ការសម្រេចបិទដែលនឹងត្រូវធ្វើឡើងចាប់ពីថ្ងៃទី ០៤-០៥ មិថុនា ២០២២ នេះគឺយោងទៅតាម លិខិតលេខ ០២ សណន ចុះថ្ងៃទី ២០ ឧសភា ២០២២ របស់រាជរដ្ឋាភិបាល ស្ដីពីការផ្អាកការលក់ដូរ និងពិសាគ្រឿងស្រវឹងមួយថ្ងៃមុនការបោះឆ្នោត និងថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២ ដែលនឹងប្រព្រឹត្តទៅនៅថ្ងៃទី ០៤ និងទី ០៥ ខែឧសភា ២០២២។
ដោយសារប្រព័ន្ធបញ្ជាមួយដែលមិនស៊ីចង្វាក់ជាមួយនឹងចលនា យានអវកាស ឬផ្កាយរណប Voyager ១ បានបញ្ជូនទិន្នន័យចម្លែកមកកាន់ផែនដីជាបន្តបន្ទាប់ ធ្វើឱ្យ ណាសា ព្រួយបារម្ភ បន្ទាប់ពីបំពេញបេសកកម្មអស់រយៈពេល ៤៥ ឆ្នាំនៅក្នុងទីអវកាស។
យាន Voyager ១ របស់ ណាសា ដែលត្រូវបានបាញ់បង្ហោះកាលពីឆ្នាំ ១៩៧៧ បានហោះចូលដល់តំបន់អន្តរតារាកាលពីឆ្នាំ ២០១២ ហើយកំពុងតែបន្តគោចរក្នុងទីអវកាស។ បច្ចុប្បន្ន យាននេះកំពុងស្ថិតនៅក្នុងតំបន់ដែលមានចម្ងាយពីផែនដីប្រហែល ២៣.៣ ពាន់លានគីឡូម៉ែត្រ។ បើទោះជា Voyager ១ នៅដំណើរការល្អ ប៉ុន្តែ ថ្មីៗនេះក្រុមអ្នកវិទ្យាសាស្ត្រទទួលខុសត្រូវក្នុងបេសកកម្មយល់ថា យាននេះជួបបញ្ហាច្របូកច្រល់ទាក់ទងនឹងទីតាំង ឬទិសនៅក្នុងទីអវកាស ដោយមិនបានងាកមកកាន់មុខងារសុវត្ថិភាព ឬផ្ញើសញ្ញាប្រកាសអាសន្ន។
«រឿងចម្លែកប្រភេទនោះនឹងកើតឡើងនៅក្នុងដំណាក់កាលនេះនៃបេសកកម្ម» Suzanne Dodd អ្នកគ្រប់គ្រងគម្រោង Voyager ១ និង Voyager ២ នៅបន្ទប់ពិសោធន៍កម្លាំងរុញច្រានរហ័ស (JPL) របស់ ណាសា នៅ California ឱ្យដឹងដូច្នេះ។ «យានទាំងពីរសុទ្ធតែមានអាយុជិត ៤៥ ឆ្នាំ លើសពីការគ្រោងទុករបស់ក្រុមអ្នកចាត់ចែងបេសកកម្ម។ យានកំពុងស្ថិតក្នុងលម្ហអវកាសអន្តរតារា បរិស្ថានមានវិទ្យុសកម្មខ្ពស់ដែលមិនទាន់មានយានផ្សេងណាមួយធ្លាប់ហោះឆ្លងកាត់»។
ទំនងជាប្រព័ន្ធបញ្ជា និងតំណភ្ជាប់ជាមួយផែនដី (AACS) របស់ Voyager ១ ជួបបញ្ហា។ ប្រព័ន្ធ AACS ជួយឱ្យយានអវកាស និងអង់តែនរបស់វា វិលត្រូវទិស។ AACS ក៏ទំនងជានៅដំណើរការ ដោយសារតែវានៅទទួលបញ្ជា អនុវត្ត និងបញ្ជូនទិន្នន័យមកកាន់ផែនដីដោយរលកសញ្ញាខ្លាំងដូចធម្មតា។ ប៉ុន្តែ AACS មិនស៊ីចង្វាក់គ្នាជាមួយនឹងចលនារបស់យាន ហើយក៏ផ្ញើទិន្នន័យសំរាមស្ដីពីការវាស់វែងពីចម្ងាយ។
យោងតាម ណាសា ក្រុមអ្នកវិទ្យាសាស្ត្រនឹងបន្តស្វែងយល់ ក៏ដូចជាដោះស្រាយបញ្ហាដែលបានកើតឡើងនេះ។ ប៉ុន្តែ វានឹងស៊ីពេលយូរ ដោយសារថា រលកសញ្ញាពីផែនដី នឹងត្រូវចំណាយពេលជាង ២០ ម៉ោងកន្លះ ដើម្បីទៅដល់ Voyager ១ ហើយគេក៏ត្រូវរង់ចាំការឆ្លើយតបពីយាននេះក្នុងរយៈពេលដូចគ្នានេះដែរ។
យាន Voyager ២ ដែលត្រូវបានបាញ់បង្ហោះកាលពីឆ្នាំ ១៩៧៧ ដែរនោះ គ៏កំពុងដំណើរការធម្មតា ប៉ុន្តែ អគ្គិសនីដែលយាននេះអាចបង្កើតបាន ចេះតែបន្តខ្សោយទៅៗ ដូច្នេះ ក្រុមអ្នកទទួលខុសត្រូវគម្រោងក៏ត្រូវបិទឧបករណ៍មួយចំនួនដើម្បីសន្សំសំច័យថាមពល។ ពួកគេសង្ឃឹមថា យានទាំងពីរនេះនឹងអាចដំណើរការរហូតដល់ឆ្នាំ ២០២៥៕
ប្រទេសប៉ូឡូញ ប្រកាសបញ្ចប់កិច្ចព្រមព្រៀងនាំចូលឧស្ម័នរបស់ រុស្ស៊ី បើទោះជាកិច្ចសន្យានេះមានសុពលភាពរហូតដល់ចុងឆ្នាំ ២០២២។
រដ្ឋមន្ត្រីក្រសួងអាកាសធាតុប៉ូឡូញ Anna Moskwa កាលពីថ្ងៃទី ២៣ ឧសភា បានប្រកាសថា ប្រទេសនេះបញ្ចប់កិច្ចសន្យាទិញឧស្ម័នរបស់ រុស្ស៊ី តាមរយៈបំពង់បង្ហូរ Yamal ក្រោយពី ទីក្រុងវ៉ាសូវី (Warsaw) បានបដិសេធសំណើទូទាត់ដោយប្រាក់រូប្លរុស្ស៊ី ចំណែក មូស្គូ ក៏បានកាត់ប្រភពផ្គត់ផ្គង់កាលពីខែមេសា។
ក្រុមហ៊ុនឧស្ម័ន PGNiG របស់ ប៉ូឡូញ កាលពីឆ្នាំ ២០១៩ ធ្លាប់បានប្រកាសថា មិនបន្តកិច្ចសន្យាដែលមានសុពលភាពរហូតដល់ចុងឆ្នាំ ២០២២ ជាមួយនឹងក្រុមហ៊ុននាំចេញឧស្ម័ន Gazprom របស់ រុស្ស៊ី។
លោកស្រី Anna Moskwa ថ្លែងថា «សកម្មភាពរបស់ រុស្ស៊ី ចំពោះ អ៊ុយក្រែន បង្ហាញថា ប្រការដែលរដ្ឋាភិបាលប៉ូឡូញ ប្ដេជ្ញាចិត្តឯករាជ្យពីឧស្ម័នរបស់ រុស្ស៊ី គឺជារឿងត្រឹមត្រូវទាំងស្រុង»។
(អ៊ីតាលី)-នៅក្នុងការសាកល្បងហោះហើរមានមនុស្សបើកបរ យន្តហោះសម្រាប់មនុស្សម្នាក់ Jetson One ដំណើរការយ៉ាងរលូត ឆ្លងកាត់ភូមិសាស្ត្រជាច្រើនសណ្ឋាន។
Jetson One គឺជាយន្តហោះសម្រាប់មនុស្សម្នាក់ដែលអាចបើកបរក្នុងល្បឿន ១០២ គីឡូម៉ែត្រ/ម៉ោង និងអាចហោះបានរយៈចម្ងាយ ៣២ គីឡូម៉ែត្រ បន្ទាប់ពីបញ្ចូលថាមពលពេញ។ ម៉ូដែលយន្តហោះអគ្គិសនីដែលអាចហោះឡើង និងចុះចតដោយត្រង់ (eVTOL) នេះ ត្រូវបានបង្ហាញជាផ្លូវការកាលពីខែតុលា ២០២១ ហើយវាល្បីឈ្មោះដល់ថ្នាក់លក់ដាច់ស្ទើរអស់ភ្លាមៗ សម្រាប់ដំណាក់កាលប្រគល់ទំនិញនៅចុងឆ្នាំនេះ។
ក្រុមហ៊ុន Jetson នៅ ស៊ុយអែត និង ប៉ូឡូញ កាលពីថ្ងៃទី ១៩ ឧសភា បានចែករំលែកវីដេអូថ្មីដែលថតអ្នកបើកបរកូនយន្តហោះនេះនៅឯ Tuscany ប្រទេសអ៊ីតាលី។ ក្នុងវីដេអូនោះ អ្នកកាន់ចង្កូតអនាមិក កំពុងបើកបរ Jetson One ឆ្លងកាត់វាល និងព្រៃ។ ក្រុមហ៊ុននេះក៏បានបញ្ជាក់ថា យន្តហោះនេះអាចហោះពីលើផ្ទៃទឹកផងដែរ។
Peter Ternstrom ប្រធានក្រុមហ៊ុន Jetson និងសហស្ថាបនិក Tomasz Patan បានបង្កើតក្រុមហ៊ុននេះឡើងកាលពីឆ្នាំ ២០១៧ បន្ទាប់ពីមានគំនិតរចនាកូនយន្តហោះនេះកាលពីប៉ុន្មានឆ្នាំមុននោះ។ ពួកគេបំពាក់បច្ចេកវិទ្យាជាច្រើនដើម្បីធានាថា ម៉ាស៊ីនដំណើរការប្រកបដោយសុវត្ថិភាព។
Jetson One មានទម្ងន់ ៨៦ គីឡូក្រាម អាចហោះបាន ២០ នាទី/លើក និងពេលវេលាសម្រាប់បញ្ចូលថាមពលគឺ ២ ម៉ោង។ ក្រុមហ៊ុន Jetson ឱ្យដឹងថា នៅឆ្នាំ ២០២៦ ពួកគេនឹងផលិតកូនយន្តហោះប្រភេទដែលអាចផ្ទុកមនុស្សបាន ២ នាក់ ហើយនៅចុងទសវត្សរ៍នេះ Jetson នឹងផលិតប្រភេទផ្ទុកមនុស្សបាន ៤ នាក់៕
កាលពីឆ្នាំកន្លង យីហោធ្វើនំរបស់ Justin Ellen រកចំណូលបាន ១០០,០០០ ដុល្លារអាម៉េរិក ប៉ុន្តែ ចាប់ពីខែមករា ឆ្នាំនេះ Ellen ចាប់ផ្ដើមរកបាន ១២,០០០ ដុល្លារ/ខែ បន្ទាប់ពីបានចំណាយពេលពេញម៉ោងសម្រាប់ការងារធ្វើនំផ្ទាល់ខ្លួន។
នៅពេល Justin Ellen ទទួលបានសារមួយនៅលើ Instagram ដែលសួរថា «ចង់ចូលរួមកម្មវិធី Netflix ដែលមានឈ្មោះថា «Is It Cake?» ដែរ ឬអត់?» Ellen គិតថា ការអញ្ជើញនេះសាមញ្ញពេកហើយ។ នៅពេលពួកគេនិយាយថា នឹងមានការសម្ភាស ទើប Ellen ជឿថា វាជាកម្មវិធីគួរឱ្យទុកចិត្ត។
ក្រោយកិច្ចសម្ភាសតាម Zoom និងការរង់ចាំ ១ ខែ Ellen ដែលកាលនោះមានអាយុ ១៨ ឆ្នាំ ក៏ត្រូវបានជ្រើសរើសឱ្យចូលរួម។ Ellen ទទួលស្គាល់ថា កម្មវិធីនោះពិតជាធំដុំមែន។
«Is It Cake?» គឺជាកម្មវិធីប្រកួតធ្វើនំ។ ក្នុងកម្មវិធីនេះ បេក្ខជនត្រូវតែធ្វើនំដែលមានរូបរាងដូចទៅនឹងរបស់របរប្រើប្រាស់ប្រចាំថ្ងៃ ដូចជាស្បែកជើងជាដើម។ Ellen គឺជាអ្នកធ្វើនំដែលនៅមានបទពិសោធន៍តិចតួចនៅឡើយ ធៀបនឹងគូប្រជែងដទៃ។
ទោះជាយ៉ាងណាក៏ដោយ មុនពេលបង្ហាញខ្លួននៅក្នុងកម្មវិធីរបស់ Netflix កំលោះ Ellen ក៏មានយីហោនំជោគជ័យមួយផ្ទាល់ខ្លួនរួចហើយ នោះគឺ Everything Just Baked។
កំលោះមកពី New Jersey ឱ្យដឹងថា «កាលពីឆ្នាំកន្លង យើងរកចំណូលបាន ១០០,០០០ ដុល្លារ។ ជាមួយនឹងកម្មវិធី Netflix ខ្ញុំទទួលបានសំណើ (ការបញ្ជាទិញ) ច្រើនជាងមុន…រវល់ណាស់។ ខ្ញុំអរគុណខ្លាំងណាស់ចំពោះប្រការនោះ»។
ធ្វើការដោយប្រឹងប្រែង និងឆ្លងកាត់បរាជ័យ
Ellen រៀនវិធីធ្វើនំពីម្ដាយ និងជីដូនរបស់ខ្លួនពេលទើបតែមានអាយុ ៧ ឆ្នាំ។ ពួកគេធ្វើនំជាច្រើនប្រភេទ ប៉ុន្តែ សុទ្ធតែមិនមែនជានំផ្អែម។
ក្រោយមក Ellen ក៏បានចាកផុតតំណែង «កូនកាំបិត» (ជំនួយការចុងភៅ) ពេលមានអាយុ ១៤ ឆ្នាំ ដោយចាប់ផ្ដើមចេញពីការមើលវីដេអូលើ Youtube និងមានគំនិតចង់ផលិតនំផ្ទាល់ខ្លួន។
«ខ្ញុំបានបរាជ័យច្រើនលើកច្រើនសា…។ ខ្ញុំគិតថា នោះគឺជានំដែលងាយស្រួលធ្វើ ប៉ុន្តែក្រោយមកក៏ធ្វើមិនបានល្អ» Ellen និយាយអំពីបទពិសោធន៍ក្នុងការធ្វើនំទៅតាម Youtuber។
ក៏ប៉ុន្តែ Ellen នៅតែមិនបោះបង់ការព្យាយាម។ ដំណាក់កាលដែលជក់ចិត្តក្នុងការធ្វើនំគឺពេល Ellen រៀនដល់កម្រិតមធ្យមសិក្សា។
«ខ្ញុំរវល់ខ្លាំងណាស់។ ប៉ុន្តែ បើអ្នកពិតជាមានការប្ដេជ្ញាចិត្តខ្ពស់ អ្នកនឹងឆ្លៀតយកឱកាសទំនេរបានច្រើន» Ellen និយាយដូច្នេះ។
ដឹងអំពីតម្លៃរបស់ខ្លួន
ឧបសគ្គធំបំផុតដែល Ellen ជួបប្រទះនៅពេលក្លាយជាអ្នកជំនួញវ័យក្មេងនោះគឺការកំណត់តម្លៃរបស់ខ្លួន។
«កាលណោះ ខ្ញុំមិនច្បាស់ថា សិល្បៈរបស់ខ្ញុំមានតម្លៃប៉ុន្មាននោះទេ។ ខ្ញុំសួរម្ដាយ ហើយគាត់ក៏លើកឡើងនូវតម្លៃដូចខ្ញុំ គឺឱ្យតម្លៃយ៉ាងទាប។ ដូចជាថា «ម៉ាក់នឹងមិនទិញនំដែលមានតម្លៃ ១០០ ដុល្លារឡើយ»។ ប៉ុន្តែ ពេលនេះ គ្រប់គ្នាកំពុងចំណាយក្នុងកម្រិតនោះ»។
ក្នុងដំណាក់កាលដំបូងនៃការរកស៊ី Ellen បានលក់នំមួយដែលមានទំហំ ៦ អ៊ីញ ក្នុងតម្លៃ ៦០ ដុល្លារ ប៉ុន្តែ បច្ចុប្បន្ន «ពិតជាងាយស្រួលក្នុងការលក់នំក្នុងតម្លៃ ១៥០ ដុល្លារ សម្រាប់នំដែលមានទំហំ ៦ អ៊ីញ»។
ចាប់ពីខែមករា ឆ្នាំនេះ Ellen ចាប់ផ្ដើមរកបាន ១២,០០០ ដុល្លារ/ខែ បន្ទាប់ពីបានចំណាយពេលពេញម៉ោងសម្រាប់ការងារធ្វើនំផ្ទាល់ខ្លួនសម្រាប់លក់។
«ខ្ញុំដឹងថា គ្រប់គ្នាកំពុងទិញកាបូបប្រែន តម្លៃរាប់ពាន់ដុល្លារ។ អ្នកត្រូវធ្វើឱ្យអតិថិជនយល់អំពីតម្លៃយីហោរបស់អ្នក និងអ្វីដែលអ្នកកំពុងផ្ដល់ជូនពួកគេ…ព្រោះថា នំមានរសជាតិឆ្ងាញ់ណាស់ ហើយខ្ញុំបានប្រើប្រាស់សុទ្ធតែគ្រឿងផ្សំដែលមានគុណភាពខ្ពស់» Ellen បកស្រាយអំពីយុទ្ធសាស្ត្រឃោសនា។
តែងតែឆ្ពោះទៅមុខ
ក្ដីស្រមៃរបស់ Ellen ទទួលបានការតបស្នង។ អ្វីដែលកំលោះនេះនឹកស្រមៃអំពីខ្លួនឯង បានក្លាយជាការពិត។ បច្ចុប្បន្ន Ellen លក់នំចម្រុះ និងសម្ភារធ្វើនំ តាមអនឡាញ។ Ellen ក៏បង្កើតកម្មវិធីបង្រៀងសម្រាប់អ្នកធ្វើនំដែលចង់ចាប់យកអាជីពនេះផងដែរ។
Ellen ទទួលបានការបញ្ជាទិញប្រហែល ៦ លើកជារៀងរាល់សប្ដាហ៍ ហើយវាសុទ្ធតែជាការបញ្ជាទិញធំ។ មួយថ្ងៃរបស់ Ellen គឺក្រោកពីគេងនៅម៉ោង ០៨ ព្រឹក និងធ្វើនំទៅតាមការបញ្ជាទិញពីអតិថិជន ពីផ្ទះបាយរបស់គ្រួសារ។
«ខ្ញុំនៅតែគិតអំពីការងារជំនួញរបស់ខ្ញុំ និងឧបសគ្គថ្មីដើម្បីលើកកម្ពស់ការងារ។ ខ្ញុំចង់មានការិយាល័យក្រុមហ៊ុនមួយ…ប៉ុន្តែគោលដៅចុងក្រោយរបស់ខ្ញុំនោះគឺដូចទៅនឹង Wilton ដែលជាក្រុមហ៊ុនតុបតែងនំខេក»។
Wilton គឺជាក្រុមហ៊ុនផលិតសម្ភារធ្វើនំ សម្ភារតុបតែងនំ និងវត្ថុធាតុសម្រាប់ធ្វើនំជាដើម។
«នឹងត្រូវចំណាយពេលយូរទៀត។ ប៉ុន្តែ ចុងក្រោយ អ្នកនឹងបានដឹងថា វាពិតជាស័ក្ដិសម» Ellen បញ្ជាក់អំពីការព្យាយាមរបស់ខ្លួន៕
របាយការណ៍របស់ Oxfam បានសង្កត់ធ្ងន់ថា មនុស្សរាប់រយនាក់បានក្លាយជាមហាសេដ្ឋី ខណៈរាប់រយលាននាក់ផ្សេងទៀតបែរបានធ្លាក់ខ្លួនក្រ ដែលនេះបានបង្កើតឡើងនូវបញ្ហាវិសមភាពប្រាក់ចំណូលនៅទូទាំងពិភពលោក។
យោងតាមរបាយការណ៍ដែលប្រកាសកាលពីថ្ងៃទី ២២ ឧសភា របស់អង្គការក្រៅរដ្ឋាភិបាល Oxfam មនុស្ស ៥៧៣ នាក់ មានឈ្មោះនៅក្នុងបញ្ជីមហាសេដ្ឋី ចាប់តាំងពីឆ្នាំ ២០២០ ជួយឱ្យចំនួនសរុបនៃមហាសេដ្ឋីរបស់ពិភពលោក កើនឡើងដល់ ២,៦៦៨ រូប។ ប្រការនេះមានន័យថា ក្នុងសម័យកូវីដ-១៩ ជាមធ្យមក្នុងរយៈពេល ៣០ ម៉ោង គឺមានមនុស្សម្នាក់បានក្លាយជាមហាសេដ្ឋី។
របាយការណ៍ដែលយោងទៅតាមទិន្នន័យរបស់ Forbes នេះ ត្រូវបានប្រកាសនៅមុនវេទិកាសេដ្ឋកិច្ចពិភពលោក (WEF) នៅ Davos ប្រទេសស្វ៊ីស។ វេទិកានេះគឺជាកន្លែងដែលប្រមូលផ្ដុំវត្តមានរបស់មេដឹកនាំបណ្ដាប្រទេស និងក្រុមអ្នកមានកំពូលៗរបស់ពិភពលោក។
ក្នុងសម័យកូវីដ-១៩ ទ្រព្យរបស់មហាសេដ្ឋីទាំងឡាយបានកើនឡើងថែម ៣.៨ ទ្រីលាន (៣,៨០០,០០០,០០០,០០០) ដុល្លារ ប្រហែលនឹង ៤២% ធ្វើឱ្យទ្រព្យសរុបរបស់ពួកគេកើនឡើងដល់ ១២.៧ ទ្រីលានដុល្លារអាម៉េរិក។ កំណើននេះ មួយភាគធំបានមកពីទីផ្សារមូលបត្រ ដោយសារតែរដ្ឋាភិបាលនានាបញ្ចេញប្រាក់ជំនួយសេដ្ឋកិច្ចដើម្បីកាត់បន្ថយផលប៉ះពាល់ផ្នែកហិរញ្ញវត្ថុដែលកើតឡើងដោយសារបញ្ហាកូវីដ-១៩។
Max Lawson នាយកផ្នែកគោលនយោបាយទទួលបន្ទុកបញ្ហាវិសមភាពប្រចាំ Oxfam ឱ្យដឹងថា អត្រានៃកំណើនខាងលើ ភាគច្រើនកើតឡើងនៅឆ្នាំដំបូងនៃរោគរាតត្បាតសកល។ ក្រោយមក អត្រានៃកំណើនក៏ដើរថេរទៅមុខ និងថយចុះបន្តិច។
ក៏ប៉ុន្តែ ក្នុងពេលដំណាលគ្នានោះ កូវីដ-១៩ ក៏បានបង្កើនវិសមភាព និងបង្កើនតម្លៃស្បៀងនៅទូទាំងសកលលោកផងដែរ។ បញ្ហានេះអាចរុញច្រានមនុស្សជាង ២៦៣ លាននាក់ ឱ្យធ្លាក់ទៅក្នុងស្ថានភាពក្រីក្រខ្លាំងក្នុងឆ្នាំ ២០២២ នេះបើតាម Oxfam។
ក្នុងគ្រាដែលអ្នកប្រើប្រាស់ទូទៅ ត្រូវប្រឈមនឹងការលំបាកដោយសារតែទំនិញឡើងថ្លៃខ្ពស់ ម្ចាស់ក្រុមហ៊ុន និងក្រុមមេដឹកនាំក្រុមហ៊ុនក្នុងវិស័យជាច្រើនបែរជាទទួលបានផលចំណេញច្រើនជាងមុន។ ទ្រព្យសម្បត្តិរបស់ក្រុមមហាសេដ្ឋីក្នុងវិស័យស្បៀងអាហារ និងកសិកម្ម កើនឡើង ៤៥% នៅក្នុងរយៈពេល ២ ឆ្នាំកន្លង។ ចាប់ពីឆ្នាំ ២០២០ មានមហាសេដ្ឋីថ្មីចំនួន ២០ នាក់ បានបង្ហាញវត្តមានក្នុងវិស័យនេះ។ ប៉ុន្តែ ទ្រព្យរបស់ក្រុមមហាសេដ្ឋីក្នុងវិស័យថាមពល ត្រូវថយចុះអស់ ៥៣% ប្រហាក់ប្រហែលនឹង ២៤% ចាប់តាំងពីឆ្នាំ ២០២០។
មហាសេដ្ឋីថ្មីចំនួន ៤០ នាក់ បានលេចមុខឡើងនៅក្នុងវិស័យឱសថ។ វិស័យនេះទទួលបានផលចំណេញច្រើននៅក្នុងយុទ្ធនាការប្រយុទ្ធប្រឆាំងនឹងកូវីដ-១៩។
វិស័យបច្ចេកវិទ្យាក៏មានមហាសេដ្ឋីថ្មីជាច្រើននាក់ផងដែរ។ ក្នុងចំណោមអ្នកមានជាងគេ ១០ នាក់របស់ពិភពលោក គឺមាន ៧ នាក់ស្ថិតក្នុងវិស័យបច្ចេកវិទ្យា ក្នុងនោះលេចធ្លោជាងគេគឺ Elon Musk មកពីក្រុមហ៊ុន Tesla, Jeff Bezos មកពី Amazon និង Bill Gates មកពីក្រុមហ៊ុន Microsoft។
ដើម្បីកាត់បន្ថយបញ្ហាវិសមភាពប្រាក់ចំណូល អង្គការ Oxfam បានជំរុញឱ្យបណ្ដារដ្ឋាភិបាលយកពន្ធពីក្រុមអ្នកមាន និងបណ្ដាក្រុមហ៊ុនខ្នាតយក្សឱ្យបានខ្ពស់ជាងបច្ចុប្បន្ន។ អង្គការនេះអំពាវនាវឱ្យយកពន្ធបណ្ដោះអាសន្ន ៩០% លើប្រាក់ចំណេញដែលលើសពីមធ្យមភាគរបស់បណ្ដាក្រុមហ៊ុន (excess corporate profit) និងពន្ធមួយលើកលើទ្រព្យសម្បត្តិ របស់ក្រុមមហាសេដ្ឋី។ ការយកពន្ធ ២% ចំពោះអ្នកដែលមានទ្រព្យច្រើនជាង ៥ លានដុល្លារ និង ៥% ចំពោះអ្នកមានទ្រព្យលើសពី ១ ពាន់លានដុល្លារ គឺជួយឱ្យបណ្ដាប្រទេសរកចំណូលជូនរដ្ឋបាន ២.៥ ទ្រីលានដុល្លារអាម៉េរិក៕
យន្តហោះយោធាមួយគ្រឿងដែលដឹកម្សៅទឹកដោះ ៣៥ តោន ដំបូង បានចុះចតនៅ Indianapolis សហរដ្ឋអាម៉េរិក។
យោងតាម Aljazeera យន្តហោះនេះស្ថិតក្នុងក្របខណ្ឌ «យុទ្ធនាការ Fly Formula» របស់ រដ្ឋាភិបាលអាម៉េរិក ដើម្បីនាំចូលផលិតផលម្សៅទឹកដោះពី អឺរ៉ុប និងដោះស្រាយស្ថានភាពខ្វះខាតទំនិញប្រភេទនេះយ៉ាងធ្ងន់ធ្ងរនៅ សហរដ្ឋអាម៉េរិក។
នេះគឺជាជើងដំបូងពី អឺរ៉ុប ដែលដឹកផលិតផលម្សៅទឹកដោះសម្រាប់កុមារដែលមានបញ្ហាប្រតិកម្មជាមួយនឹងប្រូតេអ៊ីន និងទឹកដោះគោ។ តាមគម្រោង បរិមាណទំនិញខាងលើនឹងជួយកាត់បន្ថយបានមួយកម្រិតចំពោះកង្វះខាតដែលកើតឡើងកាន់តែធ្ងន់ធ្ងរនៅ សហរដ្ឋអាម៉េរិក ដោយសារតែរោងចក្រផលិតម្សៅទឺកដោះក្នុងស្រុកធំបំផុតប្រចាំប្រទេសនេះ ត្រូវបិទទ្វារនៅ Michigan កាលពីខែកុម្ភៈ ព្រោះតែមានបញ្ហាសុវត្ថិភាព។
មូលហេតុដែលនាំឱ្យមានជើងហោះហើរនៃយន្តហោះយោធាអាម៉េរិក នេះ ក៏ព្រោះតែពុំមានជើងហោះហើរពាណិជ្ជកម្មណាមួយត្រូវបានធ្វើឡើងនៅចុងសប្ដាហ៍កន្លង។
សេតវិមានឱ្យដឹងថា ម្សៅទឹកដោះ Nestle Health Science Alfamino Infant និង Alfamino Junior ចំនួន ១៣២ កោះធំ (pallet) នឹងត្រូវបានដឹកពីមូលដ្ឋានទ័ព Ramstein នៅ អាល្លឺម៉ង់ មកកាន់ សហរដ្ឋអាម៉េរិក។ ជាសរុប ម្សៅទឹកដោះសម្រាប់កុមារប្រតិកម្មនឹងប្រូតេអ៊ីនរបស់ទឹកដោះគោ ប្រហែល ១.៥ លានកំប៉ុង នឹងមកដល់ដៃអតិថិជន នៅ សហរដ្ឋអាម៉េរិក នៅក្នុងសប្ដាហ៍នេះ។
ខ្ទង់វិនិយោគទៅលើ Luna របស់ក្រុមហ៊ុន Binance បានធ្លាក់ដាំក្បាលចុះដោយមិនអាច «ចាប់ឃាត់» បាន ធ្វើឱ្យពួកគេខាតបង់អស់ ១.៦ ពាន់លានដុល្លារអាម៉េរិក កាលពីខែកន្លង។
កាលពីថ្ងៃទី ១៧ ឧសភា មហាសេដ្ឋី Changpeng Zhao ដែលជាស្ថាបនិក និងជានាយកប្រតិបត្តិរបស់ផ្សារជួញដូរប្រាក់ឌីជីថលគ្រីបតូ Binance បានចែករំលែកអត្ថបទព័ត៌មានមួយរបស់ Fortune នៅលើ Twitter ផ្ទាល់ខ្លួន អមជាមួយនឹងមតិថា «Poor again» (ក្រទៀតហើយ)។
ខ្ទង់វិនិយោគទៅលើ Luna របស់ក្រុមហ៊ុន Binance បានធ្លាក់ដាំក្បាលចុះដោយមិនអាច «ចាប់ឃាត់» បាន ពី ១.៦ ពាន់លានដុល្លារកាលពីខែកន្លង មកនៅត្រឹម ២,២០០ ដុល្លារ នៅក្នុងសប្ដាហ៍នេះ។ កាលពីថ្ងៃទី ១៩ ឧសភា រូបិយប័ណ្ណឌីជីថល Luna ត្រូវបានគេជួញដូរក្នុងតម្លៃ ០.០០០១៤៦៨ ដុល្លារ/កាក់។
ក្នុងអំឡុង ២ សប្ដាហ៍កន្លង Luna បានធ្លាក់ថ្លៃខ្លាំងដោយមិនអាចទប់បាន បន្ទាប់ពី token (មុខងារបង្កើតកូដសម្ងាត់ប្រើម្ដង) TerraUSD (UST) បាត់បង់តុល្យភាពជាមួយនឹងប្រាក់ដុល្លារអាម៉េរិក។ យោងតាម Business Insider តម្លៃរបស់ token ទាំងពីរនេះមានទំនាក់ទំនងយ៉ាងម៉ត់ចត់នឹងគ្នា។ ក្រុមអ្នកវិនិយោគប្រញាប់លក់ចោលនៅពេលតម្លៃរបស់ TerraUSD ថយចុះ នាំឱ្យកើតមានការដួលរលំរបស់ Luna។ ការដែល TerraUSD និង Luna ធ្លាក់ថ្លៃដោយសេរី បានធ្វើឱ្យពួកវាបាត់បង់តម្លៃអស់ជាង ៥០ ពាន់លានដុល្លារអាម៉េរិក។
កាលពីមុននោះ Zhao ឱ្យដឹងថា Binance កាន់កាប់ ១៥ លាន token Luna បន្ទាប់ពីបានវិនិយោគទៅលើបណ្ដាញ Terra កាលពីឆ្នាំ ២០១៨។
ក៏ប៉ុន្តែ ការបញ្ចេញមតិថា «ក្រទៀតហើយ» របស់លោក Zhao ប្រហែលគ្រាន់តែជាការលេងសើចប៉ុណ្ណោះ ព្រោះថា បច្ចុប្បន្ន បុរសនេះនៅតែជាមហាសេដ្ឋី ដោយមានទ្រព្យសម្បត្តិប្រមាណ ១៧.៤ ពាន់លានដុល្លារអាម៉េរិក និងស្ថិតក្នុងចំណោមកំពូលអ្នកមានទាំង ១០០ របស់ពិភពលោក។
យ៉ាងណាក៏ដោយ កាលពីខែកន្លង Forbes ឱ្យដឹងថា Zhao ឈរលំដាប់ទី ១៩ ក្នុងចំណោមមហាសេដ្ឋីពិភពលោក ដោយមានទ្រព្យ ៦៥ ពាន់លានដុល្លារអាម៉េរិក។ ដូច្នេះ អាចនិយាយបានថា បច្ចុប្បន្ន Zhao កំពុងធ្លាក់ខ្លួន «ក្រ» ជាង បើធៀបនឹងខែមុន។
ក្រុមមន្ត្រីចិន ត្រូវបានគេជឿថា កំពុងចរចាជាមួយក្រុមមន្ត្រីនៅ មូស្គូ ដើម្បីទិញប្រេងក្នុងតម្លៃទាបពី ប្រទេសរុស្ស៊ី សម្រាប់បន្ថែមទៅក្នុងឃ្លាំងយុទ្ធសាស្ត្រ។
Bloomberg ដកស្រង់ប្រភពព័ត៌មានអនាមិក ឱ្យដឹងថា ការចរចាត្រូវបានធ្វើឡើងក្នុងថ្នាក់រដ្ឋាភិបាលរវាង ទីក្រុងប៉េកាំង និង មូស្គូ ប៉ុន្តែ បណ្ដាក្រុមហ៊ុនប្រេង ទំនងជាមិនបានចូលរួមផ្ទាល់ក្នុងការចរចានេះទេ។ ប្រការនេះបង្ហាញថា ចិន កំពុងតែបង្កើនកិច្ចសហការប្រតិបត្តិក្នុងវិស័យថាមពលជាមួយ រុស្ស៊ី ក្នុងគ្រាដែល លោកខាងលិច ស្វែងរកវិធីហាមឃាត់ការនាំចូលប្រេងពី រុស្ស៊ី ដោយសារតែសង្គ្រាមនៅ អ៊ុយក្រែន។
ប្រេងបានឡើងថ្លៃខ្ពស់ក្នុងឆ្នាំនេះ ក្រោយពី រុស្ស៊ី បើកការឈ្លានពានលើទឹកដីរបស់ អ៊ុយក្រែន ប៉ុន្តែ តម្លៃប្រេងឆៅរបស់ រុស្ស៊ី បែរជាធ្លាក់ថ្លៃ ព្រោះតែ អតិថិជនជាច្រើនមិនចង់ជាប់ឈ្មោះក្នុងបញ្ជីទណ្ឌកម្មរបស់បស្ចិមលោក។ ប្រការនេះបានជួយឱ្យ ចិន អាចទិញប្រេងពី រុស្ស៊ី ក្នុងតម្លៃថោក សម្រាប់បន្ថែមទៅក្នុងឃ្លាំងយុទ្ធសាស្ត្រ។
«ចិន និង រុស្ស៊ី ចូលរួមកិច្ចសហប្រតិបត្តិការសេដ្ឋកិច្ច និងពាណិជ្ជកម្មធម្មតា ក្នុងក្របខណ្ឌគោរពគ្នា ស្មើភាពគ្នា និងផលប្រយោជន៍រួមគ្នា» អ្នកនាំពាក្យក្រសួងការបរទេសចិន Wang Wenbin ប្រកាសនៅក្នុងសន្និសីទសារព័ត៌មានកាលពីថ្ងៃទី ២០ ឧសភា មួយថ្ងៃបន្ទាប់ពីព័ត៌មានទាក់ទងនឹងការចរចាទិញប្រេងខាងលើត្រូវបានចុះផ្សាយដោយ Bloomberg។
ចិន មិនបានប្រកាសឱ្យដឹងអំពីទំហំនៃឃ្លាំងប្រេងយុទ្ធសាស្ត្ររបស់ខ្លួននោះទេ ប៉ុន្តែ ក្រុមហ៊ុនប្រឹក្សាយោបល់មួយចំនួន វិភាគរូបភាពបានពីផ្កាយរណប បានសន្និដ្ឋានថា ប្រទេសនេះមានលទ្ធភាពរក្សាប្រេងជាង ១ ពាន់លានធុងក្នុងឃ្លាំងយុទ្ធសាស្ត្រ និងពាណិជ្ជកម្ម៕
បណ្ដាក្រុមហ៊ុនអាកាសចរណ៍មកពីជុំវិញពិភពលោក បានបញ្ជាទិញយន្តហោះផលិតនៅ ប្រទេសចិន ចំនួន ៨១៥ គ្រឿង ដែលនេះគឺជាការបំបែកស្ថានភាពផ្ដាច់មុខរបស់ Boeing និង Airbus។
យោងតាមសារព័ត៌មាន Yahoo យន្តហោះ C៩១៩ របស់ក្រុមហ៊ុន Comac ដែលផលិតនៅ ប្រទេសចិន ទើបតែបានបញ្ចប់ការហោះហើរសាកល្បងដំបូង មុនពេលត្រូវបានប្រគល់ដល់ដៃអតិថិជនដំបូងនៅ សៀងហៃ នាពេលខាងមុខ។ នេះគឺជាការបោះជំហានថ្មីមួយក្នុងការដែលក្រុមហ៊ុនចិន ឆ្ពោះទៅរកការផ្គត់ផ្គង់យន្តហោះពាណិជ្ជកម្ម ជំនួសឱ្យ យន្តហោះប្រភេទ ៧៣៧ របស់ Boeing និង A៣២០ របស់ Airbus ក្នុងទីផ្សារអាកាសចរណ៍ពិភពលោក។
Commercial Aircraft Corp របស់ ចិន (Comac) បានបញ្ចប់ការហោះហើរសាកល្បងរយៈពេល ៣ ម៉ោង នៅឯ សៀងហៃ កាលពីចុងសប្ដាហ៍កន្លង នេះបើតាមសារព័ត៌មានក្នុងស្រុករបស់ប្រទេសនេះ។
ជោគជ័យនៃការហោះហើរសាកល្បងនេះគឺជាចលករមួយដ៏ធំសម្រាប់ Comac។ ក្រុមហ៊ុននេះបច្ចុប្បន្នទទួលបានការបញ្ជាទិញចំនួន ២៨ លើក សម្រាប់ ៨១៥ គ្រឿង នៃយន្តហោះប្រភេទ C៩១៩។
ក្រុមហ៊ុនអាកាសចរណ៍ចិន China Eastern បានត្រៀមខ្លួនរួចរាល់ហើយក្នុងការទទួលយកយន្តហោះ C៩១៩ ចំនួន ៥ គ្រឿងដំបូង ក្នុងតម្លៃ ៩៩ លានដុល្លារ/គ្រឿង ទៅតាមកិច្ចព្រមព្រៀងកាលពីឆ្នាំ ២០២១។ ក្រុមហ៊ុនអាកាសចរណ៍ធំជាងគេលំដាប់ទី ៣ របស់ ចិន នេះ គ្រោងនឹងប្រើប្រាស់យន្តហោះរបស់ Comac សម្រាប់ទីផ្សារក្នុងស្រុក៕