សង្គម និងសេដ្ឋកិច្ច - La Reine Media

OPEC+ ឯកភាពគ្នា បង្កើនការផលិតប្រេងឆៅឡើងដល់ ៦៤៨,០០០ ធុង/ថ្ងៃ

អង្គការបណ្ដាប្រទេសនាំចេញប្រេង និងដៃគូសហការ (POEC+) ទើបតែបានយល់ព្រមបង្កើនការផលិតប្រេងឆៅឡើងដល់ ៦៤៨,០០០ ធុង/ថ្ងៃ នៅក្នុងខែកក្កដា និងសីហាខាងមុខ។

តួលេខខាងលើនេះខ្ពស់ជាងច្រើនធៀបនឹងអត្រានៃការបង្កើនទិន្នផលប្រចាំខែដែលគ្រោងទុកមុននោះ គឺ ៤៣២,០០០ ធុង/ថ្ងៃ។ ការសម្រេចចិត្តនេះ ត្រូវបានធ្វើឡើងក្នុងពេលដែល សហភាពអឺរ៉ុប កាត់បន្ថយការនាំចូលប្រេងពី ប្រទេសរុស្ស៊ី ដែលប្រការនេះបានដាក់សម្ពាធទៅលើទីផ្សារ និងបន្តរុញតម្លៃប្រេងឡើងកាន់តែខ្ពស់។

សមាជិកចំនួន ៣ របស់ OPEC ដែលនាំមុខដោយ អារ៉ាប៊ីសាអូឌីត និងដៃគូសហការចំនួន ១០ របស់អង្គការនេះ ដែលនាំមុខដោយ រុស្ស៊ី បានកាត់បន្ថយទិន្នផលប្រេងឆៅកាលពីឆ្នាំ ២០២០ ក្នុងពេលដែលតម្រូវការថយចុះដោយសារ កូវីដ-១៩។

នៅចំពោះមុខការជំរុញពីបណ្ដាប្រទេសប្រើប្រាស់ប្រេងឆៅលំដាប់កំពូលៗរបស់ពិភពលោក បណ្ដាប្រទេសជាសមាជិក OPEC+ បានបង្កើនការផលិតឡើងដល់ ៤០០,០០០ ធុង/ថ្ងៃ ជារៀងរាល់ខែ ចាប់ពីឆ្នាំកន្លង។ យោងតាម Interfax ប្រទេសអារ៉ាប៊ីសាអូឌី និង រុស្ស៊ី នឹងអាចបង្កើនការផលិតប្រេងក្នុងខែកក្កដា ថែម ១៧០,០០០ ធុង/ថ្ងៃ ធៀបនឹងខែមិថុនា ឡើងដល់ ១០,៨៣៣ ធុង/ថ្ងៃ។

June 3, 2022

ទិដ្ឋភាពក្នុងព្រឹត្តិការណ៍ព្យុហយាត្រា រំលឹកខួបនៃការគ្រងរាជរបស់មហាក្សត្រិយានីអង់គ្លេស

នៅក្នុងពិធីព្យុហយាត្រា រំលឹកខួបនៃការគ្រងរាជ ៧០ ឆ្នាំរបស់ មហាក្សត្រិយានីអង់គ្លេស កងទ័ពអង់គ្លេស បញ្ចេញទាហាន ១,៤០០ នាក់ និង សេះប្រយុទ្ធ ២០០ ក្បាល។

ព្យុហយាត្រានេះត្រូវបានធ្វើឡើងនៅខាងមុខរាជវាំង Buckingham នាថ្ងៃនេះ ជាផ្នែកមួយនៃព្រឹត្តិការណ៍រំលឹកខួបនៃការគ្រងរាជសម្បត្តិរបស់មហាក្សត្រី Elizabeth ទីពីរ របស់ ចក្រភពអង់គ្លេស។

មហាក្សត្រី Elizabeth ទីពីរ របស់ ចក្រភពអង់គ្លេស

June 2, 2022

អាល្លឺម៉ង់ សន្យាផ្តល់ ៣០ លានអឺរ៉ូ ដល់ កម្ពុជា សម្រាប់គម្រោងលើកកម្ពស់ប្រសិទ្ធភាពផ្គត់ផ្គង់ថាមពលអគ្គិសនីនៅជនបទ

កិច្ចព្រមព្រៀងហិរញ្ញប្បទាន សហប្រតិបតិ្តការ រវាង កម្ពុជា និង អាល្លឺម៉ង់ ត្រូវបានចុះហត្ថលេខារួចហើយ ដោយក្នុងនោះ អាល្លឺម៉ង់ សន្យាផ្តល់ឥណទាន សម្បទានជាថ្មី ចំនួន ៣០ លានអឺរ៉ូ ដល់ កម្ពុជា សម្រាប់គម្រោងលើកកម្ពស់ប្រសិទ្ធភាពក្នុងការផ្គត់ផ្គង់ថាមពលអគ្គិសនីនៅជនបទលើកទី២ ដែលនេះនឹងផ្ដោតសំខាន់ទៅលើ ខេត្តសៀមរាប។

ពិធីចុះហត្ថលេខាលើកិច្ចព្រមព្រៀងនេះ ត្រូវបានធ្វើឡើងនៅក្នុងជំនួប រវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចកម្ពុជា និងលោក Christian Berger ឯកអគ្គរដ្ឋទូតរបស់ អាល្លឺម៉ង់ ប្រចាំ កម្ពុជា នៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីចុងខែឧសភា ឆ្នាំ ២០២២។

កន្លងមក អាល្លឺម៉ង់ ក៏ធ្លាប់បានផ្តល់ឥណទានសម្បទាន ប្រមាណ ៣០ លានអឺរ៉ូ ដល់ កម្ពុជា លើកទី១ សម្រាប់គម្រោងខាងលើ កាលពីឆ្នាំ ២០១៩។ ក្នុងឆ្នាំ ២០២០ អាល្លឺម៉ង់ ក៏បានផ្តល់ ៣០ លានអឺរ៉ូ ទៀត ដល់ កម្ពុជា សម្រាប់កម្មវិធីអភិវឌ្ឍន៍ហេដ្ឋារចនាសម្ព័ន្ធជនបទ។

លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចកម្ពុជា និងលោក Christian Berger ឯកអគ្គរដ្ឋទូតរបស់ អាល្លឺម៉ង់ ប្រចាំ កម្ពុជា នៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីចុងខែឧសភា ឆ្នាំ ២០២២

គិតចាប់ពីឆ្នាំ ១៩៩២ ដល់ដំណាច់ឆ្នាំ ២០២១ អាល្លឺម៉ង់ បានផ្តល់ហិរញប្បទានសហប្រតិបត្តិការ ដល់ កម្ពុជា សរុបប្រហែល ៧២០ លានដុល្លារអាម៉េរិក ក្នុងនោះមាន ហិរញ្ញប្បទានឥតសំណង ប្រហែល ៦៥០ លានដុល្លារ និងឥណទានសម្បទាន ប្រហែល ៧០ លានដុល្លារអាម៉េរិក។

June 2, 2022

កូនជ្រូកដែលកើតពីការបន្តពូជដោយរ៉ូបូតស្វ័យប្រវត្តិទាំងស្រុង មានសុខភាពល្អ! អ្នកវិទ្យាសាស្ត្រថា ជារឿង «ជោគជ័យ»

ក្រុមអ្នកវិទ្យាសាស្ត្រចិន ថ្មីៗនេះ បានអភិវឌ្ឍយន្តការបន្តពូជជ្រូកតាមបែបសិប្បនិម្មិត និងស្វ័យប្រវត្តិទាំងស្រុងតាមរយៈការប្រើប្រាស់រ៉ូបូត ដែលនេះអាចជួយឱ្យប្រទេសដែលបរិភោគសាច់ជ្រូកច្រើនជាងគេក្នុងពិភពលោក កាត់បន្ថយការពឹងផ្អែកលើពូជជ្រូកនាំចូល។

យោងតាមសារព័ត៌មានចិន ក្រុមអ្នកស្រាវជ្រាវរបស់សាស្ត្រាចារ្យ Zhao Xin នៃសាកលវិទ្យាល័យ Nankai រួមនឹងវិទ្យាស្ថានបសុសត្វ និងបសុពេទ្យ នៃ សាកលវិទ្យាល័យវិទ្យាសាស្ត្រកសិកម្ម Tianjin បានអភិវឌ្ឍដោយជោគជ័យនូវយន្តការបន្តពូជជ្រូកបែបសិប្បនិម្មិត និងស្វ័យប្រវត្តិទាំងស្រុង ដោយការប្រើប្រាស់រ៉ូបូត និងបាន «បន្តពូជ» ដោយជោគជ័យទៅលើសត្វជ្រូក Landrace ចំនួន ៧ ក្បាល កាលពីថ្ងៃទី ៣១ មីនា ២០២២។

ជ្រូកមេធម្មតាមួយក្បាលបាន «ពពោះជំនួស» ក្នុងរយៈពេល ១១០ ថ្ងៃ ហើយបង្កើតបានកូនជ្រូក ៧ ក្បាល។ ទាំងនេះគឺជាកូនជ្រូកដែលត្រូវបានបន្តពូជដោយស្វ័យប្រវត្តិ និងដោយមិនត្រូវការឈ្មោលដំបូងគេក្នុងពិភពលោក។

លទ្ធផលនៃការស្រាវជ្រាវបង្ហាញថា ចំនួនកូនជ្រូកក្នុងមួយសម្បុកដែលជ្រូកមេ «ពពោះជំនួស» ដោយយន្តការស្វ័យប្រវត្តិបានបង្កើត បានកើនដល់ ៨ ក្បាល ស្មើនឹងជាង ៦០% ធៀបនឹងមធ្យមភាគមិនដល់ ៥ ក្បាលក្នុង ១ សម្បុកដែលបង្កើតដោយការបន្តពូជសិប្បនិម្មិតធម្មតា។

ជ្រូកបន្តពូជដោយរ៉ូបូតស្វ័យប្រវត្តិសម្បុកដំបូងរបស់ក្រុមអ្នកវិទ្យាសាស្ត្រខាងលើ បច្ចុប្បន្នត្រូវបានដាក់ឱ្យចិញ្ចឹមក្នុងកសិដ្ឋាន។ ៩ ក្នុងចំណោមកូនជ្រូក ១៣ ក្បាល ដែលបង្កើតដោយយន្តការបន្តពូជដោយរ៉ូបូតស្វ័យប្រវត្តិ មានសុខភាពល្អ និងត្រូវបានរក្សាទុកជាជ្រូកពូជ ដែលនេះបង្ហាញថា អត្រាជ្រើសរើសពូជដែលសម្រេចបានគឺកើនដល់ ៦៩% ខ្ពស់ជាងទ្វេដង ធៀបនឹងអត្រា ៣៥% នៃការរក្សាទុកជ្រូកពូជធម្មតា។

June 2, 2022

ទូរស័ព្ទឆ្លាតវៃរបស់ ក្រុមហ៊ុនចិន ផលិតនៅ ប្រទេសវៀតណាម

ម៉ូដែលមួយចំនួននៃទូរស័ព្ទឆ្លាតវៃរបស់ ក្រុមហ៊ុនចិន Xiaomi នឹងក្លាយជាផលិតផល «made in Vietnam» ដើម្បីផ្គត់ផ្គង់ទីផ្សារក្នុងស្រុក និងនាំចេញទៅកាន់ប្រទេសមួយចំនួនក្នុងតំបន់ អាស៊ីអាគ្នេយ៍។

ឡូទូរស័ព្ទ «made in Vietnam» ដំបូងត្រូវបានដឹកជញ្ជូនទៅដល់ឃ្លាំងរបស់អ្នកចែកចាយ Digiworld នេះបើតាមប្រកាសរបស់ក្រុមហ៊ុន Xiaomi កាលពីថ្ងៃទី ៣១ ឧសភា។ នេះគឺជាផលិតផលដែលត្រូវបានបង្កើតឡើងក្រោមកិច្ចសហការរវាង ក្រុមហ៊ុនចិន Xiaomi និង DBG Technology ដែលមានរោងចក្រនៅខេត្ត Thai Nguyen ភាគខាងជើងនៃ ប្រទេសវៀតណាម។

យោងតាម Xiaomi Vietnam ក្រុមហ៊ុន DBG Technology ដើរតួនាទីជាប្រតិបត្តិករ ដែលស្ថិតក្រោមការគ្រប់គ្រងរបស់ Xiaomi Vietnam។ រោងចក្រ DBG Technology ដំណើរការចាប់ពីខែមិថុនាឆ្នាំកន្លង ដោយទទួលខុសត្រូវក្នុងការផលិតស្មាតហ្វូន ដើម្បីផ្គត់ផ្គង់ក្នុងទីផ្សាររបស់ វៀតណាម និងនាំចេញទៅកាន់ទីផ្សារ អាស៊ីអាគ្នេយ៍ ដូចជា ម៉ាឡេស៊ី និង ថៃ ជាដើម។

តំណាងរបស់ Xiaomi ឱ្យដឹងថា រោងចក្រខាងលើផលិតតែម៉ូដែលមួយចំនួនរបស់ទូរស័ព្ទ Xiaomi តែប៉ុណ្ណោះ។

ក្រុមហ៊ុនវិភាគទីផ្សារបច្ចេកវិទ្យា Canalys បានឱ្យដឹងថា Xiaomi គឺជាស្មាតហ្វូនជាប់ចំណាត់ថ្នាក់លេខ ២ ស្ដីពីស្មាតហ្វូនដែលត្រូវបានផ្គត់ផ្គង់ច្រើនជាងគេនៅ វៀតណាម នៅក្នុងត្រីមាសទី ១ ឆ្នាំនេះ។

មុននោះ ទូរស័ព្ទ Xiaomi ភាគច្រើនត្រូវបានផលិតនៅក្នុង ប្រទេសចិន និង ឥណ្ឌា។ ខុសពី Samsung ដែលមានរោងចក្រផ្ទាល់ខ្លួន ក្រុមហ៊ុន Xiaomi តែងតែដំឡើងទូរស័ព្ទរបស់ខ្លួនតាមរយៈបណ្ដាក្រុមហ៊ុនជាដៃគូ ដូចជា Foxcom, DBG, BYD, Flex ជាដើម ដូចទៅនឹងវិធីដែលក្រុមហ៊ុន Apple កំពុងធ្វើនាបច្ចុប្បន្ន។

June 2, 2022

ប្រេងពិភពលោកឡើងថ្លៃក្នុងការជួញដូរថ្ងៃទី ០១ មិថុនា ២០២២

តម្លៃប្រេងពិភពលោកក្នុងថ្ងៃទី ០១ មិថុនា បានកើនឡើង បន្ទាប់ពីក្រុមមេដឹកនាំរបស់ សហភាពអឺរ៉ុប (EU) ឯកភាពលើការដាក់ទណ្ឌកម្មតាមដំណាក់កាលទៅលើប្រេងនាំចូលពី រុស្ស៊ី។

ក្រៅពីកត្តាខាងលើនេះ ការដែល ប្រទេសចិន បញ្ចប់ការបិទខ្ទប់ដោយសារ កូវីដ-១៩ នៅ សៀងហៃ ក៏អាចជំរុញឱ្យតម្រូវការប្រេងកើនឡើងផងដែរ។

ក្នុងថ្ងៃទី ០១ មិថុនា តម្លៃប្រេង Brent មានលំនឹងក្នុងរង្វង់ ១១៦.២៩ ដុល្លារ/ធុង កើន ៦៩ សេន (ប្រហែល ០.៦%)។ តម្លៃប្រេង WTI ក៏ឡើងថ្លៃ ៥៩ សេន (០.៥%) ឡើងដល់ ១១៥.២៦ ដុល្លារ/ធុង។

សហភាពអឺរ៉ុប កាលពីថ្ងៃចន្ទកន្លងទៅ បានឯកភាពគ្នាលើគោលការណ៍កាត់បន្ថយ ៩០% នៃបរិមាណប្រេងនាំចូលពី រុស្ស៊ី នៅចុងឆ្នាំនេះ។ នេះគឺជាទណ្ឌកម្មធ្ងន់ធ្ងរបំផុតរបស់ EU ក្រោយពី រុស្ស៊ី បានចូលឈ្លានពាន អ៊ុយក្រែន។

លោក Bill Farren-Price ប្រធានក្រុមហ៊ុនស្រាវជ្រាវទីផ្សារថាមពល Enverus (សហរដ្ឋអាម៉េរិក) ឱ្យដឹងថា ទណ្ឌកម្មថ្មីរបស់ EU នេះ អាចនឹងធ្វើឱ្យ រុស្ស៊ី ខាតបង់ប្រេងនាំចេញប្រហែល ៣ លានធុង/ថ្ងៃ ហើយ រុស្ស៊ី ក៏មិនងាយនឹងបង្វែរបរិមាណប្រេងទាំងនេះទៅកាន់ទីផ្សារដទៃ។

June 2, 2022

ទ្រព្យសកម្មរបស់កំពូលមហាសេដ្ឋី ៣ រូបរបស់ពិភពលោក ថយចុះ ជាង ១០០ ពាន់លានដុល្លារ ចាប់ពីដើមឆ្នាំ ២០២២

តម្លៃសុទ្ធនៃទ្រព្យសកម្ម (Net Worth) របស់ Elon Musk, Jeff Bezos និង Bill Gates បានថយចុះសរុប ១១៥ ពាន់លានដុល្លារអាម៉េរិក ក្នុងខែឧសភាកន្លងទៅ ព្រោះតែភាគហ៊ុនរបស់បណ្ដាក្រុមហ៊ុនបច្ចេកវិទ្យាបានធ្លាក់ថ្លៃខ្លាំង។

យោងតាមសន្ទស្សន៍របស់ Bloomberg (Bloomberg Billionaires Index) ទ្រព្យសម្បត្តិរបស់មហាសេដ្ឋី Bill Gates ប្រធានក្រុមហ៊ុន Microsoft បានថយចុះអស់ ១៥.១ ពាន់លានដុល្លារ។ ទ្រព្យរបស់លោក Jeff Bezos ស្ថាបនិករបស់ក្រុមហ៊ុន Amazon បាត់បង់អស់ ៥៣.២ ពាន់លានដុល្លារ។ ចំណែកទ្រព្យសម្បត្តិរបស់មហាសេដ្ឋី Elon Musk ដែលជាសហស្ថាបនិករបស់ Tesla វិញ ក៏បានបាត់បង់អស់ ៤៦.៤ ពាន់លានដុល្លារ។

គិតត្រឹមថ្ងៃទី ២៧ ឧសភា លោក Elon Musk នៅតែជាមហាសេដ្ឋីលំដាប់លេខ ១ ក្នុងពិភពលោក ដោយមានទ្រព្យ ២២៤ ពាន់លានដុល្លារ។ បន្ទាប់មកគឺ Jeff Bezos ដោយមានទ្រព្យ ១៣៩ ពាន់លានដុល្លារ និង Bill Gates មានទ្រព្យ ១២៣ ពាន់លានដុល្លារ។

ទ្រព្យភាគច្រើនរបស់ Elon Musk និង Jeff Bezos ស្ថិតក្នុងទម្រង់ភាគហ៊ុនរបស់ Tesla និង Amazon។បច្ចុប្បន្ន Musk កាន់កាប់ភាគហ៊ុន ១៥.៦% ស្មើនឹង ១២២ ពាន់លានដុល្លារ នៅក្នុងក្រុមហ៊ុន Tesla។ គិតចាប់ពីដើមឆ្នាំមកនេះ ភាគហ៊ុនរបស់ Tesla បានថយចុះអស់ជិត ៣៧% ក្នុងនោះ ការសម្រេចចិត្តទិញ Twitter របស់លោក Musk ត្រូវបានគេចាត់ទុកថាជាមូលហេតុសំខាន់ដែលនាំឱ្យភាគហ៊ុនិកជាច្រើននាំគ្នាលក់ចោលភាគហ៊ុននេះ។

រីឯ Jeff Bezos ដែលជាអ្នកមានជាងគេលំដាប់ទីពីរវិញ ក៏ជួបបញ្ហាស្រដៀងលោក Musk ដោយភាគហ៊ុន ៥០ លានហ៊ុន (តម្លៃប្រហែល ១១៥ ពាន់លានដុល្លារ) របស់លោកនៅក្នុងក្រុមហ៊ុន Amazon បានធ្លាក់ថ្លៃ ព្រោះតែភាគហ៊ុនថយចុះជិត ១/៣ រាប់ចាប់ពីដើមឆ្នាំនេះ។

លោក Bill Gates មានតារាងមុខជំនួញសម្បូរបែប ដូច្នេះគាត់ក៏បានរួចខ្លួនខ្លះពីការដែលភាគហ៊ុនត្រូវគេលក់ចោលច្រើន។ មូលនិធិមនុស្សធម៌ Bill និង Melinda Gates បានចំណាយប្រាក់យ៉ាងច្រើនក្នុងការវិនិយោគទៅលើក្រុមហ៊ុន Berkshire Hathaway របស់មហាសេដ្ឋី Warren Buffett។ ខ្ទង់វិនិយោគនេះបានកើនជាង ៥% ក្នុងឆ្នាំនេះ។ ប៉ុន្តែ ខ្ទង់វិនិយោគរបស់លោក Gates ទៅលើ Cascade Investment បានជួបនឹងបញ្ហាធ្លាក់ថ្លៃជាបន្តបន្ទាប់។

ដោយសារតែសម្ពាធពីបញ្ហាអតិផរណា និងជំនឿរបស់អ្នកប្រើប្រាស់ថយចុះ តម្លៃភាគហ៊ុនក្នុងវិស័យបច្ចេកវិទ្យាបានឆ្លងកាត់ការប្រែប្រួលច្រើនក្នុងមួយរយៈចុងក្រោយនេះ៕

June 1, 2022

រុស្ស៊ី កំពុងពិចារណាលើការប្រើប្រាស់រូបិយវត្ថុឌីជីថលគ្រីបតូ ក្នុងការទូទាត់អន្តរជាតិ

ថ្ងៃទី ៣១ ឧសភា អគ្គនាយករងទីមួយនៃធនាគារជាតិរុស្ស៊ី លោកស្រី Ksenia Yudaeva បានឱ្យដឹងថា ធនាគារនេះអាចអនុញ្ញាតឱ្យប្រើប្រាស់ប្រាក់ឌីជីថលគ្រីបតូ (Cryptocurrency) នៅក្នុងការជួញដូរអន្តរជាតិ បើទោះការជួញដូរដោយប្រាក់ឌីជីថលនេះនៅ រុស្ស៊ី មានហានិភ័យខ្ពស់។

ព័ត៌មានពី មូស្គូ ឱ្យដឹងថា លោកស្រី Yudaeva ថ្លែងថា ធនាគារជាតិរុស្ស៊ី មិនជំទាស់នឹងការប្រើប្រាស់ប្រាក់ឌីជីថលគ្រីបតូនៅក្នុងការជួញដូរអន្តរជាតិ និងក្នុងហេដ្ឋារចនាសម្ព័ន្ធហិរញ្ញវត្ថុអន្តរជាតិ។ ប៉ុន្តែ លោកស្រីអះអាងថា ការប្រើប្រាស់រូបិយវត្ថុឌីជីថលប្រភេទគ្រីបតូ នៅក្នុងប្រទេស ពិសេសគឺនៅក្នុងប្រព័ន្ធហិរញ្ញវត្ថុរបស់ រុស្ស៊ី គឺអាចបង្កហានិភ័យ។

កាលពីខែមេសា ក្រសួងហិរញ្ញវត្ថុរុស្ស៊ី ក៏បានលើកឡើងនូវសេចក្ដីព្រាងនៃការកំណត់ស្ដីពីទីផ្សារប្រាក់ឌីជីថលគ្រីបតូ ដោយស្នើឱ្យមានការអនុញ្ញាតឱ្យបុគ្គល និង នីតិបុគ្គល ជួញដូរដោយប្រាក់ឌីជីថលគ្រីបតូ។ ប៉ុន្តែ ត្រូវគោរពតាមគោលការណ៍ប្រឆាំងនឹងការលាងលុយ និងការគាំទ្រដល់ភេរវកម្ម។ ក្រសួងហិរញ្ញវត្ថុរុស្ស៊ី ក៏មិនបានហាមឃាត់ការប្រើប្រាស់រូបិយវត្ថុប្រភេទនេះ ចំពោះអ្នកដែលមិនមានទីលំនៅក្នុង ប្រទេសរុស្ស៊ី នោះដែរ។

កាលពីខែមករា ២០២១ ច្បាប់ស្ដីពីទ្រព្យឌីជីថល និងប្រាក់ឌីជីថលគ្រីបតូនៅ រុស្ស៊ី បានចូលជាធរមាន អនុញ្ញាតឱ្យប្រជាជនវិនិយោគ និងរក្សាទុក។ បទបញ្ជាដែលបានហាមប្រាមកន្លងមក ត្រូវបានទុកជាមោឃ។

យោងតាមក្រុមហ៊ុនផ្គត់ផ្គង់សេវាកម្មទូទាត់ដោយប្រាក់ឌីជីថលគ្រីបតូ TripleA របស់ សិង្ហបុរី បច្ចុប្បន្នមានប្រជាជនជាង ១៧ លាននាក់នៅ រុស្ស៊ី កំពុងកាន់កាប់ប្រាក់ឌីជីថលគ្រីបតូ និង ៦០% ក្នុងចំណោមពួកគេគឺមានអាយុពី ២៥ ដល់ ៤៤ ឆ្នាំ។ ទិន្នន័យរបស់ សាកលវិទ្យាល័យ Cambridge (អង់គ្លេស) ឱ្យដឹងថា ឆ្នាំ ២០២១ រុស្ស៊ី ជាប់ចំណាត់ថ្នាក់ទីបីលើពិភពលោកស្ដីពីការរកប្រាក់ឌីជីថលគ្រីបតូ បន្ទាប់ពី សហរដ្ឋអាម៉េរិក និង កាហ្សាក់ស្ថាន៕

June 1, 2022

រោងចក្រអគ្គិសនីកូនកាត់ ប្រើប្រាស់ថាមពល «ជំនោរ-លំនាចទឹកសមុទ្រ និងព្រះអាទិត្យ» ទំហំ ១៣៣ ហិកតា ត្រូវបានដាក់ឱ្យដំណើរការ

រោងចក្រអគ្គិសនីប្រើប្រាស់កម្លាំងនៃជំនោរ និងលំនាចរបស់ទឹកសមុទ្រ បូករួមនឹងកម្ដៅព្រះអាទិត្យ របស់ ប្រទេសចិន ដែលត្រូវបានដាក់ឱ្យដំណើរការជាផ្លូវការកាលពីថ្ងៃទី ៣០ ឧសភា។

ផ្ទាំងសូឡាគ្របដណ្ដប់លើផ្ទៃទឹកទំហំ ១៣៣ ហិកតា ត្រូវបានរចនាឡើងដើម្បីបំពេញបន្ថែមទៅលើការផលិតអគ្គិសនីដែលដើរដោយកម្លាំងជំនោរ និងកម្លាំងលំនាចនៃទឹកសមុទ្រ។ នេះគឺជាគម្រោងរោងចក្រផលិតអគ្គិសនីបែបចម្រុះដោយប្រើកម្លាំងទឹកជោរនាច និងថាមពលព្រះអាទិត្យដំបូងបង្អស់របស់ ប្រទេសចិន។

គម្រោងនេះជួយឱ្យប្រភពផ្គត់ផ្គង់អគ្គិសនីដំណើរការបានដោយរលូត ព្រោះអាចដោះស្រាយបញ្ហារអាក់រអួលនៅពេលគ្មានពន្លឺព្រះអាទិត្យ។ ផលិតភាពរបស់រោងចក្រចម្រុះនេះនឹងបង្កើតបានអគ្គិសនីលើសពី ១០០ លានគីឡូវ៉ាត់ម៉ោង នៅក្នុង ១ ឆ្នាំ ដែលអាចផ្គត់ផ្គង់តម្រូវការប្រចាំឆ្នាំរបស់គ្រួសារនៅទីក្រុងប្រហែល ៣០,០០០ គ្រួ។

គ្រោងដែលមានទីតាំងនៅក្នុងតំបន់ Wugen នៃទីក្រុង Wenling របស់ខេត្ត Zhejiang ភាគខាងកើតនៃ ប្រទេសចិន នេះ ត្រូវបានគេរំពឹងថា នឹងជួយកាត់បន្ថយការប្រើប្រាស់ធ្យូងថ្មក្នុងវិស័យផលិតអគ្គិសនីបានប្រមាណជាង ៣១,០០០ តោន/ឆ្នាំ។

June 1, 2022

AirAsia ចូលរួមរកស៊ីក្នុងទីផ្សារផ្ដល់សេវាកម្មហៅយានជំនិះតាមកម្មវិធីទូរស័ព្ទ នៅ ប្រទេសថៃ

ក្រុមហ៊ុនអាកាសចរណ៍តម្លៃទាប AirAsia បញ្ចេញសេវាកម្មហៅយានជំនិះតាមប្រព័ន្ធអ៊ីនធើណិតនៅ បាងកក ប្រទេសថៃ ដើម្បីឆ្លើយតបនឹងតម្រូវការធ្វើដំណើរនៅពេលវិស័យទេសចរណ៍ងើបឡើងវិញ។

សេវាកម្ម AirAsia Ride ចាប់ដំណើរការពីថ្ងៃទី ៣១ ឧសភា នៅ ទីក្រុងបាងកក ដោយមានអ្នកបើកបរចំនួន ៣,០០០ នាក់។ ក្រុមហ៊ុននេះក៏មានគម្រោងទាក់ទាញអ្នកបើកបរបន្ថែមទៀតផងដែរ។ ក្រៅពី បាងកក AirAsia ក៏ដាក់គោលដៅអភិវឌ្ឍសេវាកម្មនេះ នៅ ភូកេត និង ឈៀងម៉ៃ ដើម្បីបម្រើដល់ភ្ញៀវបរទេស។

ក្រុមហ៊ុនអាកាសចរណ៍តម្លៃទាបនេះក៏សង្ឃឹមទៅលើការងើបឡើងវិញនៃវិស័យទេសចរណ៍នៅក្នុងរដូវក្ដៅ ដែលអនុញ្ញាតឱ្យពួកគេផ្ដល់សេវាកម្មចាប់ពីការហៅយានជំនិះ រហូតដល់ការកក់សំបុត្រយន្តហោះ។ ក៏ប៉ុន្តែ AirAsia ក៏នឹងត្រូវប្រកួតប្រជែងជាមួយនឹងបណ្ដាគូប្រជែងនៅ ប្រទេសថៃ មានដូចជា Grab និង Bolt Technology ជាដើម។

AirAsia បានផ្ដល់សេវាកម្មហៅយានជំនិះនៅ គូឡាឡាំពួ ប្រទេសម៉ាឡេស៊ី ចាប់តាំងពីខែសីហា ឆ្នាំ ២០២។ យោងតាម Statista តម្លៃទីផ្សារនៃវិស័យហៅយានជំនិះ និងបញ្ជាទិញ-ប្រគល់អាហារតាមកម្មវិធីបច្ចេកវិទ្យានៅ អាស៊ីអាគ្នេយ៍ អាចនឹងកើនឡើងខ្ពស់ជាងមុន ៣ ដង ឡើងដល់ ៤២ ពាន់លានដុល្លារអាម៉េរិក ក្នុងឆ្នាំ ២០២៥។ កាលពីឆ្នាំ ២០២១ ទីផ្សារនេះមានតម្លៃប្រហែល ១៣ ពាន់លានដុល្លារអាម៉េរិក។

AirAsia (Capital A Berhad) ដែលជាក្រុមហ៊ុនបុត្រសម្ព័ន្ធរបស់ Tune Group គឺជាក្រុមហ៊ុនអាកាសចរណ៍តម្លៃទាប ពហុជាតិរបស់ ម៉ាឡេស៊ី មានទីស្នាក់ការកណ្ដាលនៅក្បែរមជ្ឈមណ្ឌលនៃ ទីក្រុងគួឡាឡាំពួ ប្រទេសម៉ាឡេស៊ី។

June 1, 2022

Category: សង្គម និងសេដ្ឋកិច្ច