របាយការណ៍របស់ ក្រសួងកសិកម្ម រុក្ខាប្រមាញ់ និងនេសាទ របស់ កម្ពុជា បានឱ្យដឹងថា ៦ ខែដើមឆ្នាំនេះ កម្ពុជា បាននាំចេញស្រូវជាង ១.៧ លានតោន ស្មើនឹងអង្ករប្រមាណ ៩០០,០០០ តោន ទៅកាន់ទីផ្សាររបស់ វៀតណាម ដែលមានតម្លៃជាង ៣៣៦ លានដុល្លារអាម៉េរិក និងកើន ២០% ធៀបនឹងដំណាក់កាលដូចគ្នានៃឆ្នាំកន្លង។
ចំណែក វៀតណាម វិញ ជារៀងរាល់ឆ្នាំបាននាំចេញអង្ករប្រមាណពី ៦ ទៅ ៦.៥ លានតោន។ វៀតណាម គឺជាប្រទេសមួយក្នុងចំណោម ៣ ប្រទេសដែលនាំចេញអង្ករច្រើនជាងគេក្នុងពិភពលោកនាបច្ចុប្បន្ន។ ដូច្នេះ ព័ត៌មានដែលថា វៀតណាម នាំចូលអង្ករក្នុងបរិមាណច្រើនពី កម្ពុជា បានធ្វើឱ្យមានការភ្ញាក់ផ្អើល។
ទោះជាយ៉ាងណាក៏ដោយលោក Nguyen Thanh Long ប្រធានក្រុមហ៊ុន Viet rice Co., Ltd របស់ វៀតណាម បានបញ្ជាក់ថា សកម្មភាពនាំចូលស្រូវពី កម្ពុជា បានកើតឡើងជាច្រើនឆ្នាំមកហើយ។ ពិសេស ប៉ុន្មានឆ្នាំមកនេះ បរិមាណស្រូវនាំចូលពី កម្ពុជា បានកើនឡើងខ្ពស់ ដោយសារតែបុគ្គល និងក្រុមហ៊ុនវៀតណាម ជាច្រើន បានចូលមកកាន់ កម្ពុជា ដើម្បីជួលដីដាំស្រូវ រួចប្រមូលផលដឹកទៅកាន់ វៀតណាម។
ប្រធានក្រុមហ៊ុន Viet rice Co., Ltd អះអាងថា «ផ្ទៃដីដែលអាចដាំស្រូវបាននៅ កម្ពុជា នៅធំទូលាយ នាំឱ្យ ជនជាតិវៀតណាម ចូលមក កម្ពុជា ជួលដីដើម្បីកាត់បន្ថយការចំណាយក្នុងការដាំដុះ ប្រមូលផល។ ជាងនេះ ដីសម្បទាននៅ កម្ពុជា ក៏សមស្របខ្លាំងណាស់ ស្រូវផ្ដល់ទិន្នផល និងគុណភាពខ្ពស់។ ស្រូវដែល ប្រជាពលរដ្ឋកម្ពុជា ដាំ ក៏មានការប្រើប្រាស់ថ្នាំសម្លាប់សត្វល្អិត និងជីគីមីតិច ដូច្នេះ គុណភាពត្រូវបានធានា»។
លោកសាស្ត្រាចារ្យ Vo Tong Xuan ដែលជាអ្នកជំនាញផ្នែកស្រូវអង្ករ របស់ វៀតណាម ក៏បានយល់ស្របនឹងការអះអាងខាងលើរបស់ ប្រធានក្រុមហ៊ុន Viet rice Co., Ltd។
លោក Nguyen Thanh Long បន្ថែមថា ស្រូវដែលនាំចូលពី កម្ពុជា ភាគច្រើនគឺស្រូវ IR 50404 ដែលមានអង្ករគ្រាប់វែង និងត្រូវបាន វៀតណាម នាំចេញទៅកាន់ទីផ្សារមួយចំនួន ដូចជា ចិន, ហ្វ៊ីលីពីន និង ទ្វីបអាហ្វ្រិក ជាដើម។ល។
«ប្រភពអង្ករដែលនាំចូលពី កម្ពុជា ជួយឱ្យ ក្រុមហ៊ុនវៀតណាម អាចកែច្នៃ និងនាំចេញ នៅពេលប្រភពផ្គត់ផ្គង់ក្នុងស្រុកថយចុះ។ ប្រការនេះធានាបាននូវសន្តិសុខស្បៀង និងស្ថិរភាពទីផ្សារអង្ករក្នុងស្រុក» ប្រធានក្រុមហ៊ុន Viet rice Co., Ltd អះអាងដូច្នេះ។
ចំណែកលោក Nguyen Van Don ប្រធានក្រុមហ៊ុន Viet Hung Co.Ltd បាននិយាយថា មូលហេតុដែលនាំឱ្យ វៀតណាម នាំចូលស្រូវច្រើនពី កម្ពុជា គឺមួយផ្នែកដោយសារ វៀតណាម ផ្ដោតលើការដាំស្រូវគុណភាពខ្ពស់ដើម្បីបង្កើនតម្លៃនាំចេញ ខណៈដែលទីផ្សារជាច្រើនដូចជា ទ្វីបអាហ្វ្រិក, មជ្ឈិមបូព៌ា, ហ្វ៊ីលីពីន, ចិន ជាដើម បែរជាចូលចិត្តនាំចូលអង្ករ IR 50404 ដែល កម្ពុជា ផលិតបានច្រើន។ ដោយសារតែខ្វះប្រភពផ្គត់ផ្គង់ ទើបបណ្ដាក្រុមហ៊ុនរបស់ វៀតណាម រត់មករក កម្ពុជា ដើម្បីទិញ សហការជួលដីដាំស្រូវ រួចប្រមូលផលនាំទៅកាន់ វៀតណាម ដើម្បីកែច្នៃ និងនាំចេញទៅបរទេស។
ទន្ទឹមនឹងនេះ ក្រសួងឧស្សាហកម្ម និងពាណិជ្ជកម្មវៀតណាម ក៏បានអនុញ្ញាតឱ្យនាំចូលស្រូវអង្ករពី កម្ពុជា ដោយមានការសម្រួលពន្ធជាពិសេស។ ក្នុងឆ្នាំនេះ បរិមាណសរុបនៃកូតាពន្ធពិសេស អត្រា ០% ចំពោះទំនិញអង្ករដែលនាំចូលពី កម្ពុជា គឺ ៣០០,០០០ តោន។ នេះក៏ជាមូលហេតុដែលនាំឱ្យបរិមាណស្រូវដែល វៀតណាម នាំចូលពី កម្ពុជា មានការកើនឡើងខ្ពស់៕
