សង្គម និងសេដ្ឋកិច្ច - La Reine Media

អ្នកមានបំណងទៅកម្សាន្តនៅ ខេត្តព្រះសីហនុ ក្នុងខែនេះ មានឱកាសទស្សនាពិព័រណ៍ និងប្រកួតប្រណាំងកង់

មន្ទីរទេសចរណ៍ខេត្តព្រះសីហនុ បានឱ្យដឹងថា ចាប់ពីថ្ងៃទី ១៣ ដល់ ១៥ ខែឧសភា ឆ្នាំ ២០២២ ខាងមុខ នៅឯទីលានតេជោ (ពយ តាមូង) នឹងមាន កម្មវិធីតាំងពិព័រណ៍ និងប្រកួតចម្អិនម្ហូបអាហារ ភេសជ្ជៈ និងប្រកួតប្រណាំងកង់។

ស្ថាប័នខាងលើបន្ថែមថា ព្រឹត្តិការណ៍តាំងពិព័រណ៍ និងកម្មវិធីប្រកួតទាំងឡាយខាងលើនេះត្រូវបានធ្វើឡើងក្នុងបំណងទាក់ទាញភ្ញៀវទេសចរណ៍មកលេង ខេត្តព្រះសីហនុ ឱ្យបានកាន់តែច្រើនបន្ថែមទៀត។

មន្ទីរទេសចរណ៍ខេត្តព្រះសីហនុ បញ្ជាក់ថា ព្រឹត្តិការណ៍នេះនឹងប្រព្រឹត្តទៅនៅក្នុងឱកាសបុណ្យចម្រើនព្រះជន្ម ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃ ព្រះរាជាណាចក្រកម្ពុជា។ ខាងក្រោមនេះគឺជាកម្មវិធី និងពាក្យសុំចុះឈ្មោះ ប្រកួតម្ហូបអាហារ និង ប្រកួតប្រណាំងកង់៖

May 9, 2022

អគ្គិភ័យឆាប់ឆេះផ្ទះមួយ និងទ្រព្យសម្បត្តិទាំងអស់របស់ប្រជាពលរដ្ឋមួយគ្រួនៅស្រុកថ្ពង

(កំពង់ស្ពឺ)-កាលពីថ្ងៃទី ៨ ឧសភា ២០២២ វេលាម៉ោងជាង ២២ និង ១០ នាទី មានករណីអគ្គិភ័យមួយធ្វើឱ្យផ្ទះ ១ ខ្នង និងទ្រព្យជាច្រើនរបស់ប្រជាពលរដ្ឋមួយគ្រួ ស្ថិតនៅភូមិតាំងបន្ទាយ ឃុំវាលពន់ ស្រុកថ្ពង ខេត្តកំពង់ស្ពឺ ត្រូវបាត់បង់គ្មានសល់ នេះបើតាម អគ្គស្នងការដ្ឋាននគរបាលជាតិ។

ជនរងគ្រោះជាម្ចាស់ផ្ទះខាលើ ដែលមានឈ្មោះថា ផន ខន ភេទប្រុស អាយុ ៥៦ ឆ្នាំ រស់នៅភូមិឃុំកើតហេតុ ត្រូវរងរបួស ហើយផ្ទះរបស់គាត់ត្រូវអគ្គិភ័យលេបត្របាក់យកអស់គ្មានសល់។

សមត្ថកិច្ចឱ្យដឹងថា ផ្ទះរបស់ជនរងគ្រោះ មានទំហំ ៦មx៨ម ធ្វើពីឈើ ប្រក់ក្បឿង ថ្មក្រោម។ ក្រៅពីផ្ទះ ករណីអគ្គិភ័យនេះក៏បានឆេះមាសរបស់ម្ចាស់ផ្ទះអស់ ៣ តំឡឹង, ប្រាក់ដុល្លារអស់ ៨,០០០ ដុល្លារ ,ប្រាក់រៀលអស់ ១០,០០០,០០០ រៀល, ស្រូវចំនួន ១ តោន និងអង្ករ ១០០ គីឡូក្រាម ព្រមទាំងសៀវភៅស្នាក់នៅ(ក២), អត្តសញ្ញាណប័ណ្ណ និងសម្ភារៈ ឯកសារជាច្រើនផ្សេងទៀតផងដែរ។

មូលហេតុដែលបណ្ដាលកើតមានអគ្គិភ័យខាងលើ ត្រូវបានសមត្ថកិច្ចក្នុងតំបន់បញ្ជាក់ថា គឺដោយសារឆ្លងចរន្តអគ្គិសនី ៕

May 9, 2022

គម្រោងធំរបស់ មហាសេដ្ឋី Elon Musk ដែលត្រៀមសម្រាប់ Twitter

លោក Elon Musk អាចបញ្ឈប់ការងាររបស់បុគ្គលិកច្រើនរយនាក់ មុនពេលជ្រើសរើសបុគ្គលិកជំនាញថ្មី ដើម្បីត្រៀមសម្រាប់គម្រោងពាណិជ្ជកម្ម និងផលិតពិសេសរបស់បណ្ដាញសង្គម Twitter។

នៅក្នុងឯកសារផ្ញើទៅកាន់ក្រុមអ្នកវិនិយោគដែល New York Times ទទួលបាន មហាសេដ្ឋីអាម៉េរិក ដើមកំណើតអាហ្វ្រិកខាងត្បូង Elon Musk បានគូសវាសផែនការជាច្រើនសម្រាប់ Twitter បើសិនការទិញដូរដែលមានតម្លៃ ៤៤ ពាន់លានដុល្លាររបស់លោក បានសម្រេចជាស្ថាពរ។

កែទម្រង់ធនធានមនុស្ស

New York Times យល់ថា បន្ទាប់ពីចូលគ្រប់គ្រង Twitter ម្ចាស់ SpaceX អាចកាន់កាប់តំណែង CEO ជាបណ្ដោះអាសន្ន និងបញ្ឈប់បុគ្គលិករាប់រយនាក់ មុននឹងជ្រើសរើសអ្នកជំនាញថ្មីផ្នែកបច្ចេកទេស។ លោក Elon Musk គ្រោងនឹងរកបុគ្គលិកឱ្យបានប្រហែល ១១,០៧២ នាក់ នៅឆ្នាំ ២០២៥ ខណៈបច្ចុប្បន្ន Twitter មានតែជាង ៧,៥០០ នាក់។

លោក Musk ក៏គ្រោងនឹងប្ដូរផ្លាស់ទម្រង់ដឹកនាំមួយចំនួនផងដែរ។ កាលពីចុងសប្ដាហ៍កន្លង លោកធ្លាប់បាននិយាយថា លោកជឿថា មេដឹកនាំគ្រប់រូបក្នុងវិស័យបច្ចេកវិទ្យា ត្រូវតែជាមនុស្សឆ្នើមក្នុងផ្នែកបច្ចេកវិទ្យា។

ផ្លាស់ប្ដូរយុទ្ធសាស្ត្រជំនួញ

លោក Musk ប្រកាសកែលម្អប្រាក់ចំណូលប្រចាំឆ្នាំរបស់ Twitter ឱ្យឡើងដល់ ២៦.៤ ពាន់លានដុល្លារ ក្នុងឆ្នាំ ២០២៨។ កាលពីឆ្នាំកន្លង បណ្ដាញសង្គមនេះរកចំណូលបាន ៥ ពាន់លានដុល្លារអាម៉េរិក។ លោក Musk ក៏នឹងកាត់បន្ថយកញ្ចប់ចំណាយទៅលើការផ្សារពាណិជ្ជកម្មរបស់ Twitter ផងដែរ។

អូសទាញអ្នកប្រើប្រាស់ថ្មីបន្ថែមទៀត

មហាសេដ្ឋី Elon Musk មានគម្រោងទាក់ទាញអ្នកប្រើប្រាស់ Twitter ឱ្យបានដល់ ៩៣១ លាននាក់ នៅឆ្នាំ ២០២៨។ កាលពីចុងឆ្នាំ ២០២១ Twitter មានអ្នកប្រើប្រាស់ ២១៧ លាននាក់។

លោក Elon Musk ក៏ឱ្យដឹងថា នឹងមានការយកថ្លៃប្រើប្រាស់បន្ថែម ៣ ដុល្លារ/ខែ សម្រាប់គណនី Twitter Blue ហើយថា Twitter Blue នឹងមានអ្នកប្រើប្រាស់ ៦៩ លាននាក់នៅឆ្នាំ ២០២៥ និង ១៥៩ លាននាក់នៅឆ្នាំ ២០២៦។

គម្រោងសំខាន់មួយចំនួនផ្សេងទៀត

នាយកប្រតិបត្តិរបស់ក្រុមហ៊ុនផលិតរថយន្ត Tesla ក៏បានបង្ហើបឱ្យដឹងអំពីគម្រោង «X» ដ៏អាថ៌កំបាំង ដែលត្រូវបានចាត់ទុកថាជាផលិតផលថ្មីរបស់ Twitter។ លោក Musk មិនបាននិយាយលម្អិត ប៉ុន្តែ លោកបានលើកឡើងអំពីបទពិសោធន៍នៃមុខងារគ្មានការផ្សាយពាណិជ្ជកម្មនៅលើ Twitter។ គម្រោង «X Subscriber» នឹងបង្ហាញខ្លួននៅឆ្នាំក្រោយ ហើយនឹងមានអ្នកប្រើប្រាស់ប្រហែល ៩ លាននាក់ក្នុងឆ្នាំដំបូង។

នៅលើទំព័របណ្ដាញសង្គម កាលពីថ្ងៃទី ៦ ឧសភា លោក Musk ឱ្យដឹងថា ដើម្បីបានសម្រេចគម្រោងខាងលើ លោកនឹងដឹកនាំ Twitter ផ្ដោតទៅលើវិស័យសំខាន់ៗចំនួន ៤ គឺ បច្ចេកទេសផ្នែកទន់, រចនា, ការពារទិន្នន័យ និងផ្នែករឹងសម្រាប់ម៉ាស៊ីនមេ (server)៕

May 9, 2022

ប្រជុំកោះ Faroe ក្លាយជា «កំពង់ផែ» ថ្មី សម្រាប់កប៉ាល់ទាំងឡាយរបស់ រុស្ស៊ី ដែលត្រូវហាមចូលចតនៅ អឺរ៉ុប

ដោយត្រូវបានហាមឃាត់ចូលចតនៅកំពង់ផែនានារបស់ អឺរ៉ុប ចាប់តាំងពីកញ្ចប់ទណ្ឌកម្មទី ៥ របស់ សហភាពអឺរ៉ុប (EU) ប្រឆាំងនឹង រុស្ស៊ី ត្រូវបានអនុម័តកាលពីថ្ងៃទី ១៦ មេសា បណ្ដាទូក កប៉ាល់របស់ រុស្ស៊ី បានរកឃើញកំពង់ផែដ៏សមគួរសម្រាប់ពួកគេ នោះគឺប្រជុំកោះ Faroe។

ប្រជុំកោះ Faroe ដែលជាទឹកដីស្វយ័តមួយរបស់ ប្រទេសដាណឺម៉ាក ស្ថិតនៅ មហាសមុទ្រអាត្លង់ទិកខាងជើង។ អាជ្ញាធររបស់ ប្រជុំកោះ Faroe អនុញ្ញាតឱ្យបណ្ដាទូក កប៉ាល់របស់ រុស្ស៊ី ចូលចត និងលើកដាក់ទំនិញដោយសេរី។

ប្រជុំកោះដែលមានប្រជាជនជាង ៥០,០០០ នាក់ និងស្ថិតនៅចន្លោះប្រជុំកោះ Shetland និង Iceland នេះ គឺជាចំណុចគោលមួយនៃចរាចរណ៍ដែនសមុទ្រសំខាន់ចំពោះកប៉ាល់នេសាទរបស់ រុស្ស៊ី ដោយសារជាទីកន្លែងផ្ទេរ និងផ្ទុកជលផលមួយផ្នែកធំក្នុងចំណោម ៣៧០,០០០ តោន ដែលបណ្ដាកប៉ាល់របស់ប្រទេសផ្សេងៗនាំចូលកំពង់ផែនានារបស់ប្រទេសនេះ។

នាយករដ្ឋមន្ត្រីដាណឺម៉ាក លោក Mette Frederiksen គ្រាន់តែអាចសង្ឃឹមថា ក្រុមមេដឹកនាំរបស់ ប្រជុំកោះ Faroe «គោរពតាមការសម្រេច» របស់ EU។ ដាណឺម៉ាក មិនអាចលូកដៃចូលក្នុងកិច្ចការផ្ទៃក្នុងរបស់ប្រជុំកោះនេះ តាំងតែពីឆ្នាំ ១៩៤៨។

ជាទឹកដីដែលផ្សារភ្ជាប់ជាមួយ EU ប៉ុន្តែ ប្រជុំកោះ Faroe មិនទទួលរងចំណងផ្នែកច្បាប់ក្នុងការអនុវត្តវិធានការទណ្ឌកម្មរបស់ សហភាពអឺរ៉ុប ឡើយ។ ប្រជុំកោះនេះបន្តបង្កើនចំនួន និងពង្រីងកំពង់ផែរបស់ខ្លួនសម្រាប់បណ្ដាកប៉ាល់នេសាទរបស់ រុស្ស៊ី និងការនាំចេញជលផលរបស់ខ្លួនទៅកាន់ រុស្ស៊ី។ ចំណែក ដាណឺមាក វិ ក៏មិនចង់កាត់ផ្ដាច់ទំនាក់ទំនងជាមួយទីផ្សារធំបំផុតរបស់ខ្លួន ដែលកាន់កាប់ ២៣.២% (ឆ្នាំ ២០២១) ក្នុងការនាំចេញជលផល និង ៩៥% នៃពាណិជ្ជកម្មរបស់ពួកគេ៕

May 7, 2022

ក្រសួងការពារជាតិកម្ពុជា ជ្រើសរើសទាហានរាប់រយនាក់ ដើម្បីរៀបចំកងកាំជ្រួចការពារអាកាសរយៈកម្ពស់មធ្យម

ព័ត៌មានស្ដីពីសេចក្ដីប្រកាសជើងរើសពលទាហាននេះ ត្រូវបានបង្ហោះកាលព្រឹកថ្ងៃទី ៧ ឧសភា ២០២២ ដោយទំព័រ Facebook «កងកម្លាំងប្រដាប់អាវុធកម្ពុជា» អមជាមួយនឹងរូបភាពទាហាននៃអង្គភាពមួយចំនួនផងដែរ។

សេចក្ដីសម្រេចនោះ លើកឡើងថា រាជរដ្ឋាភិបាល «អនុញ្ញាតឱ្យក្រសួងការពារជាតិ ជ្រើសរើសពលទាហានថ្មីចំនួន ៤០២ (បួនរយពីរ) នាក់ ដើម្បីរៀបចំកងកាំជ្រួចការពារអាកាសរយៈកម្ពស់មធ្យម ចំណុះបញ្ជាការដ្ឋានការពារអាកាស អគ្គបញ្ជាការដ្ឋាន»។

សេចក្ដីសម្រេចដែលត្រូវបានចុះហត្ថលេខាតាំងពីថ្ងៃទី ២៦ ខែមេសា ឆ្នាំ ២០២២ នេះ ក៏បានបញ្ជាក់ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងការពារជាតិ រដ្ឋមន្ត្រីសេដ្ឋកិច្ច អគ្គមេបញ្ជាការ នៃ កងយោធពលខេមរភូមិន្ទ រដ្ឋមន្ត្រី រដ្ឋលេខាធិការ នៃក្រសួង និងស្ថាប័នដែលពាក់ព័ន្ធ ត្រូវអនុវត្តតាមសេចក្ដីសម្រេចនេះ ចាប់ពីថ្ងៃទីចុះហត្ថលេខាតទៅ។

May 7, 2022

ក្លឹបបាល់ទាត់ Chelsea ត្រូវបានលក់ដោយជោគជ័យ ប៉ុន្តែ មហាសេដ្ឋី Abramovich មិនទទួលបាន ១ រៀលណាសោះ

គេហទំព័រផ្លូវការរបស់ក្លឹបបាល់ទាត់ Chelsea ថ្មីៗនេះបានប្រកាសជាផ្លូវការថា ក្រុមអ្នកវិនិយោគដែលដឹកនាំដោយមហាសេដ្ឋី Todd Boehly សម្រេចបានកិច្ចព្រមព្រៀងទិញក្លឹប Chelsea ពី មហាសេដ្ឋីរុស្ស៊ី Roman Abramovich ក្នុងតម្លៃជាង ៤ ពាន់លានផោន ដែលប្រហែលនឹង ៤.៩៣ ពាន់លានដុល្លារអាម៉េរិក។

តាមគម្រោង មហាសេដ្ឋី Boehly នឹងទូទាត់ ២.៥ ពាន់លានផោន ដើម្បីទិញភាគហ៊ុន និង ១.៧៥ ពាន់លានផោនដែលនៅសល់នឹងត្រូវបានទូទាត់ក្រោមរូបភាពវិនិយោគទៅលើក្លឹប ដូចជា សាងសង់ទីលានប្រកួត ឬចំណាយទៅលើក្រុមបាល់ទាត់នារីជាដើម។

ប្រាក់ ២.៥ ពាន់លានផោនខាងលើ នឹងត្រូវបានផ្ទេរទៅក្នុងគណនីមួយនៅ អង់គ្លេស ហើយត្រូវបង្កកភ្លាមៗ ដើម្បីកុំឱ្យលោក Abramovich ផ្ទេរចេញទៅបរទេស។ ប្រាក់ទាំងនេះនឹងត្រូវបានប្រើប្រាស់ក្នុងគោលបំណងមនុស្សធម៌។

ដូច្នេះ មហាសេដ្ឋីរុស្ស៊ី Abramovich ហាក់មិនទទួលបានសូម្បីតែ ១ រៀល ពីការលក់ក្រុមបាល់ទាត់របស់លោក។

ទោះជាយ៉ាងណាក៏ដោយ សារព័ត៌មាន Wall Street Journal ឱ្យដឹងថា ការទិញដូរខាងលើនេះនៅតែត្រូវការឱ្យមានការអនុម័តជាផ្លូវការពី រដ្ឋាភិបាលអង់គ្លេស។

លោក Abramovich ដែលកាន់កាប់ក្រុមបាល់ទាត់ Chelsea ជិត ២០ ឆ្នាំមកនេះ បានចំណាយប្រាក់កាសជាច្រើនដើម្បីទិញកីឡាករ ក៏ដូចជាទទួលយកការខាតបង់ជាង ១ ពាន់លានដុល្លារ ដើម្បីប្រែក្លាយក្លឹបនេះទៅជាក្រុមបាល់ទាត់លេចធ្លោជាងគេមួយនៅ ពានរង្វាន់បាល់ទាត់អង់គ្លេស Premier League (ព្រីមៀរលីគ)។

ឆ្នាំ ២០២១ Chelsea គឺជាក្រុមដែលដណ្ដើមបានតំណែងជើងឯក UEFA Champions League (UCL) នៅអឺរ៉ុប។

ប៉ុន្តែ ដោយសារសង្គ្រាមនៅ អ៊ុយក្រែន កាលពីខែមីនា ២០២២ មហាសេដ្ឋី Abramovich ត្រូវបង្ខំចិត្តលក់ក្លឹបនេះ។ រដ្ឋាភិបាលអង់គ្លេស បាន និងកំពុងតាមដានការទិញដូរក្លឹបបាល់ទាត់ Chelsea យ៉ាងយកចិត្តទុកដាក់ ដើម្បីធានាថា មហាសេដ្ឋី Abramovich នឹងមិនអាចទទួលបានផលប្រយោជន៍ពីការទិញដូរនេះ៕

May 7, 2022

ស្រីលង្កា ដាក់ប្រទេសក្នុងស្ថានភាពប្រកាសអាសន្ន

ប្រធានាធិបតី Rajapaksa សម្រេចចិត្តដាក់ប្រទេសស្រីលង្កា ក្នុងស្ថានភាពប្រកាសអាសន្ន អនុញ្ញាតឱ្យដាក់ពង្រាយកងទ័ពដើម្បីជួយដល់កម្លាំងប៉ូលិសក្នុងការរក្សាសណ្ដាប់ធ្នាប់។

ការសម្រេចចិត្តខាងលើត្រូវបានធ្វើឡើងកាលពីថ្ងៃទី ៦ ឧសភា ដើម្បីធានាសន្តិសុខសណ្ដាប់ធ្នាប់សាធារណៈ បន្ទាប់ពីហាងនានាត្រូវបានបិទ និងចរាចរណ៍ត្រូវរាំងស្ទះដោយសារបាតុកម្ម។ អ្នកនាំពាក្យម្នាក់របស់ប្រធានាធិបតី Rajapaksa ឱ្យដឹងថា ស្ថានការណ៍ប្រកាសអាសន្ននេះនឹងត្រូវបានអនុវត្តចាប់ពីពាក់កណ្ដាលយប់។

នេះគឺជាលើកទីពីរហើយដែល ស្រីលង្កា បានដាក់ប្រទេសក្នុងស្ថានការណ៍ប្រកាសអាសន្ន ក្នុងអំឡុង ៥ សប្ដាហ៍មកនេះ ក្នុងនោះ លើកទីមួយត្រូវបានប្រកាសកាលពីថ្ងៃទី ១ មេសា និងបញ្ចប់នៅថ្ងៃទី ១៤ មេសា ក្រោយពីហ្វូងបាតុកររកវិធីសម្រុកចូលផ្ទះរបស់ ប្រធានាធិបតី។

បទបញ្ជាខាងលើអនុញ្ញាតឱ្យកងកម្លាំងសន្តិសុខចាប់ និងឃាត់ខ្លួនជនសង្ស័យក្នុងរយៈពេលយូរ ដោយមិនត្រូវបានត្រួតពិនិត្យដោយស្ថាប័នយុត្តិធម៌ និងអនុញ្ញាតឱ្យដាក់ពង្រាយកងទ័ព សម្រាប់ជួយដល់កម្លាំងប៉ូលិស ដើម្បីរក្សាសន្តិសុខ និងសណ្ដាប់ធ្នាប់សាធារណៈ។

ប៉ូលិសស្រីលង្កា កាលពីថ្ងៃទី ៦ ឧសភា បានប្រើប្រាស់គ្រាប់បែកផ្សែងបង្ហូរទឹកភ្នែក និងឡានបាញ់ទឹក ដើម្បីបំបែកហ្វូងបាតុករដែលព្យាយាមចូលទៅក្នុងវិមានសភា ដើម្បីស្នើឱ្យលោក Rajapaksa ចុះចេញពីតំណែង។ មនុស្សរាប់ពាន់នាក់ ប្រមូលផ្ដុំគ្នានៅខាងក្រៅការិយាល័យរបស់ប្រធានាធិបតី ខណៈដែលបាតុករច្រើនក្រុមផ្សេងទៀត រកវិធីសម្រុកចូលផ្ទះរបស់ក្រុមមន្ត្រីសំខាន់។

ក្នុងថ្ងៃដដែល កម្មករ កម្មការិនី រាប់ពាន់នាក់នៅ ស្រីលង្កា បានធ្វើកូដកម្ម នាំឱ្យសេវាកម្មតាមផ្លូវដែក និងរថយន្តក្រុងសាធារណៈត្រូវរាំងស្ទះ។ សេវាកម្មរថយន្តក្រុងឯកជនដែលមាន ២/៣ នៃសេវារថយន្តក្រុងសរុបនៅប្រទេសនេះក៏មិនដំណើរការ។

ក្រុមបាតុករបានទម្លាក់កំហុសលើ ប្រធានាធិបតី Rajapaksa និងក្រុមមន្ត្រីរបស់លោក ទាក់ទិននឹងកំហុសឆ្គងក្នុងការគ្រប់គ្រងសេដ្ឋកិច្ច បង្កឱ្យមានបញ្ហាដាច់ភ្លើង ខ្វះស្បៀងអាហារ ឥន្ធនៈ និងថ្នាំពេទ្យយ៉ាងធ្ងន់ធ្ងរ ក្នុងរយៈពេលច្រើនខែ។

ប្រធានាធិបតីរបស់ ស្រីលង្កា ប្រកាសថា លោកនឹងមិនចុះចេញពីតំណែងឡើយ បើទោះបាតុកម្មចេះតែធំឡើងពីមួយថ្ងៃទៅមួយថ្ងៃ។

ស្រីលង្កា កាលពីថ្ងៃទី ១២ មេសា ២០២២ បានប្រកាសក្ស័យធន និងមិនមានលទ្ធភាពសងបំណុលបរទេសចំនួន ៥១ ពាន់លានដុល្លារអាម៉េរិក ព្រមទាំងបានស្នើឱ្យ មូលនិធិរូបិយវត្ថុអន្តរជាតិ (IMF) ផ្ដល់ជំនួយផងដែរ៕

May 7, 2022

កប៉ាល់ទេសចរណ៍ល្បឿនលឿនធំបំផុតនៅ វៀតណាម ត្រៀមដឹកភ្ញៀវទៅ-មកកោះត្រឡាច

នៅ ហៃហ្វុង នៅថ្ងៃទី ៦ ឧសភានេះ ក្រុមហ៊ុនកប៉ាល់ល្បឿនលឿន ហ្វ៊ូក្វុក (កោះត្រល់-Phu Quoc) សហការជាមួយក្រុមហ៊ុនការពារជាតិមួយរបស់ រដ្ឋវៀតណាម បានសម្ពោធដាក់បណ្ដែតទឹកកប៉ាល់ ថាំងឡុង ដែលជាកប៉ាល់ល្បឿនលឿន និងធំបំផុតនៅ វៀតណាម ដើម្បីត្រៀមដំណើរការឆាប់ៗនេះ។

តាមគម្រោង កប៉ាល់ខាងលើនេះនឹងដឹកអ្នកដំណើរពី វ៉ុងតៅ (Vung Tau) ទៅកោះកូនដៅ (កោះត្រឡាច-Con Dao) ចាប់ពីខែកក្កដា ឆ្នាំ ២០២២។

កប៉ាល់ល្បឿនលឿនឈ្មោះ ថាំងឡុង មានបណ្ដោយប្រវែង ៧៧.៤៦ ម៉ែត្រ, កម្ពស់ ៤ ជាន់ ក្នុងនោះ ២ ជាន់ជាប្រភេទ Eco, ១ ជាន់ជាប្រភេទពិសេស (VIP) និងជាន់លើបង្អស់ជា «Café Roof Top»។ កប៉ាល់ថាំងឡុង អាចដឹកមនុស្សបាន ១,០១៧ នាក់ ដោយប្រើប្រាស់ម៉ាស៊ីន Rolls-Royce MTU ចំនួន ៣ គ្រឿង ដែលមានកម្លាំងសរុប ១១,៥៨០ សេះ។ ចំណែកដងខ្លួនរបស់វា ធ្វើអំពីសមាសធាតុអាលុយមីញូម នាំចូលពី អ៊ីតាលី។ កប៉ាល់នេះអាចធ្វើដំណើរក្នុងល្បឿនរហូតដល់ជាង ៥៥ គីឡូម៉ែត្រ/ម៉ោង។

ក្រុមហ៊ុនគ្រប់គ្រងកប៉ាល់ល្បឿនលឿន ហ្វ៊ូក្វុក ឱ្យដឹងថា បច្ចុប្បន្ន ពួកគេមានកប៉ាល់ចំនួន ១១ គ្រឿងកំពុងដំណើរការ ដែលទាំងអស់សុទ្ធតែជាប្រភេទទំនើប និងសុវត្ថិភាពលំដាប់កំពូលនៅ វៀតណាម។ ចំណែក ក្រុមហ៊ុនផលិតកប៉ាល់របស់កងទ័ពវៀតណាម និយាយថា ក្រុមហ៊ុននេះប្រឹងប្រែងអស់ពីសមត្ថភាពក្នុងការធ្វើទំនើបកម្មផលិតផល ទាំងក្នុងវិស័យយោធា និងវិស័យពាណិជ្ជកម្ម ព្រមទាំងពង្រីកទីផ្សារ ទាំងក្នុង និងក្រៅប្រទេស។

May 6, 2022

(វីដេអូ)-ទ័ពយន្តហោះដ្រោន ហោះគេចឧបសគ្គ និងឆ្លងកាត់ព្រៃឫស្សីក្រាស់ ដោយស្វ័យប្រវត្តិ

នៅក្នុងការសាកល្បងហោះហើររបស់សាកលវិទ្យាល័យ Zhejiang យន្តហោះគ្មានមនុស្សបើក (drone) ចំនួន ១០ គ្រឿង បានទទួលជោគជ័យក្នុងការឆ្លងកាត់បរិស្ថានដែលគ្មានការគ្រប់គ្រង និងសម្បូរដោយឧបសគ្គ នៅក្នុងព្រៃឫស្សី។

សារព័ត៌មាន SCMP បានឱ្យដឹងថា យន្តហោះដ្រោនស្វ័យប្រវត្តិទាំង ១០ គ្រឿងនេះ អាចហោះឆ្លងកាត់ព្រៃឫស្សីមួយនៅ ប្រទេសចិន។ បច្ចេកទេសកុំព្យូទ័រមួយនាំផ្លូវឱ្យពួកវាគេចពីឧបសគ្គ ហោះហើរប្រកបដោយប្រសិទ្ធភាព និងសហការគ្នាធ្វើការជាក្រុម។

ពួកវាអាចហោះឆ្លងកាត់ចន្លោះចង្អៀតរវាងដើមឫស្សី។ ទាំងដើមឫស្សីឈរត្រង់ ដើមឫស្សីទេរ ឫស្សីរលំទាប គម្ពោតព្រៃក្រាស់ មែកឈើ ឬស្លឹកឈើជាដើម សុទ្ធតែមិនអាចរារាំងដ្រោនទាំងនេះបាន។

នេះគឺជាផ្នែកមួយនៃការសាកល្បងបច្ចេកវិទ្យារបស់ក្រុមអ្នកស្រាវជ្រាវប្រចាំសាកលវិទ្យាល័យ Zhejiang ប្រទេសចិន ហើយវាគឺជាក្រុមយន្តហោះដ្រោនដំបូងគេដែលទទួលបានជោគជ័យក្នុងការហោះហើរក្នុងបរិស្ថានមិនមានការគ្រប់គ្រង។

បើតាមទ្រឹស្ដី បច្ចេកវិទ្យានេះអាចជួយបង្កើតផែនទីពីលើទីខ្ពស់ និងជួយដោះស្រាយគ្រោះមហន្តរាយ។ល។

May 6, 2022

កម្ពុជា បើកច្រកទ្វារអន្តរជាតិអូរស្មាច់ នៅព្រំដែនថៃឡើងវិញហើយ

ច្រកទ្វារអន្តរជាតិអូរស្មាច់ ដែលស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ ត្រូវបានបើកដំណើរ ឡើងវិញ នៅព្រឹកថ្ងៃទី ៦ ឧសភា ២០២២ ក្រោយប្រជាពលរដ្ឋទន្ទឹងរង់ចាំអស់រយៈពេលជាយូរដោយសារកូវីដ-១។

ការសម្រេចបើកច្រកទ្វារអន្តរជាតិអូរស្មាច់នេះ ត្រូវបានធ្វើឡើងក្រោយពីជំនួបរវាងអភិបាលខេត្តឧត្តរមានជ័យ និងអភិបាលខេត្តសុរិន្ទ ប្រទេសថៃ កាលពីរសៀលថ្ងៃទី ៥ ខែឧសភា ឆ្នាំ ២០២២។

ប្រជាពលរដ្ឋធ្វើដំណើរទៅកាន់ប្រទេសថៃ ដែលកាន់លិខិតឆ្លងដែន (ប៉ាស្ព័រ) ត្រូវមានលិខិតថៃឡង់ផាស (Thailand Pass) ប័ណ្ណធានារ៉ាប់រងសុខភាព និងប័ណ្ណចាក់វ៉ាក់សាំងពេញលេញ ហើយក្នុងករណីនេះនឹងអាចដើរពេញប្រទេសថៃបាន។ ចំណែកប្រជាពលរដ្ឋដែលប្រើប័ណ្ណព្រំដែន (Border Pass) ត្រូវមានប័ណ្ណចាក់វ៉ាក់សាំងពេញលេញ ហើយអាចស្នាក់ប្រទេសថៃបានចំនួន ៣ ថ្ងៃ។

May 6, 2022

Category: សង្គម និងសេដ្ឋកិច្ច