សង្គម និងសេដ្ឋកិច្ច - La Reine Media

ទំហំសេដ្ឋកិច្ចអ៊ីនធើណិតនៅ អាស៊ីអាគ្នេយ៍ អាចកើនឡើងដល់ ៣០០ ពាន់លានដុល្លារអាម៉េរិក នៅឆ្នាំ ២០២៥

នៅលើខឿនសេដ្ឋកិច្ចឌីជីថលអ៊ីនធើណិត ទិន្នន័យធំ (Big Data) មានសក្ដានុពលយ៉ាងធំសម្បើម ជួយជំរុញល្បឿននៃការងើបឡើងរបស់សេដ្ឋកិច្ចនៅ អាស៊ីអាគ្នេយ៍ ក្រោយសម័យកូវីដ-១៩ ដោយផលប្រយោជន៍ក្នុងវិស័យសុខាភិបាលសាធារណៈ សុខុមាលភាពសង្គម និងអប់រំ សម្រេចបានតម្លៃជាង ១០០ ពាន់លានដុល្លារអាម៉េរិក។

យោងតាមរបាយការណ៍ថ្មីរបស់ ធនាគារអភិវឌ្ឍអាស៊ី (ADB) ដែលមានប្រធានបទ ទាញយកសក្ដានុពលរបស់ Big Data នៅ អាស៊ីអាគ្នេយ៍ ក្រោយកូវីដ-១៩ Big Data អាចកែលម្អការផ្គត់ផ្គង់សេវាកម្មរបស់រដ្ឋាភិបាល និងជំរុញល្បឿននៃការងើបឡើងរបស់សេដ្ឋកិច្ច ក្រោយវិបត្តិកូវីដ-១៩។

របាយការណ៍ថ្មីរបស់ ADB បង្ហាញថា បណ្ដាប្រព័ន្ធតាមដានពីចម្ងាយអាចជួយសន្សំសំច័យបាន ៩.៤ ពាន់លានដុល្លារ សម្រាប់បណ្ដាញសុខាភិបាលនៅ អាស៊ីអាគ្នេយ៍ ក្នុងឆ្នាំ ២០៣០ ដោយសារតែការថយចុះនៃចំនួនប្រជាពលរដ្ឋដែលមកកាន់មន្ទីរពេទ្យ ពេលវេលានៃការសម្រាកព្យាបាលនៅមន្ទីរពេទ្យខ្លីជាងមុន និងការថយចុះនៃលិខិតស្នាមនៅមន្ទីរពេទ្យ។

ចំណែកឯការប្រើប្រាស់ទិន្នន័យវិភាគដើម្បីកំណត់គោលដៅសម្រាប់អន្តរាគមន៍ផ្នែកសុខាភិបាលដែលផ្ដោតសំខាន់ទៅលើក្រុមប្រជាពលរដ្ឋងាយរងគ្រោះ ក៏អាចនាំឱ្យកើនឡើងប្រហែល ១៥.៥ ពាន់លានដុល្លារ នៅក្នុងផលិតផលក្នុងស្រុកសរុប (GDP) របស់តំបន់ អាស៊ីអាគ្នេយ៍ នៅឆ្នាំ ២០៣០។

របាយការណ៍ខាងលើបញ្ជាក់ថា ការប្រើប្រាស់បច្ចេកវិទ្យាឌីជីថលដើម្បីផ្គត់ផ្គង់សេវាកម្មអប់រំ ការធ្វើការពីចម្ងាយ និងលក្ខណៈឯកជន អាចរួមចំណែកប្រមាណ ៧៧.១ ពាន់លានដុល្លារជារៀងរាល់ឆ្នាំ ទៅក្នុង GDP របស់បណ្ដាប្រទេសនៅ តំបន់អាស៊ីអាគ្នេយ៍ នៅឆ្នាំ ២០៣០ ផងដែរ។

បច្ចេកវិទ្យាឌីជីថល កំពុងតែផ្លាស់ប្ដូរសេដ្ឋកិច្ចពិភពលោក។ របាយការណ៍របស់ ADB បានបង្ហាញថា គិតតែក្នុង តំបន់អាស៊ីអាគ្នេយ៍ ទំហំរបស់សេដ្ឋកិច្ចអ៊ីនធើណិត អាចកើនជា ៣ ដង ធៀបនឹងឆ្នាំ ២០១៩ ដោយអាចនឹងឡើងដល់ ៣០០ ពាន់លានដុល្លារនៅក្នុងឆ្នាំ ២០២៥៕

August 20, 2022

វៀតណាម ស្នើឱ្យ កម្ពុជា ជួយសហការស៊ើបអង្កេតករណី ជនជាតិវៀតណាម រត់គេចពីកាស៊ីណូនៅ កម្ពុជា

អាជ្ញាធរវៀតណាម ស្នើ កម្ពុជា ជួយសហការ ស៊ើបអង្កេតរកមូលហេតុដែលនាំឱ្យ ជនជាតិវៀតណាម ៤២ នាក់ រត់គេចពីកាស៊ីណូ នៅក្នុង ខេត្តកណ្ដាល និងស្វែងរកអ្នកដែលបានបាត់ខ្លួន នេះបើតាមសារព័ត៌មានវៀតណាម VNexpress ស្រង់ព័ត៌មានពី ក្រសួងការបរទេសវៀតណាម ចេញផ្សាយនាព្រឹកថ្ងៃទី ២០ សីហា។

វៀតណាម បានទាក់ទងទៅកាន់ អាជ្ញាធរកម្ពុជា ដើម្បីបញ្ជាក់អំពីព័ត៌មាននេះ និងស្នើឱ្យត្រួតពិនិត្យទីតាំងមួយនៅក្នុង ភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល នេះបើតាមអ្នកនាំពាក្យក្រសួងការបរទេសវៀតណាម Le Thi Thu Hang និយាយអំពីព័ត៌មានស្ដីពីពលករវៀតណាម ៤២ នាក់ ដែលបានរត់គេចខ្លួនពីកាស៊ីណូ នៅ កម្ពុជា។

លោកស្រី Hang ឱ្យដឹងថា វៀតណាម បានស្នើឱ្យ កម្ពុជា ជួយតាមរកអ្នកដែលកំពុងបាត់ខ្លួន និងស៊ើបអង្កេតរកមូលហេតុនៃហេតុការណ៍នេះ។ អ្នកនាំពាក្យរូបនេះក៏បានព្រមានអំពីស្ថានភាព ជនជាតិវៀតណាម ត្រូវគេមេខ្យល់បោកមកធ្វើការដោយខុសច្បាប់នៅ កម្ពុជា ក្នុងរយៈពេលកន្លង។ លោកស្រី Hang បញ្ជាក់ថា ជនជាតិវៀតណាម ជាង ៥០០ នាក់ ត្រូវបានជួយសង្គ្រោះ និងនាំត្រលប់ទៅកាន់ប្រទេសដោយសុវត្ថិភាព និងរាប់ពាន់នាក់ទទួលបានជំនួយក្នុងការធ្វើលិខិតស្នាម។

ការិយាល័យការពារព្រំដែន Long Binh ខេត្ត An Giang របស់ វៀតណាម កាលពីថ្ងៃទី ១៨ សីហា បានចាប់ខ្លួនមនុស្ស ៤០ នាក់ រួមមានស្ត្រី ៥ នាក់ និងបុរស ៣៥ នាក់ ព្រោះតែឆ្លងដែនចូលទឹកដីរបស់ វៀតណាម ដោយខុសច្បាប់។ អ្នកដែលត្រូវបានចាប់ខ្លួននេះបានឱ្យដឹងថា មនុស្ស ៤២ នាក់ បានរត់គេចខ្លួនពីកាស៊ីណូ នៅក្នុង ខេត្តកណ្ដាល និងហែលឆ្លងទន្លេ Binh Di ត្រលប់ទៅប្រទេស។ ប៉ុន្តែ ម្នាក់ត្រូវទឹកគួចបាត់ខ្លួន និងម្នាក់ត្រូវបានខាងកាស៊ីណូចាប់ត្រលប់មកវិញ។

ក្រុមពលករវៀតណាម ដែលរត់គេចពីកាស៊ីណូ នៅ កម្ពុជា កំពុងសម្រាកនៅក្នុងទីតាំងមួយរបស់ អាជ្ញាធរវៀតណាម នៅខេត្ត An Giang កាលពីថ្ងៃទី ១៩ សីហា ២០២២

ជនជាតិវៀតណាម ខាងលើ បានសារភាពថា មុននោះពួកគេបានចូលទឹកដីរបស់ កម្ពុជា ដោយខុសច្បាប់ ដើម្បីទៅធ្វើការក្នុងកាស៊ីណូមួយចំនួន។ ដោយសារតែត្រូវធ្វើការលើសពីការកំណត់របស់ច្បាប់ មិនបានសម្រាកគ្រប់គ្រាន់ និងមិនទទួលបានប្រាក់ខែ ពួកគេក៏នាំគ្នារកវិធីឆ្លងដែនត្រលប់ទៅ វៀតណាម វិញ។

សារព័ត៌មាន VNexpress បានឱ្យដឹងថា ថ្មីៗនេះ ជនជាតិវៀតណាម ជាច្រើន ត្រូវបានមេខ្យល់បោកយកមក កម្ពុជា ហើយលក់ទៅឱ្យបនល្បែងមួយចំនួន ឬក្រុមជួញដូរប្រាក់ឌីជីថលគ្រីបតូ និងត្រូវរំលោភបំពានកម្លាំងពលកម្ម។ បើសិនជាចង់ត្រលប់ទៅប្រទេសវិញ ពួកគេត្រូវតែបង់ប្រាក់ចាប់ពី ៣,០០០ ដល់ ៣០,០០០ ដុល្លារអាម៉េរិក។

ក្រសួងសន្តិសុខសាធារណៈវៀតណាម បានចោទថា បនល្បែងដែលរំលោភកម្លាំងពលកម្ម រឹបអូសទ្រព្យសម្បត្តិបុគ្គល ភាគច្រើនស្ថិតនៅក្នុង ក្រុងបាវិត ខេត្តស្វាយរៀង, ក្រុងប៉ោយប៉ែត ខេត្តបន្ទាយមានជ័យ, ក្រុងព្រះសីហនុ ខេត្តព្រះសីហនុ, ជ្រៃធំ ខេត្តកណ្ដាល និង ភ្នំពេញ។ ក្នុងរយៈពេល ៦ ខែដើមឆ្នាំនេះ ប៉ូលិសវៀតណាម សហការជាមួយសមត្ថកិច្ចរបស់ កម្ពុជា រំដោះជនរងគ្រោះបានជាង ២៥០ ករណី ដែលត្រូវបានជនខិលខូចបោកមកធ្វើការនៅ កម្ពុជា ដោយខុសច្បាប់៕

August 20, 2022

ក្រុមហ៊ុនឡាវ អភិវឌ្ឍគម្រោងផលិតអគ្គិសនីពីថាមពលព្រះអាទិត្យ តម្លៃជាង ៦៩ លានដុល្លារអាម៉េរិក

ក្រុមហ៊ុនទទួលខុសត្រូវមានកម្រិត Solar Attapeu Power Sole (SAPC) ទើបតែបានសម្ពោធបើកការដ្ឋានអនុវត្តគម្រោងថាមពលអគ្គិសនីព្រះអាទិត្យ Attapeu (SAPP) តម្លៃ ៦៩.២ លានដុល្លារនៅស្រុក Xaysettha ក្នុងខេត្ត Attampeu ប្រទេសឡាវ។

លោក Sisavath Souvannavong ប្រធានក្រុមហ៊ុន SAPC ឡាវ បានឱ្យដឹងថា គម្រោងផលិតអគ្គិសនីពីថាមពលព្រះអាទិត្យ Attapeu នេះ គ្រោងនឹងត្រូវបានស្ថាបនារួចរាល់នៅចុងឆ្នាំ ២០២៣ ហើយនឹងមានកម្លាំងដំឡើង ៦៤MWdc/៥០MWac។ គម្រោងនេះត្រូវបានក្រុមហ៊ុន និងស្ថាប័នពាក់ព័ន្ធ សិក្សាស្រាវជ្រាវតាំងពីឆ្នាំ ២០១៤។

គម្រោងផលិតអគ្គិសនីពីថាមពលព្រះអាទិត្យ Attapeu ត្រូវបានគេរំពឹងថា នឹងជួយជំរុញការអភិវឌ្ឍវិស័យថាមពល រួមចំណែកក្នុងការធានាសន្តិសុខថាមពល បង្កើតការងារនៅក្នុងតំបន់ និងផ្ដល់អគ្គិសនី ១២៨GWh ជារៀងរាល់ឆ្នាំ សម្រាប់ប្រទេស និង ប្រជាជនឡាវ។

រដ្ឋាភិបាលឡាវ កំពុងតែអនុវត្តគោលនយោបាយអនុគ្រោះ ដើម្បីលើកទឹកចិត្តដល់បណ្ដាក្រុមហ៊ុនវិនិយោគក្នុងវិស័យផលិតថាមពលស្អាត មានដូចជា អគ្គិសនីផលិតពីថាមពលព្រះអាទិត្យ អគ្គិសនីផលិតពីថាមពលខ្យល់ និងថាមពលជីវម៉ាសជាដើម៕

August 19, 2022

ក្រុមហ៊ុនជប៉ុន គ្រោងនឹងផ្ដល់សេវាកម្មទេសចរណ៍ «លំដាប់ប្រណិត» សម្រាប់ភ្ញៀវដែលមានទ្រព្យចាប់ពី ៥០ លានដុល្លារ

បណ្ដាសហគ្រិនវិស័យទេសចរណ៍នៅ ប្រទេសជប៉ុន កំពុងពិភាក្សាគ្នាអំពីការផ្ដល់សេវាកម្មទេសចរណ៍ដែលអនុញ្ញាតឱ្យអតិថិជនដើរកម្សាន្តតាមតំបន់ប្រវត្តិសាស្ត្រ ធម្មជាតិ និងវប្បធម៌គ្រប់ទិសទីនៅក្នុង ប្រទេសជប៉ុន តាមរយៈយន្តហោះឯកជន។

ក្រុមហ៊ុនអាកាសចរណ៍ធំជាងគេរបស់ ជប៉ុន ANA Holdings Inc. និងក្រុមហ៊ុនជាច្រើនទៀត កំពុងតែពិនិត្យមើលលទ្ធភាពក្នុងការផ្ដល់សេវាកម្មទេសចរណ៍លំដាប់ប្រណិតសម្រាប់ភ្ញៀវអ្នកមានពីបរទេសដែលមានលទ្ធភាពចំណាយប្រាក់ច្រើននៅ ជប៉ុន។

កញ្ចប់សេវាកម្មទេសចរណ៍ខាងលើនេះ នឹងអនុញ្ញាតឱ្យភ្ញៀវដើរទេសចរណ៍ពាសពេញផ្ទៃប្រទេសជប៉ុន ក្នុងរយៈពេលជាង ១ សប្ដាហ៍ តាមរយៈយន្តហោះឯកជន ក្នុងនោះ តំបន់ប្រវត្តិសាស្ត្រ តំបន់ទេសចរណ៍ធម្មជាតិ និងវប្បធម៌ គឺជាគោលដៅសំខាន់។

ផែនការនេះ កំពុងត្រូវបានពិភាក្សារួមគ្នាដោយ Nippon Travel Agency ដែលជាក្រុមហ៊ុនបុត្រសម្ព័ន្ធរបស់ ANA Holdings, ក្រុមហ៊ុនលក់ឧបករណ៍ក្រៅផ្ទះ Snow Peak, រដ្ឋបាលទីក្រុង Tajimi នៅខេត្ត Gifu និង ក្រុមប្រឹក្សាទេសចរណ៍ និងស្ដារតំបន់ក្នុងប្រទេស។

ដំណើរទេសចរណ៍លក្ខណៈសាកល្បងមួយចំនួន ត្រូវបានបើកដំណើរការតាំងពីខែមេសា ២០២២។ ស្ថាប័នពាក់ព័ន្ធមានគម្រោងជ្រើសរើសតំបន់ទេសចរណ៍ល្បីៗប្រមាណជា ១០ នៅទូទាំងប្រទេសជប៉ុន សម្រាប់សេវាកម្មរបស់ពួកគេនៅចុងឆ្នាំនេះ ហើយនឹងផ្ដល់សេវាកម្មទេសចរណ៍ជាផ្លូវការនៅដើមឆ្នាំក្រោយ។

អតិថិជនគោលដៅរបស់បណ្ដាក្រុមហ៊ុនខាងលើគឺក្រុមមនុស្សដែលមានទ្រព្យយ៉ាងតិច ៥០ លានដុល្លារអាម៉េរិក។ តាមការគណនា អតិថិជនប្រភេទនេះមានប្រហែល ២១០,០០០ នាក់ នៅលើពិភពលោក។

សំបុត្រសម្រាប់ដំណើរទេសចរណ៍ថ្នាក់ប្រណិតនេះនឹងមានតម្លៃប្រមាណ ៥ លានយេន (៣៦,០០០ ដុល្លារអាម៉េរិក) ក្នុង ១ សំបុត្រ៕

August 19, 2022

គម្រោងបង្កើតរោងចក្រឧស្សាហកម្មថ្មីចំនួន ៤ ទៀត ទទួលបានការអនុម័តពី ក្រុមប្រឹក្សាអភិវឌ្ឍន៍កម្ពុជា

នៅវេលាថ្ងៃត្រង់ ថ្ងៃទី ១៩ សីហានេះ ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនថ្មីចំនួន ៤ ដែលគ្រោងនឹងបង្កើតរោងចក្រនៅ ភ្នំពេញ និង ខេត្តព្រះសីហនុ។

ខាងក្រោមនេះគឺជាបណ្ដាក្រុមហ៊ុនដែលទើបតែទទួលបានវិញ្ញាបនបត្រចុះបញ្ជីគម្រោងវិនិយោគពី ក្រុមប្រឹក្សាអភិវឌ្ឍន៍កម្ពុជា ៖

១-ក្រុមហ៊ុន R.G. FOOTWEAR (CAMBODIA) CO., LTD ដែលមានទីតាំងវិនិយោគស្ថិតនៅភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល គ្រោងនឹងវិនិយោគប្រមាណ ៥.៦ លានដុល្លារអាមេរិក និងអាចបង្កើតការងារដល់ពលរដ្ឋបានចំនួន ១,៣២៨ កន្លែង។

២- ក្រុមហ៊ុន Xing Gang Wood Industry (Cambodia) Co., Ltd.។ គម្រោងបង្កើតរោងចក្រផលិតគ្រឿងសង្ហារឹមបង្គុំ និងសម្ភារៈតុបតែងលំអធ្វើពីឈើ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជឺ, ខេត្តព្រះសីហនុ, ក្នុងទុនវិនិយោគចំនួន ៣.៩ លានដុល្លារអាមេរិក និងអាចបង្កើតការងារបានចំនួនប្រមាណ ២៥០ នាក់។

៣- ក្រុមហ៊ុន Zhejiang Jeni Furniture Co., Ltd. គម្រោងបង្កើតរោងចក្រផលិតសាឡុង និងស្រោមសាឡុង ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជឺ, ខេត្តព្រះសីហនុ,ក្នុងទុនវិនិយោគចំនួន ១ លានដុល្លារអាមេរិក និងអាចបង្កើតការងារបានចំនួនប្រមាណ ៤០០ នាក់។

៤- ក្រុមហ៊ុន FF.LL (Cambodia) Co., Ltd.។ គម្រោងបង្កើតរោងចក្រផលិតសម្ភារៈវេចខ្ចប់គ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, ក្នុងទុនវិនិយោគចំនួន ៦.៥ លានដុល្លារអាមេរិក និងអាចបង្កើតការងារបានចំនួនប្រមាណ ៨៣០ នាក់។

គម្រោងវិនិយោកដែលមានទុន ១៧ លានដុល្លារអាម៉េរិក របស់ក្រុមហ៊ុនទាំង ៤ ខាងលើនេះ នឹងបង្កើតការងារថ្មីបានប្រមាណ ២,៨០០ កន្លែង៕

August 19, 2022

អតិផរណាកើនឡើងខ្ពស់ ជប៉ុន នៅតែបន្តកម្មវិធីជំរុញសេដ្ឋកិច្ច

តម្លៃមុខទំនិញជាច្រើនមុខឡើងថ្លៃជាបន្តបន្ទាប់ ធ្វើឱ្យអតិផរណានៅ ជប៉ុន បន្តកើនឡើង ប៉ុន្តែ ធនាគារជាតិជប៉ុន (BoJ) អាចនឹងបន្តរក្សាការបន្ធូរបន្ថយគោលនយោបាយហិរញ្ញវត្ថុ ក្នុងបំណងជួយជំរុញល្បឿននៃការងើបឡើងរបស់សេដ្ឋកិច្ចប្រទេសនេះ។

នាថ្ងៃទី ១៩ សីហានេះ ក្រសួងមហាផ្ទៃ និងទូរគមនាគមន៍ជប៉ុន (MIC) បានឱ្យដឹងថា ក្នុងខែកក្កដា ២០២២ សន្ទស្សន៍ថ្លៃទំនិញប្រើប្រាស់ (CPI) មូលដ្ឋានរបស់ប្រទេសនេះ កើន ២.៤% ធៀបនឹងខែកក្កដា ២០២១, កើន ០.២ ពន្ទុ ធៀបនឹងខែកន្លង និងខ្ពស់បំផុតក្នុងអំឡុងពេលពីខែធ្នូ ២០១៤ ដល់បច្ចុប្បន្ន។ នេះគឺជាខែទី ៤ ហើយដែលសន្ទស្សន៍ CPI ឡើងខ្ពស់ជាងគោលដៅ ២% របស់ ធនាគារជាតិជប៉ុន។

យោងតាមក្រុមអ្នកវិភាគ មូលហេតុសំខាន់ដែលនាំឱ្យអតិផរណានៅ ជប៉ុន បន្តកើនឡើង នោះគឺតម្លៃឥន្ធនៈ និងវត្ថុធាតុដើមនៅតែមានកម្រិតខ្ពស់ បណ្ដាលឱ្យទំនិញជាច្រើនមុខត្រូវឡើងថ្លៃតាម ក្នុងគ្រាដែលប្រាក់យេនរបស់ ជប៉ុន ក៏ធ្លាក់ថ្លៃ ធៀបនឹងប្រាក់ដុល្លាររបស់ អាម៉េរិក ធ្វើឱ្យទំនិញនាំចូល ក៏ប្រែទៅជាឡើងថ្លៃកាន់តែខ្ពស់។

បញ្ហាទាំងឡាយខាងលើនេះ កំពុងរុញច្រានការចំណាយក្នុងគ្រួសារនៅ ជប៉ុន កើនឡើងខ្ពស់ គ្រាដែលល្បឿននៃការដំឡើងប្រាក់ខែនៅតែយឺតយ៉ាវ។ ស្ថានភាពនេះអាចជះឥទ្ធិពលអាក្រក់ដល់ល្បឿននៃការងើបឡើងនៃសេដ្ឋកិច្ចរបស់ ជប៉ុន ក្រោយយុគសម័យវិបត្តិកូវីដ-១៩៕

August 19, 2022

ផ្ទះអណ្ដែតលើទឹកតម្លៃ ១.៥ លានដុល្លារ បង្ហាញពីទីជម្រកអនាគតរបស់មនុស្ស

ត្រូវបានគេចាត់ទុកថាជា «ផ្ទះអេកូឡូស៊ីដំបូងលើពិភពលោក» ផ្ទះអណ្ដែតលើទឹកដ៏ទំនើបនេះមានតម្លៃចាប់ពី ២៩៥ ពាន់ដុល្លារអាម៉េរិក ដល់ ១.៥ លានដុល្លារអាម៉េរិក។

ជាធម្មតា ជីវភាពស៊ីវីល័យ និងបច្ចេកវិទ្យាឆ្លាតវៃនៅលើផ្ទះបណ្ដែតលើទឹកតែងតែមិនដើរស្របគ្នា។ ក៏ប៉ុន្តែ ក្រុមហ៊ុន Ocean Builders ដែលមានទីស្នាក់ការកណ្ដាលនៅប្រទេសប៉ាណាម៉ា ទើបតែបានបង្ហើបឱ្យដឹងអំពីផ្ទះបណ្ដែងលើទឹកដែលមានលក្ខណៈ «បដិវត្តន៍» ដែលអាចរួមផ្សំប្រការទាំងពីរខាងលើជាមួយគ្នា។

ត្រូវបានគេចាត់ទុកថាជា «ផ្ទះអេកូឡូស៊ីដំបូងលើពិភពលោក» ផ្ទះអណ្ដែតលើទឹកដ៏ទំនើបនេះមានតម្លៃចាប់ពី ២៩៥ ពាន់ដុល្លារអាម៉េរិក ដល់ ១.៥ លានដុល្លារអាម៉េរិក។ ប៉ុន្តែ ក្រុមហ៊ុនសាងសង់បដិសេធការទទួលយកប្រាក់កក់រហូតដល់អតិថិជនបានឈានជើងចូលដល់ «ផ្ទះអនាគត» នេះ។ បច្ចុប្បន្ន ពួកវាកំពុងត្រូវបានសាងសង់នៅឯឈូងសមុទ្រ Linton ក្បែរឆ្នេរសមុទ្រភាគខាងជើងរបស់ ប៉ាណាម៉ា។

ស្ថាបត្យករជនជាតិហូឡង់ Koen Olthuis និងក្រុមការងាររបស់គាត់នៅ Waterstudio បានរចនាផ្ទះទាំងនេះ។ ក្នុងចំណោមផ្ទះគំរូទាំងអស់របស់ក្រុមស្ថាបត្យករខាងលើ SeaPod, GreenPod និង EcoPod ត្រូវបានគេចាត់ទុកថា លេចធ្លោជាងគេ។ SeaPod ត្រូវបានរចនា និងសាងសង់ឡើងដើម្បីរស់នៅក្រោមផ្ទៃទឹក។ ចំណែក GreenPod គឺសម្រាប់ប្រើប្រាស់នៅលើដី និង EcoPod គឺជាជម្រើសមួយល្អសម្រាប់បរិស្ថាន និងសេដ្ឋកិច្ច។

និយាយអំពី SeaPod ៖ វាគឺដែលជាគំនិតរបស់ Rudiger Koch ប្រធានផ្នែកបច្ចេកទេសរបស់ក្រុមហ៊ុន Ocean Builders និង នាយកប្រតិបត្តិ Grant Romundt របស់ក្រុមហ៊ុននេះ។ SeaPod ត្រូវបានចាត់ទុកថាជាដំណោះស្រាយសម្រាប់បញ្ហាខ្វះកន្លែងទំនេរសម្រាប់រស់នៅលើឆ្នេរសមុទ្រល្បីៗ។

August 18, 2022

ការដោះដូរទំនិញរវៀង កម្ពុជា និង អាម៉េរិក ក្នុង ៧ ខែដើមឆ្នាំ ២០២២ នេះ សម្រេចបានជិត ៦ ពាន់លានដុល្លារអាម៉េរិក

ការនាំចេញទំនិញរបស់ កម្ពុជា ទៅកាន់ សហរដ្ឋអាម៉េរិក ក្នុងរយៈពេល ៧ ខែដើមឆ្នាំ ២០២២ នេះ បានកើន ៤៧.៣% ធៀបនឹង ៧ ខែដើមឆ្នាំ ២០២១។

ដោយរួមចំណែកប្រមាណ ៤១% នៃតម្លៃនាំចេញសរុប ១៣,៧៦៩ លានដុល្លារ ក្នុងរយៈពេល ៧ ខែដើមឆ្នាំ ២០២២ នេះ សហរដ្ឋអាម៉េរិក គឺជាទីផ្សារនាំចេញទំនិញធំជាងគេរបស់ កម្ពុជា។

ការនាំចេញមុខទំនិញរបស់ កម្ពុជា ទៅកាន់ សហរដ្ឋអាម៉េរិក សម្រេចបាន ៥,៦៩៥ លានដុល្លារ ក្នុងរយៈពេល៧ ខែដើមឆ្នាំ ២០២២ កើន ៤៧.៣% ធៀបនឹង ៧ ខែដើមឆ្នាំ ២០២១ ដែលមានប្រមាណតែ ៣ ពាន់លានដុល្លារ។ ការនាំចូលទំនិញពី សហរដ្ឋអាម៉េរិក របស់ កម្ពុជា ក្នុងរយៈពេល ៧ ខែដើមឆ្នាំនេះ សម្រេចបាន ១៩៦ លានដុល្លារ កើន ៣.២% ធៀបនឹង ៧ ខែដើមឆ្នាំកន្លង ដែលសម្រេចបានតែ ១៩០ លានដុល្លារ។

មុខទំនិញសំខាន់ៗដែល កម្ពុជា បាននាំចេញទៅកាន់ សហរដ្ឋអាម៉េរិក មានដូចជា ផលិតផលវាយនភណ្ឌ សំលៀកបំពាក់ ស្បែកជើង កាបូប បន្ទះសូឡា និងផលិតផលកសិកម្ម ខណៈមុខទំនិញសំខាន់ៗដែល កម្ពុជា នាំចូលពីសហរដ្ឋអាមេរិក មានដូចជា រថយន្ត, គ្រឿងចក្រ, គ្រឿងអេឡិចត្រូនិក ឱសថ និងបរិក្ខារពេទ្យ។

August 18, 2022

ជប៉ុន ផ្ដល់អាហារូបករណ៍ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ដល់និស្សិតកម្ពុជា

ដំណឹងស្ដីពីការផ្ដល់ អាហារូបករណ៍ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ទៅសិក្សានៅ ប្រទេសជប៉ុន ក្រោមគម្រោងអាហារូបករណ៍របស់ប្រទេសជប៉ុន សម្រាប់ការអភិវឌ្ឍធនធានមនុស្សនៅប្រទេសកម្ពុជា (JDS) សម្រាប់ឆ្នាំ ២០២២ ត្រូវបានផ្សព្វផ្សាយនាពេលថ្មីៗនេះ។

បញ្ជាក់ ៖

-ផុតកំណត់ទទួលពាក្យ៖ ថ្ងៃទី ២៥ ខែតុលា ឆ្នាំ ២០២២ ត្រឹមម៉ោង ៣:០០ រសៀល
-ព័ត៌មានបន្ថែមសូមទំនាក់ទំនង Email ៖ [email protected]
-ទាញយកឯកសារ៖ https://jds-scholarship.org
-ដាក់ពាក្យស្នើសុំនៅ៖ ការិយាល័យ JICE-IDS អគារ AURA Condominium ជាន់ទី ៣ ផ្ទះលេខ ៨៧ ផ្លូវលេខ៦៣ សង្កាត់បឹងរាំង ខណ្ឌដូនពេញ រាជធានីភ្នំពេញ (វិថីព្រះត្រសក់ផ្អែម)

សម្រាប់លក្ខខណ្ឌនៃការជ្រើសរើស ក៏ដូចជាព័ត៌មានលម្អិតសូមអានសេចក្ដីជូនដំណឹងរបស់ ក្រសួងអប់រំ យុវជន និងកីឡា ដែលមានដូចខាងក្រោម ៖

August 18, 2022

ជប៉ុន ផ្ដួចផ្ដើមបង្កើតយុទ្ធនាការទាក់ទាញប្រជាពលរដ្ឋឱ្យ «ផឹកស្រា» ឡើងវិញ ដើម្បីសេដ្ឋកិច្ចជាតិ

រាជរដ្ឋាភិបាលជប៉ុន បំផុសឱ្យមានការប្រកួតប្រជែងទូទាំងប្រទេស ដើម្បីជាការអំពាវនាវដល់មនុស្សពេញវ័យ លើកឡើងនូវគំនិតដែលជួយលើកទឹកចិត្តដល់ពលរដ្ឋ ឱ្យប្រើប្រាស់ភេសជ្ជៈមានជាតិអាល់កុលឱ្យបានច្រើនជាងបច្ចុប្បន្ន។

យុទ្ធនាការ Sake Vival! ដែលលើកឡើងដោយអគ្គនាយកដ្ឋានពន្ធដារ (NTA) ស្នើឱ្យពលរដ្ឋដែលមានអាយុចាប់ពី ២០ ទៅ ៣៩ ឆ្នាំ ចូលរួមផ្ដល់មតិសម្រាប់ការស្ដារតម្រូវការលើភេសជ្ជៈមានជាតិអាល់កុល ដែលបច្ចុប្បន្នជាទំនិញលែងមានការពេញនិយម ដោយសារតែយុវវ័យបានប្ដូរផ្លាស់ផ្នត់គំនិត ចំណែកប្រជាជនក៏ផ្លាស់ប្ដូរទម្លាប់រស់នៅ ក្នុងសម័យកូវីដ-១៩។

ព្រឹត្តិការណ៍ប្រកួតប្រជែងដែលចាប់ផ្ដើមពីថ្ងៃទី ១៤ សីហា ដល់ ៩ កញ្ញា អំពាវនាវអំពីមានការ «ច្នៃប្រឌិតចំពោះភេសជ្ជៈមានជាតិអាល់កុលថ្មី» ក៏ដូចជារកវិធីដើម្បីបង្កើនការប្រើប្រាស់ផលិតផលនេះនៅតាមផ្ទះ។ បេក្ខជនដែលចូលរួមប្រកួតក៏ត្រូវបានលើកទឹកចិត្តឱ្យស្វែងរកវិធីលក់ទំនិញប្រភេទនេះនៅលើថ្នាលបច្ចេកវិទ្យាផងដែរ។

អ្នកដែលបានចូលដល់វគ្គផ្ដាច់ព្រ័ត្ររបស់ព្រឹត្តិការណ៍ប្រកួតប្រជែងនេះនឹងត្រូវបានអញ្ជើញឱ្យចូលរួមពិធីប្រគល់រង្វាន់នៅ តូក្យូ នៅថ្ងៃទី ១០ វិច្ឆិកា។ អគ្គនាយកដ្ឋានពន្ធដារ ឱ្យដឹងថា ពួកគេនឹងជួយជ្រោមជ្រែងក្នុងការធ្វើពាណិជ្ជកម្មទៅលើគំនិតនានាដែលទទួលបានជ័យលាភីក្នុងការប្រកួតនេះ។

ក្រសួងសុខាភិបាលជប៉ុន បានបញ្ជាក់ថា ពួកគេសង្ឃឹមថា យុទ្ធនាការខាងលើនឹងរម្លឹកគ្រប់គ្នា ឱ្យ «ផឹកស្រាក្នុងបរិមាណសមស្រប»។

ពន្ធលើស្រាបៀរនៅ ជប៉ុន មានចំណែក ១.៧% ក្នុងថវិកាសរុបដែលប្រមូលបានពីពន្ធដារក្នុងឆ្នាំ ២០២០ ថយចុះពី ៣% ក្នុងឆ្នាំ ២០២១ និង ៥% ក្នុងឆ្នាំ ១៩៨០។ ប្រាក់ចំណូលពីពន្ធលើស្រាបៀរក្នុងឆ្នាំ ២០២០ បានថយចុះជាង ១១០ ពាន់លានយេន (៨១៦ លានដុល្លារអាម៉េរិក) ធៀបនឹងឆ្នាំ ២០១៩ មកនៅត្រឹម ១.១ យេន (៨.១៦ លានដុល្លារ) នេះបើតាមការបញ្ជាក់ពី NTA កាលពីដើមខែសីហា។ យោងតាម Japan Times នេះគឺជាអត្រាថយចុះខ្លាំងបំផុតក្នុងអំឡុង ៣១ ឆ្នាំកន្លងនៅ ជប៉ុន៕

August 18, 2022

Category: សង្គម និងសេដ្ឋកិច្ច