Category: សង្គម និងសេដ្ឋកិច្ច

គម្រោង​សាងសង់​ចំណត​កំពង់ផែ​កុងតឺន័រ​ថ្មី​ទាំង ៣ ជំហាន នឹងធ្វើ​ឱ្យ​វិស័យ​ដឹកជញ្ជូន​តាមផ្លូវ​សមុទ្រ​របស់ កម្ពុជា កាន់តែ​រីកចម្រើន នៅពេល​ត្រូវបាន​ដាក់ឱ្យ​ដំណើរការ​ពេញលេញ​នៅ​ឆ្នាំ ២០៣០។

លោក ថៃ ឬ​ទ្ធី អគ្គនាយករង ទទួលបន្ទុក​អាជីវកម្ម នៃ កំពង់ផែ​ស្វយ័ត​ក្រុងព្រះសីហនុ មានប្រសាសន៍ថា កំពង់ផែ​កុងតឺន័រ​ថ្មី​ជំហាន​ទី ១ នឹង​ចាប់ផ្ដើម​សាងសង់​នៅ​ចុងឆ្នាំ ២០២២ ហើយ​គ្រោង​នឹង​បញ្ចប់​ការសាងសង់​នៅ​ចុងឆ្នាំ ២០២៥។ គម្រោង​ដែល​ទទួលបាន​ប្រាក់កម្ចី​ជាង ២ ពាន់​លាន​ដុល្លារ ពី រាជរដ្ឋាភិបាល​ជប៉ុន នេះ​មាន​ប្រវែង ៣៥០ ម៉ែត្រ និង​ជម្រៅ​ទឹក ១៤.៥ ម៉ែត្រ អាចឱ្យ​កប៉ាល់​ដែលមាន​សមត្ថភាព​ផ្ទុក​កុងតឺន័រ ជាង ១,០០០ កុងតឺន័រ ចូល​ចត​បាន និង​ជួយ​ឱ្យ​តម្លៃ​ដឹកជញ្ជូន​ចុះ​ទាប​ជាង​មុន ២០០ ដុល្លារ/កុងតឺន័រ។

ជំហាន​ទី ២ នៃ​គម្រោង​សាងសង់​កំពង់ផែ​កុងតឺន័រ​ខាងលើនេះ មាន​ប្រវែង ៤០០ ម៉ែត្រ និង​ជម្រៅ​ទឹក ១៦.៥០ ម៉ែត្រ នេះ​បើតាម​លោក លោក ថៃ ឬ​ទ្ធី។ លោក​បន្ថែម សមត្ថភាព​របស់​កំពង់​ផែ​ជំហាន​ទី ២ ដែល​នឹងត្រូវ​បានចាប់ផ្ដើម​សាងសង់​នៅក្នុង​ឆ្នាំ ២០២៥ និង​ដាក់ឱ្យ​ដំណើរការ​ចាប់ពី​ឆ្នាំ ២០២៨ ខាងមុខនេះ អាច​អនុញ្ញាតឱ្យ​កប៉ាល់​ដែល​ផ្ទុក ១០,០០០ កុងតឺន័រ ចូល​ចត​បាន។

រីឯ​គម្រោង​កំពង់ផែ​កុងតឺន័រ​ថ្មី​ជំហាន​ទី ៣ នឹងមាន​ប្រវែង ៤៣០ ម៉ែត្រ និង​ជម្រៅ​ទឹក ១៧.៥០ ម៉ែត្រ ហើយ​អាច​ទទួល​ការចូល​ចត​របស់​បណ្ដា​កប៉ាល់ធំៗដែល​ផ្ទុក​កុងតឺន័រ​រហូតដល់ ១៥,០០០ កុងតឺន័រ។ គម្រោង​ជំហាន​ទី ៣ នេះ​នឹង​ត្រូវបាន​សាងសង់​ចាប់ពី​ឆ្នាំ ២០២៦ ហើយ​បញ្ចប់​ការសាងសង់ និង​ដាក់ឱ្យ​ដំណើរការ​នៅ​ឆ្នាំ ២០៣០។

តាម​ការអះអាង​របស់​លោក ថៃ ឬ​ទ្ធី នៅពេល​គម្រោង​ទាំងឡាយ​ខាងលើ​ត្រូវបាន​ដាក់ឱ្យ​ដំណើរការ​ពេញលេញ វា​នឹង​ជួយ​ឱ្យ​ការដឹកជញ្ជូន​ទំនិញ​តាម​កប៉ាល់​ខ្នាត​ធំ​ទៅ-មក កម្ពុជា បានល្អ​ប្រសើរ។ លោក​បញ្ជាក់ថា កំពង់ផែ​ជំហាន​ទី ៣ ខាងលើ នឹងមាន​សមត្ថភាព​ប្រហាក់ប្រហែល ឬ​លើសពី​កំពង់ផែ​មួយចំនួន​នៅក្នុង​តំបន់ ក្នុងនោះ វា​នឹងមាន​ជម្រៅ​ទឹក​ជ្រៅ​ជាង​កំពង់ផែ Cai Mep របស់ វៀតណាម ទៀតផង។

នៅ​ពេល​នេះ​ មាន​អគ្គិភ័យ​ដ៏រន្ធត់​មួយ​កំពុង​តែកើត​ឡើង​នៅ​ត្រង់​ផ្ដុំ​បឹង​ត្របែក​ សង្កាត់​ទួល​ទំពូង​ទី ១ ខណ្ឌ​ចំការ​មន រាជធានី​ភ្នំពេញ​។

អគ្គិភ័យ​ដែល​​ស្ថិត​នៅ​លើ​ដង​ផ្លូវ​ ៤៥០ នេះ ចាប់​ផ្ដើម​ឆាបឆេះ​ប្រហែល​ពី​ម៉ោង​ ៥ ល្ងាច​ ថ្ងៃទី ៩ មិថុនា ២០២២។ កងកម្លាំង​ពន្លត់​អគ្គិភ័យ និង​សមត្ថកិច្ច​កំពុង​ញាប់​ដៃ​ញាប់​ជើង​ចូលរួម​ពន្លត់​អគ្គិភ័យ​នេះ​។

មូលហេតុ​ដែល​បណ្ដាល​ឱ្យ​កើត​មាន​ហេតុការណ៍​អគ្គិភ័យ​នេះ​មិន​ទាន់​ត្រូវ​បានគេ​ដឹង​នៅ​ឡើយ​។

(ប្រទេស​ចិន)-ក្រុម​បុរាណវត្ថុវិទូ​បាន​រកឃើញថា រូបចម្លាក់​ព្រះពុទ្ធ​ដ៏​ធំ​នៅក្នុង​រូងភ្នំ Longmen Grottoes នៅ ខេត្ត Henan ទំនងជា​ធ្លាប់​ត្រូវបាន​ស្រោបមាស ប្រាក់ និង​ដាំ​កញ្ចក់​ពណ៌។

ក្រុម​ស្រាវជ្រាវ​ខាងលើ​ប្រមូលបាន​ភស្ដុតាង​ថ្មី​ជាច្រើន​នៅក្នុង​គម្រោង​អភិរក្ស​ល្អាង​ថ្ម Longmen។ ដោយ​ប្រើប្រាស់​បច្ចេកវិទ្យា​ទំនើប ពួកគេ​បាន​រកឃើញ​ដាន​មាស និង​ប្រាក់​នៅលើ​ព្រះ​ភក្ត្រ​របស់​ព្រះ​ពុទ្ធរូប Lu She Na Buddha ដែល​ត្រូវបាន​កសាង​កាលពី​សម័យ​រាជវង្ស​តាង (Tang dynasty) ចន្លោះ​ពី​ឆ្នាំ ៦១៨ ដល់ ៩០៧។ «ប្រការនេះ​បង្ហាញថា បច្ចេកទេស​ស្រោប​លោហធាតុ​អាច​ត្រូវបាន​ប្រើប្រាស់​ក្នុងការ​សាងសង់​រូបចម្លាក់​ព្រះពុទ្ធ​ខាងលើ» Shi Jiazhen ប្រធាន​វិទ្យាស្ថាន​ស្រាវជ្រាវ​ចិន ឱ្យដឹង​ដូច្នេះ។

នៅលើ​ផ្ទៃ​ព្រះ​ភក្ត្រ​របស់​រូបចម្លាក់ ក្រុម​ស្រាវជ្រាវ​បាន​រកឃើញ​ស្នាម​ថ្នាំលាប​ដែលមាន​ពណ៌​បៃតង ក្រហម ខ្មៅ និង​ពណ៌ផ្សេងៗជាច្រើន​ទៀត ដែល​នេះ​អាចឱ្យ​យើង​ជឿ​បាន​ថា រូបចម្លាក់​នេះ ទំនងជា «គ្រងចីវរ​យ៉ាង​ស្រស់​ឆើត» នៅ​សម័យ​នោះ។

ក្រៅពី​ការរកឃើញ​ខាងលើ ក្រុម​អ្នកស្រាវជ្រាវ​ក៏បាន​រកឃើញ​គ្រាប់​ព្រះ​នេត្រ​ដែល​ធ្វើ​អំពី​កញ្ចក់​ពណ៌ និង​សំណ នៅលើ​រូបចម្លាក់​ព្រះ​ពោធិសត្វ​ដែល​នៅ​ខាងស្ដាំ​នៃ​រូបចម្លាក់​ព្រះពុទ្ធ Lu She Na Buddha ផងដែរ។ គ្រាប់​ព្រះ​នេត្រ​នេះ​មាន​រាង​ជា​ដង​ធ្នូ និង​ប្រវែង​ប្រហែល ០.៥ ស.ម។

កំណែ​គំរូ​តាក់ស៊ី​ហោះ​ដែលមាន​ទំហំ​ស្មើនឹង ១/២ នៃ​កំណែ​ពិត​របស់​ក្រុមហ៊ុន Pantuo Aviation សម្រេចបាន​នូវ​ការសាកល្បង​ស្ដីពី​រចនា​រូបរាង និង​ប្រព័ន្ធ​ហោះហើរ។

ក្រុមហ៊ុន Pantuo Aviation បាន​បង្ហើប​ឱ្យដឹង​អំពី​រចនា​រូបរាង​របស់​តាក់ស៊ី​ហោះ Pantala Concept H កាលពី​ឆ្នាំ​កន្លង។ ពេលនេះ បន្ទាប់ពី​ការប្រឹងប្រែង​អភិវឌ្ឍ​អស់​រយៈពេល​មួយឆ្នាំ Pantuo Aviation ក៏បាន​បញ្ចេញ​វីដេអូ​ដំបូង​ស្ដីពី T១ ដែលជា​កំណែ​គំរូ​ដែលមាន​ទំហំ​ស្មើនឹង​ពាក់កណ្ដាល​នៃ​ទំហំ​របស់ Pantala Concept H នេះ​បើតាម New Atlas ចេញផ្សាយ​កាលពី​ថ្ងៃទី ៧ មិថុនា។

តាម​គម្រោង Pantala Concept H នឹងមាន​ល្បឿន ៣០០ គីឡូ​ម៉េ​ត្រ/ម៉ោង និង​ហោះ​បាន​រយៈ​ចម្ងាយ ២៥០ គីឡូម៉ែត្រ។ តាក់ស៊ី​ហោះ​នេះ​ប្រើប្រាស់​អគ្គិសនី​ទាំងស្រុង ដោយ​បំពាក់​ថ្ម lithium-ion និង​ប្រព័ន្ធ​កង្ហារ​ចំនួន ២២ គ្រឿង។ កង្ហារ​ទាំងអស់​របស់ Pantala Concept H នឹង​ផ្ដេកខ្លួន​នៅពេល​ងាក​ពី​ការហោះ​ឡើង​ត្រង់​ទៅរក​ការហោះ​ឆ្ពោះទៅមុខ។

យោងតាម Pantuo Aviation ការប្រឹងប្រែង​របស់​ពួកគេ​ក្នុង​ឆ្នាំ​កន្លង​បាន​នាំមក​នូវ​មូលដ្ឋាន​រឹងមាំ​សម្រាប់​ការអភិវឌ្ឍ Pantala Concept H កំណែ​ពេញលេញ។ ក្រុមហ៊ុន​នេះ​ដាក់​គោលដៅ​យក​ឱ្យបាន​នូវ​វិញ្ញាបនបត្រ​ទទួលស្គាល់ ហើយ​ចាប់ផ្ដើម​ដំណើរការ​សេវាកម្ម​តាក់ស៊ី​ហោះ​របស់ខ្លួន​យ៉ាងយូរ​ត្រឹម​ឆ្នាំ ២០២៧។

ក្រៅពី Pantuo Aviation ក៏​នៅមាន​ក្រុមហ៊ុន​របស់ អាល្លឺម៉ង់ ចំនួន ២ គឺ Lilium និង Volocoter ដែល​សុទ្ធតែ​ប្រកាសថា​នឹង​ដំណើរការ​សេវា​តាក់ស៊ី​ហោះ​របស់ខ្លួន​នៅ​ឆ្នាំ ២០២៤។ ក្រុម​អ្នកជំនាញ​ព្យាករ​ថា ទីផ្សារ​តាក់ស៊ី​ហោះ​នឹងមាន​តម្លៃ​ឡើងដល់ ៦.៦៣ ពាន់​លាន​ដុល្លារ​នៅ​ឆ្នាំ ២០៣០។

ប្រទេស​ចិន មាន​គម្រោង​សាងសង់​រោងចក្រ​នៅលើ​មេឃ​នៅ​ឆ្នាំ ២០២៨ ដើម្បី​ផលិត​អគ្គិសនី​ពី​ថាមពលព្រះអាទិត្យ និង​បញ្ជូន​អគ្គិសនី​ពី​រយៈកម្ពស់ ៤០០ គីឡូម៉ែត្រ មកកាន់​ផែនដី។

យោងតាម​គម្រោង​ថ្មី​ដែល​ត្រូវបាន​ចុះផ្សាយ​នៅលើ​ទំព័រ​ទស្សនាវដ្ដី Chinese Space Science and Technology ផ្កាយរណប ១ គ្រឿង​នឹង​ត្រូវបាន​បាញ់​បង្ហោះ​ដើម្បី​សាកល្បង​បច្ចេកវិទ្យា​បញ្ជូន​អគ្គិសនី​ពី​ទី​អវកាស​មកកាន់​ផែនដី​ដោយ​មិនបាច់​មាន​ខ្សែ។ ក្រុម​អ្នកវិទ្យាសាស្ត្រ​ចិន ឱ្យដឹងថា ផ្កាយរណប​នេះ​នឹង​បំប្លែង​ថាមពលព្រះអាទិត្យ​ទៅជា​រលក​វិទ្យា​សកម្ម​អេ​ឡិច​ត្រូ​ម៉ាញេទិក មីក្រូ​វ៉េវ (Microwave) ឬ ឡាស៊ែរ រួច​បញ្ជូន​ថាមពល​នេះ​តម្រង់​មកកាន់​គោលដៅ​នានា រួមទាំង​ស្ថានីយ​នៅលើ​ដី និង​ផ្កា​រណប​ដែល​កំពុង​ហោះហើរ​នៅលើ​មេឃ។ រោងចក្រ​អគ្គិសនី​អវកាស​នេះ​អាច​ផលិត​អគ្គិសនី​បាន ១០ គីឡូវ៉ាត់ម៉ោង គ្រប់គ្រាន់​សម្រាប់​ផ្គត់ផ្គង់​តម្រូវការ​នៃ​គ្រួសារ​ជាច្រើន​គ្រួ។

ក៏ប៉ុន្តែ បច្ចេកវិទ្យា​ខាងលើ​អាច​ពង្រីក​ទំហំ​បាន ហើយ​អាច​ក្លាយជា​ដំណោះស្រាយ​ដ៏​មាន​ប្រសិទ្ធភាព រួមចំណែក​ក្នុងការ​ឆ្ពោះទៅរក​គោលដៅ «មិន​បំ​ភាយ​ឧស្ម័ន​កាបូន» នេះ​បើតាម​សាស្ត្រ​ចា​រ្យ Dong Shiwei មកពី​បន្ទប់ពិសោធន៍​វិទ្យាសាស្ត្រ និង​បច្ចេកវិទ្យា​មីក្រូ​វ៉េវ​អវកាស នៃ បណ្ឌិត្យសភា​វិទ្យាសាស្ត្រ និង​បច្ចេកវិទ្យា​ចិន នៅ ទីក្រុង​ស៊ី​អាន (Xi’an) នៃ ខេត្ត​សាង​ស៊ី (Shaanxi)។

Dong និង​សហការី​បានឱ្យដឹងថា គម្រោង​នេះ​ត្រូវបាន​ផ្ដួចផ្ដើម​ដំបូង​កាលពី​ឆ្នាំ ២០១៤ និង​ត្រូវបាន​កែ​ប្រែជា​បន្តបន្ទាប់​ដើម្បី​សម្រប​ទៅតាម​បច្ចេកវិទ្យា ក៏ដូចជា​ស្ថានការណ៍​ថ្មី​នៅក្នុង និង​ក្រៅប្រទេស។

ក្រុមការងារ​ខាងលើ​ក៏បាន​រៀបរាប់​អំពី​បញ្ហា​ដែល​ត្រូវ​ប្រឈម​នៅពេល​អនុវត្ត​គម្រោង​នេះ។ ការបញ្ជូន​រលក​ថាមពល​កម្រិត​ខ្ពស់​ពី​ចម្ងាយ​ឆ្ងាយ​គឺ​ទាមទារ​ឱ្យមាន​អង់​តែ​ន​ប្រវែង​រាប់រយ ឬ​រាប់ពាន់​ម៉ែត្រ។ រាល់​ការប្រែប្រួល​របស់​ខ្យល់​ព្រះអាទិត្យ ទំនាញ ឬ​ប្រព័ន្ធ​រុញច្រាន ក៏​អាចធ្វើឱ្យ​ប្រសិទ្ធភាព​នៃ​ការបញ្ជូន​អគ្គិសនី​ដោយ​មិន​ប្រើប្រាស់​ខ្សែ និង​កម្រិត​នៃ​ការបញ្ជូន​ចំ​គោលដៅ ត្រូវ​ថយចុះ​ទាប​ខ្លាំង។

ក្រៅពី​បញ្ហា​ធំ​ខាងលើ គម្រោង​បែបនេះ​ក៏​នឹងត្រូវ​ដោះស្រាយ​បញ្ហា​ជាច្រើន​ផ្សេងទៀត ដូចជា ការ​ធ្វើឱ្យ​​ម៉ាស៊ីនសំខាន់ៗចុះ​ត្រជាក់, ការដំឡើង​ហេដ្ឋារចនាសម្ព័ន្ធ​នៅ​ទី​អវកាស, ការបញ្ជូន​រលក​ថាមពល​កម្រិត​ខ្ពស់​ឆ្លងកាត់​ស្រទាប់​បរិយាកាស​គ្រប់​ស្ថានភាព​អាកាសធាតុ, ការទប់ស្កាត់​អាចម៍ផ្កាយ និង​សំរាម​អវកាស ឬ​ការវាយប្រហារ​ពី​គូប្រជែង​ជាដើម។

យោងតាម​គម្រោង​ថ្មី​នេះ រោងចក្រ​ផលិត​អគ្គិសនី​ព្រះអាទិត្យ​ខ្នាត​ធំ​ក្នុង​ទី​អវកាស​នឹង​ត្រូវបាន​សាងសង់​ជា ៤ ដំណាក់កាល។ ពីរ​ឆ្នាំ​បន្ទាប់ពី​ការបាញ់​បង្ហោះ​ដំបូង កម្មវិធី​នឹង​នាំយក​ផ្កាយរណប ១ គ្រឿង​ផ្សេងទៀត​ដែលមាន​កម្លាំង​ខ្លាំង​ជាង ឡើងទៅ​កាន់​គន្លង​គោចរ Geostationary orbit ដែល​ស្ថិតនៅលើ​ខ្សែ​អេក្វាទ័រ កម្ពស់ ៣៦,០០០ គីឡូម៉ែត្រ ពី​ដី ដើម្បី​ធ្វើការ​សាកល្បង​មុខងារ​ច្រើនជាង​មុន។ រោងចក្រ​អគ្គិសនី ១០ គីឡូវ៉ាត់​នេះ​នឹង​ផ្ដើម​បញ្ជូន​អគ្គិសនី​ដើម្បី​បម្រើ​ដល់​វិស័យ​យោធា និង​ស៊ីវិល ចាប់ពី​ឆ្នាំ ២០៣៥។ ដល់​ឆ្នាំ ២០៥០ ផលិតភាព​របស់​រោង​ចក្រ​នឹង​កើន​ដល់ ២ ជី​ហ្គា​វ៉ា​ត់ ប្រហាក់ប្រហែល​នឹង​រោងចក្រ​អគ្គិសនី​ដើរ​ដោយ​ថាមពល​នុយ​ក្លេ​អែរ​ខ្នាត​មធ្យម។

អ្នកវិទ្យាសាស្ត្រ​មួយរូប​នៅ ប៉េកាំង ដែល​សុំ​មិន​បញ្ចេញ​ឈ្មោះ ឱ្យដឹងថា រោងចក្រ​អគ្គិសនី​ព្រះអាទិត្យ​ក្នុង​ទី​អវកាស​អាច​ដំណើរការបាន​រលូន​ជាង​នៅលើ​ដី ដោយសារ​អាច​ផលិត​អគ្គិសនី ២៤/។ ក៏ប៉ុន្តែ មិនទាន់​ដឹង​ច្បាស់​ថា វា​បង្ក​ផលប៉ះពាល់​ដល់​សុខភាព​របស់​មនុស្ស​ដែល​នៅក្បែរ​ស្ថានីយ​ប្រមូល​រលក​ថាមពល​នេះដែរ ឬ​យ៉ាងណា​នៅឡើយ៕

ព្រៃ​បៃតង​ត្រូវបាន​ស្រោចស្រព​ទឹក​ដោយ​ប្រព័ន្ធ​បូម​ដែល​ប្រើប្រាស់​ថាមពល​អគ្គិសនី​បានមកពី​ព្រះអាទិត្យ ជួយ​បន្សាប​ឧស្ម័ន​កាបូន​ដែល​បញ្ចេញ​ពី​យានយន្ត​បើកបរ​លើ​ដងផ្លូវ​ផ្លូវ​ល្បឿន​លឿន​ឆ្លងកាត់​សមុទ្រ​ខ្សាច់ Taklimakan។

ផ្លូវ​ល្បឿន​លឿន​ដំបូង​ដែល​ឆ្លងកាត់​សមុទ្រ​ខ្សាច់​ធំ​បំផុត​របស់ ប្រទេស​ចិន Taklimakan សម្រេចបាន​គោលដៅ​បន្សាប​ឧស្ម័ន​កាបូន នេះ​បើតាម Globalink។

ផ្លូវ​ប្រវែង ៥២២ គីឡូម៉ែត្រ នៅ​តំបន់​ស្វយ័ត ស៊ីន​ជាំ​ង (Xinjiang) ត​ភ្ជាប់​ទីរួមស្រុក Lunnan នៅ​ភាគ​ខាងជើង ជាមួយនឹង Mingfeng នៅ​ភាគខាងត្បូង។ ហេដ្ឋារចនាសម្ព័ន្ធ​នេះ​ត្រូវបាន​ដាក់ឱ្យ​ប្រើប្រាស់​តាំងពី​ឆ្នាំ ១៩៩៥។

កាលពី​ថ្ងៃទី ៦ មិថុនា ២០២២ គម្រោង​បន្សាប​ឧស្ម័ន​កាបូន​មួយ​ត្រូវបាន​ចាប់ដំណើរការ​នៅលើ​ផ្លូវ​ល្បឿន​លឿន ដោយ​ការបំពាក់​ផ្ទាំង​សូ​ឡា​ដើម្បី​បង្កើត​អគ្គិសនី​សម្រាប់​ការបូមទឹក​ស្រោចស្រព​រុក្ខជាតិ​ដែល​ដាំ​អម​សងខាង​ផ្លូវ។

Chen Yabing ដែលជា​អ្នកគ្រប់គ្រង​គម្រោង​ខាងលើ​បានឱ្យដឹងថា «សម្រាប់​ព្រៃ​បៃតង​ដែល​ត្រូវបាន​ដាំ​អម​សងខាង​ផ្លូវ​ល្បឿន​លឿន​នេះ យើង​ប្រើប្រាស់​អគ្គិសនី​បានមកពី​ថាមពលព្រះអាទិត្យ ជំនួស​ឱ្យ​ប្រេងម៉ាស៊ូត នៅក្នុង​ការបូមទឹក​ស្រោចស្រព»។

«វិធី​នេះ​ជួយ​ឱ្យ​យើង​កាត់បន្ថយ​ការប្រើប្រាស់​ប្រេងម៉ាស៊ូត​បាន ១,០០០ តោន​ជា​រៀងរាល់ឆ្នាំ តាមរយៈ​នេះ​យើង​អាច​បន្ថយ​ឧស្ម័ន​កាបូន​បាន ៣,៤១០ តោន ក្នុង ១ ឆ្នាំ» លោក Yabing បន្ថែម​ដូច្នេះ និង​បន្តថា «រុក្ខជាតិ​បៃតង​ដែល​ដាំ​អម​សងខាង​ផ្លូវ ជួយ​ស្រូបយក​ឧស្ម័ន​កាបូន​បំ​ភាយ​ចេញពី​ម៉ាស៊ីន​យានយន្ត ក្នុងនោះ ព្រៃ ១ ហិកតា អាច​ស្រូបយក​ឧស្ម័ន​កាបូន​បាន ៦.៤ តោន ហើយ​ព្រៃ​ទាំងមូល​ដែល​ដាំ​សងខាង​ផ្លូវ​នេះ​អាច​ស្រូបយក​កាបូន​បាន ២០,០០០ តោន​ជា​រៀងរាល់ឆ្នាំ»។

អ្នកគ្រប់គ្រង​គម្រោង​អះអាងថា ប្រការ​ខាងលើនេះ​មានន័យថា គោលដៅ​បន្សាប​កាបូន​នៅ​ទូទាំង​ផ្លូវ​ល្បឿន​លឿន​ឆ្លងកាត់​សមុទ្រ​ខ្សាច់​ធំជាងគេ​នៅ ប្រទេស​ចិន បានសម្រេច​ជា​ស្ថាពរ។

ប្រការ​ដែល​ចម្លែក និង​អាថ៌កំបាំង​ជាទីបំផុត​នោះ​គឺថា នៅក្នុង​ដើមឈើ​ដ៏​ធំ​នេះ​មាន​ប្រហោង​តូច​មួយ​អាច​មើលឃើញ​រូបសំណាក​ព្រះពុទ្ធ​ដែល​ស្ថិតនៅ​ខាងក្នុង។

នៅ ប្រទេស​ចិន មាន​រុក្ខជាតិ​វ័យ​ចំណាស់​ដ៏​អាថ៌កំបាំង​មួយ​ដើម​ដែលមាន​ឈ្មោះ​ជា​ភាសា​អង់គ្លេស ថា camphor ឬ​ភាសា​ជប៉ុន ហៅថា kusunoki ដែល​ស្ថិតនៅក្នុង​ខេត្ត Fujian។ រូបសំណាក​ព្រះពុទ្ធ​មួយអង្គ​ដែលមាន​ទំហំ​ប៉ុន​បាតដៃ​មនុស្ស កំពុង​លាក់​ព្រះកាយ​នៅ​ខាងក្នុង​រុក្ខជាតិ​ដែលមាន​អាយុកាល​រាប់ពាន់​ឆ្នាំនេះ។ មកដល់​បច្ចុប្បន្ន ប្រវត្តិ​របស់​ដើម​រុក្ខជាតិ​ខាងលើ​នៅតែ​ជា​រឿង​អាថ៌កំបាំង។

ដើមឈើ​នេះ​ស្ថិតនៅ​ក្នុងភូមិ Kaoting, សង្កាត់ Jianyang, ក្រុង Nanping, ខេត្ត Fujian ប្រទេស​ចិន។ នៅទីនេះ​សម្បូរ​ដើម camphor ដែលមាន​អាយុកាល​រាប់រយ រាប់ពាន់​ឆ្នាំ។ សូម្បីតែ​នៅ​រដូវក្ដៅ អ្នក​ក៏​នៅតែ​ទទួលបាន​ភាព​ត្រជាក់​​ដោយ​សារ​តែ​​ម្លប់​​ដ៏​ត្រឈឹងត្រឈៃ​នៃ​រុក្ខជាតិ​ទាំងនេះ។

នៅក្បែរ​ច្រកចូល​ភូមិ Kaoting មាន​ដើម camphor មួយ​ដើម​យ៉ាង​ធំ ដែលមាន​មែក​សាខា​ផ្ដល់​ម្លប់​យ៉ាង​ត្រជាក់។ ដើមឈើ​នេះ​មាន​កម្ពស់ ៣៦ ម៉ែត្រ, អង្កត់ផ្ចិត​របស់​ដើម​នេះ​មាន​ប្រវែង ១០.៥ ម៉ែត្រ, មែក​របស់​វា​លាតសន្ធឹង ៩០០ ម៉ែត្រក្រឡា និង​មាន​អាយុកាល​ជាង ១,០០០ ឆ្នាំ។

ប្រការ​ដែល​អស្ចារ្យ​បំផុត​របស់​ដើម camphor នេះ​គឺថា វា​មាន​ប្រហោង​តូច​មួយ ខាងក្នុង​មាន​រូបសំណាក​ព្រះពុទ្ធ​កម្ពស់​ប្រហែល ៦០ ស.ម។ អ្នក​ដែលមាន​ស្មារតី​ខ្សោយ នៅពេល​បានឃើញ​ផ្ទៃ​ព្រះ​ភក្ត្រ​របស់​ព្រះ​ពុទ្ធរូប​ដែល​ស្ថិតនៅ​ខាងក្នុង​ដើមឈើ​នេះ ប្រាកដជា​ភ្ញាក់ផ្អើល «បះសក់» មិន​ខាន។

ដើមឈើ​ខាងលើនេះ បាន​ទាក់ទាញ​ពុទ្ធបរិស័ទ​ពី​គ្រប់ទិសទី​ក្នុង ប្រទេស​ចិន មក​គោរពបូជា សុំ​សេចក្ដីសុខ​ សេចក្ដី​ចម្រើន​។ ក៏ប៉ុន្តែ មានមតិ​មួយចំនួន​លើកឡើងថា នេះ​គ្រាន់តែ​ជាការ​រៀបចំ​របស់​អាជ្ញា​ធរ​ដែនដី ក្នុង​បំណង​ទាក់ទាញ​ភ្ញៀវ​ទេសចរណ៍ ដើម្បី​ជំរុញ​កំណើនសេដ្ឋកិច្ច​ប៉ុណ្ណោះ៕

មហាសេដ្ឋី​អាម៉េរិក ដើមកំណើត​អាហ្វ្រិក​ខាងត្បូង លោក Elon Musk កំពុង​បង្ហាញ​នូវ​ការខកចិត្ត​របស់ខ្លួន​ក្នុង​គម្រោង​ទិញដូរ​បណ្ដាញ​សង្គម Twitter នេះ​បើតាម​ទីភ្នាក់ងារសារព័ត៌មាន New York Times។

សារព័ត៌មាន​ខាងលើ​ឱ្យដឹងថា តំណាង​មេធាវី​របស់​មហាសេដ្ឋី​លេខ ១ ក្នុង​ពិភពលោក​ឱ្យដឹងថា បណ្ដាញ​សង្គម​នេះ​កំពុងតែ «ប្រឆាំង និង​ទប់ស្កាត់​យ៉ាងសកម្ម» ទៅនឹង​សិទ្ធិ​របស់លោក Musk ក្នុង​ដំណើរការ​នៃ​ការសម្រេច​លើ​កិច្ចព្រមព្រៀង​តម្លៃ ៤៤ ពាន់​លាន​ដុល្លារ​នេះ។ ទន្ទឹមនឹងនេះ ក្រុមហ៊ុន Twitter ក៏ «បដិសេធ​សំណើ​របស់លោក Musk ទាក់ទង​នឹង​ទិន្នន័យ» និង​មិនបាន​បង្ហើប​ឱ្យដឹង​លម្អិត​អំពី​តួលេខ​ពិត​នៃ​គណនី​ក្លែងក្លាយ​នៅលើ​បណ្ដាញ​សង្គម​នេះ។ យោងតាម​មេធាវី ប្រការ​ទាំងនេះ​គឺ​គ្រប់គ្រាន់​ដើម្បីឱ្យ​លោក Musk អាច​លុបចោល​គម្រោង​ទិញដូរ​នេះ​ជា​ឯកតោភាគី​បាន។

«លោក Musk មាន​សិទ្ធិ​ស្នើ ហើយ Twitter មាន​តួនាទី​ត្រូវ​ផ្ដល់​ទិន្នន័យ​តាម​សំណើ​នេះ» តំណាង​មេធាវី​របស់លោក Musk បញ្ជាក់​ដូច្នេះ។

ឯកសារ​ស្ដីពី​ព័ត៌មាន​ខាងលើ​ត្រូវបាន​បញ្ជូន​ឡើងទៅ​កាន់ គណៈកម្មការ​មូល​ប​ត្រ​អាម៉េរិក ដែល​នេះ​គឺជា​ការ​គំរាម​លុបចោល​គម្រោង​ទិញដូរ Twitter ជា​ទម្រង់​ឯកសារ​ដំបូង​របស់លោក Musk ជំនួស​ការ​បង្ហោះ​សា​រលើ​បណ្ដាញ​សង្គម​ដូចមុន។

ប្រតិកម្ម​ទៅនឹង​សកម្មភាព​ខាងលើ​របស់លោក Elon Musk តំណាង​របស់​ក្រុមហ៊ុន Twitter បានឱ្យដឹងថា គម្រោង​ទិញដូរ​បណ្ដាញ​សង្គម​នេះ​នៅតែ​ប្រព្រឹត្ត​ទៅតាម​ធម្មតា។

ចំណែក​ក្រុមអ្នកវិភាគ​វិញ អះអាងថា នេះ​គឺជា​ការប្រឹងប្រែង​មួយ​របស់លោក Musk ដើម្បី​បង្ខំ​ឱ្យ​តម្លៃ​ភាគហ៊ុន Twitter ចុះថោក។ ជាក់ស្ដែង ភាគហ៊ុន​នេះ​បាន​ថយចុះ ១.៥% និង​បញ្ចប់​ការជួញដូរ​ត្រឹម ៣៩.៥៦ ដុល្លារ/ហ៊ុន នៅក្នុង​ថ្ងៃ​ជួញដូរ​កន្លង ទាប​ជាង​ឆ្ងាយ​ធៀប​នឹង​ការកំណត់​តម្លៃ ៥៤.២០ ដុល្លារ/ហ៊ុន ដែល​លោក Musk បាន​ដាក់ចេញ​ដើម្បី​ទិញ Twitter។

កាលពី​ខែឧសភា លោក Musk ក៏​ធ្លាប់​បានប្រកាស​នៅលើ​បណ្ដាញ​សង្គម​ថា លោក​កំពុង​ផ្អាក​ការទិញ Twitter ព្រោះតែ​តួលេខ​នៃ​គណនី​ក្លែងក្លាយ​នៅលើ​បណ្ដាញ​សង្គម​នេះ​មាន​មិន​ដល់ ៥%។ លោក Musk យល់ថា ការពិត តួលេខ​នេះ​យ៉ាងហោចណាស់​ក៏ ២០% ដែរ។

យ៉ាងនេះ​ក្ដី យោងតាម CNBC បើសិនជា​លុបចោល​គម្រោង​ទិញ Twitter លោក Musk អាច​នឹងត្រូវ​ប្រឈម​នឹង​បញ្ហា​ច្រើន​ទាក់ទង​នឹង​ផ្លូវច្បាប់ ហើយ​លោក​ក៏​អាច​បាត់បង់​ប្រាប់​រាប់ពាន់​លាន​ដុល្លារ៕

រាជធានី​ភ្នំពេញ មាន​អគារខ្ពស់ៗ ចំនួន ១,៦០៣ អគារ ក្នុងនោះ អគារ​កម្ពស់​ចាប់ពី ២០ ជាន់​ឡើងទៅ មាន​ចំនួន ២២៥ អគារ​ហើយ គិត​ត្រឹម​ដើមឆ្នាំ ២០២២ នេះ​បើតាម លោក ឃួ​ង ស្រេង អភិបាល​រាជធានី​ភ្នំពេញ។

នៅក្នុង​ពិធី​បើកសម្ពោធ​ផ្សារ​ទំនើប ព្រី​នស៍ ថា​ម​ស​ឃែ្វ​រ នៅ​សង្កាត់​ទន្លេបាសាក់ ខណ្ឌចំការមន រាជធានី​ភ្នំពេញ កាលពី​ព្រឹក​ថ្ងៃទី ៧ មិថុនា ២០២២ លោក​អភិបាល​រាជធានី ឱ្យដឹងថា បច្ចុប្បន្ន សំណង់​បុរី និង​បណ្ដុំ​ផ្ទះល្វែង នៅ រាជធានី​ភ្នំពេញ មាន​ចំនួន ៣១០ កន្លែង ខណៈ​អគារខ្ពស់ៗមាន​ចំនួន ១,៦០៣ អគារ ក្នុងនោះ អគារ​កម្ពស់​ចាប់ពី ២០ ជាន់​ឡើងទៅ មាន​ចំនួន ២២៥ អគារ គិត​ត្រឹម​ដើមឆ្នាំ ២០២២ បើ​ទោះ​រង​ផលប៉ះពាល់​ពី​វិបត្តិ​ជំងឺ​កូ​វីដ-១៩។

លោក​បញ្ជាក់ថា រាជធានី ទទួលបាន​គម្រោង​សាងសង់ថ្មីៗពី​វិស័យ​ឯកជន​ឡើងដល់​ជាង ១,០០០ គម្រោង ដែល​សាងសង់​លើ​ផ្ទៃដី ៤.៦៣ លាន​ម៉ែត្រក្រឡា ជាមួយនឹង​ខ្ទង់​វិនិយោគ​សរុប​ប្រមាណ ២.២៦ ពាន់​លាន​ដុល្លារ​អាម៉េរិក។

លោក ឃួ​ង ស្រេង ថ្លែងថា សេដ្ឋកិច្ច​របស់ កម្ពុជា ត្រូវបាន​ព្យាករ​ថា នឹងមាន​កំណើន​កើនឡើង​បន្តទៀត​នាពេលខាងមុខ នៅពេលដែល​វិនិយោគិន​ទាំងឡាយ​មាន​ទំនុកចិត្ត​ទៅលើ​វិស័យ​អចលនទ្រព្យ ពិសេស​គឺ​អគារ​ពាណិជ្ជកម្ម និង​អគារ​ស្នាក់នៅ​លំដាប់​ប្រណិត។ល។

ប្រទេស​សេ​ណេ​ហ្គា​ល់ កាលពី​ថ្ងៃទី ៣១ ឧសភា បានចាប់ផ្ដើម​សាងសង់​រោងចក្រ​បន្សាប​ទឹកប្រៃ​ដំបូង​របស់ខ្លួន ដើម្បី​កាត់បន្ថយ​ស្ថានភាព​ខ្វះ​ទឹក​នៅ រដ្ឋធានី​ដា​កា។

ក្នុង​ពិធី​សម្ពោធ​បើក​ការដ្ឋាន​នៅ​ខណ្ឌ Mamelles ក្នុង រដ្ឋធានី​ដា​កា កាលពី​ថ្ងៃ​អង្គារ ប្រធានាធិបតី​សេ​ណេ​ហ្គា​ល់ Macky Sall សង្កត់ធ្ងន់ថា នេះ​គឺជា «គម្រោង​ដ៏​ស្មុគស្មាញ និង​មិន​ធ្លាប់មាន​ពីមុនមក» ដែល​នេះ​គឺជា​ចំណុច​ចាប់ផ្ដើម​ដ៏​សំខាន់​ក្នុង​គម្រោង​សាងសង់​ហេដ្ឋារចនាសម្ព័ន្ធ​ប្រកបដោយ​មហិច្ឆតា ដើម្បី​រុញច្រាន​ប្រទេស​នេះ​ឱ្យ​ក្លាយជា​សេដ្ឋកិច្ច​លេចធ្លោ​ថ្មី​នៅ​ឆ្នាំ ២០៣៥។

រោងចក្រ​ដែល​ស្ថិត​នៅក្បែរ​ឆ្នេរសមុទ្រ​នេះ​នឹង​អាច​បន្សាប​ទឹក​ដែល​យក​ពី​មហាសមុទ្រ​អា​ត្ល​ង់​ទិ​ក បាន ១០០,០០០ ម៉ែត្រគូប​ជា​រៀងរាល់ថ្ងៃ។ គម្រោង​នេះ​នឹងត្រូវ​ការកែលម្អ​ផ្លូវ​ជាង ៣០០ គីឡូម៉ែត្រ ដើម្បី​ដាក់​បំពង់​បង្ហូរទឹក។

នៅពេល​ដំណើរការ​ពេញលេញ គម្រោង​នេះ​អាច​ផ្គត់ផ្គង់​ទឹកស្អាត​ដល់ ១៦ ខណ្ឌ​របស់ រដ្ឋធានី​ដា​កា ដែល​បច្ចុប្បន្ន​មាន​ប្រជាជន​ជាង ១ លាន​នាក់។ ប្រការនេះ​មិន​ត្រឹមតែ​ជួយ​បង្កើន​ទិន្នផល​នៃ​ការផលិត​ទឹកស្អាត​នៅ ដា​កា ប៉ុណ្ណោះ​ទេ តែ​ក៏​ជួយ​ការពារ​ប្រភពទឹក​ក្រោម​ដី​ទុក​សម្រាប់​ក្មេងជំនាន់ក្រោយ​ផងដែរ។