Category: សង្គម និងសេដ្ឋកិច្ច

ហេដ្ឋារចនាសម្ព័ន្ធនៃទីក្រុងបណ្ដោយត្រង់ប្រវែង ១៧០ គីឡូម៉ែត្រ ឆ្លងកាត់សមុទ្រខ្សាច់ (វីដេអូ)
(អារ៉ាប៊ីសាអូឌីត)-ទីក្រុងបណ្ដោយត្រង់ The Line នៅ អារ៉ាប៊ីសាអូឌីត គ្រោងនឹងដាក់មនុស្សបាន ៩ លាននាក់ ដោយមានផ្ទៃក្រឡា ៣៤ គីឡូម៉ែត្រ និងប្រើប្រាស់ថាមពលកកើតឡើងវិញទាំងស្រុង។
ព្រះអង្គម្ចាស់ Mohammed bin Salman ដែលជារាជទាយាទរបស់ អារ៉ាប៊ីសាអូឌីត បានប្រកាសគម្រោងសាងសង់ទីក្រុងបណ្ដោយត្រង់ The Line កាលពីខែមករា ២០២១។ គោលដៅនៃគម្រោងនេះគឺដើម្បីធ្វើពិពិធកម្មសេដ្ឋកិច្ចរបស់ប្រទេសនេះ បំណងកាត់បន្ថយការពឹងផ្អែកលើប្រេងរ៉ែ។
កាលពីថ្ងៃទី ២៥ កក្កដា ព្រះអង្គម្ចាស់ Mohammed bin Salman បានបង្ហើបអំពីហេដ្ឋារចនាសម្ព័ន្ធរបស់ទីក្រុងនេះ។ ទីក្រុងនេះគ្រោងនឹងត្រូវបានបើកទ្វារចាប់ពីឆ្នាំ ២០៣០។ ប៉ុន្តែ ក្រុមវិស្វករវាយតម្លៃថា សំណង់នេះនឹងត្រូវការពេលសាងសង់ក្នុងរង្វង់ ៥០ ឆ្នាំ។
The Line នឹងត្រូវបានកសាងនៅលើផ្ទៃដីប្រហែល ៣៤ គីឡូម៉ែត្រក្រឡា អាចឱ្យមនុស្ស ៩ លាននាក់រស់នៅប្រកបដោយផាសុកភាព ដោយសារមានអ្វីៗស្ទើរគ្រប់យ៉ាង តាំងពីសួនសាធារណៈ តំបន់សម្រាប់ថ្មើរជើង សាលារៀន ផ្ទះស្នាក់នៅ កន្លែងធ្វើការ មជ្ឈមណ្ឌលពាណិជ្ជកម្មជាដើម។ល។
ប្រជាជននៅក្នុងទីក្រុង The Line អាចផ្លាស់ទីទៅតាមទិសចំនួន ៣ គឺ ឡើង ចុះ និងត្រង់ទៅត្រង់មក និងដោះស្រាយតម្រូវការប្រចាំថ្ងៃដោយចំណាយពេលដើរតែ ៥ នាទី។ សំណង់របស់ទីក្រុងនេះ អាចឱ្យគេផ្លាស់ទីពីចុងខាងអាយ ទៅកាន់ចុងខាងនាយដោយប្រើពេលតែ ២០ នាទី ហើយក៏មិនចាំបាច់មានរថយន្ត ដូច្នេះ ក៏មិនបំភាយឧស្ម័នកាបូន។
ព្រោះតែប្រើប្រាស់បច្ចេកវិទ្យាបញ្ញាសិប្បនិម្មិត សេវាកម្មនានានឹងដំណើរការដោយស្វ័យប្រវត្ត ជួយកាត់បន្ថយពេលវេលា និងកម្លាំងកាយ។
ទីក្រុង The Line មានកម្ពស់ ៥០០ ម៉ែត្រ ខ្ពស់ជាងអគារ Empire State (៤៥០ ម៉ែត្រ) នៅ សហរដ្ឋអាម៉េរិក និងតួ Eiffel (៣៣០ ម៉ែត្រ) នៅ ប្រទេសបារាំង។ The Line មានទទឹងប្រវែង ២០០ ម៉ែត្រ, បណ្ដោយ ១៧០ គីឡូម៉ែត្រ។
ដំណោះស្រាយឆ្លាតវៃនាំមកនូវប្រសិទ្ធភាពខ្ពស់ ខណៈដែលអាកាសធាតុត្រូវបានរក្សាឱ្យនៅកម្រិតល្មម ស្រួលរស់នៅពេញមួយឆ្នាំ ដោយមានប្រព័ន្ធបន្សុទ្ធខ្យល់តាមធម្មជាតិ។ ចំណែកប្រភពទឹក និងថាមពលក៏សុទ្ធតែជាប្រភេទកកើតឡើងវិញ និងកែច្នៃឡើងវិញបាន។
The Line នឹងត្រូវបានកសាងនៅក្នុងខេត្ត Tabuk ភាគពាយព្យនៃ ប្រទេសអារ៉ាប៊ីសាអូឌីត។ ពីទីនេះ គេអាចធ្វើដំណើរទៅកាន់ទីតាំងប្រមាណ ៤០% នៅក្នុងពិភពលោក ដោយប្រើពេលតែ ៦ ម៉ោង។ ទីក្រុងនេះក៏ត្រូវបានគេឃោសនាថាជាមជ្ឈមណ្ឌលនៃបណ្ដាដងផ្លូវពាណិជ្ជកម្មសំខាន់ៗផងដែរ៕

July 28, 2022
ក្រោយការសម្រេចចិត្តរបស់ Fed តម្លៃប្រេងពិភពលោកនៅតែបន្តកើនឡើង
បញ្ចប់ការជួញដូរកាលពីថ្ងៃទី ២៧ កក្កដា តម្លៃប្រេង Brent កើន ២.១% ក្នុង ១ ធុង គ្រាដែលតម្លៃប្រេងឆៅ WTI កើន ២.៤% ក្នុង ១ ធុង។
តម្លៃប្រេងពិភពលោកបានកើនជាង ២ ដុល្លារ ក្នុងការជួញដូរកាលពីម្សិលមិញ នៅពេលដែលការថយចុះនៃបរិមាណប្រេងក្នុងឃ្លាំងយុទ្ធសាស្ត្ររបស់ សហរដ្ឋអាម៉េរិក និងបញ្ហាបរិមាណឧស្ម័នពី រុស្ស៊ី ទៅកាន់ អឺរ៉ុប «មានប្រៀប» ជាងការបារម្ភអំពីតម្រូវការថយចុះ និងការដំឡើងការប្រាក់របស់ សហរដ្ឋអាម៉េរិក។
បញ្ចប់ការជួញដូរកាលពីថ្ងៃទី ២៧ កក្កដា តម្លៃប្រេង Brent កើន ២.២២ ដុល្លារ ឬ ២.១% ឡើងដល់ ១០៦.៦២ ដុល្លារ/ធុង គ្រាដែលតម្លៃប្រេងឆៅ WTI កើន ២.២៨ ដុល្លារ ឬ ២.៤% និងបញ្ចប់ក្នុងតម្លៃ ៩៧.២៦ ដុល្លារ/ធុង។
រដ្ឋបាលគ្រប់គ្រងព័ត៌មានថាមពលអាម៉េរិក (EIA) បានឱ្យដឹងថា បរិមាណប្រេងឆៅក្នុងឃ្លាំងរបស់ សហរដ្ឋអាម៉េរិក បានថយចុះ ៤.៥ លានធុងក្នុងសប្ដាហ៍កន្លង នៅពេលបរិមាណប្រេងនាំចេញកើនឡើងខ្ពស់បំផុតមិនធ្លាប់មានពីមុនមក ដោយសារតម្លៃប្រេងឆៅរបស់ អាម៉េរិក ទាបជាងឆ្ងាយធៀបនឹងតម្លៃប្រេង Brent។
ទន្ទឹមនឹងនេះ តម្លៃប្រេងក៏ទទួលបានប្រយោជន៍បន្ទាប់ពីមានព័ត៌មានថា បរិមាណឧស្ម័នបង្ហូរតាមប្រព័ន្ធ Northern Stream 1 កាលពីថ្ងៃទី ២៧ កក្កដា បានថយចុះមកនៅត្រឹម ២០% នៃកម្លាំងរបស់បណ្ដាញបំពង់បង្ហូរនេះ និងព័ត៌មានដែលថា ក្រុមហ៊ុនថាមពលរបស់រដ្ឋអ៊ីតាលី Eni ឱ្យដឹងថា នឹងទទួលបានឧស្ម័នតិចជាងមុន ពីសាជីវកម្ម Gazprom របស់ រុស្ស៊ី។
ការប្រែប្រួលទាំងឡាយខាងលើ បាន «យកឈ្នះ» លើឥទ្ធិពលដែលកើតមានពីការសម្រេចចិត្តដំឡើងការប្រាក់ថែម ០.៧៥ ពិន្ទុភាគរយរបស់ ធនាគារកណ្ដាលរបស់ សហរដ្ឋអាម៉េរិក (Fed) កាលពីថ្ងៃទី ២៧ កក្កដា។
July 28, 2022
លីប៊ី អះអាងថា នឹងប្រឹងប្រែងបង្កើនបរិមាណប្រេងឆៅឱ្យបាន ៣ លានធុងជារៀងរាល់ថ្ងៃ
បរិមាណប្រេងឆៅរបស់ប្រទេសនេះបានកើនឡើងដល់ជាង ១ លានធុង/ថ្ងៃ ក្រោយការធ្លាក់ចុះក្នុងរយៈពេល ៣ ខែ ព្រោះតែការបិទទ្វារអណ្ដូងរ៉ែប្រេង និងកំពង់ផែនានា។
អ្នកនាំពាក្យរបស់ រដ្ឋាភិបាលឯកភាពជាតិលីប៊ី (GNU) លោក Mohammed Hammouda ឱ្យដឹងថា GNU ត្រៀមជាស្រេចក្នុងការបង្កើនការវិនិយោគដើម្បីអភិវឌ្ឍវិស័យប្រេងរ៉ែរបស់ លីប៊ី និងបានអះអាងថា ការប្រឹងប្រែងរបស់រដ្ឋាភិបាលអាចជួយបង្កើនបរិមាណប្រេងឆៅរបស់ប្រទេសនេះឡើងដល់ ៣ លានធុង/ថ្ងៃ។
លោក Hammouda និយាយថា អ៊ីតាលី គឺជាដៃគូពាណិជ្ជកម្មសំខាន់របស់ លីប៊ី ដោយប្រើប្រាស់ប្រេងឆៅជិត ៣០% របស់ប្រទេសនៅ អាហ្វ្រិកខាងជើង មួយនេះ។ នៅពេលនិយាយដល់គម្រោងសាងសង់រោងចក្រអគ្គិសនីដើរដោយថាមពលព្រះអាទិត្យដែលមានកម្លាំង ៥០០ MW របស់សាជីវកម្ម Total (បារាំង) លោក Hammouda ក៏បានជំរុញឱ្យបណ្ដាក្រុមហ៊ុនរបស់ អ៊ីតាលី បង្កើនការវិនិយោគទៅលើ ប្រទេសលីប៊ី ពិសេសក្នុងវិស័យថាមពលកកើតឡើងវិញ។
ឃ្លាំងប្រេងមួយកន្លែងរបស់ ប្រទេសលីប៊ី
ក្រុមមន្ត្រីរបស់ ប្រទេសលីប៊ី កាលពីថ្ងៃទី ២៦ កក្កដា ប្រកាសថា បរិមាណប្រេងឆៅរបស់ប្រទេសនេះបានកើនឡើងដល់ ១.០២៥ លានធុង/ថ្ងៃ ក្រោយការធ្លាក់ចុះក្នុងរយៈពេល ៣ ខែ ព្រោះតែការបិទទ្វារអណ្ដូងរ៉ែប្រេង និងកំពង់ផែនានា។ តួលេខនេះខ្ពស់ជាងឆ្ងាយធៀបនឹង ៨៧០,០០០ ធុង/ថ្ងៃ កាលពីសប្ដាហ៍មុន។
រដ្ឋមន្ត្រីក្រសួងប្រេងឧស្ម័នលីប៊ី លោក Mohamed Aoun បានឱ្យដឹងថា បរិមាណប្រេងឆៅនឹងកើនឡើងដល់ ១.២ លានធុង/ថ្ងៃ ក្នុងរយៈពេល ១០ ថ្ងៃទៀត ធៀបនឹង ១.៣ លានធុង/ថ្ងៃដែលបានផលិតក្នុងត្រីមាសដំបូងនៃឆ្នាំនេះ៕
July 28, 2022
G7 នឹងចាប់ផ្ដើមកំណត់តម្លៃពិតានចំពោះប្រេងរ៉ែរបស់ រុស្ស៊ី យ៉ាងយូរត្រឹមដើមខែធ្នូ
បណ្ដាប្រទេសជាសមាជិក G7 រួមមាន សហរដ្ឋអាម៉េរិក, កាណាដា, ជប៉ុន, អាល្លឺម៉ង់, បារាំង, អ៊ីតាលី, និង អង់គ្លេស បានប្រកាសថា នឹងពិនិត្យការកំណត់តម្លៃពិតានចំពោះប្រេងរ៉ែដែលនាំចេញពី ប្រទេសរុស្ស៊ី ដើម្បីកាត់បន្ថយប្រាក់ចំណូលរបស់ ទីក្រុងមូស្គូ។
កាលពីថ្ងៃទី ២៧ កក្កដា មន្ត្រីជាន់ខ្ពស់មួយរូបមកពីក្រុមប្រទេសឧស្សាហកម្មរីកចម្រើនលំដាប់កំពូលលើពិភពលោក (G7) ឱ្យដឹងថា ក្រុមនេះគ្រោងនឹងអនុវត្តវិធានការកំណត់តម្លៃពិតានចំពោះប្រេងរ៉ែនាំចេញរបស់ រុស្ស៊ី យ៉ាងយូរចាប់ពីថ្ងៃទី ៥ ធ្នូ ២០២២ នៅពេលទណ្ឌកម្មរបស់ សហភាពអឺរ៉ុប (EU) ដែលហាមការនាំចូលប្រេងឆៅរបស់ រុស្ស៊ី មានសុពលភាព។
មន្ត្រីខាងលើបានប្រាប់ថា កាលបរិច្ឆេទនៃការកំណត់តម្លៃប្រេងរបស់ G7 ដែលត្រួតស៊ីគ្នាទៅនឹងពេលវេលានៃទណ្ឌកម្ម ដែល EU បានដាក់ចេញ ក្រុមប្រទេស G7 ចង់ធានាថា យន្តការកំណត់តម្លៃពិតាននឹងមានប្រសិទ្ធភាពស្របពេលជាមួយនឹងវិធានការដាក់ទណ្ឌកម្មរបស់ EU។ កាលពីខែមុន បណ្ដាប្រទេសនៅ G7 រួមមាន សហរដ្ឋអាម៉េរិក, កាណដា, ជប៉ុន, អាល្លឺម៉ង់, បារាំង, អ៊ីតាលី និង អង់គ្លេស បានប្រកាសថា នឹងពិនិត្យលើការកំណត់តម្លៃពិតានចំពោះប្រេងរ៉ែនាំចេញរបស់ រុស្ស៊ី ដើម្បីកាត់បន្ថយប្រាក់ចំណួលពីប្រេងរ៉ែរបស់ ទីក្រុងមូស្គូ។
បច្ចុប្បន្ន G7 កំពុងតែប្រឹងប្រែងបញ្ចុះបញ្ចូល ចិន និង ឥណ្ឌា ឱ្យចូលរួមយន្តការនេះ ក្នុងគ្រាដែលប្រទេសទាំងពីរនេះសុទ្ធតែកំពុងទិញប្រេងឆៅយ៉ាងច្រើនសន្ធឹកពី ប្រទេសរុស្ស៊ី ក្នុងតម្លៃទាប។
G7 ចង់ប្រមូលផ្ដុំសម្ព័ន្ធមិត្តនៃបណ្ដាប្រទេសនាំចូល ដើម្បីអនុវត្តតម្លៃពិតានជាក់លាក់មួយចំពោះប្រេងឆៅដែលនាំចេញពី រុស្ស៊ី។ តម្លៃពិតាននេះត្រូវតែធានាឱ្យបានថា ខ្ពស់ជាងការចំណាយក្នុងការផលិតនៅ រុស្ស៊ី ដើម្បីលើកទឹកចិត្តឱ្យ មូស្គូ បន្តរក្សាការផលិត ប៉ុន្តែ ត្រូវតែទាបជាងតម្លៃនៅក្នុងទីផ្សារដែលកំពុងឡើងខ្ពស់នាបច្ចុប្បន្ន។
មុននោះ កាលពីថ្ងៃទី ២២ កក្កដា ទេសាភិបាលធនាគារជាតិរុស្ស៊ី Elvira Nabiullina បានប្រកាសថា ទីក្រុងមូស្គូ នឹងមិនផ្គត់ផ្គង់ប្រេងដល់បណ្ដាប្រទេសដែលបានសម្រេចចិត្តកំណត់តម្លៃពិតានចំពោះប្រេងរ៉ែរបស់ប្រទេសនេះ៕
July 28, 2022
កម្ពុជា គឺជាប្រទេស «សោកសៅបំផុត» នៅអាស៊ីអាគ្នេយ៍! ការស្ទង់មតិរបស់ Gallup បង្ហាញដូច្នេះ
លទ្ធផលនៃការស្ទង់មតិដែលធ្វើឡើងដោយ Gallup បានបង្ហាញថា កម្ពុជា ឈរលំដាប់លើគេបង្អស់នៅ អាស៊ីអាគ្នេយ៍ ស្ដីពីអារម្មណ៍ «សោកសៅ» ខណៈដែល ហ្វ៊ីលីពីន គឺជាប្រទេសដែល «តានតឹងបំផុត» ក្នុងតំបន់នេះ។
Gallup ដែលជាក្រុមហ៊ុនប្រឹក្សា និងវិភាគទិន្នន័យលំដាប់កំពូលលើពិភពលោក និងមានមូលដ្ឋាននៅ វ៉ាស៊ីងតោន សហរដ្ឋអាម៉េរិក ថ្មីៗនេះបានប្រកាសលទ្ធផលនៃការស្ទង់មតិស្ដីពីស្ថានភាពអារម្មណ៍ពីវិជ្ជមានរហូតដល់អវិជ្ជមាន របស់ប្រជាជននៅក្នុងប្រទេសជាង ១០០ ក្នុងនោះមានទាំងបណ្ដាប្រទេសនៅក្នុង តំបន់អាស៊ីអាគ្នេយ៍ ផងដែរ។
លទ្ធផលនៃការស្ទង់មតិបង្ហាញថា កម្ពុជា គឺជាប្រទេស «សោកសៅ» បំផុត នៅ អាស៊ីអាគ្នេយ៍ ដោយ ៤២% ក្នុងចំណោមមនុស្សដែលត្រូវបានសួរ ឆ្លើយថា ពួកគេទើបតែបានឆ្លងកាត់ភាពសោកសៅ។ រីឯ ហ្វ៊ីលីពីន វិញ ឈរលំដាប់ទីពីរ ដោយមានអត្រា ៣៥% បានឆ្លើយថា «សោកសៅ» ខណៈដែល វៀតណាម ឈរលំដាប់ទីបី ដោយមាន ២៧%។
ចំណែក អារម្មណ៍ «ភាពតានតឹង» វិញ ហ្វ៊ីលីពីន ឈរលំដាប់ទីមួយនៅក្នុងតំបន់អាស៊ីអាគ្នេយ៍។ ប្រទេសថៃ កម្ពុជា និង វៀតណាម ឈរពីក្រោយតាមលំដាប់បន្តបន្ទាប់គ្នា។
ការស្ទង់មតិរបស់ Gallup ត្រូវបានធ្វើឡើងនៅក្នុងតំបន់ អាស៊ីអាគ្នេយ៍ ចាប់ពីឆ្នាំ ២០២១ ដល់ដើមឆ្នាំ ២០២២ ដោយការដាក់សំណួរនានាដែលមានចម្លើយចំនួន ៣ ឱ្យជ្រើសរើសគឺ «យល់ស្រប», «មិនយល់ស្រប» និង «មិនដឹង ឬបដិសេធការឆ្លើយ» ចំពោះមនុស្សដែលមានវ័យចាប់ពី ១៥ ឆ្នាំឡើងទៅ។
នៅក្នុងប្រធានបទ អារម្មណ៍ «ក្រោធខឹង» ប្រទេសឡាវ ឈរលើកំពូលតារាងនៅ អាស៊ីអាគ្នេយ៍ ខណៈដែល ហ្វ៊ីលីពីន ឈរលំដាប់លេខ ២ និង កម្ពុជា ឈរលេខ ៣ ក្នុងគ្រាដែល ថៃ, មីយ៉ានម៉ា និង ឥណ្ឌូណេស៊ី ឈរពីក្រោយបន្តបន្ទាប់គ្នា។
ប្រទេសសិង្ហបុរី ត្រូវបានគេរកឃើញថា មានការ «ក្រោធខឹង» និង «សោកសៅ» តិចជាងគេបង្អស់នៅក្នុង តំបន់អាស៊ីអាគ្នេយ៍។
កម្ពុជា បើទោះជាត្រូវបានគេរកឃើញថា «សោកសៅ» បំផុតនៅ អាស៊ីអាគ្នេយ៍ ប៉ុន្តែ បែរជាឈរលំដាប់កំពូលតារាងចំណាត់ថ្នាក់នៅ តំបន់នេះ និងជាប់លេខ ៥ លើលោក ក្នុងប្រធានបទស្ដីពី «បទពិសោធន៍រីករាយ (Experienced Enjoyment)» ដោយមានចម្លើយស្រប ៨៥% និងមិនស្រប ១៤%។ ក្នុងប្រធានបទនេះដែរ ឥណ្ឌូណេស៊ី, ម៉ាឡេស៊ី និងហ្វ៊ីលីពីន ឈរលំដាប់បន្តបន្ទាប់ សម្រាប់ តំបន់អាស៊ីអាគ្នេយ៍។
ចំណែកអារម្មណ៍ស្ដីពី «ស្នាមញញឹម ឬសំណើច (Smile or Laugh)» Gallup បានរកឃើញថា ឥណ្ឌូណេស៊ី ឈរលំដាប់ទីពីរលើលោក និងទីមួយនៅ អាស៊ីអាគ្នេយ៍ ដោយមានអ្នកឆ្លើយស្រប ៩០% និងមិនស្រប ១០% ខណៈដែល កម្ពុជា ស្ថិតនៅឈរលំដាប់ទីបួនលើពិភពលោក និងទីពីរនៅ អាស៊ីអាគ្នេយ៍ ដោយមានចម្លើយស្រប ៨៩% និងមិនស្រប ១០%។ ចំណែក ឡាវ ឈរលំដាប់ទីប្រាំក្នុងពិភពលោក ស្ដីពី «ស្នាមញញឹម ឬសំណើច»៕
July 27, 2022
ប្រេស៊ីល នឹងមានរោងចក្រផលិតអ៊ីដ្រូសែនបៃតង (green hydrogen) ធំបំផុតក្នុងពិភពលោក
រោងចក្ររបស់ក្រុមហ៊ុន Unigel ដែលគ្រោងនឹងចាប់ផ្ដើមដំណើរការនៅចុងឆ្នាំ ២០២៣ នឹងផលិតអ៊ីដ្រូសែនបៃតងប្រមាណ ១០,០០០ តោន និង អាម៉ូញាក់បៃតង ប្រមាណ ៦០,០០០ តោន នៅក្នុងដំណាក់កាលដំបូង។
ក្រសួងបរិស្ថានប្រេស៊ីល កាលពីថ្ងៃទី ២៦ កក្កដា បានប្រកាសថា សាជីវកម្មពហុជាតិ Unigel ទើបតែចាប់ផ្ដើមសាងសង់រោងចក្រផលិតអ៊ីដ្រូសែនបៃតង (green hydrogen) មួយ ដោយមានទុនវិនិយោគដំបូង ១២០ លានដុល្លារអាម៉េរិក នៅក្នុងទីក្រុង Camacari នៃរដ្ឋ Bahia ភាគឦសានប្រទេសនេះ។
រោងចក្ររបស់ Unigel គ្រោងនឹងដំណើរការចាប់ពីចុងឆ្នាំ ២០២៣ ហើយនឹងផលិតអ៊ីដ្រូសែនបៃតង ប្រមាណ ១០,០០០ តោន និង អាម៉ូញាក់បៃតង (green ammonia) ប្រមាណ ៦០,០០០ តោន នៅក្នុងដំណាក់កាលដំបូង។
Unigel គ្រោងនឹងបង្កើនការផលិតឱ្យបានច្រើនជាងតួលេខខាងលើ ៤ ដង នៅដើមឆ្នាំ ២០២៥ ដែលនេះនឹងជួយឱ្យរោងចក្រនៅ Camacari ក្លាយជាមូលដ្ឋានដែលផលិតអ៊ីដ្រូសែនបៃតង ធំជាងគេក្នុងពិភពលោក។
រោងចក្រថ្មីនេះនឹងប្រើប្រាស់បច្ចេកវិទ្យារបស់សាជីវកម្ម Thyssenkrupp Nucera របស់ អាល្លឺម៉ង់ ក្នុងនោះនឹងដំឡើងម៉ាស៊ីនបំបែកធាតុទឹក ឬហៅថា ម៉ាស៊ីនអេឡិចត្រូលីត្រទឹក (Water Electrolysis Machine) ចំនួន ៣ គ្រៀង ដែលមានកម្លាំង ៦០ MW ដើម្បីបំបែកអ៊ីដ្រូសែនចេញពីភាគល្អិតរបស់ទឹក។
ប្រធានក្រុមហ៊ុន Unigel លោក Roberto Noronha អះអាងថា គម្រោងរោងចក្រ Catamari នឹងជួយឱ្យក្រុមហ៊ុននេះនាំមុខគេក្នុងវិស័យបន្សាបកាបូននៅ ប្រេស៊ីល។
លោក Noronha ឱ្យដឹងថា ប្រេស៊ីល មានសក្ដានុពលខ្លាំងក្លាក្នុងការផលិតអគ្គិសនីពីកម្លាំងខ្យល់ និងថាមពលព្រះអាទិត្យ ដូច្នេះ Unigel ជឿថា ប្រទេសនេះនឹងមានឱកាសនាំមុខពិភពលោកក្នុងវិស័យអ៊ីដ្រូសែនបៃតង ដែលជាដំណោះស្រាយក្នុងការរក្សាថាមពលស្អាតតាមរយៈការបំប្លែងថាមពលកកើតឡើងវិញ ឱ្យទៅជាឥន្ធនៈមិនមានកាបូន។
July 27, 2022
សហរដ្ឋអាម៉េរិក បញ្ចេញប្រេងទៅក្នុងទីផ្សារ ២០ លានធុងបន្ថែមទៀត ពីឃ្លាំងយុទ្ធសាស្ត្រ
អាជ្ញាធរអាម៉េរិក បង្ហើបឱ្យដឹងថា ប្រទេសនេះនឹងលក់ប្រេង ២០ លានធុងថែមទៀត ពីឃ្លាំងប្រេងរ៉ែយុទ្ធសាស្ត្រ (SPR) ដើម្បីជួយបញ្ចុះតម្លៃប្រេងសាំងក្នុងទីផ្សារនាបច្ចុប្បន្ន។
កាលពីថ្ងៃទី ២៦ កក្កដា រដ្ឋាភិបាលរបស់លោក បៃដិន បានឱ្យដឹងថា សហរដ្ឋអាម៉េរិក នឹងបញ្ចេញប្រេងពីឃ្លាំងយុទ្ធសាស្ត្រចំនួន ២០ លានធុងទៀត ដើម្បីបញ្ចុះតម្លៃប្រេងសាំងដែលកំពុងតែឡើងថ្លៃខ្ពស់។
មុននោះ កាលពីចុងខែមីនា ប្រធានាធិបតី បៃដិន បានចេញបញ្ជាឱ្យបញ្ចេញប្រេងចំនួន ១ លានធុង/ថ្ងៃ ពីSPR ក្នុងរយៈពេល ៦ ខែ ដើម្បីបញ្ចុះតម្លៃប្រេងសាំង ក្នុងគ្រាដែលសង្គ្រាមនៅ អ៊ុយក្រែន កំពុងបង្កឱ្យមានការរឹតត្បិតប្រភពផ្គត់ផ្គង់ប្រេងរ៉ែនៅលើទីផ្សារអន្តរជាតិ។
មន្ត្រីជាន់ខ្ពស់របស់ មូលនិធិរូបិយវត្ថុអន្តរជាតិ (IMF) Pierre-Olivier ក្នុងថ្ងៃដដែលបានថ្លែងថា «បរិស្ថានបច្ចុប្បន្ន បង្ហាញថា លទ្ធភាពដែលសេដ្ឋកិច្ចរបស់ សហរដ្ឋអាម៉េរិក អាចចៀសវាងពីវិបត្តិបាន គឺពិតជាស្ដួចស្ដើង»។ លោក Olivier ក៏បានព្រមានថា សូម្បីតែបញ្ហាភ្ញាក់ផ្អើលតូចមួយ» ក៏អាចរុញច្រានសេដ្ឋកិច្ចរបស់ សហរដ្ឋអាម៉េរិក ធ្លាក់ទៅក្នុងឱនភាព៕
July 27, 2022
កម្មវិធីសម្ពោធរថយន្ត Ford Everest ស៊េរីថ្មីឆ្នាំ 2023 សម្រាប់អ្នកសារព័ត៌មាន
[ភ្នំពេញ – ថ្ងៃទី ២៥ ខែកក្កដា ឆ្នាំ២០២២] ក្រុមហ៊ុន អ អិម អេ (ខេមបូឌា) ម.ក ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបានប្រារព្ធកម្មវិធីសម្ពោធរថយន្ត Ford Everest ស៊េរីថ្មីឆ្នាំ 2023 ជាមួយអ្នកសារព័ត៌មានដែលកម្មវិធីនេះបានប្រារព្ធធ្វើឡើងនៅសណ្ឋាគារ សុខា ភ្នំពេញ។ កម្មវិធីនេះបានប្រព្រឹត្តទៅយ៉ាងជោគជ័យដែលនេះជាឱកាសដ៏ល្អសម្រាប់មិត្តអ្នកសារព័ត៌មានក្នុងការទទួលជ្រាប និងស្វែងយល់ពីរថយន្តបន្ថែមមុនពេលប្រកាសចេញលក់ជាផ្លូវការ។ កម្មវិធីនេះត្រូវបានអញ្ជើញចូលរួមក្រោមវត្តមានដ៏ខ្ពង់ខ្ពស់របស់លោក ងន សាំង អគ្គនាយកនៃក្រុមហ៊ុន អ អិម អេ ខេមបូឌា លោកស្រី Pritika Maharaj ប្រធានគ្រប់គ្រងគម្រោងរថយន្ត Ford Ranger និង Ford Everest នៃក្រុមហ៊ុន Ford Motor Company ប្រចាំប្រទេសអូស្រ្តាលី លោក Peerakorn Sophonsiri ប្រធានផ្នែកទីផ្សារនៃក្រុមហ៊ុន Ford Motor Company ប្រចាំអាស៊ីប៉ាស៊ីហ្វិក និងមិត្តអ្នកសារព័ត៌មានយ៉ាងច្រើនកុះករ។
ឆ្លៀតក្នុងឱកាសនេះដែរ លោក ងន សាំង បានមានប្រសាសន៍ថា៖ “ថ្ងៃនេះខ្ញុំពិតជាមានសេចក្តីសោមនស្សរីករាយក្រៃលែងដែលបានអញ្ជើញចូលរួមក្នុងកម្មវិធីសម្ពោធរថយន្ត Ford Everest ស៊េរីថ្មីឆ្នាំ 2023 ជាមួយអ្នកសារព័ត៌មាន ជាពិសេសទៀតនោះគឺ ក្រុមហ៊ុន អ អិម អេ ខេមបូឌាមានកិត្តិយសបានអញ្ជើញលោកស្រី Pritika Maharaj ប្រធានគ្រប់គ្រងគម្រោងរថយន្ត Ford Ranger និង Ford Everest នៃក្រុមហ៊ុន Ford Motor Company ប្រចាំប្រទេសអូស្រ្តាលី មកធ្វើបទបង្ហាញពីរថយន្ត Ford Everest ស៊េរីថ្មីឆ្នាំ 2023 ជូនដល់បងប្អូនមិត្តអ្នកសារព័ត៌មាន និងបានធ្វើការបង្ហាញលម្អិតពីផ្នែកនីមួយៗនៃរថយន្តនេះផងដែរ។”
លោកស្រី Pritika Maharaj បានមានប្រសាសន៍ថា៖ “រថយន្ត Ford Everest ស៊េរីថ្មីឆ្នាំ 2023 គឺបានត្រៀមខ្លួនរួចជាស្រេចក្នុងដំណើរកម្សាន្តបែបផ្សងព្រេងរបស់លោកអ្នកជាមួយនឹងភាពធន់ រឹងមាំ ផាសុកភាពជូនដល់អ្នកដំណើរ និងបច្ចេកវិទ្យាច្រើនលើសពីការរំពឹងទុក ដើម្បីផ្តល់ជូននូវការបើកបរដ៏រីករាយ និងមានទំនុកចិត្ត។”
មិនត្រឹមតែប៉ុណ្ណោះលោកស្រី Pritika Maharaj ក៏បានធ្វើបទបង្ហាញយ៉ាងក្បោះក្បាយ និងលម្អិតបន្ថែមពីចំណុចពិសេសរបស់ Ford Everest ស៊េរីថ្មីដូចជា៖
- ម៉ាស៊ីនម៉ាស៊ូត 0L Bi-Turbo ជំនាន់ថ្មី ដែលត្រូវអភិវឌ្ឍន៍ និងកែប្រែបន្ថែមឲ្យកាន់តែមានកម្លាំងខ្លាំង និងស្ងាត់ជាងមុន
- ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) ដែលនេះគឺជាលើកដំបូងដែល Ford បានបំពាក់ប្រអប់លេខជាប្រភេទអេឡិចត្រូនិចបែបនេះនៅលើរថយន្ត SUV នេះ ដែលប្រអប់លេខនេះមិនត្រឹមតែការរចនាស្រស់ស្អាតដូចរថយន្តស្ព័រប៉ុណ្ណោះទេ តែថែមទាំងមានមុខងារយ៉ាងច្រើនសម្បូរបែបដូចជា៖ ការចូលលេខរលូន និងធូរជាងមុន ការដំណើរការដោយស្វ័យប្រវត្តជាមួយនឹងប្រព័ន្ធជំនួយចូលចតដោយស្វ័យប្រវត្ត 0 ជំនាន់ថ្មី និងសុវត្ថិភាពខ្ពស់បំផុតនោះគឺ នៅពេលដែលលោកអ្នកបានពន្លត់ម៉ាស៊ីនដោយមិនបានចូលលេខទៅ P ប្រអប់លេខនឹងធ្វើការចូលលេខទៅលេខ P ដោយខ្លួនឯងដើម្បីធានាជូននូវសុវត្ថិភាពពេលចតរថយន្ត
- ប្រព័ន្ធជំនួយចូលចតដោយស្វ័យប្រវត្ត 0 ជំនាន់ថ្មី (Active Park Assist 2.0) ដែលរថយន្តនឹងដំណើរការចូលចតដោយស្វ័យប្រវត្តដោយលោកអ្នកគ្រាន់តែចុចនូវប៊ូតុងមួយតែប៉ុណ្ណោះ នោះរថយន្តនឹងធ្វើការចូលចតដោយស្វ័យប្រវត្ត ពោលគឺវាជួយបង្វិលចង្កូត ដំណើរការហ្វ្រាំង និងហ្គ៊ែរ និងប្រអប់លេខក៏នឹងធ្វើការចូលលេខខ្លួនឯង ដោយពុំចាំបាច់មានការចូលរួមពីអ្នកបើកបរឡើយ
- កុងទ័រឌីជីថលថ្មីស្រឡាងទំហំរហូតដល់ 4 អ៊ីញ (12.4” Digital Instrument Cluster)ដែលនូវផ្តល់ទិន្នន័យយ៉ាងលម្អិតពីរថយន្ត
- អេក្រង់ Touchscreen បញ្ឈរធំចំកណ្តាលទំហំ 12 អ៊ីញ (12-Inch Infotainment Screen) ផ្តល់នូវរូបភាពរស់រវើក
- ប្រព័ន្ធកាមេរ៉ា 360 ដឺក្រេកម្រិតខ្ពស់ជុំវិញរថយន្ត (360^oCamera Split-View Display)
- ប្រព័ន្ធបើកឃ្លុបក្រោយដោយគ្រាន់តែគ្រវាសជើង (Hands-Free Liftgate)
- បូករួមជាមួយនឹងប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែល Ford បានបំពាក់នៅលើរថយន្ត SUV ដ៏ប្រណិតមួយនេះ
គួរបញ្ជាក់ផងដែរថាសម្រាប់ទីផ្សារប្រទេសកម្ពុជា Ford Cambodia ប្រកាសបើកទទួលការកក់ជាផ្លូវការជាមួយនឹងរថយន្ត Ford Everest Sport ស៊េរីថ្មីឆ្នាំ 2023 ជាមួយនឹងតម្លៃជាង 6 ម៉ឺនដុល្លា និងរថយន្ត Ford Everest Titanium ស៊េរីថ្មីឆ្នាំ 2023 ជាមួយនឹងតម្លៃជាង 7 ម៉ឺនដុល្លា សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរនៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
- អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
- អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
- អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
- អគារតាំងបង្ហាញរថយន្ត Ford Trade-In ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 077 722 999
- អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
- អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
July 26, 2022
ប្រធានផ្នែកប្រតិបត្តិថ្មី (COO) របស់ Facebook គឺជាអ្នកណា?
ក្រោយពីអ្នកស្រី Sheryl Sandberg ដែលជាដៃស្ដាំរបស់ CEO Facebook លោក Mark Zuckerberg បានសុំលាឈប់ពីតំណែង លោក Javier Olivan នឹងឡើងមកជំនួស។
Meta ដែលជាក្រុមហ៊ុនមេរបស់ Facebook ប្រកាសថា Javier Olivan នឹងចូលមកជំនួសអ្នកស្រី Sheryl Sandberg ដោយកាន់កាប់តំណែងប្រធានផ្នែកប្រតិបត្តិការ (COO) របស់ Facebook។ លោក Olivan ដើរតួនាទីសំខាន់ ប៉ុន្តែមិនសូវ «មាត់ក» ដោយបានជួយឱ្យបណ្ដាញសង្គមនេះរីកចម្រើនក្នុងរយៈពេល ១៥ ឆ្នាំកន្លង។
កាលពីថ្ងៃទី ២ កក្កដា អ្នកស្រី Sandberg បានបង្ហើបឱ្យដឹងថា នឹងលាលែងពីតំណែង COO របស់ Facebook នៅចុងឆ្នាំនេះ ដើម្បី «បង្កើតទំព័រថ្មី» ក្នុងជីវិត និងផ្ដោតទៅលើសកម្មភាពមនុស្សធម៌។ អ្នកស្រីបានសម្រេចចិត្តបែបនេះនៅក្នុងគ្រាដែល Meta កំពុងធ្វើដំណើរយ៉ាងត្រដាបត្រដួសដោយសារកំណើនយឺន និងការចំណាយខ្ពស់។ ក្រុមហ៊ុននេះកំពុងតែពង្រីកខ្លួនពីបណ្ដាញសង្គម ទៅផ្ដោតលើពិភពនិម្មិត (Virtual world)។
លោក Olivan កើត និងធំឡើងនៅ អេស្ប៉ាញ មានសញ្ញាបត្របរិញ្ញាផ្នែកវិស្វកម្មឧស្សាហកម្ម និងបច្ចេកទេសអគ្គិសនី ដែលបានមកពីសាកលវិទ្យាល័យ Navarra, សញ្ញាបត្រអនុបណ្ឌិតផ្នែកគ្រប់គ្រងពាណិជ្ជកម្ម របស់ សាកលវិទ្យាល័យ Stanford។
មុនពេលចូលធ្វើជា ប្រធានផ្នែកកំណើនអន្តរជាតិ (Director of International Growth) ឱ្យក្រុមហ៊ុន Facebook កាលពីឆ្នាំ ២០០៧ លោក Olivan ធ្លាប់ធ្វើការនៅក្រុមហ៊ុនអ៊ីនធើណិត NTT (ជប៉ុន) និង Siemens។ ពេលនោះ Facebook ទើបតែមានអ្នកប្រើប្រាស់ប្រចាំថ្ងៃ ប្រហែល ៤០ លាននាក់ប៉ុណ្ណោះ។ មកដល់ពេលនេះ «ម៉ាស៊ីនរកប្រាក់» នេះ ទាក់ទាញអ្នកប្រើប្រាស់បានជិត ៣.៦ ពាន់លាននាក់នៅលើ Facebook, Instagram, WhatsApp ។ល។
លោក Javier Olivan
ក្នុងនាមជា ប្រធានផ្នែកកំណើនអន្តរជាតិ Olivan បានជំរុញផែនការពង្រីកឥទ្ធិពលរបស់ Facebook នៅក្នុងបណ្ដាប្រទេសដូចជា ឥណ្ឌា, ជប៉ុន, រុស្ស៊ី, ឥណ្ឌូណេស៊ី និង ប្រេស៊ីលជាដើម។
ជាមួយនឹងតំណែង ប្រធានផ្នែកកំណើនអន្តរជាតិ ភារកិច្ចសំខាន់របស់លោក Olivan គឺគ្រប់គ្រងឧបករណ៍ និងមុខងារទាំងឡាយនៅលើ Facebook, Instagram, WhatsApp, Messenger។ ចំណែកតំណែងថ្មី (COO) លោក Olivan នឹងបន្តដឹកនាំសកម្មភាពអភិវឌ្ឍអាជីវកម្ម និងហេដ្ឋារចនាសម្ព័ន្ធ។ ប៉ុន្តែ បើតាម CEO Zuckerberg ការងារដែលលោក Olivan ត្រូវរ៉ាប់រងបន្ថែមទៀត នោះគឺ ផលិតផលផ្សព្វផ្សាយ និងពាណិជ្ជកម្ម៕
July 26, 2022
ប្រទេសចិន សាកល្បងឧទ្ធម្ភាគចក្របើកបរស្វ័យប្រវត្តនៅលើសមុទ្រ (វីដេអូ)
កំណែគំរូនៃឧទ្ធម្ភាគចក្រគ្មានមនុស្សបើក AR-500BJ របស់ ចិន បានសម្រេចគោលដៅជាស្ថាពរក្នុងការសាកល្បងហោះឡើង និងចុះចតនៅលើនាវានៅឯកំពង់ផែ Qingdao កាលពីថ្ងៃទី ២២ កក្កដា។
«ក្នុងពេលសម្ដែងបង្ហាញ និងដំណើរការសាកល្បង AR-500BJ បានសម្រេចគោលដៅដោយរលូនចំពោះវិញ្ញាសាហោះហើរដូចជា ហោះឡើង និងចុះចតនៅលើនាវា ដែលនេះគឺជាជំហានដ៏ធំនៃការរីកចម្រើនរបស់ប្រភេទឧទ្ធម្ភាគចក្រគ្មានមនុស្សបើកបរនេះ» ក្រុមហ៊ុនឧស្សាហកម្មអាកាសចរណ៍ចិន (AVIC) បានប្រកាសនៅលើទំព័រ WeChat ដូច្នេះ។
AR-500BJ គឺជាឧទ្ធម្ភាគចក្រធុនស្រាល ដោយមានទម្ងន់ ៥០០ គីឡូក្រាម នេះបើតាម CCTV។ វាត្រូវបានអភិវឌ្ឍដោយយោងទៅតាមម៉ូដែលឧទ្ធម្ភាគចក្រ AR-500 ដែលត្រូវបានប្រកាសបង្ហាញមុននោះ ដើម្បីសមស្របនឹងចំណតដ៏តូចចង្អៀតនៅលើនាវា។ ឧទ្ធម្ភាគចក្រនេះប្រើប្រាស់ម៉ាស៊ីនដើរដោយប្រេងឥន្ធនៈធុនធ្ងន់ ដែលផលិតដោយប្រទេសចិន។
ឧទ្ធម្ភាគចក្របើកបរស្វ័យប្រវត្តិថ្មីនេះ ត្រូវបានរចនាឡើងសម្រាប់គោលដៅយោធា និងស៊ីវិល។ វាអាចស៊ូទ្រាំបានជាមួយនឹង «បរិស្ថានអេឡិចត្រូម៉ាញ៉េទិចស្មុគស្មាញ» ជាស្ថានការណ៍យោធាមួយដែលរលកសញ្ញាអេឡិចត្រូម៉ាញ៉េទិចរារាំងសមត្ថភាពតាមដានសភាពការណ៍ក្នុងសមរភូមិ។
ឧទ្ធម្ភាគចក្របើកបរស្វ័យប្រវត្ត ដែលផលិតដោយ ប្រទេសចិន ទទួលបានការគាំទ្រពីប្រទេសមួយចំនួន ដូចជា ប្រទេសអាលហ្សេរី និង អេហ្ស៊ីប ជាដើម ដោយសារតែវាមានតម្លៃទាបជាង ធៀបនឹងផលិតផលរបស់ សហរដ្ឋអាម៉េរិក និង អឺរ៉ុប៕
July 26, 2022