សង្គម និងសេដ្ឋកិច្ច - La Reine Media

កម្មវិធីទូរស័ព្ទដៃ CamDigiKey ជំនាន់ចុងក្រោយ ២.០ មានមុខងារពិសេសចំនួន ៤

ក្រសួងសេដ្ឋកិច្ច និងហិរញ្ញវត្ថុ និង ធនាគារជាតិកម្ពុជា (NBC) បានដាក់ឱ្យដំណើរការ KHQR ដើម្បីធ្វើឱ្យមានស្ដង់ដា ចំពោះ QR codes ធនាគារក្នុងប្រទេស និងកម្មវិធីទូរស័ព្ទ CamDigiKey ជំនាន់ទីពីរ កាលពីថ្ងៃទី ៤ កក្កដា។

តាមរយៈទំព័រ Facebook ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា កម្មវិធីទូរស័ព្ទដៃ CamDigiKey ជំនាន់ទីពីរ (២.០) នេះ មានមុខងារពិសេសចំនួន ៤ រួមមានដូចខាងក្រោម៖

១-មុខងារស្គែនមុខយ៉ាងរស់រវើក, ២-ការស្គែតកូដដែលអាចអានបានដោយម៉ាស៊ីន (MRZ) លើអត្តសញ្ញាណប័ណ្ណខ្មែរ និងលិខិតឆ្លងដែនបរទេស, ៣-សន្ធានកម្មកម្មវិធីទូរស័ព្ទដៃ និងកម្មវិធីទូរស័ព្ទដៃ (App-to-app Integration), ៤-សន្ធានកម្មគេហទំព័រ និងគេហទំព័រ (Web-to-web integration)។

CamDigiKey គឺជាកម្មវិធីទូរស័ព្ទដៃដែលមានសុវត្ថិភាព និងងាយស្រួល ដែលត្រូវបានប្រើប្រាស់សម្រាប់ផ្ទៀងផ្ទាត់ អត្តសញ្ញាណរបស់លោកអ្នកតាមមធ្យោបាយឌីជីថល។ តាមរយៈការចុះឈ្មោះលើ CamDigiKey អ្នកនឹងទទួលបានអត្តសញ្ញាណឌីជីថលមួយដែលមានសុពលភាព ហើយអាចប្រើប្រាស់សម្រាប់ login ចូលទៅកាន់ portal រដ្ឋាភិបាលកម្ពុជាណាមួយក៏បាន។ ដើម្បីធ្វើការ login លោកអ្នកគ្រាន់តែធ្វើការស្កេនកូដ QR ដែលមាននៅលើ portal នោះជាមួយកម្មវិធីទូរស័ព្ទ CamDigiKey ជាការស្រេច។

ព័ត៌មានបន្ថែម សូមចូលទៅកាន់គេហទំព័រ www.registrationservices.gov.kh ។

July 5, 2022

កម្ពុជា សម្ពោធដាក់ឱ្យដំណើរការជាផ្លូវការ កម្មវិធី CamDigiKey ជំនាន់ ២.០

លោកអ្នកអាចទទួលបានអត្តសញ្ញាណឌីជីថលដែលផ្សារភ្ជាប់លោកអ្នកទៅកាន់សេវាកម្មរដ្ឋាភិបាលឌីជីថលរបស់ កម្ពុជា ដែលដំណើរការលើប្រព័ន្ធ CamDX តាមរយៈ CamDigiKey។

CamDigiKey គឺជាកម្មវិធីទូរស័ព្ទដៃដែលមានសុវត្ថិភាព និងភាពងាយស្រួល និងដែលត្រូវបានប្រើប្រាស់សម្រាប់ផ្ទៀងផ្ទាត់អត្តសញ្ញាណរបស់លោកអ្នកតាមមធ្យោបាយឌីជីថល។ តាមរយៈការចុះឈ្មោះលើ CamDigiKey លោកអ្នកនឹងទទួលបានអត្តសញ្ញាណឌីជីថលមួយដែលមានសុពលភាព ហើយអាចប្រើប្រាស់សម្រាប់ login ចូលទៅកាន់ portal រដ្ឋាភិបាលកម្ពុជាណាមួយក៏បាន។ ដើម្បីធ្វើការ login លោកអ្នកគ្រាន់តែធ្វើការស្កេនកូដ QR ដែលមាននៅលើ portal នោះជាមួយកម្មវិធីទូរស័ព្ទ CamDigiKey ជាការស្រេច។

ឥលូវនេះកម្មវិធី CamDigiKey ជំនាន់ ២.០ ត្រូវបានសម្ពោធដាក់ឱ្យដំណើរការហើយកាលពីព្រឹកមិញ (៤ កក្កដា) នៅសណ្ឋាគារ រ៉ូសវូដ (Rosewood) រាជធានីភ្នំពេញ។

ដើម្បីជ្រាបច្បាស់ សូមទស្សនាវីដេអូខាងក្រោម៖

July 4, 2022

តម្លៃប្រេងនៅ អាស៊ី ធ្លាក់ចុះកាលពីព្រឹកថ្ងៃទី ៤ កក្កដា ដោយសារការបារម្ភអំពីវិបត្តិសេដ្ឋកិច្ច

ការបារម្ភអំពីវិបត្តិសេដ្ឋកិច្ចសកលបានដាក់សម្ពាធទៅលើផ្លូវចិត្តរបស់អ្នកជំនួញក្នុងទីផ្សារ ធ្វើឱ្យប្រេងធ្លាក់ថ្លៃនៅ អាស៊ី កាលពីព្រឹកថ្ងៃទី ៤ កក្កដា បើទោះជាប្រភពផ្គត់ផ្គង់នៅតែតូចចង្អៀតក្នុងគ្រាដែលទណ្ឌកម្មកំពុងធ្លាក់ទៅលើ វិស័យថាមពលរបស់ រុស្ស៊ី។

តម្លៃប្រេង Brent ប្រគល់ក្នុងខែកញ្ញា ២០២២ ធ្លាក់ចុះ ៣៦ សេនដុល្លារ (ប្រហែល ០.៣%) មកនៅត្រឹម ១១១.២៧ ដុល្លារ/ធុង កាលពីម៉ោង ១០ ព្រឹក ថ្ងៃទី ៤ កក្កដា (ម៉ោងនៅ ភ្នំពេញ)។ ប្រេង WTI ប្រគល់ក្នុងខែសីហា ២០២២ ធ្លាក់ថ្លៃ ៣៤ សេនដុល្លារ (០.៣%) មកនៅត្រឹម ១០៨.០៩ ដុល្លារ/ធុង។

អ្នកវិភាគ Tina Teng មកពីក្រុមហ៊ុន CMC Markets ឱ្យដឹងថា ការបារម្ភអំពីវិបត្តិសេដ្ឋកិច្ចគឺជាកត្តាសំខាន់ដែលរារាំងការលោតឡើងនៃតម្លៃរបស់ប្រេង។ អត្រាប្ដូរប្រាក់កើនឡើង និងការធ្លាក់ចុះនៃទំនុកចិត្តរបស់អ្នកប្រើប្រាស់នៅ សហរដ្ឋអាម៉េរិក បានកាត់បន្ថយក្ដីសង្ឃឹមលើតម្រូវការប្រើប្រាស់ប្រេងឥន្ធនៈ ខណៈដែលរបាយការណ៍បានបង្ហាញថា ផលិតភាពរបស់រោងចក្រចម្រាញ់ប្រេងនៅ សហរដ្ឋអាម៉េរិក ត្រូវបានកែលម្អ។

អ្នកជំនាញខាងលើក៏បានសង្កត់ធ្ងន់ថា ប្រាក់ដុល្លារអាម៉េរិក ឡើងថ្លៃ ក៏ធ្វើឱ្យទីផ្សារទំនិញរួមចុះថោក ក្នុងនោះរួមមានទាំងតម្លៃប្រេងឆៅផងដែរ។

ទោះជាយ៉ាងណាក៏ដោយ ការព្រួយបារម្ភអំពីបញ្ហាប្រភពផ្គត់ផ្គង់ នៅតែជួយទប់មិនឱ្យតម្លៃប្រេងធ្លាក់ថ្លៃខ្លាំង៕

July 4, 2022

រោងចក្រស្រូបយកកាបូនឌីអុកស៊ីត (CO2) ដោយផ្ទាល់ធំជាងគេក្នុងពិភពលោក

ក្រុមហ៊ុន Climeworks ដែលមានទីស្នាក់ការកណ្ដាលនៅ ប្រទេសស្វ៊ីស កាលពីថ្ងៃទី ២៩ មិថុនា ២០២២ បានបើកការដ្ឋានសាងសង់រោងចក្រប្រមូលកាបូនឌីអុកស៊ីតដោយផ្ទាល់ (DAC) ទីពីររបស់ខ្លួន នៅ ប្រទេស អ៊ីស្លង់។

រោងចក្រឧស្សាហកម្មប្រមូល CO2 ដោយផ្ទាល់ទីពីររបស់ Climeworks នេះមានឈ្មោះថា Mammoth។ វាក៏មានហេដ្ឋារចនាសម្ព័នដូចទៅនឹងរោងចក្រដំបូង Orca របស់ពួកគេ ប៉ុន្តែមានកម្លាំងស្រូបយក CO2 បានចំនួន៣៦,០០០ តោនជារៀងរាល់ឆ្នាំ។ តាមគម្រោង ការសាងសង់រោងចក្រនេះនឹងត្រូវចំណាយពេលពី ១៨ ដល់ ២៤ ខែ។ ដូចទៅនឹង Orca ថាមពលកកើតឡើងវិញនឹងត្រូវបានប្រើប្រាស់ដើម្បីដំណើរការប្រព័ន្ធស្រូបយក និងរក្សាទុក CO2។

Climeworks គ្រប់គ្រងបច្ចេកវិទ្យាស្រូបយក CO2 ដោយផ្ទាល់ពីបរិយាកាសដ៏ទំនើប និងបានដំណើរការរោងចក្រអគ្គិសនីមិនបំភាយឧស្ម័នពុលដំបូងគេបង្អស់ក្នុងពិភពលោកកាលពីឆ្នាំ ២០១៧ ដោយមានកិច្ចសហការជាមួយក្រុមហ៊ុនរក្សាទុក CO2 ឈ្មោះ CarbFix។ កាលពីឆ្នាំ ២០១៦ CarbFix បានអភិវឌ្ឍបច្ចេកវិទ្យាបំប្លែង CO2 ទៅជារ៉ែ ដោយប្រើពេលមិនដល់ ២ ឆ្នាំ មិនមែនរាប់រយ ឬរាប់ពាន់ឆ្នាំដូចធម្មតារបស់ធម្មជាតិនោះឡើយ។

Orca គឺជារោងចក្រស្រូបយកកាបូនឌីអុកស៊ីត (CO2) ដោយផ្ទាល់ដំបូង របស់ក្រុមហ៊ុន Climeworks

រោងចក្រអគ្គិសនីសាកល្បងនោះ អាចស្រូបយក CO2 ចំនួន ១២.៥ តោន ដោយសុវត្ថិភាព ដោយប្រើពេលត្រឹមតែ ៣ ខែប៉ុណ្ណោះ ដែលនេះបានបើកផ្លូវឱ្យ Orca ដែលជារោងចក្រប្រមូល CO2 ដោយផ្ទាល់ដំបូងរបស់ Climeworks ចាប់ផ្ដើមដំណើរការនៅ អ៊ីស្លង់ កាលពីឆ្នាំកន្លង។ Orca ដែលអាចស្រូបយក CO2 បាន ៤,០០០ តោន/ឆ្នាំ មានរូបរាងដូចទៅបន្ទប់ម៉ូឌុល ដែលអាចផ្ទុកតម្រួតលើគ្នាបាន។

បច្ចុប្បន្ន មនុស្សលោកកំពុងតែបំភាយឧស្ម័នកាបូនឌីអុកស៊ីតជាង ៣០ ពាន់លានតោនទៅក្នុងបរិយាកាសជារៀងរាល់ឆ្នាំ ដូច្នេះ ក្រុមហ៊ុន Climeworks ត្រូវការរោងចក្រដូច Mammoth និង Orca ជាច្រើនទៀតដើម្បីដោះស្រាយបញ្ហាបំពុលបរិស្ថាននេះ៕

July 1, 2022

ប្រេងសាំងឡើងថ្លៃ សម្តេច ហ៊ុន សែន អំពាវនាវឱ្យពលរដ្ឋទិញយានយន្តប្រើអគ្គិសនី

បងប្អូនប្រជាពលរដ្ឋដែលមានថវិកាល្មមៗគួរចាប់ផ្តើមប្ដូរទៅទិញរថយន្តប្រើប្រាស់អាគុយ ឬអគ្គិសនីវិញដោយសារតែសាំងឡើងថ្លៃ នេះបើតាមប្រសាសន៍របស់ប្រមុខរាជរដ្ឋាភិបាលកម្ពុជា ថ្លែងនៅក្នុងពិធីអបអរសាទរទិវាមច្ឆជាតិ ០១ កក្កដា ដែលប្រារព្ធឡើងនៅទីតាំងអាងទឹកត្រពាំងថ្ម ស្ថិតក្នុងភូមិត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ កាលពីព្រឹកមិញ។

ការជិះយានយន្តអគ្គិសនី ថ្វីបើយឺតជាងយានយន្តប្រើប្រេងសាំងក៏ពិតមែន ប៉ុន្តែវាមានសុវត្ថិភាព និងសន្សំសំច័យប្រាក់បានច្រើន។

“ខ្ញុំមើលឃើញផលប្រយោជន៍ ២ យ៉ាងគឺ ទីមួយ ការកាត់បន្ថយការចំណាយលើថ្លៃសាំង និងទីពីរគឺ កាត់បន្ថយគ្រោះថ្នាក់ចរាចរណ៍។ អីចឹងទេ អ្នកមានលុយទិញ អាចទិញអាព្រូស និងឡានប្រើអាគុយ ឬអគ្គិសនី” សម្ដេច ហ៊ុន សែន អំពាវនាវដូច្នេះ។

ទន្ទឹមនឹងការអំពាវនាវឱ្យ ពលរដ្ឋកម្ពុជា ងាកមកទិញ និងប្រើប្រាស់យានយន្តអគ្គិសនី ប្រមុខរាជរដ្ឋាភិបាល សម្តេចតេជោ ក៏បានស្នើឱ្យស្ថានីយ៍ប្រេងឥន្ធនៈនានា បង្កើតកន្លែងសម្រាប់បញ្ចូលថាមពលអាគុយ ឬថ្មផងដែរ។

ក្នុងឱកាសនេះដែរ សម្ដេចតេជោ ក៏បានមានប្រសាសន៍ថា មូលហេតុដែលនាំឱ្យប្រេងឡើងថ្លៃខ្ពស់គឺដោយសារវិបត្តិសង្គ្រាមរវាង រុស្ស៊ី និង អ៊ុយក្រែន។ យោងតាម តួលេខពីក្រសួងពាណិជ្ជកម្ម ប្រមុខរាជរដ្ឋាភិបាលឱ្យដឹងថា តម្លៃឧស្ម័នហ្គាសបានកើនឡើង ៣៥.៨% ហើយប្រទេសមួយចំនួនក្នុងពិភពលោកកំពុងខ្វះប្រេងប្រើប្រាស់ ដូចជា ស្រីលង្កា និង ឡាវ ជាដើម។

សម្ដេច ហ៊ុន សែន បញ្ជាក់ថា នៅ កម្ពុជា មិនទាន់មានបញ្ហាខ្វះប្រេងនៅឡើយ ប៉ុន្តែត្រូវតែមានការបម្រុងទុកជាមុន៕

July 1, 2022

គម្រោងផ្លូវដែកឡាវ-វៀតណាម នឹងជួយឱ្យការដឹកជញ្ជូនរវាង ប្រទេសថៃ ឡាវ វៀតណាម និង ចិន បានងាយស្រួលថែមទៀត

រដ្ឋាភិបាលឡាវ បានបើកភ្លើងខៀវសម្រាប់លទ្ធភាពនៃការសិក្សាលើគម្រោងផ្លូវរថភ្លើងមួយខ្សែដែលអនុញ្ញាតឱ្យការដោះដូរទំនិញ និងការដឹកជញ្ជូនរវាង ប្រទេសថៃ ឡាវ វៀតណាម និង ចិន មានភាពរលូនជាងមុន។

សារព័ត៌មាន Lao Economic Daily បានរាយការណ៍ថា ពិធីចុះហត្ថលេខាលើអនុស្សរណៈនៃការយោគយល់ (MOU) មួយត្រូវបានធ្វើឡើងកាលពីម្សិលមិញ រវាង រដ្ឋាភិបាលឡាវ និងក្រុមហ៊ុន Petro Trade នៅឯ ទីស្ដីការក្រសួងផែនការ និងវិនិយោគ របស់ ប្រទេសនេះ ទាក់ទិននឹងគម្រោងផ្លូវដែកដែលនឹងតភ្ជាប់ រដ្ឋធានីវៀងចន្ទន៍ ជាមួយនឹងទីក្រុង Thakhek ក្នុងខេត្ត Khammoune ប្រទេសឡាវ ដែលជាផ្នែកមួយនៃផ្លូវរថភ្លើងមួយខ្សែតភ្ជាប់ពី ឡាវ ទៅ វៀតណាម។

គម្រោងផ្លូវរថភ្លើងឡាវ-វៀតណាម (LVRP) នេះគឺជាផ្លូវរថភ្លើងល្បឿនលឿនដោយថាមពលអគ្គិសនីមានតម្លៃ ៥ ពាន់លានដុល្លារអាម៉េរិក។ គម្រោងដែលនឹងអនុញ្ញាតឱ្យប្រើប្រាស់ក្បាលរថភ្លើងអគ្គិសនីនេះ នឹងមានប្រវែងប្រហែល ៤៥២ គីឡូម៉ែត្រ។

ក្នុងដំណាក់កាលដំបូង ផ្លូវដែកនេះនឹងតភ្ជាប់ស្រុក Thakhek ក្នុងខេត្ត Khammouane របស់ ឡាវ ជាមួយនឹងកំពង់ផែ Vung Ang ក្នុង ប្រទេសវៀតណាម ដែលមានប្រវែងប្រហែល ១៣៩ គីឡូម៉ែត្រ។ ក្នុងដំណាក់កាលទីពីរ វានឹងតភ្ជាប់ផ្លូវដែកពី Thakhek ទៅកាន់ រដ្ឋធានីវៀងចន្ទន៍ ដែលមានប្រវែងប្រហែល ៣១២ គីឡូម៉ែត្របន្ថែមទៀត។

គម្រោងផ្លូវដែកឡាវ-វៀតណាម ត្រូវបានសិក្សា និងពិនិត្យតាំងពីឆ្នាំ ២០១៥។ គម្រោងនេះនឹងអនុញ្ញាតឱ្យការដឹកជញ្ជូនទំនិញពីកំពង់ផែ Vung Ang របស់ វៀតណាម មកកាន់ផ្លូវដែកឡាវ-វៀតណាម ហើយឆ្ពោះទៅកាន់កំពង់ផែស្ងួត Thanaleng និងសួនឧស្សាហកម្មដឹកជញ្ជូនវៀងចន្ទន៍ បានដោយរលូន។

តាមរយៈការតភ្ជាប់ជាមួយនឹង មជ្ឈមណ្ឌលដឹកជញ្ជូនវៀងចន្ទន៍ ផ្លូវដែកខាងលើក៏នឹងជួយឱ្យការដោះដូរទំនិញ និងការដឹកជញ្ជូនរវាង ប្រទេសថៃ ឡាវ វៀតណាម និង ចិន បានងាយស្រួលថែមមួយកម្រិតទៀត៕

July 1, 2022

បន្ទប់សណ្ឋាគារលំដាប់ផ្កាយពេញមេឃ តម្លៃ ១,៣០០,០០០ រៀល/យប់ «គ្មានជញ្ជាំង គ្មានដំបូល» តែមានភ្ញៀវជាហូរហែ

មនុស្សរាប់ពាន់នាក់សុខចិត្តចំណាយប្រាក់រាប់រយអឺរូ សម្រាប់ការដេកមិនពេញភ្នែកពេញមួយយប់នៅក្នុងបន្ទប់សណ្ឋាគារ «ផ្កាយពេញមេឃ» Null Stern Hotel ដែលមិនមានជញ្ជាំង មិនមានដំបូល នៅឯ ប្រទេសស្វ៊ីស។

បន្ទប់សណ្ឋាគារនេះមិនមានជញ្ជាំង ឬដំបូលឡើយ ប៉ុន្តែ វានៅតែអាចទាក់ទាញភ្ញៀវរាប់ពាន់នាក់មកសម្រាកកាយឆ្លងរាត្រីនៅឆ្ងាយពីទីក្រុង។

សិល្បករ Frank Riklin ឱ្យដឹងថា «ចំពោះបន្ទប់សណ្ឋាគារប្រភេទនេះ ការគេងលក់មិនមែនជាគោលដៅចម្បងឡើយ។ ប្រការសំខាន់គឺវាកំពុងតែបង្ហាញអំពីស្ថានភាពពិភពលោកនាបច្ចុប្បន្ន។ បន្ទប់នេះគឺជាសារមួយស្ដីពីតម្រូវការសម្រាប់ការផ្លាស់ប្ដូរបន្ទាន់នៅក្នុងសង្គម។

សណ្ឋាគារ «ផ្កាយពេញមេឃ» នេះ គឺជាស្នាដៃបែបសិល្បៈថ្មីបំផុតរបស់បងប្អូនពីរនាក់នៃត្រកូល Riklin។ Null Stern Hotel ស្ថិតនៅក្បែរស្ថានីយប្រេងសាំងមួយនៅទីរួមស្រុក Saillon នៃរដ្ឋ Valais របស់ ប្រទេសស្វ៊ីស។

គំនិតស្ដីពីបន្ទប់សណ្ឋាគារខាងលើត្រូវបានបង្កើតឡើងក្នុងបំណងធ្វើឱ្យភ្ញៀវទាំងឡាយពិចារណាអំពីពិភពលោកនៅជុំវិញ ក៏ដូចជាដាស់អារម្មណ៍របស់ពួកគេ ឱ្យធ្វើសកម្មភាពប្រកបដោយភាពច្នៃប្រឌិតខ្អស់។

ក្រៅពីបន្ទប់ខាងលើ នៅមានបន្ទប់សណ្ឋាគារ «ផ្កាយពេញមេឃ» ចំនួន ៣ ផ្សេងទៀត កំពុងត្រូវបានត្រៀមដាក់ឱ្យដំណើរការនៅតំបន់ជនបទរបស់ ប្រទេសស្វ៊ីស។ នៅសណ្ឋាគារនេះ ក៏មានបម្រើអាហារ និងភេសជ្ជៈនៅនឹងកន្លែងផងដែរ។

សម្រាប់តម្លៃវិញ បន្ទប់សណ្ឋាគារដែលមិនអាចដេកពេញភ្នែកនេះ មួយយប់គឺ ៣២២ អឺរ៉ូ (ស្មើនឹង ៣៣៦ ដុល្លារអាម៉េរិក ឬ ១,៣០០,០០០ រៀល)៕

July 1, 2022

ក្រសួងពាណិជ្ជកម្ម ប្រកាសពីតម្លៃលក់រាយប្រេងឥន្ធនៈសម្រាប់អំឡុងពេលពីថ្ងៃទី ០១-១០ ខែកក្កដា

នាព្រឹកថ្ងៃទី ០១ កក្កដានេះ ក្រសួងពាណិជ្ជកម្ម បានប្រកាសពីតម្លៃលក់រាយប្រេងឥន្ធនៈតាមស្ថានីយប្រេងសាំងនានានៅទូទាំងប្រទេស ចាប់ពីថ្ងៃទី ០១-១០ ខែកក្កដា ឆ្នាំ ២០២២។

យោងតាមការប្រកាសថ្មីរបស់ ក្រសួងពាណិជ្ជកម្ម ប្រេងសាំងធម្មតានឹងត្រូវលក់ក្នុងតម្លៃ ៥,៨០០ រៀល/លីត្រ ពោលគឺនៅរក្សាតម្លៃដូចមុន។ ចំណែកប្រេងម៉ាស៊ូត ក្រសួងតម្រូវឱ្យលក់ក្នុងតម្លៃ ៦,២០០ រៀល/លីត្រ ពោលគឺចុះថ្លៃ ១០០ រៀល ធៀបនឹងការកំណត់តម្លៃមុននេះ។

July 1, 2022

កូរ៉េខាងត្បូង ដំឡើងប្រាក់ខែអប្បបរមាដល់កម្មករ និយោជិត សម្រាប់ឆ្នាំ ២០២៣

នាថ្ងៃទី ៣០ ខែមិថុនានេះ ក្រុមមន្ត្រីកូរ៉េខាងត្បូង បានឱ្យដឹងថា តំណាងកម្មករ និយោជិត និងម្ចាស់ក្រុមហ៊ុននៅប្រទេសនេះ បានឯកភាពគ្នាក្នុងការដាក់ចេញនូវកម្រិតប្រាក់បៀវត្សអប្បបរមាគិតទៅតាមម៉ោងធ្វើការ សម្រាប់ឆ្នាំ ២០២៣ គឺ ៩,៦២០ វ៉ុន (ប្រហែល ៧.៤១ ដុល្លារអាម៉េរិក) កើន ៥% ធៀបនឹងឆ្នាំនេះ។

គណៈកម្មការប្រាក់បៀវត្សអប្បបរមា (MWC) ដែលមានសមាជិក ៩ រូប តំណាងឱ្យកម្មករ និយោជិត ម្ចាស់ក្រុមហ៊ុន និងសាធារណជន កាលពីព្រលប់ថ្ងៃទី ២៩ មិថុនា សម្រេចបានកិច្ចព្រមព្រៀងស្ដីពីការកំណត់ប្រាក់បៀវត្សអប្បបរមាសម្រាប់កម្មករ និយោជិត។ យោងតាមកិច្ចព្រមព្រៀងនេះ ប្រាក់ខែរបស់កម្មករ និយោជិតកូរ៉េខាងត្បូង គឺ ២.០២ លានវ៉ុន ដែលនឹងត្រូវបានអនុវត្តចំពោះគ្រប់វិស័យ។

នៅក្នុងការចរចា ភាគីតំណាងកម្មករ និយោជិត បានស្នើឱ្យដំឡើងប្រាក់ខែទៅតាមការសន្យារបស់ អាជ្ញាធររបស់អតីតប្រធានាធិបតី Moon Jae-in (១០,០០០ វ៉ុន/ម៉ោង)។ ចំណែកភាគីខាងម្ចាស់ក្រុមហ៊ុនវិញ បានស្នើឱ្យពន្យារពេលគម្រោងដំឡើងប្រាក់ខែទៅតាមការសន្យាខាងលើ ដោយសារមានការបារម្ភអំពីការខាតបង់ដែលកើតឡើងដោយសារកូវីដ-១៩ ការប្រាក់ អតិផរណាកើនឡើង និងអត្រាប្ដូរប្រាក់ក៏សុទ្ធតែខ្ពស់។

ការកំណត់ប្រាក់ខែអប្បបរមាថ្មីខាងលើសម្រាប់ឆ្នាំ ២០២៣ នេះ នឹងមានសុពលភាពចាប់ពីថ្ងៃទី ១ មករា ២០២៣។

ក្នុងអាណត្តិរបស់ អតីតប្រធានាធិបតី Moon Jae-in ប្រាក់បៀវត្សអប្បបរមាបានកើន ១៦.៤% នៅឆ្នាំ ២០១៨, ១០.៩% នៅឆ្នាំ ២០១៩, ២.៩% នៅឆ្នាំ ២០២០ និង ១.៥% នៅឆ្នាំ ២០២១៕

June 30, 2022

ន័រវែស នឹងសាងសង់បំពង់បង្ហូរខ្នាតយក្ស នាំសមាសធាតុ CO2 ចុះក្រោមបាតសមុទ្រ

ក្រុមហ៊ុនថាមពល Epuinor របស់ ប្រទេសន័រវែស កាលពីថ្ងៃទី ២៩ មិថុនា ឆ្នាំ ២០២២ បានដាក់សំណើសាងសង់ប្រព័ន្ធបង្ហូរ កាបូនឌីអុកស៊ីត ចុះក្រោមបាតសមុទ្ររបស់ប្រទេសនេះ ដើម្បីកប់សមាសធាតុគីមី CO2 នេះចោលជារៀងរហូត។

បើសិនត្រូវបានអនុវត្ត នេះនឹងក្លាយជាគម្រោងប្រមូល ដឹកជញ្ជូន និងរក្សាទុកកាបូន (CCS) ធំបំផុតមួយក្នុងពិភពលោក។

«ប្រព័ន្ធបំពង់បង្ហូរនៅឯសមុទ្រ ដែលមាននៅក្នុងគម្រោងនេះ មានសមត្ថភាពអាចបង្ហូរកាបូនឌីអុកស៊ីតបានពី ២០ ទៅ ៤០ លានតោនជារៀងរាល់ឆ្នាំ ផ្គត់ផ្គង់តម្រូវការថ្មីស្ដីពី CCS របស់បណ្ដាក្រុមហ៊ុនឧស្សាហកម្មនៅ អឺរ៉ុប» ក្រុមហ៊ុន Equinor បញ្ជាក់ដូច្នេះ។ តួលេខខាងលើគឺប្រហាក់ប្រហែលនឹងឧស្ម័នដែលមនុស្សពី ៣ ទៅ ៦ លាននាក់បានបង្កើតជារៀងរាល់ឆ្នាំ។

CCS ត្រូវបានចាត់ទុកដូចទៅនឹងដំណោះស្រាយដ៏មានសក្ដានុពលសម្រាប់វិស័យឧស្សាហកម្មដែលបញ្ចេញ CO2 កម្រិតខ្ពស់ ជាវិធីដែលអនុញ្ញាតឱ្យបណ្ដាក្រុមហ៊ុនអាចបន្តសកម្មភាពរបស់ខ្លួន បើទោះជាមានវិធានការកាត់បន្ថយការបំភាយឧស្ម័នដើម្បីប្រឆាំងនឹងបញ្ហាបម្រែបម្រួលអាកាសធាតុ។

តាមសំណើ ក្រុមហ៊ុន Fluxys របស់ បែលហ្ស៊ិក នឹងដំណើរការមូលដ្ឋានមួយនៅ Zeebrugge ជាទីសម្រាប់ប្រមូលកាបូឌីអុកស៊ីត ពីបណ្ដាក្រុមហ៊ុន និងកប៉ាល់ដែលចូលចតក្នុងកំពង់ផែ ដោយត្រូវបានភ្ជាប់តាមរយៈប្រព័ន្ធបំពង់បង្ហូរ។

បន្ទាប់មក កាបូនឌីអុកស៊ីត នឹងត្រូវបានបង្ហូរទៅតាមបំពង់មួយផ្សេងទៀតដែលក្រុមហ៊ុន Equinor ជាអ្នកគ្រប់គ្រង នៅក្រោមបាតសមុទ្រ។ បំពង់បង្ហូរនេះនឹងជួយរក្សាទុក CO2 នៅក្រោមបាតសមុទ្ររបស់ ន័រវែស ជារៀងរហូត។

គម្រោងនេះកំពុងស្ថិតក្នុងដំណាក់កាលស្រាវជ្រាវអំពីលទ្ធភាព។ បច្ចុប្បន្ន ក្រុមហ៊ុន Equinor និង Fluxys បានធ្វើការជាមួយបណ្ដាក្រុមហ៊ុនជាអតិថិជនសក្ដានុពល ហើយសង្ឃឹមថា ពួកគេនឹងមានការសម្រេចចិត្តក្នុងការបណ្ដាក់ទុនវិនិយោគនៅឆ្នាំ ២០២៥៕

June 30, 2022

Category: សង្គម និងសេដ្ឋកិច្ច