Category: សង្គម និងសេដ្ឋកិច្ច

៥ ខែដើមឆ្នាំនេះ ទំហំពាណិជ្ជកម្មទ្វេភាគីរវាង កម្ពុជា-វៀតណាម កើនឡើងជាង ១៤% ធៀបនឹង ៥ ខែដើមឆ្នាំកន្លង
រយៈពេល ៥ ខែ ដើមឆ្នាំ ២០២២ នេះ ការដោះដូរពាណិជ្ជកម្មទ្វេភាគីរវាង កម្ពុជា និង វៀតណាម សម្រេចបាន ៥.៤៤ ពាន់លានដុល្លារអាម៉េរិក កើត ១៨.៧% ធៀបនឹងដំណាក់កាលដូចគ្នាកាលពីឆ្នាំកន្លង។
កម្ពុជា បាននាំចេញទំនិញទៅកាន់ ប្រទេសវៀតណាម សរុបជាទឹកប្រាក់ជាង ២,៧៧៥ លានដុល្លារអាម៉េរិក ខណៈដែល វៀតណាម នាំចេញទំនិញមក កម្ពុជា បានជាង ២,៦៧៤ លានដុល្លារ ក្នុងរយៈពេល ៥ ខែ ដើមឆ្នាំ ២០២២។
បណ្ដាមុខទំនិញសំខាន់ៗដែល កម្ពុជា នាំចេញទៅកាន់ ទីផ្សាររបស់ វៀតណាម មានដូចជា គ្រាប់ស្វាយចន្ទី ៣៤.០១%, កៅស៊ូ ២៥.០៨%, ដែកថែបអេតចាយ ១.៤០%, បន្លែផ្លែឈើ ១.០៦%, ក្រណាត់ ០.៨០% និងទំនិញដទៃទៀតចំនួន ៣៧.៦៥%។ ចំណែកទំនិញដែល វៀតណាម នាំចូលមក កម្ពុជា រួមមានដូចជា ដែកថែប ១៧.៨៤%, វាយនភ័ណ្ឌ ១៤.៧៦%, ប្រេងសាំង ១២.៤០%, វត្ថុធាតុដើមសម្រាប់វិស័យវាយនភ័ណ្ឌ ៥.៨៨%, ផលិតផលធ្វើពីជ័រ ៣.១០% និងមុខទំនិញដទៃទៀតចំនួន ៤៦.០៣%។
ទំហំពាណិជ្ជកម្មទ្វេភាគីរវាង កម្ពុជា និង វៀតណាម ក្នុងឆ្នាំ ២០២១ បានឡើងដល់ ៩.៥៤ ពាន់លានដុល្លារអាម៉េរិក កើន ៧៩.១% ធៀបនឹងឆ្នាំ ២០២០។ រយៈពេល ៥ ខែ ដើមឆ្នាំ ២០២២ នេះ ការដោះដូរពាណិជ្ជកម្មទ្វេភាគីរវាង កម្ពុជា និង វៀតណាម សម្រេចបាន ៥.៤៤ ពាន់លានដុល្លារអាម៉េរិក កើត ១៨.៧% ធៀបនឹងដំណាក់កាលដូចគ្នាកាលពីឆ្នាំកន្លង។
July 11, 2022
ទំហំពាណិជ្ជកម្មទ្វេភាគីរវាង កម្ពុជា-ថៃ កើនឡើងជាង ១៤% ក្នុងរយៈពេល ៥ ខែដើមឆ្នាំ
រយៈពេល ៥ ខែ ដើមឆ្នាំ ២០២២ នេះ ការដោះដូរពាណិជ្ជកម្មទ្វេភាគីរវាង កម្ពុជា និង ថៃ សម្រេចបានទឹកប្រាក់សរុបចំនួនប្រមាណ ៣.៨៤ ពាន់លានដុល្លារអាម៉េរិក កើនឡើង ១៤.៥% បើធៀបនឹង ៥ ខែដើមឆ្នាំ ២០២១។
ក្នុងខែឧសភា ទំហំពាណិជ្ជកម្មរវាង ប្រទេសកម្ពុជា និង ប្រទេសថៃ សម្រេចបានទឹកប្រាក់សរុបចំនួន ៩២៣.២ លានដុល្លារ កើនឡើងជាង ២៤% បើធៀបនឹងខែមេសា ក្នុងនោះការនាំចេញពី កម្ពុជា ទៅ ថៃ សម្រេចបាន ៨៩.៨ លានដុល្លារ ធ្លាក់ចុះ ១.១៤% ធៀបនឹងខែមុន។ ចំណែកការនាំចូលពី ប្រទេសថៃ វិញ មានតម្លៃ ៨៣៣.៤ លានដុល្លារ ធ្លាក់ចុះ ២៨.១% ធៀបនឹងខែមុន។
បណ្ដាមុខទំនិញដែល កម្ពុជា បាននាំចេញទៅកាន់ ប្រទេសថៃ មានដូចជា ផលិតផលកសិកម្ម វត្ថុធាតុដើម ត្បូងថ្មមានតម្លៃ និងវាយនភណ្ឌ។ ចំណែកទំនិញដែល កម្ពុជា បាននាំចូលពី ប្រទេសថៃ មានដូចជា ត្រី សាច់ ម្ហូបអាហារ និងភេសជ្ជៈ ជីសរីរាង្គ ស៊ីម៉ង់ត៍ គ្រឿងសំអាង គ្រឿងតុបតែងផ្ទះ ឧបករណ៍អេឡិចត្រូនិក រថយន្ត និងគ្រឿងបន្លាស់ សម្ភារៈការិយាល័យ និងបរិក្ខាសំណង់។ល។ នេះបើតាម របាយការណ៍ការងាររបស់ស្ថានទូតកម្ពុជាប្រចាំទីក្រុងបាងកក ប្រទេសថៃ។
July 11, 2022
បណ្ដាប្រទេសសេដ្ឋកិច្ចទើបតែលេចធ្លោ ប្រឈមនឹងរលកនៃហានិភ័យក្ស័យធនថ្មី
ចំពោះបណ្ដាប្រទេសដែលមានប្រាក់ចំណូលទាប ហានិភ័យក្ស័យធន និងវិបត្តិបំណុលលែងនៅជាសេណារីយោក្លែងក្លាយទៀតហើយ។
យោងតាមបណ្ដាញសារព័ត៌មាន Bloomberg បណ្ដាប្រទេសសេដ្ឋកិច្ចទើបតែលេចធ្លោ ដូចជា អែលសាល់វ៉ាឌ័រ, ហ្កាណា, អេហ្ស៊ីប, ទុយនីស៊ី និង ប៉ាគិស្ថាន ជាដើម មានហានិភ័យប្រឈមបញ្ហាក្ស័យធនជាប្រវត្តិសាស្ត្រ នៅពេលរងសម្ពាធពីទម្ងន់នៃខ្ទង់ប្រាក់បំណុលជាង ២៥។
«ចំពោះបណ្ដាប្រទេសដែលមានប្រាក់ចំណូលទាប ហានិភ័យក្ស័យធន និងវិបត្តិបំណុលលែងនៅជាសេណារីយោក្លែងក្លាយទៀតហើយ។ យើងបានមកដល់ដំណាក់កាលនោះហើយ» សេដ្ឋវិទូ Carmen Reinhart មកពីធនាគារពិភពលោក (WB) អះអាងដូច្នេះ។
ក្នុងរយៈពេល ៦ ខែកន្លង ចំនួនទីផ្សារទើបលេចធ្លោដែលមានបំណុលរដ្ឋាភិបាល (មូលបត្របំណុលរបស់រដ្ឋ) ត្រូវបានជួញដូរក្នុងកម្រិតលំបាកខ្លាំង បានកើនឡើងទ្វេដង។
មូលហេតុមួយផ្សេងទៀតដែលបង្កឱ្យមានការព្រួយបារម្ភយ៉ាងជ្រាលជ្រៅត្រូវបានគេជឿថា មានប្រភពពី «បាតុភូត domino»។ បាតុភូតនេះតែងកើតឡើងនៅពេលអ្នកវិនិយោគដែលកំពុងស្ថិតក្នុងស្ថានភាពព្រួយបារម្ភ ចាប់ផ្ដើមដកប្រាក់ពីបណ្ដាប្រទេសដែលមានបញ្ហាសេដ្ឋកិច្ចដែលប្រហាក់ប្រហែលនឹងបណ្ដាប្រទេសដែលបានក្ស័យធនមុននោះ។
ប្រជាពលរដ្ឋស្រីលង្កា កំពុងជួបវិបត្តិខ្វះថាមពល
កាលពីខែមិថុនា ក្រុមអ្នកវិនិយោគត្រូវបានគេដឹងថា បានដកមូលបត្របំណុល និងភាគហ៊ុនតម្លៃ ៤ ពាន់លានដុល្លារអាម៉េរិក ពីទីផ្សារទើបលេចធ្លោ ដែលនេះគឺជាខែទីបួនហើយដែលរលកនៃការដកប្រាក់ត្រូវបានធ្វើឡើង។
ទន្ទឹមនឹងខាងលើ ករណីក្ស័យធនក៏អាចកើតឡើងបន្ទាប់ពីកើតមានអស្ថិរភាពនយោបាយក្នុងប្រទេស។ កាលពីដើមឆ្នាំនេះ ស្រីលង្កា គឺជាប្រទេសដំបូងគេដែលបានផ្អាកការសងបំណុលដល់ម្ចាស់មូលបត្របំណុលបរទេស ដោយសារតែវិបត្តិស្បៀង និងថាមពល ធ្វើឱ្យកើតមានបាតុកម្ម បង្កអស្ថិរភាពផ្នែកនយោបាយ។
អ្នកជំនាញ Barclays បកស្រាយថា «ប្រជាជនកំពុងទទួលរងឥទ្ធិពលដោយសារតម្លៃស្បៀងអាហារកើនឡើងខ្ពស់ និងបញ្ហាខ្វះប្រភពផ្គត់ផ្គង់ថាមពល។ នេះអាចជាមូលហេតុដែលនាំឱ្យមានអស្ថិរភាពនយោបាយ»។
ថ្មីៗនេះ កាលពីថ្ងៃទី ៩ កក្កដា រដ្ឋធានីកូឡុំបូ របស់ ស្រីលង្កា បាន «ញាប់ញ័រ» ដោយសារតែបាតុកម្មធំ។ ក្រុមបាតុករនាំគ្នាសម្ដែងមតិអំពីការលំបាកដែលពួកគេបាន និងកំពុងជួប។ ក្នុងថ្ងៃដដែល នាយករដ្ឋមន្ត្រី Ranil Wickremesinghe ក៏បានប្រកាសថា នឹងលាលែងពីតំណែងនៅថ្ងៃទី ១៣ កក្កដា ដើម្បីធានាចំពោះដំណើរការប្រគល់អំណាចត្រូវបានធ្វើឡើងដោយសន្តិវិធី។
បាតុកម្មនៅ ប្រទេសស្រីលង្កា នាពេលថ្មីៗនេះ
ស្រីលង្កា បានឆ្លងកាត់វិបត្តិខ្វះស្បៀង និងថាមពលអស់ជាច្រើនខែមកហើយ។ បញ្ហាដាច់ភ្លើងបានអូសបន្លាយ ចំណែកអតិផរណាក៏ហក់ឡើងខ្ពស់ បន្ទាប់ពីអស់រូបិយប័ណ្ណបរទេស មិនអាចនាំចូលទំនិញសំខាន់ៗពី ធ្វើឱ្យវិបត្តិសេដ្ឋកិច្ចដែលមិនធ្លាប់មាននៅប្រទេសនេះ បានកើតឡើងពិតប្រាកដ។ តម្លៃរបស់ទំនិញសំខាន់ៗបំផុតនៅ ស្រីលង្កា បានកើនឡើងខ្ពស់ជាងមុន ៣ ដង ក្នុងអំឡុងប៉ុន្មានខែចុងក្រោយនេះ៕
July 11, 2022
សម្តេចតេជោ ហ៊ុន សែន ប្រកាសចូលរួមកាន់ទុក្ខទូទាំងប្រទេស ចំពោះមរណភាពអតីតនាយករដ្ឋមន្ត្រីជប៉ុន អាបេ ស៊ីនហ្សូ (Shinzo Abe)
នៅព្រឹកថ្ងៃទី ៩ ខែកក្កដា ឆ្នាំ២០២២ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងសារពិសេស និងប្រកាសចូលរួមកាន់ទុក្ខទូទាំងប្រទេស នៅថ្ងៃទី ១០ ខែកក្កដា ឆ្នាំ ២០២២ ចំពោះមរណភាព ឯកឧត្តម អាបេ ស៊ីនហ្សូ អតីតនាយករដ្ឋមន្ត្រីជប៉ុន។
សម្តេចតេជោ ហ៊ុន សែន បានមានប្រសាសន៍ថា មរណភាពរបស់លោក អាបេ ស៊ិនហ្សូ មិនត្រឹមតែជាការបាត់ប្រកបដោយភាពសោកស្តាយ តក់ស្លុត រន្ធត់ និងអាឡោះអាល័យសម្រាប់តែប្រជាពលរដ្ឋជប៉ុនប៉ុណ្ណោះ តែសម្រាប់ប្រជាពលរដ្ឋនៅលើពិភពលោក រួមទាំងប្រជាពលរដ្ឋកម្ពុជាផងដែរ។
សម្តេចតេជោបានបញ្ជាក់ថា ក្នុងការកាន់តំណែងជានាយករដ្ឋមន្ត្រីជប៉ុនទាំងពីរលើកឯកឧត្តម អាបេ ស៊ិនហ្សូ បានប្រឹងប្រែងយ៉ាងខ្លាំងដល់ការជំរុញទំនាក់ទំនងរវាងជប៉ុន និងកម្ពុជា រហូតក្លាយទៅជាដៃគូយុទ្ធសាស្ត្រនៅឆ្នាំ២០១៣។ បន្ថែមពីលើនោះ ឯកឧត្តម អាបេ ក៏បានជំរុញនូវការផ្តល់ជំនួយគាំទ្រដល់ការអភិវឌ្ឍគ្រប់វិស័យនៅកម្ពុជា រួមទាំងហេដ្ឋារចនាសម្ព័ន្ធផងដែរ។ ឯកឧត្តមអាបេ ក៏ជានាយករដ្ឋមន្ត្រី ដែលបានជំរុញដល់ទំនាក់ទំនងរវាងអាស៊ាន និងជប៉ុន និងជំរុញដល់ទំនាក់ទំនងមេគង្គ-ជប៉ុនផងដែរ។
ដើម្បីសម្តែងនូវការដឹងគុណចំពោះមនោសញ្ចេតនាការស្រឡាញ់ដ៏ស្មោះត្រង់របស់ឯកឧត្តម អាបេ ស៊ិនហ្សូ សម្តេចតេជោ បានសម្រេចឱ្យមានការកាន់មរណទុក្ខនៅទូទាំងប្រទេសមួយថ្ងៃ គឺនៅថ្ងៃអាទិត្យ ទី១០ ខែកក្កដា ឆ្នាំ២០២២។ សម្តេចតេជោ ហ៊ុន សែន បានណែនាំដល់គណៈកម្មាធិការបុណ្យជាតិ និងអន្តរជាតិ ឱ្យយកចិត្តទុកដាក់រៀបចំការកាន់មរណទុក្ខនេះ ដោយតម្រូវឱ្យមានការបង្ហូតទង់ជាតិនៅពាក់កណ្តាលដង នៅតាមសាលារៀន និងតាមក្រសួង ស្ថាប័ននានារបស់ជាតិ៕
July 9, 2022
បារាំង គ្រោងនឹងចំណាយ ២០ ពាន់លានអឺរ៉ូ «ដើម្បីបង្កើនលទ្ធភាពទិញ» ដល់ប្រជាពលរដ្ឋ
គណៈរដ្ឋមន្ត្រីបារាំង បានបង្ហាញសេចក្ដីលម្អិតនៃកញ្ចប់ថិការជំនួយដែលមានតម្លៃ ២០ ពាន់លានអឺរ៉ូ (ប្រហែល ២០.៣ ពាន់លានដុល្លារអាម៉េរិក) ដើម្បីដោះស្រាយបញ្ហាអាទិភាពទីមួយ នោះគឺការបង្កើនលទ្ធភាពទិញ ក៏ដូជាទប់ទល់នឹងកំណើននៃអតិផរណាដែល បារាំង ថាគ្រោងនឹងឡើងដល់ ៥.៨% ក្នុងខែមិថុនាកន្លងទៅ។
ខ្លឹមសារសំខាន់នៅក្នុងសេចក្ដីព្រាងច្បាប់ស្ដីពី «ការបង្កើនលទ្ធភាពទិញ» សម្រាប់ប្រជាជន របស់ រដ្ឋាភិបាលបារាំង គឺការទប់កំណើននៃតម្លៃប្រេងឥន្ធនៈ ដែលត្រូវបានចាត់ទុកថាជាមូលហេតុចម្បងដែលនាំឱ្យអតិផរណាកើនឡើងខ្ពស់ក្នុងរយៈពេលកន្លង។
រដ្ឋាភិបាលបារាំង នឹងពន្យារសុពលភាពនៃវិធានការគ្រប់គ្រងកំណើនរបស់តម្លៃអគ្គិសនីឱ្យនៅក្នុងអត្រា ៤% និងបង្កកតម្លៃឧស្ម័នរហូតដល់ខែតុលា ២០២។ អត្រាជំនួយ ១៨ សេន សម្រាប់ប្រេងសាំង ១ លីត្រ នឹងត្រូវបានពន្យាររហូតដល់ខែកញ្ញា ហើយក្រោយមកបន្ថយបន្តិចម្ដងៗ មុនពេលលុបចោលនៅខែធ្នូ ២០២។ ក្រៅពីនេះ គ្រួសារដែលមានប្រាក់ចំណូលទាបប្រហែល ១២ លានគ្រួ ក៏នឹងទទួលបានខ្ទង់ប្រាក់ជំនួយផ្នែកថាមពលពី ១០០ ដល់ ៣០០ អឺរ៉ូ ផងដែរ។
រដ្ឋាភិបាលបារាំង បានស្នើឱ្យមានការដំឡើងប្រាក់ខែប្រចាំឆ្នាំមុនកាលកំណត់ ៤% ដល់ពលរដ្ឋដែលបានចូលនិវត្តន៍ និង ៣.៥% ដល់មន្ត្រីរដ្ឋការនៅក្នុងខែកក្កដានេះ។ ប្រការនេះនឹងធ្វើឱ្យរដ្ឋាភិបាលត្រូវចំណាយថវិកាជាតិអស់ប្រហែល ៧.៥ ពាន់លានអឺរ៉ូបន្ថែមទៀត។
ក្រៅពីនេះ សេចក្ដីព្រាងច្បាប់ស្ដីពី «ការបង្កើនលទ្ធភាពទិញ» របស់ រដ្ឋាភិបាលបារាំង ក៏ថែមទាំងលើកឡើងនូវវិធានការហិរញ្ញវត្ថុជាច្រើនផ្សេងទៀតដូចជា ការផ្ដល់ជំនួយដល់គ្រួសារដែលមានប្រាក់ចំណូលទាបចំនួន ១០០ អឺរ៉ូ សម្រាប់ថ្លៃអាហារ, ១០០ អឺរ៉ូ ដើម្បីត្រៀមសម្រាប់ឆ្នាំសិក្សាថ្មី រួមនឹងប្រាក់ឧបត្ថម្ភ ៥០ អឺរ៉ូ សម្រាប់ក្មេងម្នាក់, ថ្លៃឈ្នួលផ្ទះត្រូវបានកំណត់មិនឱ្យឡើងលើសពី ៣.៥% រហូតដល់ខែតុលា ២០២៣, ថ្លៃសេវាទូរទស្សន៍រដ្ឋ ១៣៨ អឺរ៉ូ ត្រូវបានលុបចោល, ខ្ទង់ប្រាក់អាហារូបករណ៍សម្រាប់និស្សិតនឹងត្រូវបង្កើន ៤% បន្ថែមទៀត។
តាមគម្រោង សេចក្ដីព្រាងច្បាប់ស្ដីពី «ការបង្កើនលទ្ធភាពទិញ» ខាងលើ នឹងត្រូវបាននាយករដ្ឋមន្ត្រីបារាំង Elisabeth Borne បញ្ជូនឡើងទៅកាន់សភានៅថ្ងៃទី ១៨ កក្កដាខាងមុខ ប៉ុន្តែ សេចក្ដីព្រាងច្បាប់នេះទំនងជានឹងត្រូវជួបការជំទាស់ពីក្រុមប្រឆាំងនៅក្នុងសភា៕
July 8, 2022
ក្រសួងពាណិជ្ជកម្មរបស់ វៀតណាម ផ្ទល់ប្រាក់ជំនួយថ្លៃសាំងដល់ប្រជានេសាទ
ក្រសួងឧស្សាហកម្ម និងពាណិជ្ជកម្មវៀតណាម ទើបតែបានដាក់សំណើទៅកាន់នាយករដ្ឋមន្ត្រី ស្ដីពីការផ្ដល់ប្រាក់ឧបត្ថម្ភដល់ប្រជាពលរដ្ឋដែលរងផលប៉ះពាល់ពីបញ្ហាប្រេងសាំងឡើងថ្លៃ ក្នុងនោះក៏មានគោលដៅជាប្រជានេសាទផងដែរ។
យោងតាម ក្រសួងឧស្សាហកម្ម និងពាណិជ្ជកម្មវៀតណាម ប្រជានេសាទបាន និងកំពុងរងឥទ្ធិពលធ្ងន់ធ្ងរដោយសារប្រេងសាំងឡើងថ្លៃខ្ពស់ និងត្រូវកាត់បន្ថយសកម្មភាពនេសាទ និងការចំណាយប្រចាំថ្ងៃ។
ដោយមូលហេតុខាងលើ ក្រសួងឧស្សាហកម្ម និងពាណិជ្ជកម្មវៀតណាម ស្នើសុំនាយករដ្ឋមន្ត្រី ណែនាំឱ្យ ក្រសួងការងារ យុទ្ធជនពិការ និងសង្គមកិច្ច ដឹកនាំ សហការជាមួយ ក្រសួងហិរញ្ញវត្ថុ រួមនឹងបណ្ដាក្រសួងដែលពាក់ព័ន្ធ ក៏ដូចជាតំបន់ដែលមានសកម្មភាពនេសាទ ដើម្បីចាត់ចែងថវិកា ជួយសម្រួលតម្លៃប្រេងសាំងដល់ប្រជានេសាទ នេះបើតាមសារព័ត៌មានវៀតណាម VOV។
ការឧបត្ថម្ភប្រាក់សម្រាប់ថ្លៃប្រេងសាំងខាងលើនឹងជួយឱ្យប្រជានេសាទមានលទ្ធភាពចេញទៅនេសាទនៅលើផ្ទៃសមុទ្រដូចធម្មតា។ គិតមកដល់បច្ចុប្បន្ន កប៉ាល់ និងទូកនេសាទប្រមាណពី ៤០ ទៅ ៥០% បានផ្អាកសកម្មភាព ប៉ះពាល់ធ្ងន់ធ្ងរដល់ប្រាក់ចំណូល និងជីវភាពរស់នៅរបស់សហគមន៍នេសាទ។ បញ្ហានេះក៏បានជះឥទ្ធិពលដល់ប្រភពផ្គត់ផ្គង់ជលផលក្នុងប្រទេស និងការនាំចេញផងដែរ៕
July 8, 2022
ក្រុមហ៊ុនរបស់មហាសេដ្ឋី Elon Musk ទទួលយកការទូទាត់ដោយប្រាក់គ្រីបតូ Dogecoin
The Boring Company បានឱ្យដឹងថា អតិថិជនអាចទូទាត់ប្រាក់ដោយប្រើប្រាស់រូបិយវត្ថុឌីជីថលគ្រីបតូ Dogecoin នៅពេលប្រើប្រាស់ប្រព័ន្ធផ្លូវក្រោមដី Loop នៅ Las Vegas សហរដ្ឋអាម៉េរិក។
បច្ចុប្បន្ន ប្រព័ន្ធ Loop មិនគិតថ្លៃសេវាចំពោះអតិថិជន និងមិនទាន់ត្រូវបានប្រកាសអំពីពេលវេលាដែលត្រូវគិតថ្លៃ។ ប៉ុន្តែ ក្រុមហ៊ុន The Boring Company គ្រោងនឹងលក់សំបុត្រ ១.៥ ដុល្លារ សម្រាប់ការជិះមួយលើក ឬ ២.៥ ដុល្លារ សម្រាប់មួយថ្ងៃ។
អតិថិជនអាចស្គែនកូដ QR នៅលើជញ្ជាំងក្នុងស្ថានីយ Resorts World ដើម្បីទិញសំបុត្រ។ អតិថិជនអាចទូទាត់ដោយប្រើប្រាស់រូបិយប័ណ្ណដុល្លារអាម៉េរិក, កាត់ឥណទាន និងប្រាក់ឌីជីថលគ្រីបតូ Dogecoin។
ប្រព័ន្ធផ្លូវក្រោមដី Loop
គម្រោងប្រព័ន្ធផ្លូវក្រោមដីនេះត្រូវបាន Elon Musk ប្រកាសជាលើកដំបូងកាលពីចុងឆ្នាំ ២០១៦។ លោកបានហៅគម្រោងនេះថា The Boring Company និងបានឱ្យជីកកាយរូងក្រោមដីនៅខាងក្រៅទីស្នាក់ការរបស់ SpaceX នៅ California។
រថយន្តអគ្គិសនី Tesla ដែលបើកបរនៅក្នុងប្រព័ន្ធផ្លូវក្រោមដីខាងលើ បច្ចុប្បន្នមានល្បឿនប្រហែល ៥៦ គីឡូម៉ែត្រ/ម៉ោង។ ប្រព័ន្ធនេះមិនមានកាលបរិច្ឆេទនៃការចេញដំណើរជាក់លាក់ដូចរថយន្តក្រុង ឬរថភ្លើងក្រោមដី ប៉ុន្តែ ភ្ញៀវត្រូវរង់ចាំតែប៉ុន្មាននាទីប៉ុណ្ណោះនឹងមានជើងអាចចេញដំណើរបាន។
Loop មានស្ថានីយចំនួន ៤ នៅ Las Vegas និងគ្រោងសាងសង់ ៥០ កន្លែងបន្ថែមទៀតនៅទីនេះ។ Boring Company ក៏កំពុងអនុវត្តគម្រោងនានានៅ Florida និង Texas ផងដែរ។
ប្រាក់ឌីជីថលគ្រីបតូ Dogecoin
និយាយអំពី Dogecoin វិញ៖ វាគឺជាល្បែងលេងសើចមួយនៅលើអ៊ីនធើណិតកាលពីឆ្នាំ ២០១៣។ ប្រាក់ឌីជីថលគ្រីបតូនេះ រងការរិះគន់ជាច្រើន។ សូម្បីតែសហស្ថាបនិក Jackson Palmer ក៏បានប្រកាសចាកចេញពី Dogecoin ដោយមិនវិលត្រលប់។
Dogecoin ល្បីឈ្មោះនៅពេលត្រូវបាន Elon Musk លើកយកមកនិយាយជាញឹកញាប់នាពេលថ្មីៗនេះ។ ១ Dogecoin បច្ចុប្បន្នមានតម្លៃប្រហែល ៧ សេនដុល្លារ ទាបជាងឆ្ងាយបើធៀបនឹង ៦៨ សេន កាលពីឆ្នាំកន្លង។ ប្រាក់នេះបានឡើងថ្លៃ ៤,០០០% កាលពីឆ្នាំ ២០២១ ប៉ុន្តែ បានធ្លាក់ថ្លៃ ៧០% ក្នុងរយៈពេល ១២ ខែកន្លង៕
July 7, 2022
ចិនដីគោក ធ្វើតេស្តយន្តហោះទម្ងន់ «មហាស្រាល» ធ្វើអំពីសរសៃកាបូន
យន្តហោះ ២ កៅអី ZA800 ដែលអភិវឌ្ឍដោយក្រុមហ៊ុន ZAir ត្រូវបានផលិតអំពីសរសៃកាបូន អាចហោះហើរក្នុងល្បឿន ២២២ គីឡូម៉ែត្រ/ម៉ោង និងអាចហោះបានចម្ងាយ ១,២០០ គីឡូម៉ែត្រ។
យន្តហោះ ZA800 ត្រូវបានសាកល្បងការហោះហើរដំបូងដោយជោគជ័យនៅឯទីក្រុង Jingmen នៃខេត្ត Hubei ប្រទេសចិន កាលពីថ្ងៃទី ៤ កក្កដា។
នេះគឺជាយន្តហោះមួយប្រភេទក្នុងចំណោមយន្តហោះធុនស្រាលទំនើបបំផុតក្នុងពិភពលោក។ វាអាចហោះនៅពេលយប់ ក្នុងល្បឿន ២២២ គីឡូម៉ែត្រ/ម៉ោង និងអាចហោះបានចម្ងាយ ១,២០០ គីឡូម៉ែត្រ។
យន្តហោះ ២ កៅអី ZA800 ដែលអភិវឌ្ឍដោយក្រុមហ៊ុន ZAir នេះ ត្រូវបានផលិតឡើងដោយធនធានក្នុងស្រុកទាំងស្រុង។
Xu Qiang ប្រធានផ្នែកបច្ចេកវិទ្យា នៃក្រុមហ៊ុន ZAir និយាយថា «កន្លងមក យន្តហោះប្រភេទនេះស្ទើរតែទាំងអស់ ត្រូវបានផលិតអំពីសមាសធាតុអាលុយមីញូម និងមានផ្នែកជាច្រើន ដូច្នេះតម្លៃក៏ថ្លៃ ហើយសមាសធាតុអាលុយមីញូមក៏មិនរឹងមាំដូចសរសៃកាបូន។ ដូច្នេះហើយ ការប្រើប្រាស់សរសៃកាបូននៅក្នុងយន្តហោះ គឺមានប្រៀបជាងពីរប្រការ៖ កាត់បន្ថយទម្ងន់ និងមានប្រសិទ្ធភាពជាង»។
តាមគម្រោង យន្តហោះ ZA800 នឹងត្រូវបានផលិតចំនួនច្រើននៅក្នុងឆ្នាំនេះ និងត្រូវបានប្រើប្រាស់ដើម្បីការងារហ្វឹកហាត់ ការធ្វើដំណើរលក្ខណៈឯកជន សកម្មភាពនាំផ្លូវ និងក្នុងវិស័យជាច្រើនទៀត។
July 7, 2022
រាជរដ្ឋាភិបាលជប៉ុន ដំឡើងខ្ទង់ប្រាក់ជំនួយលើថ្លៃប្រេងសាំងក្នុងស្រុក
រាជរដ្ឋាភិបាលជប៉ុន ចាប់ផ្ដើមអនុវត្តកម្មវិធីផ្ដល់ប្រាក់ឧបត្ថម្ភលើតម្លៃប្រេងសាំង ៣.៤ យ៉េន/លីត្រ ចាប់ពីថ្ងៃទី ២៧ មករា ប៉ុន្តែ ចាប់ពីថ្ងៃទី ៧ កក្កដា ខ្ទង់ជំនួយនេះគ្រោងនឹងត្រូវបានដំឡើងដល់ ៤០.៨ យ៉េន/លីត្រ (ប្រហែល ១,២០០ រៀល)។
កាលពីថ្ងៃទី ៦ កក្កដា ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន (METI) បានប្រកាសថា គិតត្រឹមថ្ងៃទី ៤ កក្កដា តម្លៃលក់រាយប្រេងសាំងជាមធ្យមនៅប្រទេសនេះ បានធ្លាក់ចុះ ១.៣ យ៉េន/លីត្រ ធៀបនឹង ១ សប្ដាហ៍មុននោះ មកនៅត្រឹម ១៧៣.៦ យ៉េន/លីត្រ (ប្រហែល ៥,២០០ រៀល)។ នេះគឺជាលើកដំបូងហើយនៅក្នុងរយៈ ៥ សប្ដាហ៍ ដែលតម្លៃលក់រាយប្រេងសាំងជាមធ្យមនៅប្រទេសនេះបានធ្លាក់ថ្លៃ។
ក្នុងអំឡុងពេលពីថ្ងៃទី ៣០ មិថុនា ដល់ ៦ កក្កដា រាជរដ្ឋាភិបាលជប៉ុន បានឧបត្ថម្ភ ៣៨.៤ យ៉េន/លីត្រ ដល់បណ្ដាក្រុមហ៊ុននាំចូល និងចែកចាយប្រេងសាំងក្នុងប្រទេស ដើម្បីធ្វើឱ្យតម្លៃប្រេងសាំងធ្លាក់ថ្លៃ ៣៦.២ យ៉េន/លីត្រ។ រាជរដ្ឋាភិបាលជប៉ុន គ្រោងនឹងដំឡើងខ្ទង់ប្រាក់ជំនួយសម្រាប់ថ្លៃប្រេងសាំង ឡើងដល់ ៤០.៨ យ៉េន/លីត្រ ចាប់ពីថ្ងៃទី ៧ កក្កដា។
រាជរដ្ឋាភិបាលជប៉ុន ចាប់ផ្ដើមអនុវត្តកម្មវិធីផ្ដល់ប្រាក់ឧបត្ថម្ភលើតម្លៃប្រេងសាំង ៣.៤ យ៉េន/លីត្រ ចាប់ពីថ្ងៃទី ២៧ មករា ក្នុងបំណងទប់ទល់នឹងការឡើងថ្លៃខ្ពស់របស់ទំនិញនេះ។ ដំបូងឡើយ រដ្ឋាភិបាលជប៉ុន ផ្ដល់ខ្ទង់ប្រាក់ឧបត្ថម្ភត្រឹមតែ ៣.៤ យ៉េន/លីត្រ ដល់ក្រុមហ៊ុននាំចូល និងចែកចាយប្រេងសាំងក្នុងស្រុកចំនួន ២៩ ស្ថាប័ន ហើយគ្រោងនឹងបញ្ចប់កម្មវិធីឧបត្ថម្ភនេះត្រឹមចុងខែមីនា ២០២២។ ក៏ប៉ុន្តែ ដោយសារប្រេងឆៅពិភពលោកចេះតែឡើងថ្លៃ បន្ទាប់ពី រុស្ស៊ី ចូលឈ្លានពានលើ អ៊ុយក្រែន ជប៉ុន ក៏ត្រូវដំឡើងខ្ទង់ប្រាក់ជំនួយ និងពន្យារពេលកម្មវិធីនេះជាបន្តបន្ទាប់៕
July 7, 2022
Citigroup ៖ តម្លៃប្រេងអាចធ្លាក់មកនៅត្រឹម ៦៥ ដុល្លារអាម៉េរិក/ធុង នៅចុងឆ្នាំនេះ
ការព្រួយបារម្ភអំពីហានិភ័យសេដ្ឋកិច្ចធ្លាក់ទៅក្នុងវិបត្តិ បណ្ដាលឱ្យប្រេងពិភពលោកបន្តធ្លាក់ថ្លៃនៅក្នុងការជួញដូរក្នុងថ្ងៃទី ៦ កក្កដា ហើយបើយោងតាមក្រុមហ៊ុន Citigroup តម្លៃប្រេង Brent អាចធ្លាក់មកនៅត្រឹម ៦៥ ដុល្លារ/ធុង នៅចុងឆ្នាំ ២០២២ បើសិនជាវិបត្តិសេដ្ឋកិច្ចកើតឡើង។
ចប់ការជួញដូរនៅក្នុងទីផ្សារ New York កាលពីម្សិលមិញ តម្លៃប្រេង WTI ប្រគល់ក្នុងខែសីហា បានធ្លាក់ចុះ ៩៧ សេនដុល្លារ (១%) មកនៅត្រឹម ៩៨.៥៣ ដុល្លារ/ធុង។ ក្នុងគ្រានោះដែរ ក្នុងទីផ្សារនៅ ទីក្រុងឡុងដ៍ តម្លៃប្រេង Brent ប្រគល់ក្នុងខែកញ្ញា បានធ្លាក់ចុះ ២.០៨ ដុល្លារ (២%) មកនៅត្រឹម ១០០.៦៩ ដុល្លារអាម៉េរិក/ធុង។ ក្នុងការជួញដូរកាលពីម្សិលមិញ ប្រេង Brent ពេលខ្លះបានធ្លាក់ថ្លៃមកនៅក្រោម ១០០ ដុល្លារ/ធុង។
ក្នុងការជួញដូរមួយថ្ងៃមុននោះ ប្រេង WTI បានធ្លាក់ថ្លៃមកក្រោម ១០០ ដុល្លារ/ធុង។ ជាក់ស្ដែង តម្លៃប្រេង WTI ប្រគល់ក្នុងខែសីហា កាលពីម្សិលម្ង៉ៃបានធ្លាក់ចុះ ៨.៩៣ ដុល្លារ (៨.២%) មកនៅត្រឹម ៩៩.៥០ ដុល្លារអាម៉េរិក/ធុង។
ការប្រែប្រួលនៃតម្លៃប្រេង បានបង្ហាញអំពីការព្រួយបារម្ភរបស់អ្នកវិនិយោគចំពោះហានិភ័យសេដ្ឋកិច្ចសកលត្រូវធ្លាក់ទៅក្នុងវិបត្តិ ដោយសារតែគោលនយោបាយបង្កើនការប្រាក់ដើម្បីទប់ទល់នឹងបញ្ហាអតិផរណារបស់ប្រទេសជាច្រើនក្នុងពិភពលោក ដែលប៉ះពាល់ដល់តម្រូវការប្រើប្រាស់ថាមពល។
យោងតាមក្រុមហ៊ុន Citigroup ប្រេងឆៅអាចធ្លាក់ថ្លៃមកនៅត្រឹម ៦៥ ដុល្លារអាម៉េរិក/ធុងនៅចុងឆ្នាំនេះ និងនៅត្រឹម ៤៥ ដុល្លារ/ធុងនៅចុងឆ្នាំ ២០២៣ បើសិនវិបត្តិសេដ្ឋកិច្ចកើតឡើង។
ក្រុមអ្នកវិភាគរបស់ Citigroup បានឱ្យដឹងថា ការរំពឹងទុកនេះគឺយោងទៅលើលក្ខខណ្ឌ «OPEC+ មិនធ្វើអន្តរាគមន៍ចូលក្នុងទីផ្សារ ហើយការវិនិយោគទៅលើសកម្មភាពរុករកប្រេងត្រូវធ្លាក់ចុះ៕
July 7, 2022