សង្គម និងសេដ្ឋកិច្ច - La Reine Media

រាជរដ្ឋាភិបាលកម្ពុជា មិនគិតលុយពីពលរដ្ឋដាច់ខាត ចំពោះការចាក់វ៉ាក់សាំងបង្ការជំងឺកូវីដ-១៩

(ភ្នំពេញ)-ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាក់ថា ទោះបីជាត្រូវចាក់វ៉ាក់សាំងបង្ការជំងឺកូវីដ-១៩ ដល់ប្រជាពលរដ្ឋ រហូតដល់ដូសទី ១០ ក៏ដោយ ក៏រដ្ឋាភិបាលនៅតែមិនយកប្រាក់ពីប្រជាពលរដ្ឋជាដាច់ខាត។

ប្រសាសន៍របស់ សម្ដេច តេជោ ត្រូវបានលើកឡើងនៅក្នុងឱកាសជួបសំណេះសំណាលជាមួយក្រុមគ្រូពេទ្យស្ម័គ្រចិត្តយុវជនសម្ដេចតេជោ (TYDA) នៅថ្ងៃទី ១៧ ឧសភានេះ។ ប្រមុខរាជរដ្ឋាភិបាល ថ្លែងថា កម្ពុជា ប្រហែលជាមិនទទួលបានជោគជ័យនោះឡើយ បើសិនជាការអនុវត្តការចាក់វ៉ាក់សាំងទៅតាមប្រទេសមួយចំនួន។

គិតមកដល់បច្ចុប្បន្ន កម្ពុជា ទទួលបានវ៉ាក់សាំងកូវីដ-១៩ សរុបប្រមាណ ៥២ លានដូសរួចហើយ ក្នុងនោះវ៉ាក់សាំងដែលទិញដោយខ្លួនឯងមានជាង ២៨ លានដូស។ ពេលនេះ កម្ពុជា មានវ៉ាក់សាំងក្នុងដៃប្រមាណ ៩ លានដូសទៀត សម្រាប់បន្តចាក់ជូនពលរដ្ឋ និងកំពុងរង់ចាំវ៉ាក់សាំងដែល កម្ពុជា បានបញ្ជាទិញ ក៏ដូចជាវ៉ាក់សាំងដែលជាជំនួយពីបរទេស។

May 17, 2022

ប្រទេសស្រីលង្កា អស់សាំងពីឃ្លាំង! ប្រជាជនតម្រៀបជួរ ៨ ម៉ោង ដើម្បីរង់ចាំទិញឥន្ធនៈ

កាលពីថ្ងៃទី ១៦ ឧសភា មនុស្សរាប់រយនាក់បានឈរតម្រៀបជួរនៅខាងក្រៅស្ថានីយប្រេងសាំងនានានៅ ស្រីលង្កា រង់ចាំពី ៧ ទៅ ៨ ម៉ោង ដើម្បីបានចាក់ឥន្ធនៈ ប៉ុន្តែ ភាគច្រើនបានត្រលប់ទៅផ្ទះដោយ «ដៃទទេ»។

ទីភ្នាក់ងារសារព័ត៌មានរបស់ រុស្ស៊ី Sputnik បានរាយការណ៍ថា នាយករដ្ឋមន្ត្រីថ្មីរបស់ ប្រទេសស្រីលង្កា គឺលោក Ranil Wickremesinghe បានប្រាប់អ្នកយកព័ត៌មានថា ប្រទេសនេះអស់សាំងកាលពីថ្ងៃទី ១៦ ឧសភា។

ក៏ប៉ុន្តែ មេដឹកនាំដែលទើបត្រូវបានជ្រើសតាំងកាលពីសប្ដាហ៍កន្លង បានសន្យាថា នឹងបកស្រាយពេញលេញនាពេលខាងមុខ ស្ដីពីវិបត្តិហិរញ្ញវត្ថុដែលកំពុងកើតឡើងនៅ ប្រទេសស្រីលង្កា។

«បច្ចុប្បន្ន សេដ្ឋកិច្ចរបស់ ស្រីលង្កា ពិតជាដុនដាបខ្លាំងណាស់» អ្នកនយោបាយវ័យ ៧៣ ឆ្នាំខាងលើ បានថ្លែងដូច្នេះ។ កាលពីថ្ងៃទី ១៦ ឧសភា អ្នកលេងបណ្ដាញសង្គមក្នុងប្រទេសនេះ បានចែករំលែកតៗគ្នាអំពីវីដេអូដែលស្ដែងពីទិដ្ឋភាពយានយន្តតម្រៀបជាជួរយ៉ាងវែង និងអស់រយៈពេលយ៉ាងយូរ ដើម្បីរង់ចាំចាក់សាំង នៅតាមទីតាំងស្ថានីយប្រេងសាំងនានារបស់ ស្រីលង្កា។

នាយករដ្ឋមន្ត្រីវិញ ក៏បានប្រកាសថា ប្រទេសនេះកំពុងខ្វះថ្នាំពេទ្យសំខាន់ៗ ១៤ មុខ ហើយថា បញ្ហាអតិផរណាអាចកើនឡើងខ្ពស់ក្នុងរយៈពេលខ្លី។ លោកបានឱ្យដឹងថា បញ្ហាដាច់ភ្លើងប្រចាំថ្ងៃអាចកើនដល់ ១៥ ម៉ោង/ថ្ងៃ។

ស្ថាប័នពាក់ព័ន្ធរបស់ ប្រទេសស្រីលង្កា បានអំពាវនាវឱ្យពលរដ្ឋអត់ធ្មត់ ហើយមិនចេញមកតម្រៀបជួរចាំចាក់សាំង និងមិនត្រូវទិញសាំងទុកក្នុងរយៈពេល ៣ ថ្ងៃ រហូតដល់ប្រេងសាំងត្រូវបានចែកចាយនៅតាមស្ថានីយប្រេងនានា។

មុននោះ អតីតនាយករដ្ឋមន្ត្រី Mahinda Rajapaksa បានចុះចេញពីតំណែងដោយមានសម្ពាធពីក្រុមបាតុករ។ អំពើហិង្សារវាងក្រុមអ្នកគាំទ្ររដ្ឋាភិបាល និងក្រុមបាតុករ បានធ្វើឱ្យមានមនុស្សស្លាប់ ៩ នាក់ និងរបួសជាង ៣០០ នាក់ កាលពីសប្ដាហ៍កន្លង។

May 17, 2022

នារីម្នាក់ វ័យ ២៦ ឆ្នាំ រកបានប្រាក់ចំណេញ ៧,០០០ ដុល្លារ/ខែ ពីការលក់សម្លៀកបំពាក់ជជុះ

Olivia Hillier ធ្វើជំនួញក្នុងវិស័យសម្លៀកបំពាក់មួយទឹក និងរកបានប្រាក់ចំណេញប្រហែលពី ៦,០០០ ទៅ ៧,០០០ ដុល្លារអាម៉េរិក ជារៀងរាល់ខែ។

នាង Olivia Hillier ចាប់ផ្ដើមការងារបន្ទាប់បន្សំរបស់នាង ដោយលក់អាវយឺតតម្លៃ ៥ ដុល្លារអាម៉េរិក ដែលនាងបានឃើញនៅក្នុងហាងសម្លៀកបំពាក់តម្លៃទាបមួយកន្លែង។

Hillier គឺជានិស្សិតពេទ្យនៅសាកលវិទ្យាល័យ Oakland ក្នុងរដ្ឋ Michigan សហរដ្ឋអាម៉េរិក។ នាងសន្សំបានបទពិសោធន៍មួយចំនួនដោយសារតែការលក់សម្លៀកបំពាក់មួយទឹកនៅលើកម្មវិធី (App) លក់ទំនិញជជុះ Poshmark។ នៅក្នុងសម័យកូវីដ-១៩ ឆ្នាំ ២០២០ នាងបានរកឃើញថា អ្នកលក់នៅលើ Poshmark កំពុងរកបានប្រាក់ចំណេញច្រើនពីការ «ទិញហើយលក់វិញ» នូវសម្លៀកបំពាក់ទាក់សម័យមួយទឹក។

នារីរូបនេះបានចាប់ផ្ដើមស្រាវជ្រាវលើវិធីដំណើរការនៅលើហាងអនឡាញ Poshmark និងពិចារណាអំពីយុទ្ធសាស្ត្រលក់របស់ខ្លួន។

អាវយឺតតម្លៃ ៥ ដុល្លារដំបូងរបស់នាង ក្រោយមកត្រូវបានលក់ក្នុងតម្លៃ ២០ ដុល្លារ។ ចាប់ពីពេលនោះមក មុខរបរនេះបាននាំមកនូវចំណូលសរុបជាង ១១៧,០០០ ដុល្លារដល់នាង ក្នុងនោះ ឆ្នាំ ២០២១ Hillier រកបានប្រហែល ៨៥,០០០ ដុល្លារ។ ជារៀងរាល់ខែ នាងរកបានប្រាក់ចំណេញចាប់ពី ៦,០០០ ដល់ ៧,០០០ ដុល្លារ ដែលនេះជួយឱ្យនាងទិញបានផ្ទះមួយខ្នងដែលមាន ៥ បន្ទប់គេង។

ចាប់ពីខែសីហា ២០២០ Hillier បានសិក្សាស្រាវជ្រាវលម្អិត ហើយចុងក្រោយនាងបានរកឃើញថា សម្លៀកបំពាក់បែប «vintage» ទទួលបានការពេញនិយមជាងគេ។ អតិថិជនសំខាន់របស់នាងគឺជានារីដែលមានអាយុចាប់ពី ២៦ ដល់ ៤០ ឆ្នាំ។

ដំបូង នាងគិតថ្លៃពី ២០ ដល់ ៣០ ដុល្លារសម្រាប់ទំនិញមួយមុខ ដោយមិនគិតអំពីប្រភពទំនិញ។ ក្រោយពីការស្រាវជ្រាវ នាងបានកែប្រែងតម្លៃ ក្នុងនោះ រ៉ូបមួយឈុតរបស់ Hillier ត្រូវបានលក់ចាប់ពី ២៥ ដល់ ២០០ ដុល្លារ អាស្រ័យលើម៉ាក និងតម្លៃលក់រាយរបស់ទំនិញ។

Hillier រៀបរាប់ប្រាប់ថា នៅថ្ងៃសុក្រ នាងតែងតែទៅកាន់ហាងលក់សម្លៀកបំពាក់តម្លៃទាបនានា ដើម្បីវិភាគ បែងចែកប្រភេទទំនិញ។ ថ្ងៃអាទិត្យ នាងទៅស្លៀកពាក់ និងថតរូបសម្រាប់កម្រងសម្លៀកបំពាក់ថ្មីរបស់ខ្លួន។ នៅថ្ងៃចន្ទ ពេលទំនេរចន្លោះពីម៉ោងសិក្សា នាងបង្ហោះរូបថតនៃផលិតផលថ្មីរបស់ខ្លួនទៅលើ Poshmark។ ថ្ងៃណាក៏នាងត្រូវទៅផ្ញើទំនិញឱ្យអតិថិជន។

យោងតាម CNBC ទន្ទឹមនឹងការស្រាវជ្រាវ ការវិភាគ ការបែងចែកប្រភេទទំនិញ ឬមួយការកំណត់ពេលវេលាជាក់លាក់ក្នុងការបង្ហោះលក់ខាងលើ នាង Olivia Hillier ក៏បានបង្កើនប្រភពទំនិញតាមដែលអាចធ្វើទៅបាន។ ក្រៅពីនេះ ការជ្រើសរើសកន្លែងលក់ (គេហទំព័រ E-Commerce) ក៏ត្រូវបាននាងយកចិត្តទុកដាក់ ដោយសារថា កន្លែងលក់ខ្លះកាត់ភាគរយពីទំនិញខ្ពស់បន្តិចមែន ប៉ុន្តែ សេវាកម្មល្អ ខណៈកន្លែងខ្លះកាត់ភាគតិច ប៉ុន្តែ សេវាមិនបានល្អ ដូច្នេះនាងត្រូវធ្វើការជ្រើសរើសនូវថ្នាលបច្ចេកវិទ្យាដែលផ្ដល់បទពិសោធន៍ល្អដល់អតិថិជនរបស់នាង។

Hillier និយាយថា «ពិតជាអស្ចារ្យណាស់នៅពេលវា (ថ្នាលបច្ចេកវិទ្យា) មិនត្រឹមតែជួយឱ្យយើងមានពេលវេលាធ្វើអ្វីដែលខ្លួនចូលចិត្តនោះទេ តែក៏ឱ្យយើងមានលទ្ធភាពសម្រាប់ធ្វើរឿងផ្សេង» នៅពេលលក់ដូរអនឡាញបែបនេះ៕

May 16, 2022

«សាកសព» ដើមឈើទាលធំមួយដើម អាយុកាលប្រហែលរាប់រយឆ្នាំ ទទួលបានការគោរពបូជា ក្រោយផុសពីទន្លេឡើងវិញ

សាលាឃុំឈើទាល នៃ ស្រុកកៀនស្វាយ ខេត្តកណ្ដាល បានក្លាយជាទីចាប់អារម្មណ៍របស់ជាជននៅក្នុងតំបន់ ពិសេសគឺអ្នកមានជំនឿ ចាប់ពីថ្ងៃដែលអាជ្ញាធរឃុំឈើទាល បានអូស «សាកសព» ដើមឈើទាលដ៏ធំមួយដើមមកតម្កល់នៅខាងមុខបរិវេណសាលាឃុំ។

ប្រជាពលរដ្ឋជាច្រើនកុះករ នាំគ្នាទៅមើល និងអុជធូបទៀន ថ្វាយផ្កា បួងសួងសុំសេចក្ដីសុខពីខ្លឹមដើមឈើទាលខាងលើ ខណៈដែលអ្នកលេងបណ្ដាញសង្គមនាំគ្នាចែករំលែកទិដ្ឋភាពនៃកន្លែងតម្កល់ «សព» ដើមឈើទាលនេះ។

«ដើមឈើទាលមានអាយុកាលរាប់រយឆ្នាំ កប់ក្នុងទឹកទន្លេបាសាក់រាប់សិបឆ្នាំទៀត សល់តែខ្លឹមសុទ្ធ បើមិនបានទៅមើលមិនអស់ចិត្តទេ» នេះបើតាមគណនី Facebook ឈ្មោះ Phoeng Seang ដែលបានទៅដល់កន្លែងតម្កល់ «សព» ដើមឈើទាលនៅ ឃុំឈើទាល កាលពីម្សិលមិញ។ ម្ចាស់គណនីនេះបន្តថា «ទីតាំង» តម្កល់ដើមឈើទាលនេះ ស្ថិត «នៅសាលាឃុំឈើទាល ស្រុកកៀនស្វាយ» ខេត្តកណ្ដាល។ បុរសនេះថែមទាំងបានបង្ហោះតំណភ្ជាប់ផែនទីនៃទីតាំងរបស់សាលាឃុំឈើទាលផងដែរ។

នៅក្នុងឱកាសនៃថ្ងៃបុណ្យវិសាខបូជា បងប្អូនប្រជាពលរដ្ឋដែលរស់នៅក្នុងភូមិឈើទាល ឃុំឈើទាល ស្រុកកៀនស្វាយ ខេត្តកណ្ដាល បាននាំគ្នារៀបចំពិធីនៅទីតាំងតម្កល់ដើមឈើទាលនេះ។ អ្នកភូមិក្នុងមូលដ្ឋានបានឱ្យដឹងថា ដើមឈើទាលនេះបានបាត់ខ្លួនអស់រយៈពេលជាយូរមកហើយ ប៉ុន្តែពេលនេះបែរជាផុសឡើងមកវិញ ធ្វើឱ្យមនុស្សម្នាកមានការចាប់អារម្មណ៍យ៉ាងខ្លាំង។

អាជ្ញាធរឃុំខាងលើ កាលពីថ្ងៃទី ១៣ ឧសភា បានយកគ្រឿងចក្រទៅអូសទាញដើមឈើទាលមួយដើមដែលនៅសល់តែឃ្លឹមនេះឡើងពីទន្លេ និងបានដាក់តម្កល់នៅសាលាឃុំ បន្ទាប់ពីទទួលបានសេចក្ដីរាយការណ៍ថា មានមនុស្សច្រើននាក់ប្រុងនឹងអូសដើមឈើទាលនេះយកចេញពីកន្លែងដែលគេប្រទះឃើញដំបូង។

May 16, 2022

ក្រុមហ៊ុនរ៉ែប្រេងមួយ ចំណេញកប់ក្ដោង នៅក្នុងត្រីមាសដំបូងនៃឆ្នាំ ២០២២

ប្រាក់ចំណូលក្នុងត្រីមាសទី ១ របស់ក្រុមហ៊ុន Saudi Aramco កើនជាង ៨០% ដែលនេះខ្ពស់ជាងការព្យាកររបស់ក្រុមអ្នកវិភាគ ព្រមទាំងបានបង្កើតកំណត់ត្រាថ្មីផងដែរ។

ក្រុមហ៊ុនប្រេងរបស់រដ្ឋ អារ៉ាប៊ីសាអូឌីត កាលពីថ្ងៃទី ១៥ ឧសភា បានប្រកាសថា ប្រាក់ចំណេញបានកើត ៨២% ធៀបនឹងឆ្នាំកន្លង ដោយឡើងដល់ ៣៩.៥ ពាន់លានដុល្លារក្នុងត្រីមាសដំបូងនៃឆ្នាំនេះ។ មុននោះ ការស្ទង់មតិរបស់ Reuters ទៅលើក្រុមអ្នកវិភាគ បានព្យាករថា Saudi Aramco នឹងរកបានប្រាក់ចំណេញត្រឹមតែ ៣៨.៥ ពាន់លានដុល្លារប៉ុណ្ណោះ។

ក្រុមហ៊ុនខាងលើបានឱ្យដឹងថា ប្រាក់ចំណេញរបស់ពួកគេកើនឡើងខ្ពស់ដោយសារតែតម្លៃប្រេងឆៅឡើងថ្លៃខ្លាំង បរិមាណប្រេងលក់ចេញច្រើនជាងមុន ផលចំណេញនៅដំណាក់កាលចម្រាញ់ និងក្នុងវិស័យគីមីសាស្ត្រក្រោយការទាញយកត្រូវបានកែលម្អ។

កាលពីសប្ដាហ៍កន្លង Aramco ក៏បានយកឈ្នះលើ Apple ហើយបានក្លាយជាក្រុមហ៊ុនដែលមានតម្លៃជាងគេបង្អស់ក្នុងពិភពលោក ដោយមានមូលធនទីផ្សារ ២.៤៣ ទ្រីលានដុល្លារអាម៉េរិក។ មូលធនទីផ្សារបច្ចុប្បន្នរបស់ Aramco នៅតែស្ថិតក្នុងរង្វង់នេះ។

May 16, 2022

អគ្គិភ័យឆាបឆេះផ្ទះមួយល្វែងនៅក្នុងបុរីសូនី បណ្ដាលឱ្យមានការភ័យភិតទាំងយប់ជ្រៅ

(ភ្នំពេញ)-ផ្ទះល្វែងមួយកន្លែងនៅ បុរី សូនី គឺផ្ទះលេខ៣៣១A ស្ថិតនៅផ្លូវលេខ៨១៥០ny ភូមិឫស្សី សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ត្រូវបានអគ្គិភ័យឆាបឆេះ បណ្ដាលឱ្យទ្រព្យសម្បត្តិប្រជាពលរដ្ឋមួយចំនួនត្រូវខូចខាត ដែលហេតុការណ៍នេះបានកើតឡើងកាលពីវេលាម៉ោង ២ និង ៣០ នាទីទៀបភ្លឺ នៃថ្ងៃទី ១៦ ឧសភា ២០២២។

មូលហេតុនៃករណីអគ្គិភ័យនេះ គឺ «បណ្តាលមកពីការដុតទៀនធូប» នេះបើតាមរបាយការណ៍របស់លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ។ អគ្គិភ័យនេះមិនបានឆេះរាលដាលដល់ផ្ទះអ្នកជិតខាង ប៉ុន្តែ សម្ភារមួយចំនួនក្នុងផ្ទះកើតហេតុបានរងការខូចខាត។

នៅក្នុងការធ្វើអន្តរាគមន៍ កម្លាំងជំនាញបានពន្លត់អគ្គិភ័យទាំងស្រុងនៅវេលាម៉ោង ២ និង ៤០ នាទីទៀបភ្លឺ ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ២ រឿង បាញ់ទឹកអស់ ១ ឡាន នេះបើតាមគេហទំព័ររបស់ អគ្គស្នងការដ្ឋាននគរបាលជាតិ៕

May 16, 2022

ការសិក្សារបស់ក្រុមហ៊ុន Visa លើកំណើននៃការទូទាត់តាមរយៈឌីជីថល ខណៈពេលដែលប្រជាជនកម្ពុជាងាកចេញពីការប្រើប្រាស់សាច់ប្រាក់សុទ្ធ

ភ្នំពេញ ថ្ងៃទី ១២ ខែ ឧសភា ឆ្នាំ២០២២ នៅថ្ងៃនេះក្រុមហ៊ុន Visa ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធឌីជីថលឈានមុខគេនៅក្នុងពិភពលោក បានចេញផ្សាយការសិក្សាចុងក្រោយរបស់ខ្លួន ដែលបានបញ្ជាក់ថា ប្រជាជនកម្ពុជាចំនួនប្រមាណ ៣២ ភាគរយ គ្រោងនឹងឈប់ប្រើប្រាស់សាច់ប្រាក់សុទ្ធ បន្ទាប់ពីការកើនឡើងនៃជំងឺរាតត្បាត Covid-19។ បើយោងតាមការសិក្សា[1] របស់ក្រុមហ៊ុន Visa ស្តីពីឥរិយាបថទូទាត់ប្រាក់របស់អតិថិជននេះ បានបង្ហាញពីការផ្លាស់ប្តូរយ៉ាងលឿន ពីការប្រើប្រាស់សាច់ប្រាក់សុទ្ធ ទៅជាការទូទាត់តាមរយៈឌីជីថល និងតាមរយៈបច្ចេកវិទ្យា Contactless ជាពិសេស គឺតាមរយៈ QR កូដ និងកាបូបអេឡិចត្រូនិច (e-Wallet)។

ជំងឺរាតត្បាតកូវីត បានពន្លឿននូវការទូទាត់តាមរយៈឌីជីថលក្នុងចំណោមអ្នកប្រើប្រាស់នៅកម្ពុជា ដោយសារពួកគេជឿជាក់ថា ការមិនប្រើប្រាស់សាច់ប្រាក់សុទ្ធ នឹងធ្វើឱ្យសង្គមកាន់តែមានអនាម័យ (មានប្រមាណ ៤៣%) កាន់តែមានប្រសិទ្ធភាព (មានប្រមាណ៣៩%) និង ល្អសម្រាប់បរិស្ថាន (ប្រមាណ៣៧%) ។

អ្នកស្រី ជុំ ម៉ូនីកា នាយិកាគ្រប់គ្រងក្រុមហ៊ុន Visa ប្រចាំប្រទេសកម្ពុជា បានមានប្រសាសន៍ថា៖ “ដោយសារតែជម្រើសនៃការទូទាត់តាមរយៈឌីជីថលមានច្រើន យើងកំពុងធ្វើដំណើរឆ្ពោះទៅរកការផ្លាស់ប្តូរពីជំនាន់មួយ គឺអំពីរបៀបដែលប្រជាជនកម្ពុជាជ្រើសរើសការទូទាត់ និងការទទួលប្រាក់។ នៅក្រុមហ៊ុន Visa យើងកំពុងតាមដានយ៉ាងជិតស្និទ្ធអំពីដំណើរការអភិវឌ្ឍទៅរកការទូទាត់ដោយមិនប្រើសាច់ប្រាក់សុទ្ធ តាមរយៈការប្រើប្រាស់ព័ត៌មានទីផ្សារ ដើម្បីធានាបាននូវការគាំទ្រដល់ដៃគូអាជីវកម្មក្នុងស្រុកឲ្យទទួលបានទម្រង់ទូទាត់ប្រាក់ឌីជីថលដែលកាន់តែឆ្លាតវៃ ឆាប់រហ័ស និងមានសុវត្ថិភាពជាងមុន។

ចាប់តាំងពីមានការរីករាលដាលនៃជំងឺរាតត្បាត COVID-19 ការប្រើសាច់ប្រាក់សុទ្ធ បានធ្លាក់ចុះ ២២ ភាគរយ បើធៀបទៅនឹងឆ្នាំមុន។ អ្នកប្រើប្រាស់កម្ពុជាម្នាក់ក្នុងចំណោមប្រាំនាក់ បានព្យាយាមសាកល្បងឈប់ប្រើសាច់ប្រាក់សុទ្ធ ហើយជាលទ្ធផលស្ទើរតែពាក់កណ្តាល (ប្រមាណ៤៦%) អះអាងថា ពួកគេអាចឈប់ប្រើសាច់ប្រាក់សុទ្ធ បានយូររហូតដល់ទៅជាងមួយសប្តាហ៍។ ក្នុងចំណោមអ្នកដែលមិនបានសាកល្បងឈប់ប្រើសាច់ប្រាក់សុទ្ធ មានប្រហែល ២៩ ភាគរយ មានជំនឿចិត្តថា ពួកគេអាចពឹងផ្អែកលើជម្រើសនៃការទូទាត់ប្រាក់ដោយមិនប្រើសាច់ប្រាក់សុទ្ធបានរហូតដល់ទៅមួយខែឬយូរជាងនេះ។

តាមរយៈការសិក្សាក៏បានបង្ហាញពីសន្ទុះនៃការទទួលយកការទូទាត់ដោយមិនប្រើសាច់ប្រាក់សុទ្ធ និងតាមរយៈឌីជីថលផងដែរ ជាពិសេសតាមរយៈការប្រើកាត និង QR កូដ។ បច្ចុប្បន្ន ៣៨ ភាគរយ នៃប្រជាជនកម្ពុជា ជ្រើសយកការទូទាត់តាមរយៈកាត ហើយស្ទើរតែ ៧នាក់ ក្នុងចំណោម ១០នាក់ (ស្មើរ ៦៨%) កំពុងប្រើទាំងកាបូបអេឡិចត្រូនិច នឹង កាត ដែលនេះបង្ហាញពីចំណូលចិត្តនៃការប្រើប្រាស់របស់ពួកគេទៅថ្ងៃអនាគត។ ទន្ទឹមនឹងនេះ ការទូទាត់តាមរយៈ QR កូដ មានការកើនឡើងបីដងក្នុងមួយឆ្នាំ ដែលបច្ចុប្បន្ននេះអ្នកប្រើប្រាស់មានចំនួន ៣៦ ភាគរយ នៅក្នុងប្រទេសកម្ពុជាបាននឹងកំពុងប្រើប្រាស់វា។ ការទូទាត់តាមរយៈ QR កូដ គឺជាទម្រង់ទូទាត់ប្រាក់ដែលពេញនិយមបំផុតដែលស្ថិតនៅលំដាប់ទីពីរនៅក្នុងចំណោមជម្រើសនៃវិធីសាស្ត្រទូទាត់ប្រាក់ទាំងអស់ ជាពិសេសនៅក្នុងផ្សារទំនើប នឹងហាងលក់ទំនិញ។

អ្នកប្រើប្រាស់ បានបង្ហាញពីទំនោរចិត្តលើការប្រើប្រាស់កម្មវិធីទូរស័ព្ទដៃ ព្រោះវាជាជម្រើសដ៏ល្អដែលមានបញ្ចូលមុខងារទូទាត់ប្រាក់ភ្ជាប់ជាមួយ។ ធនាគារឌីជីថល ក៏បានចាប់ដៃគូជាមួយធនាគារបែបប្រពៃណីផងដែរ ខណៈដែល ៦០ភាគរយ នៃអ្នកប្រើប្រាស់ឥឡូវនេះ ប្រើប្រាស់កម្មវិធីធនាគារចល័ត នឹងបានកោតសរសើរដល់សុវត្ថិភាពនៃការទូទាត់តាមរយៈទូរស័ព្ទដៃ (មានប្រមាណ ៥១%) ព្រមទាំងអត្ថប្រយោជន៍សុខភាពដែលទាក់ទងនឹងការកាត់បន្ថយការប្រាស្រ័យទាក់ទងដោយផ្ទាល់ (មានប្រមាណ ៥០%) ។

អ្នកស្រី ជុំ ម៉ូនីកា បានបន្ថែមទៀតថា៖ “អ្នកប្រើប្រាស់ជឿជាក់ថា កម្ពុជានឹងក្លាយជាសង្គមដែលមិនប្រើប្រាស់សាច់ប្រាក់សុទ្ធក្នុងរយៈពេល១០ឆ្នាំខាងមុខ ដោយមិនគិតពីផលនៃការប៉ះទង្គិចនៃមេរោគ COVID-19។ ក្រុមហ៊ុន Visa មានសេចក្តីរីករាយក្នុងការគាំទ្រដល់អ្នកប្រើប្រាស់ និងពាណិជ្ជករ សម្រាប់ទទួលយកការផ្លាស់ប្តូរនេះ រួមជាមួយនឹងសេវាកម្មទូទាត់ប្រាក់ឈានមុខគេនៅក្នុងពិភពលោក ស្របនឹងការយល់ដឹងកាន់តែច្បាស់អំពីទីផ្សារ ដើម្បីជួយពួកគេក្នុងការសម្របខ្លួន ព្រមទាំងយកឈ្នះលើបញ្ហាប្រឈមនានា”៕

###

អំពីក្រុមហ៊ុន Visa Inc.

Visa Inc. (NYSE: V) គឺជាក្រុមហ៊ុននាំមុខគេក្នុងបច្ចេកវិទ្យាទូទាត់សាច់ប្រាក់តាមរយៈឌីជីថល ដែលជួយសម្រួលដល់ប្រតិបត្តិការរវាងអ្នកប្រើប្រាស់ ពាណិជ្ជករ ស្ថាប័នហិរញ្ញវត្ថុ និងស្ថាប័នរដ្ឋាភិបាលដែលពាក់ព័ន្ធ ច្រើនជាង 200 ប្រទេស និង តំបន់ ជារៀងរាល់ឆ្នាំ។ បេសកកម្មរបស់យើងគឺផ្សាភ្ជាប់ពិភពលោកទាំងមូល តាមរយៈការតភ្ជាប់បណ្តាញទូទាត់ប្រាក់ប្រកបដោយភាពច្នៃប្រឌិតថ្មី ងាយស្រួល អាចទុកចិត្តបាន និងមានសុវត្ថិភាពបំផុត ដែលអនុញ្ញាតឲ្យអ្នកប្រើប្រាស់ អាជីវករ និងសេដ្ឋកិច្ចមានការរីកចម្រើន។ យើងជឿជាក់ថាសេដ្ឋកិច្ចដែលរួមបញ្ចូលមនុស្សគ្រប់រូប នៅគ្រប់តំបន់ នឹងជួយដល់ការអភិវឌ្ឍនៅគ្រប់ទីកន្លែង ហើយយើងមើលឃើញថា នេះគឺជាមូលដ្ឋានគ្រឹះនៃចរន្តសាច់ប្រាក់។ ស្វែងយល់បន្ថែមតាមរយៈ Visa.com ៕

សម្រាប់ព័ត៌មានបន្ថែម សូមទំនាក់ទំនង៖

កញ្ញា ត្រាង ង្វៀន (Trang Nguyen) កញ្ញា គ្រី សុវណ្ណារី

Head of Corporate Communications ក្រុមហ៊ុន Red Dot (Cambodia) Co., Ltd

Visa Vietnam, Cambodia and Laos តំណាងក្រុមហ៊ុន Visa Inc.

ទូរស័ព្ទ ៖ +84 902 831 891 ទូរស័ព្ទ ៖ +855 11733368

អ៊ីម៉ែល៖ [email protected] អ៊ីម៉ែល៖ [email protected]

[1] The Visa Consumer Payment Attitudes Study was prepared by CLEAR in Aug-Sep 2021, surveyed amongst 6,520 consumers in Singapore, Philippines, Malaysia, Indonesia, Thailand, Vietnam, and Cambodia.

May 16, 2022

ជាង ៧ ទ្រីលានដុល្លារ «បាត់ខ្លួន» ពីផ្សារមូលបត្រអាម៉េរិក ចាប់តាំងពីដើមឆ្នាំមកនេះ

ក្នុងឆ្នាំ ២០២២ វិស័យបច្ចេកវិទ្យា បានបាត់បង់ប្រាក់ ៣ ទ្រីលាន (៣ លានលាន) ដុល្លារអាម៉េរិក នៅក្នុងចំណោម ៧ ទ្រីលានដុល្លារនៃតម្លៃមូលធនទីផ្សារដែលបាន «បាត់ខ្លួន» ពី S&P ៥០0។

ចាប់ពីដើមឆ្នាំ សន្ទស្សន៍ S&P ៥០០ (S&P 500 ដែលជាពាក្យកាត់របស់ Standard & Poor’s 500 Stock Index គឺជាសន្ទស្សន៍មូលបត្រដែលយោងទៅលើភាគហ៊ុនមូលដ្ឋានរបស់ក្រុមហ៊ុនចំនួន ៥០០ ដែលមានមូលធនទីផ្សារធំជាងគេនៅលើផ្សារហ៊ុន NYSE ឬ NASDAQ) បានថយចុះជិត ១៨%។ ក្រោយការធ្លាក់ថ្លៃ ០.១% កាលពីម្សិលម្ង៉ៃ សន្ទស្សន៍នេះកាន់តែដើរជិតដល់ចំណុច «ដាំក្បាលចុះ ២០% រាប់ចាប់ពីចំណុចកំពូលចុងក្រោយ»។ ជាសរុប តម្លៃមូលធនទីផ្សារជាង ៧ ទ្រីលានដុល្លារអាម៉េរិក បាន «រលាយខ្សុល» ពីបណ្ដាភាគហ៊ុននៅក្នុងសន្ទស្សន៍ S&P ៥០។

DJIA កាលពីម្សិលម្ង៉ៃក៏បានធ្លាក់ថ្លៃ ០.៣%។ ជាសរុប ក្នុងឆ្នាំ ២០២២ នេះ សន្ទស្សន៍នេះបានបាត់បង់ ១៣%។

បណ្ដាភាគហ៊ុនក្នុងក្រុមបច្ចេកវិទ្យា រងការខាតបង់ច្រើនជាងគេបង្អស់។ សន្ទស្សន៍ Nasdaq បានថយចុះ ២៧% រាប់ចាប់ពីដើមឆ្នាំ។ វិស័យបច្ចេកវិទ្យាបានបាត់បង់ជិត ៣ ទ្រីលាន ក្នុងចំណោមមូលធនទីផ្សារ ៧ ទ្រីលានដុល្លារដែលបានបាត់បង់ពីសន្ទស្សន៍ S&P ៥០។

ភាគហ៊ុនរបស់បណ្ដាក្រុមហ៊ុនបច្ចេកវិទ្យាធំៗ ដូចជា Apple, Microsoft, Amazon, Alphabet, Meta Platforms និង Elon Musk ជាដើម សុទ្ធតែមានពណ៌ក្រហម។ Netflix បានបាត់បង់ ៧០% ដែលនេះគឺជាតួលេខអាក្រក់ជាងគេបង្អស់នៅក្នុងសន្ទស្សន៍ S&P ៥០០៕

May 14, 2022

អគ្គិសនីបង្កបង្កើតឡើងវិញ គ្រោងនឹងកើនឡើងយ៉ាងគំហុកនៅឆ្នាំនេះ

ពិភពលោកនឹងបង្កើតបានកំណត់ត្រាថ្មីស្ដីពីកម្លាំងអគ្គិសនីបង្កបង្កើតឡើងវិញនៅក្នុងឆ្នាំនេះ ក្នុងនោះប្រភេទដែលនាំមុខគេគឺ ថាមពលព្រះអាទិត្យនៅ ប្រទេសចិន និងអឺរ៉ុប។

ក្នុងរបាយការណ៍មួយកាលពីថ្ងៃទី ១១ ឧសភា អង្គការថាមពលអន្តរជាតិ (IEA) បានឱ្យដឹងថា កម្លាំងនៃថាមពលបង្កបង្កើតឡើងវិញថ្មី ដែលត្រូវបានបន្ថែមក្នុងឆ្នាំ ២០២១ បានឡើងដល់ ២៩៥ gigawatt។ ឈានចូលដល់ឆ្នាំ ២០២២ ប្រព័ន្ធផលិតអគ្គិសនីស្អាតកម្លាំង ៣២០ gigawatt គ្រោងនឹងត្រូវដំឡើងបន្ថែមទៀត ដែលនេះប្រហាក់ប្រហែលនឹងតម្រូវការអគ្គិសនីនៅទូទាំង ប្រទេសអាល្លឺម៉ង់ ឬអគ្គិសនីសរុបដែលផលិតដោយរោងចក្រធ្យូងថ្មរបស់ សហភាពអឺរ៉ុប។ ថាមពលទាំងនេះនឹងក្លាយជាកំណត់ត្រាថ្មីរបស់ពិភពលោក។

ថាមពលព្រះអាទិត្យដែលនាំមុខដោយ ចិន និង អឺរ៉ុប នឹងក្ដោបក្ដាប់ ៦០% នៃថាមពលបង្កបង្កើតឡើងវិញនៅនៅទូទាំងពិភពលោក ក្នុងឆ្នាំ ២០២២។ ចំណាត់ថ្នាក់លេខ ២ គឺ ថាមពលខ្យល់ និងវារីអគ្គិសនី។ នេះបើតាមស្ថាប័នប្រឹក្សាសម្រាប់បណ្ដាប្រទេសអភិវឌ្ឍ និងគោលនយោបាយថាមពល។

May 13, 2022

អង់គ្លេស នឹងសាងសង់រោងចក្រអគ្គិសនីព្រះអាទិត្យនៅ «លើមេឃ»

ក្រុមអ្នកស្រាវជ្រាវកំពុងពិនិត្យលទ្ធភាពរចនាម៉ូឌុលនៃរោងចក្រប្រមូលយក និងបញ្ជូនថាមពលព្រះអាទិត្យមកកាន់ផែនដី ដែលរោងចក្រនេះនឹងត្រូវសាកល្បងនៅឆ្នាំ ២០៣៥។

ស្ថាប័នបច្ចេកវិទ្យាជាង ៥០ របស់ អង់គ្លេស រួមទាំងក្រុមហ៊ុនអាកាសចរណ៍ Airbus, សាកលវិទ្យាល័យ Cambridge និងក្រុមហ៊ុនផលិតផ្កាយរណប SSTL កំពុងចូលរួមក្នុងគម្រោងស្ដីពីថាមពលអវកាសអង់គ្លេស ដែលត្រូវបានផ្ដួចផ្ដើមឡើងកាលពីឆ្នាំកន្លង ដើម្បីស្វែងយល់អំពីលទ្ធភាពនៃការអភិវឌ្ឍរោងចក្រអគ្គិសនីព្រះអាទិត្យនៅទីអវកាស។

យោងតាមគម្រោងខាងលើ ការបញ្ជូនអគ្គិសនីពីអវកាសមកកាន់ផែនដី អាចជួយឱ្យ អង់គ្លេស ឆ្លើយតបនឹងគោលដៅមិនបញ្ចេញឧស្ម័នផ្ទះកញ្ចក់នៅឆ្នាំ ២០៥០។ សំណើបញ្ឈប់បំភាយឧស្ម័នកាបូនទាំងស្រុងនៅពាក់កណ្ដាលសតវត្សរ៍នេះគឺស្ថិតក្នុងការប្រឹងប្រែងដើម្បីទប់ស្កាត់បម្រែបម្រួលអាកាសធាតុរបស់ពិភពលោក។

ក្នុងកិច្ចប្រជុំមួយនៅ អង់គ្លេស កាលពីថ្ងៃទី ២៧ មេសា Martin Soltau ដែលជាប្រធានរបស់គម្រោងផ្ដួចផ្ដើមខាងលើបានបញ្ជាក់ថា បច្ចេកវិទ្យាទាំងឡាយដែលត្រូវការដើម្បីអភិវឌ្ឍរោងចក្រថាមពលព្រះអាទិត្យក្នុងទីអវកាសគឺមានរួចហើយ ឧបសគ្គគឺនៅត្រង់ទំហំរបស់គម្រោង។ ម៉ូឌុលដែលត្រូវបង្កើតឡើងដើម្បីធ្វើការសាកល្បង ក៏មានទំហំធំ ពោលគឺប្រហែលរ៉ាប់គីឡូម៉ែត្រក្រឡា និងត្រូវការបាញ់បង្ហោះ ៣០០ ដង ដោយប្រើប្រាស់រុក្កែត Starship របស់ SpaceX។ រោងចក្រនៅលើមេឃនេះនឹងត្រូវគោចរជុំវិញផែនដីក្នុងរយៈកម្ពស់ ៣៦,០០០ គៅឡូម៉ែត្រ។

ដើម្បីប្រមូលថាមពលពីទីអវកាស ប្រព័ន្ធនឹងត្រូវការអង់តែនខ្នាតយក្សមួយនៅលើផែនដី ហៅថា rectenna។ អង់តែននេះចាប់យករលកវិទ្យុសកម្មពីអវកាស និងបំប្លែងទៅជាអគ្គិសនី។ Soltau ឱ្យដឹងថា rectenna នឹងដូចទៅនឹងសំណាញ់ដ៏ធំមួយដែលមានអង់តែនតូចៗជាច្រើន។ វានឹងមានទំហំពី ៧ ដល់ ១៣ គីឡូម៉ែត្រ៕

May 12, 2022

Category: សង្គម និងសេដ្ឋកិច្ច