នៅវេលាម៉ោងប្រហែល ៤ កន្លះល្ងាចនេះ មានករណីអគ្គិភ័យកំពុងឆាបឆេះផ្ទះចំណុចផ្លូវ ៣៦៩ សង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ។
ក្រោយពីទទួលបានដំណឹងនេះភ្លាម កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍បន្ទាន់។
នេះបើយោងតាមព័ត៌មានបឋមនៃ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។
«ក្នុងចំណោមសញ្ញាទាំងឡាយខាងក្រោម តើលោក អ្នកមានប៉ុន្មានប្រការ?»
១-មនុស្សម្នាក់ដែលមានរូបកាយទាក់ទាញ
សាស្ត្រាចារ្យផ្នែកសេដ្ឋកិច្ចមួយរូបនៅសាកលវិទ្យាល័យ Texas បានរកឃើញថា អ្នកដែលមានរូបរាងទាក់ទាញ ភាគច្រើនមានសមត្ថភាពរកប្រាក់បានច្រើនជាងពី ៣% ទៅ ៤% ធៀបនឹងមនុស្សដែលមានរូបរាងទាក់ទាញក្រោមកម្រិតមធ្យម។
២-មានឈាមជាអ្នករកស៊ីតាំងពីតូច
សេដ្ឋី និងមហាសេដ្ឋីដែលរកស៊ីមានបានពីបាតដៃទទេភាគច្រើននៅលើពិភពលោក សុទ្ធតែមានចំណុចរួមដ៏ពេញនិយមមួយនោះគឺ ចាប់ផ្ដើមរកប្រាក់តាំងតែពីតូច ក្នុងនោះមានទាំង Warren Buffett និង Mark Cuban ជាដើម។
៣-មានទំនាក់ទំនងទូលំទូលាយ
ការស្រាវជ្រាវមួយបង្ហាញថា បើសិនមានមិត្តភក្ដិច្រើននៅពេលរៀននៅសាលាមធ្យមសិក្សា មហាវិទ្យាល័យ និងនៅកន្លែងធ្វើការ ឬដៃគូសហការកន្លែងធ្វើការ បុគ្គលនោះនឹងរកបានប្រាក់ច្រើននាពេលអនាគត ដោយសារតែឱកាសដែលរកបានពីទំនាក់ទំនងខាងលើ។
៤-សេពគប់អ្នកដែលពូកែជាងខ្លួន
បើសិនចំណាយពេលច្រើនទៅលើមនុស្សដែលនាំមកនូវថាមពលអវិជ្ជមាន ឬមិនមានគោលដៅឆ្ពោះទៅមុខ នោះអ្នកនឹងមិនអាចរីកចម្រើន តែថែមទាំងដើរថយក្រោយទៀតផង។ ប៉ុន្តែ បើសេពគប់បុគ្គលដែលមានចំណេះដឹង និងមនុស្សដែលពូកែជាងខ្លួន នោះយើងនឹងជោគជ័យ ដោយសារតែបានរៀនសូត្រនូវបទពិសោធន៍ដ៏មានតម្លៃពីពួកគេ។
៥-ចេះផឹកស្រាបៀ ប៉ុន្តែមិនជក់បារី
យោងតាមការសិក្សាស្រាវជ្រាវមួយកាលពីឆ្នាំ ២០០៦ បុរសដែលចេះផឹកស្រាបៀ អាចរកប្រាក់បានច្រើនជាង ២១% ធៀបនឹងបុគ្គលដែលតមស្រា។ មូលហេតុគឺដោយសារថា វាអាចជួយបង្កើនទំនាក់ទំនងក្នុងសង្គម។ ការស្រាវជ្រាវមួយផ្សេងទៀតនិយាយថា អ្នកដែលមិនជក់បារី តែងតែមានទ្រព្យច្រើនជាង ៥០% ធៀបនឹងអ្នកដែលជក់បារីតិចតួច និងច្រើនជាងទ្វេដង ធៀបនឹងអ្នកញៀននឹងថ្នាំជក់។
៦-មិនធ្លាប់ ឬមិនទាន់មានការលែងលះ
ការសិក្សាស្រាវជ្រាវមួយបានឱ្យដឹងថា ការលែងលះអាចធ្វើឱ្យទ្រព្យសម្បត្តិរបស់មនុស្សម្នាក់ថយចុះប្រហែល ៧៧% ធៀបនឹងបុគ្គលដែលនៅលីវ។ ចំណែកការរៀបការវិញ អាចមានលទ្ធភាពបង្កើនទ្រព្យឡើងច្រើនទ្វេដង។
៧-តែងតែប្រឹងប្រែងដើម្បីរីកចម្រើន
សេដ្ឋី និងមហាសេដ្ឋីដែលរកស៊ីមានបានពីបាតដៃទទេជាច្រើនរូប បានឱ្យដឹងថា ពួកគាត់គឺជាប្រភេទមនុស្សដែលមិនចេះពេញចិត្តនឹងលទ្ធផលដែលខ្លួនធ្វើបាន។ ជំនួសឱ្យការត្រេកអរនៅពេលរកបាន ១ លានដុល្លារ ពួកគាត់បែរជារកវិធីដើម្បីរកឱ្យបានច្រើនជាងនេះ។
៨-កំណត់គោលដៅច្បាស់លាស់
ការរកប្រាក់បានរាប់លាន ឬរាប់ពាន់ដុល្លារ មិនមែនជារឿងចៃដន់ឡើយ។ អ្នកមានតែងតែចំណាយពេលច្រើនដើម្បីរិះគិតដើម្បីកំណត់គោលដៅយូរអង្វែង ជាក់លាក់របស់ពួកគេ សម្រាប់អនុវត្តតាម។
៩-មិនខ្លាចបរាជ័យ
បុគ្គលជោគជ័យគឺជាមនុស្សដែលធ្លាប់បានឆ្លងកាត់ការបដិសេធ ភាពបរាជ័យ និងភាពភ័យព្រួយ មុននឹងបានជោគជ័យ។ ដូច្នេះ ប្រការដែលពួកគេយកចិត្តទុកដាក់បំផុតគឺ ការដាក់ថាមពលទៅក្នុងបច្ចុប្បន្នកាល និងអនាគតកាល៕
លោក Elon Musk ពេលនេះទំនងជាមិនអាចក្រអឺតក្រទម ឬមើលស្រាលក្រុមហ៊ុនផលិតរថយន្តអគ្គិសនីចិនមួយនេះបានទៀតឡើយ។
ជាងមួយទសវត្សរ៍មុន មហាសេដ្ឋី Elon Musk ធ្លាប់សើចចំអកចំពោះគំនិតដែលនិយាយថា ក្រុមហ៊ុនផលិតរថយន្តអគ្គិសនី BYD របស់ ចិន គឺជាគូប្រជែងគួរឱ្យញញើតរបស់ Tesla។ ប៉ុន្តែ ការក្រអឺតក្រទមរបស់មហាសេដ្ឋីរូបនេះ បច្ចុប្បន្នហាក់បានថយចុះច្រើន។
ពេលនេះ BYD ដែលទទួលបានការគាំទ្រពី មហាសេដ្ឋីអាម៉េរិក លោក Warren Buffett កំពុងតែត្រៀមខ្លួនផ្ដួលគូប្រជែងរបស់ខ្លួននៅលើ ទឹកដីចិន នោះគឺ Tesla។ កាលពីសប្ដាហ៍កន្លង នាយកប្រតិបត្តិមួយរូបរបស់ BYD បាននិយាយថា ក្រុមហ៊ុនរបស់គាត់កំពុងតែ «ត្រៀមផ្គត់ផ្គង់ថ្មឱ្យ Tesla ក្នុងពេលឆាប់ៗខាងមុខ»។ កិច្ចព្រមព្រៀងនេះនឹងអាចនាំឱ្យ BYD ក្លាយជាក្រុមហ៊ុនមួយក្នុងចំណោមក្រុមហ៊ុនផលិតថ្ម និងរថយន្តអគ្គិសនីលេចធ្លោ និងធំជាងគេក្នុងពិភពលោក។
ពីរឆ្នាំកន្លងទៅ BYD បានផលិតរថយន្តអគ្គិសនី និងថ្ម lithium បច្ចេកវិទ្យាខ្ពស់ជាងមុន អនុញ្ញាតឱ្យពួកគេគ្រប់គ្រងទីផ្សារពិភពលោកបានមួយភាគធំ។ BYD មានគម្រោងលក់រថយន្តអគ្គិសនី ១.៥ លានគ្រឿងក្នុងឆ្នាំ ២០២២ ដែលនេះនឹងជួយឱ្យក្រុមហ៊ុនឆ្ពោះទៅជិតដល់គោលដៅកាន់កាប់ ១/៣ នៃចំណែកទីផ្សាររថយន្តអគ្គិសនីនៅ ប្រទេសចិន នៅចុងឆ្នាំនេះ។
កាលពីខែមេសាកន្លងទៅ BYD ជាប់ចំណាត់ថ្នាក់លេខមួយ ក្នុងចំណោមក្រុមហ៊ុនផលិតរថយន្តអគ្គិសនីលំដាប់កំពូលៗ បើគិតទៅតាមចំនួនរថយន្តដែលបានលក់ចេញ និងក្លាយជាក្រុមហ៊ុនផលិតរថយន្តធំជាងគេលំដាប់ទីបីក្នុងពិភពលោក បើគិតទៅតាមតម្លៃមូលធនទីផ្សារ។ ក្នុងខែមេសា BYD បានលក់រថយន្តអគ្គិសនីជាង ៤៦,០០០ គ្រឿង (Tesla លក់បាន ១,៧២៨ គ្រឿង) និងបានប្រកាសឈប់ផលិតរថយន្តប្រើប្រេងសាំង។ ខែឧសភា កំណើននៃការលក់រថយន្តអគ្គិសនីរបស់ក្រុមហ៊ុន BYD ក៏បានកើនឡើង ២៥០% ធៀបនឹងមួយឆ្នាំមុននោះ។
កិច្ចព្រមព្រៀងរវាង BYD និង Tesla នៅមិនទាន់មានភាពច្បាស់លាស់នៅឡើយ ប៉ុន្តែ ក្រុមហ៊ុនចិន មួយនេះអាចផ្គត់ផ្គង់ថ្ម Blade ដល់ Tesla។
BYD កំពុងតែធ្វើអ្វីៗដែល Tesla ចង់ធ្វើ ៖ ផលិតថ្ម និងធានាប្រភពផ្គត់ផ្គង់។ BYD ក៏សម្រេចបាននូវគោលដៅរបស់ខ្លួន នោះគឺ «ក្លាយជាក្រុមហ៊ុនផលិតរថយន្តអគ្គិសនីធំជាងគេមួយនៅក្នុងពិភពលោក។ ថ្វីបើរថយន្តរបស់ BYD មិនទាន់មានបច្ចេកវិទ្យាទំនើបខ្លាំង ឬរូបរាងមិនទាន់សម័យខ្លាំងដូច Tesla ប៉ុន្តែ ពួកវានៅតែទទួលបានការគាំទ្រច្រើន និងជាហូរហែ។ បច្ចុប្បន្ន ថ្មរបស់ BYD ក៏ត្រូវបានប្រើប្រាស់នៅលើរថយន្ត Tesla។
ទោះជាយ៉ាងណាក៏ដោយ BYD នឹងអាចដើរមិនទាន់គេ បើសិន CATL (Contemporary Amperex Technology Co. Limited) ដែលជាក្រុមហ៊ុនផលិតថ្មធំជាងគេក្នុងពិភពលោក និងបណ្ដាក្រុមហ៊ុននានានៅ កូរ៉េខាងត្បូង ប្រឹងប្រែងជំរុញការប្រើប្រាស់ថ្មដែលមានថាមពលខ្ពស់ជាង។
ក្រុមហ៊ុនចិន BYD បន្តពង្រីកមូលដ្ឋានអតិថិជនរបស់ខ្លួន ដោយផ្គត់ផ្គង់ថ្មដែលមានរូបរាងជាដំបង (ប្រភេទដែលដូចទៅនឹងថ្មដែល Tesla កំពុងប្រើប្រាស់) ឱ្យ BMW AG ដោយបំបាត់ថ្មដែលមានរូបរាងជ្រុង។
សូម្បីតែនៅពេល CATL មិនទទួលបានជោគជ័យ BYD ក៏នៅតែទទួលបានផលចំណេញពីយុទ្ធសាស្ត្រមួយដែលមានចក្ខុវិស័យវែងឆ្ងាយ និងត្រូវបានអនុវត្តប្រកបដោយប្រសិទ្ធភាព។ ប្រការនេះទំនងជាអាចជួយឱ្យ BYD យកឈ្នះលើ Telsa នៅថ្ងៃណាមួយមិនខាន៕
គម្រោង Hotan-Ruoqiang នៅ ស៊ីនជាំង បានចាប់ផ្ដើមដំណើរការ និងក្លាយជាផ្លូវដែកព័ទ្ធជុំវិញសមុទ្រខ្សាច់ដំបូងគេបង្អស់ក្នុងពិភពលោក។
ក្រុមហ៊ុនផ្លូវដែករដ្ឋចិន (CR) កាលពីថ្ងៃទី ១៥ មិថុនា បានប្រកាសត្រៀមដំណើរការផ្លូវដែកមួយខ្សែដែលមានប្រវែង ២,៧១២ គីឡូម៉ែត្រ ព័ទ្ធជុំវិញសមុទ្រខ្សាច់ Taklimakan បន្ទាប់ពីកំណត់ផ្លូវដែកចុងក្រោយដែលតភ្ជាប់ស្រុក Hotan នៅភាគខាងលិចតំបន់ ស៊ីនជាំង ជាមួយនឹងស្រុក Ruoqiang នៅភាគអាគ្នេយ៍ ត្រូវបានដាក់ឱ្យដំណើរការជាផ្លូវការកាលពីថ្ងៃព្រហស្បតិ៍កន្លងទៅ។
កំណាត់ផ្លូវដែក Hotan-Ruoqiang ប្រវែង ៨២៥ គីឡូម៉េត្រ ក្នុងនោះមាន ៥២៤ គីឡូម៉ែត្រ រត់ឆ្លងកាត់តំបន់ខ្សាច់។ ផ្លូវដែកនេះអាចឱ្យរថភ្លើងធ្វើដំណើរក្នុងល្បឿន ១២០ គីឡូម៉ែត្រ/ម៉ោង និងឆ្លងកាត់ស្ថានីយរថភ្លើងចំនួន ២២ កន្លែង។
ដោយស្ថិតនៅភាគខាងត្បូងនៃសមុទ្រខ្សាច់ផ្លាស់ទីធំជាងគេទីពីរក្នុងពិភពលោក ផ្លូវដែក Hotan-Ruoqiang ត្រូវប្រឈមនឹងឧបសគ្គច្រើនក្នុងដំណាក់កាលសាងសង់ ក៏ដូចជាដំណើរការ។
ដើម្បីសុវត្ថិភាពសម្រាប់ការធ្វើដំណើរនៅតំបន់ដែលកើតមានព្យុះខ្សាច់ជាញឹកញាប់ ក្រុមហ៊ុនខាងលើបានសាងសង់ស្ពានគោកជិត ២២០ ស្ពាននៅទូទាំងផ្លូវដែក។ សំណាញ់ស្មៅប្រមាណ ៥០ លានម៉ែត្រគូប និង រុក្ខជាតិចំនួន ១៣ លានដើមក៏ត្រូវបានដាំនៅតាមបណ្ដោយផ្លូវដែកនេះ ដើម្បីទប់ទល់នឹងខ្សាច់។
ផ្លូវដែក Hotan-Ruoqiang ដែលបានចាប់ផ្ដើមលក់សំបុត្រកាលពីថ្ងៃទី ១៦ មិថុនា នឹងមានជើងរថភ្លើងដឹកអ្នកដំណើរចំនួន ២ ជើង និងដឹកទំនិញ ៨ ជើងជារៀងរាល់ថ្ងៃ។
ផ្លូវដែក Hotan-Ruoqiang ផ្ដល់ផលប្រយោជន៍ដល់មនុស្សជាង ១០ លាននាក់ ចាប់ពីភាគខាងត្បូងតំបន់ស៊ីនជាំង រួមមានទាំងតំបន់ស្វយ័ត Byaingolin, Kizilsu Kirghiz និងតំបន់ Aksu, Kashgar និង Hotan។
ផ្លូវដែកនេះអាចជាផ្លូវដែកខ្លីបំផុតដែលដឹកទំនិញពី ប្រទេសចិន ទៅកាន់ អឺរ៉ុប និង មជ្ឈិមបូព៌ា កាត់បន្ថយការធ្វើដំណើរចម្ងាយ ៩០០ គីឡូម៉ែត្រ និងសំច័យពេលធ្វើដំណើរបានពី ៧ ដល់ ៩ ថ្ងៃ។
គិតត្រឹមចុងឆ្នាំ ២០២១ ប្រវែងសរុបនៃផ្លូវដែកកំពុងដំណើរការរបស់ ចិនដីគោក មានជាង ១៥០,០០០ គីឡូម៉ែត្រ ក្នុងនោះមានជាង ៤០,០០០ គីឡូម៉ែត្រ ជាផ្លូវដែកល្បឿនលឿន៕
កាលពីថ្ងៃទី ១៣ មិថុនា ក្រុមហ៊ុន VinFast ប្រកាសគម្រោងបើកមជ្ឈមណ្ឌលពាណិជ្ជកម្មជាង ៥០ កន្លែង នៅក្នុង ប្រទេសអាល្លឺម៉ង់, បារាំង និង ហូឡង់ នៅក្នុងកម្មវិធីបង្ហាញជាផ្លូវការនូវរថយន្តអគ្គិសនីម៉ូដែល VF ៨ និង VF ៩ នៅក្នុង ទីផ្សារអឺរ៉ុប។
ក្រុមហ៊ុនដែលទើបតែលេចធ្លោមួយនេះ មានគម្រោងបើក VinFast Store យ៉ាងតិច ២៥ នៅ អាល្លឺម៉ង់, ២០ នៅ បារាំង និង ៥ នៅ ហូឡង់។ បណ្ដាហាងនៅ អាល្លឺម៉ង់ នឹងបង្ហាញខ្លួននៅក្នុងបណ្ដាទីក្រុងធំៗដូចជា Frankfurt, Berlin, Cologne, Oberhausen និង Hamburg។ ចំណែកនៅ បារាំង ហាងទាំងនេះនឹងមាននៅទីក្រុងប៉ារីស, Marseille, Nantes, Rennes, Nice។ល។ រីឯនៅ ប្រទេសហូឡង់ វិញ VinFast Store នឹងមាននៅទីក្រុងអាំស្ទែដាំ។
ថ្មីៗនេះ VinFast ក៏បានប្រកាសអំពីតម្លៃរថយន្ត និងកញ្ចប់សេវាជួលថ្មនៅ អាល្លឺម៉ង់, បារាំង និង ហូឡង់។ ក្នុងនោះ ដើម្បីលើកទឹកចិត្តដល់អតិថិជនដំបូងៗ ក្រុមហ៊ុននេះនឹងផ្ដល់តម្លៃថេរចំពោះការជួលថ្ម ដោយមិនផ្លាស់ប្ដូរជារៀងរហូត សម្រាប់អ្នកទិញ VF ៨ និង VF ៩ ក្នុងឆ្នាំ ២០២២ និង ២០២៣៕
កម្មវិធីបើកបរសាកល្បងរថយន្ត Ford Ranger ស៊េរីថ្មីឆ្នាំ ២០២៣ នេះ នឹងប្រព្រឹត្តឡើងនៅ៖
ជាក់ស្ដែងគឺនៅមានឧបសគ្គយ៉ាងច្រើននៅក្នុងដំណើរឆ្ពោះទៅរកគោលដៅហាមលក់រថយន្តប្រើប្រេងសាំងថ្មីនៅឆ្នាំ ២០៣៥ សូម្បីតែនៅក្នុងទីផ្សារមួយដែលបានរីកចម្រើនហើយក៏ដោយ។
កាលពីសប្ដាហ៍កន្លង ក្រុមអ្នកបង្កើតច្បាប់នៅ សហភាពអឺរ៉ុប (EU) បានបោះឆ្នោតអនុម័តលើការហាមលក់រថយន្តដំណើរការដោយប្រេងសាំង និងម៉ាស៊ូតថ្មី នៅក្នុងតំបន់នេះចាប់ពីឆ្នាំ ២០៣៥។
គោលដៅដែលកំណត់លើការប្រើប្រាស់រថយន្តអគ្គិសនី ត្រូវបានបញ្ជាក់យ៉ាងច្បាស់
សេចក្ដីព្រាងច្បាប់ស្ដីពីផែនការប្រើប្រាស់រថយន្តអគ្គិសនី ១០០% ត្រូវបាន សភាអឺរ៉ុប (MEP) អនុម័តកាលពីសប្ដាហ៍កន្លង ក្នុងនោះ មានសំឡេងគាំទ្រចំនួន ៣៣៩ សំឡេង, ប្រឆាំងចំនួន ២៤៩ សំឡេង និងអនុបវាទ ២៤ សំឡេង។
គម្រោងដែលត្រូវបានអនុម័តខាងលើ បានជួយឱ្យ EU បោះមួយជំហានយ៉ាងវែងនៅក្នុងដំណើរទៅរកគោលដៅកាត់បន្ថយការបំភាយឧស្ម័នផ្ទះកញ្ចក់ពីរថយន្ត និងយានយន្តធុនស្រាលឱ្យបាន ១០០% ក្នុងឆ្នាំ ២០៣៥ ធៀបនឹងឆ្នាំ ២០២១។ គោលដៅកាត់បន្ថយការបំភាយឧស្ម័នកាបូន នៅឆ្នាំ ២០៣០ របស់ EU គឺ ៥០% សម្រាប់រថយន្តដឹកទំនិញ និង ៥៥% សម្រាប់រថយន្តទេសចរណ៍។
ក្នុងព្រឹត្តិការណ៍សន្ទនាអំពីបញ្ហាអាកាសធាតុដែលត្រូវបានធ្វើឡើងនៅ Glasgow កាលពីខែវិច្ឆិកា ២០២១ ក្រុមមេដឹកនាំ បានអំពាវនាវដោយមិនមានការបង្ខំចំពោះបណ្ដាប្រទេសក្នុងពិភពលោកថា សង្ឃឹមថា នៅឆ្នាំ ២០៤០ យានយន្តដែលត្រូវបានលក់ចេញ សុទ្ធតែជាប្រភេទមិនបំភាយឧស្ម័នពុល។
ក្រោយព្រឹត្តិការណ៍នៅ Glasgow មានសកម្មភាពជាច្រើនត្រូវបានធ្វើឡើងក្នុងបំណងគាំទ្រដល់ការអំពាវនាវខាងលើ។ ក្រុមហ៊ុនផលិតរថយន្តបែបប្រពៃណីជាច្រើនបានប្រកាសផែនការងាកទៅផលិតយានយន្តអគ្គិសនីទាំងស្រុងចាប់ពីឆ្នាំ ២០៣០ ឬ ២០៣៥ ដូចទៅនឹងគម្រោងរបស់រដ្ឋាភិបាលមួយចំនួន។
គោលដៅបញ្ចប់ការលក់យានយន្តប្រើប្រាស់ប្រេងសាំងនៅឆ្នាំ ២០៣៥ មិនងាយនឹងសម្រេចបាន
ឆ្នាំ ២០៣៥ ស្ដាប់ទៅដូចជានៅយូរទៀត ក៏ប៉ុន្តែ បណ្ដាប្រទេសមានពេលតែ ១២ ឆ្នាំទៀតប៉ុណ្ណោះដើម្បីអនុវត្ត។ អ្នកជំនាញជាច្រើនយល់ថា ១២ ឆ្នាំ គឺមិនគ្រប់គ្រាន់ឡើយនៅក្នុងការអនុវត្តផែនការបដិវត្តមធ្យោបាយដឹកជញ្ជូន សូម្បីតែនៅក្នុងទីផ្សារដែលរីកចម្រើនខ្លាំងដូច អឺរ៉ុប និង សហរដ្ឋអាម៉េរិក។
«ការបញ្ចប់ការជួញដូររថយន្តប្រើសាំងនៅឆ្នាំ ២០៣៥ ទាមទារឱ្យមានការផ្លាស់ប្ដូរធំធេង តាំងពីការវិនិយោគទៅលើហេដ្ឋារចនាសម្ព័ន្ធ រហូតដល់ការផ្លាស់ប្ដូរការគិត និងឥរិយាបថរបស់អ្នកប្រើប្រាស់» Jasmine Sanders នាយកប្រតិបត្តិរបស់ OurClimate ឱ្យដឹងដូច្នេះ។
សមាគមអ្នកផលិតរថយន្តអឺរ៉ុប (ACEA) ឱ្យដឹងថា ពួកគេបារម្ភចំពោះគោលដៅកាត់បន្ថយការបំភាយឧស្ម័នកាបូន ១០០% ពីរថយន្ត ចាប់ពីឆ្នាំ ២០៣៥ របស់ EU។
Oliver Zipse ប្រធានរបស់ ACEA និងជានាយកប្រតិបត្តិរបស់ BMW និយាយថា វិស័យផលិតរថយន្តកំពុងស្ថិតក្នុងដំណាក់កាលជំរុញឱ្យមានរថយន្តអគ្គិសនី ក្នុងនោះ ម៉ូដែលថ្មីៗជាច្រើនបានបង្ហាញខ្លួនជាបន្តបន្ទាប់។ ប៉ុន្តែ លោកថា កាលបរិច្ឆេទរបស់ EU ហាក់ឆាប់រហ័សពេកហើយ៕
យោងតាមលទ្ធផលនៃការស្រាវជ្រាវថ្មីបំផុតរបស់ រាជរដ្ឋាភិបាលជប៉ុន ស្ដីពីស្ថានការណ៍អាពាហ៍ពិពាហ៍របស់បុរសពេញវ័យនៅ ជប៉ុន ដែលទើបត្រូវបានចុះផ្សាយកាលពីព្រឹកនេះ (១៤ មិថុនា) បង្ហាញថា តួលេខនៃបុរសពេញវ័យរបស់ប្រទេសនេះ មានភរិយា ឬគូស្នេហ៍ មានកម្រិតទាបគួរឱ្យភ្ជាក់ផ្អើល។
ការស្រាវជ្រាវបានឱ្យដឹងថា ៧០% នៃកំលោះជនជាតិប៉ុន ដែលមានវ័យចាប់ពី ២០ ដល់ ៣០ ឆ្នាំ មិនទាន់មានភរិយា ឬសង្សារ។ ជាង ៤០% ក្នុងចំណោមតួលេខខាងលើ មិនធ្លាប់បានណាត់ជួបមិត្តស្រីសូម្បីតែម្ដង។ ចំពោះនារីវិញ អត្រានៃអ្នកមិនទាន់មានស្វាមី ឬសង្សារ គឺមានត្រឹម ៥០%។
បកស្រាយចំពោះបញ្ហានេះ រដ្ឋមន្ត្រីទទួលបន្ទុកប្រជាជន របស់ ជប៉ុន បានឱ្យដឹងថា មួយក្នុងចំណោមបណ្ដាមូលហេតុនោះគឺបញ្ហាប្រាក់ចំណូល។ ក្រៅពីនេះ ការដែលមានពេលជួបគ្នាតិចតួច ខណៈដែលការចំណាយពេលលើខ្លួនឯងច្រើនជាង ក៏រួមចំណែកធ្វើឱ្យបញ្ហាខាងលើកើតឡើងផងដែរ។
នេះគឺជាបាតុភូតគួរឱ្យព្រួយបារម្ភសម្រាប់ ប្រទេសជប៉ុន ដែលបច្ចុប្បន្នត្រូវប្រឈមនឹងអត្រាបង្កើតកូនកម្រិតទាប ខណៈដែលចំនួនប្រជាពលរដ្ឋចាស់ចេះតែកើនឡើងច្រើន។
បើទោះជា ជប៉ុន បានប្រឹងប្រែងលើកឡើងនូវគោលនយោបាយលើកទឹកចិត្តដល់ការបង្កើនតួលេខប្រជាជន ប៉ុន្តែ ហាក់មិនទាន់កែលម្អស្ថានការណ៍បានច្រើននៅឡើយ ព្រោះបញ្ហានេះភាគច្រើនអាស្រ័យលើការគិតរបស់បុគ្គលម្នាក់៕
គម្រោងសាងសង់វិមានតារាសាស្ត្រនៅលើកម្ពស់ ៣,៦៥០ ម៉ែត្រ ធៀបនឹងផ្ទៃទឹកសមុទ្រ ត្រូវបានបើកការដ្ឋានស្ថាបនាកាលពីថ្ងៃទី ១២ មិថុនា នៅតំបន់ស្វយ័តទីបេ (Tibet)។
លោក Wang Junjie អនុប្រធានមន្ទីរវិទ្យាសាស្ត្រ និងបច្ចេកវិទ្យាទីបេ បានឱ្យដឹងថា វិមានតារាសាស្ត្រនេះនឹងមានទំហំសរុប ១១,៥៧១ ម៉ែត្រក្រឡា និងមានរូបរាងដូចទៅនឹងអាចម៍ផ្កាយមួយដុំ។
សំណង់នេះនឹងត្រូវបានដាក់នៅស្លាបខាងកើតរបស់សារមន្ទីរវិទ្យាសាស្ត្រធម្មជាតិទីបេ នៅទីក្រុងរដ្ឋបាល Lhasa របស់តំបន់នេះ។ នៅពេលសាងសង់រួចរាល់ វានឹងក្លាយជាវិមានតារាសាស្ត្រខ្ពស់ជាងគេបង្អស់ក្នុងពិភពលោក ដោយមានកម្ពស់ ៣,៦៥០ ម៉ែត្រ ធៀបនឹងផ្ទៃទឹកសមុទ្រ ខ្ពស់ជាង ៧៧៣ ម៉ែត្រ ធៀបនឹង Pic du Midi ដែលជាវិមានតារាសាស្ត្រ (កម្ពស់ ២,៨៧៧ ម៉ែត្រ) ខ្ពស់បំផុតនៅ អឺរ៉ុប និងមានទីតាំងនៅ ប្រទេសបារាំង។
វិមានតារាសាស្ត្រទីបេ នឹងបើកទ្វារដំណើរការនៅឆ្នាំ ២០២៤ ហើយអាចទទួលទេសចរបានជាង ១០០,០០០ នាក់ជារៀងរាល់ឆ្នាំ។ តាមផែនការ គម្រោងនេះនឹងជួយដល់ការស្រាវជ្រាវផ្នែកតារាសាស្ត្ររបស់ ប្រទេសចិន។
ក្នុងនាមជា «ដំបូលផ្ទះរបស់ពិភពលោក» ដោយសារស្ថិតនៅលើកម្ពស់ជាមធ្យមជាង ៤,០០០ ម៉ែត្រ ធៀបនឹងទឹកសមុទ្រ តំបន់ទីបេ មានផ្ទៃមេឃស្រលះ ល្អសម្រាប់ការសង្កេតមើលតារា។
វិមានខាងលើនឹងត្រូវបានបំពាក់តេឡេស្កុបចំណាំងបែរ (refracting telescope) ធំជាងគេក្នុងតំបន់ ដោយអង្កត់ផ្ចិតរបស់កញ្ចក់មានប្រវែង ១ ម៉ែត្រ។ ឧបករណ៍នេះត្រូវបានសហការអភិវឌ្ឍដោយវិមានតារាសាស្ត្រទីបេ និងស្ថានីយជាតិសង្កេតតារារបស់ ប្រទេសចិន។ វានឹងត្រូវបានប្រើប្រាស់ក្នុងការសង្កេតមើលផ្កាយដែលមានពន្លឺមិនប្រក្រតី និងដែនពេលវេលាក្នុងតារាសាស្ត្រ។
វិមានតារាសាស្ត្រទីបេ នឹងជាផ្នែកមួយដ៏សំខាន់ក្នុងបណ្ដាញសង្កេតតារារបស់ ប្រទេសចិន។ វានឹងក្លាយជាមូលដ្ឋានគ្រឹះដើម្បីស្រាវជ្រាវតារាសាស្ត្រ និងអប់រំវិទ្យាសាស្ត្រសាធារណៈក្នងតំបន់៕
មុខទំនិញដែលត្រូវបានក្រុមហ៊ុន Amazon ដឹកជញ្ជូនដោយយន្តហោះគ្មានមនុស្សបើក រួមមាន ផលិតផលសម្រាប់ប្រើប្រាស់ក្នុងផ្ទះ ផលិតផលថែទាំសម្រស់ សម្ភារការិយាល័យ និងឧបករណ៍បច្ចេកវិទ្យា។
សេវាកម្មខាងលើដែលត្រូវបានប្រកាសកាលពីថ្ងៃទី ១៣ មិថុនានេះ នឹងត្រូវអនុវត្តចាប់ពីចុងឆ្នាំ ២០២២ នៅក្នុងបណ្ដាទីក្រុងរបស់រដ្ឋ California សហរដ្ឋអាម៉េរិក។
យោងតាមក្រុមហ៊ុន Amazon អតិថិជននៅក្នុងទីរួមស្រុក Lockeford ភាគខាងជើងរដ្ឋ California អាចចុះឈ្មោះស្នើសុំការដឹកជញ្ជូនដោយយន្តហោះគ្មានមនុស្សបើក «Prime Air» ដោយមិនគិតថ្លៃ។ ទំនិញដែលត្រូវតាមលក្ខខណ្ឌនឹងត្រូវបានដឹកដោយយន្តហោះគ្មានមនុស្សបើកទៅកាន់អាសយដ្ឋានប្រគល់ទំនិញ និងហោះសំកាំងខ្លួននៅលើកម្ពស់សុវត្ថិភាព ដើម្បីឱ្យអតិថិជនចុះហត្ថលេខាទទួល។
យន្តហោះគ្មានមនុស្សបើក Prime Air អាចផ្ទុកទំនិញទម្ងន់រហូតដល់ ៥ ផោន (ប្រហែល ២.២ គីឡូក្រាម) និងមានទំហំប្រហែលនឹងប្រអប់ដាក់ស្បែកជើងខ្នាតធំ។ មុខទំនិញដែលនឹងត្រូវបានដឹកជញ្ជូនដោយ Prime Air រួមមាន ផលិតផលសម្រាប់ប្រើប្រាស់ក្នុងផ្ទះ ផលិតផលថែរក្សាសម្រស់ សម្ភារការិយាល័យ និងឧបករណ៍បច្ចេកវិទ្យា នេះបើតាមអ្នកនាំពាក្យរបស់ Amazon។
នៅ សហរដ្ឋអាម៉េរិក គូប្រជែងមួយរបស់ Amazon គឺ Walmart ក៏កំពុងផ្ដល់សេវាកម្មបែបនេះ។ Walmart មានគម្រោងពង្រីកសេវាកម្មនេះនៅក្នុង ៦ រដ្ឋរបស់ សហរដ្ឋអាម៉េរិក នៅចុងឆ្នាំ ២០២២៕