រដ្ឋមន្ត្រីក្រសួងថាមពល និងធនធានរ៉ែឥណ្ឌូណេស៊ី កាលពីថ្ងៃទី ១៣ កក្កដា បានឱ្យដឹងថា ឥណ្ឌូណេស៊ី (ប្រទេសដែលនាំចេញធ្យូងថ្មធំជាងគេក្នុងពិភពលោក) នឹងអាចបង្កើនបរិមាណធ្យូងថ្មដើម្បីជួយឆ្លើយតបនឹងតម្រូវការពីបណ្ដាប្រទេសដែលបាត់បង់ប្រភពផ្គត់ផ្គង់ពី រុស្ស៊ី។
នៅខាងក្រៅវេទិកាថាមពល Sydney ដែលរៀបចំដោយ រដ្ឋាភិបាលអូស្ត្រាលី និងស្ថាប័នថាមពលអន្តរជាតិ លោក Arifin Tasrif បានឱ្យដឹងថា ប្រទេសមួយចំនួនបានស្នើឱ្យ ឥណ្ឌូណេស៊ី ផ្គត់ផ្គង់ធ្យូងថ្ម បន្ទាប់ពី រុស្ស៊ី រងការដាក់ទណ្ឌកម្មទាក់ទងនឹងសង្គ្រាមនៅ អ៊ុយក្រែន។
ក្នុងឆ្នាំនេះ ឥណ្ឌូណេស៊ី ដាក់ផែនការទាញយករ៉ែធ្យូងថ្មឱ្យបាន ៦៦៣ លានតោន។ រដ្ឋមន្ត្រី Tasrif មិនបាននិយាយច្បាស់ថា ហ្សាការតា អាចបង្កើនទិន្នផលធ្យូងថ្មឡើងដល់កម្រិតណានោះទេ។
លោក Tasrif បញ្ជាក់ថា «យើងមានកម្លាំងធនធាន។ បើសិនមើលទៅលើតុល្យភាពរវាងការផ្គត់ផ្គង់ និងតម្រូវការ យើងខ្ញុំត្រូវតែបង្កើនបរិមាណរបស់ខ្លួន»។
វេទិកាថាមពល Sydney ផ្ដោតសំខាន់ទៅលើបញ្ហាសន្តិសុខថាមពល និងស្វែងរកវិធីដើម្បីបង្កើនល្បឿននៃការប្ដូរផ្លាស់ទៅរកការបន្សាបកាបូន។ លោក Tasrif អះអាងថា ឥណ្ឌូណេស៊ី ចាត់ទុកការប្រមូលយក និងរក្សាទុកកាបូន (CCS) គឺជាវិធីសំខាន់ដើម្បីសម្រេចបានគោលដៅបន្សាបកាបូន និងមានគម្រោងផ្ដល់ឥណទានដល់បណ្ដាគម្រោង CCS។
បច្ចុប្បន្ន មានគម្រោងសាកល្បង CCS ចំនួន ៣ នៅ ឥណ្ឌូណេស៊ី ក្នុងនោះមាន ២ គម្រោងជារបស់ក្រុមហ៊ុនប្រេងឧស្ម័ន BP និង ExxonMobil Corp និង ១ គម្រោងទៀតជារបស់រដ្ឋាភិបាល បំណងរកមធ្យោបាយប្រមូលយកកាបូនពីវិស័យឧស្សាហកម្ម ដើម្បីរក្សាទុកក្នុងអណ្ដូងរ៉ែអស់ប្រេងនៅបាតសមុទ្រ៕
