគម្រោងសហការរវាង ក្រុមប្រឹក្សាក្រុង Coventry និង Urban-Air Port ដើម្បីបញ្ជាក់ឱ្យដឹងថា ការដឹកជញ្ជូនផ្នែកអាកាសចរណ៍នៅទីក្រុង អាចជួយកាត់បន្ថយការបំពុលបរិយាកាស និងបញ្ហាកកស្ទះចរាចរណ៍បានដល់កម្រិតណា។

Air One ដំណើរការដោយថ្មឧស្ម័នអ៊ីដ្រូសែន និងត្រូវបានរចនាឡើងដើម្បីអាចដំណើរការដោយស្វ័យប្រវត្ត។ Air One បានសហការជាមួយ Supernal របស់ក្រុមហ៊ុន Hyundai ដើម្បីប្រើប្រាស់គំរូតាក់ស៊ីហោះ SA-1 ធ្វើជាយានសម្រាប់ការបង្ហាញជាក់ស្ដែង។

«នេះគឺជាដំណាក់កាលដំបូងនៃយុគសម័យដឹកជញ្ជូនបែបថ្មី ជាសម័យកាលមិនបញ្ចេញឧស្ម័នពុល មិនបង្កការកកស្ទះចរាចរណ៍នៅក្នុងបណ្ដាទីក្រុង ហើយតាមរយៈនេះនឹងជួយឱ្យមនុស្សមានសុខភាពល្អ សុភមង្គល និងទទួលបានការតភ្ជាប់ច្រើនជាងមុន» Ricky Sandhu ស្ថាបនិករបស់ Urban-Air Port ថ្លែងដូច្នេះ។

Air One នឹងបើកទ្វារទទួលភ្ញៀវចូលមកទស្សនានៅក្នុងរដូវក្ដៅឆ្នាំនេះ ហើយក្រោយមក Urban-Air Port នឹងរើ Air One ទៅដាក់នៅកន្លែងផ្សេងៗក្នុង ប្រទេសអង់គ្លេស ដើម្បីឱ្យមនុស្សជាច្រើនផ្សេងទៀតបានស្គាល់។ ក្នុងពេល Air-One បើកទ្វារដំណើរការ ជើងហោះហើរនានារបស់ប៉ូលិស និងយន្តហោះដ្រូនដឹកទំនិញនឹងត្រូវបានធ្វើឡើង។

តាមគម្រោង Sandhu នឹងបើកដំណើរការព្រលានឡានហោះជាង ២០០ កន្លែង នៅលើពិភពលោក ជាមួយនឹងគម្រោងដែលកំពុងចាប់ផ្ដើមអនុវត្តនៅក្នុងទីតាំងមួយចំនួននៅទីក្រុង London (អង់គ្លេស), Los Angeles (អាម៉េរិក), អូស្ត្រាលី, កូរ៉េខាងត្បូង, បារាំង, អាល្លឺម៉ង់, តំបន់ Scandinavia (ដាណឺម៉ាក, ន័រវែស និង ស៊ុយអែត) និង អាស៊ីអាគ្នេយ៍ ផងដែរ៕

May 2, 2022

UnionPay របស់ ចិន រារែកក្នុងការរកស៊ីជាមួយបណ្ដាធនាគាររបស់ រុស្ស៊ី

ក្រុមហ៊ុនបច្ចេកវិទ្យាហិរញ្ញវត្ថុ UnionPay របស់ ចិន គេចចេញពីការរកស៊ីជាមួយបណ្ដាធនាគាររបស់ រុស្ស៊ី ព្រោះតែមិនចង់រងទណ្ឌកម្មពី បស្ចិមលោក ទាក់ទងនឹងបញ្ហានៅ អ៊ុយក្រែន។

នៅពេលដែល ចិន បន្តបដិសេធការចូលរួមធ្វើការដាក់ទណ្ឌកម្មទៅលើ រុស្ស៊ី ជាមួយក្រុមប្រទេសលោកខាងលិច បណ្ដាក្រុមហ៊ុនរបស់ ចិន ដូចជា China UnionPay ជាដើម នៅតែបារម្ភចំពោះបញ្ហាដែលថា ពួកគេនឹងអាចជាប់ទណ្ឌកម្ម។

ក្រុមហ៊ុនផ្ដល់សេវាប័ណ្ណធនាគារ UnionPay បានបដិសេធការរកស៊ីជាមួយ Sberbank (ធនាគារធំរបស់ រុស្ស៊ី) និងផ្អាកការចរចាជាមួយបណ្ដាស្ថាប័នហិរញ្ញវត្ថុដទៃទៀតដែលមានឈ្មោះនៅក្នុងបញ្ជីទណ្ឌកម្មរបស់ប្រទេសនេះ។ ដូច្នេះ គម្រោងដាក់ឱ្យប្រើប្រាស់កាត UnionPay ថ្មីនៅ រុស្ស៊ី ក៏ត្រូវបង្ខំឱ្យលុបចោល។

គិតត្រឹមឆ្នាំ ២០២០ UnionPay កាន់កាប់ចំណកទីផ្សារប្រហែល ១% ប៉ុណ្ណោះ នៅ រុស្ស៊ី ប៉ុន្តែ ប័ណ្ណទូទាត់ប្រាក់របស់ពួកគេនៅទីផ្សារនេះបានកើនឡើង បន្ទាប់ពី Visa និង Mastercard បានផ្អាកសេវាកម្ម ដោយសារតែវិបត្តិនៅ អ៊ុយក្រែន។ ក៏ប៉ុន្តែ UnionPay មិនចង់ឆក់យកឱកាសដែលប្រកបដោយហានិភ័យនេះ ដើម្បីពង្រីកទីផ្សារឡើយ។

ក្រុមហ៊ុនចិន ជាង ៨០% នៅ រុស្ស៊ី នៅតែបន្តធ្វើសកម្មភាពជំនួញដូចធម្មតា នេះបើតាមស្ថិតិបានមកពី សាកលវិទ្យា Yale របស់ អាម៉េរិក។ ប្រការនេះគឺផ្ទុយទាំងស្រុងទៅនឹង ជប៉ុន អាម៉េរិក និង អាល្លឺម៉ង់ ដែលមានក្រុមហ៊ុនប្រហែល ៩០% បានចាកចេញ កាត់បន្ថយទំហំ ឬផ្អាកសកម្មភាពជំនួញនៅ រុស្ស៊ី។

ក៏ប៉ុន្តែ ក្រុមហ៊ុនចិន មួយចំនួន ក៏មានការប្រុងប្រយ័ត្ន។ ធនាគារចិន និងធនាគារឧស្សាហកម្ម និងពាណិជ្ជកម្មចិន បានកាត់បន្ថយសកម្មភាពទាក់ទិននឹងបណ្ដាទំនិញរបស់ រុស្ស៊ី។

«សហរដ្ឋអាម៉េរិក កំពុងបង្កើនការតាមដានបណ្ដាក្រុមហ៊ុនហិរញ្ញវត្ថុរបស់ ចិន ដែលចង់ជំរុញសកម្មភាពជំនួញនៅ រុស្ស៊ី» ប្រភពព័ត៌មានសុំមិនបញ្ចេញឈ្មោះរបស់ប្រទេសនេះបានប្រាប់ Nikkei ដូច្នេះ។ ការដែល ទីក្រុងវ៉ាស៊ីងតោន តឿនឱ្យ ទីក្រុងប៉េកាំង ផ្អាកផ្ដល់គាំទ្រដល់ ទីក្រុងមូស្គូ គឺមានន័យថា ពួកគេបានបញ្ជូនសញ្ញាព្រមានថា បណ្ដាក្រុមហ៊ុនចិន ដែលនៅតែរកស៊ី នៅ ប្រទេសរុស្ស៊ី នឹងមានហានិភ័យទទួលផលវិបាកផ្នែកសេដ្ឋកិច្ច។

May 2, 2022

ប៉េកាំង ហាមលក់ចំណីអាហារហូបនៅនឹងកន្លែង នៅក្នុងទិវាពលកម្មអន្តរជាតិ រយៈពេល ៤ ថ្ងៃ

ក្រុមមន្ត្រីនៅ ទីក្រុងប៉េកាំង នៃ ប្រទេសចិន ស្នើឱ្យប្រជាជនមិនហូបចុកក្នុងភោជនីយដ្ឋាននៅក្នុងថ្ងៃឈប់សម្រាក ទិវាពលកម្មអន្តរជាតិ ដែលអូសបន្លាយពេល ៤ ថ្ងៃ ក្នុងបំណងទប់ស្កាត់កូវីដ-១។

យោងតាមបទបញ្ជាថ្មីរបស់ ទីក្រុងប៉េកាំង បណ្ដាភោជនីយដ្ឋាននៅក្នុងរដ្ឋធានី អាចលក់ចំណីអាហារខ្ចប់ទៅផ្ទះ ចាប់ពីថ្ងៃទី ១ ឧសភា ដល់ដំណាច់ថ្ងៃទី ៤ ឧសភា។

អ្នកគ្រប់គ្រងភោជនីយដ្ឋានល្បីឈ្មោះមួយនៅភាគខាងកើតនៃ រដ្ឋធានីប៉េកាំង ឱ្យដឹងថា ស្ថានការណ៍កូវីដ-១៩ មានភាពតានតឹង និងសេវាកម្មត្រូវបានកាត់បន្ថយ នឹងធ្វើឱ្យអាជីវកម្មរបស់គាត់ខាតបង់ប្រហែលជាង ៣,០០០ ដុល្លារអាម៉េរិក ជារៀងរាល់ថ្ងៃ។

ចាប់ពីថ្ងៃទី ៥ ឧសភា ពលរដ្ឋក្រុងប៉េកាំង នឹងត្រូវបង្ហាញលិខិតបញ្ជាក់ពីការធ្វើតេស្ត PCR អវិជ្ជមាន ដែលអនុវត្តរយៈពេល ៧ ថ្ងៃ ដើម្បីអាចប្រើប្រាស់មធ្យោបាយធ្វើដំណើរសាធារណៈ មុនពេលបានចូលការិយាល័យ ទីតាំងលេងកម្សាន្ត កីឡដ្ឋាន បន្ទប់ហាត់ប្រាណ មជ្ឈមណ្ឌលពាណិជ្ជកម្ម ផ្សារទំនើប សណ្ឋាគារ ភោជនីយដ្ឋាន បណ្ណាល័យ និងទីតាំងទេសចរណ៍។

ទីក្រុងប៉េកាំង ក៏ប្រកាសបើកដំណើរការមន្ទីរពេទ្យ Xiaotangshan ដែលជាមជ្ឈមណ្ឌលបណ្ដោះអាសន្ន ព្យាបាលជំងឺកូវីដ-១។ Xiaotangshan ដែលមានគ្រែចំនួន ១,២០០ បច្ចុប្បន្នមានអ្នកជំងឺកូវីដ-១៩ ចំនួន ១២ នាក់ កំពុងទទួលការព្យាបាល៕

May 2, 2022

តំបន់នៅ អ៊ុយក្រែន ដែល រុស្ស៊ី កំពុងកាន់កាប់ នឹងប្រើប្រាស់លុយ រូប្លរុស្ស៊ី

តំបន់ Kherson នៅភាគខាងត្បូងនៃ ប្រទេសអ៊ុយក្រែន នឹងចាប់ផ្ដើមប្រើប្រាស់ប្រាក់ រូប្ល របស់ រុស្ស៊ី ចាប់ពីថ្ងៃទី ១ ឧសភា។

យោងតាម Reuters ព័ត៌មានខាងលើគឺជាការឱ្យដឹងពីលោក Kirill Stremousov ជាមន្ត្រីនៃគណៈកម្មការមួយស្និទ្ធនឹង រុស្ស៊ី ដែលហៅខ្លួនឯងថា «អាជ្ញាធរយោធា-ស៊ីវិល» របស់តំបន់ Kherson។

លោក Stremousov និយាយថា ការប្ដូរទៅប្រើប្រាស់រូបិយប័ណ្ណ រូប្ល របស់ រុស្ស៊ី នឹងត្រូវចំណាយពេល ៤ ខែ។ ក្នុងអំឡុង ៤ ខែនោះ ប្រាក់ រូប្ល និងត្រូវបានប្រើប្រាស់ទន្ទឹមគ្នានឹងរូបិយវត្ថុផ្លូវការរបស់ អ៊ុយក្រែន (Hryvnia)។

កាលពីថ្ងៃទី ២៦ មេសា រុស្ស៊ី បានឱ្យដឹងថា ពួកគេដណ្ដើមបានអំណាចទាំងស្រុងនៅ Kherson ដែលជាតំបន់យុទ្ធសាស្ត្រ ព្រោះជាផ្នែកមួយដែលតភ្ជាប់ដីគោករវាង ឧបទ្វីប Crimea និងបណ្ដាតំបន់ផ្ដាច់ខ្លួននៅភាគខាងកើតរបស់ អ៊ុយក្រែន។

រុស្ស៊ី បានជ្រើសតាំងអភិបាលក្រុងដោយឡែករបស់ពួកគេនៅ ទីក្រុង Kherson និងចូលគ្រប់គ្រងសាលាក្រុងរបស់តំបន់នេះ។ នេះគឺជាទីក្រុងធំដំបូងដែលបានធ្លាក់ទៅលើដៃ រុស្ស៊ី បន្ទាប់ពីសង្គ្រាមនៅ អ៊ុយក្រែន បានផ្ទុះឡើងកាលពីថ្ងៃទី ២៤ កុម្ភៈ។

April 30, 2022

មហាសេដ្ឋី Elon Musk បន្តលក់ភាគហ៊ុន Tesla តម្លៃរាប់ពាន់លានដុល្លារបន្ថែមទៀត ក្នុងថ្ងៃទី ២៨ មេសា

អ្នកមានទ្រព្យច្រើនជាងគេបង្អស់ក្នុងពិភពលោក បានលក់ភាគហ៊ុន Tesla ជាង ៥ លានហ៊ុនទៀត ក្នុងអំឡុងការជួញដូរនៅផ្សារហ៊ុន ថ្ងៃទី ២៨ មេសា។

យោងតាមទិន្នន័យកាលពីថ្ងៃទី ២៩ មេសា នៃ គណៈកម្មការមូលបត្រ (SEC) របស់ សហរដ្ឋអាម៉េរិក នាយកប្រតិបត្តិរបស់ Tesla លោក Elon Musk បានលក់ភាគហ៊ុន Tesla ចំនួនជាង ៥ លានហ៊ុន ដែលមានតម្លៃ ៤.៥ ពាន់លានដុល្លារ ក្នុងថ្ងៃទី ២៨ មេសា ២០២២។ ប្រការនេះបានធ្វើឱ្យភាគហ៊ុនដែលលោកបានលក់ចេញ បន្ទាប់ពីបានប្រកាសទិញ Twitter ឡើងដល់ជាង ៨.៥ ពាន់លានដុល្លារអាម៉េរិក។

មុននោះ ឯកសារដែលបានប្រកាសកាលពីថ្ងៃទី ២៨ មេសា បង្ហាញថា លោក Musk បានលក់ភាគហ៊ុន Tesla ចំនួន ៤.៤ លានហ៊ុន នៅក្នុងថ្ងៃទី ២៦ និង ២៧ ខែមេសា។ ជារួម ក្នុងអំឡុង ៦ ខែកន្លងទៅ លោក Musk បានលក់ភាគហ៊ុន Tesla សរុប ២៥ ពាន់លានដុល្លារអាម៉េរិក។

នាយកប្រតិបត្តិរបស់ Tesla លោក Elon Musk កាលពីថ្ងៃទី ២៥ មេសា បានឯកភាពទិញបណ្ដាញសង្គម Twitter ក្នុងតម្លៃ ៤៤ ពាន់លានដុល្លារ។ គម្រោងប្រមូលទុនសម្រាប់ទិញ Twitter របស់លោក Musk រួមមាន ១៣ ពាន់លានដុល្លារជាកម្ចីពីធនាគារ, ២១ ពាន់លានដុល្លារជាប្រាក់ពីហោប៉ៅផ្ទាល់ខ្លួន និង ១២.៥ ពាន់លានដុល្លារជាប្រាក់កម្ចីដោយដាក់បញ្ចាំភាគហ៊ុន Tesla។

កាលពីម្សិលមិញ លោក Musk បានសរសេរលើ Twitter ថា «មិនមានគម្រោងលក់ភាគហ៊ុនណាមួយទៀតឡើយ ក្រោយពីថ្ងៃនេះ»។

ភាគហ៊ុន Tesla ម្សិលមិញបានបាត់បង់ ០.៨% នាំឱ្យកំណើននៃការថយចុះសរុបរាប់ចាប់ពីថ្ងៃទី ២២ មេសា ឡើងដល់ ១៣%។ សប្ដាហ៍នេះគឺជាពេលដែល Tesla ធ្លាក់ថ្លៃធ្ងន់ធ្ងរបំផុតរាប់ចាប់ពីខែវិច្ឆិកា ២០២១។

April 30, 2022

Category: សង្គម និងសេដ្ឋកិច្ច