ក្នុងកិច្ចប្រជុំកំពូល G៧ កាលពីម្សិលមិញ ប្រធានាធិបតីអាម៉េរិក លោក ចូ បៃដិន សង្កត់ធ្ងន់ថា សហរដ្ឋអាម៉េរិក ចង់ធ្វើឱ្យច្បាស់លាស់ថា នេះ (គំនិតផ្ដួចផ្ដើមសម្រាប់ហេដ្ឋារចនាសម្ព័ន្ធពិភពលោក) មិនមែនជាជំនួយ ឬបរិច្ចាគបែបមនុស្សធម៌។ នេះគឺជាខ្ទង់វិនិយោគដែលនឹងនាំមកនូវផលប្រយោជន៍រួមសម្រាប់ ជនជាតិអាម៉េរិក និងប្រជាជននៅគ្រប់ប្រទេស។
កាលពីថ្ងៃទី ២៦ មិថុនា លោក បៃដិន ជាថ្មីម្ដងទៀត បានលើកឡើងនូវគំនិតផ្ដួចផ្ដើមសម្រាប់ហេដ្ឋារចនាសម្ព័ន្ធទូទាំងពិភពលោក ដើម្បីធ្វើឱ្យមានតុល្យភាពជាមួយនឹងឥទ្ធិពលដែលកំពុងរីកសាយភាយរបស់ ប្រទេសចិន។ យោងតាមប្រធានាធិបតី បៃដិន សហរដ្ឋអាម៉េរិក នឹងចូលរួមចំណែក ២០០ ពាន់លានដុល្លារ សម្រាប់គំនិតផ្ដួចផ្ដើមនេះ។
នៅក្នុងកិច្ចប្រជុំកំពូល G៧ នៅ អាល្លឺម៉ង់ កាលពីថ្ងៃទី ២៦ មិថុនា លោក បៃដិន ឱ្យដឹងថា គំនិតផ្ដួចផ្ដើមនេះត្រូវបានកសាងឡើងដោយយោងទៅលើបទពិសោធន៍ល្អបំផុតក្នុងពិភពលោក ទាក់ទិននឹងតម្លាភាព ដៃគូសហការ ការការពារបុគ្គលិកនិយោជិត និងបរិស្ថាន។
យោងតាមលោក បៃដិន ក្រុមប្រទេស G៧ នឹងរកវិធីប្រមូលទុន ៦០០ ពាន់លានដុល្លារ សម្រាប់គំនិតផ្ដួចផ្ដើមនេះនៅឆ្នាំ ២០២៧ ក្នុងនោះ សហរដ្ឋអាម៉េរិក នឹងចូលរួមចំណែក ២០០ ពាន់លានដុល្លារក្នុងវិស័យហិរញ្ញវត្ថុ ដើម្បីជំរុញគម្រោងនានានៅតាមបណ្ដាប្រទេសកំពុងអភិវឌ្ឍ និងមានប្រាក់ចំណូលកម្រិតមធ្យម។ ខ្ទង់ថវិការបស់ អាម៉េរិក នឹងត្រូវបានអនុវត្តក្នុងអំឡុង ៥ ឆ្នាំខាងមុខ។
លោក បៃដិន និយាយថា «ខ្ញុំចង់ធ្វើឱ្យប្រាកដថា នេះមិនមែនជាជំនួយ ឬកិច្ចការមនុស្សធម៌។ នេះគឺជាខ្ទង់វិនិយោគដែលនឹងនាំមកនូវផលប្រយោជន៍រួមសម្រាប់ ជនជាតិអាម៉េរិក និងប្រជាជននៅគ្រប់ប្រទេស។ គំនិតផ្ដួចផ្ដើមនេះនឹងជំរុញកំណើនសេដ្ឋកិច្ច និងឱកាសដើម្បីឱ្យយើងចែករំលែកនូវចក្ខុវិស័យវិជ្ជមានអំពីអនាគត និងទុកឱ្យសហគមន៍អន្តរជាតិមើលឃើញផលប្រយោជន៍ជាក់ស្ដែងនៃការដែលបានធ្វើជាដៃគូសហការជាមួយបណ្ដាប្រទេសប្រជាធិបតេយ្យ»។
គំនិតផ្ដួចផ្ដើមដែលត្រូវបានគេឱ្យឈ្មោះថា «ដៃគូសម្រាប់ហេដ្ឋារចនាសម្ព័ន្ធសកល និងការវិនិយោគ» នេះ គឺជាគំនិតផ្ដួចផ្ដើមកសាងឡើងវិញនូវពិភពលោកដែលល្អប្រសើរជាងបច្ចុប្បន្ន ដែលត្រូវបាន ប្រធានាធិបតីអាម៉េរិក លោក បៃដិន ប្រកាសនៅក្នុងកិច្ចប្រជុំកំពូលរបស់ G៧ កាលពីឆ្នាំ ២០២១។
គំនិតខាងលើ ផ្ដោតសំខាន់ទៅលើកិច្ចការស្នូលចំនួន ៤ រួមមាន ការទប់ទល់នឹងការប្រែប្រួលអាកាសធាតុ និងការវិនិយោគសម្រាប់ថាមពលស្អាត, ការកសាងប្រព័ន្ធអ៊ីនធើណិត និងព័ត៌មានសុវត្ថិភាព និងបើកចំហ, ជំរុញសមធម៌ និងសមភាពយេនឌ័រ និងចុងក្រោយគឺ ការស្ដារហេដ្ឋារចនាសម្ព័ន្ធសុខាភិបាល។
បើទោះជាមិនបាននិយាយដល់ ប្រទេសចិន ប៉ុន្តែ គំនិតផ្ដួចផ្ដើមខាងលើនេះ ត្រូវបានគេចាត់ទុកថាជាការប្រឹងប្រែងដើម្បីធ្វើឱ្យមានតុល្យភាពជាមួយនឹង គំនិតផ្ដួចផ្ដើមខ្សែក្រវាត់ និងផ្លូវ របស់ ប្រទេសចិន ដែលត្រូវបានប្រកាសកាលពីឆ្នាំ ២០១៣ ជាមួយនឹងគោលដៅវិនិយោគអភិវឌ្ឍហេដ្ឋារចនាសម្ព័ន្ធក្នុងប្រទេសជាច្រើននៅទូទាំងពិភពលោក៕
