សង្គម និងសេដ្ឋកិច្ច - La Reine Media

មហាសេដ្ឋីឥណ្ឌា «យកឈ្នះ» លើ Bill Gates ក្លាយជាអ្នកមានជាងគេទី ៤ ក្នុងពិភពលោក

មហាសេដ្ឋី Gautam Adani មានទ្រព្យ ១១២.៥ ពាន់លានដុល្លារអាម៉េរិក ច្រើនជាងសហស្ថាបនិករបស់ Microsoft លោក Bill Gates ប្រមាណ ២៣០ លានដុល្លារ។

យោងតាម Bloomberg Billionaires Index កំពូលអ្នកមាននៅ ឥណ្ឌា លោក Gautam Adani រកបាន ៣៦ ពាន់លានដុល្លារបន្ថែមទៀតក្នុងឆ្នាំនេះ។ នេះគឺជាតួលេខដែលកើនឡើងច្រើនជាងគេក្នុងពិភពលោក។ ចំណែកទ្រព្យរបស់លោក Bill Gates បែរជាត្រូវថយចុះ ដោយសារតែសកម្មភាពមនុស្សធម៌របស់លោក និងភាគហ៊ុនត្រូវបានគេលក់ចោលច្រើន។

គិតត្រឹមក្រោយការជួញដូរក្នុងផ្សារមូលបត្រថ្ងៃទី ២១ កក្កដា លោក Adani មានទ្រព្យសរុប ១១២.៥ ពាន់លានដុល្លារអាម៉េរិក ច្រើនជាងទ្រព្យរបស់លោក Bill Gates ២៣០ លានដុល្លារ ដូច្នេះ តំណែងអ្នកមានជាងគេលំដាប់ទី ៤ ក្នុងពិភពលោក បានធ្លាក់ទៅលើដៃរបស់ មហាសេដ្ឋីឥណ្ឌូរូបនេះ។

កាលពីថ្ងៃទី ១៣ កក្កដាកន្លងទៅ លោក Bill Gates បានប្រកាសថា នឹងបរិច្ចាគប្រាក់ ២០ ពាន់លានដុល្លារសម្រាប់កិច្ចការមនុស្សធម៌។ លោកបានសរសេរលើ Twitter ថា «យើងមានគម្រោងបង្កើនការចំណាយពីជិត ៦ ពាន់លានដុល្លារជារៀងរាល់ឆ្នាំនាបច្ចុប្បន្ន ឡើងដល់ ៩ ពាន់លានដុល្លារជារៀងរាល់ឆ្នាំ នៅឆ្នាំ ២០២៦។ ដើម្បីអនុវត្តគម្រោងនេះ ខ្ញុំនឹងផ្ទេរ ២០ ពាន់លានដុល្លារអាម៉េរិក ទៅក្នុងមូលនិធិ ក្នុងខែនេះ»។

ចំណែកលោក Adani វិញ ក៏កំពុងតែប្រឹងប្រែងបំពេញការងារមនុស្សធម៌របស់លោក។ កាលពីខែមុន លោក Adani បានប្រកាសបរិច្ចាគ ៧.៧ ពាន់លានដុល្លារសម្រាប់កិច្ចការសង្គម៕

July 22, 2022

កសិដ្ឋានឈរត្រង់បំពាក់បច្ចេកវិទ្យាខ្ពស់ ដាំបន្លែបានជាង ៩០០ តោនជារៀងរាល់ឆ្នាំ

(អេមីរ៉ាតអារ៉ាប់រួម/UAE)-កសិដ្ឋាន Emirates Crop One មានទំហំប្រហែល ៣០,៦៥០ ម៉ែត្រក្រឡា និងអាចសន្សំសំច័យទឹកបាន ២៥០ លានលីត្រជារៀងរាល់ឆ្នាំ ធៀបនឹងការដាំបន្លែនៅលើដីខាងក្រៅផ្ទះតាមបែបប្រពៃណី។

កសិដ្ឋានឈរត្រង់គឺជាដំណោះស្រាយដ៏មានប្រសិទ្ធផាព ជួយកាត់បន្ថយវិបត្តិកង្វះដីដាំដុះនាបច្ចុប្បន្ន។ ក្រុមហ៊ុន Crop One Holdings (សហរដ្ឋអាម៉េរិក) និងក្រុមហ៊ុន Emirates Flight Catering (UAE) បានសហការគ្នាសាងសង់កសិដ្ឋានឈរត្រង់ Emirates Crop One នៅ ឌូបៃ ក្បែរព្រលានយន្តហោះអន្តរជាតិ Al Maktoum។ កាលពីថ្ងៃទី ១៨ កក្កដា ក្រុមហ៊ុនទាំងពីរនេះបានប្រកាសបើក Emirates Crop One ហើយបានហៅវាថាជា «កសិដ្ឋានឈរត្រង់ធំជាងគេបង្អស់ក្នុងពិភពលោក»។

Emirates Crop One មានផ្ទៃក្រឡាប្រហែល ៣០,៦៥០ ម៉ែត្រ និងអាចផលិតបន្លែបានជាង ៩០០ តោន ជារៀងរាល់ឆ្នាំ។ ប្រភេទបន្លែដែលដាំនៅក្នុងកសិដ្ឋាននេះសុទ្ធតែប្រកបដោយភាពអនាម័យខ្ពស់ និងមិនចាំបាច់លាងសម្អាត ព្រោះថា ពុំមានថ្នាំសម្លាប់សត្វល្អិត ថ្នាំសម្លាប់ស្មៅ ឬគីមីឡើយ។ Emirates Crop One ប្រើប្រាស់ទឹកតិចជាង ៩៥% ធៀបនឹងកសិដ្ឋានបែបប្រពៃណី ហើយគ្រោងនឹងផលិតបន្លែបាន ៣ តោនជារៀងរាល់ថ្ងៃ។ កសិដ្ឋាននេះក៏ប្រើប្រាស់ការរួមផ្សំរវាងបច្ចេកវិទ្យាបញ្ញាសិប្បនិម្មិត (AI) និងការវិភាគទិន្នន័យដើម្បីនាំមកនូវប្រសិទ្ធភាពខ្ពស់ជាងមុន។

Emirates Crop One បំពាក់ប្រព័ន្ធបង្ហូរទឹកយ៉ាងស្អាត និងអាថ៌កំបាំង បង្ហូរទឹកពីបន្លែមួយដើម ទៅបន្លែមួយដើមទៀត ដើម្បីប្រើប្រាស់ឱ្យមានប្រសិទ្ធភាព។ ទឹកដែលហួតជាចំហាយក្នុងពេលស្រោចស្រពនឹងត្រូវបានទាញយក កែច្នៃ និងបញ្ជូនត្រលប់ចូលប្រព័ន្ធវិញ ជួយសន្សំសំច័យបាន ២៥០ លានលីត្រជារៀងរាល់ឆ្នាំ ធៀបនឹងការដាំនៅខាងក្រៅផ្ទះតាមបែបប្រពៃណី។

បន្លែរបស់ Emirates Crop One នឹងត្រូវបានផ្គត់ផ្គង់សម្រាប់អតិថិជននៅលើជើងយន្តហោះដែលក្រុមហ៊ុន Emirates Flight Catering សហការជាមួយ។ ក្រៅពីនេះ បន្លែរបស់ Emirates Crop One ក៏នឹងមានវត្តមាននៅក្នុងហាងនានានៅក្នុងស្រុកដែលមានយីហោ Bustanica។

Craig Ratajczyk នាយកប្រតិបត្តិរបស់ Crop One បានឱ្យដឹងថា «បេសកកម្មរបស់យើងគឺកសាងអនាគតមួយដែលមានស្ថិរភាពដើម្បីឆ្លើយតបនឹងតម្រូវការចំពោះអាហារស្រស់ អាហារក្នុងស្រុក ហើយកសិដ្ឋានបែបថ្មីនេះជួយបង្ហាញអំពីប្រការទាំងនេះ។ កសិដ្ឋានថ្មីនេះដើរតួនាទីដូចទៅនឹងរូបភាពគំរូមួយសម្រាប់អ្វីដែលអាចធ្វើទៅរួចនៅពាសពេញពិភពលោក»។

យោងតាម Simpleflying កសិដ្ឋាន Emirates Crop One នេះ ត្រូវបានបោះទុនវិនិយោគក្នុងទឹកប្រាក់ប្រមាណ ៤០ លានដុល្លារអាម៉េរិក៕

July 22, 2022

តម្លៃមាសលើទីផ្សារពិភពលោក ងើបឡើងវិញក្នុងថ្ងៃទី ២១ កក្កដា

តម្លៃមាសពិភពលោកងើបក្បាលឡើងបន្តិចក្នុងការជួញដូរកាលពីម្សិលមិញ ក៏ប៉ុន្តែ មើលជារួម មាសបានបាត់បង់តម្លៃជិត ៤០០ ដុល្លារអាម៉េរិក/អោន រាប់ចាប់ពីខែមីនា ២០២២។

តម្លៃមាសពិភពលោកងើបក្បាលឡើងបន្តិចក្នុងការជួញដូរកាលពីថ្ងៃទី ២១ កក្កដា បន្ទាប់ពីកើនជាង ១% ក្នុងពេលដែលប្រាក់ដុល្លារអាម៉េរិកធ្លាក់ថ្លៃ និងការបារម្ភអំពីវិបត្តិសេដ្ឋកិច្ចបានជំរុញឱ្យមាសមានភាពទាក់ទាញជាងមុន ដោយសារតែវាគឺជា «ខ្ទង់វិនិយោគសុវត្ថិភាព»។

នៅវេលាម៉ោងប្រហែល ២៣ និង ៣០ នាទី នៃថ្ងៃទី ២១ កក្កដា (ម៉ោងនៅ កម្ពុជា) តម្លៃមាសប្រគល់ភ្លាម បានកើន ១% ឡើងដល់ ១,៧១២.៦១ ដុល្លារ/អោន ក្រោយពីបានធ្លាក់ថ្លៃដល់ ១,៦៨០.២៥ ដុល្លារ/អោន តាំងពីខែមីនា ២០២២។ មាសប្រគល់មានកាលកំណត់របស់ សហរដ្ឋអាម៉េរិក បានឡើងថ្លៃ ០.៦% ពោលគឺមានតម្លៃ ១,៧១១ ដុល្លារ/អោន (មាស ១ អោន (ounce) ស្មើនឹង ៨.២៩៤២៦ ជី)។

ការដែលប្រាក់អឺរ៉ូឡើងថ្លៃធៀបនឹងប្រាក់ដុល្លារអាម៉េរិក មុនពេលត្រលប់មកស្មើគ្នា ក៏បានរួមចំណែកជួយឱ្យមាសឡើងថ្លៃផងដែរ។

ទោះយ៉ាងណាក៏ដោយ ជារួម មាសបានបាត់បង់តម្លៃជាង ៣៨០ ដុល្លារអាម៉េរិក/អោន រាប់ចាប់ពីខែមីនា ឆ្នាំ ២០២២ ដោយសារតែប្រាក់ដុល្លារអាម៉េរិកឡើងថ្លៃ ធ្វើឱ្យឧបសគ្គដែលកើតពីការប្រាក់ហក់ឡើងត្រូវកើនឡើងខ្ពស់ ដែលនេះគឺជាកត្តាកាត់បន្ថយឱកាសនៃការកាន់កាប់មាស៕

July 22, 2022

Ford ងាកទៅផ្ដោតលើការផលិតរថយន្តអគ្គិសនី ដោយគ្រោងកាត់បន្ថយបុគ្គលិករាប់ពាន់នាក់ក្នុង «រោងចក្ររថយន្តប្រពៃណី»

ក្រុមហ៊ុន Ford គ្រោងនឹងប្រកាសកាត់បន្ថយការងាររាប់ពាន់កន្លែង ក្នុងប៉ុន្មានសប្ដាហ៍ខាងមុខ ដើម្បីបន្ថយការចំណាយ និងបង្កើនការប្ដូរទៅផលិតរថយន្តដើរដោយថាមពលអគ្គិសនី។

Wall Street Journal (WSJ) កាលពីថ្ងៃទី ២០ កក្កដា បានឱ្យដឹងថា ក្រុមហ៊ុនផលិតរថយន្តអាម៉េរិក Ford កំពុងតែត្រៀមខ្លួនកាត់បន្ថយការងារជាង ៤,០០០ កន្លែង ដើម្បីបង្កើនសកម្មភាពក្នុងការផ្លាស់ប្ដូរទៅផលិតរថយន្តអគ្គិសនី (EV) ដែលបច្ចុប្បន្នមានការចាប់អារម្មណ៍ខ្លាំង ដោយសារតែកត្តាប្រេងសាំងឡើងថ្លៃ និងកត្តាបរិស្ថាន និងបម្រែបម្រួលអាកាសធាតុជាដើម។

ក្រុមហ៊ុននេះគ្រោងនឹងប្រកាសព័ត៌មានលម្អិតស្ដីពីការកាត់បន្ថយការងារនៅក្នុងប៉ុន្មានសប្ដាហ៍ខាងមុខ នេះបើតាម WSJ។ សារព័ត៌មានខ្លះនិយាយថា កម្មកររបស់រោងចក្រ Ford នឹងមិនរងផលប៉ះពាល់ ប៉ុន្តែ Bloomberg បានផ្សាយថា មានការងាររហូតដល់ ៨,០០០ កន្លែងអាចនឹងត្រូវរងផលអាក្រក់។

នាយកប្រតិបត្តិនានារបស់ Ford នឹងផ្ដល់ព័ត៌មានលម្អិតស្ដីពីវិធីដែលក្រុមហ៊ុនកំពុងតែកសាងប្រព័ន្ធឧស្សាហកម្មរបស់ខ្លួន ដើម្បីសម្រេចបានល្បឿននៃការផលិតរថយន្តអគ្គិសនីឱ្យបានពី ៦០០,០០០ គ្រឿង ទៅជាង ២ លានគ្រឿងនៅឆ្នាំ ២០២៦ នេះបើតាមក្រុមហ៊ុន Ford។

កាលពីខែមីនា Ford បានប្រកាសបង្កើតយីហោថ្មីរថយន្តអគ្គិសនីថ្មី គឺ Ford Model e។ អំឡុងពេលនោះ Ford បានឱ្យដឹងថា ចង់ផលិតរថយន្តអគ្គិសនីឱ្យបាន ២ លានគ្រឿងជារៀងរាល់ឆ្នាំ ចាប់ពីឆ្នាំ ២០២៦ ដែលតួលេខនេះកាន់កាប់ប្រហែល ១/៣ នៃបរិមាណរថយន្តអគ្គិសនីសរុបនៅទូទាំងពិភពលោក និងមានគម្រោងចំណាយ ៥០ ពាន់លានដុល្លារអាម៉េរិក សម្រាប់សកម្មភាពនេះ។

ក្រុមហ៊ុន Ford ក៏បានឱ្យដឹងថា ចង់កាត់បន្ថយការចំណាយសម្រាប់ការផលិតរថយន្តប្រពៃណី ឱ្យចុះមកនៅត្រឹម ៣ ពាន់លានដុល្លារជារៀងរាល់ឆ្នាំផងដែរ៕

July 22, 2022

ស្ពានខ្សែកាបដែលមានប្រព័ន្ធបង្គោលទ្រតែមួយវែងជាងគេបង្អស់ក្នុងពិភពលោក ឆ្លងផុតការពិសោធ

(ប្រទេសចិន)-ស្ពានខ្សែកាប Lvzhijiang ប្រវែងប្រហែល ៨០០ ម៉ែត្រ បានឆ្លងផុតដំណាក់កាលពិសោធន៍ បន្ទាប់ពីបានឱ្យក្រុមរថយន្តដឹកទំនិញធុន ១,២៨០ តោន បរឆ្លងកាត់ក្នុងរយៈពេល ៨ ថ្ងៃ។

ស្ពានខ្សែកាប Lvzhijiang ដែលស្ថិតនៅក្នុងខេត្ត Yunnan ភាគនីរតីនៃ ប្រទេសចិន បានឆ្លងផុតការពិនិត្យគុណភាព និងសមត្ថភាពនៃការផ្ទុកទម្ងន់រួចហើយ។ ក្នុងការពិសោធរយៈពេល ៨ ថ្ងៃ ដែលចាប់ផ្ដើមពីថ្ងៃទី ១១ កក្កដា ក្រុមរថយន្តដឹកទំនិញដែលមានទម្ងន់រហូតដល់ ១,២៨០ តោន បានបរឆ្លងកាត់ទៅមកលើស្ពាន នេះបើតាម Science and Technology Daily។

ដោយមានប្រវែងប្រហែល ៨០០ ម៉ែត្រ ស្ពាន Lvzhijiang គឺជាស្ពានខ្សែកាបបង្គោលទ្រតែមួយដែលវែងជាងគេបង្អស់ក្នុងពិភពលោក។ ស្ពាននេះនឹងជួយកាត់បន្ថយរយៈពេលធ្វើដំណើររវាងទីក្រុង Yuxi និងទីក្រុង Chuxiong Yi ពី ១.៥ ម៉ោង ចុះមកនៅត្រឹម ២ នាទី។ ស្ពានដែលកាន់កាប់តំណែងស្ពានខ្សែកាបបង្គោលទ្រមួយវែងជាងគេក្នុងពិភពលោកមុននោះ គឺស្ពាន Jinshajiang Hutiaoxia ដែលស្ថិតលើកំណាត់ផ្លូវល្បឿនលឿន ប៉េកាំង-ទីបេ ដោយមានប្រវែង ៧៦៦ ម៉ែត្រ។

ស្ពាន Lvzhijiang គឺជាផ្នែកមួយនៃកំណាត់ផ្លូវល្បឿនលឿនថ្មីប្រវែង ២០០ គីឡូម៉ែត្រ ឆ្លងកាត់ខេត្ត Yunnan ដែលត្រូវបានសាងសង់ឡើងដើម្បីបង្កើនការតភ្ជាប់ជាមួយបណ្ដាប្រទេសនៅ អាស៊ីអាគ្នេយ៍ ហើយវាក៏ជាគម្រោងមួយនៅក្នុង គំនិតផ្ដួចផ្ដើមខ្សែក្រវាត់ និងផ្លូវ របស់ ប្រទេសចិន ផងដែរ។

July 21, 2022

ក្រសួងពាណិជ្ជកម្ម បន្តបញ្ចុះតម្លៃប្រេង សម្រាប់អនុវត្តពីថ្ងៃទី ២១ ដល់ ៣១ កក្កដា

ប្រេងឥន្ធនៈនៅ កម្ពុជា ត្រូវបានកំណត់ឱ្យលក់បញ្ចុះតម្លៃបន្តទៀត ធៀបនឹងសន្ទស្សន៍នៃតម្លៃដែលត្រូវបានកំណត់មុនថ្ងៃទី ២១ កក្កដា។

ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈនៅតាមស្ថានីយនានាទូទាំងប្រទេសកម្ពុជា រាប់ចាប់ពីថ្ងៃទី ២១ ដល់ ៣១ ខែកក្កដា ឆ្នាំ ២០២២។ ក្នុងនោះ ប្រេងសាំងធម្មតាត្រូវលក់ក្នុងតម្លៃ ៤,៨០០ រៀល/លីត្រ (ចុះ ៤៥០រៀល) និងប្រេងម៉ាស៊ូតត្រូវលក់ក្នុងតម្លៃ ៥,៣០០ រៀល/លីត្រ (ចុះ ៣០០រៀល) ។

សូមអានសេចក្ដីប្រកាសខាងក្រោម ៖

July 21, 2022

ក្រុមហ៊ុនផលិតរថយន្តអគ្គិសនី Tesla លក់ Bitcoin បានជាង ៩០០ លានដុល្លារ

Tesla បានលក់ Bitcoin ចំនួន ៧៥% ដែលក្រុមហ៊ុនរថយន្តអគ្គិសនីនេះបានកាន់កាប់ ហើយរកបានប្រាក់ ៩៣៦ លានដុល្លារ នៅក្នុងត្រីមាសទីពីរ។

តម្លៃ Bitcoin បានដាំក្បាលចុះ បានប៉ះពាល់ដល់ប្រាក់ចំណេញរបស់ Tesla ធ្វើឱ្យក្រុមហ៊ុនផលិតរថយន្តអគ្គិសនីនេះ សម្រេចចិត្តលក់ចោលប្រាក់ឌីជីថលគ្រីបតូនេះខ្លះ។ នាយកប្រតិបត្តិរបស់ Tesla លោក Elon Musk បានឱ្យដឹងថា ពួកគេលក់ Bitcoin ដើម្បីបង្កើនសាច់ប្រាក់ ដោយសារតែបរិស្ថានពាណិជ្ជកម្មខ្វះភាពប្រាកដប្រជាព្រោះតែកូវីដ-១៩។ ក្នុងរបាយការណ៍ស្ដីពីលទ្ធផលអាជីវកម្មក្នុងត្រីមាសទីពីរដែលទើបតែបានប្រកាស Tesla ទទួលបានសាច់ប្រាក់បន្ថែម ៩៣៦ លានដុល្លារ ពីការលក់ Bitcoin ខាងលើ។

នៅក្នុងរបាយការណ៍ដែលបានដាក់ឡើងទៅកាន់គណៈកម្មការមូលបត្រអាម៉េរិក កាលពីដើមឆ្នាំ Tesla ឱ្យដឹងថា កាន់កាប់បរិមាណ Bitcoin ដែលមានតម្លៃជិត ២ ពាន់លានដុល្លារ គិតត្រឹមដំណាច់ឆ្នាំ ២០២១។ Tesla បានចំណាយ ១.៥ ពាន់លានដុល្លារ ទិញ Bitcoin កាលពីខែកុម្ភៈ ២០២១ និងបានលក់អស់ ១០% ក្រោយពីទិញបាន ២ ខែ។ បច្ចុប្បន្ន Tesla បញ្ជាក់ថា នៅកាន់កាប់ Bitcoin ដែលមានតម្លៃតែ ២១៨ លានដុល្លារប៉ុណ្ណោះ។

ក្នុងត្រីមាសទីពីរ Tesla រកចំណូលសរុបបាន ១៦.៩ ពាន់លានដុល្លារ ទាបជាងតួលេខ ១៧.១ ពាន់លានដុល្លារដែលបានព្យាករមុននោះរបស់ Refinitiv។ ក្នុងនោះ ប្រាក់ចំណូលបានពីរថយន្ត មានចំនួន ១៤.៦ ពាន់លានដុល្លារ, ថាមពល ៨៦៦ លានដុល្លារ ខណៈដែលសេវាកម្ម និងផ្នែកផ្សេងៗទៀតរួមចំណែក ១.៤៧ ពាន់លានដុល្លារ។

អត្រាប្រាក់ចំណេញសរុបក្នុងត្រីមាសទីពីររបស់ Tesla សម្រេចបាន ២៧.៩% ទាបជាងអត្រា ៣២.៩% កាលពីត្រីមាសទីមួយ ឆ្នាំ ២០២២ និងអត្រា ២៨.៤% ក្នុងត្រីមាសទីពីរនៃឆ្នាំកន្លង ដោយសារផលប៉ះពាល់ពីបញ្ហាអតិផរណា និងការប្រកួតប្រជែងក្នុងទីផ្សារថ្មផ្ទុកថាមពល ក៏ដូចជាគ្រឿងបន្លាស់ដទៃទៀតរបស់រថយន្តអគ្គិសនី៕

July 21, 2022

Elon Musk ថា បានដំឡើង «ប្រព័ន្ធខួរក្បាល» ទៅក្នុងប្រព័ន្ធពពកកុំព្យូទ័ររួចហើយ

មហាសេដ្ឋី Elon Musk បានឱ្យដឹងថា គាត់បានដំឡើងទិន្នន័យដែលថតបានពីខួរក្បាលរបស់គាត់ ចូលទៅក្នុងប្រព័ន្ធពពកកុំព្យូទ័រ (cloud computing) ដើម្បីជជែកលេងជាមួយកំណែចម្លងរបស់ខ្លួន។

«បើសិនលោកអាចដំឡើងប្រព័ន្ធខួរក្បាលរបស់ខ្លួនទៅក្នុងពពកកុំព្យូទ័រ និងនិយាយជាមួយកំណែមួយទៀតរបស់ខ្លួន តើអ្នកទាំងពីរអាចក្លាយជាមិត្ត ឬទេ?» Bill Marcus សហស្ថាបនិករបស់ Dogecoin បានសួរនៅលើ Twitter កាលពីថ្ងៃទី ១៩ កក្កដា។

ឆ្លើយតបនឹងសំណួរខាងលើ លោក Musk សរសេរថា «បានធ្វើរឿងនេះរួចហើយ» ប៉ុន្តែ មិនបានឱ្យដឹងលម្អិតអំពីបញ្ហានេះ។ មតិរបស់ម្ចាស់ Tesla ភ្លាមនោះក៏ទទួលបានចំណាប់អារម្មណ៍ច្រើនពីអ្នកលេងបណ្ដាញសង្គម។

មតិជាច្រើនត្រូវបានលើកឡើង ក្នុងនោះមានអ្នកខ្លះថា «សប្បាយចិត្តបើសិនជាមានកំណែចម្លងបែបនេះ»។ ក៏ប៉ុន្តែ ក៏មានអ្នកខ្លះថា «មិនចូលចិត្ត ព្រោះថា កំណែចម្លងរបស់ពួកខ្លួនអាចជជែកលេងជាមួយអ្នកផ្សេង និងទទួលបានព័ត៌មាន ឬចំណេះដឹងបន្ថែមជាបន្តបន្ទាប់ ខណៈដែលកំណែពិតត្រូវដោះស្រាយបញ្ហាជីវិតរាប់មិនអស់»។ ចំណែកអ្នកខ្លះក៏ថា «នឹងទុកឱ្យកំណែចម្លងរបស់ខ្លួនជជែកលេងជាមួយមនុស្សម្នា ហើយកំណែពិតនឹងមានពេលសម្រាក កម្សាន្ត ឬលម្ហែកាយតាមចិត្ត»។

ទោះជាយ៉ាងណាក៏ដោយ ក៏នៅមានមតិមួយចំនួនសង្ស័យទៅលើព័ត៌មានដែល Musk បានប្រកាស។ កាលពីឆ្នាំកន្លង Elon Musk បាននិយាយថា «ពេលអនាគត ប្រព័ន្ធ Neuralink ដ៏ឆ្លាតវៃ អាចនាំអ្នកទៅកាន់ពិភពពិតក្នុងរូបភាពនិម្មិត»។ លោកជឿថា បច្ចេកវិទ្យាឈីបខួរក្បាលរបស់ Neuralink ល្អជាង metaverse ទៅទៀត។

មុននោះ Neuralink ធ្លាប់បានបញ្ចេញវីដេអូបង្ហាញពី សត្វស្វា Pager ចេះលេងហ្គេម បន្ទាប់ពីត្រូវបានបំពាក់ឈីបខួរក្បាល។ លោក Musk បានឱ្យដឹងថា ក្រុមហ៊ុន Neuralink មានគម្រោងចាប់ផ្ដើមបំពាក់ឈីបកុំព្យូទ័រទៅក្នុងខួរក្បាលមនុស្សនៅក្នុងឆ្នាំនេះ ប៉ុន្តែ មកដល់បច្ចុប្បន្ន ក្រុមហ៊ុននេះមិនទាន់ទទួលបានការយល់ព្រមពី FDA (អាជ្ញាធរគ្រប់គ្រងអាហារ និងឱសថអាម៉េរិក) នៅឡើយ។

July 20, 2022

គម្រោងស្ដារគុណភាពកំណាត់ផ្លូវលេខ ១៤៦បេ និងផ្លូវលេខ ១៤៨ សម្រេច បាន ៩៩,៨១% ហើយ

នាព្រឹកថ្ងៃទី ២០ កក្កដា ២០២២ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមការងារពាក់ព័ន្ធ អញ្ជើញចុះពិនិត្យគម្រោងធ្វើឱ្យប្រសើរឡើងកំណាត់ផ្លូវលេខ ១៤៦បេ (វិថីសម្ដេចសង្ឃរាជទេពវង្ស) និងផ្លូវលេខ ១៤។

ក្នុងការចុះពិនិត្យវឌ្ឍនភាពការងារសាងសង់ និងផ្ទៀងផ្ទាត់គុណភាពនៃគម្រោងខាងលើ រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ផ្លូវនេះសាងសង់បានល្អ មានគុណភាពរឹងមាំ ក្រោយការធ្វើតេស្តសាកល្បងចំនួន ៤១៤ កន្លែង ក្នុងនោះមានតែ ២ កន្លែងប៉ុណ្ណោះដែលមានគុណភាពក្រោមកម្រិតបច្ចេកទេសបន្តិច ប៉ុន្តែអាចទទួលយកបាន។

ចំពោះកំណាត់ផ្លូវក្រាល AC វិញ លោករដ្ឋមន្ត្រីបានថ្លែងថា កម្រិតនៃភាពរលាក់ IRI មានតម្លៃតូចជាង ២m/km ដែលស្ថិតក្នុងកម្រិតល្អណាស់។ រីឯផ្លូវបេតុង លទ្ធផលនៃការពិនិត្យកម្រិតនៃភាពកកិត បានបង្ហាញថា តម្លៃនៃភាពកកិតរបស់ផ្ទៃកម្រាលបេតុង គឺខ្ពស់ជាងស្តង់ដារដែលបានកំណត់។

រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ផ្លូវខាងលើអាចជួយសម្រួលដល់ឡានដឹកទំនិញធុនធ្ងន់ធ្វើដំណើរវាងផ្លូវជាតិលេខ ៤ ដោយជួយកាត់បន្ថយគ្រោះថ្នាក់ចរាចរណ៍ និងការកកស្ទះចរាចរណ៍លើផ្លូវជាតិនេះ។

យោងតាម អគ្គនាយកដ្ឋានបច្ចេកទេសក្រសួងសាធារណការ និងដឹកជញ្ជូន ការអនុវត្តគម្រោងធ្វើឱ្យប្រសើរឡើងកំណាត់ផ្លូវលេខ ១៤៦បេ និងផ្លូវលេខ ១៤៨ នេះ សម្រេចបាន ៩៩,៨១% ហើយ គិតត្រឹមថ្ងៃទី ២០ កក្កដានេះ៕

July 20, 2022

ការនាំចេញរបស់ វៀតណាម នឹងកើនឡើងជិតដល់ ៤០០ ពាន់លានដុល្លារ ក្នុងឆ្នាំ ២០២២

ការផលិតដែលត្រូវបានស្ដារឡើងវិញ គ្រាដែលក្រុមហ៊ុន រោងចក្រអាចឆ្លើយតបនឹងការបញ្ជាទិញ រួមនឹងការប្រើប្រាស់ប្រកបដោយប្រសិទ្ធភាពនូវកិច្ចព្រមព្រៀងពាណិជ្ជកម្មសេរី គឺជាមូលដ្ឋានគ្រឹះដែលជួយឱ្យការនាំចេញរបស់ វៀតណាម អាចកើនឡើងជិតដល់ ៤ ពាន់កោដិ (៤០០,០០០,០០០,០០០ ឬ ៤០០ ពាន់លាន) ដុល្លារអាម៉េរិក ក្នុងឆ្នាំនេះ។

ក្នុង ៦ ខែដើមឆ្នាំនេះ ការនាំចេញរបស់ វៀតណាម បានឡើងជិតដល់ ១៨៦ ពាន់លានដុល្លារអាម៉េរិក កើន ១៧.៣% ធៀបនឹងដំណាក់ដូចគ្នាកាលពីឆ្នាំ ២០២១ ក្នុងនោះមានទំនិញ ២៨ មុខដែលមានចំណូលលើសពី ១ ពាន់លានដុល្លារ។ ទន្ទឹមនឹងនេះ វៀតណាម ក៏ទទួលបានការបញ្ជាទិញយ៉ាងច្រើនពីបរទេសសម្រាប់ឆ្នាំនេះ។

មន្ត្រីជាន់ខ្ពស់របស់ ក្រសួងឧស្សាហកម្ម និងពាណិជ្ជកម្ម របស់ វៀតណាម បានវាយតម្លៃថា បណ្ដាក្រុមហ៊ុនបានប្រើប្រាស់ប្រកបដោយប្រសិទ្ធភាពនូវកិច្ចព្រមព្រៀងពាណិជ្ជកម្មសេរី (FTA) ដែល វៀតណា កំពុងមាន។ បច្ចុប្បន្ន ប្រទេសនេះមាន FTA សរុបចំនួន ១៥ ដែលកំពុងអនុវត្ត និង ២ ទៀតកំពុងចរចា។ FTA ទាំងនេះកំពុងតែជួយឱ្យ វៀតណាម នាំចេញទំនិញបានកាន់តែច្រើន។

យោងតាម ក្រសួងឧស្សាហកម្ម និងពាណិជ្ជកម្មវៀតណាម សកម្មភាពនាំចេញក្នុងរយៈពេល ៦ ខែចុងឆ្នាំនេះ នឹងបន្តកើនឡើងខ្ពស់ ដោយសារតែការងើបឡើងនៃសេដ្ឋកិច្ចពិភពលោកក្រោយកូវីដ-១៩ និងបណ្ដា FTA ដែលប្រទេសនេះបានចុះហត្ថលេខា ត្រូវបានអនុវត្តពេញលេញ។

ក្រសួងខាងលើបានព្យាករថា ការនាំចេញនាំចូលសរុបរបស់ វៀតណាម ក្នុងឆ្នាំ ២០២២ អាចលើសពី ៧០០ ពាន់លានដុល្លារអាម៉េរិក ក្នុងនោះ ការនាំចេញសរុបនឹងកើនឡើងជិតដល់ ៤០០ ពាន់លានដុល្លារ ហើយ វៀតណាម នឹងបន្តស្ថិតក្នុង Top 20 ស្ដីពីបណ្ដាប្រទេសដែលមានពាណិជ្ជកម្មអន្តរជាតិធំជាងគេក្នុងពិភពលោក៕

July 20, 2022

Category: សង្គម និងសេដ្ឋកិច្ច