សង្គម និងសេដ្ឋកិច្ច - La Reine Media

ស្ពានយោលសម្រាប់ឡានដឹកសម្ភារសំណង ឆ្លងកាត់ពីលើជ្រលងភ្នំជម្រៅ ៣០០ ម៉ែត្រ (វីដេអូ)

(ប្រទេសចិន)-ស្ពានបណ្ដោះអាសន្នមួយខ្សែដែលមានសមត្ថភាពផ្ទុក ៤៥ តោន និងប្រវែងជាង ២៤៥ ម៉ែត្រ ត្រូវបានគេសង់ឡើងដើម្បីដឹកជញ្ជូនគ្រឿងសំណង់ទៅឱ្យការដ្ឋានមួយដែលកំពុងអនុវត្តគម្រោង ជំនួសឱ្យការធ្វើដំណើរតាមផ្លូវបត់បែនចម្ងាយ ៣០ គីឡូម៉ែត្រ។

ទិដ្ឋភាពរថយន្តបរឆ្លងកាត់តាមស្ពានយោលបណ្ដោះអាសន្ននេះ ត្រូវបានគេប្រៀបប្រដូចទៅនឹងអ្នកសំដែងសៀកកំពុងដើរនៅលើខ្សែ។ ស្ពានយោលដែលធ្វើឡើងពីខ្សែពួរនេះទាក់ទាញបានចំណាប់អារម្មណ៍ច្រើនពីអ្នកលេងបណ្ដាញសង្គម នេះបើតាម Xinhua ចេញផ្សាយកាលពីថ្ងៃទី ៣១ កក្កដា។

ស្ពានដែលមានទទឹងត្រឹមតែ ៤.៣ ម៉ែត្រ, បណ្ដោយជាង ២៤៥ ម៉ែត្រ និងអាចទ្របានទម្ងន់ ៤៥ តោននេះ ត្រូវបានសាងសង់ឆ្លងកាត់ពីលើជ្រលងភ្នំមួយដែលមានជម្រៅ ៣០០ ម៉ែត្រ។

ស្ពាននេះគឺជាផ្លូវបណ្ដោះអាសន្នសម្រាប់ការដឹកជញ្ជូនសម្ភារសំណង់នានាទៅឱ្យគម្រោងស្ពានមួយផ្សេងទៀតដែលកំពុងត្រូវបានស្ថាបនា។

ផ្លូវចរាចរណ៍ដែលមានស្រាប់ មិនសមស្របជាមួយនឹងការងារខាងលើ និងត្រូវការពង្រីកបន្ថែមបើសិនមិនចង់បរតាមផ្លូវដែលមានចម្ងាយ ៣០ គីឡូម៉ែត្រ។ ដូច្នេះ ស្ពានយោលនេះក៏ត្រូវបានបង្កើតឡើងដើម្បីដោះស្រាយបញ្ហាខាងលើ។

ស្ពានបណ្ដោះអាសន្នដែលស្ថិតនៅក្នុងខេត្ត Chongqing ភាគនិរតីនៃ ប្រទេសចិន នេះ ជួយកាត់បន្ថយការចំណាយប្រាក់កាស និងចៀសវាងផលប៉ះពាល់មិនចាំបាច់ដល់បរិស្ថាន៕

August 1, 2022

ជើងរថភ្លើងដំបូងរវាងខេត្ត Shanxi របស់ ចិន និង ឡាវ ចាប់ផ្ដើមដំណើរការហើយ

ខេត្ត Shanxi ប្រទេសចិន ទើបតែចាប់ផ្ដើមដំណើរការខ្សែរថភ្លើងដឹកទំនិញអន្តរជាតិដំបូងរបស់ខ្លួនដែលរត់នៅលើផ្លូវដែក ចិន-ឡាវ។

យោងតាមក្រុមហ៊ុនផ្លូវដែក Taiyuan Group របស់ ចិន រថភ្លើងបានចេញដំណើរពីខេត្ត Shanxi និងគ្រោងទៅដល់ រដ្ឋធានីវៀងចន្ទន៍ របស់ ឡាវ ក្នុងរយៈពេល ៧ ថ្ងៃទៀត។ រថភ្លើងនេះដឹកទំនិញមួយចំនួន ក្នុងនោះមានទាំងជី និងថ្នាំលាបផងដែរ។

ខ្សែរថភ្លើងដឹកទំនិញអន្តរជាតិថ្មីដែលទើបតែបានសម្ពោធបើកដំណើរការនៅក្នុងខេត្ត Shanxi ប្រទេសចិន នេះ ត្រូវបានគេរំពឹងថា នឹងជួយសម្រួល ពង្រីកការតភ្ជាប់ក្នុងវិស័យដឹកជញ្ជូនរវាងតំបន់នានានៅភាគខាងជើងប្រទេសចិន និងបណ្ដាប្រទេសជាសមាជិករបស់ ASEAN ក៏ដូចជាដើរតួនាទីក្នុងការជំរុញការដោះដូរសេដ្ឋកិច្ច និងពាណិជ្ជកម្មក្នុងតំបន់ទាំងនេះ។

ចាប់ផ្ដើមដំណើរការកាលពីថ្ងៃទី ០៣ ធ្នូ ២០២១ ផ្លូវដែកឡា-ចិន នេះ មានប្រវែង ១,០០០ គីឡូម៉ែត្រ តភ្ជាប់ទីក្រុងរដ្ឋបាល Kunming របស់ខេត្ត Yunnan នៅភាគនិរតីនៃ ប្រទេសចិន ជាមួយនឹង រដ្ឋធានីវៀងចន្ទន៍ របស់ ឡាវ។

ផ្លូវដែកនេះត្រូវបានគេវាយតម្លៃថាជាគម្រោងដ៏ធំមួយ ដែលមិនត្រឹមតែជួយជំរុញការធ្វើដំណើរ និងទេសចរណ៍នោះទេ តែថែមទាំងបង្កភាពងាយស្រួលដល់ពាណិជ្ជកម្មឆ្លងព្រំដែន កាត់បន្ថយពេលវេលា និងការចំណាយទៅលើការដឹកជញ្ជូនផងដែរ។

មុននោះ កាលពីថ្ងៃទី ០៣ ធ្នូ ២០២១ ក្រោយពីពិធីសម្ពោធបើកដំណើរការជាផ្លូវការ ជើងរថភ្លើងដឹកទំនិញដំបូងនៃផ្លូវដែកល្បឿនលឿនលេខ ១ នៅ ឡាវ ក៏បានចេញដំណើរ។ ទំនិញដែលត្រូវបានដឹកតាមជើងរថភ្លើងនេះគឺជាជីរបស់ក្រុមហ៊ុនចិន-ឡាវ។

ផ្លូវដែកល្បឿនលឿនដំបូងគេបង្អស់នៅ ប្រទេសឡាវ ត្រូវបានសម្ពោធបើកការដ្ឋានសាងសង់កាលពីឆ្នាំ ២០១៦ ដោយមានទុនវិនិយោគប្រហែល ៥.៩៥ ពាន់លានដុល្លារអាម៉េរិក។ ផ្លូវដែកឡាវ-ចិន នេះ មានប្រវែង ៤១៤ គីឡូម៉ែត្រ នៅក្នុង ប្រទេសឡាវ និង ១,០៣៥ គីឡូម៉ែត្រ នៅក្នុង ប្រទេសចិន។

គម្រោងនេះ ភាគច្រើនត្រូវបានអនុវត្តដោយសាជីវកម្មផ្លូវដែកជាតិចិន (CNRG) និងជាផ្លូវដែកមួយគន្លងដែលស្ថាបនាទៅតាមស្ដង់ដារបស់ ប្រទេសចិន៕

August 1, 2022

រ៉ូបូតរាងមនុស្ស ចុះទៅស្រាវជ្រាវសាកសពកប៉ាល់នៅបាតសមុទ្រ (វីដេអូ)

(សហរដ្ឋអាម៉េរិក)-រ៉ូបូត OceanOneK របស់វិទ្យាស្ថានស្រាវជ្រាវ Stanford Robotics អាចមុជទឹកក្នុងជម្រៅជិត ១ គីឡូម៉ែត្រ ដើម្បីប្រមូលយកវត្ថុបុរាណ ស្រាវជ្រាវសាកសពកប៉ាល់ដែលបានលិច និងជួសជុលសំណង់ក្រោមសមុទ្រ។

នេះគឺជា OceanOneK ដែលជារ៉ូបូតរាងមនុស្សត្រូវបានបង្កើតឡើងដើម្បីធ្វើការនៅក្រោមទឹក។ ត្រូវបានរចនាឡើងដោយវិទ្យាស្ថានស្រាវជ្រាវ Stanford Robotics រ៉ូបូតនេះអាចមុជទឹកក្នុងជម្រៅជិត ១ គីឡូម៉ែត្រ និងដំណើរការក្នុងបរិស្ថានដូចមនុស្ស។ កំណត់ត្រានៃការមុជទឹកមានបំពាក់បំពង់អុកស៊ីសែននាបច្ចុប្បន្នរបស់មនុស្សគឺត្រឹម ៣៣២.៣២ ម៉ែត្រ។

ប្រព័ន្ធឆ្លើយតបដែលយោងទៅលើអង្គញាណរបស់ OceanOneK បង្កើតបានជាអារម្មណ៍ជាក់ស្ដែងដល់ថ្នាក់អ្នកបើកបរអាចទទួលអារម្មណ៍ដឹងគ្រប់យ៉ាងដែលរ៉ូបូតនេះបានប៉ះ។ ក្បាលរបស់រ៉ូបូតនេះក៏មានបំពាក់កាមេរ៉ាចំនួន ២ គ្រាប់ ដូចទៅនឹងភ្នែកមនុស្ស ដើម្បីបង្កើតបានជាទិដ្ឋភាព 3D យ៉ាងរស់រវើកនៅលើអេក្រង់។

យោងតាម Ousamma Khatib ប្រធានវិទ្យាស្ថានស្រាវជ្រាវ Stanford Robotics ប្រព័ន្ធអេក្រង់ដែលតភ្ជាប់មនុស្សទៅនឹងរ៉ូបូត ធ្វើឱ្យអ្នកប្រើប្រាស់មានអារម្មណ៍ថាដូចកំពុងស្ថិតនៅក្រោមទឹកដោយមិនសើម។

នៅក្នុងការស្រាវជ្រាវថ្មីៗនេះ រ៉ូបូតខាងលើប្រមូលយកក្រឡបុរាណពីកប៉ាល់មួយគ្រឿងដែលបានលិចក្នុងសម័យចក្រភពរ៉ូម។ ក្រៅពីនេះ OceanOneK ក៏អាចជួយជួសជុលសំណង់នានាដែលនៅក្រៅទឹកសមុទ្រផងដែរ។

ក្រោយពីការសាកល្បងដំណើរការនៅ Stanford រ៉ូបូត OceanOneK ក៏ធ្លាប់បានចូលរួមបំពេញបេសកកម្មមួយចំនួនក្នុងឆ្នាំ ២០២២ រួចមកហើយ ដូចជានៅ La Ciotat, Cote d’Azure, Bastia, Corsica និង Cannes ជាដើម៕

August 1, 2022

តម្លៃមាសនៅក្នុងសប្ដាហ៍នេះអាចបន្តកើនឡើង

ដោយមានក្ដីសង្ឃឹមថា Fed នឹងបន្ធូរបន្ថយគោលនយោបាយហិរញ្ញវត្ថុ អ្នកវិភាគជាច្រើននាក់នៅ Wall Street និង Main Street ព្យាករថា មាសនឹងរក្សានិន្នាការឡើងថ្លៃ។

យោងតាមការស្ទង់មតិប្រចាំសប្ដាហ៍របស់ Kitco News ថ្មីៗនេះ អ្នកវិភាគភាគច្រើននៅ Wall Street និងអ្នកវិនិយោគនៅ Main Street បានព្យាករថា តម្លៃមាសនឹងឡើងខ្ពស់នៅក្នុងសប្ដាហ៍នេះ។ អារម្មណ៍វិជ្ជមានបានកើតឡើងនៅពេលតម្លៃមាសកើន ២% កាលពីដំណាច់សប្ដាហ៍កន្លង និងកំពុងមានប្រៀបជាងប្រភពឧបសគ្គសំខាន់។ តម្លៃមាសសម្រាប់ខែធ្នូ ប្រគល់ជាលើកចុងក្រោយ ត្រូវបានជួញដូរក្នុងតម្លៃ ១,៧៨៣.៣០ ដុល្លារអាម៉េរិក/អោន ខណៈដែលមាសប្រគល់ភ្លាម មានតម្លៃ ១,៧៦៦.៥ ដុល្លារ/អោន (១ អោន ស្មើនឹង ៨.២៩៤២៦ ជី)។

ក្នុងចំណោមអ្នកវិភាគ ១៦ រូបនៅ Wall Street ដែលបានចូលរួមក្នុងការស្ទង់មតិ មាន ១១ រូបយល់ថា មាសនឹងឡើងថ្លៃក្នុងពេលខាងមុខនេះ។ ក៏ប៉ុន្តែ នៅតែមានអ្នកវិភាគ ៣ រូបទៀត ដែលយល់ថា មាសនឹងធ្លាក់ថ្លៃ គ្រាដែលអ្នកវិភគ ២ រូបផ្សេងទៀត យល់ថា មិនឡើង មិនចុះ។

អត្រាដែលស្ទើរតែដូចគ្នានេះក៏បានបង្ហាញនៅក្នុងការស្ទង់មតិតាមអនឡាញជាមួយនឹងអ្នកវិនិយោគជាង ១,៥០០ នាក់នៅ Main Street ផងដែរ។ ៦២% យល់ថា តម្លៃមាសនឹងកើនឡើង, ២២% ព្យាករថា នឹងធ្លាក់ថ្លៃ ស្របពេលដែល ១៦% ផ្សេងទៀតថា នៅដដែល។

Daniel Pavilonis អ្នកវិភាគរបស់ RJO Futures បានអះអាងថា ការឡើងថ្លៃរបស់មាស កើតឡើងនៅពេលអារម្មណ៍អស់សង្ឃឹមរបស់អ្នកវិនិយោគបានធូរស្បើយ។ បើសិនជា ធនាគារកណ្ដាលអាម៉េរិក (Fed) មានគោលនយោបាយបន្ធូរបន្ថយជាងមុនក្នុងប៉ុន្មានខែចុងឆ្នាំនេះ តម្លៃមាសនឹងបន្តកើនឡើង៕

August 1, 2022

សហគមន៍កសិកម្មមួយនៅក្នុងខេត្ត សៀមរាប ចូលរួមចំណែកក្នុងការជួយបណ្តុះបណ្តាលជំនាញកសិកម្ម និងរកទីផ្សារជូនកសិករ

ស្ថិតនៅក្នុងស្រុកពួក ខេត្តសៀមរាប សហគមន៍កសិកម្មអភិវឌ្ឍន៍រីកចម្រើន បានពង្រីកសមាជិករបស់ខ្លួនបានចំនួន ១០៤ នាក់ នៅក្នុងឆ្នាំ ២០២២ ដើម្បីពង្រឹងសមត្ថភាពផលិតផលកសិកម្ម ឱ្យកាន់តែមានគុណភាព និងមានការជឿងជាក់ ពីសំណាក់អតិថិជន។

យោងតាម លោកស្រី រិន រាន សហគមន៍កសិកម្មអភិវឌ្ឍន៍រីកចម្រើន ត្រូវបានបង្កើតឡើងក្នុងបំណង ប្រមូលផ្តុំកម្លាំងផលិត និងពង្រឹងសមត្ថភាពផលិតកម្មកសិកម្ម កសិឧស្សាហកម្ម សិប្បកម្មកែច្នៃ សេវាកម្ម ពាក់ព័ន្ធនឹងវិស័យកសិកម្ម លើកកម្ពស់ទិន្នផល បរិមាណ និងគុណភាព ការពារតម្លៃផលិតផលកសិកម្ម ដែលប្រជាពលរដ្ឋផលិតបាន ព្រមទាំងលើកកម្ពស់ផលប្រយោជន៍ប្រជានពលរដ្ឋនៅក្នុងមូលដ្ឋាន ជាពិសេសធ្វើការបណ្តុះបណ្តាលជំនាញ និងបច្ចេកទេសផ្នែកកសិកម្ម និងជួយរកទីផ្សារជូនសមាជិកនៅក្នុងសហគម។

នៅក្នុងសហគមន៍កសិកម្មអភិវឌ្ឍន៍រីកចម្រើន មានការបែងជាក្រុមតាមប្រភេទផលិតផល ដូចជា អ្នកដាំបន្លែ អ្នកចិញ្ចឹមសត្វ និងក្រុមអ្នកធ្វើវត្ថុអនុស្សាវរីយ៍ផ្សេង។

សហគមន៍កសិកម្មអភិវឌ្ឍន៍រីកចម្រើន ត្រូវបានបង្កើតឡើងតាំងពីឆ្នាំ ២០១៨ ដោយផ្តើមចេញពីក្រុមជួយខ្លួនឯង ចំនួន ៧ ភូមិគោលដៅ ស្ថិតនៅក្នុងឃុំត្រីញ័រ និងឃុំល្វា នៃស្រុកពួក។ បច្ចុប្បន្ន សហគមន៍នេះមានសមាជិកចំនួន ១០៤ នាក់ ក្នុងនោះស្ត្រីចំនួន ៨៩ នាក់ នេះបើតាម លោកស្រី រិន រាន មកពីផ្នែកទីផ្សារនៃសមាគមនេះ៕

July 30, 2022

ទិដ្ឋភាព «បើសិនមនុស្សបាញ់គ្រាប់បែកនុយក្លេអែរទាំងអស់ទៅលើព្រះអាទិត្យ» (វីដេអូ)

កម្លាំងបំផ្លាញរបស់គ្រាប់បែកនុយក្លេអែរទាំងអស់នៅលើពិភពលោក គឺពិតជាមហិមា ប៉ុន្តែ នៅតែមិនអាចធ្វើឱ្យព្រះអាទិត្យប្រែប្រួលបាន។

ព្រះអាទិត្យ ភាគច្រើនត្រូវបានបង្កើតឡើងពី អ៊ីដ្រូសែន និង អេល្យូម។ កម្ដៅ និងសម្ពាធនៅក្នុងស្នូលរបស់វាមានកម្រិតខ្ពស់ខ្លាំងណាស់ ខ្ពស់រហូតដល់ធ្វើឱ្យអាតូមអ៊ីដ្រូសែន ត្រូវរួមចូលគ្នា ហើយក៏ក្លាយជា អេល្យូម។ ដំណើរការនេះ បានបញ្ចេញថាមពលដ៏មហាសាលដើម្បីរក្សាសកម្មភាពរបស់ព្រះអាទិត្យ។ នេះត្រូវបានគេហៅថា ប្រតិកម្មនុយក្លេអែរ។

ដោយឡែក អាវុធប្រល័យលោកដែលទំនើបនាបច្ចុប្បន្ន ក៏សុទ្ធតែទទួលបានថាមពលដ៏មហាប្រល័យពីដំណើរប្រតិកម្មដូចព្រះអាទិត្យ។ នេះគឺជាមូលហេតុដែលអាវុធទាំងនេះត្រូវបានគេហៅថា គ្រាប់បែកនុយក្លេអែរ។

ប្រមាណជា ៥ ពាន់លានឆ្នាំទៀត ព្រះអាទិត្យនឹងអស់សារធាតុអ៊ីដ្រូសែន ហើយក៏ស្លាប់។ នេះគឺជាដំណឹងដ៏អាក្រក់ រកអ្វីមកប្រៀបពុំបានចំពោះពិភពផែនដី ហើយសត្វលោកទាំងមូលនឹងស្លាប់ទៅតាមព្រះអាទិត្យ។ បើសិនមនុស្សអាចស្ថិតនៅបានរហូតដល់ពេលនោះ យើងនឹងត្រូវរកវិធីដើម្បីជួយឱ្យព្រះអាទិត្យធ្វើសកម្មភាពបន្ត។

តើយើងអាចផ្ដល់ថាមពលឱ្យព្រះអាទិត្យដោយប្រើប្រាស់អាវុធនុយក្លេអែរ ដើម្បីជួយឱ្យវាធ្វើសកម្មភាពឡើងវិញដែរ ឬទេ?

ដំបូង យើងត្រូវប្រមូលអាវុធនុយក្លេអែរទាំងអស់ដែលមាននៅលើផែនដី។ តើអ្នកដឹងថា ឃ្លាំងអាវុធនុយក្លេអែររបស់មនុស្សធំដល់កម្រិតណាហើយ ឬនៅ?

បច្ចុប្បន្ន ពិភពលោកទាំងមូលមានគ្រាប់បែកនុយក្លេអែរយ៉ាងតិច ១៣,០០០ គ្រាប់។ ក្នុងនោះ ១ គ្រាប់ៗ មានកម្លាំងផ្ទុះយ៉ាងតិច ១០០ គីឡូតុន (kiloton)។ នៅ សហរដ្ឋអាម៉េរិក តាមការគណនា មានប្រហែល ៦៥០ គ្រាប់ដែលមានកម្លាំងបំផ្លាញខ្លាំងជាង ៦០ ដង ធៀបនឹងគ្រាប់បែកដែលបានទម្លាក់នៅ Nagasaki ប្រទេសជប៉ុន ក្នុងសង្គ្រាមលោកលើកទីពីរ។

ឧទាហរណ៍ថា យើងបាញ់គ្រាប់បែកទាំងអស់នោះសំដៅទៅកាន់ព្រះអាទិត្យ។ ចូររង់ចាំមើលថា តើនឹងមានអ្វីកើតឡើង…! ចាំបន្តិច…! …ចាំបន្តិចទៀត!

ក៏ប៉ុន្តែ ហាក់ពុំមានអ្វីកើតឡើងសោះ។ ផ្កាយមេក្នុងប្រព័ន្ធព្រះអាទិត្យរបស់មនុស្ស នៅតែបន្តដំណើរការនៃការស្លាប់! ហេតុអ្វីអាចទៅជាយ៉ាងនេះ? គ្រាប់បែកនុយក្លេអែរចំនួន ១៣,០០០ គ្រាប់ ដែលមានកម្លាំងផ្ទុះដ៏មហិមា តែបែរជាមិន «ស្កៀបជើងធ្មេញរបស់ព្រះអាទិត្យ» ទៅវិញ។

ជារៀងរាល់ ១ វិនាទី ព្រះអាទិត្យបញ្ចេញថាមពលច្រើនជាង ៧០ លានដង ធៀបនឹងគ្រាប់បែកនុយក្លេអែរទាំងអស់ដែលមាននៅលើពិភពលោក។ សូម្បីតែនៅពេលព្រះអាទិត្យអស់ អ៊ីដ្រូសែន ដើម្បីប្រមូលផ្ដុំទៅជា អេល្យូម ការបាញ់គ្រាប់បែកនុយក្លេអែរទាំងអស់សំដៅទៅលើវា ក៏ប្រៀបដូចទៅនឹងការគប់ឈើគូស ១ ប្រអប់ចូលទៅក្នុងភ្លើងព្រៃ។ វាហាក់មិនបង្កឱ្យមានការប្រែប្រួលអ្វីបន្តិចសោះឡើយ។

លទ្ធផលគឺថា «គួរឱ្យអស់សង្ឃឹមខ្លាំងណាស់» សត្វលោកទាំងមូលត្រូវផុតពូជ។ គួរឱ្យស្ដាយ…ក៏ប៉ុន្តែ យ៉ាងហោចណាស់ក៏មនុស្សមិនបានបំផ្លាញព្រះអាទិត្យ៕

July 29, 2022

ទេសចរណ៍នាពេលអនាគត ៖ ជិតក្នុងបាឡុងហោះខ្នាតយក្សទស្សនាទិដ្ឋភាពភាពកោងរបស់ផែនដីពីលើមេឃ

មនុស្សភាគច្រើនទំនងជាមិនមានប្រាក់គ្រប់គ្រាន់សម្រាប់ដំណើរទេសចរណ៍គយគន់ផែនដីពីចម្ងាយតាមយានអវកាសនៅពេលអនាគត ក៏ប៉ុន្តែ មនុស្សភាគច្រើនប្រហែលជាអាចជ្រើសរើសកញ្ចប់ទេសចរណ៍ «ទត» ផែនដីពី «ឋាន ស្ត្រាតូស្ពែរ» (stratosphere) ដោយប្រើប្រាស់បាឡុងហោះខ្នាតយក្ស។

ក្រុមហ៊ុនអាម៉េរិក មួយ កំពុងតែធ្វើការដើម្បីសម្រេចគោលដៅនាំយកភ្ញៀវឡើងទៅកាន់ «ឋាន ស្ត្រាតូស្ពែរ» (stratosphere) របស់ផែនដី ដោយប្រើប្រាស់បាឡុងហោះដែលដំណើរការដោយឧស្ម័នអេល្យូម និងមានទំហំធំជាងទីលានបាល់ទាត់។

បាឡុងហោះខ្នាតយក្សនេះនឹងហោះនៅលើកម្ពស់ប្រហែល ៣០,៤៨០ ម៉ែត្រ ស្មើនឹងជាង ៣ គីឡូម៉ែត្រ ពីដី និងភ្ជាប់ជាមួយបន្ទប់ដាក់ទេសចរដ៏ធំមួយ។ ពីបាឡុងហោះនេះ ភ្ញៀវអាចគយគន់ទៅកាន់ទីអវកាស និងបានឃើញភាពកោង ក៏ដូចជាបរិយាកាសរបស់ផែនដី។

គំនិតខាងលើនេះកំពុងតែត្រូវបានអភិវឌ្ឍដោយ World View ដែលជាក្រុមហ៊ុនមួយនៅ Arizona សហរដ្ឋអាម៉េរិក។ សំបុត្រសម្រាប់ដំណើរទេសចរណ៍ដូចខាងលើនេះ មានតម្លៃប្រហែល ៥០,០០០ ដុល្លារអាម៉េរិក។

តាមគម្រោង ជើងហោះហើរដំបូងរបស់ World View នឹងចាប់ផ្ដើមនៅឆ្នាំ ២០២៤ ដោយហោះឡើងពីទីតាំងមួយចំនួនដែលស្ថិតនៅក្បែរបេតិកភណ្ឌពិភពលោក។

Dale Hipsh ប្រធានផ្នែកទេសចរណ៍ និងដំណើរផ្សងព្រេងរបស់ World View ឱ្យដឹងថា ដំណើរទេសចរណ៍បែបនេះនឹងផ្ដល់ឱ្យទេសចរនូវបទពិសោធន៍ទូទៅ និងប្ដូរផ្លាស់ផ្នត់គំនិត និងការយល់ឃើញអំពីពិភពផែនដី និងចក្រវាល។

«ឋាន ស្ត្រាតូស្ពែរ» (stratosphere) របស់ផែនដី

នៅក្នុងថ្ងៃចេញដំណើរទេសចរណ៍ គ្រប់គ្នានឹងចូលទៅក្នុងបន្ទប់ដែលដាក់ភ្ញៀវបាន ៨ នាក់ និងសមាជិកក្រុមបើកបរ ២ នាក់ នៅមុនពេលព្រះអាទិត្យរះ។ ១៥ នាទីបន្ទាប់ពីបានហោះឡើង ភាពកោងរបស់ផែនដីនឹងលេចឡើងច្បាស់។ បាឡុងនេះត្រូវការពេលប្រហែល ២ ម៉ោង ដើម្បីហោះឡើងដល់ជាយអវកាស ហើយបន្ទាប់មក

វានឹងអណ្ដែតនៅលើកម្ពស់ខ្ពស់បំផុតដើម្បីឱ្យភ្ញៀវអាចគយគន់ទេសភាពដ៏មហាសែនអស្ចារ្យមុនពេលបន្ទាបខ្លួនចុះមកកាន់ផែនដី។

ការហោះហើរនេះនឹងអូសបន្លាយពី ៦ ទៅ ៨ ម៉ោង ប៉ុន្តែ សំបុត្រនេះក៏រួមបញ្ចូលទាំងការស្នាក់នៅកម្សាន្តសប្បាយនៅឯសណ្ឋាគារបែប boutique នានា, ការធ្វើដំណើរទេសចរណ៍ទៅកាន់ទីតាំងធម្មជាតិដែលនៅក្បែរកន្លែងហោះហើរ, ការទទួលទានអាហារនៅហាងនានាក្នុងតំបន់ជាដើម។ល។

លោក Hipsh បានឱ្យដឹងថា សំបុត្រសម្រាប់ការហោះហើរនៅ Grand Canyon ក្នុងឆ្នាំ ២០២៤ បច្ចុប្បន្នត្រូវបានលក់អស់ហើយ៕

July 29, 2022

កូរ៉េខាងត្បូង កំពុងប្រឹងប្រែងទាក់ទាញកម្មករជំនាញខ្ពស់ពីបរទេស

ពលរដ្ឋបរទេសដែលមានសញ្ញាបត្របរិញ្ញាឡើងទៅ និងចេះភាសាកូរ៉េច្បាស់លាស់ ធ្វើការនៅក្នុងបណ្ដាវិស័យដែលត្រូវបានចង្អុលបង្ហាញដោយអាជ្ញាធរក្នុងតំបន់របស់ កូរ៉េខាងត្បូង នឹងទទួលបានទិដ្ឋាការស្នាក់នៅប្រភេទថ្មី (F-2)។

អាជ្ញាធរកូរ៉េខាងត្បូង ថ្មីៗនេះបានប្រកាសអំពីគម្រោងទាក់ទាញពលរដ្ឋបរទេសដែលមានជំនាញការងារច្បាស់លាស់ ឱ្យមកធ្វើការ និងស្នាក់នៅក្នុងតំបន់ជនបទដែលកំពុងប្រឈមនឹងបញ្ហាខ្វះកម្លាំងពលកម្មយ៉ាងធ្ងន់ធ្ងរ ដោយសារតែចំនួនប្រជាជនថយចុះយ៉ាងឆាប់រហ័ស។

ក្រសួងយុត្តិធម៌កូរ៉េខាងត្បូង (MOJ) បានប្រកាសអំពីការអនុវត្តគម្រោងផ្ដល់ទិដ្ឋាការដែលមានឈ្មោះថា «ទិដ្ឋាការដោយឡែកសម្រាប់តំបន់» ដែលនឹងចាប់ផ្ដើមមានសុពលភាពពីខែតុលា ២០២២ តទៅ។ គម្រោងនេះអនុវត្តចំពោះពលរដ្ឋបរទេសដែលកំពុងស្វែងរកវិធីមករស់នៅ និងធ្វើការនៅជនបទដែល រដ្ឋាភិបាលកូរ៉េខាងត្បូង ជាអ្នកណែនាំ។

យោងតាមលក្ខខណ្ឌនៃទិដ្ឋាការថ្មីនេះ ពលរដ្ឋបរទេសដែលមានជំនាញការងារកម្រិតខ្ពស់ ឆ្លើយតបនឹងលក្ខខណ្ឌមួយចំនួន (រួមមាន ចេះភាសាកូរ៉េច្បាស់ និងមានសញ្ញាបត្របរិញ្ញាឡើងទៅ) នឹងទទួលបានទិដ្ឋាការស្នាក់នៅប្រភេទថ្មី (F-2) នេះ។ ពលរដ្ឋបរទេសដែលមានលក្ខខណ្ឌគ្រប់គ្រាន់នឹងមានការងារធ្វើ តាមរយៈការចង្អុលបង្ហាញរបស់អាជ្ញាធរកូរ៉េខាងត្បូង។

ទន្ទឹមនឹងនេះ ក្រោយពីទទួលបានទិដ្ឋាការ ពលរដ្ឋបរទេសត្រូវតែមានពេលវេលាស្នាក់នៅក្នុងតំបន់ដែលបានចុះឈ្មោះ យ៉ាងតិច ៥ ឆ្នាំ។ ក្នុងអំឡុងពេលនេះ ពួកគេមានសិទ្ធិយកភរិយា/ស្វាមី និងកូនមិនទាន់គ្រប់អាយុ មករស់នៅជុំគ្នានៅ កូរ៉េខាងត្បូង។

MOJ ឱ្យដឹងថា នឹងទទួលពាក្យពីអាជ្ញាធរនៃបណ្ដាទីក្រុង និងស្រុកទាំងឡាយណាដែលចង់ចូលរួមកម្មវិធីសាកល្បងនៃ គម្រោងផ្ដល់ទិដ្ឋាការដោយឡែកសម្រាប់តំបន់។ ក្រោយមក MOJ នឹងជ្រើសរើសប្រហែល ៥ តំបន់ ដើម្បីផ្ដល់ទិដ្ឋាការ F-2 ដល់ពលរដ្ឋបរទេសសរុប ៥០០ នាក់ ដោយចាប់ផ្ដើមពីខែតុលាខាងមុខ។

គម្រោងសាកល្បងខាងលើនេះនឹងអនុវត្តក្នុងរយៈពេល ១ ឆ្នាំ (រហូតដល់ខែតុលាឆ្នាំក្រោយ) ហើយបន្ទាប់មក សមត្ថកិច្ចកូរ៉េខាងត្បូង នឹងពិនិត្យមើលដើម្បីពង្រីកគម្រោងនេះទៅកាន់តំបន់ដទៃនៅទូទាំងប្រទេស។

បច្ចុប្បន្ន ប្រព័ន្ធដូចខាងលើកំពុងត្រូវបានរដ្ឋាភិបាលប្រទេសមួយចំនួនអនុវត្ត ក្នុងនោះមាននៅ អូស្ត្រាលី និង កាណាដា ជាដើម៕

July 29, 2022

តម្លៃមាសពិភពលោកកើនឡើងក្នុងថ្ងៃទី ២៨ កក្កដា ព្រោះតែតួលេខមិនល្អពីសេដ្ឋកិច្ចអាម៉េរិក

នៅវេលាម៉ោង ០ និង ៥៩ នាទីព្រឹកថ្ងៃទី ២៩ កក្កដា (ម៉ោងនៅ កម្ពុជា) តម្លៃមាសប្រគល់ភ្លាមបានឡើងថ្លៃក្នុងអត្រា ១.១% នៅក្នុង ១ អោន ខណៈដែលតម្លៃមាសអាម៉េរិកប្រគល់មានកាលកំណត់កើនឡើង ១.៨% ក្នុង ១ អោន។

មាសពិភពលោកឡើងថ្លៃជាង ១% ក្នុងការជួញដូរនាថ្ងៃទី ២៨ កក្កដា ក្នុងពេលដែល សេដ្ឋកិច្ចអាម៉េរិក ជួបឱនភាពក្នុងត្រីមាសទីពីរជាបន្ត ដែលជួយជំរុញឱ្យមាសកាន់តែមានភាពទាក់ទាញ ខណៈដែលនិន្នការកណ្ដាលរបស់ប្រធានធនាគារកណ្ដាលអាម៉េរិក (Fed) ក៏បានជួយឱ្យតម្លៃមាសកាន់តែកើនឡើង។

GDP របស់ សហរដ្ឋអាម៉េរិក បានថយចុះ ០.៩% ក្នុងត្រីមាសទីពីរនៃឆ្នាំ ២០២២ ក្នុងនោះ ការចំណាយរបស់ប្រជាជនកើនឡើងក្នុងល្បឿនយឺតបំផុតក្នុងអំឡុង ២ ឆ្នាំមកនេះ ចំណែកសកម្មភាពចំណាយរបស់បណ្ដាក្រុមហ៊ុនក៏ថយចុះ។ បញ្ហានេះធ្វើឱ្យមានការបារម្ភថា សេដ្ឋកិច្ចបានធ្លាក់ចូលក្នុងវិបត្តិរួចទៅហើយ។

នៅវេលាម៉ោង ០ និង ៥៩ នាទីព្រឹកថ្ងៃទី ២៩ កក្កដា (ម៉ោងនៅ កម្ពុជា) តម្លៃមាសប្រគល់ភ្លាមបានឡើងថ្លៃក្នុងអត្រា ១.១% ឡើងដល់ ១,៧៥២.៣៩ ដុល្លារ/អោន។ មាសអាម៉េរិកប្រគល់មានកាលកំណត់កើនឡើង ១.៨% ឡើងដល់ ១,៥០.៣០ ដុល្លារ ក្នុង ១ អោន (១ អោន ស្មើនឹង ៨.២៩៤២៦ ជី)។

លោក Phillip Streible អ្នកវិភាគផ្នែកទីផ្សាររបស់ Blue Line Futures នៅ Chicago ឱ្យដឹងថា ក្រោយពីទិន្នន័យ GDP បញ្ជាក់អំពីការបារម្ភចំពោះវិបត្តិសេដ្ឋកិច្ច ក្រុមអ្នកជំនួញព្យាករថា Fed នឹងពន្យារពេលការដំឡើងការប្រាក់ ធ្វើឱ្យមាសកាន់តែមានភាពទាក់ទាញ។ ការប្រាក់ខ្ពស់តែងតែធ្វើឱ្យការចំណាយទៅលើឱកាសកាន់កាប់ទ្រព្យដែលមិនមានចំណេញដូចជាមាសជាដើម ឡើងថ្លៃ៕

July 29, 2022

ក្រុមក្រុម ២ គ្រោងនឹងចំណាយជាង ១៤ លានដុល្លារអាម៉េរិក បង្កើតរោងចក្រផលិតសម្លៀកបំពាក់ និងកាបូបនៅ ខេត្តកណ្ដាល និង កំពង់ស្ពឺ

ក្រុមហ៊ុនដែលទើបតែត្រូវបាន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ចេញវិញ្ញាបនបត្រចុះបញ្ជីគម្រោងវិនិយោគនេះ រួមមាន MILANNA LEATHERWARE M.F.Y (CAMBODIA) CO., LTD និងក្រុមហ៊ុន BEST BEAUTY COMPANY LIMITED។

នៅលើទំព័របណ្ដាញសង្គមផ្លូវការ ក្រុមប្រឹក្សាអភិវឌ្ឍន៍កម្ពុជា (The Council for the Development of Cambodia) បានសរសេរថា ៖ តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖

១. MILANNA LEATHERWARE M.F.Y (CAMBODIA) CO., LTD គម្រោងបង្កើតរោងចក្រផលិតខ្សែក្រវាត់ និងកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៩.២ លានដុល្លារអាម៉េរិក និងអាចបង្កើតការងារបានចំនួន ១,៤១៤ កន្លែង។

២. BEST BEAUTY COMPANY LIMITED គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិព្រែកតាព្រីង សង្កាត់សិត្បូ ក្រុងតាខ្មៅ ខេត្តកណ្តាល មានទុនវិនិយោគប្រមាណ ៥.១លានដុល្លារអាម៉េរិក និងអាចបង្កើតការងារបានចំនួន ២,២៣៦ កន្លែង។

July 28, 2022

Category: សង្គម និងសេដ្ឋកិច្ច