សង្គម និងសេដ្ឋកិច្ច - La Reine Media

LAMBORGHINI អភិវឌ្ឍកំពូលរថយន្តអគ្គិសនី ល្បឿនលឿនជាងរថយន្តម៉ាស៊ីនសាំង

ក្រុមហ៊ុនផលិតរថយន្តកីឡាប្រណិត Lamborghini បានឱ្យដឹងថា ពួកគេកំពុងអភិវឌ្ឍម៉ូដែលរថយន្ត hybrid និងរថយន្តអគ្គិសនី ដែលបរបានលឿនជាង Huracan V10 និង Aventador V12។

បច្ចេកវិទ្យា hybrid និងអគ្គិសនី អាចជំរុញឱ្យមានយុគសម័យជឿនលឿនថ្មីនៅក្នុងវិស័យរថយន្ត ដោយវាមានប្រសិទ្ធភាព និងកម្លាំងខ្លាំងជាងបណ្ដាកំពូលរថយន្តដែលដំណើរការដោយម៉ាស៊ីនសាំងនាបច្ចុប្បន្នទៅទៀត។

ប្រធានក្រុមហ៊ុន Lamborghini លោក Stephan Windelmann បានឱ្យដឹងថា អគ្គិសនីបើកផ្លូវឱ្យមានឱកាសថ្មីសម្រាប់ក្រុមហ៊ុន រួមទាំងម៉ូដែលរថយន្តទីបួនដែលជិតនឹងបង្ហាញខ្លួន នោះគឺម៉ូដែល SUV ប្រភេទអគ្គិសនី។

«ខ្ញុំគិតថា យើងនឹងមានឱកាសល្អក្នុងបណ្ដាឆ្នាំខាងមុខ ដើម្បីបង្ហាញថា ក្រុមហ៊ុនអាចប្រសើរជាងបច្ចុប្បន្ន ទាក់ទងនឹងទម្រង់រូបរាង»៕

August 5, 2022

វិស័យអាកាសចរណ៍នៅ តំបន់អាស៊ីអាគ្នេយ៍ ចាប់ផ្ដើមងើបឡើងវិញ ប៉ុន្តែ កំពុង «ចាំមើលផ្លូវ» ចិន

ទីផ្សារអាកាសចរណ៍នៅ តំបន់អាស៊ីអាគ្នេយ៍ កំពុងតែងើបឡើងវិញជាបណ្ដើរៗ និងមានសញ្ញាណវិជ្ជមានជាច្រើនដែលនាំឱ្យមានក្ដីសង្ឃឹម ប៉ុន្តែ នៅតែត្រូវការការជួយរុញច្រានពី ចិនដីគោក។

បណ្ដាក្រុមហ៊ុនអាកាសចរណ៍នៅ អាស៊ីអាគ្នេយ៍ បានចាប់ផ្ដើមប្រសើរឡើងវិញទាក់ទងនឹងការកក់សំបុត្រ នៅពេលវិធានការរឹតបន្តឹងការដើរហើរក្នុងតំបន់ត្រូវបានបន្ធូរបន្ថយ រួមនឹងការជំរុញវិស័យទេសចរណ៍ឡើងវិញពីសំណាក់អាជ្ញាធរនៃបណ្ដាប្រទេស។

«យើងជឿថា រដូវកាលធ្វើដំណើរច្រើនចាប់ពីខែតុលាឆ្នាំនេះ នឹងមានអតិថិជនច្រើនបំផុតក្នុងអំឡុង ២ ឆ្នាំកន្លង» លោក Nond Kalinta ប្រធានពាណិជ្ជកម្មរបស់ Thai Airways បានប្រាប់ Nikkei Asia ដូច្នេះ។

ចំនួនអតិថិជនរបស់ Thai Airways ពី អឺរ៉ុប កំពុងតែមានការកើនឡើង ក្នុងនោះ ចំនួនភ្ញៀវប្រចាំថ្ងៃ កើនឡើងជិត ៦ ដង ក្នុងអំឡុងពេលពីខែមករា ដល់មិថុនាឆ្នាំនេះ។

យន្តហោះរបស់ក្រុមហ៊ុន Philippine Airlines

ចំណែក Philippine Airlines វិញ បានកំណត់គោលដៅស្ដារជើងហោះហើរឡើងវិញឱ្យបាន ៨០% ធៀបនឹងដំណាក់កាលមុនសម័យកូវីដ-១៩។ ក្នុងខែមីនា ក្រុមហ៊ុននេះដឹកភ្ញៀវអន្តរជាតិបាន ១,៥០០ ជើង រួមមានជើងហោះហើរទៅមក ជប៉ុន, អាម៉េរិកខាងជើង និងមជ្ឈិមបូព៌ាផងដែរ។

កាលពីខែមិថុនា ក្រុមហ៊ុនអាកាសចរណ៍ Garuda Indonesia របស់ ប្រទេសឥណ្ឌូណេស៊ី ដែលវិះនឹងក្ស័យធន សម្រេចបានកិច្ចព្រមព្រៀងមួយជាមួយម្ចាស់បំណុល ដើម្បីបន្ថយខ្ទង់បំណុលប្រហែល ៩.៥៤ ពាន់លានដុល្លារអាម៉េរិក។ ក្រុមហ៊ុននេះក៏គ្រោងនឹងទទួលខ្ទង់បានប្រាក់វិនិយោគជាង ៧ ទ្រីលានរូពៀផងដែរ ពីរដ្ឋាភិបាល។

ដំណឹងទាំងនេះពិតជាគួរឱ្យមានក្ដីសង្ឃឹម ប៉ុន្តែ ក្រុមហ៊ុនអាកាសចរណ៍នានានៅតែទន្ទឹងរង់ចាំដំណឹងល្អបំផុតដើម្បីអាចឱ្យសកម្មភាពបម្រើសេវាកម្មរបស់ពួកគេដំណើរការប្រក្រតី នោះគឺ គេត្រូវការឱ្យការធ្វើដំណើរទៅមកពី ប្រទេសចិន «ល្អប្រសើរឡើងវិញ»។

ភ្ញៀវពី ប្រទេសចិន ហាក់មិនទាន់ត្រលប់មកវិញ។ ទីក្រុងប៉េកាំង ស្នើឱ្យប្រតិបត្តិករទេសរណ៍ផ្អាកការបញ្ចេញកញ្ចប់ទេសចរណ៍ជាក្រុមទៅបរទេស និងបន្តអនុវត្តវិធានការទប់ស្កាត់កូវីដ-១៩។ នាយកដ្ឋានអាកាសចរណ៍ស៊ីវិលចិន (CAAC) អនុញ្ញាតឱ្យដំណើរការចំពោះតែជើងហោះហើរមួយចំនួនដែលគ្រប់គ្រងដោយក្រុមហ៊ុនបរទេស។

គួរបញ្ជាក់ថា អ្នកដំណើរជាង ១០% របស់ Thai Airways នៅលើជើងហោះហើរអន្តរជាតិក្នុងឆ្នាំ ២០១៩ (មុនកូវីដ-១៩) គឺជា ជនជាតិចិន៕

August 5, 2022

ការសិក្សាស្រាវជ្រាវ ៖ វិស័យមូលបត្រនាំមកនូវប្រាក់ចំណេញខ្ពស់ជាងអចលនទ្រព្យ ប៉ុន្តែ បន្ថែមគម្លាតរវាងអ្នកមាន និងអ្នកក្រ

ទីផ្សារមូលបត្របានឡើងថ្លៃខ្ពស់ជាង ៥ ដង ធៀបនឹងអត្រានៃកំណើនរបស់តម្លៃអចលនទ្រព្យ រាប់ចាប់ពីឆ្នាំ ១៩៥០ នេះបើតាមរបាយការណ៍របស់ NBER។

សម្រាប់ជនជាតិអាម៉េរិក ក៏ដូចជាមនុស្សភាគច្រើននៅលើផែនដី ការដែលមានដី និងផ្ទះ គឺជាវិធីសន្សំទ្រព្យមួយដ៏ពេញនិយម។ ក៏ប៉ុន្តែ របាយការណ៍ថ្មីរបស់ ការិយាល័យស្រាវជ្រាវសេដ្ឋកិច្ចជាតិ (NBER) របស់ សហរដ្ឋអាម៉េរិក បានឱ្យដឹងថា ទម្រង់វិនិយោគដែលនាំមកនូវប្រាក់ចំណេញខ្ពស់ជាងគេគឺមូលបត្រ ពោលគឺមិនមែនអចលនទ្រព្យឡើយ នៅក្នុងអំឡុងពេលច្រើនទសវត្សរ៍មកនេះ។

យោងតាមរបាយការណ៍ស្រាវជ្រាវខាងលើ ទីផ្សារមូលបត្របានឡើងថ្លៃខ្ពស់ជាង ៥ ដង ធៀបនឹងអត្រានៃកំណើនរបស់តម្លៃអចលនទ្រព្យ រាប់ចាប់ពីឆ្នាំ ១៩៥០។ នេះមានន័យថា ពលរដ្ឋអាម៉េរិក ដែលវិនិយោគទៅលើទីផ្សារមូលបត្រ រកបានប្រាក់ចំណេញខ្ពស់ជាង ធៀបនឹងអ្នកវិនិយោគទៅក្នុងវិស័យអចលនទ្រព្យ។

«នេះគឺជាមូលហេតុមួយដែលធ្វើឱ្យមានការកើនឡើងនៃគម្លាតរវាងអ្នកមាន និងអ្នកក្រ ទាក់ទិននឹងជាតិសាសន៍នៅ សហរដ្ឋអាម៉េរិក។ ជនជនអាម៉េរិកស្បែកខ្មៅ មានទ្រព្យស្ថិតក្នុងវិស័យអចលនទ្រព្យច្រើនជាងមូលបត្រ ហើយប្រការនេះមិនមានអំណោយផលល្អសម្រាប់ពួកគេ» Business Insider ស្រង់របាយការណ៍របស់ NBER ឱ្យដឹងដូច្នេះ។

ការស្រាវជ្រាវមួយរបស់ Fed New York (ធនាគារជាតិអាម៉េរិក សាខា New York) កាលពីឆ្នាំមុនបានបង្ហាញថា ជាង ៩០% នៃមនុស្សដែលបានចូលរួមការស្ទង់មតិ ប្រាប់ថា ចូលចិត្តកាន់កាប់អចលនទ្រព្យជាជាងការវិនិយោគទៅក្នុងទីផ្សារមូលបត្រ ហើយសូម្បីតែនៅក្នុងពេលទីផ្សារមូលបត្របង្កើតបានកំណត់ត្រាថ្មីៗជាបន្តបន្ទាប់ ក៏ឥរិយាបថនេះមិនបានប្ដូរផ្លាស់ដែរ។

«ក្នុងអំឡុងពេលប្រហែលពីឆ្នាំ ១៩៥០ ដល់ ២០១៩ ផ្ទះស្នាក់នៅ និងទ្រព្យដែលមិនមានជាហិរញ្ញវត្ថុ បានគ្របដណ្ដប់លើមុខជំនួញមួយភាគធំរបស់ ជនជាតិអាម៉េរិកស្បែកខ្មៅ ខណៈដែលវាមានតែ ៤១% ប៉ុណ្ណោះ នៅក្នុងខ្ទង់វិនិយោគរបស់ ជនជាតិអាម៉េរិកស្បែកស។ ទ្រព្យដែលជាទម្រង់ភាគហ៊ុនរបស់ ជនជាតិអាម៉េរិកស្បែកខ្មៅ មានតែ ៧% ប៉ុណ្ណោះ ទាបជាងឆ្ងាយ បើធៀបនឹង ១៨% របស់ ជនជាតិអាម៉េរិកស្បែកស» របាយការណ៍ខាងលើបង្ហាញដូច្នេះ។

របាយការណ៍នេះបន្ថែមថា «ការឡើងថ្លៃខ្ពស់នៃទីផ្សារមូលបត្រ បាននាំឱ្យទ្រព្យរបស់ក្រុមអ្នកមានកំពូលៗ ដែលភាគច្រើនបំផុតជា ជនជាតិអាម៉េរិកស្បែកស បានកើនឡើងខ្ពស់ខ្លាំង»។

ក្រុមអ្នកស្រាវជ្រាវរបស់ NBER បង្ហាញថា ក្នុងអំឡុងសម័យកូវីដ-១៩ កម្រិតនៃការប្រមូលផ្ដុំរបស់ទ្រព្យនៅ សហរដ្ឋអាម៉េរិក បានឡើងដល់កំពូល រាប់ចាប់ពីសង្គ្រាមលោកលើកទីពីរ ក្នុងនោះមានគ្រួសារតែ ០.០១% ប៉ុណ្ណោះ ដែលកាន់កាប់ ៣៦% នៃទ្រព្យឯកជនសរុបទូទាំងប្រទេស។

ក្រុមអ្នកស្រាវជ្រាវរបស់ NBER សន្និដ្ឋានថា គោលនយោបាយនានាដែលបែងចែកទ្រព្យឡើងវិញ នឹងជួយកាត់បន្ថយបានភ្លាមៗនូវវិសមភាពរវាងអ្នកមាន និងអ្នកក្រ។ ផ្ទុយទៅវិញ បើសិនជាវិធានការស្ដីពីរចនាសម្ព័ន្ធត្រូវបានអនុវត្តសន្សឹមៗ គេនឹងអាចត្រូវចំណាយពេលរាប់សតវត្សរ៍ ដើម្បីទទួលបានប្រសិទ្ធភាព។ ទោះជាបែបនេះក្ដី ក្រុមនេះសង្កត់ធ្ងន់ថា វិធីសាស្ត្រទាំងពីរនេះសុទ្ធតែមានសារសំខាន់ និងចាំបាច់៕

August 5, 2022

ក្រសួងសាធារណការ ណែនាំដល់អ្នកបើកបរ យកឯកសារពាក់ព័ន្ធតាមខ្លួន ពេលធ្វើចរាចរណ៍លើដងផ្លូវ

ដើម្បីចូលរួមអនុវត្តច្បាប់ស្ដីពីចរាចរណ៍ផ្លូវគោក ក្រសួងសាធារណការ និងដឹកជញ្ជូន ណែនាំដល់អ្នកបើកបរយានយន្តនៅលើផ្លូវថ្នល់ យកឯកសារពាក់ព័ន្ធភ្ជាប់តាមខ្លួន មានដូចជា បណ្ណបើកបរច្បាប់ដើមជាដើម។ល។

ព័ត៌មានលម្អិត សូមអានសេចក្ដីជូនដំណឹងរបស់ ក្រសួងសាធារណការ និងដឹកជញ្ជូន ខាងក្រោម ៖

August 5, 2022

គម្រោងវិនិយោគថ្មីចំនួន ៥ ត្រូវបានអនុម័តឱ្យដំណើរការនៅខេត្តក្រុងមួយចំនួន ក្នុងនោះមានផលិតផលសូឡាផងដែរ

គម្រោងវិនិយោគថ្មីចំនួន ៥ ដែលមានតម្លៃជាង ២៦ លានដុល្លារ ត្រូវបានសម្រេចចេញវិញ្ញាបនបត្រចុះបញ្ជី ឱ្យដំណើរការនៅខេត្តក្រុងមួយចំនួន ៣ នេះបើតាម គណៈកម្មាធិការវិនិយោគកម្ពុជា នៃ ក្រុមប្រឹក្សាអភិវឌ្ឍន៍កម្ពុជា ដែលបានឱ្យដឹងកាលពីព្រឹកមិញនេះ។

គម្រោងវិនិយោគថ្មីទាំងនេះរួមមាន ៖

១. FUKKI APPAREL AND LAUNDRY TECHNOLOGY CO., LTD គម្រោងបង្កើតរោងចក្រកាត់ដេរ និងបោកគក់សម្លៀកបំពាក់ ដែលមានទីតាំងវិនិយោគស្ថិតនៅផ្លូវលេខ ៦ A ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ក្នុងទុនវិនិយោគប្រមាណ ៥.៤ លានដុល្លារអាមេរិក និងអាចបង្កើតការងារបានចំនួន ២,៤០៤ កន្លែង។

២. THE INHERITANCE (CAMBODIA) CO., LTD គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិអង្គសុគន្ធា ឃុំមហាឫស្សី ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥.៣ លានដុល្លារអាមេរិក និងអាចបង្កើតការងារបានចំនួន ១,០១៨ កន្លែង។

ដោយឡែក តាមសំណើសុំវិនិយោគរបស់ក្រុមហ៊ុន គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖

១- “Solar Long PV-Tech (Cambodia) Co., Ltd.” គម្រោងបង្កើតរោងចក្រផលិតបន្ទះសូឡា និងគ្រឿងបង្គុំ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ១២ លានដុល្លារអាមេរិក និងបង្កើតការងារបានចំនួនប្រមាណ ៥០០ នាក់។

២- “Cambodian Xihanouke Cabinet Co., Ltd.” គម្រោងបង្កើតរោងចក្រផលិតទូគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជឺ, ខេត្តព្រះសីហនុ, មានទុនវិនិយោគចំនួន ៣ លានដុល្លារអាមេរិក និងបង្កើតការងារបានចំនួនប្រមាណ ២៥០ នាក់។

៣- “Taica (Cambodia) Corporation” គម្រោងបង្កើតរោងចក្រផលិតគ្រាប់ជ័រ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៦២ ម៉ឺនដុល្លារអាមេរិក និងបង្កើតការងារបានចំនួនប្រមាណ ២០ នាក់។

August 5, 2022

ពិព័រណ៍ចម្លែក នៅ សិង្ហបុរី ៖ រូបសំណាកនិយាយអំពី «ពូជកូនកាត់» រវាងមនុស្ស និងសត្វ

ពិព័រណ៍ «Patricia Piccinini ៖ We are Connected» មានតាំងបង្ហាញស្នាដៃចម្លាក់ដែលមានភាពរស់រវើក ចម្លែកអស្ចារ្យ ស្ដីពីការ «បង្កាត់ពូជ» រវាងមនុស្ស និងសត្វ។

វិចិត្រការិនីជនជាតិអូស្ត្រាលី Patricia Piccinini ថ្លែងនៅក្នុងសន្និសីទសារព័ត៌មាននៅក្នុងព្រឹត្តិការណ៍តាំងពិព័រណ៍របស់នាងនៅឯសារមន្ទីរ ArtScience នៅ ប្រទេសសិង្ហបុរី។ Patricia Piccinini និងស្នាដៃរបស់នាង និយាយអំពីការព្រួយបារម្ភចំពោះអនាគតដែលមនុស្សមិនចង់បាន។

នាង Patricia Piccinini ធ្វើការនៅក្នុងប្រព័ន្ធផ្សព្វផ្សាយ និងការងារច្រើនប្រភេទ មានដូចជា ការគូរគំនូរ វីដេអូ សំឡេង ការបោះពុម្ភបែបឌីជីថល និងរូបចម្លាក់ជាដើម។ ការងាររបស់ Patricia តែងផ្តោតលើ «ផលវិបាកដែលគេមិនចង់បាន» បង្ហាញពីការព្រួយបារម្ភជុំវិញបញ្ហាសីលធម៌ក្នុងជីវសាស្ត្រ និងជួយឱ្យមើលឃើញពី «ពិភពអវិជ្ជមាន» (dystopias) ដែលគួរឱ្យខ្លាច នាពេលអនាគត។

ខាងក្រោមនេះគឺជាបណ្ដារូបចម្លាក់ដែលមានក្នុងពិព័រណ៍ «Patricia Piccinini ៖ We are Connected» របស់នាង Patricia Piccinini ៖

August 5, 2022

ប្រទេសថៃ ជិតបញ្ចេញ «ទិដ្ឋការប្រភេទ ១០ ឆ្នាំ» ដើម្បីទាក់ទាញបុគ្គលិកជំនាញពីបរទេស

ក្នុងខែកញ្ញាខាងមុខនេះ អាជ្ញាធរថៃ នឹងចាប់ផ្ដើមផ្ដល់ទិដ្ឋាការប្រភេទ ១០ ឆ្នាំ ដើម្បីទាក់ទាញកម្លាំងពលកម្មជំនាញ និងអ្នកវិនិយោគបរទេស ក្នុងនោះ ថៃ ក៏មានបំណងអូសទាញពលរដ្ឋមកពី ប្រទេសជប៉ុន ប្រមាណ ១ លាននាក់ផងដែរ ក្នុងរង្វង់ ៥ ឆ្នាំខាងមុខ។

ការបញ្ចេញទិដ្ឋាការប្រភេទរយៈពេលយូរ ត្រូវបានគេយល់ថា ដើម្បីបង្កើនកម្លាំងប្រកួតប្រជែងសម្រាប់វិស័យសំខាន់ៗរបស់ ប្រទេសថៃ ដូចជា រថយន្ត អេឡិចត្រូនិក និងបច្ចេកវិទ្យាជីវសាស្ត្រជាដើម។ អគ្គលេខាធិការនៃគណៈកម្មការវិនិយោគថៃ (BOI) Nartis Therdsteerasukdi បានថ្លែងថា ទិដ្ឋាការរយៈពេលយូរត្រូវបានបង្កើតឡើងដើម្បីទាក់ទាញ «ប្រភពធនធានមនុស្សដែលមានជំនាញ ពីបរទេស» និងត្រូវផ្ដើមអនុវត្តចាប់ពីថ្ងៃទី ០១ កញ្ញាខាងមុខ។

បច្ចុប្បន្ន ប្រទេសថៃ កំពុងស្វែងរកក្រុមអ្នកជំនាញពីបណ្ដាក្រុមហ៊ុន ឬវិទ្យាស្ថានស្រាវជ្រាវដែលមានជំនាញទាក់ទងនឹងប្រភេទឧស្សាហកម្ម និងបច្ចេកវិទ្យាចំនួន ១០ រួមមានដូចជា រថយន្តអគ្គិសនី អេឡិចត្រូនិក ឱសថ និងការពារជាតិជាដើម។ល។

ក្រុមមនុស្សដែលត្រូវបានក្រុមហ៊ុនបរទេសជ្រើសរើស បើសិនចង់ធ្វើការពីចម្ងាយក៏អាចដាក់ពាក្យស្នើសុំទិដ្ឋាការថ្មី និងរើមកស្នាក់នៅ ប្រទេសថៃ។ អ្នកដែលមានទ្រព្យចាប់ពី ១ លានដុល្លារអាម៉េរិក និងអ្នកចូលនិវត្តន៍ដែលមានប្រាក់ខែស្ថិរភាពក៏ឱ្យដាក់ពាក្យបាន។

អ្នកដែលត្រូវបានជ្រើសរើសនឹងទទួលបានលិខិតការងារប្រភេទអេឡិចត្រូនិក។ រដ្ឋាភិបាលថៃ នឹងបញ្ចុះអត្រាពន្ធលើប្រាក់ចំណូលរបស់ពួកគេ។ បណ្ដាក្រុមហ៊ុនដែលទទួលយកធនធានមនុស្សខាងលើនឹងត្រូវបានលើកលែងការកំណត់ដែលតម្រូវឱ្យមានបុគ្គលិកថៃ ៤ ម្នាក់ លើបុគ្គលិកបរទេសម្នាក់ ដែលជាគោលការណ៍កំពុងត្រូវបានអនុវត្តដើម្បីការពារកម្លាំងពលកម្មក្នុងស្រុកនាបច្ចុប្បន្នរបស់ ប្រទេសថៃ។

កម្មវិធីផ្ដល់ទិដ្ឋាការថ្មីនេះគឺជាកម្មវិធីទីបីដែល ប្រទេសថៃ ធ្វើឡើងដើម្បីទាក់ទាញអ្នកជំនាញ និងអ្នកវិនិយោគ បរទេស។ ក្នុងចំណោមកម្មវិធីទាំងពីរដែលបានអនុវត្តកន្លង គេឃើញថា កម្មវិធីលិខិតអនុញ្ញាតពលកម្មបានអូសទាញមេដឹកនាំក្រុមហ៊ុន និងអ្នកជំនាញជាង ៥០,០០០ នាក់ មកពី ប្រទេសជប៉ុន, ចិន, កូរ៉េខាងត្បូង និងប្រទេសជាច្រើនផ្សេងទៀត ក្នុងរយៈពេល ៦០ ឆ្នាំកន្លងមកនេះ។

>ព័ត៌មានទាក់ទង ៖ ថៃ អនុម័តគោលនយោបាយផ្ដល់បណ្ណស្នាក់នៅអចិន្ត្រៃយ៍ដល់ជនបរទេស

កម្មវិធីផ្ដល់ទិដ្ឋាការរយៈពេលយូរថ្មីនេះ ត្រូវបាន រាជរដ្ឋាភិបាលថៃ ប្រកាសនៅក្នុងគ្រាដែលការប្រកួតប្រជែងនៅក្នុងតំបន់ មានការកើនឡើងកាន់តែខ្ពស់ ក្នុងបំណងបង្កើតវិស័យឧស្សាហកម្ម និងបណ្ដាញផ្គត់ផ្គង់ថ្មី៕

August 5, 2022

វិស័យឧស្សាហកម្មមនុស្សនិម្មិតនៅ កូរ៉េខាងត្បូង ៖ ស្រីស្អាតផលិតដោយកុំព្យូទ័រ រកចំណូលបានយ៉ាងច្រើនជូនក្រុមហ៊ុន

បុគ្គលនិម្មិតដ៏ល្បីឈ្មោះ និងមានឥទ្ធិពលនៅលើបណ្ដាញសង្គម (influencer) ដែលជាផលិតផលរបស់កុំព្យូទ័រ កំពុងក្លាយជាឧបករណ៍រកប្រាក់យ៉ាងមានប្រសិទ្ធភាពនៅ កូរ៉េខាងត្បូង បើទោះវាបង្កឱ្យមានបញ្ហាចម្រូងចម្រាសមួយចំនួន។

Rozy មានអ្នកតាមដានជាង ១៣០,០០០ នាក់ នៅលើ Instagram ជាទីដែលនាងបង្ហោះរូបភាពស្ដីពីដំណើរទេសចរណ៍របស់ខ្លួន។ រូបរាង សម្រស់របស់នារីនិម្មិតមួយរូបនេះ ពិតជាមិនមានចំណុចណាដែលអាចឱ្យគេរិះគន់បាន តាំងពីការតុបតែងមុខមាត់ និងសម្លៀកបំពាក់។ នាងចៀង រាំ និងធ្វើជាតារាបង្ហាញម៉ូដ។ ប៉ុន្តែ គ្រប់យ៉ាងដែល Rozy មាន រួមទាំងរាងកាយរបស់នាងផងដែរ គឺសុទ្ធតែជារបស់និម្មិត ពោលគឺមិនមាននៅក្នុងលោក។

Rozy គឺជាក្រមុំនិម្មិត និងជា influencer ម្នាក់ នៅ កូរ៉េខាងត្បូង ដែលត្រូវបានផលិតផលឡើងដោយកុំព្យូទ័រ។ ប៉ុន្តែ រូបរាងរបស់នាង បង្ហាញពីភាពជាក់ស្ដែងដល់ថ្នាក់មានមនុស្សជាច្រើនច្រឡំថា នាងជាមនុស្សមាននៅក្នុងលោក ជានារីដែលបានចាប់កំណើតពីផ្ទៃម្ដាយពិត។

Sidus Studio X ដែលជាក្រុមហ៊ុននៅ កូរ៉េខាងត្បូង និងជាអ្នកដែលបានបង្កើត Rozy ឱ្យដឹងថា នាងក្រមុំនិម្មិតម្នាក់នេះ គឺជាផលិតផលនៃការលាយបញ្ចូលគ្នារវាងពិភពពិត និងពិភពនិម្មិត។ «នាងអាចធ្វើការងារគ្រប់យ៉ាងដែលមនុស្សពិតមិនអាចធ្វើបាន ដោយប្រើប្រាស់រូបរាងដូចមនុស្សពិត» នេះបើតាម Sidus Studio X។

នាង Rozy បានជួយឱ្យក្រុមហ៊ុន Sidus Studio X រកបានប្រាក់ចំណេញក្នុងពិភពផ្សាយពាណិជ្ជកម្ម និងកម្សាន្ត តម្លៃរាប់ពាន់លានដុល្លារអាម៉េរិក។

ចាប់តាំងពីត្រូវបានបង្កើតឡើងកាលពីឆ្នាំ ២០២០ ស្រីស្អាត Rozy ទទួលបានកិច្ចសន្យាផ្សាយពាណិជ្ជកម្មជាមួយនឹងក្រុមហ៊ុន យីហោល្បីៗ និងបានចូលរួមព្រឹត្តិការណ៍បង្ហាញម៉ូដសម្លៀកបំពាក់និម្មិតជាច្រើន ហើយថែមទាំងបានចេញអាល់ប៊ុមផ្ទាល់ខ្លួនផងដែរ។

យ៉ាងណាក៏ដោយ ស្រីស្អាត Rozy មិនមែនជាមនុស្សនិម្មិតដែលមានឥទ្ធិពលខ្លាំងតែម្នាក់នៅ កូរ៉េខាងត្បូង ឡើយ។ វិស័យឧស្សាហកម្មមនុស្សនិម្មិត កំពុងតែផ្ទុះការពេញនិយម ធ្វើឱ្យទីផ្សារមានវិស័យសេដ្ឋកិច្ចដ៏ថ្មីសន្លាងមួយទៀត។

បុគ្គលនិម្មិតល្បីឈ្មោះមិនចាស់ទៅតាមអាយុនោះទេ ហើយក៏ពុំមានរឿងអាស្រូវដូចមនុស្ស និងត្រូវបានបង្កើតឡើងដោយបច្ចេកវិទ្យា CGI ទាំងស្រុង។

តាមពិត បច្ចេកវិទ្យា CGI (រូបភាពដែលបង្កើតឡើងដោយកុំព្យូទ័រ) មិនមែនជារឿងថ្មី។ វាមានការពេញនិយមក្នុងវិស័យឧស្សាហកម្មកម្សាន្តនាបច្ចុប្បន្ន ជាទីដែលក្រុមសិល្បករប្រើប្រាស់វាដើម្បីបង្កើតជាបុគ្គលនិម្មិតនៅក្នុងខ្សែភាពយន្ត ហ្គេម និងវីដេអូតន្ត្រី។ ក៏ប៉ុន្តែ CGI ទើបតែត្រូវបានប្រើប្រាស់នាពេលថ្មីៗនេះ នៅក្នុងការបង្កើតបុគ្គលនិម្មិតដែលមានភាពល្បីល្បាញ និងឥទ្ធិពលក្នុងបណ្ដាញសង្គម។

ទោះជាអស្ចារ្យយ៉ាងណាក៏ដោយ ក្រុម influencer ដែលជាបុគ្គលនិម្មិតល្បីឈ្មោះ នៅតែបង្កបញ្ហាចម្រូងចម្រាសមួយចំនួនសម្រាប់សង្គម ពិសេសគឺបញ្ហាដែលទាក់ទិននឹងសីលធម៌ និងវប្បធម៌របស់មនុស្សជាតិ។

ខាងក្រោមនេះ សុទ្ធតែជាស្រីស្អាត និងជាតារាបង្ហាញម៉ូដដ៏មានឥទ្ធិពល ដែលត្រូវបានបង្កើតឡើងដោយកុំព្យូទ័រ ៖

ស្រីស្អាត Lucy គឺជាតារាបង្ហាញម៉ូដនិម្មិតរបស់ Lotte Home Shopping

August 4, 2022

ប្រេងរ៉ែពិភពលោកធ្លាក់ថ្លៃភ្លាមៗ បន្ទាប់ពី OPEC+ សម្រេចចិត្តបង្កើនការផលិត

កាលពីថ្ងៃទី ០៣ សីហា តម្លៃប្រេងពិភពលោកបានធ្លាក់ថ្លៃ ក្រោយពីទិន្នន័យបានបង្ហាញថា បរិមាណប្រេងឆៅដែលសល់ក្នុងឃ្លាំងរបស់ សហរដ្ឋអាម៉េរិក កើនឡើង និងអង្គការនៃក្រុមប្រទេសផលិតប្រេងរ៉ែ និងដៃគូសហការ (OPEC+) បានឯកភាពគ្នា បង្កើនបរិមាណប្រេងក្នុងខែកញ្ញាខាងមុខ។

ជាក់ស្ដែង ប្រេងឆៅ WTI ប្រគល់ក្នុងខែកញ្ញា បានធ្លាក់ថ្លៃ ៣.៧៦ ដុល្លារ (៤%) មកនៅត្រឹម ៩០.៦៦ ដុល្លារ/ធុង នៅលើផ្សារជួញដូរទំនិញ New York។ តម្លៃប្រេងឆៅ Brent ប្រគល់ក្នុងខែតុលា ក៏ថយចុះ ៣.៧៦ ដុល្លារ (៣.៧%) មកនៅត្រឹម ៩៦.៧៨ ដុល្លារ/ធុង នៅក្នុងផ្សារអន្តរទ្វីប។

ប្រេងធ្លាក់ថ្លៃ បន្ទាប់ពី រដ្ឋបាលព័ត៌មានថាមពលអាម៉េរិក (EIA) បានឱ្យដឹងថា បរិមាណប្រេងឆៅដែលសល់នៅក្នុងឃ្លាំងរបស់ប្រទេសនេះ បានកើនឡើង ៤.៥ លានធុងនៅក្នុងសប្ដាហ៍ដែលបញ្ចប់កាលពីថ្ងៃទី ២៩ កក្កដា។ ទិន្នន័យរបស់ EIA ក៏បានបង្ហាញថា បរិមាណប្រេងសាំងដែលសល់សរុបនៅក្នុងសប្ដាហ៍កន្លងរបស់ សហរដ្ឋអាម៉េរិក បានកើន ២០០,០០០ ធុង។

នៅក្នុងកិច្ចប្រជុំចុងក្រោយបំផុត អង្គការ OPEC+ បានសម្រេចចិត្តបង្កើនការផលិតប្រេងបន្ថែម ១០០,០០០ ធុង/ថ្ងៃ សម្រាប់ខែកញ្ញា ២០២២ ដើម្បីជួយទប់ទល់នឹងតម្លៃប្រេងដែលចេះតែកើនឡើងពីមួយថ្ងៃទៅមួយថ្ងៃ៕

August 4, 2022

ប្រព័ន្ធផ្លូវទម្រង់លូរបស់ TransPod អាចឱ្យរថភ្លើងធ្វើដំណើរក្នុងល្បឿន ១,២០០ គីឡូម៉ែត្រ/ម៉ោង

(កាណាដា)-ក្រុមហ៊ុន TransPod បានឱ្យដឹងថា ពួកគេចាប់ផ្ដើមការសាងសង់ប្រព័ន្ធផ្លូវដែលមានរូបរាងជាបំពង់លូ អាចឱ្យរថភ្លើងដឹកអ្នកដំណើរពី Calgary ទៅកាន់ Edmonton ដែលមានចម្ងាយផ្លូវ ៣០០ គីឡូម៉ែត្រ ប្រើប្រាស់ពីតែ ៤៥ នាទី។

ប្រព័ន្ធដឹកជញ្ជូនល្បឿនមហាលឿន TransPod FluxJet ដែលត្រូវបានបង្ហាញកាលពីសប្ដាហ៍កន្លងនៅទីក្រុងតូរ៉ុនតូ ប្រទេសកាណដា ត្រូវបានគេរំពឹងថា នឹងប្រើប្រាស់បច្ចេកវិទ្យាទំនើបចុងក្រោយទាក់ទងនឹងកម្លាំងរុញច្រាន ថាមពលស្អាត និងបច្ចេកវិទ្យាបញ្ជូនអគ្គិសនីមិនប្រើខ្សែជាដើម។ ប្រព័ន្ធនេះនឹងកាត់បន្ថយកម្លាំងកកឹតរបស់ខ្យល់ ដោយសារតែរថភ្លើងនឹងបរនៅក្នុងបំពង់ នៅក្នុងការដឹកជញ្ជូនអ្នកដំណើរ និងទំនិញនៅក្នុងប្រទេស ជាមួយនឹងល្បឿនមហាលឿន។

ដូចទៅនឹងគម្រោងដទៃដូចជា Hyperloop, Hyperloop TT, Hyperloop One, ET3, HyperPort ជាដើម គម្រោង FluxJet នឹងលុបបំបាត់ស្ថានភាពកកឹតដែលកើតឡើងដោយទម្ងន់ ព្រោះតែវាប្រើប្រាស់បច្ចេកវិទ្យា Maglev (Magnetic levitation)។ ផ្នែកនានាដែលប៉ះនឹងដីរបស់រថភ្លើង នឹងត្រូវបានដកចូលខ្លីនៅពេលរថភ្លើងធ្វើដំណើរក្នុងល្បឿនយ៉ាងតិច ៣០០ គីឡូម៉ែត្រ/ម៉ោង និងអាចបង្កើនល្បឿនដល់ ១,០០០ គីឡូម៉ែត្រ/ម៉ោង ឬលឿនបំផុតត្រឹម ១,២០០ ម៉ែត្រ/ម៉ោង។

ក្រុមហ៊ុន TransPod មិនបានបង្ហើបឱ្យដឹងច្រើនអំពីបច្ចេកវិទ្យាសំខាន់ៗ ប៉ុន្តែ ពួកគេនឹងប្រើប្រាស់ veillance flux ដែលជាប្រព័ន្ធកំណត់ទិស អនុញ្ញាតឱ្យស្កេនផ្លូវក្នុងប្រព័ន្ធបំពង់ និងសម្រួលទីតាំងរបស់រថភ្លើង។ រថភ្លើងមួយខ្សែៗ មានប្រវែង ២៥ ម៉ែត្រ អាចដាក់មនុស្សបាន ៥៤ នាក់ និងបំពាក់ម៉ាស៊ីនរុញច្រានចំនួន ៤ គ្រឿង។ បន្ទប់ទាំងនេះក៏មានបំពាក់ថ្មផ្ទុកថាមពលអគ្គិសនី និងអាចទាញយកថាមពលអគ្គិសនីដោយមិនប្រើខ្សែពីផ្លូវប្រភេទបំពង់នេះ។

TransPod ឱ្យដឹងថា ក្រុមហ៊ុនទទួលបានប្រាក់វិនិយោគ ៥៥០ លានដុល្លារអាម៉េរិក និងកំពុងឈានដល់ដំណាក់កាលបន្ទាប់របស់គម្រោង គឺការបើកការដ្ឋានសាងសង់ផ្លូវប្រវែងជាង ៣០០ គីឡូម៉ែត្រ រវាង Calgary និង Edmonton។

ប្រព័ន្ធផ្លូវទម្រង់បំពង់លូតម្លៃ ១៨ ពាន់លានដុល្លារនេះ នឹងជួយឱ្យពេលវេលានៃការធ្វើដំណើររវាងទីក្រុង Calgary និង Edmonton ចុះមកនៅត្រឹម ៤៥ នាទី ជំនួសឱ្យជាង ៣ ម៉ោង ដែលត្រូវចំណាយនាបច្ចុប្បន្ន។ ផ្លូវនេះក៏ជួយកាត់បន្ថយបាន ១/៣ នៃចំនួនយានយន្តដែលធ្វើចរាចរណ៍លើដងផ្លូវល្បឿនលឿនពីទីក្រុង Calgary ទៅកាន់ទីក្រុង Edmonton។ ហើយជាងនេះ វាក៏នឹងកាត់បន្ថយឧស្ម័នកាបូនបាន ៦៣៦,០០០ តោន ជារៀងរាល់ឆ្នាំផងដែរ ដោយសារតែប្រើប្រាស់ថាមពលស្អាត៕

August 3, 2022

Category: សង្គម និងសេដ្ឋកិច្ច