សង្គម និងសេដ្ឋកិច្ច - La Reine Media

សហភាពអឺរ៉ុប អនុម័តគម្រោងថាមពលអ៊ីដ្រូសែន តម្លៃច្រើនពាន់លានអឺរ៉ូ

គម្រោងផលិតថាមពលអ៊ីដ្រូសែន ថ្មផ្ទុកថាមពល និងឃ្លាំងផ្ទុកថាមពលជាដើម ទើបតែទទួលបានការអនុញ្ញាតជាផ្លូវការពី គណៈកម្មាធិការអឺរ៉ុប។

គណៈកម្មាធិការអឺរ៉ុប (EC) បានផ្ដល់ការអនុញ្ញាតសម្រាប់គម្រោងផលិតថាមពលអ៊ីដ្រូសែន តម្លៃប្រហែល ៥.៤ ពាន់លានអឺរ៉ូ (៥.៤ ពាន់លានដុល្លារអាម៉េរិក) ដែលត្រូវបានគាំទ្រ និងឧបត្ថម្ភដោយ សមាជិកសហភាពអឺរ៉ុប (EU) និងក្រុមហ៊ុនចំនួន ៣៥ ក្នុងពិភពលោក។

គម្រោងនេះត្រូវបានបង្កើតឡើងក្នុងបំណងជំរុញសមត្ថភាពប្រកួតប្រជែងក្នុងការផលិតថាមពល ហើយសេដ្ឋកិច្ចរបស់ EU ក៏ត្រូវបានរំពឹងថា នឹងទាក់ទាញបានទុនវិនិយោគពីឯកជនប្រមាណ ៨.៨ ពាន់លានអឺរ៉ូផងដែរ។

ច្រើនឆ្នាំកន្លងមកនេះ EU បាន «បើកភ្លើងខៀវ» សម្រាប់គម្រោងដែលមានការឧបត្ថម្ភរួមដើម្បីអភិវឌ្ឍប្រភេទថ្មផ្ទុកថាមពល ហេដ្ឋារចនាសម្ព័ន្ធទាក់ទងនឹងថាមពលបៃតងជាដើម ដោយបញ្ចូលវិស័យទាំងនេះទៅក្នុងបញ្ជីគម្រោងសំខាន់ដើម្បីផលប្រយោជន៍រួមរបស់ អឺរ៉ុប (IPCEI)។ បណ្ដាគម្រោងនេះក៏ទទួលបានអត្ថប្រយោជន៍ទាក់ទងនឹងបញ្ហាផ្ដល់ជំនួយរបស់រដ្ឋាភិបាល។

គម្រោងនេះគ្រប់គ្រងសកម្មភាពផលិតថាមពលអ៊ីដ្រូសែន ថ្មផ្ទុកថាមពល ឃ្លាំងផ្ទុកថាមពល ការដឹកជញ្ជូន និងចែកចាយថាមពលអ៊ីដ្រូសែន រួមនឹងផលិតផលសម្រាប់អ្នកប្រើប្រាស់ ពិសេសក្នុងវិស័យចល័តជាដើម។ល។

July 16, 2022

ឥណ្ឌូណេស៊ី ព្រមានថា ៦០% នៃបណ្ដាប្រទេសក្រីក្រ មានហានិភ័យក្ស័យធន

រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី យល់ថា ផលប៉ះពាល់នៃសង្គ្រាមរវាង រុស្ស៊ី-អ៊ុយក្រែន វិបត្តិទំនិញ និងបញ្ហាអតិផរណាទូទាំងពិភពលោកដែលកើនឡើងគឺជាមូលហេតុនាំឱ្យបំណុលត្រូវកកស្ទះ។

កាលពីថ្ងៃទី ១៥ កក្កដា រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី លោកស្រី Sri Mulyani បានព្រមានថា ប្រហែល ៦០% ក្នុងចំណោមបណ្ដាប្រទេសក្រីក្រ កំពុងប្រឈមនឹងហានិភ័យធ្លាក់ទៅក្នុងស្ថានភាពក្ស័យធន ក្នុងគ្រាដែលអតិផរណាកើនឡើងខ្ពស់ និងបណ្ដាញផ្គត់ផ្គង់ស្បៀងទូទាំងសកលលោកត្រូវដាច់។

ប្រសាសន៍របស់ រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី ត្រូវបានលើកឡើងនៅក្នុងពិធីបើកមហាសន្និបាតរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្ដាល នៃបណ្ដាប្រទេសជាសមាជិករបស់ G20 (FMCBG) លើកទីបីនៅកោះ Bali ប្រទេសឥណ្ឌូណេស៊ី។

មហាសន្និបាតរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្ដាល នៃបណ្ដាប្រទេសជាសមាជិករបស់ G20 (FMCBG) លើកទីបីនៅកោះ Bali ប្រទេសឥណ្ឌូណេស៊ី។

មុននោះ ប្រធានធនាគារពិភពលោក (WB) David Malpass បានព្រមានថា ប្រទេសមួយចំនួននឹងក្ស័យធនដោយសារផលប៉ះពាល់ពីសង្គ្រាមរវាង រុស្ស៊ី-អ៊ុយក្រែន និងបញ្ហាដាច់បណ្ដាញផ្គត់ផ្គង់ទូទាំងសកលលោក។ លោក Malpass បានឱ្យដឹងថា សម្រាប់ប្រទេសជាច្រើន បញ្ហាឱនភាពសេដ្ឋកិច្ចនឹងពិបាកចៀសផុត។ សេដ្ឋកិច្ចរបស់ប្រទេសមួយដែលនឹងត្រូវបានចាត់ទុកថាឱនភាព ឬវិបត្តិ គឺនៅពេលសេដ្ឋកិច្ចប្រទេសនោះមានកំណើនអវិជ្ជមាន ក្នុង ២ ត្រីមាសបន្តបន្ទាប់។

មហាសន្និបាត FMCBG លើកទីបី មានការចូលរួមរបស់តំណាងជាង ៤០០ រូប មកពីបណ្ដាប្រទេសជាសមាជិក G20 និងបណ្ដាអង្គការអន្តរជាតិ ក្នុងនោះមានរដ្ឋមន្ត្រីហិរញ្ញវត្ថុ ១៧ រូប និង ប្រធានធនាគារកណ្ដាល ១០ រូប។

ឥណ្ឌូណេស៊ី ដែលជាប្រធានប្ដូរវេនរបស់ FMCBG ក៏បានអញ្ជើញរដ្ឋមន្ត្រីហិរញ្ញវត្ថុអ៊ុយក្រែន ចូលរួមព្រឹត្តិការណ៍នេះផងដែរ៕

July 16, 2022

Tesla អាចបញ្ចុះតម្លៃរថយន្ត បើសិនអតិផរណាត្រូវបានគ្រប់គ្រង

បន្ទាប់ពីបានដំឡើងថ្លៃដើម្បីទប់ទល់នឹងឥទ្ធិពលរបស់កូវីដ-១៩ និងវិបត្តិបណ្ដាញផ្គត់ផ្គង់ មហាសេដ្ឋី Elon Musk បានអះអាងថា ការបញ្ចុះតម្លៃរថយន្តអគ្គិសនី នឹងត្រូវបានអនុវត្ត បើសិនស្ថានភាពអតិផរណាត្រូវបានកែលម្អ។

កាលពីថ្ងៃទី ១៥ កក្កដា នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk បានប្រកាសថា អាចនឹងមានការបញ្ចុះតម្លៃរថយន្ត នៅពេលអតិផរណាត្រូវបានគ្រប់គ្រង។ នេះគឺជាការឆ្លើយតបរបស់លោក Musk នៅពេលមានគេសួរនៅលើបណ្ដាញសង្គម Twitter ថា តើ Tesla មានផែនការបញ្ចុះតម្លៃរថយន្តហើយ ឬនៅ ក្រោយពីក្រុមហ៊ុននេះសម្រេចចិត្តដំឡើងថ្លៃដើម្បីទប់ទល់នឹងឥទ្ធិពលរបស់កូវីដ-១៩ និងវិបត្តិបណ្ដាញផ្គត់ផ្គង់។

ក្នុងប៉ុន្មានខែថ្មីៗនេះ រថយន្ត Tesla ត្រូវបានដំឡើងថ្លៃជាបន្តបន្ទាប់ដើម្បីប៉ះប៉ូវលើថ្លៃវត្ថុធាតុដើមដែលកើនឡើងខ្ពស់ រួមនឹងបញ្ហាកង្វះប្រភពផ្គត់ផ្គង់ឈីបជាដើម ធ្វើឱ្យតម្លៃរថយន្ត Tesla ឡើងខ្ពស់ជាងមុនច្រើនពាន់ដុល្លារ។

បញ្ហាទំនិញឡើងថ្លៃបានបណ្ដាលឱ្យក្រុមហ៊ុនជាច្រើនត្រូវរកវិធីដោះស្រាយ ក្នុងនោះមានទាំងការកាត់បន្ថយចំណាយ ការផ្លាស់ប្ដូរគម្រោងប្រើប្រាស់កម្លាំងពលកម្ម និងការដំឡើងថ្លៃផលិតផលជាដើម។ល។

July 16, 2022

ក្រុមហ៊ុនផលិតរថយន្តអគ្គិសនីរបស់ វៀតណាម បើកមជ្ឈមណ្ឌលលក់ ៦ កន្លែង ដំណាលគ្នានៅ សហរដ្ឋអាម៉េរិក

ក្នុងឆ្នាំនេះ VinFast នឹងបន្តបើកមជ្ឈមណ្ឌលលក់រាប់សិនកន្លែងទៀតនៅក្នុងរដ្ឋ California និងកំពុងស្រាវជ្រាវដើម្បីបន្តបើកនៅក្នុងរដ្ឋដទៃទៀតនៅ សហរដ្ឋអាម៉េរិក។

ក្នុងថ្ងៃទី ១៥ កក្កដា (ម៉ោងនៅ កម្ពុជា) ក្រុមហ៊ុន VinFast បានសម្ពោធបើកមជ្ឈមណ្ឌលលក់ VinFast Store ចំនួន ៦ កន្លែងដំបូងក្នុងពេលដំណាលគ្នា នៅក្នុងរដ្ឋ California សហរដ្ឋអាម៉េរិក។

ក្នុងឆ្នាំ ២០២២ VinFast នឹងបន្តបើកមជ្ឈមណ្ឌល VinFast Store ជាង ៣០ កន្លែងទៀតនៅក្នុងរដ្ឋ California និងកំពុងស្រាវជ្រាវដើម្បីបន្តបើកនៅក្នុងរដ្ឋដទៃទៀតនៅ សហរដ្ឋអាម៉េរិក។

VinFast Store មិនត្រឹមតែជាកន្លែងដាក់តាំង និងលក់រថយន្តអគ្គិសនីគុណភាពលំដាប់ខ្ពស់នោះទេ តែក៏ជាកន្លែងដែលអតិថិជនអាចទទួលបានបទពិសេសធ៍ក្នុងការប្រើប្រាស់សេវាកម្មរបស់ក្រុមហ៊ុន VinFast ហើយពួកវាមានទីតាំងនៅក្នុងតំបន់កណ្ដាលក្រុង។

នេះគឺជាយុទ្ធសាស្ត្រទីផ្សាររបស់ក្រុមហ៊ុន VinFast ក្នុងការពង្រីកបណ្ដាញចែកចាយរបស់ខ្លួន ដើម្បីកសាងទំនាក់ទំនងជាមួយអតិថិជន ធានានូវភាពស្និទ្ធស្នាល ទំនុកចិត្តក្នុងពេលប្រើប្រាស់រថយន្តរបស់ក្រុមហ៊ុននេះ៕

July 15, 2022

កំណែពេញលេញនៃយន្តហោះបែបឯកជនតម្លៃ ១៥០,០០០ ដុល្លារ ចាប់ផ្ដើមហោះហើរសាកល្បង

(អ៊ីស្រាអែល)-កំណែគំរូ Air One ដែលជាយន្តហោះមានកង្ហារចំនួន ៨ គ្រឿង និងអាចហោះហើរបាន ២៥០ គីឡូម៉ែត្រ/ម៉ោង បានសាកល្បងហោះហើរបណ្ដែតខ្លួនជាច្រើនលើកដោយជោគជ័យ។

កំណែគំរូពេញលេញដំបូងរបស់ Air One ដែលហោះឡើង និងចុះចតដោយត្រង់ ដំណើរការដោយអគ្គិសនី បានចាប់ផ្ដើមធ្វើការសាកល្បង នេះបើតាម New Atlas ចុះផ្សាយកាលពីថ្ងៃទី ១៣ កក្កដា។ Air One ដែលត្រូវបានអភិវឌ្ឍដោយក្រុមហ៊ុនធុរកិច្ចថ្មី Israel Air របស់ អ៊ីស្រាអែល គឺជាយន្តហោះ ២ កៅអី មានមនុស្សបើកបរ មានតម្លៃប្រហែល ១៥០,០០០ ដុល្លារអាម៉េរិក។ មុននោះ ក្រុមហ៊ុននេះបានសាកល្បងការហោះហើរចំពោះកំណែដែលមានទំហំតូចជាងនេះ។

Air One មានស្លាបវែងចំនួន ២ និងមានបំពាក់កង្ហារតូចៗចំនួន ៨ គ្រឿង។ ដោយពុំមានប្រព័ន្ធរុញច្រានទៅមុខ យន្តហោះនេះត្រូវទេរខ្លួនដូចទៅនឹងយន្តហោះដែលមានកង្ហារច្រើនដទៃទៀត។ Air One អាចហោះបានលឿនបំផុតត្រឹម ២៥០ គីឡូម៉ែត្រ/ម៉ោង និងហោះធម្មតាត្រឹម ១៦០ គីឡូម៉ែត្រ/ម៉ោង។ កម្លាំងអតិបរមារបស់យន្តហោះនេះគឺ ៧៧១ សេះ ខណៈដែលផ្ទុកទម្ងន់បាន ២៥០ គីឡូក្រាម និងហោះបាន ១ ម៉ោង បន្ទាប់ពីបញ្ចូលថាមពលពេញ ហើយហោះបានរយៈចម្ងាយប្រហែល ១៧៧ គីឡូម៉ែត្រ។

កំណែពេញលេញរបស់ Air One ដែលមានទម្ងន់ ៨៦៨ គីឡូក្រាម បានហោះហើរសាកល្បងដំបូងនៅលើវាលស្រែមួយកន្លែងនៅ Megiddo ភាគខាងជើងប្រទេសអ៊ីស្រាអែល កាលពីថ្ងៃទី ២១ មិថុនា។ នេះគឺជាការសាកល្បងហោះហើរបណ្ដែតខ្លួនដោយមានចងខ្សែ ហើយ Air One ក៏បានសាកល្បងហោះហើរបែបនេះជាច្រើនដងមកហើយក្នុងប៉ុន្មានសប្ដាហ៍ចុងក្រោយនេះ។

ដោយមានតម្លៃ ១៥០,០០០ ដុល្លារ Air One ថ្លៃជាងប្រហែលពាក់កណ្ដាល ធៀបនឹងយន្តហោះ Jetson One របស់ ក្រុមហ៊ុនស៊ុយអែត Jetson។ ប៉ុន្តែ Air One មានកៅអីចំនួន ២ ចំណែក Jetson One មានតែ ១ កៅអី។ Air One ហោះបានឆ្ងាយជាង ៣ ដង ធៀបនឹង Jetson One។

ក្រុមហ៊ុន Israel Air បានឱ្យដឹងថា ពួកគេលក់ Air One បានជាង ១៥០ គ្រឿង ហើយគ្រោងនឹងប្រគល់ដល់ដៃអតិថិជនដំបូងៗនៅឆ្នាំ ២០២៤៕

July 15, 2022

តម្លៃឧស្ម័នអាចកើនឡើងខ្ពស់ជាងបច្ចុប្បន្ន ៣ ដង នៅឆ្នាំក្រោយ! នេះជាការព្រមានរបស់ អាល្លឺម៉ង់

យោងតាមការគណនារបស់ Bundesnetzagentur អគ្គិសនី ១ គីឡូវ៉ាត់ដែលបានមកពីឧស្ម័ននៅ អាល្លឺម៉ង់ មានតម្លៃប្រហែល ២២ អឺរ៉ូ ខ្ពស់ជាង ៤ ដង ធៀបនឹងឆ្នាំ ២០២១ ហើយអាចកើនឡើងយ៉ាងតិច ៣ ដង នៅក្នុងឆ្នាំក្រោយ។

យោងតាមប្រកាសកាលពីថ្ងៃទី ១៤ កក្កដា របស់ អាជ្ញាធរជាតិគ្រប់គ្រងបណ្ដាញ Bundesnetzagentur (Federal Network Agency) របស់ អាល្លឺម៉ង់ បន្ទាប់ពីការផ្គត់ផ្គង់ឧស្ម័នរបស់ រុស្ស៊ី តាមរយៈបណ្ដាញបំពង់បង្ហូរ Nord Stream 1 ត្រូវបានផ្អាក កម្រិតនៃការប៉ះប៉ូវរបស់ឃ្លាំងឧស្ម័ននៅ អាល្លឺម៉ង់ កំពុងថយចុះ ក្នុងនោះ ឧស្ម័ននៅក្នុងឃ្លាំងមួយចំនួនកំពុងតែត្រូវបានយកចេញ «ព្រោះតែទីផ្សារ»។

Bundesnetzagentur បានព្រមានថា តម្លៃឧស្ម័នអាចកើនឡើងដល់ ៣ ដង នៅឆ្នាំ ២០២៣។ Bundesnetzagentur បានប្រកាសថា ជារួមបរិមាណឧស្ម័នដែលត្រូវបានយកចេញពីឃ្លាំង គឺច្រើនជាងធៀបនឹងបរិមាណដែលបានបញ្ជូនចូលក្នុងឃ្លាំង។

បញ្ហាខាងលើនេះធ្វើឱ្យការរក្សាឧស្ម័នដែលរក្សាទុកសម្រាប់រដូវរងា ក្លាយជារឿងលំបាក និងនាំឱ្យបរិមាណឧស្ម័នដែលរក្សាទុកក្នុងករណីខ្វះខាតត្រូវថយចុះ។ កម្រិតនៃការបំពេញឃ្លាំងឧស្ម័ននៅ អាល្លឺម៉ង់ បច្ចុប្បន្នគឺ ៦៤.៥%។

បច្ចុប្បន្ន Nord Stream 1 កំពុងស្ថិតក្នុងដំណាក់កាលជួសជុល ហើយកិច្ចការនេះគ្រោងនឹងបង្ហើយនៅថ្ងៃទី ២១ កក្កដា។ ក្នុងដំណាក់កាលនេះ ពុំមានទំនិញជាឧស្ម័នធម្មជាតិណាមួយត្រូវបានដឹកជញ្ជូនទៅកាន់ អាល្លឺម៉ង់ តាមរយៈបណ្ដាញ Nord Stream 1 ឡើយ។

ថ្វីបើមានវិធីដឹកជញ្ជូនផ្សេងដូចជា ប្រព័ន្ធបំពង់បង្ហូរ Yamal ឬ ការដឹកជញ្ជូនឆ្លងកាត់ ប្រទេសអ៊ុយក្រែន ប៉ុន្តែ ទាំងនេះមិនត្រូវបានគេប្រើប្រាស់នោះទេ នៅក្នុងគ្រាដែល Nord Stream 1 កំពុងត្រូវជួសជុល។

ទោះជាយ៉ាងណាក៏ដោយ Bundesnetzagentur បានបញ្ជាក់ថា ប្រភពផ្គត់ផ្គង់ឧស្ម័ននៅ អាល្លឺម៉ង់ ជារួមនៅតែមាន «ស្ថិរភាព» ហើយសន្តិសុខនៃប្រភពផ្គត់ផ្គង់នៅតែត្រូវបានធានា។

រាប់ចាប់តាំងពីឆ្នាំ ២០២១ តម្លៃថាមពលនៅ អឺរ៉ុប ពិសេសគឺនៅ ប្រទេសអាល្លឺម៉ង់ បានកើនឡើងខ្ពស់ ដោយមួយផ្នែកធំគឺបណ្ដាលមកពីវិបត្តិសកល៕

July 15, 2022

ក្រុមហ៊ុនវៀតណាមពីរស្ថាប័ននៅកម្ពុជា សហការគ្នាអភិវឌ្ឍសេវាទូទាត់ប្រាក់តាមប្រព័ន្ធឌីជីថល

អគ្គនាយកក្រុមហ៊ុន Metfone បានឱ្យដឹងថា ការចុះហត្ថលេខាលើកិច្ចព្រមព្រៀងសហការគ្នានេះគឺជាឱកាសដើម្បីតភ្ជាប់ទំនាក់ទំនងសហប្រតិបត្តិរវាង Metfone និង Angkormilk រួមចំណែកផ្ដល់នូវតម្លៃល្អប្រសើរសម្រាប់ កម្ពុជា។

ក្រុមហ៊ុនវៀតណា ២ ស្ថាប័ន ដែលកំពុងរកស៊ីនៅ កម្ពុជា គឺ Viettel Cambodia (Metfone) និង Angkormilk ទើបតែបានចុះហត្ថលេខាលើកិច្ចព្រមព្រៀងសហការគ្នាអភិវឌ្ឍសេវាកម្មទូរគមនាគមន៍ និងទូទាត់តាមប្រព័ន្ធឌីជីថល នៅ កម្ពុជា។

ពិធីចុះហត្ថលេខាលើកិច្ចព្រមព្រៀងសហការគ្រប់ជ្រុងជ្រោយរវាង Metfone និង Angkormilk ត្រូវបានធ្វើឡើងកាលពីរសៀលថ្ងៃទី ១៤ កក្កដា នៅ រាជធានីភ្នំពេញ។

ខ្លឹមសារនៃកិច្ចព្រមព្រៀងខាងលើបានបញ្ជាក់ថា កិច្ចសហការនេះគឺដើម្បីកែលម្អវឌ្ឍនភាពនៃសេវាកម្មទូរគមនាគមន៍ និងសេវាកម្មទូទាត់ប្រាក់តាមប្រព័ន្ធឌីជីថលនៅ កម្ពុជា។

យោងតាមកិច្ចព្រមព្រៀង Metfone និង eMoney នឹងសហការគ្រប់ជ្រុងជ្រោយជាមួយដៃគូក្នុងការផ្ដល់សបវែរលក់ទំនិញនាំចេញនាំចូលពីឃ្លាំង, ខ្សែទូរស័ព្ទទាន់ហេតុការណ៍ (hotline) សម្រាប់សេវាបម្រើអតិថិជន, សេវាផ្ញើសារផ្សព្វផ្សាយ,សេវាអ៊ីនធើណិត, កញ្ចប់សេវាទូរស័ព្ទសម្រាប់ក្រុមហ៊ុន, ស៊ីម data សម្រាប់កាមេរ៉ាសន្តិសុខខាងក្នុងទូ ATM រួមនឹងការផ្ដល់សេវាទូទាត់ប្រាក់តាមប្រព័ន្ធឌីជីថល ដូចជា បើកប្រាក់ខែដល់បុគ្គលិកជាដើម។ល។

Angkormilk គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនវៀតណាម Vinamilk ដែលផ្គត់ផ្គង់ផលិតផលទឹកដោះគោ។ ចំណែក Metfone វិញ គឺជាក្រុមហ៊ុនបុត្រសម្ព័ន្ធរបស់ Viettel ដែលគ្រប់គ្រងដោយកងទ័ពវៀតណាម។

July 15, 2022

ក្រុមហ៊ុនផលិតរថយន្តកូរ៉េខាងត្បូង Hyundai បញ្ចេញម៉ូដែលរថយន្តអគ្គិសនី Ioniq 6

តាមគម្រោង Ioniq 6 នឹងបរបាន ៦១០ គីឡូម៉ែត្រ បន្ទាប់ពីបញ្ចូលថាមពលពេញ ហើយវានឹងត្រូវបាន Hyundai ចាប់ផ្ដើមផលិតនៅ កូរ៉េខាងត្បូង ក្នុងត្រីមាសទីបីខាងមុខ។

ក្រុមហ៊ុនផលិតរថយន្តកូរ៉េខាងត្បូង Hyundai ទើបតែបានបញ្ចេញរថយន្តអគ្គិសនី (EV) ម៉ូដែល Ioniq 6 ថ្មី របស់ខ្លួន។ នេះគឺជារថយន្តប្រភេទស៊ីដាន់ (sendan) ដែលមានរូបរាងប្លែកភ្នែក។ ម៉ូដែល Ioniq 6 មានរូបរាងខុសពី ម៉ូដែល Ioniq 5 ដែលទទួលបានការគាំទ្រច្រើន ហើយដែលនឹងត្រូវចេញលក់ចាប់ពីចុងឆ្នាំនេះ។

SangYup Lee អគ្គនាយករង និងជាប្រធានក្រុមរចនារបស់ Hyuandai បានឱ្យដឹងថា រថយន្តក្នុងត្រកូល Ioniq នឹងមានរូបរាងពិសេសខុសៗគ្នា ក្នុងបំណងភ្ជាប់ទំនាក់ទំនងរវាងក្រុមអ្នករចនា ជាមួយនឹងអតិថិជន តាមរយៈអារម្មណ៍។

Hyundai ឱ្យដឹងថា ម៉ូដែល Ioniq 6 នឹងរត់បាន ៦១០ គីឡូម៉ែត្រ បន្ទាប់ពីបញ្ចូលថាមពលពេញ។ នៅក្នុងរថយន្តនេះក៏មានបំពាក់អេក្រង់ ១២ អ៊ីញចំនួន ២ គ្រឿង សម្រាប់ផ្ដល់ព័ត៌មាន និងការកម្សាន្តដល់អ្នកបើកបរ។

ម៉ូដែល Ioniq 6 ជារថយន្តដែលនឹងដំណើរការដោយថាមពលអគ្គិសនីទាំងស្រុងទីបីនៅ សហរដ្ឋអាម៉េរិក របស់ Hyundai បន្ទាប់ពី Kona និង Ioniq 5។ តាមគម្រោង Hyundai នឹងផលិតរថយន្តអគ្គិសនីម៉ូដែល Ioniq 6 នេះចាប់ពីត្រីមាសទីបីឆ្នាំនេះ ហើយនឹងមានលក់ក្នុងទីផ្សាររបស់ សហរដ្ឋអាម៉េរិក ចាប់ពីត្រីមាសទីមួយឆ្នាំ ២០២៣។

July 14, 2022

វៀតណាម មានកំពង់ផែសមុទ្ររាប់សិបកន្លែង ក្នុងនោះមានប្រភេទពិសេសចំនួន ២

ក្នុងចំណោម ៣៤ កំពង់ផែសមុទ្ររបស់ វៀតណាម មានកំពង់ផែចំនួន ២ ត្រូវបានចាត់ចូលជាប្រភេទពិសេស និង ១១ ជាប្រភេទទីមួយ។

ឧបនាយករដ្ឋមន្ត្រីវៀតណាម លោក Le Van Thanh ទើបតែបានចុះហត្ថលេខាលើសេចក្ដីសម្រេចមួយដែលប្រកាសអំពីប្រភេទកំពង់ផែសមុទ្រចំនួន ៣៤ របស់ វៀតណាម។

យោងតាមសេចក្ដីសម្រេចខាងលើ បច្ចុប្បន្ន វៀតណាម មានកំពង់ផែសមុទ្រសរុបចំនួន ៣៤ ក្នុងនោះមាន ២ ជាប្រភេទពិសេស, ១១ ជាប្រភេទទីមួយ, ៧ ជាប្រភេទទីពីរ និង ១៤ ជាប្រភេទទីបី។

គោលការណ៍ដើម្បីវាយតម្លៃ និងបែងចែកជាប្រភេទចំពោះកំពង់ផែសមុទ្រនៅ វៀតណាម រួមមាន រង្វង់នៃឥទ្ធិពល និងទំហំរបស់កំពង់ផែសមុទ្រ។ ការវាយតម្លៃ និងបែងចែកប្រភេទកំពង់ផែសមុទ្រនេះ ត្រូវបានធ្វើឡើងទៅតាមវិធីផ្ដល់ពិន្ទុ។ កាំនៃពិន្ទុដែលយកមកប្រើសម្រាប់វាយតម្លៃគឺ ១០០ ពិន្ទុ អមនឹងគោលការណ៍លម្អិតជាច្រើន។

July 14, 2022

ពលរដ្ឋអាម៉េរិក កំពុងត្រូវទិញរថយន្តថ្មីក្នុងតម្លៃខ្ពស់មិនធ្លាប់មានពីមុនមក

ក្រុមហ៊ុនស្រាវជ្រាវ Cox Automotive ទើបតែបានឱ្យដឹងថា តម្លៃទិញដូរជាមធ្យមរបស់រថយន្តថ្មី ១ គ្រឿង នៅក្នុងខែមិថុនា ២០២២ គឺ ៤៨,០៨៣ ដុល្លារអាម៉េរិក កើន ១.៩% ធៀបនឹងខែឧសភា ២០២២ និងខ្ពស់ជាងកំណត់ត្រាមុននោះគឺ ៤៧,២០២ ដុល្លារ។

តម្លៃរថយន្តបានកើនឡើងដោយសារតែតម្រូវការប្រើប្រាស់កើនឡើង រថយន្តថ្មីដែលសល់ក្នុងឃ្លាំងមានចំនួនតិច និងចំនួនរថយន្តប្រណិតលក់ចេញបានច្រើន។

សន្ទស្សន៍ថ្លៃទំនិញប្រើប្រាស់ (Customer Price Index-CPI) ដែលជារង្វាស់សម្រាប់វាស់ស្ទង់ទំនិញ និងសេវាកម្មប្រចាំថ្ងៃ បានកើនឡើង ៩.១% ធៀបនឹងដំណាក់កាលដូចគ្នាកាលពីឆ្នាំកន្លង និងខ្ពស់ជាងការព្យាករ ៨.៨% របស់ Dow Jones។

ការកើនឡើងនៃអតិផរណា ភាគច្រើនគឺដោយសារតម្លៃប្រេងសាំង ដែលបានកើន ១១.២% ក្នុងខែមិថុនា។ យោងតាមការិយាល័យស្ថិតិការងារ (BLS) តម្លៃរថយន្តថ្មីបានកើនឡើង ០.៧%/ខែ ចំណែករថយន្តមួយទឹកកើន ១.៦%។

នាយកប្រតិបត្តិរបស់ក្រុមហ៊ុនផលិតរថយន្តកូរ៉េខាងត្បូង Hyundai ប្រចាំ អាម៉េរិកខាងជើង បានអះអាងថា តម្លៃរថយន្តនឹងអាចបន្តកើនឡើងទៀតនាពេលខាងមុខ៕

July 14, 2022

Category: សង្គម និងសេដ្ឋកិច្ច