ទំព័រសារព័ត៌មានហិរញ្ញវត្ថុ Financial Times បានចេញផ្សាយថា តម្លៃអគ្គិសនីនៅ សហភាពអឺរ៉ុប (EU) បានកើនឡើងខ្ពស់ជាងមុន ៤ ដង ដោយសារការចំណាយខ្ពស់ទៅលើឧស្ម័ន។
Financial Times ឱ្យដឹងថា កាលពីថ្ងៃទី ៥ កក្កដា តម្លៃអគ្គិសនីនៅ អឺរ៉ុប បានកើនឡើងខ្ពស់បំផុតក្នុងប្រវត្តិសាស្ត្រ ដោយសារតែអស្ថិរភាពនៃប្រភពផ្គត់ផ្គង់ពី រុស្ស៊ី ធ្វើឱ្យតម្លៃឧស្ម័នកើនឡើងខ្ពស់។
ប្រភពបន្ទុកអគ្គិសនីមូលដ្ឋានរបស់ អាល្លឺម៉ង់ សម្រាប់ផ្គត់ផ្គង់នៅឆ្នាំក្រោយ ត្រូវបានជួញដូរក្នុងតម្លៃ ៣៣៤ ដុល្លារ/ MWh។ តួលេខនេះបានឡើងខ្ពស់ជាងកំណត់ត្រាមុននោះដែលបង្កើតឡើងកាលពីខែធ្នូ ២០២១។ កាលពីខែកក្កដាឆ្នាំកន្លង តម្លៃអគ្គិសនីត្រូវបានលក់ត្រឹមតែជាង ៨៣ ដុល្លារប៉ុណ្ណោះ នៅក្នុង ១ MWh។
យោងតាម Financial Times តម្លៃអគ្គិសនីនៅ ប្រទេសបារាំង ក៏បានកើនទ្វេដង ឡើងដល់ ៣៧៧ ដុល្លារ/MWh រាប់ចាប់ពីដើមឆ្នាំនេះ។
តម្លៃអគ្គិសនីរងឥទ្ធិពលពីការចំណាយទៅលើឧស្ម័នធម្មជាតិ ដែលប្រើប្រាស់នៅក្នុងការផលិតអគ្គិសនី។ តម្លៃឧស្ម័ននៅ អឺរ៉ុប បានកើនឡើងលើសពី ១,៨០០ ដុល្លារ/ពាន់ម៉ែត្រគូបជាលើកដំបូងកាលពីថ្ងៃទី ៥ កក្កដា រាប់ចាប់ពីដើមខែមីនា ដោយសារតែកម្មករក្នុងវិស័យប្រេងឧស្ម័ននៅ ន័រវែស នាំគ្នាធ្វើកូដកម្មទាមទារដំឡើងប្រាក់ខែ ធ្វើឱ្យបរិមាណដែលត្រូវផលិតជាធម្មតា ត្រូវថយចុះ។
Financial Times បញ្ជាក់ថា ស្ថានភាពខ្វះអគ្គិសនីកាន់តែអាក្រក់ឡើងៗ បន្ទាប់ពីរោងចក្រផលិតអគ្គិសនីដើរដោយថាមពលនុយក្លេអែររបស់ បារាំង ត្រូវបានផ្អាកមួយរយៈពេលដើម្បីថែទាំ។ ដូច្នេះ បណ្ដាប្រទេសជិតខាង ក៏ងាកទៅប្រើប្រាស់ឧស្ម័នច្រើនជាងមុនដើម្បីបង្កើនការផលិតអគ្គិសនីក្នុងស្រុក។
ក្រៅពីនេះ ប្រព័ន្ធបំពង់បង្ហូរឧស្ម័ន Nord Stream 1 រវាង រុស្ស៊ី និង អាល្លឺម៉ង់ ដែលនឹងបិទទ្វារដើម្បីថែទាំចាប់ពីសប្ដាហ៍ក្រោយ ព្រោះតែបញ្ហាបច្ចេកទេសដែលទាក់ទងនឹងទណ្ឌកម្មរបស់ សហភាពអឺរ៉ុប ក៏បានក្លាយជាបញ្ហាធំចំពោះរោងចក្រផលិតអគ្គិសនីទាំងឡាយដែលដើរដោយឧស្ម័នផងដែរ៕
