សង្គម និងសេដ្ឋកិច្ច - La Reine Media

ការនាំចេញប្រេងរបស់ រុស្ស៊ី ទៅកាន់ ឥណ្ឌា កើនឡើងខ្ពស់ជាងមុន ២៥ ដង

បរិមាណប្រេងដែលនាំចេញពី រុស្ស៊ី ទៅកាន់ ឥណ្ឌា កើន ២៥ ដង ធៀបនឹងមធ្យមភាគ ៩៦០,០០០ ធុង/ខែ កាលពីឆ្នាំកន្លង ដែលនេះបានកើនដល់ ២៤ លានធុងក្នុងខែឧសភា ២០២២។

សារព័ត៌មាន Reuters កាលពីថ្ងៃទី ៣០ ឧសភា បានឱ្យដឹងថា ឥណ្ឌា បាននាំចូលប្រេងតម្លៃទាប ៣៤ លានធុងពី រុស្ស៊ី រាប់ចាប់ពីខែកុម្ភៈ ជាពេលដែល រុស្ស៊ី បើកយុទ្ធនាការយោធានៅ អ៊ុយក្រែន។ តួលេខនេះខ្ពស់ជាង ១០ ធៀបនឹងដំណាក់កាលដូចគ្នាកាលពីឆ្នាំកន្លង។

ក្នុងខែឧសភា ប្រេងឆៅជាង ២៤ លានធុងរបស់ រុស្ស៊ី ត្រូវបានផ្គត់ផ្គង់ឱ្យ ឥណ្ឌា កើនឡើងច្រើនធៀបនឹង ៧.២ លានធុងក្នុងខែមេសា និងប្រហែល ៣ លានធុងកាលពីខែមីនា ឆ្នាំនេះ។ ទិន្នន័យដែល Reuters ទទួលបាន បង្ហាញថា ក្នុងខែមិថុនា ឥណ្ឌា នឹងនាំចូលប្រេងប្រហែល ២៨ លានធុង។

កាលពីឆ្នាំកន្លង ការនាំចេញប្រេងឆៅរបស់ រុស្ស៊ី ទៅកាន់ ឥណ្ឌា ជាមធ្យមត្រឹមតែ ៩៦០,០០០ ធុង/ខែ ទាបជាងជិត ២៥ ដង ធៀបនឹងខែឧសភានេះ។

ការនាំចូលប្រេងកើនឡើងខ្ពស់ បានជួយឱ្យខ្ទង់ប្រាក់នាំចូលទំនិញសរុបរបស់ ឥណ្ឌា ពី រុស្ស៊ី រាប់ចាប់ពីថ្ងៃទី ២៤ កុម្ភៈ ដល់ ២៦ ឧសភា ឡើងដល់ ៦.៤ ពាន់លានដុល្លារ ច្រើនជាងឆ្ងាយធៀបនឹង ១.៩៩ ពាន់លានដុល្លារក្នុងដំណាក់កាលដូចគ្នាកាលពីឆ្នាំកន្លង។ ក៏ប៉ុន្តែ ការនាំចេញរបស់ ឥណ្ឌា ទៅកាន់ រុស្ស៊ី បានថយចុះជិត ៥០% មកនៅត្រឹម ៣៧៧.០៧ លានដុល្លារ ក្នុងអំឡុងពេលដូចខាងលើ ដោយសារតែ ទីក្រុងញូវដែលី មិនទាន់បង្កើតយន្តការទូទាត់ប្រាក់ជាផ្លូវការជាមួយ ទីក្រុងមូស្គូ។

ការដាក់ទណ្ឌកម្មរបស់បស្ចិមលោក ទៅលើ រុស្ស៊ី បានជួយឱ្យបណ្ដាប្រទេសដូចជា ចិន និង ឥណ្ឌា ជាដើម មានឱកាសទិញប្រេងរបស់ រុស្ស៊ី ក្នុងតម្លៃទាប។ យ៉ាងនេះក្ដី កន្លងមក ឥណ្ឌា ក៏ត្រូវបានប្រទេសលោកខាងលិចរិះគន់មិនតិចនោះដែរ ទាក់ទិននឹងការទិញប្រេងពី រុស្ស៊ី ខណៈដែល ទីក្រុងមូស្គូ កំពុងចូលឈ្លានពាន អ៊ុយក្រែន៕

May 31, 2022

ស្ថានីយវារីអគ្គិសនីធំជាងគេលំដាប់ទីពីរក្នុងពិភពលោក ដំណើរការបាន ៥០% ហើយ

(ប្រទេសចិន)-ប្រព័ន្ធម៉ាស៊ីនវារីអគ្គិសនីលេខ ៥ ដែលមានកម្លាំង ១ លានគីឡូវ៉ាត់ របស់រោងចក្រវារីអគ្គិសនី Baihetan ត្រូវបានដាក់ឱ្យដំណើរការជាផ្លូវការចាប់តាំងពីថ្ងៃទី ៣០ ឧសភា។

ស្ថានីយវារីអគ្គិសនី Baihetan ដែលស្ថិតនៅលើទន្លេ Jinsha ដែលជាដៃទន្លេផ្នែកខាងលើរបស់ទន្លេ Yangtze ជួយបញ្ជូនអគ្គិសនីពីតំបន់ភាគខាងលិចដែលសម្បូរធនធានធម្មជាតិ ទៅកាន់តំបន់ភាគខាងកើតរបស់ ប្រទេសចិន ដែលក្រីក្រធនធានធម្មជាតិ។ គម្រោងស្ថានីយវារីអគ្គិសនី Baihetan គឺជាការបោះជំហានធំមួយនៅក្នុងការប្រើប្រាស់ថាមពលស្អាតរបស់ប្រទេសនេះ។

រាប់ចាប់តាំងពីប្រព័ន្ធម៉ាស៊ីនដំបូងត្រូវបានដាក់ឱ្យដំណើរការកាលពីខែមិថុនា ២០២១ រោងចក្រវារីអគ្គិសនីនេះផលិតអគ្គិសនីបានជាង ២៦.៩ ពាន់លានគីឡូវ៉ាត់រួចហើយ បើទោះជាមិនទាន់ដំណើរការពេញលេញ។ ជា មួយនឹងការដាក់ឱ្យដំណើរការប្រព័ន្ធម៉ាស៊ីនលេខ ៥ កាលពីថ្ងៃទី ៣០ ឧសភា បន្ទាប់ពីដំណើរការសាកល្បង ៧២ ម៉ោង គម្រោងខាងលើនេះត្រូវបានគេបញ្ជាក់ថា ដំណើរការបាន ៥០% ហើយ ធៀបនឹងកម្លាំងសរុប។

ស្ថានីយវារីអគ្គិសនី Baihetan នៅពេលស្ថាបនារួចរាល់ នឹងមានប្រព័ន្ធម៉ាស៊ីនវារីអគ្គិសនីចំនួន ១៦ ក្នុងនោះ ១ ប្រព័ន្ធមានកម្លាំង ១ លានគីឡូវ៉ាត់។ បច្ចុប្បន្ន រោងចក្រវារីអគ្គិសនីនេះ បានដាក់ឱ្យដំណើរការប្រព័ន្ធម៉ាស៊ីនចំនួន ៨ រួចហើយ រាប់ទាំងប្រព័ន្ធម៉ាស៊ីនលេខ ៥ ដែលចាប់ផ្ដើមដំណើរការជាផ្លូវការកាលពីម្សិលមិញ។

នៅពេលដំណើរការពេញលេញ រោងចក្រវារីអគ្គិសនី Baihetan នេះ នឹងផលិតអគ្គិសនីជាមធ្យមជាង ៦២.៤ ពាន់លានគីឡូវ៉ាត់ម៉ោង ជារៀងរាល់ឆ្នាំ គ្រប់គ្រាន់សម្រាប់តម្រូវការប្រើប្រាស់ប្រចាំឆ្នាំរបស់មនុស្សប្រហែល ៧២ លាននាក់។

May 31, 2022

Startup «ធ្វើចំការ» ក្នុងកសិដ្ឋានប្រភេទ «ឈរត្រង់» នៅក្នុងអគារខ្ពស់ៗ

នៅពេលហាងទំនិញទាំងឡាយនៅ ហុងកុង ខ្វះកសិផល ដោយសារដាច់ចង្វាក់ផ្គត់ផ្គង់ Gordon Tam ក៏យល់ឃើញថា នេះគឺជាឱកាសសម្រាប់រូបមន្ត «កសិដ្ឋានឈរត្រង់» នៅក្នុងបណ្ដាអគារខ្ពស់។

Gordon Tam ជាសហស្ថាបនិក និងប្រធានរបស់ Farm៦៦ ដែលជាក្រុមហ៊ុនអភិវឌ្ឍរូបមន្ត្រី «កសិដ្ឋានឈរត្រង់» នៅ ហុងកុង។ Tam បានដឹងថា ទិន្នផលបន្លែដែលដាំនៅមូលដ្ឋានមានកម្រិតទាបខ្លាំងនៅក្នុងសម័យកូវីដ-១៩។

នៅ ហុងកុង ស្បៀងអាហារ ជាង ៩០% ពិសេសគឺបន្លែ ត្រូវបាននាំចូលពី ចិនដីគោក។ ដើមខែកុម្ភៈ ២០២២ ហុងកុង ដែលមានប្រជាជនជាង ៧ លាននាក់ ត្រូវប្រឈមមុខនឹងស្ថានភាពខ្វះអាហារស្រស់។ ហាងទំនិញនានាស្ទើរតែគ្មានអ្វីដើម្បីលក់ ដោយសារតែ អាជ្ញាធរចិន រឹតបន្តឹងព្រំដែន ព្រោះតែបញ្ហាកូវីដ-១៩។

Gordon Tam គណនាឃើញថា បរិមាណបន្លែប្រហែលតែ ១.៥% ប៉ុណ្ណោះ ដែលត្រូវបានផលិតនៅក្នុងស្រុក។ ហើយបណ្ដា «កសិដ្ឋានឈរត្រង់» ដូចជា Farm៦៦ ដែលមានជំនួយពីបច្ចេកវិទ្យាទំនើបដូចជា អង្គញាណ loT, អំពូលភ្លើង LED និងរ៉ូបូតជាដើម អាចជំរុញដល់ការដាំដុះក្នុងតំបន់។ Farm៦៦ ក៏មានគម្រោង «នាំចេញអាថ៌កំបាំង» នេះ ទៅកាន់ទីក្រុងផ្សេងៗផងដែរ។

ក្នុងសម័យកូវីដ-១៩ ក្រុងហុងកុង ប្រឈមនឹងបញ្ហាខ្វះបន្លែស្រស់

Tam និយាយថា «កសិដ្ឋានឈរត្រង់គឺជាវិធីសាស្ត្រដាំដុះដែលជួយឱ្យគេអាចដាំបន្លែនៅក្នុងទីក្រុងបាន និងកាត់បន្ថយការពឹងផ្អែកលើការនាំចូល ពិសេសចំពោះ ហុងកុង»។

Tam ចាប់ផ្ដើមកសាង Farm៦៦ តាំងពីឆ្នាំ ២០១៣ រួមជាមួយនឹងសហស្ថាបនិក Billy Lam។ Farm៦៦ បានរកឃើញថា ពណ៌ខុសគ្នានៅលើកាំរស្មីនៃពន្លឺ ជួយឱ្យរុក្ខជាតិរីកលូតលាស់ទៅតាមវិធីខុសៗគ្នា។ ភ្លើង LED ពណ៌ក្រហមនឹងជួយឱ្យដើមរុក្ខជាតិរីកលូតលាស់បានលឿន ខណៈដែលពន្លឺ LED ពណ៌ផ្ទៃមេឃជួយឱ្យស្លឹករុក្ខជាតិរីកធំជាងធម្មតា។

Farm៦៦ ក៏ប្រើប្រាស់សែនសឺរ loT និង រ៉ូបូត ដើម្បីគ្រប់គ្រងគុណភាព និងជួយគ្រប់គ្រងកសិដ្ឋានក្នុងផ្ទះទំហំជិត ២,០០០ ម៉ែត្រក្រឡា។ Farm៦៦ មានបុគ្គលិកពេញម៉ោង ១៥ នាក់ រួមមាន ក្រុមអ្នកវិភាគទិន្នន័យ អ្នកវិទ្យាសាស្ត្រផ្នែកអាហារ និងវិស្វករគ្រឿងម៉ាស៊ីន។ Farm៦៦ ផលិតបន្លែបានរហូតដល់ ៧ តោនជារៀងរាល់ខែ។

Farm៦៦ ទទួលបានការវិនិយោគពី ParticleX ដែលមានមហាសេដ្ឋី Tang Yiu នៅពីក្រោយ និងទទួលបានការគាំទ្រពីមូលនិធិសហគ្រិន Alibaba, Cyberport និងក្រុមហ៊ុនអភិវឌ្ឍអចលនទ្រព្យ Sino Group របស់មហាសេដ្ឋីសិង្ហបុរី Robert Ng ផងដែរ។

Farm៦៦ ដាំបន្លែបៃតង បន្លែក្រអូប និងបន្លែច្រើនប្រភេទទៀតដោយប្រើរូបមន្តកសិដ្ឋានឈរត្រង់ និងតាមបែបដាំដុះលើទឹក។ ក្នុងនោះ រុក្ខជាតិត្រូវបានថែបំប៉នដោយសារធាតុចិញ្ចឹមដែលបានមកពីកាកសំណល់របស់ត្រី ជំនួសឱ្យជីគីមី ឬជីធម្មជាតិ។ រុក្ខជាតិមានតួនាទីចម្រាញ់ទឹក បង្កើតបានជាប្រព័ន្ធជីវសាស្ត្រនៅក្នុងកសិដ្ឋានទំនើបនេះ។

បច្ចុប្បន្ន ក្រុមហ៊ុន Farm៦៦ របស់ Gordon Tam ផ្គត់ផ្គង់កសិផលឱ្យផ្សារទំនើប សណ្ឋាគារ និងហាងលក់រាយលំដាប់ខ្ពស់។

May 31, 2022

មិនគួរឱ្យជឿសោះ! ទារកវ័យ ៤០ ថ្ងៃ នៅ ឥណ្ឌា មានផ្ទៃពោះ

ទារកម្នាក់ទើបតែមានអាយុ ៤០ ថ្ងៃសោះ ត្រូវបានគេរកឃើញថា មានផ្ទៃពោះដែលកំពុងរីកចម្រើន។

យោងតាម Sputnik ហេតុការណ៍ចម្លែកនេះត្រូវបានរកឃើញបន្ទាប់ពីឪពុកម្ដាយរបស់ទារកនេះមើលឃើញថា ពោះរបស់កូនពួកគេឡើងធំ និងធ្វើឱ្យពិបាកនោម។

វេជ្ជបណ្ឌិត Tabrez Aziz នៃមជ្ឈមណ្ឌលសុខាភិបាល Rahmania ក្នុងតំបន់ Bihar បានស្នើឱ្យថត CT ក្រពះរបស់ទារកនេះ ហើយលទ្ធផលបានធ្វើឱ្យគ្រប់គ្នាស្រឡាំងកាំង។ វេជ្ជបណ្ឌិតឱ្យដឹងថា ពួកគេបានឃើញទារកក្នុងផ្ទៃរបស់ទារកវ័យ ៤០ ថ្ងៃនេះ កំពុងតែរីកចម្រើននៅក្នុងក្រពះ។

បច្ចុប្បន្ន សុខភាពរបស់ទារកវ័យ ៤០ ថ្ងៃខាងលើនេះបានប្រសើរឡើងវិញហើយ បន្ទាប់ពីការវះកាត់ព្យាបាល ហើយក៏បានអនុញ្ញាតឱ្យចេញពីពេទ្យរួចហើយដែរ។

ក្រុមអ្នកឯកទេសបានឱ្យដឹងថា បាតុភូតចម្លែកនេះត្រូវបានគេហៅថា «គភ៌ក្នុងគភ៌» គឺជាស្ថានភាពដែលទារកមួយចិញ្ចឹមទារកមួយទៀតដែលត្រូវជាបងប្អូនភ្លោះ នៅក្នុងរាងកាយរបស់ខ្លួន។ ក្រុមវេជ្ជបណ្ឌិតបានប្រាប់ទីភ្នាក់ងារសារព៏ត៌មាន ANI របស់ ឥណ្ឌា ថា នេះគឺជាករណីដ៏សែនកម្រ។ ក្រុមអ្នកវិទ្យាសាស្ត្រយល់ថា ករណីបែបនេះកើតឡើងនៅពេលទារកមួយក្នុងផ្ទៃ ត្រូវបាន «ស្រូបយក» ដោយទារកមួយទៀតដែលនៅក្នុងផ្ទៃជាមួយគ្នា។

កាលពី ៥ ឆ្នាំមុន នៅ ហុងកុង និង ឆ្នាំ ២០១៩ នៅ អ៊ីស្រាអែល ក៏ធ្លាប់មានសេចក្ដីរាយការណ៍ស្ដីពីករណីដូចទៅនឹងរឿងរ៉ាវខាងលើនេះដែរ។

May 31, 2022

Elon Musk ថា «មហាសេដ្ឋីមិនមែនជាមនុស្សអាក្រក់»

អ្នកមានទ្រព្យច្រើនជាងគេបង្អស់ក្នុងពិភពលោក បានសម្ដែងការខកចិត្តនៅពេលមហាសេដ្ឋីត្រូវបានគេចំអកទៅលើវិធីដែលពួកគេរកប្រាក់ និងចំណាយប្រាក់។

នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk កាលពីថ្ងៃទី ២៥ ឧសភា បានសរសេរនៅលើ Twitter ថា «ពិតជារឿងខុសឆ្គង និងមិនសមហេតុផល» នៅពេលប្រើប្រាស់ពាក្យមហាសេដ្ឋីក្នុងន័យរើសអើង បើសិនអ្នកនោះកំពុងចំណាយទ្រព្យសម្បត្តិរបស់ខ្លួនដើម្បីបង្កើតផលិតផលដែល «ជួយឱ្យមនុស្សរាប់លាននាក់មានសុភមង្គល»។ លោក Musk ក៏បានថ្លែងថា បើសិនជាអាច លោកនឹងបោះបង់ខ្ទង់បន្ថយពន្ធពេលធ្វើកិច្ចការមនុស្សធម៌។

ការបង្ហោះសារខាងលើគឺដើម្បីឆ្លើយតបទៅនឹងសារមួយដែលនិយាយថា «ខ្ញុំមានអារម្មណ៍ថា មហាសេដ្ឋីទាំងឡាយមានចិត្តនឹងនបំផុតនៅពេលរកប្រាក់ និងកាចបំផុតនៅពេលប្រើប្រាស់លុយដើម្បីប្រឹងប្រែង «ធ្វើរឿងល្អ»។

លោក Musk ក៏បានបង្កើតគណនីស្ទង់មតិលើ Twitter ហើយសួរអ្នកតាមដានចំនួន ៩៥ លាននាក់ថា ពួកគេជឿជាក់លើអ្នកនយោបាយជាង ឬមហាសេដ្ឋីជាង។ មិនយូរប៉ុន្មាន លទ្ធផលបង្ហាញថា មនុស្សប្រហែល ៧៥% ក្នុងចំណោម ២.៨ លាននាក់ដែលបានចូលរួមឆ្លើយ ឱ្យដឹងថា ពួកគេជឿជាក់លើអ្នកនយោបាយ។

កាលពីខែវិច្ឆិកា ២០២១ លោក Musk បានបរិច្ចាគ ៥.៧ ពាន់លានដុល្លារដែលបានមកពីភាគហ៊ុន Tesla ទៅឱ្យមូលនិធិមនុស្សធម៌។ ប្រការនេះបានជួយឱ្យលោកក្លាយជាសប្បុរសជនដែលបរិច្ចាគប្រាក់ច្រើនជាងគេលំដាប់ទីពីរនៅ សហរដ្ឋអាម៉េរិក បន្ទាប់ពី Bill Gates និងអតីតភរិយា លោកស្រី Melinda French Gates។

May 28, 2022

ប្រាក់ឈ្នួលគោលនៅលើពិភពលោក បច្ចុប្បន្នស្ថិតក្នុងកម្រិតណា?

បច្ចុប្បន្ន នៅ សហរដ្ឋអាម៉េរិក ប្រាក់ឈ្នួលគោលគឺ ៧.២៥ ដុល្លារ/ម៉ោង ខណៈដែលនៅ កូរ៉េខាងត្បូង បានកំណត់ប្រាក់ឈ្នួលគោលត្រឹម ៨ ដុល្លារអាម៉េរិក។

យោងតាមនិយមន័យរបស់ អង្គការពលកម្មអន្តរជាតិ (ILO) ប្រាក់ឈ្នួលគោល គឺជាប្រាក់កម្រៃអប្បបរមាដែលនិយោជកត្រូវផ្ដល់ជូននិយោជិត សម្រាប់ការងារដែលត្រូវបានអនុវត្តក្នុងអំឡុងពេលកំណត់ណាមួយ។ គោលដៅនៃគោលនយោបាយនេះគឺដើម្បីបញ្ចៀសបញ្ហាដែលបុគ្គលិក និងយោជិត ត្រូវបានផ្ដល់ប្រាក់ឈ្នួលទាបដោយមិនសមហេតុផល។

នៅលើពិភពលោក ប្រទេសស្ទើរតែទាំងអស់សុទ្ធតែកំណត់អំពីប្រាក់ឈ្នួលអប្បបរមា ដោយគិតទៅតាមម៉ោង ថ្ងៃ សប្ដាហ៍ ឬខែ។ នៅ សហរដ្ឋអាម៉េរិក ប្រាក់ឈ្នួលអប្បបរមាគិតតាមម៉ោងគឺ ៧.២៥ ដុល្លារ។ រដ្ឋខ្លះបានកំណត់ប្រាក់ឈ្នួលអប្បបរមាខ្ពស់ជាងនេះ ឬស្មើនឹងការកំណត់របស់សហព័ន្ធ។

នៅ ប្រទេសអង់គ្លេស ប្រាក់ឈ្នួលអប្បបរមាក៏ត្រូវបានកំណត់ទៅតាមម៉ោង និងចែកជាប្រភេទទៅតាមអាយុ។ ចាប់ពីចាកចេញពីសាលារៀន ដល់អាយុ ១៨ ឆ្នាំ ទទួលបានប្រាក់ឈ្នួល ៤.៨១ ផោង (៦ ដុល្លារអាម៉េរិក) ក្នុង ១ ម៉ោង, ចាប់ពីអាយុ ១៨ ឆ្នាំ ដល់ ២០ ឆ្នាំ ទទួលបាន ៦.៨៣ ផោន (៨.៦៣ ដុល្លារ), អាយុពី ២១ ដល់ ២២ ឆ្នាំ ទទួលបាន ៩.១៨ ផោន (១១.៥៨ ដុល្លារ) និងលើសពី ២៣ ឆ្នាំ ទទួលបាន ៩.៥ ផោន (១២ ដុល្លារ)។

នៅអាស៊ី មានប្រទេស និងដែនដីមួយចំនួនតូចប៉ុណ្ណោះដែលបានកំណត់ប្រាក់ឈ្នួលគោលទៅតាមម៉ោង ដូចជា ហុងកុង ជប៉ុន និង កូរ៉េខាងត្បូង។ នៅ ហុងកុង បច្ចុប្បន្ន ប្រាក់ឈ្នួលគោលគឺ ៣៧.៥ ដុល្លារហុងកុង (៤.៨ ដុល្លារអាម៉េរិក) ក្នុង ១ ម៉ោង។

នៅ ប្រទេសជប៉ុន ប្រាក់ឈ្នួលគោលមធ្យមភាគទូទាំងប្រទេសគឺ ៩៣០ យេន (៨.៤៦ ដុល្លារ) ក្នុង ១ ម៉ោង។ អាជ្ញាធរខេត្តនានានឹងបង្កើតគោលការណ៍លើប្រាក់ឈ្នួលអប្បបរមាដោយឡែករបស់ពួកគេ។ តំបន់ដែលមានប្រាក់ឈ្នួលអប្បបរមាខ្ពស់បំផុតនៅ ជប៉ុន គឺ រាជធានីតូក្យូ (១,០៤១ យេន ប្រហែល ៨.១៩ ដុល្លារអាម៉េរិក) ចំណែកឈ្នួលអប្បបរមាទាបបំផុតនៅប្រទេសនេះគឺ ៨២០ យេន/ម៉ោង ស្មើនឹង ៦.៤៥ ដុល្លារ។

នៅក្នុងឆ្នាំ ២០២២ នេះ កូរ៉េខាងត្បូង បានកំណត់យក ៩,១៦០ វ៉ុន (៨ ដុល្លារ) ជាប្រាក់ឈ្នួលអប្បបរមា គិតជាម៉ោង។

May 28, 2022

គម្រោង «ចិញ្ចឹមសាច់» ដោយមិនកាប់សម្លាប់សត្វ របស់ Good Meat និងផ្គត់ផ្គង់សាច់សិប្បនិម្មិតជាង ១៣ ពាន់តោន/ឆ្នាំ

(សហរដ្ឋអាម៉េរិក)-Good Meat ដែលជាក្រុមហ៊ុនបុត្រសម្ព័ន្ធរបស់ Eat Just នឹងសាងសង់រោងចក្រដែលមានម៉ាស៊ីន ឬឡប្រតិកម្មជីវសាស្ត្រចំនួន ១០ គ្រឿង ដែលធំជាងគេបង្អស់ក្នុងពិភពលោក ដើម្បីចិញ្ចឹមសាច់ ក្នុងនោះ ឡនីមួយៗមានចំណុះ ២៥០,០០០ លីត្រ។

ប្រកាសកាលពីថ្ងៃទី ២៥ ឧសភា របស់ក្រុមហ៊ុនខាងលើបានបញ្ជាក់ថា រោងចក្ររបស់ពួកគេនឹងផលិតសាច់គោ និងសាច់មាន់សិប្បនិម្មិត។ ឡប្រតិកម្មជីវសាស្ត្ររបស់ Good Meat នឹងប្រើប្រាស់កោសិការស់ដែលបានមកពីធនាគារកោសិកា ឬស៊ុត ដូច្នេះនឹងមិនមានការកាប់សម្លាប់សត្វឡើយ។

បច្ចុប្បន្ន មានក្រុមហ៊ុនប្រហែល ១៧០ ក្នុងពិភពលោក កំពុងតែអភិវឌ្ឍសាច់សិប្បនិម្មិត ប៉ុន្តែ Good Meat គឺជាក្រុមហ៊ុនតែមួយគត់ដែលទទួលបានអាជ្ញាប័ណ្ណលក់ផលិតផលរបស់ខ្លួននៅក្នុងទីផ្សារនាបច្ចុប្បន្ន។ ក្រុមហ៊ុននេះបានចាប់ផ្ដើមផ្គត់ផ្គង់សាច់មាន់ដែលចិញ្ចឹមពីកោសិកាសត្វមាន់នៅ សិង្ហបុរី កាលពីខែធ្នូ ២០២០។

ការចិញ្ចឹមសត្វនាំឱ្យប៉ះពាល់បរិស្ថាន ព្រោះតែវាបំភាយឧស្ម័យមេតាន ការកាប់ព្រៃឈើយកកន្លែងធ្វើកសិដ្ឋាន និងការប្រើប្រាស់ទឹកច្រើន ដូច្នេះ ការចិញ្ចឹមកោសិកាដើម្បីឱ្យវាធំធាត់ទៅជាសាច់គឺជាដំណោះស្រាយល្អ។

អ្នកគាំទ្រ និងអ្នកដែលបានបរិភោគសាច់សត្វសិប្បនិម្មិតបានឱ្យដឹងថា សាច់ដែលចិញ្ចឹមពីកោសិកាគឺមានរសជាតិដូចទៅនឹងសាច់សត្វដែលគេចិញ្ចឹមដោយឱ្យចំណី។

ក្រុមហ៊ុន Good Meat កំពុងសាងសង់ឡប្រតិកម្មជីវសាស្ត្រចំនួន ១០ ក្នុងនោះ ឡនីមួយៗមានចំណុះ ២៥០,០០០ លីត្រ និងកម្ពស់ ៤ ជាន់ ធំជាងគេបង្អស់ក្នុងពិភពលោកនៅក្នុងវិស័យនេះ។ ក្នុងរយៈពេល ៣ ខែទៀត ឡទាំងនេះនឹងត្រូវបានដាក់ក្នុងរោងចក្ររបស់ Good Meat នៅ សហរដ្ឋអាម៉េរិក។

តាមគម្រោង រោងចក្រខាងលើនឹងដំណើរការចាប់ពីចុងឆ្នាំ ២០២៤ និងអាចផ្គត់ផ្គង់សាច់សិប្បនិម្មិតចំនួន ១១,៨០០ តោននៅឆ្នាំ ២០២៦ និង ១៣,៧០០ តោននៅឆ្នាំ ២០៣០។

សាច់មាន់អាំងសិប្បនិម្មិតនៅក្នុងចង្ក្រានរបស់ភោជនីដ្ឋាន Eat Just

May 27, 2022

មហាសេដ្ឋីលេខមួយនៅ អ៊ុយក្រែន ចង់ប្ដឹងប្រឆាំង រុស្ស៊ី ព្រោះទម្លាក់គ្រាប់បែកលើរោងចក្ររបស់ខ្លួន

Rinat Akhmetov ចង់ដាក់ពាក្យប្ដឹងប្រឆាំង រុស្ស៊ី ព្រោះតែបានទម្លាក់គ្រាប់បែកលើរោងចក្រផលិតដែកថែបរបស់លោកនៅ Mariupol បង្កការខាតបង់ពី ១៧ ដល់ ២០ ពាន់លានដុល្លារអាម៉េរិក។

«យើងប្រាកដជាប្ដឹងប្រឆាំង រុស្ស៊ី និងទាមទារសំណងឱ្យបានសមស្រប ដោយសាររងការខូចខាតហេដ្ឋារចនាសម្ព័ន្ធ និងសកម្មភាពជំនួញ» មហាសេដ្ឋី Akhmetov បានប្រាប់ទំព័រ mrpl.city ដូច្នេះ។

មហាសេដ្ឋីអ៊ុយក្រែន វ័យ ៥៥ ឆ្នាំខាងលើ មានភាគហ៊ុននៅក្នុងក្រុមហ៊ុនជាច្រើនតាមរយៈក្រុមហ៊ុនហិរញ្ញវត្ថុនិងឧស្សាហកម្ម SCM។ ភាគហ៊ុនធំជាងគេរបស់លោក Akhmetov គឺស្ថិតនៅក្នុងក្រុមហ៊ុនផលិតដែកថែបលំដាប់កំពូលរបស់ អ៊ុយក្រែន គឺ Metinvest Group។

រោងចក្រដែកថែប Azovstal បានរងការខូចខាតធ្ងន់ធ្ងរដោយសារការទម្លាក់គ្រាប់បែករបស់ កងទ័ពរុស្ស៊ី នៅពេលតំបន់រោងចក្រនេះក្លាយជាលេណដ្ឋានចុងក្រោយរបស់ ទាហានអ៊ុយក្រែន នៅ Mariupol។ រោងចក្រជាច្រើនផ្សេងទៀតក៏បានរងការខូចខាតធ្ងន់ធ្ងរ។

មហាសេដ្ឋី Akhmetov បញ្ជាក់ថា «ការចំណាយទៅលើការជួសជុលព្រោះតែសកម្មភាពរបស់ រុស្ស៊ី គឺប្រមាណពី ១៧ ទៅ ២០ ពាន់លានដុល្លារអាម៉េរិក។ តួលេខចុងក្រោយនឹងត្រូវបានលើកឡើងនៅក្នុងពាក្យបណ្ដឹងប្រឆាំង រុស្ស៊ី»។

May 27, 2022

ក្រុមហ៊ុនឱសថរបស់ ស្វ៊ីស អភិវឌ្ឍឧបករណ៍ PCR សម្រាប់តេស្តរកវីរុសអុតស្វា (monkeypox)

ក្រុមហ៊ុនផលិតឱសថ Roche របស់ ប្រទេសស្វ៊ីស កាលពីថ្ងៃទី ២៥ ឧសភា បានប្រកាសថា អភិវឌ្ឍឧបករណ៍តេស្តប្រភេទ PCR ដែលអាចរកឃើញវីរុសបង្កជំងឺអុតស្វា។

យោងតាមក្រុមហ៊ុន Roche ម៉ាស៊ីនធ្វើតេស្ត PCR កំណែដំបូងអាចរកឃើញវីរុសដែលស្ថិតក្នុងអម្បូរ Orthopoxvirus, ចំណែកកំណែទីពីរអាចរកឃើញវីរុសបង្កជំងឺអុតស្វា ខណៈដែលកំណែទីបីអាចរកឃើញវីរុសទាំងពីរប្រភេទនេះ។

អង្គការសុខភាពពិភពលោក (WHO) យល់ថា ការធ្វើតេស្តដោយម៉ាស៊ីន PCR គួរត្រូវបានផ្ដល់អាទិភាពមុនគេដោយសារតែវាមានភាពសុក្រឹតខ្ពស់។

នៅទូទាំងសកលលោក ករណីឆ្លងជំងឺអុតស្វា បានកើនឡើងដល់ ២១៩ នាក់ នេះគឺជាការប្រកាសរបស់ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអឺរ៉ុប (ECDC) ធ្វើឡើងកាលពីម្សិលមិញ។

ដោយមើលឃើញហានិភ័យ ប្រទេសអេស្ប៉ាញ បានរៀបគម្រោងទិញវ៉ាក់សាំងបង្ការជំងឺអុតស្វា Imvanex និងថ្នាំប្រឆាំងវីរុស Tecovirimat តាមរយៈយន្តការរបស់ សហភាពអឺរ៉ុប ដើម្បីទប់ស្កាត់ការឆ្លងរាលដាល។ វ៉ាក់សាំង Imvanex ត្រូវបានអភិវឌ្ឍដោយក្រុមហ៊ុន Bavarian Nordic របស់ ដាណឺម៉ាក និងត្រូវបានស្ថាប័នឱសថអឺរ៉ុប ទទួលស្គាល់រួចហើយ។

នៅ សហរដ្ឋអាម៉េរិក វ៉ាក់សាំង Imvanex ក៏ត្រូវបានអាជ្ញាធរគ្រប់គ្រងអាហារ និងឱសថ (FDA) ផ្ដល់ការការអនុញ្ញាតឱ្យលក់ក្នុងទីផ្សារជាមួយនឹងឈ្មោះ Jynneos សម្រាប់ប្រឆាំងនឹងជំងឺអុតធំ និងជំងឺអុតស្វា។

May 26, 2022

អ្នកវិទ្យាសាស្ត្រអភិវឌ្ឍកញ្ចក់ធ្វើពីត្បូងពេជ្រ អាចគ្រប់គ្រងឡាស៊ែរកម្លាំង ១០ គីឡូវ៉ាត់

(សហរដ្ឋអាម៉េរិក)-ប្រភេទកញ្ចក់ពេជ្រថ្មីមានសភាពរឹងមាំកម្រិតខ្ពស់ ត្រូវបានកែច្នៃពីត្បូងពេជ្រ អាចប្រើប្រាស់ក្នុងការផលិតគ្រឿងអេឡិចត្រូនិក និងការបញ្ជូនព័ត៌មានក្នុងទីអវកាសឆ្ងាយ។

ក្រុមស្រាវជ្រាវរបស់សាលាវិស្វកម្ម និងវិទ្យាសាស្ត្រអនុវត្ត Harvard John A. Paulson (SEAS) ច្នៃកញ្ចក់ «មហារឹងមាំ» មានសមត្ថភាពទាញយក និងបញ្ជាកម្លាំងរបស់រលកឡាស៊ែរប្រភេទ CW (Continuous-Wave) ដែលមានថាមពលកម្រិតខ្ពស់។ ការស្រាវជ្រាវនេះទើបត្រូវបានចុះផ្សាយលើទស្សនាវដ្ដី Nature Communication កាលពីថ្ងៃទី ១១ ឧសភា។

ឡាស៊ែរដែលមានកម្លាំងខ្លាំងដើរតួនាទីយ៉ាងសំខាន់ក្នុងដំណើរការផលិតរថយន្ត រថភ្លើង និងយន្តហោះភាគច្រើន។ ក៏ប៉ុន្តែ ការច្នៃឧបករណ៍រឹងមាំដើម្បីបញ្ជាកាំរស្មីឡាស៊ែរកម្លាំងខ្លាំងដែលអាចកាត់ដែកថែបបានគឺជារឿងលំបាកជាទីបំផុត ព្រោះថា បើសិនជាឧបករណ៍ដែលប្រើសម្រាប់កំណត់ទិសរបស់ឡាស៊ែរជួបបញ្ហាក្នុងពេលធ្វើការ កាំរស្មីឡាស៊ែរនឹងអាចកម្ទេចប្រព័ន្ធម៉ាស៊ីនបាន។

សាស្ត្រាចារ្យ Marko Loncar មកពី SEAS និងជាសមាជិកនៃក្រុមស្រាវជ្រាវខាងលើឱ្យដឹងថា «បច្ចេកវិទ្យានេះផ្ដល់ក្ដីសង្ឃឹមក្នុងការកែសម្រួល ឬបង្កើតឧបករណ៍ថ្មីសម្រាប់គ្រប់គ្រងឡាស៊ែរកម្លាំងខ្លាំង»។

ក្រុមស្រាវជ្រាវអះអាងថា កញ្ចក់ត្បូងពេជ្ររបស់ពួកគេអាចស៊ូទ្រាំបានជាមួយនឹងកាំរស្មីឡាស៊ែរកម្លាំង ១០ គីឡូវ៉ាត់ ដោយមិនមានការខូចខាតណាទាំងអស់។

ក្រុមអ្នកជំនាញសង្ឃឹមថា ក្នុងពេលអនាគត កញ្ចក់ប្រភេទថ្មីនេះអាចត្រូវបានប្រើប្រាស់ក្នុងការផលិតគ្រឿងអេឡិចត្រូនិក ការពារជាតិ បញ្ជូនទិន្នន័យនៅទីអវកាសឆ្ងាយៗ និងក្នុងវិស័យជាច្រើនផ្សេងទៀត។

May 26, 2022

Category: សង្គម និងសេដ្ឋកិច្ច