នាព្រឹកថ្ងៃទី ២៦ កក្កដានេះ ក្រសួងប្រៃសណីយ៍ បានចេញសេចក្ដីជូនដំណឹងមួយ ស្តីពីការបញ្ឈប់ការប្រើប្រាស់ឧបករណ៍បង្កើនកម្លាំងសេវា និង/ឬឧបករណ៍ពង្រីកសេវា ដែលបង្កផលប៉ះពាល់យ៉ាងខ្លាំងដល់សេវាទូរសព្ទចល័ត។
ក្រសួងខាងលើបានស្នើឱ្យអ្នកប្រើប្រាស់ រុះរើឧបករណ៍បង្កើនកម្លាំងសេវា និង/ឬឧបករណ៍ពង្រីកសេវាដោយខ្លួនឯង និងស្នើឱ្យអ្នកជំនួញ ឈប់នាំចូលផលិតផលទាំងនេះផងដែរ។
សូមអានសេចក្ដីជូនដំណឹងរបស់ ក្រសួងប្រៃយ៍សណីយ៍ខាងក្រោម៖
ធនាគារនានារបស់ ចិន នឹងសហការគ្នាបង្កើតមូលនិធិដើម្បីជួយដល់បណ្ដាក្រុមហ៊ុនអចលនទ្រព្យ ក្នុងការដោះស្រាយវិបត្តិបំណុលនាបច្ចុប្បន្ន។
សារព័ត៌មាន Reuters ដកស្រង់ប្រភពព័ត៌មានដែលជិតដិត បានឱ្យដឹងថា ប្រទេសចិន នឹងបង្កើតមូលនិធិអចលនទ្រព្យមួយដើម្បីជួយឱ្យក្រុមហ៊ុនក្នុងវិស័យអចលនទ្រព្យ ឆ្លងផុតដំណាក់កាលវិបត្តិបំណុលដែលកំពុងកើតមាននាបច្ចុប្បន្ន។ ទំហំទឹកប្រាក់ដែលជាគោលដៅរបស់មូលនិធិនេះគឺ ៣០០ ពាន់លានយ៉ុន (៤៤ ពាន់លានដុល្លារអាម៉េរិក)។ នេះគឺជាសកម្មភាពធំដំបូងរបស់ ទីក្រុងប៉េកាំង ក្នុងបំណងជួយសង្គ្រោះវិស័យនេះ រាប់ចាប់តាំងពីឆ្នាំ ២០២១។
មូលនិធិនេះនឹងត្រូវបានប្រើប្រាស់ដើម្បីទិញបណ្ដាគម្រោងគេហដ្ឋានដែលកំពុងផ្អាកការសាងសង់ ហើយបង្ហើយការសាងសង់ឡើងវិញ។ ក្រោយមក គម្រោងទាំងនោះនឹងត្រូវបានដាក់ឱ្យជួល ដើម្បីជំរុញផ្នែកគេហដ្ឋានសម្រាប់ជួលនៅប្រទេសនេះ។
ក្នុងដំណាក់កាលដំបូង មូលនិធិនេះនឹងបញ្ចេញសាច់ប្រាក់ជិត ១២ ពាន់លានដុល្លារអាម៉េរិក ដោយមានការចូលរួមរបស់ ធនាគារជាតិចិន ( PBOC) និងធនាគារអភិវឌ្ឍចិន។ បើសិនជារូបមន្តនេះមានប្រសិទ្ធភាព បណ្ដាធនាគារផ្សេងទៀតនឹងចូលរួម ពង្រីកគោលដៅឱ្យដល់ ពី ២០០ ទៅ ៣០០ ពាន់លានយ៉ុន។
ជាសសរទ្រូងសំខាន់របស់សេដ្ឋកិច្ចធំលំដាប់ទីពីរក្នុងពិភពលោក ប៉ុន្តែ ចាប់តាំងពីឆ្នាំ ២០២១ វិស័យអចលនទ្រព្យនៅ ប្រទេសចិន ត្រូវជួបវិបត្តិជាបន្តបន្ទាប់។ ថ្មីៗបំផុតនេះ វិស័យអចលនទ្រព្យចិន បានពើបប្រទះនឹងរលកនៃការបដិសេធការទូទាត់បំណុលគេហដ្ឋាន ចំពោះបណ្ដាគម្រោងដែលបានពន្យារពេលនៅក្នុងខែនេះ បណ្ដាលឱ្យក្រុមមន្ត្រីនៅ ប្រទេសចិន ឈឺក្បាលកាន់តែខ្លាំង។
ចំនួនផ្ទះដែលបានលក់ចេញនៅ ប្រទេសចិន នៅតែបង្ហាញតួលេខទាប ហើយសញ្ញានៃការងើបឡើងវិញ មានតិចតួច នៅក្នុងគ្រាដែលសេដ្ឋកិច្ចកំពុងត្រូវញាំញីដោយកូវីដ-១៩ ខណៈដែលអត្រានៃការបាត់បង់ការងារមានការកើនឡើង និងពេលវេលាប្រគល់ផ្ទះចេះតែត្រូវបានអូសបន្លាយដោយមិនមានភាពប្រាកដប្រជា។ ក្នុង ៥ ខែដើមឆ្នាំនេះ តួលេខនៃគេហដ្ឋានដែលបានលក់ចេញ បានថយចុះ ២៣.៦% ធៀបនឹងដំណាក់កាលដូចគ្នាកាលពីឆ្នាំកន្លង៕
លោក ចូ បៃដិន បានជំរុញឱ្យសភា អនុម័តសេចក្ដីព្រាងច្បាប់ផ្ដល់ជំនួយដល់បណ្ដាក្រុមហ៊ុនផលិតបន្ទះអេឡិចត្រូនិកក្នុងស្រុក តម្លៃ ៥២ ពាន់លានដុល្លារ ដើម្បីកាត់បន្ថយការពឹងផ្អែកលើប្រភពផ្គត់ផ្គង់ពីបរទេស។
«សភាត្រូវអនុម័តសេចក្ដីព្រាងច្បាប់នេះ កាន់តែឆាប់ កាន់តែល្អ» ប្រធានាធិបតីអាម៉េរិក លោក បៃដិន ថ្លែងដូច្នេះនៅចំពោះមុខក្រុមជំនួយការសេដ្ឋកិច្ច សន្តិសុខជាតិ រួមនឹងតំណាងមកពីបណ្ដាក្រុមហ៊ុនផលិតបន្ទះអេឡិចត្រូនិក កាលពីថ្ងៃទី ២៥ កក្កដា ស្ដីពីសេចក្ដីព្រាងច្បាប់ផ្ដល់ជំនួយដែលមានតម្លៃ ៥២ ពាន់លានដុល្លារ សម្រាប់បណ្ដាក្រុមហ៊ុនផលិតបន្ទះអេឡិចត្រូនិកក្នុងស្រុក។
លោក បៃដិន បញ្ជាក់ថា ដើម្បីសេដ្ឋកិច្ច និងសន្តិសុខជាតិ ត្រូវតែធានាការផលិតបន្ទះអេឡិចត្រូនិក semiconductor ដែលជាវត្ថុចាំបាច់សម្រាប់គ្រប់យ៉ាង ចាប់ពីទូរស័ព្ទឆ្លាតវៃ រហូតដល់រថយន្ត និងអាវុធជាដើម។ ម្ចាស់សេតវិមានសង្កាត់ធ្ងន់ថា ការជួយគាំទ្ររបស់រដ្ឋាភិបាលចំពោះអ្នកផលិតបន្ទះអេឡិចត្រូនិកក្នុងស្រុកគឺមានន័យថា សហរដ្ឋអាម៉េរិក នឹង «អាចនៅលេងបានបន្តទៀត»។
«សហរដ្ឋអាម៉េរិក គឺជាអ្នករកឃើញវិធីបង្កើតបន្ទះអេឡិចត្រូនិក semiconductor ប៉ុន្តែ ប៉ុន្មានឆ្នាំមកនេះ យើងបែរជាបណ្ដោយឱ្យការផលិតបន្ទះអេឡិចត្រូនិកនេះស្ថិតនៅក្រៅប្រទេស។ សហរដ្ឋអាម៉េរិក ត្រូវតែនាំមុខពិភពលោកនៅក្នុងកិច្ចការនេះ» លោក បៃដិន អះអាងដូច្នេះ។
រដ្ឋមន្ត្រីក្រសួងពាណិជ្ជកម្មអាម៉េរិក Gina Raimondo បានហៅ microchip ដែលជាបន្ទះអេឡិចត្រូនិកខ្នាតតូច ថាជា «ថ្នាលបច្ចេកវិទ្យាជួយដល់សេដ្ឋកិច្ចទាំងមូល» ហើយបានព្រមានថា អាម៉េរិក កំពុងដើរក្រោយគេ។ លោកស្រីអះអាងថា ក្រុមអ្នកនាំចូលរបស់ សហរដ្ឋអាម៉េរិក កំពុងតែ «ពឹងផ្អែកទាំងស្រុងលើ តៃវ៉ាន់ ដើម្បីមានបន្ទះអេឡិចត្រូនិកដែលមានតម្លៃទាប»។
Microchip កំពុងក្លាយជាគ្រឹះនៃបច្ចេកវិទ្យា សូម្បីតែនៅក្នុងវិស័យឧស្សាហកម្មរថយន្តអគ្គិសនីដែលកំពុងផ្ទុះខ្លាំង។ ក្រុមមន្ត្រីសហរដ្ឋអាម៉េរិក ក៏បានបញ្ជាក់ប្រាប់ប្រធានាធិបតី បៃដិន អំពីផលប៉ះពាល់ចំពោះសន្តិសុខជាតិ នៅពេលប្រភពផ្គត់ផ្គង់បន្ទះអេឡិចត្រូនិកក្នុងស្រុកមានភាពអន់ថយ៕
រាជរដ្ឋាភិបាលកម្ពុជា នឹងដាក់ឱ្យប្រើប្រាស់នូវការធានារ៉ាប់រងយានយន្តឯកជនជាកាតព្វកិច្ច ដែលជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គមជាតិ តាមរយៈការធានារ៉ាប់រងដល់ជនរងគ្រោះ ដែលបង្កដោយគ្រោះថ្នាក់ចរាចរណ៍នៅតាមដងផ្លូវ នេះបើតាម ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ។
ក្នុងឱកាសចូលរួមក្នុងទិវាធានារ៉ាប់រង នៅថ្ងៃទី ២៥ ខែកក្កដា ដែលធ្វើឡើងក្នុងគោលបំណងលើកកម្ពស់វិស័យធានារ៉ាប់រង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្លែងថា ការកំណត់ជាកាតព្វកិច្ចនេះ នឹងជួយឱ្យជនរងគ្រោះទទួលបានសំណងសមស្របណាមួយ សម្រាប់ការព្យាបាល និងដោះស្រាយបញ្ហាផ្នែកហិរញ្ញវត្ថុរបស់ខ្លួន ដែលបង្កឡើងដោយគ្រោះថ្នាក់ចរាចរណ៍នៅតាមដងផ្លូវ។
យោងតាម ឯកឧត្តម រស់ សីលវ៉ា គម្រោងខាងលើនេះអាចនឹងដំណើរការក្នុងឆ្នាំ ២០២២ នេះ បន្ទាប់ពីទីផ្សារធានារ៉ាប់រងរបស់ កម្ពុជា បាន និងកំពុងបន្តរីកចម្រើនយ៉ាងឆាប់ ក្នុងរយៈពេល ៥ ឆ្នាំមកនេះ។
ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា បានឱ្យដឹងថា បុព្វលាភដុលសរុបនៃទីផ្សារធានារ៉ាប់រងរបស់កម្ពុជា បានកើនឡើងដល់ប្រមាណ ៣០០ លានដុល្លារអាមេរិក ក្នុងឆ្នាំ ២០២១ និងមានកំណើនជាមធ្យម ប្រមាណ ២០% ក្នុងរយៈពេល ៥ ឆ្នាំចុងក្រោយនេះ។
លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានសម្ដែងការគាំទ្រចំពោះគម្រោងដាក់ឱ្យដំណើរការប្រព័ន្ធធានារ៉ាប់រងយានយន្តឯកជនជាកាតព្វកិច្ច ដែលបច្ចុប្បន្នទើបតែបាន និងកំពុងអនុវត្តជាអន្លើរនៅលើយានយន្តនៃក្រុមហ៊ុនដឹកជញ្ជូនអ្នកដំណើរ និងក្រុមហ៊ុនដឹកទំនិញប៉ុណ្ណោះ។
បច្ចុប្បន្ន ទីផ្សារធានារ៉ាប់រងនៅ កម្ពុជា មានក្រុមហ៊ុនធានារ៉ាប់រងសរុប ៣៩ ស្ថាប័ន ក្នុងនោះមាន ១៨ ស្ថាប័នជាក្រុមហ៊ុនធានារ៉ាប់រងទូទៅ, ១៤ ស្ថាប័នជាក្រុមហ៊ុនធានារ៉ាប់រងអាយុជីវិត និង ៧ ស្ថាប័នជាក្រុមហ៊ុនធានារ៉ាប់រងខ្នាតតូច ហើយក៏មាន ១ ស្ថាប័នជាក្រុមហ៊ុនធានារ៉ាប់រងបន្ត៕
មហាសេដ្ឋី Elon Musk អះអាងនៅលើ Twitter ថា លោកនៅតែជាមិត្តជាមួយនឹង Sergey Brin ហើយថា ជាងនេះពួកគេថែមទាំងទើបតែបានចូលរួមពិធីជប់លៀងជាមួយគ្នាទៀតផង។
«ពិតជាផ្ដេសផ្ដាស់មែន» លោក Musk ឆ្លើយតបនឹងសំណេរមួយឃ្លានាថ្ងៃនេះ ដែលទាក់ទិននឹងការចោទប្រកាន់ដែលថាលោកមាន «ទំនាក់ទំនងស្នេហារយៈពេលខ្លី» ជាមួយភរិយារបស់សហស្ថាបនិក Google លោក Sergey Brin ។ «ខ្ញុំជាមួយនឹង Sergey នៅតែជាមិត្តភក្ដិ ហើយយើងទើបតែបានចូលរួមពិធីជប់លៀងជាមួយគ្នាកាលពីយប់ម្សិលមិញ»។
មុននោះ WSJ បានចុះផ្សាយថា នាយកប្រតិបត្តិរបស់ Tesla មានទំនាក់ទំនងមនោសញ្ចេតនា «ភ្លើងចំបើងជាមួយនឹង Nicole Shanahan ដែលជាភរិយារបស់ Brin នៅក្នុងពិធីបុណ្យ Art Basel នៅ Miami កាលពីដើមខែធ្នូ ២០២១។ ក៏ប៉ុន្តែ លោក Musk បកស្រាយថា «ខ្ញុំបានជួប Nicole តែ ២ លើកក្នុងរយៈពេល ៣ ឆ្នាំកន្លង ហើយការជួបគ្នានោះសុទ្ធតែមានមនុស្សច្រើននៅជុំវិញ។ មិនមានអ្វីរ៉ូមែនទិកនោះទេ»។
នៅក្នុងសារមួយផ្សេងទៀត លោក Musk បានបង្ហើបឱ្យដឹងថា ជាយូរមកហើយដែលលោកមិនមានទំនាក់ទំនងផ្លូវភេទជាមួយអ្នកណា។ លោក Musk ក៏បានរិះគន់ WSJ ថា រត់តាមរឿងរ៉ាវសហាយស្មន់ដើម្បីទាក់ទាញអ្នកអាន ដោយយោងទៅតាម «ពាក្យចចរាមអារ៉ាមរបស់ភាគីទីបី» បើទោះជា WSJ ត្រូវបានគេជឿថា មានស្ដង់ដាខ្ពស់ផ្នែកសារព័ត៌មាន។
ក្រៅពីព័ត៌មានស្ដីពីលោក Musk មានទំនាក់ទំនងផ្លូវភេទជាមួយ Shanahan សារព័ត៌មាន WSJ ក៏ស្រង់សម្ដីអ្នកជិតស្និទ្ធនឹងលោក Musk ចុះផ្សាយថា ម្ចាស់ Tesla ថែមទាំងបានលុតជង្គង់នៅចំពោះមុខ Brin និងសូមអភ័យទោសចំពោះរឿងនេះទៀតផង។ Brin បានដាក់ពាក្យលែងលះជាមួយនឹង Shanahan ដោយមូលហេតុថា «មានភាពខុសគ្នាមិនអាចផ្សះផ្សាបាន» នេះបើតាមឯកសារដែលបានដាក់ឡើងតុលាការខណ្ឌ Santa Clara កាលពីខែមករា។
លោក Sergey Brin មិនទាន់មានប្រតិកម្មយ៉ាងណានៅឡើយ ចំពោះព័ត៌មានទាំងឡាយខាងលើ។
ប្រទេសអារ៉ាប៊ីសាអូឌីត មានគម្រោងសាងសង់ Mirror Line ដែលជាអគារភ្លោះកប់ពពកផ្ដេកខ្លួនទន្ទឹមគ្នា និងលាតសន្ធឹងប្រវែង ១២០ គីឡូម៉ែត្រ កាត់ទទឹងឆ្នេរសមុទ្រ ភ្នំ និងសមុទ្រខ្សាច់ ដោយប្រើប្រាស់ខ្ទង់វិនិយោគឡើងដល់ ១ ទ្រីលានដុល្លារអាម៉េរិក។
ដោយមានកម្ពស់ជិត ៥០០ ម៉ែត្រ Mirror Line នឹងក្លាយជាសំណងដ៏មហិមាបំផុតក្នុងពិភពលោក។ អគារភ្លោះនេះត្រូវបានគ្របដោយកញ្ចក់នៅចំហៀងខាងក្រៅ និងតភ្ជាប់គ្នាដោយផ្លូវថ្មើរជើង ហើយអាចដាក់មនុស្សបាន ៥ លាននាក់ បន្ទាប់ពីសាងសង់រួចរាល់ នេះបើតាម Wall Street Journal ចេញផ្សាយកាលពីថ្ងៃទី ២៣ កក្កដា ២០២២។
ក្រោមអគារ Mirror Line នឹងមានផ្លូវរថភ្លើងល្បឿនលឿនមួយខ្សែ។ ប្រភពអាហារសម្រាប់ប្រជាជនដែលរស់នៅក្នុងអគារនេះ នឹងបានមកពីបណ្ដាកសិដ្ឋានឈរត្រង់នៅក្នុងអគារ។ ក្រៅពីនេះ អគារភ្លោះនេះក៏នឹងមានកីឡដ្ឋានមួយដែលស្ថិតនៅកម្ពស់ជាង ៣០០ ម៉ែត្រ និងចំណតកប៉ាល់ទេសចរណ៍ស្ថិតនៅខាងក្រោមដំបូលចន្លោះអគារទាំងពីរនេះ។
Mirror Line គឺជាគម្រោងលំដាប់ខ្ពស់ និងស្ថិតក្នុង Neom ដែលជាគម្រោងទីក្រុងធំប៉ុនរដ្ឋ Massachusetts របស់ សហរដ្ឋអាម៉េរិក ដែលផ្ដួចផ្ដើមការសាងសង់ដោយព្រះអង្គម្ចាស់ Mohammed bin Salman របស់ អារ៉ាប៊ីសាអូឌីត ក្នុងបំណងធ្វើពពិធកម្មសេដ្ឋកិច្ចរបស់ប្រទេសដែលពឹងផ្អែកលើរ៉ែប្រេង។ តាមគម្រោង អគារភ្លោះនេះនឹងចំណាយទុនវិនិយោគសរុប ១ ទ្រីលាន (១,០០០,០០០,០០០,០០០) ដុល្លារអាម៉េរិក។
នៅក្នុងអគារ Mirror Line ប្រជាជននឹងចំណាយពេលតែ ២០ នាទីប៉ុណ្ណោះក្នុងការធ្វើដំណើរពីចុងម្ខាងនៃអគារ ទៅកាន់ចុងម្ខាងទៀត។ ដោយសារតែដំណើរការដោយថាមពលកកើតឡើងវិញ អគារភ្លោះនេះនឹងមិនបញ្ចេញឧស្ម័នពុលទៅក្នុងបរិយាកាស។
https://www.youtube.com/watch?v=kAQXYtKIF3Y
យោងតាមការវាយតម្លៃលើគម្រោង Mirror Line កាលពីខែមករា ២០២១ បង្ហាញថា សំណង់នេះត្រូវការសាងសង់ទៅតាមដំណាក់កាល និងត្រូវការពេលវេលាសាងសង់សរុបរហូតដល់ ៥០ ឆ្នាំ។ នៅពេលសាងសង់រួចរាល់ Mirror Line នឹងលាតសន្ធឹងកាត់ឆកសមុទ្រ Aqaba និងឆ្លងកាត់ជួរភ្នំមួយនៅក្បែរមាត់សមុទ្រ៕
ប្រេងនៅ អាស៊ី បានធ្លាក់ថ្លៃនៅក្នុងការជួញដូរនាព្រឹកនេះ ដោយផ្ទុយពីការកើនឡើងមុននោះ ព្រោះតែមានការបារម្ភថា ការដំឡើងការប្រាក់នៅ សហរដ្ឋអាម៉េរិក ដែលជាប្រទេសប្រើប្រាស់ប្រេងច្រើនជាងគេក្នុងពិភពលោក ធ្វើឱ្យតម្រូវការប្រេងត្រូវថយចុះ។
វេលាម៉ោងប្រហែល ៩ ព្រឹកថ្ងៃនេះ (ម៉ោងនៅ ភ្នំពេញ) តម្លៃប្រេង Brent ប្រគល់ក្នុងខែកញ្ញា ២០២២ បានថយចុះអស់ ៤៨ សេនអាម៉េរិក (០.៥%) មកនៅត្រឹម ១០២.៧២ ដុល្លារ/ធុង។ ប្រេង WTI ប្រគល់ក្នុងខែកញ្ញា ២០២២ ក៏ធ្លាក់ថ្លៃអស់ ៦៥ សេនអាម៉េរិក (០.៧%) មកនៅត្រឹម ៩៤.០៥ ដុល្លារ/ធុង។
លោក Kazuhiko Saito ប្រធានផ្នែកវិភាគទីផ្សាររបស់ក្រុមហ៊ុនហិរញ្ញវត្ថុ Fujitomi Securities Co Ltd. (ជប៉ុន) បានឱ្យដងថា និន្នាការធ្លាក់ថ្លៃនៅតែគ្របដណ្ដប់ទីផ្សារប្រេង ដោយសារតែការបារម្ភថា ការដំឡើងការប្រាក់នឹងធ្វើឱ្យតម្រូវការប្រើប្រាស់ប្រេងពិភពលោក និងប្រេងពី លីប៊ី ដែលជិតត្រលប់មកទីផ្សារវិញ នឹងជួយបន្ធូរបន្ថយបញ្ហារឹតត្បិតប្រភពប្រេងនៅលើពិភពលោក។
ក្រុមមន្ត្រីនៅ ធនាគារកណ្ដាលអាម៉េរិក (Fed) បង្ហើបឱ្យដឹងថា ធនាគារនេះអាចនឹងដំឡើងការប្រាក់គោល ៧៥ ពិន្ទុទៀតនៅក្នុងកិច្ចប្រជុំចាប់ពីថ្ងៃទី ២៦ ដល់ ២៧ កក្កដាខាងមុខ។
ទន្ទឹមនឹងនេះ ក្រុមហ៊ុនប្រេងរ៉ែរដ្ឋលីប៊ី (NOC) ក៏បានកំណត់គោលដៅចាប់ផ្ដើមបញ្ចេញប្រេង ១.២ លានធុង/ថ្ងៃ ទៅក្នុងទីផ្សារឡើងវិញនៅក្នុងរយៈពេល ២ សប្ដាហ៍ទៀត៕
ម៉ូដែលយន្តហោះពាណិជ្ជកម្ម C919 របស់ ប្រទេសចិន បានបញ្ចប់ដំណាក់កាលហោះហើរសាកល្បងដោយជោគជ័យ និងកំពុងរង់ចាំទទួលវិញ្ញាបនបត្រទទួលស្គាល់ការហោះហើរ។
ដកស្រង់អត្ថបទបង្ហោះលើទំព័របណ្ដាញសង្គមផ្លូវការរបស់ ក្រុមហ៊ុនផលិតយន្តហោះពាណិជ្ជកម្មចិន (COMAC) កាលពីថ្ងៃទី ២៣ កក្កដា ទីភ្នាក់ងារសារព័ត៌មាន Reuters បានចុះផ្សាយថា យន្តហោះពាណិជ្ជកម្មដំបូងដែលអភិវឌ្ឍដោយ ប្រទេសចិន បានបញ្ចប់ការហោះហើរ ៦ លើកដោយជោគជ័យ និងកំពុងរង់ចាំនាយកដ្ឋានអាកាសចរណ៍ស៊ីវិលចិន ផ្ដល់វិញ្ញាបនបត្រទទួលស្គាល់ ដើម្បីដំណើរការជាផ្លូវការ។
ទីក្រុងប៉េកាំង បានចាប់ផ្ដើមកម្មវិធីផលិតយន្តហោះ C919 តាំងពីឆ្នាំ ២០០៨ ប៉ុន្តែ បានជួបបញ្ហាជាច្រើនទាក់ទិននឹងការកំណត់ និងបច្ចេកទេស ក្នុងនោះមានទាំងការគ្រប់គ្រងការនាំចេញរបស់ សហរដ្ឋអាម៉េរិក ផងដែរ។
បើទោះជាត្រូវបានដំឡើងនៅ ប្រទេសចិន ប៉ុន្តែ ផ្នែកសំខាន់ៗជាច្រើនរបស់យន្តហោះ C919 ដូចជាប្រព័ន្ធបញ្ជា ឬម៉ាស៊ីនជាដើម ត្រូវបានផ្គត់ផ្គង់ពីបណ្ដាប្រទេសលោកខាងលិច។ ដំណាក់កាលអភិវឌ្ឍជាផ្លូវការបានចាប់ផ្ដើមពីឆ្នាំ ២០១១ ហើយយន្តហោះដំបូងត្រូវបានដំឡើងពេញលេញនៅក្នុងឆ្នាំ ២០១៥។
យន្តហោះ C919 ដំបូង គ្រោងនឹងត្រូវបានប្រគល់ឱ្យក្រុមហ៊ុនអាកាសចរណ៍ជាតិចិន Eastern Airlines នៅក្នុងខែសីហាខាងមុខ។ Eastern Airlines បានបញ្ជាទិញយន្តហោះ C919 ចំនួន ៥ គ្រឿង កាលពីខែមីនា ឆ្នាំ ២០២១។
យន្តហោះ C919 ត្រូវបានផលិតឡើងដើម្បីប្រកួតប្រជែងជាមួយនឹងយន្តហោះ 320neo របស់ក្រុមហ៊ុន Airbus និងយន្តហោះ Boeing 737 MAX របស់ សហរដ្ឋអាម៉េរិក។ ក៏ប៉ុន្តែ ទីផ្សារយន្តហោះនៅ ប្រទេសចិន នៅមានការនិយមប្រើប្រាស់យន្តហោះរបស់ សហរដ្ឋអាម៉េរិក នៅឡើយ ដូច្នេះ Eastern Airlines ទំនងជាត្រូវចំណាយពេលយូរទៀតទើបអាចមានសមត្ថភាពដណ្ដើមទីផ្សារបានច្រើន៕
ក្រុមអ្នកវិភាគយល់ថា មាសប្រហែលជាបានធ្លាក់ថ្លៃដល់កម្រិតទាបបំផុត ហើយមានលទ្ធភាពអាចងើបឡើងដល់ ១,៧៥០ ដុល្លារ នៅពេលអារម្មណ៍របស់អ្នកវិនិយោគក្នុងទីផ្សារមាសបានប្រសើរឡើងវិញ។
ចប់ការជួញដូរកាលពីចុងសប្ដាហ៍កន្លង មាស ១ អោន (ounce) ធ្លាក់ថ្លៃមកនៅត្រឹម ១,៦៧៨ ដុល្លារអាម៉េរិក ដែលជាតម្លៃទាបបំផុតក្នុងរយៈពេល ១ ឆ្នាំមកនេះ។ ក៏ប៉ុន្តែ ក្រុមអ្នកវិភាគនៅតែលើកឡើងនូវការព្យាករប្រកបដោយសុទិដ្ឋិនិយមចំពោះតម្លៃមាសសម្រាប់ពេលខាងមុខ នៅពេលអារម្មណ៍របស់អ្នកវិនិយោគបានប្រែប្រួល បូករួមនឹងការរំពឹងទុករបស់ក្រុមអ្នកទិញដូរបានធ្លាក់ចុះទាបបំផុតក្នុងមួយរយៈពេលខ្លីកន្លងទៅថ្មីៗនេះ។ ទន្ទឹមនឹងនេះ អ្នកវិនិយោគជាច្រើនកំពុងសង្ស័យលើកម្លាំងរបស់ប្រាក់ដុល្លារអាម៉េរិក នៅពេលវាបានថមថយក្នុងសប្ដាហ៍ដំបូងនៅក្នុង ៤ សប្ដាហ៍កន្លង។
ក្នុងការស្ទង់មតិរបស់ Kitco News កាលពីពេលថ្មីៗនេះ ដោយមានការចូលរួមពីអ្នកវិភាគចំនួន ១៨ រូប នៅ Wall Street ក្នុងនោះមានអ្នកជំនាញ ១២ រូប (៦៧%) បានបង្ហាញការជឿជាក់លើតម្លៃមាសនៅក្នុងសប្ដាហ៍នេះ ក្នុងពេលដែលអ្នកវិភាគ ៦ រូបផ្សេងទៀត (៣៣%) បានព្យាករថា មាសនឹងធ្លាក់ថ្លៃ និងមិនមានអ្នកវិភាគណាម្នាក់យល់ថា តម្លៃមាសនឹងនៅថេរ។
ដោយសារតែមានបញ្ហាបច្ចេកទេស មានសន្លឹកឆ្នោតតែ ១៨៧ សំឡេងប៉ុណ្ណោះដែលបានមកពីអ្នកវិនិយោគឯកបុគ្គល នៅក្នុងការស្ទង់មតិកាលពីសប្ដាហ៍កន្លង។ ក្នុងចំណោមនេះ មាន ៥៦% យល់ថា មាសនឹងឡើងថ្លៃ , ២៨% ព្យាករថា មាសនឹងធ្លាក់ថ្លៃ ចំណែក ៣១% រក្សាជំហរកណ្ដាល (តម្លៃថេរ) នៅក្នុងសប្ដាហ៍នេះ៕
(ប្រទេសចិន)-ក្រុមហ៊ុនបច្ចេកវិទ្យា Baidu បង្ហើបឱ្យដឹងអំពីម៉ូដែលរថយន្តអគ្គិសនីបើកបរស្វ័យប្រវត្ត បំពាក់កាមេរ៉ា ១២ គ្រាប់, ឧបករណ៍ស្កេតដោយឡាស៊ែរ (lidar) ៨ គ្រាប់ និងចង្កូចដែលអាចដោះចោលបាន។
Apollo RT6 នឹងក្លាយជារថយន្តអគ្គិសនីបើកបរស្វ័យប្រវត្តដែលមានចង្កូចអាចដោះចោលបានដំបូងរបស់ក្រុមហ៊ុនបច្ចេកវិទ្យាចិន Baidu។ រថយន្តម៉ូដែល Apollo RT6 នេះ ត្រូវបាន Baidu បង្ហាញនៅក្នុងវេទិកា Baidu World 2022 នៅ ទីក្រុងប៉េកាំង កាលពីថ្ងៃទី ២១ កក្កដា។
ក្រុមហ៊ុន Baidu ឱ្យដឹងថា Apollo RT6 ជួយកាត់បន្ថយការចំណាយទៅលើការផលិតបានជិតពាក់កណ្ដាល ដោយនៅត្រឹមតែ ៣៧,០០០ ដុល្លារអាម៉េរិក ធៀបនឹងការចំណាយ ៧១,០០០ ដុល្លារ នៃការផលិតរបស់រថយន្តជំនាន់មុន។
រចនារូបរាងដែលមិនមានកង្កូត ក៏ជួយបង្កើនកន្លែងទំនេរសម្រាប់អ្នកដំណើរ។ Apollo RT6 បំពាក់កាមេរ៉ាចំនួន ១២ គ្រាប់ និង លីដា (lidar) (ឧបករណ៍ស្កេនដូចទៅនឹងរ៉ាដា ប៉ុន្តែប្រើឡាសែរជំនួសរលកវិទ្យុ) ចំនួន ៨ គ្រាប់។
លោក Robin Li សហស្ថាបនិក និងជា CEO របស់ Baidu បាននិយាយថា «ដោយមានរបកគំហើញធំៗក្នុងបច្ចេកវិទ្យាបើកបរស្វ័យប្រវត្ត យើងបានកាត់បន្ថយការចំណាយប្រហាក់ប្រហែលនឹងយានដើរដោយថាមពលថ្មីធម្មតាមួយគ្រឿង»។
នៅបច្ចុប្បន្ននេះ ចង្កូតដែលអាចដោះចោលបានមិនទាន់មានភាពស្របច្បាប់ និងកំពុងរង់ចាំការយល់ព្រមពីអាជ្ញាធរចិន។
ក្រុមហ៊ុន Baidu ឱ្យដឹងថា ម៉ូដែលរថយន្តថ្មីនេះគ្រោងនឹងដាក់ឱ្យប្រើប្រាស់នៅក្នុងគម្រោងសេវាកម្មរថយន្តតាក់ស៊ី Apollo Go របស់ក្រុមហ៊ុននេះនៅឆ្នាំក្រោយ។
